Inferno 12/

INFERNO (12)

Ziaktu: Toni Ràlte

A status rawn comment tu chu tudang ni lovin Zirsangliana ngei a ni. Mak a ti bawk si, a zak bawk si chu a lum pup pup mai a. Engtia reply tur nge ni ang tih a ngaihtuah a. Chhan dan tur reng reng a hre tawh lo. Mahse, chhan ve ngei a duh bawk si. A nu a rawn ngam der si lo. 

"A ni lo, i rin ang kha a ni lo" a va ti ta ringawt a. 

"Ka rin dan i hria em ni?" A rawn ti let khauh. 

"Hre chuang lo e. Mahse, i hre lo ang, thudik" a va ti a. 

Zirsanga chuan a rawn call ta nge nge a. Drose a phu chiang kher mai. Lak loh a duh, mahse, a be chák si. Tîm dai chungin a la ta a. 

"Drose, engkim ka hria ka tih chuan ka hria a ni mai. Mahse, ka dem lo che a, ka hmuh dan che leh a en dan che a danglam phah lo aw. I vanduai ka ti" a rawn ti ta kalh kalh a. Drose chuan a chil a lem khawlh. 

"Zirsang, a ni lo. Engmah i hre lo" a la ti táng táng a. 

"A va mak e aw. Nang hian kan bo atang khan ka lakah feelings i nei..a dik em? Mipa ka ni a, ka hai ring suh. I inthup thiam lo ropui si" a rawn ti ta mai a. Drose a chhing sawk ringawt. 

"Aw le. Mahse, i nupui hrilh suh aw. Ka zak êm mai. Hmuh che ka duh tawh lo a nia" a ti sawk sawk a. 

"Thian kan ni reng ang chu le..namnul tum zawk la, i dam hma zawk ang. Khatia min pumpelh zel chuan i hrehawm rei mai mai" a rawn ti ta a. Drose chuan tlawm a inti vawng vawng mai. Mi pasal kher lo hi a hmuhte pawh a hmu ve lutuk asin le aw. Ti nge Zirsanga kher kher chu a vei ni..an inbuaipui nasat vang te pawh kha a ni mahna le. Khumah mu thlawpin Mamawia nen an inngaihzawn laite, a thih laia a awmdante kha a ngaihtuah let ta vang vang a. Mamawia nen khan engkimah an inthurual a, Mamawia lahin a dawm thiamin a hrethiam a, a át phuang avangte khan a zilhte pawh a zilh nasa ve thin. Bakah sawi tawh angin hmeichhia mah nise, a nu zêm lo a, khangte kha inchei dan tur thlengin Mamawia khan a hrilh thin. A ngaihzawng a nih piah lamah a thian a ni tel a, a chang phei chu a pa ang dawn ten a en thin. Tikhan Mamawia a haw a. Nitin zan tin an inbia a, a tel lo va Christmas hman khawharthlakzia tak kha aw. Mahse, a la naupan ve deuh vangin a chhungte lakah erawh a hrehawm tihna chu a thup ve hram hram thung. Diteii erawh chuan a hriatpui vek. MAmawia tak pawn hrehawm a lo ti ve hle a nih a rinawm. Kum thar chu Drose bula hman ngei a intiam ta a. Drose pawh a lawm kher mai. Ni 27-ah Mamawia chuan Drose awmna a rawn pan ta vang vang a. Inhmuh leh nghakhlel ngawih ngawihin signal awmna apiangah chuan inbe pawp zel chungin an rawn tlan a. Mahse, vanduaina hian chinlem a nei si lo. An chuanna sumo chu kawngkawiah Truck a rawn tlan thut avangin Driver a hamhaih tawh bawk si chu kawng thlangah a tlan liam ta a, Truck kha side a rawn la lo êm bawk a, an thiam lo hul hual a ni. Drose chuan Mamawia a be thei tawh si lo, mangang ru taka a awm laiin a vawi 7nan Mamawia chu a call leh ta a. Mipa dang daihin phone chu a lo la a, "Hei i thianpa nge i unaupa te motor hi an accident a. Vanduaithlak takin i thianpa chu nunna chàn zingah a tel ve ta a ni" a rawn ti ta mai a! Drose a let tawp. A chhung ten an buaipui nghal a, a rawn harh deuh hnuah thil awmzia a sawi thei hram. Nikhua a hre lo zui leh ta nghal a. 

A lu kham huh dap chuan a ngaihtuahna atang chuan a rawn kai harh hlawl a, a hriat miah lohin a muttui a lo luang nasa hle a lo ni. Mamawia a lo la hmangaihzia leh a kalsan tak hnu pawha mipa dang a ngaihsak lohzia chu a chhungte chauh ni lo an veng chhung ami te pawn an hria. An khawsa thei a, a hmeltha bawk nen, bemtu leh betu neuh neuh hi chu a nei ve reng. Mahse, mipa dang tan a rilru chu a hlan thei rih thlawt lo a ni. Tikhan ruk bo an han ni a. Zirsanga an kahna hliam kha Judy nen an in dressing chhawk thin a, Zirsanga chezia, a mize pa leh ngeng ngulh mai te, hmeichhe tana innghah ngamna a nihzia te kha chiang takin a lo hriain a lo hmu hman a. Kha thil khan a thinlungah zung lo kaiin a lo tiak ta hial a! Inthup harsa khawpin a chang chuan a danglam thin. Mi pasal duhlai a ni tih hrereng chung pawh hian tu emaw hi a hmangaih theih tih chiang takin a hria. MAhse, hmeichhe dang ang lo takin va tihbuaia an nupa inkar khiktir erawh a tum lo bur thung. Tum a hnêkin an hriat a hlau ngawih ngawih a, hmuh fô pawh a duh tawh lo a ni. Engtin nge a hringnun a hman zel dawn tih chu hunin a la hril ang chu..

Naute tap ri ngák ngàk thawm chuan a beng a rawn verh zawk a. A rilarah a fa ngei mai a piang ta. Nurse nelawm zet hian a rawn pawm chhuak a, "Ka lawmpui a che. Fanu i nei e" a rawn ti a, a nui sáng bawk. Ephraime chuan a fanu chu a en vang vang a, a nu chiah chiah niin a hria. Zomuani a chhun chuan a hmeltha dawn tih a hai lo. Dichim taka melh vawng vawng chungin, "Bawihte, ka lawm e. Ka duat ngawt ang che" a han ti ngawt a. Mi dang lo awm ve te chu an nui hak mai. Naute chu Nurse chuan pawm luh leh a tum laiin, "A nu eng nge a an? A tha em?" Ephraime chuan a ti vat a. 

"A rawn harh vat turah ngai ang. " nurse chuan a ti sap a. A lut zui leh ta a. Ephraime hmel chu hmuh a nuam takzet. Fanu a nei ta a, pa tak tak a ni ve dawn ta. Fa tir atan fanu hi a lo awt ru bawk nen, engkim mai chuan a lung a dum hliah hliah a ni ber e. Zomuani te nufa pawh ramhnuaia a inah hruaia chentir ve a tum rilru bawk. An inpuia Zomuani lal tawh lohzia leh a puzawn ngeiin a mantir dan te kha a hai bik lo va, nau no pawm chunga hrehawm leh chêp taka a awm a remti tawh lo hul hual. A jail tan ai Ruatfela a tang ta bawk a, tunah chuan tibuaitu a nei tawh rih lo vang chu. Ruatfela a ngaihtuah chuan a inthiam lo ru deuh, an lak chhuah vat tur thu kha a lo sawi tawh si a. Mahse, buaina neuh neuh an tawk ve reng si, Ruatfela, Sangpuia leh Mampuia te lak chhuah dan tur pawh ngaihtuah chhoh tan a ngaiin a hria. An tlanchhuak a nih ngawt loh chuan tu ukil mahin an dinsak ngam a ring si lova, an tlan chhuah dan tur ruahmanna a siam a ngai tih a hria. Tihtur hi a inchher chhuan tup tup reng mai a, hun awl reng reng a nei ve thei lo. Amanda a ngaihtuah leh a, a fapa kha a hmu tawh em tih lah a hre hek lo, puih a duh a, mahse, tunah hian dan lo va khaw chhak atanga thil tawlh ru, milian deuh deuh leh sawrkar inzawm rukna an chhui mek a, Amanda pawh a la thlahthlam rih mai a ngai a ni. Ani zawng a fing a, a inngaihtuah thei em emin a ring. 

Chhim lam pa hausa Pu Nunsanga thihna pawh chhui kal ve reng a la ni a. Rinhlelh an la nei si lo, hotela thawkte zawng zawng an kawm kim tawh a. Engmah an hriat loh thu an sawi zel si. Cctv lah a rintlak bawk si loh. Police te lu pawh a hai mep mep hle. Hel pawl lam thiltih a nih ngei a rinawm a, khami zana kha hotela thleng zawng zawngte list an kawl a, an kawm kual vek tawh. An hlawhchham zel si. Rinhlelhawm deuha an hriat mipa pahnihte chu an han kawm fal deuh a, khami zan khan an rui an chatthla tih an sawi a, Hotela thawk pakhatin a lo hriatpui ve lehzel bawk si. An thluak bur Amanda ber lah an pur ngam tawh der si lo. Tihian case pawh hi a zuihral leh ringawt dawn a nih hmel. 

Cindy chu a hawi kual ruai a, amah rawn thlira rawn en bik an awm lo tih a hriat hnuah a phone phawrhin, "Ka awm tawh e" a ti sap a. 10 mins velah parkah chuan palian lam, sunglass vuah hmelchhe lo tak hi a rawn lut ta zan zan a. Cindy lam chu rawn pan nghalin, "Ti rawh, sawtah sawn" tiin a kil lama thutna chu a pan pui a. 

An thut dun hnuah, "Pari ka tih kha Zo choka lamah a insawn leh tawh a, Dingpuii chezia enthla tura rawih a nih rinna ka nei tlat a ni. " Cindy chuan a ti nghal zat a. 

"Dingi i hrilh tawh em?" Chu pa chuan a ti sup a. 

"Hrilh tawh e. A fimkhur turah ka ngai. Chu ai mah chuan Pari hian police te bulah engvangin nge khami zana thil thleng kha a sawi loh tih hian min tibuai" Cindy chuan a ti mawlh mawlh a. 

"Thil phut a neih i ring deuh tihna em ni?" A ti nghut a. 

"Ka hrethiam lo. Engmah chu a la rawn sawi lo naa, tum ruk eng emaw hi chu a nei niin ka hre tlat. Chuan, kei pawh ka inven a ngai, hman zan ka haw pawh zuitu ka nei tlat" a ti ta mai a. 

Chu pa chuan phàwk angreng takin, "A ranglama kan chet vat a ngai anih chu. Zui rutu che chu i hriat a ngai" a ti a. A rilru a buai hmel angreng hle. 

" Nia lo hriat ka tum ang. Pari pawh Dingi'n a lo mitmei dawn e. " a ti sap a. 

"Camp lamah chuan vawi khat tal chu rawn kal ve la, hmuh ve te pawh an chak alawm le" Mipa chuan a ti zawi sup a. 

"Enthlak ka ni rih sia, ka thei rih lo alawm. Engkim hi fel se ka la rawn kal em em ang" Cindy chuan a ti a. 

Cindy hi ZCP member a lo ni ve reng tihna a nih chu! A mak hle mai. Dingpuii pawn a hriatpui thlap a nih hmel, Rosangpuia bo chhan nen pawh hian a inkaihhnawih thei maithei a ni. Amah Rosangpuia ZCP member a ni lo nachunga rukbo a ni ve ngawt kha a kawng lo tlat! 

Judy leh Ngura te pawh Ngura te khaw lam panin an tlan mek a, Judy khan motor a la thar ve tawh a, an pahnih maiin an kal a. An titi bawrh bawrh mai. 

"An ru bo ve ngawt che hi a chhan tur awm ka la ngaihtuah thiam miah lo. ZCP member ka ni ve si lo, nang i ni bawk si lo, rin dan deuhte i nei em?" ngura chuan a ti nuah nuah a. 

"Ka nu mawle. Ka nu thawhpuite zingah sawrkar mi leh sa, pawimawh tak tak an inphum ru tih i hrethiam mai lo em ni?" judy chuan a ti a. 

"A ni mahna. An secret society hi an la kalpui zel em tih pawh hriat a chakawm. Mahse, inhnamhnawih buai tawh lo ila ka duh, kei leh nang chauh ni lo ka chhungte thlengin an tuar thei tlat" Ngura chuan thutak zetin a ti a. Judy pawh a bu nghat mai. 

"Ni e, an awm awma awmtir mai hi a tha. Nakinah zoram khawvel hian an la hre tho ang. An inthup rei thei teuh lo mai..U Ngur...kawng saw en rawh" a ti tuar a. Rul dum lian zet hian kawng a lo kan mek a, Ngura a ding hráwk. Chhuk a tum chu Judy chuan a lo chelh vat. A lu thing nar narin, "Thah kher a ngai lo. Nghak mai ang" a ti sap a. A hlau deuh tih a lang. Chu Rul lah chu rul dang ang lo takin a rawn ding ur ur a, a lei a chhuah zuk zuk a, an pahnih chuan a rawn melh tawn chhen lehnghal, a ngampa deuh chu a ni. Ngura insum thei ta lo chuan Motora a dah reng thin Chemte chu a la lawk a, a chhuak ta a. Judy erawh , "Lo awm rawh" a ti sup a. Rul nen chuan an inhmachhawn ta ran mai. Mihring nge nge chu a zah ve deuh nge, chu rul chu zawi muangin kawng chhak lamah a tleng bo ta zul zul a. Ngura chuan lungin a vawm hram. A thih erawh a ring lo. Rul ngan chi khat a ni tih erawh a hre hman, chuk na se chuan a damkhaw chhuak thei kher lo maithei a ni. Muangchangin Motorah chuan a lut leh ta a. Judy chu a lo khur der der mai. 

"Rul dang ang a ni ve lo tawp mai. U Ngur, a mitte kha mihring mit a anzia kha.." A ti ta mai a. Ngura a nui hawk, "Thil mak i tawng ngun tawh lutuk a, i ngaihtuah mak zel tawh a nih kha..kal ang aw" tiin a luah a va chul zauh a, an tlan leh ta a. An khaw luh hma deuhin Judy phone chu a rawn ri a, Ngura nu a ni. "Aw ka nu" a tih rualin, "Lateii rulin a chuk a, hei nikhua a hre lo tan..Tualpui kan pan dawn mek" khur dar dar chungin a rawn ti ta a. Judy a dáng sáwp sâwp mai. Tawng nachang pawh a hre lo. Ngura'n thil awmzia a zawh tak sekah chuan, "Lateii Rulin a chuk" a ti chhuak thei hram. Ngura pawh a break tuarh. Mak a ti ve takzet tih a hmelah a lang reng. Mahse, inngaihtuah fim vatin chak mangtarain an khaw lam chu an pan ta a. 

Abby chu rilru buai takin a vei sek a, a thaw leh hawk thin. AManda fapa bo leh chungchangah hian a inhnamhnawih miah lo tih a chiang. Tuin nge set up ta ang? A lakah eng nge an duh? A chang leh sawrkar lam hian eng emaw tak hautak deuh tihtir an duh vangin an ru bo ve lehchhawng a nihte a ring thut thut a, Amanda leh Sawrkar inkara dinga chet la lo thei lo va an siam theih nan. Mahse, ani chu sawrkar lamtang sa a nia, an duh ang chu a la tihhlawhtlinsak zel si, chutianga an tihbuai chu a ring ngam chiah bawk si lo. Lucy te a han ringhlel dawn thut thut a, a thiantha ber, engkim a chhia a tha a thlenna, a lo puih fo tawh hian a phatsan a ring phal bawk si lo. Tunah hian loh theih lohna avangin a hmelma Amanda lam a tan rih a ngai tlat! Naute a zawnpui loh chuan Amanda thinrim rapthlakzia leh tharuma a hneh lohzia kha a hai bik si lo. A phone a rawn ri a, Sama a ni. 

"Sama" a ti sap a. 

" Engvanga ruk botir leh nge i nih a? Eng nge i duh?" A rawn ti tuar a. Abby pawh a phu zawk mai. 

"Ka rukbotir lo. Ka buai mek a ni. Ka kut atanga labotu hian eng nge a duh ang tih ka hrethiam bik lo" a ti tham tiak a. 

"I zawng hmu lo a nih chuan Amanda hian i lu a la duh ngei ang. Kei a pasal pawh min kidnap duh a nih chuan nang phei chu a dim hlek lo vang che" a rawn ti hmuk hmuk a. 

"Ka hria ka hria. Min rawn be buai rih lo la, ka lo ngaihtuah ang. A tha em?" Abby chuan a ti nghat a. A hmet hlum nghal daih. Sama thleng chuan a ngei zo vek tawh, a hmanraw tha tak kha a ni si a. An mutdun tawh miau avangin Sama hian chutimaia a thlah erawh a ring lo. Amanda lahin a pawm thei tawh loh hmel bawk si. Sama tak pawh hi lehlam zawng chuan a khawngaihthlak angreng. 

Ramhnuai Camp-ah Member thar lawmluhna chu Tluanga hoin an nei mek a. Member tharte hi hmeichhia pali, mipa pasarih an ni. An vaiin Aizawl khua an ni bawk. Nula leh tlangval thah an ni bawk a, Zoram hmangaiha vei tak taktu te an ni. Kohhrana inhmang tak tak pawh an awm. Thu an tiam hnuah kut an beng dar dar a, Zochhingpuii leh Dami ten eitur an rawn sem ta a. An ei chhungin Tluanga chuan an hna thawh dan tur a sem kual a. Camp lama awm te chuan Khawchhak atanga ruihhlo leh a kaihhnawih tawlhru thinte leh Sawrkar inzawmna hailang turin ngaihtuahna an lo seng ang a, Aizawl lama khawsa ten an chhui mekte ho enthlak hna an thawk thung ang. A hmaa mi rubotu, an pawla inpe lut te erawh kha chu an haw leh ang a, Anmahni chhawrtu Doctor zawng chhuakin tu tu nge inhnamhnawih tih an chhui ve thung ang. Tin, mi panga, tharum aia thluak hmang thiam zawk ten Jaila an thian tang mekte lak chhuah dan tur an lo ngaihtuahin an lo ruahman bawk ang. An hna chanpual theuh chu tha taka thawk turin an intiam hlawm a, Hmeichhe lam pawh an phur ve viau mai. An lawmluh thar zinga hmeltha zet, vai hmel pu lek lek Hruaii chuan Tluanga chu a melh vang vang a, a hmuh tirh phat atang khan vawm bei ang thlawrh a ni. A len dan, a aw ngaihnobei zet te, a hnar ngul invuah dik thlup bakah a mitmeng rum lam lek lek, fin hmel zet avang chuan Hruaii chuan thlir nin harsa a ti ru kher mai. Theih se camp lama hun hman ve daih a chak a, mahse, Khawpui lama awm tur a ni bawk si. Mahse, hun tha chu a la inher chhuah tho a ring tlat a, a beisei bawk. Zoi pawn Hruaii mitmeng leh chezia chu kil khat atangin a lo chîk ru ve em em a, Tluanga a melh dan chu a hai der si lo. Ani Hruaii chu a hmeltha em em bawk si. A thinlunga thîkna meipui rawn alh hlup hlup chu a hmelhmaiah tihlan loh hram a tum ve táng táng a. An thawk ho tawh dawn bawk si, Tluanga hi a nghin mai a hlau a ni ber. Ani Zoi lah ramsa a ni tel a, mihring dang aiin a danglam si, a insit ru ngawih ngawih a ni ber e. 

An haw darh hnuah Zoi chu choka lamah an thil eina silin a buai hle a. A hnunga amah en rengtu Tluanga a awm tih reng a hre lo. A ngaihtuah nasat em vang ni maw, "Min chhuhsak vaih chuan ka sehhlum ang che" a ti chhuak pek a! Tluanga khuh kharh thawm a hriat rualin a inher zawk, kut kuangkuahin a lo thlir reng a. "I awm elo?" A ti ringawt a. 

"Tu maw i sehhlum daih ang?" Nui chungin a ti sup a. 

"Aa..tumah ,thil dang ka lo ngaihtuah daih a" a ti bah niaih a. 

"Sawi la, mawh.." Tiin a rawn pan hnai a. Zoi chuan melh chho háin, "Hruaii khan a duh ve che alawm. A melh dan che kha ka duh lo" a ti zawi ta sap a. Tluanga a nui hawk hawk. Zoi lu-a chulsakin, "Ta mai mai thin hian aw. Chu! I lo va chîk awm ve. Ka lo hmu ve hleinem" a ti a. 

"A hmeltha bawk sia, ka thîk alawm..nang pawn i duh ang" Zoi chuan pangchang zetin a ti nghat a. 

Chek hluk pahin, "A mak! Ka thinlungah hian i lian ber ka tih kha..ka phatsan lo vang che. Kum hi thar vat se kan innei ang" a ti hmiah mai. Zoi chuan makti zetin a melh háw a. 

"Mahse, ramsa.." A hmui a rawn hup vat, a lu thing chungin, "Ramsa i ni lo. Zoi, mihring, nula hmeltha leh thinlung nem tak i ni. Ka hmangaih che. Min nei ang che" a ti thawp sup a. Zoi a sen ap ap ringawt. Tumah mi dang an awm ve lo bawk a, Tluanga chuan a rawn fawp ta a, Zoi pawn infawh na ná na hi chu a thiam ve tawh viau. Infawh aia thui erawh an la kal miah lo. Duh nise hun an ngah, mahse, Tluanga hian a zahsak a, humhim a duh tlat! Hei tak hi mipa a nihzia tarlangtu a ni thung si. 

"Amanda, nau i nei chauh a, chawl hahdam ve teh. Kha.. I taksa pawh a chhiat tawhzia kha..thil i ei tha bawk si lo" Sama chuan Amanda insiam mawlh mawlh chu melhin a ti a. Amanda a ner sawk, "Chu! Min ngaihtuah ve deuh tihna em ni?" A ti duh lek a. 

"Aw ka ngaihtuah loh chein..ka nupui i la ni reng alawm. Tihtheih i nei rih chuang lo" Sama chuan a lo ti vat a. 

"Ka fapa, a pawm pawh ka la pawm hman loh a bo mek a, ka lo mu der der ang maw?! Duh leh ka thi mai ang. Ka fapa hi ka hmu dawn a ni mai" Amanda chuan a ti sehchilh nak a. A thin a rim leh dawn tih Sama chuan a hai lo va, ngawih a chuh ta ringawt. Inthen si loin in khatah an la cheng dun ve zel chu a nia. Sama'n a fapa a ru bo tih hria an tam lo a, an department-ah pawh Amanda ngenna angin anmahni team bik chauhin an hria a ni. Naute hmu vat se inthen vat chu Amanda duh dan a ni. Tuna Sama a then mai chuan hmanrua a nei dawn tlat lo,. A hna bansan tawh mah se; sum lamah a buai rih lo bawk a, a naute a hmuhkir lehna a nih dawn phawt chuan a neih zawng zawng chán pawh a huam. Tunah hian Abby hmu tura kal a tum mek a ni. A bul atanga ngaihtuah dun tur an neiin a hria a, Abby chu amah ang bawka thluak hmang nasa mi a ni tih a hria, chuvang chuan naute chungchang bika a lamtang tura a rilru a hneh fai vek theih chuan an hmuh vat a ring a, a beisei bawk. 

Zirsanga chu tukverhah dakin mei zu vang vang a. Ral khata tlang bawk mawi angreng tak chu a melh reng naa, a ngaihtuahna erawh a dang daih thung. Drose chungchang hian a tibuai ve tlat! Kha lai an rukbona hmuna hliam a niha Drose ten an enkawl lai khan Judy nen an titi dun a ngaithla fuh tawh a. Drose chuan a mipa hmangaih ber a lo chán tawh tih leh chu mipa bak a nunah mipa dang a lakluh theih loh thute nen lam Judy bulah khan a sawi sep sep a ni. Mahse, Khatia an han inenkawl chhoha an han inkawm nel tak hnu khan Drose mitmeng leh chezia chu hrethiamin a inhria a, amahah feelings a nei tih pawh..mahse, nupui a neih tawh miau avangin Drose chuan a beisei ngam ngai dawn lo tih erawh a hrechiang hle. Dik tak chuan Drose a va duh ve lam ni loin a nuhluite a ngaihtuah a, a khawngaih takzet a ni. Kimi nen la intawng lo nise chuan Drose chu iaina chhan tur a nei hauh lo. A hui pap a, " Nula vanduai" a ti sup a. 

Kimi a rawn haw ve chiah bawk. "Zirsang, lo kal teh..hei nula fel deuh ka rawn hruai haw a nia" a ti làng láng a. 

Zirsanga a va chhuak vat. Kimi chu tleirawl hàng lam, hmelchhe vak lo nen an lo ding dun ran a. Tleirawl chuan air bag a khai bawk. 

"Ani hi ka pasal Zirsanga a nih hi, Pa zir tiin i ko mai dawn nia. Chuan, Zirsang, hei hi Zuali a ni e. Kan buai nupa thin si a, kei ka haw tlai ve thin bawk nen, kan in min nghahsaktu tur a nih hi" Kimi chuan a ti zung zung a. Zirsanga pawh chuan, "A va tha ve aw. Ngaihngam deuhin kan chhuak thei tawh dawn a nih chu" a lo ti ve hlut a. Zuali pawh chu a room turte kawhhmuhin a lut zui a. A tawng tam loh hmel riau, mahse, tiangho hi an taima phian zel. 

Kimi chuan inthlak pahin, "Vawiin chu Drose kha ka hmu nawlh a, a inentir dawn a niawm e. Kan inbe hlut a" a ti niah niah a. Zirsanga a nghing deuh, a heh liah zauh pahin, "A fel reuh lutuk alawm" a ti ve ringawt. 

Zuali chu bathroomah lutin a inphelh a. A phone chu phawrhin darthlalang hmaa ding chungin a hmet mial mial a, lehlam amiin , "Engkim a tha maw?" A rawn tih chuan, "Aw..a tha vek e. A harsa lo turah ka ngai" a ti sap a. 

Lehlam ami chuan, "Document kha a pawimawh aw. Chet nghal buan buan chi erawh a ni lo a nia" a rawn ti a. 

"Ka hria e,. " Zuali chuan a ti a. A dah ta a. 

Amanda leh Abby te chu inhmatawnin an thu ran a. Coffee an in pah bawk. 

"Eng nge i ruahmanna?" Abby chuan a ti sap a. 

"I kutah chu chu a innghat zawk. I hnen atanga bo a ni miau a. Call i la dawng lo em ni?" A tih mek laiin Abby phone chu a ri ta ral ral a, number hlang a ni. Inmelh tawn zauh chungin an bu nghat a, speaker a on zui nghal. 

Mipa aw sin lam lek lek hian, "I naute rukbo hi hmuh let leh i duh chuan, naktuk zan dar 11-ah Sihhmuiah rawn kal ang che. Cheng nuai 10 keng chungin.." A rawn ti ta a. 

Abby chuan, "Aw le, ka hria e. " a ti nghat a. Lehlam ami chuan phone a dah nghal. Han chhui hman pawh a ni lo. A fimkhur hmel khawp mai. Pawisa duh vanga rubo an nih duh hmel ta viau mai. 

"I thiannu Lucy pawh kan zingah a tel a ngai, a mawhphurhna a ni tlat" Amanda chuan a ti a. 

"Ni e, hrehawm a ti khawp mai. Amah pawn" Abby chuan a lo ti mai a. 

Amanda chuan Coffee no dahthlak pahin, "Ka ngaihtuah a, Lucy kha inah a awm reng a nih si chuan mihring lut chu engtin nge a hmuh loh theih? Ngawi teh, Abby, ka ngaihtuah ang hi i ngaihtuah ve em? Kha pa khan tu emaw chu a thurualpui a ni. Lucy in naute a kawl tih hrechiangtu a ni bawk, Ka naute inrukbo a ni tih a hre lehzel bawk a, Police hnenah inthlen ngam dawn lo tih nen lam..Kawngka pakhat chauh awm, tukverh chhunglama inkalh vek ni bawk sia mihring lut lai Lucyin a hmu lo thei hi a mak i ti ve em?" A ti ta duah a. Abby pawh a thu ngil zawt. A ngaihtuah fe hnuah, "Amanda, a awmzia chu Lucy hian.." Tiin a hmui a hup nghal a. Amanda a bu nghat thung.

Abby chuan Amanda melh ranin, "I fapa chu him pialin kan hmu leh ngei ang tih ka tiam a che" a ti hniam raih a. A kut pharchhuah chu Amanda chuan lo vuan chatin an inchibai a. Tunah chuan hmeichhe hlauhawm tak pahnih te an tang dun dawn ta tlat mai..eng tak ang maw?!

(In mi tawngtaipuina zarah ka ha na pawh a zia chho ve zel e 😇🤗