Judy last

MISS JUDY ( LAST)

Ziaktu: Toni Râlte

(Inferno lamah a behtel dawn vangin ka tihtawp mai a ngai aw. In lo hrethiam dawn nia) 

In ka va thleng chu ka pa chu an lo lenpui ve tiai a. Ka nu chuan min lo dawngsawngin min lo buaipui vat vat mai. Ka pa chu a lo mu hlán a,ka tum aiin ka hmu tlangval zawk. Chu chuan ka thla a timuang deuh a, a bulah va thuin a kut ka va vuan a. 

"Damdawiina kal tha i ti lo em ni?" Ka ti a. 

Lateii chungchang an hriat ka duh lo. An rilru a hah tawh sa nak alaiin an buai zual dawn. 

"Damdawiin kal lo va ka that theih mai ka beisei mawle. Ka nák ná hian ka thawk a tisak tih mai loh chu, a dang chu nä em em ka nei tawh rih lo. " a ti ve mai a. 

"Mahse, naktukah i va kal hrim hrim ang u. Ngaihthah ngawt chi a nih bik loh chu" ka ti a. A buk ve nghut kha. Ka va inphih harh thuak thuak a, chaw ka ei zui ta a. Mi dang an awm ve rih vang nge ka nu paw'n Judy chungchang engmah min zawt rih lem lo. Ka pa chu nachhawknain kan chiu leh a, a muhil zui ve mai. Ka ippik a, ka buai ru em em a ni. Ka farnu chu tunah tu emaw kutah a awm mek chu a ni si a. Ka nu leh pate hian hre ve ta se engtin nge an dawnsawn ang le? Amah Lateii pawh a hlauhthawn leh thlabar dan tur te..aa..ka lainat takzet a ni. Min rawn betu number kha ka nute mut tawh hnuah ka call leh a, a off tlat bawk si. Judy call ka tum lai takin a rawn call ta a. Pawnah ka chhuahpui vat. Ka nu te an harh ka hlau sia. 

"U Ngur, Azuii hi ka ringhlel ta tlat! A chhan chu pindan rûk ka hmuha ka chhoh leh khan amah chiahin ka kalna min zawt a ni. Ka hrilh chuang lo a, ka awm lo tih a lo notice chat danah ka ringhlel. Tin, U Siama nen nichin lawk khan U Siama roomah an inbia, an inbiakna erawh ka hre lo" a rawn ti a. 

"Kha lam kha chu dah tha lawk ila, Lawmkima te chu i ko tawh ni lawm ni? An va rawn thleng har ve" ka ti a. 

"Naktukah chet lak an tum. Lateii bo thu pawh ka hrilh tawh a, mahse, hmanhmawh taka kan chet chuan Lateii nunna a derthawng dawn. A ruk thei ang bera kan kalpui a tha" a rawn ti a. 

"Ni e, Police i hrilh tih kha an la hre lo chu a ni phawt ang a, engmah an la rawn sawi lo" ka ti a. 

"Lo call tu che number kha ka chhuitir mek bawk aw. Mangang lutuk suh. " a rawn ti dam diai a. 

"Mangan loh theih loh ni hek lo. Ka farnu ngaihtuah a na bawk si" ka ti a. Ka lung chu a awi lo ve ringawt. 

"Ni ngawt mai. Engkim hi keimah atanga chhuak a nia, keimah vanga heng hi thleng a ni. Mahse, U Ngur, hremna an hmuh hma loh chuan ka beidawng dawn lo. Pakhatte mah zuah loin jail-ah ka nawr liam dawn a ni" a rawn ti nghat nghat a. 

Ka muhil hleithei lo. Kan hetih mek lai hian Mizoram hel zinga hruaitu lawk zual pahnih an man tih thawmte a thang a. Ka ngaihven hman vak si lo. Ka farnu bo thu hi a thiante pawn an hre lo tihna a nia nga, engtin emaw tak chuan an bum chhuak a ni ngei ang. Tunah chuan a tuka lo thleng tur chauh chu a ni ka nghah tak ni. Mahse, ka farnu nunna hian a tawrh phah ang em? Chu chuan min kap ve tlat bawk si. Muthilh chu kaha se a ni ringawt e. Zing dar 4 velah ka mit thip leh lu na lutuk vanga ka chhing lui chu ka lo muhil zui ve hram a. Ka harh chuan dar 8 a lo pel vah tawh. Ka chauh ringin ka nuin min kaitho duh lo a lo ni. Ka phone ka dap nghal a. Battery a lo low vek chu niin, ka charge vat a. Ka tih nun atanga 3mins velah call ka dawng ta nghal. Ka hriat ngai loh bawk a ni. 

Ka lak rualin, "U, keimah Lateii..U, min pui rawh. Misualin min ru bo a, ka tlan chhuak a, Khawngaihin Aizawlah min lo hruai rawh. " a rawn ti tap tuau mai. Ka thaw káwk a. Ka nau aw ka han hre leh chu ka lawm hawk hawk ni maiin ka hria. 

"Ka nu ten an hre tur a ni lo aw. Mate" bathrooma ka luh hnuah ka ti a. 

"Aw an hriat ka duh loh vang alawm nangmah ka lo biak che. " a rawn ti a. A aw pawh a tham tiak mai. A tap nasa a ni ngei ang. 

"Khawiah nge i awm tunah?" Ka ti ta vat a. 

"Durtlangah ka awm a..hei tunah chuan huan thlamah ka tlan lut tawp a, ka lo biakna che pawh hi thlam neitupa phone a nia" a ti a. 

"Late, engpawhnise ,i him dama ka lawm. Khawngaihin huan neitupa chu ka lo bia ang e" ka ti a. A pe a ni ngei ang, mipa puitling aw hian min lo chhawn nghal a. 

"Ka pu, ka farnu i lo humhim a ka lawm e. Aizawla ka rawn kal hun chhung a rei hmel si a, chumi chhung chu khawngaihtakin khuaah in inah emaw i lo awmtir rih thei ang em?" Ka ti ta tawp a. 

"Thei tehlul e. Amah hian hostela let a duh thu a sawi a, mahse, a tan a hlauhawm ka ring sia,ka lo remti chiah lo va" a ti dam thluam a. Thla a muang suai suai mai. 

."Ni e, a hlauhawm ang. Hostelah chuan let rih suh se.. Kei pawh chaw ei khamah ka rawn chho leh ang. " tiin kan inbiakna chu kan titawp ta a. Judy ka call leh nghal vat. 

"Lo call che ka tum chiah a. Tunah chuan Lateii awmna hriata chhanchhuah chiah kan hmabak ta. Pindan rûk chu an rawn verified tawh a, camera an kam thluah bawk. Tu te nge ka nu thuihhruai finfiahna kan hmu vat dawn e" a rawn ti ta a. 

"Lateii a tlan chhuak a" ka tih rualin, "Maw?! Tak tak em ni? Khaw nge a awm?" A rawn ti chul a. 

A awmna chu ka sawi a. 

"I rawn lam vat loh chuan a him lo a nia. In khuaah awm rih se a him ber rih ang. I pa chu a chetsual dan chu i zawt chiang tawh em?" A rawn ti mawlh mawlh a. 

"La zawt chiang lo, vawiinah damdawiina phei pui ka lo rilruk a. Aizawl rawn kal leh a ngai si a. An bula sawi dan turah pawh ka buai angreng" ka tih chuan,"Nia, a khirh e. Tihian ti ang hmiang. Keiman ka han lam ang a, motor ka hire sak ang a, rawn haw ta mai se. Vawiinah. A tha i ti em?" A ti a. A inthlahrunawm ka ti si, mahse, hnial hleihtheih lohin mi kar ve bawk nen. Ka dinhmun laklawh lutuk vang nen ka pawm ve ta mai. Lateii erawh ka biak pawh leh phawt a ngaih hmel. Judy a la hre ve si lo va. Ka nu chuan ka awmdan chu a hrethiam nge "Bawiha, eng emaw vei i nei em ni? I awmdan a danglam tlat" a ti nge nge a. 

"Aa..ka tha, ka pa hi ka ngaihtuah deuh a. Chuvang mai mai" ka ti ta ringawt. Lateii chungchang ka sawi chuan Judy chungchangah kual luh, chuan thil dang tam tak nen. A rilin a thuk si a, a buaithlak. Chaw kan ei khamah ka pa duh vak lo chung chu Tualpuiah kan phei pui ta a. Apeki pawh kan hruai tel ve a. Tualpui thlen hma deuhin Judy'n min lo call a. Lateii nen an inhmuh tawh thu leh an hostela an phei dawn mek thu a rawn sawi a. A insiamfel zawhah a rawn haw nghal mai dawn a niawm e. Thawk khat a veng huai mai. Tualpui pawh kan thleng a, ka pa chu Doctorin a han en vel a, a bán ná kha chu an zutsak bawk a, a nâ a ti em em tawh lo. A nák mawlh kha. PHC-ah x-ray khawl an kawl ve bawk si lo va. Aizawl te min han refer dawn thut thut a. Ka pa ber chuan,"A ngai lo, Doctor, ka tha viau tawh a nia. " a ti tlat si. A damlo berin duh tlat hek lo le. PHC-ah chuan an admit ve ta rih phawt a. Bakah ka pa chu a sawi ang deuh khan a zia ve deuh zel chuan ka hria. Tlemin han dam chho se Aizawlah x-ray ti tura kalpui chu ka la tum tho. A ngaihthatthlak bik vak lo nen. Ka nuin a riahpui dawn a, Damdawiin chaw an rin ve mai a ngai dawn a ni. Keini Apeki nen kan haw a. Lateii a lo thleng dawn bawk si. Lateii lo hawn tur thu kha ka hrilh a, mak an ti deuh niin ka hria. A phone tihbo thu bakah Class an chawlh thut thu te ka sawi tak ngawt kha. Kan inah Apeki nen khawhar zetin kan tei ruk ruk a. Eirawng ka bawl ve a. Ka siam tui vak pawh ka ring lo. Zanriah kan ei kham hlim, thleng ka sil laiin Lateii chu a lo haw ta a. A rawn bawr tehchiam lo. Apeki nen an han inpawm chuk chuk phawt a. Ka lo en reng ringawt. A insingsak zawh fel meuh chuan dar 9 a ri tep. Apeki pawh a muhil tawh. Kan unau chuan kan titi ta a. 

A bo dan chu tiang hian a sawi, "Ka class kalpui thin ka thiannu Remremi'n an ina riak tur leh chaw ei turin min sawm a. Ni dangah pawh ka kal fo avangin hostel mess nin ve bawk nen ka lo pawm a. Class banah ka chhuak ta a. Remremi te inah chuan chaw te eiin ka puar viau. Zanah khan Remremi khan dawra kalpuiah min sawm a. Kan chhuak a. A hnai tho tiin scooty pawh a keng lo. Kawngpui chhuah chhoh hma chiahah hian in sak lai lian ve deuh a awm a. A thim deuh bawk. Chumi zawn kan kal lai chuan Remremi chu mipakhat hian a rawn bia a, kan ding a. Kan ding deuh chiah tihin hnunglam atangin ka hmui an rawn hup a. Thil rim na tak ka hipluh rual khan ka zawi nghal a ni mai e. In sak laiah chuan min kuah lut ta a. Veivak pawh an awm. ' Duh aiin a rui deuh a' tia min sawi te chu ka hre pha vek. Remremi kha a ka an hup ve nge eng thawm mah a chhuah lo. Min lo phatsan ta pawh a ni maithei. Ka harh leh chuan room zim ve deuhah hian ka lo mu a. A hnawng churh bawk si, a vawt khawp mai. Ka au vak vak a. Kawngka an rawn hawng a, Hmai tuam pakhat rawn lutin ngawi turin min hrilh a. Kut erawh min thlak lo. A tuka ka chhuah leh mai tur thu te pawh a sawi. Ka tap nasa bawk a, ka tap chau chu ka muhil leh ta daih a. Ka harh khan dar 5 bawr vel a nih ka ring. Kawngka kha chu pawn lam atanga min kalh hnan avangin kawngka atanga chhuah ngaihna a awm lo. Ka mutna thlangah chuan tukverh lian vak lo a awm a. Darthlalang chu room kila pot ruak tawh an hun chuan ka chhu keh ta a. Mahse, ka rin aiin a hnuai chu a lo sang a. Mahse, kawng dang ka nei lo. Darthlalang keh ri an hriat chuan min rawn nangching leh ang tih ka hlau si a. Ka mutna kha matress lawng tawp a ni a, a lian lo bawk. Chu chu tukverhah chuan thei leh thei loin ka thlak thla a. Ka tlakna tur atan ka nat lutuk loh nan ka ti a ni. Tichuan, hlau chung chungin ka zuangthla ta tawp mai a. Ka ke ka tiulh deuh tih loh chu vanneihthlak deuhin engmah hliam leh na dang ka nei lo. Pan tur lam pawh hre loin ka hma zawnah ka kal ta tawp a, a vawt ropui bawk si. Ka phone lah ka kawl tawh si lo. Tichuan, a tawpa tawpah huan thlam kha ka thleng ta hlawl a. Tikhan ka pu nen khan kan intawng ta a nih kha. Pathianin min veng ka ti lo thei lo" tiin.

Chuan Judy khan phone thar te a lo leisak thlap a lo nia. Lateii bulah ka bialnu a nih thu a lo sawi hmiah bawk. Lateii chuan fel a'n ti mai mai khawp a. Ka nui ka nui ringawt mai. Lateii ber himdamin kan hmu tawh a. Ka lawm a kim titih ta. Judy thangkam a per hun chiah a ni kan nghah tawh ni. 

Ka pa pawh vanneih asiamin a tha chho ve zel a. Aizawl kalpui a ngaih rih loh hmel. Judy nen kan beisei angin thil lah chu a kal muang a. Rilrua nghah neih run chuan kan zalen tak tak thei lo. Thiante pawn mak min ti. Ka awmdan hi ka lo thup thiam vak lo nen, "I zia hi a danglam tak tak tawh a nia aw. Judy vang mi?" An ti leh nulh zel a. 

"Ka tha reng, ka pa dam loh vang hi a niang" ka ti mai zel a. Zu in lam pawh a lang rih vak lo. Zep nák emaw zu in kha inthlahrunna riau ka nei thin. Kan ep mek te hi Secret society an ni miau si a. Zu hi sual ang deuhthawa kan lo ngaihzia chu a lang chiang viau a ni. Bakah Judy hian min khap ve deuh bawk a. Ka pa chu ni 3 leh zan thum an awm hnuah tha tawh anga inhriain an rawn haw a. Lateii khan zan khat a va riahpui ve hman a, chhungkua kan kim leh ta bawk nen, ka nu pawh a hlim ve leh viau tawh. Christmas thlen nan kar hnih chauh a awm tawh a. Lateii hi a hma chuan bazarna tur kan thawn a, a rawn bazar mai zel kha a nia. Khati tut tuta rawn haw a nih avang khan engmah a rawn lei hman si lo. A hrana han bazar leh chu a ngaih hmel..Apeki tal thawmhnaw thar kan neihtir ve loh chuan..ka nute duh danin ka pa checkup pahin Lateii te nen Aizawl kal chu an rel a. Kei erawh keimahin ka lo awm dawn a nih hmel. Pawi ka ti lem lo. 

Ka nu te zin ni chuan Buanga nen an chulah sava kan veh mai mai a. Pawl a tlak hi chuan thalai tan pawh lo lam hna tul a awm tawh lem lo bawk a, tei mai mai hi a awl ve bawk a. Sava lah chu an váng phian lehnghal. Buanga te ri Pu Kawla te chul lamah kei chu ka phei ta daih a. An vauah chhukin ramár nupa tla lai ka zuk hmu hlauh mai le. Pakhat zawk zawk thah chu ka hreh si, an pahniha kah hlum ngaihna a váng angreng si. Ka thlir reng a. Sava veha kal ve nafam engmah hawn loh lah ka hreh ve tumhrang nen. Ka tin vang vang a, ka lam lo hnaih zawk chu ka kap ta pawp a. A kawppui zawk chu a tlanchhe rang ngei mai. Mahse, ka umzui a, a hamhaih ve nge ni dawn ni..ka rin aiin a ngampa tlat. Ka kah phak tawk leka a awm lai chuan ka kap leh ta hmiah. A nunrawnthlak inti viau maithei. Silai huma thingtlangpa nih bawk chuan, Engmah hawn loh ngawt hi zuk tlawmthlak riau zel a. Pathianin mihringte tana a siam an ni bawk a. Kha lam kha chu ka ngaihtuah vak duh lo. Hlawhtling inti takin ka chhuak chho a, Buanga chuan engmah a lo kap ve mang si lo. A te zawk chu ka pe ve ta a. Bakah keimah chauhin ka awm a, ka ei seng dawn lo. A lawm thiam ngang mai. Muangchangin kan haw ta hnak hnak a. In ka thlen rual deuhthawin Judy call ka dawng ta. Ramhnuaiah khan signal awm hek lo le.

"Aw" ka ti nghut a. 

"Kan hlawhtling e" a rawn tih chuan ka ding chawt. Mahniin ka nui vur vur mai. 

"Engtin?" Ka ti nghek a.

"Tunah mai khan an hling fel e. An vaiin mi 8 an ni rih a. An thawhpui dangte pawh an sawi zel turah ngai ang. Chuan, Azuii kha ka lo ringhlel dik chiah e. Ka nu pawh kha ama thah ngei a ni e. A chhan erawh ka la hre bik lo. Tunah chuan a tam lutuk a, phone-a sawi sen a ni lo" a ti mawlh mawlh a. 

"I u te?" Ka ti vat a. 

"U Siama an man ve. U Tluanga erawh U Siama'n 'Tel vena a nei lo' tiin a hum tlat. A chhan a awm ka ring tlat" a rawn tih chuan mak ka lo ti ve deuh. Mahse, ka sawi zawm duh lo. 

"In ka thleng chiah a. Zanah hman vek vawkin sawi dun ila, ka hre ve chak sia" ka ti a. Aw le rawn tiin kan dah ta a. Ka thawven dan chu a zahthlak zawk awm e. Pi Rinpuii te sumdawnna hailan a nih rualin secret society pawh tlangzarh an ni ngei dawn a. Hneh tawhah ka inngai. Harsatna leh buaina chuan min kiansan ve dawn hnai ta e. Judy nen kan inlaichinna lam pawh zalen takin ka hawi ve thei tawh ang. 

Zanriah eipuiah Rema leh Zaua te nupa ka sawm a. Ramar buhchiar nen chuan a ei hnem theih ngei mai. Ka duh dan deuhin zanriah ei kham atanga reivak loah min hawnsan ta a. Hnawk ka tih vang lam aiin Judy nen inbiakna hun thawl kan mamawh si a ni. Kawngka ka kalh sauh sauh a. 

Judy chu ka call ta a. 

Ti hian an man dan chu a rawn sawi ta a. 

"Nizanah khan ka mut tawh hnuah ka pum nawm loh vangin ka tho leh a. Ka room toilet-ah tuilum a haw theih loh vangin choka bathroom ka va hmang a. Ka inthiar laiin thawm a ri khup khup a. Inbe ru sur sur ang te ka hria a. Thawm ka nei duh ta miah lo va. An thawm a reh hnuah ka chhuak ta a. Azuii room ka va en ta dêk dêk a. A lo inhawng a. Amah a awm lo. Ka u te room ka en leh a, U Siama a awm lo. Kan awmpui dangte erawh an kim thap. Hmanhmawh takin pindan rûk ka pan ta a. Chhunglama kawngka an kalh avangin awm an awm ngei tih a chiang ta a. Pawnlamah tala-in ka kalh hnan ve ta hmiah a. Camera kha an lo hmuin an lo tichhe thei a, chutiang baka chet dan chu ka nei lo tih ka hriat vang a ni. Ka mutsan leh ta daih a. Zingah Lawmkima leh a hote an rawn kal a. Kawngka chu an nam chhe ta a. Kan tlai hman ta tho va. Hmeichhe pakhat ka la hmuh ngai loh chu an lo tihlum hman tawh. Nakinah an la inpuang ang a, tu nge a nih chu a la hriat mai ang. Dr. Sena pawh a lo awm ve ran a. Azuii bakah hmeichhe pahnih an awm ve. An vai khan ka hmuh hnu vek chu an ni. Mahse, an hming ka hriat loh an awm. An vai chuan an khawm ta a. Tan pawh an tang der eih lo, Azuii chuan ka hmaichhanah ngei, "I nu kha keimah ngeiin ka that. Nang pawh hi that tur che ka ni. I vannei hle mai" min ti nia! Engtin nge khang hun chhung zawng kha a lo inthup theih? U Siama te nen engtiang chiahin nge an inzawm ka hre chak. Mahni nu ngei phatsana that thei chu eng emaw thil rapthlak tak inphumru a awm ka ring. U Tluanga an sawi fihlim tlat pawh hi ka ngaih a tha miah lo. Chuvang chuan ka pa thurochhiah anga in dan mai ka duh tawh. Kan inah ngei pawh hian himin ka inhre lo. Naktukah Zoram khawvelin he thil rapthlak tak hi an hre turah ngai ang" tiin. 

"He tah lo chhuk rawh. Lo chhuk vat ang che" ka'n ti ngawt a. Ka hlauthawng leh vek tawh. 

"Nia..chu pawh a tha tho. Mahse, secret society kha" a ti tham chhal a. 

"An inzawm vek aalwm. An pawl mi leh sa tam tak inthupru an la awm tih hre ta che. An veh ru reng tawh maithei che a ni. Lo chhuk vat la a tha a ni mai" ka ti hmawk hmawk a. Nui hak hak chungin,"Min van ngaihtuah em em. Ka pa thattu hriat theih hi ka la inbeisei deuh mawle..chu tal chu hriain hahdamin ka awm thei tawh ang" a ti a. 

"Hre mah la, i pa ber a awm tawh lo va. I hriat khan i nat zual phah mai mai zawk. Engpawhnise, fimkhur la, meng kar ang che. I tan Aizawl kha a him lo" ka ti nghut nghut a. 

"Ka lawm e. u Ngur, tunah chuan nangmah bak neih leh beisei ka nei tawh lo a nia" a ti sap a. Ka thinlung a dek riau. 

"Kan innei vat dawn nia" ka ti thut a. Ka thutak ve khawp mai. Ani pawh a lai deuh nge a ngawi dat a. 

"Lawmkima'n min call a, ka'n be lawk ang e aw" tiin a dah ta a. Ngaihthain kei pawh mut zai ka rel ve ta a. Zoram hian heng thuruk rapthlak leh ril tak tak hi hre ve ta se engtiang takin dawngsawng ang maw? Christian ram tia inchhal ramah sualna inthup ril leh rothap tak tak inphum hi rapthlak leh mak an va ti ve dawn tak em. Judy vangin hmeh mih an nih beisei ila, mahse, judy hi a dinhmun a derthawng ta riau mai. Chutiang ngaihtuahna chuan ka thawven tur ang pawn min tithawveng thei lo. 

Ka nu te pawh a khat tawkin ka be reng a. Secret society lam hian engtin tin emaw lo hre pawpin an chungah eng emaw an lo ti ang tih hlau reng rengin ka awm a. Lo haw vat turin ka chah hial nghe nghe. Ka pa a incheckup zawh tukah an rawn haw ve ta mai reng a. Eng eng emaw pawh min lo lei ve nial mai. Apeki hlim hmel leh uang hmel chu hmuh a hrehawm hran loh hle. 

Ni e, Mihring taksa hmanga sumdwng thin pawl pakhat man an ni tih leh mi bo tam tak kha anmahni kutthlak an ni tih Zoram khawvelin a han hre ta chiah kha chu titi dang reng reng a leng thei ta lo. Judy hming pawh lamrik loh theih loh a ni ta a. A nu kha a fawng vuantu a ni miau si a. An inpuang ve mai bawk nen. Mahse, Judy pa thattu chu tuman an hre tlat lo. Azuii pawh an han dáwp na deuh naa, Pi Rinpuii bak a thah loh thu a sawi tlat. Pi Rinpuii kha a aiawh theih inbeiseia that a nih thu leh, amah Azuii hian an sumdawnna tur hmanrua mihring a zawn thin thu a sawi nghe nghe. A tirah chuan an sumdawnna hi a lo hnawl ve tawh ngei a, mahse, a rei a, a thluak an su ta a. Mahse, Judy chetlak dan tur engkim hriat zel an duh avangin lem a chang thin a lo ni. Azuii hi an pawl tan a lo pawimawh lawtlak zawk a ni. Ka bula Judy khawngaih awm taka a awm te kha keimah min hman tangkai an tumna hmanrua vek a lo ni. Phiangsen hlawm hian. Siama zawk chu a mak ka ti. Azuii'n a nu a that tih a hria, mahse, hma a la lo ni mai loin Azuii chu a thlawp tlat nia! A nu kha a lo haw viau zawk em mawni dawn ni. Heng mite hian thinlung an nei lo niin ka hria. 

Amaherawhchu, Zoram chuan thilmak a tawng chho mawlh mawlh ta reng a. Ka sawi tawh ang khan hmeichhe pathum bo hnuah Zo Choka neitu a bo ve leh a, chumi hnu lawkah sumdawng pakhat Zirsangliana a bo bawk a. Azuii ten an tihhlum tak hmeichhia kha ks an tih ang chi deuh hi a lo nia. Tu khaw kha ngaihsak lem loh, chhungte pawh nei lem lo a ni a niawm e. Chutiang a nih avang chuan thah kha a phu tihna erawh a ni hauh lo thung. 

Khang mi bote kha hel pawl thiltih a ni lo tiin hel pawl hruaitu niawma an sawi an man te khan an sawiin an tang nasa ve si a. Rilru a buai duh ngawt ang, a chhuitu te tan pawh. Keini ak zat hnuailam chu kan lu a hai map tawh. Kan zoram hmabak tur hi a duhawm lo takzet a ni.

Central jail lama an liamthlak atanga ni 4-naah Judy pawh kan khaw lama mas hmang tura rawn chhuk a tum a. Chanchin kan inhrilh tawn reng mai. Tualpuiah ka lo hmuak nghe nghe dawn a ni. Zinga lo chhuak tur an ni a. Ka harh rualin Judy a rawn chhuk dawn tih ka rilruah a lang nghal. 

Phur zetin ka tho a, hmai te ka phih zawhah Judy chu ka call a. A ring quit thak thak mai. A buai a niang tiin ka dah a. Chawhma pum thak ka biak theih tak loah chuan Tluanga ka call ta tawp a. "Zingah an lo chhuah kha.. Kan driver ka'n call ang e" a ti a. 

A hnu reivak loah, "Ngura, Judy an ru bo!" a rawn ti ta mai a! Ka dinna lei chu a nghet lo nge ka nghing dawt a. Ka hai chhulh mai. Khawvel chu a thim ruai ruai mai..

Zan tirah Tluanga bawk chuan min lo call leh a. 

"Ka nau rubotu te leh khang mi bo rutu te kha thuhmun an ni. An ni chu sawrkar rawihte an ni..Amanda leh a hote kutah dah mai ang aw" a rawn ti ta a..

He mangchhia hi thanharhsan leh daih theih ka va duh tehlul êm..

(Lets have a chance to see again Miss Judy in the Inferno...✋😊