Saidingpuii 11

Dr. SAIDINGPUII (11)

Ziaktu : Toni Rälte

A lo thim thap tawh mai a. Tei kha mitthi lumennaah a la awm bawk si. Valtea te lah Nupuii te nen an thu thap bawk a. Saidingpuii leh Ramropuia te tan chuan Golden chance a ni ngei ang le. Verandaah chuan ka ding vang vang a. Ka va chawkbuai mai mai zawk ang em? Mi inngaizawng awmdun lai ka va tibuai mai mai zawk ang em? Ropuia khan engvanga min rawn call nge a nih ang? Nge min call palh? An thawm leh an awmdan kha ka hriat a duh viau tihna a nia. Min runluih tihna em ni ang? Saidingi khan muthilh a duh thu kha a sawi a. Ropuia hian a sual lui dawn em ni ang? Ka ngaihtuahna chu buai mup mup tak a ni. Kan va intimualpho mai ang em tih thlengin ka ngaihtuah. Mahse, Saidingi laka ka thinrimna leh rilru natna chuan min thunun hneh zawk si a, Saidingi kawngkapui chu ka chum ta dawt dawt a. Doctori quarter hi a han fal deuh vangin an bengkhawn viau a nih loh chuan tuman ka thawm chu an rawn hriat ka ring lo. A hmingin ka ko bawk a, a reh vung vung si mahse, ka beidawng duh bik lo. Ka call ta ngat ngat a, vawi 2 a reject tihin a vawithumnaah a rawn la ta a.

"Lo hawng vat rawh" ka ti nghal tâwng..in chhung lam chu a ri deuh khet khet a. Kawngka chu a rawn hawng ta a. A ruih hmel kher mai. Din pawh a ding ngil hleithei lo. Min hmuh chuan makti hmel pawh a pu lo va, "Eng nge" a ti hlar a. Ka lut a. Kawngka ka kalh nghal. Ka lung a la phu dup dup thei nia..amah chu kapelin a pindanah ka lut hmiah, hmuh ka lo inbeisei ruk kha ka va hmu ta lem hlei lo va. Khum hnuai bakah a bathroomte ka han en kual a, Ropuia hmel reng reng ka hmu si lo. Ka hrilhhai viau mai. Saidingi lah chuan ding bu lúk lúk chungin ka chetdan chu a lo thlir reng a. Tawng pawh a tawng chuang lo. 

"Khawiah nge Ropuia?" ka ti ta a. 

A kut phar kualin, "Ka hre nang" a ti liam puat a. 

"Nichin mai pawh khan min lo call a, in awmdun kha. Sex in hman kha" ka tum loh deuhin ka sawi. Ka thinrim êm a tin ni. 

A nui hak a, tui va in lehin, "Sex a?! Kan hmang a maw? Duati nen in hman ang khan" a ti nghat a.

"Khawiah nge i thuhrúk a? I bialpa chu" ka ti leh tuar. Dik taka sawi chuan hetia a ina han luhchilha han hráwk ngam tur hi ka ni miah lo. Min then tawh a, ka lakah kut a sil tawh, a duh duha awm turin zalênna a nei. Mahse, chu chu ka thlentir thei si lo a nih hi. Mipa ka nihna pawh inhrechang tawh loin ka tlawm nawn leh ta awn awn chu a nia. Ka bialnu ang maia la treat-in a bialpa thar awmna te ka zawt vel chu a ni sia, ka va cheap tak. Mahse, Ropuia min set up danah ka lung a awi lo ve bawk êm a ni. Vawi khat tal chu ka hnek a phu. 

"Ngaithla rawh, hei, min en rawh.." tiin Saidingi chu ka vuan a. Min en ve mai, a mitmeng erawh a dava riai thung. 

"Ropuia nen hian inkawp in duh a nih pawhin kei kha tihnata khatia set up kual vel kher kha ka ngai em ni? Ka lakah i thikthu a chhe em em a,rinawm ber niawm takin. Mahse, Ropuia lakah chuan ka tê leh hle sia.. Hetiang i nih hi ka ring phak lo asin. Mahse, ni e, i duh i thlang a, Ropuia i thurualpui a. Kei pawh i duh ang takin ka awm ang. Zu erawh khawngaihin in tawh lo hram la ka la duh fan e" ka ti ta charh charh a. A mitmeng mumal vak lo mah se, min ngaithla tih ka hria. Ropuia chu a inah hian a awm si loh chuan nichin lawka a lo call zawh hnu lawk khan a haw tihna em ni ang? Nge hmeichhe nui kha Saidingi angin ka ngai vek tawh zawk. 

"Chhuak rawh. Tenawmpa,. I mi ngaih ang kha ka ni lo ve. Ropuia a rawn kal bawk lo. Ani chuan ka hmaah thudik a pholang a, mi tha tak a ni. Nang chuan hmeichhe dang mutpui i duh avangin in atangin min hnawtchhuak a, Zu ka nghei theih nan chauha min ngaizawng i ni tih i puang bawk a.Tunah thiam i chan theih nan min rawn mawhpuh tum suh. Duati kha nei la, a inhmeh pawh in inhmeh tawk viau e. Kei leh nang chu a tawp tawh. Min ngaihtuah angin awm tawh suh. Zu pawh ka nghei dawn lo,ka la in dawn chauh..Johny ang chauh i ni..Johny nen rank khat in ni..haw vang vang rawh" Sehchilh deuh nawk nawk hian a ti a. A rui hle naa a thusawiah chuan a chian ngam hmel khawp mai. Ni e, ka inrawlh lohna turah ka han inrawlh niin ka hria. Ropuia'n a thluak a su hneh tawh em mai. Bakah nizana ka chet dan kha amah Saidingi tan pawh enliam chu a lo har ve bawk ang. Hrai ruih ka ni tih tal chu a rinthiam ka lo beisei asin le.  

"Aw le, ka zuk haw ang e. I duh dan ang tak chuan ni rawh se. Mahse, ka rilru dik tak erawh i la hre tho ang. Ropuia thangkamah ka awk palh a, nang lahin min rinna chhete mah i nei si lo va. Kan tawp dan tur hi ka lungawi lo khawp mai. Mahse, hneh tum chein ka buan ka buan tawh lo vang che. I duh dan kha ka laltir ang. Mang tha le" ka ti ve sak sak a. Ngawi rengin ka chhuak ta a. Haw thla mai loin kein Ropuia quarter ka pan ve leh ngat. Fiah reng reng ka duh. A lo thim thap a, thawm reng reng a awm lo. Tin, pawn lamah kawngka a lo inkalh bawk. Ropuia chu a inah a awm lo va, Saidingi inah a awm ngei ang. Saidingi khan a thukru tih a chiang reng. Ni e, hnawl ka ni ta tih ka pawm a ngai. Ka bansan loh theih lohna tura an thangkam, keimah ka inthiam lohna tur thil ni bawk si hmanga min awk hi an lawm viau ngei ang le. An duhdan chu engvangin nge ka zawm mai bik loh ang? Mipa ka nia lawm le. Ka theihtawpin sawifiah ka m tum tawh a, rin ka nih loh miau chuan ka tihtheih a tàwp tihna a nih mai chu. 

Mitthi in lamah ka let leh a, Hruaia chu chabi ka pe a. Ka hmel landan vang nge engmah min zawt lo. Pawn khawvawtah kan thu char char naa, ka lum pup pup tho. Ka chhungril ber thleng hian ka na a, mipa e ti lo chuan tah hawm hawm ka chak a. Ka dinhmun leh ka fahrahna te mi dangte anga inbawhbehtira mahni inngaihhniam hi ka duh ngai miah lo naa, Zanin zet chu ka ngaihtuah lo thei lo. Kha chen ka ní te leh ka pa min zilhna zawmin ruihhloah ka fihlim a, nulat tlangvalna kawngah ka hlei hek lo. Driver phawkphawhraw pui puite nena kan inkawp lai pawn eng anga hun fianrialah pawh ka inveng ve thin. Ka ní te pawn engkimah min ringtawk rêng a. 

Ngaihzawng pawh ka dinhmun ka siam ve hma chuan nei lo law law ang ka tih laii Hlimi a rawn lang a. A duhawm ve êm a, tin, a zeihawi bawk nen. Tikhan ka inhnimphúm chho a, mahse, tawnhriat ka neih lohna chu remchanga hmangin tikhan chiang kek kawka bum ka ni a. Ka talbuai ve tep nghe nghe a nih kha. Ngaihzawng lamah ka harh chho a, Doctori a rawn lang a. Then leh mai mai tura ka ngaihzawn loh laiin ka nun tichêp tur khawpin a thikthu a chhia a, mahse, ka duh êm vang leh ka phu loh êm vang pawh a niang ka tlawm zel a, ka thinrimna leh lungawi lohna lah ka pai reng ngai hek lo. Tihlawm leh tihlungawi theih loh ka ni ngai lo va, khang ka tlawmna te avang kha nge ka dinhmun dik tak, Fahrah ka nihna vang zawk tunah rah hrual ka ni leh mêk a. Kei aia dinhmun tha zawk Ropuia chan a tha mek a, engkim kha ka duh vanga thleng a nih lohzia hrethiam tur pawh amah Saidingi a nih laiin a thil hmuh tlemtê avang maiin thutawp a siam a. Insawifiahna hun min pe hek lo. Zu a in nghal zat a, keimah vanga na anga lan a duh ve te pawh a niang e. Mahse, kan inthen chauha Ropuia zu a inpui nghal a nia. Mipa dangte hian engtin nge an dawnsawn ang tih ka hre lo, kei tlangval hawiharh lo leh zei em em lo tan chuan a tawp chiang viau. Han beih leh vak dan tur ka hre lo, a nih ang anga ka enliama ka pawm ve tawp mai loh chuan. Nupui atan pawha ka lo suangtuah thin hmeichhia chuan min kalsan ta chu a nia. 

Ka dik lohna leh thiam lohna te pawh ka chhui let lo bik lo. Ni e, ka nu vanga min ngaizawng mai mai anga ka ngaih vanga ka thinlung natzia ka ngaihtuah chuan, Zu ngheitir ka duh vang chauha ngaizawng anga ka insawina kha Saidingi te ang hmeichhe induhtawk tan chuan tawrh chu a har ve ang. Mahse, ka ruihzia hmutu a ni. Zu ka in ngai lo tih hretu a ni bawk. Hrai ruih ka ni a, ka chungah dik lo takin an che a, min kai kual tih kha fim taka ngaihtuah tur a nia sin. Khang ka thil sawite kha chu a edit theih, khatiang sawi tura min vehthlemna te kha a paih vek theih a, thudang ka sawina lai pawh a cut theih. Chungte chu ti nge fiah a tum loh. Duati nen mutdun luihtir kan ni tihte kha vawi khat chauh tal ngaihtuah se ka duh a ni. A ngaihtuah lo va. Ka nawrlui lo vang. 

Zing dar 4 velah ka awm nuam lo lutuk chu ka thu lui thei ngang lo va, ka haw ta ringawt. Venglai atangin kan veng a hla tawh lo bawk a, kein ka phei hnak hnak a. Ka inngaihtuah tui a talàngin ka mi tawhte pawh ka lo hrechang lo a lo nia. 

"Ruata..Ruatpui" a rawn tih láng lang chuan ka harh zawk. Ka hawilet zuk a, Hruaia u U mawipuii te an lo nia. 

"I va ngaihtuah ril awm ve, i haw dawn mi?" a ti a. 

."Aw, ka awm a nuam tlat lo. Ka va mu mai teh ang" ka ti nghut a. Ka kalsan zui nghal. Venglai leh kan veng inrina lai ka kal lai takin Theireh veng atanga nula leh tlangval niawm tak lo chhuk dunte chu ka han hmu a. An rawn hnai zel a, Daisy leh Danny an lo nia! Ka nui hawk. Inkawp daih se a tha zawk daih rêng a ni. Daisy chuan biak pawh min be ngam meuh tawh lo, pawi ka ti lo nasa. In ka thleng a, thawm dim takin ka mu ta hlun a. Mutchhuak erawh a awm lo. Ka phone ka khal ka khal a. Doctori nen kan inbiakna tlemtê chu a bul atangin vawi 3 lai ka chhiarchhuak. Ka ngai a, enghelh nei miah lo va a bula ka awm lai hun kha ka ngai a ni. Huat ka duh a, huat theih lohna tur tingtangin tihsual ka lo nei ve bawk si. Amah ka ngaihzawn theih avang khan mi dang laka han inchhuan emaw han chapo riauna kha ka nei ngai hauh lo naa, zep nák emaw ka inrintawk phah viau thung. Tunah chuan ka inhmu tê leh ta ngawih ngawih chu a nia. He ka rilru kal kawi hi ka hneh chu a ngai ka ti. Ka hriat loh karin ka lo muhil ve mial a niang. Ka harh chuan dar 8 a lo ri vah tawh. Mut kha ka lo mamawh nasa a nih ka ring. Ka harh chiang kek kawk bawk a, ka tho ta vat a. Ka hriatchhuah hmasak ber erawh Saidingi bialpa ka ni tawh lo tih hi. A la na dawn chauh nge ka tuar liam ve thei ang tih chu hunin a hril ang chu. Ka va chhuah phei chuan ka ní leh Nu thari an lo titi bawrh bawrh a. 

"Khawiah tak awm ang maw? Kei ka hlau riau asin. Pawisak a nei dawn lo nasa sia" Nu Thari chuan a ti bawrh bawrh a. Tu chungchang nge maw an sawi le..

Ka ní chuan, "Mampui, i hre ve tawh em? Rinliana tlanbo thu chu" a lo ti ta var a. Ka bangbo rei lo e. 

"Hre nang, a tlanbo a maw?engtin?" ka ti hú a. 

"Nizan khan Police te kha an rawn thang rei angreng sia, dar 12 dawnah an lo thleng chauh a, Kan khaw pelh lawkah sawn Rinliana chuan zun a dil a niawm e. A tlanbo an ring lo nge an lo enzui vak lo a niang. Ramhnuaiah a pilbo daih an tia. YMA lam pawn in zawn a ngai maithei vawiin lama"' Nu Thari chuan a lo ti ta zung zung a. A va mak dawn ve aw.

" Zote lamah an zawng em le?" zawh bik pawh nei lo chuan ka ti a. 

"Zawng ang, Zote lam khawtlang hruaitute an be pawp nghal a. Mahse, Zote khaw lamah a tlan bo ka ring lo. A mawl bik lo va" Nu Thari bawk chuan a ti leh a. A sawi dik reng mai. Rinliana zet chu aw, amah hringtunu nunna hial a la a, hremna hmachhawn ngam loin a la tlanbo zui a. Nu Thari sawi angin YMA pawh Venglai Branch tih loh chuan Rinliana kan zawn a ngai maithei a ni. An branch hi kan khuaah an lian ber bawk a, an indaih thei thoin a rinawm. Rinliana chu kan hmehmih vat loh chuan nunau tan pawh a hlauhawm dawn tlat, hmanrua a neih phei chuan..hmai ka phih zawhah nilum ka va ai mai mai a. Rinliana chungchang bak sawi tur an hre vak lo a nih hmel. 

Rin ang ngeiin Information mike atangin an rawn au ta a. Kan Veng Lalveng Branch leh Vengsang Branch te'n RInliana chu kan zawng dawn a nih awm chu. Branch inthen dan hi ka'n sawi lawk ang a, Venglai leh Vengchhak leh damdawiin tlang hi branch khatin a huam a. Vengsang leh Theireh veng te hi branch khat an ni leh a. Lalveng leh vengthlang hi branch khat kan ni bawk. Venglai an lian ber a, keinin kan dawt. Mahse, thingtlang khua tih takah chhiat niah chuan mipa lam phei hi chu kan intawiawm deuh zel tho. Nula lam hi an han inla hrang deuh zawk a. A tul hunah erawh kan thawkho leh vek tho a ni. Tukthuan kan ei a, Kei leh Nupuii chu hnatlanga chhuah kan tum a. Ka ní te nupain min zilh leh malh malh mai. 

"Fiamthu zahmawh leh phawkphawhraw deuhah te khan in zuk nui uar uar ang e, thil mawi a ni lo a nia. Amah Rinliana in lo hmu ta a nih pawhin Mampui, a kut za zingah tel ve loh a tha aw. Insumtheih hram hram tum tur..Rinliana pawh a rilru a hrehawm ve viau ang. A nu thihna hian a nunte siamtha se a lawmawm tur hi a nia.." ka ni chuan a ti mawlh mawlh a. 

"Mahni nute ngei thattu chu Pathian pawn a ngaidam duh lo vang' Nupuii'n a ti hmuk. Kha lam kha chu kan sawi zawm tawh lem lo. Ka chaw ei a tui lo tlat hi ka duh lo. Rilru nat vanga chaw thlahte hi nep ka ti thin sia, Ka insanmar vat chu a ngai dawn a nih hi. Chaw lian tawkin ka niin min funsak a. Kan insiam nghal mawlh mawlh mai. Hnatlang pawh kan thawk chhuak tha leh viauin ka ring. 

Ka lukhum ka zawn lai mekin Hlimi'n a lo call tehmial a. Whatsapp lamah chuan min rawn be deuh reng nain ka reply mumal lo va. " hello" ka tih chuan, "Ruatpui, I va induh ve a" a rawn ti a. A va hun chiah lo e aw. 

"Induh mawni le..hei kan hnatlang dawn a" ka ti mai a. 

"Doctori nen in inthen tihte ka lo hria a" a rawn tih chuan ka ding ngil zawt. Engtin nge a hriat? 

"Tu nge sawi a?" ka ti nghut a. 

"A sawi tu lehzel ka sawi ten kamtam ka ni dawn asin. Tak taka a zia lo e, Ropuia chu i khan lo deuh a ni maw?" a nui naa min tawngkhum dan khan mei a nei tlat..min tham lo riauin ka hre bawk. 

"Doctor meuhte chu keini tluk phak rual an ni hleinem" ka ti ve mai a.

"Ropuia a rawn awm dawn tih ka hriat atang khan boruak eng emaw a awm ka ring rengah..Saidingi hi a atchilh thin êm a. " a ti ta a. Hlimi chu ka be zui chak leh ta tlat. 

"In lo inhre tawh a ni maw? Ropuia te nen chuan" ka ti puat a.

"Lehkha kan zir ho thin alawm. Ayush doctor a ni daih hi mak kan ti asin aw. Khanglai vel pawh khan doctori kha a star tawh alawm. A duh thei rap' a ti ve ta zel a. 

" A nih Doctori nen hian an inhre sa em ? Heta a rawn thawh hmain an inhre tawh em?" fimkhur ru tak siin ka ti a. 

"Ka hre lo chutak chu, hriatsa ka ring. A rei ve tawh a, Ropuia hian a hmain a biak tawh ka ring." a ti a. Ka phone ka hum nghet hle. Ka insehruh bawk.

"Um a nih chu a! Chutiang khawpa a lo atchilh tawh a nei thei tur chu a lawm ngawt ang chu. An lawmpuiawm ti tawh mai ang" ka ti hul hak a, ka nui lui bawk. 

"Mahse, Doctori pawh nangmah nen in ni reng a, hetia mi dang a kawpsan leh daih si che hi ka dem ve tawp.. " a rawn tih chuan, "Ka phu ve lo lawm" ka ti zauh. 

"A ho lutuk, lungngai mahta che, ka rawn kham bek hunah nun bul kan tan leh dawn nia.." a ti ham ham a. Min hnem a tum ve dan chu a dangdai thei. Amahah ka tui tawh hlawl lo tih a hrethiam lo mawni le..

"Lo let vat rawh" ka'n ti ngawt a. Sawi tur ka hre tawh bawk si lo va, ka off daih. A rawn call nawn tawh em lo vang chu maw..Nupuii nen hnatlang tur chuan kan inzui chhuak ta a. Innghahkhawmna hmun kan va thlen chuan rin aiin kan thahnem. Police lam pawh an rawn thleng a. "Ekhai! Hei a zia lo khawp mai. Min puih mai loh chuan keini lam lah thil dang vangin kan buai ve neuh neuh thin si a, in tlawmngaihna a hlu hle mai" an ti ve mawlh mawlh a. Hruaitu ten group 6-ah min then ta phawk phawk a. Keini lam chu Zote leh kan khaw inkar mual lam kan kal dawn a ni. Lalnuna nen kan inchhawm a, ani hi pick up khalh, kan khaw tui supply tu regular ber a ni a. Tui hi thal lai chuan kan nghei lek lek fo a, tuikhur lah kangchah hun a lo nei ve bawk nen. Lalnuna te ho hian Zawlsei leh kan khaw inkar lui ami an va chawi vang vang zel a. An zarah nghei loin kan la awm ve zel chu a nih hi. A titi bawrh bawrh a, a thing rim a nam hum hum bawk. Engahmah ka ngai hran lem lo. 

"Daisy vel kha ka lo hre ve chauh a, kan nuin a sawi a, ka nuih a za zawk lutuk a. I khing let duh lo kha lehlamah chuan ka lo ngei lek lek che alawm" a ti sur sur a. Mi dang ho nen chuan kan inhlat deuh hlek a, an hre pha kherin a rinawm loh. 

"Aa..khinlet kha anmahni ang chauh kan nihna laite a awm a. Vantlangin thudik a hre tho a, kan ti duh ta lo a nih kha" ka ti ve mai a.

"Nizanah pawh Danny nen chuan an rawn inkawp rawl rawl kha. He nau hi a tleirawl chhuah phat atang khan a za tlat mai a, a thanthi neih hma te hian an lo khawih tawh emaw ni ka ti rum rum nia" a ti leh a, a hawi ve zuk zuk mai. 

"Ringawt a che. Fimkhur rawh, Daisy nu mizia i hriat kha. Bakah thanthi neih hma pawn lo khawih se hur hlenna a ni hleinem.." ka ti ve mai a. Ni e, mizoten emaw kan tih tlat thil, kan zeldin zuia kan ngaihbel zui thil hi a awm ve a. Tar át leh tleirawl sual nei hnam kan ni ka ti mai. Emaw kan tihna hian min bawhbet hneh êm a, Chutiang chiah chuan thanthi neih hmaa mipa paŵl chu hur hlen tura ngaihna kan nei bawk. Kei ka vannei a, helama inzirtirna leh inhrilhhriatna lam hi ka chhiar peih ve fú roh a. Mithiam leh doctor tam takte thutlukna hi ka ring zawk daih. Mipa laka insum thei lo, hmeichhe buanchak lo kan tihte hi an hur luat vangte, mipa an mamawh em em vangte a ni hran lo. A tam zawk hi chu ka thianghlim tawh chuang lo tia engmah pawisak tawh lohna neite an ni a, a nawmna lo tem ve tawh tingtang si, insum tul ti lo law law an ni bawk. A hranpain mipa hi mutpui turin an va sawm hiam hiam lo vang. Naupang kum tling lo, thanthi neih hmaa pawngsual tawk emaw a duh vanga sex hmang emaw, engpawhnise, a tam zawkte ngaihdanah chuan, "A piangsual hlen dawn a nih hi" tih hi a awm fó! Chu kan ngaihdan chu vanduaina tawkte thinlungah tuh a lo nih chuan,anmahniah inrintawk lohna, piangsual leh mipa ngai tura inngaihna a piang cháwk..rilru hian mihring hi a kaihruai thui thei nasa si a. Kan inzirtir tam hi a hun tawh hlein a lang. 

Lalnuna chuan, "Daisy te pawh an awm chet chet a, pawnlamah te chuan zakzum awmtein an lang a, tiang ho hi an hur duh" a ti leh phawng mai a. Hei pawh ka ngaihdan letling daih a ni. 

"A ni kher lo asin, Lalnun, hmeichhe awm chet chet. ,awm mual mual an easy tihte chu tih ve mai mai alawm. Hetiang hmeichhia hi chu an zakzum tlangpui a, ngaihzawng pawh an nei ngam mang lo. An neih ve chhunah tawnhriat nei ta lo nafam chu an nghet tlut a, an hmangaihte tan an inpumpek ta mai zel a. Indanna damdawi tih vel hre ta lo chu rin loh deuhin an rai nulh duh a, easy emaw kan lo ti ringawt alawm. A nihna takah chuan hmeichhia harhvang leh ngaihzawng pawh nei ve deuh reng, zu pawh in ve thei maite hi an va hur chu ka ti lo, Hmeichhe awm mual mual ai chuan fight pawh an nuam daih zawk lo maw?nang phei chuan tawnhriat te pawh i nei zawk ang a" ka ti ta bawrh bawrh a. A ngawi run run a, "Nia, i han sawi takah chuan a dik viau bawk si. Aa..mipa te hi kan dik lo alawm tiraw, kan neih duh loh tur pawh mutpui hram hi kan tum zel a. Kei nangte hi ka ngaisang teh mai che nia, hetiang kumah i la virgin thei a nia" a ti ve leh ta duah a. Lalnuna ka lo kawp chu ka chhungril na te pawh hrechang lo lek lekin kan titi thei a. Ka lawm viau mai.

Rinliana chu a váng viau mai a. Kan thawm hriain a biru ve ngei awm bawk si. A rilte pawh a tam ve viau tawh maithei bawk a. Zote khua nen kan inrina laiah hian lui pakhat a luang tlang a. Zo lui kan ti mai a. A len lem loh vang hian kan tlawh zen lem lo. Tlema nau zawkten chakai chhit nan an hmang thin. Lui dung chu kan zawhthla zel a. Hnuhma awmte kan han zawng a, kan hmu lem lo. Lui kam ding leh veiah kan inthen leh phawk a. Lalnuna nen kan la kal dun zel e. Chakawk hmun kan pel a, changel hmun kan luh chuan kan hma zawn hlam 20 vel àwmah thil che zeuh hi ka va hmu ta a. Ramsa eng emaw ber pawh a ni thei tho. Mahse, ka pen phei páwk páwk a, changel kung chu kung hnih a tlu nghe nghe, tumbu lakna hmuamhma pawh a la thar angreng khawp mai. Kan mi zawn mek riltam hian a la a ni maithei asin. Che zeuh ka hmuhna lai hmun ka thlen chuan ka ding a, mi dang chuan a chhak tlang thingkungte chu an lo thlir kual a. Changel kung chu a bit ve riau a, tin, a hmunhma chu a rem tehchiam lo bawk. Dinglamah chuan ka phei a, ka ding vung vung. Veilam kawngtum te takte ka va hmuh chuan rang takin ka zawh vat a, kawngsir hnim zinga tumbu kawr lo awm zeuh zeuh pawh ka hmu ta. Kawngtum chu ka zawh zel a, Lalnuna'n min lo au lung lung zui, ka chhawn duh ta rih lo va. Chu ka zawh mek kawngtum chuan lui kawr tui awm tawh lohna a pawh hlawl mai. A roin a hnimte pawh a hnim bum mai. Ka chem ka phawrh a, eng emaw thutah tia ka inrin ve ngaia ka hriat vang a ni. Lui kawr chu ka zawh a, tui a awm lo bawk a, kal a harsa lo. Vaukam dinglamah chuan phaihek hlai pui pui hi a ding sung mai a, a karah anchiri leh thiallawn a inzep thliah thliah bawk. Chu lam hawia ngun em ema ka thlir lai chuan ka hriatna thazám ten ka hnungah ding an awm tih min rawn hrilh niin ka hria, hawilet tuma ka inher rualin ka tukhum a ri dup a, arsi a leng chuai nia! A thim ta mup mai. 

"Mampui, mampui.." ka ní aw chu hla tak atanga lo ri ni hian ka hria, a lo hnai zel a. Ka beng bul maiah a ri ta a. Men ka tum a, ka mit chu a phui tlat ni hian ka hria a. Ka han insangmar leh thin, tihtakzeta ka beih hnu chuan ka meng ta sêt sêt a. Engmah phei chu ka hmu lo, a êng em em ringawt. Ka dang a roin ka tui a hal huam huam mai lehnghal a. "Tui' ka ti ve ni chuan ka hria. Ka ka chu tu emaw hian a rawn keu ang a, tui chu a rawn far lut ta a, ka khawpkham lo ngei mai. Tui ka in tak vang nge ka mitmeng pawh chuan awmzia a nei ta deuh a. Ka meng chiang thei ta. Ka ní leh Nupuii te ka hmu hmasa ber a. Ka lu zawna Saidingpuii lo ding reng pawh ka han hmu thei ta. Doctor kawrfual var a ha a, a sam a tawnsang vah bawk. A nui lo va, a túm hek lo. 

" Eng nge thleng?" ka ti sup a.

Ka ní chuan, "Rinliana khan a lo lambun che a, i tukhumah a hlap a, i hnungzangah a chhuih bawk. Rehhlum che a tum lai takin Lalnuna ten an rawn nangching ta a, an chhan hman ta che a ni. Rinliana pawh an man fel tawh e" a ti dap dap a. Ka chil ka lem khawlh, tlema tlemah ka thi lo chauh a nih chu a. 

"Tunah hian zan nge tlai" ka ti hú a. 

"Zan dar 8 a ri chiah. I tukhuma a vuakna vang khan i harh thei lawk lo va, an zawn hawng che a. Tunah i lo harh chiah a nih hi. A na em? I tukhum chu" Nupuii'n a lo ti vat a. 

A va zahthlak e, zawn haw ngai khawpa ka han awm chu aw. Min hlap na viau a niang, ni e, ka hriat hnuhnun ber kha a thim mup kha a ni mai a. Ka hnungzang a chhuih leh min rehhlum a tum lai chu engmah ka hre zui lo tlat a ni. 

"Chuan, damdawiina ka awm a ngai lo vang tiraw?" ka ti leh a. Ka chák hlawl lo a ni e.

Saidingi chuan, "Zanin chu riak rawh. I la chau rih em mai" a lo ti dam thlap a. 

"A nih chuan Nupui, min riahpui rawh aw" ka ti vat a, a lo bu nghat. 

."Chaw ei la, Mampui, i ril a tam em?" ka niin a lo ti a. 

"Ka ei lo mai ang. Engmah ka ei chak lo" ka ti nghut a. Ka ni chuan min rawn hnaih hratin, "I nute pawh nichin lawk khan an rawn thleng a, an ni pawh zanin chu an riak dawn a niawm e" a ti sar sar a. Ni tak, an lo haw dawn tak kha mawle. 

"A tha em? Ka nu chu" ka ti vat a. 

"Aa..cancer khan a lo fan hneh tawh êm a, nikhua a hre vak lo, a tawngvai deuh reng mai" ngui zet hian a ti a. Ka chhing sawk mai. A kal hma ngeia a kut vuana , "Ka nu" tih leh theih ka duh. 

"Min hruai ru, a bulah" ka ti vut a. An che suau ni maiin ka hria. Doctori a rawn kal hnai a, "Zankhua hun i la nei alawm. Tunah rih chuan drip khai phawt ang. I chau rih lutuk, chaw i ei bawk si lo" a lo ti vat a. Zuii a rawn lut a, drip khai tur a siam nghal mawlh mawlh. Han hnial vak kha a nuam si lo va, ka dawh ve ringawt. Ka lu na vung vung leh ka hnungzàng kham erh urh chu ka hre reng. Mahse, tawrh theih loh khawp a ni lo bawk a, ka sawi chhuak duh bik lo. Ka ní leh nupuii te chu mutbu vel la turin an haw leh phawt a. Valtea'n a u motorin a zuk hruai dawn a niawm e. A zia lo e, Valtea te lo zin pawh vawikhatmah ka la ramvahpui si lo, an rawn zin chhan ve ber kha a ni sia. Ka inthlahrung ngei mai. Saidingi nen chauh kan awmdun ta ran a. Kan ward-ah damlo dang an awm ve bawk si lo. 

"I thi teuh kher mai" a ti hap a. 

"Thi ila a tha zawk tur" ka ti chhum hmuk. Mi rawn melh háw a, "Engvang chuan maw?" a ti a, a aw a khur deuh. 

"Sihal pahnih tenawm deuhte hmuh fo loh hi a nuam dawn êm a" ka ti sup a. 

A ding khawng lah mai. "I tihdik loh pawh pawm ngam loin keimah zawkte chu min la burbun zawk a. Ni e,Zu ka in loh nan ringawta min ngaizawng der peih ai chuan, hman atanga min lo duh ngat ngattu sihal pawh chu a tha fe zawk ang. " a ti ta nghat nghat a. Inhauh mood-ah ka awm lo va, ka peih lo bawk. Muthilh daih ka duh avangin, "Aw le.." ti chiahin ka chhang. Ka maimichhing ta daih a. A chhuah lai pawh ka hre lo, ka lo muhil zui daih a niang. Valtea tawng thawmin min tiharh a, dar 10 a lo ri tep tawh. Khum lehlamah Valtea leh Nupuii chu an lo thudun ve ran a. Ka harh takah chuan ka zun a chhuak sia, zun nghal law law ka duh si, va tihbuai ka hreh deuh bawk si..mahse, ka che vel an hmu nge, Nupuii a rawn phei vat a. "Mam, i zun a chhuak ami?" a ti var a. Ka lo bu nghut. Valtea nen chuan min tung tho a, ka thawhkan chiah khan ka hliam chu ka hrethiam chiah, ka tukhum chu a tur ut ut mai. Ka hnungzang lah a na lai ber pawh sawi theih si loh hian a na thúm vek mai a, ka tukhum ai chuan tawrh chu a la nuam deuh e. Zun in thleng min kuah phei a, engtin tin emaw ka va inthiar ve ta hram a. Ka thawl hawk nghe nghe. Zial ka zu chàk sia, Valtea chuan min lo theh vat, verandaah chuan ka zu ta ringawt a. Min rawn hmu êm lo vang chu maw. 

"Kan lo zin hian chhiatna kan lo keng a niang a..ramvah chu sawi loh kawm pawh kan la inkawm tak tak thei lo a nih hi" Valtea chuan a ti bawrh bawrh a. 

"A zia lo khawp mai. Mahse, ka tha vat mai ang. Zanin bak ka riak lo vang. Lo la cham rih phawt teh u" ka ti ve mai a.

"Puia chu vawiin khan a haw. An buai ve deuh bawk sia, kei erawh cham chhan tur tha deuh ka la nei rih sia" nui vur vur chung hian a ti a. Ka lo nui ve ringawt. 

"nia, cham reng rawh nang chu..kan la ramvak em em ang,." ka ti a. Zial ka zu zo ta bawk a, ka khum lam pana kan kal laiin Saidingi hi hmanhmawh fe hian hmeichhe ward lam panin a rawn kal a, a thlabar hmel riaua ka hriat vang leh ngaihbel tur thil ka neih bawk si avangin, "Saiding, engkim a tha em?" ka va ti tuar a. Min rawn melh zauhin," I beisei phawt teh ang" a ti zawi sap a. Ka ngaih a va tha lo tak. 

"Lawkin, ka nu a ni maithei, va ngaihven ve lawk ang u. " tiin ka pen pui ta a. Pindan pawnah chuan a makpa leh tlangval pakhat an lo thu a, kan thut rei hmain ka nu unaute an rawn lang ve bawk. Ka farnu kha a rawn inhnit hlap hlap a, a pasal chuan a lo kuah vat. 

"Ka nu chu engtin nge a awm?" ka lo ti tial ruan a. Min rawn melhin, "Ka u, va hmu ve rawh,a dam lai hmel i hmuh hnuhnunber pawh a ni maithei asin" a ti tham tiak a. Ka tho zawk, ka lu a la hai deuh chhulh vangin Valtea'n min kuah a. Rem leh rem lo chuan kan inhnawh lut ve ta a. Khuma mu chu ka melh tlawk tlawk mai. Ka nu, min hringtu, kei leh ka pa vanga dinhmun derthawnga dinga keimahni vanga tual hial that ngam ka nu chu a meng naa, a mitmeng chu a à ruai mai a. A ban veilam chuan a puan tlang chu a zút zút bawk. Saidingi chuan Oxygen chu a hnarah a han vuah sak a, chungte chu hre awm pawn a lang tawh lo. A phun sep sep a, a tawngri erawh hriat hleihtheih a ni lo. Ka nu pasal chuan min hmuh veleh, "Lo thu rawh" tiin thutna min kian vat a. He pa hi pa tha tak a nih dawn hi a. Lo hnial buai loin ka thu thla vat a. Ka nu kut vuai leh cher em em chu ka chelh a, ka hum a ,ka hmer vawng vawng mai. Ka farnu leh ka nu pasalte chuan an ko reng bawk a. Ka nu u pawh rawn lut vein, "Ka nau, intipachang rawh aw. I chhel èm kha" a rawn ti a. A lung a chhiat ve hmel hle. 

Ka nu chu a tawngvai leh ta niah niah a. Ka zuk kun hnai deuh a, a sawi pawh chu ka hre thei ta. 

'U Rin, min hruai tawh mai rawh aw..an ni chu ka ngaihtuah lo. Bawiha, mamte, i va dam tha tawh ve. Min lo ngai tawh maw. Kei pawh i tel lo chuan engmah ka ni lo. Ka rawn kal vat dawn e aw. I pa rina bulah khan i him ang. .u Rin, Bawiha nen pawh kan inhre tawh asin. Ka nu tiin min ko tawh..engkim ka la hrilh vek ang che.." tiin. Mipa hi pachan a va har tehlul êm. Ka pa thih khan rei tak ka enkawl tawh avang khan chutin ka tuar na em em tawh lo. Ka sún lawk ka ti mai. Mahse, ka ngaiin ka theihnghilh ngai lo. Ka nu erawh ka enkawl ngai lo va, hmanni lawkah kan inpawh ve chiah a, a tawrhna leh harsatna a tawh zawng zawngte ka hre ve chiah a, tihian min liamsan leh mai dawn chu a ni sia! Ka enkawla a duhthusam ka tihhlawhtlin ve hmain..chu chuan ka thinlung hi chemte zuma chhun ang maiin a chhun na a ni. Ka lo luhlui reiin ka lo huat tawhna zawng zawngte khan min phelhruak a, inchhirna leh ka nu ka khawngaihna chuan hliam tawrh harsa tak min siam lo thei lo a ni.

"Nu, i fapa hian ka la mamawh che asin. Kal suh aw" ka ti khur dar dar a. Ka mitah mittui a tling pum bawk. 

Ka tawng chu hre awm pawhin a lang lo va. A kut chu nghet zetin ka hum ngat ngat. 

"Nu, i kal a nih chuan ka pa kha ka ngaih thinzia lo hrilh rawh aw. I fapa ka nau nen ka pa te nen khan lei lam ngai miah loin lo hlim ru aw. He lam chu ngaihtuah suh, ka naute leh ka pa chu ka lo enkawl ve tawh ang e" ka ti leh nghut nghut a. Ka hnukulhzia chu thup pawh ka tum buai peih tawh lo, ka taksa nà te pawh engmah ka hre tawh lo. Ka nu natna chu a na êm a, a fapa rualbanlo hmanni lawka liam ta a ngai em em bawk si, a taksa natna lah nachhawkna chak ber chi pawn a chhawk zo mang tawh si lo va. Kal zawk mai rawh se tih ngaihdan ka nei tawh. Mahse, vawikhat tal fiah taka lo mengin min lo ko leh se tih erawh ka duh. Rei tak nu ka nei lo va, nu ka neih chhung reilote pawh laksak ka ni leh dawn ta chu a nia! Ka nu a kal lehzel chuan thisen zawmpui tumah he khawvelah ka nei tawh dawn lo tihna a nia. Vanruatpuia hi Van khian a theihnghilh ta em ni? 

Ka nu kut cher thiak leh a vun chuar tep mai ka fawh vawng vawng lai chuan, "Bawiha, Bawihte" a rawn ti sap a. Ka va melh rang tak. Ka nu chu fiah em ema lo mengin min rawn melh reng a nih chu..boruak pawh a reh duk mai. 

"Ka nu" ka ti vat a. A nui lui hram a, a vunin a tuam der der chauh tawh mahnise, mi nute aiin a hmeltha zawk ka mitah chuan. 

"Bawiha, i naute leh i pate hi lo ensan bik suh aw.." A ti zawi sap a. Ka beng ka dawh hnaih vangin ka hre thei mai mai zawk a ni. 

"An ni chu rawn ngaihtuah miah suh. Ka ensan reng reng lo vang, ka theihtawpin ka lo chhawmdawl ang e. " ka ti nghet charh a. Ka nu pasal mittui hru zauh chu ka mitsirin ka va hmu thei, ka farnu erawh a tap khur ngat ngat thung. Ka sawi uar mah mah in ti maithei,mahse, ka sawi uar lo, ka nu chu a nui leh a. A hmel chu a êng phêt niin ka hria. Ka hmuh dan chauh a ni emaw ni lo emaw ka sawi lo thei lo a ni. Chunglam a melh a, a chhing ta riai riai a. A kut pawh a zawi ta hnak mai. Ka nu a fam ta..a kal tawh. A thi ta..

Tap riin pindan chhung chu a khat a. Kil khata Saidingi lo tap khur ngat ngat ka va hmuh chuan, thei leh thei loin ka va pan a. A darah ka khawih a, a rawn hawi a. A kut chu vuanin, "Doctor, ka lawm e aw. A tawp thlengin ka nu min enkawlsak a. Engtikah emaw ka la rul let ngei ngei ang che. Rilru hahdam leh lungmuang takin nangmah vangin a kal a ni. Ka lawm e" duhthawh zetin ka ti a. Min melh ngawt ngawt ringawt. Ka nu chala va dawm leh vang vangin, "Ka nu, thlamuang takin chawl rawh aw.." Ka ti sup a. Pindan chu ka chhuahsan ta a. 

Chhin khat mah ka chhing lo. Ka nu chu Pu Zaia te inah an menpui a, a tuk zingah Zawlseiah an phur phei dawn a ni. Ka nu thurûk hre lo te chuan kan pafa tawrhna avang khan , "A chantawk a nih hi" an ti mahna le. Dem ngawt chi pawh an ni chuang lo. Mahse, ka nu kha nu ropui tak a ni ka ti ve tlat. Ka pa leh kei min hmangaih vanga a tawrhna kha ani ang hmeichhe naran tan tawrh har tak tur a ni. 

A tukah khaw en rualin Nupuii ka kaitho a, Zuii a va ko a. Nachhawknain min chiu a. Damdawi min chawhte chu Nupuii ka lamkhawmtir zung zung a. Doctori pawh rawn tawh loin damdawiin chu kan chhuahsan ta daih a. Ka nu ruang ka zui ve loh chuan fapaa inchhiar tlak niin ka inhre dawn lo. Ka nî te nupa pawn zui an lo tum ve bawk a. La dam tha mah suh ila, ka zui dawn a ni ringawt mai. Tukthuan pawh chák lo chungin ka ei a. Zawlsei a hnai tho tiin chaw eikhama chhuah an lo rel a lo nia. A tihzia e. Ka insiam mawlh mawlh a. Ka pa kalta thlarau ka be mawlh mawlh bawk. An inhmu tawh ang em le..? Ka farnu te nen kan thu ho a, A tap nasa si a, a chau viau ang. Ka dar nghengin a muthlu làwp láwp a. Ka nu thisen a kai a, ka nau a ni. Ka tuamhlawm em em ang. Ka nute in kan thleng a, an lo tam ve khawp mai. Kan khuaah ngaih ropui ni lo mah se, Zawlseiah chuan rin aiin uitu leh sûntu a ngah. Tahtu apui an tam khawp mai. Ka nu ruang kil chuan ka thu tluan chhuak thak. Saidingi leh Ropuia te pawh an rawn lang ve a. Ka hmu lo der thung. An awm awmin lo awm teh se. Saidingi chuan ka nu chu a rawn chei nawn leh a. A siam hmeltha khawp mai. Ka bulah tak a rawn thu ve zui. 

"Doctor phalna loin engvanga chhuak ngawt nge i nih a?" Mi dang hriat loh tur chuan a ti sap a. 

"Ka nu aia pawimawh an awm lo a ni mai alawm" ka ti hmuk. Ka be chàk hlawl lo. A bula thu Ropuia hnar erawh hi chu ka la hnek thisak dawn chiang e. 

Zai pawh a nuam hle mai a. Chhungkaw aiawhin ka pahrawn chuan thu a sawi a, A sawi tawp lamah kei leh ka nu inpawm dan, a lungchhiatthlak piah lamah ka nu lawmzia te a sawi ve a. Mi mit chu ka chungah a fu thup mai. Mahse, ka zak lo. Nu leh fa kan lo inhel rei deuh a ni e. Ka nu chu ropui taka vuiliam a ni ta a. A thlan thlengin ka thlah thlap e. 

Thlan atanga kan haw hnu chuan ka tukhum chu a na ta khawp mai a. Nachhawkna chu ka hmawm tawh naa, a chhawk hleithei si lo. Ka dawm leh vung vung thin. Ka ni te lah hmelhriat apui an ngah a, hawn lam an la hnaih hmel si loh. Ka nute in bulah chuan lutin thutphahah chuan ka thu hnawk a, ka kun ngawih ngawih mai. Mak an tih ka hlauh vangin, "Ka lu a na lutuk a mawle..ka zia tep ang" ka ti ngawt a. 

Ka rilrua ka tawngtai mek laiin, "Lo kal rawh. Roomah" ka beng bulah a rawn ti sap a. Ka hawi chhuah chuan Saidingi a lo nia! Ka bangbo deuh. 

."He laia awmte hian i mawng no zet kha an hmuh ve i duh a nih loh chuan min rawn zui rawh" a ti leh a. Ka hrethiam ta. Ka zui ve ta vut a. A lo hrilhsa nge engmah an sawi lem lo. Khumah ka bawk a, ka kekawr pawh ka hlip mawlh mawlh, ka boxer chu pawtthlain, "Thuawih loh man a nih kha" a ti leh sap a. A vih lai pawh ka hre lo. He nu kut hi chu a dam zawng a dam a ni. A thinrim loh chuan..

" ka lawm e" ka ti sup a. 

"Ka damlo i nih vang a nia, a bak a awm lo a nia" a ti sak a. 

"Ka hria alawm. Chubak chu ka beisei bik lo ve" ka ti ve ngat a. A laka tlawm hnêp chu ka tum tawh bik lo. Ropuia mitmeng reng a uang êm mai. 

A chhuak ta a. Kei pawh ka inhak that zawhah ka chhuak ve nghal. Ka pahrawnte chuan min chelh tum viau mah se, ka damsam loh êm vangin ka dam that hnua zan riaka ka kal leh tur thu ka sawi hnuah an pawm ve hram. Ka ni te mitmei ka veng ve deuh bawk a ni. 

In thlen veleh tuilum sa ver vawra inbualin ka mu lum nghal daih. Zanriah pawh ka ei peih ta lo. Min hrethiam nge engmah an sawi lem lo. Tei'n min lo call a, "Msg te kha en ve ta che" a rawn ti hlar a. Phone ka khawih lo hrim hrim ve bawk a. A dah veleh ka en ta vat a. 

"Mam, Doctori room ka tihfaihna lamah a thuziah thenkhat ka chhiar palh a. Ka inthiam lo viau naa..ih,Mam, Doctori hian a hmangaih che" tih a ni. Ka thinlung a deng ve dawt thei. 

"Min hmangaih lo" ka ti teh tawp a. 

"A thuziah chu a thla ka la a, ka lo thawn ang. Mahse, ka chhiar tih a hre tur a ni lo. I hrethiam em?" A rawn ti a. Phur deuh anga lan hreh si, phur ru tho si hian, "Aw le, a hre lo vang" ka ti a. A rawn thawn ta a. Mahse, ka la chhiar duh rih lo. Mi dang min lo betu te ho chu ka reply leh te te phawt a. Ruthi pawh ka reply that vak peih loh nen min la be peih hram hram zel a. A fel ve khawp mai. Ka chanchin zawng zawng erawh hrilh vek kher tul ka ti lo. Ani pawh damdawiin atangin a chhuak tawh a. Nunphung pangngaiin a nung chho ang a, mipa tha tak a tawng mai ang.

Hahdam deuha thuin Tei thil lo thawn ho chu ka chhiar tan ta a. 

Doctori kutziak chu Doctor dang ang lo takin a mawiin a zahawm hle. 

"Nu Zuali te khaw bul maia ka thawk thei tur chu ka lawm hle. A sawi fo thin a fapa pawh engtin tin emawa hnaih theih ka tum ang chu..khaw nuam leh boruak nuam tak a ni. Johny tlanbosanna atan chuan a duhawm tawk viau e " tih lai hi a ni a. He ta a ziah hi a ziahzawm tawh lo nge, Tei chuan a lo thawn lo ka hre lo. A dang a ziahho chu kan inngaihzawn dawn vel leh inngaihzawn hnu lam a ni tawh. 

"Nu Zuali fapa pawh ni lo tehreng se, driverah ka la tho ang. A hmel ka hmuh rual chiaha keimaha danglam awm kha sawifiah dan awm se a mawi ngawt ang chu. Keia tawngkam thiamna hian a daih ve si lo va. A sang a, a thau lo va, a pian a nalh ka ti. A hmel pawisawi lo zet te, a mitmeng dum leh lian kelkawlte, a sam buk tak dum hlap si te chu..a aw lehzel a mawi ang tih ka lo hre lo. Reitak mipa hi ka tan engmah lo mai an nih tawh laiin Vanruatpuia hi a danglam a ni. A bula ka awm hian ka lai ngawih ngawih zel tih a hria ang em le? A bula awm tam ka duh vanga meeting ka rawt te, damdawi sem leh vaccine lak ka rawt te hi..Nurse ten ka tel lo va an tihtheih rengah pawh tel vena neih zel ka tum a. Ka inzahpui mang e.

Mahse, ka rin phak loh lutukin Hlimi'n min chetkhalh ta tlat! A va hrehawm tak em. Hlimi nunzia, a thawhna hmasaa a chetdan engkim hretu ka ni te hi pawi ka ti. Tawngsual ka hlau thin. Mahse, Hlimi hian a bum hlen loh ka beisei..Vanruatpui, harh teh.." 

Ka hriat loh hlanin ka lo nui vur vur a niang, Apuii thingpui hàng rawn dah chuan, "Mi â chu lawm lohin an nui thin" a rawn ti thut a. Ka phu uih a, ka'n tûm tha leh vel a. 

Apuii chhuah hnuah ka chhiar zawm leh zat. Kan inngaihzawn tawh hnu a ni tawh thung..

"Ka thlakhlelh angte hian min thlahhlel ve ang em le? Va tih huam hi ka duh si lo, a boss ka nih angin tlawm zawka tan loh hram zel ka duh. Zu hi ngheitir min tum sia aw..kan inngaihzawn atangin ka in leh tawh miah lo tih a hre ve êm ang chu maw..Hetiang tlangval fel, mipat hmeichhiatnaa fihlim, ruihhloin a tihbuai ve loh hi kei ang nun ho lutuk hi chuan ka phû lo tih chang ka nei thin. Mahse, neih ngei ka duh thung si a..Mahse, aman a sawi hma loh chuan ka hmangaih thu hi ka va hrilh awm lo tak..! " tih a ni. A tawp bera a ziah erawh a tlem hle..kan inthen zana a ziah a ni maithei.

"Vanruatpui, min va tina ngai ve le..Zu vanga min ngaizawng pawh ni la, pawi ka la ti lo fô. A chhan chu ka hmangaihna che hian hneh hun che a nei leh tho vang. Hmeichhe dang i mutpui erawh chuan min tikehchhe zo ta a ni e..mangtha" tih chauh a ni. Ka thaw hawk a. 

Duati kha ka mutpui emaw a ti tih a lang reng. Amah Duati lah Ropuia rawih a ni a, ka rindanin. Sawi hreh leh sawi tîm a nei dawn hlek si lo. Engtin nge Duati ka mutpui lo tih chu ka finfiah tak ang le? Chu chu ka tithei a nih chuan, Doctori hi ka nei let leh thei ang. Mahse, thil pakhat a awm. Ropuia nen hian an chesual ve tawh ang em? Zu an in dun si a..chu chuan min mawlh ve tlat lo thei lo, ani chuan min then chiang kuang a, Ropuia a zui tawh a. Tihbuaia neih let leh tum kher hi a tul viau ang em? 

Rilru buai takin ka thu ran a. Ka inngaihtuah vang vang hnuah ..Ka phone ka hmet mawlh mawlh a. A ring ral ral mai. A lo lak rualin, "Duati, inhmu lawk ang hmiang" ka ti hul hak a..

Huiha