Dr. saidingpuii (1)

DOCTOR SAIDINGPUII..

(1)

Ziaktu: Toni Rálte

Ka ní rawn lut chuan a chawhmeh zawrh ban ho dawhkana dah that pahin, "Mampui, Kan doctor tharin driver tur a mamawh tak kha, dil ve ta che" a ti chuar chuar a. Ka bawkbawn chan lai chawl meuhin, "Doctor thar kan lo nei a ni maw?" ka ti hú a. 

"I tuallîm lo lutuk a, engmah i hre ve lehpek lo a ni maw? Nimin khan a rawn join chiah a niawm e. Sawtah Pi Hlimi ten driver a mamawh thu an lo sawi a, Ruatpuia khan dil ve rawh se an tia..dil ve la a tha ang" a ti leh mual mual a. Ka ní hi chu tawng muang chi, tawng chuar chuar chi a ni reng a. A hmanhmawhthlak thei a nia aw. A tawng chhung zawng ngaihchan chu. 

"Mahse, dil an tam ve riau lovang maw?" ka ti a. 

"Aa..vcp pawh insawipuitir dan a awm ang, I pa Rema'n bia se la" a ti leh a. Ka tui chhuan a so vangin ka bawkbawn bai tura ka chansa chu ka thlak sawk sawk a, Ka ní pawh a puan pho seng turin a chhuak leh nghal vut. 

Vanruatpuia ka ni a. Ruatpui tih chu min kohna a ni. Vanlaia tla êm chu ka ni lo naa, fahrah erawh ka ni ka ti lo thei lo. Sáwn ka ni a, ka nu hian thla 3 min pai hnuah a chhungte tihluihnaa tihtlak min tum a niawm e. Mahse, doctor ten ama nunna atan ngei pawh a hlauhthawnawm avangin an titla duh ta lo va. Loh theih loh vangin kei chu ka lo piang ta a. Ka pa hian ka nu te in lamah palai te pawh a tir ve sasawi naa, Ka pa te chu kan khua angah a berh pawl, a rethei pawl an ni a. Ka nu te erawh dawrkai an ni a, a awm thei pawl an ni a niawm e. Chuvang chuan ka nu pa Pu Thanghrima hian ka pa chu a hnar fithla thak a ni. Ka nu rilru pawh hnehin, an hmin ta vek a. Ka pa chu a hlat ta telh telh a. Tichuan, Damdawiinah pawh min nei lo vin an inah nurse an ko chúk chúk a, min hring ve ta hlawl mai. Ka nu hnute ka hnek hma hauhin Pu Thanghrima chuan puan hlapa tuamin ka nu nau ka nuteii chuan ka pa te hnenah kei chu min va dah ta a ni. Chutiang taka min duh lo va min hnawltu an nih takah chuan ka pa te lam pawh an rilru a na ta hle a. Ka pa thinrimin va luhkhung a tum hial nghe nghe. Mahse, ka ni te hoin an dang bet thei hram a. Kei chu tuna ka awmna ka nî hian min chawi seilian ta a nih chu..sawi leh sawi hnu ka pa nu leh pate hi an damrei lo lulai êm a, ka hmu ve hman lo. Ka pa te hi unau 3 lek an ni a. Ka pa hi an upa ber a ni ve a, a nau chiah hi min enkawltu an farnu neihchhun ka ni chu a ni a. An pang ber patea hi Pathian zarah Aizawl lamah hna chhete hmu vein a nupui fanaute nen an khawsa ve mek bawk a. Ka pian lai chuan patea chu rawlthar lek a la ni nghe nghe. Ka ni chu nulaa chhiar ve theih a ni tawh a, mahse, kei a vahpa min enkawl a ngaih tak si avangin Kohhran leh Khawtlangah pawh a duh angin a inhmang thei ta lo. 

Bawnghnute hi kan khuaah sawr ve an awm a. Chu chu an la ve ta tawp a, bawnghnute ringin ka thang chho ve ta a ni. Ka pa kha a tlangval laia tlangval chak leh taimaa sawi a ni bawk a. Ka tetlai chhung chuan rethei tho mah ila ka pa zarah chhuanchhamin kan awm ngai lo. Patea a rawn chhawrtlak chho ta bawk a. MAhse, ka pa chu upa ber tih takah Patea talin sawrkar hna a thawh ve a duhsakpui em avangin Patea huphurh chung chung Aizawlah mi ina awm chungin School a kal a. Patea pawh hian harsatna a tawk nasa ve hle a ni. Ka ní chu nula a ni ve bawk nen, amah a hmelchhe lo va, duhtu a nei ve neuh neuh thin. Keimah vangin a hnar zel thin a. Kum 10 ka tlin ve takah chuan ka pa chuan ka ní a lainat tawh si nen, Tuna a pasal Pa Rema hi nei turin a nawr ta a. Pa Rema pawh kan level ang tho, hausa le lu an lo ni bik lo bawk nen. Ka ni chuan pasal min neihsan ta a. Ka pa nen kan khawsa dun ta rak rak mai. A tawi zawngin sawi ila, ka nu te lam nen chuan kan inhnimhnai lo kher mai. Ka ni hian, "I nu tal chu hre ve rawh" a tih vang chauha ka nu pawh hre ve ka ni. Kan inbe ngai lo va, an in lam kal chu thih hrehin ka hreh thin. Kum 4 ka nihin ka nu chuan pasal a nei a. Kan khaw thenawm atanga rawn awm, Kan PHC-a clerk hnathawk a ni. Min nghawng vak lem lo. Ka pa nen kan khawsak dun atanga kum 2-naah ka pa chuan chaw helh a ching chho ta riau a. Pum damdawite pawh a ei ve nasa. Kei Zirna ka chhunzawm a ngai ve bawk nen. Duh angin ka buaipui tha thei meuh lo. A insawisel ta zeuh zeuh a, thawk lakte a harsat a, ka ni mangangin incheck up turin Aizawl a panpui ta rawih a. Thla a phang duh hle. Ka hlauh ang ngeiin ka pa chu chawkawng cancer a lo ni a! A result ka hriat nia ka tah nasatzia tak kha aw. Ka thian, ka classmate te pawn min tahpui ve vek a ni. Kan zirtirtunu fel deuh miss mahlimi pawh a muttui a tla nasa khawp mai. Ka pate chu an lo haw a, cancer a ni tih a inhriat avang nimaw ka pa chu a cher nghal kuam mai a. A thu that bawk. Patea pawh a rawn haw ve nghe nghe. Ani chuan BA a zo fel tawh a..hna a zawng ve mek a ni. 

Hun harsa leh khirh tak kan hmachhawn chho a. Engkim kha a thim a ni mai e. Kan rethei bawk si. Ka pa chemo khaina tur takngial pawh kan nei zo si lo. Ka ni te nupa leh an fanu Mami te pawh an rawn awm phei tawp mai a ni. Pa Rema hi a felin a puitling em em a, a thawhchhuah kha kan ring a ni ber e. Tichuan, ka pa chu cancer a ni tih a inhriat atanga thla 5-na ni 13-ah a boral ta a. Kan inenkawl rei tawh vangin ka lo sun làwk rei tawh a. Ka tuar na em em tawh lo zawk. Kum 13-na ka hmang mek a, class vii ka zir lai a ni bawk. Ka pa khan nikhua a la hriat lai khan ka nite leh patea te bulah, "Sanga (ka patea) chu tihian Aizawlah in luahin a la khawsa thei a. Lapuii te hian in leh lo an la nei lo bawk nen, Bawiha an enkawl a ngai tho bawk si a. In puiah hian khawsa mai se. In hmalam hun zel tur erawh Rema leh Sanga te inbiakremna a ni mai e. Sanga pawn hna a hmu a nih chuan Aizawl lamah inbengbel se la, hetah chuan changkanna tak tak a awm thei lo. Engpawhnise, a nu duh loh ka fapa hi Pathian hmingin tha takin min lo enkawlsak hram ang che u aw" tiin thu a chah thlap a. Ka pate unau hi an tlem bawk a, an inhmangaih ve em em a. Patea pawn in pui chu a ta tur anga ngaih ni mahse, ka pa thu chu a pawm hmak mai a ni. Tichuan, ka nite chhungkua nen kan khawsa ho ta zel a. Ka nite hian fanu pathum an nei a, fapa an lo nei lo bawk nen, min duatin vuivaina tur pakhatmah ka hre lo. Pawl 10 kha ka pass ve hram a. Patea'n Aizawlah zirzawma an hnena cheng turin min rawn chah a. Pawl 12 thleng chu Patea te in atangin ka han kal ve a. Mahse, zep nák emaw patea nupui te chhung lam hi awmpui an nei ve tho va, kan inlal hleih êm vangin nuam ka ti lo. Ka lung a leng thei bawk si. Exam zawh tukah ka haw nghal. Kal leh tumna ka nei tawh lo. Ka result erawh ka hre ve hram a, 2nd div-ah ka pass ve. Kan khua Darpuiah ka inbengbel nghet ta a. Chutia awm teh tlawng chu tiin Pa Rema leh ka ni ten kan thenawm pickup chu zui ve turin min ti a, ka zui ve ta lauh lauh a. Ka chemkalna lam a lo ni nge, kar loah ka khalh thiam ve ta mai a. Kan VCP pu Lawmkima te LPK ka khalhsak ta a. Kan khua hi PHC hial awm ve theihna chu khaw te kan ni lem lo. YMA pawh branch 3 lai a awm ve a ni. VC erawh pakhat kan nei thung. Chutiang chuan motor hmang chuan kan ei khawp te chu ka thawk chhuak ve ta a. Ka hlawh hi chu ka ni kutah ka hlan vek thin. Ka vannei a, ka dinhmun hriain leh ka ni te min zilhna avangin meizial ka zuk bak chu ruihhlo lamah ka tlan ve lo hlauh a. Zu pawh ka in ngai lo. Ka phak ang tawkin ka hun neih ve lai chuan Kohhran pawh a rualpawl tawk chuan ka bel ve thin. Hun thawl hi kan nei lo thin êm zawk a. Khawtlang lamah pawh chhiat thatah chuan a rual pawl tawk chuan ka tel ve zel bawk. 

Mipa vantlang zet zawt, 6'1 ft ka ni ve a. Ka hàng chhe lem lo bawk. Ka nu ka chhun a, ka thau lem lo bawk. Hmeltha min ti tawk leh mitmei min hmuhte hi chu ka tawng ve fô mai. Mahse, ka dinhmun avangin eizawnna ngelnghet leh innghahna tlak ka neih hma chuan ngaihzawng lamah rilru ka pe hleithei lo. Tun thlengin ka la virgin bawk. Thenkhat tan chuan ka nep ru viau awm e. Mahse, ka dinhmun ngaihtuaha sual kawng zawh lova, ka phak ang tawka thatna lam ka kai chu ka lawmin ka inchhir ngai lo. Han hmelduh deuhte pawh ka nei ve thin..Sawi tawh ang khan ngaihzawng ten a ruka an zahpui nih ka hlauh luatah ka insûm leh thin. Nikum kum lai hawl khan kan lo inkhawl ve tauh tauhna bakah insak tanpuina kan hmuhin in kan sa ve thei hlauh mai a. Mi te anga mawi leh tha ni lo mah se, kan lawmin kan hlim ve khawp mai. Ka farnu te hi an rual bawk a, anmahni an lo felin thenrual kawm an thiam bawk nen, inleng an ngah ve dar dar thin khawp mai. A upa ber Tei hi kumtir lam khan kan khaw thenawmah pasal a nei ve ta a. A chhang chiah Nupuii leh kan te ber Apuii te kan ni tlawng tawh mai. Apuii hi a hmeltha bawk a, a luck ve reuh khawp mai. Nupuii hi chu "Mipa tur hmeichhiaah a piang" tih ang tur chi, pa thûng mai a ni a. Ngaihzawng pawh a ngaihsak lo khawp mai. 

Ka motor vawn lai kha VCP te khan thla hnih kalta khan an hralh ta daih si a. Ka hawihai viau. Han khalh leh mai tur ka vàn si a, Ka nî ten min nawrseh tak reng avang chuan Kan doctor thar, a hmuh pawh ka la hmuh loh motor khalh dil tur chuan ka chhuak ta poh a. Min lak kher pawh ka ring vak lo, Kan khua angah chuan kan langsar lo ve nasa bawk si. Zám ru angreng takin Damdawiin chu ka thleng chho a. Zaua leh Nuna an lo thu ve khur a. Driver hna chu dil an lo tum ve reng a lo nia. Zaua phei chu a senior tawh nasa mai si a, a lak ngei ka ring. Ani pawh a confi khawp mai. Doctor office lamah kan phei a. 4th grade, Nu Thangi a rawn chhuak a, min hmuh rual chuan min kai hrang a. "I hming ka lam nasat kha, a la ngei ang che" a ti sur sur a. Nu Thangi hi ka ni nen best friend an ni, chuvanga a theih ang tawka min duhsak ve em emtu a ni. 

"U Zaua te saw an senior sia" ka ti ringawt a. 

"Zu an in alawm..a duh lo sa" a ti liam puat a. Doctori room lamah chuan min nam lut ta a. Chair vir theiah chuan hmeichhia ka hmuh tawh azawnga ngo ber mai, te reuhtê hi a lo thu kàk mai a. A sam chu a dum hlap a, chalsam a nei bawk. A mitmeng erawh a lian reuh zek a. A zahawm ru riau mai. A nui lo va, nui se a nelawm reuh ngawt ang. A hmaah chuan kan thu thap a. Min melh kual dan dan mai. A zámawm ve lek lek nia! Chutah a aw thian kharhin, "Vanruatpuia hi ka lo la ang e. An khawsak dinhmunte ka lo hria a, mi dang chuan in lo hrethiam dawn nia" a ti ta a. A aw chu a chher tep, a thám zawk em mawni. Kei chu ka thêp suai suai mai. U Zaua te pawh lungawi lo hmel an pu hran lo. Kei aia senior an nia, motor khalh turte chu an la hmu leh dawn tho bawk a. 

U Zaua te chhuah hnuah min la chelh khawtlai a, "Thil hautak vak tur a ni dawn lo va, amaherawhchu, naktukah khaw thenawmah vaccine pek a ngai dawn a. Kan kal nghal a ngai dawn a ni. Zing dar 10-ah i rawn inpeih dawn nia. I kal thei e" a ti a. Vawikhatmah ka tawng ve lo. Sawi tur ka hre lo, mi tawng tlem tak ka lo ni kher bawk nen. Kan doctor hming kha tu nge kha aw? E! Ni tak, Saidingpuii a ni tak e. Kei ai chuan a nau maithei, a ngo ver reuh avang khan a kum aiin a lang naupang pawh a ni thei bawk. Ka nî te bulah chanchin ka han sawi a, an lawm thiam khawp mai. Hna hahthlak tak a ni lo bawk a, Ka hlawh tur zat kha a sawi miah lo va. Tlem chhe tak chu a nih ka ring lo. 

Nupuii'n, "Mama, Bem keuh la, Monu doctor kan nei keuh dawn alawm" ka inbual dawn chuan a rawn ti zauh a. 

Nuih suk pahin, "A te reuh êm mai. A thinchhia ang" ka ti daih. Nia, hmeichhe te lam hian an thin an awrh tlangpui. Ka pi thar chu hrawn hrehawm tak ni lo hram teh se. Zanah pawh hian ka leng chhuak vak ngai lo. Thian ka kawm tam em em bawk si lo nen, ka naute inleng bulah hian ka táp ve hruih hruih zel a. Zanin erawh kan thenawm Hruaia'n lenpuiah min rawn sawm tehmial a. Kan doctori rawn thawh hma khan nurse thar a rawn awm a, Doctor pakhat leh nurse pathum, 4th grade pahnih ten min vil mek a ni. Chu nurse chu hmuh pawh ka la hmu lo, Hruaia chuan rim a rawt tlat mai si. Hnial dan tur vak hre hek lo i, ka zui chhuak ve ta poh a. Nurse chu damdawiin tlangah quarterah a awm ve a. Thleng a lo sil mek. Hruaia nen chuan an lo inhre sa tawh nge an inbe nghal siam siam a. Kan doctori ai khan a lianin a hleitling zawk a. Mahse, a háng deuh zawk. Hmeichhe hmelchhia erawh a ni lem lo thung. A hming chu Hlimi a ni. Serchhip khua a ni.Kan inrual vel maithei. A felin min be siam siam mai. A quarter chhak lawkah kan doctori quarter pawh a awm ve. 

Hruaia chuan, "Tu nge zaninah night dawn?" A ti a. 

Hlimi chuan, "Rengi a nia. Damlo kan nei lem lo va, tun lai chu a zia" a ti siam siam a. A aw pawh a fiahfai khawp mai. Mi rawn melh zauh a, "He lamah hian i vàng ve ngawt mai" a ti sap a. 

"Lo kalna chhan tur a vang ve em alawm" ka ti ringawt. Hruaia chuan Doctori driver ka nih tur thu a sawi a. Hlimi chuan, "Kan doctori hi a tet ngaihtuah hian a mi uap a na reuh tawp. A nelawm vak loh. Mahse, thiam thuah chuan a thiam viauin ka ring. " a ti a. 

"Nia, a thinchhiat hmel ka ti. Kan inhrawn thei ang e maw le" ka ti sup a. 

"I fel a, i thei mai ang. " Hlimi'n a tih chuan ka nui hawk a. "Fel teh nang" ka ti liam puat a. Kan thu ve ta reng mai, Hlimi chu rin aiin kawm a lo nuam a, thingpui a lum tui viau bawk. Dar 9 velah hawn tuma kan intihtuah laiin Damdawiin tuala ri deuh laih avang chuan kan tawi khawmuang a. Tap thawm niawm takte kan hriat avang chuan kan han chho ve ta a. An lo awm nual mai. Thil awmzia kan han zawh chuan, Vengthlang lam rawlthar Lalrova kan tih mai leh LPK an lo insu a niawm a. A ke ruh a tliah bakah a lu atangin thisen a chhuak nasa viau a niawm e. Amah a chau riau bawk si, a chhungte leh thenwm khawveng ten an rawn kalpui nghal a lo nia. A nu chu a tap deuh par mai. A zia lo hle mai. Doctori pawh a quarter atangin hmanhmawh takin a rawn tlan thla a, a mu tawh nge mawni pyzama lian hnek hnuk leh tshirt simple zet mai nen a ni. An ko hmanhmawh ve bawk a, a rawn tlan nghal a nih ka ring. Rova chu a va en vat vat a, a lu chu thui turin nurse a hrilh a. U Rengi hi kan khaw PHC-ah chuan thawktu senior ber a ni tawh. Kan khaw thenawm Zote ami a ni a. Nuthlawi phanchang zet tawh, kut dam em em mai a ni. Rova lu chu an thuisak nghal mawlh mawlh a. A ke ruh tliak erawh doctori chuan a han hmet vel a, Lalrova chu a rak leh tuar thin. Na a ti takzet tih a lang reng mai. Doctori chuan them a dawhsak ta a. A tuk lama zai a ngaih tur thu leh damdawi chah a ngaih thute a sawi bawk. Damlo bula a awm dan leh mi dang bula a awm dan chu a danglam daih. Damlo tan chuan a duty a hlen tha khawp mai, tawngkam nêm tak hmangin thlaphang lo turin a fuih thlap bawk. Ka lo chîk deuh nge ka lo en reng a niang, min rawn melh zauh a. Ka mit ka la sawn rang kher mai. Mahse, "Ruatpui, naktuk kha kan thulh mai a ngai ang. Hei mi zai tur ka nei si a. I lo hre mai dawn nia" a ti a. Thupe aw a ni leh daih tawh. Ka bu nghut ringawt. 

Dar 10 dawn Hruaia nen Rova te chu kan han thutpuiin kan han awmpui ve renrawn a, a chhungkhatte an tam tho bawk a tiin hawn lam kan hnaih ve ta a. Hawn kawngah Hruaia chuan, "Hlimi kha bem la..nang hi bialnu neih i ngai tawh aw" a ti zuk zuk a. Ka hrilhhai letling. 

"In ni na nge?" Ka ti he haw a. A nui hawk hawk, "Kei nente chuan chhungkhat angin alawm kan in en. Kan hnampui a nia, min rawn tlawh chhuak thlap alawm. Chuan a star che a" a ti ta a. Tlemin min thawng ve deuh. Hlimi chu zaninah ka hre ve chauh kha a ni sia. 

"Min hria mi? A hmain" ka ti a. 

"Sundayah khan a hmu che a. I hmingte min zawt a, in inte pawh ka kawhhmuh alawm. 'Ka star e' chu a ti lo naa, 'In khuaah chuan a langsar pawl a nih kha' a ti che a. A star che tihna" a ti ta duah a. 

"Hmm..a fel khawp mai. Amah kha chu..mahse, ngaihzawng neih hi ka thiam ka ring lo" ka ti ta tawl a. Min nuih tiah tiah mai. Ka rilru dik tak ka sawi reng sia. Nia, ngaihzawng pakhatmah la nei lo ka nihna hian min ti confi hleithei lo a ni ber. Tlangvala pumpa min duh der vetu te ka lo duh ve mai ta lo kha ka inchhir tan deuh. Hmeichhe ten mipa zei an duh ve sia, ka zei lo hu hu dawn êm asin. 

"Thil chu a thleng chawp ve zel mai alawm. Nupui atan pawh iaiawm loh deuh a ni. An hlawh nise a tam tawh si" Hruaia chuan a ti a. 

"Chutak reng, kan dinhmun a inthlau e" ka ti nghut a. 

"Tunah te chuan in kán ve tawh êm hi.. Insit lutuk suh" a ti a. A sawi dik ve tho mai. A hma ai chuan káng ve tawh tak kan ni. Kan lo puitling ve ta deuh bawk a. Kum 27-na ka hmang mek a. Thingtlang khuaah chuan tlangval tak tak kan ni tawh. Kan intinula tlangval hma lo thei lo a ni. 

Ka zan mutnaah Hlimi hmel kha ka mitthlaah a lo lang a. Nula hmelchhia chu a ni mawlh lo mai. A felin min kawm dante kha a thiam riau a, zep nák emaw ka ngaihzawng hmasa ber atan chuan iai lo tak ka ni. Iai a hnekin phu lo ka inti zawk. Mahse, chet lak dan tur ka hre hauh lo. Amahin hma a rawn lak ngawt loh chuan..Hruaia hi la zawh tur a ni. Ani hi chu hmeltha lem lo mah se, hmeichhe cheng a man riau a. Bialnu a nei tha thei phian zel. Kan khaw tlangval tlawmngai a ni bawk nen, a rukin a to ve tlat! Tiang chuan hmabak nei tha inti zetin ka muhil ve ta a. 

A tukah chuan kan hna a khaihlak ta si a, engmah tih loh ngawt ai chuan tiin kan huan lamah ka kal ta a. Thang hi ka kam ve thin a, silai lam hi chu kan nei zo lo bawk nen, ka leklam tehchiam lo. Ramvachal tia sawi theih ka ni lo,. Ka kal lamah chuan ka hmaah ka nu nutapa Pu Zaia te nupa an kal ve a. Ka umphak duh lo lui tlat! An ni chhungkua nen hi chuan kan damchhunga kan inzawm ka ring lo. Khati taka min duh lo va ka pian zan la la a min kalsantu te thisen ka kai pawh hi pawi tih tawh nak alaiin ka ngaihdam theih hi chu ka ring lo hul hual. An kal muang angreng si a, lehpelh mai ka duh ta a. Ka aw ka thian kharh a, an rawn hawi rang kher mai. 

"Ka lo kal hmasa mai" tih leh an inkara tlakzeh ka rual a. Ka lehpel ta. Pu Zaia nupui Pi Hriati chuan, "Ruatpui, nangmah i ni maw? I nu te pawh an lo zin kha" a rawn ti a. Ani hi chuan khawlaiah pawh min biak zauh zauh a hrat. Ka nu chhungte a ni ve lem lo bawk a. Ka be chhe ngai bik lo. Mi pangngai tak chhungkua atanga zi chhuak kha a ni miau a. 

Ka hawilet zawk a, "Nu ka nei hleinem" ka ti ram hmak. Pu Zaia chuan ka nu leh anmahni ka ngaihdan hi hre ve hrim hrim se ka duh vang a ni. Pi Hriati pawn min hriatthiam tho ka beisei. Ka kalsan ta vang vang a, an sawi chhunzawm maithei a ni. A ho em mai. 

Huan ka thleng a, kan huan hi ka pa khan a dam that ve lai, sum a thawhchhuah ve theih lai khan kan khaw pa ,Pu Hrima te pem turin an bel tawp mai kha a nia. A man zat tak erawh ka hre lo. Khua atangin 1km vel lek a ni a, rin aiin a zau bawk. Tui lakna a tha bawk si,. Pa Rema hi huan lama tui a ni bawk a. A cheihnûm peih hle. Kuhva, Balhla, nimbu bakah thei chi hrang hrang kan ching ve a. Kuhvarah phei chu kan hralh ve nual tawh. Nimbu erawh a tui kan sawr a, lei mai theihin inah kan kawl reng a ni. Motor ka khalh tak avang khan ka tlawh zen zen thei lo va, motor khalh bansana huan lama inpumpek mai te pawh ka duh ve rum rum thin naa ka ni hian a phal meuh thin lo a ni. Lehlamah huan thlai pawh a hralhna lamah buaina hi a awm ve lehzel bawk nen. Engtikah emaw chuan dil siama ar emaw vawk emaw vulha huan lama khawsak daih ka la rilruk tho a ni. A nuam dawn êm asin. Thlamah ka lut a, ka in dahfel hnuah iptepui akin thang en tur chuan ka chhuak leh ta a. Thlam bulah hian tui tui kan tih mai chu chu kan khawhtir a, tui tui tih takah a tui riau, hah hi a dam sawng sawng zel mawle. Huan mawng lamah ka chhuk a. Sahdàl leh beái ka kam a. Sahdál ka en hmasa zawk a, Ka khi sak mai. Vahrit a lo awk reng mai. A thihna a la rei lo tih a hriat mai. Lawm zetin ka ak a. Beái thangah erawh ram parva a lo awk ve a. Ka nî hi chawhmeh engilo zuar reng renga khawsa tih takah hralh atan a ît leh ngawt ang. Mahse, ka hralhtir dawn lo. Ei ve a chakawm tlat. Thlamah ka chho leh a, thlam thlang hnim ve deuh lai chu ka thlo thuak thuak a. A la hnim lutuk lo va, Hlawhfa hi kan ruai ve mai zel tawh a, Engtin tin emaw kan ruai ve thei mai zel. Huan hi chu amah leh amah a intum ve thei deuh tawh bawk nen. 

Thlamah lutin thingpui ka chhuang a. Nupuii min paitir chhangthawp nen chuan ka hmeh ta a. Ril a la tam em em lo. Namthlaka thu chung chuan ka phone ka'n khawih ve mai mai a. Phone te hi khawih tam lo ber pawl ka ni awm e. Games ka khel peih si lo, mi han biak vak ka nei bawk si lo. Groupah lah ka tawng ve ngam vak bawk si lo, ka nei ve tawp mai a ni e. Msg pakhat number ka save loh atangin a lo awm ran a. Ka open vat. 

"Keimah Hlimi, ka number hi lo save ve la" tih a ni. Ka nui var var mai. Ka save nghal hmak. 

"ka save tawh e" tiin ka reply ve hram. 

Eng tak ang zel ang i maw..kan huan sira Khuangthli kungah chuan Tlaiberh rual khat an rawn fu a, an hram nak nak mai. Ka lung a tileng deuh nge, ka naupan lai min ngaihtuahtir a. Ka vannei a, Ka tetlai khan fahrah dangte anga tihduhdahna leh diriamna ka tawng ngai lo, tawng ngai lo ti ila kei aia u deuhte velh erawh ka tawk ve zauh zauh a. Mahse, Ka patea hian min chhan viau zel a. Tin, ka piantirha thil thlen dan hriate chuan min lainat a, an fate bulah pawh tiduhdaha hmusit lo tur leh khawngaih zawk turin an lo hrilh ve thin a. Thian ka kawm tam lem lo va, kawm bik erawh ka nei. Keimahni ang bawka rethei ve tho te an ni. Mi an tha a, Thingtlang khua kan nih vang nge rilru a thianghlim a, tawngkam meinei leh dawnsawn nuam lo zawnga min tawngkhum an awm chuan an aia û zawk ten an lo zilhhau vat thin. 

Ka pa khan mi khawngaih a hlawh bawk a, a lo taima em em bawk nen. Mi te hian hlawhfa atan te hian an duh thei em em a, a in chan lo zawk thin. Thenawm khawvengte lahin chawhmeh engilo min pe ve reng reng bawk a. Dik tak chuan vuivaina leh sawiselna tur ka hre hauh lo. Ka nî pawh khan mi zah a kai ve hle. Tin, ka nu te chhung lam khan ngei an hlawh ve deuh bawk. Dawrkai mah nise, kan khaw dawrkaiah chuan inhralh lo ber pawl an ni maithei. Ka nu pa Pu Hrima lah mi chapo, an neihnun chhuang mi a lo ni bawk nen..ka nu tak phei chuan kei min hrin hnu phei kha chu thian kawm tur pawh a vàn viau a niawm e. Ka nu pa Pu Hrima chu a rilru chhiat vang ni maw ka pa boral hnu kum khatnaah khan an in bul awihah a lum a. Tuma dawmhlum hman lohin a boral ta a ni. Chhiat an tawh pawh khan mi an láwm lo bawk a, kal pawh an thahnem vak lo khawp an ti. Ka pa erawh thi ropui tak a ni ve leh lawi si. Ka nute hi unau pali an ni a, ka nu hi an te ber dawttu niin , a u chiah hmeichhia hian sáwn a pawm a. A fa paina hi mi pasal a ni nghe nghe. Ka nu nau mipa erawh Zu ngawlvei a ni a, nuthlawi zu zuar a luhkhung. Ka nu te u ber pu Zaia leh a nupui bakah ka nu û sawn pawm nen an in puiah an khawsa mek a ni. Ka nu erawh sawi tawh angin khaw thenawmah pasal a nei kha a nia. Ka hmuh chang pawn ka pumpelh hram hram zel,. Amah ka hmuh apiangin ka pa cher kuam, thih hmabaka khuma a mu lai kha ka hmu tel thin a, ka thinlung a na leh thin. 

Ka phone rawn ri ral ral chuan ka ngaihtuahna atangin min rawn kaiharh a. Number hriat loh atangin a ni. "Hello" ka ti a. A ri deuh rawk rawk. 

"Aw..Ruatpuia a ni em aw?" A rawn ti a. A aw chu ka hriat hnu a ang. 

"Aw ni e, tu nge aw?" Ka ti a. 

"Hetah, Saidingi, tlai dar 3-ah khaw thenawmah chuan kan kal dawn a. Lo insiam ta che" a rawn ti ta a. Doctori lek!

"E..aw le, hei huanah ka kal a. Ka haw dawn chiah e. Ka lo kal ang" ka ti sawk sawk a. 

"Tlai suh ang che" a ti hriam hraih a. A dah nghal hmak. Ka ner sawk mai. Driver nih hi chuan pi berte tihlungawi hi a tha ber, hei chu Driver hoin an manthiam ang. Dar 2 a la ri lo deuh a, ka insiam sawk sawk a, ka haw ta nal nal. In ka thlen rualin ka inbual sawk sawk a. Ka rin ang ngeiin vahrit chu ka ni chuan zawrh atan a ît ngang mai. Mahse, "A tul ziah lo. Ei ang, Pa Rema pawn a ei chak ang. A ek te kha kan siam dawn nia. " ka ti tlat a. A tilui ngam lo. Ram parva pawh fridge-ah kan dah rih. Ka chin tur ka chhungte ka hrilh mawlh mawlh a. Ka nî lahin min zilh ve sek. Ninawm. Thawmhnaw hi mipa tih takah ka ngaihsak mang lo va, Apuii hi hetiang lama mit lerh a ni bawk a. Amah hian min thlansak mai zel. Ka inhmeh tur te hi a hre zêk a. Jean kekawr pawl dak hlarh leh tshirt dum, a hma print awm leh nikum mas-a ka lei ve Nike sneekars ka bun a. Nalh ka inti ve hle. Ka sam hi ka nu te lam ka chhun nge a tam riau a. Lu kawlh ka inhmeh si lo va, a buk mah mah zel. Ka tuai thuak thuak a, hair style a ni vek mai. Ka chhuak tur chu ka niin, "Kha..i zuk hmuam leina tur" tiin cheng 100 min paitir ve a. Ka chhuak ta a. 

Ka han thlen chhoh chuan a bolero bulah chuan a lo ding ran tawh mai a. A zahawm ru viau mai. A sam chu a tawnsang vah a, a chalsam tlem erawh a tla hniang thung. Kekawr parallel a ha a, a kawrchung var hnuaiah top dum a ha bawk. A felfai reuh hle. 'Reuh' ka hman avang hian ka va hmu hniam lo a nia, a lian lo ve êm a tin ni. 

"3 mins in i tlai" a ti hmak a. 

"nia, ka tihpalh lutuk" ka ti ringawt. Chabi min pe a, motorah ka lut a, a rawn lut ve nghal zat. Hlimi leh U Rengi bakah Pa Muana te an rawn lut zui bawk a. Engmah sawi tawh loin khaw thenawm lam panin kan tlan zui ta a. 

Pa Muana hi Lab technician a ni a. Pa fel leh zaidam, fiamthu duh deuh mai a ni. A tel ve chu ka lawm ru viau mai. 

"Ruatpuia chu vawiinah vahrit i awk a ni maw?" A ti a. 

"Umm a lawmawm tak tak a ni" ka ti ve mai a. 

Saidingi chuan ner náng chungin, "Tun laiah thangte la kam" a ti nghat a. Ka khi suk ringawt. 

Hlimi chuan, "Nizan kan tlangval kha a chhel reuh zawk ngawt mai ka ti" tiin titi dang a rawn vawrh ta hlauh a. Ka lawm viau. 

"Lalrova te chu a tet lai atanga luhlul ve tak kha a nia." Ka lo ti ve a. Pa Muana chuan, "Hman deuha ramhnuaia a bo pawh khan a hmu hmasa pawlah khan ka zuk tang a, a lo awmna lah kha hman deuha Suii te nupa in vihhlumna lai kha a la ni zui a. Hlau hmel pawh zuk pu mang lo va. A la ramvachal ngawt ang" a ti suam suam a. Sawi belh tur em em ka hre lo. Ka rilru tibuai deuhtu erawh chaw ei loin kan kal sia, chaw ei min lo siamsaktu an awm turah ka ngai ringawt a, zan kan riak dawn nge tih lah ka hre hek lo. Ka ngaihtuahna hria niawm takin U Rengi chuan, "Vcp te inah chuan mi chaw chu kan ei vek dawn?" A rawn ti ta hlauh a. 

"Aw kan inbe fel tawh e. Zan erawh riak lo ila" Saidingi chuan a ti a. Kan khaw thenawm hi a hla lem lo naa, khalh chak vak kha ka hreh ve deuh sia, mahse, Saidingi bawk chuan, "I khalh dim mah mah a nih kha. Hmanhmawh deuh a pawi lo" a ti dam thlap a. A mizia chu hriatthiam a har hmel angreng viau mai. Kan inhrawn rei ang a, kan innel ve mai ang tih ka beisei. 

Zote chu kan thleng a. Vcp in kan pan nghal. Min lo welcome tha viau mai. An nu laha fel thar thar bawk. Dar 4:30 a pel hlek chauh naa, chaw chu mikhual lam chuan kan ei hmasa ta a. Vawksa rêp an chhum hluah a, ka ei puar ngei mai. Kan doctori pawh ka rin ai daihin a chaw lak a tha. Chaw eikham zial zu tura ka chhuak chu Hlimi'n min lo zui ve a. 

"Hawh, saw lai dawrah sawn kuhva va lei ang" a ti a. Kan inzui phei a ni mai. Kuhva hring pack khat kan lei a, VCP kawta an vawk chaw chhumnaah chuan kan thu a. A lai ve deuhin ka hria. Mipa zawk ka nia lawm le tiin, "Ka number kha Hruaia i dil mi!" Ka ti a. 

"Umm..ka lo be ve tawp che a nih kha.." Nui rah rah chungin a ti a. 

"Min lo be lo mah la lo biak che ka tum tho alawm" ka ti khawmawi a. 

"Hmm..ngati nge?" No deuha min melhin a ti a. 

"Aa..ka be chak che" ka ti ringawt. 

"I va inno tak" a ti sep a. A nui zui har har bawk. 

"Kal ang u hmiang, in inkawm zo tawh em?" Doctori chuan kan hnunglam atangin a rawn ti a. A tawngkam erawh a dam thlap thung. Hlimi a tho vat a, kei pawh ka zial ka nawr hlum a, ka ding ve nghal. An community hall lam chu kan pan ta a. A veng thler angin vaccine chu an rawn la dawn a. Rin aiin an punctual..an buai mam mam chhungin tihtur nei ve hek lo, Hall pawnah chuan ka thu a. Mei ka zu leh ringawt. Ka zuk mek laiin ka piah maiah tlangval ti ila kei ai chuan an nau deuh ang..an rawn ding ve a. 

"A chhiat lohzia kha..a ngo dan saw sap a nih duh hmel" pakhat chuan a ti ham ham a. Doctori an sawina a ni tih ka hrethiam nghal. 

Pakhat chuan, "Dam loh der a ngai dawn nih saw..min han enkawl se a nawm dan tur chu..nurse pawh saw a chhe vak lo" a ti ve sur sur a. Ka lo nui ruh ruh thung. Ka tihtur hre lo ka awm ning chuan phone te ka'n khawih ngawt a. Facebook video hi ka en thin a, net pack ka heh chhan ber pawh a ni. Dar 9 velah an inpe zo thei hram e. Ka mawng a kham hman ngei mai. Kan khaw lam pana kan tlan dawn chuan, Saidingi chuan Hlimi bulah, "A hmaah hian va thu rawh" a ti sap a. Ka lo melh nghek ringawt. Eng chu ka sawi chuang lo. Hlimi chu a rawn thu a. A tawng duh bawk a, kan titi ve nual mai. Pa Muana erawh a chau deuh nge a muthlu burh burh mai. Saidingi chuan, "In lo inhre tawh a..antena a chak bawk maw?" Tiin min rawn fiam a. 

"Kan inhriatna a la rei lo " ka ti ringawt. Hlimi chuan,"Ruatpuia te chu an khaw tlangval fel a nia, hriat loh a har alawm" a ti deuh ngei a. Ka nui ringawt. Ka tlan muang lo bawk a, kan thleng hma viau. Damdawiinah kan tlang nghal a. Kan chhuk sap sap. 

"Motor khan haw mai ta che, naktukah chaw ei khamah kan zin dawn sia" Saidingi chuan a ti a. Kan zin dawn tih ka hre leh chiah. Engmah zawt lem lo chuan motorah ka lut a, ka tlan thla nghal daih. Ka chau ve lek lek mai. 

Ka mu chiah tihin Hlimi leh Saidingi msg a lo thleng rual tháwih a. Hlimi ka ensak hmasa zawk. 

"In zin leh daih dawn sia, lo lenna hun pawh i nei dawn lo a ni maw?" Tih a ni. 

"Nia.,kan zin dawn tih ka hre lawk lo reng reng" tiin ka chhang a. 

Saidingi msg ve thung, "Aizawlah kan zin dawn a. Zan 3 vel kan riak dawn sia, thawmhnaw kha i inken loh chuan..dar 10 velah chhuah hman tum ila aw" tih a ni. 

"Aw le" tiin ka reply. A seen a. Min be zui tawh lo. Aizawla zin chu ka chàk viau hran lo. Mahse, zin rau rau chuan patea te pawh tlawh ve a tha ang. Zin tur ka ni bawk nen, phone ka dah a. Ka muhil zui ta daih. 

Zingah hian ka tho tlai ngai lem lo va, dar 6ah chuan ka harh ngei ngei zel. Ka tho a, Ka vahrit awh kha a ek ka siam nghal. A chek a nih ve mai chu..tui ka tihzawng tak a nia. Ka ni te bulah kan zin tur thu ka sawi a, Apuii chu ka thawmhnaw siam turin ka hrilh bawk. Thil min chah leh tawh kha. Aizawl zin hi chuan eng emaw tal hawn hi a ngai ve ziah, khawpui kan chuang chhuak khat ve bawk nen, a awm ve tho mai. Tukthuan kan ei laiin Doctori'n min lo call a, ani chu a inpeih leh der tawh. Ka duh ang pawn ka ei tam hman lo. Motor ka hru fai thuak thuak a, ka bag lain ka nî pawisa min pai Rs. 5000 chu ka ak a, ka chhungte chu ka mang tha zui ta a. Ka han thlen chhoh chuan a quarterah a awm a, ka lo nghak a. Min rawn call, a bag kensak a ngai a nih chu. Ka chho nghal a. A quarter-a ka luh vawikhatna a ni. A felfai thlarh mai. Mahnia awm nan chuan a zau mah mah ka ti. Mahse doctor leh nurse ho hi chu an huai riau zel a, mitthi an hmu zing bawk nen. An awm thei mai zel. Ni 3 lek cham tur si a inkeng rip phian ka tia, eng erawh ka sawi hran lo. Kan chhuak zui ta nghal a. Zu rim a nàm thàna ka hriat tlat chu! Amah lah chu a chauh hmel bawk si. A ngui nghiai mai a, biak pawh a inthlahrunawm. 

Khua kan pelh hnu tawngtaina hmunah chuan ka ding a. Min rawn melh haw, "Tawngtai ang aw" ka ti a. A maimichhing hmiah. Tawitein tawngtaina ka nei a, kan tlan zui leh nghal. 

"Kan inah innghat ve mai rawh aw. Kalna tur a awm nual sia, i tan a buaithlak lo zawk ang" a ti a. 

Ka bu nghut ringawt. 

"Chuan, Hlimi nen khan inva inhmeh ve" a ti a, a nui sáng bawk. A nui hmel ka hmuh vawikhatna! 

"Aa..a ho e" ka ti mai a. 

"Nurse hi nupui atan chuan an tha, chhungkaw tan an tangkai si" a ti leh a. 

"Doctor pawh in tha tho alawm" ka ti a, kan inmelh zawk. Ka lai lek lek nia, a mitmeng hi a lian reuh êm a. 

"Doctor chu neih kan khirh alawm. " a ti sep a. A mitmengah chuan eng emaw a lo lang zawk. 

"Hmalam en tawh la" min melh miah si lo hian a ti a. Hmalam ka en rang kher mai. A muthlu ta daih a. A chau a nih dawn hi ka ti rilru a, zawitein zai ka play a, a muhil tho tiin chak angreng fain ka tlan ta a. Kawngkam thingpuidawr bulah ka ding dawt a, ril a tam ve deuh tawh a ni. Ani pawh rawn harhin a mit a nuai nawk nawk a. Kan chhuk a. He thingpui dawr hi zin veivah changa ka chawlh thinna ber a ni bawk a, a nghaktu Tepuii nen pawh kan inhre tha tawh angreng. Min lo chiauau vat a. 

"I reh lutuk a, awii nupui te i lo nei vel a ni maw?" a ti ham ham a. Ka îp deuh, "Kan doctor a nih hi. A motor ka khalhsak a, hei Aizawlah kan zin lawk dawn a" ka ti a. 

"Aw..a ni maw, in nu emaw ka lo ti dawn alawm" tiin a nui har har a. A fel thei a nia.

An paratha kan thar hlim hlai hlep hlawp leh thingpui ka chah a. Doctori chuan, "Thingpui chauh ka duh" a ti a. A ril a tam vak lo a nih hmel. Thingpui an rawn dah hma chuan a bag a zen rak rak a, Fizz bur rawn phawrhin a in khawlh khawlh a. Fizz rim a nam lo, zu rim a nam! Mak ka ti ru viau naa engmah ka sawi duh lo. Rei pawh kan chawl lo. Kan tlan leh chuan a tawng duh ta riau a. A thil in kha a thawk tan a nih ka ring. 

"Nu Thangi khan a fak khawp mai che a, zu a in ngai lo va, a rintlak tih velin, lak loh che kha a hlau khawp mai" a ti niah niah a. 

"A fel ve alawm, mahse, a mi fak ang em em chu ka ni lo a nia" ka ti ve mai a. Min rawn thut hnaih deuhin, "Ruatpui, Zu hi vawikhatmah i la in lo maw?" a ti a. 

Ka bu nghut. 

"I va thei ve" a ti nghat a. Thawk la hawkin, "Ruihhlo hi chu a ti thinte bawkin a that lohzia kan hria. Kei chu zu ka in thin asin" a ti hawk a. Hmalam a bih ngar bawk. 

"I duty i hlen loh phah loh chuan a pawina a awm hleinem" tiin ka hnem a. 

"Ka in reng lo. Mahse, zan muttheih loh chang hian ka lem thin a. Khawvel hi a tenawm em a, ka hne" a ti leh daih. A tawngdan vel chu a naupangchhia riau. Ka nuih a za deuh, "Nia..ni ve tho. Mahse, ka sawi theih chu a awm lo va, zu hi chu in thiam an awm tak tak lo a nia" ka ti a. A nui a. 

"Dik chiah, 'A in dan tawk ka thiam' tihte chu tih mai mai a ni. In thiam tak tak ka la hre lo, a tawpah a ngawl an vei tho tho" a ti hmarh hmarh a. 

Min rawn melh lehin. 'Mahse, zu in chhan hi a inang lo ve thei khawp a nia" a ti leh a. 

"Nih ti nge i in?" ka duh aia hmain ka ti a. 

"Nakinah le" a ti ringawt. Kan tawng zui leh tawh lo. Aizawl kan thlen thlengin a tawng tawh lo. A muhil lo thung. Bungkawnah an khawsa a, chu lam chu kan pan ta nghal a. An in chu ka beisei san vang nge ka rin aiin a ropui lo. A lian vak bawk si lo va. Kan luh rual rual chuan ui lian zet hi a rawn tlan nghal a, Saidingi chu a lawm nghal chung chung mai. 

"Duatpui, min lo ngai tawh ni maw? Kei pawn kei pawn.." a pi chuan a ti mawlh mawlh a. Saidingi nuta niawm tak hian kan bag chu a lo la sawk sawk a, ka room turah min hruai nghal. Pawn lama a lan dan ang ai chuan a chhung chu a ropui leh lawi sia! A changkang ru riau. Ka va chhuah leh chuan Saidingi nu leh pate pawh in chung atangin an lo chhuk tawh a. Kan han inchibai a. 

"Ruatpui, hei hi ka nu a nia. Nu Sang tiin i ko mai dawn nia. Chuan ka pa hi chu Pa Lawm ti mai la, hei ka nau Valtea a nia, ka ú dawr nghak a la haw lo a niang. Kan nula senior" a ti deuh kher a. Ka lo nui suk. Nu Sangi chu a nelawmin a ngainatawm kher mai. Pa Lawma pawh a dam thlup a, Saidingi hian tu zawk nge a chhun pawh ka hre lo. Valtea nen chuan kan inrual vel maithei. Saidingi nen pawh an inang deuh. Kan han intifai a, ka chhungte pawh chanchin ka hrilh ve a. Zanriah ei a hun a ni deuh mai. An nula senior U Pari pawh a rawn haw tawh a. Khawpuia awm an ni bawk a, chutiangin ka hmu chal lem lo. Ani pawh a nelawm viau e. Zanriah chu kan kil ta a, Driver nih chuan khaw hrang hrangah kan zin fo a, mikhual niha chaw ei zah tih vel hi a awm vak tawh lo. Ka ei ve bawrh bawrh mai. Saidingi chu kan khuaa a awm dan kha a thlak vek ni maiin ka hria, a pangchang a, a tawng duh barh barh hle bawk. Chhungkaw inngeih tak an nih ka ring. An bula khawsak a nuam èm mai. Chaw eikhama zuk hmuam ka tih zawh chuan mut mai ka tum a. Ka chau ve deuh aniang. Ka muhil nghal dawn chuang lo va. Hlimi'n a lo call a, "Chanchinte rawn sawi ve ta che" a ti nghal táwng a. Min bialpa chei riau tawh mai. 

"Nia, ka hman ve chiah alawm" ka ti ringawt a. 

"In tluang maw? Doctor te inah mi i innghah ve " a ti siam siam a.

"Umm, innghat ve ta mai. I duty lo mi?" ka ti a. 

"Aw..hei keimahin ka awm a. A khawharthlak tawp" a ti a. 

"Ka lo hawn veleh ka lo leng dawn nia" ka tih mek laiin Saidingi tawng vin thak ka hre ta a. Ka beng ka dawh deuh, inhau thawm ni ngeiin ka hria. Hlimi bulah, "Ka lo be leh ang che, lawk aw.." tih leh dah ka rual a. Va chhuah ve chu ka tum lem lo, ka inrawlhna tur a ni lo bawk a. Mahse, ka beng erawh ka chhi lo thei bik lo. 

Saidingi chuan , " I hmel tenawm tak i rawn lan leh ngam pawh hi i zakthei lo e. Zak ve deuh teh" a ti vin thak a. 

Mipa tawng thum lam hian, "Inbe lawk ang. Tun chiah" a ti a. 

"Chhuak vat mai teh" Saidingi aw a ring viau. Pa Lawma a rawn inrawlh ta a. 

"Ni e, Johny, min chhuahsan phawt mai teh. Rawn lang tawh lo la a lawmawm viau ang" a ti dam thlup a. Thawm a reh vang vang mai. Eng tak ni ang maw?! Ka zawt ngam dawn der si lo va. A bialpa hlui a nih ka ring. 10 mins hnu velah ka room kawngka chu a rawn kik dat dat a, ka va hawn chuan, Saidingi chu a lo ding ran a. 

"Eng nge ni ta?" ka ti a. 

"Eng ni lo ve. Ka lo kal mai mai. Muttui" tih leh kal a rual nghal. Min tihrilhhai viau a ni. Kei pawh ka mu leh a, Hlimi nen kan intext pah. Ka insawi luh ngai loin amah hian min hauh deuh tawp ni maiin ka hria. A vawi khat nan bialnu ka nei ve ta chu a nia! A hlimawm hranpa ve reng reng e. 

Tawk rih❤