inferno 19

INFERNO (19)

Ziaktu: Toni Râlte

An zanriah kil chu hun dang aiin an tak ran mai a. Han titia han fiamthu pawh an nei lem lo. Rosangpuia chuan, "Zanriah ei tura ka sawm chhan che u chu thil pawimawh tak a awm a. Kan nu nen kan sawi dun hnuah a tan pawha tha tur leh keini tan pawha nakin zela kan fihlim theihna tur kawng niin kan ngai a. Kan fa u zawk, Mipa Rogera saw a nihna takah chuan ka thian hlui fapa a ni a. A pa erawh Arab lam daih a ni. Kan thiani chuan a pa a hlauh vang leh a pa ten naute hralhsak an tum avangin ka kutah an dah a. Mahse, amah vanga han buai leh zauh chu kan nei. Tunah hi chuan a pute lam chuan an la rawn ngaihven tawh rih lo va, mahse, Rogera hi an tlangval chho ang a, a nu te chhung lam hian an la rawn ngaihven leh tho ka ring a. Tin, an hmangaih vang ni loin sum leh pai avang zawkin..Loicy naute dang an la rawn piang chho ang a, amah Roger hian kan thlah a ni ve lo tih hriain hrehawm a la ti ang tih kan hlau a. Dingpuii phei hi chuan zep nàk emaw a tirah phei chuan ka lakah a thinur hial nghe nghe. A fa ang tak taka Roger a lo en tawh vang a nia..chu chu a nia ka sawi tum, fa in nei thei tawh lo va. Rogera hi in fa anga in enkawl theia in hmangaih dawn a nih chuan in kuta hlan hi pawi kan ti ta lo a ni" a ti ta dap dap a. 

Kimi a hamhaih nasa ngang mai. Lawm tur nge lungngaih tur tih pawh a hrethiam lo. Zirsanga erawh a inngaihtuah vung vung a. Rosangpuia melhin, "Thianpa, thian tha nih i lo tling hle mai. Mahse, nakinah buaina i tawh phah ang em? A pute lamin an rawn ngaihven hunah eng thu nge i lo sawi tak ang" a ti a. 

Rosangpuia chuan, "A nu hi nizanah khan ka be pawp thei hram a. Ani chuan ka ruahmanna engkim a pawm thlap vek a ni. A puten an rawn ngaihven hunah, 'A nuin a rawn la tawh' tiin ka sawi mai ang. A nu hi chu kan ramah a rawn haw a rinawm tawh lo a,amah pawn a duh dan a ni bawk. Kha lamah kha chuan buaina a awm lo" a ti awlsam êt a. 

Kimi chuan, "Awii! Pathian hian min lo ensan lo a nih dawn hi..ka lawm em mai kei zawng" hnukulh teuhin a rawn ti chhuak hlawl a. 

Dingi chuan," Ni ngawt mai. Zep loh chuan kei chuan a tirah pawm harsa ka ti a. Amah Rogera ka'n en thin, ka lainat si. Mahse,a pain chiang taka a han sawi takah kha chuan a tana tha ber tur zawk niin ka hre leh ta a..ka ngai viau ang" a lo ti ve a. Zirsanga pawh a nui ta var var mai. 

"Eng hunah nge ni ang?" A ti ta sup a. 

Ephraime chuan a mit a nuai chawt chawt a. Tunah hian Emily profile check tha lehin a thusawite kha a dik leh dik loh a finfiah mek a ni. A nu leh pa thih hun nia a sawiah chuan chutiang thil thleng chu a awm hauh lo va. Nupaa thihna te chu news-ah te pawh lan ve chuai chuai awm tak a nia. Sawrkar lamin an thup zawk nge tih erawh a hre bik lo. Tin, Emily inti in a awmna hmun nia a sawiah khan a bulhnaia cheng ten Emily thlalak an han en pawn chutiang hmeichhia an hriat ngai loh thu an sawi tlat a ni. Ngaihdan siam thiam harsa a ti tan ta riau mai a. A lo lalut ve luklak tawh bawk si, an camp lama hruai erawh a tum ta lo phawt. He hmeichhia hi sawrkar spy pawh lo ni tehreng se, an pawl tana hman tangkai dan a awm maiin a ring. Amanda anga fing ziktluak a ni lo phawt ang a, a duh ang chu a hmu mai bik tur a ni lo tih chu Ephraime intiam ruk dan a ni. Emily file a en fel hnuah Zochhingpuii lak chhuah dan turah ngaihtuahna a seng chho leh tan ta a. Zoi hi amah a inpe mai nge, sawrkar lamin an lalui zawk tih a hre lo. Amah Zoi chu kam khat lek pawn be thei se chuan ngaihdan a siam thiam mai tur hi a nia. An dahna hmun pawh a la hre si lo. Mahse, engti kawng zawng pawn Zoi chu hmuhkir leh a tum tlat a ni. He hmeichhia hi sawrkar ta a nih dawn ai chuan thi se a tha zawk tih ngaihdan a neih hial danah Zoi pawimawhzia chu a lang ruak mai awm e. 

Dr. Muanpuia chuan sana chu melh zauhin a hmaa ding chu chiang takin a en leh te te a. Buk nghut pahin, "Kal rawh le. Cabin no. 8 aw" a ti zawi sup a. A tarmit phena a mitmeng chu phurna hlirin a khat a. Doctor mahnise, mi dang nunna a la dawn ta chu a nia. An hlawhtlin ngei a ring ni turin Amanda thih thu an puanzar huna Zoram mipuite awmdan tur te a lo mitthla kual a, Sawrkar lam erawh chuan Abby nen an hlawh an pun ngei thung ang. 

Abby chu syringe hum ran chungin a chhuak ta a. Cabin lam chu pan chhat chhatin a syringe ken chu a hum nghet sauh sauh a. Amanda hun tawp kharsaktu a ni thei tur chu a inchhuang hluah hluah mai. Step a zawh chhuak chiah tihin nurse pakhat a tawk a, a phu deuh zawk. A hmel chu êngin a rawn chhun chian êm vangin a lang chiang thawkhat a niang, Nurse chuan a rawn enzui vang vang a. A hmuh ngai loh vang nge a chal a chuar náng náng mai. Mahse, thawktu thar pawh a ni ve thei tho ti rilruin a chhukthlaksan ta zawk a. Abby chu Amanda cabin bulah a ding ran a, a thinphu pawh a rang ve deuh. Kawngka chu zawitein a hawng a. Amanda chu a lo muhil sák sák a. Thutthlengah Samsona chu a lo thu a, phone a lo khawih mek. Nurse a hmuh rual chuan, "E! Pek a hun tawh ni maw?" A ti vat a. A tawng chuan a hria ang tih a hlauh avangin Abby chu a bu nghat a. Amanda drip bur lam chu panin syringe chu a lek va a. Amanda chu an thawm vang nge a rawn meng diar diar a, fiah lo ruai hian nurse chu a han hmu a. Nurse erawh chuan a harh tih a hre lo a nih hmel, Drip lam ngawt chu a en thung. Amanda chu a meng chiang thei ta deuh a, nurse kuta syringe chu a va hmu ve a, mahse, thil hmuh dang a nei tlat! Chu Nurse chu a kut a khur nia mawle! Hei chen damdawiinah a awmin doctor leh nurse a lo hmachhawn fo tawh. Doctor leh nurse kut khur der der hi a hmu ngai tlat lo. An duty a nih angin awlsamtêin an an hlen mai thin. Tin, nurse mitmeng tak ran leh eng emaw inphum ru pawh chu Amanda chuan a hmu ta zel a. Ngaihthat lohnain a tuam nghal. Engmah erawh a sawi lo. Nurse-in drip chhunga syringe a kah luh rual chuan a a bana venflon an vuah chu rizai hnuaiah a hlip ta daih a. Nurse chuan a rawn harh tih a hmuh chuan meng buai nak hian, a nuih sak a. A tawng duh miah lo thung. Amanda pawn a lo nuih let ve sak. A tihtur a tih zawh chuan a chhuak ta nal nal a. Kawngka bul pawn lamah chuan ding datin thawk a la hawk a. Syringe chu lek kang zauhin, "I hna i thawk tha e" a ti sap a. Dr. Muanpuia office lam a pan leh ta nghal a. 

"Sama, tuna lo kal kha tu nge tih i hria em?" Amanda chuan a ti zawi sap a. Sama a phu uih. Hawi à angreng tak hian, "Hre nang..tu nge?" A lo ti nghut a. 

"Tu emaw chu a ni. Nurse a ni hauh lo" tih pahin a venflon hlihna lam kut chu a lek kang a. Sama chuan phawk zetin, "I hlip elo? Ngati nge?" A ti hluai a. 

" a kut a khur tlat a tin ni. Tunah rang takin Dr. Muanpuia office lamah va kal rawh. Eng emaw tal hriat va tum ang che" a ti hmawk hmawk a. Sama pawh a chhuak vut. Zan a rei tawh bawk a, a reh thiap mai. In hnuai lam bathlara mei zu pahnih khat lo chu pawn lama chhuak pawh an awm mang lo. Dr. Muanpuia pindan zawnah chuan a ding chat a. Va luh ngawt mai chu dika a hriat loh avangin thawm ngaithlain a ding reng a. 

"Riak mai rawh. Naktukah ka rualin i chhuak mai dawn nia. Tunah chuan rinhlelh i kai palh ang" Muanpuia tih ri a hriat chuan a hmui a hup a. 

Chhana erawh a hre phak lo. A awmzia chu Dr. Muanpuia pindanah chuan awm ve dang an awm tihna. Tu nge ni ta ang? A rilruah hmeichhe pakhat chiah a rawn lang..Abby..

"Naute, in huan, in ar in sirah ka awm. Khawngaihin lo chhuk lawk ta che" dar 12 a ri tep tawh tihin Sangpuia'n a rawn bia a. A thu hluai mai. A thinphu chu rang tak a ni. Zawitein a tho them them a, a hmuh chak ngawih ngawih a hmangaih Sangpuia hmu tur chuan engmahin an dal thei lo vang. Kawngkapui chu zawitein a hawng a. A khar leh khap. An huan lam chu pan thlain a pa ar in sak phena tu emaw ding ran pawh chu a zuk hmu thei ta. A hnute lam lam a ulh a ni. A zuk thlen thlak chuan eng sawi set set loin an inkuah ta vawng vawng a. Sangpuia chuan nauteii chhipah a khabe nghatin a inpetruh nasa hle. Mipa e ti lo chuan a tah a chhuak ve takzet a ni. 

"Ka naute, i lo dam em? Ka va ngai tak che em" a ti zawi sup a. 

"Umm dam e..nang i tha em? I va cher ve" a ti siam siam a. A mittui a tling pam bawk. 

"I hmel hmu lo va rei tak awm chuan chaw ei tui a har em a ni" nui chungin a ti a.

"Ei teuh teuh tawh rawh. Chuan, ramhnuaiah mi i let leh dawn?" Nauteii chuan a ti a. 

"Umm, tunah pawh hian min enthla mek maithei. Nang leh i chhungte dinhmun hlauhawma dintir che u ka duh lo. Mahse, ka ngai tawh êm che a, ka lo kal tawp mai a ni" Sangpuia chuan a ti a. 

"Ka khawngaih che ee,. Engkim hi tha vek tawh se ka ti" nauteii chuan a ti tiau a. 

"Kan hneh tep tawh ang bawihte, fel deuhin awm la, fimkhur la aw. " tiin a biangah a chul a. 

"Ka sual ngai hleinem" tih pahin a nui a. Sangpuia insum zo tawh lo chuan a hmangaih hmuiah chuan a fawp ta ngawih ngawih a. An duhthawh dun kher mai. An inthlah hleithei lo a chha a ni e. A tawpa tawpah Sangpuia chuan a hmui phawiin, "Chho tawh rawh le.. Kei pawh ka kal ang..ka hmangaih che" tiin Nauteii chalah a fawp a. Thuawih takin Nauteii pawh chu a chho ta a. Sangpuia pawh thim zingah a relhbo ve ta nghal bawk. Nauteii tan chuan muthilh a har ngawt ang le..

Dr. Zira ruahmannin An pawl member lakluh hna chu an tan chho ta a, "Jail atanga chhuah vat i duh chuan kan pawl rawn zawm ve rawh" tih mai chu a nia an sawi thin. Pa bumro leh rawva tak tak pawisak nei lo te tan chuan offer tha tak a ni mai a. An lut ta ruih ruih mai. Pu Ramliana'n thil kalhmang a hriat thawi takah chuan Erica a va hmu ta vat a. 

"Eng chena thui nge an kal tawh ang?" Tiin a va zawt a. Erica lah chuan engmah a hriat loh thu a lo sawi mai a. A hre lo tak tak bawk nen, Pu Ramliana rilru a hah ru kher mai. Amah thlimin a pawl lo dinsa leh a lo dawmkan hram hram chu Zirliana leh a thuihhruai ten an neihsak dawn ta chu a ni si a. A cellah lutin a ruk thei ang berin a kut chu a zai thi a, bati bung chhi lehin, a chhing ta vang vang a. Mahse, a reh tlawk tlawk mai. Zohlupuii a ngai vawng vawng nia! Ani kha chuan a chingfel vat zel kha a nia. A puihna a mamawh ta kher mai. Engpawh nise, He thil hi a tel lo chuan a kaltir dawn bik lo tih thuah a chiang. A tel ve theih lohna chu a tichhe ngei tur a ni. Lucifera lahin a ngaithla duh tawh bawk si lo. Hlupuii te biakpawh vat dan a ngaihtuah a ngai a ni. An warden nen hian an intitha riau tawh a, sum hmanga a tlawn tlat avangin warden pawh hian a duh ang thil chu a tihhlawhtlinsak ve mai zel. Mahse, jail chhung atang chuan engtin nge pawn lam mite bulah an pawl chungchang a sawi theih ang? An veng reng zel bawk si. Tihdan tur ngaihtuahin a tlaivar ta zak a. Zing dar 5-ah chuan a thu chhuak ta hlawl a. Nuih sáwng pahin, "Zira, min daikhalh dawn bik lo" a ti nghut a. Chaw ei tura an intlar lai chuan Dr. Ramliana pa upa tawh lam chu luhaiin a tlu tawp mai le..guard ten an rawn zawn vat a, A cellah an zawn lut a. Pu Ramliana lah chu a harh duh miah si lo. A hnuah rawn khuh bawrh bawrhin a ka atang chuan thisen a rawn chhuak ta mai a. Vengtute ngaihtha lo chuan warden an zuk be ta vat a. Ani pawh rawn chho ve nghalin a rang thei ang bera Pu Ramliana chu Hospitala hruai turin a ti ta a. Kutkawl pawh an buntir lo. Vengtu pakhat erawh a kal tel. Hospital an thlen chuan doctor ten an han en a, a BP a lo sang ve a lo nia. A ka atanga thisen chhuak kha chu an ngaipawimawh vak lo a nih hmel. Ni e, a ka atanga chhuak tak tak ni hek lo le. A rawn harh deuh chuan amah vengtu bulah chuan, "Heti hi ka ni sia. Ka fapa tal ka lo be thei ang em? Dama ka hmuh hnuhnunna ber tur pawh a ni maithei a" tiin a ngen a. Vengtu pawh chuan hrethiam takin a lo phalsak a. Zoliansanga number chu hmehchhuahsakin, a call sak ta a. Pu Ramliana chah angin, "Hei i pa damdawiinah kan rawn hruai a, a BP sang avangin. Nang leh i nupui kha hmuh che u a duh a niawm e. In rawn kal theih chuan a lawmawm viau ang" tiin a chah ta a. Zoa te pawn chawhnu lama an rawn kal nghal tur thu an rawn sawi ve a. 

"Ka pa chu a upa ve tawh bawk nen, a pawi ngawt mai" Zoa chuan a ti a. Hlupuii erawh chuan chairman chu hmuh a chak fahran lo hle. A pasal pa a nihna ang chauha hmu tur a ni. An sulhnu zozaite avang khan kha pawl mi leh sate kha chu a tuamah hmuh a duh vak tawh lo a ni. Hriatchhuah tur a tam lulai êm a ni. 

Damdawiin an thlen chuan Pu Ramliana chu a lo mu a. Amah vengtu pawh pawnlamah zuk leh hmuam a lo ti ve mek a, putar mai a ni tawh bawk a, ven uluk vak kha ngaiin a hre bik lo a ni mahna le. Zoa chuan, "Ka pa, eng nge i an le?" Tiin a pa chu a melh a. 

A fapa leh a monu hmel a hmu chu a lawm kher mai. 

"Ka tha reng, in tan thuchah pawimawh lutuk ka neih avangin ka na der ringawt a nih hi. " a lo ti sam êt a. Zoa leh Hlupuii an meng phawk hle. 

Pu Ramliana chuan a aw a han thian te te a, "In hriat ngei ngei tur thil a awm a ni. Jail chhungah Zira leh a hoten pawl dinthar hna an tan leh mek a, member pawh an pung chak khawp mai. Kei leh Erica te erawh hmaih kan ni. Pawi ka ti lem lo bawk. Hetianga an inlak len leh chuan pawn lamah pawl mi leh sa ten lakchhuah dan tur ruahmanna an siam vat ngei ang. Rawn chhuak ta se, Zoram hmabak in hre ngei ang. Tin, in fanu nunna atan pawh a hlauhawm bawk. In hmeh mih vat a ngai a ni" a ti ta mawlh mawlh a. Hlupuii a khur ru deuh. Kha pawl rapthlak leh tawp ru tak kha dinthar a nih leh teh chuan aw...A hma ai khan thil an tithei ngei awm si a. 

Zoa chuan, "Engtin nge hma kan han lak ang aw. Sawrkar lahin a thawhpui tlat bawk si. ZCP lam hi hrilh mai chi em mawni dawn le" a ti zawi sup a. 

"Chu chu a tha ber ang. Nang Journalist i ni bawk a, Jona nen pawh in thawk dun thei leh ang a. Hlupuii hian Zira te chu a hmachhawn thei ber dawn a, mahse, i remtih ka ring si lo. Kha lam chu in tih dan dan a ni e" a pa pawh chuan a lo ti ve a. 

Hlupuii chuan, "I tunu chu sawrkarin an kawl mek asin" a lo ti zauh a. Pu Ramliana chu a rum nghut a, "Zawi zawiin a thisena virus pawh thah dan a awm maithei a ni. Mahse, Pu Liana ber a boral tawh si a. Sawrkar chuan an train ngei ang le

. " a ti a. Vengtu a rawn luh tak avangin an topic an thlak ta daih a. 

Dr. Muanpuia chuan zing a thangharh rualin nurse tu emaw berin mangang taka Amanda thih thu a rawn sawi a nghak a. A nui suk suk bawk. Mahse, a nghak rei ta riau. Engmah chutiang boruak chu a awm der si lo. A pindan atanga chhuakin a han hawi vel a, engkim chu a pangngai vek bawk si. Amanda te cabinah lut an la awm lo a nih beiseiin amah ngei chu a va kal ta a. Kawngka a hawn hmain chhunglam atangin a rawn inhawng a, a phu zawk nghe nghe. Amanda ngei mai chu kal kun deuh hian a rawn chhuak ta mai! Phung hmu ang maiin Muanpuia chu a dáng sáwp säwp thei nia! Amanda pawh chuan a hmuh hmaih lo nasa. A khi sak a, "Doctor, min rawn hmuh i tum em ni?" A ti sap a. 

"Aa..aw..eng nge i an tih rawn hriat ka tum a" a ti nawi nak mai a. 

"Ka inthiar dawn a" tih leh kalsan a rual. Amanda chu a dam tha mah mah. Mahse, a banah venflon a awm lo! Muanpuia chuan Amanda hian engkim a hria tih a hre ta. A dinhmun a derthawng tan ta le..Abby ngei pawh a hawntir vat a ngai. An rawn hmuh dun hlauh chuan an mualpho nghal a ni mai. 

Amanda pawn buhhawp a ei thei ve tan a. Ei tam erawh a har viau ang. Ephraime a ko a, a rawn lang tep tawhin a ring. Nizan a thil tawn kha Ephraime bula a sawi a ngai. Imma pawh a rawn thleng tawh a. An chaw eina vel Sama'n a tihfai laiin Ephraime pawh a rawn lut ta zan zan a. Kawngka chu an kalh tete phawt a. An thu kual ta pap mai. Sama chuan Amanda khum chung bangrel sang laia camera a kam ruk chu a han la thla a. An en ho ta thap mai. Nizana nurse rawn lut Ephraime'n a hmuh rual chuan pháwk zetin, "Emily a nih hi. ZCP-ah lo luh a duh a, ka kawm alawm" a ti ta a. Amanda chuan engkim a fiah ta kuar mai. 

"Emily ni loin Abigail a ni. A mitmengah khan Abby sulhnu ka hmu rêng a ni. Ani hi tûra min hraitu ngei kha a ni bawk. Sama, khaw nge a lem an ziah kha rawn la teh. Khamini coffee min rawn pek ni pawh khan Emily angin a nih hi a va kal..a chiang ta. " a ti nghat nghat a. Thinrim vak chu sàwta a hriat loh avangin a insûm a. An lemziah leh Emily hmel chu inang tak a ni. 

"Mahse, Amanda, Emily tak tak pawh a ni ve thei tho asin. Abby nen hian mi hran an ni ve thei tho" Sama chuan a ti a. 

"Chu zawng kan la fiah dawn nia. Ephraime, in pawla lo luh a tum chhan pawh tikhan i hrethiam tawh ang chu..a thangah awk hlek suh ang che u. " a ti ram hmak a. 

Imma chuan, "Kan man nghal mai dawn lawm ni?" A lo ti ve a. 

"Ni lo ve. Emily anga a inchei danglam leh hunah zawk le.. Chu chu Ephraime hian a ruahman ang. " Amanda chuan a ti hul hak a. Ephraime pawh a bu nghut mai. 

"Abby chu keimah ngeiin ka hmachhawn duh a nia. " a ti leh a. Sama'n , "I la chak lo êm mai. Tharum te hmang ta se" ngaihtuah hmel deuhin a ti a. 

"Ka chak hunah kan che dawn alawm. Ani chu tihian ZCP member ni rih phawt se, Ephraime pawn a ringtawk tih lan nan an ruahmanna thenkhatte pawh hrilh ve zauh zauhin tihtur te pawh tuk se la..ka dam that veleh kan che ang. Tuna kan chet nghal vut chuan nizan an lo chet tawh vangin kan hrechhuak tih an hre dawn a. An fimkhur dawn" a ti ta a. An thaw huai hlawm mai. 

Sawrkar mai bakah sumdawng ho pawh an thawm a zawi ta viau mai. Thenzawl leh Haulawng chu District thara puan niin inhnialna a sosan phah hle. Sawrkar a retheih hle laia Chutiang awm leh ta chu Social media lamah boruak a sosang viau mai. Nia, thil tul ber a la ni rih lo bawk a. Mahse, an in hnial luih luih laiin ramri lamah buaina a rawn awm leh ta. Topic a dang leh ta daih mai. Vai ho chuan ram an rawn la leh ta duai duai mai a, ramri hnaih mizo khuate thleng chuan an rawn chuh ngam ta hial mai le. Hei zawng ram hruaitu te chawhthawhna remchang tak pawh a niawm e. Central lah chu a inrawlh duh malêk a. Kan thalai tam tak ramri venghima kal duh si, kal ve thei si lote chu Media lamah an au dum dum mai a. Ramri lama duty sipaiten, "Sipai min rawn pek belh rawh u, a siruk lain an rawn thawk tawh si a. Thisen a luan a rinawm" tiin ngenna an siam a. Platoon hnih tirhbelh an tum laiin kan sawrkar lam hotute atangin, "Saiphai lamah tirh belh zawk rawh u. Ramri lam chu buaina hmehmih theih a la ni" an ti ta tlat mai! Saiphai lamah an intir chho a. Tin, hetia ram buai lai hi an chuh nge ni dawn ni, khawthlang lama awm chakma ho pawn ram hauh an rawn tina chho leh tan ta. Zoram chu a va buai tehlul êm.. Titi dang reng reng a leng lo a ni ber e. Sipai tlem zawk na ná na chu Vai ho chuan an lo zuam ta deuh nge, Zing lam dar 2 velah silai a puak ta dur mai le. Indona chu tan a ni ta. Zoram sipai lam an tangin, hman ata tawh huaisen leh tlawmngaia sawi Mizo hnam nuna duhawm em em chuan par a rawn chhuang ta a. Tha thlah miah lohin khawvar thlengin silai a puak ta. Zoram chu chhum dumin a tuam a ni ta der mai. 

Vanduaithlak takin Zoram lam chuan sipai 12 lai a chán ta a. Vai ho lam chuan nunna 6 an chán thung. Rilru a va na duhin mizo tlangval thisen a lum ta hulh hulh mai. Ram hruaitu te lahin thu leh hla an la nei thei si lo, an han meeting leh te te a. Sawiho vak ngai pawha lang lo, thil urgent lutuk chutianga la tih khawtlai a ni chu mipui thinlung a na lutuk tawh a. Central YMA lam phût a na tawhin, an ni lah sawrkar lamin an ka an hup bet hmiah nge thawm riva engmah a awm si lo. ZCP te pawn chutia kan ram chhung ngeia vai hoin min han tlawm ta mai chu rilru na leh thin tawt takin an lo ngaichang ve reng a. An kut an hum ruh a, an hachang an thial rawp rawp mai. Sawrkar lam chuan thuchhuah an rawn siam ta a, kan sipaite lam chu flag var zar turin a ti ta mauh mai le! Hei zet chuan kan sipaite mittui a hnámtir lo thei ta lo. A mal ang pawha an ngam em em vai ho hmaa puanvar han pharh chu thih hrehin an hreh tih a lang. Hotu lam atanga an thuhmuh a ni miau si a. Mahse, thil danglam tak chumi darkarah chuan a rawn thleng ta.

Media lam atangin, Zoram Chhantu Pawl te atanga thu chhuah chu an rawn puang ta tluar tluar mai le. Hetiang hian, "Zoram Chhantu Pawl te chuan kan ram chhung ngeia vai sipai laka Mizo kan tlawm dawn ai chuan, kan sipaite puia vai ho nawr let tura chhuah a tum a. He hunah hian mizo thalai, ram hmangaihtu zui ve duh in awm chuan silai nen in rawn chhuak ve thei e. Zoram tan kan thisen a luang a nih pawhin, Zoram tan a ni. Dam leh tlang khatah, thih leh ruam khatah le…" tiin. Thalai tam zawk chu hmun hrang hrang atangin an rawn chhuak ta tak tak mai a, Hmun hla tak atang pawn chu thu an hriat rual ruala Aizawl rawn pan ta vang vang an tam mai..hetiang khawp hian Zoram chuan hmangaihtu a lo la nei a ni maw?! Sawrkar chu dem pawh an dem peih tawh lo, ramri buai hi chingfelin vai ho hi an nawr tawm tâwk hnuah sawrkar chu paihthlak a ni mawlh ang. Mi inphal leh inpe tak tak an tam bawk a. Bus- pawh 30 chuang lai an hmang. Tute nge ZCP member ber tih pawh hriat theih a ni ta lo. Sawrkar lam chuan khatia ZCP cho chhuah an ni kha a ruk tak chuan an lo lawm a, man phiar theih an inbeisei a ni mahna. An zinga ram hmangaih tak tak inphum ru te chuan mi hlemhle leh centrala tlaktlum loh hlau tak takte thu chu an hneh zo ngang si lo va. Education Minister zahawm tak phei chuan khatia flag var zara a hrana inbiak leh thu an tihtluk rual khan a banna a thehlut nghal hmak a ni. Ani hi Ephraime hnena information a ruka pe thintu kha a ni nghe nghe. CM leh Minister tam zawk hi an huaisenna kawng a dang tlat a, MLA thenkhat pawn ban an tum ru fur mai. Tum lo mah se, paihthlak an la ni tho dawn tih an hre lawk te pawh a niang e. Sipai lama thuneitu te lah Sawrkarin an kut an phuarsak tlat si a. Sipai ho chu an mawng a za zek zek mai, hotute thu hmu lo va chhuah ve ngawt lah dan bawhchhiatna a ni bawk si. An va khawngaihthlak tehlul êm. Thalai rual tam tak chu Vairengte lam panin an inzui thla nguah nguah mai. A ropui zawnga ngaihtuah chuan ropui tak a ni. A hmun nghak sipai ten chutiang taka tam thalai an han hmu chu lawm vangin an tap lo chauh a ni. Vai ho pawh an hrilhhai hle tih a lang reng mai. Mahse, a hma lama an lo sawp deuh tawh avang khan an infuihphur a, hlauh loh an tum ve khawp mai. An ni lam chu sipai an ngah êm mai a. Training chhuak leh chhuak lo chu a dante pawh a dang mahna. Mahse, mizo thalai te duai lohzia an la hmu dawn chiang. 

Zirsanga leh Rosangpuia pawh an chhuak ve. Joshua ngei pawh. An nupui leh ngaihzawng ten an ngaihtuah ngei mai. Kimi chuan a khawhar hnem tur Roger a awmpui tawh hlauh zawk a. A tirah khan Rogera chu a tap reng mai a. A lungleng lutuk kha. Mahse, Kimi chuan hmangaih leh duat takin a kuah a, ni 5 an han chen dun takah chuan naupanga thuchang, a tlei chho ve tan a. Kimi pawh a ngaina ve ta viau. An nufaa an han awmdun rial phei chuan an inkhawih tam a, a nu chu a zui ve det det ta reng mai. Rogera chauh fa an nei dawn ta a nih hmel. Mahse, Rogera ah hian a lawm a kim a, an nupa inkar chhanhimtu a nia..a hmangaih dan a thûk khawp mai. 

Ramri buai vangin Amanda te pawn chet an la la thei rih lo va. Ephraime te chu a vanduai pawlah an zu tang ang tih a hlauhawm khawp mai. Hmabak a la ko nasa si a. Sawrkar lam inthiam leh si lo chuan sipai a tirh belh leh hnuhnawh a, mipui thengthawngah a thawk tawh si lo. An hmabak a thim ru viau mai. Zochhingpuii lakah pawh chet an la thei rih ta lo. Jail chhung atanga an thuchah hmuh secret society dinthar leh lam pawh buaipui vak dan a la awm rih lo. Dr. Zira te pawn an la nghah deuh a ngaih hmel. Zoliansanga te nupa erawh chuan hmalak dan tur an ngaihtuah a. Zoa chuan Hlupuii tel ve leh inrawlh ve a phal tawh lo bur. Amah ngeiin heng an thurûk hi puanzara mipui te dotir a rilruk ta a. Jail lamah pawh puitu a mamawh avangin Erica zuk biak tha a ti a, kal turin a insiam mek a ni. 

Zoi chu a mur er er a , a taksa za chuai chuai chu a hre thei. A hun a thleng leh ta ngei e. Kutkawl an buntir chu a pawt nghek nghek a. A taksa chu a tang nasa hle. A hmul a rawn khawng chho a, a tinte pawh an rawn zum leh tan ta. A thawmhnaw a tet hawk hawk a, ring em emin a rum leh ta a. Amah veng tura an dah mi pahnihte thil ei lai chu an tawp chawt, thlaphang takin an inmelh rulh a. Zoi an dahna pindan lam chu an va pan ta a. Zing dar 1 a pel hlek chauh a ni. Ramsa chu rapthlak zetin a rum leh ta chhur chhur a. An inrin hmain kawngka chu a rawn su hawng rawp mai. An phu chiang hle, an hmaah chuan ramsa hrawl leh ngho sei zet a ding ta luah mai le. An kha a chih a, chet lak dan tur pawh an hre lo. An inngaihtuah buai chhungin ramsa chuan a rawn zuan zawk a, pakhat hrawk chu a seh chat ta hawk mai, thisen chu a rawn chik chhuak a. A thianpa chuan a silai phawrh tumin a indap a, an thil eina hmunah a hnutchhiah tih a hre chiah. Bawkvakin a tlanchhe ta a, mahse, a tlan rei lo, vawi leh khatah a rawn la lawp a, bang den nan a hmang ta a. A kawng ruh a tliak chiang kher mai. A mu ta hle hle a. Ramsa chu thlanglam bathlarah chhuakin a hnuai sang takah chuan a zuang thla ta a. A lum nasa hle. Mahse, a zalen tho alawm le. Zankhuain Villa lam a pan a. Villa a thlen meuh chuan dar 5 a ri tawh. Kawngka chu a hiat tâwk tâwk a, Zoa'n a va hawnsak ta a. A tawlhhnung dawrh. Chu ramsa chu a fanu a ni miau a. A inhliam nasa hle tih a hmuh chuan a va kuah vat a, a nupui a au nghal bawk. Zochhingpuii'n a in a thleng leh thei ta. 

Vai sipai lam atangin firing order pek a nih angin silai a rawn puak ta a. Inkahna chu tan a ni leh ta. Mizo kan duai ngai lo,.ZCP lam chu training pek an ni ve bawk nen, an kap thiam hlawm khawp mai. Ephraime chuan a silai chuan an tin vang vang a, a hmet ta a. A kahna zawna silai lo lek ve mek chu a eu awrh mai. Ephraime pawh a khik sak kha..An inkap rei vak lo, a chhan chu Vai sipai lamin nunna an inhloh hnem ta riau a,. An hotute lamin dik dawna an hriat loh avangin Flag var an rawn zar ta va va a. Mizo lam authawm leh hnehna hlado chham thawm a ring narawh e. Vai ho chu an rawn lang nawn tawh lo turah ngai ang. Kan ram chu kan ram a ni. 

Zoliansanga leh Erica zuk inhmu chuan rah a chhuah ngei dawn niin a lang. Tlang takin Zoa chuan a sawi ri ngam lo va, "Dr. Zira leh a thuihhruaite pawl din kha pawn lamah chuan keini lamin kan lo hup bet dawn a. Jail chhung lam chu i kutah a awm e" tiin. Erica chuan a hrethiam khawp mai. "Ka lo tum ang e" a ti nghut a. Zoa kal hma chuan, "Hlupuii kha min lo biak rawh aw. Lo hlim zel ang che u" a ti sup a. Zoa pawh a bu nghut mai. 

Mapuia te pawh Sasa duh ang ngeiin tlan kohin an innei ve ta a. Man leh mual an inhlan ve ta. Sasa pawh a hlim kher mai. Lawmsanga pawh Nguri'n a chawm hneh bawk a, ei leh in tha tinreng pein a taksa pawn that lam a pan chho ve ta a. Hmuh an nuam nupa leh tan ta ..Mapuia te fa lo piang tur chu an nghakhlel tlang khawp mai. 

Hnehna changa an rawn takah chuan, Ephraime pawn chet lak a hun tih hriain, Emily chu a be ta a. 

"Naktuk zan dar 9-ah Zo chokaah min rawn hmu ta che. Zanriah i ei dun ang" tiin. Rinhlelhna nei miah loin Emily chuan,"Tehlul e" a lo ti sap. Ephraime taksa lian tak a lo mitthla nghal..naktuk zanah Ephraime chu a mutpui ngei tur a ni tiin a intiam ru sap a. 

(A tawp tep aw..ni e. A dangdai deuh a, ngaihnawm tak a ni vak lo maithei.