inferno 18

INFERNO (18)

Ziaktu: Toni Râlte

Ephraime chuan a hmuihmul lem chu vuahin a sam buk zet chu a lai takah bari a then phawk a. Darthlalanga a inen chuan a in nuih hawk hawk mai..bolywood star, misual pawl zing ami a nih duh hmel kher mai. Member rawn nih duhte hmuh a ngaih miau avangin a inchei danglam lo thei lo. Judy pasal Ngura an tih chu a ring tawk viau naa, Emily inti kha a nu leh pa thahsak an nih si chuan a va lar lo si êm tiin ngaihdan a lo nei hman a. Veh leh chhui reng an nih avang hian fimkhur tluk a awm lo a ni. Ephraime hmabak a la kò viau tho mai. Zochhingpuii lak chhuah a la ngai chèu! A kutah a nute pawn a him ringin an dah ngam a, rintlak a ni tih a lantir a ngai. A nupui leh a fanu duhawm zette chu fawp zauhin ramhnuaia a in chu a chhuahsan ta a. Amanda pawh va kan ve hram chu a tum e. 

Dr. Zira chuan jail tang zinga an pawla lakluh theih tur nia a rinho chu a list thla duat duat a. A hmaa an chairman, Zoliansanga pa, Dr. Ramliana erawh hmaih a ni. Pu Zira hian amah aia fing a nih avangin a chanvo hi a chhuhsak leh mai a hlau a, tin, Zoi pa anga an chhal Pu Liana kha Jail-a kum 4 a tan hnuah inawkhluma hmuh a ni a. Jail thlang ram awl laiah phum a ni nghe nghe. Tunah chuan Dr. Zira pawn beiseina rawn nei thar lehin an pawl chu dinthar leha Zoram kalphung thlak chu a tum ruh hle. Vawiin lama rawn kantu lah khan Zochhingpuii an kawl thu a sawi hlauh lehnghal. Suangtuahna tam tak a nei chho leh a, thuneihna duh vang hian mihringte hian pawisak kan va nei lo thin tak êm. Chung a list chhuah, an pawla tel tura sawm tur a tihte chu a sem dan dan a. Erica pawh a tel ta lo. Thlim zar zar kha a duh zawk hrim hrim. Eric hi chu a hlau ru ve tho, a chet dan engkim hretu a ni miau a. A ka a àn vaih chuan a chhe vek thei dawn tlat a ni. Tichuan, a ruk aralin hmalakna chu an tan chho ta a. Ram an la duai duai maithei a ni. 

"Eng a?! I á ta em ni? Roger te chu ka fapa ang chiahin asin ka ngaih tawh. Engtin nge ka lak atangin i lak hran ang a?" Dingpuii awki chu a ring viau. A hrilhhai hle tih a hmelah pawh a lang. 

"Ka hria alawm, Duatpui, engkim ka hre vek e. I hmangaih tawhzia te, i ngaihsakzia te nen. Mahse, kan thiante ngawih ngawih fa nei thei tawh lo tur saw ngaihtuah teh. Home ami adopt ai chuan an hriatchiansa leh keini chhung nena kan la inzawm zel theihna tur atan Rogera hi kan pe ngei tur a ni. Nakinah fanau dangte pawh kan la nei dawn, Rogera nu leh a chhungte hian an la rawn ngaihven thut maithei. Buaina nasa sawk kan tawn loh nan pawh Zirsanga ten an enkawl hi a fuh a ni. " Rosangpuia chuan a ti dam thlup a. Dingi erawh a ngawi ran a, a lung erawh a awi chiah lo tih a lang. Roger chu a tirah khan han en eng emawna kha nei mah se; an lo chengho rei telh telh a, a hmangaihna pawh a thuk ve tial tial tawh a ni. Zirsanga te a khawngaih lo pawh a ni lo, mahse, han kaltir daih kha a ngaingam chiah lo chu a ni. 

"Kan sawi tha leh dawn nia. Tunah chuan inngaihtuah nan hun ka mamawh" Dingi chuan a ti ta nge nge a. Rosangpuia pawh a bu nghut mai. 

Bella chuan Malsawmpeka muhil lai chu hmuhnawm ti zetin a thlir ngawih ngawih a, a nu leh pa a chhun kawp a, a duhawmin nausen mah nise, a mitmengte chu a fin hmel riau! Imma chhungte pawn an lo hrethiamin Amanda an khawngaih ve em em a. Bella a nau chhiat vanga nunram chau em em kaihthawha a han awm leh ta chu an lawm viau zawk. Peka pawh an duat hle. Mahse,a la sen ve em mai a, han pawm kuala han chhawnchhaih theih a la ni lo nen, Bella kutah a awm deuh tawp mai a ni. Imma pawn a nupui mitmenga hlimna lo inzar chhuak leh a hmuh chuan nuam a ti veng veng a, chutiang taka Bella'n fa a lo awt chu a khawngaih angreng zawk hle bawk. 

Kan Amanda erawh a la harh chiang thei meuh lo va, rawn harh zauh chang chu nei mah se; a la tawng hleithei lo. Sama leh Imma chuan an ven chhawk deuh tawp mai. Zan lamah Sama hi a tlaivar a, chhunah a muhil thung. Chutiang taka ven ngawrh ni ta chu Dr. Muanpuia a chebuai hle. Hotute lam atangin a rang thei ang bera Amanda hnuk chhat tura thupek a dawng tawh si. A awlsam hauh si lo. A vei tuak sek a, tihdan tur ruahman vat vat a tul a ni. A mi chhawr a kaltir takte pawh kha la enthlak zui zel an ni a. Report a dawn danin an chhungte bulah kirin nunphung pangngai an zawm leh vek tawh a, han rinhlelhawmna tur an hre lo a niawm e. Ni e, a rin dan sa kha a nia, mi huaisen leh pawisak nei lo an ni lo miau a. Pawisa duh vang chauha thawk an nihnaah pawisa hmang pawhin an ka hupsak theih an nih kha a ring ŕèng a ni. 

Abby a call ta tawp mai. 

"Abby, zanin chu i puihna ka mamawh tlat, i hnathawh zawh fel loh hi rawn zo fel law law ta che. Lo kal tawp la, ruahmanna ka siam vek tawh" tiin. 

Abby chuan, "Zaninah chuan ZCP hotupa nen kan inhmu dawn asin. An pawla lakluh tlak ka nih dawn leh dawn loh min test dawn a ni" a rawn ti a. 

"Aw le, a nih chuan naktuk zanah hun lo insiam ang che. Amanda hi a harhfima a harh chhuah tak tak hmain kan dahbo a ngai..rinhlelh kan kai loh nan" Dr. Muanpuia chuan a ti a. Phone a dah nghal. 

A rawn meng diar diar a, tlemin a mitmeng a fim tan e. Sama chuan tui a lo thlitsak nghal vat. Thil tuiril lam ni lo engmah ei phalsak a la ni lo va, a ril a tam thin ngawt ang. Drip hi an khai reng zawk a. Tui chu tlem te tein a in a. 

Zawite hian, "Ka zungin ka hria" a ti sap a. Nizan thleng khan a zun an la siaksak a, vawiin chawhnuah khan Doctorin, "A ngai tawh lo vang. Hei a tha chho hnai a. Sama'n a puih chuan amah pawhin a zung thei tawh ang" a tih vangin an siaksak ta lo va. 

Sama chu a tho vat a, Amanda awngphah chu a va dap a. A lo huh dap mai. A zung ngei a nih hmel. 

"I mut puan hi thlak lawk ang aw. Khaw maw, ka pawm ang che" tih leh zo zeta Amanda pawm a rual a, Drip an phawi lai a ni bawk a a zia hlauh. Thutthlengah chuan a muttir a. Awngphah chungah sarang an phah sa avangin Matress tak chu a huh lo va. Bed sheet chu va la chhuak sawk sawkin a phah ta mual mual a. A zei tehchiam lo. Mar tha mang lo zeta a phah hnuah a nupui chu a muttir leh a, "I kekawr leh panty thlak ang aw" a ti leh zat. Amanda lah chu a che chang tawh der si lo. A awm ang ang chuan Sama chuan a kekawr leh panty chu a hlip sawk sawk a. Kekawr fai leh panty a hak thattir leh ta a. Zahah pawh lak theih a ni tawh lo a nih hi. Amanda rilru chu a fim chhoh tan tawh avangin chutia Sama'n a han buaipui chu inthlahrung tho mah se; nuam a ti. Hetianga inngaihsakna hi a tawng khát ve bawk a ni. 

A mut that leh hnu chuan, "Ka chunga he thil titu hi man a ni tawh em?" a ti sap a. 

"An la zawng mek" Sama chuan a ti ringawt. 

" An va xawng hmu har ve. Canteen atang khan zawng rawh se..ka coffee in atanga hetia awm hi ka ni.." a ti a. A tawng zawng chuan a àwm a insêp dáwrh dáwrh a. 

"I hah hle a nih kha..tawng tawh rih suh. An man vat mai ang. Fimkhur a ngai dawn a, chuvang a nia Imma nen kan ven chhawk che. Chhun lamah ka nute an rawn lang ve zeuh zeuh bawk.." Sama chuan a ti ta duah a. 

Amanda pawh a maimichhing leh daih. A hnute hi a rawn tang leh at at thin a. A fapa a hrechhuak lo thei thin lo. Bella kutah a awm tawh a, a ngaihtuah lutuk pawh tlemin a zia deuh e. Tunah chuan thi thei a la ni lo tiin a inngaihtuah a, a thi ta lo ta sa sa, damkhawchhuah tuma a insanmar ve deuh pawh ngai dawnin a hria. 

Ngura leh Ephraime chu an inhmachhawn ran a. Ngura hmuh tum dan nen a dang daih! A hmaa thu chu vaipa a ang a ti..mahse, a inchei danglam a nih a ring rilru deuh. 

"Engvangin nge ZCP chu rawn zawm ve i duh?" Ephraime chuan a ti a. 

A aw chu mipa tih a hriat hle. 

"Ka nupui vang hi a ni pakhat. Tun hnaiah zantin deuhthaw mangchhiain a kaiharh thin a, a nu thi tawh hmu thinin Zorama Secret Society dinthar an tum thu leh Zoram chu setana lalram a la ni dawn tih a lo chah zantin a. ZCP hian tihtheih a neih takmialin tiin ka rawn zawm ve tawp mai a ni" Ngura chuan thutak zetin a ti ta a. Ephraime pawh a bu nghut. Hei hi chu a mikhual lem lo, mahse, thil dangah chetna tur a la tam deuh avangin an la hawl fuh lo deuh chauh a ni. 

"Chuan Secret society chu a la ding rengin i hre deuh em ni?" a ti leh sup a. 

"Aw..ka ring. Judy pu jail-a tang mekte hian engtin tin emaw jail chhung atang khuan he lam pawh hi an rawn thunun ka ring tlat a ni" a ti ve ta zel a. Ephraine ngaihtuahnaah Zoi a rawn lang zawk. Sawrkarin Zochhingpuii an duh em em chhan chu he pawl rúk vang hi a ni ang tih a ring thiam nghal a. A awmzia chu sawrkar pawh Lucifera lalram dinna kawngah a inhnamhnawih thuk hle tihna. ZCP chauhin chu chu a dodal thei ang chu, Pathian puihna azarah. 

"Aw le, a lawmawm e. Lawm takin kan pawm a che. Camp lama awm i remchan loh paw'n hetah a hmun lo nghak la, Secret society chhui tur bik teamah i lut nghal dawn nia. " a ti a. A nui sáng bawk. Ngura pawh a thaw huai mai. Tunah chuan a nupui mai bakah an nupa nun tinuam lo rutu dotur in a in peih ta e. Judy pawn a pawmpui ngei a beisei tlat a ni. 

Ngura nen an inhmuh hnuah Abby, Emily tia inchhal nena inhmu turin Aizawl tlak lama cottage fàl tak pakhat lam chu a pan leh ta vang vang a. Mak deuh mai chu Emily tia inchhal hi belhchian chakna riau a nei tlat! Chu chu a chhan a awm a ring bawk. Emily chuan a lo nghak ran tawh a. Fimkhur takin a lut a, a mitmeng fing zet chuan melh tur lai bik a hre chat chat viau. Camera kam rúk a ni em tih chu a thlek kual chhan a ni. Chutianga rinhlelh tur awma a hriat loh hnuah chauh a thu a. Emily chu nula nalh ber pawl a ni ngei ang, a sam a thlah hniang a. Kawrfual a khup khuh pha lo, a tawngchham mah mah em tih tur a inhmeh em em nisi a ha bawk a. A hmel chu.a sexy ti mai ila a tawk viau awm e. 

"Engvanga ZCP rawn zawm ve duh nge i nih le?" a ti dam thlup a. Ngik faih chungin, "Sawrkar hi ka hua alawm. Ka chhungte ka neihchhun min laksak a, mal takin min awmtir a. Chuvang chuan tihchhiat vek hi ka duh a ni" a ti ngher ngher a. Tah duh si, tah chhuak si lo a ang ber awm e. 

Ephraime chuan, "A pawi hle mai. I nu leh pate chu engtia boral nge?" a ti ta a. 

Emily chuan no zeta rawn melhin, "Motor accident vanga thi anga hriat an ni a, mahse, Sawrkar kutthlak ngei a ni tih kei hian ka chiang. Ka pa kha khatih lai khan Officer lian ve tawk tak a ni a. Sawrkar hian thil dik lo an ruahmanna kawngah tel ve turin an sawm a. Mahse, a hnar fithla thak thung. Chuvang chuan ka pa chu an hmu mawh ta a ni" a ti dap dap a. Dàwt sawi hmel lah a pu der si lo. 

"I nu leh pate hming ka hre thei ang em?" la ringhlel ru chungin Ephraime chuan a ti a. 

"Ka pa chu Lalchungnunga a nia. Ka nu erawh Laltlanthangi a ni. Aizawla khawsa kan ni lo va, Champhai lam kan ni. Ka nuten min kalsan hnuah Aizawlah eizawnna tha zawk a awm takin tiin ka rawn chhukthla ve ta rawih a ni. Sawi tawh angin ka pa sum min hnutchhiah ve zawng zawng lah ka patea ten a ruk aralin thuneitute bethiamin an lo fanghma no ei vek a, kan in leh lo ngei pawh min chuhpui a, chu erawh ka hminga a lo awm avangin in chu ka hralh ta daih a. Hetah ka rawn awm ta a ni" a ti leh bawrh bawrh a. Ephraime chuan ngaih dan siam thiam harsa a ti hle. 

."min hrethiam la, fimkhur tluk a awm lo va. I pate chu engtik kumah nge an boral?" a ti leh ta a. 

"Kum 4 kaltaah khan" a lo ti hnual raih. Ephraime chuan a chhinchhiah ta kar a. 

Chutah, "A nih kan pawl rawn zawm ta la, thiamthil eng emaw te i nei em? Sawrkar han tihchhiatna kawnga tangkai tur" a ti duah a. 

Emily chuan nui sen sen chungin, "Hmeichhe nalh tak ka ni a..Hmeichhia ka ni tih ka inhrechiang hle bawk. Tumah hneh loh ka la nei lo..kan pawl tan chuan ka inhuam thui hle ang" a ti ta sar sar a. Ephraime a khi suk. Emily sawi awmzia hrethiam lo tur khawp a ni bik lo bawk a. Ngaihdan siam thiam harsa ti ru hle mah se; Emily hian sawrkar a lo haw ve tak tak anih chuan hmanraw tangkai tak tur a la niin a hria a. Lakluh lailawka an camp lama an hruai hmaa a sawi zawng zawng endik leh chu tha a ti ta a. 

"A lawmawm e. Kan pawl member i ni ta e" tih pahin a kut a phar chhuak a. Emily chuan a lo vuan ve zat..nghet zeta inhmerin an inchibai ta a. Emily-in a melh dan chu Ephraime chuan a hrethiam, mahse, tluk a tum lo. Hetiang te mai mai chu a tan hnar harsa an ni ngai lo. Nupui duhawm leh fanu hmeltha tak a nei tawh a, a lungawi tawk e. 

Drose leh Joshua pawh Amanda kan turin an inzui chhuak ve mek a. Anmahni chhanchhuaktu, A nu nulat lai atanga puitu Amanda chu an thlauhthla thiang lo a ni tawp mai. Hetih mek lai hian Zirsanga te nupa pawn anmahni chhanchhuaktu chu rawn kan ve tumin in an chhuahsan ve mek bawk. Ephraime lah Damdawiin panin a tlan mek bawk. Inhmuhkhawmna danglam tak a ni ngei ang. 

Lawmsanga te erawh a chhuah chak a zat ruai reng avangin Nguri'n doctor a dil ta nge nge a. Rem a ti chiah lo naa, Lawmsanga chu damdawiinah pawh han enkawl vak ngaihna awm hek lo le, a remti lo thei ta lo va. Mapuia'n a pate chu a han hruai a. Lawmsanga cher kuam chuan rilru a tikalthui duh viau ang le. A tlangval laia sa tha pawl, insua huai leh thahrui ngah tak kha a ni thin a nia. Tunah chuan a upat hmel tawhin Nguri te chu a fa a nih duh hmel tawh zawk. Mahse, ei leh in lam a tihthat chuan a zia chho ve leh mai turah ngai ang. Sasa pawn in leh lo a lo tuaihnúm viau mai a. A dul pawh a puar lang ve viau tawh, Nguri a lawm khawp mai. Zanriah chu Muanpuia te chhungkua nen an ei ho a. Lawmsanga'n, "Naktuk zanah i pu leh thenawmpa Pu RInga te saw va palai se la, hetia inhrenbeh reng zawng a dik lo ve" a ti chuar chuar a. Sasa leh Mapuia an thaw huai mai. 

Nguri pawh chuan, "Ni e, va kal teh se. I pa pawn ziaawm lam a pan chho ta bawk a, amaherawhchu, sum leh pai lamah hei i pa enkawlna lamah kan inpaih ve deuh nual si a. Mite anga tih búng búng lam kha chu kan ti ve thei lo maithei a nia" a lo ti ve a. 

Sasa chuan, "Kei chu chutiang tih vak vak lam ka duh lo. Tlan koh ang mai mai ni se ka duh zawk.." a lo ti vat a. Nguri lawmzawng tak a ni. Bakah a lo raipuar ve tawh bawk nen..raipuar ul hnua tih búng bûng hi chu zahthlak lamah te pawh a kal alawm. 

Nauteii chuan, "U Sangpuia awm ve se..in inneih ni chu tiraw? U" tiin Mapuia a melh a. A u chuan lainat hmel zetin, "Ni ngawt mai. A lo tel ve thei tawh maithei asin" a ti sup a. Lawmsanga leh Nguri an inmelh zauh ringawt. Nauteii hi Drose ang mai khan a vawikhatnaah hian a nghetin vawmbei ang thlawrh a ni reuh a, a bialpa chu wanted a ni tih hrereng chungin thlauhthlak a tum lo chiang hle. Sangpuia tan pawh he hmeichhia hi chu a hlu lo thei lo a ni e. 

Sama chuan nelawm takin, "Lo kal r'u..lo leng rawh u" a lo ti sawk sawk a. Drose leh Joshua chu cabinah chuan an lut a. Amanda erawh a lo thu mu a, a mutmeng dul raihah chuan chauhna te pawh a lang thei. Mahse, a lo nui ve hram hram a. Drose chuan eitur a kensak ho te chu a locker-ah chuan a khungsak zung zung a. Zirsanga te nupa an rawn lut ve leh chiah. Drose leh Zirsanga mit intawng chhak chu lo hmutu an awm hauh lo naa, Drose chu a zak chem chem thei. Boruak chu a uap nghal nghulh hian a hriat theih. Josh leh Kimi erawh chuan an hrethiam lo thung ang. Ephraime a rawn lut ve nghal zat. Cabin a lian vak si lo va, an chep titih deuh. Mipa awmho lah an palian hlawm angreng si. Ephraime chuan pangpar mawi zet hi a rawn kensak a, Kimi'n a lo khawisak nghal vat. 

"Kha, i that tawh viau kha. I elpuite chu an thaw dêp dêp tawh ang..tha vat la, phuba kan la ang" Ephraime chuan a ti nghut a. Lo awm ve dangte chu a lo hriat silawn tawh vangin a zahpah duh lo . An hêk dawn lo tih a hrechiang bawk nen. Sama lah Amanda lakah a inpumpek hlawm tawp tawh bawk si. 

Amanda pawh chuan, "Nia, hei ka zia chho viau e. In naute a tha zel maw?" a ti sap a.

"aw..tha zel a, i fapa chu tu kutah nge i dah tak?" a lo ti vat a. 

"Imma nupui Bella khan min enkawlsak rih a. Sama lah kei min buaipui a ngai si, ka nute lam lah an buai lai a lo ni kher nen, ka pur buai duh ta lo a nih kha" Sama chhungte thlavang hauh deuh takin a lo ti a. 

Ephraime chua Drose te ho chu enkualin, "In bo lai ai chuan hmuh pawh in nuam tawh zawk a nih hi.." nelawm takin a ti a. 

Drose chuan, "Chaw ka heh tawh rap..hei ka thau túng túng mai" a lo ti ve vat a. An boruak pawh a zangkhai chho tan..Kimi mitmeng hnual raih reng erawh Drose chuan a hrethiam loin amah vang em ni ang tih a ngaihtuah leh zawk thin. Mahse, Kimi chuan mitmei chhia a hmuh chuang bawk si lo. Zirsanga pawh chuan ni dang a pha meuh lo a ni e. Mahse, inthunun thei tih takah a tawngkam hmante chu a la zangkhai hle tho va. 

Rei mawi tawk a awm hnuah Ephraime chu a chhuak ta a, A fala Amanda biak a duh nen, hun an nei rih ta lo chu a nih kha. 

Zirsanga chuan, "Kha Drose leh Joshua chu ka rin ang ngeiin in lo inzawm ta chat a ni maw? Innei ve vat r'u" tiin a fiam a. 

Josh chuan, "Nia, rial reng chi a ni lo..min thlawhbosan daih palh ang" tiin Drose a melh a. Drose pawh a nui sáng. Kimi chuan, "In fa a duhawm ngawt ang, in hmeltha dun sia" a ti a, a hnukulh chu a kun daih. Zirsanga'n lo hrethiamin a kut a vawnsak vat a. 

"Hrethiam teh u, Tun lai chu nau a awt lutuk a. A nau chhiat kha a tuar thar leh a nih hi" a ti sawk sawk a. 

Amanda chuan, "Kimi, lungngai mah ta che, kei nula thankin, senior tawh lutuk pawn fa ka la nei thei alawm. Fa duhawm deuh in la nei leh vat mai ang" tiin a lo hnem vat a. An dinhmun a hre bik miau lo va, hnem ngawt mai loh chu tihtheih a nei lo a ni. 

"Ka tha alawm..ka pms hi ka tuar reuh lutuk a, ka mood hi a inthlak zung zung zel anih hi" Kimi chuan a lo ti vat a. 

Josh chuan Drose melhin, "Kan kal tawh mai dawn em niang? Ka duty a hun leh dawn tlat" tiin a rawn a. Drose duhthusam a ni. Zirsanga nena inhmatawna thut reng kha a insangmar rei mai mai. 

"Nia a pawi lo, a nih Amanda, kan kal phawt ang aw. Remchan veleh kan lo kal leh ang. Lo dam tha vat la " tiin a nui sáng a. Amanda chuan, "Aw le, a lawmawm lutuk aw. In lo kal a. I nu min lo biak rawh aw" a ti sap a. An chhuak zui nghal, Sama'n a va thlah a. 

Zirsanga te pawh an awm rei em em lo. Rosangpuia te nupa nena zanriah an ei dawn vangin an chhuak zui ve deuh chu a ni mai. Ni e, Rosangpuia rawt angin zaninah nupa tuak hnihte chuan zanriah an ei dawn a ni. Rosangpuia'n , "Thil pawimawh tak sawiho tur kan nei" a ti bawk nen, han thulh chi niin a lang lo. 

Resort chu a reh ngawih ngawih mai. Mikhual tumah an awm lo, Arini thu angin tumah an thleng thei rih lo a ni. Zan dar 8 velah Resort hmar lam, balhhla huan atang chuan mi pakhat ke bai hi a rawn phei kat nawk nawk a. An manager Kima chuan lo thlir rengin, Cook te leh hnathawk dangte chu thil dangah a tir bo ta vat a. Chu kebai chu rawn phei zelin manager dawhkan bul a thlen chuan a intuamna puan chu a hlip sawk sawk a. Kima chuan, "In chung zawlah a lo nghak reng tawh che. Fimkhur ula aw" a ti zawi sup a. Chak takin in chung zawl lam a pan nghal. A han thlen chuan a nupui duhtak, hringnun harsatna karah pawh phatsan ngai lotu chuan a lo nghak reng tawh a. An han inhmuh chuan nghet em emin an inkuah vawng vawng mai. Arini phei chu a mittui a hnám nghal a, a pasal rim a hre leh ringawt pawh chu lawmawm a ti takzet a ni. An han inthlah fel chuan a chung zawla pher an phahah chuan an thu dun a. 

"Tunah pawh hian min enthla reng tawh maithei a ni" Ruatfela chuan a ti sup a. 

"An rin loh lamah kan kual daih dawn alawm" Arini chuan a lo ti mai a. An han infáwp ngawih ngawih phawt a. Pherah Arini chu a zangthal zawnga muttirin kha chen an lo inthlakhlelhna te kha an hrithla dun ta a. Thla lah chu a eng ngang mai si. Boruak a nuam tawk viau bawk. 

An zawh fel hnuah, "Tihian ka let leh phawt ang a. Boruak dang a awm leh veleh ka rawn kal leh ang. Tunah chuan hetia a khat tawka kan inhmuh hi a tawk. Dinhmun derthawnga dah che hi ka duh lo" Ruatfela chuan a ti a. 

"I tel lo chuan engmah hi a nuam lo" Arini'n a tih sep lai chuan, Ruatfela chuan an chhak kawng an laih thar atanga thil tle zauh chu a han hmu ta a. 

"Lut rawh. Rang takin..vat" a ti nghal tuar. Amah pawh chu a che nghal vut vut a. Arini pawh hamhaih hman loin in hnuai lamah a chhuk zui nghal. Ruatfela pawh a inha tha sawk sawk a, a kawrkilh hnuai ber a chilh mek laiin a bul chiaha sintex pawp, thawm that tur an dah rih chu a rawn ri fua mai. A awmzia chu silaiin an rawn kap tihna. A rang arangin a insaseng ta a. In chung zawl thlanglama pangpar zam chi an dahah chuan far thlain khawthlang lamah a tlan thla ta puat puat a. Êng a nei lo naa, thla a eng tho bawk a, inpal nawk nawk mah se, a lum èm lo ve. Tihian, an rawn zawng ngei dawn a, camp lam chu a pan duh rih ta lo. Khawi laiah emaw khawvar hun nghah mai a tithlu ta a. Arini pawh thu an zawt leh ngei dawn tih hriain a chhan dan tur a ngaihtuah rauh rauh a. A rin aiin an enthlain an vil peih tlat! Bansan chu an tum loh hmel angreng khawp mai. 

Abby chu hospitalah lutin Dr. Muanpuia office-ah a lut nghal a. 

"A lawmawm e. Abby, zaninah i hna i chhunzawm ang" Muanpuia chuan a lo ti vat a. Abby chu a thu ngawi reng thung. Muanpuia chuan Almira bula saranga eng emaw intuam chu pein, "Va inthlak rawh" a ti zawi sup a. 

Nurse uniform a lo nia. Abby chuan a inhmeh kher mai. Muanpuia pawh chuan ít hmel zetin chil lem khawlh chungin a lo melh rulh rulh nia. 

Syringe-a damdawi a kahluh hnuah, "He thil nen hian dar 10-ah i va lut ang a. Ngawi lawk teh, Sama leh Amanda ten i hmel an hre ve ve tawh. I inchei danglam a ngai. Ti nge maw ka lo sawi láwk loh aw" a ti leh hnuhnawh a. 

"Lungngai suh. Ka thiam alawm. " tih leh a bag hawn a rual a. Darthlalang hmaah chuan a va ding ang tei tawi a, eng eng emaw a inhnawih ta mial mial a. A inchei zo a rawn hawi chhuah leh meuh chuan, Abby ni tawh loin Emily kha a ni ta daih! A mitmeng erawh lens a ken tawh loh vangin chîk taka entu tan chuan Abby sulhnu a la hmuh theih thung. Mahse, chutiang zan rei tawhah chuan tu khaw khain an chîk a rinawm loh. Syringe chu lek kang vahin a melh ran a. "Amanda, mang tha le" a ti sap a. 

(Ka lo hmangaih ber che u a nih hi. Waiting shed atang pawn ka type sak ngat ngat che u a nia. Adds clicksak hi chu ka phu ve lo maw 🤭🤪