Inferno 15

INFERNO (15)

Ziaktu: Toni Râlte

(Adds kha aw. Duatte u ❤

A chil a lem khawlh a. 

"Ni e, Abigail-in thlalak min rawn thawn ngawt danah khan ngaihthat lohna ka nei sa tawh. Nangmah tibuaia phiarrutu che an awm a nih ka rin vangin belhchian ka duh a. Amah ka va hmu ta kha a nia. I uire thu leh thil tam tak a sawi a. Ka awih lo va, awih pawh ka duh hek lo. Thlalak pawh kha edit theih a ni tih ka hria. Mahse, ka mit ngeiin kha pa nena in inthlah lai kha ka hmu ta a. Ka ngaihtuahna a buai chho tan ta a ni. Rin che ka duh a, mahse, kha pa nen in inhmu kha ka rilruah a cham reng bawk si. Engkim zawh fiah che ka duh a, mahse, " Ni e, Sama, thudik a ni" tia min lo chhan kha ka hlau êm a tin ni. Ka tuar zo dawn si lo va. Tichuan, ngaihtuahna buai nuaih chungin Abby pawh ka hmu leh ta a. Nangmah tihchhiat che chu a tum ngei tih ka chiang ta bawk. A taksa hmanga min thunun a tum a, mahse, ka rilru zawng zawng a nei thei chuang lo. Naute kha ka fa a ni lo tia Abby-in ka thluak a fan chhuahtir vek avangin ka fapa ngei chu Abby thupek angin ka rubo a nih kha. Mahse, ka lo tisual tih leh ka lo kal thui hman hle tih chu car-a min sawisak zan atang khan ka inhrefiah ta a. Khata i thinrim leh rilru na lutuk hmel ka hmuh khan pawi rapthlak tak ka lo khawih tih ka hre ta a ni. Ka inchhir a, engkim siam that ka duh. Mahse, nang chuan min rinna chhete pawh i neih tawh loh vangin Abby belbul chungin a ruahmanna te chu ka hre ve ta zel a. 

Naute ka rukbotir leh chhan kha chu engdang a ni lo. Abby ngeiin khami in inhmuh ni zan la laa naute thehthang a tum thu leh ka puihna pawh a mamawh tur thu a sawi tlat a. Lucy kha ka be lo thei ta lo a ni. Abby chu tal awhtir ve leh a sum pawh sentir ka duh a. Tikhan ka thiam ang tawkin ruahmanna kha ka kalpui ve ta tawp a nih kha. I bula ka sawi chuan ka bum che emaw i tih ka hlau bawk si a. Ni e, i tan ka chhe vek tawh a, hnaih ngam tur che pawh ka ni tawh lo tlat a ni. Mahse, ka tihsual siam that hna tal chu a tawp nan thawh ka duh a, Ka mi chhawrte kha an fing ziktluak lo nge, Abby khan thil a hre ru zawk..sum an inhlan hman ta lo kha a nia. Ka tum ruk dan chuan sum kha laa, Abby pawh phuarhlawma rawn hawn turin ka ti a ni. Mahse, a thleng hman ta lo a nih kha. Naute ber kan hmu let ta bawk a, i lawma i hlim chuan ka duhtawk ta mai. Chuan, Abby hi sawrkar mi rawih a ni a, mi bo te i chhui atang khan nangmah tibuaia i hna tithuanawp turin an ruai a ni. Chakma thisen kai a ni a, pawisak a nei lo bawk. Tunah hian i lakah tihtheih an neih rih tak loh avangin kawng dangin kua an hreuh leh mek a, ZCP member niawma an rinhlelhte vehthlem turin mi hrang hrang an ruai mek a ni. Tin, inrukbona pawh a thleng leh maithei. Sawrkar lam hi an mangang tan tawh a, Hel pawl te hi an hlauhawm tham tawh nen..inphenna zawngin anmahni venghim tur mi sual tam tak an ruai ru vek tawh a ni. Tin, sawrkar thurúk ril tak pakhat chu secret society hi a rukin an la kalpui reng a ni. Mahse, an vaiin an inhnamhnawih lo thung. Minister pahnih khat hneh theih loh an la nei a, tin, Officer thenkhat Iluminati member ni duh lo hi an la awm thup bawk. Setana lal ram din hi an tum ber a ni. Hmana Dr. Zira te lo kalpui tawh kha an la buaipui ru zel..Secret Society hian Mizoram a la a nih chuan kan hmabak a èng lo khawp ang. Heng zawng zawng hi i tana ka theihtawk ka tih ve chu a ni mai. Nang hi Zoram hian a mamawh che a ni. I hna hi bansan suh" Sama tawng chhung zawng Amanda chu a chechang eih lo. A awih nge awih lo tih pawh a hmelhmaiah a lang hek lo. Sama chu a melh vawng vawng ringawt mai a ni.

Rei tak a reh hnuah, "Inchhirna hun siamsak i la ni hi lawm ang che. Pasal thluak suksak theih ka nei che hi kei ngei pawh ka inhmusit hial a ni. Tunah chuan ka lung a dam rih lo va, chen dun la duh rih lo. Mahse, mihringte hian kan nun hmanah chance vawi khat tal chu kan phu ve ka tia..inthenna chu kan la tifel lo vang a, in in lamah lo va khawsa rih la, ka nute pawh engkim hrilh ang che. Ka lung a dam hunah i lo haw leh dawn nia" Amanda chuan a ti ta a. Sama mitmeng chu phurna hlirin a khat a ni.

"Tak tak em? Amanda, ka lawmzia hi ka sawi thiam lo zawk. Ka lawm e..ni e, ka nun pawh a hma aia thaa hman ka tum tawh ang. Vawi khatmah i natna siam zawngin ka khawsa tawh lo vang. Ka hmangaih che" a ti hluai a. Chance pek a ni leh chu hmuh theih khawpin a lawmzia a hmelah a lang a ni. Amanda erawh a zia a zawi raih a, chau hluah hluah hmel a pu. Chawlh hahdam hi a mamawh em em bawk a ni. 

"A nih ka va haw ang e. Hun min siamsak avangin ka lawm e. " tiin Sama chu a tho va. Kawngka thleng an inthlah ve kha. Engkim a la chhe vek lo ve. Amanda ngilneihna azarah Samsona pawh a insiamtha leh thei êm ang chu maw..

"Hello" Drose aw chu a tham chhel mai. A tah zawh chiah vang a ni bawk a. 

"I tha maw?i va pik hmel ve. Joshua ka nia" lehlam ami chuan a rawn ti a. Drose a ner sak, mahse hawihawm takin "I va fel ve ..ka tha alawm" a ti ve mai a. 

"Lo len i phal em?" Inthlahrun hmel deuh hian a ti a. Drose chuan a khawngaih deuh. 

"Phal tehlul e.." A ti var a.

"A nih chuan naktuk zanah lo kal ka tum ang aw. Ka lawm e" Josh chuan a ti a. 

Joshuain a melh dan leh a treat dan kha a hai hauh bik lo. Josh chu mipa hmeltha leh thahrui ngah tak a ni, amah a intodelh hle bawk si. Han iaina chhan tur a awm hauh lo. Mahse, Josh hmakhalhtu Zirsanga a awm ve ta tlat hi a pawi a ni. MAhse, Drose pawh tihian a inngaihtuah a. "Thian em em ka nei lo bawk a, josh hian ka khawhar leh ka inngaihtuah nasa lutuk tur pawh min hnem ve thei maithei asin" tiin. Zirsanga chu a tan beisei ngam rual a ni tawh lo va, tihian a ruka a veina pawh hi khuareiin a la phumbosak ve maithei asin. 

Lawmsanga natna chuan dam lam aiin hniam lam a pan ta zel mai a. Nguri meuh pawh a rukin a tap zing ta. Nauteii lah a pa a rawn hmuh chuan a insum thei ngai si lo. A pa chu a cher kuam tawh a, a hriatna lah a hloh tam telh telh bawk. A fanu chauh zawng a la hre ve a, Nguri pawh a la hria. A pianpui unau Muanpuia ngei pawh han hriat loh changte a nei ta zauh zauh a. Doctor lam lahin han enkawl dan vak an hre si lo. Nguri mangannain a vawrtawp a thleng titih ta hial mai. Sum leh pai lamah chuan an la buai em em hran lo, mahse, Lawmsanga natna kher kher chu natna vàng tak a ni si a. Zan khat phei chu an kaitho zo lo thelh a, Nguri a khur zawih zawih mai. A pasal hi thi turin a la phal thlawt lo a ni. Enkawl a la kham lo bawk. 

Tuk khat an han tho chu Lawmsanga chu mitmeng felfai tak nen a rawn tho harh ve mial a. Nguri'n a va inthiarpui hnuah khumah chuan a thu mu a. Nguri pawh a bul thutthlengah a thu ve a. 

"Ngur, peih lohsan hun che u hi a la awm ka ring. Ruahmanna siam te pawh hi a hun tain ka hria" Lawmsanga chuan a ti thàm tuak a. Nguri a nghing dawt. 

"Chutiang thute i sawi tak. I dam leh vat dawn alawm..khatiang lam sawi ka duh rih lo" a lo ti nghat a. 

Lungchim em ema a nupui han melhin, "Pasal dang tha deuh nei leh ang che aw. I la naupang a, bakah inphenna tur mipa i mamawh. Kei zawng ka laktlak tawh si lo va" a ti leh hram a. Nguri'n a kut a rawn vuan chawt. 

"Lawmsang, a tawk rih. Chutiang thleng thleng sawi suh. Kan dam dun ang a, kan thi dun bawk ang" a ti nghet charh a. 

"Ka fate i enkawl danah hian vuina tur pakhatmah ka nei lo bawk aw. Nang ang nupui ka nei hi Pathian malsawmna ka dawn zinga ka dawn that leh hlu ber a ni..ka hmangaih che" Lawmsanga aw chu a ri chang chang a ni. Mahse, a tih takzia te, a thûkzia te chu a fiah em em thung si. Nguri hnuk a ulh thung. Aw khur dar dar hian, "Ka tan i awm reng thin a. Ka pasal i ni hi ka inchhir ngai lo. Ka tan chuan pa leh pasal i ni" a ti a. Nghet taka kut inhumsakin an inmelh ngawih ngawih mai. 

Zirsanga wine lem hlek chu a taksa a la chak tawk loh vang nimaw a ni deuh nghulh mai a. A kai ve deuh lek lek tihtheih turin a awm. Kimi chu a thiannu Alawmi pasal rál turin a kal a. Alawmi chu a la naupang si a, pasal sûn atan chuan a khawngaihthlak takzet a ni. Hmeithai a ni ve ringawt dawn chu a nia. Zirsanga pawh kal a tum tho naa, Kimi'n, "Zuali amah maia dah zawng buaina a tawk leh ang. Lo awm mai rawh" a ti kha a nia. Ani a lo chau ve deuh tho nen, a pawm ta ringawt. Zanriah ei khamah a inbualfai a, wine a lem hlek kha a nia. Zuali erawh sitting roomah tv enin a thu thung. 

Khumah chuan a vàng zawngin a mu a, a sei sia a ke lam a lawr zuah mai. Drose a ngaihtuah chhuak thut. A ngui deuh rawih mai. Joshua khan Drose kha a melh no viau mai a, mipa tha tak pawh niin a hria. Insawirem dan awm se a tihpui ru hle. Drose nungchang leh zia atangin hmeichhe awmmawh leh sihhnip a ni hauh lo va, amah Zirsanga pawh a rawn tibuai lem lo. Chuvang chuan mipa tha tak a phuin a hria..Josh khan theihtawp chhuah teh se. Amah rawn bawhtu a awm avang chuan a meng hlawl a, a lo chhing sek hman a nih hmel. Kimi a lo haw tawh emaw a ti hman a. "Kim" a ti sup a. Mahse, amah rawn bawhtu chu Kimi a ni hauh lo. Zuali lek!

Zirsanga chu a rang arangin a tho a. Zuali chu chhuatah a nemthlu pah bawk. Zuali chu a kai hmel kher mai. 

"Eng nge a awmzia? Zuali" a ti hluai a. 

"Ka..ih, i wine kha ka lem ve a. Ka rui a" a ti bah nak. Zawi muanga rawn thoin a kawr bah chu a banah a tuai liam ta mai a. A hnute a rawn lang thawih mai. Zirsanga melh ran chungin, "Ka rawn awm tirh atang khan ka star tawh che. Hun remchang ka hmu thei si lo va..U Zirsang, ka duh che" tiin a rawn pan ta mai a. Zirsanga chu a pháwk kher mai. Ten hmel zeta ner sawk chungin, "Chhuak rawh. Nangmah vulhtu kut pawh sehsak duh i nih hi..kimi'n a duat tehlul che nen, hetiang rilru te i lo put reuh le..ka hmeichhe duhzawng i ni lo tlat" tiin Zuali chu a nam chhuak ta hmiah. Zuali lah chuan thawm nei zui miah loin a muthmun a pan ve mai bawk a. Zirsanga chuan Kimi a call nghal. 

"Lo haw tawh mai la..nge ka rawn lam dawn che" a ti a. 

"Aw hei rawn hawn ka tum mek e" a rawn ti ve mai a. An awmpuinu chu an ban mai a ngaih hmel. Hetiang hmeichhia hi Zirsangliana ngaihtheih loh zawng tak a ni tlat. A ten a ni ber mai. 

Ruatfela te an va kan leh ni chuan an ruahmanna chu engtia han hrilh tur nge ni ang tihah an buai a. An veng uluk angreng bawk si. Mahse, Arini thluak a rawn lang leh ta a. Ruatfela thil pek tur zingah Sikret a dah tel nual a. Sikret chhunga lehkha them a zeh chu a seal that leh vek avangin lo endiktu tan pawh man chhuah theih a ni lo. Chu lehkhathemah chuan, "Tun atanga ni 3-naah in awmna cell bul kha a rawn kang dawn a. Thelh hlek suh u. An sahàwk lai takin Helicopter a rawn thlawk ang a, Jail thlang lam hungna bulah khan lo awm ula, tui a rawn phuhna bawm a rawn dahthlak veleh bawmah chuan in lut dawn nia" tiin. Chutiang ti tur chuan a pa a hmin diam tawh a ni. Pu Thanga chekkawite chu amah Pu Thanga'n zuk tlawhin an ac-a pawisa a deposit tur thu leh meialh siam turin a hrilh a. An inhrilh dan pawh hi a nalh riau. Arini idea tho a nia. Pu Thanga chuan a thuihhruai zinga pa rorum ber bulah, eitur eng emaw a pe ve a. Cake sial deuh a dahtel a. Cake chhungah chuan lehkhathem an zep tel leh a ni. Engkima lo in man tawh sa an ni bawk a, A thuihhruaite pawn an lo hrethiam nghal vek. Pawisa an hlawh dawn bakah an ni chu an tang rei tawh dawn lo bawk a. Pawisa hi a thlanawm zawk fô reng a ni. Pawisa vanga thawkrim kan ni miau a. 

Ruatfela te pathum pawh chuan chu hun chu an lo nghak ta ran mai. An helhhawlh atalángin an za ve sek mai a. Chhuak thei pawh nise, khawpui chhungah an awm ngam dawn lo va, camp lamah an liam nghal mai ang chu. 

Pari chu a kal ru tham tham a. Hotela a let leh hnu hian Cindy chu mitmei nasa tak a ni. Mahse, han rinhlelhna tur lai a la hmu chhuak hleithei lo. Mahse, zanin zan tirah khan a hmaa Cindy nena a lo hmuh palian deuh kha a rawn lut tlat mai a. Eng emaw a awm leh ngei dawn niin a hria. Chu pa room kawngka chu a inkalh tlat avangin room service anga chet a lak mai a ngaih hmel. Choka lama thawk mah nise, a inchei danglam chuan an hre lo turah a ngai. Room service te uniform chu a va inbel sawk sawk a. Wine leh a sehhmehte nawr chungin kha pa room lam kha a pan ta a. Kawngka a kik rei lem lo, a rawn hawng vat a. A beisei ruk ang ngeiin Cindy a lo thu ve váng mai. A lukhuma a inhliah avangin Pari chu Pari a ni tih a rawn hre lo a ni maithei. Eng thu mah a sawi lo. A chhuah leh ruala kawngka bula pot phena recorder a dah ruk zauh chu an hrechhuak lo hram turah a ngai. Hlawh a hmu tha a, a hna pawh tha taka thawh a duh ve a ni. Rosangpuia te nupa lakah a hlawhchham tawh bawk si. Ngaihtha fahranin a room lam panin a mu ta vang vang a. 

Isabella te nupa pawh tluang takin Lunglei an thleng phei a. Bella in lamah an innghat a. Tihian a in hi a enkawl fai tur a ruai mai a, an lo chei hnûmsak reng a. Hralh êm chu a pa sulhnu a neihchhun a ni tawh a,a phal chiah bik lo a ni. A nuteii pawh jailah a la táng a, a patea erawh kum 2 liam taah khan chuap cancer vangin a boral tawh a ni. An fate an khawngaihthlak khawp mai. 

Ruatdiki thihna room kha chu Bella pawn a lut leh tawh ngai lo. A hlauh vang lam ai mahin a lungchhiat thin vang zawkin..Ni e, Ruatdiki khan a haw viau thin naa, Bella chuan a lainat em em zawk. Khatia rawng taka thah kha a phu mawlh lo a ni. Imma nen hian an sawi dun ve leh zauh zel a, Imma hian sawi nuam a ti vak lo tih erawh a hria. 

A hmaa Bella room thinah khan an mu dun vang vang a. Ngaihtuah lem nei lo va Imma-in mei a zuk lai chuan a phone a rawn ri ta ral ral a. Amanda a lo ni.

"Imma, Sawrkar hi kan rin aiin a kal thui a ni. Kei pawh ka hna bansan ka tum kha ka thulh leh ta mai. Nang leh kei hian hmabak huphurhawm tak kan nei..sawrkar kan do a ngai. Min thawhpui duh ang tiraw?" A rawn ti nghal bawrh bawrh a. Imma a thu tha sawk sawk. 

"Engtin? Eng chena thui nge an kal tawh?" A ti hluai a. 

"Hmai chhanah kan la sawi dun zawk dawn nia. A hmasa berah chuan ZCP kan zawm ve a ngai" a rawn ti hriam hraih a. 

"Mahse, man chhuah kan ni vat mai lawng maw?"Imma chuan a ti a. 

" ka ring lo,. Tunah pawh min veh ru tawh tho alawm. Kawng dang kan nei lo..Department-a i rawn let vat a ngai. DIG ka lo bia ang" a rawn ti a. 

"Lungleiah ka awm mek a, Kar leh lamah lo phei kan tum ang a. Kan sawi dun dawn nia. Inenkawl tha la aw" Imma chuan a ti a.

"Aw le, chuan Bella kha ka naute min lo enkawlsak tawhnaah lawmthu min lo sawisak dawn nia aw. " tiin an inbiakna an titawp a. Bella nen an sawizui dun nasa. Dik tak chuan an ram inrelbawlna leh sawrkar kalphung danglam ta lutuk chu an hne thawkhat ve bawk a. Amanda thawhpui chu Imma pawn a hreh lo khawp mai. 

Abby chuan a taksa ruak káng mai zut kual pahin, "Ani saw chu ka hmachhawn duh tawh lo. Min tlan khalh leh tho ang. Thil dang min tihtir zawk mai rawh" a ti ngher ngher a. 

A hnuaia ruaka mu mek mipa chuan, "A tlan khalh theih tawh miah lohna tur che ka hria asin. I hre duh em?" A ti sur sur a. 

"Sawi la" Abby chuan pangchang zetin a ti a. 

"That rawh. Ani saw that la, buaina tam zawk a kiang ang" a ti rum ûl a. Abby a kang zawk. 

"Amanda ka that ang maw?!" A ti há a..

(Ruai kan theh dawn sia. A tam hman ngang lo a ni e.