inferno 17

INFERNO (17)

Ziaktu: Toni Râlte

Jail tang tlan chhuak zawn runpui an han nei chho chu an thawk ngawrh hle. Mahse, boruak danglam takin a rawn thlak ta hlauh mai si a. Sawrkar lam lu chu a hai teh ang chu. Dan phal loha sumdawnna khawihtute leh an thurualpui sawrkar mi leh sate chu an man ta phiar mai si a! Minister leh MLA an kat nuk ta mai le..chutihrualin Officer zahawm pui pui, Kohhran upa ni lai ngatte pawh zuk bang bik lo va! He zoram hi a lo chhe tawh zet mai. Amanda leh Pu Dinga hmalakna piahlamah ZCP puihna azarah smugling kaihhnawiha inhnamhnawihte chu an man ta nghauh nghauh mai a. A tira an pawr tehlul nen, Lehlamin an lo hlau hlek si lo va, an zik a ngui hlawm ta viau. An ukil teah an innghat pumhlum ta tawp mai. Central jail lam pawh an pung chak ta viau a. Mi lian pui pui an han inhmu khawm far chu an thinurna an han hrithla tlang a, Amanda an huatzia leh a team te tihchhiat vek dan tur ruahmanna te an han siam thul. Dr. Zira leh a hote la tàngte pawh khan an rawn zawm ve vat a. Jail chhung atang chuan Amanda leh ZCP tihchhiat vek dan tur an rel chho ta. Pawn lamah Police lamin an lak ban, a ruka an sangawizawnpui an la awm nual tho va, an ni lamin an hna an thawhsak thei turah an ngai. 

Zoram chu a buai ta neih nuaih a. CM pawh lungmuangin a awm hle hle thei ta lo. Mizoram chunga roreltu ber a nihna laiah ani chu tuman a hming an lamri lem lo va. Inhnamhnawihna erawh a nei ve maithei. A thla a muan loh danah. A naute ho chu a chhuah zalen ngawt thei bik si lo va, kawng dang an dap vat vat a tul takzet a ni. Zoram mipui pawh an saháwkin, sawi tur dang an hre vak lo. Social mediaah Dan palzûtte ho demna leh thlavang hauhna a tlar nghek nghuk a. Inhnialna tawp thei lo an siam a ni ringawt mai. ZCP lam pawn tan an hlawh leh tan a. Tin, nunna lak a awm leh ta lo bawk nen..Zoram thalai ram hmangaihna rilru putu tak takte pawn beiseina sang tak an nei chho tan ta. 

Ruatfela te thianho pawh camp lamah hun an la hmang zel a. A khat tawkin an chhungte an be ve zauh a. Chu pawh number dang dang atangin. Vil renga chhui rengtu an awm avangin an fimkhur hle, an chhungkua leh an hmangaihte dinhmun tihderthawn chu an tum lo bur a ni mai. A vawrtawp an thleng chho tan dawn ta a. Sawrkar nen inbiakremna neiha tuna sawrkar mek paihthlaa, Inthlan that chu a ni an tum ni. ZCP chuan Mizorama pa challang bakah huaisen, dik leh Pathian tih mi nia an hriatte an list chhuak a. Zoram tana engpawh huama Zoram nuam tak din thei tur, mi rethei atanga hausa ber khairuala hleih neiha rorel lo tur, mipui chanai hmanga invurlian ve ngai lo tur nia an hriatte chuan Zoram enkawl hna chu changin enchhin ni se tih an duh a. Chung an list te pawh chu inbiakna neihpui an tum nghe nghe. Tuna sawrkarna changtu te hian kum khat tha zen zawn an la nei a, mahse, paihthlak hmak an tum ruh hle. Tichuan, Zoram hian bung thar a kai ve mahna le. 

Abby chu a hna thawk tura nawrna a nasa tawh bawk a. Jail chhung atang hiala nawrna a dawn tak avangin a che chhuak lo thei ta lo. Amanda nen khan reilote chhung thawk dun ang deuh khan an lo awm ve hman kha a nia. Mahse, an inring lo dun viau thung. Hmaichhan leh inhmatawna Amanda thah chu tithei dawna a inhriat loh avangin kawng dang a dap ta ringawt a. Amanda chu a office-ah a awm mek a, Coffee a chah ziah tih a hre kur bawk. Amah Abby chu inchei danglamin an canteen-ah chuan a va lut a. Nula pawisawi lo hmel tak leh hlauthawng hmelpu ang maiin a va inlan a ni. A luh atanga reivak loah Amanda chuan Coffee chu a va chah ta ngei a. Abby pawn Coffee a in lai tak a ni. Waiter-in Coffee a chawi dawn lai tak chuan, "Amanda hmuh tuma lo kal ka nia. Ka lo pe nghal mai dawn mi? Inbuai sia" a ti dam diai a. 

"Aw a tha lawm..pawi i tih loh chuan" tiin waiter pawh chuan a lo chhang var a. Abby chu tho vatin Coffee chu a la a, a chhuak zui nghal. Canteen a pel fel tihin a jacket ipte atangin bur tung ît êt a phawrh ru zauh a, hmutu an awm leh awm loh en kual leh te tein, amah rawn ngaihventu an awm lo tih a hriat chuan bur chhunga thil dip var chu coffee-ah chuan a pawlh ta zauh a. Khi sak chungin Amanda Office lam a pan ta a. Kawngka bula guard lo ding hnenah chuan, "Sir, Hei hi Amanda min lo peksak lawk thei ang em? Saw lai dawrah sawn kal nghal ka ngai a" a ti sap a. Guard pawh chuan a lo la ve mai. Ngaihtha zetin Abby chuan station a chhuahsan ta a. 

Darkar khat pawh a la tling lo vang tihin Amanda thichhawnga a awm thu a hre zui ta a. Awmhmunah a khi var var mai. Sama'n Amanda chanchin a lo hriat chuan a chiái takzet a ni. Hmanhmawh takin Hospital lamah a inkhalh phei a, a rilruin a tawngtai mawlh mawlh mai. A va thlen chuan Amanda chu an lo buaipui mek a, amah Amanda erawh biak tlak a awm lo. A ka leh hnar atangin thisen a rawn chhuak reng a, Doctorte pawh an mangang ru viau tih an mitmeng atangin a hriat. Zai a ngai tiin OT ah an nawrlut nghal rum rum a. Sama chu a khur thei hial! Chuti maia Amanda a awm ringawt chu thil dik lo eng emaw tak a awm a ring, a rilruah Abby a rawn lang nghal vat. Mahse, va zawh chi a ni hauh lo vang. Amah ngeiin a nupui chunga hetiang thil titu hi a hmachhawnin a chhui ang. 

"Judy, i tha em? Hei,harh teh" Ngura chuan a nupui chu a sawi nawk nawk a. Judy a rawn meng hlawl. A rum nasa lutuk a, Ngura'n a kaitho ringawt a ni. Judy chu a thlan hliam a, Khur ru der der chungin Ngura chu a vuan a, a hlau tih a mitmengah a lang chhuak. 

"Mang rapthlak tak a ni" a ti hap a.

Ngura chuan duat deuha lo kuahin, "Han sawi teh" a ti sup a. 

A chil lem khawlhin, "Ka nu ka lo hmu a. Kan khum bula dingin thlarau tam tak a rawn hruai bawk a, Biteii pawh kha a tel ve asin. Tichuan, 'Ka thlarau hian a umzui zel tawh dawn che. He ramah hian Secret society in ro a la rel dawn a ni. Chu hunah chuan Lucifera thuhnuaiah mi zawng zawng in kun tawh ang" a lo tia. Rapthlak zeta min nuihin an zavaiin an nui uar uar a, an hmel landan a rapthlak bawk si.." Tiin a sawi a. Ngura a lo insangmar teuh ringawt. Setana lal ram din hi an la bansan hlen miah lo vang tih a ring reng a. Mahse, engtia hmachhawn tur nge ni ta ang tih a buai a ni. 

"Tawngtai ang aw..judy..engkim a tha vek mai ang" a ti a. An pahnih chuan thingthiin thinlung leh tihtak zetin an tawngtai ta a. Judy pawh a thawl ve huai e. Mawlhtu erawh a la nei run a. Secret society hi engtianga thiah darh tur nge tih a ngaihtuah zankhua thak a ni. 

Rosangpuia chuan Dr. Muanpuia chezia leh a tawngkam hmante chu chîk takin a enthla reng a. Mahse, mi á a ni lo va, a fimkhur viau mai. Loicy a rawn en chang pawn han rinhlelh tur awmin a awm ngai mang lo. Dingi bulah engkim a lo hrilhsa ve tawh bawk a, Dingi pawn a lo chîk ru ve thei viau. Khatia dan lo va sumdawnnaa inhnamhnawihte Amanda leh a team ten an man tukah kha chuan Dr. Muanpuia chu a che reng reng a phili em em a, helhhawlh ang deuh ten a awm a ni. Loicy a rawn en lai takin a phone a rawn ri hlauh pek a! A hnunga ngawi renga lo ding Rosangpuia chuan a lo calltu chu a zuk hmu thawi thuak, 'CM' tih a zuk hmuh khan thil nih dan a lang nghal ruak chuan a hre ta. Amanda hnena thlen vat tur a nih hi a ti rilru a. Mahse, a tuk leh lawkah Amanda chu thichhawngin a rawn lumlut ta mai si! Khata Dr. Muanpuia chet dan kha alawm..Doctor dang te mangang philia an vir buai laiin hahdam huai hmel a pu a. Zai an sawite khan Doctor ber si khan, "Kan chhan hmanin ka ring tawh lo. A kawchhung a fan chhuak vek tawh" a lo ti nia! Mahse, ani aia senior zawkte thu chu a hnialthla thei ta lo va, an zai ta chûk chûk kha a nia. Rosangpuia chuan thil tam tak a ngaihtuah a ni. Amanda hi a nunna chhan hman pawh nise venhimna hnuaia an enkawl zui a ngai dawna hriatna a nei. Dr. Muanpuia hi a hlauhawm dawn tlat! A chunga leng leh amah chhawrtu te hian Amanda thih an duh tih hai rual a awm lo. Chuvang chuan Rosangpuia chuan Imanuela a hrilh ta vat a nih kha..

Imma pawh an cham tum aia hmain a lo haw a. Amanda sawipuina azarah a chungchang thu chu ngaihtuah that leh tur a ni a, engtin tak rel ang maw? A hna a zawm leh thei ta rih lo a nih pawn Amanda chu a ven ngei ngei a ngai. Rosangpuia khan a hrilh chiang em mai. Sama lah rin tur nge rin loh tur tih a la chiang ngam bik si lo. 

Lawmsanga erawh mak takin a rawn tha chho leh ta deuh a. Nguri pawh a nui leh thei ta. Damdawiina awm hi a nin theih êm vangin tlema a thawh harh peih hi chuan chhuah hi a rawt chung zel a, Mahse tun tum chu Nguri'n a tilui ve deuh a. An la awm rih. Mapuia te pawh an la inkawl ran a. Sasa pawh in lamah a tangkai viau, Nguri pawn ngaihngam takin a chhuahsan thei a. Nauteii erawh college kha a zawm leh ta rih lo law law a. Amah zirna lama rilru han seng chi a la ni rih lo nen, nakkum lama chhunzawmah an ti ta ngawt mai a ni. Ina a awm loh chuan damdawiinah a chho mai zel. A dinhmun hi a la khirh ve rih khawp mai. 

Dr. Zira chuan Judy putea melh ran chungin, "Jail chhung atang hian bultan hna chu kan tan leh thei reng alawm. A ruk thei ang bera kan la kalpui erawh a ngai ang" a ti sur sur a. Pu Lalzuia a lo bu nghut. 

"Zaninah i cell-ah programme chu aw. Kan mi leh sa chauhte pualin ni rih rawh se" a ti sup a. 

Dr. Zira chuan, "Erica hi a tawhkhirh dawn a, kan thlim hlen thei ang em ka hre lo va, kawng dang a awm loh miau chuan kan dah tha mai aniang chu" a ti a. Erica chu Zohlupuii, Emy tia hriat ni bawk nen pawh affairs lo nei dun tawh, a hun tawp lama Secret Society atanga thlawn kha a nia. Jail chhungah chuan a phak ang tawkin rawngbawlna te a nei ve thin a. Hetianga setana hnena intulut hial tawhin Pathian a han hmu leh thei hi a lawmpuiawm takzet a ni. Jail atanga chhuah pawh a ngaihtuah ngai lem lo. Kantu a nei ngai lo va, mahse, pawi a ti lo. Tunah chuan jail chhungah pawh a thu pawl leh mi zah kai pawl a ni ve der tawh a ni. 

Zirsanga leh Kimi te erawh an tan hun nuam lo tak a ni. Amanda chanchin an han hre ve lehzel phei kha chu, an boruak a rit zual ngei mai. Kimi chu a insit tlat a, Pathian hremnaah a ngai hmiah mai. Zirsanga chuan fa a hrinsak theih dawn loh vanga then daih turah a inngai tawp mai. 

"Fa i nei emaw nei lo emaw chuvanga nei che ka ni lo. Ka hmangaih vang chea nei che ka ni..kim, ka hmangaih lutuk che asin" Zirsanga'n a tih ngawih ngawih pawn, "I tan ka hlutna a bo tawh" a ti tlat si. Zirsanga tak pawn tihngaihna a hre lo kher mai. A thian chhar thar a ngainat em em Rosangpuia bulah a va inhrithla ta ringawt a, Rosangpuia pawn pawi a lo tihpui kher mai. Kawng dang a lo ngaihtuahsak tur thu a sawi ta ringawt. Ani pawh a fanu vangin damdawiin leh an in a kartawn mek si a. Roger erawh a pi Dini te nupain hnehsawh takin an lo enkawl a, ngaihtuahawm a ni lo thung. Nupa inkar boruak a nawm loh chuan hausakna leh sum leh paite hian awmzia an nei hauh lo. Hmangaihna leh inhriatthiam tawnna hlutzia hi aw..

Abby erawh intithei leh inchhuang takin a vei thar thar a. Khuma mu mek chuan hahdam hmel zetin, "A kaikuang ber kan phumbo thei dawn ta niin a lang a. Tunah chuan ZCP lam kan hawi thei tawh ang" a ti ham ham a. 

Abby chuan, "Tlan chhuakte umzui tur khan min beisei tihna em ni?" a ti hlar a. 

A lu lo thin nghur nghur pahin, "Nangmah ngeiin he pawl hi i zawm ve ang a. Engkim a bul ràt atangin i zirchiang ang a, Ruatfela kha an hotupa a ni tak tak lo tih chu kan hre tawh a. An hruaitu lu ber chaldara silai mu i kah luh hnuah hahdam takin i chawl thei tawh ang" a lo ti chat chat. 

"Mipa rorum tak tak pawh an awm si a" Abby chuan pangchang aw lek lekin a ti a. 

"Hmeichhia i nihna kha i tan hmanrua a ni tawh. Hmanraw tha leh mipa tichak lo thei i kawl avang khan alawm kan thlan che" a lo ti nghut a. Abby a ner sak, "Amanda saw dam chhuak ta se" a ti hliai a. 

"Zai dam angin awm mah se, Muanpuia a awm alawm. A lo chingfel mai ang" a ti awlsam êt a. 

"A nih thil ka zawt ang che aw" Abby chuan a ti no ngher ngher a. 

"Umm sawi la" a lo ti ve mai a. 

"Eng ber nge in tum? Sawrkar mi leh sa zawng zawng in tel bawk si lo va" a ti ta a. Chu pa chu a nui huk. 

"Kan ram hi hei aia ram nuam zawk leh zalen zawka siam kan tum mawle..mi pakhat, mi ropui tak rorelna hnuaia kuna a hausakna chen kan duh..chumi atan chuan kan pawl hi din kan ni" a ti ta a. Thudik a sawi ngei ni pawn a lang. 

"In pawl hi eng pawl nge? " bangbo angreng takin Abby chuan a ti a. 

"Secret Society" a lo ti zawi sup a. Abby pawh a tawlhhnung dat..

An zai atanga darkar 6 hnuah a rawn meng diar diar a. Mahse, khaw hmu lo hmel a pu. A meng á vek. Sama chuan a lo chiauau vat. 

"Amanda, i harh a ngai. Khawngaihin" a ti mawlh mawlh a. 

A rawn melh hú a, Sama chu hria ang pawn a lang lo. A phun sep a, eng nge a sawi pawh hriat theih a ni chuang lo. A chhing zui leh ta daih a. Pu Dinga'n a chunga thil thlen dan chu a lo chhui ve mek a. Coffee a in atanga rawn intan a nih piahlamah a coffee in pawh endik a ni tawh a, túr chak tak, Mizorama awm ngai lo hmuh a ni a. A awmzia chu Amanda chu thah an tum tihna. Guard khan Coffee chu hmeichhe pakhatin a pektir thu a sawi a, Canteen lamah pheiin an han inzawt tha hlawm a. A chin chhuakin waiter chuan engkim a sawi ta a. Kha hmeichhe hmel kha a la mitthla thei a, lemziak thiam koin an ziak ta a. Abby a inchei danglam tih an hre si lo. Chu lemziak ami ang hmeichhia chu an han rinzawn tawp a, hmuh a harsa viau ngei ang. Pu Dinga chuan thil awmzia hrethiam ruakin a inhria, Amanda chet dan duh lova kalh turte chu sawrkar milian tak tak an ni ang tih hi..he buaina hi a ril tawlh tawlh dawn a nih hmel e. 

Drose leh Josh pawh an la inkawm ve reng a, an inngaina ve tawh viau. Diteii te lahin a fanu dinhmun hriain Josh chu an be thain an lo dawngsawng thiam em em zel a. Drose chuan Khami zan zanriah an ei ho hnu atang khan Zirsanga chu a hmu leh tawh lo va, amahin a tum bawk a. Han theihnghilh changte pawh a nei ve thin. Joshua chuan a kawm hlim thiam bawk si. Zan khat Joshua rawn leng chu a thutak riau a, Drose awm pawh a nuam lo lek lek. 

"I va cool ve" a ti ta nge nge a. 

"Engtikah nge i nunah hian ka pawimawh ber ang tih ka ngaihtuah a"a lo ti hmiah mai. Drose chu a dang titih. 

" Josh.,i hriat kha" a ti sap a. 

"Nuam lo ti suh. Ka hmanhmawh mah mah a ni. Nawr vak chi che a ni lo alawm" a lo ti leh hnuhnawh a. 

Drose chuan a khawngaih deuh nge a tihngaihna hre tawh si lo chu, Joshua biangah a fawp ta ringawt a. A nui sen sen bawk. Josh chu a meng phawk kher mai. 

"Drose" a ti sup a. 

"Umm..ka haw lo che Josh" a lo ti ve sep a. 

"Ka lawm e. Tui deuhin ka muhil thei tawh ang.."a lawm tak tak tih hriat takin a lo ti a. An boruak uap churh pawh a ziaawm ta deuh e. Ta tang khan inngaizawng awm chuan an awm ve ta tak tak a. Drose pawn Joshua chu mi tha tak a nih avangin tihnat a duh bik lo. Hlim dun reng se a va tha êm..

Dr. Zira cell-ah chuan an thu khawm taih a. Mi lian leh mi naran aia chunglam vek an ni. Mi dang awm vete mitmei ven a ngai si. Mahse, an hna chu an tan tho ang. Dr. Zira chuan zawi sup hian, " He jail chhung atang hian bul kan tan tawh ang. Member pawh kan ngah leh tawh a, tunah hian pawn lama kan member ten min lak chhuah dan tur an ngaihtuah mek a. Hun kan pek thiam rih pawh a ngai ve ang. Damchhunga tang tur kan ni fur a, mahse, kan damchhung hun chu hetah hian kan hmang lul lo vang. ZCP member an rawn lak chhuah ang khan ruahmanna te pawh an siam ve a ngaih hmel..inring ru rana kan lo awm a tha ang aw. Lucifera lalram hi a tam thei ang ber kan lak a ngai a ni" a ti a. 

An hrethiam tih hriat takin an bu nghut nghut hlawm mai. A dik adik chuan Dr. Zira chu an aia chalchang a ni a, engkimah an ring deuh tawp a ni. An pawl kalphung hre lo an awm lo va, Hausakna duh luat vang leh thuneihna duh vanga an thlarau hralh an ni hlawm fur a, an tan inlam letna hun siamsak a ni tawh kher lo maithei a ni. 

Pakhat chuan , "He lai hung chhungah engtin nge lalram kan din theih ang? Kan mualpho zawk mai lo vang maw?" a ti hluai a. 

Dr. Zira chuan, "Offer tha tak kan chhawpsak dawn alawm. Chhuah chaka za zek zek, pawisak nei lo awmkhawm an nih hi. Mahse, naktukah kan target turte list ka lo siam phawt ang a, bul kan tan hlawm dawn nia" a ti ta a. An pawm tlang hle. Heng mi hnawksak tak te tel lo pawh hian Zoram hi a kal thei asin le. 

"Sama, biak lawk che ka va duh ve" Imma chuan a ti sup a. Sama pawh chuan nelawm takin, "A tha alawm..sawi la" a ti a. Amanda erawh a harh lo va, a mu chawrh chawrh ringawt mai a ni. 

"In chung zawlah chho lawk ang hmiang. Bella leh Rosangpuia te hian lo vil lawk mai rawh se" tiin Amanda a melh zauh a. Rosangpuia hian Amanda nunna atana a hlauhthawn êm vangin a nupui bulah engkim hrilhin Amanda hi a rawn vil deuh tawp mai a ni. Sama te chu an inzui chhuak ta a. 

"Dik tak chuan rin tur i nih leh nih loh ka hrethiam lo va, i fa ngei i rukbo avang khan" Imma chuan a ti nghal táwng a. Sama a hamhaih deuh, mahse, insiamrem vatin, "A dik alawm. Rinngam chu ka har tawh viau ang. Mahse, Amanda thih ai pawh hi ka thi ngam asin. " a ti nghut a. 

"Tunah hian mi dang lak atanga i nupui hi venhim a ngai a ni. Khawihahmah kalsan a rem lo, Chutiang taka a hautak avang chuan Rosangpuia nen kan lo sawi dun a, Damdawiin dangah kan insawn mai dawn em ni ang kan tia. Mahse, chutihrualin Amanda phiarrua thah tumtu te kan hriat theih nan Amanda hi kan tawktarh a ngai bawk si. I nupui hi i venghim thei ang em?" a ti ta kalh kalh a. 

Sama chuan nui hawkin, "Ka hriat loh i ring em ni? Ka hriat lawksa avang alawm ka kalsan duh loh. Ka fapa pawh amah awmtu bulah ka hnutchhiah tawp a, ka nu ten an va ngaihven ve bawk a. Kan chhungkua kan buai lai tak a lo ni ve bawk nen..amanda ven himna a nih chuan engpawh ka ti ang" Sama chuan a ti nghet charh a. 

Imma pawh inthlahdulin, "Naute chu Bella bulah kan dah thei ang. Naute chungah pawh engtin emaw ruahmanna an siam thei. Bella bulah a him ber ang. Kei leh nangin i nupui venhim hna kan thawk thung ang. Tichuan, Amamda thah tumtu dik tak hi tu nge a nih kan hre thei bawk ang" a ti ta a. Sama erawh a inngaihtuah deuh nge a ngawi vang vang a. 

"Dr. Muanpuia te nena inzawm vek an ni a, amah hian engtikah emaw chet a rawn lak ngei ka ring. Camera kam ru ila a tha mai lo'ng maw?" a ti ta hluai a. 

"Nia, chu pawh chu a pawi hran lo. Mahse, thil pawi erawh thleng hman lo se..i nupui hi a dam a ngai" a ti mawlh mawlh a. Chuti taka Amanda tana inpe a lo awm chuan Sama hnukte pawh a tiulh lek lek hial. Ni e, a nupui hi Zoram hian a mamawh tlat si a ni. 

An zu chhuk leh chuan an rin loh deuhin Amanda chu a lo harh ve a, a mitmeng pawh tlemin a fim ta deuh. Sama chuan a thutchilh vat a. A sam huichhohsak pahin, "I dam a ngai" a ti rimgawt a. 

Amanda chuan a rawn melh haw a. Sama a ni tih chu a hre tawh niin a lang. Tui an intir vat a. A chhel hle naa túr kha a chak êm vangin Amanda meuh pawn a tuar hleithei lo a ni e. A tla nghal rawk rawk mai a. A mitkhur te pawh a tla nghal duak a ni. Túr khan a kawchhung a fan chhuak hman a, thisen pawh a hloh hnem angreng. Tawng tur pawn chakna a la nei hleithei lo a ni e. 

Bella a hmuh chuan a en ta reng a. Bella chuan ngaihven vatin, "Naute chu ka kutah awm rawh se aw. I dam hma chu, tihnat a ni ve ang tih a hlauhawm em mai" a ti vat a. Tawng a tum a, chau si. A aw a chhuak thei lo. 

Mitmeiin a chhang ta ringawt a. Bella chuan nui sáng chungin, "Tha takin ka lo enkawl ang. Lo ngaihtuah miah suh. Dam vat rawh aw" a ti a. A biang a rawn chul bawk. Amanda pawh hahdam huai hmel a pu. Bella kuta a fapa a awm chuan a him dawn si a. 

Ephraime erawh rilru buai ru takin a vei sek mai. Amanda chunga thil thleng chu thuhran, Khami zan Amanda te chet chhuah zana Minister hmu tura a kal kha.. An va inhmu ta hauh lo. A rawn lan hun tur a sawiah khan a rawn lang si lo. Thil dik lo a awm aniang tiin a call a, a ring ral thak bawk si. He minister a hmuh tum hi tun sawrkara rinawm leh dik nia a hriat awmchhun, information te pawh a ruka pe thintu kha a ni a. A chungah thil tha lo a thleng a nih a ring deuh. Amah vanga dinhmun hlauhawma mi dang an din hi a duh bik hauh lo, chuvang chuan Ministerin a rawn biak pawh hun a lo nghak tawp mai a ni. Chutia rilru buai ru zeta a awm lai chuan Tluanga hi pawr phang hian a rawn lut a. A lan dan chu a bawrchhawr ngawih ngawih..

"Zochhingpuii a bo. An la ta" a rawn ti ta mai a! Ephraime a vir zawk a ni ber e. 

"Engtin nge a nih theih?" a ti tuar a. 

"Amahin a pan zawk a nih hmel. Camp-ah a riak emaw kan tih laiin a mutna a lo ruak hiai a, tuman a kalna kan hre si lo. Mahse, nichin lawk khan a nu pi Hlupuii'n min lo bia a. Sawrkar lamin a fanu an kawl mek thu a rawn sawi a" Tluanga chuan a ti ta mawlh mawlh a. Amah pawh chu mi á ang maiin a vei sek a, awmngaihna reng reng a hre lo. 

Ephraime leh Tluanga inbiak mek laiin, Tluanga thachhang dawltu Fela a rawn lut ve leh a. 

"Luh belh duh mi pahnih kan nei a. Mipa leh hmeichhia an ni. Chuan, Hmannia mi bo rutute kan man ho khan min rawn bepawpin Camp-a rawn kir a him rih loh thu leh an enthlak thu an rawn sawi bawk. Boruak a inlumlet kual ta hle mai" a ti duah a. 

Tluanga chuan, "Tu te nge luh belh duh chu, an profile i check vek em?" a ti táwng a. 

"Aw..check ve ve tawh. Mipa hi chu hmanni lawka bo Judy pasal Ngurhmingliana kha a nia. A rintlak ang tih ka ring. Hmeichhia hi Emily Laldinpuii niin, A nu leh pate hi Sawrkar lam ten dik lo takin an lo thahsak tawh niawm tak a ni. Chhungte dang tumah a nei lo bawk. Sawrkar chu thih thlenga do a tum a ni" Fela chuan a ti a. 

Ephraime chuan, "Anmahni ka lo hmu phawt ang e. Fimkhur tluk a awm lo. Tluanga hi chu tun dinhmunah chuan kan awl rih a ngaih hmel e.." a lo ti dam thlup a. A sawi dik chiah bawk a ni. 

Fela chuan Ngura leh Emily inti te chu a be ta ve ve a. 

"Kan hotupa hian kawm hmasak phawt che u a duh a ni.." tiin. 

Abby chu a khi var var a, "Ka rin aiin a awlsam dawn e" a ti zawi sap a. 

Pindan te taktê-a mu mek chu kawngka hawn riah a rawn tho kang vat a. Pa sang lam deuh hi a rawn lut a. A hmuia a kutzungchal dahin tawng lo turin a mitmei a. 

"Eng nge ka tih dawn?" a thu zawm ta lo chuan a lo ti sap a. 

Nelawm zeta nui chungin, "Zoramah ro i rel thei dawn ta e. Thla 3 chhung kan train ang che" a ti sur sur a. 

Zochhingpuii chu a vawt sung sung mai…

(Naktukah Bank dawr a ngai a. Ka rawn dah theih ka ring lo aw.