Inferno 9

INFERNO (9)

Ziaktu:Toni Râlte

(Ka exam chhung zawng min hrethiamtu te zawng zawng chungah lawmthu ka sawi e 😍

Ephraime hmaah chuan Inspector Nunpuia chu a thu ran a. An inmelh no lo dun kher mai. Nunpuia hi sawrkar uisathiam dik tak a lo ni bawk nen. Ephraime an hling thei chu a tan kaisanna remchangte pawh a ni thei tih a hai lo va, tifuh a inti viau mai. 

"Chuan, inpuang mai rawh. Engkim kan nei" a ti nghut a. Zam lo zeta rawn melh letin Ephraime chuan, "Mizorama piang leh seilian pawh ni lo hian engtin nge hel pawl ka din theih ang?" A ti ve sup a. 

"He laia khalh luttu che hi tu nge a nih hria la, i nui tawi tak ang mawle" Nunpuia chuan a ti phar phar a. Ngeiawm zetin a nui sáwng bawk. 

"Ka puzawn a ni lo em ni? Ani hian a fanu nen kan inneih hi a tir atangin rem a ti ngai hleinem" Ephraime chuan a lo ti chat. Nunpuia a dang titih. Chutih lai tak chuan DGP Pu Dinga a rawn lut a. Nunpuia a inkheng khawng auh nghal. Pu Dinga chuan buk nghauh pahin, "Thil kal sual a awm tlat. Ani hi hel hruaitu a ni lo. Hel pawl hruaitu chu Rinsangi pasal Ruatfela a ni e" a ti dam thlup a. Nunpuia a meng zawk zawk a ni ber e. 

"Engtin..?" A ti nuah nuah a. 

"Ruatfela ngei a rawn inpe alawm" Pu Dinga chuan a ti ta a. Awmze nei zeta Ephraime nen an inmitmeina erawh Nunpuia chuan a hmu lo thung. 

Hreh zetin Ehphraime chu an chhuah ta a. Ruatfela an rawn hruai luh lai chuan Ephraime chuan, "Ruatfela hi hel pawl hruaitu a nih chuan, a nupui ngei a ru bo thei dawn em ni?" A lo ti hawk a. Chu a thusawi ril zet chuan Nunpuia pawh a nghawng ve deuh tih a hmelah a lang. 

Zirsanga hliam pawn zia lam a pan ve mek zel a, Judy leh Drose ten an vil ran reng mai. Nauteii leh Bella te erawh an naute thar buaipuiin hun an hmang thung a. Arini erawh Rosangpuia nen chhuah dan kawng dapin ruahmanna hrang hrang an han sawi dun a. Anmahni tawkah an buai ve mam mam khawp mai. Mahse, chumi zan chuan hmai tuam pahnih rawn lutin Arini chu an rawn hruai hrang ta a. A ngaihna an hre lo tlang khawp mai. Arini chu an hmu zui leh ta reng reng lo a, a thi ta emaw tiin Nauteii phei chu a tap par reng mai. An lo awmho rei tawh a, an inngaina tlang tawh bawk a ni. Mahse,an ngaih angin Arini chu a thi hauh lo. A pasal Ruatfela'n a nupui khul chhuak turin Hel pawl hruaitu a nih thu puangin a inmantir zawk a ni. Arini chu a mit an tuam phui vek a, kawng rualrem lo zetah tlanpuiin rei tawk fang hnuah an chhuktir a, a mit tuamna an phelh nghal bawk. A han men chuan a dinna piah lawkah a pa Pu Thanga in chu a lo ding luah mai. Arini pawh a hamhaih ve deuh, amah hruaitute chuan, "Nang chu i zalen tawh e. Mahse, i bo chhunga i thil tawn pakhat hlek pawh i sawi chhuak a nih chuan i pasal Jail-a phurh thlak tur khuan jail a lut lo vang..i hrethiam tiraw?" An ti a. An tlan liam zui nghal. Mahse, Rinsangi rilru tumlumzia hi an lo la hrechiang tawk lo a ni. An motor number chu a rilruin a vawng hman tlat! Zawi muangin a pa in chu a pan ta chhat chhat a. 

Ruatfela hi a nupui chhanchhuah nan nge Ephraime chhanchhuah nan a inpek tih erawh amah leh hmeichhe pakhat chauhin an hria ang chu! 

Bella naute thar chu a hming atan, 'Vanmalsawmpeka' tiin Bella ngei chuan a phuah a. Nauteii chuan a duat kher mai. Naute lo awm ve chuan an nun pawh tlemin a tizalenin anmahni mantute pawn mamawh an rawn pe zing bawk. 

Judy chuan Zirsanga chu tuilumin a dep a, Drose erawh a inbual mek thung. Zirsanga chu a rawn meng diar diar a, "Kimi.." A ti sup a. A nupui a ni tih Judy chuan a hai lo. Ngura a hrechhuak zawk mai. Engtin tak hun hmang ve zel ang maw? Secret society te kha amahin a lo hmachhawn ve ngawt ang tih a hlau viau. Engchen nge an khung dawn tih a hre bawk si lo. Zirsanga'n a kut a rawn vawn chawt takah chuan a harh chhuak thut, a lo dep rei lutuk a, sa a lo ti tawh lutuk a nih hmel. A ner sak sak a, "Tihpalh.." Ti sapin hmun dang chu a dep leh nghal a. Rosangpuia rawn phei vein, "Zirsang, i dam vat a ngai. Arini lah a chin kan hre tawh bawk si lo. Pakhat te te hian min rawn thiar chhuak dawn a ni maithei. Chumi hmaa kan chhuah hman a ngai" a rawn ti nghut nghut a. Zirsanga chu a ngaihtuah ve hmel khawp mai. Drose inbual zo pawh a rawn thu hnai ve nghal a. Malsawmpeka a tap nasa mai a, Bella leh Nauteii'n an buaipui thung. A tah nasat deuh vang nge pawn lam atang chuan an rawn lut ta nge nge a. 

"A pum a na a nih ka ring, zing atangin a la e miah lo" Bella chuan hlauthawng zetin a lo ti nghal a. 

"Doctor a rawn kal ang" tih leh chhuah an rual a. Rosangpuia chuan Bella chu a bekbawr vat, "Doctor i biak buai chhungin a phone ruk dan ka lo zawng ang. I hrethiam em?" A ti sur sur a. Bella pawh a bu nghat mai. Kar loah Doctor leh nurse an rawn lut a, an hmai an tuam ve ve a, Bella chuan Doctor chu be nghal mawlh mawlhin naute harsatna chu a sawi bawrh bawrh a. Rosangpuia pawh an bulah rawn ding hnai vein, "Doctor, naute i en zawhah Zirsanga pawh saw min ensak leh la kan duh khawp mai. A khawsik saw a la reh hleithei lo va" a lo ti dam thlup a. Doctorin naute a en kual lai tak chuan Rosangpuia chu Zirsanga bula kal tum niawm taka a pen chu chhuata perek hmawr lo lawrah chuan a inchhuih nge Doctor chu a va bawh deuh rawk a, a palian sia, doctor pawh a pai nawk mai. Rosangpuia chuan ngaihdam a dil mawlh mawlh a. A ipte lehlam puar sawt chu a zen tat a. Bella nen an insignal zauh bawk. Phone an kawl ta phawt e. 

Malsawmpeka chuan a ek a lo khawl ve a lo nia. Chu chuan a pum timarin a tina ve deuh a ni maithei. Damdawi te a han pe a, a thawk chak khawp mai, a e nghal par par mai a. A tap pawh a bang ta. Zirsanga pawh doctor chuan a han en ve leh a, nachhawkna chak chi a pe bawk. A hliam tak chu a hil tan tawh a, chetpui tam loh a ni rih mai. An chhuak ta a. Kawngka a inkalh rualin Rosangpuia chuan a phone ruk chu a phawrh ta a. A hmasa berin a nupui number a dial nghal phawt. Dingi lah chuan a la har zêk a, hmanhmawh tawh nen..

"Hello" a rawn tih rualin, "Duatpui, keimah.. I tha em?" Rosangpuia chuan a ti nghal a. Lehlama a nupui phawk zet chu hmu thei ngat se aw..

"Awii..Khaw nge i awm? Engtin nge?" A rawn ti bah nuai a.

"Ngun takin lo ngaithla ang che. Ka biak zawh che hian Amanda bia la, tuna ka phone rawn hmanna number hi chhui rawh se..doctor ta ka ruksak a nia, an hrechhuak tep ang. Kan awmna hmun hriat ngaihna a awm lo." A tih mek laiin, Malsawmpeka a rawn tap a. Dingi chuan a hre phak si, "Chu! Naute elo?" A ti phawk hrá a. 

"Aw..Naute..hei chu nakinah. Chuan, Chanchin thar i hriat ang ang sawi zung zung rawh. An rawn kal tep ang. Hmanhmawhin" Rosangpuia chuan a ti zung zung a. 

Dingi chuan an hotela thil thleng chungchang, Amanda fapa bo thu, Ruatfela a inpek thu bakah Hel pawl zing ami Sangpuia leh Mampuia man an nih thu..a hriat ang ang chu a sawi ta zung zung a. 

Rosangpuia chuan, "Cindy leh a thurualpui chu an fimkhur a ngai anih chu..min rubotu te hi hel pawl an ni lo tih kan chiang tawh alawm" a ti a. Kawngka a ri rak a. Phone a hmet hlum nghal.. A switch off lo thung. Doctora leh hmai tuam pahnih an rawn lang a. 

"Ka phone inru tih ka hria, min pe ru le" Doctor chuan a ti a. Thinrim awrawl erawh a ni lo. 

"kan hmu miah lo" Nauteii chuan a lo ti vat a. 

"Ka rawn luh dawn khan ka la ak tih ka chiang. Min pe vat mai ru..tha tetea ka dil lai che u hian" Doctora chuan a ti a. Tlemin a awki pawh a sang ta deuh. Drose chu Rosangpuia bula va dingin a kut dinglama Rosangpuia hnunglam chul pahin, "I la mi?" Tiin a melh chho há a. Rosangpuia'n a lu a thing nur nur, hnunglam atanga phone an inpe ru erawh Judy tih loh chuan an hmu hauh lo. Drose chu a lu a hai thut nge a lu a dawm vung vung a, Judy'n a lo chelh vat, Doctora te pawh an hamhaih deuh a nih hmel an melh ngur ringawt a. Drose kekawr kawng hnunglama phone chu Judy chuan phawi zauhin Zirsanga mutna bul chhuatah chuan a thehthla ta a. 

Bella chuan, "Ka pu, kan hmu miah lo tak tak..i thlauh zawk te hi a ni lo maw?" Hrilhhai hmel fe hian a lo ti zauh a. Rosangpuia chu a che vut, "I phone ru ila kan hmang daih tawh ang chu..khawi zawng ila, i thlauh aniang" a ti nghut nghut a. Hmaituama te pahnih pawh an rawn che ve nghal, an fimkhur ru hle tih erawh a lang. A rei thei ang ber an chelh a ngai tlat si a, Rosangpuia te pawh an che muang lui ve tho mai. Phone pawh chu Drose chuan a rap hmak a, a lo ri palh ang tih hlauhna erawh chuan a khat thung. 

Hetih mek lai hian Dingi pawn a tihtheih a lo ti ve mek bawk. Amanda a bia a, ani lah a buai lai a ni si, naute chungchang Dingi'n a sawi takah erawh phawk taka mengin a inngaihtuah fim tan a. Imma be nghalin Rosangpuia'n a nupui a lo callna number chu lo chhui turin a thawn ta nghal a. Hun an nei tlem bawk si. Chhungrilah an hmanhmawh tlang a ni ber e. Imma te lam pawn an theih ang angin an lo chhui a, location chu an chhui fuh thei ta. Imma phei chu a khur titih hial a ni. Amanda a be nghal zat a, Team te nen phone location chu va chhui zui tura kal an inpeih thu sawiin amah Amanda pawn a rawn zui tur thu a sawi bawk. 

An mutna lai vel zawng zawng an han dap dan dan a, doctora phone a awm si lo. An chelh rei tawk tawh tih hriain Judy chuan Drose a mitmei zauh a. Phone chu Drose chuan Zirsanga khum ke bula hmu fuh hlawl ang maiin, "Kha le..i phone chu" tiin a rawn lek kang ta va a. Mahse, thil pawi deuh a awm ta fô! Rosangpuia khan Dingi a callna kha a delete hman tawh si lo. A hmu ngei dawn si a, an awmna an sawn leh phah emaw tu emaw ber nunna hian a tawrh phah hial thei..an rilrua tawngtai mai loh chu tihtheih an nei ta lo. Doctor chuan a lek kang a, a check nghal ta ngei a, a tarmit kar atanga rawn meng rum ulin, "A tu phiangsen nge in lo biak a.." A ti pawr hlur mai a. 

"Tumah kan be lo. I phone i thlauh tih hria ila, i phone hi i hmu leh tawh kher lo vang" Rosangpuia chuan zam hlek lo hian a lo ti a. Ringhlel zeta melhin, "Awmna hmun sawn leh a ngai dawn a nih hi. Kei pawn ka tawrh phah ngei ang" a ti nghut a. Dingi number chu a dial nghal bawk. 

"Hello, Doctor, ka zin leh ta thut sia..ka appointment kha ka cancel a ngai tlat mai" Dingi'n a rawn ti nghal zat a. Makti zetin a phone chu a melh a. Thaw dep dêpin an lo thlir thung. 

"Tu nge i nih?" Doctor chuan a ti hul hak a. 

"A mak! Ka number te hi save ve la, Puii kha..ka pum na vanga vawi tam rawn inentir tawh kha mawle" a rawn ti vin hlar a. Doctora a bangbo tulh tulh. 

"Hei nichinah mai khan kan inbiak ka hre si lo va, history-ah a lang tlat bawk si" a ti he haw a. Puii inti chu a thaw hawk a. 

"I hnuaia thawk pakhat sawi dan che kha a lo dik tak tak a nih dawn hi. I memory lam a chiankuan tawh loh thu a sawi kha..engmah i hre leh tawh lo a nia, Naktuk tukleha rawn kal tur ka nih thu i rawn sawi kha mawle" a rawn ti mawlh mawlh a. Doctora mitmeng chu hmuhnawm khawpin a danglam tawh a ni. 

"Ngawi lawk teh, kan sawi tha dawn nia. Tunah chuan tihtur pawimawh ka nei rih" tiin a dah ta ringawt. A rilru a buai ngei mai. A chhan pawh kumin kumtir atang khan a hriatna hi a pawnlangin a haihawt thar ta riau a, chu chu hmuh theih khawpin a lo lang chhuak tawh em ni ang? Ngawi rengin an chhuak ta daih a. Judy te ho chu an thaw huai mai. 

"I nupui chu a fin kha le.." Bella chuan Rosangpuia melhin a ti a. A khi sak bawk. Rosangpuia erawh Dingi dinhmun a derthawn tak avangin a hlauthawng ru viau. 

"Tluanga, ani kha kan hruai a ngai dawn. Lo inpuahchah rawh u" Ephraime chuan hmanhmawh zetin a ti a. 'Ani' tia a sawi chu Zochhingpuii a ni. Nichin mai khan Amandain a rawn bia a, Mi bo ho awmna lai an hriat tawh thu leh an kal nghal tur thu a rawn sawi a, tel ve ngei a tum tlat a ni. Sawrkar uikhawi ho chu thisen chhuahsak pawh pawi a ti hlek lo. A eizawnna a lo than hnan tawh avang hian rik rap rap hi ani zawngin nuam a ti a, Amanda nena thawh duna engkim hmachhawn chu a cho zek zek tawh a ni. Amanda pawh a car hnunga a pasal phuar hlawma mu reng phur chungin chak zetin a tlan par par a. A phone rawn ri chu hun lo a ti viau naa, Imma a ni tlat..

"Aw ..Imma" a ti nghal zat a. 

"Hotu te lamin min dang rih tlat! 'In team ringawtin inhmachhawn chuan buaina a nasa zawk ang, inhloh palh a hlauhawm' an tia. Team dang an select leh mek. Amanda, kan tlai ngei dawn anih hi" a rawn ti ta a. Amanda a ding hráwk. Thinrim hmai sen teuh chungin, "Ka hlauh ang ngeiin maw?! Engvanga hrilh nge in nih?" A ti ram hmak a. A mitmeng pawh a de sawr sawr mai. 

Imma chuan a chil lem khawlhin, "Julie te an lo kamtam deuh atin ni" a ti zawi sup a. Pawi a ti ve tak tak tih a aw atang pawn a hriat. Amanda pawh inbengdaiin, "Aw le, keiman ka va hmachhawn mai ang e. Mahse, tumah hrilh suh ang che" a ti sap a. 

"Ka rawn zui ang che..ka lo kal nghal" Imma chuan a ti zung zung a. Phone an dah nghal. Amanda chuan a motor start nghalin chak zetin a tlan leh ta a. 

"Amanda, ti duh suh. An tlan khalh hneh tawh lutuk che" a hnunga phuar hlawma mu reng Sama chuan a rawn ti thut a, Amanda pawh a hamhaih deuh. A harh lo emaw a ti kha a nia. 

"Nang ka nei tal che alawm " ti el rawngkai lek lek hian a ti a. Sama chu a rawn khuh bawrh bawrh a. Amanda chu a tlan muang ta deuh hlek a. 

"I uirena pa nen khan vawi engzat nge in mutdun?" A rawn ti ta hlawl a. 

Amanda a khi sak, "Vawi engzatmah" a ti hmak a. A meng rum sawt bawk. Sama chu a nui hawk hawk a. "Naute pawh kha a fapa a ni ngei awm si a" a ti zawi sup a. Amanda a ding leh hràwih. Car atanga chhuakin Back seat lam kawngka chu a hawng thuai a, Sama chu a pawt tho lawp..a hmaiah a hnek ta siah siah a. Sama hnar chu a thi nghal zawih zawih. Chutiang taka Amanda thinrim chu Sama pawn a la hmu ngai lo. A hamhaih ve deuh bawk. Sama a chauh deuh hnu chuan, "Samson, mipa i nih ngai chuan hei hi lo hria ang che. Ka nunhlui kha chu ka nunhlui a ni. Mahse, kha nunhlui ka kalsan hnua ka mipa mutpui leh hmasak ber i ni a. I la ni reng bawk. Thluak suksak theih khawp pasal ka lo nei che hi kei pawh ka inhmusit ta e. " a ti khur hlawk hlawk a. Sama erawh a ngawi reng. A rilru a buai ve deuh a ni maithei. 

Amanda chu ngawi rengin carah a lut leh a. A tlan zui leh nghal hmiah. 

Tluanga chu rilru buai hmel takin a vei a vei a. A bialnu Zochhingpuii ramhnuaia tirha ramsa nihtir leh ringawt chu harsa a ti a ni. MAhse, an hotupa berin a mamawh miau si a. An pawl tana lakluh a nih angin a tirh ngei chu a ngaih hmel si. Hreh zetin Zoi chu a ko chhuak a. Aw lawi lek lek hian, "Zoi, ramhnuaia i kal leh a ngai dawn tlat mai" a ti sup a. Zoi chu a hnual rawih hian a lang. Phurna reng reng a nei lo niin a lang. 

"Ti nge? Ramsa nih ka duh tawh lo asin" a ti sep a. 

Tluanga chuan, "Ramsa i nih kher hi ngai lo se ka ti..kei pawn. Mahse, tun tum chu a pawimawh si a. I kal leh hram chu a ngai a ni" dichim takin a ti a. Zoi mittui a parawl kiang mai. Lainat zetin Zoi chu a kuah a. A chalah fawpin, "I kiangah ka awm zel dawn alawm" a ti sup a. Zoi mittui a baw záwih mai. 

Ephraime chuan Amanda callin an thlen chin a rawn hrilh a. An intawhna hmun tur te sawiin an inbiakna an titawp ta nghal a. Phone a dah rualin Ephraime chuan, "Ka ba tlat che a ni. Amanda..ka zui zel ang che" a ti zawi sup a. 

Kawngka a rawn inhawng thuai a. An phu zawk hlawm mai. Hmaituam pathum rawn lutin, "Zalen takin kan siam che u a. In theihna zawnah chhuah dan kawng in lo dap ve zel a. Tunah chuan a mal tetein kan dah hrang tawh dawn che u" pakhat chuan a ti pawr hlur a. Nauteii a men par nghal. Sangpuia jail tan thu Dingpuii ka atanga a hriat atang khan biak tawng zawh a ni tawh lo hrim hrim a. Tunah an dah hran vek lehzel phei chuan engtin tehlul nge a awm ang?! 

"Min chhuahtir hi a hun tawh viau zawk lo maw?!" Rosangpuia chuan a ipte zen chungin a lo ti ram hmuk a. 

"A la hun lo. A hunah chuan in kal mai ang. Tuna chhuah in lo tum ve sek hian min tihel laklawh tawh a ni" pakhat chuan a lo ti a. 

An ngawi thap. 

A hnu deuhah hmai tuam dang pakhat sang deuh rawn lut lehin, "Khai le..insiam ru le..hmun dangah kan insawn a ngai. An mit saw va tuam vel r'u le" thunei awm tak hian a ti a. An rawn kal hnai a. An mit chu an rawn tuamsak ta hlawm a. Bella chuan aw khur dar dar hian, "Ka naute hi..ka kuah thei nang. " a lo ti a. 

"I naute a ni lo. I enkawl rih mai chauh a ni. A enkawltu tur dang kutah a awm tawh dawn" a bula ding chuan a rawn ti sup a. Bella a mur sung sung thei. La inkuah tamin la inchul lutuk lo mah se; a hmangaihna zawng zawng Nauteah a chhunglut vek tawh si. A tah a chhuak ut ut mai. 

Zirsanga chu pahnihin an kuah a. A chauh deuh vangin eng han sawi thei a ni lo naa, a lungawi lohzia erawh a insehruh danah a lang chiang viau thung. An mit an tuam tlat si avangin khawi hmunah nge an kal dawn tih tuman an hre lo. An awmna hmun chhuahsana pawn boruak an hîp chuan an thaw a chham lek lek mai. An han ding ren rawn a. Motor start thawm an hria a, ramhnuaiah chuan an awm lo a ni maithei. An kut phuarsak ni bawk nen, chet lak ngaihna a váng riau. 

"Motorah hian dah lut ru" aw thum lam hian a rawn ti a. Nauteii atanga tanin a indawt tetein motorah chuan an lut ta a. An lut fel kawngka an rawn khar dawn lai tak chuan motor rawn ding dawt thawm an hre ta a. 

Aw fiak ring tha leng lawnga, "In zavai khan in bàn phar r'u. Man in ni e" tih ri an hriat rual chuan an thaw sang sang thei nia..Nauteii phei chu a ngik faih a, Judy in zawi sapin, "Amanda a lo thleng ta" a ti a. 

Engkim chu a reh thuap mai. Mahse, 2mins hnu velah ramsa hram rapthlak tak a rawn ri khawk ta rum rum mai le..a hram dan rapthlak zet avang chuan an hmulthi a ding sung sung a..an tukhum pawh a hit mam mam mai. 

"Kan hual bet vek tawh che u" mipa aw tih hriat zet hian a rawn ti leh a...A sawi zawh rualin silai a puak thuai..engkim chu a reh ta tlawk tlawk a.

(A tlem ka hria. Tawipui atangin Hauruangah ka haw phei a. Ka rawn ziak nghal. A tam thei lo a ni e. Ka tiam tawh che u a, hlen hram ka duh sia..infel kha aw 😍