Saidingpuii 2

DR. SAIDINGPUII (2)

Ziaktu: Toni Râlte

(Adds mawlh kha ❤

Thawh ka hai ve tehkhiah! Engdang vang a ni lo. Mut than lohnaah ka mu a, zing dar 2 thleng video ka en pek alawm. Ka thawh chuan dar 8 a lo ri tawh. Nuam lo ka ti ve deuh. Nu Sangi'n min lo be nghal bawrh bawrh a, Saidingi pawh ka la hmu lo. A la tho bik lo a ni maithei. Tihtur em em a awm bawk si lo, Valtea nen motor kan sil ta ringawt. Tukthuan chu dar 9:30-ah kan ei a. Ka riltam a pel laklawh a, ka duh ang pawn ka ei tam thei lo. Saidingi nen kan chhuak leh dawn a, kan khaw damdawiin lama mamawh kan lam kual dawn a ni. Dar 11 ah kan chhuak a. A nalh lehpek reuh hle. Aizawl zin ka ninna chu traffic jam reng hi..vawiin pawh kan tlai phah viau mai. Damdawi lam pawh kan la thahnem hle. A hmelhriatte vek an nih hmel, an inbe bawrh bawrh mai. Chawhnuah Restaurant-ah kan chawl a. Nizan thilthleng kha chu hre tawh lo ang maiin a awm. Mahse, kan thil chah lo thlen hma chuan, "Nizan kan thawm kha i hria em?" a ti ta a. 

"Hria e" ka ti hmiah. Ka hre miau sia lawm.

"A zia lo khawp mai..ani kha ka pasal hlui chu a nia" a ti ta mai a! Eheu! Nuthlawi a ni tih ka hre reng reng hleinem. Ka makti hmel a hmuh chuan a khi sak a, "Ni e, nuthlawi ka nia lawm. Fa erawh kan nei lo. Thla hnih kan innei a. Ka then ta mai a nih kha" a ti leh a. Sawi ve tur ka va haihchham tak, "A va zia lo ve aw" ka'n ti ngawt a. 

"Amah vanga ka tawrhna te kha hunin amah a pelet ve leh tawh a, ka hawn chang chuan a rawn kal ziah..ka haw tihte hi engtin nge maw a hriat thin ni" a ti niah niah a. 

Inthlahrung takin, "Ti nge in inthen?" ka ti a. A kun chhal a, eitur an rawn dah chiah bawk. A chawk rak rak a. Min en miah loin, "Nupui i neih zanah i nupui chuan mipa dang mutpui nghal se engtin nge i hmachhawn ang?" a ti ta a. Mi den dan a dang deuh. Chutiang chu maw a lo tawrh tawh. A va na dawn ve le aw. 

"Na ka ti ngawt ang. Ka then nghal bawk ang" ka ti nghet charh a. 

Min rawn melh kiau a, "Thla hnih hun ka la pe hram a. Mahse, a sim duh tak loh vangin ka haw leh ta a ni. Mahse, mi zawng zawngin min dem rawn thung. " a ti a. 

"I tihtur dik tak i ti a nih chu, a mak hle mai. I pasal chu" ka ti a. A ngawih tak daih avangin kei pawh ka tawng zui tawh lo. Kan chawlh zawhah , "Lalsavunga park-ah i va kal ang hmiang. Ka tlawh khat tawh a, ka kal chak" a ti a. A la hma ve deuh bawk nen, mahse, ka la kal ngai loh avangin kalkawng pawh ka hre lo. Amah chuan min hrilh chawp zel a. Kawng a chhe angreng si, a chep bawk nen, kan tlan rei zêk a. Hei hi ka vei zawng tak a ni. Hetiang mipuite lehvahna leh intawllenna panna kawngte hi chu sawrkar lam pawh hian ngaihsak deuh se, kawngte hi zau ve deuh leh tha ve deuh ni thei se a lawmawm lehzual ngawt ang. Lenvahna tur a vàng ropui si. A hmun kan han thlen chuan nuam ka ti phian a. Hmun thengthaw leh mi tlem deuhna lai kan pan a. A bag chu a zen rak rak a, Zu um a rawn rekchhuak nawlh. Dispo cup pawh a keng thlap mai. A sehhmeh a tan bawngsa roast a pai tát bawk. 

"Driver i ni a. Driver angin awm ang che. " a'n ti nghal táwng bawk a. Eng rilru nge maw pu tura min ngaih le. 

"Ka hria lawm" ka ti ve mai a. Zu chu a thli a, no khat chu a thawk khat piap. Thil dang ka melh lui vak vak ringawt. 

"Ih maw, Ruatpui,. Pathian hi a awm i ring em?" a ti ban chhalh a. A zawhna hi a dangdai thei!

"Ring e, a awm bawk" ka ti nghut a. 

"Awm nise nasa taka ka auh lai khan ti nge chet a lak loh le..a laka beidawng turin min siam a, min dem ngawt thei lo" tiin a intlawhkhalh a. 

"Kan tawngtaina zawng zawng hi chhan vek a ni ngai lo alawm. Mahse, kan tana tha tur vek a ni tho zel" ka ti ve luam a. A ner sak.

"Ka hun paltlang i hre lo a nih kha" a ti nghat a. 

Ngeiawm chhuahin, "Min hrilh lohte chuan hre nang" ka ti zauh a. 

"I hriat tur chin aia tam mah i hre tawh zawk" a ti leh hmak. A kai deuh tawh niin ka hria. Ka tilui chak ve deuh tlat , "Ka zawt hleinem che" ka ti puat a. 

"Awii..khu Johny-a.." a ti thut. A melhna lam chu ka zuk en ve a. Mipa lian lam, kan intiat viau ang. Mahse, kei ai chuan a sa a tha deuh, hmelchhe lo tak hi kan awmna lam panin a rawn chho mek a. A hmelah thinrimna erawh a lang hran lo. 

"Insual a ngaih pawn dim hlek suh ang che" Saii chuan a ti sap a. Ka va melh káwk ringawt. 

Johny chuan kan bul a rawn thleng chho a, "In va nuam tawh awm ve..kha" ti el rawngkai miah lo hian a ti a. 

"Nia..lo thu ve rawh" ka ti sup a. Saidingi bulah chuan thuthmun a rem ve a. Saidingi erawh a tum hmak mai. Biak a huphurhawm ngawih ngawih. 

"Duati, zu hi chu in tawh lo la..doctor i ni sia, i damlo te tan i thlamuanpuiawm loh" nem duai hian a ti a. 

"Ka thu thu" tih chu a chhanna dawn a ni. 

"Nia ka hre tho va, mahse, i tana tha tur ka duh vanga sawi ka nia. " dawhthei zetin Johny chuan a ti leh a. 

"Johny, khawngaihin i hmel hi ka hmaah rawn lan tawh lo teh. Engtikahmah ka ngaidam dawn lo che. Min beisei tawh suh, khawngaihin" Saidingi aw chu a fiah kekkawk hle. Johny chu ka lo khawngaih lek lek hman. Mahse, beidawng hmel a pu hauh lo thung. 

"Engtikah emaw chuan min la ngaidamin min la pawm leh em em ang. Min hmangaih êm kha" inringtawk zet hian a ti a. 

Za lo zeta nui hul hakin, "I mumang a nih chu..Hei Ruatpuia nen hian nakkumah kan innei dawn. Ka bialpa hi hmelhriat ve reng reng rawh" a ti hmiah mai. Ka lo hamhaih thung. 

"Ani te chu i driver alawm. Mahni driver i neih mai ten le..an hmuhniam lutuk ang che" a ti a. Tlemin mi nghawng deuh. Driver a ngaisang lem lo tih a hriat hle. Ka tawng chuan ka tawng na palh ang tih ka hlauh vangin ka ngawi ta zawk a. Saidingi mitmeng erawh a alh ta phat mai. 

"Ve khanglang che chuan, Driver chu i va hmusit awm ve a. Eng nge i nih? Johny, engmah i ni lo. Driver pawh i tluk pha lo. Nupui neih zana hmeichhe dang mutpui thei aia mipa hmuhsitawm an awm em ni? Tenawmpa, kal rawh" a ti khur hlawk hlawk a. Bengdaih a ngai ta in ka hria. Ka tho vut a, a banah ka va hmer a, "Duhtawk rawh. Kal ang" ka ti nghut a. 

Johny chu rawn ding vein min melh run run a. Thinrimna a lang tan ta, "Ani hi i kut hmawr pawn khawih hlek suh. I khawih phak a ni ve lo, nang thingtlang tlangval driver satliah" a ti ham ham mai. Ka ngeng a chhun ve ta deuh, inhmuhsitna hi chu tu tan pawh dawnsawn nuam a ni lo. Eng mi pawh ni ila..ka tawng hmain Johny biang chu a ri thlawp. Saidingi'n a beng! Johny chuan chet a lak chuan ka che ve ang tih rilru puin ka inring ran a. 

"He pa vang hian min beng a maw?! Duati, i va danglam ta ve" Johny aw chu a khur lek lek. 

"Aw..he pa hi ka pasal tur a ni. Khatia hmusit taka i tawngkhum tur a ni hauh lo. Nang ang sang sawm ai pawn ka thlang zawk aw" a ti ram hmak hmak a. Min rawn melhin, "Kal ang" a ti sap a. A zu um vel chu a khung rawk rawk a, ka kai a, kal mai kan tum lai chuan Johny chuan ka kawr hnungah a rawn tham a. Ka ding chawt. 

"Zawng khawro, ka nupui hi nanga khawih phak a ni lo" tih leh ka tukhuma rawn ben a rual a. Mipa inti ve tana tukhuma inben tlawmthlakzia hi mipa bawkin an hrethiam ang. Ka inher a, "Thianpa, i ti mah mah aw" ka ti nghut a. Cho zeta min rawn melhin, "Ani hi ka ta a ni" a ti salh a. Rum nghut chungin ka dinchilh rap, Insual mi chu ka ni lo. Mahse, motor ka khalh lai khan ka driver pui thenkhat phawkhawhraw ve tak tak an awm a, han inphek sual changte a awm cháwk zel a. Johny hi ka hlau bik hauh lo mai. Saidingi chu kan sirah khawng zetin a ding ran a, insual se min tih hmel tawp. Johny chuan min rawn hnek tumin a ban a vai fua a, ka lo mansak chawt. A mita melh ran chungin, "Ti tak tak ang aw" tih leh ka kut veilama hnek ka rual a, a bek a ri no chhawk mai. A pai deuh uan uan a, a tlu êm lo ve. Posi a la vat a, Saidingi'n, "Ruatpui, na lua awm loin aw" a rawn ti vawt raih. He hmeichhia hi a 'man' tlat! 

Johny chuan min rawn bawh ruak a, ka per sawn hman, a kun lai takin ka kiuin a hnungzangah ka nghawk dawt. A tlu bawkkhup ta zuah a. Mahse, a tho rang kher mai. "Thingtlangpa leh" a ti sup a. Ka lo nuih suk. Ka ning tan, tukzal deuh a ngai niin ka hria. Kei aiin thahrui a ngah lo tih ka chiang ngam tawh bawk a. Ka cho sárh tawh. Ka bekah a rawn hnek thawi fua a, a na lem lo. Min rawn pan min hnek a tum lai takin a hmaiah ka theihtawpa nain ka hnek ta a. A hnar a thi nghal záwih mai. A thal ta huang a. Park-a hnathawkte an rawn lang a, min thelh ta si. Ka khawih nawn ta lo. Saidingi ka kai lawk a, kan kal nal nal. Hawn lamah kan inbe mang lo, a thinrim a, kei pawh ka thisen a lum hman avangin sawi tur ka hre lo. An in thlen dawnah erawh, "Ka lawm e aw" a ti sap a. Ka melh zauh ringawt. 

Zanriah ka ei puar leh hle. Valtea leh a thiante nen an in chung zawlah kan titi ho a, Valtea hi ram lama chettlat nuam ti deuh mai a lo nia. Kan khaw ram leh sa kah tur a la tam thu ka sawi chuan a phur khawp mai. "Ka rawn zin ve teh ang. Kan ramvak dawn nia" a ti sauh sauh a, a thianpa Puia pawh chuan a lo chàk sakhai ve bawk. Nuam an ti phianin ka ring. Dar 9 rik hma deuhin ka mu a, Hlimi nen kan inbe zuai. Zep nák emaw sawi tur hi ka'n hre lo laileng thin khawp a, amah zawk hian titi a vawrh loh chuan lungtum ka ni ringawt. Kan incall zawha whatsapp ka luh chuan Apuii'n , "U, i nute an lo leng a, an haw chiah. Rawn hmuh che a tum a" a rawn ti a. Ka ner sawk. 

"Nu ka nei lo, mate" ka va ti a. 

"A inchhir ve deuh niin ka hria a, i pa te kha a rawn rál hnuhnawh vel a" a rawn ti leh a. Ka hrawkah min hnawh, ka hnukulh vang lam ni loin ka pa ka mitthla vang zawkin. A nat tak tak tawh hnu, tawngvaih a chin lai khan vawi hnih hi ka nu hming a lam a ni. A hun tawp thleng pawha phatsan miah lotu ka pa khan ka nu hi a lo va hmangaih awm em ve aw ka ti nghe nghe. A thih nia an chhungkua bakah an chhungkhat hnai tumah an rawn lang ve lote kha khaw pum titi a tling a nih kha. Khati taka ka pa duh lo va hnawltu te khan ka pa aia tha leh fel makpa an nei chai bik si lo. An fahrah vanga hnawltu te kha chhungkaw awhawm tak an ni ta hauh lo bawk. Tuna ka nu pasal pawh hi mistiri an tia, mistiri ka hmuhniam ni loin ka pa pawn mistiri hmuh ang zat pawisa chu a thawk chhuak ve tho asin le. 

"Ka ni ten an lo dawngsawng tha em?" ka va ti a. 

"Apa chuan a be hurh hurh mai. Mi hmai êng zah chi a ni bawk nen, anu tak chuan a be mang lo. A la ngei ve a niang" a rawn ti a. Pa Rema chu ka dem hran lo, pa tha duam mai tu pawi mah sawi ngai lo a ni miau a. Ani talin a lo biak that ve kha a ngai ve bawk alawm. 

Hlimi msg pawh a rawn thleng leh zat, "Lo haw tawh ula ka ti.." tihte mai hi. 

"Nia, kei pawh ka chak tawh" ka tih khawmawi ve kha. 

Ka va duh huam lo naa, mi fel tak nupui atan pawh tling leh tlak nia ka hriat vang a ni. Ka ni min zilhna ka la hriatreng chu, "Nupui pasal atana in duh loh tur chu ngaihzawn pawh ngaihzawn loh tur. Laklawh te a awm thei" tih hi. Chuvang a nia hei chen ngaihzawng nei lo va ka la len ni. Ka mit a sang hran lo naa, nupui atan chuan in chhungkhur chet peih, mipa zahthiam hi ka zawng ve hram hram thin. Tin, hmeichhia ka rim ve te hian a rukin an in leh lo hi ka chîk ve nasa thin. Hmeichhe che fel leh fel lo hi chu han lenluh hian a hriat khawp mai. Kan unau ti tawh mai ang, ka ni fate hmeichhia vek an nih vang hian ka ni te hian in hrang ka chan hi an remtih pawh ka ring chiah lo. An ni nupa enkawl ngai bawk nen. 

"Ruatpui, i roomah khan ka zu in bang kha ka dah a, ka nu ten ka room an rawn luh ka hlauh vangin. Min rawn pe lawk mai teh a " Saidingi msg! A va buaithlak thin e aw. Ka zawng vut a, ka hmu mai si lo. "Khawi laiah nge i dah?" ka han ti. 

"Almiraah khan" a rawn ti ta a. Ka en vat, a lo awm rum a. Ken lan vút kha a mawi chiah si lo, engtin nge niang aw. Bag lah a awm bawk si lo. Ka ngaihtuah nasa mai a..bangla blanket ka sin loh an dah tel chu ka bat ta hlun a, zu chu ka pawm titih. Ka chhe ngawt ang. Ka va chhuah chuan U Pari leh a bialpa an lo la meng a, min en lem lo. In chung ka chhoh dawn chuan, "Ngati nge Ruatpui" a lo ti a. 

"Piin min ko a" ka ti sup a. Ka pen chho páwk páwk. Saidingi room chu a thlang lam berah a awm a. Ka kik karh karh a. A rawn hawng vat. Min hmuh chuan ka inthuam dan zawng zawng vang nge a nui hawk a, kei pawh ka nui. 

"Kha" ka ti a. A la vat. 

"Thu ve rih rawh. Zu in chuan kawm tur ka duh thin" thupe aw deuh si hian a ti a. A room chu zau tak a ni lo naa, engkim chu a dahna hmun turah a awm thlap vek mai. A rimtui chêk chêk bawk. Khum epa sofaah chuan ka thu a. Kawngka a kalh a, zu chu a thli nghal. A bag a zen rak rak a, sunhlum pum thum a phawrh nawlh. A sehhmeh dawn a ni ngei ang. A tlak pawp a, "I nute hian i in tih an hria em?" ka ti a. A lu a thing nar nar, "Ka pa chuan min hlap duh ang" a ti a. A ner sak bawk. 

"An hriat hmaa nghei a ngai a nih chu" ka lo ti vat. 

"Ninawm" a ti hlak a. Ani zu in hi chu vawi khatah tam deuh a in ngai lem lo. Mahse, zu in a ni tho tho. 

"Hlimi nen chuan in ni ta mi?" a ti daih a. 

"Umm" ka ti ringawt. 

"A fel alawm. Nupui tlak ka tih kha" a ti leh a, "Nia a fel ka ti" ka ti ve leh ringawt. 

"Nang pawh bialpa nei la" ka ti nghal zat a. A khi sak, "Ka peih mai mai lo" a ti nghat a. A mitmeng a de sawr sawr mai. 

"Chhuk tawh rawh. Keimaha awm ka duh" a ti leh thut a. A nelawmna a bo leh vek tawh. Min va tihrilhhai thin tak. Ka tho vut a, "Muttui aw" ka ti a. Min chhang lo. Ka chhuk ta nghal a. Ka mutchhuak a reh vek. Video bawk ka en leh ta a. Ka en laiin ka lo mutthilhsan daih. Thawh ka hai tawh êm lo ve. Mahse, thawh hma pawn tihtur a vang thei e. Patea te va tlawh zuai ila a tha ang ka ti a. Tukthuan kan ei hma ngai chuang lo bawk nen, Nu Sangi bulah ka sawi a. "Ee..va kal rawh va kal rawh" a ti sawk sawk a. Doctori pawh rawn lem loin a motor chu ka hmansak ta a. 

Patea ten min han hmu thut chu mak an ti hle, ka hrilhlawk bawk si lo. An nu Nu Dini pawh chuan min lo be ve sawk sawk a. Chaw ei turin min sawm ngial naa, ka hnar thei hram. An fate nen hian kan inpawh vak lo. Apuii te nen pawh an inpawh em em lo. An induh ve deuh bakah an inla changkang ka ti mai. Kan mizia nen a inmil lem lo bawk a ni. Patea chuan, "Hetiang ringawt lo hian he lamah rawn awm la, taxi ka lei ang a, khalh la, i tuak ve ang a. Nangma puala i neih hunah duh leh in hrangte i chang ve ang a. In khuaa awm reng chuan hmasawnna a awm lo a nia. Nupui nei rual in ni ve tawh bawk nen" a ti chuar chuar a. Mi hi chu a ngaihtuah ve reng. 

"Ka ni ten an remti lo vang, bakah kei pawn kan khaw pemsan saw chu ka hreh" ka ti a. 

Chutihlai tak chuan Nu Dini chhungte lam an rawn kal a. Nu Dini chuan a lo dawngsawng tha ngei mai. Min rawn en a, "Ruata, i awm remchan lai hian vawksa va lei lawk teh a..hei i pi te hi an rawn thleng thut sia..chawhmeh kan lo nei tha vak si lo va" a ti a. 

"Aw le" ka ti a, ka tho nghal bawk. Pawisa min pe a, ka chhuah dawnin Patea chuan,"Tlai lamah kan hmehpui mai dawn alawm. Tuna tih chung chung kher" a tih chu ka hre hman. Sawi tawh angin ka lehkha zir lai khan Nu Dini u fa kha a awm ve a. Kan inrual khat viau. Mahse, kan inlal hleih êm a, patea hlawh a la tlem ve si,. Vawi khat phei chu Nu DIni'n an khua ami chawhmeh zawrh tur a chah a. Aman a zuar dawn emaw tih laiin, "Ruatpui, nang va zuar rawh" min ti daih a. A fate leh a u fa pawh an awm ve reng sia. Rilru na ru deuhin êm in ka phur chhuak a, veng chhung ka suartluan a nih kha. Tui kan dawng tha vak lo thin a, kan kawmthlang lawkah tuikhur a awm a, lehlamah kan zia phah thin. Tui neih tam lai pawn a fate bakah an nupa thawmhnaw, a u fa thawmhnaw thlengin ka school banah min suktir thin. Vawi khat phei chu tuikhur piah lawka awm an pitar hian, "Bawiha, tui connection in nei lo em ni? Bakah farnu i nei lo nge? Ti nge nangmah hlir i rawn insuk thin" a ti nghe nghe. Ka inkhawngaih vangin ka mittui a hnám sawk nghe nghe a ni. Tin, vawk kha an vulh bawk a, an vulh ka ti naa ka vulh ni mai awm a ni. Zingah hma tawkah ka tho a, vawk chaw ka chanin ka chhum a, School bana ka insuk loh tlaiah vawk chaw ka zawng leh bawk. An fate pawn awmpui treat khan min treat rêng a, an demawm loh, an nu ber min enkawl dan khan a zir lo miau a. A u fapa Tluanga pawh khan min tham lo thin viau. Chawlhni tukah bak sa kha kan hmeh ngai lo va, ráwp a lo na ve thin bawk nen. Sa hmeh nia chaw ka han ei tam deuh te khan, Tluanga chuan, "Ruata hi chu zo khua tih takah sa hmeh ni hian i ráwp tih a hriat theih eee" ti ten min tawngkhum thin. Mahse, Patea awm lai chuan Nu Dini pawn min tichhe ngam bik lo. Thleng kha tlai lamah chuan ka sil ngei ngei a, zingah chuan school kal nen ka hman bik lo a. Zan khat ka la hre reng, School atangin ka khawsik vangin ban hmain hawn ka dil a, ka haw a. Ka mu nghal daih. Nuteii ang ri pawh ka hre reng, ka tho peih ngang si lo. 

Zanriah pawh ka ei peih lo va, Patea'n damdawi min rawn pe a. Ka mu char char. Damdawiin min han chhawk takah chuan ka va inthiar a, ka insilfai nghal bawk. Thleng chu sil lohin an lo la dah vúm thúr mai a. Ka eina a nih loh bakah khawsik ka nia, sil ka tum bik lo. Dar 9 vela Nuteii leng rawn haw chuan thleng chu a rawn hmu ta a. Min rawn ko tuar tuar, ka va chhuak a. Thinrim zet hian, "Ti nge thleng saw i sil loh a?" a ti a. 

"Ka khuasik a, bakah ka eina a ni lo bawk a. Mi dangin an sil ang chu ka ti" ka ti mai a. 

"He inah hian a thlawnin i awm tih hria la, i tihtheih ang chu i tih zel a ngai. Va sil rawh" min ti ta a. Tluanga leh a fate chuan tv an en. Mittui tling teuhin ka va sil ta a, Patea a rawn haw hlauh. Ka thleng sil min hmuh chuan, "Ngati nge khawsik chung ten thleng i sil a. Dah rawh. Dini, va sil ta che u, ngati nge insiltir" a ti vin thak mai. 

"In silfai thiam lo, ka lo sil ang a ti tlat a nih kha" Nuteii chuan a ti ta a nih chu! Ka insum zo ta ngang lo va. "Nute, dawt muhlum hi chu sawi lo ang u. Va sil rawh min tih vanga sil ka nih hi. " ka ti ve ta ngat a. Patea a têk ngang mai. 

"Tluanga te, Veni te pawn eng nge an tih? Engvangin nge Ruata hi engkim i tihtir a, ka fapa a nih hi hre rawh. Zahpuiawm lutuk. Tun atang chuan hre rawh u. Zanriah eina hi Tluanga leh Veni'n an insil chhawk tawh ang. Tin, Ruata hi vawikhatmah insuktir tawh bawk suh ang che. Mahni thawmhnaw bal chu mahni vekin kan su tawh ang. Chu chu thutawp a ni. In hria em?" a ti ta hmiah mai a. 

Nuteii chuan, "I u fapa vanga khatia thinrim vak kha eng nge a tulna? Tih tak takah chuan a hrawk kan chawm a, a school mamawh zawng zawng kan tum bawk a. A tihtheih tawk a ti ve ang chu" a ti hlaih hliah a. 

"Mi chhang tawh suh. He ina la awm in duh chuan ka sawi ang chuan ti ula a ni mai. Tluanga pawh hmanniah ganja in lo zu a, Sena nuin min hrilh leh a, School tlanbo te i lo ching lehnghal. Hetia i awm dawn chuan ka inah i awm thei lo vang. Sim hmak ang che" a ti ta nghut nghut a. Tumah kan tawng ngam tawh lo. Thleng chu a laklawh tawh vangin ka sil zo ta tho va. Ka mu nghal daih. A tuk atang kha chuan patea thu angin kan kal ta a. Lehlamah Nuteii pawh an khuaah awm se an khawsa thei fahran bik si lo va, Patea then chu a hlau viau ang. Kei chu min be lo rei khawp mai. Pawi ka ti lem lo. Khatiang vel kha a nia kan inenkawl dan. Han awm rengna chi ziazang kha a ni tlat lo a ni. Khawpuia chhiahhlawh ang maia awm ai chuan thinhtlanga fapa duat nih kha ka thlang var var..ka inchhir eih lo bawk. 

Sa chu ka khai haw a. A hma tawh lo bawk nen, Nu Sangi ten min lo nghak ang tih ka hlauh vangin tlawh leh intiam chungin ka haw phei leh ta a. Garage-a motor ka dah luh hnua ka chhuak leh chiah chu Saidingi nen kan inhmachhawn thut. Ka phu uih nghe nghe. A mitmeng a thim khap mai a, lungawi lohna a nei chiang lutuk.

"Ka driver i nih avang hian i duh duhnaah ka motor hi i hawl chhuak thei tihna a ni lo a nia" a ti chang rât a. Ka hamhaih deuh. 

"Ka tihpalh" ka ti sup a. 

"Hrereng tawh ang che. " a ti leh nghat a. A kal zui nghal. Zep loh chuan ka lawm vak lo, nia ka motor a ni lo. Ka dik lo tih chu ka hre tho, min hnuaichhiah lu deuh em ni aw ka tia..ka umzui vat. A banah ka va chelh a, a rawn hawi let rang kher mai. Ka wallet phawrhin Rs. 500 tlang ka la chhuak a. "Ka hausa lo naa, hei hi i phalna la lo va i motor ka hman avangin petrol man ni rawh se" ka ti hul hak a. A kutah ka hmehbel a, in chhungah ka luhsan daih. Mak a ti ve deuh maithei a ni. Tukthuan pawh a ei lo. Kei erawh ka thinrim deuh nen ka ei leh ngheng mai. Nu Sangi hi eisiam a thiam khawp mai. Valtea'n ,"Ruatpui, vawiinah eng nge in tih dawn? Tlawngah kan kal dawn a. Lo kal ve ta che" a ti suam suam a. Ka chak ve hle.

"Ka hre lo i u hian engmah a la sawi lo va" ka ti a. 

"Aw..zawt la, in chhuah dawn loh chuan lo kal ve rawh. Nang phei chu len den i hnehsawh dawn a, a hmuna ei tur kan man pawh a hlu..a nuam ve lawm" a ti a. Ka buk khum nghut. Kan ei khamah Saidingi room lam ka pan a. A lo chhuak ve mek bawk. 

"Vawiin lam chhuahna tur kan nei em?" inthunun zetin ka ti a. 

"Nei lo. Nei pawh ni ila mi dang ka khalhtir dawn" a ti a. 

"Aw..a nih chuan Valtea te nen Tlawngah kan kal dawn a nia" ka ti a. Ka inher rualin, "Johny ka lo sawm mai dawn nia" a ti sap a. Ka ding chawt. Mahse, nui luiin, "Umm i thu thu le" ka ti nghut a. Ka kalsan nghal. Johny ber kher! Hmeichheho tak hi chu aw..an rilru hi a lêt ve tak tak thei lo a niang. Kan insiam nghal sawk sawk a. A thiante an lo thleng a, mamawh kan ken nen kan bawr viau. Valtea nen bike-in kan inphur a, mi dang chu motorah an chuang thung. Hmeichhe pahnih an tel ve a, kan vaiin mipa panga leh hmeichhe pahnih kan nih chu. Valtea nen chuan kan titi dun nasa mai a, a tawng duh ve riau a. 

"Ka u hi hrawn a hrehawm ngawt lo maw? A sual reuh sia" a ti thut a. Ka nui huk. A sawi dan teh tawp chu.

"Kan la inhrawn rei lo va ,a hrehawm pawh ka hre lo" ka ti mai a. 

"Johny nen an inthen atang khan a zia hi a danglam vek alawm. Ka pa te pawn tihngaihna an hre tawh lo. An enliam ve tawp tawh. Aizawla thawhte hi a duh lo va, thingtlanga transfer turin a kherh ngat ngat alawm. Mahnia awm hi a duh ka ti mai. Lehlamah chuan a khawngaihthlak" a ti ta a. Ka ngaithla tui kher mai. Hriatchian lehzual ka chak a, a pawi em lo vang chu tiin, "A nih chu aw..a va pawi êm..Johny nen chuan ti nge an inthen?" ka ti a. Saidingi khan a sawi tawh tho naa, mi dang ka atanga hriat ka chak leh mai mai. 

"Johny saw lawm..a tenawm lutuk a, an inneih zante khan a lo riakbo daih a. Thla hnih an inneih chhung khan bialnu a neihsan char char , ka u khan a dawh ve hram hram a. Mahse, limit kan nei theuh a, a tlin ta ngang lo a niang. Johny chhungte lahin Johny an tan tlat bawk si. Ka pa ngaihdan a ni ta bik lo va, sum kan chhuah ta tawp mai ni" a ti ta a. Saidingi chuan dawt a lo sawi lo ve. 

"An va mak bawk ve mawle. Johny chuan an inngaihzawn lai pawn a lo kawp ru reng tawh a ni ngei ang" ka ti a. A hnar ka hnek thi sak tih chu sawi kher tulin ka hre lo. 

"Aw. Kum 2 an inzui ve a, Mi dang ka atangin Johnya'n a kawp tih chu ka u pawn a hre thawi. Johny hi a insawithiam thin bawk si. Bakah i bul a ni tho bawk a, a pawi lo turah ka ngai. Ka u hi a fair ve riau a, Johny nen khan an lo chesual ve a niang. 'Ka chetsualpui tawh a, mipa dang tan chuan ka thianghlim tawh lo alawm' a ti tlat a. Ka nu phei chuan Johny hi a duh vak lo va, hmin vak lo chungin alawm an neihtir.. Johny chuan dan khatnaa inneih a duh a, ka u in, " Kan tlin tawh loh kha. Pathian leh mipui chu bum lo ang" a ti hmiah sia. Hall-ah alawm an inneih" a ti ta mawlh mawlh a. Saidingi ka ngaihdan a danglam ta deuh. Hmeichhe luhlul leh rilru lian tak a ni ang tih hi chu ka rinsa kha a ni hrim hrim a. 

"Mipa hi a ngaihsak leh ta miah lo mi?" ka ti leh a. 

"Teuh lo. A thawhpui Doctor te pawn an ngaizawng ve nasa thin alawm. Engatan mah mipa hi a ti lo ni berin ka hria. A hna hi a tui a, nuam a tia. Ka pa pawn, 'Tihian enliam rih tawp mai ang u. A la tha ve mai ang' a ti tawp alawm.." a ti leh bawrh bawrh a. Ni e, na taka hliam lo tawk tawh tan chuan mipa dang chu ngaihven a harsa rih viau ang le. Ka khawngaih reuh mang e. Thinchhe viau mah se..

Tlawng chu kan thleng thla ta a. Kan phur hlawm viau mai. Khawpui nge nge an polite a, kei pawh min kawm ve bawrh bawrh a, ka inkiltawih rei lo. Teteii leh Thari pawh chuan min be ve siam siam a, an chhe vak lo. An khal dun angreng bawk sia. Thari chu Valtea thianpa Puia bialnu a ni nghe nghe. Lui mawng lamah kan chhuk zel a, vaukam zau laiah chuan kan innghat ta a. Puia hoin nula ten eirawng an lo bawl ang a, keini pali chuan len kan deng dawn a ni. Sangha chu an awm ve nual naa, an lian lem lo. Lenkhang tlem kan zar bawk. Intihlim tura kal kha kan ni bawk a, man teuh kan tum hran lo. Len den na ná na hi chu Pa Rema ka zui nasa bawk a, mahni tawkah thiam ka inti ve khawp mai. Ka han deng tan a, kan man ve leh mai zel a. Thei hnih dawn chu kan man ta. Chakawk hmun a lo awm remchang hlauh bawk a, tlem a zawng ka han sik zawk zawk a, Buar tlem ka la bawk. Chhum pawlh hian a tui ve riau a. Kan han thlen chhoh chuan an ni pawn mei an lo nun tawh a. Dal an lo chhum hluah mai. Alu an lo chan mek bawk. An kang dawn a niang. Kan sangha man kan han bun chhuah chuan thla an han la leh te te a, an status a inang suau dawn a nih hmel e. Dal an chhum tho sia tiin Sangha chu kan bai thak zawk mai dawn mi ka tih chuan, Teteii chuan, "Awii ka chil a pút nghal. Ruata, i bai tui ngawt ang" a'n ti ngawt a. Kan nui dar dar mai. Bai tur chuan ka'n sawngbawl tan a. Hmarcha rep pum an lo keng nual bawk a, a tui ngawt ang. Kan han insil fai te te phawt a. Thla kan la deuh reng mai. An bula awm a nuam khawp mai. Teteii lah hi a nui ring thei mai siah..

"Ruatpui, khaw maw i bialnu pic ka lo en" tih pahin ka bulah a rawn thu a. 

Hawi hú pahin. "Ka nei reng reng lo" ka lo ti. Awih loh hmel deuh hian, "Bialnu i nei lo maw?!" a ti hluai a. 

Hlimi ka hrechhuak zawk. "Aa..neihte chu nei e, a thlalak ka nei lo" ka ti ta zawk a. 

"Nei ve ta che..e chuan number inpe ang, in khuaah te pawh kan la rawn sumdawng thut maithei" a ti sauh sauh a. Ka number ka pe a. Whatsappah min rawn be nghal. Ka lo save ve hmak a. 

Chaw ei hma deuhin an zu ken an phawrh ta a. Min lo thlit kep ve ringawt lehnghal. Ka hnar táng táng a. Thari'n, "In á mi? Mi in luihtir a ngai lo. " a lo ti hlak hlak. 

Puia lah chuan, "Bro, han tem ve chhin reng reng teh. I rui chuang lo vang" tiin min hnawn tlat mai si. Midang lah an lo phur. Mak deuhin an bulah ka thla a muangin han hnar fithla thak kha ka hreh zawk ni, vawi khat na nà na chu ka'n in ve ange ka ti rilru ta a. Mahni inthiam lo ru deuh chungin dispo no khat chu ka thawkkhat ta piap a. Awii a tui lohzia chu..Teteii'n sunhlu min lo pe vat. Ka hmawm thawih mai. Ka pum a ruak nen, a sa thla raih raih mai. Teteii leh Thari pawh chuan an in ve mai a, mahse, tumah rui nawi an awm lo. Polite tawk velin an rui a nih ber chu. Kei erawh no khat lek kha in ngai lo nafam chu ka rui mah mah a, ka'n tawng duh em em khawp a. Teteii ten min nuih min nuih mai. Zuala'n, "Ruatpui, i remhre lo e, Valtea u chu nei daih la, doctor pasal i ni mai dawn alawm. Bem rawh" a rawn ti ta pek! Valtea pawh a nui uar uarah a tang. 

"Ka bem ngam awzawng lo. A thinchhe si" ka lo tih phei chuan an nui tlawrh tlawrh mai. 

Ril a tam tlang tawh bawk a, chaw ei kan rawt ta a. Changel hnahah kan han bun chhuak a, pum a ri ruih ruih mai alawm. Chaw ei chu tui mep mep tak a ni. Hruaia nen hnu kan khar a, Hruaia phei chu kaihthawh a ngai. Sangha phei chu kan ei bang miah lo. Kan ei inna velte chu kan han senghawi a, fai taka hnutchhiahin kan haw chho ta dam dam a. Valtea nen kan inphur tur chu, "Nang hi min tlukpui ang e aw. I rui si" ka ti nghut a. Nui vur vur chungin, "Ka confi daih zawk" a lo ti. Kan tlan haw ta vang vang a. Thlen veleh ka inbual nghal. Ka ni nghulh mai. Ka chau a ni mai ang chu. Ka ní te ka bia a, "Mampui, i nu in i number min dil a. Ka pe dawn em?" a rawn ti a. Ka ning ee..

"Pek a ngai lo, a fapa pawh ka ni lo" ka ti hmuk a. 

"Nia, mahse, han pek loh tawp kha a nuam si lo va" a ti nuah nuah a. 

"Aw i thu thu. Min lo be mah se, ka be peih chuang lo" ka ti leh hmuk. 

"Taka hei Tei a rawn khawtlan ve tlat mai a. An pa farnu nen an lo inbakkaih deuh nitur a ni. A zia lo khawp mai" a rawn ti a. Tei chu ka ni fanute zinga upa ber kha a ni. 

"A va zia lo ve aw, eng nge an buaina ni reng reng a?" ka ti a. 

"Aa..a insawithiam ve te pawh a ni maithei a. Nimin tlai khan i Pa Rema chhungten Sakhi rêp min rawn pe ve a, Tei hian a ei chak ve thei sia, an pa nen ka va sawm a. An rawn ei a. An va haw kha an lo be duh miah lo a niang. Mahse, a dawh ve mai a. Vawiin chawhnu khan Muana farnu Teremi kha pasal nei tawh kha a va leng a. Tei chu a lo khak a niawm e. 'Pasal neih tawhte chuan mahni in lama len zen te, chaw ei zen te hi a mawi lo. I leng tam mah mah' a lo ti ni tur a ni. Ani Kan Tei thinthawk ve ta khan, 'Awi chutiang sawi ngam tur i ni bik lo ve. I pasal te in aiin hetah i awm tam zawk. Tih tak êm ah chuan ka nute tivui khawpin ka leng lo zawk. ' a lo ti ve a niang. An inchhang chho a, Muana nuin Tei chu, " I zak lo em mai, ka fanute khatia i tih ngam. Mo i nih hi inhre rawh. He inah hian engmah thu i nei ve lo" a lo tia. A la na ta êm a, a rawn phei ta mai a ni" ka ni chuan a ti chuar chuar a. Ka ner nawk mai. 

"A nih mai mai tak chu, inthen se ni mai lawm. Muana lahin a indanpui ngam bawk si lo. Tikhan awm rawh se , ka lo haw hma chu lo hawtir miah suh u" ka ti ta hmiah a. Ka lungawi lem lo khawp mai. Tei hi a nulat lai atang tawha kan khaw nula taima leh fela sawi a ni ve thin. Sum dehchhuahte hi a thiam riau a. Pasal a neih dawn pawh khan kan ui reng a. Muana te hi an khawsa thei ve reuh a. Pawnlamah chuan an fel viau asin le. An inneih tirh phat atangin Tei chuan kuhva a zuar a, awl lai a nei mang lo. In chhungkhur engkim zawhg zawng a enkawl bawk a, vawk a vulh bawk. Muana hi middle schoolah mi ai a kal ve a. A sawi ang tak tak khan kan in lamah hian rawn leng phei khát tak a ni. Ka ni phei chu a vui tak tak hial alawm, Teremi Muana u chu Tei sawi ang kha a ni. A pasala chhungte reng pawn, "Keini chu mo kan nei lo. " an ti hial a nia. Chutianga ka farnu a lo zilh ve khanglang chu zak thei lo ka ti khawp mai. Ka hriat loh karin ka lo muhil daih a. Pen ri ka hriat avangin ka harh zawk, light pawh ka lo off lo. Ka men chuan ka mit ka nuai nawk nawk a, makti fe hian Saidingpuii lo ding ngawi reng chu ka melh ta reng a!

Min melh run run a, rui hmel a pu pawn ka hre lo. Ka thu vat a. "Eng nge ni ta?" Ka ti vut a. 

"Ka tihpalh..tukin avang khan" a ti sap a. 

"Chutiang thil sawi tur ringawt chuan i lo kal a maw?" Ka ti hû a. 

"Kawngka i kalh lo va" a ti zawi sap a. A awmdan chu a mak riauin ka hria. Khumah chuan a rawn thu a, "Vawiin chuan Johny nen chuan in chhuak ta mi?" Ka ti a. A ner sawk. 

"Ka chhuahpui i lo ring a ni maw? I á a nih chu" a ti nghat. Ka nuih a za deuh a, "Chuan, engtikah nge kan hawn ang?" Ka ti ta daih a. 

"Naktukah bazar vete i duh awm sia, a tuk lehah kan haw dawn nia. Mamawh chu ka lam kim thawkhat a, meeting ka nei a. Min va drop ang a, min lo lam leh mai dawn nia" a ti dam thlap a. Zu rim a nam lo. Ka ding tur ka thaw hawk chu tlaia ka zu in rim kha a nam ni tur a ni. 

"Ehe! Ruatpui, zu i in elo?" Makti fe hian a ti ta mai a. 

Ka nui ringawt. Thutak fahran hian, "Sawi rawh. I in em ni?" Inkuangkuah fel than hian a ti a. 

"Aw no khat ka in ve chhin a" ka ti ta ringawt a. A rum nghat. 

"Tun hnuah in chhin tawh ngai suh ang che. I hria em?" Thupe aw zet hian a ti a. A hnuaia thawk ka ni tho naa, min control a tum dan chu bialpa treata min treat te pawh a ang. 

"Aw le. A tui lo si" ka tih lai chuan a nui deuh a, a ding a. "Ka han chho tawh ang e. Tukin kha ka mood a chhe deuh a, ka tihpalh aw" a ti leh hram a. 

"Ka theihnghilh vek tawh. Tui deuhin han mu rawh" tiin ka chhuk melh run a. A sam a thlah hnûp a, a mitmeng chu a dul hnak bawk. Ka dar pawh a chen pha lo. Mahse, a kim ve biai reuh sia..a duhawm ve riau bawk si. Aaa..kei hi hetiangte ka ngaihtuah le..

"Muttui le" a ti sep a. A chhuak zui nghal. Ruak huaia ka inhriat ve ngawt chu..ka mutchhuak a bo laklawh sia, phone ka khawih mai mai. Hlimi pawh ka be mumal lo. Ani pawh a buai ve deuh nge a reh rih a. Status ka view thla diat diat a, Hlimi chuan, "Lo haw vat vat se" tih a lo hmang ngei! Ka inngaihbel ve tawp mai. Kan doctori hian min hide nge mawni dawn ni, status a nei ngai lo reng reng. Kei pawh hian ka nei ngai lo tluk a ni. Thlalak pawh hi ka phoneah 10 aiin a tlem ang. Selfie tih velte hi ka uar ve lem lo, kan naupang zawk zawk tawh lo bawk a. Video ka en leh ta ringawt. 

A tukah chuan chaw ei khamah doctori chu ka va thlah a. Apuii leh Nupuii ten thil min chah ngun ve si nen, bazar tur chuan ka intintuah a. Ka kal dawn chuan, "Kha i bazarna tur " tih leh pawisa ka kuta hmehbel a rual a. Zep loh chuan ka nei tam viau lo a, mahse, "A ngai lo, ka la nei ve alawm" tiin pek let ka tum a. 

"I hlawhah kan cut dawn nia" a ti a. A kal zui daih. Rs. 10000 lai a la ni zui! A va zahthlak e aw. Ka hlawh tur zat pawh ka la hre hauh si lo. A atthlak angreng, hlawh zat pawh hre loin a driverah ka han tang ngawt chu a nia. Amah lahin sawi tang e ti bik hek suh. Bazar lam chu ka pan ta a. Apuii tan kawrfual par nalh ve deuh mai ka leisak a. Ani hi kawrfual ha hnulh hnulh chi a ni bawk a, a lawm turah ngai ang. Nupuii hi a buaithlak thin, a nu em em si lo. Mipa thawmhnaw leisak ngawt chi a ni bawk si lo. Cargo ka leisak ta ngawt a. Ka ni tan puan pheikhawk, Biak ina lampui nuam deuh tur ka leisak bawk. Pa Rema chu tshirt ka leisak ta mai. Tei a la awm dawn sia tiin in khawm nan pawha hman theih tur kawr ka leisak bawk. Kei chu han inlei vak ngai pawh ka inti lo naa, zin leh a khát takin tiin jean kekawr ka en ve a. Ka duhzawng tak ka lei ve kha maw..Ka ril a tam tak deuh avangin bazar atanga hnaite thingpui dawr te takteah chuan ka chawl a. Paratha leh soup ka chah a, min rawn petu chu ka hriat hnu ni tlata ka hriat avangin ka en ngun viau. Ani pawh chuan min en run run mai. Ka hrechhuak ta. Patea te ina awm ve thin Tluanga kha lo ni rengin. A bawrchhawr leh a induan loh êm vangin a lo danglam ta deuh a ni. 

"Tluanga tehdaih chu, i dam a maw?" ka ti ta hlut a. 

"Ruata kha i ni tiraw? Nang pawh i va danglam ta ve. Ka dam alawm" a ti a. A nui huah huah mai. A ha sen thút te, a biang puar leh a dul kiar bakah a mawng dêp dan atang chuan zu báwihah a tang tih ka hrethiam ve mai. Ka bulah a rawn thu ve a, "Hei Ka rawn zin lawk a. Ih, kan khaw doctor driverah ka tang a. Nang in dawr em ni?hei hi" ka tih chuan a hawi zuk zuk a. Kan piah lawka pawisa dawngtu nu thau liang luang, sam kir buk chhup mai chu kawk zauhin, "Kan nu a nia. A dawr a nih hi" a ti sur sur a. A va mak mai mai e aw. Tluanga te chu mipa hmelchhia a ni hran miah lo asin le. 

"A ni maw? Fa te in nei tawh em?" Ka ti leh a. 

"A nei thei tawh lo, fa bik pathum a nei a. Aa..Ruata, kei zawng ka tla chhe ta a nih hi. Tihian nuthlawi ka luhkhung tawp mai a ni" beidawn hmel angreng tak hian a ti a. Sawi tur a váng duh riau. 

"Zirna kha i chhunzawm ta lo mi?" Ka tih chuan, "Engmah i hre lo a ni maw? I rawn awm tawh loh hnu khan zu in ka ching chho a, lehkha zir te chu khawilamah, Ka bang zui ta daih a. Zu man tur nei ta lo chu Nuteii pawisa ka ruksak ta fo a, a tawpa tawpah min hnawtchhuak ta a nih kha. Kan khuaah ka awm peih bawk si lo va, tihian ka vakvai kual a. Kan nu nen hian kan intawng ta a ni" a ti ta mawlh mawlh a. A lehlamah chuan a khawngaihthlak angreng. 

"Aa. Kei pawh lehkha zir peih lo na na na chu a rem remah tihian ka inhlawh kual ve mai mai alawm" ka ti ta ringawt a. 

"Nupui i la nei lo mi?" A ti a. 

Ka nui hawk , "Nei nang, tuman min duh ve lo" ka ti hlut a. Chutihlai tak chuan an nu chuan, "Vanlaltluang, ngati nge i lo thut leh veng veng, hei rawn ngaihven ta che" a rawn ti vin hluk hluk a. A hmel leh a aw pawh a inhmeh viau. A meng no lo ve bawk si, a han dan lah chu a behin a balh hmel ngawih ngawih. Mahse, Tluanga tan chuan Angel anga mawi a ni ve ngei awm si a. Tluanga chu a tho vut a, "Aww..hei thian hlui te kan han hmu ve lawk alawm.." A ti nem duai a. Choka lamah a lut zui nghal. An eisiam erawh a tui zêk mai. Restaurant changkang taka thil tlemte to deuha ei ai chuan kawngkam thingpui dawra inhnawhpuar mai hi ka duh dan a nia. Mahse, che felin thianghlim se chu ka duh khawp mai. 

Dar 2 pelh hlekah Doctori'n min lo call a. An ban chiah thu a rawn sawi. Kei pawh chuan ka va lam ta nal nal a. In lam pan nghal mai ka tum laiin, "Lawk..Chaltlang lamah kal lawk ang. Thlanmual tlawh lawk ka duh" a ti a. Thuawih zetin ka tlan nghal. Inbe miah lo chuan Chaltlang thlanmual kan thleng a. A chhuk a, ka chhuk ve bawk. Ka zui ve ta zel a, Rose par sen kuang khat hi a keng vá bawk. A tana mi pawimawh tak thlan kan tlawh dawn tih chu hai thu a awm lo. Thlanmual mawng lam, a kil lam a pan zel a. A ding ta chat. Thlan chuan tlawhtu a nei khát tih hriat takin a hnîm bám mai a. Hnahthel ro a tla nuai bawk. Thingphekah chuan rawng dumin, 'Lalremsiama, Kum 21"' tih leh a thih ni leh kum a inziak a. Chu zawng chu a ni. Saidingi chuan thlan chu a melh vang vang a. Dimtêin rose par chu thingphekah chuan a thiat ta a. Hnahthel ro te chu a theih ang angin a tifai bawk. Ka lo pui ve ta vat a. A hmel lan dan a serious em avangin ka be ngam lo. Kan tihfai zawhah a bula thlan an zut mam tawhah chuan kan thu dun ta a. A ngawi leh veng veng ringawt. Ka dawhtheihnain a tlin ta lo nge.."Sawi dun i duh em?" Ka ti ta tawp a. A kun a, a kuttin chu a sik niap niap a, a aw thian leh kharhin, "Ani hi ka 1st love a ni a" a han ti te te a. A aw a lawi deuh. 

"Umm" ka ti nghut. 

 

(😆😆😆