Judy 10

MISS JUDY (10)

Ziaktu: Toni Rälte

Judy nu boral vanga zin tur ka ni tih ka chhungten an hre bawk a, mi dang hrilh kher chu ka tum hran lo. Lehlamah kan inngaizawng tih hria an la tam lo bawk nen. Thawmhnaw pawh ka keng tam lem lo, kan cham rei ang em erawh ka hre lo va. Tualpui atangin kan motor hman tur khan min rawn lam vang vang a. Zan dar 8 leh a chanve bawr velah kan chhuak thei hram. Zan lam hi chu a tlan chak theih deuh a, a zia tak a awm tho mai. Back seat-ah Judy nen chuan insi rialin kan thu dun a. A u te pawh a be tawh a, min lo nghak dawn a ni. Kan tlan rei a, kan muthlu bawrh bawrh mai. Driver kha haw leh tur a ni bawk a, a thianpa a hruai tel ve a. Kan titi mang lo. Judy chu ka dar nghengin a muhil sák sák a. A nu thihna chuan a nghawngin a tawrh hmel tehchiam lo khawp mai. 

Zing dar 3 pelhah Aizawl kan thleng a. Chauh a na ve duh angreng, kawng a chhe si, kan tlan muang tehchiam si lo va. Min sawh chau ka ti mai. Pawr fahranin Judy te in lam chu kan pan a. A u te a be nghal a, pawnah an lo ding a. Thalai zai thawm atang chuan an tlem hmel reng rawng hle mai. An milen nen kal an tam vak lo em mawni dawn ni. Kan va luh chuan an lo thahnem phian lawi a. Zai an tlem a ni mahna. Zan a rei tawh bawk a, a awm ve tho mai. Pi Rinpuii ruang chu ka thlek vang vang a. A thi ringawt chu mak ve tak a ni. Dik tak chuan khawtlang tan pawh a mak ang. Hmanni lawkah a pasal muhil an kaitho zo lo tawh a, tunah nu ber ama roomah inawkhluma hmuh a ni leh bawk a. Pi Rinpuii chu engvanga inawkhlum tak ni ang maw! Nge thah a ni zawk..a thuihhruai te hian an that ta mai em ni ang. Zawhna ka ngah viau naa, lehlam tak chuan ka sual vang pawh a ni maithei. A thi chu kawlpui khen thlak ang hawk ka ni tlat thung. Judy pawh a tap miah lo! A fanu neihchhunte a ni ve sia, a han tap lo chu mi dang ka lo vengthawng deuh. Mak an tih ka hlau. Judy u te pawh an thu ve ran a, kan la inbe tuitam hman lo. Judy u chiah chu nula te duh tur chi tak, hmeltha leh pa deuh mai a ni a. An upa ber erawh an unau ni awm pawha mawi lovin a hmulphurh a chhia a, a tawi terh turh bawk si. Inang lo ve tak chu an ni. Pi Rinpuii unaute lam an tap nasa viau. An unau an hmeltha hlawm khawp mai. Kan health minister pawh a thu ngui ve bur mai. Ani pawh hi setana hnena a thlarau hralh tawh a ni ngei awm si a. Tihian fel viau awmtê hian a lang a, kei zawng a nun hi ka awt hauh lo mai. 

Khua pawh a rawn var ta a. Thalai ho haw hnu, nu leh pa lam an rawn luh hnu lawkah Judy nen kan chhuak a. An in hnuaiah kan lut a, Azuii pawh kha a lo awm. Christy erawh ka la hmu miah lo. Judy nen chuan an inkuah a, an inngaih hmel angreng khawp mai. 

"Chawl hahdam phawt rawh u, in tur ka rawn la ang. Chaw erawh nakin deuhah aw" a ti siam siam a. Room pakhatah min hruai lut a, khum zau deuh lo awmah chuan ka mu ta vang vang a. Kan motor chuang chau nen, ka muhil zui ta mai. Judy'n min lo kaitho a. "Chaw ei ila" a rawn ti sap a. Ka tho ve vut. Chaw kan ei zui a, a u te pawh an rawn lang ta bawk a. Biak an nuam viau mai. Judy chuan, a chhungte awm thup laiin, "Ka pasal tur a nih hi" a la ti zui! An milian nasa mai si a, hnar a lian duh viau. Ka khap hman tawh bawk si lo. Engmah erawh an sawi lem hlei lo va, mak ti hmel pawh an pu lo. Tukthuan kan ei lai chuan judy chuan a nu ruang an hmuh dan leh engvanga inawkhlum nge a nih an rin dante a zawt ve a. 

"Zanriah ei tura a rawn chhuah loh vang kha chuan ngaihthat lohna em em kan la nei lo. Zanriah te chu a ei lo fo tho a. Mahse, Doctor Sena a rawn kal a, 'I nu awmdan hi ka ngaih a tha miah lo. Harsatna lian tak a neih thu a rawn sawi a, eng tak nge a sawi bawk si lo. Hetiang hian a awm khát si a, ka rawn kal tawp" a rawn ti a. Tah chuan Azuii hian ka nu chu va koh a tum a, tikhan a va hmu ta mai a ni. Min thawng khawp mai. A che rang mah mah a ni. Thih duh hial khawpa a harsatna lah tuman kan hriatpui ve bawk si lo. A mak tak tak a ni" an upa ber Siama chuan a ti mawlh mawlh a. 

Judy u chiah Tluanga pawh chuan,"Mate, nang pawh he lamah i rawn hawn a ngaih tawh hmel. Ka pa a awm tawh bawk si lo, kan kal zel dan tur pawh hriatthiam a har" a lo ti ve a. Judy erawh a ngawi reng. 

Siama bawk chuan,"Ka pa khan engkim a lo sem fel thlap tawh a, unau nisi ro chungchanga buaite hi thil zahthlak a ni. Zaninah kan ukil a rawn kal ang a, ka pa thurochhiah a rawn sawi ang. Ka pute ho pawh awm ve se a tha. Ka nite pawh ka hrilh tawh kha" a lo ti a. Judy khan a u te pawh an inhnamhnawih ve vek ang khan a sawi sia, hetia en mai chuan an that hmel viau bawk si. Kei pawh min be ve bawrh bawrh mai a. Han rinhlelh ngaihna a vang khawp mai. judy pawn a hre sual a ni maithei. Pi Rinpuii chu ropui taka vuiliam a ni ta a. Kal khawm an tamin mi lian leh challang ho hmuh tur an tam hle. Vawi khatmah Judy chu a tap lo. A u te pawn mak an tih hmel lem loh, a nu nen an inzawmna an hria a niang e. Tlai lamah kei chu ka mu leh daih. Min ngaihven em em lem lo bawk a, a zia phian. Ka chhungte pawh ka bia a, kan cham chen tur ka sawi thei lo thung. 

Ka muhil zuai a, mahse, a rei lo. Ka harh rualin Azuii hi a rawn lut a. Theitui a rawn keng a. He nula hi a hmel chu a tha lo naa, hmuh a nuamin hlim hmel a pu reng mai a, a bula awm pawh a hahdamthlak hle. Khumah chuan a rawn thu ve a. 

"U Ngur, hetah awm ve daih ula" a ti ringawt a. Ka lo nui hawk. 

"Ngati maw?" Ka ti a. 

"Aa. Judy a awm hian ka thla a muang thin. Ka pu a awm tawh bawk si lo va" a ti ve mai a. 

"Taka Azui, i pu kha muhlum a ni tak tak em?" Ka ti thut a. A che lawihin ka hria. Hlauthawng hmel a pu bawk. 

"I ring em?" A ti ta daih a. 

"Ring lo" ka ti hmiah. A bu nghat a.

"Kei pawn ka ring lo. Mahse, chu bak sawi theih ka nei lo. Ka hmu ve miau lo va. " a ti ta a. 

"A nih i pi hi inawkhlum tak tak a nih i ring em?" Ka ti leh a. 

A lu a thing nar nar a. "Tu emaw thah a ni. Ka pi kha amah leh amah intihlum tur khawpa dam thlahlel lo a ni lo" a ti duah a. 

"Tu nge i rin? Siama leh Tluanga te hi chu an ni lo vang tiraw?" Ka tih chuan, rang lutukin "A teuh lo. An ni chuan ka pi hi sakei hlauhin an hlau. Tûr in ru pawh ti se an in duh ang. An that ngam teuh lo vang" a ti leh bawrh bawrh a. 

"A nih Azui, ka rawn kal ve chhan hi i hre tawh em?" Ka ti zawi sup a. 

"Hre chiah lo, Judy i rawn tawiawmah ka ngai a. A ni lo em ni?" A ti a. 

"Ni chiah lo. Judy nen ruahmanna kan nei a. I pite sumdawnna tichhiaa a inhnamhnawihte hremna pek kan tum a ni. Chutah chuan i puihna pawh kan mamawh dawn a nia. " ka ti ta hmiah a. A rintlak tih ka hriat vang a ni. Titak zetin min melh a, a mitmengah engmah a lang thei lo. "Chu thil chu kei pawh ka duhthusam a ni. He sumdawnna rapthlak tak avang hian khawi hmunah mah ka zalen lo" a ti a. 

"Heta i thawh tirh atangin engkim min han hrilh ve teh. I chanchinte pawh. Hriatchian a chakawm ve alawm" tiin ka thut hnaih a. 

"Tunah chuan ni lo ve. Zanriah ei a hun tep.. Zan lamah an chhungkaw inhmuhkhawm hunah kan sawi dawn nia" a ti a. A tho zui daih. Nia, zanriah ei a lo hun deuh tawh reng a, kei pawh ka tho chhuak ve ta a. Zanriah pawh ka ei tui leh phian mai. Thingtlanga kan chawlhni chawhmeh ang kha hetah chuan nitin an hmeh chu a nia. Dinhmun hi chu a inthlau ve khawp mai. Mahse, ka ngaipawimawh lem lo. 

Zana thalai rawn kalte pawh an rawn thahnem leh hle. Zai erawh an zai tha lem lo a ni. Phone khawih mai mai an tam tlat! Eng anga nula tlangval hmel tha pawh ni se, inchei nalhin branded vekin inthuam mah se; Khawhar ina kala phone khawih char char te hi chu ka ngaisang lo ve tawp. A hun leh a hmun hi a awm ve a. Lehkhathiam leh thiam lo kar a hla ka ti ve tlat. Zan hmasaah an lo tlaivar tawh bawk a, an bang har lem lo. An ban hnuah chhungkaw inhmuhkhawm chu in chungah an nei ta a. Kei leh Azuii pawh in hnuaiah chhukin ka mutna roomah khan kan lut a. Azuii chanchin ngaithla tur chuan ka inpeih ta ran mai. 

Tihian a chanchin chu a sawi ta a. 

"Ka pa hi Nepali a nia, ka nu mizo. Mizoram chhim lama khaw pakhatah ka piangin ka seilian a. Nikhua ka hriat tirh ata ka nu chu zu ngawlvei a ni. Chhungkaw nu berin zu a ruih tlat zel avang chuan kan buaina chu a thûk lehzual a. Ka nau mipa leh ka pate chuan ka nu chu an dawhthei ta ngang lo a niang e. Min chhuahsan ta a. Ka pa chuan zui ve turin min ti naa, ka nu kha ka lainat tlat a. Ka zui ve ta lo. Tichuan, kan nufain kan khawsa ve naw naw a. Ka nu chu zu thlawrnaah a inhlawh thin. A ruih luat vanga an rawn zawn haw changte pawh a awm thin. Chaw kan nghei changte a awm bawk. Ka nu avangin thenawm khawvengte pawn min thinhrik a, inleng pawh kan nei ngai lo. Kan retheih chu thuhran, ka nu khan harhfim lai a nei ngai mang si lo va, kei tak pawh khuahkhirha zilhhautu nei ta lo chu ka tal hraw hle mai a. Ka rilru hah leh nat vangin ka nu zu thuhrukte hi ka in ruksak ve thin. A hre ngai chuang lo. Zirna pawh pawl 8 bak ka thleng lo a ni. Tichuan, a tawi zawngin kum 18 ka nihin ka nu chu a boral ta a. Zu seh vang a ni. Chhungkhat hnai kan nei si lo va, keimaha khawsak ngawt chu a harsat bakah kan khua chu nuam ka tih loh vangin kan in chu ka hralh a. Aizawl hi ka pan ta a. Awmpui tur duh an awm em tih chanchinbuah te ka en kual a, ka biak ve lahin an lo la hman zel tawh si. Hotelah mangang takin ka awm a. Chutia thawh tur nei bawk si lo, ka pawisa lah ren ngai bawk sia ka awm lai chuan ka thlenna hotel manager chuan ka chanchinte min zawt chho a. Ka harsatna te sawiin ani chuan mi ina awmna tur min hmuhsak ta a. Chu chu tuna ka awmna hi a ni ta a ni. An sawi thin chu he ina lut tawh chu an chhuak leh mai mai tawh lo an ti. An chhuah pawn reivak loah an thi mai zel. I hriatthiam kha..ka awm tirh chuan min duat bakah ka duh duh dana awm min phalsak a, nuam ka ti viau. 

Mahse, kum khat ka awm hnuah thil a danglam zo ta a. Zan khat chu ka pi hian a room bikah a inlengte a kawm a. Thingpui ka va pe tur chuan an thusawi ka hre ta a. Mihring taksa hmanga an sumdawn dan tur ruahmanna an lo siam a lo nia. Ka hlauh em vangin ka hmelhmaiah a lo lang nge ni, ka pi chuan ka hria tih a hre ta a. Pindan thimah kar khat zet min dah hnuah intiamkamna ka neih hnuin min la chhuak a, an hnenah ka la awm zui ta zel a. A chhan pawh ka piin chhuah a phal lo. Tlanchhuah ka tum tawh a, khawikipah pawh an awm a niang. Min zawng hmu rang khawp mai. Min nghaisa rethei khawp mai a, tlanchhuah chu ka tum leh tawh ngai lo. Judy hi chu phaiah a awm thin a. A rawn haw ve ta a, a nu te sumdawnna chu a rawn hre ve ta a. A duh loh em vangin report hial a tum a, mahse, ani pawh a fanu mah nise a dim bik lo. Pindan thimah rei tak an khung ve nghe nghe. Tin, tikhan i hriat angin pasal neihtir a tum a, hei tak chu a chhan ka hre lo. A pasal tura an tih lah a upa tawh si. Nasa takin a rilru hneh an tum a, mahse, an hlawhtling thei lo. Police te bula a hrilh chuan a pa thahsakah an vau a. A inbunruahna ka ni ve a, engkim ka hria. Tichuan, zirtirtu kha an phal lo chung a dil a. In khuaa awm kha a kherh ngat ngat bawk. Awm hran kha a duh ber a ni. A pa erawh a ngaihtuah ve hle. Mahse, ka pu pawh kha dik tak chuan ka pi khan a thluak a se hneh tawh lutuk a maw..Judy lam pawh a tang ngam meuh lo. U Siama te lah ka pi uite an ni bawk sia. An sumdawnna kha a hlawk êm a, bakah mi lian tam tak nen an inthlunzawm vek bawk si. Judy tan khan chet lak a har ve êm a ni. Ka pi chu thenawm te leh vengchhung te ngaihsan a ni a. Mi harsa tanpui lamah a hming a chher bawk si. A phenah sumdawnna rapthlak tak a kalpui tih an hre si lo. Awmpui hi ka awm hnuah pawh pali an nei leh tawh a, damin an haw leh lo vek. Christy hi chu an thuhnuaiah an dah tawh a, a la thawk mai mai. Kei pawh ka auchhuah an hlauh vangin min la hreng ringawt. Min thah hi an tum fo, mahse, Judy kut an phuar theihna hmanrua ka ni ve tlat a, min la that phal lo ka ti mai. Ruang chhar te, awmna chin hriat loha bo ringawt tam zawk hi ka pi te kutthlak vek an ni..a rapthlak tih hian a sawifiah zo lo vang" tiin. 

Ka ngaithla uluk khawp mai. Amah Azuii tak pawh chu a dinhmun a laklawhin a lainatawm kher mai. Zalenna awm lohna hmun hi chu khawi hmun mah nuam a awm ngai si lo. Mahse, Azuii hian Pi Rinpuii te hi Illuminati an ni tih a sawi loh danah engmah a la hre lo a nih ka ring. Hre lo law law se a tha ang, rapthlak a ti lehzual dawn em mai. 

"Lungngai miah suh. Tunah chuan hlauh tur an awm tawh lo. Hremna an hmu em em ang" ka ti nghet charh a. A bu ve nghat nghat mai. 

"Nia ka thlamuang huai alawm. Mahse, in khuaa in awm leh daih dawn chuan ka chhuak ang" a ti a. 

"Lo awm ve daih la" ka tih chuan kan nui dun a. 

Judy te inhmukhawm pawh an tin ta a. Eng thu tak rel ang maw. Aman min la hrilh tho ang chu maw. Kei pawh Azuii chhuah hnuah mut ka tintuah a. Ka mut a chhuak vak lo naa ka chau nghulh tho mai. Thiante nen kan intext ve leh zuai a, phone dahin rizai ka sin a, ka chhing ta vang vang mai. Ka lo muhil zui nge ni zawitea kawngka hawng thawm chuan min tiharh a. Ka lehhawi vat. Kawngka bulah chuan Judy chu a lo ding ran a. A nui deuh bawk. Thawh ka tum chu min rawn nem mu vat a. 

"Tawlh rawh" a ti zawi sap a. Ka tawlh ve mai. Ka bulah a rawn inthawlh ve nghal sawk sawk a, khua a vawt ve tawh bawk nen. A ke vawt zeta ka chawn vel a rawn tlawh chuan ka phu uih. A nui sak a. 

"Zanina kan thu rel pawh i la hre si lo va" a ti sep a. 

"Nia, min hrilh tho ka ring a" ka ti ve ringawt. A aw a thian kharh a. A zangthal zawnga muin chunglam a melh vang vang phawt a. 

"ka pa khan thurochhiah a siam thiam khawp mai. A thluak kha a nu but emaw ka tih laiin a lo fim ru ve kar tho a nih hmel. In leh lo hi U Tluanga hmingin a dah a. Zarkawta kan in sak thar saw U Siama tan. Kei erawh Bawngkawna kan in min dah ve thung. Chuan, ka nu sumdawnna tenawm leh bawlhhlawh tak kha chhunzawm tawh lo turin ka ngen a, mahse, an thutlukna tur ka hre lo. U Siama hian a chhunzawm mai ka ring. Anmahni hian tihtawp duh mah se; an thawhpuite hi an kal thui tawh lutuk a, chutimaia an bansan ka ring lo. Ka nu pawn a sum zawng zawng hi ka ute pahnih tan a dah vek bawk. Min dahsak ve pawh nise ka duh chuang lo. Ka pa khan ka hminga a account hawnah ka damchhung daih tur pawisa a dah tho. Ka hlawh tel lo pawh hian nuamsain ka khawsa thei ang. Chuan, Dr. Sena nena kan inneihna tur chungchang chu kan thulh fel ta bawk. Secret society chungchang erawh kan sawi lo. " a ti ta dap dap a. 

"Chu! Chet kan la tho dawn em?" Ka ti vat a. Min rawn melhin, "Kan mihringpui an tihhlum takte khan hlutna leh uitu an nei ve vek asin. Khang nunna hlu tak takte thisen kha a thlawn ngawt chuan luanraltir lo vang. Chuan, ka pu (Minister kha) hian ka nu thih danah ngaihthat lohna a neih avangin report a thehlut dawn bawk. Ni e, kei pawn ka nu hi amah intihlum a nih ka ring thei lo" a ti chat chat a. Ka pawmpui viau. 

"I pa pawh kha" ka ti sup a. 

Ka kut rawn vuanin,"Ka nu thih dan dik tak kan hriat chuan ka pa thattu pawh kan hre thei mai ang. Min pui dawn tiraw?" Tiin min rawn melh kiau a. Ka lo bu nghut mai. Puih a chakawm miau a, a hlauhawm ber Pi Rinpuii a awm ta lo bawk nen, ka zuam viau ringawt a, a thawhpuite hi an hraw viau chuan kan nasa vak lo maithei bawk. 

Kan titi kan titi a, kan pahnih inkar te pawh kan sawi dun kha. Kei chuan ka sawi ril duh vak lo. Mi hausa fanu a nia, kei leh ani dinhmun chu lei leh van ang mai a nih avangin hmalam hun ka ngaihtuah lawk vak duh lo. Mahse, thil a awlsam ve lehzelna chu a nu leh pa an boral tawh miau a, a duhthlannaah a innghat thui ve hle dawn a ni. Kan khuaah te chuan a awm reng peih hauh lo vang. Kei lah fapa mal ka ni si. 

Inkuah rialin kan muhil a, mipat hmeichhiatna lam pawh a lang thei meuh lo a ni e. Kan tho tlai em em lehnghal. A nuam chiah lo. Chutiang chuan ni 3 zet chu ka awm ve ta ringawt a. Chet lak dawnin a la sarhu angreng si a, a rem rih vak lo. Judy thianpa Police Lawmkima nen pawh kan inhmu tawh a. Ani pawn theihtawp chhuah a tum khawp mai. Pi Rinpuii thawhpuite hi hre vek thei ila enthla ta ila kawng chu a awm ngei ang mawle. 

Ni 4-na zing ka tho room atanga ka chhuak chiah chu Azuii rawn luh tum mek nen kan insu thelh a. 

"Awii U Ngur, ka pi thlan an hai kha i lo hre ve tawh em?" A ti nghal var a. Ka ding chawih mai. 

"Eng a?! Engtikah" ka ti vat a. 

"Nizanah a nih hmel. Niminah kha chuan engkim a la pangngai vek. Tukinah ka pi thlan chu hai a ni tih an hmu chauh" a ti mawlh mawlh a. Mak mai mai thin mang e. Judy pawh a rawn lang ve chat a,"Eng boruak nge maw siam an tum leh ni. Ka nu ruang erawh a la awm " a ti bawrh bawrh a. 

"Kuang an hai thleng em ni!" Ka lo ti vat a. 

"Thleng e mawle. Chuvang alawm kuang an hawn leh" a lo ti mai a. 

"A va mak thin ve aw. Tu te tak ni ang maw? In thlanmual phei chu a laili angreng sia, mi hmuhte pawh an hlau lo a niang" ka ti a. 

Tukthuan kan ei laiin Lawmkima leh a thuihhruaite an rawn lang a. Pi Rinpuii thihna case kha a la dawn bawk a, a rawn lang deuh reng mai. Lehlamah a tan pawh an sumdawnna nen chhuizui a awl dawn a. A zia tak a awm. Pi RInpuii thlan hai vel te chu an sawi ho a, Judy chuan harh chhuak thut niawm takin, "Taka! Ka nu ruang chu a chhe tawh viau em? A rimchhe tawh viau lo maw?" A ti vak a. Kan melh thap. A hriatchak ber kher chu. Lawmkima chuan , "Boruak vawh tawh vang nge mak ka ti ve mai mai, i nu ruang kha a la chhe mang lo. Rim erawh tlem chu a nei" a ti a. Sawi nuam ti chiah lo hmel a pu. Kei pawn mak ka ti ve. Ni 4 zet lei hnuaiah a mu tawh a. A ruang la tha tlat chu! Leh a rim pawh na ve viau tawh awm a ni. Thlasik lai ni eng ang mah se..ngaihdan thar ka nei ta thut, tawng ka tum mek laiin Judyin mitmeiin min lo khap vat. Ka ngawi leh ta daih a. Siama leh Tluanga te erawh chuan,"Hetianga a thih hnu pawha zah lotu leh a thlan hial hai ngamtu hi man ngei teh u. A nuam vak lo a nia kan tan pawh" an ti a. Ni e, a nuam vak lo khawp ang le. 

Judy erawh a ngawichawi angreng. Chawhma lam chu Judy nu thlanah kan va kal ve a. An lo chhilh tha leh vek tawh a, eng thil thar em em mah kan va hmu lo. Judy ngawichawi riau chuan ka ngaih a titha lo. 

Ka nu call ka dawng a, ka va be ta daih a .."Bawiha, i lo haw vat a ngai. Vawiinah aw.. Hei i pa a chesual tlat mai. A leipui kal a lum pek a, a che hleithei lo. Lo haw mai teh" a rawn ti a. Vawiinah Judy te ina pindan ruk kha zawn kan tum ve chiah si a. A va khawlhkham thin ve aw. 

"Engtin chiah nge a awm?" Ka ti a. 

"A khel bawr hi na a tia, a nak ruh hian a thawk a tisak deuh bawk. Bakah a zia hi a mak tawp. Lo haw mai rawh aw" a rawn ti zawi sap a. Ka thaw hawk. Ka nu meuhin min ngen chuan ka haw a ngai, a thla a phang deuh a ni ngei ang. Ka nu nen kan inbiak zawhah ka nau nen kan inbe leh zuai a. A hawn a hun ve tep tawh a, an zirlai an la zo lo deuh si nen. Ka rualin a haw ve thei rih dawn ta lo. Judy bula thil awmzia ka sawi chuan min kai nawlh a, roomah min luhpuiin, "U Ngur, kei chu eng emaw hian min mawlh tlat a ni. Ka nu ruang hi hmuh leh ka duh em mai. Mak i ti ve lo em ni? " a ti ta a. A ngaihtuahna chu hriain ka inhria, ka sawi ngam loh kha a ni sa a. 

"Ti ve e. Mahse, engtin nge kan tih chuan ang? Tuin nge i nu ruang chu la bo ta ang le?" Ka ti a. Min rawn melh káwk. 

"Mitthi a ni tawh si a, ni e, tu chuan nge mitthi tawh chu duh ta ang?" A ti ve vat a. Rilru a buai duh hle. 

"Mahse, Judy, engpawhnise kan rilru tihbuaina hmanrua te pawh a ni ve thei tho asin. Chuan, ka haw phawt ang a, remchang dang a awm leh em em ang. " ka ti ta ringawt a. Min chelh duh viau mah se, min chelh lui ngam meuh lo a niang. Motor hman tur min biaksak a, engkim tum vek a tum chu ka duh bik lo naa, "Min tihtir loh chuan ka rawn haw ve ang" a ti tlat si. He lamah kawng lo dah rih se ka duh bawk nen a duh dan chu ka pawm lo thei ta lo va. Ka hawn laiin a u te an awm lo va. Azuii nen min thlah a. 

Ka kal dawnah,"I pa pawh chu lo en ngun zual teh aw. Kan rin aiin an kal thui thei a nia." A ti sap a. Chulam zawng chuan ka lo ngaihtuah miah lo. Mahse, a nih theih dan a awm. Kan tlan chhuak ta vang vang a. Kan chhuah hian dar 2 a ri lek lek tawh. Ka nu ka be zui nghal a. 

Kan khaw thlen hma lawk Lei tlahniam kan tlan laiin Judy call ka dawng a. 

"U Ngur, mak i ti ngawt ang. Ka nute tawmbuk ka hmuchhuak tawh e." A rawn ti ta mai a. Ka thu ngil zawt mai. 

"Khawiah" ka ti tuar a. 

"In hnuai i mutna roomah khan kawngka rûk a lo awm reng alawm. Chu chuan lei hnuai pindan a pawh a. Chutah ngei chuan a ni ka nute chuan thisen an lo chhuah thin. Lawmkima a lo thleng tep ang. Ka ko a" a ti mial mial a. Ka thaw huai mai. 

"Chuan, a thawhpuite?" Ka tih mek laiin, "Ka u te pahnih hi ka mantir ang a. An ka an ang em em ang." A rawn ti ta mai a. 

"Judy" ka ti nghek ringawt. 

"Duhthlan tur dang kan nei lo. Tun bak chance kan nei lo. An secret society thlengin zoram khawvel hian an hre tawh ang. I pa kha lo enkawl tha ang che" a ti a. Hnial ngaihna ka hre hauh lo. Khua kan lut a,number dang atangin call ka dawng leh nghal. 

Ka lak rual rualin, "I farnu nunna i la hlut a nih chuan, Judy kha a ka chip hmak turin hrilh rawh. " Mipa aw thum lam hian a rawn ti ta mai a. Ka tukhum a hit mam mam mai. Ka dai ngai loh kawng ka dai hi inchhir ka duh miah lo naa, ka rin aiin ka mi ep te hian thil an lo tithei si. Mahse, Ngurhmingliana hian ka tum ka thlak lo vang. Sual chu thisen chhuak khawp pawhin ka do ngei tur a ni..

Judy ka call leh a. "Secret society leh i nu sumdawnna hi a inzawm vek. Ka farnu an la bo" ka ti tawl a. A reh duk mai. 

"Judy" ka ti leh a. 

"Engtin nge chet an lak theih? Pindan rûk ka hmuchhuak tih tuman an hre hleinem" a rawn ti ta a. 

"Tuman maw?! Engtin nge tun hunah min tlankhalh theih? Tu emaw chuan kan kawng dal a tum a, kan ruahmanna pawh a hre lawk vek tihna a nih chu" ka ti duah a. 

Judy chuan zawi sapin, "Azuii nge Lawmkima ni ta ang?" A rawn ti a. 

😒😒😒😒😒