Inferno 7

INFERNO (7)

Ziaktu: Toni Râlte

Kawngka chu a ri bur bur a. An rawn nek nasa mai si, Zirsanga leh Rosangpuia chuan nghet zetin silai an hum a, hmeichheho erawh an hmui hupin phawk zetin an thu far thung. Bella pawn a pum na leh tai na a sawi hleithei tawh lo. A lung erawh a chhia a ni. Harsa takin nau a pai a. Tunah a duhthlan ni miah lovin a fa chu a boral leh ta si! Remruata'n hria se a va na dawn tehlul êm. Fa neih kha a nghahhlelh ve tawh tehlul nen. 

Pawn lam atang chuan, "Kan hual bet vek tawh che u. Tha takin indawr ang u. Kan lo lut dawn a, engmah lo ti suh u. Tihnat che u hi kan duh ber a ni lo a nia" mipa aw thum lam hian a rawn ti lung lung a. 

Zirsanga chuan,"Ni e, tha takin indawr ang u. Min kaltir ula, keini pawn thu leh kan nei tawh lo vang" a ti pawr hlur a. A nih nih nih tawh mai chu an duhdan a ni. Bella nau chhiat khan engkim a rawn tidanglam ti mai teh ang. An thin a rim tlang tawh êm a ni. 

Kawngka chu a ri rawk a. A rawn inhawng hlawl mai. Mahse, Zirsanga leh Rosangpuia chuan an silai ken lai chu khawng zetin an lek kawh a. Mi 10 dawn an rawn lut a, an rawn hual ta khup khup mai. An hmai an tuam vek bawk. 

"Min kaltir rawh u" Rosangpuia chuan a ti hráwk a. Mahse, an ngaihpawimawh loh hmel angreng,. "A la hun lo. Dawnthei leh hram r'u" Mipa sang lam chuan a ti nghut a. Tihnat tum awm chuan an lang lem lo. Mahse, sazu pawh a kaw tawpah a tang thin tih ang deuhin Zirsanga te chu an tang ve tlat! Silai chu an la dahthla duh chuang lo. Rawn hnaih tumtu pakhat chu Zirsanga chuan a lo tlawh leng lawp a, a tluk rualin silai a puak nghal. Zirsanga a eu zawk mai. Hmeichheho chu an rak tuar hlawm a, Zirsanga tlu reng chu Arini chuan zuk bawhin a nak veilam atanga thisen tharlam zet rawn chhuak chu mangang takin tihtawp a tum a. Mipa sang zet khan, "Kan duh loh danin min nawr a tin nih kha. A pawi hle mai. Rang takin a thisen chhuak hi tirawp rawh u" a ti zung zung a. A hmaa Doctor leh Male nurse te kha rawn langin Zirsanga chu mipa pahnihin an zawn a, pawn lamah an chhuahpui ta. 

"A tha e. Dawhthei hram rawh u ka tih mawlh mawlh kha. Tihnat che u hi kan tum a ni lo. A hun thlen hmaa heta in awm rih hi a ngai a ni" Mipa khan a ti leh a. Tumah an tawng tawh lo. An hmelah erawh thinrimna a lang thung. Zirsanga kha an ngaihtuah ru theuh niin a lang. Engtin tak awm ang maw..a damkhawchhuak thei êm ang chu..

Amanda leh a hote pawh Tuirial ram chhung an rawn lut ve mek a. Mahse, han zawn chawt dan tur erawh an hre lo. Minister emaw MLA farm house emaw zawn deuh tawp kha a nih mai hmel a. A tuirial khaw chhungah chuan an awm a rinawm loh. Ramhnuaiah an insem darh a, an kal pah khan Amanda khan Ephraime kha a hrilh ve a, an ni lam pawh a ruk deuhin an lo chhuak ve mek bawk. Engkim hi tihtawp a ngai tawh a ni. 

Hetih mek laiin Khawpuiah sawrkar mi pawimawh an lo inhmu khawm ve mek bawk a. Thinrima inhnial thawm nen, inkhap ri nen, an thawm a bengchheng ngang mai. Pu Thangliana a rawn ding chhuak a, a nectie chu phelh thawlin hmai sen teuh chungin, "Pakhat hi dah tha ila tlanchhuah tuma an beihna hi a tawp mai ang" a ti pawr huar a. 

Pu Chama a rawn ding ve zat, "Nunna kan lak chuan thil a khawlo zual ang. Zoram mipui kan ngam lo vang" a rawn ti a. 

Pu Muanpuia ve thung chuan, "Amanda te dang tur team chu in tir tawh em? Kan chet vat loh chuan an va hmuh chhuah teh chuan..kan nasa dawn lo teh mai a nia" fimkhur takin a lo ti ve a. An ngawi thap. 

"Abby leh a hote an kal tawh e. Mahse, an dang thei ngut ang e mawle. Samsona lah a kut a phuarsak tlat si a" Pu Chawimawia'n a lo ti chuar chuar a. Pu Thangliana chuan call a dawng zui zat a. Ramhnuai atangin a ni. A la vat a. 

"Khatah khan a theih ang angin enkawl rawh u. In lak chhuah chuan engkim a kal dik lo palh ang. A theih chin chinah vengtu kha indah tam ang che u" a ti hmuar hmuar a. Zirsanga chungchang a ni. Silaia kahna kha thisen chhuak a tawp hleithei tlat lo va an mangang deuh a ni mahna le. Tuna zoram dinhmun chu a khirh ru ta hle mai. Sawrkar leh Hel inkarah Amanda leh a team te an ding ve tlat tawh si a, an ni hian engkim an hai chhuah chuan sawrkar lam chu an heh a hil viau ngei ang le. Chuvang a nia an hmanhmawha an chet phelh phung ni. 

Zan thil thu mah nise ,an eng neih ang ang nen ramhnuai chu an fang a, Amanda leh Imma chu an kal dun a. Ngawi rengin hmazawnah an kal mawp mawp mai. An ngaihtuahna an kawm dun char char thung. Amanda chu a thinlung a na a ni. A pasal a hmangaih em emin heti taka a kawng a dodal ta mai hi a pasal chu a ta a ni tawh lo niin a hria a, engtia chet lak tur nge a hrethiam tawh rih lo. Heti taka a pasal nen an inkara hem thlaktu hi a hmachhawn chak zek zek mai. A tu pawh lo nise Sama neihkir leh a tum tho ang. 

"Ding rawh u" an piah thing hmun atanga rawn titu avang chuan an ding chawt a. Chu aw neitu chu Amanda chuan a hrechiang viau. 

"Ephraime" a ti sap a. Ephraime chu hmeichhe pakhat nen an rawn lang a. A hmeichhe hruai chu a hmelthain a nalh zeih zawih hle. 

"Information kan dawng dik lo a ni maithei. Ramhnuai kan daidar hneh tawh, Mibote awmna hmun tur awm kan hmu lo" Ephraime chuan a ti nghut a. A thaw lak nat danah a hah ve deuh tih a lang. 

"Khawiah emaw chuan an awm ngei tur a ni. Naktukah nasa zawka beihpui thlak kan tum e" Amanda chuan a ti a. 

Ephraime chuan Zoi kuta vawn pahin, "Khawvar hmain he nau hian min pui thei ngei ang" a ti hniam raih a. Zoi chu inpeih tih hriat takin a lo then sak bawk. Amanda leh Imma chuan thil awmzia an han hriat takah chuan Ephrame duhdan anga ramhnuai chhuahsan chu pawi an ti ta lo va. An team te kokhawmin Tuirial ram chu an chhuahsan leh ta phawt. Zing lam dar 2 a ri ve mek bawk. Ephraime leh a hote pawh hmun fai laiah ding khawmin, Zoi chu a laiah a ding a. Zoi koki-a a kut nghatin, "Zoi, ka ringtawk che aw. I hmachhawn thei ngei ang" a ti nghet charh a. Zoi pawh a bu nghat mai. Zawi muangin ramhnuai chu an chhuahsan ve ta a. Zoi chauh chu a ding ta ran mai. Tluanga chuan a ngaihtuah ru hle naa an hotupa thuchhuak chu a hnial ngam bik si lo. Zoi hmel mitthla chung zelin an tawmbuk lam an pan ta a.

Zing dar 3 a pel fel awrh tihin Ramsa hram thawm mak tak mai chuan an awmna bul vel chu a rawn vel ta thar thar mai a. Nauteii phei chu a thlabar nghal tihtheih a ni. A khur der der a, A bula mu Drose chu a kuah chawih chawih mai. Mi dang pawh chu an harh ve hlawm a, Judy chuan, "Hlau suh u. Ramsa a ni satliah lo. " a lo ti zawi sap a. 

Chutia rei tawk fang chu ramsa a inhrosak hnu chuan thawm chu a reh leh ta tlawk tlawk a. An dahna pindan lehlam tukverh darthlalang keh thawm niawm takin a rawn zui a. An harh hra hlawm mai. Chutah rapthlak taka mihring thlabar rak thawm leh silai puak ri a rawn ri zawm leh zat. Ramsa hram thawm kara mipa aw thlabar zet chuan taksa leh rilru a fan ngaih ngaih hle. A rapthlak dan a thúk riau a tin ni. Nauteii khur nasa lutuk chu Judy chuan a kuah bet a, Rosangpuia pawh rawn thu chhuak vein, "A mak dangdai hle mai" a ti sup a. Mihring na tuar rak thawm kara vei nuk nuk, tawng ri noh nohte, silai puak thawm rawn ri leh zawk zelte chuan an awmna hmun a him lohzia a rawn tarlang chiang hle. Mihring rak thawm a tawp rual chuan rapthlak khawpin thawm chu a reh zui leh tlawk tlawk a. Hriau pawh tla se a hriat theih ang tih tur khawpin a reh a ni. An awmna pindan kawngka chu a rawn inhawng rawk a. Hmaituam mi pakhat a rawn lut a, "Engkim a tha vek e. Ramsa pawh kan kaphlum tawh e. Khawvar rualin kan awmna hmun kan sawn ang" a rawn ti ta a. 

"Abby, i thiltih hi i hrechiang lo a ni. Ani ang hmeichhia saw hnaih ka duh tawh lo. Sama thluak ber i su tawh a, duhtawk rih rawh" A hmaa Abby ding ngawi ran melh chung chuan chu pa chuan a ti nghut nghut a. 

"Mike, i hrethiam lo a ni. A rilru hneh kher a ngai lo. Ding taka thil a ngaihtuah theih loh nan tibuai ringawt rawh. A bak a ngai lo" Abby chuan a lo ti hriam hraih a. Mike chuan a heh a pet ruh a, a kut a hum ruh bawk. 

"Engtin?" a ti ta a. 

"I bia ang a, i kawm ang. Hun remchang ka neih theih nan kawng i lo sial dawn a ni. Khawiah emaw hmun fianrial takah i hruai chhuak ang" a lo ti kalh kalh a. 

"Eng nge a chungah tih i tum a?" mike chuan mak ti fe hian a ti a. Verther zeta nui var varin,"A lu la tura thupek hmu ka ni" a ti vawt raih a. Mike chu a tim sung sung mai. Amanda tihhlum thupek a chhuak tawh a maw?! Wow! Sawrkar chuan chet a va la hmanhmawh ve mawle. Abby chu a melh leh a, he hmeichhia hian thupek a hmuh ang chu tihhlawhtlin a tum leh ngei ngei ang le. Chak lo nih duh ngai lo hian Amanda thah chu a chak zek zek ang chu mawle..huiham..

Sangpuia leh Mampuia chu zawi te tein an phun dun sup sup a. An ni hi hel pawl zinga mi an nih vanga Jail-a dah luh kha an ni. Inhre sa an ni bawk a, an inkawp nghal chawt mai. A tu ve ve mahin an thiante hming an sawi lo a ni. Nghaisak pawh an tawk nasa, mahse, an ka an ang duh thak lo thung. 

"Ka u chunga thil thlen chhanah hian keimah bak mawhphurtu an awmin ka hre lo va, a bakah chuan he pawl ka zawm avanga hrehawm tihna ka la nei lo" Mampuia chuan a ti nghut nghut a. 

"A dik ang. Kei pawh ka ni tho alawm. Ka bialnu hi rukbo ni ve kher lo se rilru kaptu ka nei lem lo vang. Mahse, Mampui, lungngai lo phawt ang. Kan hotuten engkim an tifel mai turah ngai ang" Sangpuia chuan a ti nuah nuah a. Mi dang chimbuai vak an duh lo bawk a, cell-ah pawh an awmdun zel mai. An titi tui lai takin an piah lawka mi dang thukhawm titi chuan an beng a verh deuh nge ni, an va pan phei a. 

"Thiante u, eng maw in sawi lai kha. Ramsa in mihring a sehhlum intia law?" Sangpuia chuan a ti a. 

Rinpuia chuan,"Aw..ka nau sawi dan chuan tukin zing dar 4 bawr vel khan Tuirial ramah ramsa rapthlak takin mi pakhat a seh hlum a tia. A hnu an chhui naa an man hman lo a niang. A mak tak tak a ni. Eng ramsa tak ni ang maw?" a lo ti nang nang a. Mampuia leh Sangpuia an inmelh zawk mai. Thil thlen dan chu an manthiam a ni mahna le. 

"News-ah an puang tihna em ni?" Mampuia chuan a ti leh ngat a. 

"A nih hmel. Tuirialah hian kan MLA farm house a awm a, chumi enkawltu te zinga pakhat chu a seh a niawm e" Rinpuia chuan a lo ti ve leh mai a. 

"A mak hle mai. " Sangpui chuan a ti nghut a. An kal kiang nghal. 

"Ngaihdan i nei em?" Sangpuia chuan Mampuia melhin a ti a. 

"Zochhingpuii an chhuah tihna a ni thei ang em? A nih chuan mibo te pawh an hmu hnai a ni mai lo maw?" Mampuia chuan a lo ti ve zat. Inhrethiam tawn takin an inbuk khum zauh a. Thil thlen zel dan tur erawh an ngaihtuah thiam chiah lo. 

A taksa ruak kàng chu a berh nuai a. Kawrte kam lam chu panin a taksa rawl thum vang chuan a ner sak. A chhuak khat tawh a, a han che chhuak leh ta chu a chauhpui ngei mai. Kawrte tuiah chuan inchiahin a insil pharh pharh a. A hmuia thisen kai a tihfai lai chuan a uak tuar tuar a, thisen tháng rim chuan a pum a luh deuh nge a luak a chhuak ut ut mai. Chau zetin vaukamah chuan a tlu zal a. Ruak ngalngatin awm mah se; a pawisa vak lo a nih hmel. Ephraime'n a rawn lam hun lo nghah tawp a ni tawh mai. Silai khan an kap tak naa a fuh lo bawk a, hliam a nei lem lo. Kha ramhnuaia in awmna kha chiang taka a la hriat avangin zaninah a siruk lain an mibote an va chhan chhuak dawn a ni. Sava chiar nak nak thawm ngaithla chung chuan a mu zangthal ar ar a. A mitthlaah Tluanga a rawn lang zawk. A ner sak a. He pa a hmuh leh a bulhnaia a awm apiang hian engtin emaw a awm ve ziah! A sawithiam chiah si lo. Tluanga hmel pa leh hriam hraih, lian bawk si chu a suangtuah a. A taksa chu a rawn za deuh chuai mai. A zak leh hnuhnawh a, "Hetiang ngaihtuah hman ka ni ve lo" a ti tham chhalh a. A chil a lem khawlh bawk. A tan inngaihzawnna khura tluk luh ve chu a rem lo a ni. He a taksaa virus chi khat an chiu luh hi a danna an hmuhsak hma loh chuan a nihna hi a pawm thiam a ngai tih a hai lo. A nu leh pate a ngaihtuah a, a hmu lo rei ve leh ta deuh, engtin tak a tel loin nun hmang zel ang maw?! An him nan hetia a kalsan hi a tul miau si a le…

A pum na riai riai avang chuan a inbeng kang a. Tui a in khawlh khawlh. Sama a lo la haw lo va. Khatia a pasal ngei a handcuff avang khan an nupa kar chu a khi nasa zual a. Heng buaina hi reh fel se, A pasal nen a bul atanga engkim an sawi dun a ngai tih a hria. A pum na chu a la reh hleithei tlat lo! A tho chhuak a, inthiar tuma bathroom a pan tur chu a kap chu a rawn hnawng hawk mai. A ding chawt a. A tuibawm a keh! Khai aw! Thla 7-ah naute a nei dawn tihna em ni ang? Hmanhmawh zetin a doctor a call a. "Min rawn hruai vat rawh..ka tuibawm a keh" a ti tial ruan a. Phone chu dahin thei leh thei loin bathroom a pan a. Sama awm ve se tih a ngaihtuahna chuan a tina zawk thei. A bula awm tur ani asin le. Khawiah nge a awm ang? Doctor leh a staff rawn luh lai chuan a pum na lutuk vangin a thlan a lo tla bawrh bawrh tawh a, a rum chhuak lo naa a inpetruh nasa khawp mai. 

"A kumkuruh hi a kau thei tlat lo mai" Doctor Hmingsanga'n a tih mek laiin Pawr chhapin Sama a rawn lang ve hlawl mai a! An lo melh hrek hrek mai. Imma leh Amanda thawhpui hmeichhia ten an lo awmpui ve a, Mizorama detective tha pawla sawi Amanda chuan chhungkhat a nei lo tih a va lang chiang tehlul êm. Nurse ho pawh chuan a rukin an lainat takmeuh a ni. Sama rawn thlen hnu lawkah Sama nu leh a farnute an rawn lang ve ta bawk a. Engmah an lo hre lo a lo nia, amah Sama lahin hrilh hek suh. News atanga an hriat vangin an rawn lang ve rawih chauh a ni. An thiam loh a ni hran lo. Amanda chuan a vei rei tawh si, chutimaiin a nei thei lawk bawk si lo. Amah lah chu a chauin men pawh a meng tha peih tawh mang lo va. Sama chuan darthlalang chhan atangin a lo thlir ve reng, a lainat a. Mahse, tuna naute lo piang tur saw a fa a ni thei lo ang tiin a ngaihtuah tlat thung! Thla 7-ah a lo vei ve kher bawk nen. A hmaa a ngaihtuahna kal kual vel kha a rawn nemnghet ti mai ang, Amanda a rinhlelhna chu a nasa telh telh mai si! Sama, harh chhuak lul teh. Amanda hian a mamawh che asin le. 

"A lu a rawn lang e. Amanda, i thei a nia. Tang rawh aw. Vawi khat leh chiah" Dr. Hmingsanga chuan a dula nem chungin a rawn ti lawm lawm a. Mang ramah a lo cheng hman titih alawm le. A mitthlaa naute duhawm zet mitthla chungin vawikhat chu a han insangmar leh ta a, then chak chak chung leh rum hráwih chungin a sang leh vak a. A thim ta mup mai. A chau a ni..a chau. A harh leh meuh chuan engkim chu a lo pangngai tawh a. Sama nu leh a thawhpui ten an lo thlir thap mai. 

"Ka naute" a ti sep a. Imanuela chuan, "A tha e. An hem mek a" a lo ti var. A awmzia chu naute a nei tihna. A naute pawh a dam..a khi sak a, a bianga mittui luang chungin, "Khawiah nge Sama" a ti sap a. Sama nu chuan a biang rawn chul pahin, "Inah a haw lawk a nih kha. Mamawh a va lam khawm dawn a. Thlamuang takin awm rawh aw. Engkim a tha a nia" a lo ti siam siam a. Nu hmangaihna leh uapna hnuaia a hun tam zawk awm ve ngai lo Amanda chu Sama nuin a duatna te avang chuan a hnuk a ulh a, tawng pawh a tawng tha thei lo. 

"Fapa duhawm deuh i nei a. Lungngaihna tur a awm lo a nia" Dr. Hmingsanga'n a lo ti ve vat bawk a. Fapa a nei a maw?! A va lawm tehlul êm. Sama pawh a lawm ngawt ang. Ni e, fapa kha a awt nasa mai si a. 

Imanuela enin,"Kan hna kal lai chu i kutah ka dah rih mai a ngai dawn a ni. " a ti sep a. Imma pawh chuan,"Lungkham suh. Engkim ka lo siamtha vek ang. Tunah chuan nang leh i naute chauh ngaihtuah rawh" a lo ti sawk sawk a. Ni e, chawlh a lak ngei a ngai dawn a ni. Mibo te chu tunah chuan a theihnghilh rih a ngai. Sawrkar lamin an chelh rei tawh a, tunah chuan an chelh zawh rual lohin naute a nei tlat! A naute chauh a ni a ngaihtuah tawh rih dawn ni. 

"Kimi,..kim..kal suh. " Zirsanga chu a tawngvai niah niah a. Drose kut chu a chelh tlat bawk. An dah hran atang khan ni 2 a liam tawh a, thisen chhuak an titawp tawh a, silaimu pawh an la chhuak tawh. A thianten an enkawl thei ta bawk a. Drose leh Arini ten an vil deuh chawt mai. Ni e, an bona a rei ve leh deuh tawh a, an lo inngaina tlangin an lo lungrual ve hle tawh a lo ni. Khatia ramsa mak takin an awmna a rawn vela mihring a sehhlum tuk zing karah la la khan an awmna hmun an sawn nghal a. An kalkawngah an mit tuamsak vek an nih avangin khawi lai nge an hruaina hmun an hre hauh lo. Tuirial ramchhung tho a la ni em tih pawh. Tuna an awmna hi chu building lian tak, tukverh reng reng awm lohna hmun a ni. In chung sang takah ventilation chu a awm ngei naa, a sang lutuk a, tu han lawn phak rual a ni lo. An dahna pindan chu a zau viau bawk. Cement chhuat, a bang pawh cement vek a ni a. Bungrua engmah a awm lo. Dunlop leh tuisik in tur a awm tawp a. Chaw chu an rawn dah mai a. A sir kilah bathroom lian lo tak a awm leh tawp bawk. Kawngkapui chu thing tha chia siam niawm takin a chhah tha hle a, han nek chhiat zawh rual chi ni pawhin a lang lo. Tlanchhuahtir chu an tum lo hle tih a lang. Tin, an insawn zanah khan an inbual faitir vek a. Thawmhnaw thar an dawng theuh bawk. An han fai ta chu an harh sawt mai. Dik tak chuan hetia hrenbeh an ni hi an zalen lo tih mai loah chuan innghaisakna an tawk lo va, damtir an tum ve tih hriat ringawt pawh a hlu ve viau. Ngaihdan an nei vek tawh bawk. Sawrkar mi rawihten an ru bo a, Hel ho rukbo anga tlang thantir piahlamah Hel ho lakah an ni hi an tawktarh a ni tih hi. Hel hoin rawn chhan tum se an ni lam hian lo tingmit dial se chu chu an duhdan a ni tih an hre ve tlat tawh. Chuvang chuan Zirsanga a la dam chiang lo bawk nen, an tih ang anga awm rih tawp mai chu an tum ta a ni. Zoram khawvel dangah eng nge thleng an hre lo. Tihian anmahni leh mahni inbuaipuiin an awm ve chawrh chawrh tawp mai a ni. 

"Zirsang, i harh em? Heii..i tha aw" Drose chuan a biang a rawn chul heuh heuh a. A men chhuah chuan a nupui hmel kha a ral tial tial a, Drose leh Arini te a hmachhawn nghal. A mit a khap sawk a. Kimi a ngai a ni. A nupui hmuh leh a chák. Silaiin a denna a nák na chuan a khawsik a rawn siam leh tan a. A thaw pawh a lum leh ta hiam mai. Arini chuan puan a rawn sin tir vat a. Nachhawkna a barh bawk. A thiante hi a la hriat ngai loh mah nise an va hlu tehlul êm..

"Ka dawn tur ang zat ka dawng em tih ka hriatchian phawt loh chuan engmah ka ti dawn lo" Zomuansangi pa Pu Mawia chuan a ti nghut nghut a. A hmaa thu chuan, "A lo berah Cheng nuai 20 chu i dawng ngei ang" a lo ti nghet charh. 

"He thil hi a ruk thei ang berin in kalpui tur a ni. Chuti maiin ka makpa hi in man thei dawn lo va. In vehthlem phawt a ngai dawn a nia" Pu Mawia chuan a ti leh a. 

A hmaa thu bawk chuan khi sukin, "Kha lamah chuan lungngai suh. A in pawh luhchhuak turin kan naute kan tir tawh e. Amah ngei hian Zochhingpuii pawh a kawl a ni. Ani hi kan kuta a awm anih chuan, ZCP chu an ral a ni mai" hmai uang angreng tak hian a ti a. Pu Mawia nuamti lo chu a che sek mai. Ni e, a fanu tana a tihsak theih awmchhun nia a hriat a ti mek a ni. A makpa a fanu pasal Ephraime chu ZCP hotupa ber a ni tih a finfiah zet hnuah tihian mantir turin hma a la ta chu a nia! A fanu a hmangaih tak tak vang nge sum vang zawk tih erawh amah pawh hian inringtawk takin a chhang thei ngutin a rinawm loh. 

"Ka tel ve tih hi ka fanu leh ka makpa hian an damchhunga an hriat ka duh lo a nia" a ti leh a. A heh a liak kual a. A zám tih a lang reng mai. 

"Hna thar duhawm tak min rawn chhawp chhuahsak a. I makpa hi rinhlelh ngaihna kan lo hre ngai hauh hleinem. Mahse, a chiang ta a. Amah hi tunah chuan kan veh ber tawh ang. Mi dang chu a rualin kan hmetmit thei ngei ang" Pu Rothuama, Inspector chuan a lo ti chang fak fak a. Mi dang pawh chuan thawk an la sang sang mai. Ephraime meuh pawh a him ta lo chu a nia! 

Ruatfela tui cheng ning chu towel vengin in chhungah a lut a. A hna ngaite bawkin a inthlak fel hnuah zu bawk a tauh leh ta. A nupui bo a chin harhfimin a awm ngai ta lo. A hmangaih a nupui a chán nawn leh hi mipa taka tawrh harsa a ti takzet a ni. A nu leh Arini ú te pawn rawn hnem tumin han sawipui an tum ngial thin a. Mahse, a tuamah chu a hmu duh lo. Amaha awma thil ngaihtuah vak vak a duh ber mai. Ral lehlam tlang thlir chunga a thut vang vang laiin a phone a rawn ri ral ral a. A nupui chungchang ni lo tawh phawt chu menah a thlak vek tawh zel a, mahse, number hlang a nih avangin beisei nei ru deuhin a la kang ta a. 

"Keimah Arini pa..zaninah min hmu turin rawn kal ang che. Ka fanu chungchangah kan inbiak a ngai" a puzawn Pu Thanga chuan a rawn ti nghut a. A ner sawk. Pu Thanga rilru chu a hria..a fanu rubotu te hi tu te nge an nih a hria, mahse, thil ngiat an nei ve tlat a! Ruatfela hi ZCP member anih leh nih loh hrechiang turin. Chutah chuan Arini pa hi a kut an phuarsak ve tlat a ni. Ruatfela hi ZCP member a lo ni ru ve reng em ni ang? Chu zawng hunin a la hril ang chu..pu Thanga hian a fanu tlan chhuah nan a inpuantir thei ang e maw chu le..

"Abby, i hna i hrechiang maw? Kal rawh le" A hmaa ding thim mukin a tih rual chuan a khi sak a. 

"Amanda nun tichhe tura din leh siam ka ni" a ti zawi raih a. A pil bo zui nghal. 

Zing lam dar 5:10 chiah chiah a ni. Boruak chu a vawt viau mai a. Khua erawh a thiang nuam viau thung. An vei suau suau a, hmanhmawh hmel taka pen thlawp thlawpte hmelah chuan eng emaw tak inmung a awm chiang. A ngaihna hrethiam chiah lo va a awm laiin Dr. Hmingsanga a rawn lut ta hlawl a! 

"Naute a bo! Sama'n a ru bo" a rawn ti ta a..

Amanda mitmengah chuan tawrhna leh thinrimna a inbuan let tawp tawp mai. A taksa na leh hliamte hrechang lek lo va inbeng kangin, "Samson leh! A tawk ta e. Tunah chuan i nupui ni loin Amanda i hmachhawn tawh ang" a ti vawt raih a. A mitmeng ling hlar chu Dr. Hmingsanga pawn a melh tha ngam meuh lo. Amanda chuan a phone lain Home Minister no a dial a. A lak rualin, "Engkim hi ka hria. Min daikhalh tum eng ang mah ula, ka fapa leh mi bote chu Zoram mipuite mithmuhah ka chhanchhuak ngei ang. Chuan, ka bang e. " a ti ram hmak a. A dah nghal bawk. Ephraime call lehin, "Engkim ka chán tawh e. Tunah chuan ZCP member ka nih lohna tur reng reng a awm ta lo. Vawiinah min rawn hmu ang che" a ti leh sak sak a. A thinrimna mei de set set, tih daih theih mai a lo inbeisei kha a pasal ngei hmangin an rawn chhem alh hluai a. Tunah chuan tuman an dang thei tawh lo vang. He sawrkar tenawm zet hi a bul rát atanga a tawp thlengin a kar phawng vek ang a. Zoram khawvelah dikna a laltir ber tawh ang..

Ephraime chuan a naute ho melh kualin, "Amanda kan thawhpui thei ta. " a ti sup a. Kut an lo beng dar dar mai. Hetih mek laiin Samsona leh Abby pawh an lo inhmachhawn ve mek a. 

"I titha takzet e. Tihian naute hi chu hmun himah kan dah ang a. Tunah chuan amah chhanchhuah tuma lo kal i nupui chaldara silai tin chiah kan hmabak ta" Abby chuan a ti fiah kák a. 

Sama chuan meng hnual rawihin, "Amanda chu engvangin nge a thih kher a ngaih a?" a ti tham tuak a. 

"A chhan chu Zoram thurúk a hre tam mah mah tawh a tin ni..nitin a rawn hnai zel a, engkim a rawn hailan huna chhe vek tur ten a dam ve reng hi tul an ti tawh lo a ni" Abby chuan a ti vawt raih a..

(Ka hrawk/dang a pilh a. Engmah ka ei thei lo. Inmi tawngtaipui ka ngai khawp mai 😇