Inferno 13

INFERNO (13)

Ziaktu: Toni Rálte

"Late, hei, harh teh. I tha em?" Ngura chuan a farnu chu a sawi nawk nawk a. Lateii chuan nikhua a hre ta mang lo. Tualpui PHC-ah mai chuan enkawl dam zawh chi rual niin a lang ta si lo va, an mangangin an thlaphang tan ta hle mai. Aizawl lama phurh chhoh turin an han inruahman naa Doctor chuan, "Kawng lakah buaina in tawk ang tih chu ka hlauhpui che u em mai. A thui tham ve bawk si a" a ti nuah nuah a. Amah Lateii ber chu a thawk a sak tawh bakah meng tur pawn chakna a nei meuh tawh lo chu a ni. Kar kawngah an buai ang tih hlau ru viau mah se; kawng awmchhun an dap mai loh chuan..Judy te pawh thleng ve chauh mah se, a pasal farnu chu Aizawl lama a letpui leh a ngai dawn a ni. Nu ber lah a tap kerh kerh reng bawk si. Ngura rilru pawh a buai viau mai. Chutia Aizawl lam chhoh tuma an han insingsak lai tak chuan Tualpui khuaa mi pangngai phak zán lo va an hriat, amah maia khawsa Pu Hránga an tih mai chu tiang hawlin a rawn lang ve hlawl mai a. Sarang hian eng emawni a fun tat bawk. 

"Ngawi teh u, ka thinlungah turtu a awm tlat a, hei kan nula tan damdawi ka rawn kensak tawp mai. Hei hi hlo nuar densawm, ka rêp ro leh a ni a. Rul chuk damdawiah kan tet lai khan ka pa khan a hmang thin a, a ngeih chuan an dampui ve mai zel a. A lo dampui ve mial takin tih thuah han eitir ve reng reng teh u" a rawn ti ta charh charh a. An ngawi thup ringawt. Doctor pawh chuan eng a sawi lo. Pu Hranga lah chu a thutak phian mai si. Ngura nu a rawn tawng hmasa ta ber a, "Mama, han eitir ve reng reng teh. Pathian paw'n 'In rinna indampui' a tih thin kha maw. Kei beiseina ka nei tlat mai" a rawn ti ta a. Ngura pawh chuan thuawih takin Pu Hranga rawn ken hlo nuar rêp chu a la chhuak a, Pu Hranga sawi angin tuiah a chiah leh te te a, a tui chu a farnu kaah chuan a far lut ta a. Tin, rul chukna hmuamhmaah Hlo nuar rep chu a bel bawk. A kawtawpa mihring kan han tan tawh chuan awihawm loh deuh anga kan ngaih pawh hian beiseina min siamsak ve zel mai zawng a nih hi. Thinphu dep depin Lateii chu an thlir thap a, Pu Hranga chuan, "Tawngtaina ka'n nei ang e" a ti a. An maimichhing thap. A tawngtai ta a. A tawngtai zo an han men rual chuan, Lateii pawh rawn meng vein, "Khaw nge ka awm a?' Fiah fel takin a rawn ti ta mai a! Mak an tiin an hamhaih tlang bawk aniang, chhan lawk nachang pawh an hre lo. An lawm bawk si. Nu ber chuan a fanu chu a kuah thawk a, " Bawihte, ka va lawm em ve aw. Ná i la nei em?" A ti mawlh mawlh a. 

"Neih pawh ka hre lo, mahse, he lai hi tlem chuan a thip deuh" tii rul chukna lai a kheimit chu a kawk a. Doctor sawi angin Lateii chu drip an khaisak nghal a, nachhawknain an chiu zui bawk. Thil mak hi a thleng fo a, a la thleng lehzel bawk ang. Judy te nupa pawh an thaw suai suai mai. Pa ber hoin Pu Hranga hnenah lawmthu an sawi tliar tliar a, mi ten engah teh vak an ngaih loh, mi pangngai phak lo nia an hriat khan an tan damna a rawn thlen tlat si! Pathian hian mi tlawm zawkte nun hi inpuanchhuah nan a hmang fô reng a ni. Lateii pawh a muhil ta siai siai a, tunah chuan a hmuamhma bak enkawl tur a awm ta lo. A dam a ni mai e. 

"Bella, hei..i tha em? Ti nge tihian i awm?" Imma chuan a nupui a sawi nawk nawk a. Bella erawh a thle tawn sek a, a tang tûng bawk. A phun niah niah a, Imma-in a han ngaihthlak chian chuan, "Ka naute..ka naute" tih a ni. Mangchhiain a tibuai leh ta chu a nia. An bo an hmuh atang khan zantin deuhthaw Bella chuan mangchhia a mang thin. A naute thi ta kha a hmu thin a, thisena bual khat vekin a ni a hmuh thin ni. An fa hmasa ber tur khatia an rukbo vanga an han chán ta mai leh Amanda naute an chhuhsak leh ta mai bawk si kha, Bella hian a tuar thiam lo takmeuh a, a pasal leh a chhungte hmuh loh hlana mahnia tah kerh kerh te a ching chho ta hial mai. 

A rawn harh hlawl a, "Ka naute kha ka duh, Remruat..mawh.." A ti mawlh mawlh a. Imma a hrilhhai letling. Duat taka a nupui kuahin, "Bella, naute chu Pathianin rem a tih hunah kan nei leh mai dawn alawm. Tiang hian awm tawh suh aw. I inenkawl that a ngai" a ti a. Bella chuan nghet zeta lo kuahin, "Min rubotu te kha that rawh.Anmahni vangin ka naute ka chán asin.." Tiin a tap khur ngawt ngawt a. Imma pawn sawi tur a bangbo viau. Bella chu a lainat a, a naute boral ta pawh pawi a ti. Tun dinhmunah tihtheih an nei rih si lo. 

"Engpawhnise, inenkawltha la, naute chu kan siam leh vat dawn alawm. Lunglei lamah te kan va zin khawthawng rih dawn em ni ang?" A ti sup a. 

"Ka hre lo, i thu thu. Ka nuten an remti dawn mi?" A lo ti ve mai a. 

"Remti ang, i danglam chak lutuk hi an ni pawh an ngaih a tha tawh lo va, naktukah ka sawipui dawn nia. Tunah chuan muthilh tum rawh aw. " tiin a chalah a zu fawp zauh a. An ngawi dun ta vang vang a. 

Doctor Muanpuia chuan a call dawn chu lain, "Hello" a ti hawk a. 

"Kan hlawh kan duh a ni. Ramhnuaiah kan bo a, tukinah khawpui kan rawn lut ve chiah" rawn titu aw a hriat rual chuan a ner sawk. 

"In hna in thawk hleinem. Engvangin nge hlawh chu ka pek ngawt ang che u, kan mi mansa pawh venghim thei lo khan hlawhte in phût ngam le?" Thinrim zetin a ti lung lung a. 

Lehlam ami chuan, "A nih chuan police-ah kan inpe mai ang. Tichuan, Zoram khawvelin i hming leh nihna an hre tawh ang" a rawn ti vawt raih a. Dr. Muanpuia pawh a meng hnual ta deuh. 

"Chu! Min vau ve deuh tihna em ni?" Ngaihsam luih tum takin a ti a. 

"Hlawh kan duh a ni mai. Kan pawisa min pe la, kan ka kan ang lo vang" a rawn ti nghet churh a. Rilru chu a buai ve map maithei a ni. A mi chhawrten an ka an an chuan engkim a chhe vek thei. Amah ruai lehchhawngtu te hming thlenga pholan a ni ang a, Heng mi bote chungchanga kutthlaktu ber Zoramin an hriat vaih chuan helna nasa zawk a chhuak dawn. Amah ngei pawh a damkhawchhuak kher lo maithei. 

"Zaninah farm house-ah dar 10-ah ka lo beisei ang che u" a ti ta nge nge a. Lehlam ami chuan a dah ta khap a. Dr. Muanpuia erawh chuan a landline atangin tu emaw number a hmet chhuak a, a ring ral ral mai. 

"Hello" a rawn tih rual chuan, "Kan mi chhawrte an rawn lang leh tlat mai. Anmahni zawnga tihlum tura thupek kha i chhuah emaw ka tia" a ti zawi sup a. A chala a thlan lo bawl tek tek chu a hru pawk pawk a. 

"An intawng fuh lo a nih dawn chu. Mi ka tirh ngei kha mawle., chuan ruahmanna i nei em?" A rawn ti a. 

"Zaninah Farm house-a inhmu turin ruahmanna chu ka siam a, i mite i rawn tir thei ang em? An ka kan hup vat loh chuan darkar chanve pawh mualpho nan kan mamawh lo vang" a ti a. 

Lehlam ami chuan, "Aw le mi 10 ka rawn tir ang e. An ruang senghawi erawh i kutah a awm e" a ti a. An inbiakna an titawp zui ta. Eng thilah pawh inphiarrukn chuan zoram khawvel chu a tuam ta chu a nia! Zoram hmabak hi a va eng lo tak êm..

Lawmsanga thlan chhia chu Nguri chuan a hruksak mawlh mawlh a. Nimin piah atang khan a natna a rawn chhuak leh tlat a. Chaw pawh ei hleithei loin a hma aiin a natna chuan a rawn buan nasa a. Nauteii leh Teremi te nen Lawmsanga chu an kil thap a. A rawn rum leh hawk thin. Nguri chuan a fanu hmuh laia mittui tihtlak loh hram a duh sia, a insangmar teuh mai. Nauteii pawh chuan a pa kut a vuan ran a. Mangang takin a melh ran bawk. Kawngka an lo kik karh karh a, Teremi chu mawng zang tih takah a tho vat a. A va hawng ta a. Mapuia leh Sasa an lo ding dun ran mai. 

"Nute, kan lo inru ve tawp mai" Mapuia chuan Teremi nuih tlawn titihin a ti a. Teremi erawh a hamhaih deuh nge a ngawi reng ringawt. Mapuia leh Sasa te chu a nute roomah an va lut a. Nguri chuan phawk zetin a lo melh a. A mitmeng atangin a lawm vak lo tih a lang reng mai. Mapuia chuan, "Nu, Sasa nen hian kan laklawh zel tawh sia, a chhung ten an lo nawr reng bawk nen, kan rawn inhruai tawp mai a ni" tîm angreng takin a ti a. Nguri a lo thaw hawk. Inthunun tum takin, "Aw le, tunah chuan a tlai deuh tawh sia, va mu phawt rawh u. Zing lamah i papuia te nen kan sawiho dawn nia" a ti a. A nui lui bawk. NAuteii a insum zo chiah lo nge, "A u chu apa hetiang a nih laiin nupui i lo ti ve sek a..a pa pawh a lawm miah lo vang" a lo ti ve hmiah a, Nguri'n mitmei mah se, a hmu lo der ve tlat. 

"Nia, ka duh vang pawh a ni lo asin. Sasa hi a chhungte lamin an hmumawh tawh si a, a khawngaihthlak ve em a ni. Min hrethiam r'u, kan innei lawk thei si lo va. I bo vang khan" Mapuia chuan a ti kher a. Khati khawpa a nau a bo chung khan Sasa nen an inneihna tur lam daih a lo ngaihtuah nge , chutiang tawngkam a nei chu Nguri a lawm ta hlek lo va. 

"I nau a bo a, kan mangang em em a, kan han hmu leh a, dam tein. Nang lahin nupui lam ngawt i ngaihtuah a, Sasa dinhmun hi kan hre lo a ni lo. I pa nen pawh kan sawi dun reng, i pa lah heti hi a dinhmun a ni rih a. In inneih theih loh chhanah i nau mawhpuh tum suh" a ti ve ta nghat nghat a. A thawkrimin a pasal vangin zan 2 a tlaivar tawh a, a chauin a thinte pawh a chhe ve riau tawh a tin ni. 

Mapuia chuan, "Chutiang zawng chuan ka sawi lo. Nauteii a bo a, amah chauh in ngaihtuah a, hetah ka fa paitu a awm ve reng a. In ngaihsak lo, ka lawm bik lo. Tunah dam takin ka nau a lo haw a, inneih lam inla sawi bawk si lo va, ka rawn hruai haw a ni mai" a ti hmawk hmawk a. Nauteii tawng tur chu a nu chuan a lo khap vat a. 

."Va mu phawt teh u, inhnialna hun kan nei lo. I pa hi a dam fel hma chu inneih lam chu kan ti lo vang. Tikhan Sasa pawh kan bulah khawsa ve rih mai rawh se. Chu chu ka thutawp a ni" a ti ta hmak a. Mapuia chuan a do ngam ta lo nge, Sasa a kai a, a roomah an lut ta a. 

Teremi chuan, "U Ngur, hahdam rawh. Mapuia pawh ka lo titipui ve ang e, a la naupang ve bawk nen..hrethiam rawh. " a lo ti var a. Lawmsanga a rawn thu chhuak hlawl. Nauteii phei chu a phu zawk nghe nghe. 

Mitmeng á ruai hian, "Khaw nge Nguri.." a ti he haw a. A nupui hi a zawng reng mai zawng a nih hi. A lu chu a na deuh nge a bek tawn tawnah a dawm a, a kun ta ngawih ngawih a. Nguri ten an lo dawm vat. Lawmsanga chu a tal thut a, a chak angreng si. Mitmeng rum el ula melh kualin, "Ka fanu i thuhrukna sawi rawh. Khawiah nge i dah tehchai" tiin Nguri chu a melh ngur mai a. Nauteii chuan a pa chu lo dawm vatin, "Pa, ka awm reng hi, keimah ka ni. Nauteii" tah chhuak zetin a lo ti a. 

Khum atang chuan a tho thut a, "Ka nupui leh ka fanu ruboa mal taka min dahtu te hi ka dim dawn hauh lo che u a nia. Khawiah nge Gabriela hi..ani pawh ka fapa a ni asin. Ti nge ka chhungte tumah an awm loh?" a ti tuar tuar a. Nguri chau tawngkhawng leh rilru na lutuk chuan a áwm a dawm a, a thaw hle hle ringawt. A pasal hian a hriatna hi hloh fai vek law law se, nun bul tan thar zawk se ti ten a ngaihtuah thin. Teremi chuan Lawmsanga chu chelhin, "U Lawmsang, i chhungte vek kan awm e. I u ka'n bia ang e aw..U Ngur, damdawiinah chhohpui mai ang u. Naute, i pu te ho zuk hrilh ve teh" a ti mawlh mawlh a. Nauteii a tho nalh, a nu a ngaihtuah bawk si. Engkim chu ipikthlak a ti ngawih ngawih. A tah a chhuak bawk si. Teremi chuan Mapuia te pindan kawngka kikin, "Mapui, i pa hi kan chhohpui mai dawn em ni ang? A buai zual tlat mai" a ti lawm lawm a. 

Mapuia chuan a rawn hawng a, Chutihlai chuan Lawmsanga chu an pindan atangin a lo chhuak ve mek a, Nguri'n a rawn zui chhuak bawk. 

"U sanga te pawh an awm lo mi? Sasa hi ka kalsan daihte chuan.." Mapuia chuan a ti nghut a. A meng sen rám bawk. Nguri a thawk lawk a, a fapa duat em em, a hrin ni miah si lova a theihtawpa a hmangaih thin biangah chuan a beng ri thlawp mai. Boruak a reh duk nghal. Aw khur dawt dawtin, "Ani hi i pa a ni asin. Uiresan in nih pafa lai pawha i kianga awma phatsan ve ngai lotu che a nih hi,. Va insiam rawh, kan kal ang" a ti ta a. Mapuia a tawng ngam eih tawh lo. Sasa pawh a ti dák mai. Sasa tak pawh a lainatawm ve tho mai. 

"Nute, Sasa hi lo awmpui tal la..khawngaihin" Mapuia chuan a ti hram a. Teremi pawh a bu nghat. Nguri erawh ngawi rengin a insiam mawlh mawlh a, Lawmsanga a melh ngai melh reng chu a thawmhnaw a thlaksak sawk sawk a, Nauteii leh Lawmsanga patea leh a nite ho pawh an rawn lut khawm a. An motorin Lawmsanga chu damdawiinah phurh chhoh leh a ni ta. He chhungkua pawh hi an hlim dawn chauh a, buaina hi a awm lehzel thin. Nguri hi Lawmsanga nupui ni lo ta se, an kehdarh tawh maithei a ni. Lawmsanga a natna a chhuah lai chuan hmangaihtu tak tak lo tan chuan enkawl ngaihna a awm lo miau a, Kan Ngurnunsangi erawh hmeichhe pakhat a tling ve tawk a ni. 

Zomuansangi chu a rawn meng diar diar a, a rit burin a hria. A khum bula a pasal lo ding run a hmuh chuan thei leh thei lo hian a han nuih a. Ephraime pawh a vei nuih suk kha.."Zoi, fanu duhawm deuh min hrinsak a, ka lawm e aw. Ka hmangaih che" tiin a chal a rawn fawp zauh a. Ephraime rim chu a lo híp kawk kawk mai. A hmangaih ber pasalah a nei naa, an awmdun aiin an awm hran a tam zawk si. Tunah chuan Ephraime bulah an nufain an awm ve zel tawh ang tih chu a thutlukna a ni. 

"A hming i phuah tawh em?" a ti sap a. 

"Thansangzuali tiin ka sa a..a mawi i ti em?" a pasal chuan a lo ti vat a. A bu nghat mai. Nurse-in a fanu chu a rawn pe a, hnute a pek laite chuan a thlir ngawih ngawih mai. A duhawmin a pa a chhun ngawih ngawih. 

"Cuan, Ka bulah in nufain ramhnuaiah in khawsa ve tawh dawn a. Pawi i ti em?" inthlahrun hmel deuh hian Ephraime chuan a ti a. 

A lu a thing nar nar, "Ti lo mah la, zui che ka tum tawh sa alawm. Min kalsan tawh suh aw" a lo ti sep a. Lainat hmel zeta a nupui melhin, "Ka nupui leh ka fanute hi ka thlahthlam ngai lo vang. Mahse, hna pui tak tak kan thawk chho dawn a, thihna hial pawh ka lo tawk thei..in nufa inenkawlna tur, indamchhung daih erawh ka khawl tawh e" a lo ti duah a. Thihna lam chu Zomuani ngaihthlak duhzawng a ni si lo.

"Ephraime, thi suh" a'n ti ngawt a. Ephraime a nui hawk hawk, "Robot ka ni hleinem. Thi thei mihring ka ni a, mahse, thi pawh ni ila ka nu hnam mizote tan hriatreng tlak sulhnu neih erawh ka tum a ni" a ti nghet charh a. 

"Bang mai rawh. ZCP atang hian" a ti ta tawl a. 

"Hlauthawng mah ta che, member kan pung zel a nia. Ka nunhlui i hria, in ram tana mi tha lo senghawi hna ka lo thawk tawh thin a. Tihsual erawh ka neih kha..chumi ka rulhletna atan chuan ZCP hi ka chhawm nun zel a ngai alawm. Zoi, Zoram tan thalai ten zalenna kan sual chhuah hun tur beisei rawh" a rawn ti hniam raih a. A pasal a ni a, a thu hnial hi a hreh thin mai pawh a. Dik tak chuan a pasal chu a chán mai ang tih a hlau ngawih ngawih zel..mi naran nih mai kha a duhtawk viau asin le. Mahse, a pasal hi mi naran a ni miau si lo va, a support zel zawng a ngai dawn a ni. 

Camp lamah pawh jail tang mek an thiante chhanchhuah dan tur an rel map map hlawm a. Thu a tam, risk la huai pawh an tam. An han inhnial leh bap bap thin, thinrima inhnial erawh an ni lem lo thung. An thian, an memberpui táng mek te chu bail theih an nih miau loh avangin an zuk lakchhuah tawp mai a ngai dawn a ni. Chulai tak chu an mutan a ni. An sawiho fe hnuah, Tluanga leh Zuala ten an zuk kan ang a, chuta an inbiakna leh Jail chhung awmdan atanga ruahmanna siam an titlu ta a. An thiante tan chuan an inpe zo khawp mai. Aizawl lama cheng mek an thian dangte pawn khawchhak lam atanga dan phal loh thil rawn tawlhru nia an hriatte bawhzuia an sangawizawnpui, sawrkar hotu liante chhui hna an lo thawk tan ve mek bawk a. Hna an sem zai thiam angreng khawp mai. Camp-ah tak hi chuan awm an tam lem lo. Bakah an awmna hmun an thlak an thlak ve bawk nen. Zoi chiah hmeichhe awmchhun a ni bawk. Ani zawng a dan a dang miau a. A nu leh pate han ngaih chang chu nei thin mah se, Tluanga awm ve chuan a khawhar lutuk tur a lapeng ve a, a nute erawh camp an chhuahsan hmaa va tlawh ngei a tum thung. 

Ni e, Zohlupuii leh Zoliansanga te pawn an fanu hi an ngaihtuah lo a ni lo. Ngaihtuahin phe buai se sawrkar lamin an beng an chhi ve kar si a, an fanu rawn lak an tum dawn si a. Sawrkar kuta awma an duh duha an kawihher atan an fanu chu an phal teuh si lo. Tunah rih chuan sawrkar lam pawn a rawn tibuai ta rih lo va, an nupain villa lian takah chuan an khawsa ta rek rek a. Mamawh lama an chhuak zauh tih loh chu pawn an chhuak mang lo. Kha chen an lo inthen tawhna hun kha bultan thar lehin nun bul an hmang leh a ni deuh mai. Zoliansanga pa kha a la táng a, a upa ve tawh viau naa, a damchhung tang tura thu tihtluk a ni si a, a thih hunah bak pawn lam boruak a dawn loh hmel. Pu Zira te leh a thuihhruaite pawh an la táng ve ran bawk. Secret society hi a mit ta mai emaw ti ho hian an ring sual viau maithei. A chhan chu Judy nu thawhpuite leh Dr. Zira te ho an han tan ho takah chuan Jail chhungah pawh an thurúk chu an la kalpui tlat si a. Eng emaw tak chu an thlentir leh maithei a ni. Sawrkar lah hian secret society lam chu a bengkhawn lo viau mai si..Setana hi a rawn inlar leh har loin a rinawm. 

Abby chuan in chhung luh pahin, "Zaninah naute chu ka khul chhuak dawn a nih chu" tiin Lucy a melh a. 

Lucy chuan, "Engzatin?" a lo ti vat. 

"Nuai 10-in..tichuan, Amanda hnenah nuai 20 ka phút thung ang" a ti satliah a. 

"Tu ten nge ru bo?" Lucy chuan a ti vat. 

"Ka hre bik lo, min lo bia a" Lucy pawh en chuang lo chuan a ti mai a. 

"Tháng pawh a ni maithei a nia..Abby" Lucy chuan ngaihtuah hmel fe hian a ti a, Abby a nui hak. 

"Pawisa an duh ber a, ka pe mai ang chu, Amanda hi ka khing pha tlat lo a tin ni. Police ka hrilh thei bawk si lo va" a ti a. Coffee a inthlit nghal zat. 

"Chuan, Amanda naute i pek leh hunah eng nge i tih leh ang?" Lucy chuan a rawn ti a. 

"Malaysia -ah ka kal ang, nuamchen turin..he lai ram zimteah hian eng nawmna mah ka hmu lo ve" thinrim hmel lek lek hian a ti a. Lucy a ngawi daih. Abby chuan coffee a in zawhah inbual turin bathroomah a luhsan ta a. Lucy leh Abby hi home atanga intawng, inkawmngeih hlen ta an ni. Lucy erawh Zoram lamah a inbengbel chho a, a rukin ruihhloa sumdawnna a kalpui thung. Ani pawh Abby ang deuha sex addict a ni a, pasal nei si lo, nghei si loin a khawsa ve tawp mai a ni. Abby angin a fing var lo deuh tih mai loh chu a hmel a tha a, mipa a lêm thiam bawk. Tin, sum a duh a, a duhàmzia chu Abby ngei pawh hian a sawi thei ang. 

Khua a la vawt em em lo va, thli erawh a thaw sang sang thung. Amanda carah Abby leh Amanda an thu dun ran a. Abby chuan bag lian vak lo a khai ran bawk. Sum chu pek tak tak an tum tihna a ni thei ang em..zan dar 11 a ri ta. Abby chu Sihhmuiah a chhuk a, Amanda erawh Lucy in lam a pan thung. Tlaia Abby-in a lo hawn ruk tawh, tukverhah chuan a lawn kai a, thawm dim takin a hmaa a naute an dahna pindanah khan a tawm ta ran a. Thawm chu a reh tlawk tlawk mai. Lucy chu a muhil tawh a ni maithei. Dar 11:20 a ri ta tihin Lucy room atang chuan thawm a rawn awm ta a, tumah an awm ve loa ngaiin Lucy chuan thawm a dim vak lo khawp mai. 

"Aw..Amanda nen an ni. An hual tawh maithei che u..a rang thei ang berin insaseng ru, Abby kha chu nikhua hre lo se, naute nen ka hnenah rawn hruai ula..Abby bag kha theihnghilh lo bawk ula"a ti mawlh mawlh a. Amanda a lo ner sak. A rilru tetein, " I va chák lo dawn rua em" a ti a. 

12 a ri dawn tihin kawngka chu an rawn kik ta a, Lucy chuan a va hawng ta vat. 

"Abby kan hmu lo. " an rawn ti lut nghal. Pakhat chuan basket niawm tak a khai bawk. Amanda chuan a silai a phawrh ru ta zál zal a. Mahse, a va pawh mai duh lo. Mipa pahnih leh Lucy chu an ni mai a. A tan hlauh tur awmin a hre lo. 

"An thangkamah kan awk zawk a ni mai lo maw?! Pawisa lah kan dawng si lo" pakhat chuan a ti sur sur a. 

"Maithei. Abby khan ka hrechhuak tih a hria a ni maithei. A nih chuan AManda hnenah pawisa kan phút thung ang a a ni mai lawm" Lucy chuan a ti a. A sawi zawh rualin naute a rawn tap ta rawng rawng a. Amanda a insum hman lo thelh. Lucy chuan naute chu pawmin, "Nangmah vang hian kan buai vek tawh a nih hi. Sum hlawm i ni reuh bawk si" a ti nghat a. A fapa hringtu Amanda a insum zo ta lo. Pindan kawng chhuih hawn thuai pahin, "Tumah kha che tawh suh u" a ti fiak thak. Lucy chu a chaldarah tak silai chuan a tin ran bawk. An hamhaih atalangin an ngawi thap a, mahse, a rei lo. Mipa lian zawk chu a che zawk a, kawngka lam pan a tum chu Amanda silai a puak thuai. A mal chu a inthlep hnawk mai. A tlu rawk rawk a, chuti maia beihlet chi a ni lo tih an hrethiam mahna. 

"Naute kha min rawn pe rawh" tiin Lucy chu a melh a. Lucy tan nek luih ngam a ni lo. Kawngka an rawn kik ve mek bawk. Amanda chuan hawng turin mipa pakhat chu a mitmei a, Abby ngei mai chu a rawn lut ta zan zan mai. Lucy biang a ri nghal thak, a thip ve khawp ang le. 

"Thiantha tiin hei chen ka lo chhawmdawl chein ka lo puibawm tawh che. Tunah ka kut ngei hmangin rul kaw zen i tum leh a, engkim ka hre vek tawh, Lucy..mahse, he thil hi i rilru puakchhuak a ni lo tih erawh ka hria..tuin nge tir che?" a ti dap dap a. A thinrim hle tih a mitmeng atang pawn a hriat. 

Lucy chuan inhnit faih chungin, "Samsona a ni e. Ama min tihtir vek a ni" a ti ta a. Amanda a nghing lawih! A pai deuh dáwrh bawk. Abby pawh chu a thawng ve hle tih a lang. Sama ber kherin maw hetiang ruahmanna hi lo siam le? Engvang nge? 

Naute tap ngák ngák chu duat em ema pawmin a kuah a, a silai pawh a kawngah a zep leh tawh. A naute bianga zuk fawh pahin, "I pa ngeiin hetianga i chunga a ti hi awih harsa ka ti a ni..ka naute, tun atang chuan tuman ka hnen ata an la bo tawh lo vang che" a ti nghet charh a. A mitmeng thuk zetah chuan natna thuk tak a inlar leh zawk thin bawk. Lucy te, abby te chunga a thinrimna chu hrikthlak chi a ni lo. A pasal ngeiin a naute chu ruboin, mi dang a ruktir ve lehchhawng a nia! Sama, eng thil nge maw ti nia i inhria le?! 

A mit khur thuk lek lekah chuan eye shadow a hnawih malh malh a. A hmui duk lek lekah pawh lipstick sen no nalh zet a hnawih a. A sam chu sang takah a tawn kawh vah bawk. Darthlalanga inmelh chungin, "Rinsangi kha ka la ni reng" a ti sap a. A pindan atang chuan a chhuak ta a. A chhungten an lo hmuh chuan an hawi phawk teh e. A nui sak a, "Nu, Ka pasal hmu turin ka kal dawn a nia..driver in min hruai a ngai lo, keiman ka khalh mai ang" a ti hniam raih a. A nu erawh a áng phuau ringawt. A mak êm alawm. Kha chen a pindanah tawmin tumah a be duh lo va, eng thil mah a ei duh lo bawk. Tunah a pasal hmu turin a chhuak leh ta thut dawn chu a ni sia. 

"Arini kha..ti nge?" a fanu chhuah hnuah an nula chuan a lo ti hluai a. 

Pi Puii pawh chuan meng buai nakin, "Ka hre lo tawp mai" a ti sap a. 

Arini chu Central jail lam panin a inkhalh thla vang vang a. Nizana a call dawn kha a ngaihtuah let a, a rin aia hmain a pasal nen an inkuah leh thei dawn niin a hria. Ni e, rawn betu khan, "I pasal lak chhuah kan tum dawn a. I puihna kan mamawh dawn a ni. Naktukah Central jail-ah kan inhmu dawn nia" a rawn ti teh ngawt kha a nia. Mahse, kha tawngkam khan beidawnnain a lempil mek Arini zik ngui tawh chu a rawn tiharh thar leh ta kha a nia. A hmangaih, a pasal , hel pawl hruaitu nia inchhal ni bawk, huat theih a duh em em a huat theih si loh Ruatfela a ngai tawh êm a ni. Tin, engkim hi a hriat ve vek a ngai tawhin a hre bawk. Jail a thlen chuan mi dang táng kan ho pawh an lo zi ve nak nak a. Eitur leh Ruatfela mamawhte a han lam khawm sawk sawk a. Warden bulah a va inreport ta a. Ruatfela a lo nghah lai chuan, a bulah mi pakhat palian leh hmeltha tak hi a rawn thu ve a. 

"Nizan ami kha ka nia" a rawn ti sup a. Arini chuan a lo hrethiam vek. A bu nghat a. Ruatfela pawh a rawn chhuak ta thauh thauh a. A inzuah buk deuh tih loh chu danglamna vak a nei lo. Arini a hmu thut chu a hamhaih deuh nge a ding deuh chawt a. Arini bula Tluanga a hmu ve lehzel te chuan a tihrilhai letling bawk. 

"Eng nge i an? I tha tiraw?" Arini chuan a ti zangkhai vah a. 

Buk nghut pahin, "Ka tha e. I va reh rei ve" a ti a. 

"Engkim khan min la thawng êm a tin ni" a lo ti mai a. 

"A dik ang. Engkim hi sawifiah ka chàk" Ruatfela chuan a lo ti vat a. 

"Tunah chuan ni rih lo ve. " Arini chuan a lo ti hmiah. Hmana Arini chiah chiah kha a ni leh tawh. Inringtawk, lu zo veh vawh tak kha. Tluanga chuan a aw a thian kharh a, "Hman zanah tlan chhuah tum an awm elo?" tiin bul a han tan a. An sir tawn tawnah an veng ve reng bawk sia, tawng insumkar a ngai tlat. 

"Awm pawh ka hre lo, tlan chhuah ngaihna pawh awm lo chuan..An hal hluai emaw helicopter hmanga an rawn hruai chhuakte a nih ngawt loh chuan" Ruatfela chuan a lo ti bawrh bawrh a. 

"Tlan chhuahte kha i lo tum ve ang e aw. A hlauhawm..bail theih i nih veleh ka rawn bail ang che" Arini chuan a ti mawlh mawlh a. 

"Tum hran lo e. Ka thiante Sangpuia leh Mampuia te nen card kan khel deuh reng ringawt a, kan la hlim ve viau tho a nia" Tiin Ruatfela chu a nui hak hak a. 

Tluanga chuan, "Karlehah kan rawn hmu leh ang che. Lo inenkawl tha la aw. " awmze nei zet hian a ti a. Inkan hun a tawp leh ta mai si. Inngai tak chungin an inthlah liam leh ta phawt a. 

Pari chuan a heh liak zauhin, "Tunah chuan engmah ka la hre thei lo. Dingi hi chu an pawl mi leh sa a ni lo a niang. Rosangpuia pawh hi ka ring lo" a ti niah niah a. 

"Mahse, hotela thil thleng khan an lam a hawi tlat alawm" amah hmachhawntu chuan a ti nghut a. 

"Chutak chu lawm hotelah ka thawk thei ta si lo va, Cindy hi ka enthla thei lo alawm. A inhnamhnawih ve ngei chuan ka hria a ni" Pari chuan a ti zung zung a. 

"Hmanhmawh suh. Rosangpuia sum hman dan kha engtin pawn hriat theih tum la a tawk mai. Khawi khawiah nge a donate tih te, tu te nge a hmuh tihte.." a hmaa thu chuan a ti leh a. 

"Nia, ka tum alawm. Mahse, Dingi hian min mitmei ru rengin ka hria. Ka hlauthawng thin" Pari chuan a ti a. 

"I hlawh ka pun ang. Zantin dar 8-ah report i rawn pe zel tawh ang. A chiang em?" A hmaa thu chuan a ti leh nghut a. Pari a bu nghat. A inhnuhluhna boruakah hian a huaisen hleithei vak lo. Dingi te nupa enthlak hna thawk tura rawih a ni a, report mumal tak pek theih a la nei si lo, amah ruaitute a tihthinur vaih chuan a nunna thlengin a derthawng thei tih a hai si lo. A che buai tan ta riau. Dingpuii leh Rosangpuia te nunah lah rinhlelh tur a la hmu bawk si lo. Hotel an la hawng lo va, Zo Choka chiah an la hawng rih si, Dingi te nupa chu anmahni buai buaiin an buai a. An awmdun pawh a hmu vak lo. Rosangpuia hi rukbo a nihna khan a nunah nghawng a nei miah lo nge a bo hma ang mai khan a la smart-in a sumdawnna pawh a la kalpui thei zel a, pa ngaihsanawm ve tak zawng a ni. Rukbo a nih chhan erawh tu emaw chuan a hre ngei ang mawle..

Kimi lu su zo chuan, "Zuali, Zuali.." a ti làng lâng a. Zuali a rawn lang vat. 

"Aw ka u" a ti sep a. 

"Zanin tlai chu i pa Zira nen chaw kan ei chhuak dawn aw. Ka pa te in lamah" Kimi chuan a ti zung zung a. Zuali a khi sak, "Aw le..lo haw har lo ula aw. A khawharthlak ve sia" a ti a. Kimi pawh chuan, "Tlai lo vang. Hna ka la ngah.." a ti mai a. 

Zirsanga nen an chhuak rual a. Tun hnaia Zirsanga awmdan chuan a ngaih a titha lo lek lek thin. Eng emaw hi a lo ngaihtuah leh vung vung zel a. A zan mute hi a hui leh pawp thin, vei eng emaw chu a nei chiang a ni. 

"Tun hnai hi i danglam..a chhan a awm em?" a ti ta nge nge a. Zirsanga chuan rawn thlek háw pahin, "I ngaihbel a niang, ka tha reng" a ti sup a. 

"Tei i ngai aniang, nih loh pawn Eli" Kimi chuan fiamthu hian a ti a. 

"Nang pawh Rinpuia emaw Dinpuia emaw i ngai" a lo ti ve ringawt. An nui dun hak hak a. Kimi ngaihthat lohna pawh a bo ta deuh. Zaninah a pa te in lamah chaw an ei phei ang a, boruak pawh a danglam mahna le..

Zuali chu an liam rual khan Zirsanga te nupa roomah a lut nghal zat. Almira a hawng kual a, Safe pakhat chuan a mit a la viau. Mahse, chabi a nei si lo. Hetah hian tirtu neiin a lut a, a hlawhtlin ngei ngei a ngai. Amah ruaitu te hi an namai si lo. A za sek a, a tei kual ruai ringawt. Phone a lo ri ral ral a, a la vat. 

"Safe chabi ka nei tlat lo va. Tihngaihna a awm lo" a ti nghal táwng. 

"Mi ka rawn tir ang. Engpawh ni rawh se, Zirsangliana hi ZCP-ah a inhnamhnawih ve ngei tih finfiahna kan nei ngei tur a ni" lehlam ami chuan a rawn ti fiak thak a. A dah nghal daih. Zuali erawh chuan chet lak mai dan tur a hre hauh lo. 

"Sama, Samson, tenawmpa..chhuak rawh" Amanda aw chu a ri chang chang naa, a fiah khawp mai. Sama erawh a ding zum reng ringawt. 

"Ka nupui i ni, ka chhuak lo vang" a ti tak naa, Amanda mitmeng atangin an cheng dun thei tawh lo tih chiang takin a hmu tlat! 

Amanda mitah mittui a rawn hnám a. "I fapa chungah ngei hetiang hi i ti duh a, engtin nge i theih zawk?" a ti tiau a. A no ve tlat! Han pangchanna hun pawh nei lêk loin fa a hrin hlim atangin a fapa zawngin a phe buai a, a chau tawh, a na hle bawk. 

"Amanda, engkim a chinchhuakin hria la, min dem lo vang. Heng zawng zawng ka tihchhan chu nang leh ka fapa ka hmangaih vang zawk a nia sin" Sama aw-a inrintawkna rawn lang chuan Amanda mitmeng pawh a tibuai nak mai. 

"Dâwt hlawm i ni. Ka ngaithla thei tawh lo che. Chhuak vat mai rawh" tiin Sama chu a nam a. A lo tang bik lo. Kawngka a kalh ri rak a, pindanah lutin khumah a bawk thlawp a, a tap ta hlawp hlawp a. Hringnun hian chhel tur hrim hrimin a hring emaw tih tur khawpin hun harsa leh khirh tak tak a lo hmachhawn fo tawh. Mahse, khang zawng zawng ai chuan a hmangaih a pasalin a phatsanna hian a chhun na zawk a, A duhthusam zawng zawng an thamral tur chuan a mittui a luantir lo thei lo. 

Sama chu kawngka bulah a ding ran a. Tawrhna hlira khat mitmeng hian, "Engkim i hriat hunah Rammuanawma hi min dem lo vang..Amanda.." a ti sup a. Stepah chuan muangchangin a pen thla thlep thlep a..

(Comment lam uar ang aw 😍