Judy 7

MISS JUDY (7) 

Ziaktu: Toni Rälte

"Judy, eng thil nge i tih hi?" Ka ti nghek a. Ka chhungril a vawt sung sung bawk. 

"U Ngur, pawi ka ti. Ka pa leh Azuii an phuar tlat si a. Eng nge ka tih ang tih ka hrethiam lo" a ti sap a. A darah sawiin, "Chu chu kei min mantir avangin a fel theih i ring em ni? " ka ti mawlh mawlh a. Thutthlengah chuan a thu hnawk a. 

Chhuat lam melh ranin,"Engkim ka tichhe ta a nih hi. Eng nge ka tih tak ang le? Nang lehzel pawh a kangkai ta si che a. Ka pa leh Azuii nunna an lak chuan engtin nge ka awm ang. Keimah vanga thi an ni dawn asin" a ti tiau a. Naupangchhia takin a ngik faih faih bawk. Kei atak pawh ka rilru a mumal lo viau. Ka hlau pawh a ni lo. Mahse, thil thleng chuan min thawng lo thei lo a ni e.. 

A bulah ka va thu a, "Judy, i dinhmun dik tak hi ka la hrethiam chiah lo. Thil hi a mak lutuk a, ka hrethiam pha lo pawh a ni maithei. Hetah an awm tawh tihna em ni? Nge nang hian dawt hlir min lo fah leh zawk? I nu chu Illuminati a nihte chuan thlarau chu amah ngeiin a ko chhuak thei mai lo em ni? Engvangin nge a la mamawh che a, a la zui zel che" ka ti ta mawlh mawlh a. Hriatchak ka ngah lutuk hi ka buai a ni ber. 

"Thlarau a ko chhuak thei tlat lo alawm. Kei pawhin ka thei hek lo. Mahse, enchhin nana min hman an tum miau si a. Ka pasal tura a tih hian vawi ta experiment a nei tawh a, mihring taksa hmangin mitthi hi tihnun a tum tawh thin. Mahse, thlarau tel lo chuan an hlawhtling thei si lo va, kei hi min kawla min hrenbeha ka duhthlanna leh chhia leh tha hre miah lo khawpa min chinzal an tum alawm. Tin, thil pakhat a la awm bawk. Ka pa avang chauha an thuruk hi la puangchhuak lo ka ni tih an hria. Ka pa chhanchhuah ka tum dawn tih pawh an hria. Chumi hun a thlen hmaa ka thluak suk hi an tum ber a ni" a ti ta dap dap a. 

"Mahse, hei i kalsan tawh a. Hetah tuman engmah an hre lo va, an duh chuan an hna chu kaltlangpui ang hmiang. Hetah hian i him alawm" ka ti a. 

Min rawn melh káwk a,"Ka him tawh lo. Biteii thih atang khan min veh tak tak dawn tih ka hre tawh. Biteii kha ka tan warning a ni" a ti fiah kák a. 

Ka ner sawk. "Biteii kha an spy maw a lo nih!" Ka ti leh hnuhnawh a. 

"Ni chiang e. Heta ka thawk dawn tih an hriat atang khan an hna an thawk der tawh. Biteii kher an thlan chhan ka hre lo. Min enthla a, tu nge ka hmuha tu nge ka biak tih a chhui a, Chuvang alawm nangmah a rawn belbul tak chat che. Kan inhnaih mah mahin a hria a ni maithei. Mahse, an thah chhan tak hi ka hre lo thung" a ti ta a. Ka lo thaw hawk ringawt. 

"Tichuan, tuna kan buaina chu i pa leh Azuii chu a ni ta a ni maw? Engvangin nge police kan hrilh mai loh?" Ka ti hluai a. 

"Police a!? Police maw. Hehee, saw department-ah sawn a hotu lawk zual te saw Secret society member an nih saw. Chuvang alawm ka nu hi an man theih loh. Rinhlelh takngial pawh a kai ngai lo. Zoram khawvel bawlhhlawh zia hi i la hre telh telh mai ang" a ti chhum hmak hmak a. Ka chil ka lo lem khawlh. 

"I pa chu an thah ka ring lo. An phuar theihna che hmanrua a ni tlat" ka ti sup a. A bu nghat.

"Ni e, an that kher lo vang. Mahse, an nghaisakna hnuai atang sawn a damkhawchhuak zo ang em? An memberah a lut ve mai ang em? Chu chu thlentir loh hram ka duh a ni" a ti chat chat a. 

Ka ding hluai. "Judy, ka ning tawh. Hetiang buaina hi ka hne tawh. Tihian nunphung pangngaiin awm tum tawh zawk rawh. I ka i an loh chuan buaina i nei lo a ni mai" ka ti ta bawrh bawrh a. 

."chutiang chu ni thei se ka duh takzet a ni. Aizawla i han kala ka nu i han bia kha a pawi em a ni" a ti zawi sap a. 

."Lapuii vang a ni. Nang hian min nawrseh zawk alawm.. Thlarau i hmu thei hrim hrim pawh hi thil pangngai a ni tawh lo. Siamthat dan a awm ang" ka ti ram hmak a. Beisei mitmeng hian min lo melh kiau mai. "Pathian hnaih rawh" ka lo ti sup a. A khi sak mai,"Pathian hi a awm tak tak em ni? Kha chen ka beisei a, rawn lan tih ni a nei ngai hleinem. Setana pawl, setana hnena thlarau hralh ten min chenchilh tawh chung pawn a kut a la lek loh hi" a ti duah a. A dinhmun atanga chhutpui chuan chu chu a ngaihtuahna awm reng pawh a ni ve tho mai. Mahse, ngaihtuahna thar ka nei ta tlat! Mi fel leh mi piangthar tha ka ni hauh lo. Pathian a awm tih ringtu erawh ka ni. Judy lo lan dan, kan inzawm tan dan leh tuna buaina lo awm dan zawng zawng ka ngaihtuahin Pathianin keimah hmang hian Judy nun hi chhanchhuah a tum a ni mai lo maw?! Mahse, ti nge kei kher..a harsa dawn hle mai a..

"Zan a rei dawn..ka va haw phei phawt ang e. Thil thleng a awm chuan min lo hrilh dawn nia" ka ti a. 

"U ngur, zaninah hian engmah a thleng lo va, engmah i hre lo aw. Chu chu hrechiang ang" min ngaihtuah hmel deuh hian a ti a. 

"Tehlul e. Engmah ka hre lo" ka ti ve mai a. Ka chhuak zui nghal. Ka ngaihtuah ru viau naa, inngaihtuah harh ka mamawh rih tlat. Chinfel dan ka hriat si loh, harsatna leh buaina mak tak, Zoram khawvelah a awm ang tih pawh rin harsa tak chuan min rawn uap tan der chu a ni si a. Engtin nge kan han chinfel ang aw. Judy leh a pa tal chu kan la chhanhim thei em ang chu maw. Kalsan duhin inrawlh duh lo mah ila; Judy chu ka ensan thei hlek lo. Eng emaw ti zawnga ngaihtuah phei chuan a lainatawm ka ti. A chhungkua tlansanin hetah a la awm ngai lohna leh a tih than lohna hmunah khawsak a rawn rel a, Rilru ngaihngam takin a awm chuang dawn miah si lo. Zoram zawng a zim em a, engtikah emaw chuan he kan khaw te takteah hian boruak a la alh phat ngei ang le..

A tukah thuthar engmah ka hre lo a. Ngaihngam takin ka tho chhuak a. Kan in sak pawh kan chhunzawm leh thei dawn ta. Vena nen bawk kan inzui leh ta hnak hnak a. Kan ngawichawi dun khawp mai. Chhun chawlh lai chuan,"U Ngur, U Biteii thih dan kha chhui chhuak vat se tiraw? A mak e ka ti" a ti hluai a. Thingpui chu a in khalh khalh a. Kei chuan sawi tur ka hre tlat lo. Biteii thattu te chu an man mai ka ring lo. Judy sawi kha thudik a nih chuan..

"Taka..U Ngur, naktuk kan chawl dawn sia, Ka pute lo va sanghal chhuak thin khu zanin chu zu chang ang hmiang" a ti leh thut a. 

"An chhuak a maw?" Ka lo ti a. 

"Chhuak chiang e. Ka pu pawn mi sawihmuh tawh. Tlema rinawm deuh zui loh chuan ka ngam chiah lo va, keimah chauh chuan" tiin a nui hak hak a. 

"A pawi hleinem. Zu chang ila a ni mai lawm. Sanghal sa ei pawh a khat tawh hi" ka lo ti vat a. Chutiang chuan sanghal chan chu kan tithlu ta phawt. Kan ban veleh ka insiam zui nghal mawlh mawlh a. Ka nuin chaw a chhum sawk sawk a. Min funsak nghal. Tlem ka bar tho bawk. Silai chu ka hru fai hliau hliau a. Apeki infiam zo rawn lut chuan,"Miss Judy chhungte an lo kal a. Ih, an hmeltha rapthlak" a ti niah niah a. Ka bengkhawn ru viau. 

"A nu te maw?" Ka lo ti vat a. Ka nu mitmei ka veng ve ringawt. A chhan pawh ka hre lo. 

"Aniang, nu a nia. A hmeltha tawp. Chuan tlangval pawh a tel" a ti leh a. An rawn thawk ta nge nge a nih awm chu. Judy chuan a dangzo em ang chu maw..dangzo turah ngai ang. Kei chu va lan rih kha remin ka hre lo. Judy dinhmun ka tiderthawng mai mai. Bakah ka chhungte chungah an tuante pawh a hlauhawm. Chutiang ka ngaihtuah chuan ka lo inrawlh ve chu ka inchhir ziah. Mahse, inrawlh lo thei lo dinhmuna ka din ve na chin pawh a awm si a. 

Vena'n min rawn sawm phei a, a patea silai a rawn pu ve a, kan inzui leh ta hnak hnak a. Kan tlai deuh tawh vangin thim hmaa thlam thlen hman tumin kan kal chak deuh a. Mipa thalai ve ve kan ni bawk a. Kan la fit bawk nen, khaw thim hmain a pute thlam chu kan thleng ta a. An lo hi zau an nei lo nen, a reh viau mai. Thlamah chuan kan thu deuh vang vang a. Chaw tlem kan bar lawk avangin kan ril a la tam rih lo bawk a. Thlam hnaih deuha thlai leh anhnah eng ilo chu kan la sawk sawk a. Thim hnua zawn chawp leh ai chuan kan ti ve a ni. Sanghal hi thenkhat chu an chhuak hma thei ve viau a, thenkhat erawh tlaivar deuhthawa chan an ngai thin. Buh pawh a hmin mawi tan khawp viau e. Ngawi renga kan thut laiin sava chi khat 'Ngheng' kan tih hi a rawn hram lauh lauh a. He tiang sava an hram hian chhiatna eng emaw tak thleng turah tlema puithu deuh chuan an ngai thin. Kei erawh chuan eng he huah ka ngai lem lo. Vena erawh a hawi hrek hrek a, nuam a ti vak lo em mawni dawn ni. A tit tawh nak alaiin chingpirinu a rawn hram leh ta lai a! Keiin ka lo namliam mai mai kha ,ani tlangval tantir tan chuan a holam miah lo ve thei tlat. A hlauhna a nasat tak tak hmain sa chang tura chhuah chu ka rawt ta a. 

"Saw lam saw keiin, nangin he lam" tiin ka kawk kual a. 

A bu ve nghut nghut mai. Kan kal hrang ta a. Ka sa channa lai chu a nuam phian a. Mei te ka han zu leh tete a, thawm dang a awm rih lem lo. Dar 8 a pelh hnu chuan ka ril a tam ta khawp mai a. Mahse, thawm ka neih chuan kan sa chan chu a rawn chhuah loh ka hlau bawk si. Dar 9 ah phei chuan ka tamchhawl dawn titih ta mai. Sa lah chu thehmeh angin a reh tlawk tlawk bawk si, tamchhawl ai chuan tiin thlam lama chhoh mai ka rilruk ta a. Ka din thut vang nimaw ka lu a hai deuh a, ka pai nawk mai. Chumi rual chiah chuan silai puak thawm ka hre ta bawk. Ehe! Vena chuan a kap em mawni le..phur zetin thlam lan pan tumin ka pen páwk páwk a. Mahse, ka ding leh chawt. Thawm ri sun sun chu ka ngaichang a, ka beng ka chhi kar bawk. Vau lam atanga rawn ri phei nia ka hriat avangin en tuma ka inher rual chiah chuan ka bek a ri no chhawk! Thlawhmaah chuan ka let ta tawp a. Arsi leng chuai ka hmu hman nia. Ka tluk rualin ka hmui chu a rawn hup a, rim hiar lam hi a nam chûk bawk. Ka khawhmuh a thim riai riai a. Ka zal ta der mai. 

Ka harh chuan vawt ka ti khawp mai a. Chet lak tuma ka han chet chuan ka meng tal tawp tawp. Ka kut leh ke chu phuar a lo nia! Thingbul rinchhanin phuarbeh ka ni. Tal a sawt dawn lo tih ka chiang viau. Vawt ka tih em em nachhan pawh ruah a lo sur chu niin tun anga ruah sur chu eng ruah tak ni ang maw. Ka kawr chu a hnawm chuap a. Khua lah chu a thim phui mup mai. Thla leh arsi eng hmuh tur a awm lo. Au tumin ka han ang dawn a, ka ka pawh hnawhphui a lo nia. Ka rilru a rawn fim chho tan a, thlawhhmaa ka bek rawn na zawk leh ka tluk dan te chu..ni e, kei hi tu ten emaw min ru bo a ni. Khaw nge Vena a awm tak ang? Ani pawh a va him lo em. Mangannain min rawn bual tan a, thihna lamah chuan ka hlauthawng em em lo. Min that duh chu nise thlawhhmaah khan min tihlum daih tawh ang. A nung chunga min la phuarhlawm hian chhan a nei ang. MAhse, ka manganna erawh ka chhungte bakah He thil hi Judy chhungte thiltih a nih hmel a, nghaisakna bakah fiahna ka hmachhawn dawn niin ka hria. An member atana min lakluh ka hlau! Thinlungin tum lo mah ila, chhia leh tha thliar thiam lo khawpin min chingzal ta se. Ka inthing nawk nawk a. Ka kut chu tihchet ka han tum leh a, min phuarna hrui chu a fei hmel hrep. Chutih nak alaiin ka pum ruak lutuk chu a rawn ri ruk ruk a, ka riltamzia ka hrechhuak nghal. Hetia min man hma pawn ka tamchhawl lo chauh kha a nia. Ka chauh har dawn loh hi..Vena chin tal chu hria ila ka awm a nuam deuh tur. 

Ka chau leh zawi lutuk vang nge mawni dawn ni, ka lo muhil leh daih nge..ka naka na vak loa an rawn chhuih chuan ka che zuk a, peih mang lo hian ka meng a. Khua pawh a lo eng iar tawh e. Ka awmna lai hmun chu ka hre lo tawp mai. Ramhnuai a ni tih bak. Ka hmaah chuan mipa ka rualpui awm vel tur biang hmul nasa deuh mitmeng thip zet hi a ding ran a. Kan san zawng pawh a inchen viau ang. A kutchungchal chu a hmuia dahin thawm nei lo turin min mitmei a. Ka melh reng ringawt. Mi pakhat kei aia u hlek tur, palian leh tawr tha zet hi a rawn lang leh a. 

"Kal ang" ti hmukin min phuarna chu a rawn phelh a. Ka ban kham lutuk chu ka pharin ka tiche vak vak a. Ka ka an la hnawh vagin ka la tawng thei chuang lo. 

"I hriat loh tur i hre tam mah mah a. A pawi khawp mai" kei aia upa zawk niawm tak chuan a ti nghut a. 

Ka tawng thei ve dèr si lo. Engtia min tih nge an tum ang le. Ka riltam em vang chuan ngaihtuahna fim pawh ka hmang thei lo. Ka ka an hnawhna chu an rawn la ta a. An lak rual rualin,"Ka ril a tam" ka ti tham tuak a. Ka aw te pawh a lo thám vek hman anih chu. Ka tider lo tih an hrethiam ve nge, pakhata chuan a bag a va zen ruk ruk a. Balhla sei hi a rawn la chhuak nawlh a, pahnih chu a kheh a, ka kaah a rawn hnawh a. Ka lo ei duak duak mai. Chu balhla pahnih lek chuan min tiharh leh ta a, ka ngaihtuahna pawh a fim chho tan ta deuh e. 

"Khawiah nge min kalpui dawn?" Ka ti a. An nui huk a. 

"I hre mai ang. " an ti ringawt. 

."ka thianpa kha khaw nge? A him em?" Ka ti a. 

"Ani chu nangmah zawngin a buai mek ang" upa zawka chuan a ti nghut a. Ka ke phuarna chu an phelh a, min kai tho lawp a, ka beka an chhutna bak chu na dang ka nei lem lo. Ka bek erawh a na ngut ngut mai. Ka kut la phuar chung chuan ka zui ve ta poh a. Kan kalna ramhnuai chu kan khaw ram chhung a ni lo em mawni dawn le..ka kal tawhna hmun a ang lo. Kan khaw ram chhung na na na hi chu ka phak ang tawkin ka tlawh dar ve riau tawh a, he lai hmun hi chu ka hre tlat lo. Tualpui ram a ni maithei. Ka zui ve zel ta phawt a. Mel hnih dawn kan kal hnuah kan chawl a. Tuite pawh min intir ve a. A tharum thawh zawngin an che lo va, a zia tak a awm. 

"Judy a him em?" Ka ti leh ta hlawl a. An pahnih chuan inmelh ralhin,"I man chak kher mai" an ti leh tawp a. Ka zawhna chhan an hreh viau aniang e. Lui pakhat kan pawh ta hlawl a. A len loh danah Tualpui khaw lui pakhat Theire lui an tih chumi hnar chu a nih ka ring. Chu luite chu kan zawh chho zel a, kawi 6 vel kan kawi hnuah lengkir kan pawh ta hlawl a. A helna kawngtum te taktea kan inzui thám thám lai chuan chet lak ka tum ta a. Chu lai kawng tum hnuai chu a sang lo va, thialbal leh anchiri hmun a ni mai a, suar a zuk pawh leh mai bawk. Ka kalpuite hian silai an keng lo bawk niin ka hria a, chemte emaw eng emaw tak erawh an paipawn mahna le. Ka silai kha an la ta lo a ni ngei ang. A hnawk tham ve deuh dawn bawk a. Lengkir kan hel chhuak tep tihin chesual niawm takin ka kawng kal lai chu ka petek ta zauh a, lei a lo hnip ve kher bawk a, ko pangah chuan tlahawlh luiin ka lum thla ta a, a awih fahran lo naa ka lum lui ve bawk a, ka tawlh chak khawp mai. A rang a rangin min rawn umzui ve bawk a. Mawngtawlh titihin an rawn chhuk a. Suar ka zuk pawh takah chuan ka tho vat a, lui mawng lamah chuan ka phit thla ta a. Ka kut phuar mah se, hmalama a awm avangin chet a khirh vak lo. Silai an neih loh miau vangin an kut ngeia min man a ngai si a, ka tlan chhuah an rin loh luatah an lo thlamuang ve bawk nen. An ni ai ngawt chuan lui kal leh kawr chhengchhe zawhte chu ka hnehsawh si. Ka tlan chak bawk a, kan inkar a hla ta fu. Thawm chhuah miah loin kan inum a ni ber. 

"Ding rawh. I tlan chhuak hlen dawn chuang lo. " pakhat chuan a rawn ti ta nge nge a. Ka han lehhawi zauh,"Haw pawh ni la, i him hlen dawn lo a nia. " a rawn ti leh a. Ka ding a. An ni pawh an ding ve. Ring angreng tak hian,"Min tibuai tawh suh u. Engmah ka sawi chhuak lo vang. Engmah ka hre lo. A tha em?" Ka ti làng làng a. 

"Mahse, i hria alawm. A ni lawm ni? Chutin kan hnutchhiah ngawt thei lo che" naupang zawk chuan a ti a. 

"Duhtawk r'u,..in duh angin kal ula, ka nunphung pangngaiin ka kal ang. Engahmah inrawlh ka duh lo" ka ti tuar a. Chak zetin ka tlan thla leh. 

Ka hah leh chauh tawh em vangin ka thu ta hnawk a. Ka kal hla thawkhat tawh viauin ka hria. Ka hawi kual a, kan ram lui a ni lo tih chiang takin ka hria. Mahse, chu chu ka buaina a ni lo. Ka bek na leh ka chau lutuk avang chuan ka tha a tlem telh telh tih ka hria. Min rawn zui tawh lo nge an thawm a reh hmak a. Kawng dang an zawn tho ka rin avangin ka hmanhmawh zual. Ka chhungte chungah an tuan ang tih ka hlau a ni. Ka kut an phuarna chu phelh phawt a ngai , ka'n seh a. A sak fun si. Ka han tal deuh a, a nghet telh telhin ka hria. Beidawng angreng takin ka thu vang vang a. Ka tui a hal bawk a, tui awmna lam chu panin ka dawt khawlh khawlh a. Ka zia leh ta hlek e. Ka kut phuarna chu ka ke hmangin theihtawlin thlawh thlak ka'n tum leh a. Hruihrual a ni a, a tawlh ve hlek hlek chuan ka hria. A dul tak deuhah chuan ka seh leh ta chàt chát a. Ka ha a na vek thei. A tawpa tawpah ka phelh thei ta hram e. Ka hah lutuk chu ka thaw hlawi hlawi mai. Ka pum a ruah vangin ka kua a ri leh ruk ruk tawh, heti ringawt chuan hmun him ka thleng zo dawn lo tih ka hria. Ka che vel thei ta bawk a. Ka chhak lawka changel kung chuan ka mit a la nghal. Mahse, chem ka nei lo. Changel chu a lian lo va, ka nam nghek nghek a. A nghet phian bawk si. Chutia thahnem ka ngaih em em lai chuan thawm ka hre ta thut, a ranga rangin changel kung dinglama hnimpik zingah chuan ka zuang lut a. Ka bawk phêk ta reng mai. Thawm chu a lo hnai zel a. An rawn lang ta hlawl e. Pa pakhat lukham parh chul zet tawh khum leh a nupui niawm tak em phur an ni. Ka hmuh vawikhatna an ni. Mahse, ka lawm. Hmelma an ni lo miau a. 

Ka tho vat a, ka va pan ta a. Ka thawm an hriat rualin min rawn en ve vat a, mak min tih hmel angreng viau. 

"Ka pu, ka lo be lawk mai che u. He lai hi khawi lai ram nge le? Kawng ka bo a" ka ti ta ngawt a. 

"Darpui ram a ni e. Khawi atanga lo kal nge i nih le!" Pa zawk chuan a ti ta mai le! Chhei! Darpui chu ka hriat vawikhatna a ni tlat! Ka meng phawk lutuk chu mak an ti nge ni ,"Tlangval, khawi atanga lo kal nge i nih le?" A ti nawn leh ngat a. Ka kha a chih titih. Mahse, intipachangin, "Zopui khua atangin a nia. Ka pu, Darpui chu eng district nge ?" Ka ti ta tawp a. 

"Zopui a!? Chute chu kan khaw hlui alawm. Mamit district kan ni e. " mak ti zetin a ti a. Ani aiin mak ka ti zawk. 

"Ka pu" ka han ti hluai a. 

"Ngawi teh, Vala, Darpui chu Zopui khaw thar a nia. Khaw thar kan kai tawh alawm. Kum 20 tha chu a liam tawh ang. Kan khaw hmun hlui kha chenna tlak ni tawh hek lo" a ti leh ta mual mual a. Ka à vek. Eng nge a awmzia le?! 

"ka pu, Zopui i hriat leh ka hriat hi a inang lo a niang e. Darpui chu kei pawn ka hriat vawikhatna a nia. Kan khaw thenawm chu Tualpui a nia.." Ka ti a. Beisei nei takin ka melh a. 

A lu a thing nur nur a, "Kan hriat a inang chiah e. Tualpui pawh khaw ram a ni tawh, thil rapthlak tak a rawn thlen atang khan kan khaw hnih chu kan darh zo ta a ni. Tichuan, khaw thar kaiin kan khaw hnih chu kan inchenpawlh ta ngawt mai a ni" a ti ta zel a. Ka pawt chawt a, vaukam hmun fai laiah chuan ka pawt thu hmiah, ka chezia leh awmdan avangin an ni pawn min hnial lem lo. Ka á mai dawn, eng tin nge chutiang chu a nih theih?! 

."Ka pu, a mak ka va ti em. Nimin tlaiah khan ka thianpa nen sanghal changin kan kal a. Ka chesual ta hlauh a, kawng ka bo zui ta a. He lui hi ka pawh leh ta chauh kha a nia. Nimin maia thil thleng a ni." Ka ti ta bawrh bawrh a. Ka hlauthawngin ka hnukte pawh a ulh hial mai. 

A chil a lem khawlh a, a nupui melhin, "Ngura nen an inang hlein i hre ve lo maw? " a ti sup a. Rang lutukin, "Ka pu, Ngura ka ni, Ngurhmingliana, ka pa pawh Thanthuama, ka nu erawh Zaiteii..ka pu, keimah ka ni. Zopui khaw tlangval " ka ti tuar tuar a. An nu nen chuan meng bial pawp pawpin min en a. Mak an ti em em tih a lang chiang khawp mai. 

"Ngura maw?! Ngura..engtizia nge?" Pa chuan a ti hluai a. Ka hmai hupin, "Ka hre lo. Heng hi engtin nge a nih theih?" Ka ti hnual raih a. 

"A va mak ve le! Nangte chu in sa channah i bo a, Vena hlauhlawpin a rawn haw a. Khawtlangin kan zawng che a, ni 7 hnuah pawh hmuh i nih tak loah chuan kan vuiliam ta ngawt che a nih kha. Kei hi min hre tawh lo em ni? Puia kha ka ni. Puia Rinpuia thian thin kha..i la hria em? Kum a liam tam ta a, min hai ta a ni maw?! Hei kan nu hi Rengi kha a nia" a ti a. Puia kha maw! Eheu! A va mak ngai em. Kei hian mumang ka nei em ni zawk. 

"Puia, thil hi ka hrethiam ta hauh lo mai. Engvangin nge kan khua chu kan darh? Miss Judy kha a la awm ve em? Ka thiante, ka chhungte pawh. Eng nge an chanchin?" Ka ti ta mawlh mawlh a. Meizuk a siam te te a, "Ngura, U ngur ka ti zawk dawn che mawni. Ka u rual kha i nia, tunah hmana i hmel ang tho kha i la pu si! Mumangte pawh a ang alawm le. Ni e,i chhungte chu khatia kan darh hma kumah khan i pa a boral hmasa ber a, i nuin a dawt a. I farnu erawh a awmna chin kan hre tawh lo, in naute Apeki erawh tu ten emaw an fa atan an la niin ka hria. Miss Judy pawh kan khaw darh hma tho khan ama in luahah khan thi-a chhar a ni bawk. I thiante erawh an la dam vek ti ila Buanga kha cancer vangin tunah chuan nikhua a hre lo chho tawh. U Ngur, a va mak em?!" Tiin min rawn melh a. Ni e, a mak a ni. A mak thlawt. Hei hi thil thleng tak tak a ni thei lo. Nimin lawka thil thleng te, ka tlan chhuah dawna thil thlengte kha ka la hre vek. Thawk leh khatah he thil hi a rawn thleng thut thei lo.

"Chuan, kan khaw darh chhan chu?" Ka ti vat a. A chil a lem khawlh, sawi hreh hmel a pu. Mahse, "Englo a nia. Hri mak tak mai Zoram khawvelah hian a leng a. Chu hri chu mihring siamchawp niin a damna a awm a. Mahse, chu a damdawi nei tur chuan a kawltute thuhnuaia kan intukluh a ngai a. Chu damdawi chu keini ringtute tan chuan sakawlh a ni mai awm e. Damdawi ei apiang an dam a, mahse, an damchhungin an zalen thei tawh lo. Chutiang chuan Zoramah damdawi duh leh duh lo kan inpawlh ta nuk a. Kan khua ngei pawh damdawi duh leh duh lo kan inzat nawk mai si, mahse, damdawi neitu te khan thil an tithei em a. An thuhnuaia awmte chu sum leh pate vurin an siam hausa a, mahse, hausakna pawh ni eng ang mah se, a duh ve lo pawl kan awm tho. Kan indo chu a ni ta reng mai a, Tichuan, Hri kai ve thei lote chuan keini hri vei theite chu khuaa awm min phalsak ta lo va, min hnawtchhuak ta a ni. Tualpui pawh chutiang tho chu..tichuan, khaw thar kaiin reithei takin bul kan tan hlawm a..tunah pawh sawrkar pawhin a tlawhpawp loh kan la ni reng. Mahse, Pathian kan nei a, kan hlim tho mai" a ti ta charh charh a. Thawk pawh thaw tha ngam loin ka lo ngaithla. 

"Ka chhungte leh ka thianten eng kawng nge an zawh ve?" Ka ti a. 

"An ni chu khaw thar kai pawlah vek an bet e. I chhungte pawh thlamuang takin an chawl e" a ti dam thlap a. 

Ka ding thut, "Hei hi ka ring thei lo. Puia, khuaah chuan min hruai teh u. Ka awih thei thlawt lo" ka ti tuar tuar a. An rawn ding ve nghal vat. Ka pen leh tur chiah chu tui ka zuk dai thawih a, ka rin aiin a lo thuk a, a vawt bawk nen.."Awkhaih!" Ka tih rualin ka meng káwk a! Ka meng phawk nghal viau bawk. Ka awmna chu ramhnuai a ni ta awzawng lo mai. 

Damdawiin emaw ka ti hman a, mahse, Pi Rinpuii hmel ka hmuh takah chuan engkim ka hrethiam ta vek e. Nui sáng chungin min melh a. Ka biang chu rawn chulin ka chal a dek leh a. 

"I mumang chu i hlimpui em?" A ti sap a. Ka chhing sawk. 

"Eng nge ka chungah thleng?" Ka ti thàm tuak a. 

Nui ver ver chungin, "Khang i thil hmuhte kha la thleng tur a nih kha..kan thu i awih erawh chuan khang kha thleng lo thei a ni bawk.. Tunah chuan ni 7 an zawng tawh che a, an vui liam tawh che. Mitthi i ni tawh. Hlutna i nei tawh lo. MAhse, keini hian kan tuamhlawm ang che. Hming thar, nihna thar leh khawvel thar i tan kan chhawpsak ang che..i pawm a ngai" Pi Rinpuii chuan a ti nghat nghat a. 

Ka beidawng lutuk chu ka nui hawk. Ka nuih erawh a za hlek lo. Ka hun tawn mek chu mumang ni se, harhsan ka chak ber mai. Thil thleng chu a mak lutuk a, ka hrethiam lo va, ka mawl huih bawk. Min mantute hnen atang khan ka tlan chhuak ngei sia, engtin nge tihian min man leh theih? Ni 7 a liam hman a maw? Nimin lawkah a nih kha min man. Vena nen thlama kan thut lai te, sava hram mak takte engkim kha chiang takin ka la hria. 

Ka buaizia chu a hre ve nge ni dawn ni, "Mangang viau suh. I harh lo rei em alawm. I muthilh chhungin thil tam tak a thleng a ni.. " a ti a. Mutchhuakin min rawn zem leh chiai chiai a. Ka maimichhing leh daih. Mahse, ka awmdan chuan ka lung a tiawi thlawt lo a ni e. Ka muhil tep tihin kawngka a rawn inhawng rawk a, ka meng leh zawk. Thei leh thei loin kawngka lam chu ka va hawi a. Ka thil hmuh avang chuan ka chiái leh ta vek mai. 

A mit hnuai valh kulh leh a biang duk churin Judy hi mipa lian zet hian a rawn kai lut a, Judy chu a sam a thur viau..a cher hle bawk. Min rawn en ve chiah bawk a, thinrim hmel a pu nghal. Min rawn pan a, ka mutna sirah chuan dingin, "U ngur, chak takin aw. Pawi ka ti, ka hnuklut si che a. Min ngaidam ang che aw..khawngaihin" a ti nghal mawlh mawlh a. A ngaihna hre mang lo zeta ka melh laiin a nu lam chu hawiin,"A hriatna lehzel pawh in nawhrehsak a maw?! Engvang nge?" A ti tuar a. Pi Rinpuii chu a lo nui sak. Thawven hmel zeta Judy kal hual chungin,"Plan kan thlak leh alawm. A hriatna a bo reng reng lo. A tha mah mah zawk. Ngura hian ram min lakpui dawn a ni. " a ti nghat nghat a. Thawh lawka reh nawk nawk ka chak, mahse, ka zawi em em bawk si. 

"Chutiang chu a ti hauh lo vang. Ani hi kaltir rawh. Tel vena a nei lo, engmah a hre hek lo. " Judy chu a per dat dat a. A aw khurh danah a thinrim hle emaw a lungchhia emaw a ni maithei. 

"Judy, heng thil hi.." Ka lo ti sup a. Min rawn en vat. Lainat hmel taka min enin,"Keimah vang vek a ni. Engmah kha lo hrilh lo chein lo zep ila, hetiang thil hi i tawk lo tur..he secret society hian i ka i an hlauin i thluak suk an tum mek a nih hi. Mahse, U ngur, mipa i ni. Fim takin thil ngaihtuah ang che aw. I thlarau kha hralh ve hlek suh. He lai hmun atang hian him dam takin kan chhuak ngei ngei ang" a tih mek laiin mipa khan a rawn chelh bet vat a, Pi Rinpuii chuan,"Hruai bo rawh. He hmeichhia ka hmu peih tawh lo. " a lo ti hlar a. A fanu chuan a nu hmaiah chil a chhak nia! Haw em emin a melh a. 

"Nu rapthlak leh bawlhhlawhnu, setana fanu diktak chu i ni e. Mahse,i duh angin engmah a thleng dawn lo. Zoram khawvel hian tu nge i nih chiah hi an hre tawh dawn aw. Ka hmangaihber ka pa min laksak tawh a, tunah chuan damchhan pakhat chiah ka nei tawh..nang tihchhiat che hi..tichuan, lawm takin ka thi tawh ang" a ti táwn táwn a. Chuti em ema huatna mitmeng chu ka la hmu ngai lo. Pi Rinpuii pawh chu a dang deuh nge ,a ngawi kur a. A nuih a za hauh lo tih a lang reng mai. 

Mipa khan a pawm chhuak ta a. Ka tel ve atanga thil thlen chak dan hi hriatthiam harsa ka ti a ni. Aizawla ka kal leh Judy nu ka va be kher kher khan engkim a tipawi zo ta a nih hi..Thut chhuah ka tum a, na chu ka nei lo. Ka zawi a ni. Khur ngar ngar chungin thawh ka tum lui tang tang a. Pi Rinpuiin min lo hmuh chuan min nem mu leh hnawk. Ka hah hle mai. Ka chau hlauh hluah a ni mai e. Ka khawhmuh a rawn thim leh ta tial tial a, ka awmna chu a vir muai muaiin ka hre bawk. 

"Ngur, Ngura" ka aw hriat than tak mai ka hriat rual chuan ka meng káwk! Eheu! Hetah eng nge a tih ve le? Min rawn chhanchhuak dawn em ni ang? 

"Ka pa" ka ti zwi sup a. Thaw huai hmel a pu. Ka chalah kut dam thlap hian a rawn chul a, ka'n en nak chuan ka nu ka hmu. A mittui a hru chawt chawt bawk. Ka hawi kual zel a, ka thiante Zaua, Buanga leh Rema ten min ngaihtuah hmel taka min lo chhuk en thap ka han hmu leh bawk. Ka phu uih a, thut ka tum chu ka pa chuan min nem mu leh vat. "I chau em mai, thawh tum rih suh. A va lawmawm em i lo harh chu" a ti chuar chuar a. Ti nge mak deuh deuh hi ka tawn zel a?! Eng nge a awmzia le..a mak em mai. 

"Thianpa, min kalsan dawn emaw kan lo ti hman tawh asin. I lo harh chu kan va lawm em" Buanga chuan a ti sur sur a. Mak ti em emin ka thiante chu ka melh kual a. Ka lawm si, mak ka ti bawk si chu ka hnukte lam lam a ulh. Lalpa, ka va lawm em. Mumang rapthlak tak atangin min kaiharh a. Ka lawm e. 

A hnua ka harh deuh hnuah thil awmzia an sawi ta a. Khatia Vena nen kan sa chang kha silai puak ri ka hriat kha Vena silai kah ngei a lo ni a. Sanghal lian vak lo a lo kap a lo nia. Phur em emin min rawn ko a, ka lo chhawn thei si lo. Ka awmna lamah rawn kalin min rawn au pah reng a, kei lahin ka chhawn thei si lo. A mangang tan ta viau a nih hmel. Mahse, min zawng kual zel a, an vau lui kawrah ka silai a chhar a. Ka bo ngei nia hriain lui kawr chu a rawn zawh thla ta zel a. A tawpa tawpah lengkir sang vak lo hnuaiah ka lo mu hlawm reng chu min hmu ta a. Signal a lo awm mai si lo nen, kei lah ka harh thei bawk si lo, a mangang khawp mai a. Thlamah chho lehin ka chhungte a be ta a. Tichuan, ka awmna hmunah rawn chhuk lehin min rawn hruai hma chu min lo thutpui char char mai a ni. Tichuan, min zawn hawng a, ka marphu a la awm a, ka thaw erawh a zawi deuh thung. A ranga rangin Tualpui PHC-ah min kalpui nghal a. Enkawl vak dan ka awm chuang lem si lo va, drip te min khaisak ta ngawt a. Harh miah loin zan hnih leh ni khat ka mu a nih chu. Aizawl lama min chhohpui dan an ngaihtuah mek laiin ka harh ta a ni. Khang ka mangchhia, a tak taka thil thleng vek ang ni si kha eng nge a awmzia ni ta ang? Mumang chhawng an tih ang hi ka nei ve tihna a nia. Mumang satliah erawh a ni hauh si lo. Mumang awmze nei, a taka thleng ngei tur niin ka hre tlat. Ka hlauthawng a, ka buai chhiava ta hle. 

"Judy khaw nge?" Ka ti phawng a. Mak min tih hmel hlawm ngang mai. 

Rema chuan,"A awm reng alawm ani te chu. " a lo ti vat a.

"A haw lo maw?" Ka ti leh ngat. 

"Haw lo..a nu te pawh an haw tawh aniang" Buanga'n a lo ti a. Ka nu chuan min melh vang vang a, ka zah ru deuh hle. Mahse, Judy ka ngaihzawn vang ni loin ka ngaihtuah vang a ni zawk. A nu leh a u an lo kal si a, an rawn hruai chhuak ta lo chu a nia. Tlem chuan ka thaw a veng ta deuh. He Judy buainaa inhnamhnawih tawh loh tawp chu ka tum ta a. Ka hlen ngei ang. Ka lengin ka hmu tawh tur a ni lo. Kha mumang rapthlak tak kha a taka thlentir ka duh lo. Ka hlau! 

Ka harh ta bawk a, chaw erawh ka la ei hleithei meuh lo. Chaw chakna reng reng ka nei lo a tin ni. Ka bo ngawt dan chu a chhan an hre chak tih ka hria. Kei ngei pawn ka hre bik tlat si lo, ka bekah an chhu a. Min hruai lovin min kalsan leh daih a! Kei pawn chu lai tak chu ka hrethiam bik lo. Min hnutchhiah tura ka bek an chhu kher kha..nge tuna ka awmdan pawh hi ka mumang tho..huiham, ka a vek,. Ni e, at law law te pawh a chakawm hial ta ve ang. Ka harh atanga ni 2-naah damdawiin kan chhuahsan a. Kan khaw lam kan pan ta. Zanah chuan thenawm khawveng leh chhungkhatte an rawn leng khawm tiai tiai a. Ka bo tih leh Vena min rawn hmuh dan kha an hre ve fur sia, zawhna an ngah ngei mai. Kei lahin chhanna fumfe tak ka pe hleithei bik bawk si lo. Ka thil tawn leh ka mangchhia zawng zawngte kha sawi ni ila rapthlak an tih bakah miss Judy ngei pawh an hnualsuat dawn tlat! Chuvang chuan ngawih mai ka duh a ni. Ka phone kha mak deuhin ka silai a chharna thlang lawkah hnim karah a lo awm a. A lo la tha vek bawk. Mut dawna ka han khawih ve chu tawngtaipuitu ka lo ngah hle tih ka hmu a, ka lawm ngei mai. Kan khua angah chuan ka bo dan leh ka nat dan kha thilmak a tling ve miau si a. 

"U Ngur,..i dam chhuak leh chu ka lawm e. Rawn kan che ka duh viau naa, ka hlat che hi a tha zawk tih ka hria. I hriatthiam kha. Min hrethiam rawh aw" Judy msg a ni. Ka chhiar nawn ka chhiar nawn a. 

"Ni e, Judy, nang leh kei hi la inhre ngai lo angin awm ang aw. Keimahah chuan ka hlauthawng lo, ka chhungte ka ngaihtuah a ni. I hriatthiam kha.." Tiin ka chhang let ve ta a. Ka maimichhing a, Judy hmel hlir ka mitthlaah a la lang zui. He nu rawn lan atanga a ruka kan buai nasatzia ka ngaihtuahin huat ka duh a, ka haw thei bawk si lo. Huat a hnekin ka lainat tlat si. A nunah thil tam tak inthup a la awm ang tih pawh ka ring. Mahse, dawt min hrilh tawh lo tih erawh ka chiang thawkhat ta viau. Ka mumang avang khan. 

Ka mutui viau mai. Mumang pawh ka nei lo. Ka phone ka en ve vut a, thawh veleha phone khawih hi ka ching lem lo, eng ka hria ni maw. Ka en ve vut ni..

"U Ngur, ka pa a boral! Tunah chuan engmahin min dang thei ta lo. An thuruk puang thei lo tura min phuartu an awm ta lo. Ka haw dawn..he pawl tenawm tak hi a tul a nih chuan ka thihchilh mai ang. Lo inenkawl tha rawh aw. Dam takin le.." judy msg..

Ka thaw hawk a. Amah maiin ka tihtir ang maw?! Hrereng chungin dinhmun derthawngah ka dintir ang maw? Judy chu ka call ta nge nge a..

(Ih maw u, a mak tawp. Miss Judy hi a tira ka plot siam dan nen inanna pakhatmah a nei tawh lo. Thingtlang tlangval leh khawpui nula inngaihzawnna boruak kalpui ka tum kha a nia. Secret society hi rilruah a lang tlat a. A tul a nih ka ring ve tawp. Lo dawhthei u la, induh ang kha chu in la hmu em em ang. Inferno hmahruaiah in ngai thei ang. A in relate vek dawn..a mak tawp, kei pawn mak ka ti! 

Silipar thar ka la lei lo.✋🥲