saidingipuii 10

Dr. SAIDINGPUII (10)

Ziaktu: Toni Râlte

A tukah chuan Pa Rema hoin in hnuai chu kan siam leh a, kan zo fel thawkhat e. Tukthuan ei lai khan ka nu cancer thu te kha ka sawi a, Ka nî te lo rindan sa a lo nia. Mak ti hmel pawh an pu lem lo. Khawngaih erawh an khawngaih ve khawpin ka hria. Naupang awm laia ka nu thurûk kha sawi chi ni hek lo, hun remchang hmasa bera sawi erawh ka tum. Hun fal hi a awm hleithei rih si lo va. In hnuai kan peih fel takah chuan Nupuii leh Apuii te'n an tifai a, Carpet pawh kan hman ban kha a rem dan danin kan phah a. A nuam ve khawp mai. Khum phah dáp tur ka chih mawlh mawlh laiin ka pindan thar tifai mek ka farnute chu an inchhaih a. Ka lo ngaithla ve reng. Apuii chuan, "A melh dan atang che khan ka man vek, ti nge nang pawh kha i laih vak kher a?" A tih chuan, Nupuii'n pawr em em hian, "Lalmuanpui, ngawi mai mai rawh. Ka lai thlawt lo. Eng atanmah bialpa ka ti ve lo" a ti hlak hlak a. Apuii chuan tu nge maw a chhaih ni..

A nui har har a, "Ka hrethiam ve reng aw. I number pawh i pek kha. Mama bulah ka sawi ang" uang zet hian a ti lang làng a. Nupuii'n , "I ngam chuan sawi rawh, i na viau ang. Number te chu min dil a, ka pe a nih kha. I ninawm sawi tawh suh" a ti nghat nghat a. A zak a ni tih ka hrethiam. 

"Au Tei ai Doctori inah han awm zuai la, a nuam dawn sin" Apuii'n nui uar uar chunga a tih leh takah chuan Nupuii chu Valtea nen a hmehbel tih ka hai ta lo. Ka khi vur vur mai. Ber kher chuan..Valtea chuan a lo mitmei deuh tak tak em mawni le. Thil ni thei lo hul hual a ni lo. A chhan chu Nupuii hi a nu hnàp lo a ni mai a, an unauah rau rau, a hleitlingin a pian pawh a dik ber zawk. Dul kiar tih vel a nei ngai lo va, inchei a thiam loh em vang hian a nalh tur angin a nalh lo thin mai pawh a. A sam hi chu ka nî te thu a zawm theih lohna ber a ni ve a. A boys cut kumtluan thin. Tlereuh engmah a inbel lo va, Zirna a chawlhsan chhan pawh kha dik tak chuan hmeichhe pawnfen kha a inhmeh thlawt lo va, an lo chhaih ve thin si , a zak khan ban a ngen ta ngawt a nih kha. Class x a pass hman ta lo. Hetiang a nih lai hian Biak inah erawh hmeichhia a nihna a lantir tho, zei leh zei loin puan a bih sawi ve tlun zel. Pheikhawk sang erawh a bun ka la hre miah lo. 

Valtea chuan a that rukna lai a lo dap fuh te pawh a ni mahna le. Han inhrual nu tak tak se la a tha viau ang. Ka dáp chih tawh sa ho chu nisaah ka pho rih a. Pawnthuah vel hi ka nî hi chuan a ngaihven vak lo naa, Teii rualawhna a ni hlauh a. Pasal a neih hma khan mutbu vel hi chu a lei nasa hman bawk a, mikhual neih nikhua pawn kan mualpho ngai lo. 

Tlai lam programme kan neih hrerengin ka che hmanhmawh ve deuh a. Sa ràwp vang hrim hrim aiin Saidingi ven ka duhna vang zawkin Ropuia sawmna chu ka ngaipawimawh lo thei lo a ni. Ka inbual dawn lai takin Valtea a rawn lut hlawl mai a. Ka ngaihbel nge Nupuii meizial lai chu a kun nghal daih. Apuii erawh Hruaia te inah a phei lawk a. 

"Teh hlawl che chuan, eng nge ni ta?" Ka lo ti vat a. 

"Ropuia birthday lawmnaah khan Nupuii hi ka rawn sawm ve dawn. I la insiam na nge?" Tiin Nupuii zawk chu a melh daih a. 

"Siam lo" a lo ti hmuk. Ka nî chu a vengva bawk a, "Va insiam ve ta vat che. Nghah ngaia awm loh tur" a lo ti zung zung a. 

"Ka kal chák lo eee" Nupuii chuan a ti zawi sep a. Valtea chuan,"Kan sawifel vek tawh kha..khaw nge APuii pawh chu" a ti a. Apuii pawh tengtere pawm chungin a rawn lut a. Valtea'n a tur nasa bawk a, ka inbual zawh meuh chuan an lo inpeih at tawh mai. Nupuii chu Apui'n a chei nge, Aizawl atanga ka hawnsak Cargo kha hain, Tsgirt ghrey body fit zaih a ha bawk a. Convers a bun leh bawk a. A nalh ve reuh. Apuii erawh a mawng tilang khal lehzual tur kekawr fit zet a ha thung. A u motorin a rawn kal tho bawk a. Scooty keg ta bik lo chuan Doctori motor chuan kan chho ta a. Ka intinalh ve viau chuan ka hria. Nupuii lai tlat chu engtia han tih chi nge mawni dawn ni. Kan han thlen chhoh chuan Ropuia inah chuan Duati bakah Venglai tlangval Arema leh Biaka te an lo awm ve a. A sawm zau vak dawn lo a nih hmek.

Eirawng chu bawl en em tur a awm tawh lo bawk a. Salad chu hmeichhe hoin an siam thung. Kei pawh rei awm loin Saidingi in lamah ka chho ta a. Ani pawh a lo inpeih zàn tawh. A sam erawh a la hnàwng a, chhem ro a lo tum mek a. Min hmuh chuan, "Tei tirh ka hreh sia, kha.. Min lo chhem teh' a lo ti vat a. Ka thiam awm chai si lo. 

Engtin tin emaw chuan kan han inchhem sak a. Teii pawh Puia nen Ropuia in lam an pan a. A inchhem zawhah a va inhnawih leh thuak thuak a. Make up hi chu a hmang nasa lem lo viauin ka hria. Tihian a mawiin a duhawm em em tho e.

" An la ei dawn chuang ami? Chhuk vut vut pawh chu" a ti nghat a. 

"Nia, thu rih ang" ka ti vat. Ka bulah a rawn thu ve mai a. A beng bulah, "Tereuhtê" ka ti sup a. A meng ráng ve ngang mai. 

"Taka! Hlimi khan transfer a dil a niawm e. Mahse, chuti thut thut chuan an sawn lo vang" a ti sap a. Ka rindan sa deuh a ni. 

"A awm ve tho, hetah chuan nuam a ti vak tawh dawn lo va" ka lo ti a. 

"A bialpa lah khan a lo pawm ve leh mai bawk nge a statusah te khan an induh leh hmel viau sia, a lawmpuiawm e" a ti niah niah a. Hlimi status ka en loh vangin engmah khalam ka hre lo thung. Valtea a rawn lut a, "Lo chhuk ve tawh ula, chaw ei hmaa ei kham lam party a duhàm deuh dawn a nih hmel" a ti zung zung a. Kei chu ka lo lai deuh, a û nen kan ni tih hre mah se, a nuam vak lo. Ani erawh chuan a ngaihpawimawh hmel vak loh. A va inthlak a, a chhuak leh vut.

"Chhuk ila" ka ti a.

"Umm..nia.." Tiin a ding a. Kal hmain ka'n fawh leh zuai kha..chance hi hman thiam tur. Hehe..kan zu thlen thlak chuan Chaw chu ei theih turin an lo sawngbawl vel mek a. Damdawiina thawk te ho te pawh an tel ve vek a. Tumah chu han zah rûn tur erawh an awm chuang lo. Duati te pawh chu an tlangnelin ka ngaihbel nge ni a intineitu thiam phian lehnghal a, Ropuia nen chuan an inhmeh dawn khawpin ka hria a ni. 

Keini Saidingi nen pawh kan han dawh ve a. Hetiang chaw eikhawm nikhua hian ka eitam thei ngai miah lo. In ni ve em chu ka hre lo va, Hunpui laia ruaitheh nikhua pawh hian a boruak chiah hi nuam ka ti thin, ka puar ve ngai mang tlat lo. Ka urlawk nasat luat thin vang pawh a ni mahna le. Saidingi nen thu dunin kan ei mial mial a. Kan hmazawnah Nupuii leh Valtea pawh an lo kil ve mek. Nupuii chu a laih em em reng avangin hmu lo niawm takin ka awm ta ringawt. Ka khawngaih letling. Apuii erawh Arema te ho nen an kil thung a. An innel sa vek tawh bawk a. Ani hi chu a ngaihtuahawm loh. Kan ei mek laiin Biaka pek chuan, "Ruatpui, Daisy te chuan an lo ngam vak lo che a ni maw? Ka lo tang ru khawp mai a. An chapona thinthlak a han ni hi e.. An thenawm te ho chuan, 'Huai taka' an ti hlawm a nia aw" a ti lung lung a. A kamnam ve deuh bawk a..

Duati pawh chuan, "Daisy insawitheihna zawng zawng i rawn phumbo a, a dáwt sawi leh a infakna ringawt lo ngaithla thin tan chuan hnára hlit phawi ang huai a ni e" chaw hmuam tûn chung chuan a lo ti ve bawk a. A eng emawti nuihzatthlak deuh bawk nen, kan nui ham ham mai. Saidingi pawh a khi ve sak sak. 

Valtea chuan, "Naktuk chu luiah nge kan kal dawn? Sa kan pel dawn!" A ti thut a. Saidingi a meng ráng nghal. 

"In duh zawk zawk a ni mai" ka tih laiin, "I la damkawr..chhuak chi i la ni lo reng reng" a lo ti nghal chat a. 

A nau Valtea'n zawi supin, "Strict thei siah" a ti nghut. 

"Naktuk chu in hnuaiah ka bungrua ho ka thiar thla dawn a, min rawn pui ve zawk ula, chuan a tuk lehah Sakhi kan va chàng dawn nia. Sebawh muala sunhlu kha a tlan an ti tlat. " ka ti ta zung zung a. Saidingi'n a chaw bar thulh thakin min melh a. Melh zuk zuk chungin, "Nge, ka dam tawh reng. Ka tha" ka ti a. Ka nuih tlawn bawk. Engmah chu a sawi zawm bik lem hlei lo va. Ka puar thawkhat ve mai. Pa Muana te nupa siam a ni a, an siam tui viau mai. Chaw eikhamah zialte kan han zu leh te te a. Hmeichheho erawh a hrang deuhin an inkawm ve a. 

Valtea chuan, "Nupuii hi ka duh riau. I remtih chuan" a ti sup a. Ka nui hawk. Kan lo inpawh ve tawh bawk a, zep buai vel kha tul a ti tawh lo a ni maithei. 

"A duh ve che em tih a pawimawh a nih chu" ka ti nghut a. Inringtawk fe hian, "Ka la bei tawk lo alawm..a lai zel a" a ti a. 

"Mipa ngaihsak ngai lo a nia. I tihthiam viau chu a ngai ang" ka ti ve mai a. 

Min melh rulh pahin, "Mipa ngaihsak reng reng lo, ka u mi thinchhe lutuk pawh i hneh thei alawm le..nang aiin ka zei fe dawn a..nge ka theih loh ang!" A ti ta mai a. Puia te nen kan nui ruh ruh mai. Ropuia erawh phone a hmang a, a buai hmel angreng. 

Puia chuan, "Mipa ka ni naa, a hmeichhe thuhla viau nain Ropuia hi a mitmeng hi a dik lo ka ti..ka sawi thiam lo, eng emaw hi a awm" a ti thut a. Nizan ka haw tur a mitmeng verther zeta min melh lai kha ka hrechhuak nghal. Mahse, ka sawi duh lem lo.

Valtea pawh chuan,"Nia, pawh a har..a fel viau naa, eng emaw a awm" a ti ve nuah nuah a. Amah Ropuia a rawn phei takah chuan tha tak chuan kan inkawm ho ve leh mai a. A birthday cake a order chu Biaka ten an zu laksak a. Kan thu kual thap mai. Tlangvala pumpa birthday la lawm zuk zuk hi khawpui lamah an ching a ni mahna, keini khaw lamah chuan kan birthday te hi kan theihnghilh rem rum zel a. A tha nge tha lo erawh ka hre lem chuang lo. Pian ni hi chu a hlu ve bawk a. 

Duati chuan inti neitu takin a sawngbawl a, Chaw kan eina la rei lo mah se, Cake chu zai phawt tha an ti nge, Ropuia chuan a zai ta a. A hlimawm ve dar dar khawp mai. Kei erawh hawn vata Saidingi nena awmfal ka thlahlel thung. Zai an play a, Biaka leh Arema te kamnam chu an su auh auh mai. Zuii leh U Rengi lah lo phawk ve bawk, an lo lam ve nghal zat a. Kan ri ve ta le lû mai. Valtea leh Puia te chu Ropuia roomah lutin eng emaw chu an va ti a ni maithei. An rawn chhuak leh chu an khi sûng reng mai a. Puia pawh a tawng ve suam suam mai. 

Ropuia chuan ka bula rawn thut pahin, "Va ti ve la..dawhkanah ka dah sa kha" a ti sur sur a. Ka lu ka thing nur nur. Saidingi melh lehin, "Ka thlit tawh che saw aw" a ti leh a. Saidingi chuan min rawn melh zawk. Ka mitmeng tak zet a hmuh vang nge ni min pallui ngam ta lo va. 

"Ka ti lo mai ang, zanin chu" a ti sap a. Ropuia phur tawh lah chuan, "I ho ee..a nuam lo a nia. Nangmahni vangin ka chah teuh a, khatia intih leh si te chuan..Ruatpui, nge maw i strict vak le..tun ang hunte chu enjoy ve hun a nia.." A ti thur thur a. 

Ka ngawi reng thung. Saidingi chuan, "Ruatpuia vang pawh a ni lo..tunlai chu ka peih thlawt lo" a lo ti nghat a. Awm lo ta ila chuan a in maithei a ni. Lehlamah ka inthlahrung ve deuh tho, bialpa rilru zim tak nih ka duh hauh lo naa, ka bialnu zahawmna hi venpui ngai ka ti a ni. Biaka leh Arema te ho chu awm lo nise, Valtea te ringawt hriatah chuan ka phal mahna. Unau an ni bawk a. Mahse, Biaka te zia ka hria a, Duati lahin Doctori'n a in tih a hriat chuan Venglaiah a darh nghal hluai dawn tih ka hai lo. Chuvang chuan ka intihmitak rih a ngai tlat. Saidingi pawn min kalpah a tum miah lo. Hei hi a nia ka duh riau zelna chu..

An saháwk lai takin Saidingi nen kan chhuak ta keuh a. Hetiang tih bûng bûng lam hi ka nuam tihzawng a ni ve tlat lo. Rui ve ila zawng a zia tak pawh a awm ang a. Ka sawi hmaih loh tur chu Buata te kha tukinah an chhuak a, Zote lamah an haw tawh a ni. Tunah hian damlo an nei lo. Insi rialin kan thu dun a, "I lem hlek chák em? I chàk chuan hetah ka bulah ti la" ka tih chuan, "Chák angin ka awm em ni?" A ti nghat a. 

"Awm chuang lo ve. Mahse, hrehawm i tih takin ka ti mai mai" ka ti ta ringawt a. 

"Reilote ka nawmna ka thlan avanga ka mipa duh a kalbo dawn ai chuan, engkim hlamchhiaha a thu awih ka thlang zawk" ka beng bula a rawn tih chuan ka chhungril hi a lawm veng veng ni maiin ka hria. Tawngkamte chu a lo thiam zêk a. A kut ka humsak a. Ka fawp zauh bawk. 

"Ka hmangaih tawh chein ka hria" ka ti ta thlawt a. Min rawn melh hàw a, nui hmel pu lek lek hian, "Engtin chiah nge i awm?" A ti sep a. 

"Ka hre lo..ka sawi thiam bik lo" ka ti mai a. 

"Kei pawhin hmangaih che ka duh" a ti zawi sap a. Inkiss hi chu ka nuam tih ve zawng leh ka ngam chintawk a ni bawk a, ka fawp sek reng mai. A ning bik lo a niang, min chhang let tha thei êm mai. Ropuia'n a lo call a, "In va timak ve leh! Thian emaw kan nih ka lo tia. In lo haw daih a maw? Rawn chhuk vat rawh" a rawn ti thur thur a. Min ngaihpawimawh ve êm vangin han namnul kha nuam hek lo le. Kan zu chhuk leh ta a. Valtea te leh ka farnute chu haw tumin an lo intintuah mek a, "Kan leng nghal dawn " a ti zauh bawk. Nupuii pawh a lai chhe over tawh bik lo e. Kan inthlah zawhah in chhungah kan lut a. Pa Muana te nupa bakah U Rengi leh Zuii te pawh an lo haw tawh a nih hmel. Biaka, Arema leh Duati bakah Ropuia te nen kan la awm a nih chu. 

"Ruatpuia hian a drinks ve si lo va, a nuam lo êm mai..kha hei tal hi in rawh" tiin Sting bur khat hi min rawn pe a. Sting hi chu tui ka tih ve zawng tak a ni bawk a, ka lo la ve mai. Doctori chu beer a pe thung. Beer hi chu kei pawn ka phal. Mahse, rui khawpa in erawh ka phal lo. Rui khawpa in tur chuan in tam a ngai ve hle dawn tih ka hre ve bawk a. Duati chuan whisky a in pap pap reng a, ani hi chu a ti thin tih ka hre tawh hrim hrim a, mak ka ti lem lo. Arema pawh a kai deuh nge ni a va inbunruak bûrh bûrh a. A luak zo a, a in leh mai a. An thei hi ka ti. A tukah a hrehawm dawn lo mi le..an sehhmuh bawngsa roast chu ka ei ve a, a tui phian. Saidingi pawn beer cane hnih a in zo ta. Rui hmel pawh a pu hran lo. Engtik lai velin nge ka lu a rawn hai chu ka hre chhuak zo tawh lo va, zan a rei telh telh a, ka thil hmuh a phê tual tual niin ka hria. Sting bur hnih kha ka rui ve em ni ang? Energy drink rui hmasa ber ka ni mai lo'ng maw? Ka zawi nghulh mai a. Saidingi ka bula thu reng pawh chu ka hmu ta hauh lo. Ka awmdan chu mak ka ti mang e. Ka hawi kual a, Biaka te ho chu an vei sek tho niin ka hre bawk si. 

"Ruatpui,.." Ka hawi chhuak hû a. Ropuia a lo nia. Zu no a keng vá a. 

"Khaw nge Saidingi" ka ti vat a. 

"In inhau hrep a, a hawnsan ta che a nih kha" a ti ta mai a. Ka ding thut, ka luhai lutuk vangin ka pai leh nawk a. Ka thu thla leh tawp. 

Kan inhau a maw? Eng nge a awmzia le? Darkar hnih khat vel ka tibo tihna em ni ang? 

"Hetah riak mai rawh. Zu in ngai loin i in ve vak a. I zo lo a nih kha..a tha vek a nia. Doctori pawh ka lo hrilhfiah vek ang" a ti mial mial a. A thusawi tawp lam pawh chu ka hre pha mang tawh lo. Ka chau ngawih ngawih a ni ber e. 

Ka banbul dinglam kham ut ut avang chuan ka harh ta hlawl a. Ka meng chiang kher mai. Ka bangbo deuh a, ka mutna chu ka khum a ni si lo. Ka tui lah chu a hal huam huam mai a. Thawh ka tum chu ka ban chu delhtu an awm..ka hawi phei vat a. Ka va phu chiang tak..Duati chu thlamuan hmel zetin a lo muhil säk sâk a nih chu! Khai leh! Eng nge thleng ta ngai? A ranga rangin ka tho va, ka duh lo. Saruak vekin ka lo mu! Lalpa, ka chungah eng nge thleng? A ni thei lo, hei hi..ka lungphu chu a ri dûp dûp mai. Ka khur thei hial. Rizai ka hlim chuan Duati pawh saruak vekin a lo mu..ka chhing sawk mai. Khum ep chiaha khum ruakah chuan ka thawmhnaw ka va hmu a, ka inha nghal sawk sawk. Ropuia quarter a ni tih ka hria. Nizan thil kha ngaihtuah let ka tum a, a tawi tup mai. Tunah chuan he lai hmun hi ka chhuahsan phawt a ngai tih hriain pindan kawngka chu ka hawng a, thutkhawmna pindanah chuan Biaka leh Aremi hi an lo mu kawisawi nuaih mai. Ropuia hi khawiah nge maw a mut ve le..tui ka in khawlh khawlh a. Tlemin ka harh ta deuh. Ka va inphih harh ta bawk a. Engkim chu a hnawk nuaih mai a. Bathrooma ka va luh chuan luak rim a nam vung vung bawk. Ka ti thei ngang lo va, ka chhuak leh tawp. Ka phone ka va zawng leh a, ka inhmuhkim hnuah zawitein kawngka ka hawng a. Ka chhuak ta a. Damdawiin bathlarah chuan Zuii a lo ding vang a. Min hmuh rual chuan, "Nuam bawk maw? I che na ngei mai" a ti a. A nui var var bawk. Kei ka lo hrilhhai thung. Ka tahte lam lam a chhuak. Saidingi in lam ka pan nghal a. An la tho lo nge mawni dawn ni. Tei ka call ta a. Reife hnuah a rawn la a, phak chuapin a rawn hawng. Min hmuh chuan a pháwk viau bawk. 

"Ti nge a?" A ti hû a. 

"Nizanah eng nge thleng?" Ka ti nghal táwng a. Hamhaih zet hian a meng a, "Ka hre nang, kei chu ka haw hma daih kha. Doctori lo hawn lai pawh ka hre lo " a ti si. Zah pawh dawn zo loin Doctori room lam ka pan a, kawngka chu ka kik a. A rawn hawng thei si lo. Ka call leh a, a tawpa tawpah a pick hram. 

"Lo hawng teh" ka ti tháwr a. 

."I hmel hmuh ka duh tawh lo, kal bo rawh" a rawn ti chang fak. 

"Engmah a awmzia ka hre lo, khawngaihin lo hawng teh. Sawidun ka duh" ka ti a, ka mangang takzet a ni. 

"Duati bulah zuk mu leh rawh. Kei chu i tan ka rem tawh lo, ka inah hian vawikhatmah i hmel rawn lan tawh suh" a ti tuar tuar a. Ka insum zo tawh lo,. A pindan kawngka chu ka su ta nghek nghek a. Valtea te pawh an rawn harh ta hial. Engmah ka pawisa tawh lo, thil awmzia hriat hi ka phû ve tlat a ni. Kawngkhar chu a chhe takngial dawna a hriat vang nge a rawn hawng ta hram a. Muhil miah lo hmel a pu, a meng bui lák a, a mitmeng a sen rám bawk. A chauh hmel ngawih ngawih bawk.

"Sawi dun ka duh. Eng nge ka chungah thleng?" Ka ti tham tûak a. A rawn chhuak a, ka hmaah tak dingin ka inrin hma hauhin ka biangah na zetin a rawn beng thlawp..a rawn beng nawn leh sak bawk. Valtea'n a lo chelh bet ta a. Mittui tling pam chungin, "Mi tenawmpa, engkim ka hre vek tawh. Ka laka rinawm leh ka thatna duh ber niawma i lemchanna kha ka ten. Min lo bum ve khanglang a maw? Tu nge nia i inhriat? Ngaithla rawh. Vawiin atangin ka driver i ni tawh lo va, ka bialpa i ni tawh hek lo. Chhuak la, i tan mitthi ka ni tawh a, ka tan pawh tlangval naran i ni tawh e. " a ti ta hlawk hlawk a. Heng zawng zawng hi ka mumang nise ka va ti ve mawle..beidawng takin ka thu hnawk a. 

"Eng nge ka chungah thleng tih chauh tal chu hriat ka phu ve lo maw?" Ka ti sup a. Tei'n min lainat ngang a niang, ka kut a rawn vuan chawt a,. Saidingi chuan a phone phawrhin a hmet malh malh a. "En rawh le" tiin ka hmaah a rawn dah hnai ta a. 

Video a lo nia. Kei chu thutthlengah ka thu niaih a. Ropuia ka bulah a thu bawk. Duati chu ka dar nghengin min intitatu zetin a thu duhdah viau bawk. Ropuia chuan, "Insum deuh tur che a nia, i hau hrep a, a haw daih kha" a ti a. Kei chuan tawng pawh tawng tha thei tawh lo hian, "A duh leh haw ang hmiang. A uitê emaw min tia, doctor a nih vangin a thu zawk kher lo. Mipa ka nih hi mipa" tiin ka awm ka lo chum vel a. 

"Ruatpui, nia ka hrethiam reng. I ngaihzawnna chhan dik tak hi amah i duh vang hi chu a ni lo tiraw!" Ropuia chuan a ti a. Rui ve hmel pawh a pu lo. 

"Aa..zu hi in tawh lo se ka duh êm a. Doctor zu ngawlvei kan khuain neih ka duh lo. Ka missionary vena a nia..zu hi ka ngheitir theih chuan ka hna ka tlak a ni mai" tiin ka nui sáwng a. Ropuia chuan ka dara beng thak thakin, "I ropui hle mai. Bei zel rawh. A that ve tawh êm hi..a nih zu chu nghei se i nei dawn tihna mi?" A ti lehzel a. 

."ka hre nang..ka hmangaih leh hmangaih loh a ni mai lawm" ka ti sehchilh nawk. Duati chuan min rawn nek salh pahin, "Mu tawh ila" a ti sar sar a. Min fawp nawk nawk bawk, kei pawh chuan ka lo fawp ve a. Ka duhthawh phian lehnghal..chumi chin zawng chu a ni. Ka khur hlawk hlawk mai. Doctori erawh a mittui a luang ngiai ngiai. 

Boruak a reh duk a. Sawi tur reng reng ka hre lo va, awmdan tur lah ka hre hek lo. Kha videoa mipa kha keimah ka ni tih ka chiang em em tawp. Ka thaw hawk a, Ropuia'n nimin piah zana , "Thilmak kan thlentir dawn nia" a tih kha ka bengah a rawn ri nawn awn awn mai. Min lo vehthlem char char tihna a ni maw? A va mak ngai êm..Duati te kha a bialnu emaw ka tih laiin ka lakah a lo tawktarh reng chu niin..min set up hneh lutuk chuan min tisahal takzet a ni. Tihtheih reng reng ka nei bawk si lo. 

"Min chhuahsan rawh. Ruatpui..i hmel hmuh ka duh tawh lo. Tikhan engkim a chiang tawh e. Ropuia avangin i rilru dik tak ka hre ta a, Ih maw, Hmeichhe dang lakah i lo va missionary zawk dawn nia. Kal rawh" Saidingi aw-ah chuan natna a tel. A khur bawk. 

Ka melh ngawih ngawih a, "Engkim kha a dik lo a ni. Hrai ruih ka ni tih i hre lo em ni? Ti nge min hawnsan? Nizan thil thleng engmah hriat ka nei tawh hleinem" mangang zetin ka ti a. A nui lui hawk.."Ka hawnsan che a maw? Nangmah ngeiin min nawr chhuak a ni lawm ni? Chuan,kan ruih ber laia kan sawi chhuah thil hi kan harhfim laia kan sawi chhuah ngam lo, thudik ziktluak tak a ni cháwk! Tikhan i rilru fim loh lai khan i rilru dik tak i phawrh zawk aw..insawifiahna leh insawithiamna engmah ka ngaithla duh lo. Kal vat mai rawh. Police ka koh hma ngeiin" a ti ta fak fak a. A pindanah va lutin pawisa note a rawn hum chhuak a, ka kut chu rawn lain. "hei hi ka driver i nih chhunga i hlawh aw. Ka tan i thi fel hmak tawh e. " a ti hriam leh hraih a. A pindanah a lut nal nal. 

Valtea chuan, "Thianpa, zuk haw phawt mai rawh. Ropuia khan a set up che a nih kha..a chiang reng. Puia nen kan kutah dah rawh. Ka u pawh hneh kan lo tum ang. Rilru hahdam deuha awm tum rawh aw.." Tiin min thlah ta a. Engmah ka ngaihtuah thei lo va, ngaihtuah tur pawhin ka rilru a fim lo hrim hrim. Ka kawngkal te chu ka pai leh khut khut zel a, Ropuia chu ka bulah awm se ka hnek loh atakah. Hetiang lam zawng hian maw kua a lo hreuh le..a fin ka va chelh lo lulai êm. Buai rukna riau erawh ka nei. Sting ka in hnu khan ka lu a hai kha a nia, Saidingi nen kan inhauha ka hnawhchhuah lai vel ka hre miah lo te, videoa min cover lai engmah ka hre lo te chu..ka sting inah damdawi eng emaw an pawlh ngei ang a, A nih chuan FIR thehluh mai chi em ni ang? Ka kawchhungah damdawi sulhnu an hmuh chuan Saidingi pawn min ring leh thei mahna. Harsatna ka tawk neuh neuh reng a, tun ang renga ka rilru hah hi ka la hre awm lo ve. 

Tukthuan pawh ka ei lo. Ka mu ngat ngat. Tumah va biaka insawifiaha thil va chhui pawh ka tum chuang lo. Rilru mang takin ka mu tawp a ni ber mai. Saidingi hmeichhe luhlul leh tihmawh tak chuan video atang khan ngaihdan fel tak a nei tawh a, thutlukna pawh a siamfel vek tawh tihna a nia. Ka hlawh min pek kha ka nî te pawh ka pe lo, amah Saidingi pek let leh ka tum. Kan inthen tak tak dawn a nih phei chuan laksak ka tum lo bur. Tunah rih chuan a rilru hneh tumin awmzia a neih ka rin loh avangin biaka ngen pawh ka tum lo. Kan inthen hlen rinna leh rin lohna chu ka thinlungah an insual a ni ber e. Ka ril a rawn tam ta a, ka nî a chhuak bawk a, Nupuii te ringawt an awm chuan eng em em min zawt lo vang tiin ka va tho chhuak a. Thingpui ka insiam rak rak a. A rukin min melh reng tih ka hre kur. Ka nelawm loh em vang nge engmah min zawt hauh lo. Ka inei puar zawhah ka balh hmel êm avangin tui ka lum leh a, tuilum sa ver vawrin ka inbual ta a. Tlem chuan ka harh ta deuh, ka lu a nat deuh vangin nachhawkna ka hmawm bawk a, "Zanriah pawh ka ei lo vang. Min lo kaitho suu aw..ka chau rih em mai" tiin ka naute ka hrilh a. Ka pindanah ka tawm leh ta tlawk tlawk. 

Engtin nge video-ah khan tiang thu kha ka lo sawi theih le? Ka rilru dik tak a ni tawp si lo. Saidingi chu ka duh a, nupui atan pawh ka duh asin. Zu a nghei ka duh vang ringawtin ka ngaizawng hauh lo. Ka nu vanga min ngaizawng emaw ka tih laia ka thinlung natzia ka ngaihtuahin Saidingi tan pawh a nat ve turzia ka hriatthiampui. Hmeichhe induhtawk tak a ni ve bawk nen. Pawi ber chu Ropuia sawmna thanga kan àwk kha a ni e. Siamthat rual a ni tawh si lo. 

Tei call ka dawng a. Ka la lo thei lo. 

"Mam, lo haw ve daih mai ka duh. U Saidingi chuan biak pawh min be duh lo. U Ropuia a rawn leng a, zu an in dun char char" a rawn ti tiau a. Ka nghing dawt. 

"Valtea te an awm lo em ni?" Ka ti vat a. 

"Pa Muana hoin kawmthlang luiah chakai man an tum a, an kal deuh chiah" a ti hak a. 

Ka lainat si, keimah vanga Tei thleng thlenga tawrhtir chu ka duh hauh lo. 

"I lo haw dawn pawn tha takin hrilh la aw. " ka ti ta ringawt a. 

Ropuia nen zu an in..hmm, a nuam a ti ngawt ang chu. Ka lo inthiam loh rukna leh ka natna te chu thîkna leh khàknain a rawn luahlan chho a. "Hei hi alawm an lo tum ruk, kei hi min thehthang an duh a, min thenna chhuanlam an hre si lo va, tiang khan an che ta mai a nih hmel..hlim teh se" tih chu ka rilru ngaihtuahna a ni. Mihring rilru danglam chakzia hi. Ropuia'n min vehthlem tih hrethiam lo tur khawpa mawl a ni lo, tunah zu an in dun lehnghal thei a maw?! Hei bak baka inthlimna chiang..ka insawh ka insawh a, an rui tawh ngei ang a, Ropuia'n a fawp emaw kha a niang a, khumah bawhthluin...ka tho hlawl..ka hah vek thei. Ka kut ka hum ruh a, ka han thaw leh hawk thin. A va harsa reuh êm..doctori zûn hian min lo phuar nghet viau tawh a nih hmel e. Mi dang tan ka phal thei thlawt lo a ni. A laka tlawm leh mai pawh pawi ka ti lo tan. Tei ka call leh ta ngawt a, "Te, an la awmdun em?" Ka ti a. 

"Aw..an titi nasa mai" a ti mai a. 

"Roomah em ni?" Ka tih chuan, "Aw..an inkalh hnan tlat bawk sia..mam, nang pawh i dik lo chu ka ti tho a, mahse, U Saidingi pawh U Ropuia a ring hma mah mah ka ti..ka rilru a natpui che" a ti mawlh mawlh a. 

"Ka lo chho dawn" ka ti hul hak a. 

"Aih, buaina i tipunlun mai mai, kei chu min be tawh a. Ka rawn haw ta rih lo mai. Lo lang rih suh, chanchin ka rawn hrilh zel ang che" a ti ta tlat a. Han chhoha Ropuia chu hnek siah siah ka chàk lutuk a ni. 

Duati lah chuan min rawn text chhen lehnghal. "Inru ang kan ni ta mai sia, engtikah nge palai hmel ka hmuh dawn?" Te a rawn ti nia! Ka luak lo chauh. Eng ang pawn rui mah ila, sex kan hman hi ka ring lo bur. Engkim video-a min cover leh kan inbiak lai te, Saidingi ka hnawhchhuah lai zawng zawngte pawh hre lo khawpa ka ruih chuan engtin nge sex ka hman theih ang. Ngawltawt chhuah ve a ngai tih hriain ,"Kan hman loh kha..mu dun satliah ringawt kan nia. Engmah a thleng lo, ngaihtha deuhin awm rawh" ka va ti ta hmiah. 

Mahse, a rawn zàm lo nasa, "Ka fel loh lai tak a ni lehnghal a, ka rai maithei ni" te a rawn ti. Ka ner nasa ngang mai. 

"Sex hman lohin a rai theih loh, duati, ka ti lo che. Chu chu chiang ang aw. Chuan, nizan thil vel kha sawi vak ka duh lo, inbe tawh lo vang" ka ti ta hmak a. A la hnawksak viau chuan ka ring. Mahse, dik tak chuan ka inringtawk bik chiah lo. Ka lo che ve thei tho, hmeichhia anga serh nà leh eng emaw ang kha mipa chuan kan nei ve bawk si lo. Mahse, he lama tawnhriat ka neih loh êm vangin a ranglama finfiah ka duh a. Duati hmehmih nan pawh. Hruaia bak rawn leh rin tur ka hre lo bawk nen, ka call ta tawp a. A rawn phei ve mai bawk a. 

Zep leh thup vel kha neih a sáwt tawh lo tih hriain a bul tang rátin engkim ka hrilh ta vek a. A bu nghut nghut a. A hmel pawh a thutak viau mai. Ka manganzia a hria a ni ngei ang. 

"Ka hrethiam ve si lo va, Ani ang nuthlawi lungfing chin chuan min puhthlu ngei dawn niin ka hria. Hruaia, engtin emaw hriat dan a awm lo maw?" Ka ti ta a. A ngawih vung vung hnuah, "Ropuia mai mai chu ka va hnek chak ve aw. I rilru hi a thianghlim lutuk a, bumin i awm zel a nih hi..aw chuan, Sex vel kha chu i zun zawngin thîp leh ná te i nei em? " a ti ta a. Chutiang chu ka nei miah lo. 

"Aih, nei lo reng reng" ka lo ti vat a. 

"In ti lo tawp a nih chu, bakah maw chutiang khawpa i ruih chuan i pa thei lo vang. Duati chu i hmetmit thei mai ang" a ti a. Ka thaw huai mai. 

A leng ve ta reng a, kan titi dun nasa a, kei pawh ka harh hawk e. Hruaia chungah pawh ka lawm khawp mai. Ka nî te an rawn hawn takah chuan a haw phei ve a, zanah Saidingi han rim ngat kan tum kha. Eng tak han ang ang i maw..Zanriah ka ei lo vang ka ti zet naa, ka pum a ruak angreng sia, tlangvala pumpa, rilru nat vanga chaw thlah ngawt chu ka tlawmlak zawng tak a ni ve nge, ka va kil ta hram. Ka hmelhmaiah biak ka chakawm loh nge min be lumlam vak lo. 

"Chawii chuan tawng nuam a ti barh barh hle mai, mo an han nei thar chu.." ka nî chuan a ti suam suam a. Nupuii chuan, "An chengho rei thei lehpek ang e maw..a mitmeng saw a phakar hmel ka ti" a lo ti nghat a. 

"U muana hi kei chu ka ten, ka hmuhte hi ka uak tep zel" Apuii a ni. 

."in ho mai mai e a. Tei'n let a tum tawh si lo va, amah duhtu a neih mai loh ten..en liam mai mai ru" Pa Rema'n a ti a. Ka kham daih, ka ka a tui viau lo. Ka ni chuan, "Mampui, i dik lo, eng nge thleng a? Sawi chi te a ni em?" A ti ta a. A insum thei ngang tawh lo a ni maithei. 

"Ka tha reng, nizan khan beer ka in ve a, ka awm nawm loh phah vek alawm" ka ti ta ngawt a. 

"Beer pawh zu inna hmawr, in tawh reng reng suh. Ka rawn phei lam khan Hriatpuii'n min lo ko ding a, i nu pawh naktukah rawn hawnpui an tum a niawm e. I lo awm ve dawn nia. Thawh tur em em a awm chuang lo bawk a" a ti zui siam siam a. Huiham, engkim hi a thim vek mai. Ka nu chungchang pawh ngaihtuah a that ve tehlul nen, Saidingi hian ka engkim a nei bawk si. Lung a zîng mang e aw. 

Muangchangin ka insiam a. Hruaia a rawn lut. Ka phur fahran lo hle. Mahse, ka lo sawi laklawh tawh si. Min lo ankhum leh hrep ta se, ka hnàr ka hmu lian dawn mai si a. Mahse, inti pachangin, "Mipa lawm ka nih le" tia infuihin ka bialnu, keiin ka then ve loh Saidingpuii rim tur chuan kan chhuak ta a. Hruaia bike-in kan kal a. Venglai kan thlen chuan bazar shed bulah chuan an lo phu mur mur mai a. Keini lah kan lo háwkdák ve bawk nen, Hruaia chu a ding a, kan hnaih bera ding Saia chu koin eng nge thleng a zawt a. 

"Rinliana'n a nu a sat a" a ti ta mai a! Mi deng dawt. Rinliana chu keini aia nau, damdawi addict a ni. A pa bul Zawlseiah a va awm char char a, a rawn let leh tih ka hre miah lo. A rawlthar chhuah phat atangin kan khaw rawlthar sual leh luhlula sawi a ni thin. Tharum a ngaina a, amah a lo chakin thahrui a lo ngah bawk nen. Insualpui hi a nei deuh reng mai. Damdawi a han ti ve a, an harsa si, Ruk ruk a ching chho a. An awmna lai velah phei chuan puan pho pawh a bo zeuh zeuh reng a. Mi dawr han rawk mai te, mi inkhawm hlana an in rawk mai te a ching chho a. Man a tawh lahin a táng rei ngai si lo. A nu leh pate hi an inthen a, a nu lah hian a hlau nasa si. Khawngaihthlak tak an ni. 

Pi Nguri chu Pu Rinawma motorin an phur chho ta a. Kan zui ve nghal. Zui ve dang pawh an awm nual mai. U Rengi a lo duty a, Saidingi a call nghal. Pi Nguri chu ward-ah an dahlut a. Ka va hmu ve chiah lo naa a lu ah leh a darah a sat an tia, thisen a chhuak nasa khawp mai, a than pawh a thàng huam reng a. Kan chhan hman lo mai ang aw ka ti rilru hial. Ka lainat vawng vawng mai. Saidingi leh Ropuia pawh hmanhmawh takin an rawn tlan thla a, Pi Nguri chu a en ta zung zung a. Pawnah kan lo awm thung. Oxygen an pe nghal a, a lu kak chu an thui nghal bawk. Amah Pi Nguri chuan nikhua a hre tawh lo hrim hrim a, Eng nge maw a an dawn ni. Hlauthawng deuhin kan lo nghak ve ran a. Damdawiin tualah chuan thalai kan thu nghûk mai. Rinliana chu Police in an rawn lam nghakin Pu Hmingliana inah an hreng bet a niawm e. Damchhungin tang se a tha e. A hrechiangte sawi danin a nu pawisa a dil a, ani a nu chuan Rs. 50 a pe a. Rs. 50 lek chuan ruih theih hek loh, a dang a dil leh a, a nu chuan a neih tawh loh thu a hrilh pawn a vau chiam chiam a, a nu hlauthawng chu in atanga tlan chhuakin a inhlawhna thin Pu Hmingliana te ina tlan luh a tum a. Mahse, Rinliana hian rawn nangchingin a nu inring lo lai chu a sat ta mai a ni awm e. Rapthlak hian aw. Mahni hringtunu ngei kut han thlak ngam hrim hrim pawh chu ka ngaihtuah zawng pawn ka ná vawng vawng thei. Ruihhlo hi chu aw..thah rem vek theih nise a va tha dawn êm..

Saidingi te pawh an rawn chhuak a, Pu Hmingliana chuan pa chan chang takin an chin vel chu a sawi ta a. "Heta an inenkawl theih ang ang chu an ti mek a, a dara sahna hi a thuk riau a, thisen a chhuak nasa bawk nen , thisen pek a ngai dawn a. Unit 3 lai a mamawh dawn a ni. A blood group hi A+ a ni a, tlawmngai thei kan awm chuan a lawmawm viau ang" a rawn ti ta dap dap a. Ka blood group hi A+ ve tho a nia, ka ding nghal vat. "Ka thei e" ka ti a. Vengsang ami Kawngtea a lo ding ve bawk. Mamawhte tan chuan ka ui reng reng lo ve. A rang lama inpek a ngaih avangin kan va lut nghal a. Test pawh nei hran tawh loin a urgent tawh si a, Khumah kan mu ran mai. Saidingi leh Ropuia te chu an rawn lut a, U Rengi'n a rawn zui bawk. Saidingi chuan Syringe lian zet lek chungin chiang zet hian min melh a. 

"Maimichhing rawh" a ti nghat a. Thuawih zetin ka chhing ve mai. Ka vein-a hruai a rawn vih luh lai chuan ka lo insangmar ve deuh. Ka tet lai chuan hriau hi ka hlau thin. Vaccine lak te kha ka hlau thin a, ka nî leh ka pa te khan min phuarbeh tawp chang an nei thin. Mahse, tunah chuan ka hlau tawh hran lo. Ka thisen chuan Nu Nguri nunna chu chhanchhuak hram se ka va ti êm. Kawngtea chuan min lo nghak a. 

"Unit khat chu a kal tawh e" Ropuia aw chuan a rawn ti a. 

"Unit 2 ka lo pe ang e" ka ti sup a. Ropuia mitah chuan ka melh ngat ngat bawk. A khi suk a, "Nizan i chet nat nen i va fit ve " a ti hluk a. Ka thisen la lo se chuan ka hnek ngei ang. Inthunun hram hramin, "I tawktarh hmeichhia kha ka ît zawng a ni lo hlauh a, a him phah ta a nih kha.." Ka ti ta nghut a. Saidingi meng kal ralh chu ka hmu reng. U Rengi pawh a awm ve tho naa ka zah buai duh tawh lo. 

"Engmah i hriat mai mai loh kha" Ropuia chuan a ti leh hmuk a. 

"Doctor ve si, mi hrai ruiha lo vehthlem kual hi a cheap ngawih ngawih..mipa takin kan la inhmachhawn ang chu" ka ti chang fak a. Chhete mahin ka hlau lo. 

Saidingi chuan, "Ekhai! Kan pasaltha chu insum teh khai! Kha i thinrim chuan i thisen kha duh aia tam a baw chak dawn a nia" elsen rawngkai tih hriat ngawih ngawih hian a rawn ti a. Ka insum ang ka ti naa, Ropuia nui sáwng hmel ka hmuh chuan ka inthunun theihna a bo vek. 

"Kan doctor fingberi chu i duh i hmu a, i va hlim har har ve. Sabengtungin sihal pahnih ka lo hmachhawn a, min bum hlum lo chauh a nih hi..Duhhmunu, i lawmpuiawm e. " ka ti ta sak sak a. U Rengi mitmeng danglam pawh chu ka haider lo thei tawh lo a ni e. Ka thinrim a, ka na êm a ni. 

"Chiam chiam a che. Zeldin thubawl ringpa, i ngaih ngaih khan ngai teh" Saidingi aw chu a chang viau. A aia chang mah zawkin, "Khawngaihin mask hreng rawh. I rim kha sawlai thalai tlingkhawm sawn an hre palh hlauh ang e..Pi Doctor" ka ti ve leh ngat. Ka hmaah tak rawn dingin rum elkhena min melhin, "A zo e, i chhuak thei e" a ti vawt raih a. 

"A lawmawm e. He lai room zimtea bumhmang pahnih inchhai kual vel hmuh kha ka lo kham thawkhat tawh viau reng a ni" tih leh chhuah ka rual. Ka thisen pek avang chuan ka taksaah engmah han nawm lohna a awm hran lo. Mahse, Pu Hminga nupui chuan rasgulla min lo pe vat a,mum 2 chu ka eisak ve kha. Ka khur der der chu ka thinrim vang a ni tih ka hria. Hruaia bulah ka va thu leh hnawk a. 

"Hruaia, hawn mai ka duh, ka insum zo dawn lo, Ramropuia saw ka hnek duh mai dawn" ka ti khur dat dat a. 

"Ka hrethiam che. Mahse, reilote ngaicháng ve lawk ang aw. Kan haw vat dawn nia" a ti a. Ka insangmar rei viau. Ka hriatchhuah tak chu mahni tawkah hian engmah ni si lo hi kan lo chapo ve vek tih hi..kei pawh eng chu ka ni lo, mahse, an duh an nawm amaka min kaihkual atan chuan ka lo inphal hauh lo va. Sadingi pawh ka duh em em, mahse, Ropuia side zawnga a tawng chuan ka chapona khan a paidam thei hlawl lo. Ka tawngkam pawh kha a na tih ka hria. Mahse, ka tuardam thei thlawt lo a ni e. Mahse, chutiang tak chuan a laka thinrimin na mah ila, a zu rim kha mi dangin an hriat ka la hlauhpui ngawih ngawih. 'zu hi i va ngai sual awm em em' min ti a ni thei. Ka ngaih sual leh sual loh lam ni loin, mi satliah leh kamtam, engmah ni bik si lo ten nuamti taka a zu ruih thu an sêprawtui tur ka ngaihtuah hian ka phal thei thlawt lo a ni. 

Kawngtea pawh chuan a pe zo thuai a. Chanchin kan ngaichang ta thap mai. Valtea leh Puia an rawn lang ve hlawl mai. Chanchinte kan lo hrilh ve a, an ni chakai zu man tum lah chu an rawn hlawhchham haw zui. Kan bulah an han thu ve ren rawn a, an mawng a nghet tlat lo. Ka hrethiam mai. Valtea chuan, "A awm ang tiraw, kan chhuk dawn" a ti sup a. Ka bu nghut ringawt. A u chungchang a sawi ka lo beisei ve a, a la be lo a ni maithei. Lehlamah Ropuia'n a chim buai ve reng sia, hun thawl an la nei lo a ni maithei. 

Valtea te chhuk atanga 10 mins vel hnuah Pi Nguri dinhmun chu a hniam leh ta thut nge , Saidingi te pawh an tlan khap khap mai a, an chetdan atangin buaina a awm tih chu hai rual a ni lo. Pu Hminga te nupa pawh an va lawr ta vat a, Pi Nguri thaw chu a zawi telh telh niin an sawi. Haw daihna chi a ni tawh si lo, kan ngaichang leh ta reng a. Darkar chanve dawn an bawihsawm hnuah Pi Nguri chu a kal ta tih thu Pu Hminga chuan a rawn sawi ta a. Ka thisen pek chu engmah lo mai a ni ta a nih chu! Ka ui ni loin, Nu khawngaihthlak tak nunna chelh din theih kha ka duh ber a ni asin le aw. Ka va lainat êm. Thalai te chu kan phu ta mur mur a, a tam zawk chu an in singsa turin kan tlan thla a, An in lah hi hmeithai tih takah do that a ngai nasa mai si. A zan azanin an thenawmte thingtuai leh banril an khawlsa chu va puin an in chu kan han do tha leh sawk sawk a. Pi Nguri hian Rinliana naute pahnih mipa leh hmeichhia, tleirawl ve ek ek tawh a la awmpui bawk a. An va khawngaihthlak tak êm. A u zawk Mateii chu a tap a tap a, a nau Atea pawh an tukverhah dakin a mittui a tla kiang kiang mai. Hmuh an hrehawm êm vangin ka chhuak tawp. Kan insingsa fel thawkhat ta tihin ruang pawh a rawn thleng zui a. Mipui kan pungkhawm chak kher mai. Hun dangah chuan branch huam chhung ami lo hi chu kan lang tam vak ngai lo a nia. Mahse, Pi Nguri chuan lainat a hlawh bakah a thihdan a runthlak êm vang ni maw, chutiang taka mipui kan tam chu chhiat kan tawhah ka la hre ngai lo. In chhung a te si, pawnah an in panna peng thlengin kan thu nghûk mai. Hruaia nen kan la inzui ve zel a. Zorina te an rawn lang ta bawk a, kan thu ho a. 

Pi Nguri ruang kha Tei leh U Rengi te pawn an rawn zui ve a. Ropuia leh Saidingi erawh hmuh tur an awm lo. 

Valtea te leh Nupuii te pawh lumen turin an rawn lang ve hlawl a. Kan sirah an thu nghe nghe. Valtea hian a chhaih kual mai mai lo vang chu maw...nakinah ka la kawm chiang ang. 

Ka phone a rawn nghawr dat dat. Lak loh ka tum zet a, Ropuia call a nih avangin ka reject thei lo. Ka beng bulah ka dah a, Zai thawm avangin lehlam thawm chu a hriat hleihtheih loh a. Ka beng lehlam hupin zun in lam ka pan a. 

Nui ri ka hriat chuan ka ding chawt. Saidingi rawn chhuah lai ka hre miah si lo va, Ropuia phone atanga nui ri ka hriat chu Saidingi nui ri a ni tlat. Ropuia aw hian, "Zanin atangin ka ta i ni tawh ang..ka ta chauh" a ti sur sur a. Ka khur der der mai. 

Saidingi chu a ngik faih a,.."Mutthilh ka duh" a ti sep a. 

"Mutthilh hmain vawikhat aw" Ropuia aw chu a hur hmel ngawih ngawih.

"Khaw maw..Ropui,..ka mu duh ka tih chu" Saidingi aw chu tlemin a khur deuh. Ropuia phone a ri khep a, a off a ni maithei. Engvanga kha thil tenawm lutuk min hriattir tura min rawn call nge a nih..zawnga mai mai chuh..

"Hruaia, chabi..vat" Ka mitmeng atangin hnial chi ka ni lo tih a hrethiam nge, chabi min pe vat . Hruaia bike chuan Saidingi in lam chu chak zetin ka pan ta a..zaninah hian nui hnuhnung zawk chu kan awm ngei ang le…

(🥺🥺🥺