Judy 5

MISS JUDY (5)

Ziaktu: Toni Rálte

"Eng nge thleng?" ka ti sup a. Min pawt a, thutthleng seiah chuan kan thu dun ta a. Chhuat lam melh lehin a rilru a kawm nge mawni dawn ni a ngawi vang vang mai. Ka dawhthei lo tep tihin, "U Ngur, engkim ka hria a ni" a ti sap a. 

"Eng chu" ka ti vat. Min rawn melh ralh a,"He ta ka lo kal hma hian ka hre vek tawh. Nang ka hriat hma chein Lapuii ka hre tawh" a ti leh nghat nghat a. Mak ka va ti si èm. 

"Eng nge a awmzia?" Ka ti nghut a. Thawk a la hawk a. Fel áta thuin,"Mak i tih viau pawn zawhna nei rih suh aw. Ka chanchin dik tak hi sawi a hun tain ka hria. Ni e, U Ngur, in khuaa ka lo awm hian chhan a nei asin. Ka putea hi Health Minister a ni a, a duh phawt chuan khawpuiah min dah thei. Mahse, heta ka awm hi a tul tlat si a ni. Ka chhungte ngei pawn ka awmdan hi an hrethiam lo. Veng chhunga mi hausa pawla an sawi chhungkua kan ni. Thingtlang kil khawr taka ka rawn thawk hi veng chhung mite mak tih a tling hial a. Ka chhungte ngei pawn min dodalin, min thlah tur takngial pawhin an rawn kal lo a nih kha. Ka nau ka tih kha a nihna takah chuan ka ni fanu a nia. Min lainata ka rilru hrethiam awmchhun a ni. 

Aw le, A bul rat atangin ka'n sawi mai ang e. Kan chhungkua hi panga lek kan ni a. Ka nu leh pa leh ka u te pahnih, mipa ve ve kan khawsa a. Hmeichhe awmchhun ka nih vang leh naupangber ka nih avangin duat rawn ka ni. Engkimah ka tan a tha ber tihsak ka ni thin. Kum 2 liamtaah khan nangmah ang bawkin ka bialpa, ka hmangaih leh ka duh em em chuan accident vangin min lo boralsan ve tawh tho a! Khata tang khan ngaihzawng ka nei leh ta lo, mi dang tan chuan mi á ang mai ka ni a. Ka khawsak dan pawh a bawraw viau. Mahse, kei chuan bawraw ka inti phal lo thung. Khatia ka mumal loh chhoh tak atang khan ka bialpa nen mang ramah kan inkawm thin a. Chuvanga mipa dang pawh ngaihsak thei lo ka ni. Tichuan, kum khat liamta atang khan Lapuii kha mang ramah ka hmu ta zauh zauh a. Mangang taka puitu a zawng lai ka hmu thin. Eng lai pawhin a taksa leh thawmhnaw a huh chuap zel avangin tuia tla a nih ka ring ve tawp mai. Min be ngai miah lo thung. A rei a, ka hmu zing ta tulh tulh a. Zan khat chu nasa takin ruah a sur a. Ka khum bulah ngei Lapuii chu huh hluamin a lo ding ta mai a. Ka mumang a ni hauh lo. Chutah chuan a tawng chhuak ta a. 

"Zopui khua ka ni a. Dik lo taka thah ka ni. Tuiah khan namthlak ka ni a, mi zawng zawngin chesual angin min ngai a. Ka bialpa, ka pasal ni mai tur pawn namthlak ka ni tih a hre hauh lo. Chu chu hriattir ka duh a, mahse, a kiangah ka kalin ka inlan thei si lo. Nang chauhin min hrilhsak thei a ni" tiin. Mak ka ti em em a. Chu aia mah lehzual chu zirtirtu hna ka dil kha Zopui khuaah post ka ni ta kha a ni. Lapui'n min biak atanga thla khatnaah chiah result kha ka hria a ni. Ka chhungte an lungawi lo va, Khawpuia awmtir min duh vangin biak ngaiho min biaksak a. Mahse, kei chuan heta rawn awm hi ka duh ta tlat si. Ka chungah te an thinrim thul! Mahse, ka tuang ka tichhah ve tlat si! Bakah dik tak chuan khawpui nun hi ka ning a; Thingtlang reh raiha khawsaka zalen taka awm chu ka thlahlel a ni. Ka chhungte lungawi vak lo chung chu ka rawn awm ta a. Ka rawn awm atangin zanin kha Lapuii'n min rawn hmuh leh hmasak berna a ni e. Thudik hre turin a duh che a ni. Tichuan, a chawl hahdam thei tawh ngei ang. "a sawi chhung chuan thawk pawh ka thaw tha ngam lo tihtheih a ni. Mak ka ti a, rapthlak ka ti bawk. Lapuii kha thah maw a lo nih a?! Luia ka thil tawn zawng zawngte ka ngaihtuah letin thudik a nih theihna a awm tlat si! Mahse, Judy ber kher nen a inzawm chu mak ka ti táwp hleithei lo. Engtin nge a nih theih le? Judy pawh chuan keimah ang bawkin a hmangaih a lo chán ve tawh tihna a nih chu! 

" Tu nge Lapuii that tu chu?" Ka ti ta a. 

A nui deuh lek lek a, mitmeng hriam lama min melhin," Amah chuan a hnaih khawp mai che. I rin loh lam daih a nih avangin ringhlel miah suh. I bialnu Biteii ngei a ni" a ti ta mai a! Ka phu chiang kher mai. Ringhlel zetin Judy chu ka va melh a, a mitmeng chu a verther lek lek nia! Dawt sawi hmel erawh a pu si lo. Biteii kher kher maw?! Engvangin nge chutiang chu a tih duh ang? Keimah vang ti dawn ila Lapuii thih hnu fëah chauh min ngaihven si. A mak em mai. 

"A va mak dawn ve! " ka ti hluai a. 

"Mak ka ti kei pawn. Sawi pawh hi ka hreh viau asin" a ti ve leh ta zel a. Ka ngawi hmuk ringawt. Thil kal dan chu mumangte pawh a ang ka ti! Harhsan daih theih ka chàk. Biteii chu ka bialnu a nih vangin ka ringhlel a ni lo, a inrawlh ve nachhan tur awm ka ngaihtuah thiam chiah lo a ni. 

Judy lam chu hawiin, "Ka lo ngaihven ang e. Chuan, mu tawh rawh. Ka va haw ang e" tiin ka tho a. Min lo chelh vat. Mitmeng hriatthiam harsa zet hian min melh a, "Haw lo mai rawh. Ka mu ngam lo" a ti sep a. 

"Ka riak ve dawn mi?" ka lo ti hû a. A bu nghat. 

Han haw luih tlat Thu awm hek suh, Thutthleng seiah chuan muthmun ka rem ve ta ringawt. Zan a rei tawh a, dik tak chuan ka awm a nuam vak lo nen, mutzal ka chak tawh ve bawk a. Ani pawh bathroomah lutin a va intifai a niang, a ri rak rak a. A rawn let leh chuan ka hmaah dingin chiang kel kawla min melh chungin,"Muttui aw. I bialnu chunga thil thlengah khan hmanhmawh takin chet la kher suh" a ti dam thlap a. Ka ngawi reng ringawt. Sawi mai tur ka hre lo. Judy awmdan te, Lapuii thlarau te, Biteii te..a mak em a ni. Ka beisei loh lutuk thilin min denna hian ka mood a thlak vek. Judy chu kan khaw mi leh sa chu nise ka la hrethiam. A ni bawk si lo, ka bialnu Lapuii a lo hre daih te, he lai hmuna a lo thawk vang vangte chu plan lawk te pawh a ang alawm le..Judy mut hnuah pawh ka la meng kar. Judy ka rinna leh rin lohna chu ka chhungrilah a insual buan buan a ni ber e. Ka inleh ka inleh hnuah ka lo muhil ve hram a niang, mumang ka nei zui a. 

Ka zan len denna luiah khan Biteii leh Judy te nen kan lo kal a. Kan hmaah hian tu emaw a kal a, chu chu kan lo um zak zak mai. Tu nge kan um ka hre mai bawk si lo. A hnu deuhah keimahin hrui inzam hnawk nuaih bulah hian ka lo ding a, ka lo hawi nasa mai. Chutia a ngaihna hre mang lo va, ka din reng lai chuan ka beng bulah zawi leh fiah tak si hian, "He hmeichhe á hi hlat rawh" a lo ti a. Chu aw chu ka hriat ngai pawh niin ka hre lo. Ka harh nghal zawk. Khua a lo la thim vek a. Ka men rual khan choka lama ri rak thawm ka hre zui. Judy in hi choka leh sitting room a inzawm nghal a, Choka lam hawiin ka mu bawk nen, ka va hawi phei nghal a. Dawhkan bulah Judy chu lo dingin dawhkan chu a lo melh tlawk tlawk mai! A tho á em mawni dawn le, ka inbeng kang a, ka aw ka thian a. A chechang eih lo. "Judy" ka ti sup a. A inher a, muangchangin a gas lam hawi chuan a ding leh a, min hnungchhawn zawngin..

Mak tak maiin ka tirilah ka khur tlat! A awmdan tehchai chuan min tihrilhhai te pawh a niang e. Ka tho ta nge nge a. Zawitein ka va pan a, a darah ka va vuan a. 'Judy" tia kawihher ka tum rual chuan..

"Ka á lo. Mi á ka ni lo. Min thlah rawh u. Mi á ka ni lo" tiin a tal ta chiam mai le! Mak ka ti hamhaih chu ka ding khawng reng ringawt. Chhuatah chuan a zangthal zawnga muin a tal vak vak a. A râpawm letling. A maimichhing tlat thung! Ka harh ta zawk a. Judy chu ka phih tho dáwrh a, a darah sawiin, "Hei, harh teh. I harh em? I tha em?" Ka ti nghek. Ka mitah tak min rawn melh a, a mitmeng chu a buai nuai mai. Fiah leh chiang zet hian,"Mi ä ka ni lo" a ti sap a. Ngawi rengin a roomah a lut zui daih. A mak ka va ti mai mai em! Ka beisei loh lutuk thilin min deng dawt dawt ni maiin ka hria. Ka muhil zui ta miah lo. Ka ngaihtuahna a buai nuai nuai a. Thil awmdan chu ka ngaihtuah fim zo chuang lo. A mak ka ti a ni tawp mai. 

Judy rawn thawh hmain zing dar 5 pelh hlekah ka haw ta daih a. Thingtlang tih takah kan tho hma hlawm a, min hmutu an awm nual. "Exer ka'n la ve lawk a nia" tiin ka chhang mai zel. An awih ve tho ang chu maw. A dik a dik chuan Thingtlang tih takah kan nun a la mawlmangin a la thianghlim em em a, Nula mahnia in luah a vawikhat awmna a nih piahlamah tlangval a riak tih hria awm phei se chuan khaw pum a khat leh ang a. Zeldin thu nen inru ang hialin kan thang leh dawn tih ka hai lo. Khawpui lama ngaia in neih leh in enliam theih kha Thingtlangah chuan thilmak leh mualphona a la tling miau a. Chuvang chuan Judy pawh a mualpho theihna tur lak atanga venhim chu ka tihtur ni ve rihin ka hria. In ka thlen chuan ka nu a lo tho tawh a. Min hmuh chuan mak ti takin min en a. "Exer ka la a" tiin dawt var bawk ka sawi leh ngawt kha. Ka nu leh pate hi dawt ka hrilh ngai zen zen lo va, ka inthiam vak lo. Engmah min zawt zui tawh lem lo va, ka lawm angreng. Ka mit a thial urh a, ka zawi hle bawk. Ka la dam chiang meuh lo bawk nen. Tukthuan kan ei laiin ka pain,"Nizan ka mumang tehreng chu! Lapuii kha ka lo hmu teh daih a! Sawi ka hreh viau nain mi mawlh tlat pek a! Tanpui ngai mangang hmel a lo pu a. Tawng erawh a tawng hauh lo thung" a ti chuar chuar a. Ka nuin min rawn melh vat. Ka ngawi hmuk bawk si. Ka sawi ve chuan ka tum loh thleng thleng ka sawi ang tih ka hlau a ni. Ka nu chuan,"A va mak dawn ve aw. A thihna a rei tawh sia" a ti a. 

"Chu chu lawm..a mitmengte kha a sen rám mai a. Tap hrep hmel a pu..Mama, a thih dan kha kei ka ngaihtuah hian thil dik lo te hi a awm em mawni aw ka ti rum rum asin. Ngaihdan te i nei em?" Tiin min rawn melh ra rulh a. Ka chaw bar tur ka thulh leh phah. Lapuii nen kan inlaichinna hre lo an awm lo va, tin, ka nu leh pate pawh hian an ngaina vein an mo ang riakah an ngai sa ve reng reng kha a nia. A thih pawh khan an tuar ve hle bawk anih kha. 

"Aa..ka hrethiam lo. Tui hleuh kha chu a thiam lo ngei mai a. Thil dik lo a awm dawn em ni? Awm pawh nise a rei tawh sia, hriat a har tawh awm" ka ti buh nuaih a. Judy thil sawi kha chu fiahna tel lo va sawi chhuah ngawt chi a ni lo tih ka hre ve tlat. Ka nu leh pate mah nise, ka rin loh vang ni loin, thil a kal dik lo ve thei tih ka hria. Kan sawi zui rih ta lo va. Ka la nuamsam chiah lo naa kan huan thlanga ka thangkam en a hun tawhin ka hre si a, ka insiam a. Ka nu remti vak lo chung ka chhuak ta a. Rilruah thil dang reng a leng hleithei lo a ni e. Judy chungchang leh Lapuii chungchang ngawt bak ka ngaihtuah thei lo. Ka chhut chhuak zo thei chuang der si lo. 

Ramár leh Vahrit ka awk hlauh mai. Mahse, mak deuh maiin Vahrit zawk chu a lo tîtek hman tawh a. Ka paih ta ringawt. Ramar erawh a la him pial thung. Vawk chaw thing tur thingro ka pu hawng bawk a. In ka thlen chuan dar 2 a pel hlek chauh. Thingpui ka in laiin Rema a rawn lut a, a hmanhmawh danah eng emaw tak a awm a ni maithei. Pháwk zetin kan lo en a. 

"Miss Judy luhaiin a tlu a. Tualpui an panpui mek" a rawn ti teh ngawt a! Ka tho hluai nghe nghe. A engvanga luhaia tlu ringawt nge maw a nih dawn ni..Biteii call ka dawng zui zat. Vawiinah kan la intext miah lo tih ka hrechhuak nghal.

"Hello" ka tih rual chuan,"Miss Judy kha i hre ve tawh em?" A rawn ti nghal ngawt bawk a. 

"Hre chiah,Rema'n a lo sawi a " ka ti mai a. 

."A mak tawp. Lalkima te sawi danin a kawchhungah ramhuai a lut an tia" a la ti zui! Ka ner sawk. 

."Ngati nge chutia an tih ngawt?" Ka ti nghut a. Ka aw chu a chang mah mah. 

"Ka hre bik lo, a meng var vek te an tia. Naupanga thuchang, an hlau viau a niang" a ti ve mai a. Engin emaw min mawlh. Judy hmel ka mitthlaah a cham zui a. Ka lainat riau nia! Inlaichinna nei lo mah ila, inzawmna mak tak kan nei tlat! Rema chu enin,"Zu insiam rawh. Va kal ve ang. Kan thiannu a ni ve sia" ka ti sup a. Ka nu nen mak tih hmel deuhin min melh run run mai. Chutia ka ngaihsak viau chu mak an ti tih ka hre mai. Zan lama thil thleng kha engmah hre ve hek lo le. 

A zuk insiam ve mai bawk a. Kei pawh ka inbual sawk sawk a. Ka bike-in Tualpui lam kan pan ta a. Buanga tel ve se a tha viau a, An thenawmpa rahtlan sava an chang daih a, awm ve se chuan min zui ngei ang mawle. 

Tualpui PHC chu kan va thleng a. Pu Tlana te chu an lo awm tawh a. Zirtirtu dangte pawh an lo awm. Chanchin kan han zawh chuan, "A class lak lai khan a lu a dawm vung vung a. A tlu ta tawp mai a ni. Naupangho rak chul vangin kan va kal vat a. A lo tal nasa mai a. Tibuaitu nei niawm takin..a mak khawp mai. Mahse, tunah chuan a tha tawh e. A la biak hleihtheih loh a ni mai" an ti a. Kan thu ve ta reng a. Khua a thim lek lek tawh ang tihin Judy chu a rawn harh pangngai ta a. A harh ka'n ti tak naa, a la meng á deuh ruai mai. Kan va kala min hmuh rual chuan, "Hmanhmawh rawh" a ti ringawt mai. Ka ding chàwih a, Mi dang pawh chuan mak ti zetin min melh dun a. Sawi tur mai ka hre si lo. Zahzelah,"I tha tawh em?" Ka'n ti ngawt a. Ani pawh a inthunun nge ni, "Ka tha tawh e. A zia lo hle mai" a ti sap a. A thawhpui tlangval, Tualpui khua ami te khan chaw an rawn kensak a. Keini ho erawh pu Tlana hoin Vcp inah chaw kan ei dawn a niawm e. Chhungkhat chu kan nei tho naa, min sawm ve tlat sia, kan kal ve ta ringawt. Chaw ei khamah muangmarin kan khaw lamah kan inphur phei dawn a ni. Amah Judy chuan riah a ngai lo a ti ve tlat si a. A damlo berin a duh tlat loh chuan chelh zui an tum bik lo a niang e. Kan hmaah an tlan a, Rema nen kan zui a. 

"Ti nge Judy khan tikhan a tih ngawt che le?!" Rema chuan a ti ta nge nge a. 

"Ka hre bik lo" tiin ka chhang. Inbe leh tawh lem lo chuan kan tlan dun zar zar a. Pu Tlana te inah kan peng ve leh zuai a. Amah Judy chu a tha tawh viau e. Ngaihngam takin kan haw ta a. Mahse, inah ka awm rei lem lo. Biteii rim turin ka chhuak leh ta vut a. 

Ni dang ang lo takin Biteii chu ka chîk ta viau mai. A chhan chu in hriat kha. Han rinhlelh ringawt chu inthiam chiah lo mah ila; kan rin loh lamah thil hi a thleng ve thei tihah ka chiang. Zawh ngawt chi lah a ni si lo. Ani chu a titi siam siam reng a, ka ngawichawi riau chuan a ngaih a titha ta bik lo nge, "Ti nge zanin hi? Judy damloh vang ami?" a ti ta a. Judy hi a sawi tel ve ziah! Nge maw a thik ve ngawt le. 

"Ka la nuamsam vak lo a niang" ka ti ringawt. Dawrtu an rem deuh hnu chuan ka ngaihtuah fe hnuah, "Judy sawi takah chuan Lapuii te kha a lo hre ve mawle! A mak ka ti ngawt mai" ka ti ta hlawl a. Min rawn melh káwk a, ka lo melh ve chiah. Mahse, a mit chu a la leh rang khawp mai. 

"A va mak ve, engtia hriain" a ti zawi sap a. 

"A thih dan vel kha mawle. Tu te emaw ka atangin a lo hre viau aniang" ka ti ta ringawt a. 

"Chuan" a ti tawi tak a. 

"Engvak mah, a mak ka ti mai mai mawle. Lapuii a lo sawi ve daih kha" ka ti a. Sawi zawm dan vang ka ti èm a ni. 

"I ngai thin em?" Tiin min rawn melh a. Ka nui lui a, "Ngai lo ka tih chuan dawt ka sawi dawn sia" ka ti ta a. A chil a lem khawlh ringawt. 

"A pawi ngawt mai. A thih dan lah kha a rilru natthlak bawk si" a ti sap a. 

."Khatih lai khan nangmah hi ka la hre bel vak lo che. Kan khuaah i awm tam lo mawni ka ti" tiin ka han vehthlem tan ta a. Ka zám ve deuh ringawt lehnghal. 

"Nia, ka awm tam lo em a. A thih ni kha chuan awm e. " a ti ban chhalh a. 

"Nia, ka mumal lo em a, khanglai chuan" ka lo ti vat a. 

"Ka lo khawngaih lutuk che alawm. U lapuii kha chu ka ui ve thlawt. A fel si, hmeltha bawk si" a ti duah a. Thaw huai hmel zuk pu a! Kei lahin sawi tur ka haihchham vek bawk si. Ka dang leh ta der chu a nia. 

Ka haw kawngah tihdan tur ka ngaihtuah ta rauh rauh a. Thim zingah ka khi ta sak mai. Engah nge a hma khan ka lo ngaihtuah tawh loh ni.. Lapuii best friend Asiami ka biak ngei a tulin ka hria. Zan hmasa lam ka mut tlem vang nge mawni dawn ni, ka mutui kher mai. Judy nen erawh phone-ah pawh kan la inbe miah lo. Va biak hmasak dan tur ka bangbo tlat. A tukah kan in sak lai kha chhunzawm theih a nih tak avangin Vena nen kan inzui leh ta a. Kan pahnih chauhin kan thawk bawk a, a khawharthlak angreng. 

"U Ngur, U Biteii hi i duh ve tak tak mi?" A ti thut a. Ka lo nui ringawt. A hmel lah chu a tak ran bawk si.

"Mawh? I duh ve tak tak em?" A ti leh ngat a. Mak ka ti ta deuh a,"Ka hrethiam lo. Ngati nge min zawh?" Ka ti ta a. 

"A zia leh i zia hi a inmil lo em a" a ti ringawt a. Zep nei tlata ka hriat avangin,"Chutiang ringawt. Min duh pui vak lo niin ka hria. A chhan sawi la mawle" ka ti ta bawrh bawrh a. Kum lamah inthlau deuh mah ila kan inzui nasa ve thawkhat bawk a,ani pawh hian u leh thian angin min en ve bawk nen. A ngawih deuh dat hnuah, "Ka sawi angin sawi miah suh aw. Hman zan Tualpui atanga a lo hawn zan, khawhar ina ka riak tur thosilen ka theihnghilh ka va lak leh khan an in bul Kawlthei hnuaiah sawn tu emawni a lo bia a. Lehlam tawng chu ka hre thei chuang lo naa an inbiak dan kha thian satliah chu an ni lo tawp tih ka hria. 'Ka ngai lutuk che. Hetah chuan rawn kal chi loh, chhuanlam siamin ka rawn kal leh tep ang' te kha a tia..ka lo venpui deuh che mawle..i tha mual mual sia, a bum che ka hlau" a ti ta a. Thilmak pawh va ni suh. Ka thiante rengin then turin min duh em mai. Hmeichhe naran ngawt zawng a lo ni lo tak tak a nih dawn hi. Thenna chhuanlam awm ta chu kei ka thawl huai zawk. Mahse, a pawng a puia then nghal thawr erawh ka tum lo. Lapuii chungchanga ka hriat tur tul hi hriat phawt ka duh tlat. Judy khan ka bialnu a nih vanga a thik vanga puhthlu ringawt a ni thei lo. Thikna chhan tur a nei hek lo. Min ngaizawngin ka hre lo, He Judy hian. A mizia lah hi a mak si! Thlarau te a hmu thei a nia! He Judy pawh hi hriatchian a ngai dawn tlatin ka hre ta. 

Zan tirah Nu Chami in pawh tlawh loin Asiami te in lam ka pan ta nghal a. Ani a pasal leh fate pahnih nen in hrang an chang ve tawh a. An pa te nen pawh kan inkawm fo mai. Ka va luh chuan ka leng lut khat deuh bawk nen mak an lo ti viau mai a. Mahse, min lo be sawt sawt thung. Ka thut atanga reivak loah an pa Kima chuan,"Ngur, i lo leng naa kan section kan meeting dawn sia, ka kalsan mai ang che aw" a ti a. A chhuak zui nghal. Ka luh tirh khan ka len luh ve mai mai thu kha ka sawi hrim hrim bawk a. 

An pa chhuak chu ka lawm ru viau zawk. An fate lah Kima nute inah TV an en daih lehnghal. Asiami thleng sil zo rawn thut rual chuan,"Zawh duh che pawimawh tak ka nei a ni" ka ti nghal táwng a. A hamhaih deuhin ka hria. 

"A va pwimawh hmel ve mawle" tih pahin sahdah a hmuam a. 

"Pawimawh thawkhat khawp mai. A thawng bawk chein ka ring. Lapuii chungchang a nia" ka ti ta a. A mitmeng a danglam deuh. 

"Sawi teh" hriat chak hmel zetin a ti leh ta a. 

Ka aw ka thian a. 

"Ih maw, Asiam, ngaihtuah let la. Lapuii thih nia luia awm ve zawng zawngte kha i ngaihtuah let thei em? Tu tu nge an nih ka hre duh a ni" ka ti phawt a. Mak ti fea min melh chungin, "Teh daih a che" a ti nghat a. Ka ngawi thung. 

"Aw le, lawk aw. Ka'n ngaihtuah ang e. Ka la hre thei maiin ka ring. Kei leh Lapuii, Teremi,Masangi, Biaka leh Kima te kha keini group ti mai ang. Keimahni bik kha kan ni mai a. A hnua rawn kal ve leh te kha Ruata, Puia, Henry-a, Sawmi leh Biteii te an niin ka hria. A bak naupang awm ve neuh neuh kha chu ka lo chhinchhiah seng tawh lo. Chuan engvang ber nge chu chu min zawh?" Tiin min rawn melh ta reng a. Biteii hming a sawi rik laia ka hmel lan dan a en lo kha a lawmawm viau e. Ka khur deuh nia mawle! 

"Aaa.. I bul ania ka sawi mai ang. Tun hnaiah Lapuii hi ka mangah ka hmu zeuh zeuh a, mangang taka a tap lai te a ni a. A thih danah fel lo a awm em mawni aw ka ti deuh mawle" ka ti ta hmiah a. A ngawih vang vang hnuah, "Ngur, dik tak chuan vawiin thleng hian ka thiani kha tuia tlahlum satliahah ka la ngai thei bik miah hleinem. Kum 3 dawn a liam tawh a, ka rilruah a thi thei chuang lo. Kan pa phei chuan," Sawi reng suh, eng emaw zawngin mi in an ngai ang e' tiin min khak hial tawh. Mahse, rinhlelh tumah ka nei bawk si lo va" a ti ta mial mial a. Ka thaw a chham lek lekin ka hria. 

"A kal vete kha i hrechiang takzet a maw? Biteii te ho khan an rawn pawh che u em?" Fimkhur takin ka ti a. 

"Aw pawh e, kan eirawngbawlna pawh min rawn tawm ve alawm. Taka! Biteii nen sawn in inzui ve deuh ni maw? An sawi tlat" tiin a nui rah rah a. Ka rilru a hrethiam der si lo. 

"Aa..inzui tihah kan in zui satliah ve mai mai. " ka ti ta ringawt a. 

"Chuan, Lapuii vel chu engtin chiah maw? Mumanga i hmuh vang ringawt chu a nih ka ring lo" a ti sap a. Engkim hrilh theih nise ka ti. Ka hrilh ngam rih bawk si lo. Thingpui háng ka in leh hnuah ka hawsan ta a. Ka rilru a buai angreng hle mai. Lapuii te lui kal nia Biteii kal tel ve chuan Judy rinhlelhna kha a nemnghet miau si a. Mahse, engvangin nge Biteii chuan Lapuii chu a thah ngawt ang?! A chhan tur awm ang ka ngaihtuah thiam lo. Min ngaizawng tih dawnah a kawm pawh kan inkawm ngai bawk si lo. Lapuii a er vang ti dawn ila; Lapuii chu amah aiin a u deuh a, er rualah a ngaih ka ring lo. Chhan tha tak zawng a awm ngei ang. 

Biteii call ka dawng zui zat a. Ka phu zawk mai. 

"Lo len i tum lo mi?" A rawn ti sar sar a. 

"Ka hre lo hei a tlai laklawh tawh sia" ka ti ringawt a. Chutia tlai chhia chu a ni hran lo. Mahse, ka hmu hreh deuh tlat. Judy zawk hmuh ka ngaiin ka hria. Biteii chuan,"Naktukah Tualpuiah ka phei leh dawn asin.." A rawn tih chuan, "Eng nge i tih dawn?" Ka ti vat a. 

"Bungrua chan a ngai a..chung vel chu" a ti satliah a. 

"Aw le..zanin chu ka lo phei lo mai ang" ka ti a. Kan inbiakna kan titawp nghal. A lungawi vak lo tih ka hre tho a, mahse, ka hmu chak tehchiam lo em a ni. Judy in lam ka pan zui a. Dina te an lo awm leh laih mai. Judy chuan min hmuh veleh, "Lo leng rawh. Khaw nge U Buanga te?" A lo ti vat a. 

"Ramah an kal a" ka ti mai a. Ka thu ve a. Dina te ho titi ka ngaithla vel mai mai ringawt. An haw duh mai bawk si lo. Judy chu a fala biak ngaiin ka hre si. Amah Judy chuan a hai lo nge min biak fal a duh ve tho zawk ni..msg a lo thawn keuh a. Ka en vat. 

"Haw phawt la, an hawn hnuah lo kal leh mai rawh. " tih a ni. Ka khi suk mai. Rei ka thut hmain ka tho ta a. Min thlah pah chuan zawi sapin,"Ka lo text ang che" a ti zauh a. Ka chhuak nghal. In atanga chhuah leh ai chuan tiin Nu Chami inah ka va táp a. Kan titi ta mai mai a. An pa thih dan leh a pasal chhungte sualzia te a sawi ve nuah nuah a, ka rilruah a lut vak si lo va. Ka ngaithla liam ringawt. Dar 10 a ri lek lek tihah Judy text msg chu ka dawng ta a.

"Hawh le" tih tè ringawt. Ka chhuak ta vut a. Ding takin Judy in lam chu ka pan ta a. Mi ka tawk lo va, a lawmawm lamah ngai ang. Ka zuk luh chuan hmun a lo phiat mek a. A sam uaithla siau kar atang chuan min rawn melh a. Ka hmuh duhawm leh ringawt chu! Aaa..mipa hi zawng mipa nge nge kan lo ni thin e. Ka thu a,a phiah zawhah a rawn thu ve chat a. Bultan dan tur ka bangbo viau, amah zawk chuan,"Hma i la ta em?" A ti ta a. 

"Engtia hmalak dan tur nge ka hrethiam lo. Biteii hi rinhlelh ngawtna chhan tur ka hre lo a ni" ka ti ban chhalh a. 

"U Ngur, tun hnaiah Lapuii ka hmu chauh emaw ti suh. A intanna a rei tawh ka tih kha" dawhthei lo lek lek hian a ti a..

"Ka ringhlel che a ni lo. Engtin chuan nge hma ka lak chuan ang? Biteii ka dáwp ringawt thei hleinem..hun tam a liam tawh lehnghal" ka ti nghut a. 

"I bialnu phuba lak i duh lo em ni?" Zawi leh fiah tak si hian a ti a. Mi dek riau. Ka va melh a, chiang zetin min lo melh. Ka hawi let rang viau. 

"Engtin nge Lapuii chuan a hrilh che. Biteii namthlak a ni ngei tih a sawi em ni?" Chhuat lam melhin ka ti a. 

"A namthla lai ngei hi vawi tam ka mang phan tawh zawk asin. Ka nun a tihhrehawm phah hle bawk. " a ti chang fak a. Ka lo thaw hawk ringawt. 

"Engvang nge ni ta ang? Chuan kum 3 a liam tawh a. Engvangin nge tunah chauh?" Ka ti duah a. 

"Tunah chauh a ni lo ka tih tawh kha mawle" a vin hlar a. 

"A nih chuan i va zep rei si ve" ka ti ve ngat. Zep nák emaw amah Judy pawh chu mak ka ti tan riau. Eng emaw dik lo hi chu a awm a ni. 

"Chu! Min ringhlel tihna em ni?" A ti ta phat a. Min melh no ta vak lo. Zaidam chhuahin ka ngawi rauh rauh a. Min melh reng tih ka hria. 

"A mak em a ni. Hman ami tawh tuna rawn thar thawh leh hluai hi" ka ti ta a. A thaw hak chu ka hre zui. 

"A chhan chu tunah hian a hmanhmawh zual tlat a tin ni. Biteii nen in inngaizawng miau a" a ti ro halh a. 

"A thik i tihna em ni?" Ngeiawm lek lek hian ka lo ti a. 

"Ka hre lo." A ti tawi tak a. A heh chu a liak zauh bawk. Ka ding thut a, "He thil hi tawp mai teh se, Lapuii chhung ten report an thehlut lo va, keia lo tharthawh chi a ni tlat lo. Biteii erawh ka then ang" ka ti ta a. 

"I nupui hual kha rawng taka thah a ni a. I phumbo mai ang maw?! Enh ang mipa nge i nih? Biteii chu i va duh tawh awm ve" a ti ta khak khak a. Min melh na ngang mai. 

"Keia chet lak ve vakna chi a ni lo alawm. Lapuii chhungte ka lo sawipui dawn nia. An thu thu a ni mai. A sarhu lai, a thlarau hmuh chaka ka zat ruai lai te khan khawiah nge a awm? Nang pawh khawiah nge i awm? Tunah khawvel thar ka hmachhawn tan ve mek a. Tihbuai tlak ka ni rih lo." Ka ti ta duah a. Engvanga chutianga ti ta duah nge ka nih pawh ka hre lo. Ka khat liam ve ta pawh a ni ang e. A ding phat a, hnai set sawta min melhin, "Mipa i ni em?" Hmai thal há hian a ti ram hmak a. Mi run lutuk. A khabeah chawiin na zetin ka chelh bawk, ka fawp ta hmiah a. Lung chang tak fawh ang chauh a ni. Ka kut a paihthla ta thuai a. A tawlh hnung dat bawk. 

"Tikhan mipa ka ni nge ni lo i hre tawh ang chu" ka ti nghut a. 

"Khatiang mipa kha chu tam tak in awm.. I bialnu thlarau hi vakvai nawn turin i hnutchhiah dawn maw?!" A ti ta sak a. Ka nui huk ringawt. 

"Tu nge i nih chiah? Miss Judy, mawh, tu nge i nih?" Tih leh banga nem beh ka rual nghal a. A chiái hlek lo va, a hamhaih hek lo. Ka mitah tak a ni a melh ngat ngat ni..ka hrilhhai lek lek zawk. 

"Chu zawng Aizawlah nangmah ngei han kalin engvangin nge i han fiah mai loh ang? Ngurhminglian" a ti vawt raih a. Ka thlah nghal. Cho zeta min melhna chu melh let vein, "Engkim hi ka hai lang ngei ang. Nang emaw Biteii emaw pawh..Lapuii thlarau a vakvai tak tak em tih pawh" ka ti ta khawl khawl a. A ngawi hmak. Engmah sawi zui tawh bik loin ka chhuahsan zui. Kan mumal lo dun hlein ka hria. Han ngaihtuah vein in rilru kha han sêng ve mah teh u. Mak deuh mai a nia.

Kan khua khaw chengker ve tak, In 150 awrh awmna khua, High School pawh la awm lohna khuaah Aizawl mi hausa fanu duatlai, a pu pawh Minister ni lai ngat, chu hmeichhia chu Middle schoolah a rawn thawk a! Chu chu kan zoram kalphung ngaihtuah chuan thilmak a ni phawt. Chutah chu nula chuan min ngaizawng emaw tih turin zan thim hnuaiah ka ban vuanin, ka bulah a him thu a sawi a. Min rin thu nen, ka ngaihzawn a hlauh luat vang nge a bialpa chungchang a sawi tel zauh bawk. Chumi hnuah bialnu ka neih hnuah Lapuii thla niawm tak Luiah ka tawng a. Chumi rual deuhthaw chuan Judy chuan Lapuii a hmuh thu leh Lapuii kha thah a nih thu min chhamkhum a! A thattu pawh tudang ni loin ka bialnu vawn lai mek Biteii a nih thu nen lam...chu mai a la ni lo, amah Judy ngeiin a bialpa a chán ve tawh thu bakah thlarau nen an inkawm thin thu te, he lai hmunah a chhungte phal lo chung a lo kal luih thute min hrilh leh a. A enga chu nge rina rin loh tur reng ka hrethiam ta hauh lo mai. Amah Judy nen lam chuan rinhlelhna mitin ka en lo thei lo. Phuba la tura min duh em emte chuan chhan dang a nei a ni thei ang em? Biteii hi huat rukna a lo neisa tawh em ni ang? Heng zawng zawng hi plan pawh lo ni ta tehreng se ,sawifiah leh hriatthiam theih loh thil pakhat erawh a la awm. Luia Lapuii thla niawm tak ka tawn kha..mihring a ni lo tih chiang takin ka hmu ve tlat a ni. Kha thil khan ania Judy ka rin lohna tur lak atang pawha min pawt peng leh thintu chu...kum 3 liam tawh thihna kha tunah engvanga thar thawh nge a nih ang? 

Muthilh pawh a har fat mai. Ka let ka let a. Lapuii hmelte ka han mitthla leh a. A ngaih zawng ka ngai thin ngawt mai. Ani ang hmeichhia kha Siamtu hian khawvelah a dah miau si lo va. Mahse, hun hian min thawidam ve ka ti lo thei lo. Ka dam ta vek e ka ti lo naa, rilru te pawh ka siam chho ve tan chauh a, tihian buaina mak tak ka tawk leh si! Engtia chinfel tur nge a nih ka hriat si lohna hian min uai rit lo thei lo a ni. 

Thil pakhat erawh ka hrechiang. Tum nghet tak ka nei a. Judy hi ka hrechiang ngei tur a ni. Aizawla kal a tul a nih pawn ka kal mai ang. He buaina hi a zual zel hmaa ka hmehmih emaw ka chinfel a ngai. He Judy hi tu nge a nih chiah ka hriat a ngai. A tuk tukthuan ei laiin Thawhtanni-a Aizawla ka zin tur thu chu ka sawi ta a. Tihtur neia min hriat loh vangin mak an tih hmel angreng. 

"Thil hriatchian ngai a awm a. Ka han enfiah lawk ang a, ka rawn let vat ang" ka ti a. A zawng zawnga sawi chi a la ni si lo. Engmah an sawi zui lo bawk a, an remti a niang. Nilengin kan in sak kan chhunzawm a. Ka ngawichawi khawp mai. Vena tak pawh a tawng tam lo. Ka zia chu mak a ti ve deuh maithei..tlaiah tuilum sa ver vawrin ka inbual a, ka harh sawtin ka hria. Ka phone ka han en chuan Biteii msg a lo tlar leh dal mai. 

"Kei aiin Judy i duh zawk a. A pawi lo. Nizan khan Judy inah i kal a. Ka lo tlazep tawh lo vang. Engkim a tawp e" tih te, "U Ngur, i insawifiah dawn lo em ni?" Tih te a ni nuai mai. A engamah chu ka reply lo. Ka sengfel ngai lo va, amah zawk a inthiarfihlim chu ka lawm daih zawk. Min lo kawp ve vang kha chu ni pakhat mah se; Ka tui tawh lo. A tu chu nge maw tui thei tawh ang le..ka lo lut thuk hman lo chu ka lawm khawp mai. 

Judy msg pawh pakhat a lo awm ve ran a. 

"Mi á ka ni lo" tih leh bawk! A va mak fo e aw. Ngaih a tha lo telh telh mai. Tumah ka hrilh thei si lo chuan min ti ipik zual bawk. A hrehawm.. Ka nu tal chu ka hrilh mai dawn em mawni aw ka ti deuh a, mahse, a derthawng si a. A buai leh vak ka hlau deuh si..Aizawl kal phawt ila a chiang mai ang. 

Thawhtanni zingah Tualpuiah Bike-in Rema ka va inthlahtir a, Sumo-in Aizawl lam chu ka pan ta vang vang mai. Ka zin tur thu chu mi dang bula sawi lo turin ka chah thlap bawk. Mak a ti tih ka hria, ka la sawifiah thei si lo. Tlangvala pumpa, nula mumang emaw a dawt sawi emaw vang mai maia Aizawl tlang ka thleng ta hial chu eng emaw zawng chuan a atthlak maithei. Mahse, ka nun a tibuai pha miau a. Engkim chu ka finfiahin ka hre fiah ngei tur a ni. 

Ka phone-a ka thil chhinchhiahna chu ka melh ran a. 

Judy Malsawmzuali

Venghlui. Aizawl, Mizoram

H/no : T- 0781

Kan khawmi Aizawla hnathawka awm, amaha in luah Sangtea inah ka in nghat a. A lo lawm ve tumhrang a. A in chu a chep zet mai. Mipa ve ve kan ni hlauh a. A zia tho mai. Thlen zan chuan ka chau bawk a, kawng chhiain min sawh chau khawlo zo nen. Ka mu hma khawp mai. Zing khua a lo var a, ka thawh phat atanga ka rilrua lo awm chu.."Vawiinah engkim a chiang dawn" tih chu a ni. Ka helhhawlh nge chaw pawh tihtham ka ei lo. Sangtea bulah chuan mamawh lam tur angin ka insawi a. A awih ve mai. Kan chhuak rual a. Bus-ah chuangin Treasury-ah ka chhuk tharh a. Ka lung a phu dup dup nia! Ka zám deuh em mawni le. Judy te in lam pan chuan ka pen ta páwk páwk a. House no atanga ka zawn avangin zawn hmuh a harsa hran lo. An in atang chuan zawlnei ni lo mah ila, mi rethei an ni lo tih a hriat ngawih ngawih..kan in ang chu pathum vel a leng ang. Chutiang chu ka sawi thiam dan a ni mai e. Door bell ka hmet ri tlang tlang a. Reivak loah kawngka chu a ri rak a. A rawn inhawng ta..Ka hmaah chuan Judy nu a ni ang tih hai rual loh tur, Judy nen inang em em mai chu a ding ta ran a..

(Ka sillipar kha maw. Dik tak chuan inbualnaa bun atan a tha em a ni. A huh rei lo si, tiang chiah kha ka duh leh ee. Aizawl bazara Rs. 280-a ka lei a nia 🥺🥲