Judy 6

MISS JUDY (6)

Ziaktu: Toni Rälte

(Adds kha 😁

"Lo lut rawh. Eng nge ni ta?" Makti hmel lek leka min enin a ti sap a. An aw chenin zuk inang a mawle! Zám a hun lo tih hriain ka pen lut a. An in pawn lam ropuina kha chu nep tē a ni ringawt. An in chhung chu ka in luh tawhnaah chuan a la ropui ber awm e. Ropui tihah an chei chhuai pawh a ni chuang lo, simple siin engkim chu a dik thlarh a ni ber e. An in chhung rawng leh an painting tar zawng zawngte, an parda, sofa engkim chu a inchawih em em vek mai. Judy chenna a ni ang tih pawh rinthiam a harsa, ani kha chu a in chep leh thim rek rukah khan vuivai hlek loin a khawsa thei mai kha a ni si a. Thuthmun ka rem fel chiah tihin nula kei aia nau tur pawnfen chhing dum leh kamiz var ha, pheikhawk dum flat bun hian no tung ît ët hian tuisik min rawn pe nghal var a. An ina thawk paw'n uniform an nei a nih ngei dawn hi. An che western nge an che korean ka ti dawn. An nula lah chu hmuh a nuamin a nui sáng bawk si. Judy nu erawh a la tawng leh miah lo. Ngunthluk takin min en tih erawh ka hre ve kar mai. Thingtlang tlangval, khawpuia chuang chhuak khat ve tak ka ni a, ka che te chu a khawrin ka zei lo tet tut ngawt ang. Ka thawmhnaw hak lah an awmpuinu uniform ai pawn a man a tlawm zawk ang tih tur a ni. Mahse, mahni insitna chu paihboin ka kal chhan pawimawhziaah ka rilru chu ka nghat leh ta zawk a, ka thawl huai mai. 

Ka inpeih tih a hmu nge ni, "Tlangval, khai le, i lo kal chhan min hrilh tawh dawn em ni ang?" A ti dam thlap a. A mitmeng fiah zet chuan min melh kal bawk. Ka chil ka lem khawlh a. 

"He tah hian Judy a cheng thin em?" Ka ti ta tháwr a! A kang deuh awkin ka hria. Mahse, a insiamrem leh vat a. 

"Ani chu ka fanu a ni a." A ti sap a. Zawhna mitmengin min melh.

"Kan khuaah zirtirtuin a lo thawk a. Chuan, kei hi Ngurhmingliana ka ni e" ka ti hnuhnawh a. A ban rawn pharchhuakin,"Judy nu Pi Rinpuii ka ni e" a ti zangkhai vah a. Milian tam zawk hi biak an hrehawmin an intivei an ti cháwk a, Pi Rinpuii erawh milian nu nisiah chuan a hmel hmuh a hahdamthlakin a polite hlein ka hre ve tlat. Ka thu ken a pawimawh vangte pawh a ni mahna le. 

"Chuan, Judy chuan buaina a tawk em ni?" A ti ta a. 

Engmah zep a hun tawh lo tih hriain a bul atangin engkim chu a chin chhuakin ka hrilh fai ta leng a. Ka sawi zawh meuh chuan ka tui a hal aniang, tui chu ka in khawlh khawlh a. Pi Rinpuii erawh a kut chu fel taka suih thlapin a thu ngil auh a. A ngaihtuahna erawh a hmang a ni ang tih a rinthiam theih. 

"A lo kir leh hun hi kan nghak tawp mai a ni" a ti ta daih a! Ka rin loh lam daih a ni. 

"Eng nge a awmzia?! " ka ti hû a. 

"Ni e, a sawi ang khan in khuaa a thawh kha kan remti lo alawm. Hetah pawh kha hna aia sang hnathawh tur a nei , mahse, a duhthlanna a ring zawk a. Keini chu min chhuahsan ta a ni" a ti zawi raih a. A rilru a nat hmel hle. 

"Mahse, in fanu a ni alawm. " ka'n ti ngawt a. A nui hak a. 

"Ni e, kan fanu a ni. Mahse, kan fanu a nih hun kha a liam tawh a ni. A danglam tawh a, keini chu a tan engmah kan ni tawh lo a ni" a tih chuan ka lo hnual ve rawih mai. A chhan dik tak eng emaw chu a la awm tih erawh ka chiang. 

"Ka pi, min hrethiam la, a chungah eng nge thleng? Engkim hi ka hre duh a ni. Khawngaihin..a chhan chu ka nun nen pawh a inzawm tel ve tlat si a" ka ti ta phawng a. Mitmeng tak ranin min rawn melh zawk a. 

"Christy" tiin a au that a. Nula pakhat tui min rawn petu lo zawk, uniform ha ve tho hi a rawn lang nghal var a..

"Lunch kha lo peih hma ta che. Hei kan tlangval hi lo siamkep bawk la, ka roomah min rawn pe dawn nia..tirawh le, in chungah chho ang hmiang" tiin a ding a. Ka lo hawihai deuh. Mahse, ka ding ve zuk a, kan inzui chho ta a. An step pawh chu siam a hautak ngawt ang. Pi Rinpuii room niawm takah chuan kan lut a. Mahse, a pasal nen an room a ni lo a nih hmel. A zau over lo va, mahse, a thawveng tho mai. Chhak lama darthlalang chhah tak chu a hmet tawlh zal zal a, boruak a rawn nuam huai huai e. Pawn lam boruak dawng leh hmu thei chuan thuthmun kan rem leh te te a. Ka chhungrilah phurna mak takin min tuam a, ka phur sual loh hram erawh ka beisei. Kan thutfel hnu chuan,"Ka fanu chu a tha reng reng maw?" A ti dam diai a. Ka lo bu nghut. A luhai a tluk kha chu ka sawi ta lo law law mai. 

"Ka fanu chanchin ka hrilh hma chein inremsiamna neih ka duh a" a ti phawt a. Inhawng deuhin ka lo bu nghat a. A ngaih a tha ta nge, "Ngur, Judy kha hetah a inah hian min rawn hruai hawnsak leh theih chuan i lawmman atan tam lua a awm lo vang. Ka fanu hi min rawn dahkirsak la, i lei kan ba kumkhua ang.." A ti a. 

"Chu zawng ka tihtheih piahlam a ni tlat. Duhthlanna a nei a, puitling a ni bawk. " ka lo ti nghet churh a. 

"Mahse, he ta awm tur a ni alawm. Thil chu pangngai se, thla thar ni 10-a pasal nei tur a ni asin" a ti ta mai a. Phâwk zetin ka va melh a, a nui sáng mai. 

"Aw a dik alawm. A pasal tur pawh kum 4 zet a bialpa lo ni tawh a ni bawk. A bialpa, a chhungte kalsantir theitu thil rapthlak tak a chunga a lo thlen hma kha chuan fanu hlim ber leh kan chhungkaw hlimna a ni thin a..(a ngawi dat a, a hnuk a ulh a nih ka ring) ..mahse, vawi leh khatah thil chu a danglam ta thut a. A engkim chu a kalsan ta a nih hi.." A ti hul hak a. A hah hmel hle. Sawi tur ka hre si lo, amah chu ka melh reng ringawt. 

A thut dan siamrem lehin..

"Judy hi ka fanu neihchhun a ni a. A naupang ber a ni bawk. A u te pawh hian an duatin duat loh theih loh khawpa hmeichhe naupang duhawm a ni miau a. Tu pawi mah a sawi ngai lo va, thu a awihin, lehkha a thiam thei hle bawk. Vawi khat mah thutlukna pakhat a siam fuh lo tih loh hi chu kan thu a hnial ka hre ngai lo. Ni e, a duhawmin a hmelte kha a tha lutuk asin. Mahse, khang kan hlimna leh kan duhthusamte kha a rawn chhe ta buaih a. He thil hi ka damchhunga ka hriatthiam ngai loh tur thil a ni ta a nih hi. 

Ni khat chu a room- atanga rawn tlan chhuakin thlabar takin a rawn rak a. Kan ngaihven nghal thuau mai. Ani chuan khur zawih zawih chungin, " Thlarau ka hmu. Thlahrang a ni. Ka darthlalangah min lo en" a ti ta mai a. Ani a lehkha zir nasat vangin a taksa a chak lo deuh ang a, a hmuh sual a niang kan ti mai a. Kan han hnem liai liai a, a pangngai ve leh mai. Chumi hnu ni 3-na zanah zan laiah ring takin a rawn au leh ta a. In chungah mutna pindan hi a awm vek avangin a thawm chu kan hre lo thei lo. Kan tho nghal vek a. Ani chu room kawngka rawn hawngin chak zetin a rawn tlan chhuak a. A tap pur bawk. 

'Nu,ka bulah tu emaw a rawn mu ve a ni. Ani chuan min be bawk. Hmeichhia a nia" a ti a. A khurh nasat em vangin dawt muhlum ringawt chu a sawi kan ring ta lo va, a khum chu kan va en a. Engmah kan hmu chuang si lo. A pa chuan,"Naktukah Doctor kan hmu dawn nia. Naute, hahdam rawh le..i hmuhsual a ni maithei asin" a ti a. Ani lah a tang kawh ve tlat bawk si. 

A pindana mu ngam tawh lo chu kan roomah sofaah a mu ta a. Judy hi mi dawihzep a ni hauh lo, kum 13 lek a nih lai hian kan kawmthlang lawkah khuan inthahna a thleng a, chutah pawh chuan ruang kha chan darh a nih avangin a taksa bung hrang te kha an zawng a, Amah Judy hian kan huanah a ban lehlam hi a chhar a, hlau leh rap miah loin Police kutah a pe a ni. Mitthi hlaua kimki mi a ni lo va, a u te nen kan zinsan tum pawn in chungah amah chauhin a riak ngam. Chutiang taka huaisen chu a ni thin. Chuvang chuan khatia hlauhlawpa awmtirtu kha a hmuhsual leh a taksa chak loh vang mai mai a nih kan ring ta lo a ni. Tichuan, atukah a pa nen kei nen kan pathumin doctor chu kan va hmu ta a. Judy chuan a thil tawn chu engkim a sawi ta vek a. Doctor lah chuan kan fanu chu a lo ring zo lo nge, Vitamins bakah mut duhna te a chawh ta vel mai mai a. Kan beisei a pha lo kher mai. Mahse, Judy bulah a hnual zawnga sawi loin kan fuih a. Ani pawh insangmarin a pindanah pawh a riak leh ta ngat a ni. Khami hnu khan engmah a hlauhna emaw a thil tawn emaw a sawi ngai tak loh avangin engkim chu a fel taah ngaiin kan ngaih a tha ta a. A dam ta emaw kan lo tia, mahse, a lo ni awzawng si lo. Kan fanu duatlai chu kan rin loh leh beisei phak lohin thlarau te nen an lo inkawm thin a lo ni reng mai le..

Chu tak chu kan hriat chhuah meuh chuan thla khat lai a tling tawh. Kan hriat chhuah dan pawh a bialpa Mapuia hian a awmdanah a ngaihthat loh thu leh an inkar pawh a hlat sáwt thu te a sawi a. Keini hna leh sumdawnnaah kan lo buai ve si, kan fanu mize danglam chu chîk nachang kan lo hre vak lo nen..kan tlai tawh a ni. Ni e, a roomah a tawm tlawk tlawk reng a, chaw erawh kan bulah a ei hram. Biakin a rul tawkin min chhang a, a hma anga titi hona leh infiamna hun kha kan nei ngai ta lo. A chhan ka zawhin, 'Lehkha zir lamah ka insawrbing a' a ti mai zel a. A tirah chuan ka awih mai a, mahse, a lehkha lo zir tawh dante ka ngaihtuahin chutiang takin a bei ngawrh ngai lo tih ka chiang si. Mapuia lahin a ngaihthat loh thu a lo sawi ve chiah bawk nen..kan fanu chu hriatchian tumin kan veh ta a. A pindanah camera kan kam ru ta tawp mai. Kan inthiam lo ve thoin a chet vel dan hmuh ngaihna dang a awm miau si lo. 

Tichuan, a pindana a chet vel dan chu kan han hmu ta a le..mak kan ti kher mai. Judy pindanah chuan zan tin mai hian mi panga atanga sawm vel hi an thu thin a. Mahse,anmahni tak erawh an hmel a hmuh chian theih miah loh thung. Judy nen chuan inbiain an titi ho thin a. Judy chu a changa nuiin a changin a tap thin. A mut pawn hmeichhe pakhat hi a bulah a mu ve thin. Tu nge a nih hriat theih dan erawh a awm si lo. Rapthlak kan ti lutuk a, a pa nen phei chuan kan tap titih tawp mai. Doctor rintlak tak kan zawng a. Psychiatrist lar leh fing tak chu kan be ta a. Judy pawh chuan kan rin loh deuhin a lo hmu duh ve mai. Tichuan, an han inkawm ta a. Beiseina sang tak kan neih laiin Doctor chuan,"Keini lama kan tihtheih chu ka ti zo e. Amah hi Doctor thiamna atanga enkawl dam chi niin a lang lo. Hei hi a pianpui emaw a thilpek dawn emaw a ni thei tlat. Thlarau a be thei a, a kawm thei..thlarau tam takin a puihna an dil a, chutiang chinfelsak chu a tum bur mai a ni. A rilru ka sawhsawnsak thei lo. Pathian thu nen tangkawpa beih chi niin ka hria" a ti ta a. Kan va beidawng tak..

Doctor a hmuh hnu atang chuan ina tawm reng kha a chhuak ta fo a, thlarau ho buaina a chinfelsak niin a sawi thin. Keini chuan rapthlak ti deuhin kan lo ngaithla tawp mai zel. Hetiang hi ni lo se kan duh em em a ni. A bialpa lah a ngaihsak tawh loin, eng atanmah a ti tawh lo emaw tih mai turin a thlah fel hmak bawk si. Mapuia lahin a ngai zualin a rilru a na em em a. Mapuia nu leh kei hi best friend kan ni a, kan khawsak dinhmun pawh a inchen tawk viau. Innei ngei se kan duh vek. Kum khat dawn khatianga a khawsak hnuah khan vawi leh khatah a rawn danglam leh ta daih a. Thlarau hoin an tinsan tawh thute sawiin a nun pawh a danglam leh tan ta a ni. Mapuia nen pawh inzui lehin a hma ang chiah khan thil chu a kal leh ta a. Kan hlimin kan lo hrehawmna zawng zawngte pawh lak bo ang huai a ni ta. Judy chuan a pa sumdawnna te pawh khawihpui vein rilru puitling a pu chho tan a. Tibuaitu a nei ta rih lo. Tiang khan hmabak hlimawm tak kan nei leh thei ta a. Mahse, kumin kum tir atangin a sulhnu a chhui leh ta. 

Thlarau vakvai ho chuan an rawn bel leh tan ta a ni ngei ang. A awmdan a danglam chho leh ta a. A hma ai mahin a bawraw chho ta bawk. Kan khap leh thunun rual lohin a khawsa chho ta a. Kei phei chu tihtheih awm hek lo ka tap tawp zel mai a ni. A u te leh a pa erawh an la beidawng lo va, an la fuihin a zilhte pawh an han zilh mgawt zel a. A sáwt lo ngei mai. A pa mangang chuan a pate te bulah Shimla-a dah a titlu ta a. Mahse, chu thu a hriat veleh Judy chu a roomah inkhungin chaw ei tur takngial pawn a rawn chhuak ngai ta lo. kan mangang leh ta si. Tichuan, Shimlaa tirh chu kan thulh ta a. Hetih lai hian zirtirtu hna ruak kha a lo hre ve nge, A dil ve ta a. Engmah min rawn eih lo. A pu pawh a insawipuitir hek lo. A tling ve mai bawk a. Tah khan a nia a post kha a tirah amah dah a ni lo va, in khuaa awm kha a dil ta a ni. A pu hial a be ta a, a pu mak ti chuan keini min rawn bia a, Thingtlanga awm a duh tlatna chhan kan hrethiam si lo. Amah lahin engmah a sawi duh bawk si lo. A pu chu a ngen nasat em vangin, a pu power hmangin i ti mai ang. In khuaah chuan post a ni ta a. Keini erawh kan lung a awi ta lo. A thlarau kawm thin vanga kan lungawi lohna hrereng chunga min palzam ta viau chu a pa a lawm ta lo hle a. "A duh a, a cho a. A duhthlanna kal tur a nia. Ka kut ka sil e. Ka ngaihsak dawn lo" a ti ta hmiah mai. Kan in chhungah chuan pa ber thu chu thutawp a ni. Tuman kan hnialin kan dodal ngam lo. 

Nasa theihtawpa ka thlem hnuah pawh Judy chuan, "Ka awm a ngai. Ka kal ngei ang. " a ti bur si a. Kei pawh ka beidawng ta a ni. Kan pa chuan, "Tihian ngaihsak miah lo ila, nakinah inchhir hun a la nei em em ang. A duh angin awmtir phawt mai ang. " a ti a. A sawi angin engahmah kan ngaihsak ta lo reng a. A rawn kal hma lawkin Mapuia palai te hmel kan hmu ta bawk a. Amah Judy chuan,"Ka tan Mapuia chu a thi tawh" a ti hmiah mai a. Inneih lam chu a tih loh hmel khawp mai. A rawn that leh kum khat chhung khan Mapuia nen khan an inzuiin an inngeih viau bawk si, engmah thil awmzia kha ka hrethiam tawh lo. Mahse, kan pain ,"Pasal neiin thisen pal se a danglam mahna" tiin Mapuia palaite chu a lo hnar ta lo va. Kan inrem ta. Chungte chu a hre ve vek, engmah chu sawi lo mah se, neih a tum lo niin ka hria. Hnialna a nei lo va, a duh thu a sawi hek lo. A chhungkua leh Mapuia ngei pawh chu a khawvelah kan leng ve ta lo ni berin ka hria. Ka han sawi leh hram duh chu kha tia a bawraw leh takah khan mualpho zauh zauh chang a nei thin a. A chhuah ve changa han tluk mualpho te, biak a neih vanga mi â anga an ngaih changte..a tam mai. Chungte chuan rilru a tihrehawm zual a, Doctor pan leh kan sawi lahin, "Doctor te tihdam theih ka ni lo. Ka awm awmin min awmtir tawp mai r'u..ka tha mai ang" tih chu min hnem ve dan a ni mai. 

Tichuan, a duhthlanna umzuiin in khuaah khan a rawn kal ta a. Rawn kalpuitu kha a cousin a nih kha. Ani khan report a rawn pe thin. Kei chu a nu ka nih angin ka nem a, ka ngaihtuahna atangin a thi ngai lo. Rawn tawiawma a in luah rawn hmuh vete pawh ka chak. Mahse, a pa hi kan pal lui ngam si lo a ni. A u te pawh hian sawi lang lo mah se, an ngaihtuah tih ka hre ve reng. Beiseina kan la nei a. Engtikah emaw Judy hi dam takin a rawn let leh ang tih hi. Mapuia tak pawh a khawngaihthlak, an inneih hun lah a hnai tawh si. Amah Judy lah hian a rawn zaiin a rawn ngaihven zui eih si lo. Thulh mai tur em mawni kan ti tawh,.mahse, Mapuia te lam hian min zah emaw an inthlahrun vang zawk nge , a hun thlen dawnah eng kan an loh chuan kan thulh mai a niang chu an ti a. A zah pawh a zahthlak. A thu hmu miah loin thil kan lo ti ve tawp tawp bawk nen..engtia han tih zel tur nge ka hrethiam ta hauh lo mai.." 

Pi Rinpuii thusawi chhung chuan thawk pawh thaw tham loin ka lo inhumruh a niang, a sawi zawh meuh chuan ka thaw hawk a, ka inthlahdul huai huai mai. Judy hrep chu aw. A mak hle mai a. Chutihrualin dawt engmah ka bulah a sawi lo tih ka hriatna chuan eng emaw ti zawng chuan min hneh riau lawi a! Kan khuaa a lo thawh chhan chu Lapuii vangah lo ngai ta ila, Lapuii thihna kha chinfel a nih hunah kan khua a chhuahsan leh mai dawn nge..engtin tak ni ang maw?

"A mak hle mai" ka ti sup a. An nula kha rawn lutin eitur a rawn dah a. Juice chu ka lo in nghal hmiah. A tui em em lehnghal. Pi Rinpuii chuan,"I bialnu thihna chu chingfel u la, ka fanu pawh a rawn haw leh maithei asin" a ti a. Ka ngaihtuah ang chiah a ngaihtuah chu mak pawh ka ti lo. 

"Mahse, Lapuii chungchang hi keia chinfel tur niin ka hre lo. A chhungte an la dam a, hma an lak loh chuan tihtheih ka neiin ka hre lo" ka ti a. 

"A ni ngawt mai. I lo kal hi ka lawm hrim hrim e. Ka fanu chanchin hre leh theia ka awm hi ka lawm. A tha tih tal hriat pawh a hahdamthlak a ni" a ti duah a. Mak ti angreng takin,"Biak pawh in inbe ngai miah lo em ni?" Ka ti hû a. 

A bu nghat a. "In khuaa a lo kal dawn khan a number a thlak a, tuman a number chu kan hre lo, a thiante zingah hria chu an awm maithei. A pa hian zawh vel kha kan chhungkaw thuruk an hre dawn sia tiin a duh lo va. Kan inbe pawp ngai lo a ni" a ti ta a. Judy chuan a timak ka ti viau mai. A chhungte tanna hi kei chuan dik ka ti. Thlarau vanga a buaina pawh thuhran, fanu neihchhun an duat rawn, thingtlang kilkhawra rawn awm ngawt kha a chhungte tan chuan lungawithlak loh ve tak tur a ni reng a ni. Mahse, lehlamah fanu te duh dan chu hnial luih tlat pawh a ni ber lo tih erawh ka hre tho. Judy pa hi pa eng emaw ve tak a nih ka ring. A nu hi chu a felin a hawihhawm a, a nel pawh a nelawm. Kan thil ei chu a tui ngei mai. Zingah khan chaw kaw puar ka ei vak lo nen, puar peng pawngin ka han ei ta chu ka mut te pawh a chhuak lek lek e. 

Engkim ka hrechiang ta bawkin ka hria a. Hawn mai ka hnaih ta a. Judy nu chuan,"Khawngaihin lo titipui leh la, he lamah englai pawhin kan lo welcome reng tih hi min lo hriatsak hram rawh aw" a ti seuh seuh reng a. Ka theihtawp ka chhuah tur thu ka sawi ve tak ngawt kha. Eng vak ka an erawh ka ring lem lo. 

An in atanga ka chhuak, kawngpui ka thleng chiah tihin , ka sir atangin, "Ka pu" aw tham chhil chhel hian a rawn ti sap a. Ka hawi rang hle. Ka luh tirha tuisik min rawn petu kha a lo nia. A uniform erawh a ha tawh lo. Kekawr dum tight lam hain, kawr buang a ha a. A chhe hran miah lo. 

"Nangmah i ni maw? Eng nge ni ta?" Ka lo ti var a. A hawi zak zak a, hlauhthawn leh venthawn a nei niin ka hria. A mitmeng lah chu a'n ti (tri) em em khawp a! Ka banah min pawt a, chak zeta min kalpuiin dawr lian lem lo bula in hnuai pan thlakna tur niawm tak stepah chuan min chhukpui a. In hnuai chu a lo ruak hiai a, bang pawh a awm lo. Bungraw eng emaw chhe tawh lam hi a lo inhung dul mai. Ka hawi vak vak ringawt. 

"Ih, he lai hi a him ang. Ih maw, U Judy chungchang kha a nia. Ka pi khan sawi kha dawt vek a nih kha,ka lo ngaithla ru vek alawm " a ti ta bawrh bawrh a. Mak ka ti nasa. 

"Eng nge a awmzia?" Ka ti tuar a. Ka hmui a rawn hup vat. 

"Tawng ring suh, min enthla emaw min zui ru a nih chuan kei chu thi sa ka ni mai. Ih maw, U Judy kha rawn hawntir miah suh. I hrethiam em? In khuaah khan awmtir reng rawh. " a ti leh mawlh mawlh a. A hawi kual zak zak bawk si. Ka bangbo ngawih ngawih. He nu hian ka rilru thawveng huai tawh kha a rawn tirit leh vek tawh. 

"Sawi chiang rawh. Ka bo vek " ka ti thawt a. 

A phone a ri ta si, a zuk en a, thlabar hmel angreng tak hian, "Hei min ko. Ka kal a ngai, ka sawi ang khan a ni mai. U judy kha venghim rawh, a nu sawi ang kha a ni lo. A nu thusawi kha ring suh. Khatiang thil kha engmah a thleng lo. Saw in chhung saw U Judy tan hremhmun a ni..a tan a him lo. Rawn hawtir lo la a tha a ni mai. Ka kal" tiin chhoh mai a tum a. Ka pawt leng lawp, "I number min pe rawh" ka ti hráwk a. 

"Ka thei lo. Ka thih i duh loh chuan min hmu tawh suh." A ti sap a. Chelh hman rual lohin a tlan chho daih. Kei chu a ngaihna hre lo zetin ka ding khawng reng mai. A va mak mai mai em..eng nge maw ka chunga thleng hi le?! Ka va hrilhhai tehlul em..

Tho lo zetin Sangtea in lam ka pan chhat chhat a. Ka ngaihtuahna buaizia chu sawi chhuak dawn pawh ni ila ka sawi chhuak thiam chuangin ka ring lo. Sangtea chu a lo haw tawh a. Min lo be suam suam naa, a sawi pawh ka hre mumal lo. Ka zia chu mak a ti deuh nge, "U Ngur, i tha maw? I va ngui ve" a ti ta chiah a. Insiamrem vatin,"Ka chau deuh a niang. Ka mamawh lam tur ber lah kha a lo la thleng lo va. Naktukah ka haw ang" ka ti ta daih a. 

"Haw hma i va tum ve..tunkar chu cham ve la" a ti nuah nuah a. Ka chhang tawh lo. Kha nula thusawi zawng zawng khan ka rilru a khawi lai hmun pawh a luah a ni. A hlauhthawnzia te, a hawi nasatzia te kha. Hlauh a nei a, mahse, Judy chungchang kha min hrilh ngei a duh si niin a lang. A number tal kha min pe se tihdan a awm tur. Engtin nge ka hmuh leh theih ang? Engtin chiah nge Judy chanchin dik tak chu ka hriat theih tak ang..huiham..ka inrawlh lohna turah ka inrawlh ta mai em ni ang? Lapuii hming hi lam rik ni ve kher lo se chuan he thil hian min tibuai miah lo tur..awmze awm miah lovin ka thinte chu a ur hlur a. Tihlan vak lah a rem si lo. Sangtea hriat lohin ka hui leh pap thin. Chaw pawh tihtham ka ei lehpek ta lo. Sangtea chuan a bialnu rimpuiah min sawm tak naa, ka phur lo angreng sia, ka zui ta lo mai. Ka nute nen kan inbe zuai a, Biteii pawh a reh hmak mai. Va biak tumna erawh ka nei hran lo. 

Judy ka call ta a. 

"Aw U ngur" a rawn ti dam thlap a.

"In inah ka kal a. Vawiinah" ka ti nghal táwng mai. 

A thaw hak a, "Chuan" a ti sap a.

"In lo hausa hle mai. I nu pawh a fel takzet a ni" ka ti duah a. Ka sawi duh tak sawi turin ka tîm ru tlat mai si. 

"A dik ang. Tikhan min la ringhlel fo em ni?" A ti sak a. 

"Lapuii i hmu leh tawh em?" Ka ti ta daih a.

"Hmu miah lo" a ti ve mai a. 

"Chah duhte min nei lo em ni? I chhungte chu" ka ti leh a. Kal leh ka tum pawh a ni hran lo. Ka sawi ve mai mai. 

"Nei hran lo, an dam that chuan a tawk mai. Ka pa a tha em?" A ti a. A pa ka hmuh loh thu ka sawi chuan ka ngaihbel nge a thaw lak a ring zualin ka hria. 

"Thilmak tak erawh a awm" ka ti ta a. Ka inhumruh nasa angreng.

"Eng" a ti vat a.

"In awmpui nula pakhat zawkin eng emaw min hrilh a. Mahse, hlauhthawnna tam tak a nei a ni" ka ti a. 

"Christy maw..nge Azuii" a ti há a.

"Azuii a nih hmel. " ka ti nghut a.

"Eng thil nge a hrilh che?" A hriat chak hmel vak pawn ka hre lo e a.

"Tlemte nisi, tam tak ni bawk si" ka ti kual a. 

"I kal thlawn ang tih ka hlau hle mai. Ka nu sawi kha thudik vek a ni. Azuii kha chu ngaipawimawh suh, mi pangngai phak lo a nia" a rawn ti duah a. 

"Ka awih hlek lo mai" ka ti hmuk. A tawng leh hmain,"I nu thusawi pawh i hria em ni? Engvangin nge thudik tak a sawi i rawn tih ngawt?" Ka ti leh vat a. 

A dang titih nge, "U Ngur, inleng ka nei tlat. Nih aw " tiin a dah daih. Phone chu ka melh run run a, buaina bawk. Hmm..rilru ka siam ta a, Judy chungchangah hian engahmah ka inrawlh tawh lo vang tiin. Ka mawhphurhna a ni lo va, Lapuii vang chauha hetia ti hi ka ni. Lapuii chungchang a sawi leh a nih pawhin ka bengkhawn tawh lo vang. Ni mai mai teh se. Tlangvala pumpa ka bialnu pawh ni hlei lo buaipui chu tlawmah ka la tlat! Tin, Ngurhmingliana'n hetiang a buaipui ngai lo. A tul lo. 

Mut hmunah intihthawven nan phone ka khawih ve mai mai a. News groupa ka luh chuan, Hmeichhe pathum bo thu chu ka zuk chhiar fuh ta a. Chiang zawkin ka chhiar ta a. Ka ngaihtuahna a hruai kual ta deuh a. Chung hmeichhiate chu - D'rose Zochhuanawmi, Lalrinsangi (Arini) leh Hmangaihzuali (Nauteii) te an ni a. Arini hi chu hmana tualthah vanga jail tang tawh kha a nih thu an sawi tel zauh bawk. A dang pahnihte chu ka la hre ngai lem lo. An thlalak an rawn dah tel a, Drose chu a nu zêm lem lo naa, a duhawm riau. Arini erawh a zahawmin a nu hnûp thung, Nauteii an tih erawh tleirawl la át hmel rual lek, cute deuh mai a ni thung. An chhungte tan chuan an va uiawmin an va mangang dawn tehlul em. Heng hmeichhe bo te case la tur hian team din niin team leader chu Amanda a nih thu leh a hnuai chiahah Hman deuha Isabella case chingfeltu Imanuel Lalremruata an ni a. An that hmel dawn viau e. Hmu mawlh teh se, a rual deuhthawa hmeichhe pathum bo ringawt chu mak ka ti ve viau. He khawpui hi a him ta lo viau a ni awm mai mang e. Chutihrualin hel pawl an rawn din takah hian zoram hmel chu nasa takin a danglam ve bawk nen, an ding hi mi rethei leh an chanvo hmu thei lo te tan a lawmawm rualin thihna leh inrukbona a tinasa zual em ka hrethiam chiah lo. Comment pawh ka chhiar chhuak vek a, a tam zawk comment chu- "Hel ho thiltih ni loin anmahni behchhana tu te emaw remruatna, hel ho tihchhiat duhna rilru atanga lo chhuak a nih hmel" tih a ni. An ngaihdan tawmpuia tawmpui loh dan pawh ka hrethiam vak lo. A dik a dik chuan kan awmna a pilril em a, hetiang lam hi kan ngaihven vak lo. Kan nun a la him a, chutihrualin sawrkar inrelbawlna fuh lo leh pachhiatzia erawh kan sawi ve fo tho. Kan thu leh hla hian awmzia nei pha ve mawlh hek lo le..Sangtea a rawn haw a, "U Ngur, news a awm leh tawh kha. I hre tawh em?" A rawn ti lut a. 

"Hre nang, eng nge?" Ka lo ti vat a. 

"Zo Choka neitupa Rosangpuia kha a bo ve leh tawh" a ti ta mai a. Zo choka chu kan lo mang hriat ve rei ruai, a chhan chu a lar em a. A dawr bula thlala thei ringawt pawh thingtlangah chuan ngaihsan an la ni. A dawra chawl phak erawh kan la awm lo a nih hmel. 

"A va mak awm ve aw. Ti nge an bo mawlh mawlh le?" Ka ti ringawt a. 

"Ka hre lo, ani hi chu hel ho ruk a nih ka ring lo. Sawrkar lam hian mi tu emaw ruaiin an rukbotir a nihte ka ring rum rum. Sawrkar rorelna huaa dodal tlat reng kha a ni ve a" a ti mawlh mawlh a. Kei aiin a hre tam. 

"Hmu vat teh se" ka'n ti ngawt a. (He mi case hi zawng Inferno lamah aw 🥰

Ka muthilh lai ka hre miah lo. Ka harh chuan khua a lo eng uar tawh. Ka mutui lutuk chu ka awih lo hial zawk. Vawiin lama hawn ka tum ve kha a ni sia, ticket pawh ka la si lo. Bakah min tlansan daih tawh. A va ho tak. Ka buai belebut vangin khalam kha ka lo ngaihtuah chang meuh lo a ni e. Chutia ka hawn loh rau rau chuan tiin bazar paha Lateii va hmuh ka rilruk a. Tin, nizan lamah bansan turin thutlukna siam mah ila; chhunglama min nawr et et tu a awm miau avangin,Judy te in hnaih velah pawh va tamtala an awmpuinu kha hmuh fuh hram dan zawn ka tum bawk. 

"Tlaiah vawksa ka rawn lei haw ang. Ka hawnsan tawh dawn che sia, zanin tlai chu ka'n show sak ang che" ka ti a. A lawm hmel viau. An hlawh a beitham ve si a, sa pawh a hmeh zing falua dawn lo tih ka hre ve kur. 

"Thil ka lo hawn ve thung ang" a ti sup a. Kan inman viau e. Thiante hawnsak pawh ka duh viau mai. Amawii an ti em mawni kha.. Kha ngei kha hawnsak ve renh reng ka duh. Sangtea chu pawisa ka pe a, kan thian inkimin um 4 ka chah tak kha. A to lem lo bawk a, mahse, a man zat hi chu ka sawi to deuh ang, an ngaihsan ve hrim hrim nan. 

Inchei lem loin ka chhuak a. Aizawl khawpuiah hi chuan engtin pawn chhuak ila kan thing ber thei lo va, kan nalh ber thei chuang lo. A ho mai mai. Lateii chu ka biak lawk tawh vangin min lo nghak dawn a. Eitur min chah nual avangin ka lei leh te te a, an hostelah chuan ka va kal a. An inleng kawmnaah chuan kan thu dun a. A titi leh hlut mai, a tawng duh ve barh barh a. Apeki chungchang min zawt leh hrep bawk. Hruaii thih zana a hlauhzia te a sawi kai a, A dawih ve bawk si. A thiannu niawm tak class kal tur hi a rawn thu ve zuai a, min en duh lutuk chu nuam lo ka ti. A kal hnuah, "Ti nge min va en nasa em em? dik lohna ka nei mi?" Ka ti vat a. A nui hawk hawk. 

"Teuh lo, a star che nih kha. I thlalak hi ka thiante zingah a lar alawm. Kan pahniha kan lak dunna dp-a ka hmanin an rawn ngaihven nghal..an hahthlak a nia..i chanchin min zawt reng zel.." A ti sar sar a. Dawnsawn nuam lo lutuk a nih hran loh chu..hehe..

"Biteii nen kan inzui ve zuai kha i hria em?" Ka ti thut a. A nui tawp chiang kher mai. No lo zeta min melhin,"Awii u Biteii ber kher.. A nasa an tih kha..i van duh mak zawk" a ti hluai a. Ka nui suk ringawt. Kan inthen tawh tih erawh ka hrilh hram. A thaw leh ta huai a. 

"U, ka thiannu Makimi nen hian ni r'u, awii a hmelthat chu thuhran, a zia hi ka duh tawp. Zuk leh hmuam pawh a ti lo ania aw. A star ve tawp che a" a ti leh siam siam a. 

"Chutiang a ho..kal mai ka duh. Bazar veleh te ka duh sia" ka ti a. Ka zia a hrechiang tawh a, min hnial lem lo. Apeki tana a thinsak 2nd hand kawr leh kekawr min thawn leh nual. A va ngaihtuah thin tak. 

"Pawisa i la ngah em?" Ka ti a. Inthlahrung deuh si hian, "Ngah vak lo" a ti zawi sap a. A nui rah rah bawk. A duh ka hria, ka wallet phawrhin ka pe a. "I duh zat la rawh" ka ti a. 

"Naa..nang chu tian i ti ziah, lak teuh dawna inthlahrunawm siin..i phal zat min pe mai rawh" a ti nar nar a. Nui hawk hawk chungin cheng 500 tlang pali chu ka pe ta a. Ka ngah vak tawh bik lo nen, bakah thla a tawp hnai tawh tho a. Kan thawn leh dawn tho. Min kuah chuk chuk a, "U felberpa,i va hmeltha tak" a ti leh chiam chiam e. Ninawm, hmeichheho hi chu..ka kalsan ta a. 

Ka bazar zui a. Bazar tihah lei tur em em ka hre lehpek lo. Apeki'n min chah nasat em vangin bengbeh hmehbeh ang kha pathum lai ka lei ve a. Ka nu puan pheikhawk tur ka lei a, ka pa hi hawn ve ngei ka duh sia, ka van hrethiam lo. Eee! Ni e, sneker an sale chu haiin a duh tur tak ka hmu a. Ka lei hmak. Kei chu engmah mamawhin ka inhre lem lo. Ka thiante lah zu ka hawn dawn bawk si. Mahse, Aizawl vea engmah inlei loh chu tiin tshirt dum leh lenkhang sin ka lei ve ta hram. Ka thil lei ho chuan ka ruckshack an hnawhpuar ûl a. Hetiang inak puar luaha vei kual chhen chu tiin Sangtea inah ka haw phawt a, hawn pahin vawksa rep tul hnih ka lei bawk. Ka bag leh chawhmeh chu dahin zangkhai takin ka chhuak leh ta a. Dar 2 a pel tawh a. Ka hmanhmawh em em lo. Ticket ka la fel tawh bawk. 

Judy te in bawr velah chuan ka tei kual a, an in ka va pawh duh chiah tawh bawk si lo. Ka táp reng chuan tu ten emaw min rinhlelh ka hlau ve tho bawk si. Azuii a tih lah kha a hmel a rawn lang thei reng reng bawk si lo. Dawr lian vak lo eichawp dawrah chuan ka lut ta ráwih a. Nu upa lam, ama tawka inhnawih nasa ve deuh hian a lo nghak a. Zahzelah kuhva leh sikret ka lam a. "Ka pi, ka'n thu lawk aw. A pawi em?" Ka ti a.

"Pawi lah lo ve. Thu rawh thu rawh" a ti var a. 

A biak tlak dawn riauin ka hre ta a. Kuhva eiin sikret ka tan nghal a, "Ka pi, Khu lai in lian deuh khu Judy te in a ni em?" ka ti ta hmiah a. 

"Aw ni e, i hria mi!" A lo ti ve mai a. 

"Kan khaw middle schoolah a rawn thawk alawm..a fel ngawt mai" ka ti luam a. 

A khi sak a, "Mali ka ti mai zel a, Kei chuan..mali hi zawng fel reuh tak a ni. A hmeltha bawk si, A putea minister a ni chungin thingtlangah te a thawk duh a nia" a ti ve luam a. 

"Nula pangngai tiraw a la nih? Nuthlawi an ti deuhte khan ka hria a" ka ti a. Ka îp deuh. 

"A teuh lo, Nula hnahkhat ngat a ni e. Marawhchu, thawk khat lai khan a bialpa a boral hlauh mai a! A át phah teuh asin aw." A ti ta mai a! Ka ding hluai lo chauh! Judy nu thusawi nen a inkalh ta chiah e. 

"Ehe! A va zia lo em..mahse, thla lehah pasal a nei dawn emaw ka tia" ka ti a. Min rawn melh káwk a, a hmel a thim deuh mákin ka hria. A lung ka tiawi ta lo emaw ka ti hman a. Mahse, "Nei dawn lo. A nei lo vang. Kan rin dan chuan neih a duh loh vangin Thingtlangah a thawk taah kan ngai asin. A chhan chu a pasal tura an tih hi putar a nia" a ti zawi ta sep sep a. Thil a mak chho ta zel mai a! Kei hi ka inrawlh thuk ta mah mah dawn chu a va ang em...dawrtu a neih tak vangin kei pawn hriat belh duh tawh lovin ka chhuahsan ta a. Bus ka chan lai chuan ka phone a rawn ri a. 

Buanga a ni. 

"Aw..Ka Valbuangpui' ka ti uang a. 

" Biteii ruang an chhar kha i hre tawh em?" A rawn tih chuan ka dinna chu a nghet ta lo nge ka che hrut mai.

"Engtin" ka ti hluai a. 

"Tualpui leh kan khaw inri-na thlanga kham hnuaiah khan an hmu..nimin vela thi a nih hmel" a ti awlsam puat a.

"Lalbuang, fiamthu a ni lo tiraw?" Ka ti leh ngat.

"Ni lo. Tu thah tak ni ang maw?! Chuan mak deuh bawk chu.." A tih mek laiin ka hma zawna rawn phei mekte ka va hmuh chuan Lalbuanga thusawi ka hrechang tawh lo. Ka melh ta tlawk tlawk a…!

(Silipar ka sawi tawh dawn lo. Jumper nalh deuh min lo zawrh teh u. Black / yellow/ red a eng emaw ber aw 😒😑