Dr. saidingpuii 3

DR. SAIDINGPUII (3)

Ziaktu: Toni Rälte

(Adds kha aw ❤

"Kum 17 a nih laiin min atchilh tlat a. Kei aiin a naupang nasa si..a tirah chuan ka hua a, biak pawh ka be duh ngai lo. Kan thenawmah sawn a pu a nu pa te an awm thin a. Tah chuan a rawn insawn phei a, amah vangin pawn pawh ka chhuak ngam ngai lo. Mahse, zan khat chu a thianpa nen bike-in an accident ta a. Nikhaw hre lo va damdawiina a awm takah chuan ka lo ngaihtuah nasat ve tawhzia ka hrethiam chiah. Ka mangang a, ka sahal a ni ber. Ka va kan thin a. A rawn harh hnua min hmuh chuan a lawm lutuk kha a mittui a luang zawih zawih thei mawle. Tichuan, kan inngaizawng ta a. Ka chhungte hian min hau nasa thin. Kei aia a naupan zawk chu thuhran, a pa hi damdawi vawrh vangin jailah a tang a, a nu lahin a fate enkawl dan a hriatchhun zu a zuar bawk. An dinhmun leh kan dinhmun chu a inthlau êm a ni. Mahse, englaimahin ka nghing ngai lo. Kei aiin a nghet zawk bawk. Harsatna tam tak karah kan inzui ve zel a. Kei hian hna ka neih veleh kan innei ang tih chu kan thutlukna a ni. Ka zilhin ka kaihruai nasa bawk a, mutiaah te tangin engmah thawh hreh a nei ngai lo. A nu pawh zu zuar tawh lo turin a ngen a, mahse, anu chu a lo awm nuam laklawh tawh si a. A sim duh si lo. An inhau ta fo a, a nu chuan hnawtchhuakin a patea te bulah a khawsa ta a. Ka theih ang angin kei pawn ka pui ve thin. 

Hun a kal zel a, Doctor ka zirsan ta a, phaiah ka awmbo ta vang vang mai. Ka ngai thei asin aw. Mahse, amah vang khan ka chak a, amah vangin zir zawh vat vata inneih vat kha duh thin. Theihtawp chhuahin karhla atang pawn ka zilhin thu tha ka hrilh reng zel a. A zawm tha viau bawk. Kan inkarah mi dang an tlazep ngai lo bawk. Kan inringtawk dun lutuk. Kum tawpah exam ka hmachhawn laiin khawvela ka thu hriat tawha rapthlak ber ka hre ta a ni. Remsiama a thi tih thu chu. Nikhaw hre loin ka tlu tawp a, ka thianten min buaipui nasa hle a ni. A hnua ka harhfim hnuin Remsiama thih chhante chu ka hre ve ta chauh a, Apa jail tang kha a lo chhuak tawh a, Amah pawh a pa chuan a ko hawng a. An in lamah a let leh ta a, Mahse, a nu chuan ngaihzawng a lo nei chu niin. A pa chuan a nupui uire lai a phawk ta a. A thinrim leh rilru na lutukin chemte chuhin a nupui leh a bialpa chu vih a tum ta a, chumi Remsiama'n a danna lamah a pa chuan Remsiama dulah a vit palh ta hlauh mai a. A lo thuk bawk si, damdawiin an thlenpui meuh chuan ani chu a lo kal hman tawh a ni. A natzia kha engti kawng mahin ka sawifiah thiam lo vang. Mizoram ka thlen rualin a thlanah ka kal nghal a. An lo enkawl uluk vak bawk si lo. Remsiama pa kha a fapa a vihhlum vanga a rilru na lutuk leh a nupuiin a uiresan vanga a tawrhna te avangin zu a lo tlan nasa a, engmah ei lo va a in tak tluk tluk avangin a pumpui a pawp a, Mizorama ka hawn hma ni 3-ah a lo boral ve chiah a ni. Apa kha ka dem lo, Remsiama nu hi ka haw lutuk a, ka huat dan chu thi ve daih se, thih dan rapthlak deuhin tihte ka ngaihtuah thin. Rei tak Remsiama avangin mi pangngai angin ka khawsa lo va, Ka thil zir laiin ka rilru a luah hek lo. Doctor ka han ni ta te kha lawmna reng reng ka nei lo. Ka beisei leh innghahna kha an thamral ta vek si a. Remsiama leh Johny chiah hi ka nuna mipa ka lakluh awmchhun an la ni. Ka nunkawng hi dik tak chuan a bumboh ve em asin" a ti ta a. A mitah mittui a tling pam mai. Sawi tur reng reng ka hre lo. Ka hnem thiam bawk si lo. Eng emaw chu sawi a tul vein ka hre bawk si. 

"A pawi hle mai. A na dawn em a nih chu mawle.." Ka ti ta ringawt. Min rawn melh a, "Ngaihzawng i la nei ngai lo va i hrethiam phak rih lo vang. " a ti sap a. A sawi dik chiah. Ka feel pha meuh lo, mahse, a na viau ang tih chu ka ring. 

A ding a, "Kal tawh ila..awm reng pawh rilru a hrehawm rei" a ti sep a. Ka ding ve nghal. Thlan lam chu va hawi lehin, "Mangtha aw. Duata" a ti zawi sap a. Muangchangin thlanmual chu kan chhuahsan ta a. Doctori chu a chhel khawp hian ka hria, chuti taka harsatna a lo tawk tawh chung pawn doctor lai a la ni thei a. Midangte tan malsawmna a la ni thei a. Ka ngaisang ru viau mai. Zu a lo in thinte pawh zep nák emaw ka dem em em tlat lo. A nun chhungril a lo hrehawm ve dawn êm asin. 

Motora kan luh leh hnuah, "I inlei kim thei maw?" A ti a.

"Aw..min pe tam em alawm. Ka hman ban hi chu ka pe leh ang che..a nihin a ni lo" ka ti nghut a. 

"I ho mai mai. Taka i hlawh chungchang hi sawi ila" a ti ta a. 

"Nia, engzat nge ka hlawh dawn?" Ka lo ti thung. 

"Ih, tunlaiah chuan engkim man hi a sang vek tawh sia. 10000 hi na i ti ang em?" A ti ta mai a. LPK ka khalh lai pawn 7000 bak ka hlawh ngai lo, driver side erawh a awm ve a. 

"A va tam awm ve..kan veivak tam bawk si lo" ka ti a. 

"I ninawm" a ti daih. Sawi tur a vàng tawh asin aw..ka lawm ru veng veng mai. Private school-a thawkte ai pawn ka hlawh tam dawn a nia. Lehlamah Saidingi pa pension hlawh, U Pari dawr atanga an lakluh bakah Valtea lah mechanic lo ni bawk. Doctori hi chuan a hlawh hi a pumbilh thei dawn chiang sa. Chuvang chuan ka inthlahrung duh vak lo. 

Zanriah pawh a tui leh ngei mai. U pari chuan, "Ruatpuia chu i ngaihawm dawn hle mai. Ka lo la zin ve ang, Mateii hian a phal chuan" a ti suam suam a. 

Saidingi'n, "Pasal ka lo zawnpui ang che. Lo zin rawh" a tih chuan kan nui dar dar mai. U Pari lah chuan,"Naute adopt tur te hi awm se ka duh a nia..pasal neih ka peih der si lo" a ti a. An awm nuam tawh sia, pasal neih chu a peihawm loh khawp ang le. 

Zanah chuan in chung zawlah kan inkawm ho leh a, a nuam ve mai mai. Lo zin chu an tum ruh khawp mai. Lo zin mawlh teh se..nuam an ti ve viauin ka ring. Kan khaw nula ho lah an lo chhe lo ve bawk nen. 

Hlimi nen kan inbia a, "Hei Hruaia te lo len an tum a. Lo haw ve vat teh" a rawn ti a. 

"Aw naktukah ka tih kha..zanah lo len ka tum dawn nia" ka ti ve luam a. 

"Yess..nuam dawn e..ka ngai tawh che" a tih chuan, ka lai deuh. 

"Nang pawh i ngaihawm " ka ti sup a. 

"Hei an lo thleng, nakinah kan inbe dawn nia aw" a ti zung zung a. Kan dah ta a. Kei pawh ka mu hma. Ka mutui viau mai. 

Tukthuan ei khamah kan haw ta vang vang a. 

"Zanah Hlimi i rim dawn em?" a ti a.

"Umm..ka leng ve ang ka ti" ka ti mai a.

"I ngai tawh em?" A ti leh a. 

"Ngaih em em pawh ka hre lo. A la tir êm a" ka ti hmiah. A ni lah tak bawk a. 

A nui hak a. 

"Min thik ang e aw" a ti ta daih a. 

"Nge maw a thik ngawt ang che le.." ka ti nghut. 

"Aa..hmeichhia hi chu kan thikthu hi a chhe thei êm a. " a ti ve mai. 

Kawng kawia kan tlan chu horn ka pe naa..a side lo lutukin Pickup hi a rawn tlan a, a tlan chak angreng si. Ka control hman ta ngang lo, kan insu ta bur mai. Ka chal ka tauh a, a rawn thi nghal bawk. Doctori ka en vat, min lo en ve kiau a. Ani chu engmah a na lo a niang. Seat belt a lo hreng bawk nen. 

."I chal a thi a nia" tih leh ka chal a rawn ban nghal a. Pickup driver lah chu thinrim hmaisen teuhin a rawn chhuk a, a áng nghal tun tun bawk. 

."Rawn chhuk vat teh u. Hei inchawi a ngai dawn a nia" a ti lung lung a. Saidingi'n first aid box a ban vat. Lapua lain ka chal chu dimtein a rawn dep a, a hnawih chi a hnawih bawk. A thîp nghal veng veng mai. 

."chhuk lawk ang" ka ti a. A bu nghat. Motor thenkhat pawh an lo ding nual hman. Ka chhuk rual rual chuan,"I va mawl ve, ti nge side la lo lutuka i rawn tlan a" min ti zawmah a nih chu! Ka va hnek chák tak. 

"Ringawt che chuan nangmah i nih kha..i tlan chak bawk. Horn nise ka rawn pe tuar tuar. Ti nge side la lo va i rawn tlan a" ka ti ve ta sak sak a. 

"I va zak lo tak e aw" tih leh ka kawr áwma rawn tham a rual nghal a. 

"Thlah vat rawh. Mawla" Saidingi aw fiak thak avang chuan boruak a reh dûk mai. 

A kut chu lakthlaksakin , "Tha zaiin sawi ang hmiang. Hei motor pawh siam a ngai nual dawn si a, Police station hnai ber i pan mai teh ang" ka ti dam thlup a. Ka thin a rim poh leh ka aw a dam..!

Police ka sawi rik takah chuan a hawi vual vual a. A zám deuh niin ka hria. Kan motor chu a chhe lutuk hran lo naa, charge hrim hrim chu ka duh. A tihdan phawr phawr chu ka ngei riau. A mi phurh nu chuan, "Lo kal mai rawh. Thiante u, tikhan inrem mai teh ang u. Hei bungraw phur kan ni si a, kan hmanhmawh tlat" a rawn ti sawk sawk a. Chutia inrem theih chu a tha tho mai. Kan chawi tlem zawk dawn tho bawk a. 

Doctori chuan, "Nang kha, Tun hnuah fimkhur tawh ang che. Zu rim i nam bawk, Police hnenah chuan thlen ila i rin aia tam i chawi ang. Tawngkam mawihnai i lo zir bawk dawn nia. Hre reng ang che" a rawn ti hriam hraih a. Tuman an chhang ngam lo. Ngawi rengin motorah kan lut a. Kan tlan zui nghal. Ka la inbengdai hleithei lo tih a hria nge, "Kawngsir zau laiah ding la, hahdam phawt rawh" a ti dam diai a. Ka mamawh tlat. A sawi ang chuan kawngsir zau laiah ka ding a, Zial zu turin ka chhuak a, ka zu ta vang vang mai. Tlem chuan ka awm a nuam ta deuh. Ani pawh a inthiar a, tui te in in thlifim dawngin kan ding dun vang vang a. 

"Ka tha tawh e" ka ti a. 

Min en miah loin, "Hlimi'n min hmakhalh hi chu a pawi ngawt mai" a ti hniam raih a. Makti zetin ka melh káwk!

 

"Eng maw i sawi kha? Sawi nawn leh teh" ka ti nghek. A ngawi ngal a, motorah a lut zui hmiah bawk. Kan han tlan leh chiah chu boruak chu nuam lo tak a ni. Biak ngam loh khawpin a thutak a ni. Chutiang taka inla mitak chu kei pawn biak tawng hram ka tum hran lo. A muthlu ta daih a, ka lawm daih zawk. Zai ka play sauh sauh a, ngawi rengin ka tlan ve miah miah ringawt. Ka khalh muang fahran lo bawk a, khua pawh kan lut hma e. A quarterah ka han thlah te te a, bungrua kan thiar fel leh vek. Hlimi pawh a rawn lang ve vat a, min nuih var var mai. 

"Eng nge min lo hawn?" A ti seuh seuh a. 

"Zanah aw" ka ti nghut. Ka mitsirin Doctori chu ka melh pah reng bawk. Kan chevel leh inbiak dante chu hre lo ang hmakin a awm nia! He mihring hian eng nge maw a hriat ni. Ka va pan a. "Motor hi chu naktukah ka lo sil mai ang, ka hawn thla ang a, rem i ti em?" Ka ti ta ráwih a. Min en miah loin, "Ka lo siltir mai ang. Tikhan dah mai rawh" a ti nghat a. Ka ner sawk. Misualnu hi a.. Hlimi nen kan inthlah a, thinrim tûn chungin bawr deuhin ka chhuk thla nghawng nghawng mai. Engvanga thinrim ve ringawt nge maw ka nih le..ka buai lohna turah ka buai a ni mahna le. In ka thleng a, ka farnu ten min lo buaipui vat vat mai, hah a dam tan e. Ka thil hawnsak pawh an lawm thiam lehpek a. Pa Rema'n, "Keite chu a ngai ve hleinem..i mak thin" a ti chuar chuar a. 

Tei pawh a lo la awm a, a nau pai a chhiat atang khan nau a la keng leh ta miah lo va, lehlamah an dinhmun heti hi a nia. Inthen a tul thut pawn fa an la neih loh chuan a awlsam zawk ang. An pa Muana lah hi nu leh pate ring chawt chi, ama that thata tha ve tawp, eizawnna mumal nei lo a lo ni bawk nen. Tei chu let tawh lo mah se pawi ka ti em em hran miah lo. An buaina ber Muana farnu Teremi phei chu Nupuii phei chuan a lo haw ngang mai a, Dawra a va kal lawk kha dawrah a lo thu ve chu niin, Teremi chuan, "In u chuan bungrua rawn la rawh se" a lo ti khanglang a niawm e. Nupuii lah huaisar chi, hlauh em em nei lo a lo ni si. 

"Ve che, i thu lo ber' a lo ti piap mai pek a. 

" Khatiang pasal farnute pawh chhang ngam hmeichhia kha kan duh ve lo"Teremi chuan a lo ti ve leh a. 

"Mo te hmumawh tlat, lawinate rêl rengnu, i ngum khak kha hmu ve rawh " Nupuii'n a lo ti ve hrep. Boruak a dik dawn lo va hriain dawr neitu ten an khapbet thei hram a ni awm e. Khatiang vel kha kan nia. 

Tei chuan, "Naktukah bungrua va la ila a ni mai lawm. Inthen hi pawi ka ti reng reng hleinem. Fa kan la nei lo bawk a" a ti hmiah mai si. Pa Rema Chuan,"Rum rum zel a che u. Inbengdaih hun lai a nih hi. Amah Muana pawn thu leh hla rawn nei ve phawt se la, chutia nupa inthen ringawt ka remti hleinem" a ti dam duai a. Ka ni pawh chuan,"Ni e, Tei, rik nghal rum rum hi a tha ngai lo ve. Zaninah Muana ko la, sawi dun ve u la" a lo ti a. Zo nu mawltê mah nise, a pasal hi a thlawp tha thei a nia aw. Tei pawh a inbengdai ve leh ta deuh a. 

Kei erawh chaw eikhamah ka insiam a. Hlimi quarter lam ka pan nghal. Ka chhungte erawh chuan ka kalna an hre lo vang. Ka han thlen chhoh lai chuan kan khaw thenawm ami raipuar an lo thleng ve chiah a, nau a vei zui a ni ta mai. U Rengi duty zan mah nise, ani a kawng a lo herh chu niin, Hlimi a phar buai lo thei lo. Raipuar chu kan zawn lut sawk sawk a, a na a ti tawh ngang mai. A thlanfimin a bual huh nasa mai a, nau vei hi mipa tan chuan a nat dan tur hriatthiam chi a ni ve lo, chutiang bawkin tila inpetsak pawh a natzia hmeichhe lamin an feel pha bik lo vang. Hlimi'n nau a chhar tak daih avang chuan damdawiin bul lawka damdawi dawrah chuan ka thu ta vel mai mai a. Hruaia leh Zorina te an rawn lut ve a, kan titi ta mai mai. Tei chungchangte min zwt ve a, Zorina leh Muana te hi inthenawm hnai tak an ni a, a sawi ve luam mai. 

"A theih phawt chuan neihtir tawh suh u. Tei te pawh nau ang tak taka kan en ve an nia, a hrehawm ve êm mai. A naupan ngaihtuahin a tlin reuh ka tia, Muana pa leh an pitar saw chu sawiselna tur pawh ka hre lo, Muana nu leh Teremi ber mi hi..an nasa nufa êm mai a. An tawngkam a chhe bawk si, Hmanni deuh lawk pawh khan Muana nau Siama sawn Tei kuhva man a dah that a lo ruksak vek a niawm a. Chutah pawh Tei lamah an tang duh chuang lo. Muana lah a nep sazu mai sia e.." A ti ve bawrh bawrh mai. A pawisa bo thu vel chu Tei chuan engmah a sawi lo. Ni e, mi titi han hriat pawh hian Muana nu te lam hian dem an hlawh zel mai a, eng emaw tak chu a awm a niang chu maw..

Kei chu titi dang ka vawrh ta daih a, "Taka Zorin, in kawmthlang huana sazaw kha inla chang fuh hleithei na nge?" Ka ti a. 

"Hman zanah Sangbera te hoin an zu chang a, an rawn hlawhchham, a lian fu roh chu an tia. Kan la zu chang dawn mi?" A ti phur phur a. 

"A pawi miah lo, sazaw sa ei pawh a khát tawh alawm" ka lo ti a. Chutihlai tak chuan Doctori quarter atang chuan vengsang lam ami Hmuna, hmanni deuh maia rawn pem hi a rawn dawk chhuak nawlh mai a. Kan awmna dawr leh Doctori quarter hi inep deuh,mahse, a chhung han hmuh phak si loh ang kha a nia. Hmuna chuan eng emaw a sawi nuah nuah a, a pawr viau bawk. Doctori aw fiak thak kan hre zui ta bawk. 

"I lung ka khei chhuah hma khan haw rang rawh. " tih thu a ni. Kan tho hlawl a, kan dak huang mai. Hmuna chu a rawn chhuk zel a, a mitko chu a kak deuh nge a dawm pah bawk. Eng tak ni ang maw kan tih mek laiin, "Zawngi mai mai chu..inla ve khanglang a. Doctor mah nise, eng atanmah ka ti bik lo" a ti tûn tûn a. Hruaia chuan, "Eng nge thleng a? Hmuna" a lo ti vat. Dawrah chuan a rawn inhnawh lut a, zu rim a nam huam bawk. 

"Khi zawngi khian eng nge ka tihtheih a hre lo a nih hi. Ve mai mai a. Tlangvalin kan rim ve em em a, mi biak nachang pawh hre lo" a ti leh nghut nghut a. Zorina chuan, "I zu rui hian i han zuam khawlo te hi a ni lo maw? Keini pawn kan rim ngam hleinem" a lo ti a. 

"Nula an nia, tlangval chuan kan rim thiang vek. Doctor nih vanga chapo vak tur a ni lo. Hei kut mi thlak lehnghal a" tiin a mitko chu a khawih a. Nat chu a nat hmel vak loh. 

"A zin haw chauh a nia, a chau ve deuh te pawh a ni maithei asin" ka lo ti a. Hmuna mizia ngaihtuahin DOctori thinrim pawh áwm chu ka tihpui deuh. An rawn pemna a la rei loh ngaihtuahin a thaw lian ve mah mah a, thawk khat lai phei kha chuan vengsang tlangval thenkhatin an piai liam liam tawh a nih kha. Kan khaw nula pahnih a lo mutpui ve niawm a ni, a uang nghal em em mai a. Chu chu an ngaithei vak lo a niawm e. Kan veng a inhlat deuh avang hian ka hrechiang ve lem lo. Doctori nen chuan an indawr fuh lo hle a nih dawn hi. Hmuna án tûn tûn laiin Hlimi a rawn lang ta a, rin aiin an sam. Nau piang chu 3kg lai a ni nghe nghe. Min rawn melhin, "Ka inbual phawt loh chuan..hei ka thàng huam sia" a ti a. Min rawn der ve chu ka lawm hle. 

"Ka nghak thei che alawm" ka ti mai a. Zorina chuan min melh tawn zak zak mai. Hruaia tak hi chuan a hrethiam vek tawh a. Hmuna pawh thinrim tûnin a haw tak kha. Hlimi in lam kan pan zui ta a, intleuh zuai kha a ni mai a. A rei lem lo. Dar 9 a lo pel vah tawh. Mahse, kan inngaihzawn ve atangin hun thawl kan la nei lo reng reng a. Chutimaia hawn ka tum bik lo. Ka bulah a rawn thu a, min rawn melh háw. Ka lai leh dûk tawh. Mahse, mipa zawk alawm le ka nih le tiin ka insangmar a. A banah va vuanin, "I ngaihawm" ka'n ti ngawt a! A khi sak mai. 

"Min ngai tak tak a maw?" A ti sap a. Ka bu leh nghut ringawt. Zei lo chu min ti ve ngawt ang. 

"Naktukah eng nge programme in nei em?" A ti nghal zat a. Doctori'n engmah a sawi si lo va, ka hre miah lo. 

"Ka hre lo, engmah a sawi lo" ka ti a. 

"Chawlh hahdamte pawh a duh ve ang chu..programme in neih loh chuan lo leng chho la" a ti seuh seuh a. 

"I duty dawn lo mi?" Ka ti hû.

"Dawn tho e, damlo kan nei chuang lo va, a inkawm theih tho lawm" a ti ve mai a. 

"Nia, ka lo tum dawn nia. Mahse, Doctori hian tihtur hi a rawn sawi leh thut maithei ni.." Ka ti a. Thingpui lum a tum chu ka pawt thu leh a, "Lum tawh lo mai rawh. Ka chau ve deuh nen, hawn mai ka duh" ka ti a. Min melh lai takin zám chung chungin ka fawp ve ta tawp a. Hmeichhia ka fawh vawikhatna erawh a ni bik lo. Nikum kum lai hawl lai khan bungrua kan la a, khata a neitunu nuthlawi fing fel zet khan min fawp tawh a ni. A lo kamnam ve si khan min fawp ve tawp. Kei lahin che zui tange ka ti hlei lo va, ka thianpa Driver ve tho Hminga bulah, "Ruatpuia hi chu serafim a nih hi" a lo ti ngei! Zahthlak hian aw..khatia a chet avang khan va hmuhsitna leh hmuh hniamna ka nei hran lo bawk. Mipa thenkhatin kan hmusitzui kher zel hian a nia kan hmeichhiate tihel thin. Duh inang leh tum thuhmun theuh theuh, gap awmtir kher hi tul ka ti ve lem lo. 

Hlimi chu a zei ngei mai. Ka zak lek lek zawk. Thawchham lek leka kan infawh hnuah kan hmui kan phawi thei hram. Kan innuih sak a, ka hmu hmeltha ngei mai. Kei pawn hawn zai ka rel ta a. Doctori quarter pawh a la eng pap mai. Amah chauh chuan a khua a har ve thin ngawt ang. Awmpuite lak mai awm ka ti..

Ka phone ri ral ral avang chuan ka mumang nuam zet atangin ka thangharh a, ka ui viau. A chhan chu ka pa nen hmun nuam takah kan lo kal a, kan lo hlim dun êm a ni. Mood chhe zetin ka phone chu ka melh a. Saidingi.!! Dar 5:40 chiah a la nia. Tun ang hunah te eng nge maw a hriat ni..ka pick lo ngam der si lo. 

"Hello" ka ti phak chuap a. 

" Záwlseiah damdawi va sem a ngai. Lo inpeih rawh. Dar 7-ah min rawn lam ang che" a rawn ti fiah kák a. Ka va ner nasa ber tak. Phun hluk hluk chungin ka tho a, ka boss a ni miau si a, a thu ka hnial thei si lo. Ka inphihfai sawk sawk a, ka nî lo tho mek bulah chanchin ka hrilh a, ka inthiar nghal. Hlimi wish pahin kan chin tur ka va hrilh hre ve a. Ani nen pawh hian hun thawl kan nei thei tak tak lo a nih hi a. Dar 6:45-ah damdawiin tlangah kein ka chho ta nal nal a. Khua a vawt ve deuh tan tawh. A quarterah ka lut nghal a. A lo inpeih leh thlap tawh. Pindan pakhat atangin percel lian zet zet ka chawi chhuak a, motorah ka dah lut zung zung. A sawi ang takin dar 7-ah kan chhuak ta a. 

"i ril a tam em?" A ti sap a. 

"Aih" ka ti hmuk. Ka mood a la dik vak lo nen. 

"A hmanhmawhthlak tawh sia, chuvang a nih kha. " a inthlahrung ve deuh em mawni..

"A ho lutuk, ka hna alawm" ka ti leh nghut a. 

"Khatin lungawi lo hmel min hmuh suh. " a ti hriam hraih, ka va melh a, min lo melh ve chiah. 

"Ka lungawi reng" ka ti leh sup a. Ka aw erawh a nem fahran lo. 

"Driver hna hi i thawh duh loh chuan i bang thei reng a nia" a ti chang leh fak a. Ka ding dawt. Melh run run chungin, "Eng nge maw i hriat le?ka lungawi reng" ka ti vin ve ta thak a. Makti hmel pu hian min rawn melh thung. Ka tlan zui leh nghal. Khaw thlen thlengin a tawng tawh lo. A mizia hi a no tih dawnin a ni bawk si lo, ka hrethiam tehnuai lo ve a. Tukthuan chu an health worker te inah kan ei a. Nupa reka khawsa an ni a, an felfai khawp mai. Ei khamah damdawi pawh chu kan thiar lut a. Kan thiar zawh dawn lamah hmuh ka duh hauh lo ka hmu ta a. Ka nu leh a fapa, rualbanlo te an ni. An fapa hi a kawng atanga hnuailam che thei lo a nih piahlamah a ban dinglam pawh hi a kawm ngul mai a. A upa viau tawh naa naupang ang mai a ni. He an fapa hi an buaipui ve nasa a, a fa dangte chu pasal neite pawh an awm. An te ber mipa erawh an bulah a la khawsa thung. Ani ka nu pawh chuan min rawn hmu a, ka en duh lo lui tlat. 

Doctori bulah, "I lo kal remchan lai hi ka lo chuh ngat ngat a. Khawngaihin ka fapa hi min ensak hram teh. Nizan zan lai vel atang khan a rawn kaih leh a, a luak nasa bawk. A ban dinglam phei chu a tiche ngam reng reng lo va, Damdawiin lama rawn phurh dawn pawn na a ti lutuk sia, tihian kan rawn zawn lut tawp mai a ni" mangan hmel deuh hian a ti mawlh mawlh a. Doctori pawh a tho vat. Khuma an muttir mek ka unaupa ti tawh mai ang, chu mi chu a va en fel a. A bp te checkin a ka te a han antir a. A mit te pawh a keusak bawk. Ka nu chuan engtik laiin nge ka bul a rawn thlen ka hre lo. Ka banah a rawn vuan chawt a. 

"Bawiha, i dam tha maw? Kan lo zin laiin i awm si lo va" a ti nem duai a. A kut chu phihthlaksakin, "Ka pi, ka va hre ngai lo che ve" ka ti ram hmak. A mitmenga na a tihzia ka hmuh chuan nuam ka lo ti thung. Min thlauhthlaa kan pafaa vakvai tura min phatsantu lakah hian mi tha ka nihna chhan tur reng ka hre thiam ve lo ve. Doctori pawn min rawn hmu vek. Kan boruak chu a uap nghal churh thei nia. 

"Bawiha, i nu ka nih hi, nangmah hringtu che. Engtin nge hetiang hian min tih theih?" Ka nu aw chu a ri chang chang a ni ber e. 

Health worker te nupa bakah bungraw thiar ve tlangval te chuan min melh thap mai. Doctori erawh chuan damlo chu a en leh mek thung. 

"I rilarah i fapa chu a pianhlim khan a thi tawhah ngai rawh. Ka nu i ni lo va, i ni ngai hek lo vang" ka duh aia naa tawng ka hlauh vangin ka chhuak daih. An hrilhhai ve khawp ang le. Ka lum pup pup a, zial ka tan ringawt. Darkar chanve dawn ka awm bo hnuah Doctori'n min lo call a, "I haw ang hmiang" a rawn ti dam thlap a. Aw pawh ka ti lo va, Aih pawh ka ti hek lo. Motor lam ka pan zui ta a. Hawn kawngah chuan kal lam aiin boruak a rit. Sawi tur ka hre hlawl lo va, ani lahin a hre bik lo nge a ngawi ve reng ringawt. Mahse, kan khua kan hnaih ta deuh tihah chuan a insum thei ta lo nge..thawk la hawkin, "Nu leh fa inkar chu a thûk asin" a ti ta a. Ka chhing sawk ringawt. 

"Ani kha i nu a nih chuan khatia ti tur i ni lo asin. Hun kal tawh chu engpawh ni rawh se" a ti leh nghat a. 

"Engmah i hre lo" ka ti tawi tak. 

"Ka hria..in khaw chanchin leh mihringte hi i rin aiin ka hrechiang ang" a ti leh khawl khawl a. Ka chil ka lem khawlh. 

"Kei chu a danglam alawm" ka ti hul hak. 

"Ka hria. Mahse,ani kha i nu a nihna a bo dawn lo. Thisena inzawmna hi chutimaia bo thei a ni ngai lo" a ti leh a. 

"Aw..a tawk..ninawm. Sawi ka duh lo" ka ti chang khak. Ka hmelhmaiah ka thinrim tih a hria nge ngawih a chuh ve ta daih a. 

Khua kan luh chuan, "Ih, i driver ka nia. Chuan khawngaihin programme hi min hrilh hma ve thei la ka lawm ngawt ang" ka ti a. A rawn ti thut zel a, ka inring hman thin lo a ni. A khi sak a, a nuih erawh a za vak loin ka hria. 

"Aw le tehreng mai. Weekend hi chu kan chawl thin ang. " a ti ve mai a. Kan inbe zui tawh lo. Hlimi ka tlawh zuai a, a night dawn lo bawk a, zan lama leng turin kan inthlah ta rih. In ka zu thleng thla chu an lo awm taih mai a. Ka nî hmel dur khap avang chuan thil dik lo eng emaw a awm tih ka hrethiam nghal. Ka luh rual rualin Tei'n min rawn uai hnawk a, "Mama, ka rilru a na lutuk" tih leh tah a rual nghal. 

"Eng nge thil awmzia? Khaw maw, Apui, nang han sawi teh" tiin kan te ber chu ka melh a. Nupuii lah a meng sen rûm mai si. 

Apuii chuan, "Nizanah khan U Muana leh U Teii te kha tha taka inthlah siin, tukinah U Muana nu ten U Teii bungrua an lo dah chhuak vek a. Nichin lawk khan kan va la ta a nih kha" a ti ta a. 

"Eng nge a chhan? Muana pawn rem a ti mi?" Ka ti vat. 

Nupuii a ri nghal phat, "Saw mi tlaw lutuk saw ek mai a ni. Engtinmah a dang ngam lo" a ti hlak hlak a. Thenawm khawvengte pawh an la awm nual a, thil thlen dan chu a duhawm lem loh hle mai. Ka han thut thlan daih hnuah, "Engvang berin maw Tei bungrua chu an dah chhuah?" Ka ti ta a. 

Ka nî chuan, "Ka hre mai mai lo ve a. Teremi te an inrawlh leh a niang. 'Nangni chhungkua nen inzawm kan duh tawh lo. Sawi a tam tawh em mai. Chuti khati' an tia. 'In duh ang tak chuan le' tiin bungrua chu kan va la ve tawp mai a ni" a ti chuar chuar a. A thinrim hle a niang a aw a khur tlat! Pa Rema erawh pa zaidam tih takah, "Aa..kan fanu pawn dik lohna tam tak a nei ve ang. Kan thiam vek bik lo e. Amarawhchu, nizana Muana nen engkim an sawifel vek tawh hnua hetia a tuk maia boruak an nei hi a intham lohthlak riau a, mahse, bungrua ber kan la tawh a. Ngawi zawka tan i tum ang u. Tei pawh vawikhatmah Muana i hmu leh tawh tur a ni lo vang" a ti dam thlup a. Tei erawh a ngawi reng. Muana ber mai chu nep ka ti riau! 

Zanriah kan ei laiin Muana nî a rawn lut hlawl mai a. Ani hi chu engmah thu nei ve lem lo, a u nupui nen inkhik khak ve reng an ni a. Kan lamah a tang tih ka hria. 

"Nizan khan Muana chuan Tei nen an inbiak dan kha a pate bulah a sawi a. 'Min indantir mai rawh u, Pathian zarah kan nghei bik lo vang. Amah Tei nen intithiam lova hetia tlan pawh a ni lo va" a lo ti ve niawm tak a ni. Muana nu leh Teremi an thinrim ta em em ringawt a, "An chhung chhungin indanpuiah an kherh che a ni maw? In hrang i chang a nih chuan an ni lam sawn thu an rawn nei vek ang. Kan inmihran nghal bawk ang" an ti ta chiam chiam a. Ka û pawn an nute pawh chu a zilhhau ve reng, Engvanga Tei hi haw em em nge an nih chu ka hre lo naa, hmannia in inbakkaih khan Teremi pasala nu khan , "Tei chuan a va sawi dik ve. Huaisen lawmman la pek tur a nih chu" a lo ti pek a! Kha kha Teremi leh a nu hian an ngai haw ta em em a ni. 

Muana pawh ka hau hrep a. Ani hi zawng eizawnna ngel nghet nei lo a ni bawk nen, a nu sawn a tithiam khawp a. Tei, ka vah chu ni tho mah se, i then hlen theih chuan a tha zawk. An sual chhungkua em mai" a ti bawrh bawrh a. Keini lam chuan eng em em kan sawi ve lo. 

Mizo society-a buaithlak deuh mai chu nupui pasal inneiha mi dang inrawlh tam lutuk te, unau mipaah a naupang ber tih avanga inpui luah tura kan ngai tlatte hi a niin ka hre ve thin. Mipa hi kan puitling lo em em bawk nen, Chhungkua atanga kan inzirtir ngun loh lutuk vangte pawh hi a ni. Fanu te chu thianghlim taka pasal neia pasal leh a chhungte tana mo tha ni turin kan inzilh a. Fapa te erawh nupui chawmzo leh makpa tha tak ni tura inzirtirna dawng hi kan tam em em tlat lo. Thawhchhuah neih loh chuan in chhungah thuneih ngam te hi a har talh tawh mai a. Nuthlawi pathlawi kan tam chhan pawh hi a bilha kan thawh tawh loh vang niin ka hria,. Teremi atang pawh hian a lang reng mai. A chhungkaw tan chuan fanu leh farnu tha tak pawh a ni mahna le, a monate tan erawh mo tha a ni hauh lo. Pasal neia hmeichhia an chhuak tawh a nih chuan mahni in lama thuneih va tum zen te hi chhungkaw inpaldarhna a ni a, nu leh pate lam pawn kan fanute hi helam hawi zawnga kan inzilhhau nasat a tha..Tei te pawh ni e, ka farnu a ni a, dik lohna a ngah ang, amah a zaidam zawk zawk bik lo nen. Mahse, pasala farnute thuneihna hnuaia mo reng chu kei mipa zawk pawh hian a nawm loh dan tur ka hriatthiampui ve tlat! Umm, inthen hlen rawh se. Muana pawh tisawn a nu fapa duat ni zel se la, Tei aia mo tha an nei em tih lo thlir zel phawt ang. 

Hlimi nen pawh kan inpawh sawt ta viau e. Amah hi a ngainatawm bakah sawi turte hi a hre phian zel a. Kei pawn ka duh ve sáwt hle. Hruaia lah hian mi chhaih zuk zuk reng a, mi hriat tam ka la duh vak lo asin mawle. Chawlhni tuk hi chuan kan buai ve mam mam zel. Ka nî lah hi eng tithei lem lo hian a lo khu ve ruai zel a. Ka insiam mawlh mawlh a, Nupuii nen kan chhuak rual. Puan bihte hi a thiam si lo, a bih sawi ang hê zel a. A patil lo va a zia tak a awm tho e. Hlimi pawh ka va hmu và mai. Doctori erawh ka zawng ru deuh naa ka hmu lo. Pathian demna thinlung kha a pai tlat mai si a, a inkhawm taima viau lo vang.Banah Hlimi chu thingpui in turin ka sawm ve a, Hruaia kamtam azarah ka nî te pawn an hre thawi ve tawh. Bakah hetia inpawh deuha inzui law law hi ka duhdan a ni. Hlimi pawh naupangchhia a ni tawh lo bawk a, a rawn peng ve mai bawk a. 

Apuii'n thingpui a lum a, Tei'n chhangban a kang thung. Hlimi te nen chuan an titi bawrh bawrh mai. Hruaia a rawn lut a, "Ruata, scooty i duh em? Lalmama'n a hralh phal asin" a ti lung lung a. 

"Pawisa awm lo" ka lo ti nghut. 

"A phal tlawm riau a nia. Eng emaw nikhuaa veivah nan pawh a tha alawm. Lei rawh" a ti leh tlat. A va buaithlak e aw. Ka ni chuan a lo bengkhawn viau a niang, "Hruaia, engzahin nge a phal a?" A lo ti ve chul a. 

"Ka chiang lo, 28000 chuan a phal mai ka ring. A la hmelhem vak bawk si lo va. Nu Lapui, Laksak ve ru" Hruaia chuan a ti hlut a. 

"Mampui, eng emaw nikhua atan hi chuan kan mamawh ve reng tak asin. Kan vawk hralhna man leh in saknaa kan hman ban kha chuan kan la thei ve reng asin" ka ni chuan a ti chuar chuar a. 

"Aa..chutia mamawh ngawih ngawih pawh kan nih loh hi..Pa Rema pawh rawn ve a ngai ang chu" ka ti a. Zêp nak emaw ka awt ru ve reng, Doctori motor lah ka kawl thei si lo. Nupuii chuan, "La ang u, ka khalh ang. Keiman" a lo ti! A va hahthlak thin e aw. Pa Rema te nen inrawn phawt chhuanlamin thutlukna chu kan siam ve leh ta ngawt a. Apuii chuan Hlimi melh chungin, "Innei u la..Mama nen hian" an ti teh ngawt bawk a! Ka farnute frank zia hi chu aw.

"Aa..min duh dawn mi?" Hlimi lahin a lo ti. 

"Duh rapthlak. I fel sia" a ti ve zel .Tei nen kan nui rah rah mai. Thingpui kan in zawh chuan Hlimi chu ka han thlah ta a. Kan han chhuak dun chu mi kan tawh reng reng chuan min melh hrek hrek ni maiin ka hria. Hmeichhia ka kalpui khát ve êm a ni. Kein kan chho dun ta ral ral a. 

"Thla thar lam chu kan khuaah hawn lawk ka ngai dawn a. " a tih chuan, "Kar khat bak thla thar nan hun a awm tawh lo" ka lo ti sup. 

"Chuvangin zantin i lo len a ngai tihna" a rawn ti sar sar a. Ka buk ve nghut kha maw. 

Reivaklo ka thu a, zan lamah ka leng leh dawn tho a tiin kan inthlah ta rih. Damdawiin tual ka chuang chhuak chiah tihin Doctori a rawn lang ve hlawl. A te fel leh át mai. A nui lo va, thinrim hmel erawh a pu lo. 

"Naktukah Kalna tur kan nei em?" Ka ti vut a. 

"Nei lem lo, pu ten min rawn tlawh dawn a. " a ti ve mai. 

"A nih chaw eitui le" tiin ka kalsan a. Min enzui vang nge ka tukhum a za mam mam mai. Zanriah ei kham ka haw ka nawh laiin, Hruaia a rawn lut leh a. Zanriah ei lai khan kan sawikhawm tawh bawk a, A lo tlawm remchang ve nen, la ve rawih ang u tiin thu kan titlu kha a nia. Hruaia chuan Lalmama a be nghal a. Lalmama pawh a rawn kal nghal. Scooty ka kawl ve thei ta chu a ni reng mai. A lawmawm e. Hlimi rim turin ka chhuak a, khalh pawh a nuam viau e. A lo inbual zo ve chiah a, a fresh khawp mai. 

Thingpui a lum laiin a phone a rawn ri a, thutphah bánah a dah remchang nen ka va bih ve a. 'Hubby' tia a save hnen atangin call a dawng! Min deng ve dawt mai. Hubby tih awmzia hre lo rual ka ni bik si lo. Mak ka ti tho bawk si. A ranga rangin a phone chu a rawn la a, "Tunah chuan ka laklawh rih, nakinah ka lo bia ang che" a ti nghal zung zung a. Ka lo thu ngawi reng. Kan boruak a nuam ta hauh lo mai. A inzep zo ta lo nge, "A number ka la save tha lo a nih kha. Ka ex a nia, min la rawn be reng zel a..ka ning thei tawp" a ti ta a. 

"Block mai la" ka ti chhum hmak. 

"Awii number dang atangin a rawn ti zel tho. " a ti nghat a. Sawi tur a vàng ta hle. Ka thinrim a hlauh vang nge a inthlahrun vang ni maw, mi rawn kuahin mi chul thuak thuak a. Ka biangah te chuan a rawn fawp leh zauh thin, "Tau tawh lo la..umm, duh leh amah pawh i be dawn nia" a ti seuh seuh a. Ngaihzawng nei ngai lova thucháng, zep loh chuan amah pawh i be dawn nia a tih avang khan ka lo ring leh ringawt tawh. Tawnhriat ka nei lo êm a tin ni. Mi kuah seuh seuh takah chuan ka nêm ve leh ta duam a. A fawh pawh kan infawp nasa , kan free bawk si. Duh aia thui kan kal dawn tlat! A thutthleng seiah chuan min pawt thlu a, ka zuk bawh titih. A zei si, mipa ka ni ve miau bawk si a, thisen chu a lum tan ta khawp mai. Kan thaw pawh a rang dun viau. A hnute pawh ka thám nawk nawk a, engkim mai chu a hminsa vek, a mitmeng pawh a dava riai tawh. 

"Hlimi" ka ti sup a. A rawn meng si sap a, engmah sawi loin ka hmui a rawn fawp zui nghal. A inpeih tih hi ka chiang ve tawp. Tumah hi zirtir kan ngai hran lo bawk a, kei pawh rilru a nu tawh nen, chet lak ka tum zui ve ta hmiah. Mahse…

Kawngka chu a rawn kik ta tlat mai! A va han hun lo lulai tak êm. Hlimi rum nghat pawh ka hre thei. Ka thu chhuak a, ka insiam tha sawk sawk. Hlimi pawh chuan a samte chu a tuai mam sawk sawk a, aw lawi deuh hian, "Tu nge?" A ti a. 

"Keimah Saidingi, Ruatpuia a awm em?" A rawn ti ta mai a. Hlimi nen kan meng phawk dun teh e. 

Kawngka chu a va hawng ta rak rak a. 

"Ka lo tibuai che u a, pawi ka ti. Zawlsei-ah emergency-ah kan kal a tul tlat mai. Call i la thei si lo va" a ti fiah kák a. Ka lo zak deuh. Kan hmel landan a phelh phang awm si a, a hrethiam vek dawn si. Tui ka in khawlh khawlh a. "Aw kal ila" ka ti tham tuak a. Hlimi sama tuai zauhin ka mangtha a, kan chhuak zui nghal. 

"I nau kha a nia. Mangang takin min lo call a" khua kan pelh hnuah a ti sep a. Inthlahrung hmel a pu. Min rawn tibuai kha nuam a ti vak bik lo a nih hmel. 

"Ka nau a ni lo" ka ti chang fak a. A rum nghat, "Mood chhe takin hmachhawn suh ang che. Pa takin" a ti leh hmiah. Hmalam a melh ran bawk a. 

"Chu zawng ka duhthlanna a ni" ka ti ve zel. Dik tak chuan a rawn kal hun lo lutuk te, ka nu fapa vangte chuan ka mood a chhe vek. Ka nui lui thei ngang lo. 

"I chapo hle mai maw?" A ti dat a. 

"Ka nu leh keima inkarah kher hi chu tumah an inrawlh ka duh lo. Tum buai duh suh" ka ti rum ûl a. 

"Vanruatpui,.khatia min be ngam tur kha niin i inhria em? " a ti tuar. Ka phu zawk nghe nghe. 

"Ka boss chu i ni ngei mai. Ka mimal nun chu ka duhthlanna a ni" ka ti hriam hraih a. Hmalam ka bih ngur bawk. 

"Aw le, a tawk e. Bang ang che. Naktuk atangin rawn kal a ngai tawh lo vang" a ti hul hak a. Ka chhang tawh lo. Ani hi huatna chhan tur chu ka nei hauh lo, mahse, ka hun liam tawha ka thutlukna leh ka hun tawn tawhteah thuneihna a nei tlat lo. Duh leh ka bang anga a ni mai. Zawlsei kan thlen thlengin kan inbe zui tawh lo. Min hringtu hmeichhia te in lam kan pan zui a. In chhungah ka lut ve duh lo. An lo menpui ve nge an lo awm nual a. Ka thu ve ta ringawt. Doctori chuan a tihtheih chin a tlem tih hriain Aizawl a refer a, mahse, kawng lakah an buai a hlauhawm si. An rilru chu a buai ve khawp ang le. Kei erawh mumal lo zetin ka hawi ka hawi thung. Darkar khat hnuah an ri ta hak a, tap thawm a rawn chhuak nghal bawk. A chatthla ta nge nge a nih awm chu! Lehlamah dam ve reng kha a hrehawmna khua a sei mai mai, amah hmangaihtu te chuan uiawm viau mah se, duhsaktu tan pawh kal zawk mai se tihna kha a awm ve tho ang. In chhung an singsak laite chuan an kawmchhak verandaah ka lo ding daih. Hlimi lah a reh hmak a, ka be hmasa duh bik si lo. Reivak loah Doctori pawh a rawn chhuak ta a. A paw leh phek tawh. A vun hi chu a nalh thlawt a ni. Ka zuk pan vat a, "Kan haw thei tawh em?" Ka ti nghut a. Na zeta min melhin, "Aw" a ti hmuk. Kan tlan chhuak nghal a ni mai. Ka tlan muang vak lo. 

"Ruatpui, mihring i ni em?" a tih riah chuan ka ngaihtuahna atangin ka harh nghal . Hmel ngui takin hmalam a melh a. 

"Ramhuai chu ka ni lo alawm" ka ti mai a. 

"I nu sawn a hmangaih che asin. Engkim min hrilh vek,. A thisen a hrin a fapa i ni. A mamawh che asin" mittui tling piau hian a ti ta a. Ka ding hráwk. Chiang kelhkawlha amah chu melhin, "Duhtawk rawh. Saw hmeichhe chanchin saw ka ngaithla peih lo. A tha em? Min hmangaih nise ka pian hlim khan puan hlapa min tuama ka pa kuta min pe lo khan a hnute tuiin min chawm ve ang. Ani saw ka tan engmah a ni lo. Engmah" ka ti tuar tuar a. Duh aiin ka aw pawh a ring. 

"Ni lo, i hmangaih nang pawn..khati khawpa natna siamsak theitu che kha i hmangaih a ni. Ka sawi dik tiraw?" A rawn ti leh hram a. Na zeta melhin, "Saidingpui, a tawk viau e. Ka boss mah nila duhtawk turin ka hrilh a che. A chiang em?" Ka ti vawt ta raih a. Ka landan avang nge ka tawngkam vang zawk a ngawi hmak mai a. A mittui erawh a la tling pam mai. Chak zetin ka khalh a, a hlau nge hlau lo tih pawh ka ngaihtuah tawh lo. Ka nu pawh chuan engvangin nge he nu bulah ber kher a lo sawi ni..eng chhuanlam mah ka pawm ve lo ve. Na taka ka pa thinlung hliama phatsantu hian eng chhuanlam tling mah a nei ngai lo vang. 

A chhuk dawn chuan ka mitah tak min rawn melhin, "Ruatpui, a chang Thudik hi rahbeh a nih vang maiin dáwt a ni ngai lo a nia. Inenkawltha ang che. " a ti dam thlap a. A nui lui bawk. A hmel lan dan kha zankhua deuhthawin ka suangtuah zu nia! Mi maknu hi a!! 

(Comment uar ang aw)