Inferno 11

INFERNO (11)

Ziaktu: Toni Ràlte

Chawhnu dar 1 a pel awrh tihin Amanda leh Sama te chuan ONO hotel an pan ta a. Ven leh enthlak reng a nih avangin Sama chuan Abby biak lehna hun a nei lo. Lehlamah heti taka Amanda a tang na leh a naute a ngaihtuah hian khaw chen lo inngaizawnga innei ta chu Sama pawn lainatna chin a nei lo thei bik lo va. "A nih ang angin ni mai teh se. Thudik pawh a rawn lang mai ang" tiin rilru a siam ve deuh tawh a ni. Mahse, Abby laka inven a ngai tawh tur erawh chuan a awm a tinuam vak lo thung. Hmeichhe pakhat kha a tling ve miau si a. A la nunrawng chêu lehnghal. Amanda nen chuan an inbe tuitam mang lo. A hmel a thutak ran reng a, biak ngam pawh a ni vak lo. A meng sen ràm mai bawk si. A nau neihna a hliamte khan an tibuai ve miah lo em mawni tih turin a naute chhanchhuak tur chuan chak takin hma a la chho ta zel chu a nih hi. 

Hotel an thlen chuan Amanda chuan Abby chu a biaktir leh a. "Aw Abby, ka awm der tawh aw. Kan chet vat loh chuan Amanda hian a tawp a thleng dawn nia" tiin thlabar hmel takin a va bia a. Abby chu an bum chhuak zo ang e maw le..a fimkhur ve dawn tho bawk si. Thlir phawt mai ang. 

Thirlenin a hung hnan kar atang chuan an inmelh vawng vawng a. Sangpuia chuan a heh liak zauh a, za lo zeta nui chungin,"Hetianga min rawn hmuh hi ka duh vak lo asin. Mahse, ka ngai bawk si che a" a ti sup a. Nauteii erawh a men leh par tawh thung. Jail chhunga a hmangaih a pasal atana a lo suangtuah thin a han hmuh meuh chuan sawi tur reng reng a hre lo chhiava a ni e. Nguri pawn sawi dun tur an neih ringin an piah deuhah a lo nghak a. A fanu chu lainat zetin a thlir vawng vawng mai. 

"I bo lai khan theihtawpin ka lo tawngtaipui ve thin che asin. Dam taka ka hmh leh che hi ka lawm takzet a ni" Sangpuia chuan a ti leh a. 

"Hel pawl i ni ang tih hi rin harsa ka ti. Engtikah nge i chhuah theih ang?" Beiseina mitmeng nen Nauteii'n a ti thung a. Sangpuia'n a chil a lem khawlh ringawt. 

"Ka la hre mai lo. Sawrkar lam hi chuan kan damchhunga min khung hi a hrehin ka ring lo va, mahse, kan thiante hian min lak chhuah dan kawng chu an la ruahman ru reng tih ka hria" a ti zawi sup a. A hawi vat vat bawk. 

"Mahse, jail tang tlan chhuak i ni reng tawh ang a, kan innei thei dawn lo asin" naupangchhia takin a lo ti vat a. 

"Kawng a awm mai ang. Naute, tha takin lehkha kha lo zir phawt la, min ngaihtuah suh aw. Ka nuamsa lutuk a nia..bakah ka thiante an awm ve bawk a. Nangmah chiah kha lo inngaihtuah rawh aw" tiin a jail tang zawk chuan a han hnem ve lehchhawng a. Inkan hun a tawp leh dawn ta mai bawk si. Nauteii chuan,"Vawiin tlaiah Zo Choka-ah mi bo hote khan zanriah kan ei dawn a. Tel ve thei la a nuam awm" tiin a nui a. 

"Nuam deuhin va hmang r'u..i hlim theih kha aw ka naute" Sangpuia chuan lungchim zeta melh chungin a ti a. An inkalsan ta. Kawngtluanin Nguri'n Nauteii a be tawng zo ta lo. 

"Nu, kei chu kal ve loh mai ka duh. Ka chàk hlawl lo" Drose chuan khuma thu chungin a ti a. 

Diteii chuan a fanu rilru hrethiam takin, "Tun tum chauh chu insangmar rawh. I thiante an hrilhhai lutuk ang. I pa pawh a rawn thleng tep tawh ang, intifai la, lo insiam rawh" tiin a fanu samah chuan a chul thuak thuak a. In hnuaiah a chhuksan a. Drose chuan darthlalanga amah chu va melhin, "Ka va hmu leh dawn chu a nia. A nupui nen an nui hmel hmuh pawh ka tan natna mai mai a ni dawn si. Mahse, nia..Judy te an hrilhhai lutuk palh ang. Drose, tun tum chauh chu intichak rawh aw" tiin amah leh amah a infuih a. Phur lo zeta tho chhuakin intifai turin bathroomah a lut ta a. Hei ang mipa tam tak, amah ngaihzawn chaka kat nuk karah Zirsangliana ber kher a nuna a han seng lut chu a pawi chung chuang ber awm e. Zirsanga pawh hian hria se a khawngaih ve ngawtin a rinawm. Mipa rilru chhia a ni lo bawk nen. 

Bella te nupa pawh an naute vanga an lungngaihna te dah thain nalh takin an inchei a. Bella hi zawng a nulat lai atanga nalh zeih zawih kha a ni bawk a, hetia pasal a neih hnu pawh hian amahah danglamna em em a awm hran lo. Sawi tawh ang khan Aizawla an awm tak hnu phei hi chuan Imma u mami nen sumdawnna an khawih dun a, an dawr pawh a changkan bakah lun thin mep mep tak a ni. Mami lah sumdawng thiam tak a lo ni bawk a, a fapa nen an nufa ei khawp na na na chu lalut hneh tak a ni. Amah mi á a ni lo bawk a, an remti vak lo chung an in hnuai berah a fapa nen an indang ve a, in puiah an awm tam mah zawk awm e. Lydia pawh nula tak tak a ang ve tan a, a vun hàng tak kha a inhmeh ta phian a, Mami fa chu a nu ai mahin a khawih tam zawk awm e. Army lam hian a lung a len bawk a, chumi line lama kal chu a tum ruh khawp mai. An chhuah hmain Imma nu chuan, "Bella, Amanda fapa hi an la zawnga hmu thei lo chu a niang maw? A mak ka ti êm mai" a lo ti a. 

"A nih dawn hi. Hmu se ka duh ngawih ngawih, kei pawn ka khawihin ka kuah leh chak" Bella chuan a lo ti ve vat a. A mitthlain Malsawmpeka a hmu nghal bawk. 

Imma chuan,"Amah Amanda ngeiin a zawng dawn a. A hmu vata turah ngai ang" a lo ti a. Amanda chu a ringtawk hle a ni ngei ang. A hnuaia a la thawh rei loh tehlul nen..taka Imma hi Hremna kha pek a ni ve a, kum chanve chhung suspend niin, enthlak leh vil zui a ni dawn bawk a ni. A lawm daih zawk. Sawrkar inkaihhruaina tenawm ru taka zuan luh ve kha a hreh êm a ni. Amanda hnung kha zuiin kal chhuak ve tawp lo se chuan Mi bote leh a nupui ngei pawh hi a hmu leh ang ngem a hre hauh lo. Chuvang chuan hotute thu ngaichang lo va a che chhuak kha inchhirna a nei lo. 

Room kawngka a ri kauh kauh a. Amanda a tho zawk. Kawngkhar phenah a ding zui zat a, Sama'n kawngka chu a va hawng ta a. 

"Lo lut rawh.." A ti nghut a. Ke pen riin a zui nghal. Amanda chuan a kawng hnung lama a silai zeh chu a phawrh zal zal a. 

"Eng thu hmanhmawhthlak nge ni ngai a? Kei pawn hun ka nei tam lo a nia" hmeichhe aw tliang ral hian a ti a. Amanda pawh a dinna hmun atanga pen chhuakin, "Ani ni loin kei hi ka hmanhmawh zawk a ni" a ti vawt ta raih a. An thangkamah Abby a awk tih amahin a inhriatchhuah meuh chuan Amanda chuan a tlan khalh hneh tawh lutuk. Amanda silai kaw phàwt chu a hmachhawn ran mai. Mahse, zám taka awm hun a ni lo tih hriain nui sak chungin, "Nang leh kei hian sawi dun tur kan neih ka hre hauh lo mai" a ti sap a. 

"Ka naute rawn hruai la, thil dang i lo tih tawh zawng zawngah chuan ka ngaidam ang che. I duh chuan Sama pawh hi i kalpui thei ang" Amanda chuan a ti fiah kák a. 

"Chu! I naute chu ka rubo angah i ngai em ni? Min va ngai ropui ve " Abby chuan a ti hluai a. 

Amanda chuan khik sak pahin, "Ka pasal ngei i rukbotir a, tunah i kutah naute a awm tih ka hria. Abigail, thil tam tak ka sawi ve ngai lo. Hun ka nei hek lo. Tunah hian ka naute awmna hmunah min hruai dawn a ni. A tha em?" Tih pahin a nawr a. Abby kut a che zawk, Amanda chuan a silai a thlauh ta a. Chair hnuaiah a per phei daih lehnghal. Sama lah a hamhaih atalàngin a lo ding khawng reng ringawt mai si. Abby'n Amanda pet a tum lai takin Amanda a inher zawk a, awn titihin Abby kawng hnuaiah a va inrawlh a, Abby kut khing hnih chu lain a herhsak ta rawp a, Abby a rak tuar. A la duhtawk mai lo, a khupin Abby dulah a do a, Abby hmaiah a chhoh dáwm ta nghek mai. Abby a tlu sawp niaih a, che zui tur a awm ta lo. Amanda mitmeng ling phat pawh zawi zawiin a dai leh tan ta a. A hnuk tho a, "Le..kan kal thei e.." A ti a. A silai erawh a va chhar leh hram. Hotel lama thawk ten an hmuh chuan thil a fel lo thei ve tlat si a. Corridor-ah inzui pheiin Abby chu a kal pai deuh nawk nawk a, a sirah Amanda a kal thung. Sama erawh a ngawi run reng ringawt. Amanda carin Abby sawina lamah vung zetin an tlan chhuak ta a. An tlan mek laiin Abby chuan call a dawng a. 

"Aw Lucy ..eng a?! Eng maw?' A ti tuar a. Amanda pawh a tlan zawi ta deuh. Tîm zeta Amanda melhin, Abby chuan, " Naute a bo" a ti ta mai a. Amanda a break tuarh. Thinrim hmai sen teuh chungin, "Engtin nge a nih theih? Tu phiangsenin nge ru bo a?!" A ti tuar a. 

Abby chuan zàm hmel zetin,"Lucy bulah ka dah a. Tha taka enkawl a intiam a. Mahse, tun lawka bawnghnute pe turina rooma a luhin naute chu a lo awm tawh lo. Hei hi chu engmah ka hre tawh lo. Ka mawhphurhna a ni hek lo" a ti khur dat dat a. Amanda chu tawng pawh a tawng thei tawh lo, a insehruh teuh ringawt. A hnukte lam lam a ulh..a naute a fapa duhtak chu tu chuan nge rubotu te hnen atangin ru bo leh ta ang?! 

"Engpawhnise, an kidnapp a nih chuan nangmah an rawn be ngei ang che. Eng thu leh eng call pawh dawng la, a hmasa berin min hrilh tur a ni. Lucy inah chuan phei phawt ang" Amanda chuan a ti a. An tlan leh ta phawt. Amanda lu a va hai mep mep ve aw..Sama lah hnap ang chauh a ni bawk si. A meng ve kul ringawt a, chhe zawr lutuk mai a..

Dingpuite nupa chuan lo kal apiangte chu nui sàng chungin an lo welcome zel a. Zirsanga te nupa an thleng hmasa ber a ni. Drose leh a nu leh paten hnu an rawn dawl bawk. Chumini na na na chu customer pawh an la duh lo va, an thian chhar thar leh an vahvaihpuite nena hlim tak leh zalen taka hun hman an duh a ni. Dawhkan sei puiah chuan thu kual pap a. Nauteii pawh a nuin a kalpui ve a, Judy te nupa , Bella te nupa an ni bawk a..Drose leh Nauteii tih loh chu an hlimin an phur sárh mai. AN ni pahnih erawh ngaihtuahna inang lo tak ni siin an hlimna a pawnlang a, a langah chuan an nui ve tak naa, chhungrilah kaptu an nei miau si. Nauteii chuan Sangpuia bak engdang mah a ngaihtuah thei lo, a khawngaihin a ngai a, tunah te hian an zingah chuan awm ve se nuam a tih ve dawn tehlul nen tiin a ngaihtuahna a lo kawm leh veng veng thin. Kan Drose erawh a hma taka thu Zirsangliana taksa lian leh a hmel pa takte avang chuan a chhungrilah a tuiral a ni ber. A ta ni thei ngai lo tur, a khawih phak leh a lawh phaka rah ve ngai lo tur vang chuan chhungrilah a tap mek chu a ni si a. Diteii chuan a fanu awmdan leh rilru chu a hriatthiampui vek avangin a vengthawng em em a. Love line lama Drose bilzia leh mipa a ngaihsak lohzia a hai si lo. 

"Taka! Arini kha kan lo sawm ve lo a. Kan buai atalángin ka lo ngaihtuah chang tawh miah lo " Rosangpuia chuan a ti láng láng a. 

Judy chuan, "Ni tak. Mahse, an sawi ka hriat danin pawn a chhuak ngai lo a niawm e. A pasal a inpek tuk atang khan a roomah a tawm deuh chawt an tia" a lo ti vat a. 

Bella chuan, "Kawm harh a ngai anih chu! A vanduai ngawt mai. A pasal lah ti kha a lo ni sia. Mahse ,kei min mawlhtu a awm tlat mawle, Ruatfela hi ZCP hruaitu a nih rin lohna lian tak ka nei tlat" a lo ti ve hliai a. 

" Min rawn chhanchhuah laia min rubotu te hruai hrangtu, palian zet kha hruaitu a nih ka ring kei chu. Kan va hriatpui phak lohin thil hi a kal thui ve angreng sia" Zirsanga chuan a lo ti ve mawlh mawlh a. Kaikuang chu khehin a nupui thlengah a dahsak a, lo melh rengtu Drose lam chu va hawiin, "Kan Drose-i chu ramhnuai kha i ngai deuh nge i va ngui ve" a ti thum chhak a. Drose a phu zawk. Inthing harh vatin, "Aa..ngai lo e. Thil dang daih ka lo ngaihtuah a.." A ti bah nuaih a. Judy chuan, "Ramhnuai atang khan i dik tawh lo. Eng emaw vei nei i ang thin. Kan ngaithla thei ania" ngaihtuah hmel zet hian a lo ti ve bawk a. 

Nu fing fel ta ngang Diteii chuan a fanu chu chhan a ngai tih hriain ,"Aa..englo a nia. Nimin kha a pasal hual boral kum 6-na cham a nia. A lungleng ve deuh a nih dawn hi..hrethiam ru" a lo ti vat a. Ramhnuaiah khan awmho reng mah se; an mimal nun erawh an inhrilh tawn tehchiam lo va, chutia pasal hual boral a nei tih an han hriat takah chuan Drose chu an khawngaih hmel hlawm kher mai. A awmdan avang chuan a thiante mood a danglam vek thei tih hriain, "Ka tha reng. Hlim tawh ang u le..Naute, kha kaikuang hi inphel ang" tiin hlim luih a han tum a. An boruak pawh a zangkhai leh ta deuh e. Chaw eikhamah desert an han ei leh a, an ei lai mekin Nauteii chu balcony-ah a va chhuak a, ni chu a tla fel chiah tawh a, kawl erawh a la sen phût thung. Lungleng takin kawl bul lam chu a thlir vawng vawng a. 

"Nun hi a hahthlak thin tiraw?/naute" a hnung lam atangin Drose chuan a rawn ti sap a. A lehhawi vat. 

"Nangte chu i vannei tal alawm..in hausa a, i hmel tha bawk si. Bialpa tha deuh i nei leh ang a, kei chu hmabak ka nei lo. Jail-ah a tàng daih sia" tiin a lo inbunruak hawk hawk a. 

Drose chuan a kut rawn vuanin, "I hmeltha fe zawk, chuan in hausa ve tho bawk. Nangte chuan nghah chhuah tur tal i la nei alawm. Kei chu engtikahmah ka ta a ni ve thei dawn hleinem" a ti hnual raih a. An pahnihin káwl bul sen chu an thlir dun ta vang vang a. 

Zomuansangi nau vei chu a hui pap pap a, a thlan tuiin a bual huh hneh hle. A thiannu Dami'n a lo dawm a, a nu a awm lo va, a pa a awm hek lo. A nu chu awm lo mah se a mak lo. A nuhrawn a ni miau a. A pa pawh chuan ti nge nau a vei laiin a thlauhthlak theih? A pasal nen lah an man ang tih hlauh vangin an inbe pawp ngam tawh si lo. Emergency atan takmeuha an hman Tluanga number chu dialin harsa tih hmel zet hian , "Ephraime kha lo hrilh la, nau ka nei dawn a ni. " a ti a. A thaw hawk a. A dah lehnghal. Tluanga chuan a rang arangin Ephraime a va kheuh a, a beng bulah, "I nupuiin nau a vei mek" a ti a. Ephraime hmel lan dan a danglam nghal vek. A thutpuite chu melh kualin, "Khuaah ka kal a ngai thut mai. Min hrethiam r'u. Inbiakna chu Tluanga ho hian lo nei mai r'u " tih leh thawh a rual nghal a. A hmanhmawhzia chu a chet dan atang pawn a lang reng mai. A car la chhuakin kawng laih tharah chuan chak zetin khawpui lam a pan ta a. Zoi hi a lo ngaihthah deuh bawk a, a inthiam lo ru viau. Ramhnuaia hruai ve mai te kha a'n tum thut thut naa, ani rai puar a ni si. Chet vel a harsa ve bawk si a, khawpuiah lah ani Ephraime a awm ve thei bawk si lo. An tana kawng tihartu ber tu chu Zoi pa a ni. He mihring verther lutuk avang hian an nupa pawh an awm hran a ngai a, a nupui nau pai lai pawh enkawl thei lo khawpin tihian a awm ania. A inngaihtuah chian chuan a thin a rim ut ut thei. 

Zomuani sawina hmun lam chu pan nghalin nau neihna ward pawnah chuan Dami leh Zomuani nau an lo ding ran a. A nupui chu a lainat takzet a ni. Buaipuitu tha pawh a nei lo a ni si a. Dami nen chuan an lo inhriat ve tawh vangin chanchin a lo hrilh vat a, an inbiak mek laiin Doctor a rawn chhuak a. 

"Zomuansangi chhungte in awm em?" A rawn ti a. 

Ephraime chuan, "A pasal ka ni e. Sir..engtin nge ka nupui chu a awm?" Ngaihtuah hmel deuhin a lo ti a. 

"A kumkuruh a kau thei tlat lo mai a. Kan zai mai a ngai dawn a ni" Doctor chuan a ti a. 

"Aw le i tihtheih apiang ti rawh. Naute leh a nu tha se ka duh a ni mai" Ephraime chuan a ti vat a. 

Doctor pawh chuan Zoi chu zai turin a buatsaih tan ta a. Tha takin naute hi a lo piang chhuak ngei tur a ni. 

"Bawihte, thil i ei loh lutuk chuan i chau telh telh ang. Intiharh hram teh" Arini nu Pi Puii chuan a fanu meng lep lep chu melhin a ti mawlh mawlh a. 

"Nu, engmah ka ei chak lo" a ti tham tiak a. A pasal man a nih atang khan tui a in tih mai loh chuan thil sakhat a ei ngai ta lo. A taksa chau zual chhawk turin drip an khai zeuh zeuh a. Ors a in zeuh zeuh bawk. A dáng bai a, a cher kuam bawk. A pa hmel a hmu duh lo va, a pasal lah a zu kan hek lo. A rilruah eng nge awm tih hriat harsa tak a ni. A pasal a demna sawi tur a awm lo va, a pa erawh a hua tih a hriat ngawih ngawih. Apa vanga a pasal chu jail-a lut angah a ngai bur mai a ni. Lehlamah Ruatfela'n kha chen a lo buma hel pawl a zawm ve tih a hrilh hre miah lo kha na a ti hle bawk. Mahse, Ruatfela tluka hmangaih hi a nei thei tawhin a ring lo. A damchhan ang hiala a neih kha a ni ve a, a ngaidam thei em em ang. 

"Ruatfela pawh lak chhuah dan kawng i pain a zawn dawn kha..intichak hram hram teh" A nuin a tih lai chuan a nui hak hak a. 

"A hun laia engmah ti thei si lo, a pawi tawh hnua che chhuak ve leh chauh zel pa ka lo nei hi ka zak" a ti hawk a. A nu pawh a ngawi rauh rauh mai. Han tih vak ngaihna a hre lo ni fahmiang. 

Lucy in an va thlen chuan ani chu a lo za ruai a,a lo phi sek tawh mai. A mangang tih hai rual a ni lo. Abby chuan, "Engtin nge i hloh theih? Tu nge lo kal?" A ti tuar tuar a. 

"Tumah an lo kal lo. Mahse, hei lo en teh u" tiin naute an muttirna pindanah chuan a hruai lut a. Khum atanga pen 7 velah tukverh a awm a, bar a awm lo. Tukverh lehlam chu a lo inhawng a, lei atangin a sang vak lo bawk. Amanda chuan a zu thlek thuak thuak a. A hnuai chu comode pipe luhna niin, cement-a zût chhuah vek a ni. Naute pawm chung chuan a chet vel a khirh ve fat maithei a ni. 

Abby chuan, "Amanda,ka tihtheih a tawp..kei chuan tihngaihna ka hre tawh lo. Pawi ka ti lutuk. Tu ten emaw min phiar ru ve tho niin ka hria" a ti hawk a. Dáwt sawi hmel lah a pu si lo. 

Amanda a ngawi ran a. Sama lah a ding zum zût ringawt. 

"Aw le..Abigail, hei hi hria ang che. Thawh dunpui che ka duh lo viau naa, ka naute ka hmuh leh theih nan nang hian min pui dawn a ni. Ka fapa kha i zawng ang..keiin ka tihtheih ka ti bawk ang. I hrethiam tiraw?" a ti kalh kalh a. A mitmeng vawt zet avang chuan a thu hnial chu a harsa khawp ang le. 

Abby pawh chuan buk nghat pahin, "Ka ti ngei ang.. " a ti nghet charh a. Dik tak chuan Amanda chu sawrkar lam tan pawh mut mawh hnar mawha neih theih a ni vak tawh lo, a hna a bansan miau a. Hel pawl lamte nen an inthurual ang tih bak chu han hlauthawn tur a awm tehchiam rih lo va, Abby pawn a puih ngei chu a rinawm. 

"Hmanah khan lo piang tawh ila..tuna ka hliam hi ka natpui lo tur" Drose status chu..

"Engkim ka hria asin" tih comment tu a hmuh rual chuan a phone a thlauh tawp, a hmui a hup nghal vat bawk a…

(Christmas hlim taka hmang turin duhsakna sang ber ka hlan a che u. Ha ná chungin kei zawng ka hmang dawn a. Ka há in ka ziak lo naa, story pawh a tawi phah lo thei lo a ni e. Mood a tibuai pha ve tlat si a. 🥺