Lalnunhlimi

LALNUNHLIMI..

Ziaktu: Toni Rálte

(Kumin ni 20, November-a boral ta, December ni 9-a pasal nei tur, kan thenawm nula leh ka thian ni bawk, Manuni pualin ka rawn ziak e. A pasal tur Vantea nen kan inkawmna atanga an love story hi ziak ka ni e.. 

"Ka ruang chungah thu i sawiin i tawngtai thei ang em? Min tiam rawh" titu chu ka melh vawng vawng a. A natna a nat tehlul nen a taksa erawh a la chhe lem lo. A hmai a dáng ve deuh tih mai loh chu..tunah hian min kalsan huna ka awm zel dan tur chungchang min sawipui mek a ni. Keiin ngaihthlak hrehawm ka ti si. Mahse, min hmangaihna leh khawngaihna avangin chau chung chung pawn ka kal zel dan tur a la sawi táwk táwk chu a ni si a. A duhthusam tihhlawhtlin ka tiam hnuah a chhing vang vang a, a muhil ta siai siai a..amah kuah chung leh thlir reng chungin bul kan tan chhoh dan te kha ka ngaihtuah let ta vang vang a. 

A BUL..

Ani chu kan chhungkhat a ni a. Kan inlaichinna chu a hla tawh deuh naa, engkima la inpurtawn leh la inphungbawm kan ni. Kei pawn û angin ka en thin. Kan khua angah chuan a senior pawl an lo ni ve ta bawk a, amah hi rual pawl em em lo, mahnia tlei riau a vahte enkawla a hun tam zawk hmang a ni. Kum 2016 kumtir lam khan Manuni chhung ten min rawn biain, "Naupang School kal hi hruai thin la, eng em em i la thawk lo bawk a. I inhlawh a ni mai" tiin. Kei lah sum mamawh ve reng ka lo ni bawk nen, ka lo remti ve mai a. Tichuan, Manuni û fate chu nitin Lunglei lamah ka hruai ta thin a. Ta tang khan a hmaa inkawm em em lo pawh kan innel chho tan ta a. A tir phei chuan, "Au Nun" tia ko ka ni. Nun hi a lo danglam thei khawp a lo nia. Phone atang hian eng eng emaw inzawh kan ching chho va, nulat tlangvalna lam erawh a lang lo. Kei aia a û deuh vang leh chhung khat anga kan inen tlat avangin ka bialnu a la ni ang tih ka ngaihtuah phak ngai lo. Hetia kan inbiak lai pawh hian ngaihzawng a nei a, Khaw dang a mi a ni nghe nghe. Ka hriatpui ve vek a ni. 

Engtik lai atang khan nge ka rilru chu inngaihzawnnaah a pen tak ka hre bik hauh lo. Kan inbiak tam tak vangah ka ngai deuh naa, han enliama palluih harsa ka ti chho tan ta a. Zan khat ka thiante nen park-a kan leng hi an bialnu te ve ve min biaksan a. Keia biak tur nei ve ta lo chu ka hawi ka hawi ringawt a. Chutia riang deuha ka han awm bik chu min hmu thei lo nge, "Manuni be ve tawp rawh. In inbiak thin tho kha, kumte chu number mai mai alawm" an ti pek a! Kei lah rilrua lo vei ruksa a lo ni bawk nen, "Ni mai zel e" tiin ka be ve ta ngawt a. 

"Hei Dinsanga leh Rodinga te hian an bialnute min biaksan reng a, biak tur ka nei ve si lo va, ka rawn be ve tawp che" ka ti a. A nui hawr hawr a, "I zak thei lo, Lalvan" a ti a. A ngai haw lem bik lo chuan ka hria. Kan inbe ve ta reng a. Kan thusawi pawh ho tak tak vel hlir a ni. Mahse, khami zan kha ka nuna a lo luh chian zan ka ti mai. "Ka va bem thlu awm e aw" tia intiam ru chungin ka mu ta kha a nia. Bialpa a nei tlat hian min tibuai thung. Mahse, hmuh pawh an inhmu ngai lo va, ngaih chu a ngam chiah lo naa ka hnual phah duh lem lo. Tichuan, ka be chho ta char char a. Msg hote te atanga tanin, a mut thleng ka be thin a. Khatih lai kha an in an sak lai a ni a, mi in luahin chep zetin an awm a. Han lenluhte kha ka zak ve deuh tlat pek a!Amah zawk hian, "Lo chho la" a ti zawk thin. Ka lai kual ta vel kha min nuihzat thin nasa. Thutak deuha ka rilru ka sawi pawn fiamthuah a la zel a, han tih leh vak dan ka hre bawk si lo. Mahse, min haw bik lo tih ka hriatna ringawt pawh a hlu viau tho e. 

6, June , 2016 a ni a. Ka la hrechiang khawp mai. Khami zan khan mawlhtu ka nei nge kan chaw eikham atang khan ka za sek mai a. Hma deuhah ka han leng chho a, chaw an lo eikham ve deuh chiah a. A che bawrh bawrh a, a u nen kan lo inkawm thung. An intihfel zawhah a u te chhungkua chu a pizawnte in lamah an han leng chho a, A nute lah an mu hma thei si. Chu hun tha chu bawhpelh ka tum lo chiang khawp mai. Ka bulah a rawn thu a, ka lo kuah chawt. Makti zetin min melh haw a, ni dangah chuan kut hmawr pawn ka khawih ngam ngai lo. Ka zám ru ve em em tho a, mahse, thinlung leh tih takzetin, "Nuni, ka hmangaih che" ka ti ta a..boruak a reh duk mai. A hamhaih ve deuh niin ka hria. Ka thutak zia a hmuh chuan fiamthua lak a tum ta bik lo nge a aw a thian kharh a. 

"Ka upa tawh a, kei chu..nakinah i la inchhir ang." A ti ta a. 

" Pawi ka ti lo. Kumah ka buai lo. Ka duh che, ka hmangaih che" ka ti leh ngat a. A chil a lem khawlh ringawt. 

"Bialpa i nei tih pawh ka hria. Mahse, ka nghak thei che. Ka tibuai lo bawk ang che u, ka rilru hi hre ve hrim hrim la ka duh a ni" ka ti leh a. 

A ner sak, "Min lo kawp a, ka hrilh ang che ka ti reng a, ka lo theihnghilh daih. Nupui a nei dawn" a ti ta mai a. Kei ka lo lawm tumhrang thung. Hlim tak ka ni. 

"Mahse, Vante, chhungkhat ang deuhthaw kan nia. Anî(ka nu) te pawn mak an ti viau ang. Kan vengte pawn min sawi duh ngawt ang" a ti a. 

"I care ho em mai a. Chutiang ka ngaipawimawh lo. Min daltu an awm tawh lo bawk a, tikhan kan ni tawh aw" ka ti ta hmiah a. Ani a bialpain a lo kawp rilru nat ve lai a nih vang nge min hnialna engmah a chhakchhuak ta bik lo va. Khami zan ka haw lam kha chu ka lam lo chauh a ni. Dik tak chuan la bialnu a nih vanga ka fakna ni lo se kan khua angah chuan a hmeltha pawl a nih bakah a nungchangah sawisep a kai ngai lo va, Kohhran leh khawtlangah a phak ang tawkin a inhmang bawk. Tlangval vannei tak ka ni ka ti lo thei lo. Kum lam chuan min tibuai lo nasa khawp mai. 

A LAIMU..

Ka lo sawi lawk tawh angin inngaizawng ang chuan kan han awm chho ve ta a. Infawh aia thui a kal theih loh bur..pawi ka ti lem lo. Ka ngaisang sawt zawk. An motor pawh ka la khalh ve zel a, a changin in sakna lamah te ka han pui ve lawp lawp bawk a. An veng lama ka tam tak em vang leh kan inzui nasat ve tak avang chuan khawtlang pawn an hre lo thei ta lo va, Mak ti an awm a. Ka thiante erawh chuan la duh ber ka ngaizawng thei chu min lawmpui hle. Ngaihzawng a la ngah lo bawk a, kei aiin û zawk mah se; a zeihawi tehchiam bik lo. Ka insawitheihna lam ni lose keimah atang hian thil tam tak a zir ve ni te pawhin ka hria. Kei hi unau zinga a tlum ber leh mipa awmchhun ka lo ni bawk a, duat rawn ka hlawh ve em em a. Chutihrualin thenkhat tan ngeiawm chang ka nei maithei, a chhan chu ka kum phu lo hian ka puitling ve reuh a. Ngaihzawng pawh ka la ngah bik lo, mahse, Hmeichhia chuan ngaihsakna hi an ngaihlu tih hrethiam tur khawp chuan ka lo lerh ve te pawh a ni mahna le..Manuni chu ka lakah a pangchangin upa zawk chan ka chang a tam zawk awm e. Kei lahin duat nuam ka lo ti ve bawk nen, ani pawh kan han inzui rei takah chuan min ngaihsak sáwt ve khawp mai. Unaua a naupang ber ve ve kan lo ni bawk a, kan no dun angreng si, Pangchan lah kan pangchang narawh e. Kan chhungte ve vein an han hriat takah chuan, "Chhungkhat kan nia. Bakah in kum a inthlau deuh..in kal thui hmain tawp rawh u" tih chu kan thurawn dawn a ni. Mahse, kan kal laklawh tawh a, a laklawha thil bansan hni hne hi ka ngaihdan a ni ve lo. Ani pawh keimaha innghat a ni bawk a, tawpsan ka tum loh êm avangin a tuang a tichhah ve zel a. Ka kianga a awma a din tlat avangin ka huaisen thin. 

December ni 8, 2017 zan dar 8:45 chiah chiah a ni. Chumi zan chuan a vawi khat nan Lalnunhlimi chuan, "Vante, ka hmangaih che" a ti ve ta. Kum khat dawn kha chu min hmangaih thu a sawi lo. Ka hlim veng veng a, ka chhungril hi a nui hawk hawk a ni ber e. An ni pawh an in an luah lut tawh a, zêp nak emaw kan in ai mahin ka awm tam zawk awm e. Engkimah ka tihtheih ang angah ka pui ve zel bawk a. A chhungte pawn min enliam ve tawp tawh a ni. Thian hi kan vengah a ngah lem lo va, bakah pawn lama han lenlam lam hi a ti vak lo nen, thian kan ni a. Kan inhmangaih bawk. Khawi kipah kan inzui a ni mai e. Bial zaipawl member kan ni dun a. Hla zir nikhua leh eng emaw tih ho nikhua pawn kan pahnih zelin kan ti thin. 

Manuni hi a mizia hrechiang lo tan chuan a ngaihdan tlang tak avang hian ngei leh huat pawh a hlawh maithei. Dik nia a hriat chu sawi phawng zel mi, ri ve tawp ang kha a ni a. Ka hau ve thin. "Ri phawng phawng zel suh. Miin an ngei ang che. Hrechiang lotu che bulah phei chuan ngawih mai hi a tha zawk" ti te pawn ka hau ve thin. A lo thanhnan tawh thil a ni si a, mahse, tlem tlem chuan a insiamrem ve ta deuh. Chhungkaw tana a tangkaizia hi ka'n sawi ve leh reng reng teh ang. Kan inhrechiang bawk a, fanu naupang ber mahnise, chhung leh khatte huikhawma chiauautu ber a ni a. Tin, an monu U Nghaki tan pawh laizawn a ni mai. A vahte pathum hian an ngainain, an mamawh engkim a hai lo va. An tan a sen pawh a inseng ve nasa. A phone te hi kan inbia a nih loh chuan a vahten an kawlsak daih chang a awm thin. A thu pawh an awih bawk. Chutiang taka mi tha leh chhungkaw tana mi hlû chu khawvel atanga lakboin a awm ta mai chu a ni si a! A pa hi stroke vanga kal tha hleithei tawh lo a ni a, a pa a duatzia leh a hmangaihzia te hi aw..kei ngei pawh hian ka ngaisang thin. 

Kan pahnih inkar bikah lut leh ta ila. Inzui rei tawh leh khawtlang hriat khawp kan lo ni ta bawk a. Thiante pawh hian over min ti lek lek zel ang tih tur khawpin kan incare tawn thin. A vahpa hian 'AB" tiin min ko thin a. Manuni pawn Ab min ti ve mai a, a chang chuan 'Amaa' ti te pawn min ko thin. Kei hi ramvachal tak chu ka ni lo naa, ramvahte hi nuam ka ti ve thin a. Mi zuia ka han chhuah changte hian Dar 1 dawnah te hian kan haw thin si. Min lo nghak tàng táng zel a. Kei pawh signal awmna lai ka thlen rualin ka call nghal a. Chanchin ka hrilh var zel. In ka lut chiah tihin ka call leh bawk a, ka men chhung min menpui a, kan mu rual ngei ngei zel. 'Ka hmangaih che' tih thu sawi lo hian kan inthlah ngai lo bawk. A changa ka hawn hma deuhte hi chuan, "A la hma, lo chho zuai la" te hi a tia. Kei lahin ka lo thlahlel ve tho bawk si, ka intifai sawk sawk a. Ka han tlan chho leh nal nal thin. Chutiang taka inthlahlel chu van khian min thîk em ni ang? Kan inhmangaihna kha a lem a ni lo tih kan chiang dun a. Kan rinawm bawk. Kei hi ka thikthu hi chhe bawn ve tak a ni a. Mahse, thik tur ka hmu ngai chuang lo. Kan thinrim rei ngai lo va, inhauh leh inhnial kha kan nei tlem khawp mai. A thinrim hi chuan, "Vana" ti ngat hian min ko thin a. Kei ka ngawi thung. Ka thinrimin, "Nuni" ka ti ve thung a. A lo ngawi ve mai zel. Chutiang taka inhrethiama indawm tawn chu kan ni ve a, mite pawhin an over ve e tih theih tur khawp kan ni ka ti lo thei lo. Mahse, pawi tihna ka nei lo thung. 

A hlawh nei zawk a ni bawk a. Eng eng emaw hi min leisak a ching thin a. A thlawn ngawta dawn fo bik ka duh si lo va, ka inhlawh ve tang tang zel a. Lungleia kan kal hian tlereuh dawrah te hian ka han luhpui a, a mit fukna hi ka melh ran zel a. Ani a inthlahrung thin hian, "A ngai lo, ka duhzawng a awm lo " a ti ringawt zel a. A hranin ka kal leh ngat a, a mit latu nia ka hriat kha ka leisak ve mai zel. A lo pawm lo thei bik tawh lo va, a zia daih zawk. 

Inneih lamte ka han sawi chho ve tan a. Kumin march thla te kha kan han sawi ve niah niah naa, a hna avang khan Rotlang lamah a phei leh a ngai bawk si. Kan tlawlh leh ta rih a. A hma chuan, "Kei talin hna ka neih loh chuan" a ti thin kha a nia. A hna hi Hindi teacher kha a ni a, mahse, an ban pawlah khan a tang ta si a. Mahse, a hnua an dil that leh khan a tling ve leh ta hlauh a. Ani pawh a inpeih thawkhat tawh ni chuan ka hria. Bakah amah pawn, "Ka kum a tam zel a, fate hi ka ngah thei dawn si lo va,." A ti ve thin. Kan fa lo la piang miah lo hming te pawh kan phuah lawk thlap tawh. Kan pahnih hming chawiin, 'Vannunhlimi/Vannunhlima' kan ti lawk diam tawh a ni. 

Rotlang lamah te khan kan va inhruai lawp lawp a. In te pawh a han luah ve ren rawn a. Mahse, Covid 19 vangin tikhan zirna in khar a ni ta bawk nen, keini tan chuan a tha daih zawk ti mai ang. Kan awm hran loh phah a. Tichuan, Kum tawp lamah palai chu kan tir ve ta ráwih a. Inthen thei tawh lo tura min ngaih vangte pawh a nia nge, rem lohna a awm ta lo. Mak deuh maiin man inhlan kha December ni 8 an lo ti a. Manuni'n , "Ka hmangaih che" a tih ni chiah kha a ni. Kan pahnih pawn kan sawi dun a, a fuh kan ti ngei mai..

A TAWP..

A hma pawh hian a pum lam hi a sawisel deuh reng thin a. Inentir ringawt pawh hian kei pawn ka kalpui zing. Damdawi pawh a ei nasa. A pum mar tung thinte hi ka zutsak thin a, a pumpui lam emaw a ril lam emaw felhlel a awm a nih kan ring. Vawi khat phei chu, "Aww..ka dul kiar lutuk hi a rai min lo ti leh tawh" tiin a nui hawr hawr a.

"Lo ti vel mai mai teh se..i inenkawl that hi chu a ngai a ni. Hmarcha thak leh uih lam te hi ei tlem ve deuh teh" ka ti a. Hei hi chu ka hrilh zing. A tawi zawngin, kan inneih hun tur kan hre tawh a. Dam tha ver vawra inneihte a duh ve bawk nen, Christian Hospital, Serkawnah kan han inentir leh a. "I nerve lam a niang" te kha an lo tia. Nerve damdawi te pawh a ei hman nghe nghe. Inneih a hnai tual tual a, Manuni a na tial tial si. Kan mangang tan ta deuh a, kan han inentir leh ta a. Test hrang hrangte an han nei a. Doctor khan, "In chhungteah thin lama harsatna nei an awm tawh em?" Tiin a zawt a. Kha tah khan kei chu ka thla a lo phang daih tawh a ni. Ani erawh ngaihthat lohna a nei lem lo nge a sawi zui tehchiam lo. Damdawiin ringawt pawh kha kal zing tak kan ni. Tichuan, Trinity Hospital-ah an refer ta nge nge a. Kan insiam ta chûk chûk mai. Kei leh a û Rema leh an nu U Nghaki te nen kan va kal ta a. Kal kawngah pawh a chau deuh riau mai a. Tlan pawh kan tlan chak lo. Refer hial ngai khawpa a han awm ta khan a tihniam zual ni te pawn ka hria. Damdawiin kan thleng a, Cabin kan book tawh a. Kan lut zui nghal. Test hrang hrangte an han nei chho leh a. Khatih laia ka tawngtai nasatzia kha Pathian pawhin Êm êma a ti hialin ka ring. Biopsy lak a ngaih takah khan a ngaih a tha ta lo va, "Ka cancer a niang" a ti ta chiah a. Mahse, A u te nen , "Tun laiah chuan an la deuh zel tawh alawm. Engmah a ni lo vang" tiin kan hnem a. 

Result kan hriat hma zanah khan ngaihthatawm loh khawp hian ka lung a leng ta a. Mak tak a ni. Tu nge ka ngaih pawh ka hre lo. A lêng vawng vawng a ni ber mai. Bathroomah ka va lut a, a mutthilh lai a ni bawk a, ka va tap zawih zawih a. Ka tah a chhuak lutuk te kha ani hi ka lo sûn lawk reng em mawni le ka ti ta..a muhil lai hmelte chu ka thlir vawng vawng a, a hmelte kha a tha asin aw. A rawn harh ta a. Damdawiin kan luh atang khan zing, chhun leh zanah hian kan tawngtai dun ngei ngei zel a, "Amaa, tawngtai ila" a rawn ti a. Ka mit sen rám te chu a hmuh hlau takin, "Aw le.." Ka ti a. A rawn thu chhuak ve leh hram a. Kan tawngtai dun leh a. Kan tawngtai zawhah kan mu dun a. Kan inkai rial mai. 

"Amaa, Pathian lakah hian i vui em?" A ti ta thut a. Ka hamhaih angreng hle. 

"Vuina tur a awm hleinem" ka ti mai a. 

"Lo vui reng reng suh aw. Kan tana tha lo turin rem a ruat ngai lo a nia" a ti sap a. Ka inlet thawk a, "I tawng dan hi thih tumte pawh i ang alawm ..khatiang sawi tawh lo vang" ka ti hlur a. Ka ngaithlak ngam loh vang a ni zawk. 

"Van pawh khian thlei bik leh thliar bik neiah lo ngai miah suh aw" a rawn ti leh hram a. Ka mittui a hnám sawk. A kut chu nghet takin ka vuan a, "Amaa, sawi tawh suh. Mutthilh tum rawh. I chau palh ang" ka ti a. A maimichhing ve mai a. A thawk dan atangin a muhil lo tih erawh ka hre thei. 

A tukah Result chu Mama'n a va lam a. Mahse, Thin cancer a ni tih kha a nupui takngial pawh a hrilh duh lo. Amaherawhchu, U Nghaki nen a awmdan avangin kan ngaih a tha ta lo va, kan zawt ta ráwih a. A sawi ta a. Ka dinna lei a nghet ta lo emaw tih turin ka pai nawk mai. Rilrua rin ruksa mah nise, a taka han tawn chiaha a natzia kha e..a tawng ve lo chuan inhrethiamin ka ring lo. Ka beiseina beithamtê pawh lak boin a awm leh ta si a. Amah Manuni zawk kha ka khawngaih ngawih ngawih, a hmel ka'n en thin. Thin cancer ni tur hian eng nge tihsual a neih bik? Zu a in ngai lo va, tuibur pawh a hmuam ve thin naa a pum lam a sawisel tal rengah khan a nghei ta daih kha a nia. A thin tha lo siam thei tur eng thil mah a ti ngai lo asin mawle. 

Amah chu kan hrilh ngam lo va. Biopsy an lak ringawt pawn tikhan a awm a nia, a natna dik tak a hriat chuan a tlahniam zual ngei dawn si. Mahse, Doctor ward rawn fang khan an kalphung a nih miau avangin a sawi palh ta hlauh mai a! Thin cancer a ni tih a han inhriat khan hmuh theih khawpin a danglam nghal. Na a ti tih ka hmu reng mai si. Bathroomah a u te nen kan in luh chhawk zut mai a. Tawngtai ka tum , ka hul vek. "Lalpa, " ka han ti a. Sawi tur reng reng ka hre lo. A tawpah ka tap leh nge nge zel. Kha lai dinhmun tak kha hremhmun ang maia hrehawm a ni ngei ang. Amah lah hnem a ngai si, a tawngvai chho tan a. A thawk lam a sak chho tan ta bawk. Doctor kha Mama'n a va hau hrep a, a lo inthiam lo em em lehnghal. "Delhi ka refer ang che u, a thin lehlam chauh a la nia. Lehlam hi chu a la him a nia..engkim ka ngaihtuahsak vek ang che u" a lo ti nghe nghe a. Delhi kalte pawh chu kan han sawi a, sum lam te pawh a harsat tak leh chhungkhat te hnena han khawn kualte pawh kan sawi thuak hman. Mahse, amah Manuni kha a tlahniam chak em em mai si. Zanah ka han thutpui a, a kut ka vuan ran bawk. A rawn meng diar diar a. 

"Amaa, Ka khawngaih che" a ti sep a. Ka khawngaih ngawih ngawih khan min lo khawngaih ve lehchhawng a nih chu! A va na ngai ve mawle..Lalpa..

"Amaa, intichak hram hram rawh aw. I dam leh dawn alawm. I rilru a pawimawh ka tih kha" tiin hnukulh teuhin ka han fuih a. 

"Ka dam zoin ka ring lo..thil pakhat min tiam rawh aw" a rawn ti thàm tiak a. 

"Sawi la" ka ti vat. 

"Ka ruang chungah thu i sawiin i tawngtai thei ang em? Pathian hnenah lawmthu i sawi thei ang em?" A ti ta a. Tawng nachang reng reng ka hre lo. Engtin nge ka hmangaih min laksaktu hnenah lawmthu ka sawi theih ang?! Mihring lam atang chuan a va harsa tak êm. Mahse, ka kut vuantu chau taka mu chuan min ngen miau si. Khur dar dar chungin , "Ka tum ang" ka ti thei hram. A hmaa tah ka duh loh vangin bathroomah ka tlan lut nghal. 

"Lalpa, ani saw ka va tluk lo tak êm. Ani chuan i hnenah lawmthu a la sawi thei a nia. Lalpa, kei chu ka hul..mahse, thil pakhat chiah ka ngen ve ang che. Ani saw min laksak a nih chuan kei hi min awmpui ve thung a ngai ang. Hei hi chu min tihhhlawhtlinsak ngei a ngai..Lalpa" tiin ka tawngtai a. Mak tak maiin Pathianin min rawn pawl ka ti mai. Ka zàng hawk a, ka phurrit tak, min kam tûntu kha a kiang duak nia! Chawp leh chilha min awmpuia min uaptu Pathian kan nei hi a va lawmawm êm..

A tuk atang kha chuan biak tlak a ni ta meuh lo va, chawhnu lamah ICU-ah kan innawr lut ta nge nge a. Ventilator an vuah tup a, darthlalang phen atangin ka va thlir thin a, ka lainat a ni. A na tawrh saw a na em em si a. A chhel pawh hi a lo chhel ka ti mang e. Lunglei atangin A u te nupa an rawn thleng ve ta bawk a. Kan thlir deuh tlawk tlawk a ni mai. Zing lam dar 4 bawr velah chuan, Mama te nen kan han sawiho a. 

"Ventilator saw phawi a nih chuan a kal a ni mai a. Engtin nge maw kan tih ang le?" Tiin. Kei chuan ná a tuar reng kha ka hmuh theih thlawt loh avangin, "Kei chuan phawi mai kha tha ka ti. A tuar rei tawh ém mai" ka ti ta thlawt a. A u te pawh an han inberawn a, Phawi mai chu tha an ti tlang ta nge..Mahse, phawi hmain a thaw a rawn chiang lo thut a. A kal ta..ka nu leh pate tih loha khawvela ka hmangaih ber chuan min kalsan ta..a han kal takah kha chuan Pathianin min awmpui ka ti mai a, ka fim kar mai. Ná erawh ka tuar, ka chhungril hi tawrhna hlirin a khat a ni. Ni 20, November, 2021 hi ka damchhunga ka hriatreng tur ni, ka hmangaih nena min then hrangtu thihna nunrawng chet hun a ni ta. 

Mi an tha a, an fel a. Saikhamakawnah min lo hmuak a, an hmelhriat ngai pawh ni lo tan khan puante an rawn dah liam liam a. An uizia thu mawlh an sawi chamchi reng mai. Bus-in kan khaw lam kan pan ta a. Hun dangah chuan ka motor khalhah chuangin hlim takin a nui thin asin le..kan khaw lam kan pan dan hi ka va duh lo tak êm. Kan khua kan han lut a, zuitu leh hmuaktu a ngahzia mawlhte kha. Manun, i thi ropui lutuk asin. Thalai zawng zawng tih theih deuhthaw bakah nu leh pa ten an in leh a vel khatin an lo hmuak a, kuang an han la chhuak a, kei erawh ka chhuk rualin ka nuin min lo kuah nghal chat a. Min tahkhum nghal hawm hawm mai. Mipa hi maw a intihpa theih loh, mittui hi chak lohna lantirtu a ni lo bawk. Ka hmangaih tan chuan mittui mai maite chu ka ren ngai dawn lo. 

Thalai tam takin min tlaivarpui a, zai erawh a theih loh avangin hla kan play a. A taksa vawt ngiai tawh chu ka chul ka chul ringawt. Ka kalsan phal thlawt lo a ni. Kan inneih nia a hak tur a mo kawr thuitir chu an haktir a, mawi takin a thian ten an chei a. Mitthi a nih tawh hnuah pawh tu hmeichhia mahin ka mitah an la tluk zo chuang lo asin. A hmeltha lutuk. A hnena ka lo intiam tawhna kha ka tihlawhtling lo a nih chuan ka damchhungin ka inthiam thei ngai dawn si lo va, huphurh tak chungin ka intiamna chu ka hlen thei ta. A hla duh ber , Zorema Khiangte sak, "Min hmangaih loh a thei lo" tih hla kha ka thlang tel bawk. Kei min khawngaih vanga tap te, amah Manuni ui leh khawngaih vanga tap te , Min kawm hlim hram hram tumtu ka thian fel tak tak te chungah hian lawmthu sawi sen loh ka ba a ni. Manuni pawn van atangin a lo thlir ve ngei ang che u. 

Tin, Manuni chhungte hian fapa ang riakah min ngaiin vawiin thlengin an inah ka la khawsa tihtheih a ni. Ka thianten min riahpui bawk a. Engkim chunga thuneitu Pathian hian malsawmna tam tak vur che u se ka ti takzet a ni. 

Min ti thin a, "In inngaiin in inhmangaih êm a. Pathian thîk tham hial khawpin in inthlahlel a. Leia mo nihtir loin Vanramah Krista mo ni turin a la ta a nih kha" tiin. A dik mahna. Mahse, lei mihrin chhung chuan ka tuar damin Lalnunhlimi hi ka theihnghilh ngai dawn lo. Khuareiin min hnem pawh ka duh hek lo. Ka phal lo. Amah ngaih hi ka la duh a, ka thinlungah hian cheng reng se ka duh a ni. A thih hlim khan , "Lalpa, mumangah tal min hmuhtir rawh aw" tiin ka dil zantin a. Ka hmu thei si lo. Mahse, a thih cham kar khatna zanah ka lo hmu ve ta hlauh a, hmun mawi leh chei nalh takah hian kan lo kal dun a. Ka hawi vak vak a. "A van mawi em em, a nuam bawk si" ka lo tia. Nui sen sen chungin, "Nuam khawp mai. Mahse, hei ai hian ka awmna chu a nuam zawk asin" tiin min rawn melh a. Ka harhsan ta daih a, ka uizia kha aw. 

A tawp ber atan Manuni nena kan hringnun thawnthu lo chhiara lo ngaithlatu te zawng zawngin in tawngtainaah min lo hre ve reng ula ka duh a, Manuni chhungte tan pawh min lo dilsak ve hram dawn nia..

"Ka hmangaih, ka enchim loh, vanram chu a nuam em? Engtikah emaw ka lo la kal ve ngei ang a. Min lo la hrereng ang che aw. Ka hmangaih che. Ka ngai lutuk che..mangtha vawng vawng le" 

(Inferno chu naktuk tangin aw..hei hi a hmanhmawhthlak ve tawh sia)