inferno 8

INFERNO (8)

Ziaktu: Toni Rálte

"Kan awmna lai hi khawi hmun nge ni ang le? Pawn lam lah a hmuh theih tawh si loh" Nauteii chuan a ti nang nang a. A nu leh pa bakah Sangpuia a ngai tawh lutuk chu a mumangah a hmu ziah lehnghal. A u pawh a ngai tho. Amah vangin a u te pawh an innei thei rih awm si lo va. 

"Ni ngawt mai. Khaw nge kan awm le?! Hre tal ila" Judy chuan a lo ti ve bawk. An rilru a baihvai tlang viau naa, tihhlum an ni dawn lo tih an hriatna erawh chuan tlemin a muan ve deuh tih chauh a ni. 

"Zirsanga hi dam chiang se a thawh hnih nan kan bei leh dawn nia. Sawrkar lam hian min zawnhmuh an hlau mai si a" Rosangpuia'n a lo ti nghut a. 

An awmho rei tawh bawk a, an chanchin bakah eizawnna te pawh an inhrilh tawn vek tawh a. Mahse, pawn lama thil thleng erawh hriat ngaihna a awm rih lo. Amanda ten buaina an tawk tih pawh an hre lo va, hel ho ten a rukin an zawng ve reng tih lah an hre hek lo. 

Judy chuan a pasal Ngura leh a chhungte a ngaihtuah a. Amah vanga he buaina hi thleng em ni ang tihte thlengin a ngaihtuah a ni. A nu leh a thawhpuite a mantir atang khan thil a pangngai lo chho zual a. Mahse, a nu thawhpuite man an nih hma khan mi bo kha chu an awm tawh tho a, tlemin a inthiam leh deuh. Sawrkar leh secret society inzawmna hi Amanda hian phindarhin puangzar vek se a duh hluah hluah mai. Ama lamah chuan tihtheih neiin a inhre tawh rih lo. 

"Ramsa kha kei chu a hram ri kha ka bengah a la cham tlat zel mawle" Drose chuan a lo ti ve mek a. 

Arini chuan,"Thil pangngai tak chu a ni lo alawm" a lo ti ve nghat a. 

Rosangpuia chuan,"Hman deuha ramsa mihring tia an sawi thin, kan zaithiam hranghlui Zohlupuii fa tia an sawite pawh kha min tihrechhuak deuh. Kei pawh ramsa naran niin ka hre lo" a lo ti ve a. 

Nauteii chuan,"Min rubotu te hi sehhlum vek se" naupangchhia zetin a lo ti ve a. Judy chuan khi sakin,"Buaina hi a reh tep tawhin ka ring. Lungngai lo phawt ang u" a lo ti thliam a. An zingah hmeichhiaah chuan Drose dawtah Judy hi a phanchang ber a, Drose aiin a sehhel zawk bawk. Thil a paltlang tam ve tawh êm bawk a ni. 

Tluanga chuan mau -a siam khuma mu mek Zoi chu duat zetin a hmai a chulsak heuh heuh a. He hmeichhia nen an inzawmna hi a thúk tawh mah mah a ni. Zoi chu a rawn meng diar diar a, Tluanga hmel a hmu thut chu a hamhaih nge a phu deuh zawk a. Mahse, a inthunun leh vat. 

"Ka..ih, ti nge hetia ka mut?" a ti niah niah a. A chil a lem khawlh bawk. Lainat hmel zeta lo thlirtu Tluanga chuan,"Kan rawn zawng hmu lawk thei lo che a. I chau lutuk a..mu hahdam rawh" a lo ti dam thlup. 

Mit khap sak sak chungin ,"Ramsa nih hi ka duh lo asin" a ti tham tiak a. Tluanga kut a khur deuh, "Ka hria alawm. A damdawi kan hmuchhuak tep ang. Lo nghak hram hram rawh aw" tiin a chalsam a huih chhohsak a. 

"Rapthlak min ti em?" a lo ti leh a. A lu thingin, "I duh vang a ni lo alawm. Hmeichhe duhawm tak i ni" a lo ti thawp sup a. Zoi pawh a ngui hmel a reh duak mai. Tluanga chulna te chu a nuam veng vengin a hria a, hetiang feelings hi a vawikhat neihna mah nise; a hrethiam ve tlat. Hmeichhia a ni miau a. 

Zomuansangi chu a tap zawih zawih mai. A pa leh a nuhrawnte chuan a khum bula dingin an melh ran a. A pa chuan, "I tana ti ka ni..ka fanu i ni a. Him taka i awm hi ka duh a ni. Sawrkar hian hma a lak tak tak hunah engtin nge i awm ang? I nghenchhan i pasal hian a phatsan lovang che tih tu nge sawi thei?" a ti dap dap a. 

"I makpa ngei mantir tumin hma i la a nia. Ka pa, Ephraime hian vawi tam a venghim tawh che asin. Thihna i pumpelh tawh dante kha ngaihtuah teh. Keimah vang chauha hmaih che a ni. Tunah kei min chhuanlamin mantir i tum leh ta chu a nia. Ka tihtir dawn reng reng lo che. " Zomuani chuan a ti hlawp hlawp a. A pa a huatna mitmeng pawh a sen rám mai. Vawiinah Ephraime a rawn kal dawn a, chutah chuan Sawrkar lamin lo bitum an tum tih a nuhrawn leh a pa titi atangin a hre ru ta hlauh a, hun a nei tam tawh lo. Engtin nge Ephraime chu a biak pawh tak ang? Ephraime hian number tam tak a nei a, a chang chuan a reh hmak thung thin. A number atanga chhui chhuah a hlauh vangin sim card tam tak a nei. Khatiang thu a hriat rual khan Epraime biak pawh a tum nghal a. A switch off tlat si! Kawng dang awm se a va ti tak..

A pa lah chuan a veng deuh reuh nge a chhuahsan duh der lo mai a. A nuhrawn ringawt chu nise a pallui thei ang. 

"Zoi, ngun takin ngaihtuah rawh. Hel pawl hruaitu nupui i ni tih hi hria se..khang an lo thah tawhte chhung khan phuba an la duh ngei ang, dik tak chuan kan him lo a nia. Chu pawh i pasal vangin.." a pa chuan zaidawh deuh si chuan a ti leh a. 

"Mahse, ka hmangaih alawm..ka hmangaih" a lo ti tuar a, a nuhrawn a chek hlak. Mahse, Zomuani chuan chutiang chu a ngaipawimawh ber lo. Ephraime chu engtin nge a venhim ang tih chauh a ni a ngaihtuah ni. Mi dang han biakpawhna tur number a nei bawk si lo. Thil pakhat a ngaihtuah chhuak thut..

A phone a chuh that a, bathroomah a luhpui. A pa chuan a melh run run naa a ngaipawimawh duh lo. 

" Amanda, keimah Ephraime nupui ka ni. Amah ka be tlang thei si lo va, sawrkar lamin an veh mek a nia. Chu chu min hrilhsak hram teh" a ti ta zung zung a. 

"Aw le..hahdam takin awm rawh" a rawn ti dam thlap a. Phone an dah zui nghal. 

Amanda chuan a mit hnuai lam val kulh chu a melh ngawt ngawt a. Hnute pawh a pek hmaa a fapa bo chuan a nun pum a nghawng chiang a ni. A rin loh lam atanga beihna a tawk hi dawngsawng thiam mah se; a chinfel dan tur kawngah a pasal ngei a tihnat tel ve a ngai dawn tlat! Sama hi a hmangaih a, a hmangaih zel dawn pawh a ni mahna. Nasa takin Sama hian a tina mek a ni. Mahse, hneh taka a thluak an suksak vangin Sama chu dem pumhlum tawp a la duh chuang lo. A rilru lam hneh a ngai tih a hai lo. 

"Ma'm, Sama chu kan hling tawh e. Lockup-ah a awm" Imma chuan a rawn ti a. A nau neih inhliamna pawh a la dam chian hma hauha a chet chhuah a ngai a. Sama a hmu zo ang a, Police department hi a mangtha hlen tawh ang. He department-ah hian tihtur a nei tawh lo, amah dodala khinthlak tum ngar ngartu te tan hian a thawk reng dawn bik lo. 

"Ka rawn hmu ang e" a ti sap a. Doctor phal lo chung Station lam a pan ta a. A chau tih a mitmeng leh a kal dan atang pawn a hriat. Mahse, a fapa a bo a, a mu mai mai thei lo. Lockup chhungah chuan zawi muangin a lut a. Sama chu kutkawl bun chungin a lo thu ran mai. 

A hmaah tak thuthmun rem vein, "Khawiah nge i dah?" a ti nghal tháwr a. 

"Hmun himah, amah enkawl thei tur bulah" a lo ti ram hmuk a. Amanda a ner sawk. 

"Tihnat che ka duh lo a nia. Ka fapa min pe la, kan inthenna lehkha kan tifel nghal dawn nia" a ti dam diai a. Sama chu a nui huk, "Engvangin nge ka then ang che? Then che ka la duh hleinem. Tihian ka nupui ni chungin i damchhung nun hi hremhmunah ka chantir ve dawn a ni" a ti bawrh bawrh a. 

"Sam, amah chu tu nge? Tu nge i thluak sutu hi?" Amanda chuan a lo ti chat. 

"Tuman ka thluak an su lo ve. Thudik leh kawng dik min kawhhmuh mai zawk a ni. Rin loh hram kha ka duh asin, mahse, ka mit ngeiin i uire lai ka hmu miau a. Mipa thinlung kehchhiain a nghawng natzia chu i hrethiam tawh em?" duhthawh zet hian a lo ti a. Amanda a thaw hawk. A va beidawnthlak thin ve aw. 

"Ka uire lai min hmu a maw? Wow! Khawiah?" a ti zangkhai vah a. Inringtawk zetin a pasal a melh bawk. 

"Hotela in inthlah lai kha ka hmu ngei che u alawm. Amanda, ni e, i hnuaia hnathawk ka ni thin. Chutiang ka nih avang chuan i duh duhin min chhaihkual thei tihna a ni lo a nia" Inringtawk ve tho hian Sama chuan a lo ti a. 

"Chu hmeichhia, thudik anga ngaihtirtu che chu tu nge?" a aw chuan ngaihno a bei lo tan. 

"Ni lo ve. Tihnat te kha i tum a ni awm sia. Ka venghim tlat dawn. Chuan, i fapa chu ngaihtuah suh. A la dam e" a ti nghut nghut a. 

"Ka duh miah loh thil ka tih a ngai dawn a nih hi. Min dem miah suh ang che" Amanda aw chu a hriam hraih a, a mitmeng pawh a thim raih mai. A ding a, Sama darah chuan khawihin na zetin a hmet ta a. Sama chuan a dar chu a tliak ta emaw a ti hial! Mahse, a inla pa ve a. A rum duh eih lo. 

"Samson, tu nge i thluak sua i fapa ngei rubo tura tirtu che hi ka hriatchhuah hunah chuan..Detective Amanda ni loin Phuba lak ching Amanda ka ni tawh ang. Nang ngei pawh hian i tuar ang. Min dem suh ang che" aw khur dar dar leh mittui tling pam chunga a tih hnuah a chhuak a. Sama phone chu lain a check nghal zung zung. Mahse, Sama hi a lo hruai fing zo ve tawh nge sulhnu engmah a hnutchhiah bik tlat lo. Mahse, a beidawng dawn lo nasa, beidawng thiang a ni lo. 

Mapuia chuan Sasa kut vuanin, "Hrethiam ve la, ka nau a bo mek a. Engtin nge ti se min tih? Dawhthei ve rih rawh" a ti mawlh mawlh a. 

."ka chhungte hian min nawr nasa em a tin ni. Thil an hrethiam duh tlat lo alawm. Nau i pai tawh a, ngaihsak i va hlawh lo ve an ti zel a.." Sasa chuan a ti a. A hmel a hlim lo hle. 

"Ka phak ang tawk chuan ka ngaihsak chein ka hria. Ka nau bo vangin rilru zawng zawng ka la pe thei rih lo zawk che a ni. Min hrethiam rawh" Mapuia chuan nuam tih loh hmel deuh hian a ti a. Sasa erawh a túm búr thung. Mapuia chu a hrethiam lo pawh a ni lo, a chhungte tawngkhum dan hi a hne tawh a ni. 

"Min ru mai rawh" a ti chawt a. Mapuia a phu zawk. 

"Eng a?!" a ti nghek. 

"Inru mai ang. Kan inah hian ka awm ning tawh" Sasa chuan a ti nghar nghar a. 

"Innei tho tur kan ni sia.." a ti a. 

"Chu pawh nise i bula awm ka duh tawh alawm" A ti leh hmiah. Sasa awm dan chu mak a ti deuh. A hmanhmawh thut chu..a chhungte atangin nawrna a nasa tawh hle a lo nih dawn hi. 

"Sasa, ka nu ka rawn phawt ang aw. Lo dawhthei hram la aw" nem deuh zawkin a ti a. Sasa chalah a fawp zauh bawk. A lungawi chawpchilh ve ta nge, Mapuia hawn dawnah chuan a nuih ve leh tak kha..

Zoliansanga chuan Hlupuii chu farm house-ah a pawm lut a, duat deuhin a muttir a. Damdawiina awm kha Hlupuii'n a nin tawh em vangin Doctor te remti lo chung an chhuak lui a. Farm house an pan leh ta poh chu a nia. Hlupuii mitmenga eng emaw inthup chu Zoa chuan zawh fiah ngei a la tum tlat a ni. Damdawi pek pahin, "Ei la, lo mu hahdam rawh. Rawng ka'n bawl ang e" a ti a. 

"Ka pui thei rih si lo che a.." Hlupuii chuan a ti sap a. An nu sama chulin, "Ka tithei alawm" tiin a nui suk. 

Choka lama a rik rak rak lai chuan kawngkapui chu an rawn kik dat dat a. A kut hruhul vat vatin a va hawng a. A tawlhhnung dáwrh mai. A meng phawk hle bawk. 

"Pa.." Zoi leh tlangval a la hmuh ngai loh hmeltha leh lian tak an lo ding dun ral mai. 

"Bawihte" a ti ban chhalh a. An rawn lut ta a. Kawngka chu a kalh vat. Zoi chuan sitting room-a a nu mu bal chu va pan nghalin, "Nu, keimah vang em ni?" a ti tham tiak a. 

Hlupuii chu a rawn meng diar diar a. 

"Bawihte,.i tha em?" a ti sap a. An inkuah dun rial a. Tluanga chuan Zoi leh a nu chu a melh tawn sek mai. 

"Eng nge in lo tih dawn? Bawihte, he lai hi i tan a him lo asin" A pa chuan a lo ti a. 

"Inthlakna thenkhat lo lak kan tum a. Chuan, hei hi U Tluanga a nih hi" tiin a bula thu chu a kawk a. Tluanga pawh a lo bu zauh. 

Zoi chu a pindanah lut nghalin a thawmhnaw thenkhat chu a va pack fel a. Tluanga erawh Zoliansanga chuan coffee a lo siamsak ve mek bawk. Hlupuii chuan, "Tun hnaiah ka fanu hi a danglam leh em?" tiin a zawt a. 

A chil lem khawlhin, "Aw..zan khat chu" a ti zawi raih a. Ramsain mihring a beih thu kha Hlupuii te hian an lo hre ve lo a nih hmel. 

"Ka va lainat thin tak em" a nu chuan a ti halh a. Tluanga chuan,"Ka lo enkawl dawn alawm. Ka kutah dah ngam ula ka duh a ni. Venhim ka duh" duhthawh zetin a ti a. Hlupuii te nupa chuan mak an tih hmel kher mai. Tluanga chu mipa rintlak tak nia a lan avangin an ngaih erawh a ngam deuh e. Zoi pawh a insiam zo va, a him tawk loh em vangin a nu leh pate chu a fawp ve ve a, an inthlah liam leh ta phawt. Camp lam panin an kal leh nghal a. 

"Vawiinah hmeichhe pahnih pawh an rawn thleng ve dawn e. In inkawm thei viau ang." Tluanga chuan a ti a. Zoi a ding dat. Tluanga melh ran chungin, "Chuan, kei aiin i ngaihsak lo vang tiraw?" a ti sep a. Tluanga nuih a za deuh. 

"Nang chu nang i nia lawm. " tiin a darah a va vuan a. An inmelh chiang ngang mai. Tluanga a insum buai peih ta lo nge, Zoi hmuiah chuan a fawp ta siah a. Zoi chu mipa a fawh hmasak berna a ni bawk a, zei lo tak a ni. A zak em em bawk. Rei tawk fang an infawh zawh hnuah camp lam panin an kal leh ta a. 

Amanda chuan Ephraime number vawi tam a dial tawh. A off tlat si. Ani ber sawrkarin an man chuan ZCP tan tihtheih a tam tawh dawn lo tih a hai si lo. A rilru a han sêng leh tan a, a rilru kil khatah a fapa bo chu a cham ve reng bawk si. Inspector Dingliana a call ta a. 

"ZCP hotupa nia in hriat kha a dik lo a nia" a ti tháwr a.

Pu Dinga a dang deuh, "Zcp hotupa nia an sawi chu tu nge ni reng reng a. Engmah kan hre ve hleinem" a ti ta mai a. Amanda rin dan chiah a ni. An department pawh hi an phel tlat a tin ni. 

"chu tak chu i ngaih a tha em ni? Engmah i hre lo a maw?" Amanda chuan a ti kual a. Pu Dinga chuan, "Eng nge i duh? Amanda" a rawn ti ta a. 

"Nang leh kei min thlima kan hriat ve loh tura lang lo lam atanga min vehthlemtu te hi kan do tur a ni dawn lawm ni!" a ti nghet charh a. 

Pu Dinga chuan a lu tuai vut pahin, "Sawrkar lam kan tan chu a ngai si alawm. Hel pawlah kan lut ve thei hleinem" a rawn ti ta chat a. 

"Hel pawla luh kher a ngai lo. Nang leh i hoten tuna a dik lo zawk man an tumna hi indan theih chuan a bak chu keiman ka ti ang. Sir, ka hna ka bansan dawn tih kha i hre ve lo em ni?" a ti ta a. Pu Dinga hmel chu hmu thei ngat se chuan a makti meng phar chu mak a ti lehchhawng viau ang. Engmah reng reng a hre ve tlat lo a tin ni. Heta tang hian inphiarrukna an kalpui thui tawhzia a lang ruak awm e. 

"Tu nge amah chu.." Pu Dinga'n a rawn ti zawi sup a. Amanda chuan a hrilh a. Tikha chuan Ephraime chu Stationah hnuk lut pawh nise, Pu Dinga chuan a tihtheih a lo lantir ve tawh mai ang chu..Pu Dinga hi mi dik tlemte zinga mi a ni a, Amanda pawn an hotute zinga a rin ber a ni bawk. Tunah chuan a tihtur a hrechiang tawh a. A fapa leh mi bo te hmuha Zoram khawvel hi Mizoram sawrkar nihna dik tak hrilh hriat a ni. 

Dingi leh Pari chu a office-ah an inhmatawn ran a. An hotelah ngei Chhim pa hausa tia sawi Pu Nunsanga thah a nih atang khan Hotel chu an khar ta rih kha a nia. Pari hian hmuh a duh thu a rawn sawi a, a office-ah a ko ta a ni. Pari meuhin a fala biak a duh danah a pawimawh viau a ni mahna le. Pu Nunsanga thattu lah an la hrechhuak thei si lo. Dingi phei chu a awm a nuam tawh lo viau, a pasal a awm bawk si lo. 

"Cindy chuan chutiangin a tithei lo vang" A ti ban chhalh a. 

Pari chuan a kut zaizir nen meuh, "Ka hmu chiang em a tin ni. Kha pa kha hotela thleng a ni lo. Chuan Pu Nunsanga thattu kha a nih ngei pawh ka ring" a ti mawlh mawlh a. Pari hian a rin loh deuhin Cindy leh mipa pakhat a hmuh dun thu, chu pa chu hotela thleng nisi lo, room luah bawk si a nih thu a hrilh zo chiah a ni. 

"Eng ang hmel pu nge?" Dingi chuan a ti a. 

"Palian tak a nia, a hmel chhe lo. Ka rindanin Hel pawl a niang" a tih mek laiin Dingi'n a kutzungchal a hmuia dahin a lo khap vat. Pari chuan hlauhthawn hmel zetin a melh a. 

"Hel pawl hi khawi hmunah pawh an awm a, fimkhur a tha. Cindy chu ka lo be dawn nia" a ti dam thliam a. 

"Chuan Hotel hawn theih a la ni si lo va, pawisa ka mamawh bawk si, hetah hian min thawhtir ve hram la" ngenngawl zetin Pari chuan a ti a. 

"Naktukah ka lo be dawn che nia" Dingi'n a ti nghat. Pari chu a chhuak a. Rei tawk fang a thut ngawih reng hnuah Cindy number hmet chhuakin, "In fimkhur tawk lo deuh a ni. Pari hi duh aiin a kamtam maithei a nia." a ti sap a. 

Ruatfela chuan hmalam bih ngurin a motor chu a khalh a, a hmel en mai chuan eng nge a ngaihtuah a hriat theih loh. A pawr chhap mai a. A khabe hmul pawh a buk mah mah tawh. A nupui awm loh chu a hriat viau mai. A puzawn te in a pan mek a ni. Nancy te nupa an awm lo va, phai lamah an pa sumdawnna thilah an chengkual tam rih a, a nau bo vang erawh chuan a buai ve khawp mai. Ruatfela hi a rawn be deuh reng mai a ni. A puzawnte in a va thlen chuan an nulain kawng a lo hawnsak a. A pu chu a private roomah a awm a, chu lam chu a pan ve nghal. A pi erawh a hmu hauh lo. A pu room a va luh chuan lehkha eng emaw samin a lo buai hmel viau mai a. Ruatfela a hmuh rual chuan, "Lo thu rawh" a ti nghut a. 5 mins vel hnuah an nulain coffee a rawn dah a. 

Pu Thanga chuan, "Ka fanu hi tu ten nge rubo ka hria a. Mahse, ka chhanhim thei mai lo a ni. A chhan chu nang hian hel pawl i zawm tlat a. Keimah vang chauha la him i ni" a ti nghal táwng a. Ruatfela erawh chuan mak ti hmel a pu hran lo. A lo beisei sa te pawh a ni mahna le. 

"Chuan" a ti nghut a. 

"Inpe rawh. Tichuan, Arini a rawn haw ang" Pu Thanga'n a ti sup. Ruatfela a lo ner sawk mai. 

"Inpe ta lo ila" tiin a thu tha a. 

"An man tho ang che. Ka la phatsak char char na chea Pu Nunsanga thihna avang khan an nangching tho tho dawn che" a makpa melh ran chungin a ti ta a. 

"Chu! Min lo enthla tihna em ni?" a ti fiah kák a. 

"Ka fanu ka hmangaih leh ngaihpawimawh vang chauhin ka enthla che. Nangmah vanga ka fanuin a tawrh reng hi ka remti hleinem" a ti hmuk hmuk a. 

"Pu Nunsanga kha ka that hleinem" a lo ti daih a. 

"I that lo, ruahmanna erawh nangma siam a ni. " Pu Thanga chuan hnai fahrana rawn melhin a ti a. Ruatfela pawh a ngawi rauh rauh mai. 

Drose chuan a beng chhi ngun lehzualin, "Chu! Naute tap ri chu in hre ve em? " a ti thut a. An phu suau a ni ber. 

Bella phei chu a hnuk a ulh lek lek. A naute kha dam tur a ni asin le. An ngawih rauh rauh laiin kawngka chu an rawn hawng a. Naute pawm chungin nula hmeltha zet hi a rawn lut ta zan zan mai. Makti zetin an lo thlir thap. Bella bulah chuan dingin, "I naute i chán a, ka tawrhpui a che. Mahse, naute duhawm tak ka hmuhsak che a ni. Ani hi tha takin enkawl ang che. " tiin naute chu Bella mal chungah a nghat ta mai a. Bella hawihai chuan a lo melh háw ringawt. Mi dang pawh chuan makti fein an lo en thap a. 

"Ka..ih. Tu fa nge?" a ti bah nak a. 

"Hmeichhe ropui tak fapa a nih kha. Tikhan i fapa a ni tawh aw. " nelawm zeta nui saih chungin a ti a, thil dang sawi tawh loin a kal nghal daih. Kawngka chu a inkhar ri leh khap. An hrilhhai hmel chu a hmuhnawm tlang khawp mai. Naute lah chu a duhawm nasa mai si, a la sen em em bawk nen. Bella chuan dimdawih em emin a pawm kang a, a hnute rawn tang at at chu a hre nghal. Naute tap tur chu awiin a hnute chu a kaah chuan a zuk dah ta a. Naute tap pawh a bang hmiah mai. 

Zomuansangi te in kawta a din rual chuan mi 10 vel tur hian an rawn hual nghal khap khap a. A hamhaih ve deuh. A tu chuan nge lo set up ta ang? A kut hnungkhirh pahin Inspector Nunpuia chuan, "ZCP hruaitu i nih vangin man i ni e. " a ti hriam hraih a. Ephraime a vei nuih suk. An va che rang tan ta ve aw. A mantirtu chu a nupui a nih a ring lo nghal. Police motor-a phurh niin station lam an panpui a, hlawhtling an intih hmel khawp mai. Mahse, Ephraime chu a zàm eih lo. An rin aiin he khawpui mai ni lo he zoramah hian an inzar pharh tawh tih an hre lo a nih hmel. Custody-ah an dah a, Tuman an la rawn kawm lo. Mahse, darkar khat a liam hnuah Pu Dinga a rawn kal ta thauh thauh a. Ephraime chu rawn thlekin, "He pa hi engvanga man ngawt nge in nih? Ani hi chu Pu Liantawna makpa a nih hi. Pu Liantawna'n a hriat hma ngeiin chhuah r'u" a rawn ti ta mai a. Mahse, case IO chuan, "Sir, hektu an awm vanga la kan ni. Thute pawh kan zawt ve phawt ang" a lo ti vat a. 

Rawn ding lehin Pu Dinga bengbulah chuan, "A puzawn ngeiin a hralh alawm" a ti zawi sup a. Pu Dinga a mengphawk hle. Amanda sawi ang khan a hriat loha thil inphiarru a lo va tam ta êm. Sawrkar hian an ringzo lo nge, an dik tawk loh vangin an bekbawr ngam lo zawk. Amanda a biak leh phawt a ngai dawn a nih hi. 

A sam chu sang takah a tawn a, a silai chu check lehin a chemte pawh a kawngah a thiat diam tawh a. Darthlalanga ngun taka inmelh chungin, "Ka hna ka thawk tawh ang. Keima pual hna chauh.." a ti zawi sap a. 

Imanuela call chu la nghal zatin, "Ka bulah a awm tawh e" a rawn tih chuan a nui sak a. 

"Sama, min nawr na mah mah a ni. Min hrethiam ang che" a ti leh sap a. A in chhuahsanin Imanuela leh a hoten an lo nghahna hmun lam chu chak zetin a pan ta a. A va thlen chuan A pasal samsona chu phuarbehin a lo mu hlawm reng a. A bail te te a, tihian amah ngeiin a pasal chu a rubo ve leh ta chu a nia. Sama hian a naute awmna hmun a hruai thleng dawn a ni. A ruahmanna zawng zawng hretu chu Imanuela chauh a ni. 

"Ka lawm e. Imma..i nupui pawh damin ka hmu ngei ang" tiin Sama phur chung chuan ramhnuai lam a pan ta vang vang a. Imanuela chuan thlir zui vawng vawng chungin, "I dinhmun hi a va khirh tehlul êm.." a ti sup a. Ngawi rengin a motorah a lut a, khawpui lam panin a tlan ta a. 

(Love affairs lam ka rawn zep tan tawh dawn a. In rilrem viau dawn lo va, Mahse, a tul tlat. Tu te nge hmangaihna khura tlalut erawh ka sawi làwk lo vang. In duh leh min hau mai ru aw 🤣🥱

L

 

uvoh