Judy 4

MISS JUDY..(4)

Ziaktu: Toni Rálte

A mi tham loh dan leh ngaih dan chu paidam harsa ka ti tan tlat! Ka mood pawh a tihchhiat phah lo thei lo va. Biteii pawh chu ka kawm hlim tak tak thei lo. Ani pawh chuan ka awmdan avang chuan a hrethiam ve nge ni , "I va cool ve" a ti ta chiah a. 

Ka lo nui hawk ringawt. 

"Ka tha reng" ka ti ve ringawt. MAhse, chhungrilah ka tha hlawl si lo va. Min chelh deuh mah se, ka hawnsan ta a. Ka mut hnuah reivaklo kan intext. Judy msg pawh a lo awm a. Mahse, ka open duh miah lo. A rin ang ka ni lo tih lantir ve reng reng ka duh a ni. 

Zaua nupui hruai ni a thleng ta a. Mi sawm tam buangbar lovin bengchheng lo takin kan inhruai a, an nu Ateii hi sawi tawh angin a la naupang ve a, tleirawl chhuak hlawt kan tih ang kha a ni ve a. An kum a inthlau viau naa, mipa hi chu kan tar har bawk a, an la inhmeh thlup tho ang ka ring. Zaua pawh a khi vur vur reng mai. Zep nák emaw hmelah phei chuan Ateii hi a phu tehchiam lo a ni. Ateii chhungte pawn a tirah kha chuan an han sit deuh dawn dawn a, mahse, nau hial an lo pai tawh si a, sawn pawm ngawt kha an hreh ve a nih ka ring. Mahse, Zaua hi a hmel anga en chi a ni lo. Mi taima rumrut leh zaidam táwp a ni ve a. Ateii hian a tihthiam chuan an inkawl thei viau ang. Khawsak dinhmunah erawh Ateii te aiin an khawsa thei a, Ateii chhungte tan pawh lehlamah chuan rem loh kha a uiawm ve tho maithei a ni. Mak ve deuh chu Ateii nen hian an vawikhat inkawmna atangin an inngaina ve nghal tawp mai a ni. 

An inneih zanah chuan Biteii pawh a rawn phei ve a. Thian tha tam vak lo nen kan lawm ve a. Lawm tihah chutia han rik bung bung pawh a awm lo. Kan thu khawm a ni mai e. Dar 8 pelhah Nu Chami in lam kan pan diak. Tlaia kan ruaithehna sa bang kha Buanga'n a then azar a lo báwk a. Sehhmehah a ti a ni ngei ang. Kan fatu tak si avang khan zuk lem zuaina hun pawh kan nei ta si lo va. Kan châk tlang tawh viau a niang e. Nu Chami pawh chuan,"Tlaiah khan in rawn kal si lo va" a lo ti chat a. 

Thudang sawi tawh lem loin kan thli ta hmiah hmiah a. Biteii lah a thu ve reng si. "Min hrethiam rawh aw" chu ka tih ve kha. Ka chak huam pawh a ni lo, Rema leh Buanga helhhawlh kual khan min ti pháwklek kual ve vak ringawt. Biteii hmuh loh theih deuh turin chokaah ka va lem a. Pum a sa thla ham ham mai. Ka duh zat ka tih zawhah a bulah ka va thu a. A ngawi reng a, thinrim hmel erawh a pu hran lo. 

"Ka va thlah dawn che mi?" ka ti sup a. Min rawn melh háw a. 

"I lo leng dawn lo mi?" a ti sap a. 

"Leng lo mai ang. Zaua te nupa kan va hmuh leh loh chuan" ka ti mai a. A ner sak. Min thlahlel ve tak tak pawh a ang. Kan inngaihzawn atangin vawi hnih chiah ka la fawp. Ka hlei vak lo he lamah chuan. 

An in lam panin kan phei dun a. Judy te in peng kan thlen chuan an ri hak mai a, in hnuai atang chuan hmeichhe thinrim awrawl inhrosa a rawn chhuak a. Chak zetin RInpuia hi a rawn tlan chho bawk. A hnungah Judy chuan a rawn um a. Kan lo ding ve ringawt. Rinpuia chu kan zawnah a ding ta chut a, a thinrim hmel hle. Judy hnungah Rinpuia thian Puia leh Johny te an lo chho ve bawk a. Pu Tlana te pawh an rawn chhuak ve. 

"Zawngsen leh! Vawi khatmah ka in khu rawn rap leh tawh ngai suh ang che. Nang ang mihring hi ka mamawh lo" Judy aw fiak thak chu ka bengah a ring viau. 

Rinpuia chuan,"Zawngi, zirtirtu i nih vang khan i inla ve deuh ni maw? Nawmchen nan bak ka duh lo che. Ve che" a lo ti pawr hlur a. Judy chuan a hlau hlek lo, a va pan a, Rinpuia hmaiah chuan a beng ta thuai a. Thinrim meng ling hlar chungin,"I khawih theih ka ni ve lo hi ka lawm. Nang ang mipa hi alawm hmeichhia ten kan ten em em chu. I damchhungin nang hian min khawih lo vang e" a ti ta piap piap a. Mak deuhin ka awm a lo nuam huai nia! Rinpuia'n a la khawih lo tih ka hriatna ringawt pawh ka hlimpui a nih si chuan..

Puia te chuan Judy bulah,"Miss, a zia lo hle mai. Lo hrethiam rawh. A rui sual ve deuh anih kha.." tiin Rinpuia chu hawnpui tumin an kai a, mahse, Rinpuia chuan keini Biteii nen kan ding ve reng chu min rawn hmu ta a. A thinrim hrikthlakna tur a hmu ta nge ni. Min rawn pan hnai a. 

"I kamtam vanga buaina thleng hi i hmu thiam tawh em? Mipa ve si, kamtam lutuk" a ti ta a. Hmana kan buaina bawk han tuai thar leh chu a va ninawm e aw. 

"U Ngura khan engmah a sawi lo ve. Nang anga kamtam leh hram tlahawlh a ni ve lo. A sawitu chu i hre duh takzet a maw? Kha i bula ding i thianpa Puia khan a sawi" Judy chuan a rawn ti fiah leh ta kak a. Rinpuia chu a lehhawi vut a, a thianpa Puia chu a hnek let tawp. Ka lo rum nghut ringawt. Puia rawn tho chuan posi a la ve ta mai bawk si. An inpawmchilh chu a ni ta reng mai. Pu Tlana nen chuan thelh tumin kan han pawt naa, an chak dun ve riau a, an invai deuh pawp pawp mai a. Tlangval dang rawn kal khawm te nen tang kawpin kan pawt then thei ta hram a. 

"Thian tenawm lutuk, zawnga,i hre viau ang" Rinpuia chuan a ti tuar tuar a. 

Puia pawh chuan,"Nang ang mi dawthei leh insawithei thian hi ka kawp peih reng reng lo aw. " a lo ti ve bawk. An buaina chu a naupangchhia riau. Biteii chu kaiin,"Kal ang" ka ti nghut a. Kan kal ta daih. Judy erawh rilruah a awm deuh tlat nia! 

"Miss Judy pawh hi a nasat ve hmel ka ti, mipa te kut a thlak ngam a nia" Biteii chuan a ti sap a. 

"A phutawk a hmu anih kha" ka lo ti hmiah. 

"Chupawh nise, hmeichhia chu hmeichhia kan nia. Mipa te kut thlak reng reng" a ti leh hlak hlak a. 

"Nia, kut thlak hi chu a tha chuang lo naa, mahse, hmeichhia mah ni ula in dikna leh thiamnaah chuan kut thawh a ngai ta a nih chuan kut han thawh mai pawh a pawina a awm hran hleinem" ka ti ta duah a. Mak tih hmel angreng taka min enin,"I va tan ve" a ti nghat a. Ka nui hawk hawk. 

"I ho em mai." ka tih mek laiin an in kan thleng a. 

"Nih aw. Muttui" ka ti a. 

"Judy ina len i chak anih kha" a ti nghat a. 

Ka insawifiah peih vel lo bawk a. Ngawi rengin ka kal nal nal. Ka hmeichhe duh ngawih ngawih a ni lo bawk a, ka laka a han titau ve te chu ka thengthawngah a thawk zo mang tlat lo. Mahse, ka bialnu a nih chhung erawh mi dang kawpsan ka tum hran lo. Fair taka chet hi harsa ka ti lo bawk a. He lamah chuan ka ngaihtuahawm loh. Judy te in pengah pawh an lo la awm deuh niai a, Judy tak erawh ka hmu lo. Zuk len luh ka tum hran lo. Ding takin Nu Chami in ka pan a. Zaua pawh a lo thu ve kur mai. An lo dawm mek a. An tawng nuam viau. Kei pawn no khat chu ka'n thawkkhat ve leh piap a. Ka thisen a lum deuh tlat chu ka hrethiam lo. Kan thil tawn vang kha a niang. 

"Ngur, Biteii hi chu ka va duhpui lem lo che e aw. I tang laklawh ang tih ka hlau" Buanga chuan a ti hlut a. 

"Ninawm a..ka neih tur pawh ni hlei lo" ka lo ti hmuk a. 

Nu Chami chuan,"Neih tur ni lo ti ngawt suh. Neih tur ngei lo chu ngaizawng rual pawh i nih tawh loh hi. Nupui nei rual in ni tawh, Ni e, Biteii hi chu a nunhlui khan a la vaw chhe deuh tlat, chuti tih loah chuan a fel lohna em em ka hre ve lo" a lo ti ve mawlh mawlh a. 

"Then ringawt pawh, chhuanlam a awm hleinem" ka ti ta a. Then mah ila ka la na dawn lo tih a lang chiang hle. 

"Chhuanlam vak a ngai lo. Then tawp rawh" Rema'n a lo ti a. 

"Keima chungchang ringawt pawh chu a..thil dang sawi ang u" ka ti hluai a. Zaua te chungchang kan sawi kai ta daih a. 

Ka zing tho chu ka rit ve deuh lúk mai. Kan in tam ve deuh bawk a ni. Ka ha ka nawt nghal sawk sawk. Zaua te inneih a ni bawk a, ka nu te pawn min hriatthiam ka beisei. Ka za lo viau mai a, vawiin chu eng han tihzai ka rel lo ang. Kan in sak lai lah kha hmanrua a zo tawh sia,kan chawl ringawt. Apeki school kal tur chuan thlah a ngiat leh ta. Ka thlah leh ta poh a, School kan thlen chuan Judy chiah zirtirtu kal an la awm a. School kawta pangpar ho a lo en kual mek lai a lo ni. Min hmuh chuan, "Ka msg te kha chhiar ve ta che" a ti nghal táwng. Ka lo hrilhhai hman deuh. Mahse, "E..aw le" ka ti ta nghut a. Ner nak chungin,"Mawl siah" a ti zui sep a. Ka ngai haw hran lo. Ka laka titau anga a awm chu a eng emaw ti nawm riau. 

"Apeki hi home work vawi hnih a ti tawh lo va. Lo enpui deuh teh u" a ti leh a. Min chelh zui a duh ve deuh niin ka hria. Nge mawle, inngaihbel chu a thiang alawm. 

"A va mak awm ve. A zir ve ziah chuan ka hre sia, tlai lamah ka awm ngai si lo va" ka ti nuah nuah a. 

"Nia, inah i awm tlem. I lenglám mah mah" a ti kher a. 

"Hmm..tlangval ka nih hi" ka ti a. Kan inbiakna chu a naupangchhia riauin ka hria. 

"Lo enpui ve tawh rawh. Ka subject-ah a hniam riau ania" a ti leh a. 

."English hi chu ka thiam vak bik lo va, tuition kaltir mai a ngai a ni. Lo kal thin se, i peih ang em?" ka ti ta zung zung a. Min melh káwk,"I va mak e aw. Enpui mai rawh. " a ti hlak a. 

"Nizan kha.." ka ti ta daih. Min melhna mitmeng a danglam nghal. Ka chhiar thiam chiah lo. 

"Nia, a pawi. Mahse, ka inchhir lo" a ti ta hmak a. Tualpui lam atanga lo thawk kha a rawn thleng ta bawk sia, awm ve reng chu nuam ka tih loh vangin ka chhuksan ta a. In ka thlen veleh Judy msg chu ka en nghal. 

A hma daiha a lo thawn kha chu, "Ka rilru i hre lo" tih chiah a nia. Nizana a msg erawh, "Rinpuia khan a phutawk a hmu a nih kha. Min zah lo em a, kut ka thlak a nih kha.." tih a ni. Eng nge maw ka lakah a insawifiah ve ngawt le. Ka zawt pawh a ni si lo. Chhan dan tur hre hek lo i, "Aw le" ka va ti tawp ringawt. 

Engmah han thawh loh ngawt pawh chu ka ti leh deuh a, chawhnuah chuan ka lu na te pawh a zia ta deuh bawk a. Sangha ei a chakawm tawh e tiin zan len den ka tum leh ta thut a. Ka nu ka hrilh a, "I pa pawn a ei chak thu a sawi a sawi tak kha mawle..zu kal hlauh teh" a ti thën a. Apeki chungchang pawh ka hrilh ve nghal a.

Rilru hah hmel angreng tak hian,"Engtin nge maw he nau hi kan han tih dawn ni. Kei phei chu min hlau mang tawh si lo, Lehkha lah ka zirtir thiam ve bawk si lo, tuition kalna te hi awm se a zia ang. Khawlai a ngaina lutuk pawh hi la zilh deuh teh. " a ti bawrh bawrh a. Kan duat sual ve ta deuh a ni maithei. Apeki chungchang hi tlem ka'n sawi kai lawk ang e. A nu hi ka ni fanu a ni a, Apeki hi sáwn a ni. A pa hi a nu hian a sawi duh tlat lo mai a. A nu hi Aizawlah mi inah a han awm kha a nia, chuta tanga rawn rai haw a ni. Zep nák emaw a rawn rai haw kha a la naupang si, kum 17 chiah a la nia! A pa phei chuan a vaw nasa hle nghe nghe. A fa paina lah a sawi duh der si lo. Tihtlak chi a ni tawh bawk si lo va, tikhan a hring a. Kum 3 a nihin kan la ta a ni. Apeki nu Lalawmi khan pasal a neih tak vang a ni ber. Tualpuiah pasal a umsan ta si a, ka nite fapa leh a nupui bakah an fate nen an chhangchhe si, an khawsak a nuam vak bawk si lo nen, chuta chhapah ka nite monu lahin Apeki chu a hmumawh ve bawk nen, keini nau awt ta reng reng chuan kan la ta a, ka nu fa a ni ta mai e. Dik tak chuan kan ina a awm hi a tan pawh vanneihna a ni ve tho, a pite bulah la awm nise tuna a tana kan tihsak ang hi an tihsak a rinawm loh. A thiante aiin engkimah a nei leh mawi ber a ni zel. Keini Lateii nen hian 'U' tiin min ko ve mai a. Kan chhang a khát khawp mai. A u Lateii lah hian a rawn ngaihtuah thei si, kei tak hi chuan ka hau ve ngai lo hi ka duat thiamna a ni mai ang chu. Naupang han chhawnchhaih vel hi ka thiam vak lo. 

"Judy ka lo be tha ang a, a hnenah kal rawh se. Tihi chuan a hniam dawn tlat" ka ti a. Ka lui kal tur chu ka insiam tan nghal a. Ka len tet pawh ka pain a lo thui tha diam tawh a. Mi dang hruai loh hian ka felfai a, a zia ka ti mai. Min zui duh an awm erawh chuan ka hnar chuang lo. Chaw ka bar sawk sawk a. Tlem ka fun bawk. Kan khua hi lui pali hual vel kara awm kan ni a. Lui hnai ber hi chu naupang lam deuh chanah kan dah a, kan kal zen zen lo. Ka kalna tur pawh hi sangha lenna leh tamna ber nia kan ngaih, Haiva luiah a ni. A hla ve deuh bawk nen, ka chhuak hma a. Zaua te ka tlawh zuai a, an lo awmdun a, Ateii chu a la zum hlein ka hria. A la naupang ve a, a awm ve tho mai. Zaua pa chuan, "Ngura, i man tam chuan min leitir ve rawh aw. A tui háng ka hawp chak riau" a lo ti a. Inleitir hi ka ti ve vak lo, sa ka kah pawn kan leitir ngai vak lo, kan hleh ve mai zel a. Kan thenawm hnai bakah kan ngaihpawimawh deuhte chu khuai pawh la ila kan sem ve zel mai. Hei hi Thingtlang nawmna chu a ni ve a, kan duhsak te khan an neih hunah min hre ve reng a, kan induhsak tawn a nih ber mai chu..

Khawhlui mual ka kal laiin Rinpuia thian Puia leh Johny te ka umpha a. 

Lam hnai luiah chakai chhit an lo tum a lo nia. Kan kal ho ta a. Rinpuia nen boruak nei mah ila, an ni nen chuan kan inkarah inhuatna a awm ve lem lo. Upa zawk ka nihna angin min zahthiam ve viau zawk. Nizan lama thil thleng chu kan sawi chhuak a. Johny chuan thil thlen dan a sawi ta a. 

"Len a rawt tlat a. Khatiang boruak kha an nei tawh sia, kan hreh ru viau. Mahse, a ngam angreng sia, kan lenpui ve a. Amahin a lo awm lehnghal nen. Kan thu ve ta reng a. Thingpui a lum laiin Rinpuia khan a rukin, 'Ka va fawp ang e. Lo en reng ru' a ti a. Ani kai phur khan a thingpui lum lai kha a hnunglam atanga kuahin fawh a tum ngawt mai a. Ani Miss Judy lah khan a lo ngaithei lo nasa chu niin, a nam per dawrh a, a chhuih zui ta nghek a. Rinpuia chuan tawngkam bawlhhlawh zet zetin a tawngkhum a, an rawn in umchhuak ta a nih kha. Rinpuia hi chu a zia lo, hmeichhia a ngam mah mah zel a" a ti ta a. Ka rin dan sa a ni deuh bawk a, mak ka ti vak lo. 

Puia bulah, "A haw viau ang che, inla inbe leh lo em?" ka ti a. A nui hak a. 

"Min haw kumkhua mah se, pawi ka ti lo. Chuan Miss Judy bulah khan Rinpuia hék zawngin ka sawi hran lo. Ka rui ve deuh khan, 'Miss, Rinpuia lakah hian fimkhur deuh rawh aw. Inawmdan vel a sawi vek zel ania" ka ti pek mawle. A hmingchhiat ka hlauhpui vang a nia.." a ti suam suam a. A fel phian zawk ka ti. Judy a ngaihzawn ve vanga sawi a ni lo va, a mualpho a hlauh vangin thurawn a pe angah ka ngai. Lamhnai Lui pengah min pensan a, keimahin ka kal leh ta rak rak a. 

Ka thlen thlak chuan khua a thim chhulh tawh a. Unau hmelhai awm vel a ni. Meizuk ka siam leh te te phawt a, kai lai taka lung phek remchangah chuan ka thu ta vang vang a. A hnar lam zawh chhoh ka tum deuh. Haiva lui hi humhalh chin kan nei a. Humhalh laia sangha chu a len pawh an lian tawh khawp mai. Tumah hian han khawih luih kan tum lem lo va, khaw fel ve tak chu kan niin ka hria. Ka phone ka phawrh a, signal a awm lo. Miscall pathum a lo awm a. Biteii vek! Ka chanchin engmah ka hrilh lo. Zanah khan titau titiha kan inhawnsan avang khan kan inbe zui ta miah lo va, zingah nise ka be hmasa bik bawk si lo. Ka ngaihsak lo lutuk chu hmeichhe tan chuan a tawrh a nuam bik lo vang. Ka va ti huam thiam bawk si lo. Ka call back thei si lo va, msg ho chu ka chhiar mai mai. Judy chuan,"Apeki chu riahpui in phal ang em?" a lo ti a. Ka chhang thei der si lo. 

Biteii pawh chuan,"I va titau rei tak. Mipa i nih kha.." tih leh " Ka tihpalh aw. Zanah lo kal ang che. Ka ngai tawh che" tih a ni. Ka kal dawn si lo va, a mangang ang em le..Lapuii ka hrechhuak zawk mai. Kum 3 a liam tawh a, Dik tak chuan han theihnghilh zeuh zeuh chang chu ka nei ve thin. Hun hian min thawidam thei tih hi chu a chiang viau. Mahse, kan hlim dun hunte ka ngaihtuah let chuan amah anga ka lungdum, ka mizia leh ngaihdan hrechiang, min zah thiam leh min duat thiam kha an awm leh ka ring tawh lo. Khawtlang pawh khan kan chan ropui takzet a ni. Lapuii te vanglai khan kan khaw nula hmeltha leh fel thlan chhuah zingah a hming hi sawi rik tam pawl a ni ve ziah zel kha a nia. A chhuan pawh ka chhuang ru ve thin. A tui tlak ni khan Tualpuiah ka putea te vawk talh tur kan va en kha a nia. Min lo call a, tuia a tlak thu an sawi khan a thih kha ka ring phal miah lo. A tla ve satliahah ka ngai. Ka bo hú a ni ber. A ruang a rawn thlen hnuah pawh ka la hawihai a, a awmah te ka nem a, thawktir leh tum khan hun ka khawhral rei asin aw. Tuman min khap ngam lo, mittui tla chungin min lo thlir thup ringawt. Mahse, thaw tur a awm tawh si lo. A natzia kha..

Ka mei zuk a lo thi daih tawh a lo nia. Ka lo inngaihtuah nasa deuh a ni maithei. Sava chiar nak nak thawm pawh ka hre tan ta. Ka insiam tan a, Torchlight phawrhin len pawh ka sam a, Lung chungah ka chawfun leh ka phone ka dah a, Kawnga ka mau thei sah sa chu akin lui hnar lam chu ka pan ta a. Mel chanve dawn ka kal hnu chuan ka thei pahnih a khat der mai. Amaherawhchu, a lian hlawm vak lo. Thei li tal khah tumin ka han insangmar leh a, mei ka zu chak tawh si, vaukam tiauphoah thuin ka han zu leh te te a. Ka ep chiah chu lung bang hlir a ni a, hrui a zám nual bawk. Hahdam zeta ka meizial ka hîp vang vang lai tak chuan ka ep chiah lung bang sang ve angreng tak atang chuan thil dum lian angreng fa hi a rawn tawlhthla pur pur mai a. Ka hamhaih hman meuh lo, a hnuai li-ah chuan a tla thla ta púrh a. Ka ngaichang deuh a, a rawn láng ta hlek lo mai a. A eng ramsa tak chu ni ang maw ka tih rilruk laiin lui hnar lam atang chuan hmeichhe aw nge mipa aw tih pawh hriat hleihtheih loh hi a rawn tap thla hawm hawm mai a! Ka hmulthi a ding ve suau thei nia! A aw chu a tial ruk mai si. Lungchhe zet hian a rawn tap thla ráwih ráwih mai a. Ka sihdet chuan ka han en ringawt a. A en thui thei vak si lo. Lí chu a rawn phul ta barh barh a, ka va ën a, a phuan berh berh mai. Lung nawi ka tham a, ka va vawm lut ta a. Ka phu nasa lutuk, ka inrin hmain mihring ni ngei tur hi lî atang chuan a rawn inkhawh chhuak lawp mai le! Ka tawlh rawk mai. Lî laiah chuan ka lam hawiin a ding ta reng mai. Khur dar darin ka va ên ve leh ngat a, thawmhnaw a ha pawn ka hre lo, a hmel chu ka hriat ngai pawh a ni lo. Hmeichhia a ni. A vun chu a dáng em em a, a mitmu lian zet chuan min rawn melh ngur mai. A sam sei tak chu a huh hlap a, a thlah hnuang bawk. Ka kha a chih a, tawng turin ka chak tawk lo pawh a ni maithei. Tap ri leh thinrim awrawl chuan chu lai lî bakah ka vel chu a rawn khat ta bawk. Ka beng ka hup a, ka hrechiang telh telh bawk si. A mak hle mai. 

"Tu nge?" ring pa mangkawha ka tih chuan vawi leh khatah a reh nghal duak. A reh tlawk tlawk a ni ber e. Ka khur nasa ta hle mai a, ka meizuk lai pawh a thi tawh. Intihuaisen luiin ka dumbawm chu phawrhin meizuk chu khur dar darin ka siam leh a. Ka hawi hrek hrek bawk. Ka lungphu pawh rang tak a ni. 

"U Ngur.." ka beng bula rawn titu avang chuan ka per sawn nghal nawlh. Ka rak chhe viau bawk. Mipa chu ka ni naa, a hmaa ka thil lo tawn tawh vang nge ka huaisen lui thei ngang lo a ni. Sihdet chuan ka ên kual pawp pawp a, tumah hmuh ka nei lo. Lí pawh chu a rehin a ngawi vung vung bawk. Lui hnar lam zawh chho thei dinhmuna ka din tak loh avangin hmanhmawh takin ka let ta a. Ka inpal nawk nawk a, ka tlu lek lek zel. Ka hnung lamah hmuh theih loh thil chuan ka kal chak ang zel chuan min rawn umzui ve ni maiin ka hria. Lung ka rah búk te pawh a rawn rap búk ve zel si. Ka ding ta chawt a. Tuman min hmu lo bawk a. Ka thi dawn emaw thi dawn lo emaw patlinga pumpa chutia hlauhlawpa awm ngawt chu tlawmah ka la ta tlat a! Hnunglam chu hawi letin, "Tu nge i nih? Eng nge i duh?" ring zetin ka ti ta a. Tap ngik feih feih bak hriat ka nei lo. 

"U Ngur" ka bul maia ding ang hian min bia a ni. 

A aw lah chu ka hrechiang lutuk. Lapuii aw ngei a ni. Lapuii Vanlalchhandami aw a ni. 

"Lapui" ka ti tuar a. Tap ri chu a ring sauh. Lapuii aw a ni tih ka hriat rual khan ka hlauhna te kha lakbo ang mai an ni. Kum 3 liam tawha ka chán tak ka hmangaih Lapuii hian eng nge min hrilh duh a neih tak ang? Kum 3 hnuah daih hian engvangin nge hetia a rawn inlar?! A mak ka tihna leh a chhan hriat ka duhna chuan ka hlauhna an umbo zo ta a ni ngei ang. 

"Lapui, i sawi duh sawi rawh." ka ti leh a. Thawm chu a reh daih. Tap ri pawh a awm tawh lo. Ka hawi vak vak a, hmuh leh hriat ka nei si lo. Chutia chechang lo va ka din reng lai chuan, "Ngura nangmah i ni em? Vung vung che chuan" an rawn ti ta phut a. Ka va phu chiang kher em. Ka piah chakawk hmun atang chuan mi pahnih an rawn chhuak a, an êng ken ka lo hmu miah lo chu a mak! Ka ngaihtuahna in min kaihruai nasa deuh a ni maithei. Ka bul an rawn thlen chuan Pu Vana leh a nau fapa Zuala te an lo nia. 

"Khai! I va thlabar hmel ve. Tawn i nei em ni?" Pu Vana chuan ka hmai rawn ên pah chuan a ti lung lung a. Ka lo thle sawn vat. 

"Nei dang lo ve. Rul ka hmu pek a, thah ka tum a, a tleng bo hman sia" dawt chiang lutuk ka sawi ta ngawt a. 

Lui mawng lam zawhin zan len an rawn deng ve tho a lo nia. Ka lo den tawh si vangin kan inzui thla ho ta a. A tira ka innghahna kha kan thleng a. Ka chawfun pawh a lo dai thler tawh mai. Dar 10 a pel hlek. Hawn mai pawh a pawi lo. Ka ril a tam ta bawk a, Pu Vana te nen chuan kan ei ho ta a, chawhmeh pawh kan siam lem lo. Tam hnemah kan bar mai mai a ni. Sangha vànzia an sawi mawlh mawlh a, thei hnih erawh an lo man ve tho a. Ka thil tawn erawh a thawi tham pawn ka sawi lo. Hre ve lo se a pawina awm hek lo le. Chaw kan ei kham chuan zawimuangin khaw lam panin kan inzui hawng ta a. Ka rilru ka kawm nasa bawk a, ka tawng tlem kher mai. Mak an ti ve deuh maithei. 

In ka thleng a, ka nute an lo tho a. Ka sangha hawn an buaipui chhungin ka inbual thuak thuak a. Ka mu nghal daih. Ka awm a nuam lo. Chhungrilah min tham er ertu a awm. Ka chau ve deuh bawk nen, ka muhil ta bawrh bawrh a. 

"Hei, mama, i pang a va sa ve. Kha damdawi hi ei teh. Nizan khan i dik lo ka ti reng a" ka nu chuan min sawi nawk nawk chungin a ti a. Ka meng káwk mai. Ka hawi á ruai hman. Ka taksa chu a rawl thúm mai a. Ka sa huam bawk si, dar 8 a lo ri vah tawh bawk. Ka tho a, damdawi chu ka dawlh pawp a. Ka mu lehnghal. Vawt ka ti deuh bawk si, ka nu chuan, "La mu rawh. A zia lo em mai" tiin puan min sin thattir a. Min kalsan a. 

A mak hle mai! Ka damlo ringawt chu. Nizanah kha chuan engmah min thamtu a awm si lo. Ka ka tui lo zet chu ka tep chuap chuap a, Nizan lama ka thil tawn kha a bul atangin ka ngaihtuah chho ta a. 

Ka lo muhil leh daih aniang. Hmeichhe tawng lawng lawng riin min kai harh a. "Va lut tawp rawh. A la tho harh peih lo a ni maithei. I fel hle mai" ka nu chuan a ti a. Ka room kawngka chu a rawn inhawng zui nghal. Biteii a lo nia. Hmel nelawm tak hian, "I khua a lo sik reng a, ka lo hre si lo va. Apeki school kal kha ka lo zawt a. " a ti siam siam a. Ka ngaihsak loh nen a zahawm ve riau mai. Ka thaw a sa tawh bawk a. Ka inbeng tho ve a. Min lo pui vat. Ka lu chu a la hai angreng. 

"I va fel ve" ka ti ringawt a. Ka bulah a rawn thu ve zat, "Fel vang pawh a ni lo. I ngaihawm alawm" a ti sap a. Ka nuih suk ringawt. 

"Chaw ei la, ka va siam ang che aw" a ti hliai a. Ka ril chu a tam khawp mai. Mahse, "Ka nu a awm alawm. Tlem tal chu ei ka'n tum ang e. Tirawh, phei ila" ka ti a. Ka ding tur chu ka pai lek lek. Kan inzui chhuak a. Ka nu chuan ka pa kekawr tet a lo thui mek a. Min hmuh rual chuan,"Chaw ei rawh aw" a lo ti thuai a. Ka bu nghut ringawt. Ka nu chuan a siam vat vat a. Ka sangha hawn chu an lo hàng chhum a, a tui ka hawp teuh mai. Ka harh hawkin ka hria. Chaw tak chu ka ei tam lo. Biteii leh ka nu chu an titi siam siam a, Biteii hi ka thiante khan an lo hnualsuat ve mai mai a ni. Hmeichhe sual a ni lo, ka nu lah chu a kawm thiam si. Ka nu pawn a ngainat hmel hle. Ka lo lawm ve ringawt. Ka ei khamah Biteii chu reivak lo a thu ve leh a, "Kuhva rah a lo thleng dawn a, ka phei rih mai ang. Lo dam la aw. Chanchin min lo hrilh ve la" a ti a. Ka chelh duh bik lo. 

A kal hnuah, "Mama, mo hi ka awt ve viau tawh ania. Biteii te kha a fel kha le" ka nu chuan a ti ta chiah a. 

"Kan la inzui rei lo em mai" ka lo ti daih a. 

"Nupui pasal tur hi chu inzui rei leh inkawp ngheh pawh hi a lo ni ber lo a nia aw. Nupa tur hi chu inzui rei a ngai miah lo" a ti mial mial a. A sawi dik mahna. Mahse, tunah rih chuan ka la kim lo, nupui neih ka chàk rih lo. Nizana ka thil tawn kha ka hrilh ve dawn mawni aw ka ti rilru a, mahse, hmeichhia a ni sia, a hlauh ka rin vangin ka ngawi leh ta a. Tihtur awm hek lo, ka khawsik lah damdawiin min chhawk rih si. Mut lah ka ning si. Thenawm te inah te ka va leng ngawt a. Hnathawh loh chuan ni a rei duh hle ngat ngat mai. Tlaia Apeki lo bang chuan,"Miss-in 'tuition lo kal kher ngai loin, zanah lo riak thin la, ka zirtir ang che' min tia" a rawn ti a. 

Ka nu chuan, "A khai! Kan mu thei nang. I pa nen" a lo ti vat a. 

"Nia, Anu leh apa ten min ngai ang' ka tia" a lo ti ve mai a. Ka nute bulah hian a la mu ve ut bawk sia. Nakkum lamah chuan a pualin khum neihtir ve tawh a ngai a ni. Judy a sawi takah chuan a msg ka seen si, ka chhan si loh kha ka hrechhuak a. Ka phone ka ban vat. 

"Nizanah khan luiah ka kal daih a. Ka chhang thei lo che a nih kha. " ka va ti a. 

Zanriah ei dawnah min rawn chhang chauh, "Nia , a pawi lo. I dam lo a ni maw? " a rawn ti a. Engtin nge maw a lo hriat ni.

"Khawsik satliah mai mai ,hei ka tha tawh reng" ka ti a. 

"Kan i ngai lo tihna mi?" a rawn ti leh daih.

"Ka hre bik nang" ka ti ve ringawt. Ka zei lo ve sia. 

"Kan che pawh a inthlahrunawm" a rawn ti ve leh tawp bawk. Chhan ngaihna ka hre tawh si lo va. Ka dah ringawt. 

Ka ka a la tui loh deuh vangin zanriah pawh tihtham ka ei meuh lo. Zan len pawh ka tum lo. Lapuii thla rawn inlar dan kha a chhan ngaihtuah ka duh tlat. Ka pindanah ka tawm ta ngat ngat a. Phone pawh ka khawih lo, zantir khan Biteii chu ka bia a. Dik tak chuan msg type vel hi ka ning thin a. Call tawp mai zel hi ka duh dan a ni. Ka la damsam lo bawk a, ani pawh a vui lo turah ka ngai. 

Lapuii chu ka ngaihtuah leh ta a. A thih khan a thiante nen picnic tura kal an ni. Haiva lui nena inzawm, Haiva lui aia te hlek Saphai luiah a ni an kal. Saphai lui hi a khawkrawk ve lo va, a nuamin lî pawh a lianin han chen vel nan a tihchi phian a. A kam vel lah a zawlin a rem angreng si a. Thianho intihhlim nana kan hman ber a ni thin. Lapuii pawh kha an kal dawn khan min rawn thlap, kal ve tur ka nih laiin putea fapa nupui neihnaa talh tur vawk en a ngai tawh sia , aw ka lo pawh vek tawh nen. Ka pha kha a nia, ani pawh a thinrim lem lo. A thian kal vete ka han mitthla a, ka hrechhuak zo tawh lo. A thiantha tak tak te tih ka hria. Mipa pahnih an kal tel bawk, chupawh a thiante bialpa an nia. Kei nen pawh kan inkawm ve fo. An sawi danin Eirawng an bawl zo, inchiah dai tura a va kal kha a va tla ta mai a ni an ti ringawt a. A thiannu ber Asiami sawi hmangin, "Lapuii hi chuan tui hi a hlau ve a, a tirah pawh khan chen pawh a cheng lo. EIrawng a bawl daih a. Chuan khatia kan awm lai khan Lalrama te thianho lui hnar atangin an rawn chhuk ve bawk a. Kan infin titih. Lapuii eirawngbawl zo kha a lum a ti ve bawk si chu mi chen lohna deuh zawkah chuan a inchiah ve a. Bual pawh inbual nghal a tum nghe nghe. Mahse, 'Lapuii tuiah a tla' an rawn ti ta sia. Nghaka'n chhar tumin a va pan a, rin aiin lî kha a lo thuk si, Lapuii chu a rawn làng tawh a. A tla tih an hre tlai hle tih a lang. An lak chhuah chuan a lo thi fel vek tawh. An buai ve deuhin an lo ngaihven hman bik si lo kha a tla ang a, tuman an lo hmu bawk si lo nen, tikhan mangang takin a awm tihna a ni ngei ang. Ka lainat takzet a ni. A thih danah thil dik lo a awm deuh em ni ang? Khatia kum 3 hnuah a rawn inlar tak. A thih sarhu lai khan a thla tal ka hmu mahna tiin a thlanah kha chen ka riak a, eng thawm thangva leh eng thil mah ka hmu lo a ni. Eng emaw tak zawng a ni ngei ang le. 

" U Ngur" Judy msg teh ngawt chu!

"Eih " ka ti ve mai a. 

"Biteii hi ka ngei" leh hmiah mai a! 

"Engah maw?" ka va ti a. 

"Ka hre lo, ka mil lo ve tawp. " a la rawn ti deuh deuh. 

"I thik ni maw?" ka ti a. 

"Thik tham a nia mi? " a rawn ti sak. Sawi leh tur ka hre lo. Judy mizia hi a mak e. AN hausak tehlul nen han inlakna leh induhna em em a nei bawk si lo, An fak viau mai si. Khawpuia thawk thei reng tur, thingtlang khaw mawngpingah a rawn awm bawk. A chhungte dang tuman an rawn tawiawm bawk si lo. A mak ve riau, ngaihtuah chian chuan. 

Ka mutui lai chu ka hminga chiang zeta min kotu avangin ka harh hlawl mai. Ka meng nghal káwk bawk. ENgmah ka hmu lo. Ka va zung a, thla chu a lo eng hle mai. Dar 1 a pel fel awrh naa, kan khua angah chuan kan mu hma a, tlai viau tawh angin a lang. Ka mu leh chiah tihin, ka phone a rawn ri a. Ka va phu chiang tak. Tun ang hunah te chuan a..Judy a la ni zui! 

"Hello" ka tih rualin,..

"U ngur, ka hlau. Khawngaihin lo phei hram teh" a rawn ti ta mai a. A hlau tih chu a aw atang pawn a hriat. 

"In chungah riak mai la" ka tih chuan, "Vawiinah khaw thenawmah an kal a, an riak nghal daih alawm..vat vatin. Lapuii ka hmu asin" a rawn tih chuan ka váwt sung sung nia! Eng nge ka thil tawn hi a awmzia ni ngai le?! Thawm dim takin ka insiam a, zawitein ka chhuak ta a. A vawt hawk hawk mai, ka kawrlum chuan ka intuam tha sauh sauh a. Judy in lam chu ka pan ta hlawk hlawk a. A rehin mi zawng zawng chu an muhil tawh niawma mawi a ni. 

Judy in kawngka ka hawn rualin, "Engvangin nge kei kher?" Judy tawng ri ka hre zui. Ka thawm avangin Judy pawh a ngawi hmak a. A rawn chhuak nghal var a. A hmai a dáng var pap a. A mitmeng chu a dava riai bawk. Kan indinchilh ran a, mit khap lék lo va kan inmelh tawn laiin eng thil emaw hian min kalpel fua a. Kawngka chu a ri nghal khap bawk...Judy hi Lapuii'n a tlawh a maw?! Engtin?! 

(Silipar khing bo hi a ho duh khawp mai. 😒