Inferno 14

INFERNO (14)

Ziaktu : Toni Râlte

(Adds kha khawngaihin aw 🥰

"Sama, eng nge a awmzia? I awmdan hi ka lung a awi hlek lo" Sama pa, Pu Rina chuan a ti a. A fapa ngui búr chu a melh rum angreng khawp mai. 

"Pa, engmah in hre lo" a ti nghut a. 

"I fapa ngei i rukbotir thei a nia, Amanda lakah hetiang hi engtin nge i tihtheih?" a pa aw chu a chang bêng báwng hle. Sama erawh ngawi rengin a pindan hluiah a lut a. A ruak hiai mai. A bungrua engkim Amanda inah a la awm bawk nen, khumah chuan a let thla tawp a. Ceiling melh vang vangin rilru buai takin a inngaihtuah vung vung a. A tho leh vut, Sikret a tan a. Hip luh vang vang pahin, "Ti nge maw a hriatthiam duh miah loh le?" a ti sup a. A chang leh a nui hawk a, a thaw leh hap thin. Helhkam lian tak a nei tih chu a lang chiang khawp mai. A phone a rawn ri ral ral a, phur fahran lo va lain, "Aw . abby" a ti bung nghut a. 

"I plan a flop..ka tum a hlawhtling ta chu a nia. Neih engmah i nei tawh lo, ka lama tan ngawt mai loh chu" a rawn ti ham ham a. 

Sama a khi suk, "Khawvelah nang chauh pawh hi awm la, i lamah ka tang leh tawh ngai lo vang. I nihna dik tak ka hriat atang khan i hmel hmuh leh pawh ka duh tawh lo e" a ti chhum hmuk a. A lungawi fahran lo tih a lang reng mai. 

"Amanda chu a maltan ta bawk a, ka tan hun remchang min siamsak a ni ringawt. A bula ding an awm tawh lo, ka lawm e, Sama" Abby chuan zangkhai zet hian a rawn ti leh a. 

"A chungah engpawh a thleng a nih chuan i ring ruh ka thuai tliak ang. Hrereng ang che" insangmar teuh chungin Sama chuan a ti ta a. A mitmeng a alh phat phat mai. 

Central jail chhungah mipa pathumte chu khun khan takin an phun sép sep a. Ruatfela chuan, "Karlehah thu chiang zawk an rawn nei turah ngai ila, kan lo inralrin ve erawh a tha ang. " a ti zawi sup a. 

Sangpuia chuan, "Mei nge Helicopter?" a lo ti khauh. 

"Chu chu ka la hre bik chiah lo. Kan rin loh tum dan te pawh an rawn nei maithei. An tih ang anga kan awm phawt a tha" Ruatfela chuan a ti a. 

Mampuia pawh chuan, "Ramhnuai lama kan tam tal deuh a ngai dawn a nih chu..Taka! Dr. Zira leh a thuihhruaite hi pawn lam nen an la inzawm in ring em? Jail chhungah pawh hna kan thawk thei tho a nia" a ti ta hlawl a. 

Sangpuia chuan, "Hmanni kha chuan Dr. Zira chu sawrkar milian tak pakhat chuan a rawn kan ngei mai a..pawn lam nen an la inthlunzawm a nih chuan chet kan la ang chu..hei hi a ni lawm ni kan do ber tur" a lo ti ve chat a. Ruatfela pawh chuan,"Nia, kan mitmei ruk deuh a ngai a nih chu..kan awmhmun theuh atangin" tiin a lo tuihnih a. Secret society phindarh pawh hi ZCP hian an tum lian tak pakhat a ni ve tho a, a chhan pawh an inzarpharh nasa tawh si a, sawrkara thiltithei tak takte pawh an inrawlh ve vek si..Heng ho avang hian Zoram kalphung a danglam dáwrh thei tlat a tin ni. Chu chu ZCP hian an do rêm a ngai a ni.Tihtur hi an va ngah tak êm aw..

Rosangpuia pawh a hotel hawn phalsak a ni ta bawk a, a lawm nan a thian a bopuite nen hotela zanriah kil a rawt leh a. Dik tak chuan an lo bo ho rei ve tawh bawk a, an inbe pawp hlawm reng nen, an inngai ve riau tlat a ni. Drose erawh chuan chhuanlam a rawn siam leh a, mahse, "Nang ber i rawn kal lohin..ka lawm lo viau ang" Rosangpuia chuan a ti hmiah mai si. Drose rilru a buai angreng hle. Zirsanga hmaa va inlan chu a zak ngawih ngawih a ni ber, engkim a hre vek tawh bawk si. Kimi tak pawh zahawm a ti a, a mualpho mai ang tih a hlau a ni ber mai. Mahse, Rosangpuia te nupa sawmna zahawm a tih êm vangin zanriah va kil ve tur chuan phur vak lo chungin a insiam ta a. A nute erawh a nau kan turin an chhuak a, Puipuia nupui Msi nen in an nghak thung. An inkawmngeih tho bawk a, Thian tha inbunruahna nei hek lo, Msi bulah chuan a inbunruak ta hiau hiau a. A thawl huai nghe nghe. 

"Awii, ka va khawngaih tak che êm. A hrehawm dawn êm a nih chu..mahse, Zirsanga chu ka hmu ve chak e" Msi chuan a ti a. Drose chuan a hmaa an chaw eikhawma an thlalak chu a entir a, "A chhe lo ve bawk em a nih hi. A pa bawk sia, an nu ai hian a naupang chiang mai" Msi chuan a ti bawrh bawrh a. 

"Mahse, a care tawp. An nu kha a fel bawk sia, an inhmeh tawp. " rilru na ru deuh chungin a ti siam siam a. A chhungril erawh a na deuh. Kimi chu a thik phak ni lo mah se; a thik ve tlat si a. Tihbuaia an inkara tlakzeh erawh a tum buai lem lo. 

Zirsanga te nupa a pa te in lama chaw eia an chhuah tlai khan zanriah ei hma deuhin Zuali'n a rawn call a. Thlabar zetin, "U, misual an lo lut a" a rawn ti ta mai a! Kimi a hamhaih vek. Zirsanga'n Zuali chu a be ta a. Chaw pawh ei ta lo chuan an in lam an va pan nghal a. Zuali chuan a biang chu vurin a lo dep mek a, a meng bui lák bawk. Zirsanga te room chu a hnawk nuaih a, safe chu kar hawn an tum nasa tih a lang. Mahse, chuti maia kar hawn theih a ni lo. Kimi tlereuh leh thawmhnaw thenkhat a bo a, Zuali chuan an kut a tuar thung niawm tak a ni. Sawi tawh ang khan an awmna hi a fál deuh a, thenawm hnai an nei chiah lo nen, Zuali sawi danin, "In ka tihfel hnuah ka muhil a. Ka roomah..ear phone in ka ngaithla sia, an lo luh lai pawh ka hre bik lo. Mahse, ka zung tur ear phone ka phawi khan in room lam ri deuh rawk rawk ka hre ta a. Hlauthawng takin ka va en chu hmaituam pahnih a dum veka inthuam hian in almira vel an lo hai mek a, ka au ta thawt a. Min rawn hmu ta si, ka biangah min hnek a, min rek bawk. Safe an hawn theih tak si lohah chuan hmanhmawh takin an chhuak zui leh ta mai a ni" tiin. Zirsanga rilru a buai ru hle. Inrawkna nge thil dang vang zawk ni ang?! Zuali lah chu a la khur zawih zawih bawk si. A lainatawm angreng zawk. Thil hlu tham bo a awm chuang lo va, FIR pawh an thehlut ta lo mai. Zuali lahin an hmel a hre bik si lo. Tun hnuah fimkhur intiam chungin an ngawi ta rih a. A tukah Rosangpuia sawmna an dawng leh ta zat a. Zuali chu amah maia awmtir an hreh tawh vangin hruai ve mai an tum ta a. Ani Zuali lahin a lo chák sakhai ve bawk nen. Kawngka tha taka kalhin an chhuahsan ta a.

Judy te nupa erawh an khaw lama an awm rih avangin an rawn tel ve thei dawn lo thung. Nauteii pawh a pa dam loh a chhuanlam naa, Nguri'n , "Engmah tihtheih a nih chuan loh hi..va in la thawveng zawk rawh. I pa chu ka enkawl thei alawm" tiin a nawr a, a nu thu hnial a hreh ve bawk nen. Phur fahran lo chuan a insiam ta a. 

Isabella te nupa pawh an insiam mawlh mawlh a, karleh lamah Lungleia zin an tum nghe nghe. Bella rilru tihthawven nan leh thian hluite tlawh kualna hun a ni mai. Imma lahin hun awl a la ngah nasa mai si a. Bella chuan kawrfual hring dal raih, a vun rawng nena inchawih zet mai a ha hnalh a. Chapal a kethiah nalh zet pholang chiang thei tak changkang tak si a bun thlep thlep bawk. A pasal chuan a melh leh vung vung thin a. 

"Ka hmuhnawm viau ami" nui chungin a ti a. 

"Kan inneih hnuah vawiin ang renga i nalh leh i duhawm hi ka la hmu ngai lo. Ka nei thei che hi ka va lawm tak" Remruata chuan a lo ti sup a. Bella pawh a nui ve var var mai, hmangaihberte ka atanga fakna dawn chu tuin nge thinrima dawngsawng ngai..he mite nupa hi chu a hmeh pawh an inhmeh narawh e. 

Ephraime leh Zomuani te erawh damdawiinah an la tamtal a. Hna tul tam takin hmuak mah se, tunah chuan a nupui a pawimawh ber rih tlat. A thachhang dawltu Tluanga a awm tho bawk a, Report a rawn pe zeuh zeuh bawk a, a chet ve vak ngai lo va a thuihhruaite an che tha thei viau chu a lawm ve khawp mai. Zomuani lah zai a ni si a, chutimaia damdawiin chhuahsan theih a la ni si lo. Zomuani mutthilh lai chuan, Amanda a va call a. 

"I fapa i hmu tawh tih ka lo hria a. Ka lawmpui a che" a va ti nghut a. 

Chauh hmel angreng deuh hian, "Ka lawm e. Chuan, eng nge chanchin zel?" a rawn ti a. 

"Kan pawlah an rawn inpe ve ta a nih kha. Mahse, hei chanchin engmah ka la dawng tlat lo mai a, Anmahni ruaitu te hrechianga chhui zui turin kan kaltir kha a nia. Nizan lamah thil thleng eng emaw te a awm em? " a rawn ti let zawk mah a. 

"Nizanah chuan mi dang ka lo ngaihven miah lo. Lo ngaihven ka tum dawn nia. He thil hnawk zet hian ka chhungkua thleng min tihbuai tel ve avang hian a tawp thlen ngei ka duh " Amanda chuan a rawn ti nghet charh a. Ephraime beiseina a ni chiah bawk, "Ni e, i ho va chhui zui hi ka chak rêng a ni. An ni kha chu mi bo vengtura rawih mai chauh an ni a. Doctor Muanpuia rawihte an ni, Dr. Muanpuia ruaitu lehchhawngte hriatchhuah kawnga min pui thei tur an nia. Mahse, hei an la reh reng si a, ka ngaih a tha chiah tawh lo" Ephraime chuan a ti mawlh mawlh a. 

"Nizanah thil thleng a awm leh awm loh ka lo ngaihven ang e. Mahse, ka hna ka bansan tih i hriat kha..ka hlawhtling bik kher lo maithei a nia" Amanda pawh chuan a rawn ti ve a. An inbiakna an titawp nghal. Ephraime chuan Tluanga a be zui leh zat. 

"Ropuia te ho hi an va reh ve mawle. Kan lo ring hma lu deuh em ni ang?" a ti nghal zung zung a. 

Tluanga chuan, "Nimin chawhnu khan Ropuia chuan min rawn bia a, nizanah khan Doctor hnen atanga hlawh an lak tur thu a rawn sawi a. Thil a kal dik lo pawh a ni maithei. Ka be tlang thei miah lo" a rawn ti ve a. An fimkhur tawk lo chu Epraime pawh a inhaw deuh. A lo ring hma lu deuh niin a hria a, khatiang sum mamawh vanga mi bo veng duh khawp chu a aia sum tam zawk hmanga hneh theih mai an ni ang tih a lo ngaihtuah pha lo a ni. Amah leh amah a inmawhchhiat thul..

"A rang thei ang berin insawn chhuak r'u.." tiin thupek a chhuah ta nghal a. Tluanga pawn a lo pawm thlap. Khang mite khan an camp awmna an hre tlat si a, an rawn nangching thut ang tih a hlauhawm riau. 

Mahse, an rin loh lamin thil a kal daih thung si a. Nizan zan laiah khan farm house lam panin Ropuia te chu an hlawh la turin fimkhur takin an kal ngei a. Farm house pindan thuhrúkah anmahni lo chánga an ka hupsaktu tur an awm tih an hre hauh lo. An tum ve dan chuan Dr. Muanpuia hnen atanga sum an dawn hunah amah Doctor chu blackmail zuia a thawhpuite sawi chhuahtir an tum kha a nia. Silai pawh a rukin an pai vek a ni. An zu thleng a, Dr. Muanpuia leh male nurse a rawn hruai thinte khan an lo dawngsawng a. Thil dik lo rim nam engmah a awm lo niin a lang. Dr. Muanpuia chuan pawisa chu a sem ta a. Chet lak hun tur an ngaihtuah buai chhungin pindan rúk atangin vawi leh khatah mi 10 rualin an rawn hual nghal khup khup mai. A dik a dik chuan training pawh nei lo, pawisa mamawh vanga chhawrte mai chauh kha an nia. Chet lak dan tur an haihchham viau mai. Dr. Muanpuia chuan, "Pawi ka ti khawp mai. Ka tan in hlauhawm tawh si a, inka kan hup theihna tur kawng kan zawn mai a ngai a ni" a ti ta a. An ngaihtuahna tawi lutuk chu an inchhir ru vawng vawng mai. Kha lam reng reng an lo ngaihtuah miah lo kha pawi an ti hlen dawn ta chu a nih hmel. An phuar hlawm a, pindan pakhatah an khungkhawm ta a. An silai leh an phone te pawh an laksak vek. Chhui zui theih miah loh turin an sim card an tichhe vek bawk. An hmabak a êng lo khawp mai. ZCP lamin hetianga an awm tih an hriat loh phei chuan damkhawchhuah ngaihna a váng rih viau maithei. An nunna an la zuahsak avang erawh chuan eng emaw taka inhnamhnawihtir leh an tum niin an hria. Tu emaw anmahni aia fing vár deuh hlek thu mum nei thei tur awm ve se chuan kawng dangte pawh a awm mahna. An la dam a, chu zawng chu a ni rih mai e. 

Amanda pawh chuan DGP Pu Dingliana a be pawp nghal a. Engmah a lo hre lo. A thu hriatna ber Imma lah suspend a ni rih bawk si. A tu amah rinngam a nei ta lo nen, mi dang chu a be kual duh ta lo mai. A naute nen an in awm chawt mai chu a nia. Zep nàk emaw a nu hnêp lo bawk si, nau khawih chu a zei lo nasa mai a. Bual pawh a la bual lo. Tihnat a hlau tlat! Heti ringawt chu a dik dawn lo tiin nau awmtu a lak mai a ngai dawnin a hre ta a. Agency lam a va be pawp ta nge nge a, an ni lam chuan Amanda duh ang tak tur nu viak tha leh nau khawih zeihawi tak Pi Dini an rawn tir ta a. A ngainatawmin Amanda a zah thiam a, Amanda pawh a lawm kher mai. Lehlánga rawn kal tur a ni naa, a bula awm turin a sawm ta tawp a. Mahse, Pi Dini chu an chhungkaw eizawngtu ber a ni si a, in lamah a faten an mamawh ve bawk si. Zan lamah chuan an nufa chauha an riah a ngaih tho hmel. 

Rosangpuia'n a rawn call hlawl mai a. "Ka hotel hawn leh tur lawm nan zanriah min rawn kilpui thei ang em?" a rawn ti! A va timing chiah lo êm..

"Ka fapa hi ka kalsan thei rih lo a ni. Eng lai pawha ka ven reng a ngai tawh sia" tiin a chhang ta tawp a. Rosangpuia pawn a hrethiam êm ang chu. Anmahni rawn chhanchhuaktu kha a ni miau a, a ngaipawimawh ve khawp mai. Mahse, Amanda dinhmun a hria a, remchang dang a la awm mai turah a ngai deuh. 

"I nu te hian min hua alawm. Hei vang hian a nia ka nute pawn min hmuhmawh em em" Sasa chuan a ti bawrh bawrh a. Mapuia pindanah an pahnihin an awm mek a ni. 

"A ni lo vang, an haw lo che. Kan la buai ve rih êm a ni. Min hrethiam ve zawk la" Mapuia chuan a ti a. Sasa dul puar ve ák tawh chu a va melh zauh. Inneih hmaa mipat hmeichhiatna hman chuan nghawng a nei lian ta hle chu a nih hi, a nuin a ben phah hial kha a nia. Mahse, a nu chu a haw reng reng lo, heti taka a nuin a pa a lo hmangaih hi a lawm ru em em zawk. Nguri laka vuivai ngam tur niin a inhre lo va, a lo enkawl tawh danah engmah sawisel tur a hre hek lo. Nauteii nen angkhat vekin a ni a lo enkawl ni. A nu leh pate zilhna zawm zo lo va, Sasa a chetsualpui chu a inchhir ru tan riau tawh mai. Sasa lah a titau búr reng bawk si. 

Tluanga leh Zoi chu inkai chungin an inzui dat dat a. An inlen hleih angreng hle. Hmeh erawh an inhmeh viau thung. Zoi nu leh pate hmu turin an kal mek a ni. Zoi hi a natna a la chhuak leh ta lo va, chuvang ni maw a rilru pawh a hlimin a taksa thlengin a rawn maih chho ve tan a. A tira cher chhe dawldàng tak kha amahah hmuh tur a awm tawh lo. Zochhingpuii rawn tleitir chhoh tan lai vel tak tak kha a rawn ang chho leh tawh a ni. 

"Naktukah Aizawlah mamawh ka han lam dawn a, i lo kal ve duh em?" Tluanga chuan a ti a. Mahni insitna hlira khat thin Zoi chuan, "Min zahpui lo mi?" a lo ti he haw a. Tluanga a khi suk. 

"Engvang chuan nge ka zahpui ang che? Ka chhungte pawh hmelhriat ve la ka duh" a ti a. Zoi a ner náng, "Ka zak e a. Min hua ang" a ti nghat a. A lama kuah hnaiin, "Duhawm viau thin teh suh. Ka mitah chuan tuman an tluk lo che" tih leh a bianga fawh a rual a. Zoi pawh a nui sen sen mai. Kar loah Villa an thleng a. Valtea leh Dory an lo awm ve lai tak a lo nia. An han inhmu khawm chu an va hlim tak. Tluanga pawh a inti mikhual duh tawh lo va, a tlangnel ve tawh hle. Bakah Hlupuii ten an lo be siam siam bawk nen..thingpui te an han in a, an in lai chuan Tluanga chuan, "Ngaih loh lamah min lo ngaihsak lo ula, Zoi hi neih mai ka duh tawh a. In remtih chuan..hetia ramhnuaia hruai kual ve reng pawh hi ama tan a that loh ka hlau a, Khawpuiah ka chhungte bulah emaw in bulah emaw pawh lungmuang takin awm se , kan bula a khawsak reng chuan hmanruaa an hman leh ka hlau deuh sia..eng nge in ngaihdan le?" a ti ta a. Zoi zak chu a kalsawn daih. Dory a nui rah rah a. 

Zoliansanga chuan, "Kan fanu hi i hmangaih tak tak a maw?!" a ti hluai a. A mitmengah pawh mak tihna a lang reng mai. 

"Aw ka hmangaih, a nihna zawng zawng nen hian" Duhthawh zetin Tluanga chuan a lo ti a. 

Zoa bawk chuan, "Remtih lohna kan nei hran lo. Mahse, nakinah i nunkhua a la buai phah mai mai ang tih erawh kan hlau a ni. Sawrkar lam hian an la ngaihven ru reng bawk si nen" a ti duah a. 

"Sawrkar lam chu kan hmetmit thei maiin ka ring. A damdawi pawh a lo thleng dawn hnai tawh a. Hei damdawi a ei lo chung pawn a danglam ngai tawh lo asin. A mak khawp mai" Tluanga chuan a ti a. 

Valtea chuan, "Naute, lo kal teh. I zak em ni? Ngati nge i kalsawn daih. Heti taka hmangaihtu che i nei hi ka lawmpui teh mai che a nia" a ti lúng lúng a. Zoi pawh kimki leh lai zetin a rawn pen phei zán zàn a, Tluanga chuan a lo nuih suk. 

"Pasal neih chu i ngam tawh reng reng em ni?" Dory chuan nui chungin a lo ti ve a. Zoi zak chu a sen awp awp mai. 

"Ka hre lo, U Tluanga thu thu" a ti sep a. Hlupuii a lo nui var var..a fanu chu ngunthluk deuha melh chungin, "Ka fanu pawh hmangaihnain a bual á ve tan ta der mai..keima lamah chuan rem tih lohna engmah a awm lo ve" a ti a. Tluanga pawh a thaw huai mai. Ni e, dik tak chuan Camp-a Zoi kawl reng hi amah Zoi tan hian a him loin a hria, sawrkar lamin an veh ve reng bawk si nen. Ani chu mipa a nia , a inngaihtuah thei. Tin, a sawi tak ang khan Zoi an kawl reng chuan hmanruaa hman an tum leh a hlauhawm tlat! Ramsa nihtir hi a phal tawh thlawt lo a ni. 

Hotel chu Isabella te nupain an va thleng hmasa ber a, Drose leh Nauteii an thleng rual. Zirsanga te nupa an rawn lang ve ta bawk a. Judy te awm lo chu an kalh kim lo riau. Cindy chuan mikhualte chu hawihhawm takin a lo dawngsawng a, a hmel hmuh a nuam hle. Dawhkan an kil tlang thap a, Drose chu a kun tlat reng mai. Zirsanga chuan a lainat ru takzet a ni. Kawng dang a awm miau si lo va, A nupui Kimi aia hmangaih hi a nei leh theiin a ring tawh lo. Amah neih tuma a thisen hekzia te a ngaihtuah let hian Kimi aia a nuna hlu tur chuang awmin a hre hlawl lo a ni. 

Rosangpuia chuan, "Nangni hi fa nei ve tawh u la..a hun ve tawh alawm le" tiin a melh dun a. 

"Nia mawle..Kan fa hmasa ber kha thisain a rawn piang tlat mai a. Kimi phei hi chu a á lo chauh. A chhang siam chu a hun tawh viau mai.." Zirsanga chuan nui hak chungin a lo ti ve a. 

Drose chuan a kuttin a lo sik niap niap a, sawi tur a vàng a ti. Bella chuan, "A ni ve tho maw? Thisen mai la ni mahse, ka naute kha kei pawh ka mumangah ka hmu fo asin. " a lo ti ve sap a. A kut chu Imaain a lo vawnsak vat. 

Kimi chuan, "Nia, ka átpui lo chauh. Kan nghakhlel tlang lutuk kha a nia. Nia, Zirsanga sawi ang khan a chhang siam hi chu a hun ta viau mai. Ka tar mai dawn" fiamthuin a lo ti ve hlut a. 

"Taka Drose, hmanniah i nu Diteii nulat lai thlalak ka hai chhuak a. A hun lai khan a lo lar ve viau a ni maw? A lo chhe lo êm a nih kha" Dingpuii chuan a lo ti a. Drose a phu zawk. 

"Aa..nia, ka nu chu a pa thei lutuk a tleirawl lai chuan" nui seih chungin a lo ti ve a. 

"Nang pawh i nu vak loh hi" Zirsanga chuan a lo ti vat. An nui hawk hawk a, Drose erawh a na tel tlat! Zirsanga'n a kalpah lutuk chu na a ti! Mahse, dem theihna a nei chuang si lo. Nauteii ngui búr chu Rosangpuia'n , "Naute, eng nge i ngaihtuah? Vung vung zel a che" a ti thut a. Nauteii a phu zawk. 

"Aa..ih, apa ka ngaihtuah deuh a. Tun lai chu engkim hian rilru a tihah vek" a ti hawk a. Hriatthiampui takin, "A ni ngawt mai. Ka hrethiam che. Mahse, hahdam tum hram hram rawh aw" Dingpuii chuan a lo ti ve a. Nauteii pawh a bu nghat ringawt. 

Zanriah pawh an rawn dah tan a. A tui hmel leh hle. Drose erawh chuan ei chakna pakhatmah a nei lo thung. Anmahni viltu Rosangpuia'n a aiawh atana a hman ber Joshua chuan Drose chu a en duh hle. A hmuh hnu a ang a ti nge hmel tha a ti zawk ni? Drose erawh chuan a hre ve lem lo. Joshua hi Zo Choka lama an manager thin Mapuia phirpui a ni nghe nghe a. Tlangval lian leh sa tha lam, dam thlup mai, smart tak a ni. Thiamna lamah erawh a sang falua lo. B.A (Hist) a zo ve táwk a, kal zawm tawh loin Hotel management lamah a kal leh ta daih a. Tihian Aizawla Hotel lar berah Manager in a awm mek chu a nia. An unau hi IG velah chuan an lar ve riau. A nu ho va khawsa niin an upa ber mipa tho hiam gym a nei bawk a. An khawsak nuam thawkhat viau a niawm e. An hmel tha tlàng bawk a. 

"Taka kan nula rawn kal ve tum kha a thianten an rawn swm leh ta sia, ka rawn sawi laklawh sia..a zia lo tak tak" Kimi chuan a ti thut a. 

Dingi chuan, "A ho lutuk. Josh hian min rawn kilpui ve mai rawh se. Cindy a awm tho alawm..hawh, Josh" tiin Joshua chu a va melh a. Josh a phu uih. Drose a melh danah Dingpuii chuan thil awmzia a lo man thiam a nih a rinawm. Drose bula chair ruakah chuan a rawn thu ve a. 

"Ka hmu tawh chein ka hria" a ti zawi sup a. 

"Nia, hmu tawh ang." a lo ti ringawt. Octopus an rawn chhawp chu Nauteii chuan a hlau leh tlat pek a! "La bo mai teh u, mi ráp" a ti ta ngawt a. An lak bosak ta nge nge. Mahni duh zawng zawng sawiin an phûl ve hlut a, Drose leh Nauteii erawh mawlhtu an neih miau avangin duh angin mi dang titi pawh an pawl pha ve vak lo. 

Parkebali leh Dr. Muanpuia an inhmachhawn leh ta ran a. 

Pari chuan, "Zaninah khan hotelah chaw an kil ho..chuan, nizanah Rosangpuia chuan tu te emaw hnenah thilpek a pektir. Mahse, khawiah nge tih leh tu te nge an nih ka hre lo" a ti zung zung a. A tarmit kar atanga rawn melh kul chungin, "I hna hi tlin taka i thawh a ngai. A rang thei ang berin Hotelah pawh inchhun luh tum ang che. I target hmasa ber tur chu Cindy ka tih kha. A mi hmuh kha tu nge tih kan chian a ngai" a ti nghet charh a. Pari a bu nghat , "Ti nge police i rawih mai zawk loh? Hrilh vek la, an man mai ang a" a ti niah niah a. 

"Police ka rawih chuan tu nge ZCP member tih kan hre thei dawn hleinem" a lo ti khauh. Pari leh Dr. Muanpuia hi engti tiha inruai nge an nih tak ang? A bul chu hetiang hi a ni. Pari pawisa nei lo, tlachhe lutuk khan mi nau paisaka inhlawh turin thutlukna a siam a. Chuta a inentirna atangin ania an intawn tak ni. Pawisa a mamawhzia hriain leh Pari chu Rosangpuia nupui DIngi te monu hlui a lo ni tawh tihte a han hriat takah chuan, Enthlak hna thawk tura rawih tlak niin a hre ta a. Pawisa a awm hi chuan engkim a awlsam mai zel. Pari nau pai lai pawh a tihtlaksak ta hmiah a. Nau chhiat angin an kaltir ta kha a nia. Hotelah inhnimphum vein, a tir berah Rosangpuia vehthlem tura tirh a ni. Mahse, Rosangpuia rukbo a nih tak siah chuan a nupui Dingi enthla tura thupek pek a ni leh a. Mahse, tikhan inthahna a thleng ta thut a, Pari lahin thil hmuh a lo nei ve si! Dr. Muanpuia hian Rosangpuia hi ZCP member a nih leh nih loh tih hriat a duh a ni. A lo ni hlauh a nih chuan an tana a thawhsakte tan hian a hnawksak tham dawn tlat a..nuaibo vat a ngai a ni. 

Arini chuan a hmaa ding a pa chu a vau leh ta chher chher mai le..

"A tir atanga vawiin thlengin ka nun khaw nawm lohna siamtuah i tang ziah thin. Tunah hi chuan hei hi chu min tihsak ngei ngei a ngai. Ka pasal hi kan la chhuak ngei tur a ni" tiin. Pu Thanga a hawihil viau. Arini luhlul lutuk hi engtia tih chi nge mawni dawn ni..

"Ka thei lo, bail theih a ni hleinem..i hriat kha" a ti bah nak a. 

"Bail rawh ka ti reng reng hleinem. I thuihhruai jail tang mekte khuan kawng an dapsak dawn a ni" a lo ti chang rát. 

Hawi á ho chungin, "Engtin?" a ti hú a. 

"Meialh nasa tak an siam tur a ni. Tin, helicopter min hire sak bawk ang. Tichuan, in nun atang hian ka pasal nen kan kal bo kumkhua tawh ang" a ti ta nghat nghat a. Pu Thanga chu rilru buai takin a indawm kun reng mai. A fanu tihmawhzia a hrereng mai si. Duhthlan tur dang a nei leh dawnin a lang tlat lo. 

Pi Dini haw hnuah ani pawh eirawngbawlin phur fahran loin zanriah chu amah chauhin a ei a. A naute erawh a tlei viau mai. A tap mang mang lo. Hnute erawh a hne na reuh hle..Amanda a la chak vak si lo va, ani pawh vitamins leh ei leh in tha tak a mamawh tih a inhria. Tunah chuan an nufa chauhin khawvel an hmachhawn tawh si a. 

Door bell a ri tlang tlang a. 

Muangchangin a va hawng. Sama a lo ding ran mai. 

A phelh phang a, a sam a thur hle bawk. 

Khar leh mai a tum lai chuan, "Min ngaithla ve phawt la..hremna chu min pe tam tawk tawh alawm" Sama aw chu a ri chang chang a ni. 

Amanda chuan, "Sawi dun tur kan nei tawhin ka hre lo..sama" a ti sap a. 

"I sawi a ngai hleinem, ka sawi ang a, min ngaithla la a tawk..ka ngenna hnuhnung a nih chu..i remti em?" Ngenngawl zet hian a ti ta a. A pasal chu a melh vang vang a, ngaihthlak ringawt chu a pawina a awm hleinem ti rilru chungin, "A tha alawm. Mahse, i sawi zawhah i chhuak leh nghal ang" tiin kawngka chu a hawng zau a. Sama chu a rawn lut a, Sofaah chuan thu dunin an inhmachhawn ran mai.

"Amanda, Ka fapa nen hian ka hmangaih che u.." a han ti te te a. Amanda chuan a mitah tak a melh ngat ngat..

(Ka há a na leh tawh 🥺🥺