Judy 3

MISS JUDY (3)

Ziaktu: Toni Râlte

Pu Rinliana in sakna lamah Vena nen kan inzui leh ta a. Zaua te chu ka pui ta lo mai. Pu Rinliana'n min ngenna a rei ve tawh bawk si a. Pu Rinliana te in hi Judy in luahna te thenawm lawk a ni a. Hnathawk ho chu kan vaiin paruk kan ni a. Nizana kan chanchin vel kha an lo hre ve nge ni, min fiam min fiam hlawm a. Nuih a za vak lo. Tukthuan ei lai pawh khan ka pain a sawi deuh a, mahse, thil nihna dik tak ka hrilh a. An sawi zawm lem lo. Vena chuan, "U ngur,i nawp nek lo anih kha. Saw pa saw ka ngei a nia, insawithei si. Chapo si" a ti sur sur a. Ka khi suk ringawt. 

Pu Lalliana te thenawmpa Pa Vuana kan tih mai fiamthu duh leh kawm nuam zet chuan, a kut phaha sahdah tam zet nuai sawk sawk pahin,"Nizan an rawn hnar haw khan an ri hlut sia, kei pa hawkdák tih takah kawtkai atangin ka va thlir ve a, i hming ber kher kha a lam sia, mak ka lo ti viau a. A pa lah khan zilh a hnekin a lo vuipui a! Hmeichhia vanga khatia buai kha i duh dan chu a nih ka ring hauh lo va. Kan miss thar pawh a zak ve riau ang..Zingah pawh khan RInpuia chu a la inhrosa kuk kuk mai" a ti nuah nuah a. 

"A zia lo ngawt mai. Hmeichhe inchuhte pawh kan ang alawm" ka ti mai a.

"Miss thar chu huháng a nei lian nghal riau mai a..Ngura, nei daih rawh. I mistiri bungrua hi kei ka lo khawm daih ang a" a ti liam puat a, an nui dar dar mai. Judy ka ngaihtuah chuan ka táwt thut! Nizana engmah sawi hlek lo va min enliam ngawt kha ka lai a na ve deuh chu a ni. Thudik hretu a ni miau si a..Rinpuia a tawng thei si a , thudik hre lem lo chuan a hma zanin Judy nen kan lo inzui ve tawhnaah ,"Ngura hian judy a ngaizawng chiang" an ti ngei dawn niin ka hria a. Tlawmah ka la tlat..mahse, hmeichhia anga han inchhal pung pung kha zahthlak ka ti bawk si. 

Chhun chawlh laiin Naupangho an lo bang a, Judy pawh Headmaster nen an rawn chhuk dun ral ral a. Ka en duh lo lui tlat. Ani pawn min en ka ring lo. Chawhnu lam chu ka ngawichawi riau. Bakah sawi tur em em hi ka hre lo bawk a. Hna bang kan haw lam chu Hruaii patea Pa Thana kha kan tawk a, ka mumang kha ka hrechhuak leh. Mak chu ka ti a ni. Pa Thana hmel a hmuh vang ni maw, Vena chuan, "U Ngur, Hruaii thawm an sawi vel hi i lo hre ve em!" A ti zawi sup a.

"Hre nang..engtin nge an sawi?" Ka ti a.

"Ka nau pawn a sawi a,ani hi a han riak ve a. An ar te pawh a khawih thin niawm tak a ni. Chuan, nizan khan kawngka kha inkalh vek si kha a rawn inhawng thuai an ti bawk a. ka nau phei chu a riak ngam chiah tawh lo nge, Zanin pawh a pawnthuah la turin ka riak dawn a" a ti mawlh mawlh a. Ka mumang nen ka la zeldin kual zel a. Hruaii hian eng emaw min hrilh duh leh a thih chhan hi khaw mite min hriattir a tum em mawni dawn le..

"A zia lo hle mai. Mahse, ngaihbel hi a awm ve thei tho asin. Zanina i riah dawn chuan lo ngaihven ru chhin teh" ka ti a. A bu ve nghut mai. Ani hi a naupan ang aia ram hrat leh ngawltawt a ni ve a. A huaisen phianin ka ring.

Ka inbual zawhah zanriah kan ei nghal a. Ka nuin, "Rinpuia nen inbuaina chu a thang mawi lo hle mai. A nu a kamtam si, a lo sawi darh nasa mai a. A zia lo ka ti em mai. Engtia han tih chi nge mawni dawn le" a ti bawrh bawrh a. 

Ka pa chuan, "Aa..engmah sawi ve a ngai lo. A hmeichhe thu hla em mai. Mi pangngai chuan engahmah an ngai lo vang" a ti hmiah mai. Ka pa rilru chu ka tawmpui. Mahse, ka rilru kil khatah, 'Ngura'n Judy a ngaizawng a, Rinpuia nen an inkar tihchhiat nan dawt a thehdarh" an tih erawh ka hlau ve tho mai. Miss Judy lo awm chuan boruak a siam nghal hat chu a nia. Amah lah chu a a hawi valh valh mai si. Mipa e ti lo chuan ka ngei riau. Kan ei kham phone ka en chu Biteii'n leng turin min lo sawm a. Nizanah khan ka thinrim lungpuam khan ka bem ve tak kha mawle..a va ho e aw. Mahse, hawihawm lo zeta bansan leh mai chu ka hreh ve bawk si, bakah Judy ngaizawng anga miin min ngaih laia Biteii nihpui zaih chu a tihchi dawn riauin ka hria. Biteii lah a lo chhe em em bik lo bawk a. 

Nu Chami in atangin keimahin Biteii te in lam chu ka pan a. Buanga leh Rema te chuan Judy an rim dawn a niawm e. Inleng a neih peih loh thu kha ka sawi duh ta bik lo. Va chimbuai hut hut teh se. Rinpuia te pawh ka tawk, mahse, ngaipawimawh lo zetin ka ka kalpel. An ni pawn eng an sawi hran lo. Biteii te in ka thleng a, dawrah a lo awm a. Ka lut ve nghal. Min lo nuih var var a, ka hmu duhawm ve ta riau mai. Ka vawiin hna te min zawt siam siam a. Panhnah a roll a, tihtur a awm lo bawk a, kuhva rah chu ka thelsak ve a. Ka zei lo lutuk chu kan han nui leh rih thin. Eng em em kan sawi lo, mahse, kan inpawh riau mai. Ka lo bel chiang ngai lo va, a felin amah rawn dawrtu te chu tha tak leh nui sángin a lo dawngsawng thei zel mai. Hei vang hi a niang, "Biteii kuhva chu a tui bik" an tih fo ni. 

"Rinpuia nu te ho an kamtam sia, khuaah i darh vek tawh ania" nizan kan buaina chu a sawi ve ta chiah a. Ka nui huk a, "Mi pangngai chuan an awih chuang nang" ka ti ringawt.

"Judy nen khan a hma zan khan in inzui ve bawk sia, mi thenkhat tan chuan rinhlelh a awl ngawt ang" a ti a. A thusawi chuan awmzia a nei deuhin ka hria. Mahse, "Nia,amah Judy ber khan thudik a sawi mai ka ring a, a sawi si lo va" ka ti ringawt a.

"I ngaizawng emaw ka ti hman a..kei pawn" a ti ta mai a. A hmel chu ka va en a, thinrim hmel erawh a pu lem lo. 

"Nangmah nen kan inzui tih an hriat hunah an ngaihdan a dang mai ang" ka ti ta a. Chutia amah nen nghet anga ka awm avang chuan a lawm hmel ta deuh. Dawrtu neuh neuh a nei kal reng a, thutak pawh a sawi hleihtheih loh. A dawr hi a lian lo naa, amah a fel leh a hawihhawm em vang hian an pan ve bawk niin ka hria. Ka lo belchiang ngai lo va, han inthutchilh takah chuan ka awm ve vanga a insum nge chu ka hre lo va, sawiselna tur ka hre miah lo mai. Dar 9 a ri hnai tawh tihin, Judy leh a nau tleirawlte kha an rawn lut hlawl mai. Kan inhmuh chuan ka meng phawk deuh maithei. Ani erawh a danglam hran lo. Eitur nepnawi an lei teuh a, Biteii chuan a lo be siam siam mai.

"Ka nau hian naktukah min hawnsan tawh dawn a, inthlahna kan nei dawn a nih hi" Judy chuan a ti mai a. A nau erawh a tawng ve lo. An chhuah dawn chuan, "U ngura chu i thianten a bialnu a rim an tia..Biteii nen hian inlo inngaizawng reng a ni maw? " a ti khawl mai a. A sawi dan teh tawp chu a frank mah mah a, min tihamhaih deuh. Ka nui ringawt, ka chhan ngai loin Biteii chuan, "An sawi dik anih chu" a lo ti a. A nui naa, a nui hmel chu tilui a ang riau. Judy pawh a nui ve, "In inhmeh tawp" a ti a. An chhuak zui nghal. A chhan ka hriat si loh thil eng emaw chuan min tuam a, ka lungawi lo a ni ber mai. Biteii chuan ka danglam tih a hria ang tih ka hlau si. Ka tawng lui vak vak ringawt. Nula fing tak a nih chuan a hrethiam tho ang. Kei pawh hawn lam ka hnaih chho ta a. Vawi khatnaa rei tak len chu a inthlahrunawm ka ti ve tho bawk. 

Mut hmunah Biteii nen kan intext zauh zauh a. Group msg ka en kual pah bawk.

"U Ngur" number hriat loh bawk. Dp a nei lo, a hming erawh 'Judy Khawlhring' tih a nih avangin kan miss Judy a ni tih ka hre ve mai. 

."Eih" ka va ti teh tawp a.

"Rinpuia vang khan ngaihdam ka dil e" a rawn ti.

"Thiam lohna i nei hleinem.." Ka ti ve a.

"Thudik kha sawi ka tum lo pawh a ni lo. Mahse, a sawitu dik tak kha kan zingah khan a awm ve kur sia, nuam lo a tih ka hlau a" a rawn ti duah a.

"A ho lutuk. Mi pangngai chuan min ringhlel chuang lo vang' ka ti a.

" Nia, Rinpuia kha a tawng thei sia, hrehawm i tih ka lo hlau a" a ti ve leh mai a.. Ka reply tawh lo. Kan inbiak zel a tulna ka hre hran lo. A laka ka lungawi lo ve ringawt chu a chhan niawm ka ngaihtuah a, Biteii nen 'In inhmeh lutuk' a tih vang kha ni berin ka hria. Lawm zawk tur nisi, ka lawm hlek si lo. A number pawh ka save hek lo. 

A tukah a ngaite bawkin Vena nen kan inzui chhuak leh ta hnak hnak a. Sawi tur a ngah nasa mai. "An lo sawi kha dawt a ni hauh lo. Nizan chu kei pawn thawm ka hre nasa ve mai. An kawmthlang huana theihai leh lamkhuang kungte kha a insawi nasa asin aw. Chuan, kawngka pawh a rawn hawng leh a. Keimah ngeiin ka va kalh leh a, zing dar 3 bawr velah chhuata tei thawm kan hre leh bawk. Rawlthar zual phei chu an tlaivar hialin ka hria, kha kan inpuchhuak fai ta deuh vek, Pu Fana leh K'u Bawla te chiah an riak tawh" a ti ta mawlh mawlh a. Hruaii chungchang a nih chu. Thalai boral hi chu a mi den dan a dan bakah an thla te pawh hrang tura ngaihna kan nei deuh thin a. Ka mumanga ka lo hmuh thawi tawh vangin mak ka ti em em lo.

Pa Vuana lah chuan, "E! Ngura, Rinpuia i lo khawih zal deuh lo hi chu pawi ka ti mang e. Tukin ka huan hung a pa nen kan inkhak fak a, ka ramah zawngtah a rawn phun a, Ka hung hnan si kha an lawm lo nasa mai a. An pafain min han cho ta ur ur mai kha a nia. Kan nuin min chelh hle lo se chuan an pafa khan ka khuainuai ang ka ti hman a. Saw, an milen saw an chhuang ve hle a nih awm saw..Rinpuia pawh a tawng chopa ar ar ngei mai" a lo ti sawt sawt a. Mak ka ti hauh lo. Pu Lalliana ram duhzia leh an kawmthlanga vantlang kawng pawh hauh vek duh, Vantlang kawngin a dal tawh hnu pawha a thlang la hauha la hung hram hram duh kha a ni miau a. A duhamzia leh a dawr thil to bikzia pawh ka hai lo. Tunah phei chuan an inhralh tha vak tawh lo vang. Dawrkai an awm belh ve zel tawh si a. Mahse, Rinpuia te lam hawiin tawngkam ka cheh duh lem lo.

Chawhnuah ruah a rawn sur thut vangin a chhung lam khawih theih ang ang te kan khawih ta ringawt a. Mahse, a sawt viau lo. Ban hun aia hmain kan bang ta daih a. Mahse, ruah chu a sur nasa riau a, do haw ngawt chi lah a ni si lo, kan nghak ta hlawm a. Ka phone ka han en chuan, Biteii miscall a lo awm ran a. Ka call back ve a, "Hei Tualpuiah ka zin thut a, call i la thei si lo va..ka rawn hrilh ve duh che a" a ti a. Inreport deuh thlap thlap a ngai tawh a nih hmel..hehe.. Kei lah ka serious tehchiam si lo. A nu nau a nuteii fapa a boral thut a niawm e. A zia lo hle mai. A cham rei maithei lehnghal. Lenna tur ka van leh dawn anih awm chu! Pawi lo. Nula rim kher lo pawn ka tumtawi zing ve tawh em mai. 

A han hlek hnu chuan kan tlan haw a. Ina ka va lut chu ka rin loh deuhin Judy a lo awm ve nia! Fel átin a lo thu a. Apeki pawh an miss a awm vang em mawni a lo thu tha thân mai. "I lo leng a ni maw?" Ka ti ringawt a.

Min chhan hmain, "Kha! Thupha a rawn chawi a nih kha. A tul lo asin aw" ka nuin a lo ti a.

"Eng thupha maw?" Ka ti nghut a.

Judy chuan, "Rinpuia nen inchungchangah mawle..vawiin lamah sawi a tam lutuk a, nuam ka ti lo em mai. Ka rawn kal tawp" a lo ti dam thlap a. Ka va melh zauh a, "I va ho e aw. Engahmah ka ngai lo ka tih kha.." Ka ti a. Ka thawmhnaw huh chu bathroomah ka khai luta. Towel vengin ka va chhuak leh a, "Chaw ei ve nghal la" ka nuin a ti a.

"Aih, ei lo vang. Ka va haw phei ang a. U ngur, Rinpuia te pawh ka hrilhfiah tawh kha aw. Nuam lo ka ti ve deuh a. Keimah vangin i hmingchhe vak sia" a ti a. 

"Hmm..rilru hahdam deuhin awm rawh. Ka thinrim lo" ka lo ti khawmawi ve a.

Verandaa thleng ka va thlah ve a. "I nau chu a haw ta mi!" Ka ti a.

"Aw..ka khua a har khawp mai" a ti sep a.

"I khua a har rei lo vang..an rawn rim leh huai huai mai ang che" ka ti a. Elsen zawngin ka sawi hran lo. Chiang zeta min rawn melhin, "Lo leng ve la" a ti zawi sap a. Ka hamhaih deuh.

"Aa..ka hnawk palh ang" ka ti bah nak a. A ner sak, nui chung hian, "Tak taka Biteii'n min thik palh ang. " a ti chang rât a. A kal zui nghal. Ka thlir zui reng a, Judy ka hmuha ka biak hian ti nge maw ka danglam ve ziah ni! Ka ngaizawng deuh tih chu ka inhria. Mahse, pumpelh nan Biteii pawh ka kawp phah kha a nia. A chhan chu bialpa a nei tlat! Tin, amah vangin Rinpuia nen kan inhmuh thiam loh phah bawk. Ani leh kei chu ni lo e..ka lut a, ka inbual nghal sar sar. Zanriah kan ei laiin Hruaii ka mumanga ka hmuh dan kha ka sawi ta a. Ka nuin a thawm an hriat vel thu a sawi vang a nia..ka pa chuan min rawn melh vung vung a.

."A mak mang e aw..eng emaw tak tihtur hi chu i nei niin ka hria" a ti ta a. 

"Pu Thana saw ka enthla dawn mawni te ka tia" ka lo ti a.

"Thana saw pa sual tak chu a ni hauh lo va, chutia i sawi takah chuan a boral tih kan hriat tirah ka han kal ve te khan a hamhaihin amah kha ka ngaihbel nge a za deuh ruai mai niin ka hria.." a ti chuar chuar a. Kei pawn ka ngaihbel zo vek tawh. Mahse, ka kuang lo nawr mai mai ka hlauh vangin ka ngawi zui ta daih a. Zanriah ei khamah Nu chami in lam ka pan leh ta a. Rema leh Buanga chu an lo thu ran tawh a. Zaua chu nupui nei mai tur a ni bawk a, a lenglam vak duh tawh lo a ni maithei. A awm ve tho e. 

Buanga chuan,"Ngur, Biteii nen in ni ve ni maw? Ka nauin a sawi a. I va inzép thei ve" a lo ti a. Ka khi suk ringawt. 

"Nia..a lo fel riau a" ka ti ve ringawt. 

"Mahse, hman deuh khan mi pa vangin a mualpho hrep tawh kha." Rema chuan a lo ti var a. Hei hian mipa te hi mi ho leh nawi mai mai pawh ni ila, hmeichhia kan lo chîkzia hi ka hrechhuak. Ni e, Biteii hi nikum hmasa khan sawi deuh chu a awm a. Kan khaw thenawma Doctor nen sawi an kai ve hat a niawm e. Kei chu ka ngaihven loh zawng lam hre lo ve tak ka ni a, an sawi thawm hre mah ila, amah Biteii kha ka lo belchiang lem lo nen,. Ka lo ngai serious vak lo a. 

"A rei tawh em kha" ka'n ti ngawt a. 

"Chupawh nise, Hmeichhe nasa ve tak an ti tlat asin" Rema chuan a ti leh zel a. Thian inhmangaih tak kan nih hlawm vangin kan induhsak luatah sawi hreh leh i kan nei vak ngai lo. 

"Chutiang pawn ka lo hre vak hleinem" ka ti ringawt a. 

"A inthup ve ang chu, kha doctor kha mi pasal a ni tih hre reng chungin a hnar lo va, a chhungte pawh sawn an duhpui an tia..mahse, doctor nupui khan a rawn awmchilh ve ta hmak sia, an inthlah ta chauh an tia lawm" Rema chuan a ti leh bawrh bawrh a. 

"Aa..kan innei dawn tihna a ni hleinem" ka ti hluk a. 

" Chupawhnise, Kei chu Judy saw bem la ka ti. I phu lohna ka hre miah lo" Buanga chuan a lo ti sup a. Ka nui huk. Nu Chami thingpui sen háng hawp hruih pahin,"Rinpuia kan ngam lo vang" ka ti sup a. Awmzia a neih avangin kan nui hawk hlawm. Dar 8 rik hma deuhin kan chhuak a. Judy ina len an rawt tlat mai si a. Han hnial tung kha ka hreh ve si. Ka zui ve ta nge nge a. Kan va luh chuan Dina te thianho an lo awm ve a. An ni hi chu phawk leh ho ve tak, manners erawh hre em em lo an ni a. An hnawksak em em chuang lo bawk. 

Judy chuan tshirt hring dal raih, a nghawng V a ha a. Kekawr arh hlei hluai a ha bawk. A inhmeh phian zel mai. Kan va lut ve chu mak a tih hmel deuhin ka hria. Thutna awm ang angah chuan kan thu ve a. Kan chëp khawp mai. 

"U Ngura chu in nu a zin daih vang a ni maw?" Hruaia chuan a lo ti phawng mai. Engtin nge Biteii nen kan chungchang chu an lo hriat leh vek hman le. Thingtlang tih takah thil hi a darh hma ve bawk a ni. 

"Ni mai e mawle" ka ti ve nghut a. Judy ner sak lai ka va hmu zuai. Nge ka ngaihbel zawk ni. Mahse, thu han khuh kuala han sawi kual vel hi ka thiam loh zawng tak a nia. Ka pehhel vel peih lo. 

Dina chuan,"Hruaii thlahrang hi in tawng ve tawh em?" a ti hlawl mai a. Judy chuan,"Chutiang sawi s'uu..mahnia awm ka nih hi" a lo ti hliai a. 

Mahse, Vana phunglung zet mai chuan,"Nizan hmasa kan chakai chhitin kan tawn kha chu ka hlau ve reng mai. Mipa hi a lo pa vak theih loh" a ti lung lung a. Thla an tawn dan chu an sawi hmiah hmiah mai. Judy chu ka va melh a, nuam a ti lo va, a hlau tih ka hrethiam si. 

"Dina, in lo-ah khan sanghal kha a chhuak leh tawh em?" ka ti ta daih a. Hawihai fe hian,"Tun hnai chu ka pa hian a sawi leh miah lo. A reh rih a niang" a ti ve mai a. Judy chu thingpui lum turin a tho tharh a. A va lum rak rak a. Keini pawh thudang sawiin kan titi mam mam mai. 

Thingpui chu a hang kan in a. A lum tak mah mah. A sen hi chu han dal raih se a tui thin. Dar 10 a ri dawn ta mai a. Hawn ka ruat a, Judy chuan,"La haw lo vang. Inhaw rual vek ang chu" a lo ti vat a. Kan hawn hnua la kawm leh kha a chak vak lo niin ka hria. Dina te lah hian len chin tawk an lo hre lo ve thin nen. 

"In school naupangte chu eng nge an an dawn awm a?" ka han ti khawmawi a. A khi sak a,"An tha reng, an ninhlei reuh tawp a." a ti mai a. 

Chutia kan ngawih deuh dúk lai chuan, Information mike atangin chhiat tawh thu an rawn puang ta tlat! Hriat a har deuh vangin Buanga chu a va chhuak tharh a. Kan lo ngawi ve thap tho. A rawn luh leh chuan, "A va mak bawk ve mawle aw. Pu Thana a boral a nih chu. Hmanni lawkah a u fanu a thi tawh bawk sia" a ti lawng lawng a. 

Ka rilru a dek zawk. Mahse, ka hmelhmaiah ka lantir duh lem lo. Dina chuan,"Miss Judy, kal ve i tum em?" a ti a. Beisei nei zetin a melh bawk. 

Thawk la halhin, "Ka awm a nuam vak lo va, zanin chu ka kal lo law law mai dawn mawni ka ti" a lo ti a. Keini chu kan tho sang sang a, Pu Thana te in singsa tur chuan kan chhuak ta a, Judy pawn min chelh tawh lem lo. Dina te erawh an la thu tho mai. Pu Thana te in kan va thleng chu tap thawm a nasa hle. A nupui leh a fate chu awrawl tawp tawpin an lo tap a. In pawh chu kan han singsa zung zung a. Chutia a dam loh pawh kan hre si lo, amah Pu Thana chu an lo zalh tawh a. A thih chhan kan hre der bawk si lo. Han inzawh sur sur chi ni nghal lo chuan. Kan che zung zung a, kar loah kan inchingfel a. 

Kan han thut fel hnu deuah chuan an bial upa rawn dingin tawngtaina a nei a. Chumi zawhah Hruaii pa kha a rawn ding ta a. 

"Hei le! Chhiatna bawk kan tawk leh ta chu a nia. Ka nau Thana boral hian min thawng hlein a rinawm a. Keini a chhungte tak pawh min thawng hle a ni. Vawiin lamah pawh an huanah kalin engmah that lohna em em a nei hran lo. Zanriah ei khamah pawh khan kan inah a rawn lut zuk a, a chhuak leh nghal mai a. Tichuan, an mut tawh hnu khan a muhil reng emaw tih laiin a rawn thaw hawk a, an nu sawi danin a hrawk a ri ta bawrh bawrh mai a. A tawngvai zui ta bual bual bawk nen, an nu mangangin min rawn kohtir a, ka zuk thlen thlak chuan a lo thaw tawh lo va; a mar ka dek vat a. Ka hmu zo lo. Engmah inrinlawkna pawh min siam miah lohin a kal ringawt mai a ni. Kumin kumtir atang khan a luhai leh rit bur reng kha a incheckup a, a BP a lo sang ve a lo nia. Kei chuan a BP che thut a nih ka ring ta ber mai. Thihna hi kan thunun zo si lo va. A pawi ngawt mai. He laia tlawmngaia lo kal zawng zawngte chungah lawmthu ka'n sawi nghal a ni e" a ti dap dap a. Pu Thana chu a khawngaihthlak hle mai. A hmaa ka lo rinhlelh rukna erawh rilruah a chambang reh hleithei lo va. Hruaii thla hian a tibuai ve em mawni zawk ang..nge a BP te chu a sang thut tak tak zawk..aaa, ka ngaihtuah tur pawh a ni ber lo ve a. Kan section lam a ni lo bawk a, ei leh in leh buaipui ngai lam chu kan khawih ve lem lo. Kan thu a, kan zai deuh tlawk tlawk ringawt. Inah ka haw kawi si lo va, zan a han rei takah chuan a vawt tan riau mai a. ZIng lamah chuan a hrehawm deuh dawna ka hriat avangin Rema leh Buanga te chu hawnpuiah ka sawm a. Vawt an lo ti ve nge ni, kan chhuak ta a. In lam pana kan kal mek laiin Judy leh an thenawm nula Mateii te kan tawk a. 

Kan inbe luam a. Judy chuan,"Nih chuan inah kan lo nghak ang che u. Min lo sawm u la" a ti a. Kal a tum lo kha a ni sia, Dina te pawh kan chhuah khan pawnah ka hmu. A rilru a thlak leh a ni maithei. Hmanhmawh takin kan inthlak a. Kan kal leh ta nghal a. Judy te chu sawm phei lehin kan kalho ta a. Ka bulah hlir a la kal zui! He nu hian min ngaizawng mawni le..emaw ka bulah himin a inhria a ni phawt ang a. A tha vek mai e. Bialpa a nei tih ka hre kur reng chuan min titui lo. Biteii chu awm ve se kan kal dun awm sia. In chhungah chuan kan va lut a. Dina te thianho lo meng ráng pawh chu ka hmuh hmaih lo. A ho em mai. 

Lumen zanah hi chuan kan inthutpawlh ve thin tho bawk a, Judy chu ka bulah a thu a. A hnung lamah kan insawn leh ta bawk nen. Kan langsar tehchiam lo. Zai lai chuan, "Kal kha i tum lo emaw ka tia" ka ti a. 

"Nia, DIna te khan min nghak tlat ang tih ka hlauh vang a nia. Nangni lah in chhuak vut si" a ti sap a. Ka nui ringawt. Ka rin ai daihin hla a hria. A zai thei phian bawk. Nula thenkhat ka lo ngaih dan leh hmuh dan ang lo takin phone khawih ruk emaw zai duh loh emaw a nei ve lem lo. Kei atak zawk chu ka zai vak lo, ka englo thenna lam ni hek lo le. Eitur an rawn sem lai chuan zai hleihtheih a ni lo a, kan ri deuh mar mar mai. Ar sawhchiar chu kan pir a, Eitur dang a kente nen kan mix a, a tui reuh phian. 

"Biteii awm ve se i ti awm?" a ti sep a. 

Va melh káwk pahin,"Ka tih em em pawh ka hre lo" ka ti sup a. 

"Min thik ang e aw" a ti leh a. 

"A ho e. Ka lo sawifiah vek ang" ka ti leh mai a. A khi sak ringawt. 

Tiang chuan inbe lem lo mah ila, khaw var thleng chu kan thu ho a, vawi khat zun zunga kan chhuak tih loh chu kan awm tluan parh e. Zing dar 4 bawr velah kha chuan a muthlu ve lák lák a, ka dar te pawh a rawn ngheng thuak thuak. 

A in pengah chuan kan ding dat a, mutchhuah hmel zeta min rawn melhin, "Zanah min lo sawm rawh aw" a ti sep a.

"Aw le.." ka ti a. Min chhuksan ta a. Rema leh Buanga lah chuan, "Bem teh..a duh che" an han ti ngawt a! Bialpa a nei si. Bakah kei pawn bialnu ka nei. 

Thlan kan han lai hi mitthi phumna tur lai e ti lo hian kan hlim viau zel mai hi sual leh mawl vang ni pawn ka hre lo. Fiamthu kan han thawh a, kan nui ham ham zel mai. Kan thlan lai pawh chu kan hlim leh viau e. Kan khaw pathlawi phawk zet hian, "Miss Judy chawn varzia khi chu aw...han kheuh ril zel ila, mizo hmeichhe dang ang bawk hian a lo máwk ve viau tho ang em le?" a ti ta pek a. Kan nui ham ham mai. 

Tlangval senior U Zàma pawh chuan,"Ani pawh khian tunah chuan kan khuaah amah phutawk a hmu lo maithei, kum hnih khat a awm hnuah chuan a tu amah hi min phu bik tawh kher lo vang" a lo ti ve fuk fuk a. A sawi dik lo miah lo. Awmna leh chenna hmun azir hi a ni ve tak tak alawm. 

Judy chu an lo notice ve hle tih ka hrethiam mai. A tam zawk hi chuan phu loh leh cho loh enin kan en a. Amah rim ngama nel ngamte pawn an zuam vang lam ai mahin a tawngkam tha kan um vang zawk a ni maithei. Ruang a rawn thleng a, kan phum fel a. Kan chhilh leh thlap hnuah kan haw ve ta a. Ka chau ve riau mai. Ka inbual a, ka mut chuan ka harh loh phah vek ang tih ka hlauh vangin ka meng tlang a. Zanriah ei a hun ve leh thuak bawk nen. Phone ka khawih ve ta mai mai a. Biteii msg chu ka open a, "Ka thleng ve deuh chiah e. Zanah min lo sawm la aw" a rawn ti. Judy ka hrechhuak nghal. Sawm ve tho kha a ngai dawn sia, Biteii te ho nen kan kal tlang tawh mai a niang chu. Zanriah kan ei khamah ka insiam zui nghal. 

Zaua pawh a rawn tel ve thei tawh a. Kan pali chuan kan phei a. Judy chu kan zu sawm a. A lo inpeih thlap tawh a. A simple leh hle. Biteii te in kawt kan thlen chuan, " Ka'n sawm lawk ang e" tiin ka peng zauh a. Kawngah min lo nghak hlawm a. Ani pawh a lo inpeih tawh a. Kan kal tlang ta a. Biteii leh Judy chu an inbe mang lo. Min intitatu takin Biteii chuan ka banah a kai deuh hmak a, zawitein a phun ser ser bawk. Judy erawh ngawi rengin a kal a, Rema nen an inbe ve leh zauh. 

Zai a nuam vak lo. Kan hul riauin a lang. Hmeichheho nen kan thu hrang tawh a. Judy nen chuan kan mit a intawng thei riau lehnghal. A meng thip lek lek a, a zai erawh a zai reng. Biteii nen an thu dun rial bawk si. Hawn kawngah Biteii chuan,"I lo leng kawi ang tiraw?" a ti sar sar a. 

"Aa..ka chau ve riau a, zanin chu ka lo peng kawi lo mai ang" ka ti a. 

Thinrim hmel pawh a pu hran lo. "Judy chu Rinpuia vang khan i mualpho ta zêk sia, a zia lo hle mai. " A ti zat zat a. 

Judy chuan,"U Ngura zawk alawm mualpho, a pawi ngawt mai" a ti hul hak a. 

Rema te chu melhin, "Thingpui chu in lo in kawi dawn maw?" a tih zawm ve zat a. 

Rema te lah chuan,"I lum peih chuan pawi lo" an lo ti si. 

"Peih tehlul e" a lo ti hmak. Biteii chu a lungawi tehchiam lo tih a lang, han tih vak dan ka hre si lo. Kan inmang tha ta rih a. Judy te inah erawh ka peng ta bik lo. Ka chauh ve bakah Biteii laka insawifiah vel kha ka peih lo. Ka mu chiah tihin, "Nizanah pawh inthu dun tlaivar thak a, Miss meuh chu kan khan lo hle aniang maw?" a rawn ti ta chiah a. Ka ner suk ringawt. 

"Kalpui a nei lo va, kan kalpui ve a nih kha" ka va ti mai a. A ni reng bawk a. 

"Zaninah pawh kan ina pen ai chuan a ina pen i thlan zawk kha" a rawn ti leh a. 

"Ka peng lo. I duh leh Rema te i zawt thei ang. Ka mut a chhuak riau, muttui mai aw" ka ti zung zung a. Ka dah a. Ka mu nghal daih. 

Zinga Judy msg chuan mood a tidanglam angreng. 

"Ka ngaizawng che emaw ti hian min lo pehhel aniang e. Ka ringtawk che a, i bula hima ka inhriat vang chauha hnaih che ka ni. " tih thu chu..A lawmawm dan a lawmawm loh. Min rintawkna chu a hlu, mahse, min ngaizawng emaw ka ti anga a ngai erawh a nuam vak lo. 

"Bialpa leh bialnu kan nei ve ve a. Inrintawn chu a tha, a bak kalpel lo ila a tha mai" ka va ti ve ngat. A seen a, min reply tawh lo. 

Chhun lam chu thlan siamna lama kal duh viau mah ila, kan in sak a laklawh angreng sia, kan chhunzawm a. Vena a ngawichawi riau mai. Mak ka ti deuh a, "I va ngawi thei ve, i mood a fuh lo ni maw?" ka ti a. A phu zuk lehnghal. Kan bulah mi an awm nge awm lo tih ngaihven niawm takin a hawi vat vat a, an awm lo tih a hriat hnu chuan, "U Ngur, enteh nizan ka khawhar in riak chu thil mak deuh ka tawng lehpek a" a ti ta sur sur a. Mak ti angreng taka hnaih deuhin, "Eng thil" ka ti vat a. 

A chil a lem khawlh a. 

."Ih maw, ka mumang a ni em tih pawh ka hrethiam lo. Ka mu kha ka muthilh lai ka hre lo. Pu Thana roomah hian ka lo ding ringawt a. An nupa khumah khan a u fanu Hruaii nen khan an lo mu dun a nih chu mawle! Makti zeta ka en reng lai chuan Hruaii chuan min rawn hmu a, a tap ta a. Pu Thana'n min khawih a tum avang chuan ka tlanchhe tur kha an room kawngka banah ka inchhuih zawt mai a. Ka harh ta zawk a, chuta mak ka tih em em chu ka mutnaah ka lo mu miah lo va. An bathroomah ka lo thu sawp niaih a ! Makti zetin ka mutna lam ka pan ringawt alawm. Dar 2 a ri tawh chu chuan. Chu chu ania ka awm hi a nuam thei miah lo mawle" a ti ta mawlh mawlh a. Mak ka ti ve kher mai. A hmaa ka mumang nen ka zeldin kual a, eng emaw inphum ru kha a awmin ka hre reng a. 

Mahse, "A va zia lo ve. A mak hle mai. MAhse, kamtam lo la a tha zawkin ka hria. I thiante pawh hrilh suh aw" ka ti ta zawk a. 

A bu nghut a. "Umm tumah nangmah bak ka la hrilh lo. Zanin ka riak leh dawn a, eng emaw ka tawn leh chuan ka hrilh leh dawn che nia" a ti a. Mi dang an rawn lan tak vangin kan ngawi ta a. Ka hawn lamah Judy dawr kal tur nen kan intawk a, min hre ngai miah lo angin min kal pel hmak nia! He nu nungchang leh khawsak dan tereuh hi a ngeiawm tlat! Mipain hmeichhia va khin erawh tul ka ti lo. A duh hunah min be tha a, a duh loh hunah mikhual ang ka ni leh tihna a nia. Min ngainep tih a lang chiang viauin ka hria. A la hre ve dawn aalwm.

Zanah Biteii sawmin thiante tel loin ka kal a. Biteii pawh a hlim leh viau tawh e. Kan lut chiah ka hmazawnah Judy pawh a lo thu ve leh khar tawh. Ka melh duh lo lui tlat. Len chhung zawng ka melh lo. Ban veleh Biteii nen bawk kan haw dun leh a. Kan hnungah Judy te chu DIna te ho nen an rawn kal ve a. Biteii te inah chuan ka peng kawi ve nghal a. Dawr a la hawn hmain Dina te chuan kuhva an rawn lam nghal bawk. Dawrah chuan kan lut zui nghal a. Judy pawh rawn lut vein hmawmsawm a rawn lei nual a. 

Biteii chuan, "Ngur, ka zun a chhuak lutuk, lo kir lawk mai, ka cheh dawn" tih leh in chhunga luh a rual a. Judy pawisa min pek chu lain ka kir a. Pawisa a lak pah chuan, "Min runluih ve khanglang suh" a ti sap a. Dina te chuan an hre pha lo vang. Ka melh hú a. Mak ka ti..a nui sáng a, "I rilru kha ka hre vek alawm..mipa hi in lo inang vek" a ti leh a. Mak ka ti tawlh tawlh. Ka tawng ve hmain a chhuak nulh lehnghal. 

Msg ka type ve nghal chat. 

"I beisei ang kha ka rilru a ni lo tlat! Sorry" tiin. Mai mai a..

(Silipar kha ka la hmu zo lo😌😢