Inferno 16

INFERNO (16)

Ziaktu : Toni Rälte

An au tuar tuar a, thawm ri nuai nuai karah ngawi rengin an pathum chuan mei alh awmna lam, jail hungna thlang lam chu an pan tham tham a. Mei engin a ên phak loh chin sia ding chungin, jail-a thawkte leh táng mekte buai nuai nuai chu thaw dêp dêpin an lo thlir a. 10 mins hnu velah Fire department lam an rawn thleng a, Chung lamah Helicopter a rawn thlawk luah luah bawk. Helicopter atang chuan tui an rawn phuh ta a, an tui bawm chu bawm lian ve tawk tak a ni. Mei pawh a mit chiang teh e. Bawm chu zawi muangin an khai chho leh ta a, chu bawm chhungah chuan mi pathumte chu an thu khawm ta dal a. Helicopter chu thlawk leh luah luahin bawm pawh chu a la khai nul nul a. Vaivakawn field an thlen chuan zawi muangin a tum ta a. Bawm pawh chu rawn inhawngin, mi pathumte chu Helicopter chhungah an lut zauh a. Ramhnuai lam panin an thlawk leh ta vang vang a. An tlan chhuak thei ta. Jail lamah erawh inchhiarna an lo nei mek a, mi pathum an kim ta tlat lo mai. Ruatfela, Mampuia leh Sangpuia te an ni. ZCP member vek. Warden chuan thil nihphung a chhui thiam ta mai. Mahse, he thilah hian inrawlh ve mi dang an awm ngei ang tih pawh a chiang. An pathum maia chet lak ngaihna a awm lo miau a ni. Jail táng tlan chhuakte chu man leh an nih vat theih nan hotu lamte be pawp lehin zawn runpui hna an thawk leh ta sang sang a. Mahse, an hmuh kher chu a rinawm tawh lo. ZCP camp-ah an chawl hahdam vang vang tawh. An awmna hmun an rawn chingphul te a nih ngawt loh chuan..

Rosangpuia fanu Loicy khawsik chu a sang riau mai a. A nu Dingpuii pawh a mangang tan tlat. A pasal hnathawk lai a call a, ani pawh a rang arangin a rawn haw nghal. Loicy chu a rang thei ang berin damdawiin hnai ber an panpui ta a. Khawsik thluaka lut a lo nia! Doctor ten an han en mawp mawp a, nachhawkna tea an jection hnu chuan tlemin a zia ta deuh, kaih pawh a kaih tawh lo. Loicy enkawltu Doctor chu Rosangpuia chuan hmuh tawhna nei thánin a inhria, a mitmeng chu a en uluk kher mai. Hriat chhuah ngei ngei ngai thil a hriatchhuah mai theih loh awmin a hre tlat a. Doctor hming chu en nawn leh ngatin, "Dr. Muanpuia" tih a lo inchhu vang a. A hre ta, ramhnuaia rukbo an nih laia rawn kal thin Doctor kha a ni chiang lutuk. A nghing dawt a ni ber e. Amah Muanpuia pawh chuan a hria tih a mitmeng atangin a hriat mai. Hlauthawng leh tîm hmel a pu tlat a ni. Rosangpuia chuan chet lak nghal ngawt chu dika a hriat loh vangin amah Muanpuia chu hre lo niawm takin a awm ta zawk a. A fanu damdawiin awm chhung ngeia eng emaw tal hai chhuah erawh a tum nghet ru hle thung. 

Dr. Muanpuia pawh a office a luh rualin tu emaw a call nghal a. 

"Tun mai khan Rosangpuia fanu an rawn admit e. Amah chuan min hriat loh hmel" a ti puam tálh a. 

"An ni kha chu ngaipawimawh suh. I mi phuar mekte chungah khuan engtin nge hma lak zel i tum?" Lehlam ami chuan a rawn ti a. 

"Zaninah ka kawm leh ang a, an ka an áng dawn lo a nih chuan nunna lak kher chu tul berin ka hre lo. Sum leh pai kan vur bawk ang a" Dr. Muanpuia chuan a ti a. 

"A tha alawm. Fimkhur la" a rawn ti a. An dah nghal. He inphiarrukna huanga a zuang lut ve hi hrehawm a ti tan der chu a ni sia, a duhám luat vang a ni ber, tunah chhuahsan dawn se thil a hre tam si a, chuti maiin an kaltir dawn teuh si lo. A taláwk chu a ni ber e. 

An zanriah eina tur hmun an thlen chuan Josh chuan Drose bag khai lai chu khaisakin kawngka a hawnsak thlap a, a care zia chu chu laia thawk ve te mit fukna an ni nghal. Ni e, khami zan leng tura an intiam zanah khan Josh chu a va kal ta chiah rêng a. Diteii te nupa an lo felin an lo be siam siam a, Drose erawh a kimki deuh. Mahse, Diteii te nupa mut hnuah a bulah va thuin, "Bang chhah tak i insiam ni maiin ka hria. Mahse, ka chhu hawng chak bawk sia" a ti ta ráwih a. A tihdan vel chu Drose chuan mak a tih bakah a hrechiang hle niin a hria. 

"A dik maithei" ti ringawtin a chhang a. 

"Enkawl che min phalsak la.." Ngenngawl takin Josh chuan a ti a. Ani hi zawng thu thluaithlum chiam mi a ni ve lem lo va, sawi duhzawng chu pehhel lo va sawi tawp thin mi a ni. 

"Ka hre lo" Drose chuan a ti leh ringawt. 

"Ka vawikhat hmuhnaah che khan ka la hriat ngai miah loh thilin min tinghing dawt a. Ka vei zui nghal char char che mawle..mahse, ka nawrlui lo vang che. I inpeih hma chu ka nghak thei" a ti leh hmiah a. Drose pawn thu a khuh lo lutuk chu a lawm phian zawk. 

"Ih,ka vanduai thei em a" a ti ve ta a. A zawng zawng erawh sawi a tum hran lo. 

"Ka ring. I landan leh min biak danah i inveng run alawm" a lo ti mai a. Tikhan an inkawm chho ta zel a, whatsapp lamah te inkawm zui zelin Drose pawh chuan a ngaina ve ta viau a. Amah Josh hian hun thawl a nei khát hle nachungin a hun neih ang ang chu Drose biak nan a hmang ve thei zel a. Drose tan pawh ngaihhlut loh theih a ni lo a ni. Vawiin chu an hun awl neihchhun a ni bawk a tiin zanriah an ei chhuak dawn a nih hi. 

An thut fel hnuah, "Karlehah khian ka cousin te an innei dawn a, lo kal ve rawh aw" Josh chuan a ti a. 

"Nia, kan tum dawn nia" a lo ti ve thliam a. Chutihlai tak chuan an zanriah eina hmuna TV lianpui an tarah chuan news an rawn puang mek a. Jail tang tlan chhuak an awm thu leh an hming leh thlalak nen lam an rawn tar a, Drose beng a verh ngei mai. A nau a tel ve miau si a! Eitur ei nachang pawh hre mang loin TV chu a thlir ngawt ngawt a. Josh pawn mak a ti deuh. 

"I tha em?" A ti sup a. 

"Ka thain ka hria..ka hawn vat a ngai, Josh..ka awm a nuam lo riau" a ti bah nuaih a. 

"Thil dik lo a awm em ni? News an puan atang chiah khan i danglam?" A lo ti vat. Drose chu mi inthup harsa ti mi a lo ni bawk nen, Josh chuan a lo haider thei lo a ni ngei ang. 

"aw..ih, Tlan chhuak zinga pakhat saw ka nau a nia" a ti ta tawp a. A heh a liak zauh bawk. Nuam lo a ti ve reng mai. Joshua chu a bu nghut a. Drose kut vawt thler chu vuanin, "Hlauthawng suh. Ka ngai mak hran lo a nia. ZCP member a nia, a him ang" a ti thawp sup a. 

"Mahse, tlan chhuah kher hi tha ka ti lo. Ka pa pawn ukil a be mek asin" a lo ti tiau a. 

"Ama tumna leh ruahmanna a ni lo ve thei tho alawm, an pawl mi leh sa ten an la chhuak te pawh a ni maithei asin" Josh chuan a lo ti leh hmiah. Drose pawh a thaw huai huai mai. Joshua chuan a hrethiam em em si a. Hawng nghal ta bik lo chuan zanriah chu an ei tluantling a, Josh chuan topic thlakin boruak uap churh pawh chu a siamrem leh ta nghal a. He pa hi mi tha tak zawng a ni chiang mai. 

Farm house pindan hnuai ber kawngka chu a ri ruai ruai a, a chhunga phuar hlawma awm rengte chu an phàwk hra mai. Dr. Muanpuia leh a thuihhruai mi panga an rawn lut a. Silai an hum far bawk. Light an on chuan an meng tha hleithei lo. Tuisik chiah pek an nih vangin an chau tawh takzet a ni. Pakhat phei chu a thawh pawh a tho kang hleithei tawh lo achha a ni e. Dr. Muanpuia chuan ring fiak thak hian, "In ka in àn dawn loh chuan chance in la nei e" a ti a. 

Palian ber chuan, "Kan hlawh erawh min pek ve a ngai ang" a lo ti a. 

"Chiangsa..in hlawh aia tam ka pe ang che u. Mahse, intiamkamna felfai tak kan neih a ngai. Nunna hi ka hlut êm vangin zuah hram che u ka duh si a, hotu lam atang phei chuan that vek tur che u in thupek ka hmu zawk a. Mahse, ka mirawih in nihnaah ngawi renga in awm zui zel theih chuan in chhuak thei ang" a ti duah a. 

"Kan ngawi ang e. Tin, kan hriat chin hi a tlem êm a, kan nunna nen chuan a inhen zo kher lo vang" paliana chuan a lo thum dût a. A ni lah taka an hriat chin hi a tlem lulai êm a ni. Dr. Muanpuia chauh bak hriat an nei si lo. Hriatbelh an tumna kawngah an rin loh lamah beihna an tawk leh ta hlauh bawk si nen. Hetia Dr. Muanpuia offer an pawm mai loh chuan..

"Aw le..a tha e. Zanin dar 12-ah he lai hmun hi in chhuahsan ang a, in chhungte hnenah kir lehin thil thleng te kha mumang angah ngai hmiah ang che u. Ka hming lamrik a nih rualin in vai hian thisa in ni. Enthlak in ni rih dawn bawk" Muanpuia chuan a ti ta a. An thaw huai hlawm mai. ZCP te nen chuan inbiakpawh leh dan a awm êm ang chu maw..a thawi tham pawha sawirik chi a ni rih si lo. Dama an chhuak thei tur hi lawm phawt mai teh se. 

Zirsanga te pawn awmpui an nei leh ta lo. Khami zan Zuali'n Zirsanga a vehthlem zana Kimi rawn haw hnenah khan Zirsanga chuan engkim a lo hrilh vek a. Kimi a chek tlak tlak mai. Zuali chu ni chhuah ruala chhuak nghal turin a ti ta hmiah a. Zuali chuan a hna a chán piah lamah a duty a tihlawhtling thei ta lo. Zirsanga hi hmeichhe duhzawng tak a ni chêk a niang chu, an nep zo hlawl ngai lo hi a mak! Kimi hi chuti taka nu hmeltha leh langsar khawpa nalh a ni miah si lo va, heti taka Zirsanga'n a hmangaih hi a vannei khawp mai. 

"Zirsang, doctor hmuh ka duh a ni. Nau ka pai leh thei lawk lo hi a chhan ka hre duh. Indanna ka ei bawk si lo" a pasal bulah Kimi chuan a ti seuh seuh a. Zirsanga lo ngaihtuah ruk a ni chiah mai. A sawi ngam lo zawk a lo nia. 

"A tha alawm. Vawiin chawhnuah ka lo book dawn nia. " A pasal chuan a ti a. Kimi pawh a bu nghat mai. Chawhnuah hawn dilin Zirsanga nen doctor chu an va hmu ta a. Test an han nei chho a, result erawh a tuka lam tur a ni thung. Hlauhthawnna em em erawh an nei lem lo. Kimi hi a naupangchhia vak tawh bik lo va, nau pai a harsat ve rihah an ngai mai. An zan mutnaah pawh nupa nun chu duhthawh takin an hmang dun a, Kimi pawh a zei sawt ve khawp mai. Zirsanga hian a kaihruai thiam bawk a. Tui takin an muhil siai siai kha a nia. A tukah hnaah an kal dun leh ve ve a. Result chu Zirsanga'n a lo lam thung ang. Nilega lecture han pek chuan Kimi pawh hi a chau ve hnáwp thin. An dawr tlawh loin a haw tlang nghal a. A inbual fai zawhah eirawng a bawl zui nghal, Zirsanga pawh ni dang aiin a rawn haw hma a. A pasal hmel a hmuh rual chuan thil dik lo a awm tlatin a hria. A mitmeng dul hnak leh ngui raih te chu a ngaihbel vang ni maw..ngaihthat lohna riau a nei ta a. Zirsanga inbual zawh veleh, "Engkim a tha em? I hmel a dik tlat loin ka hria" a ti ta nge nge a. Khumah Zirsanga chu a thu hnawk a, a chauh hmel hluah hluah. 

"kim" a ti sup a. Kimi a thu ve vat, "Sawi la, eng nge thleng?" A ti sap a. A nupui melh vawng vawng chungin, "Nang nen fa kan nei thei tawh dawn lo. Kim, nau i pai thei tawh lo" a ti zawi raih a. Kimi chuan nui hmel pu lek lekin, "Fiamthu maksak tak a nih chu" a ti nghat a. 

Test result chu Zirsanga chuan Kimi kutah a pe ta a. Kimi'n a result a han en ve takah chuan a dáng sáwp sáwp a, na a ti tih hairual lohin a hmel chu tawrhna hlirin a khat a ni. Zirsanga chuan a lo vuan vat a, Zirsanga kut chu thing thlain.."Pathianin min hremna a nih hi. Ka pa nupui fapa pasala ka neih avangin" a ti nghat a. A mittui a hnám nghal. 

"Khatin awm suh. Kawng dang a awm ang, Kim" a lo ti táwk tâwk a. 

"Hlutna ka nei ta lo, i tan pawh engmah ka ni ta lo. I duh chuan i kal thei a nia, Zirsang" a mit khap fak fak chungin a ti a. Zirsanga a tho hluai, "Zothankim, khatiang thu kha sawi hlek suh. Ka ta chauh i ni, kei pawh i ta chauh. Fa i neih theih loh vanga ka phatsan che anih chuan mipa ni tlak ka ni lo tihna a ni mai" a ti fiak thak a. Kimi erawh chuan a melh ngai a melh ngawt ngawt ringawt. 

Fa an awh ve tehlul nen, vanduaina pawh hi a va chimawm zing thin êm..

Loicy Hotelah chuan Police hmel an lo beisei hauh lo naa, an rawn lang leh miau si a. Joshua chuan a lo dawngsawng vat. A bangbo ve deuh bawk. 

Pakhat zawk chuan, "Asst. Manager Cindy rawn lam tura lo kal kan nia. Pu Nunsanga thihna chungchangah zawhfiah ngai thil a awm a" a ti ta a. Cindy ber kher chu aw!

Cindy chu a rawn lang vat a. A hmelhmaiah engmah a lantir duh lo. Police te chuan handcuff-in an hruai chhuak ta a. Josh chuan a lu thak lo pui a hiat nuah nuah mai. Cindy chu Station an thlenpui hnuah an manna chhan chu an sawi ta chauh. ZCP member a nih vangin!

Mahse, Cindy chu a tang kawh ve tlat, "Fiahna awm lo va min man theihna dan a awm hma loh chuan min man ngawt thei lo ve" a ti ve tlat si. Chutah Kha room chhunga Pari recorder dah rûk kha an play ta a. 

Mipa : Camp lamah ka kir tawh rih ang. Khawpui hi a him tawh lo. Nang pawh fimkhur rawh. 

Cindy : Nia, va awmbo rih rawh. Kei chu ka inngaihtuah thei. 

Mipa : Chanchin kan inhrilh tawn zel ang a. Pu Nunsanga case hi eng chen nge an thlen tawh tih i lo ngaihven dawn nia.

Cindy: Tehreng mai. Ka theihtawp ka lo chhuah ang. 

Chu zawng chu a ni. Cindy chuan, "Kha kan inbiaknaah khan ZCP member ka nihna a awm reng reng em ni? Fiahna a awm loh kha" a ti ta hmiah mai a. A ni lah taka an inbiak danah ringawt kha chuan engmah a fiah miah lo. Police lam chuan an tanchhan an han thlak hnuhnawh a. 

"Kha pa kha Zcp member chu a ni phawt a, Pu Nunsanga thattu pawh a ni ngei ang. Tichuan, tualthattu i lo pui a, tualthat tluk i ni" tiin. Cindy a nui hak. 

"Oh! Kha ka bialpa khan Pu Nunsanga a that tih fiahna in nei em ni? Hotela a awm ve laia thil thleng anih vangin a case kha a ngaihven ve mai chauh a ni" a lo ti leh si. An inbiakna ngaihthlak nawn leh paw'n Cindy han hnialthlakna tur reng reng a awm si lo. Police lam chuan dáwp chhuah mai inbeiseiin an la kha a nia, an rin aiin Cindy chu a zam tlat lo. A inringtawk em em si. 

"Tin, mi pahnih titi dun lai ngaihthlak ruk hi thil dik a ni lo va, khatia rooma recorder dahtu khan a thiltih man hi a tel ngei ang" Cindy chuan a ti leh hmiah bawk. Pari a mitthla nghal..amah bak an nih a ring lo hrim hrim. Dingi'n hre ta se a thinrim kher ang chu. Kha mipa a kawm lah kha Hotelah a awm der tawh si lo va, Police lam chuan tihtheih an nei tlem ta kher mai. Cindy chu an convict thei der si lo. Darkar 24 aia rei an kawl thei bawk si lo, enthlak that leh atan an sezawl chhuah leh ta ringawt a. Cindy chuan Pari chu a ban chiang kher asin le. Pari lah a evidence neih ve kha a lo tangkai tehchiam si lo..ama thangkamah a awk ta chaih chu a nia. Fing ziktluak ta lo chuan a tawrh a ngai a ni mai e. 

"Hello,..Arin, keimah i pasal" Arini a îp chawih. A pasal chu a him ta..a khi sak a. 

"Engtikah nge kan inhmuh theih ang?" A ti zawi sap a. 

"Ramhnuai loah chuan ka him si lo va. " Ruatfela chuan a ti ringawt a. A inthlahrung deuh niin a lang. 

"Ka rawn hmu ang che. Mahse, tunah chuan kei thlenga enthlak ka nih vangin a la him rih lo" Arini chuan a ti a. Ruatfela pawh chuan a lo hrethiam viau. 

Hetih mek lai hian Sangpuia pawn Nauteii biakpawh a lo tum ve mek a. Nauteii lah chu number lawng ringawt hi pickup a hreh vek tawh a, a sawi thiam si loh hian a tham tlat thin a tin ni. Vawi 4 a rawn callnaah a pawimawh viau a nih ringin a pickup ta nge nge a. 

"Naute, keimah Sangpuia" a ti nghut a. 

"Maw?! Tak tak em? In tlan chhuak tih ka lo hria a" Nauteii chuan a ti hluai a. News-ah an tarlang chei chuai a, Nauteii chu a lo buai ru ve em em kha a nia. 

"Ngaithla rawh. Tunah chuan nang pawh i him rih lo aw. Chhuak tam suh aw. Enthlak i ni rih dawn, ka lamhnai chu an enthla vek ang. Engtikah nge kan inhmuh ang tih chu ka rawn hrilh leh ang che" Sangpuia chuan a ti mawlh mawlh a. NAuteii pawh a bu nghat nghat mai. 

"Ka ngai che asin" a ti tiau a. Sangpuia mittui a hnam ve sawk thei mawle..

"Kei tak hian ania ngai che. I pa a tha em?" A rawn tih leh lek phei chuan Nauteii a tap thawthang a ni ber. 

"A dam lo char char a..anu pawh a tap reng zel" a ti tial ruan a. 

"A va pawi em aw..engpawhnise, i nu kha lo tihlim hram hram rawh aw..ka dah rih ang, phone hman pawh a him lo..ka hmangaih che aw" Tiin Sangpuia chuan a dah ta a. 

Tluanga chuan an kawngkapui chu a kik dat dat a, a nuin a rawn hawng a. Rei tak a hmuh tawh loh a fapa a han hmuh chuan a phàwk kher mai. Tluanga bula hmeichhe hmeltha zet lo ding ve zawng zawng nen phei chuan a ka hàu mai. 

"Mama.." A ti ta hluai a. 

"Nu, ka lo haw..hei hi ka bialnu Zoi a nih hi. Zo, hei ka nu aw" Tluanga chuan a ti nghal zung zung a. Zoi chu laiin zak hle mah se, a inthunun hram hram a, a nui sàng a, "Chibai le" tiin a kut a phar chhuak a. Mahse, Tluanga nu chuan mitmeng danglam taka melhin a fapa a melh ve leh a. 

"Ka bialnu a?! I a ta em ni? Kan Principal fanu nen inhualna in nei dawn ka tih kha" a ti ta mai a! Zoi chuan a kut a la thla rang kher mai. A sa hat hat a, a biangte chu a sen tan tan mai. Tluanga chuan Zoi chu kai lutin a nu hmaah chang beng bawng hian, "Ani hi ka nupui tur chu a ni. Ka nu" a ti nghut a. A chhungte dang an rawn lang ve zat a, A pa erawh an hna an la bang lo a ni maithei. A naute pahnih leh Zoi chu a inhmelhriattir a. A naute chu an pangngai bawk a, a nu angin an ráwng ve lo. Zoi chu hmeltha pawh an ti. Tluanga nu Pi Zuii erawh a lungawi thei hlek lo mai. Tluanga inthlak chhung chuan Zoi bulah rawn thuin, "Ka fapa hian nupui hual a nei dawn asin. Kiansan rang la a tha zawkin ka hria" a ti chang fak a. 

Tluanga nau Mama chuan, "Nu, i ti ang lo thin em mai. Ka pa pawn, 'In duh duh in nei thei' a tih kha mawle" a lo ti vat a. Zoi erawh a ngawi kar thung. A hrawkah hnawhtu a nei tlat. A tah a chhuak ut ut bawk. 

"Chu lam ka care ve lo. He nu hi ka duh lo. Sangteii a tha fe zawk." A ti bawrh bawrh a. Zoi zak lutuk chu a tho thut a, chhuah a tum ta mai. Tluanga rawn chhuak chuan a lo chelh vat. A nu melh chungin, "Ka nu, i ti mah mah. Sangteii let sawm ai pawn Zoi chanve chauh pawh ka thlang zawk. Ani hi ka nei dawn. Chuan, rei tak hnuah ka rawn haw ve a, min lo dawnsawn dan hi ka lawm lo kher mai. Zanriah pawh ka ei lo vang. Kal ang, Zoi" tih leh Zoi kaih chhuah a rual a. 

Pi Zuii chuan, "Lalthantluang, min va tilawm lo ve. Ani hi eng ang mi nge a nih reng reng a, eng ang chhungkua atanga seilian nge a nih? Sangteii pa te bulah ka lo tiam vek tawh a, chutimaiin kan thulh thei lo" a ti hlawih hlawih a. Tluanga a khi suk duh chauh. Zoi chuan mittui tling pamin, "U Tluang, ka kal zawk mai ang. Inhualna chu nei r'u, ka tha mai ang" a ti tham tiak a. 

"A teuh lo. Ka ta i nih hi..kal ang" ti nghet charhin rei tak a hawn tawh lohna an in chu darkar pawh a liam hmain a chhuahsan leh ta. A nu lakah chuan a lawm lo takzet a ni. Zoi chu a lainat em em bawk, khatiang tur a ni tihte hria se a hruai malêk tur..zoi rilru a hel phah vek ang tih a hlau ru viau. Ramhnuaia let leh hlawl ai chuan tiin hotelah chaw an ei dun ta ngawt a. Zoi chu a tawng tlem kher mai. A thil tawn khan a tina takzet tih a lang. Tluanga lahin han tih vak ngaihna a hre bawk si lo. An boruak a nuam lo ru khawp mai. 

Ephraime leh Zomuani te pawh a inah khan an la khawsa a, an pawl mi leh sa chhan chhuah an ni ta bawk a. Tunah chuan Aizawl lama awm te pawn khawchhak lam atanga dan lo hmanga sumdawnna kalpuitu ten an thurualpui sawrkar mi leh sate chu an rawn list tan ta a. An rin lawksa an awm nual, an ni hian a hlawkna an tel ve phak miau avangin hmalakna an nei ngai lo va, Sumdawng an hausa tual tual a, An inthlunzawm kual nasat êm vangin a hlawkna teltu pawh an tam. An zingah minister panga leh MLA pathum lai an tel bawk. Sumdawng thinte ai mahin chutianga thil sual palzama ram hmasawnna aia dan kalha lo thurualpuitu ram hruaitu te chunga kutthlak chu an tum ber a ni. Ephraime chuan a silai chu a endik leh te te a. Chemte pawh a tul thuta hman atan tiin a pai ru tho. Zomuani chuan a lo melh reng a, a hlauthawng a ni. A pasal hian mi nunna a la leh ngei dawna a hriat avangin..

A ngaihtuahna hria niawm takin, "Duhtak, thisen inchhuahna awm lo va chinfel ka tum dawn alawm..lo lungkham suh" a ti sup a. A nupui chalah a fawp zauh bawk. Zomuani awm pawh a nuam leh ta deuh a. Ephraime chuan Amanda a call nghal, "DGP chu i lo hrilh hre tawhin ka ring a. Zaninah chet kan lak a ngai ang. Bungrua a rawn thleng dawn a. Custom lamah duty tir se, keini lamin an tawmbukah kan lo chang thung ang. A chhan chu pawisa hi a cash-in an inpe dawn" a ti zung zung a. 

Amanda pawh chuan, "Aw ka hrilh tawh e. Mahse, nang chu rawn lang lo la ka duh, Police ho zingah ka rinngam loh an awm nual tlat, keiman ka lo chingfel ang" a rawn ti a. ZCP nen an inthlunzawmna hi mi dang hriata tlangzarh chi a la ni vak lo bawk nen. Ephraime tan pawh enthlak ruk a la nihna laiah sawrkar mi leh sa ni lo a lo ni bawk a, lo chet ve vak kha a hlauhawm thei dawn tlat!

"A tha alawm. Mahse, fimkhur ula..kei chu Minister pakhat hmu turin ka kal dawn e" Ephraime chuan a ti a. An inbiakna an titawp nghal. Boruak a tang ru ta hle mai. 

Amanda a hna lama a let leh dawn khan sawrkar lam atangin dodalna a awm a, Tin, leave a lak lai a ni tiin a hna zawm nghal thei loin an tikhawtlai bawk. Mahse, DGP Pu Dinga khan a thuneihna rawn hmachhuan vein tun hunah an mamawh ber a nih thu sawiin bansan a tum tawh a hna chu a zawm leh ta kha a nia. Sama erawh suspend a la ni rih thung. A tha zawk bawk, Amanda nen Office khata thawhdun chu an inkar boruak vangin thil nuam zawk zawk a ni dawn lo tlat a. In lamah a lo hahchawl der der bik chuang lo, Amanda chah angin Abby te hnena inhnimphuma an ruahmanna hriat ve zel chu a hna a ni. Mahse, Abby te pawh an á lo va, Sama'n a fapa a rukbotir nawn leh atang khan Abby chuan a hnaih ta vak lo. Sama a che phelh ve bawk nen..mahse, kawng chu a la awm êm ang chu maw. 

Custom lama duty tura an tirhte chu Hotu lam atangin kirtir leh an ni ta phawt! Engkim chu a lang nghal ruak mai. Pawisa an inhlanna tur leh bungrua an dahna tur lamah Team khat an kal ta bawk a. Hei hi Amanda leh Pu Dinga ruahmanna a nih piah lamah information an dawnna erawh ZCP lam atangin a ni thung. Khawchhak atang hian kuhva ro tawlh luh a nih bakah an vai chuan an ni lo va, kuhva kara ruihhlo lo dah duh mai te, ralthuam leh rangkachak chena lo zepru an awm ve tlat mai a. Dan phal loh thil a ni miau a, Kan ram thar ngei hralh chhuah tur a awm laia mi ram atanga chawkluh piahlamah a kara ruihhlo leh a kaihhnawih an phum tel kher hi Zoram tan chuan a huatthlalaawm a ni. A hma la tur ber te an ngawi tlat bawk si. Eng dang a ni lo, sum hi kan lo duh tlang êm a ni. 

Khua a thim chhah hle. Ke kham urhin an thu tawh a, Lo sakuh ser nghah tlawk tlawk chu a ninawm ngawt ang le. Mahse, dar 12 a pelh hlek hnu chuan hla tak atangin a rawn êng ta vàt vàt a. Motor tlan thawm chuan a rawn zui bawk. A kawtah chuan car pahnih a rawn inhûng dawt a. Car pakhat atang chuan mi pathum an rawn chhuak a, Car pakhat atangin mi pahnih. In chhungah chuan an lut zui ta a. 

An thawm lo ngaithla kartu an awm tih reng hre loin, "Custom lam chu kan chingfel a, kan him tawh e. " pakhat chuan a ti lung lung a. 

"Kan chunga thuneitute thuneihna sanzia hi Police department hian an hre lo a ni. Lo hawi kual vel mai mai teh se" pakhat chuan a ti bawk. 

Aw hniam lam hian, "Bungrua chu trip engzat tak nge in rawn thlenpui theih?" A ti a. 

"Trip 25 a ni e. Trip 10 kha chu kuhva hlang, a bak chu bungraw dang kan phum thei hram e. Tun tum chu kan duh tam bawk a,a hlawkna pawh a sang fal ang chu" A tir bera tawng lung lung khan a ti a. 

"Sum chet vel dan hi enthlak kan nih chuan hriatchhuah a harsa dawn hauh lo va. Custom lama duty an rawn tirh atang khan eng emaw hriat an nei tih chu a lang a. A cash-a kan dawn pawh hi bank lam kan la hmelhriattir rih thei lo vang.." Fimkhur hmel deuhin pakhat chuan a ti a. 

"Ni e, a dik e chu chu. Keini lam pawn kan han rial ve leh deuh ang a. " pakhat chuan a ti a. An ngawih deuh vang vang lai chuan Amanda chuan a naute ho chu signal zauhin, an tawmrukna atang chuan an chhuak ta zál zál a..

Kawngkhar chu a inkhar phui lo va, a remchang viau. Amanda chuan hawng thutin, a silai in lo ding hluaite chu a tin nghal a. "Che hlek suh u. Dan phal loh hmanga sumdawnna in khawih avangin man in ni e. " a ti ta rap mai. An hrilhhai tlang teh e. An ban an phar vah a, pakhat chuan, "Finfiahna i nei lo. Tin, kan chunga leng i hre lo" a lo ti sup a. Amanda chuan va hnaih nghal ruakin, "Nang hian i chunga lengte leh i thurualpuite zawng zawng i sawi dawn a ni. " a ti vawt raih a. 

Hetih mek lai hian Amanda thah dan tur ngaihtuahin Abby chuan ruahmanna a lo siam ve mek bawk a. Rei tak a ngaihtuah hnuah a taka inhmachhawna a lu thuaibun chu chàk teh mahse, a hneh zoin a ring si lo va. Ruahmanna thar siamin a khi ta sak a. 

"Naktuk chawhnu lamah chuan i ruang a váwt vek tawh ngei ang. " a ti sap a. Verther zetin a khi ta var var a. 

(Zan lam pawh ka awl thei tawh lo maithei. Story dang ka rawn ziak tan dawn e. Mahse, post hun ka lo ruahman ang.