Inferno 10

INFERNO (10)

Ziaktu: Toni Rálte

Thawm reh chhung erawh a rei lem lo, an ri ta nuai nuai a. Silai a puak leh thuai..pakhat a au tuar bawk. A tu lam silai nge puak an hre bawk si lo, ramsa thawm a rawn hnai leh a, mipa hlau thlabar rak tuar tuar a ri leh a, mahse, chu a rak thawm chu a hla ta tial tial a. Ramsa chuan a pu bo ta a ni maithei. An chuanna motorah chuan mi pakhat rawn lutin an kut phuarna chu a rawn zai chat mawlh mawlh a. Phelh an han nih takah chuan an mit tuamna pawh chu an hlip thla nghal a. An lungphu erawh rang tak a ni. An han hawi kual a, leiah mi pahnih an lo tlu dun rial a. An thi tawh tih an lan danah a hriat. Ephraime leh a hote chuan anmahni rubotu te mi 8 zet chu an lo hnungkhirh mawlh mawlh a. Tuman engmah an sawi lo. Amanda chuan silai lek kawh vah chungin,amah hnaih bertu chu a melh a. 

"khawiah nge ka naute?" A ti vawt raih a. Chu pa chuan hamhaih zetin, "Ka hre..ka hre miah lo" a ti bah nak a. Amanda thinrim insum zo tawh lo chuan a silai kàwm chuan a bekah a chhu bur a, a tlu hnawk mai. 

Naute kha khawiah nge a awm tak ang? Tlanbopuina hman a awm miah si lo. 

Isabella chuan a pasal Imanuela a va hmuh rual chuan rang taka panin, "Remruat, ka naute..ka naute" a ti hliam hliam a. An inkuah vawng vawng mai. Imma pawn Bella dul thêp ta vek a hmuh chuan thil awmzia a hai bik lo va, thu tam sawina hun a la ni bawk si lo. Bella chuan Amanda chu melhin, "I fapa kha hnute ka pe thin asin" a ti sep a. Amanda a chhing sawk. 

Ephraime chuan an phuar hlawm ho chu kal hualin, "Keini hi ZCP kan ni a. Mi bote hi kan rukbo anga tlangbum in tum a, eng pawl nge in nih a? Engvanga heng mi te kher kher hi rubo nge in nih? " a ti chhum hmuk hmuk a. Tuman chhan tum awma an lan loh vangin an zinga palian ber mai chu a tham tho nawk a, "In kà antir dan chu kan thiam alawm..Hruaia, heng mite hi kan camp lamah kan hruai mai a ngai ang. Anmahni vanga kan hmingchhiatna hi thaibo a tul e..Amanda, chu chu a pawi em?" Tiin Amanda a va melh a. 

"Sawrkar hnuaiah ka thawk tawh lo va, kha lam chu Imanuela te nen in inbiakremna a ni mai" Amanda chuan a ti a. 

Imma chuan, "Tunah hian team angin ka kal bik lo va. In tih dan dan a ni mai e. Buaina ka nei lo" a lo ti hmiah a. Ephraime a bu nghut. 

" mahse, ka naute awmna an sawi hma chu in hruai dawn lo a nia" Amanda chuan a ti a. 

Paliana khan, "An kal bo pui tawh. Khaw nge an kalpui dawn ka hre lo" a lo ti nghut a. Amanda a insehruh khawp mai.

"Tu nge? Tuin nge hruai?" A ti fiak thak a. 

"Abigail tih chiah kan hria. Khawia awm nge a nih kan hre bik lo. " Paliana chuan a ti leh a. 

"Aw le, nangni hi sawrkar rawih in ni tiraw? A chiang em?" Amanda chuan a ti fiah kàk a. 

Paliana bula ding chuan, "Ni lo. Sawrkar an ni lo. Mahse, tirtu kan nei..amah chu tu nge kan hre lo" a lo ti vat a. Hei hi chu dawt pawh a ni kher lo maithei. An ni ho mai mai hi chuan tu nge a fawng vuantu hi an hre hauh lo vang. Chhawr an ni ve ringawt a nia. An hriat tur chin chu a ril lem lo viau ang. Amanda pawn a hrethiam nge zawhna dang a nei tawh lo. Abigail tih hming erawh a thinlungah a chiang viau. A fapa rubotu chu hmeichhia tho a ni a, A la hriat ngai loh nimahse, hmeichhe naran chu a ni lo vang tih a ring. 

Ephraime ten an mi mante an hruai hran atanga reivak loah Police department lam an rawn thleng ve chhap a. Mahse, an hawihai viau. Rubotu te hmel hmuh tur awm ta lo chu, RUang pahnih lah kha an senghawi hman tawh bawk si. Inspector Nunpuia chuan Amanda chu kawkin, "Mimal anga i kal avang hian man theih i ni tih i inhria ang chu maw? Hotute thu nghak hman lo khawpa i kal chak hi a pawi thei maithei a nia" a'n ti ngawt a. Amanda a nui hak. 

"Sawrkar uisathiam ka ni tawh lo ve, ka duh duh dana che turin zalenna ka nei bawk" a ti nghat a. 

"Khawiah nge heng mite ru botu te chu?' Nunpuia zahzel chuan a ti a. 

" An tlan bo" a lo ti hmak. 

Tih vak ngaihna awm hek lo le..mi bote chu phur hawin chu lai hmun chu an chhuahsan ta a. Imma dinhmun erawh a derthawng maithei. Hotu te thu nghak hman lo va, Amanda ruala a chet ve avang khan. Mahse, pawi tihna a nei lo, a nupui duhtak a hmu let tawh a, suspend mah se pawi a ti therte lo. An department tawp ru tak pawh chu kalsan tlak niin a hre ve tawh. A rilru kilkhatah erawh zawhna a awm run a.Bella chuan nau a chhiat nge an rubo ve tih chu..mahse, a inngaihtuah buai tak tak hmain, Bella chuan, "Nau ka chhiat a..Chuan, Amanda fapa kha ka kutah an rawn dah ta a, ka hmangaih hman lutuk asin, a hming pawh Malsawmpeka tiin ka phuah a..ka hmu leh ang em le?" A ti chuai raih a. 

Imma thinur chu a sen tàwn táwn mai. Rubo lo se Bella hian nau a chhiat kher lo vang. Nghakhlel taka an lo thlir dun ve an fa lo piang tur chu leilungah a thamral ta. He ruahmanna tenawm tak siamtu hi hmaichhana hmuha a fa thisen man rul let tura vau a chak kher mai. An hre chho zel mai ang chu maw..

Zirsanga pawh an zalen tak vang nge a hliam pawh a zia sawtin a hria a. A nupui hmuh hlan a nghakhlel takzet a ni. Tin, tum nghet tak a nei bawk, hetiang thil titu a bul tumtu hi tu nge tih hriatchhuah a tum ngei ngei dawn. Chu chu a rilruin a intiam mawlh mawlh mai. Hel pawl mi leh sa a ni lo nachungin sawrkar thiltih dan dik lo te doa sawisel ve thin a nih vang chauha rukbo niin a inhria. Chu bak chhuanlam tur dang a hre lo. Nge a nupui hi Hel pawlah a lo inhnamhnawih ru ve reng zawk ni ang? Chu a ngaihtuahna chuan a rawn tiharh zawk mai. Kimi a ngaihtuah a, Lecturer a ni a, a nitin hun hman dan a hre vek. Tu te nge a hmuha a biak thin pawh a hria. Kimi chu a ringhlel phal lo. Hel pawl a ni thei lul lo vang. 

Station lamah an lut ho dial a. An chhungte theuh an biak hnuah an lo lam hun tur an lo nghak ta thap a. Zalenna boruak an han hip ve leh ta chu awmdan te pawh an thiam lo lek lek hial..an bo rei ve bawk ani. Bella te erawh Imma nen an haw tlang nghal. Sawi tur an ngah nupa ve ngawtin a rinawm. Judy pasal Ngura a rawn lang hmasa ber a,a pawr fap mai. A nupui bo atang khan ngaihtuahna a seng nasain a nupui a ngaihtuah vang ringawt pawn a hriselna a tlahniam hle a ni. Innei hlim chauh an la ni bawk nen, dik tak chuan rilru chu a hrehawm duh ve viau ang. An han inhmu chu an inkuah vawng vawng a, mi dangte chuan hmuhnawm ti takin an lo thlir thap a. An inzui chhuah dawn lai velin Diteii te nupa leh Lawmsanga te nupa pawh an rawn thleng ve ta zat a. Kar loah Kimi leh Dingi te an rawn lang bawk. Hlim vangin mittui a luang a, an ri nuai nuai mai. Police lam pawn an lo thlir vel mai mai, an lawmpui tak tak em tih erawh anmahni kan nih loh vangin kan sawi thei lo. Nauteii phei chu a pa kuahin a tap zawih zawih a, A pain duat takin a lo chul heuh heuh a, Nauteii chuan, "Pa, U Sangpuia chu a tang tak tak em ni?" A ti tham tiak a. 

Lawmsanga chuan hreh hmel zetin, "Aw..a pawi ka ti khawp mai..naute" a ti sup a. Nguri a melh zauh bawk. Nguri lahin tawng hun a lo hre chat chat bawk si, "Ka naute, i haw phawt ang aw. Inah he mi chungchang chu kan sawi dawn nia. I u te pawn an lo nghakhlel tawh ang che" A ti siam siam a. A bopui te ho chu va melh kualin, "Hei ka fanu in lo enkawlin nauteii tih takah a no si a, in lo dawhtheiin in lo hrethiam a, kan lawm takzet a ni. Kan kal phawt ang e..kan la inhmu leh fo turah ngai ang aw" tiin a nui a. An ni pawh chuan an rawn nuih let ve a. An chhuak zui ta. 

Judy leh Ngura pawh an chhuak fel a. Zirsanga te leh Drose te chu an indinchilh a, Drose hian Zirsanga kha a enkawl nasat deuh bik vangin ngainat pawh an inngaina zual a. Zirsanga chuan lawmthu a sawi mawlh mawlh mai. Kimi pawn a lo pui ve bawk a. Diteii te nupa pawh chuan, "Ani hi zawng hmeichhe awmchhun tih takah a nu tehchiam lo va, chutia in lo inenkawl thei chu a lawmawm lutuk e. Lo tha zel rawh.." An ti ve luam a. Drose te an chhuak fel a, Rosangpuia leh Zirsanga chu an indinchilh a. 

"I dam chian veleh kan dawrah chaw kan eiho ngei tur a ni" Rosangpuia chuan a ti a. 

Zirsanga pawh chuan, "Tehlul e. Kan rawn kal ngei ngei ang. " a lo ti ve bawk a. An nupuite ve ve pawh inrual thawkhat an ni bawk a, an pali chuan an hmuhnawm khawp mai. An hmeltha si..police te pawn an hmu duh ngang mai. An pali chuan an chhuak ho ta a. Inhmuh khawm leh hun tur leh chanchin inhrilh tawn tura inchah chung zelin an inthlah liam ta a. 

Kan Amanda erawh Abigail zawng turin a chhuak leh ta poh chu a nia. Sama lah kha a hnek deuh vang khan a mu zawi reng si. Amanda chuan a rilru thlakin Sama chu in lama hawnpuia han enkawl dam tetea Aby awmna zawh a tum ta zawk a. Pawng zawn ringawt chu dikin a hre bik lo a ni. A fapa tan chuan khawvel pawh a fang chhuak thei em em ang. A pasal vanga a thil tawn zozai chu awih harsa a ti hial zawk. Sama inthlak danglam chak lutuk leh amah hnaiha a thluak sutu thluak that turzia a ngaihtuah a. A el tur hi namnul mai chi niin a hre lo. Mahse, Amanda a nih chhung chuan tumah hlauh a nei hauh lo thung. A fapa tan game a khel dawn miau a. 

Farm house chhung chu thinrim inhnial thawmin a khat a ni ber. An ruahmanna a tlawlh takah chuan an inpuhmawh tawn a, an inkawk sawk sawk mai. An zinga hmeichhe awmchhun erawh a ngawi ran a. A mitmeng thim raihah chuan enghelh emaw tak a nei tih erawh a lang. Amanda nen an inhmachhawn hun a thleng tak tak dawn ta tih a hai lo va, a phur rualin a huphurh ru ve tho mai. 

"Pu Thana ruahman ang khan kal ila he thil hi a thleng lo vang. Mi rukbo kha a tulna kha a awm lo bawk a ni. Mualpho leh mipui thinrim hmachhawn chiah kan hmabak ta" Pu Ruata chuan a ti ram hmuk hmuk a. A meng sen rûm bawk. 

"Mahse, kan mi chhawrte kha an tlan bo a ni lawm ni? Mipuiin engmah an hre lo turah ngai ang" Pu Mawia chuan a lo ti zawi sup a. 

Pu Ruata chuan awrphiar tawng tawngin, "Mawla, an tlan bo tak tak i ring em ni? Hel hoin an la bo tih a lang reng alawm. Tlan bo se a tu emaw ber hi min rawn be pawp tawh ang" a ti tuar tuar a. Tawngkam pawh an duhtui lo sáwt khawp mai. Pu Mawia pawh chuan Pu Ruata a thinrim êm vangin awka a nei leh ta lem lo. 

"Hel ho hian ram an rawn lak leh hma ngeia kan hmeh mih hi a hun tawh viau a ni.." pu Zira chuan a ti chuar chuar a. Ani hi chu pa zaidam ve tak kha a ni bawk a, a awka pawh a dam thlup mai. 

"An hruaitupa ber kan chhuah leh ta bawk sia, kawng a ping tlat. Ruatfela hian engvanga hetia rawn inpe ve ngawt nge maw a nih dawn ni..an hruaitu a ni lo tih lah a puzawn hian a hrechiang viau si" Pu Muana chuan a lo ti a. 

Pu Thanga chuan, "DGP Dingliana vang vek alawm. Thu a nei si a, kan thu hla a ngaichang tha duh der bawk si lo. Pawi tak a ni. Mahse, beidawng lo ang u. Mipui tam zawk hi kan lama tang an ni. Thisen chhuahna duh lotu hi an tam zawk..hel pawl hi an mit tep tawh ang" a lo ti ve bawk a. Tlemin an thinrimna leh an ippikna pawh a ziaawm ta deuh e. Anmahni leh mahni chu beiseina an insiamsak tawn a ni ber mai. An ni ho hi Zoram khawvelin an hriatchhuah vaih chuan Zoram kalphung a danglam dawrh dawn si a. 

Pu Ruata chuan Abby chu melhin, "Khawiah nge naute chu i dah?" A ti ta daih a. Abby a lo inngaihtuah tui a talàngin chutia a rawn ti thut chu a phu deuh dawrh a. Inthing harh vatin, "Ka thian tha tak bulah a awm e" a ti sap a. 

"A that chu. Tunah chuan Amanda hian a veh tawh dawn che a nia. I fimkhur viau a ngai ang. Amanda hmang hian thil tih dan kawng a la awm dawn, hel pawlte nen an inthurual a, amah atang hian man dan an awm ngei ang" Pu Ruata chuan a ti charh charh a. Abby pawh a bu nghat nghat mai. 

Kimi chuan a pasal hliam chu sil faisakin a be pah siam siam a. Zirsanga chuan a lo thlir leh veng veng thin. Nui chungin, "Ka hmuhnawm viau a ni maw?" Kimi chuan a ti sep a. Zirsanga a thaw hawk, "Ka ngai tawh ém che a ni. I tel lo chuan ni a rei duh khawp mai" a ti nghut a. 

A bianga chul pahin, "Naktukah i hmuihmul kan ziat ang. Tikha chuan Rambo i nih duh hmel tawp..umm" tiin a melh kiau a. Zirsanga chu a bu nghut a, "Ka nupui thu ang zelin le.." A ti sup a. Inhrethiam tawn takin an innuih sak a. Tunah chuan Zirsangliana leh Kimi te khawvel a par vul leh thei ta. 

"Duatpui, hmu miah lo chea nitin leh zantin hun hman hrehawmzia kha..lo hnai teh..ka fawp chak tawh lutuk che" a nupui pawh hnaih pahin Rosangpuia chuan a ti sup a. Dingi chuan khik sak pahin, "Kei chu ka mutui thei lutuk asin" a ti el a. Rum hruih chungin Rosangpuia chuan a fawp a, a duhthawh telh telh a, khumah chuan an tlu dun a. An inleh thal thiak thiak mai. Thawm dim a ngai lo bawk a, Rosangpuia thlakhlelh ber hun chu a thleng leh ta..

"Sama, hei harh teh..i harh em?" Amanda chuan Sama chu a sawi nawk nawk a. A rum tuah tuah ringawt. A harh duh lo lui niin a hria. A harh ngei tur a ni. Sama chhungte hnenah tibuai rih lo tur leh Sama awmdan zawng zawngte chu a sawi a, an lo hrethiam viau mai. Mi pangngai chhungkua an ni bawk a, Sama pa phei chu Sama lakah a thinrim viau, ama fapa ngei rubo duh khawpa a rilru a danglam chu zilh ngei pawh a tum a ni. 

Puan huhin Sama hmai chu a hruksak a, a hnekna kha a biang a duk bakah a vûng deuh bur a. Tui vawtin a dehsak bawk. Sama chu a rawn meng ta a..a meng fiah viau mai. 

"Khaw nge ka awm?" A ti sup a. 

"Inah mawle..ka hruai haw leh che a nih hi. A chhan chu ka fapa kawltu awmna min hrilh dawn vangin" Amanda chuan a lo ti nghal zat. 

Sama chu a nui hawk a. "Chu! Ka fapa ni lo, i fapa chu i la hmu lo a ni maw? A va lawmawm ve" a ti kher a. Amanda a insum zo lo tep. Mahse, kutthlak leh êm chu tiin a insûm ta zawk a. 

"Abigail awmna ka hre duh, Samson.." Fiah kel kawl hian a ti ta a. 

"Ka hre lo. Abigail pawh ka hre ngai lo" Sama chu a duh aiin a tawng hma. Chutak chu Amanda lo chîk a ni si. 

"I tlangval lai atangin dáwt i sawi ve thiam lo ka tih thin kha..sawi mai teh. Tichuan, ka fapa ka hmuh veleh inthenna lehkha kan tifel ang" a ti a. 

"Ka hre lo tak tak..A awmna a chenna hmun ka hre lo. Kan inhmuh chuan hmun dangah kan inhmu thin" a ti ta a. Hei zawng dáwt a nih hmel loh. Ni e, Sama hian Abby chenna hmun a hre tlat lo a ni. 

"Call rawh..tunah" Sama phone pek pahin Amanda chuan a ti a. Sama chuan namnul tum zetin, "Engvangin maw.." A ti hàw a. 

"Biak dan tur ka sawi ang a, i bia ang. A chiang em? I ti ngei ang. Samson" Amanda chuan insûm tak chungin a ti a. Hreh zetin Sama chuan a phone chu a ban a. 

"Lawkin" Amanda chuan a ti leh phawt a. Amah chuan ONO hotel va biain, "Naktuk chawhnu dar 2 atan Room no. 056 ka lo hauh e" tiin. A biak zawhah Sama bulah chuan, "Inhmuh i duh thu leh inhmuhna hmun tur i sawi ang a. A tawk aw" a ti fiah kák a. Sama chu a ner sawk. 

Abby number chu a dial ta a. A ring ral ral a. A ring zo dawn lek lek tihin a rawn la ta a. 

"Abby, buaina ka tawk a, inhmuh ka duh, naktuk chawhnu dar 2-ah ONO Hotel room no. 056-ah ka lo nghak ang che" a ti zung zung a. Abby tawng leh hmain Amandain a off leh hmiah. 

"Nang leh kei kan kal ang. Abbyin he thuruk hi a hria anih chuan, Sama, na lua awm loin ka che ang. I hrethiam em?" A ti vawt raih a. Sama pawn Amanda mitmeng thim raih chu a hrethiam nge a bu nghut mai. Sama hi a nêm tan ve ta em ni le?!

Nauteii chu a insût hliam hliam a. A mittui a luang ngiai ngiai bawk. A hmangaih em em, a chhungkua tih loha a tana mi hlu ber Sangpuia chu jail run thimah a awm tlat si! Chuta karah hel pawl zingah a kul ataia tang thin a lo ni ru reng bawk. Inneih pawh an innei thei dawn ta loah ngaiin a lungngai takzet a ni. Nguri te pawn han hnem vak ngaihna an hre bik lo. Lawmsanga chuan, "Duatte, insum hram hram rawh aw. Sangpuia pawh a rawn chhuak ve leh thei tep tawh ang. Inrinniah i nu nen inzu kan ve dawn nia, ani pawn a ngai ngawt ang che. A lakah thinrim miah suh aw. Mipa a ni a, a tihtur dik tak a ti a ni mai.." A ti charh charh a. 

Nguri pawh chuan, "Ni e, Naute, i pa sawi ang khan amah dem zawngin tawng cheh lo hram ang che. A rilru a hrehawm ve dawn teh a nia. " tiin a fanu sam a chul heuh heuh a. A fanu duatlai chu a lainat takzet a ni. Rei tak a bo hnuah a rawn zalen a, mahse, a bialpa lunginah a tang bawk si. A la naupang ve bawk si a, a tan chuan a awlsam hauh lo vang le. 

"Zoi, Zo..i tha em?" Tluanga aw ri chu hla tak atanga rawn ri chhuak niin a hria. A meng diar diar a. Hnai taka amah melhtu Tluanga chu a han hmu ta a. A thla a muang sawt mai. Tluanga chuan a jacketin a taksa ruak vek chu a lo khuh a. A han inbengkang dawn a, a lu a hai bur a, a luak a chhuak hle bawk. Tluanga chuan a lo pui vat a. A han hawi chhuah chuan an piah kawr kama mi ruang lo let reng chu a va hmu ta a. Makti zeta Tluanga melhin, "A taksa saw a va him ve" a ti a. A sawi awmzia lo hrethiam nghalin, "Ramsa i ni lo ka tih kha..ani saw i khawih lo." A lo ti vat. Zoi pawh a hlim sawt mai. Mihring sa a ei lo ringawt pawh a lawm a nia. He nau vanduai chung chuang lutuk hi chu aw..

An han inthing harh a. Tluanga kawr chu hain , a jacket chuan a hnuailam a tuam a. Camp lam panin an kal dun ta chhet chhet a. 

"U Tluang, ka dam thei ang em?" A ti ta thut. Tluanga pawh a hamhaih deuh, mahse, rang taka insiamthain, "Ephraime khan damdawi a chah tur thu a sawi ngei alawm. Ring tawp ang. " a ti ta a. Zoi mitmenga phurna lo lang pawh a langsar sawt hle. 

"Mahse, dam hlen thei ta lo ila" tiin a meng hnual lehnghal a. Tluanga chuan kuah vatin,"Ka pawisa lo. Eng mi pawh ni rawh ka enkawl ang che. Zoi, ka hmangaih che alawm" hnai set sawta melhin a ti dam thlup a. 

"I chhungten min hlau dawn asin" a ngaihtuahna a hmang nasa ve hle tih a lang reng mai. 

"Kan pahnih chauhin ramhnuaiah kan khawsa mai dawn alawm. Eng chen nge ZCP hi kan kal dawn hriat a ni lo bawk nen" a lo ti diam a. Zoi chuan han tih leh vak dan a hre tawh lo. Tluanga bulah a thla a muang a, a hah a dam thin tih chu a hrechiang viau thung. Camp an thlen chuan a lo reh thiap a, khaw chhungah a tam zawk chu an inzar pharh leh tawh a. Camp-a awm chu tlemte an ni. Zoi chu a inbual nghal a. Thawmhnaw fai inbelin tunah chuan a zang ta vah mai. Zan lama thil thleng kha chu ngaihtuah loh hram hram a duh rih a ni. Ephraime a rawn lang a, Hruaia leh Mapuia ten an rawn zui bawk. 

"In rawn haw thei maw? A lawmawm e. Mi man lai kan nei a. Kan buai deuh atin ni" a ti nghal sawt sawt a. Zoi pawn hrethiam takin a lo buk khum nghat a. 

"Tluanga, an chungchang saw kan rel a ngai ang. Kan sezawl chhuah leh tawp chuan kan awmna kan puangzar lekfang a ni dawn a. An nunna lak kher erawh ka duh chuang lo. " Ephraime chuan a ti zung zung a. 

"Ka hrethiam lo khawp mai. Mahse, anmahni tirtu te saw zawt chhuak phawt ila an awm zel dan tur chu a chiang mai lawng maw?" Tluanga chuan a lo ti a. Engmah an la inzawt lo hrim hrim kha a nia. An mi mante hi an vaiin pariat an ni a, an tawng mawh hlawm viau. Mahse, eng emaw tak hre lo chuan an chhuah duh dawn lo tih hrethiam lo tur khawpa mawlmang erawh an ni lo. A dik adik chuan an veng chhungah pawh heng mite hi a rawva pawl an ni ngai lem lo. Pahnihte phei hi chu Kohhrana inhmang ve tak, pawisa mamawhna vang liau liaua hetia inrukbona kawnga zuang lut ve an ni. An sum dawn a tlem hran lo bawk nen, uiawm tham ve tak chu a ni. An rilru pawh a buai ve viauin a rinawm. Lo chhuak ta pawh nise anmahni chhawrtute lakah inven a ngaihna chin a awm tawh dawn tlat a! An ka an àng tih an hriat phei chuan an that duh mai ang tih an ring thiam ve tho. An dinhmun a laklawh angreng viau. 

Ephraime leh a hote chu an va lut leh ta a. An lo en thap. He Ephraime hi an hmuh vawikhatna a ni, a palen leh a hmel a mizo vak loh vangin thlahpawlh a nih an ring ve tho mai. 

Ephraime chuan a aw thian khakin, "Khai le..thiante u, nangni leh keini hi inhuatna chhan tur nei lo kan ni. Amaherawhchu, kan lem changa zoram mipui bum nana hmangtu che u hi tu te nge an nih hriat kan duh tlat mai.." a han ti te te a. 

"In tan engmah hlauhthawn tur a awm lo a nia. Mahse, in ká in an duh miau loh chuan kan inkawl rei deuh dawn tihna a nia.." A ti a. 

An lo thaw hawk hlawm. An hre thui lo nasa mai si a. Mahse, an hriat ang ang sawi mai chu an tan tha ber tur nia an hriat vangin an zinga palian ber chuan, "Kan hre thui lo khawp mai. Doctor Malsawma kha an agent a nia, amah kal tlang khan kan indawr thin" a ti ta a. Rin aia a sawi awlsam avang chuan Ephraime chuan a ringhlel deuh nge a melh vung vung a. A khi ta suk a. 

"Ka ring e. Sawrkar an inhnamhnawih in ring em?" A ti ta a. 

Pakhat chuan, "Ka hrethiam lo..chulam chu..kan hriatchhun chu hel pawl hi an do hle tih a ni mai" a rawn ti a. Ephraime a bu nghut. 

"A nih leh he ruahmannaah hian engtin nge in tel ve theih? An sawm che u em ni?" A ti ta zel a. 

Paliana chuan, "Doctor Malsawma sawm te vek kan ni e. A tam zawk hi chuan pawisa kan mamawh vangin kan zawm ve mai zawk a ni. Tin, nunna inlaksak tih vel a awm lo bawk a. Rukbo te ven kha kan hna a ni mai a" a ti mawlh mawlh a. 

"Chu! Nangmahniin khang mite kha in ru bo lo tihna em ni?" Tluanga chuan a lo ti ve a. 

Pakhat chuan a lu thin ngur ngur pahin, "Aih, kan rukbo an ni lo. An rukbo vek tawh hnuah a veng turin kan kal chauh.. Keini pawn engvanga rubo nge an nih kan hre bik lo" a lo ti vat a. Ephraime pawn a awih vek..misual leh rawva hmel an pu tlat lo. 

"Tihian chhuak ta ula, in pawisa hmuh tur zat inhmu tho ang em?" A ti a. 

"Ka hre lo..min pe duh kherin ka ring lo. Kan dinhmun a derthawng sawt bawk ang" paliana chuan a lo ti a. 

"Ni e, in dinhmun mai ni lo in chhungte thlengin an dinhmun a derthawng thei tlat. Mahse, rem ka ruatsak ang che u..kan tlan bo ti ta mai ula..tuman kan hruai che u tih an sawi dawn lo bawk a. Mahse, kan awmna hmun hi a thawi tham hlek pawn in sawi lo thung ang a..kan inrem em?" Tiin a melh kual a. 

An ngawih vang vang hnuah ," A tha viau tak ang" pakhat chuan a rawn ti ta a. Mi dang pawn an lo zawm ve tliar tliar a. Paliana ber chuan ,"Kei chu a rem anih chuan in zinga tel ve ka duh a ni. Chhung leh khat ka nei tawh chuang lo va, tihian min la lut mai u la.." A ti ta mai a. Boruak a reh duk mai. 

Drose chuan ral khata tlang hring dup chu thlir vawng vawngin a chek leh hlak thin. A mitthlaa Zirsanga hmel hlir lang thin chu a duh lo ngawih ngawih. A zalen ngei tak naa, Zirsanga khan a thinlung a ruksak tlat si! Tu bulah mah a sawi ngam lo va, sawi ngam tur pawh a ni lo reng a. A nau duat em em Mampuia lah jail-ah a lo tang daih si a..a zalenna pawh chuan hlimna a pe tehchiam lo hle mai. A thaw leh hak a. 

"A mak! Lalpa, min hmangaihtir lo hram rawh..khawngaihin..mi duhlai a ni si" a ti sap a..a chhing vang vang a. A hnunga ngawi renga lo ding a nu Diteii a awm ve tih reng a hre lo. Diteii chuan lainat zeta a fanu melh vawng vawng chungin..a rilruin, "Lalpa, ka fanu tawngtaina kha chhansak hram teh" a ti a.

Drose nunah mipa pahnih chiah an la awm..pakhat chuan mual a liam tawh a, pakhat erawh dam reng mah se; Kimi pasal a ni tlat si! Kan Drose Zochhuanawmi vanduaizia hi aw..! 

(Naktukah ka bazar ve dawn avangin story a awm lo vang aw 😍😊