Inferno Last

INFERNO (last)

Ziaktu: Toni Râlte

Zan dar 8:50-ah chuan Ephraime chu Zo Choka-ah a thu ran tawh a. Dingpuii office-ah Amanda, Sama leh Imma bakah DGP Pu Dinga leh a naute an awm thap bawk. Zaninah hian engkim tihtawp a ni tawh ang. Customer dang tumah an nei dawn lo bawk. Dar 9-ah chuan Abigail ngei mai chu EMily hmel hawhin a rawn lut ta zán zán mai a. A confi tih a hriat hle. Tum dang a nei ru ve khiau a. Ephraime nen an inbiak zawhah a car chian kuan loh thu chhuanlamin Ephraime chu a ina va inthlahtira a mipaa siam a tum a ni. Sex line-ah na nà na chuan hmeichhe ngaihtuahawm a ni hran lo. Ephraime chuan a lo dawngsawng vat a. Ani pawh a inchei danglam tho.,a hmaa a inchei ang khan. Mahse, Abby hian Ephraime chu a inchei danglam ang tih a ring thiam ve tlat! Mipa hmelchhe lo tak a nih ngei pawh a ring a ni. Coffee an rawn dah a. 

"Tihtur pawimawh tak ka tuk dawn che a. I hlen thei ang chu maw?" Ephraime chuan a ti nghut a. 

Abby chuan nuih sak pahin, "Ka tum, sawi la" a ti a. 

"Tunah hian sawrkar hi paihthlak a hun tawh viau mai a. ZCP chuan a vawrtawp thlentir kan tum tawh a ni. A rukin hmalakna kalpui a ni bawk. Mahse, kan thiltum lo hre thawitu a awm a, Doctor a ni. Ani chu Dr. Muanpuia a ni a. Sawrkar lam thawhpuitu a ni. Information lo pe ru thintu hi tu nge a nih hriat kan duh a. Amah Dr. Muanpuia vehthlem hna chu i thawk ang. " Ephraime chuan a ti chat chat a. Abby mitmeng danglam ru zauh chu a hmuh hmaih hauh lo. 

A heh liak zauhin, "A address min hrilh la, naktuk atangin ka lo thawk ang e" Abby chuan a ti a. 

"Chutiang chu a thlen hman ka ring lo" a hnunglam atang chuan Amanda aw hian a rawn ti vawt ta raih a. Abby a tho rang kher mai. Amanda lam chu a hawi nghal a. 

"Hetah nang..engtin?" A ti hliai a. 

"Kei chauh ka ni lo ve. Kan kim vek e. Man tur chea rawn kal kan ni" Inringtawk zetin Amanda chuan a ti a. A nui sàng bawk. 

"Engvangin nge min man ngawt ang a? Eng nge tihsual ka neih?" Abby aw chu a khur ve lek lek mai. 

"Min thah i tum avang khan maw le..Abby. Tûra min hrai mai duhtawk lo va, ka thisena damdawi chak tak vih luh i la tum zel avangte pawh khan ..Nurse Emily" elsen rawngkai lek lek hian Amanda chuan a ti leh a. Abby chan a chhe tan ta. Mi dang pawh an rawn lang khap khap a. Ephraime a va melh, "Engkim i hria maw!" A'n ti ngawt a. 

Buk nghut pahin, "Ka hriat avang alawm ka koh che" a lo ti hmiah. 

"Nangni ho hian min phiarru a ni. Tûrin ka hrai che tih finfiahna a awm hauh lo. Min man ngawt thei lo vang" a la ti hram a. A mangang deuh tih erawh a hmelhmaiah a lang.

Cabin chhunga Camera an kam ruk kha Amanda chuak lek va chungin, "Engtik lai khan nge nurse i lo nih?" A ti ta sak a. Abby a ngawi reng. An tlan khalh hneh si a, a him dawn lo tih a hrethiam nge hand cuff an tum lai takin a che phut a, a kawnga a zeh silai chuan DGP Pu Dinga a ti ta mai. Dingi a lo rak thawt.  

"Heta tanga min kaltir lo a nih chuan he pa lu hi ka kap darh nghal ang" Abby chuan a ti pawr hlar a. A mitmeng pawh a alh phat phat mai. Zawi muangin a tawlh hnung a, mahse, Amanda a che ve ta. Abby bekah silaia chuktuahin, "Ka lak atang hian him takin i kal tawh dawn lo ve" a ti hriam hraih a. Abby chuan a silai cheng kauin Pu Dinga chu a la tin ngar ngar tho va. 

"In hotupa thluak i hmu chakte a nih ngawt loh chuan min kaltir a ngai" a ti tán tàn a. Amanda a nui hak, a silai chu a kawnga zeh tum niawm takin a la thla a, mahse, uihli ang maia inperh auhin Abby hamhaih lai takin a ban chu a tlawh thawt mai a. Silai a thlauh nghal bawl. A silai leh Abby chaldar hmehbelin, "Min zui thei tawh ang em? Miss" a ti fiah kák a. Abby beidawng thinrim hmel chu a sen tan tan mai. An hruai ta a, a hmabak a êng lo ve khawp mai. 

Sawrkar paihthlak tumna boruak kal zelah, titi a tam hle mai. ZCP lam ten ngun taka an han ngaihtuaha an han rel ho hnuah kum khat tha bak hun an nei tawh lo bawk a. Election lo awm tur atan ram hruaitu atana an mi duh an thlanchhuahte tan hun siamsak chu tha an ti tlang ta zawk a. An inbuatsaiha an inruahman lawk ve te pawh a ngaih hmel si a. Kum khat chhungin ram inrelbawl dan zirchiana mipui zia zirchiang leh ram nuam leh muanga an chantir theih nan, Sawrkar lai mekte chuan kum khat an la nei zawk tihna a nih chu. Mahse, sual an chhuah ngam erawh a rinawm tawh loh. Mipuia an tlak nat tawh lohzia an inhrechiang tawh a, lang chhuak leh mai tur chuan sual lian an khawih ngam a rinawm tawh loh. An tan chuan ZCP chu hmelma tawpkhawk an ni. Tihtheih erawh an nei hlek si lo. Secret society a ruka kalpui pawh chu hriatchhuah a ni mai ang tih hlauin an la phumbo ta rih a, Jail lama awm ten rawn nawr er teh mah se, Zochhingpuii an kawl tawh bawk si lo. An ngawi rih ta dák mai. 

Boruak a nuam chho tan ti ila, ZCP pawn boruak an nei tawh rih lo va, a ruk erawh chuan thil an la kapui ve reng tho. Camp an chhuahsan a, mahni in lamah an hawng ta sang sang a. Tluanga pawh Hlupuii te in lam a pan vang vang mai. Villa a zuk thlen chuan Zoi chu a lo muhil a, Hlupuii te nen thil tam tak an sawi ho a ni. A nu khan Zoi a pawm thei dawn lo tih a hriatchian êm avangin in atanga chhuaha in hrang chan mai a rilruk a,a dinhmunte a siam rem hnuah Zoi chu nupuia neih a tum a ni. Ephraime'n damdawi a chahsak kha a lo thleng ta bawk a. Zoi pawn that lam a pan chhoh an beisei tlang hle. Hlupuii te pawn a ngaihdan chu an pawmpui lo ngam lo, an fanu chuti taka hmangaihtu chu hnar chi-ah an ngai lo a niang e. 

Sangpuia, Ruatfela leh Mampuia te pawh lungmuangin an in lamah an haw thei ta. ZCP lamin sawrkar an vau nasa bawk a, ZCP chungah kut an thlak ngam ta rih lo. Tin, ZCP lam pawn thil thlentir loh an intiam ve rih bawk a. An inrem i ti mai teh ang. Ruatfela leh Arini chu in chung zawlah an thu diai a. Tlai ni tla tur kawl bul lam chu thlirin an kut a insi chàt a. Ruatfela kokiah Arini chuan a dar nghatin, "Kan thil lo paltlang tawh zawng zawng ka ngaihtuah hian, Pathian hi a lo va tha êm ka ti. " a ti sap a. A dik adik chuan a vanduai aleiah Pathian lam hi a ngaihsak meuh lo va, Ruatfela pawn tih vak ngaihna a hre thin lo kha a nia. Chutia Pathian meuh a han lamri ve chu a lawm ngei mai. 

"Ni e, a tha sin. Kei pawh hian ka ngaihtuah fo alawm" a ti sup a. 

Arini chuan rawn melh chho háwin, "Thil pakhat a la awm asin" a ti sep a. 

A chala fawp zauhin, "Sawi teh" a lo ti nghut. 

Ruatfela kut chu lain a dul a khawihtir a, Ruatfela mitmeng zet chu aw! Nui sen sen chungin, "Hetah hian kan fa hmasa ber tur a awm mek a ni" a ti ta a. Tawng nachang pawh a hre lo, a lawmzia chu han thup sen ngaihna a awm hlawl lo a ni ber e. Chutah harh thut niawm takin, "Arin, tak tak em? Lalpa, ka va hlim ngai em" tiin nghet zetin Arini chu a kuah ta ngawih ngawih a. Arini pawh a mittui a tling pam mai. Tunah chuan chhungkua an din ve dawn ta e. An duat dawn sia aww..A nu anga luhlul, a pa anga zaidam si a rawn ni ang em le?!

Ngura farnu Lateii pawh kha Pathian zarah an khaw primary schoolah hna a hmu ve hlauh mai a. Judy lah Middle school-a thawk a ni bawk. An khawsak a kàng chho tan a, Ngura erawh ram lam a la tuichilh reng a. A pa erawh a lo upa ve tan tawh nen, hnathawh an phalsak vak tawh lo. Chhungkaw inngeih leh hlim tak an ni a, an inhau ngai lo. Ngura hi a dam thlup a, Judy zawk hi a thinchhe ve hlek hluk thin viau. Mangchhia pawn a rawn tibuai ta rih lo va, Ngura'n ZCP a zawm ve tih pawh a hriatpui thlap. Ngura nu hian Judy mitmei a ven vang zawk hian, "Transfer te kherh u la, Lateii kan bulah a awm tho alawm. Aizawla inbengbel in duh pawn kan hnial lo che u a nia" a ti thin. 

"Nu, hei hi kan in alawm. Min ngaihtuah mah mah thin. Thingtlanga khawsak hi nuam ka ti daih zawk" Judy chuan a ti mai zel. Thenawm khawveng leh Ngura thiantha te ngei ngei pawn Judy chu han sawisel vakna tur an hre mang tlat lo. A mawng a zangin mi biang biak a peih bawk si, pitar putar chenin ngainat a hlawh em em a ni. Nau erawh a la pai lo va, Ngura a hmanhmawh falua lo a, a zia tak a awm. 

Drose leh Joshua pawh an la inzui ve zel a. La inzui rei lem lo mah se; an inpawhin Drose pawn a duh ve ta khawp mai. Joshua hian a dawhtheih piahlamah a hrethiam em em a, a chang chuan a nunhlui vanga hmuh duh miah loh changte a nei thin. Chutiang hunah pawh , "Hun a mamawh a ni maw?" A ti thluam mai zel a. Kum lamah an naupangchhia vak tawh lo bawk a, Joshua chuan kum tawp lama palai tirh mai a rilruk tawh a ni. Drose erawh chuan, "Kum khat talte chu inzui ve phawt ila" a ti tho va. Mahse, a hnial tung bik lo tih erawh a lang. A nu a hrilh a, Diteii chuan, "Bawihte, pasal nei rual chu i ni ve tawh reng mai. Bakah in upat zel chuan fa neihte hi duh ang zat a neih theih tawh lo va, I thu thu chu a ni naa, kei chuan Joshua hi ka iai hauh lo. Mipa tha tak a niin ka hria" a ti a. Drose pawn han hnial vak ngaihna a hre bik lo. Lehlamah an inah a khawsa nuamin hmeichhe awmchhun tih takah duat rawn a hlawh ve em em a, midang va hrawn pawh a chakawm zawk zawk lo khawp mai. Mahse, Diteii bawkin, "Kan dampui reng dawn lo che. I nuta te bela i awm reng ai chuan mipa rintlak nia i hriat chu bel rawh. Bakah hmeichhia chu kan chuai hma a, I mamawh hunah pasal tur i van tawh maithei a nia. Hmeichhia chuan inphenna tur mipa kan mamawh." Tiin a zilhhau a. Drose pawn dik a ti hle. Joshua pawh hnial ngaihna a hre ta bik lo va. Kum tawp lama palai tir tur chuan thu an titlu ta a ni. Mampuia pawh rawn haw leh tawhin zalen takin hun a hmang a. Tuman mak ti enin an en lem lo. 

Lawmsanga te chhungkua pawh tha te te chuan an la kal ve zel a.sasa chu an rin aiin a lo fel daih mai. A che peih si, an parda leh eng emaw te chu a tidanglamin thutthleng te a han siksawi kual a. In chhung pawh nuam sawt tak a ni. Lawmsanga pawh a u Muanpuia'n a thianpa nauin a ngeih êm êm, damdawi a chahsak a. A ngeih nge ni, a natna a la chhuak leh ta miah lo va. Nguri a hlim, nupa nun pawh hlim takin an hmang leh thei tawh. Vitamins a ei tha bawk a, a taksa pawh a rawn nalh chho leh tan tawh. A sam erawh a tlakkawlh deuh tan avangin Nguri'n damdawi a hnawihsak thin a. A rawn to leh thei em ang chu maw. Nauteii pawn Sangpuia a hmu leh thei ta. Sangpuia nen an zanriah kil tur a han inchei chu an chhung buai a ni mai e. A thawmhnaw engamah chu Sangpuia mittlung zo awmin a hre si lo. A inbel chhin nasa tawh si, a duhzawng a hmu thei si lo. Khumah a váng zawngin a mu tual a, a tau ngût ngût mai. Nguri leh Sasa ten an han thlem a, "Kawrfual tight ka ha duh alawm. Ka nei hleinem" a ti hlar a. Mapuia a rawn lut ve, "Ngati nge? Kha kekawrte nen i mut ngût a?" A rawn ti. 

."min be suh, biak pawh" a lo ti vin leh hlar a. Mapuia a nui ruh ruh. Lawmsanga a rawn lut, "Insiam ta che ka naute, a rawn lam tep tawh ang che" a han ti a. 

"I fanu hi a thanbelh nasa lutuk a, thawmhnaw hak tawk mang a nei tawh lo a nih hi" Nguri'n a lo ti. Lawmsanga a rum nghut, safe va hawngin Rs. 10000 a va la chhuak a, Mapuia kutah dahin, "A duh ber chu va leisak vat mai teh" a ti ta nge nge a. Mapuia a tlan chhuak vat. An thaw huai hlawm e. A farnu inhmeh tur tak a rawn lei ta a, a zawn reizia erawh a sawi duh lo. Nauteii pawh a nui leh thei ta. A hmai a chei laiin Sangpuia a rawn thleng a, Lawmsanga nen an titi dun a. 

"Sangpui, engtia kal zel nge maw in tum le? I hna i zawm thei tawh awm si lo va" Lawmsanga chuan a ti a. 

"Ka sum khawlsa ve khan sumdawnna bultan ka rilruk ve deuh a. ZCP hi chuan thawm kan nei rih vak lo vang. A rukin ruahmanna erawh kan la siam e" a ti a. 

"Electionah chuan boruak a danglam tawh ang chu..nang pawh hi ding ve la" Fiamthu titak deuh hian Lawmsanga chuan a ti a. Sangpuia tawng hma hmain, "A tul mai mai lo, politician pasal ka duh lo" Nauteii'n a rawn ti hlar a. An nui dar dar mai. A fanu leh a bialpa inzui chhuak lai chu Nguri nen kawngka bul atangin an thlir liam a. 

An zanriah eina hmun an thleng a. Sangpuia chu an en duh viau. Tv velah an tlan chhuah tirh khan a lang nasa ve bawk a. Engahmah ngai lo takin a bialnu chauh chu a ngaihven thung. 

"College hi kal tawh lo law law mai rawh. Nakkumah chuan neih che ka duh, sumdawnna bul ka tan dawn phei chuan puitu ka mamawh dawn a nia" A ti zung zung a. Nauteii a ner sak, "Ka nulatna hi ka ui ee" a ti sap a. 

"I la nula reng dawn tho alawm. Fa neih ka hmanhmawh lo. Ka nu pawh a khua a har sia..a khawngaihthlak" a ti a. 

"Ka hre bik lo e a. A hun te lo thleng ve phawt se" Nauteii chuan a ti ringawt. An chaw ei pawh an puar khawp mai. Tihi chuan hmalam hun êng an nei ve ta deuh e. 

Isabella leh Imma te pawn fa an la pai leh lo naa, Bella pawh chuan a tuar thiam chho viau tawh mai. Amanda naute a kawl chhung khan a hlimin a fa a thisen ang tak takin a en a ni. Mahse, a ta a ni miau si lo va, Amanda ten an rawn lak takah chuan a ruak hiaiin a inhria, mahse, tihlan loh hram erawh a tum ve thung. Imanuela pawn a hna a zawm leh tawh a, Amanda hnuaiah a awm ta thung. A duhdan tak pawh a ni a. Sama erawh an la suspend rih. Bella chuan boruak a ziaawm tak hnu chuan, "Ka pa lung hi phun ka duh ve a, eng nge ngaihdan i nei em?" Tiin a pasal a ráwn a. 

"A tha lutuk alawm. Nang berin tul i tih chuan" a lo ti thluam a. Bella pawh a thaw huai mai. Imma chhungte lam nen an han rêl a. Ruatdiki nu te pawh an hrilh hre ve bawk. Chutia programme siam bung bung pawh an ti lem lo. Amah hriatrengna lungphun kha a ni mai. A hun leh nite an han ruat hlawm a. Thenrual tha te bakah Imma chhungte nen Lunglei lam an pan ta vang vang a. Bella nî te lamin lungphun tur chu an lo order ve tawh a. Hunserh tawite hmangin Bella chuan a pa lung chu a phun fel thei. Imma te lamin an tawiawm tha em em a, a lawmawm. A nu leh pa leh a nuta te thlan inzawm tlar pût bulah chuan dingin, "Nu, pa, Mama, in fanu hi rawn ngaihtuah reng reng suh u aw. Chhungkaw thar tha tak a nei tawh a, Engkima tawiawmtu pasal a nei tawh bawk e. Ka rawn tlawh zen zen thei tawh dawn lo che u a, Thlamuang takin in lo chawl hahdam dawn nia" Bella chuan a ti mawlh mawlh a. Imma'n a lo kuah bawk. Ni e, chhungkaw tha takah a lawilut tawh a, phatsan ngai lo tur pasal rintlak tak nen chhungkaw thar an din tawh dawn a ni. Aizawl lama an phei leh hma zanah chuan, "Remruat, inpuanna tur ka nei a. Ka rilru a mawlh reng thin. Min ngaihdam theih loh pawn i thu thu aw" a han ti tê tê a. 

Imma chuan mak tih hmel deuh hian, "Eng thil nge? Duhtak" a han ti a. 

A chil lem khawlhin, "Ih, kha misual nunráwng, Ka unaunu Ruatdiki nunna latu kha keima thahtir a nih kha. Jail ka zuk tlawh a, jail tang ve tho ka zuk ruai a ni. Tichuan, a ac-ah pawisa ka thunsak a. Engtin chiah nge a thah tih chu ka hre lo, mahse, inawkhlum angin a kaltir ta a nih kha" a ti ta a. A reh tlawk tlawk mai. Imma chuan sawi tur reng reng a hre lo, Bella tana kha mihring tenawm huatthlalaawmzia a hai lo va, mahse, mit aiah mit, ha aiah ha tih thu changchawi tur êm chuan a nupui chu a ring phal si lo. 

"Remruat, i thutlukna chu engpawhnise ka pawm vek aw" Bella chuan a ti leh sap a. A nupui kuta vawnsakin, "I hun kal tawha i sulhnu leh i hnuhmate chu hriatreng ka duh tawh lo ve. Police ka nihna ang chuan man thei che ka ni. Mahse, ka nupui i nihna ang chuan ka ngaidam che. Ka hmangaih che" a ti tham tuak a. Bella hlim hmel chu hmuh a nuam kher mai. Duhthawh zetin an inkuah ta ngawih ngawih a. 

"Awii, bawihte, kha chu khawih loh tur..i dawlh palh ang. Khaw maw" Kimi chuan a fapa ninhlei leh harh lutuk chu a veng hneh meuh lo a ni e. Nau awmtu a nei tak naa, Holidayah chuan amah ngeiin a awm thin. Rogera chuan a pa dah that coins a lo hmu fuh pek a, a kalsan hleithei lo. A nu nen an inpawt chawt chawt a, Kimi lahin awka vinin a hau phal bawk si lo. An va buai nufa thin tak. Zaninah an inah Rosangpuia te nupain chaw an rawn ei dawn lehnghal. 

"Hawh, ka bual ang che. Anuteii te an lo kal tep ang" tiin Roger duh lo chung chu bathroomah a luhpui a. An va inbual nufa thei hram. A thawmhnaw a haktir laiin Zirsanga a rawn haw a, "Ka buang thung thung, khaw nge i awm?" A rawn ti lut lûng lûng a. A pa aw a hriat rual rualin a phit chhuak nghal. A pa chu a va pawm chawt a, "Khaw maw, kekawr i la ha lo. Rawn ha phawt rawh" a nuin a rawn ti. Zirsanga chuan a haktir nghal mawlh mawlh a. An chhungkaw khawvel zimteah chuan hlimna in thla a zar mek a ni. Tumah mi dang an mamawh lo. Dar 5 velah Rosangpuia te chhungkua an rawn lang a, Loicy leh Roger chu an inkuah nghal. An inngai thei a nia. Dingpuii pawn Roger chu a chul hliau hliau a. He chhungkaw hnihte hi chu an damchhungin an inzawmna a chhe thei tawh lo vang. An inzawmna a thûk êm mai. Zanriah pawh hlim leh puar takin an kil dun a. 

Rosangpuia phone ri sek chu Dingi chuan a ning deuh nge, a pickup sak ta a. "Aw Rini, keimah a nupui ka ni e. Ka pasal hi lo call tawh lo teh. Hna thil chu office-ah insawi dun thei e" a ti piap mai. Rosangpuia leh Zirsanga te chu awmze nei zetin an inmelh zauh a. 

"Ninawm lutuk, Mi pasal a ni tih an hriat loh an lo ngaizawng hi chu ka la hrethiam. A nupui pawh min zah zo lo khawpa a lo call sek hi ka hne fahran lutuk. Hetiang hmeichhe cheap lutuk hi i ban lo a nih chuan i hre khawp ang" Dingi chuan a pasal rum zeta melh chung chuan a ti hlaih hlaih a. Kim pawh chuan, "Awii kan Zirsangliana pawh hi maw..hmeichhe pangngai hmel deuh deuh hian an rawn be ziah. Anmahni hian an zir zek zuk a nih hi, lerh lutuk mai" tih pahin a pasal a va melh ve kur a. Mipa pahnihte chu za lo zeta nuiin, "Kan zir vang pawh a ni lo. Kan be ngai lo. Ka hrethiam tawh bik lo" an han ti ngawt a. Dingi leh Kimi an áng zui hlak hlak. 

Mahse, Rosangpuia leh Zirsangliana te hian an nupuite hi an phatsan dawn lo tih chu an nupuite hian an chiang tawk viau thung. 

Abby chu Amanda ngeiin a han dâwp chho tan ta a. A tirah chuan luhlul a chhuak ve tho, mahse, Amanda chuan a tlankhalh zel bawk si. 

"Abby, tumah i that lo va, hmanrua mai i ni tih ka hria alawm. Chuvang chuan i chunga lengte hi sawi la..nang chu i sahimna lam ka ngaihtuah ang. Zalen taka khumpui kai leh i la duh a nih chuan i ka i an a ngai. Jail chhungah chuan i châkna phuhru thei an awm dawn hauh lo a nia" Amanda chuan a ti a. 

"Jail ka tan rei i ring reng reng em ni? Ka chunga lengte thiltihtheihzia i hre lo a nih kha. Kar khat pawh ka táng lo vang" Abby chuan a ti vei páng páng a. 

"Kan kuta i awm tih an hriat rual khan nang nena inzawmna neite chuan an document an halral vek tawh ang. Abby, tangkaina i nei tawh lo. Nge, heta tanga chhuakin an ni chu i va hmachhawn duh zawk? Kan kuta i awm tawh hnu hian i chunga rinna an nghah leh ngam chu ring buai duh suh" Amanda chuan a lo ti hmiah. Abby chuan a rilru tak chuan dik a ti. Mahse,a puanzar vek chuan Jailah tang ta si se, tuin nge la chhuak ang tihah a buai a ni. 

A ngaihtuahna hria niawm takin, "Rawih lai leh ruaitu te case hi a inang thei lo a nia. I chunga lengte kan kuk thluk hunah nang chuan nunbul tan thar leh turin he lai hmun hi i chhuahsan ang. " Amanda chuan a ti leh a. Tifiam mai mai hmel a pu bawk si lo. Abby huphurh ber zawk erawh a chák loh rukna Jail chhunga a hmang chhuak thei tawh lo tur chu..mahse, Amanda chu a ringngam chiah si lo. A rilru a buai ru ve khawp mai. A tawng chhuah duh si loh avang chuan Amanda chuan, "A tawpkhawk min nawr thleng a, inchhir suh ang che" a ti sap a. Vibrator a rawn lek chhuak ta mai. Abby chu a thlaphan hmel ta kher mai. Room chu a thim ruih a, Amanda chuan Ephraime a ko lut a, Ephraime hmel dik tak Abby pawn a hmu ve ta. A mipa lo mutpui tawhte zawng zawng aiin thahrui a neih hmelin a pa zawk a, a mipa duhzawng chu Ephraimeah chuan a kim vek mai. 

"Engtin nge min tih dawn?" Aw khur lek lek hian a ti ro halh a. 

"I hre mai ang" tiin Amanda chuan chhuatah a namthlu a, Vibrator chu on-in Abby kap zawn vel chu a'n hrut ta mai a! Abby a thaw hawk. A sen ap ap a, a mitmeng chu a rawn de sawr sawr bawk. Ephraime chuan a kawr hak lai chu phelhin a 6 pack chu a rawn lang ruah a. Abby chuan mamawh zetin a lo melh thung. 

"Abby, tawng rawh. I tawng chuan Ephraime hi i taah i siam nghal ang" Amanda chuan aw ring lam lek lek hian a ti a. Sex addict tan chu aia tawrhhlelhawm a awm lo. 

"Aw..ka sawi ang..ka sawi dawn" a ti ta chul a. Amanda a khi ta sak. 

Sawrkara mi pawimawh tak tak bakah Doctor thenkhatte an han man leh ta nghauh nghauh chu Sawrkar lam an thawl ta hek hawk hle. CM ngei pawh a bang ta lo. Abby a tawng chhuak miau a! Zoramah titi dang a leng leh ta lo. Chung an mi mante ka atanga chhuak chu, "Hel pawl a din tak avang leh thuneihna chan zel kan duh avangin Secret society kan din a. He pawl hmang hian Zoram chu awhbeh kan tum a, Lucifera lalram tih zau zel hi kan pawl thiltum a ni" tiin. Rapthlak an tiin, Thlavang hauhsaktu reng reng an awm ta lo. Sualna chu vaikianin a awm ta zel e. 

Ephraime pawh ramhnuaia a inah a nupui leh a fanu bulah thlamuang takin a khawsa ta a, Mipui mithmuhah a inlar ngam ta bawk a. A nun chu a zalen ta. Zomuani pawn nuam a ti a, a thla a muang takzet. An chhungkua chuan an hlim tawk viau zel a. An fanu chu an thlir ning thei mawlh lo a ni ber e. Aizawl lamah in lianpui a lei ta bawk a, An fanuin kum khat tling se insawn chhuahte pawh an tum ve tak kha. Thlahpawlh nisiin hetiang taka Zoram a vei hi Mizo pure te ngei rilru a khawihin Ephraime chu an chhuangin an ngaisang takmeuh meuh a ni. 

"Aw..Amanda.." Sama chuan hlauthawng leh huphurh rilru takin a ti a. 

"Zanriah ka bawl kep che aw. " a rawn ti teh ngawt a. Sama'n a mit a khap sak. 

"Chuan..zanriah ei khamah.." Inthlahrung takin a ti a. 

"I fapa i paw muhil ang a, kei ka lo mu hahdam thung ang" a rawn ti nghet charh a. Sama a lam lo chauh. Amanda chuan a ngaidam ta. Hmanhmawh zetin a insiam sawk sawk a, a chhungte bulah thil awmzia a sawi zung zung a. A ranga rangin a tlan chhuak nghal. A va thlen chuan Amanda a lo inbual zo chiah a, Bathrobe nen a lo la awm. Tîm zetin pindan kawngka bulah a ding a. 

"I fapa muhil lai hi rawn en teh, a hnár ve nasa mai. A pa a chhun chiang" Amanda chuan a lo ti láng láng a. Zawimuangin pindanah chuan a lut a. A fapa duhtak chu zuk melh ngawih ngawihin, "Ka fapa i ni" a ti sup a. Amanda hmaah chuan thingthiin, "Amanda, ka lawm e. Ka hmangaih che. Ka damchhungin ka pelhe leh tawh ngai lo vang" thutak em em hian a ti a. 

"Tho rawh..Pasal tha tak i ni tawh dawn tih ka hria alawm" Amanda chuan a lo ti a. Inkuah dun rial chungin an fapa muhil chu an thlir dun a. 

Jail pawh a khat ta hle mai. Milian ho an tam tawh zawk awm e. Mahse, jail chhungah na nà na chuan lo tàng senior tawhte an lal lo thei si lo. Erica pawn Dr. Zira te enthlak hna a thawk kal reng a, Report kimchang pawn lamah a pe ziah bawk. An thiltum tithuanawpa dodal turin a rukin pawl a din ve ta rup mai. Misual pui pui leh rothap deuh deuh anga a ngaih thinte pawn an rawn zawm ta dual dual a. Setana lalram din chu misual nia kan ngaihte pawn an lo duh hlek lo a lo ni. Zawi zawiin Secret society pawh an hmetmit thei turah an ngai e. 

Ephraime phone chu a ri ral ral a. Mutchhuak zetin a ban a, "Hello" a ti zawi sup a. 

"Inthlanpui lo awm leh turah ZCP aiawhin candidate tura sawm leh ngen i ni e" lehlam ami chuan a rawn ti fiah kàk a. 

A chhing sawk..

"Rem i tih ngei kan beisei" a rawn ti leh a. 

"Thutlukna ka lo siam hma ang e" tiin a lo chhang a. 

A rilru a insual nasa hle thung. 

A TAWP TA.