saidingpuii 13

Dr. SAIDINGPUII (13)

Ziaktu: Toni Râlte

"Zaninah innei ila" tiin ka va fawp a. A chechang eih lo. Ka hmui phawiin, "Ti nge?" Ka ti hû a. 

"Johny-a ka virgin ka lo hawntir kha pawi ka ti" a ti sap a. 

"I ngaihsanawm zawk, i pasalin i virgin a hawng a" ka ti mai a. 

"Pawi tihna i nei lo em ni? Nuthlawi ka ni hi" a ti leh a. Min melh kiau bawk. 

"I nuthlawi dan hi ka duh chi" ka ti hmiah. Ka sawi tum ber ka hre bik hauh lo thung. Mei chu a mit tan lek lek a, chhem alh tawh loin a vám chu kan ai a. 

"Ramropuia chuan hetia kan awm hi hria se a khua a sik ngar ngar thei ang mawle. Amah vanga kan inzawmna ril sawt hi pawi a ti ngawt ang chu" a ti leh hap a. 

"A fing viau emaw ka tia, i lo fing zawk a nih hi. Mahse, engkim i hriatthiam tawh hnu pawha min la hua anga i la awm ngar ngar kha chu ka ngei che" tiin a biangah ka va piai nawk a.

"A naa..aw min rinhlelh loh nana khatia ka chet kha la ngai hek. Duati chu kan chhanhim thei ang em aw?" A ti vang vang a. 

"Nia, Duati hi kan khaw nula a nihnaah a hmingchhiatna tur chu khuhbo theih ka duh khawp mai" ka lo ti a. Ralkhatah sihal a û ruah ruah mai. 

"Mu tawh ang" a ti sep a. Amah melh leh zauh pahin, "Heng thil hi vawiin nilengin i ruahman em ni!" Ka ti thut a. A nui hak a. 

"Damdawiin leh a chhehvelah chuan chance a váng em alawm" a ti mai a. A hmaa kan boruak nasa deuh ngaihtuah chuan hetia kan inpawh leh thliam hi ka tehkhin ber chu, naupang rilru thianghlim takte an han intibuai a, an han insual buai a, a hnu lawka an han inkawm leh mai thei hi ka chan ber. Ni e, mahni infak vang pawh ni loin rilru chhe tak pu ka ni hran lo va, Saidingi lah a rilru a tluang bawk si. Thinchhiat te chu simtir dan a la awm ang. 

Puan pakhat hnuaia insi chiala kan han mut dun takah chuan, "Inneih chu i hmanhmawh lo em ni?" Ka ti sup a. 

"Kha lam kha chu i thu thu aw. Mahse, ka quarterah awm ila..i chhungte ka hrawn peih loh vang ni loin..emergency-ah a buaithlak dawn a" a ti sar sar a. Ka lawm a va kim tak. 

"I thu vek alawm. Ka nî te pawn an remti ang" ka ti vat a. 

A awmbawra ka kut nghah chul heuh heuh pahin, "Tei pawh Asha-ah hnimphum ka tum kha. Naktuk tuk lehah kan thehlut ang a, Tisawn Damdawiinah a chhawr tel theih dan danin kan chhawr bawk ang a. Amah leh amah chu a inchawm zo mai ang. Mipa lam hi a la ngaihsak mang lo va, a pawi lo zawk. Nupuii leh Valtea lah pawh then rual lohin tihian an inchar bet bawk sia, a hlimawm ka ti" a ti seuh seuh a. 

"Nia, Tei hi han tha chho se rilru a hlim zual ang. Innei dawn ta ila, hetah kan innei anga tiraw?" Ka ti a. 

"Dan puitlingin kan thei awm si lo va" a ti chuai raih a. Ka inbeng kang a. 

."Engvang chuan nge maw kan theih loh ang le?!" Ka ti hû a. 

"Aaa..nuthlawi ka nih hi" a ti nghat a. Ka nui hawk. 

"Nuthlawi ni mah la; kei nen kan la chesual hleinem. Eng nge kan theih loh ang?" Ka ti hmuk a. A thlawi avanga a inngaihhniam theihna awm thei chu sawibosak zel ka duh. Nula hnahkhat aiin ka tan a tling tawk miau a. 

"A nihna takah chuan Virgin ve ve hi an ni tur a nia. Virgin tawh hauh loin veil an khimte hi a dik tawk lo. Veil hi chu virgin te khim tur liau liau a nia. Mahse, kan intihhmuh vek tawh a. Kan innei a nih pawhin kei chuan ka khim lo vang. " a ti nghet charh a. Saidingi rilru thianghlimzia ka hriatchian phah leh zual. 

"Engpawhnise, Ramropuia hi hmetmit phawt ila, Duati chhanchhuak bawk ila..Valtea hi haw ve phawt bawk se, palai te pawh ka va tir ve ang a" ka ti dam thlup a. 

"Kei aia nau zawk si hi puitling deuh hian tawng thin suh" a ti nghat a. Zan a rei ta deuh bawk a. Ka kuah thawk a, ani pawn min rawn khan ar ar mai. Ka fawp a, kan duhthawh ta telh telh mai. Kan mutna a chepin kan insi rial lo thei bawk si lo. Thisen a lum tan mai dawn. Zep nák emaw tum lui ila min hnar ka ring hlek lo, chutiang a nih vang chuan ka hmuhsit phah chuang lo bawk. Mahse, inneih thlengin kan sawi tawh a. Chumi hmaa lo insum tang tang chu thil harsa niin ka hre lo va, a mitmeng de sawr sawr leh a biang tai têkte melh kual dan dan pahin, "Kan insum thei a nia..lawithat zan erawh i muhil mang lo vang" ka ti nghut a. A nui hak. 

"Mipa diktak hi chu i va ni chiang tak" tiin nghet zetin min rawn kuah a. Mutthilh zai kan rel ta a. Kan picnic hun leh hmun pawh a dangdaiin kan hriatreng tawh tur a ni ngei ang. 

Zing dar 5-ah thoin kan insingsa zung zung a. A chhan chu kan awmna chu mi ram a nih avangin a neitute an rawn lan thut kha a hlauhawm ve a. Tihhnawk leh hnawmhnawk kan nei lo bawk a. Kan intifel rang viau. Motorah lutin kan tlan chhuak zui ta a. Ka khalh chak duh lo thung. Hma lutuka khaw thlen pawh a nuam lo. Dar 6-pelh hlekah khua kan lut a, a tawk viau e. Damdawiinah kan tlang nghal a. Kei pawh ka scooty-in ka chhuk thla lehnghal. Ka ni te chuan engmah min zawt lem lo. Sakhi kha 4000 man lai an lo hralh ve a. A lawmawm viau mai. A chek chu tlai lamah Pa Rema'n a siam ang, Kei Ramsaah chuan sakhi chek hi tui ka ti ber mai. A sa pangngaiah chuan Sazuk hi tui ka ti ber thung a. A paw rim a nam loh chuan sanghal pawh hi a tui viau e. 

Vawk chaw dawl lak pahin leipuia kal turin ka insiam a. Ina awm mai mai hi a ninawm. Ka tukhum leh hnungzáng chu la na deuh tho mah se, palluih ka duh. Duati te inah ka peng zuai a. A chhungte an awm avangin eng han sawi theih ni hek lo, "Thlai hnah eng ilo rawn la ve pah la, tihtur i neih chuan loh chuan" ka ti a. Ina awm mai mai ai chuan tiin a hnial ta bik lo va. A insiam chhungin Duati pa nen kan lo inkawm a. Ani hi pa taimaa sawi a ni a, lo a nei zau thei khawp mai. 

"Kha..Muana nupui chu a tlan leh tawh an tih pek kha. A awm rei theih kha ka ring lo reng a" a ti chuar chuar a. Tei te chungchang khan khua a luah hneh ve bawk a ni. 

." A va tlan leh hma ve aw" ka ti ringawt. 

Duati nu a rawn lut a, min hmuh rual chuan, "Ruatpuia chu kha khaw nge kal i tum?" A ti nghal var a. Ka sawi a, Duati ka nghah thu ka sawi bawk. 

"Daisy chungchang velah khan kan lo tang ru ve khawp mai a. A nu kha a ä em mai. A fanu a timualpho ringawt a nia" a ti leh suam suam a. A kuhva ei chu a eitui hmel kher mai.

"Ni ngawt mai" ka ti ringawt a. 

Duati insiam zo lo chhuak chu lo melhin, "Ropuia kha rawn len a tumin ka hria. Zawlseiah min va kalpui teh se a tih kha" a lo ti nghal chat a. Duati chuan, "A ho mai mai. Ka peih lo" tih leh min melh a rual a. Kan chhuak zui nghal. Duati nu chuan Ropuia chu a ngaihven viau maithei a ni. A awm ve bawk a. Duati hi Aizawlah pasal neiin thla 7 a han awm ve a, an fa pakhatna a chhiat a, khata tang khan an nupa kar a khi nge ni an inzawmna a khi chho a. An pain ngaihzawng dang a neihsan fo mai bawk nen, amah a la naupang ve bawk sia. A tuar thei ta lo va a rawn haw ta kha a nia. A hmelchhe lo va, mi biangbiak a thiamin nuih a heh bawk nen, ngainat a hlawh viau. Mikhual tlangvalte pawh hian an rim nasat pawl a ni thin. 

Daisy dawr kan kalpelh lai chuan Daisy nu lo thu ve chuan, "An va inhmeh dun rawl rawl ve" kan hriat phak ngei tur hian a ti láwng lawng a. Ka ner sak. Duati a nui huk. "A tihtheih a va nep ta ve" a ti sap a. Khinzui tlakah kan ngai lem lo. Kan inzui phei ral ral chu min hmu duh hlawm khawp mai. Engah tehvak kan ngai lo. Inngaizawng emaw pawh min lo ti se, kan chiang dun bawk a. Leipui kan thlen chuan Ropuia nen an inbiak dan vel chu a sawi ta a. 

"Amah hi a fimkhur ve tawp a, mahse, Saidingi a duh em vang hian khua a hmu bik lo. Nangmah hneha a theih phei chuan inruktir hial dante ngaihtuah turin min tia. Mahse, ka kar ve tlat sia. Nizan chuan, a bulah.." Naktuk zanah a fala hun hmanpui ka lo tum ang a, zui haw dante pawh ka lo dap ang a, emaw mutpui dante pawh. Mahse, chutiang ka tih hma chuan ka thlalak kha i delete phawt tur a ni" tiin ka kar a. A inngaihtuah nasa hlein ka hria. " a ti siam siam a. 

"Duati, ngaih loh lamah ngai lo la, i eng thlalak nge a kawl? I hmu tawh reng reng em?" Ka ti thut a. 

Hamhaih hmel fe hian, "Ka la hmu miah lo. Mahse, ka saruak thlalak ka inbual zo ka lakna kha a kawl thu a sawi a. Manuna kha ka thawn ve ngei bawk sia, ka hlauthawng vek a ni" a ti a. Ropuia hian Duati hi a bawlzan kual vel ve mai mai mai thei tlat! A thlalak a kawl nia a sawi lah Duati'n a la hmuhpui hauh lo lehnghal. 

."Mannuna i be reng reng em?" Ka ti a. 

."Bia e mawle, a ngaihna a hre vak lo. Ropuia chuan a neih theih dan ka hrethiam lo a ti ve ringawt" a ti a. Ding meuhin, "Duati, Ropuia hian i thlalak hi a kawl miah lo thei ve tlat..nangpawn i la hmu si lo" ka ti ta hluai a. Ani pawh a harh thut niawm takin, "Nia, ka thlalak Manuna ka thawn tih a hriat vangin min vau nan a hmang ringawt ve thei" a ti a. 

"Manuna i thawn tih chu engtin nge a hriat tak ang?" Ka ti leh a. 

"Amah Manuna'n kan inthen hlim khan a thinrimin an thianho groupah, " A pic te hi ka thehdarhsak dawn mawni" tiin a lo post a. Amah bawkin a rawn ss leh alawm. Min tihhlauhthwn a duh avang khan" a ti ta a. Rilru a buai ta deuh. Ropuia hian engmah hmanrua a kawl miah lo thei tlat! Duati lah mualpho hlaua lo khawsa tawh chu a hlauhthawnna hmangin hneh a awlsam tawh dawn nasa si. 

"Engpawhnise, zanin chu ngaichàng ang. A rawn be em em ang che" ka ti ta ringawt a. Dawl ka laksan ta a. Thlai leh rah engilo a vai thung. Thlamah kan thlai hawn tur chu a lo chhep hrang thliah thliah a, Kei pawh ka vawk chaw dawl lak chu ka phuar khawm mawlh mawlh a. Eitur engmah kan pai lem lo va, hawn lam kan hnaih ta nghal a. Duati te in kawtah Ropuia motor a lo ding ran mai. Awmze nei zetin kan inmelh ralh a, ka kalsan zui ta a. 

Ka la balh laiin tiin vawk chaw chu ka chan nghal bawrh bawrh a. Tei a rawn lang hlawl. "Ti nge?" Ka lo ti hû a. 

"Ka hman êm a, ka rawn leng thla mai mai. " a ti mai a. Ka nî erawh thenawmah a leng a niang, Apuii'n hmarcha a mal mek a, Nupuii erawh kawt maia behliang rah a mal mial mial thung. 

"Eng nge Doctori chu" ka ti a. Nizan lama kan awmdante kha chu sawi kher ka tum hran lo. 

"A tha vek e. Nizan chu a nuam bawk maw?" Tih pahin a nui rah rah a. A lo hre vek a nih awm chu.

"A hrilh che mi?" Ka ti hû a. 

"Hrilh chiang e..keiman alawm ruahmanna kha siampui..khitah chuan Ropuia hian a rawn vil run reng sia" a ti mai a. Farnu tangkai tak a ni. 

"I va fel leh si..Ropuia chuan a la bialnu chei ve zel a mi?" Ka ti a. 

"Umm, ka ten a nia. E chuan, Hlimi pawh vawiin tlaiah a rawn thlen dawn kha" a ti nghal zat a. Hlimi'n min rawn be tawh ngai lo tih ka hrechhuak chiah. Ngati nge mawni dawn le..

"Ropuia nen hian ni daih se a tha ang" ka lo ti nghut a. 

."Ropuia'n a duh awm lo em mai. Nangmah zawk hi i che buai leh ang e aw. I á roh si" a tih chuan ka nui hawk hawk a. A sawi dik ve tho bawk si. Thingpui a va chhuan laiin a phone a ri ral ral a. Apuii a puih pah avangin speaker a on a. "Hello" a tih rual chuan, "Zawngi, ka pasal hi rawn be tawh suh ang che. I hria em? Ti nge i lo biak ziah a" hmeichhe aw chang lam hian a rawn ti nghal tàwn tàwn mai a. Kan hawi rual thap mai. Apuii pawh a phawk ngang mai. Tei chu a hrilhhai deuh a nih hmel. 

Eng nge a awmzia?" A ti sap a. 

"Ege nge ni vak ang a? Ka pasal, i pasal hlui U muana hi rawn be tawh suh" a ti chang fak a. Tei chuan, "Ka be ngai awzawng lo ve a..ve a che" a ti nghat a. 

"Rawn be lo la a rawn be tawh lo ang che. A duh tawh lo che tih hi pawm ta che" a rawn ti leh a. Tei thinur lutuk chuan, "I va zak lo tak. I pasal kha ka la block vek aw. Amah zawkin number dang atangin min rawn bia a nih kha. Ve mai mai a che" a ti ta zêk a. 

"Rawn be lo la a rawn hàwi tawh lo vang che. Mitmei i lo hmuh leh tih hriatreng" a rawn ti leh hram a. Tei chuan a tuar thei ta lo a niang. "Hmingi, inhmu ila hmaichhanah sawifel ang. Hetiang hian min rawn puh fo suh u. Ka tuar mai mai tawh dawn lo a nia. Engkim fiahna nen thlap ka nei e" a ti ta piap piap a. Hmingi chuan a off daih. Tei a sen tàn tán mai. 

"Khatianga an la tawngkhum theih tur che khan nang pawn i lo be leh deuh em ni!" Ka ti a.

"Ka phone hi check ula, ka la block vek. Number dang tangin Pi Nguri thih zan khan msg a rawn thawn a. " ka ngai che, ka hmangaih che..chuti khati" tih vel. U muana a ni tih hriain ka reply lo hrim hrim" a ti bawrh bawrh a. A thin a rim hmel si a, kan sawipui zui duh ta lo. 

Ka nî a rawn hawng a, Pa Rema chu awm lo mah se, a remchang êm a tiin Saidingi nen kan inbiak dan, palai tirh mai ka rilruk thute ka sawi ta a. Ka ni chuan, "A la hma mah mah lo maw? Tu khaw khain in inzui tih pawh an hre si lo" a ti a. 

"Aa..inzui rei vak kher pawh a ngai hleinem, bakah buaina a tam mai mai" ka ti ringawt a. Ropuia chungchang vel erawh hre lo law law se ka duh thung. A rilru a hah leh vak palh ang. Nupuii chuan, "Nia, innei vat r'u, U Ropuia khian a duh ve tlatin ka hria" a lo ti hmuk a. Thil awmzia a hre deuh reuh si a, a sawi vek palh ang tih ka hlau ru viau. Mahse, eng em chu a sawi ta bik lo thung. 

Apuii chuan, "Mama leh Doctori an innei ang a,U Nupuii leh U Valtea..a rualin innei ula..ehh" a lo ti kual vel a. Nupuii'n a melh rum ngang mai. 

Tei chuan, " Nupuii hi chu hmanhmawh suh se, inla naupang, Bakah Valtea ka va rinhlelh lam ni loin in zir chian ve deuhte pawh a tha ka ti" a lo ti a. 

"Ka hmanhmawh awkawng lo, pasal neih pawh ka tum lo" Nupuii'n a lo ti hmawk hmawk. Kan han nui leh rih. 

Kan chungchang chu ka niin Pa Rema a lo sawipui ve ang a, thiltih zel dan tur kan hre vatin a rinawm. Ropuia chu hnawksam thamah ka ngai tawh lo nge, a hnawksak zel ka hlauh vang zawk, inneih chu ka hmanhmawh ut ut mai. Nia, ka ni sawi ang khan zep loh chuan kan inzui tih hria hi an la tam viau lo. A driver ka ni tih erawh an hre thung a. Kan innei a nih chuan mi dang pawh a thawng ve khawpin ka ring. Chu chu ka care ber hran lo. Inzui rei leh inzui rei loh hi chu ka thiante atang pawh hian ka zir thiam ve deuh tawh. Zorina ka tih fo thin kha a tlangval chhuah phat atangin an kawmchhak mai a mi Remmuani nen an inngaizawng a, kum 6 tehmeuh an inzui a ni. Mahse, inzui rei kha inneihna a lo ni chuang lo nge ni, zan khat thil thua an inthen chu an inthen hlen ta vang vang a, Nikumah khan Remmuani pawn pasal a nei ta nge nge a nih kha. Chutiang bawkin Vengthlang ami Fela ka driverpui tho pawh hian Social media atangin a nupui hi a chhar ve tho a, thla hnih erh awrh an inbiak hnuah an inhmu a, an inru zui daih! Hei kum 3 dawn chu inneiin in hrang an chang tawh a, an nupa nun chhungril va hre kilh kelh lo mah ila, an intihtlan thawm kan la hre lo chu a nia! Pathian samsuih hi chu inngaihzawn rei kher pawh hi a lo ngai lo. Doctori chu ka tana khuanu ruat a ni ang em tih ka hre lo naa, nihtir ngei ka tum. Amah lo hmeichhe dang va ngaihzawn leh kha ka tui thei tawhin ka ring lo. A thiam pawh ka thiam tawh lo vang. 

Saidingi nen pawh kan intext zeuh zeuh a. Naktukah Zoteah zin a ngai dawn a niawm e. Ropuia a inhawng viau naa, Keimah ngeiin ka hruai leh ang. Ani phurhah khan a chuang tur hi a ni lo tawp. 

"Sakhi hi ka ei ve chhin a, ka rin aiin a tui" a rawn ti a. Pa Rema'n a chek siam kha Tei a suah ve a, a chek phei chu tui a ti ngawtin ka ring. "A chek kha lo ei ve rawh. I lei i lem maithei a nia" ka han ti a. 

."mahse, sa hi chu pel tawh lo la ka duh, intihpalh a hlauhawm" a rawn ti hram. 

"Kan inneih hnuah chuan ka thu zawk dawn" ka va ti a. 

"Thu zawk awm loin thu ve ve ang. Ka upa zawk a, tlemin ka lal zawk ang" a rawn tih chuan ka nui vur vur. A upatna hi a tam lem lo bawk a, kei aia naupang anga treat chang ka ngah mai. Hruaia leh Zorina'n chaw an rawn ei ve a. Kan zanriah ei pawh kan hlim dar dar viau e. 

Zorina'n ,"Thianpa chu i luck riau mai. Tunah Duati a ni leh tawh bawk a, Daisy ten sawi nuam an tih teh kha..i tàng ange aw nang hi" a ti hlut a. Hruaia nen hian engkim kan hrilh bik lo bawk a, Duati nen kan ni tak tak emaw a ti a ni maithei. 

Ka nî chuan phawk fe hian, "Kan duatmami saw maw i sawi" a lo ti hû a. A ngaihna a hriat vak hmel loh. 

"Ni chiang e, An inzui ve nasat em hi..vawiin pawh leipuiah an inchhawm hnalh hnalh kha" Zorina lah chuan zep a nei duh bau si lo. 

Hruaia chuan, "Duati te chu a fel alawm..mo atan pawh tiraw Nupui" tiin a lo uang a. 

"Mam, U Duati saw i bem ve tak tak mi? Nia miin an sawi tak tak a nia aw.." Nupuii tapek chuan thutak fe hian a ti a. Thil nihphung a man lo thin lutuk hian nuih a tiza thin. Apuii te chu hrilh hre lo mah ila eng emaw chen chu a man leh vek ang. 

"In ninawm, sawi sek suh u. Duati te chu ka thianpa ka tihpui alawm. " ka ti ta daih a. An sawi zawm ta bik lo. Puar el euha kan ei khamah kuhva eiin zial kan han zu leh hlat hlat a, dam man hi a va awm tak e aw. 

Saidingi ka rim ang nge Duati tiha ka buai mek laiin, Information mike atangin chhiat tawh thu an rawn puang leh ta tlat mai. Uluk zetin kan lo ngaithla a. Vengchhak lam a mi reitak bawksawp tawh Pi Zahliri a lo nia! Kumin hi chhiat kan tawk zing riaua ka hriat ni. Nupuii chuan,"Kan branch an ni chuang lo va, naktukah ka kal mai teh ang" a ti nuah nuah a. An phût bik pawh ka ring hran lo. Apuii erawh chuan phone a hmang a, "Aw..dar 9 velah min lo sawm la" a ti sar sar a. Ani hi Msa nen an inbe tha leh tawh a ni maithei. Tleirawl inngaizawng ang mai an ni, niminah thinrim engphiarin inhau se vawiin angah chuan an nui dun leh var var thei zel. Doctori nena kan awmdan nen pawh a inang lek lek. A tha vek mai e. Malsawma hi Vengsang lam mi a ni thung a, an khawsak pawh a tha ve pangngai. Zirna erawh a chhunzawm tawh bik lo va. Unau mipa hlir pali lai an ni a, ani hi an upa ber dawttu niin a nu hian a chhawr thiam hlawm a. An in leh lo pawh mipa fa e ti lo chuan a hnawk ngai lo, a felfai thlarh zel. Marawhchu, Malsawma tak hi chu zu te han in ve zauh bakah insualna lama a hming lamrik a nih ve thin avang hian Pa Rema hian a ngaina tehchiam lo, Then tur erawh chuan a sawi khawl khawl chuang lo. 

Apuii nen hian inthen hleithei loin hei chen an awm ve ta chu a nia. Mi dang an han inchhaisan lawp lawp pawn a tawpah chuan an lo inkawp leh nge nge zel. Hetiang hi an tam mai. Awmdun ve apianga inngeih lo, inthik kuala inhnial reng, inthen hleithei si lo, tlawm hmasak duh si lo ang hi. An han inrunluih chiam a, an na ve ve tho si. A naupangchhia kan ti dawn nge, mihring nunah a bet ve kan ti zawk dawn. Chutiang chu APuii leh Malsawma te pawh an ni. Saidingi ka call a, "Zanin chu kal ve la" ka ti a. 

"Ka tum ve alawm. Ropuia hmehmih nan pawh a tha. Duati i be tawh em?" a rawn ti a. 

."Be lo, ka'n bia ang e. Zaninah Ropuia chu hmin se, engkim hi tawp teh se. Kan inneih dawn phei chuan khatiang hnawk vel kha a ninawm" ka ti hlur a. 

"Nangmah leh nangmah hi insawi thinrim ziah suh. Dah la, Duati chu be rawh" a rawn ti nem diai a. Ka nuih a za. A sawi dik bawk sia. Ka dah a, Duati chu ka call ta nghal a. 

"Zaninah Saidingi nen kal dun kan tum a. Ropuia chuan hmuh hrehawm a ti dawn ngei a, nangin amah kar nan i hmang thung ang. Chuan, Mitthi in atangin min lo ko chhuak la, kan awm zel dan tur chu a chiang mai ang" ka ti ta mawlh mawlh a. 

"Aw le, a tha alawm" a ti ve mai. Duati thlalak hi a kawl tak tak pawn ka ring lo e a. Amah Duati hlauthawngsa hi a vau kual mai mai niin ka hria. 

Ka hmanhmawh vak lo, Zawlseia ka farnu Makimi ka call a. "Mitthi kan nei leh ta sia, nei lo ila chuan naktukah rawn riahphei ka tum tehlul nen, a thihchamah law law a ni mai aw" tiin ka phà a. 

"Aw ni mai. I dam tha tawh em ni? Dam tha lo chung te khan i rawn kal hram ang e aw" a ti a. 

"Dam tha a ni mai e. Ka tha tawh reng" ka ti mai a. Ka inthlahrung mah zawk, ka nu thlan nghah ni-ah takngial pawh ka lang ve thei si lo. Rinliana vang vek a ni. Taka RInliana chu a central jail-ah dah luh a ni tawh a. Court-in a chungthu an la relsak ang chu. Tang hlen daih se a tha. Pi Nguri fate pahnih khan an in kha an la nghak ve zel a, Pi Nguri nau Pi Lawmsangi te chhungkuain an va uap rih bawk. Pi Nguri pasal hlui khan a fate chu Zote lama awmpui pawh a hnial bik lo va, mahse, nupui a lo nei ve hman tingtang si, an duh kher pawh ka ring lo. Chhungkaw kehdarh hi chu a pawi tehzawng a ni e. 

Dar 8:30 velah thiante tel loin ka tlan chho ta vang vang a. Ka sual vang pawh ni hran loin thiante hian min díp chang a awm ve thin sia. Bakah Hruaia leh Zorina tih loh hi chu kawm tak tak ka nei lem lo. Tei pawh a lo insiam ve mek a, Saidingi erawh a lo la thu diai a. Pyzama lian hlephlup leh tshirt grey a ha a, a duhawm leh viau. 

"I la insiam na nge?" ka ti nghal vut a. 

"La hma e. " a ti sap a. Tei chu Ka rin loh deuhin Sawnpuia'n a rawn sawm a. Mak ka ti deuh. Sawmpuia hi Pa Muana fapa a ni a, Tei te nen hian kum khat chhuak an ni awm e. Tlangval zakzum tak, zuk leh hmuam pawh ti lo a ni a. Kan khaw HSS-ah hian din a nih atangin a thawk ve nghal a. MA a lo zo fel chiah bawk a, tihian a la thawk ve zel a, hlawh tam le lú lo mah se, a hmuna thawk a ni a, a zia ve riau ang. Kan vengte a lo inhlat bakah amah hi a zahzum leh chut deuh roh vang hian kan inbe tuitam hran lo. Hetia Teii damdawiin tlang lama a chenkual tak hnu hian an lo inkawm ve thin a ni maithei. 

An chhuah hnu chuan, "Tei te chu ka rin loh deuhin" ka ti sup a. 

."In bulah a la sawi ngam lo a nih kha. Sawmpuia hian a rawn be nasa alawm. Tei tak hi chuan chutin aw a la pawh hran lo" a ti a. A nui rah rah bawk. 

Ka tawng dawn lai takin kawngka pawh kik lem loin Ropuia a rawn lut hlawl mai a. Min hmuh dun chuan a meng hnual nghal rawihin ka hria. 

."Zanin chu kal ve ila ka tia,. Ka lo sawm dawn che" a ti a. A thu zui nghal zat. 

Saidingi chuan, "Nia, kan kal dawn nia, hei Ruatpuia te nen hian. " a lo ti nghal sawk sawk a. 

Min rawn melh zauh pahin, "Ruatpui, Hlimi a rawn haw kha.." a ti ringawt a. A zahzel tehreng chu aw..lang chiang ta em em chu Hlimi nen kan lo inzui ve zawk hman tih a hria tih a lang, Chuvanga rawn sawi chhuak pawh a ni. Hlimi nen kan nih kha Doctori leh U Rengi bakah Hruaia te bakin an hre lo. Tuman chhaih pawh min chhaih ngai lo, rinhlelhte chu min lo ringhlel mahna le..Hlimi'n a hrilh a nih ka ring ber. An ni pahnih tang dun hian thil fel tawhsa te hi an tikhawbaw leh ang tih pawh ka hlau hlel lo ve. Mahse, Saidingi a nghin loh phawt chuan engmah ka hlau lo ve. 

"Amahin em ni a lo hawn?" ka ti deuh kher a. 

."Amah loin tu nen nge niang?" a lo ti nghut. 

"A bialpa khan amaha heta rawn phei kha a remti tawh lo êm a mawle..a rawn zui phei ka ring deuh a" ka ti mai a. 

A ngawi ta rauh rauh mai. A theih chin chinah tlan khalh ve zel tur. Saidingi chu a va insiam ta a. Ropuia chuan call a dawng, Duati a nih ka beisei. A biak zawhah, "Lo han kal r'u, khutah ka zu kal lawk ang e. " a ti ta chiah rêng a. Ka lo buk nghum nghut. A harhfim chiah lo bawk a, a insum thei ta ngang lo a nih ka ring. Min rawn hnaihin, "Ruatpui, Saidingi nen hian in tha leh em ni!" a ti ta a. 

"Kan chhe ngai reng reng hleinem. Min tihchhiat tumin i thiamthil dandai tak te kha hmang mah la, kan inkar i tichhe thei tak tak lo" ka ti vawt raih. 

"A video i kawl vang a ni zawk lo maw?" a la ti hram a. 

"Duati thlalak i kawla i vau ang khan ka vau ve i tihna em ni?" ka ti ta ngat a. A mitmeng a buai nak. 

"Engtin nge chu chu i hriat?" a ti ta a. Engkim a nih tur ang ni law law tawh se ka duh avangin a hmaa Duati ka biak lawkna ang kha chuan ka kal thei ta lo a ni e. 

"Duati i vau lai ka hre ru alawm. Mahse, Duati thlalak i kawl tak tak si lo va, amah Duati pawn i kawl tak tak lo tih a hre vek tawh..i hmanrua hi a holam viau a ni. Kan khaw nulate hi chutiang mai maiin kaikual suh, Khawtual tlangval kan tam a nia" cho zet hian ka ti ta a. Zep nák emaw amah ka hmuh hian insum hi harsa ka ti êm a ni. 

"Duati nen inzawmna engmah in lo nei lo a maw?" a ti nghek a. Inzawmna nei tak tak ila Doctori ina ka táp rengte hi a ring mawni le. He pa hi Doctori sawi ang khan a chiang tlat tawh lo. Saidingi atchilh luatah engmah a hmu fim thei tawh lo a nih hmel. 

"Duati nen khuan eng inzawmna mah kan nei lo. I birthday zana i chetdan pawh kha kan hrethiam vek. A tirah khan kan sawi duh lo a nih kha..a chhan pawh Duati kha i vau bet ve tlat sia..mahse, Duati thlalak a engamah i kawl lo tih kan chiang tawh a. Tunah chuan tihtheih engmah i nei tawh lo" ka ti ta hmiah hmiah a. Saidingi a rawn chhuak ve chiah. 

"In pahnih hian min lo bum kual char char a maw? Engkim hresa vekin min lo vehthlem vel a. Inhre viau ang" Ropuia mitmeng chu a alh phat mai. 

Saidingi chuan dam thlap hian, "Ropui, mipa takin awm rawh. Ruatpuia nen hian kan inhmangaih a, khatiang tactic thing lutuk hmang kha chuan pawh then chi kan ni lo. Duati pawh i lo vau a, hetia i la chet zui zel dawn chuan Police rawih mai ka tum ania. I nihna te chu zahawm viau mah se, he PHC ah na nà na hi chuan Medical Officer ka ni. Ka hnuaia thawk te mawi lo taka inchet hi ka remti lo" a ti ta sak sak a. Nia, hmehmih thuaia engkim a nih dan tur anga kaltir vat kha a ngai tawh, ka ning tawh. Ropuia chu a mitmeng a buai kher mai. 

"Duati pawh chuan min lo phatsan a maw? Hmeli chu" tiin a hachang a thial a. 

"Hei, eng emaw thil tha lote kha tih i lo tum palh ang e. Hre rawh, mikhual i ni a, khawtual tlangval ka ni thung. Nang leh keia tihtheih chin chu a inang lo viau ang" ka ti nghut a. 

Doctori melh leh daihin, "Tianga min lo vehthlem kual man hi chu i hmu dawn khawp e. I zu rui khawsak dan tenghneng lutuk hi mi zawng zawng hmuh theih turin ka'n tidarh ang e, an hnawtchhuak ngei bawk ang che" a ti thur thur a, a phone a phawrh nghal. A va á tak e aw. A che nawi sàwt bawk si. 

"Tidarh mawlh teh. A holam mah mah, engahmah ka ti lo ve. " Saidingi'n a lo ti hmiah. Kei erawh chuan Ropuia kut chu ka melh ran a. A pattern a hawn rualin rang lutukin ka va bawh rawp a, a phone chu chhuhsakin Saidingi lamah ka vawr phei a, a lo dawng chat mai. Ropuia a rak tuar a, ka bawhbet hmiah, a palian viau naa, thahrui a nei lem lo. Zu a in nasat bakah exercise a la ve vak si lo va. A rui deuh bawk nen, "Zawngkhawro, i va che thing tak..ka phone te min chhuhsak vel a maw? " tiin hnuailam atangin mi rawn vai thuak thuak a, ka khupin a awmah ka do a, a kut veilam ka dawmbet bawk. A mi vaina mai mai chu engah mah ka ngai hran lo. A na lem lo bawk a. Saidingi pawh chuan a tihtur hai lo takin a zu rui lai a lo coverna video chu a zawng nghal mawlh mawlh a, a delete ta a. 

"Lawk, Ruatpui, lo la bawhbet lawk, Duati pic chu ka'n zawng ve hrim hrim, a kawl chu ka ring chuang lo naa" a ti a. A hmet leh malh malh. A hmu ta lo a niang e. "Umm a awm lo, a kawl lo. Blue 

film erawh a ngah hle mai" nui chunga tih pahin Ropuia phone chu dawhkanah a dah a. Kei pawh ka tho nghal. Ropuia chu a rawn ding ve nghal hluai a, thinrim khur hlawk hlawk hian, "In la hre khawp ang. Engmah pawisak nei tawh lo ka nih hi. He mihringnu hi ka neih loh chuan tuman an nei bik lo ang. " a ti piap piap a. Kan melh reng tawp. Hnawhchhuah ngai loin amah chu a chhuak nulh a. 

Saidingi chuan, "Kan fimkhur ve hlek chu a ngaih hmel" a ti zawi sap a. 

"Engmah a ti ngam tak tak lo ange a..a át vek tawh kha" ka ti hmuk a. Dar 9 a lo pel duai tawh a. Duati ka call leh te te a, "Ngaihtha deuhin awm tawh rawh. A phone kan lepse a, i thlalak engmah hmuh tur a awm lo ve. Hlauthawng suh. " ka ti a.

"Tak tak em?" a ti hap a. 

"Aw tak tak. A vau leh che pawn hlau reng reng suh" ka ti a. Ka dah ta nghal. Mitthi lumen tur chuan kan chhuak phei ve ta a. Kalkawngah chuan ka ni te bula ka thusawite chu ka hrilh ve malh malh a. Zawite te hian,"Ka nu nen pawh kan sawi dun tawh a. Ka pa a lo titipui tur thu leh kan inzui ve rau rau chuan a ranglama inneih mai pawi a tih loh thute a sawi ve a. Dik tak chuan Johny leh a chhungte min tham lohna hi a la na ve êm a, Bakah Johny lahin min tihbuai a a sim bawk si lo nen, inphenna tur mipa ka mamawhzia a hre ve bawk a" a ti a.

"Doctor ve meuh chu Officer te pawh i phu sia, min iai ka ring, i chhungte hian" ka ti a. A ding dat, min melh ráw pahin, "An neih tur che ni loin ka neih tur che i ni tihah chiang ang. Tin, kan chhungkua hi chutiang mi kan ni ve lo, Remsiama kha chu a la naupan em vang leh an chhungkaw background vang kha a nia. Nang chu an sawisel che ka la hre miah lo" a ti a. Ka hlim veng veng mai. Min lo iai tehreng pawh nise, amah Saidingi hi chhungte pawh pallui ngam tur khawpa luhlul kha a ni ve tlat a. Ka lungngai tehchiam lo. 

Kan inzui lut chu min hmu duh viau mai. Lehlamah veng a inang lo bawk a, Doctori driver ka ni tih hre lote pawh an awm ve tho maithei, chungho tan chuan keini pahnih inzui ber kher chu a mak viau awm e. Zai a nuam vak lo, Saidingi zai ri chu ka hre mumal lo, a zai ve ngei bawk sia. Daisy leh Danny te pawh an rawn inzui lut ral ral mai. Zep nák emaw khati khawpa a mualpho tawh chung pawha hetia langsar taka a la awm thei hi zaktheilo ka ti! A tha lam zawnga ngaihtuah chuan a tha viau naa...Daisy chu ka rin phak bak a ni. Danny lah hian a duh hmel viau mai a, thiante chúl hnu rih pawh pawi a ti tehchiam lo a nih hmel. A tha reng mai. Apuii leh Malsawma pawh an rawn inchhawm lut ve a, Daisy te bul bak ruak hek lo, hreh hmel zetin an thu a. Apuii hi Doctori ang deuha te fel êt, ngo var mai a ni ve tho a, a luck te pawh a luck ve reuh. Malsawmaah hian a nghet ve zêk a nih dawn hi. An inthen rei thei lo êm mai. Mawng a kham tak deuh hnuah chuan kan chhuak a, zunram kan thiar a. 

"Naktukah Zoteah kal a ngai dawn sia, tlaivar ve lo mai la" ka tih chuan, "Ka cancel alawm. Ka tlaivar ve duh, nula dang i thutpui leh palh ang" a ti fun mai. A thikthu hi chhe miah lo se ka tan a hrehawm tawh zawk ang. Zial ka fawh hlat hlat laiin thingpui lumna sirah chuan an ri hak mai a. Hmeichhe thinrim inhnial thawm niin ka hria. Sadingi chu a hawi phei vat a. 

"Apuii te an niin ka hria" a ti sap a. Hmanhmawh deuhin kan phei hlawk hlawk. Kan rin ang ngeiin Daisy leh Apuii chu an lo indinchilh ran mai a. Malsawma leh Danny pawh an bulah an ding ve ran bawk. 

Daisy chuan," Nanga chanchin kha ka sawi peih awkawng lo ve, ve mai mai che chuan" a lo ti hlar a. 

Apuii chuan "Ka zun chhung lek pawn i lo hrilh ruk sur sur kha. Daisy, engmah hi ka hai lo aw. Malsawm, lut ang" tiin Msa lam a hawi nghat a. Daisy erawh a rawn pawr ta viau. "Lalmuanpui, Malsawma lakah hian min thik a, chuvang chuan hetiang hian min puh a nih hi, i bialpa ang kha chu duh ila inchei a ngai nang" a ti ta êrh a. A zia dawn lo va hriain APuii te bula phei ka va tum lai chuan, mi tawng ve mai mai lo Malsawma chuan ring vak lo hian, "Pawisa hlawh pawn nang ang hi chu ka ngaizawng lo vang, i hlauhawm ka ring" a lo ti nghut a. Daisy a têk ngang mai. "Ve a che, Malsawm, Apuii'n a then lai chea hnemtu che kha tu nge? Keimah,. Zu inna tur petu che kha tu nge keimah bawk. Khatiang kha chuan min ti ve lo mai rawh" a ti hlawih hlawih a. 

Apuii te bulah va dingin, "Haw mai rawh u,..tunah" ka ti ram hmak a. A hunah chuan min hlau thiam thin bawk a, engmah sawi tawh lovin an haw ta nal nal. Daisy lah chu a la àng zui hmarh hmarh a, "A dik lo zawk chu kha an haw mai alawm..ve khanglang a. Ka kawm ve duh kha lawm hle rawh se" a ti tán tán a. A tawngkam a chapo viau. Mahse, Pu Rinawma a rawn kal hnai a, "Nangni pahnih pawh kha haw rawh u, hetah buaina kan duh lo. Zahpuiawm lutuk " a ti chang fak a. Danny hi chu mipa sual leh tihmawh a ni lo bawk a, Daisy chu a mitmei vat. Mahse, Daisy mize dik tak a rawn lang ka ti mai. An thenawmpa Pu Rinawma melh chung chuan, "Ve ringawt a che. YMA president i nih vang ringawt khan min hnar haw thei lo aw. He lai hmunah hian mitthi lumen tura rawn kal kan nih hi..nangni hnar haw mai mai theih kan ni awzawng lo. President tih vanga inlak vak a tul lo" a ti hmiah mai mawle. Aw..Daisy, i ropui reuh mang e. Nge i lo rapthlak ka ti zawk dawn. Pu Rinawma chu pa zaidam tak a nih piahlamah Daisy pa Pu Rinpuia te nen inkawm ve reng reng an lo ni bawk nen, "A nih chuan va lut rawh u" nem deuh hian a ti leh a. 

"I thu lo" Daisy'n a ti ram hmak, a sawi zawh rualin Venglai Branch Treasurer, nula senior u Lateii'n a dinchilh rap. "I va zakthei lo rapthlak ve leh! Hmeichhe naupang zakthei lo tak i nih hir her hi. Khatiang kha hruaitute chhan dan tur a ni em? Khanglang che chuan le..zu kam namin ka tlaivar dawn e te hi intia, zahpuiawm lutuk, Danny, hruai haw vat rawh" a ti ta bawrh bawrh a. Danny nu hi U Lateii ú a nia, a fapa ang a ni ve tho a nih chu. Danny chuan a nuteii a zah bawk a, Engmah sawi tawh loin Daisy chu a kai lawk a, kal pui ta hlawk hlawk a. Kan lo pungkhawm tam hman hle mai. An phun sup sup a, Daisy nasat thu bak an sawi lem lo. Saidingi nen pawh kan lut leh a. Kan rilru a kanghláng a, zai pawh a nuam thei lo. Eitur an rawn sem lai chuan, "Ruatpui, enteh, nichina ka zunnaah khan vangvat ka kai mawni ka ti, ka kap hi a na thak thuam thuam" a rawn ti sar sar a nih chu! A va buaithlak e aw. 

"Tun angah vangvat a awm lo" ka ti nghut a. 

"Nih loh pawn rannung eng emaw a niang, ka tuar ngat ngat tawh. Hiah a rem si lo va" a ti leh a. A mangan hmel viau. A kut veilam chuan a puan invuahthuahna lai atang chuan a rukin a va zen a. A tang tung mai. Ka khawngaih ta deuh a, "chhuak ila" ka ti a. Ka banah a rawn vuan vat. Kan chhuak ta a. Zun in lam chu mi an rawn kal thut ka hlau si, Pi Zahliri fanu te inah chuan ka luhpui ta a, an lo thu nual mai. "In bathroom kan lo hmang lawk aw" ka ti a. 

Saidingi chu a lut nghal zuk. Vangvat awm hun a ni tawh lo va, chutin ka ngaih a tha lo hran lo. Rei tawk fang a awm hnuah a rawn chhuak a, a biang a tai hlar mai. Nuih za si, nui ngam si lo hmel a pu. Min kai a, min chhuahpui sawk sawk. Pawn kan thlen rualin a nui khur ta char char a. A ngaihna ka hre lo hle mai.

"Awiii...a zahthlak zawk. Ka panty tlang a lo sàn a, khami hrui khan ka kap vel a lo hawlh alawm.." sawi pawh sawi tha hleithei lo hian a ti ta a. Ka nui ve huk. A va hahthlak e aw. A nui zo hleithei si lo, kan ding reng nghe nghe. A insum theih deuh hnuah kan lut leh ta a, thil pawh kha mumalin kan ei ta lo. A changin a rawn nui leh hawk zel a. A insum thei lo ve khawp mai. 

Zai lai laiin, "A thak na thuam thuam te khan ka hria a, a chhungah a vak lut nite khan ka hria a, ka tawngtai nasatzia kha aw..ka kekawrte vang vek" a rawn ti sur sur a. Zai zawm chu har tak a ni. Khik vur vur reng lah a mawi si lo, Saidingpui mai mai chu aw..engtin tin emaw khua pawh chu a lo var ve ta mai a. Ka mitthi lumen tawha zan la rei loh ber niin ka hria, ka hmeichhe duh ber ka bulah a thu a ni bawk a. Tawpna hun an siam zawhah kan chhuak ta a, hmun hnawk vel leh eirawngbawlna vel chu an branch thalai te kutah ka dah. An thahnem bawk a. A in thleng ka thlah thlap a, ka haw thlak lamin Tei leh Sawmpuia ka tawk, Sawmpuia zawk chu a lai kher mai. Ka nuihte pawh a za deuh e a. 

Mu tha leh tawh lem lo chuan kawmthlang balhla huan ka zu sam fai thuak thuak a. Pangbal hnah no ka thliak pah bawk. Kei thingtlang tlangval tih takah chawhmeh hi ka duh thing angreng a, pangbal hnah note hi tauh mai mai hian a tui ka ti riau, Ti- uih ngei bawk ila. Nge mawle Nu Thari paw'n behlawi hnah emaw tiin bean hnah a bai ve hlauh tho alawm le. Tukthuan ei laiin APuii chu ka zilh ta malh malh a, thil awmzia ka zawt bawk. 

"Kan thutho lai reng khan, Malsawma bulah , 'Theireh veng tlangval a mengrum ang e' a rawn ti vel a. Msa nen kan inbreak zawk chhung khan Lawma sawn min lo bem ve a, chung vel chu a rawn sawi chhan a nia. A tul lo ve em a ni" a ti hmarh hmarh a. 

"Ani chu ngaihkhatah ngai daih rawh. A inteitê vek tawh saw, tuman engah teh vak an ngai lo. Engtin pawn ti che se khing ve tawh suh, amah ang chauh i ni dawn asin" ka ti ta mawlh mawlh. 

Nupuii ngawi rauh rauh chuan,"Ka la hnuk ang, saw nau saw..ngawi tak rawh u" a rawn ti leh hmiah. 

"Nangmah hi bialpa te lai nei ve tawh si, insual leh tharum thawhna lam hi uar viau suh" ka lo ti hluk a. 

Kan ngawih deuh hnuah Pa Rema chuan, "Mampui, Doctori chu zái ngai i ti deuh ta mi? Len dawn chuan Aizawlah va len a ngai ang..i patea pawh kan hrilh ran a ngai ang" a ti ta a. Ka niin a lo hrilh tawh tih ka hria. 

"Aa..nia, ka hmanhmawh ve deuh thut a, ama lamah harsatna a awm lem lo bawk a. Hetia inzui reng chu mualphote pawh a hlauhawm ka ti deuh mawle" ka ti ve mai a. Tlem chuan ka lai ve deuh. 

"I patea'n saw lam chu buaipui se, keini tan heta tang chuan a buaithlakna chen a awm. " ka ni chuan a lo ti vat a. Ka sawi hreh ruk deuh chu sawi ngaia ka hriat vangin, "Mahse, maw..in hriat angin Doctor a nia. Kan inah chuan rei a awm theih loh hmel a, khitah a quarterah kan han awm te pawh a la ngai dawn a. Emergency-ah kan in a hla si a.." ka ti ta a. 

Pa Rema chuan, "Khalamte chu buaina a awm lo. Khate chu thil nihdan tur alawm..chhungkua kan nihna a bo dawn hleinem. Amaherawhchu, i hriat angin fapa ka nei lo va, nang hi ka fapa ka hrin ni lo mahla, i ni nen kan innghahna i ni tih erawh hrereng la ka duh a ni. I naute hian pasal chhia thate an la nei ve ngei dawn a, chutih hunah chuan mipa fa nge nge chu in pawimawhna a lang thin" a ti dap dap a. A sawi dik khawp mai. 

"Kha lamah chuan in rilru tihah duh reng reng suh u. Amah Saidingi pawn a hai bik nang. Ka fahrah ber laia ka neihchhun in nia, ka thlahthlam che u ring reng reng suh u" ka ti ve ta charh charh a. 

Patea biak phawt chu kan thutlukna a ni ta rih. Lehlamah lo inrem pawh ni ila chuti thut thuta inneih pawh ka ti bik lo, intuak ve phawt te pawh ka duh. Sum khawlsa kan nei tawh mang si lo va, an milian angreng si a, zo taka kan dawl ve te kha a ngai dawn nen. Intuak ve tauh tauh ka ngai dawn tlat. Doctori púr buai ka tum bik lo bur.

Thlan lai turin ka insiam a. Hruaia'n min lo sawm phei bawk. Kan chhuak dun ta a. Thlanmual kan zu thlen chuan an lo la tam lem lo va, kan han thu thlandai ve te te a. Hruaitu te an lo lang har angreng. U Patea hoin kan han lai tan a, fiamthu an thawh leh tan a, kan nui leh ham ham zel a. 

Hruaia'n min lo ko a, "I phone a ri" a rawn tih chuan, ka chho vut a. Tei a lo nia..

"Mam, kan buai lutuk, rawn chho vat teh. Ropuia zu ruiin Doctori a khawih a nia" a rawn ti ta mai!

Chheii! Valtea lah a thianpa accident vangin thlah pawh inthlah mumal hman loin a haw bawk si. Ka thate zuk khur a mawle..

"Hruaia, kal ang, Ropuia'n ka bialnu a khawih" ka ti sup a. Ka mitmeng atangin ka tifiam lo tih a hre bawk a, a tho vut a. Midang pawh chanchin hrilh lem loin a chak thei ang berin kan pen ta páwk páwk a..! 

😎😎