Judy 7

MISS JUDY (7)

Ziaktu: Toni Rälte

Ka ep kawngpui atang chuan Pi Rinpuii, Judy nu leh Judy an lo phei mek a ni. Engtin nge saw saw a nih theih? Judy saw Aizawlah engtikah nge a lo kal? Ti nge engmah ka hriat loh? A mak ka ti mang e. Min rawn hmuh ka hlauh em vangin ka dinna bul dawrah chuan lei tur em em pawh nei loin ka lut a. An lo phei zel a, a rukin ka en char char a. Khai! Ka dawr luhna chu an rawn pan a nih chu! A va tihchi lo tak em. An rawn lut ta chiah e. Dawr hi a lian thawkhat a, customer pali vel an awm ve bawk. Thlang lam ka pan a, anmahni hnuchhawn zawng chuan ka awm lui ngar ngar. Tul uk loin an thil zawrhte chu ka tuai let ka tuai let a. Pi RInpuii chu a tawng bawrh bawrh a, dawr nghaktu nen an inhre tha viau a nih hmel. Judy erawh a ngawi reng thung. Dawr nghaktu chuan,"Judy chu i lo haw a ni maw?! Engtik nge i rawn hawn?" A lo ti sawk sawk a. 

"Tukinah khan" a ti ban chhalh a. Min rawn melh relh nia ka hriat avangin lehlam ka hawi nghal vat. Pi Rinpuii erawh chuan dawr thil ho chu basket-ah a khung mawlh mawlh a. Ka bul maiah a rawn ding thut. Lehlam ka hawi ngat ngat thung. Mipa e ti lo chuan ka insangmar nasa hle bawk. 

"Naktukah a rang thei ang berin i haw tur a ni. He khawpuiah hian i hmel hmuh ka duh tawh lo a nia" ka beng bula a rawn tawng vangin thawm ri nuai nuai karah pawh hre fiah tak ka ni. Ka phu zawk a, ka meng lian hle bawk. Ka lehhawi ta nge nge a. Ka mitah tak a melh ran mai. Judy erawh kan piahah basket khaiin a ding thung. 

"Ka sawi kha i hria em?" A ti zawi sap a. Thinrim hmel a pu lo va, mahse, a mitmeng chu a hlauhawm riau! A thim raih a. Nunrawnna ka hmu thei nia! 

"Engvangin maw?" Ka ti ve ta ngat a. 

A nui hul hak a. "Zahngaihna ka la lantir lai hian luhlul chhuah miah suh. A rang thei ang berin haw la, rawn lawr leh tawh ngai suh. " a ti chang fak a. Min lehpelin dawr chhunga lo lut mek chu a va be ta daih a. Judy chu ka va melh zauh a, min lo en ve kiau mai. A mitmenga lungngaihna thuk tak inphum chu haider luih a harsa khawp mai. Biak chi a ni ang em tih ka ngaihtuah mek laiin ka phone a ri ta hlauh a. Ka phone ka phawrh ka'n en chu ka thlauh lo chauh. Ka hmaa ding chu ka va melh a, ka phone ka melh leh bawk. Hawihai takin ani pawh chuan min lo melh ve kiau a. Phone chu lain, "Judy" ka ti sup a. 

Lehlam ami chuan, "U Ngur, rawn haw rang rawh. Khawngaihin kan inah khan kal tawh suh. A chiang em? I kal tawh tur a ni lo" a rawn ti ta tuar tuar a. Ka hmaa Ding Judy chuan phone a keng hauh si lo. Tuna ka biak mek hi Judy nge mi dang? Nge nia ka hmaa ding hi Judy nge mi dang?! Ka ngaihtuahna buai dan tur chu in hriatthiam ka ring. Ka sahal a ni ber e. 

"Judy" ka ti leh ringawt a.

"Tunah pawh khan buaina i tawk em ni? Rang takin buaina kha kalbosan rawh. I hria em? Kal vat rawh" mangan hmel zet hian a rawn ti leh tuar tuar a. A nawrin min nawr a ni ber e. Kei pawh chuan eng dang ngaihtuah tawh loin chhuah tumin ka pen a. Mahse, ka hmaah tak Judy nu a lo ding chat, verther zeta min nuihin, "Amah em ni?" A ti hriam hraih a. 

"U Ngur, ka nu kha kalsan rawh. Vatin, be suh. Kal rawh" Judy chuan a rawn ti vin thak. Min va tibuai nufa tak em. Judy nu chu buk khum zauhin a ka nêk per a, ka chhuak ta nal nal. 

"Ka kal tawh e" ka benga phone la vuan reng chung chuan ka ti a. 

"An zui ru maithei che a. Khawiah emaw vak kual rih rawh. I thlenna hmun an hriat chuan zaninah buaina i tawk thei" a rawn tih phei chuan buai ru tawh tak ka ni. Bus a rawn din rual chuan ka lawn kai vat a. A hnung ber dawttu la awlah chuan ka thu nghal chat. 

"Engkim ka hre duh" ka ti nghal táwng a. 

"Tunah chuan ni rih lo ve. Him phawt rawh" a rawn ti dam thlap a. 

"Ani kha tu nge? Nangmah ang tak kha?" Ka ti leh thawt a. Ka tawng ring deuh nge min rawn melh thup. Ka hawisawn ta daih a. 

"Ani kha keimah anga an dinchawp a nih kha. Tu nge a nih ka hre lo. " a ti fiah kák a. Huiham, heng thil hi eng nge maw a nih chiah le?! Judy chuan,"Nakinah ka lo be leh ang che. Fimkhur rawh aw" tiin a dah daih. Ka call tawh bik lem lo. Ka hawi vak vak a, min zuitu an awm takin tiin. Rinhlelh tur awm ang ka hmu mai lo. Bazarah ka chhuk ve leh ringawt. Mi karah ka inzep a, kan innêk luih luih mai. Thawmhnaw dawr pakhatah lut zauhin tshirt grey ka lei a, ka ha nghal hmak. Lukhum hmathlawk chu lei lehin ka khum ta bawk a. Lukhum hnuai atang chuan ka hmuh phak chin chu ngunthluk fahrana melh kual lehin dawr chu ka chhuahsan ta a. Ka chhak deuh hleka cosmetic dawr kawtah tlangval sek lam pahnih mi che vel leh kal vel ngun taka thlir ka han hmuh chuan, min zui rutu an nih ka ring nghal. An lam pan chuan ka chho ve leh ngat a. Ka vanneih asiamin an ni chuan ka luhna dawr kawt bawr vel chauh chu an thlir a. Awlsam takin ka kal pel ta a. Ka thaw huai mai. Engvanga umzui nge ka nih? Eng nge ka tih a..eng thil pawi nge ka khawih..umzui ngai tur khawpin. Judy chauh lo chu min hrilh thei tur an awm lo. He hmeichhia hi ka la hrechiang khawp ang. Ding takin Sangtea in lam ka pan ta vang vang a. Min zuitu an awm tawh loin ka hria. In ka thlen chuan ka chau hluah hluah. Insanmar hahthlakzia hi aw. Ka inbual a, Sangtea a rawn haw ta bawk nen, eirawng kan bawl dun a. A thil lo hawn kan lem pah zeuh zeuh bawk. Tlemin ka zangkhai ve ta deuh e. Mahse, min mawlh runtu thil erawh a la awm lo thei lo thung. 

Sangtea chuan,"Kan mi bote chu an zawng tan dawn a niawm e. An thi nge an dam hriat a ni si lo va, an lainatawm e" a ti sur sur a. 

"Ni ngawt mai. A chhan hriat si loha han bo ngawt chu..pawisa an phut pawh a ni chuang si lo" ka ti ve mai a. 

"Chu chiah, Zo choka neitu chu a hausa a, rubo pawh nise ka la hrethiam deuh. Hmeichhe ho ber kha a ni an khawngaihthlak e" a ti nuah nuah a. Kei zawng kha lamah rilru ka la pe vak thei lo a ni e. Kar loah chaw ei kan peih a, kan ei nghal hmiah. Chaw ei titui tawk lek kan lem bawk a, kan chaw lak a tha dun kher mai. 

Lenpuiah min sawm leh a, ka tan a him tawh lo tih ka hriat avangin insiam ka duh chhuanlamin ka hnial leh a. "Ka lo haw har lo vang. Kan lem leh dawn nia.." A ti a. Kei pawn in belh ka tum rih lem lo. Ka hman vek vawk hnuah Rema ka call ta a. 

"Engtin nge Biteii ruang chu?" Ka ti satliah a. 

"A lo nam deuh tawh sia, tlaiah khan kan phum nghal..a zia lo khawp mai" a rawn ti a. 

"A thattu rinhlelh te an nei lo em ni?" Ka ti a. 

"Ka hre lo, Police lam chuan enquiry chu an rawn la a. A mi hmuhte ho an khawm phawt a niawm e. " a ti chuar chuar a. 

"Judy i hmu tawh em?" Ka ti ta daih a. A meng phawk leh hrû ang chu. 

"Aw..thingpuite pawh a lum ve, vawiinah khan" a rawn tih chuan ka thêp suai suai mai. A awmzia chu Dawra ka hmuh kha Judy tak tak a ni lo tih a chiang tlat a ni. Kha Judy lem kha tu tak ni ang maw? He thil inthup mak leh rapthlak ru tak hi hriatchian chákna hlirin khat mah ila; a hlauhawm dawn tih ka hriatchian em vangin fimkhur taka ka chet a ngai tih ka hre ve kur..Judy hnen atangin thudik hre phawt ila, hmalak dan tur a awm mai ang chu maw..

Biteii thih dan pawh chuan rilru a kap ve deuh tlat! A ruang chhar han nih tawp mai chu! A mak dangdai piah lamah a rapthlak riau! Engvanga thi tak ni ang maw. An inthen hman chu lehlam tak chuan a zia tak te pawh awmin a hria. La inthen lo se chuan a hawn te pawh a ngaih hmel si a. Sangtea a rawn haw a, rin aiin a lo haw hma. Kan han lem dun leh ta khalh khalh a. Tawng a nuam chho viau. Mahse, Call ka dawng a. Judy a ni. 

Pindanah ka lut vat a. 

"U Ngur" a rawn ti tiau a. A tap em mawni le..

"Eih ah" ka lo ti ve mai.

"I him tiraw?naktukah a rang thei ang berin lo haw ang che aw" a rawn ti a. Min biak dan chu min ngaizawng cheibawl riau. Ka pangchang ve ringawt lehnghal. 

"Aw lo haw dawn e" ka ti ve mai a. 

"A that chu..Biteii pawh phuba i lak hmain a thi ta sia. A lawmawm lamah ngai ang aw" a rawn ti ta a. Ka rilruah rinhlelhna a rawn lut thut! 

"Judy, Biteii kha nangman.." Ka tih rual rualin, "A teuh lo, ka that lo. Mahse, a thih chhan kha ka hre maithei" a rawn ti zawi raih a. Ka mur ur ur nia mawle! Mak takin mipa e ti loin hlauhnain min tuam ka ti mai. Ka tiril a khur titih ringawt. 

"Eng nge a thih chhan?" Ka ti a. 

"Ka chiang ngam lo va, ka sawi dawn lo" a ti hmak. Ka zawt zui tawh lem lo. 

"Inleng i nei na nge?" Ka ti satiah a. 

"Ka nei peih lo" a rawn ti vel..

"Ka lo hawnah ka rawn leng ang" ka ti a. A nui hak. A awmdan chu a mak riauin ka hria. 

Sangtea a rawn tlan lut a, "U Ngur, mi bo an awm leh tawh" a ti hlut a. Ka lo en kul ringawt .

"Zirsangliana a bo an ti leh tawh. Pa a nia, fa a la nei lo thung! A mak em mai a. Kei chu ka ti (tri) riau tawh a ni" a ti thur thur a. Judy chuan a lo dah daih tawh a lo nia. Kan zoram awmdan chu a mak chho tan ta hle mai a. Engvanga mi bo chu awm awm ta nge maw an nih chu le. Ni e, kan him ta lo khawp mai. 

Ka zing tho chu rimchhia ka inti. A thing rim hi englaimahin rimtui ngai hek lo le. Khaw vawt pawh sawi loin tui vawtin ka va inbual ta phur phur a, ka harh deuh hawk e. Chaw ka ei hman tawh dawn lo va, ka inbual zo chu insiam nghalin Sangtea pawh tiharh duh ta lo chuan ngawi rengin ka bungrua te nen ka chhuak ta a. Ka bawr angreng. Kan khaw lam pana kan hawn kawngah pawh ka tawng tam lo viau. Sawi tur em em ka hriat loh bakah Tualpui khaw mi leh sa vek an nia. Ka hmelhriat te chu awm tho mah se, ka be lumlam peih lo. Ka zawi nguai bawk si. Rema ka be lawk tawh a, bike-in min lo hruai dawn a ni. Tualpui kan thlen chuan khua a thim ruai tawh a. A vawt suk tawh bawk. Bal paw nuanin kan chhuk khu luih a,lu pawh a paw phuk hlawm mai. A khu thin bawk a ni. Rema chuan mi dawr kawtah min lo nghak ran tawh a. Peng khawmuang tawh loin kan khaw lam kan pan zui ta a. 

In ka thlen chuan dar 8 a pel hlek. Ka ril a tam tawh bawk a. Ka inbual sawk sawk a. Chaw ka ei zui nghal. Bal deuha chaw ei hi ka thiam thlawt lo. Ka thil hawn te chu ka nu te chuan an ching darh a. Amawii erawh kha chu Rema kutah ka dah diam tawh. Apeki a lawm leh ngang mai. A bengbeh chu a beh kual sek mai a, a nuam hranpa ve reng reng e. Ka pa pawh a lawm thiam ve khawp mai. Chaw ka ei khamah mut nan a la hma tho bawk a, ka chau te a lo zia ta bawk nen, Nu Chami in lam ka pan leh ta poh a. An lo kim thap mai. An lo in tawh a. Kei pawh chuan ka'n ve leh tháwr a. Mahse, ka in tam lo. Biteii chungchang kan sawi ho a. 

"A mak ka ti, a thihna hmun ber kher kha.. Ka rin danin a thih hnuah kham hnuaiah khan an paih a nih ka ring" Buanga chuan a ti bawrh bawrh a. 

"Tu ten nge hmu hmasa ber a" ka ti a. 

"Tualpui khaw thingzai tur an tiin ka hria. " Zaua chuan a lo ti vat a. 

"A eng laiah nge hliam a tawrh le. In hmu ve em?" Ka ti leh a. Ka dilchhut an ti em lovang chu maw..

Rema chuan,"A lu kha hmun hnihah a pawp an tia. Chuan, a nak dinglamah vihna hnuhma a awm an ti bawkin ka hria. A ring ruh pawh kha a tliak a nih ka ring, a ruang awmdan atang kha chuan" a lo ti chuar chuar a. 

"Tu thah tak ni ang maw..kan inbiak hnuhnun ber kha chuan Tualpuia a kal tur thu kha a sawi a. Tualpui atanga a rawn hawn hmain an that a ni mai lo'ng maw?" Zawh bik pawh nei lem loin ka ti a. 

"A niang, kan khuaah a awm lo a niang, ka hmu lo em mai. Kuhva ka lam pawn" Zaua chuan a lo ti ve vut a. Nu Chami chuan,"A pa kha a thinur khawp a, A thattu hi an man a nih ngat chuan na lua awm loin ka sawisa ang mawle te kha a ti tun tun a. A rilru natthlak ve khawp ang, a chhungte tan chuan" a lo ti ve siam siam a. 

In ka thlen rualin ka phone a ri zui zat. Judy a ni. 

"Aw" ka ti satliah a. 

."I rawn kal ka ring a" a ti nghat a. 

"Ngati nge?" Ka lo ti leh hû pek. A zei loh theih viau mai. 

"Aww i zin i lo haw sia" a ti ve mai a. 

"Ka bialnu chu nila ka lo kal mahna. I ni si lo va" ka tum loh deuhin ka ti a. A thaw hak. 

"Muttui le" a ti sap a. A dah daih. He nu ze mak zet hi hriatthiam a har fo dawn a nih hi a. Ka mutui kher mai. Mumang bo thak khawpin a ni ka muthilh ni. 

A tuk chu ka zin haw ve chauh a ni bawk a. Ka chawl ve rih. Kan in sak lai kha mitthi awm neuh neuh vang bakah kei ka zin ta daih sia, an lo chhunzawm bik lo. Chhunah hi chuan ina awm hi chuan reh thei vawng vawng tak a ni. Ka lenkhang sin lei chu ka endik hlawm a, fel taka hlumin ka dah tha a. Tih leh mai tur ka ván riau. Ka nu chu vawk chaw tur dawl lain a chhuak a, ka pa erawh a hnatlangin ka hria. 

Thutthlengah ka tlu zal mai mai a. Eng nge ka hriat pawh ka hre lo. Judy number ka hmet chhuak a, school an kal tih hre tho mah ila, ka va text ta tho. 

"Zaninah ka lo kal ang a, inleng lo nei suh aw. sawi dun tur a tam em mai" ka va ti a. Nizanah khan va lan kha chu rilruah a lang tho nain, a tlai laklawh bakah inleng a neih chuan engmah kan sawi thei dawn lo tih ka hria. 

"Aw le" tiin min rawn reply. A tawk tiu teu viau mai. Ka thiante pawh ka sawm lo vang. He thil mak danglam zet hi tlangzarh chi pawh va ni suh. 

Tumbu leh vawkaa rep ka vaipaden a, mau theiah ngei hian han sawh ila a háng duh bik. A rim pawh a tui chák chák viau e. Zanriah kan ei laiin ka phone a ri ral ral a. Phun nag nang chungin ka va la a, number ringawt a ni. 

"Hello" ka ti a. A reh vung vung mai. 

"Hello" ka ti leh a. Hah vanga thaw hluam hluam niawm tak ka hre zui nghal.

"Ih maw, U Judy kha venghim rawh. A siruk lain an lo...ahhhh…" phone chu a thi zui hmiah. Hmanhmawh zetin ka call leh a. A tlang lo chiang kher mai. Ka chaw ei chàkna a bo vek. Tu aw nge tih ka hre thei mai lo va, Azuii kha ka hrechhuak hmasa ber. A chungah eng nge thleng ta le? Engtin nge ka number a neih theih? Zawhna hlir zawhna hlir..chaw ei zawm tawh loin ka kham a. Ka nu te hmela zawhna lo lang pawh chu ngaihsak hman loin ka kekawr ka thlak sawk sawk a. "Ka chhuak lawk dawn" tih leh chhuah ka rual nghal. Judy in ka pan ding nghal a. Chaw ei hun lai a nih avangin khawlai a reh hle. A lo inkhar thap a, ka kik kauh kauh a. A aw ka hriat rualin ka lut nghal. Chaw a lo ei mek a. Min hmuh chuan a ding hluai a. Eng sawi set set loin a bulah ka va ding a. 

"Call mak tak ka dawng leh tawh. " ka ti sup a. 

"Tu nge?" A ti sap a. 

"Ka hre lo. Venghim tur chein min rawn ngen a ni" ka ti nghut a. A kham nghal. A kam a thuah zawhah thleng seng fel pahin, "Kawngka saw va kalh lawk mai teh. Mi dang an rawn lut palh ang" a ti a. Ka va kalh ve mai a. 

A intihfel zawh hma chu kan ngawi dun char char a ni mai. Thleng a sil zo chu a rawn phei a. "Hawh roomah" a ti leh sap a. Ka zui ve leh hmiah. A khumah chuan kan thu dun a. Chhuat lam a melh ran mai. 

."sawi la" ka ti sup a. 

A rawn hawi chhuak a. Hah hmel deuha thawk la halhin, "Saltang ang mai ka ni. Khawiah mah ka him tak tak thei lo a nih hi" a ti ta a. Ka lo melh reng ringawt. 

"Ka nu khan thlarau nen kan inkawm thin thu a sawi tiraw? Thla thara pasal ka neih tur thu te" a ti a. 

"Aw" ka ti nghut ringawt. 

"Thlarau chungchang kha chu a dik a. Pasal pawh a dik. Mahse, mi à ka ni lo. Thansangzeli i hre ngai em? Thlarau hmua be thei, thlarau pui thintu kha.." A ti ta duah a. Thansangzeli , Azeli tia koh kha chu a lar bawk a, ka hre ve. Thlarau a hmuin a be thei a, a pui thin. Tun hnaiah pasal a neih tak vang nge a thawm a reh ta rih a. 

."Aw hria. Chuan" ka ti a. 

"Ani leh keia thlarau hmuh dan erawh a inang hauh lo thung. U Ngur, nasa taka nghaisak leh tihduhdah niin, i thluak suksak tum thin ta se, nangmah kawm hlim turin thlarau ten rawn hual thin ta che se la..i hnar i ring em?" Tiin chiang zetin min rawn melh a. Ka lo melh háw ringawt. A thil sawi dan mak tak tak chuan min ti á mai dawn. 

"Sawi chiang teh. Nghaisakna i tawk em ni? Tu te atangin nge? Engkim chiang takin sawi la, inpuih dan a awm ngei ang" ka ti ta mawlh mawlh a. Ka tawng zawh rualin kawngka an rawn kik dat dat a. Kan ngawi hmak. Dina aw niawm tak hian, "Miss Judy, i muhil mi? I awm em?" A rawn ti lar lar a. 

Judy chu a ngawi reng. An beidawng ta nge an reh zui ve ta mai a. Khumah chuan vaipa thuta thuin a inkual ram a, a mitmengah chuan thil tam tak ka chhiar a ni. He Judy hi a rilru a buai takzet tih a lang reng mai. 

"Sawi zawm rawh" ka ti a.

"Mi te ngaihah chuan mi hausa leh fanu neihchhun duat rawn ka ni. A chhunga chengte tan lo chuan kan in khi vanram a ni. A chhunga chengte tan erawh damlai hremhmun a ni. Khi in atanga ruang chhuak tawh zat hi i hre kher lo vang. A pindan tinte khi fang la, mak tiin i thi dang thei hial ang. Ni e, thisena tuihal chhul atanga chhuak ka ni a. Ropuina leh thiltihtheihna pumhmawm duhtu, pawn lama mi fel leh inngaitlawm ber anga lang thiam, chhungril khàkna hlira khat, khawvel chunga rorel tum ni mai awma engkima a chungnung ber nih duh hmeichhe hrin ka ni hi khawvela mi vanduai ber ka nihna a ni. Kei aia vanduai lehchhawng pakhat a awm a. Amah avang khan rei tak hremhmunah khan tawrhna ka hmachhawn phah thin. Pa azawnga pa fel leh hmangaihnaa khat ka pa avang khian kan in kha ka chhuahsan thei tlat si lo va, a chhan chu lehpek awm thei lo khawpa nasain ka pa khi ka hmangaih a ni. Ani pawhin a theihna zawng zawng nen a fanu hi a hmangaih bawk. Mahse, ka pa chu pa vanduai ber a ni a. Ka nu a nei kha mi dang chuan vannei an tiin, a phu loh malsawmna tiin an sawi a. A ni hauh lo, ka pa khi piang nawn leh ta se, ka nu hlat thei ang berah a tlanbo duh ngei ang. 

I hriat angin kan hausa a ni. Ni e, sum leh pai ngah hi thlang chhuak dawn se, keini hi top 5-ah kan lang ngei ang. Minister leh Officer tam tak aiin kan hausa zawk. A chhan chu ka nu hi thisena eizawng a ni miau a! Ka nu hi chutiang mi a ni tih erawh a hnuaia hnathawk te leh keini a chenpui te chauhin kan hre thung. Chutiang khawpa inthup thei chu a ni. A eizawnna maw..aw ni e, mihring taksa bung hrang hrang hmangin mawle. A rapthlak i ti em? Ni e, ka nu tan erawh chithlum hmanga sumdawnna ang lek a ni thung. He sumdawnna rapthlak tak hi engtik atangin a tan tih erawh ka hre hauh lo. Nikhua ka hriat theih tirh atanga sumdawng a ni tawh miau a! A unaupa ka pu minister-na hmang tangkaiin an hmingchhe tur an chhilh bo zel a, ka pu pawh khi ka nu thawhpui rinawm tak a ni. Hetiang mihring hi Zoram hruaitu an ni a nia! Zoram chu han siamthat rual a ni lo. 

Aw i zawhna tur ka hrethiam. Mihring taksa bung hrang hranga sumdawnna chu engtin nge an kalpui i ti maithei. Mihring taksa bung engkim hi Pathianin duh taka a siam a ni bawk a, an lo tangkai thei khawp mai a lo nia. Mit te, beng te, thin leh lung bakah Kál te,. Ha thlengin mawle..mahse, rapthlak uchuak lutuk chu chung taksa bung hrang chu an damlai ngeia lak a ngai tlat a! Chu chu a ni nunrawnna dik tak chu. Mizorama doctor lar ber pawl pathum te hi ka nu hnuaia thawk an ni. An hausakpui bawk a, Mi tidam tura ngaih khan mi nunna an la thin. U Ngur, he thil ka sawi avang hian ka thih phah thei tih ka hria. Mahse, he lai hmun thlenga umzui ka nih tawh takah chuan thi daih mah ila pawi tihna ka nei tawh lo a nia. 

Biteii pawh kha maw..ka nu hnathawkte thah a nih kha. Khatin mak tiin meng phar vak suh, engvangin nge an thah mai loh ang? An tan tangkaina a nei tawh lo miau a. He khuaa ka rawn awm tirh phat atang khan enthlak ka ni tih ka hre daih tawh. Mahse, ka hmeh daih theih ka inrin vangin ka ngawi a. Ka kalpah a. Min enthla tura an rawih chu Tudang ni loin Biteii a ni. Thil hi i rin aiin a ril ang. Engvanga that ta mai nge an nih erawh rin ngaihna ka hriat loh vangin an tan a tangkai tawh loh vang a nih ka ring. 

I rin phak ngai loh tur thil pakhat a la awm a. Ka nu chuan ka thlarau hmuh theihna hman tangkai tumin mitthi kaihthawh theij a inbeisei a ni. Hehe, hei tak hi a ni ka kalbona chhan..Ka nu khi a thih hma loh chuan, Zoram khawvel hian hun rapthlak tak tak a la hmachhawn fo ang. " a chawl det a. Ngaihnawm leh rapthlak ka tih em vangin, "Sawi zawm rawh" ka ti leh nghut a. 

Min rawn melh ta veng veng a. Mak ka ti deuh. Chutah chuan a ni Judy dik tak ka hmachhawn tak ni. A hmaa ka hmachhawn thin hmeichhia kha chu mahni tawka inringtawk, induhtawk leh chak ve tawka inngai hmeichhe ngeng tak kha a ni thin. Mahse, tuna ka hmachhawn erawh hmeichhe khawngaihthlak em em, puih ngai ngawih ngawih, thlabar, hmun chêp taka dah luih, chhuah duh em em a ni. A mitmeng khawngaihthlak zet avang chuan lainatna hlirin ka khat a ni. Hei hi maw Miss Judy hringnun chu..ka pian tirh ata thilmak ber nia ka la hriat a ni e. A aia mak ka hriat ka ring tawh lo. Ka rin loh lamah min hruai kual nasa em a tin ni. 

A tawng leh mai loh vangin, "Chuan, i nu chuan engvangin nge a nghaisak ve che. A fanu i ni sia" ka ti ta a. 

"Engvangin nge min nghaisak loh ang? Amah dodal ngam awmchhun ka ni tlat alawm" a ti nghet charh a. Judy lem zawk, inringtawk zet kha a rawn lang leh tawh. Ngawi rengin ka lo ngaichang a. 

"Ni e, a sumdawn dan tenawm leh rapthlak tak ka hriat rual khan report tumin hma ka la a. Mahse, ka chezia atangin a lo man thiam nghal nge, min khung hrang nghal a. Khami rual khan Judy chu thlarau ten an tibuai thin tih thu a thang nghal. Nasa theihtawpa min vau leh thlemin min kawm a. Ka rilru ka sawhsawn duh si lo va. A tlangval khawi ten ka pawnlam lang thei ka taksa chu an nghaisak duk cher chur a, hmel a lawi pawh nei hleithei lo va ka awm thlengin. Mahse, ka rilru a danglam eih lo. Tihngaihna a hriat loh tawpah ka bialpa min thahsak a. Ka khauh deuh deuh si a. Ka u te lah a thluak a su vek tawh a, ka nu hawina lam chu an hawina a ni vek tawh zel a. Ka u te ngeiin min sawisak hnuah pawh ka rilru ka thlak theih tak si loah chuan he khawvela ka hmangaih ber ka pa a tawktarh ta a ni. 

Ka rilru ka thlak loh chuan ka pa chungah engkim a nghah tur thu, ka report a nih pawhin ka pa vekin mawhphurhna a lak tur thu a sawi ta a. Ka pa ngei lo kalin ka rilru thlak turin min ngen ta a. Ka pa a ni kher a! Engtin nge ka pal luih theih ang..ka pain ka nu chu a chhanchhuak ta a ni. Khatia min vehthlem chhung kha thla khat dawn a niawm e. Amah ka nu ngeiin min sawi dan ang ngeiin thlarau ho chuan min rawn be ta tak tak a! Ka hlau hauh lo. Ka bialpa ka hmuh zan phei chuan zan khuain ka tap..ani khan tu pawi mah a sawi ngai lo. Keimah vanga thi a nih kha. Ka nu ka huatna chu a nasa deuh deuh a. Ka sawi tawh ang khan Thansangzeli thlarau hmuh dan leh ka thlarau hmuh dan a inang lo ka tih tawh kha..kei chu hlauhlawpa min awmtirtu an ni fo a. A chhan chu ka nu khi setana fanu a ni miau a. Setana'n min tibuai turin thlarau sual ho a rawn tir thin. Mahse, beidawn leh huatna tawpkhawk pai chung chuan thinlung a lo sak duh khawp mai a. Kei pawn chung huai ho chu ngaiah ka nei chho a. Ka bialpa thlarau pawh kha tun hnua ka ngaihtuah hian amah tak tak a nih ka ring ta lo. 

Lapuii kha ka hmu tak tak asin. Mahse, Biteii chungchangah erawh dawt ka sawi. Biteii himna ka duh vanga amah kha puh mai ka ni e. Min dem thei ang. Ka nu hnuaia intulut tawh, an duh loh zawnga vawikhat lek pawh an awma nunna chán ka hriat tam tawh vangin Biteii nunna kha ka fimkhurpui a, Lapuii thattuah ka puh a nih kha. A tan chuan Jail a him ber miau a! Lapuii chanchin ka hre nual a, khamini khan Biteii te pawh an kal ve tho tih ka hriat vangin nangin hma i la ang a,Biteii chu ka nute khawih phak lohna hmunah i dah ka beisei a. Mahse, ka chhan hman ta lo a nih kha..Lapuii thattu hi kei pawn ka hre lo, U ngur…

Thlarauin min tihbuai tak zeuh zeuhah khan ka sawi tawh ang khan ka nu chuan doctor te sawipuiin, Mitdawivaih thiam te anga mihring thi tawh taksaa thlarau dah luha mi nunga chantir theih dan tur ruahmanna an siam chho a. Chutiang chu a hlawhtlin hlauh chuan Zoram khawvelah hian ka nu aia thiltithei an awm dawn lo tihna a ni. Setana lahin mal a sawm nasa si a. Mahse, chu an ruahmannaah chuan kei hi a fawng vuantu ka ni ve tlat! Engtik khawtikah mah ka thinlung an hneh dawn lo tih hriain ruahmanna dang nei lehin pasal min neihtir a tum leh ta a. Chu ka pasal tur atan chuan A doctor rinawm ber Dr. Sena a thlemthlu ta a. Dr. Sena fa hring turin min duh a ni. Chu lai tak erawh eng vang nge tih erawh ka hre bik lo. Ka nu hi Iluminati member a ni a, Secret society hi Mizoramah ngei pawh a mikhual tawh lo tih lo hria la. Zoram khawvela mi pangngai tak tak thenkhat hi secret society member an nih hi. I rin loh deuh deuh an ni ang. Chung zingah ka nu hi an Ambassador a nia..kan in chhungah kei chauh hi a hneh theih loh awmchhun ka ni. Kan awmpui te reng reng hi an pawlah a lalut thei zel a. Kan in atangin an chhuak leh tawh ngai lo bawk. An chhuah chuan mitthi niin, khawi hmunah emaw an ruang an chhar thin. Azuii kha..ni e, Azuii kha ka thian neihchhun a nih kha..mahse, tunah hian a thi mek maithei a ni" a tih mek laiin Kawngka a rawn ri leh dawt dawt a..kan inmelh rual thawt..

Ka chil ka lem khawlh a. Ani pawh a tîm dai mai. Kawngka chu an rawn chum bur bur a, thawh a tum a, ka chelh vat. Ka ding a, va hawn ka tum mek laiin Rinpuia zurui aw hian, "Miss Judy , rawn hawng teh.." A rawn ti ta a. Ka thaw huai mai. Hmela mai mai chu'h! Ka thu leh daih. Judy pawh a nui deuhin ka hria. Rinpuia beidawn hnu a thawm reh hnuah chuan, "Azuii chu?" Ka ti leh vat a. 

"Ka spy a ni thin a. Mahse, i va lan avang khan an hrechhuak ta a ni ngei ang.." a ti ban chhalh a. Ka lo ner sawk.

"Nangmah ang tak hmeichhia kha" ka ti leh vut a. 

"ka hre lo. Ka hmel anpui a siam chhuak tih ka hriat rual khan tum eng emaw tak a nei a nih ka ring nghal. Ka kalsan hnu lam hi engmah hriat ka nei tawh bik lo a ni. Tunah hian min rawn lak tumin ruahmanna an siam mek emaw khuaah pawh hian an awm reng tawh maithei..a chhan chu min…" a phone a rawn ri ta dût dût a. Ka lungphu a rang nghal. 

"Hello" a tih zawh rualin, hmeichhe aw hian,.."Mi â i ni..mi á tak i ni. " a rawn ti khalh khalh a. Judy mitmeng a lian kher mai. 

"Mi á ka ni lo.." A ti nghek a. A ding nghal bawk, ka chelh bet ve ringawt. 

"I thian neihchhun Azuii hrawk ka zai lohna chhan tur sawi rawh" Hmeichhe aw chuan a rawn ti leh a. 

"Ngura ka kutah a awm" tiin Judy chuan min rawn melh zawk a. Ka lo meng phar hle. 

"Engtikah nge?" Chu nu chuan a rawn ti leh a. A awmzia reng reng ka hrethiam ta lo. 

"Ka pa leh Azuii an him tih ka hriat hunah..tin, U Ngura hian engmah a la hre lo bawk. Nangin sawi tura min tih chin chauh ka sawi" Judy aw chu a khur hlek lo. A meng ling hlar bawk. 

"A tha e.. Tun tum chu ka tawlh leh ang. Lehpekah chuan khuaah khan ka rawn kal tawh ang. Asiruk lain" lehlam aw chu a chang mah mah a ni. 

"Aw le. Ka nu" Judy chuan a ti dam thlap a. A dah nghal. Mak ti zeta ka melh reng laiin a nui hak a. 

"Pawi ka ti khawp mai. Min hrethiam ang che. An kuta ka hlan che a ngai tlat mai" a ti vawt raih a..

(Naktukah ka zin dawn vangin story a awm dawn lo aw. Ka rawn regular vak thei tawh lo maithei. Offline class practice teaching kan kal tawh dawn a)