Judy 9

MISS JUDY (9)

Ziaktu: Toni Râlte

"Hello" a rawn ti tliang ral a. 

"I chhuak tawh mi?" Ka ti satliah a. 

"ka insiam mek" a aw tliang ral kha a rawn tham tiak a, a hnuk a ulh niin ka hria. A pa a chân miau a, harsatna tam tak a tawk bawk nen. A dinhmun hi chhe ve tak chu a ni.

"I lo kir leh thei dawn em ni?" Ka ti nghut a. 

"Ka hre lo, hremhmunah ka zuang lut leh dawn a, ka chhuak thei ang em ka hre lo" a rawn ti zawi sap a. Ka ner sawk. Judy chu ka lainat ta em em mai a nih chu! Ka sawi thiam loh thil eng emaw hian min hnawh a, amah maia khawvel hmachhawna a nu te nghaisakna tuar leh tura kaltir chu ka thinlungin rem a ti thei tlat lo. Ka thunun theih chu a ni hauh thung si lo. 

"Kal suh" ka inrin hmain ka ti a. A ngawi dat. 

"Kal suh aw. Kal lo mai rawh. Ka rawn phei dawn ,lo awm rawh. Kan rel tha dawn nia" ka ti sawk sawk a. Ka dah nghal. Ka la chak vak lo naa, ka va dan ngei a ngaiin ka hre si. Ka nu chuan ka chhuak tur chu mak ti zeta min enin,"Tiang tal hawl rawh. I lu te kha a hai leh ang e" a ti a. Ka pa ram kal tiang, sumhmuna a tun thin chu lain ka chhuak ta a. Betu neuh neuh ka neih ve nual vangin ka kal sáwt lo angreng khawp mai. Mi te hi an tha a, ka dam ve deuh tawh chu min lawmpui ve liam liam hle. Judy in chu ka thleng a, Pu Tlana te nupa an lo thu ve chu niin, ka lai kual vel vek. 

"Khai! Ngura chu. I zia deuh tawh ni maw? I rawn tei phei peih mial a" Pu Tlana chuan a lo ti nghal var a.

"Nia mawle, hei ka zia tawh angreng. Ka rawn tei phei mai mai. Exer lak pahin" ka ti ta ringawt a. Judy pa thih thu kha amah Judy hian an bula a sawi leh sawi loh ka hre si lo va. Ka sawi dawt ngam lo. 

"Nia..hei Judy hian haw a tum thut a, kan zu thlah ve a nih hi " Nu Sangi chuan a ti a. 

"Ngati nge a?" Mak ti awm takin ka ti hû a. 

"Aa..haw thut a ngai a." judy chuan a lo ti ve mai a. A pa chungchang engmah a sawi lo tih ka hre thei. Ka sawi lui talh duh bik lo. 

Ka thu ve ta reng a. Pu Tlana te pawh tukthuan ei a hun ta bawk a, an chho ta a. Judy chu an sawm ngial naa, keimah vang ni maw a duh bik tlat lo. Ka lai kual vel bawk si. Hawn ka tum lahin amah Judy chuan min chelh tlat lawi sia. Pu Tlana te chuan min chhohsan ta a. 

Kawngka chu a khar a, a kalh nghal rap. 

"U Ngur, ka pa hmel ka hmu tawh lo vang maw?" A ti ta chawt a. A puak ta nge ni, a mittui a sur zung zung a, a hmai a hup vawng vawng bawk. Ka bulah ka kuai thu a. 

"Engtia thi nge? A thi tih tuin nge hrilh che" ka ti a. Ka la ringhlel ru deuh tlat nia! 

A mittui a hru chawt chawt a, "Ka nuin min hrilh. Heta an lo kal kha chu i hre tawh ang a, min hruai hawn an tum a. Ka duh si lo va. Ka pa chungah a tuan ta a nih kha..nizana ka pa muhil chu tho leh tur a awm ta lo..a muhlum a ni lo, hraihlum emaw rehhlum emaw a ni tihna" a ti nghat nghat a. A aw a khur dat dat bawk. A kut chu ka vawnsak a, ka khawngaih a, sawi tur leh tihtheih ka nei bawk si lo a ni. 

"Mahse, i tan thang a ni asin. I pa chu hmangaih hle mah la, i han hawa a ruang i vuiliam avang khan i damchhungin i chhuak leh thei tawh kher ang em? I pa i chán tawh, nang tal i dam a ngai" tiin ka fuih ve ngial a. 

"Ka kal ang nge kal lo vang tih fim takin ka ngaihtuah thei lo. Ni e, kal ila kan in ka chhuahsan leh thei ang em ka hre lo. A chhan chu tunah hian an hmanhmawh tawh em em a, an duhthusam tihhlawhtlin nan beih taktêin an bei tawh tlat a ni" a ti ve mawlh mawlh a. 

"Engpawhnise, Judy, kal lo mai teh aw. I rawn kir loh chuan i nu te pawl hi engtin nge keimah chauhin ka tihchhiat theih ang?" Ka ti nghet charh a. Pháwk zetin min rawn melh a, a mitmengah phurna ka hmu thei. 

"Eng nge i sawi awmzia? Sawi chiang teh" a ti há a. 

"I hriat kha.. Secret society hi kan tihchhiat a ngai. Mahse, engtin nge ka hre lo" ka ti nghut a. 

"Engti kawng zawng mahin kan tichhe dawn lo. An kal thuk tawh lutuk, Mizoramah chauh secret society hi a ding hleinem. Khawvel milar kan tih tam zawk hi thuk takin an inrawlh vek asin. " a ti a. 

"A nih chuan eng nge kan tih tak ang?" Ka ti sup a. 

"An pawl din hi chu enliam ang. Mihring taksa hmanga an sumdawnna hi kan nuaibo thei. Hei hi a pawi ber zawk chu a ni. An duhthlannaa an thlarau an hralh kha chu kan sawi theih a awm lo. An sumdawnna rapthlak tak hi tihbo tum ang" a ti ta a.

"Chuvang chuan i haw thei lo" ka ti a. Min rawn melhin,"Ka pa ruang takngial pawh vuia hmu hman loin i thu ka awih dawn a nia. A laklawhah min pensan miah suh ang che. Ka nu hi ka haw em a, heti taka Zoram mipui a zah loh avang hian a chungah hremna na thei ang ber nghat se ka duh a ni. Ka nu hrin chu ka ni, mahse, ka nu fanu nih hi ka duh lo" a ti nghat nghat a. A pa ruang pawh hmu thei lo khawpa ka chelh tak si-ah chuan ka phatsan thiang ta lo. Judy nen chuan tum nghet tak kan nei ta a. Chu chu Pi Rinpuii leh a thuihhruaite sumdawnna tihchhiat veka hremna pek a ni ta. Kan thei ang em ka hre lo. Kawng chu a awm ngei tur a ni. Pathian a awm a nih takzet chuan. 

Kei pawh ka intihdam vat vat a ngaiin ka hria. Engtin chiah nge bul kan tan dawn ka hre lo. Judy lah a pa a sûn sarhu lai a ni si a, ka nawr duh rih lo. A ruka kan thiltum chu tuman an hre ve hauh lo. Hrilh kher lah a tul hek lo. Kei ka la dam chiang meuh si lo va, Kan intiamkam atang khan ka la hmu leh tawh rih lo. Inenkawlthat ka mamawh rih tlat. Kha mangchhia, mak tak mai khan min la tibuai zeuh zeuh thin a. Zan khat phei chu ka farnu neihchhun Lateii hi thisenin a lo bual khat vek a,. Ka va mangang tak. Chutiang chuan mang ramah chhaih buai ni fo mah ila; ka chet lak tum dan erawh ka thlak duh bik lo. Ka tawngtai nasa ve hle bawk. He thil hi chu thlarau lam indona rim a nam ve tlat avangin mihring taka hmachhawn chi a ni tlat lo. Dik tak chuan Judy nen kan mawhphurhna hi a sang lutuk a, kan zo lo lam a ni. Kan chakna leh chak lohna hian Zoram hmabak tur a hril ve tlat a ni. 

"I dam loh atang khan i zia a dang vek. I ngawichawi si. Eng nge awmzia?" Thianpa Buanga'n a tih mek laiin ka nu pawh chuan,"Chu chu lawm..len harhpui teh u. A nihin a ni lo reng reng" a lo ti hliai a. 

Kei chuan nui chungin, "Ka tha reng alawm. Ka damkawr ve rih a nih hi" ka lo ti vat a. 

"Chu pawh a ni lo, i danglam tak tak" Buanga chuan min thlek há chungin a ti leh a. 

"A va mak e aw. Ka tha, ka zia mai ang" ka lo ti leh vat. Ni e, thuruk pai chunga engmah hre lo ang maia awm chu a harsa ve deuh bawk a ni. Rilru ka hmang nasain, thluak a vir kual nasa lutuk a. Taksa lam pawhin a tuar lo thei lo a ni e. Chaw pawh ka ei tha tehchiam lo. Mahse, tlema insiamrem ka mamawh.

"Zanin chu lo lang ve tawh em em la, sawi dun tur kan neiin ka hria" Judy msg ka dawn avangin zanriah eikhamah ka insiam nghal a. Ka len chhuah dawn vang nge ka nu pawh a phur hmel ta deuh e. Mahni lo maha mi tawngtam lo nih tawh nak alaia ka ngawichawi zual leh ka inkhung chawrh chawrh chu hrehawm an lo ti thawkhat viau a nih hmel. Ka insiam zawhah ka chhuak a, Nu Chami in lam ka pan ta lo mai. Ka kal chuan thian ten min zui an duh ve ngei awm si a. Zep nák emaw ka huphurh vang ni loin thlim an ngaihna chen a awm tlat tawh. Judy nen thuruk eng eng emaw kan sawi a ngai si a. 

Ka va thlen chuan thleng a lo sil zo vel chiah a. Min lo be nghal sawk sawk. Kawngka ka kalh nghal rap. Mi dang kan mamawh lo tlat. A roomah kan inzui lut leh ta a. Khumah kan thu dun a. 

"Biteii khan maw sum a ngiat belh a, chuvanga thi a nih awm chu" a ti nghat a. Ka lo ner deuh. 

"Tu sawi nge?" Ka ti vat a. 

"Azuii mawle. Chawhnuah khan kan inbe thei hlauh a. A vannei a, a insawi fihlim thei hlauh..chuan, ka nu te atanga a thu hriat a rawn sawi..Biteii khan sum a duh belh a, chuvangin an that a ti. A lo blackmail ve deuh a ni maithei" a ti niah niah a. 

."Chuan Azuii chu khaw nge tunah a awm?" Ka ti a. 

"Kan inah tho. Ka tan lem a chang. Ani hi kan innghahna a ni ta mai e. RInhlelh a kai loh nan keini pawn kan biak pawh rih loh a him ang. Aman min rawn bia a nih loh chuan" a ti leh a. 

"Aw le, a tha lawm..chuan, engtin nge kan chet zel dawn?" Ka ti hû a. Min rawn melhin, "Mipa thluak a chak zawk. " a ti sap a. 

Kawngka an rawn kik leh ta dat dat mai. A va hahthlak thin e aw. 

Kan ngawi tluan leh a, an beidawng nge an reh ve mai. 

"Tunah hian dik tak chuan ka pa a thih tak avangin an hlauthawng zual a, an thawkrip dawn nasa a nia. Ka ka ka an mai an ring dawn. Mahse, pawi tak chu finfiahna tha tak nen lo chuan hremna kan pe thei dawn si lo. Kan in khi lepse vek mah se, kei tak ngial pawn an mihring sawngbawlna pindan hi ka la hmu bik lo. Chu chu buaina a ni" a ti ta mawlh mawlh a. 

Ka chil ka lo lem khawlh, "Azuii chuan a hre lo em ni?" Ka ti a. A lu a thing nar nar a, "Hre lo tawp ang. Ka nu hian tumah a ring lo, a doctor leh a body guard te chauh lo chu" a ti a. Kawng a va ping leh si em .

"Engtin chuan keini chuan an pindan chu kan hmuh chhuah theih tehlul ang. Han luh ngam chi lah a ni si lo" ka ti hluai a. 

"Beidawng mai lo teh. Police-ah hian rinngam pakhat chu ka la nei ve a. Ani hian kan hna hi min thawhsak theiin a rinawm." A ti ta a. Tlem chuan ka thawveng huai e. Kan ngawi dun vang vang a, sawi tur pawh ka hre tawh lo. Ani pawh chu a ngawi ve ta veng veng a. Kan ngawih dun vang vang laiin ka rin loh lutukin a room kil atangin sazu lian vak lo hi a rawn tlan chhuak ta mai a! Judy'n a hmuh chuan a rak tuar a, mi rawn bawh titih nghal. Kei atak pawh ka phu chiang kher mai. Kan sazu teh hrep lah chu a ngampa phian mai a, kei chuan Judy room chhak lama thosilen ban a hman tak loh a tun chu la vatin sazu chu ka um ta a. Judy erawh khumah a lawnkai daih. Sazu chu a lo hlau ve riau a nih dawn hi. Sazu chu man hman rual lohin a tlan chhe zui a, kei pawh chu khumah ka thu zui ve leh mai. Ka banah a rawn vuan chat a, a thlabar hmel chuan ka nuih a tiza deuh. 

"I va hlau awm ve" ka ti zawi sup a. Ka nui deuh bawk. 

"Rannungah ka hlau ber. Ramhuai ai pawn ka hlau" a ti ta mai a. Ka ban pawh a la vuan reng. Mipa ka nih vang nge eng nge ka ngaihtuah pawh ka hre lo. A kut chu ka la kang a, a lam hawiin a mitah tak ka melh ta ran a. A rawn thlen tirh lai ai khan a cher tawh zawk a, a dawldang riau bawk. Ani pawn ka mitah tak a rawn melh ve chiah bawk. Boruak chu a rawn lum huk naa a nuam veng veng nia. Kei hian chet ka la hmasa lo thei lo. Ka lamah ka pawt hnai a, hnai taka inmelhin a hmui chu ka melh bing ta ngur a, zam miah lova min melh let kal chuan mi run ka ti dawn nge min cho ka ti zawk dawn. A hmuiah chuan ka fawp ta siah a. A dawh mawl tawp. A hmui chu a nemin a dam thlap mai. Mahse, a dai mah mah. Chhanlet ni lo mah ila; ka fawp lui zel a, a dawhthei rei thei ta bik lo nge ka rin aia uarin min rawn fawp ve ta a. A tukhum samah ka tham a, ani lah ka koki-ah a inuai tang bawk. Min uai na reuh bawk a, khumah chuan ka bawh thlu ta a. A thaw hak mai. Ka che zui hmiah. Mahse, a tawp thlen chu a duh lo bur thung. Zep nák emaw Ngurhmingliana hian ka hmanrua ka hman lohna chin pawh ka hre tawh lo, ka hlei em em lo bawk nen. A tlahlang satliah hian min hip bik si lo va. 

"A tawk e, U Ngur" a ti hap a. Kei pawh nawr chawp ngai miah loin ka inthiarfihlim nghal hmak. Pawr leh lai ru zetin khum tlangah ka thu a, a sam a tuaimam thuak thuak a, "U Ngur, ti nge?" A ti he haw a. A va buaithlak..

"Ka hre bik nang" ka ti nghut a. Ka mitsirin a nui hmel ka va hmu thei. Kei atak pawh ka nuih a za. 

"Mipa hi in lo inang lo thei khawp mai" a ti tham tiak a. 

"Engtin" ka ti ve mai a. 

"Mitmei hmu reng chunga chet la duh miah lo an awm laiin mitmei hmu miah si lo va huangtau em em an awm thung a.." A ti ta a. A sawi awmzia ka hre mah mah. Engah nge mipa chu ka nih mai loh ang le? A kut chu lain, "Min duh em ni?" Ka ti ta a. A mitah tak ka melh bawk. 

"Aw. I hria alawm" a ti hmiah mai. Kei hi ka kal thui mah mah dawn tlat! Mahse, hei hi ka duh dan chu a ni tho bawk sia. 

"A nih chuan.." Ka ti a. Ka va zei lo tak e aw. 

"I thu thu" a ti zawi sap a. 

"Ni rawh se" ka'n ti ngawt a. A rawn nui hak, kei pawh ka nui ve ta a. Za em emin kan han nui ta tlek tlek mai a. Mahse, kan boruak uap churh leh eng emaw ni run kha a bo ta daih. Kan inpawh zual sauh ta mai. A tha vek e. Ngurhmingliana a single leh ta lo. Thingpui sial deuh ka in zawhah muangmarin ka haw phei ve ta a. Rilru chu a hlim ve veng veng tho mai. Hmabak lah chu a kô angreng mai si a. 

Christmas a hnai chho tan ta bawk a, Buh seng zo tawh an awm laiin la seng miah lo kan awm bawk. Ka dam tha ve ta deuh bawk a. Kan insakna lam lahin chawlh an la rih nen, buhseng ram riah lam kan hawi tan dawn ta. Keimahni tak chuan lo pangngai kan nei lo ka tih tawh kha, mahse, Thianten min sawm ve nasa si. Thiante lo-ah signal a awm si lo va, tleirawl lai ang maiin ngaihzawng nei thar ang maiin Judy nen kan inbe thei lo tur chuan min kap ve run mai. Kan riah luh hmain zan tin kan leng a, ka thiante pawh ka hrilh ta law law mai. An lo beisei ruk kha a ni bawk a, min lawmpui thiam hle. Mahse, a mak angreng, Judy nen chuan naupangchhia takin kan lai ve ringawt zel. A nuam tho bawk si. Buhseng ram riah chu Judy pawh chuan a lo huphurh ve tawp. Kan inbe thei dawn si lo. Ka kal lo mai dawn mawni te ka ti ve rum rum. Sawi tawh angin tleirawl ang mai kan ni tlat. A nuam dangdai asin aw. Thiante hmaizah a nat bakah lo kan neih ve loh vangin buh tlem azawng lo neih ve theihna a ni si a, ka kal lo phal bik chiah lo. Lunglen te mai mai chu, thiante nen chuan tawrh a nuam tho e. Kan riah luh zanah chuan ka zep lo, zan tin leng thin kan ni bawk sia, ka lung a leng ngang mai. A inbiak theih der si loh. Buanga te lo hi an zau-au-ah chuan a zau ber leh thlam sakna pawh nei tha ber an ni bawk a. Thlam lian deuh hlek sain chutah chuan a thalai lam kan riak khawm ta a. A hlimawm dar dar viau. Nula riak lut awm ve te pawh meichher nen thian thenkhat te chuan an va rim a. Kei erawh ka zui ve peih ta lo mai. Mizote nuna nuam ve pawl tak chu buhseng ram riah leh sangha tlang vuak hi a niawm e. Hman lai nun kha la chhawm vek thei lo mah ila, tlem azawng kan la seng lut a, kan khua angah phei chuan kût kan nghahhlelh tluk zetin tiang hun hi kan nghakhlel thin. 

 Tingtang hrui kim tawh lo kan han pai ngei bawk a. Thlam namthlakah dah vang vang pahin kan han zai puak thuai thuai a. Thla en vanglai phei chuan a boruak hian zûn a nei ve ni maw, zuk nuam veng veng zel a. Zan erawh kan mengrei lem lo thung a. Dar 9-ah chuan kan mu deuh tawh tlangpui. Thosi muh kan muh vangin thosilen kan zar ngai lem lo va. Tikhan khawhar in riak ang maiin kan mu dul a. Zingah a tho hmasa ber nih tum kha kan han phusa leh a, a thenin vau tui kan chawi a, a thenin thing an fawm bawk, thenkhatin thlai la awm ang ang an lo khawm bawk a. Tukthuan kan han rel mam mam a, rawlthar lai kha chuan a hah pawh kan hah. Upate mitmei vengin kan thu ve hman meuh lo a ni ber e. Kan han tlangval chho a, upa lam chan kan chang chho ta a, rawlthar ten kan mitmei an veng ve tan a, nuam ka ti vak lo. Chaw ei mawlh hi a nuam thin. Chaw heh rual kan lo ni deuh vek hlawm nen, kan chaw lak hi tha thei mep mep tak a ni. Eng em em mah hmeh lo pawh hian kan lim nghek zel. A tha, chaw heh na na na chu a chak pawh kan chak narawh e. 

Chutiang chuan lungleng ru em emin buh chu ka sengpui ve a. Thiante hian min fiam zuk zuk an ching roh a. Ka khap nasa thin. Tlang than vak ka la duh lo. Judy ka ngaihtuah zualna chu Aizawl boruakin a rawn chim ang em tihte, zanah te hian an rawn ru chhuak mai ang em tihte avangin ngaihtuah a na em a ni. A police sawi kha chu aman a lo be dawn a, dawhtheih a ngai dawn khawp mai. Chutihrualin Judy kut phuartu ber a pa a boral ta si a, an thuruk a puan chhuah loh nachhan tur awm ta lo chu amah Judy hi an veh ruk reng ka ring. Kei ngei pawh ka him bik lo. Mahse, inngaihzawnna boruakin min han chim takah khan kan boruak kal dan leh thlir dan a lo dang lo thei lo va, tlemin lung chu a la muang deuh tho.

Zirtawp tlaiah kan haw ve ta hram a. Ka kal chak ngang mai. Kawng kal hi chu ka thei ve hrim hrim bawk a. In ka thlen rualin roomah ka lut a, Judy ka call nghal. 

."I lo haw mi?" A rawn ti nghal a.

"Haw chiang e. I lo tha em?" Ka ti vat a. 

"Ka tha a. Mahse, kan hmanhmawh a ngai ta hle. " a rawn ti zawi raih a. Thil thleng a awm leh taah ngaiin ka lo hnual rawih mai. He boruak inlumlet hi ka hne ta deuh. Zana kan i hmuh dawn tho avangin kan inbe rei lem lo. Zanriah kan ei laiin kan veng pa bengvar leh tei tam ve tak Pu Hnuna a rawn lut hlawl mai a. Eng dang a ni lo, ka pa bulah a rawn vui ve a lo nia! A chhan pawh kan VC ten a ram an lo sah hek sak chungchangah thupha takngial pawh chawi lo leh a ram an sahthlak man hu awm vel pawisa a dawng lo chu a ni. Ka pa lahin engtin han tih vak ngaihna a hre si lo. Pu Hnuna lah chu a thu ve reng bawk a. Ka kamthuah laiin, "Kha..chanchintharah lah khan Aizawl veng pakhata thlan an hai thu te kha an rawn puang a. Kan Zoram hi zawng a chhe tawh takzet a ni" a ti chuar chuar a. Ka beng a verh ru viau. Ka pa chuan a zawt chiang vat a. 

"Bethlelem veng an ti em mawni, kha mi veng thlanmual kha nizanah an lo hai a niawm e. Thlan pali lai chu an lo hai a niang. Kei setana pawl an tih mai setanic an ti em mawni kha mi te thiltih kha a nih ka ring em mai. " a ti ta a. 

Ka nu chu a chek hlak hlak a, rapthlak an ti hle tih a lang. 

Judy nu te sulhnu ni tak ang maw? Thlan an haina chhan tur erawh ka hre lem lo thung. Pu Hnuna sawi ang khan setanic ho thiltihte pawh chu a ni mai awm tak e a. Kei chu ka insiam nghal mawlh mawlh a, Pu Hnuna nen kan chhuak rual. 

"Ngura, Nupui lamte hi melh ve tawh teh. In naupangchhia tawh miah lo a nia aw" a ti nuah nuah a. Ka nui huk. 

."E! Lungngai suh. Ka nei ve tep ang" ka ti mai a. 

"Kan miss thar hi ka lo hualsak ve tawp che kha a nia. Mahse, an sawi ruk dan hian zan reiah mipa inleng a nei zeuh zeuh an tia..amaha awm a ni bawk nen, a lo sihhnip ru riau em mawni dawn ni. Ka iai sak leh ta deuh che..saw kan pem thar nula te saw a tuai pur mai a, la rim teh khai. A fel a nia" a ti bawrh bawrh a. Judy chungchang a sawi chiah chuan ka beng a verh thung.

"Miss Judy chu engtin maw an sawi a?" Ka ti hluai a. Ngaihthat lohna a nei lo a ni chêk ang chu..

"Aa..kan naute sawi a nia. Zan reiah hian mipa nen an tawng thawm niawm tak hi an in chungte sawn an hre thin an tia. Tu nge mipa tih erawh an hre lo a niang. Rinpuia khan a hel ve nasa a, RInpuia pawh chu a ni maithei. " a ti ta a. Ka ke pen a tibahlah ve chiang mai. Judy chuan min lo la bum fo tihna em ni ang? Chu mipa a tawmpui thin chu tu nge ni ta ang? Kei chu ka ni lo phawt. A chhan chu ka va len pawh khan ka leng rei ngai lo. Tin, in chungte hriat tur khawpa ringin kan inbe ngai lo. Pu Hnuna chuan min pensan a, chak zetin Judy in ka pan nghal. 

Kawngka a lo inhawng hiai a, bathroom atangin a lo chhuak ve chiah bawk. A lu chu a tuam a, bathrobe hain, a taksa a huh hliam a. Kawngka chu ka khar a, "I inbualte chuan khar ta che" ka ti satliah a. Min chhang lem lo. A roomah a lut a. Ka zui lut duh lem lo. Rei a inthlak lo, a sam hruk mawlh mawlh pahin a lo chhuak a. 

 Min rawn melh ralhin, "I hah a ni maw?i thu deuh tlat" a ti sap a. Ka chhang lo. Towel a va zar chhuak a. A rawn let leh chuan no tung sei ît êt-ah zo artui a dah a, khawizu fir pawlh lehin nimbu pum khat hi a tui a sawr lut a. A chawk rak rak a. 

"Kha in rawh" a ti teh ngawt a. Mak ka lo ti deuh. Nui sen sen chungin, "I chau tlat. Ka hre thei. I chak sawt mai ang. In la" tiin no chu a rawn lek hnai a. Ka lo la ve mai. Hetianga duatna hi Lapuii hnen atanga ka dawn bak ka dawn lohna chin a rei ve ta hle mai. A thil siam chu ka thawk khat pup a. A tui lo miah lo. …

"Ka lawm e aw" ka ti sup a. Nui hak chungin,"Nang leh keia inkarah ka lawm e tih leh tihpalh hi awm lo se ka duh. Polite deuha inbiakte hi ka duh ve lo a nia. Chuan, min ngai em?" Tiin min melh há a. Light chuan a chhun fuh bawk nen, a vun no ser sawr leh a mitmenga phurna zawng zawng nen, Pu Hnuna thusawi kha chu ka theihnghilh titih mai dawn. "Ngai chiang..nang?" Ka ti ve ngat a. A bu nghat. A no sil tur chuan ka biang a rawn nûl zauh a. Ka lo khi ve vur vur. A sil zawhah ka bulah a rawn thu ta chat a. 

"Eng maw i sawi tum kha" ka ti ta phawt a. 

"Nilaini zanah khan an sumdawnpui vai pakhat chu an man a. " a ti sap a. Ka lo lawm hman viau. 

"Chuan" ka ti vat. 

" An dinhmun a derthawng tan. Chuan Lawmkima khan a veh tan bawk. Nizana thlan an hai thute kha i lo hre ve tawh em?" A ti duah a. 

"I nute thiltih em ni?" Ka ti a. 

"Ka ring. Thlan hai hi chu a mikhual hleinem. Boruak dang siama a ruka chet an tumna hmanrua a nih ka ring. I beisei ang" a ti fiah kák a. 

"Chuan an rawn umzui tawh miah lo che maw?" Ngaihtha vak lo hian ka ti a. Ka darah a lu rawn nghatin, "Hei tak hian min ti awm nuam lo a ni. An target hmasa ber tur si hi engvanga min hlamchhiah nge an nih? Min hlau tawh miah lo nge? Chet ka lak an ring lo zawk? Kawng dangah kua an hreuh zawk a ni thei ang em..ka buai" a ti ta dap dap a. A ni awm teh tak e. 

Ka thu tha hluai a. "Tu maw zan reia i kawm thin mipa chu" tiin ka melh ta chat a. A meng buai eih lo. Nui hmel lek lek puin ,"Tumah ka kawm lo" a ti chang fak a. 

"Judy, tunah chuan kan inzawm satliah tawh lo, hna kan thawk dun bawk. Inbumna dang hmachhawn ka duh hauh lo a nia" ka ti nghut a. Ka rinhlelhna chuan ka thin a tirim ve ringawt bawk. 

"U Ngur, tu mipa mahin min beisei theih loh nan khatiang thu thang kha ka thehdarhtir a nih kha. " a ti ta mai a. A tifiam nge fiam lo tih lah chu a mitmeng atangin ka chhiar thiam der lo. Mahse, mak tak maiin ka lungawi chawpchilh nghal mai. 

"A tha e. Tunah chuan awmdunna chance kan ngah tawh alawm" ka tih mek laiin Judy phone a rawn ri ta ral ral a."Lawmkima a nih hi" tiin rang takin a la vat a. 

"Aw Lawma, engkim a tha em?" A ti nghal sar sar a. Ka lo ngaichang ve khiau. 

"Judy, pawi ka ti khawp mai. I nu ruang kan chhar tlat mai. " a rawn ti ta mai le! 

 

Kan ding rual thawt mai. 

"Engtin..khawiah" Judy aw chu a ring tha viau mai. 

"Nichinah mai khan a nia. A roomah inawkhluma hmuh a ni. In awmpuinuin a hmu a." A rawn ti a. Ka lung a phu dup dup mai. Judy hmel pawh a danglam vek, min thawng em a tin ni. A mak em mai. 

"Ka u te an awm tiraw?" a aw chu a ri chang chang a ni. 

"Aw awm e. Chuan, zaninah a theih chuan lo haw la aw" Lawmkima chuan a rawn ti a. Kan thaw dun hawk. 

"Aw le, ka rawn haw ang. Chuan Lawm, ka nu room kha khawngahin lo la chinglet lo hram teh u. " a ti a. A chiái leh tawh miah lo. 

"Enquiry kan la zo chiah a. Kan chinglet em em lo ve. A nih ka dah phawt ang aw. I u te an hamhaih si a, nang tal rawn lang vat la a tha ngawt ang" tiin a dah ta a. 

Judy chu a thu hnawk. A mittui a tla lo, a kut a humruh nasa hle thung. 

"Ka nu a thi a maw?! Thi thei a ni hleinem. Phuba pawh ka la la lo va. Ka nu hi thah a ni ngei ang. U Ngur, he thil hi inbumna a ni chiang. Eng emaw tak zawng a awm ang. " a ti mawlh mawlh a. Ka rilru a mang vek kei chu. Thawn thut thut nih hi ngaia neih a harsa dawn a nih hi. 

"Engpawhnise, Insiam rawh. I hawn a tha. I pa boralin i lang tawh lo va, tunah chuan i kal a ngai" ka ti a. Ani pawh a bu nghat. " Ka pa ruang hmu tur zawk ni ila" a ti zawi sap a. A pa ruang a han hmu lo khan a rilru a la kap hle tih ka hre mai. Tih vak ngaihna ka hre si lo. 

A insiam mawlh mawlh a. Keiin a hawnna tur motor ka biaksak a. Kan khaw motor chu an thei lo fai vek. Tualpui lam ka be leh a, Private motor kal thei kan hmu hlauh mai. A lawmawm e. Zan thil thu a ni a, a man pawh a sang viau ang. 

"U Ngur, va insiam ve la" a tih chuan ka melh hû a. 

"I lo kal ve a ngai. Tun hi kan tan chance a ni. Ka nu thi mah se, a thurualpuite an la dam alawm. " tiin min rawn melh a. 

Ka bu nghut. Inngaihtuah buai miah loin ka chhuak a, in lam ka pan nghal. Ni e, Aizawlah Judy te inah a vawi hnih nan ka lut leh dawn ta chu a nia. An thuruk leh an sumdawnna zawng zawng kan hailang ang a, Nun Zalen neiin Judy nen khawvel thar pawh kan nei thei tawh ang. A thleng ngei tur a ni. Mahse, tu te nge kan la hmachhawn dawn ka hre hauh lo thung..

(Buai tak ka ni. ✋😒