inferno 6

INFERNO (6)

Ziaktu: Toni Râlte

Hmeichhe pakhat a bo ve leh ta tlat mai! Huiham. Amah chu Judy a ni a. A pasalte khua Zopuia chawlh hmang tura a haw tur chu kal kawngah rukbo a ni. Judy hi han sawi zau hlek ila, thla 3 kalta khan a nu Pi Rinpuii sumdawnna rapthlak leh tenawm tak chu amah hian hai chhuakin, a nu thawhpuite pawh a mantir phian a. A nute sumdawnna hmun mihring thisen an chhuahna pindan pawh amah hian hmu chhuakin Police kutah a dah a ni. Kha thil thleng khan Zoram a thawng a. A chhan pawh Minister a tel ve vang a ni. Man zingah khan Judy nu nutapa minister ni lai pawh a inhnamhnawih ve vangin jailah nawr liam a ni a. An case hi a rip khawp a, a chhan pawh mihring hmanga sumdawnna a nih vang a ni. Mihring taksa bung hrang hrang hmangin India ram chhunga doctor thenkhat te nen inthlunzawmin he sumdawnna hi kalpui a ni a. Heta inhnamhnawih, an man takte hi mi hausa leh mi lian tak tak, an veng chhung tana mi tangkai leh langsar tak takte an ni. Judy bo chhan pawh hi mi bo dangte bo chhan ai khan a thukin a ril zawk maithei a ni. Tu hriat va ni suh. Nge kha a nu sumdawnna kha sawrkar lam hian a lo hriatpuiin a lo thurualpui zawk. Heng zawng zawng hi hailanin awm tawh se chuan Zoram pawh a thla a muang tawh tur. Judy bo thu chu Amanda pawn a lo hre ve a. Judy hi a lo hriatsa tawh avangin mak a ti em em lo. A tan kawng a awlsam phah sawt maithei zawk a ni. Judy pasal Ngura erawh a rilru a nain a tuarthiam lo hle a niawm e. Engpawhnise, Judy pawh damin an la hmu êm ang chu maw. 

"Kimi, hei hi a ni dawn reng asin. Unau in ni a, nupa ni tur in ni lo vawi tam ka tih kha. Zirsanga chu kan hmu leh ang em ka hre lo " Kimi pa chuan a ti mawlh mawlh a. Kimi a ner sak. Sawi tul lo hi a sawi ve ziah. 

"Unau kan ni lo. Sawi sawi a tul lo. " a ti hmak a. Zirsanga bo atang khan amah maia awm ai chuan tiin a pa te in lamah a chengkual tam zawk a. A pa lah hian a khat tawkin unau an nih thu a hrilh ve ziah. A pasal a ngaihtuaha a rilru a buai tehlul nen. Ninawm lutuk. Khumah a mu vang vang a, Zirsanga sumdawnna pawh a thawkte kutah a dah deuh tawp mai. A bo hma pawh khan a inrawlh vak lo hrim hrim a, a pasal kha a ring tawk bawk. Zirsanga chu a ngai takzet a ni. A duatna te kha a thlahlel ngawih ngawih. A la dam tih a hriatna khan tlemin a thlamuan deuh. Mahse, an inhmu leh ang em? A bo atangin kar khat a liam mai dawn. Police te chu a han dem dawn dawn a, mahse, an tan kawng a pin ve zia a hai bik si lo. 

"Zirsang, lo haw vat teh. A reh a nia" a han ti ngawt a!

Isabella pum na chu a vial ngawlh ngawlh a, a thlan fim te chu a bawl tawk tawk a. Zirsanga chuan, "Bella hian nau a vei a nia..rawn lang vat r'u" tiin a au tuar tuar a. Rosangpuia nen Bella chu an zawn kang a, dawhkan lian vak lo ho chu hmeichhe hoin an dawhzawm a, chutah chuan Bella chu an muttir a. Ani lah aw pawh chhuah hleithei loin a na chuan a pawt kun tlat a. A changin a rawn rum leh nghat thin. Drose chuan a pum chu a lo chulsak vat a, Judy leh Arini ten a kut an lo vawnsak thung a. Nauteii erawh a la nau deuh bawk a, a chiái viau a niang, awmngaihna hre loin a lo dingzum zút ringawt. Zirsanga a au leh tuar a, kawngka chu rawn inhawngin hmai tuam mi pahnih an rawn lut a. Isabella chu an rawn en kual a. 

"Khatia en kualna hman a awm tawh lo. A rang thei ang berin Hospital panpui a ngai" Rosangpuia chuan a lo ti bung nghut. Pakhat zawk chu a tlan chhuak zauh a, 5 mins hnu velah Doctor niawm tak leh mal nurse bakah mi pahnih an rawn lut a. An hmai an tuam vek bawk. Male nurse chuan, puan hlai zet hi rawn thing pharhin Bella chu a sintir sawk sawk a. 

"Hetah in neihtir thei lo vang. In neihtir dawn tih min hrilh hlek suh u" Zirsanga chuan a ti vin thak. Mahse, ngawi rengin an che mawlh mawlh bawk si. Bella chuan thei leh thei lo hian, "Ka neih a la hun hleinem.." a ti táwk táwk a. Doctor niawm tak chuan, "Khawngaihin hahdam rawh le. San a rawn pek hunah che chuan i sawi dawn nia. Hlauthawng lo la aw. " tiin a dul chu a rawn nem titih a. Arini chuan rum zeta lo melhin, "Damdawiina in kalpui lo a nih chuan kan tihtheih in hmu ang. Nang Doctor lemchang hi kan ring hlek lo che a nia" a ti chang fak a. Doctor pawh a tawlhhnung deuh. Mahse, silai keng pakhat khan , "Ngawi thap rawh u. Hospital pan chi kan ni lo. Hetah naute a nei ang. " a ti thawt a. 

Rosangpuia'n , "A nih chuan a pasal kut vuan chunga nau a neih dan tur ruahmanna insiam a ngai a nih chu! Ani hi chhuah rawh u" a lo ti dam thlup a. 

Bella pawh chuan, "Hetah chuan ka nei thei lo vang. Khawngaihin min kaltir rawh u" a lo ti ve a. Doctor chuan call a dawn vangin a va kal kiang deuh a. 

"Nau a hnai tawh em ni? A neih a la hun si lo va" lehlam ami chuan a rawn ti a. 

"Hnai lem lo, eng emaw chu a awm niin ka hria. A chhiat dawn pawh a ni maithei" a ti zawi sup a. Lehlam ami chu a chek hlak. 

"Chhiattir mai rawh" a rawn ti vawt raih a. Doctor pawh a meng hnual rawih mai. Bella na tuar insangmar chu a va thlir a, mihring a nihnaah khawngaihna chen a nei. Tin, a nau hi a chhiat chuan a rilru na leh thinrim vangin thil a kal khawlo thei. A pasalin a hriat phei chuan engkim a danglam dawrh thei tlat! Mahse, thupek chu thupek a ni miau si. A va pen phei a. Mi dang chu nam kiang deuhin, "Nachhawknain ka'n chiu ang e. Nau hi a neih a la hun tlat lo. " a ti sup a. Nachhawkna a hip chhuah lai chuan a kut a khur deuh. Drose chuan a hriat tham lekin, "Doctor kut khur maw?" a ti sap a. 

Nachhawknaa Bella a jection zawh chuan Bella pawh kar loah a na a zia tan a. A thaw lak te pawh a pangngai chho a, chauh hmel zetin a mu ta reng a. Silai keng pa khan , "Tikhan in awm dan pangngai khan awm leh rawh u. Engpawhnise in chhuak tep e. " a ti lung lung a. Doctor ho chuan an chhuahsan ta a. 

"Chhuah theih ka va chak tawh em. Heng mi tenawmho do let tur hrim hrim hian chhuah ka duh" Zirsanga chuan a ti thawt a. Mi dang an lo thaw dêp dêp thung. Nauteii pawh a meng phelh phang a. Ani hian Sangpuia tan thu pawh engmah a la hre lo. Hre ta ngat se engtin nge a hmachhawn tak ang le? A la naupang si! Hre lo law law se a tha zawk e. 

Abby chuan Sama dul thuar vel chu a fawp kual dan dan a. Sama mitah a melh ran bawk. Sama lah a rilru a fim lo tih a hriat hle bawk. Abby sawngbawlna chu nuamti zetin a lo dawngsawng ve tawp tawp a. A thaw leh hawk thin. Chutah Abby chuan Sama kekawr chu phelhsakin mitmeng hur zeta Sama melh chungin, "I hriatreng tawh tur thil ka'n tihsak ang che" a ti tham tiak a. A mitmenga phurna leh hurna inmung bakah a biangte chu a tai hlar a, a nung sawr sawr a ni ber e. Sama a lo rum hawk ringawt. Abby chuan a lei a hmang thiam zet mai. Chutah ding thutin drawer a va hawng a. Bur lian vak lo hi a va la chhuak a, Sama chuan makti zetin, "Eng nge?" a lo ti hráwk a. 

Nui ver ver chungin, "I hre mai ang" a lo ti sap a. Bur chu hawngin a kutah a chhunga awm chu a bun chhuak a. Khawizu a ni tih Sama chuan a hai lo. A phur tawh takzet a ni. A thluak nu deuh but mah se; a rilru chhungril berah erawh Amanda hlimthla a la chambang tho a. Mahse, he Abby hian a vaw chhe telh telh chu a nih si hi..khawizua Sama taksa a chulh kual lai chuan Sama chu a khur titih a. Abby tukhum sama kekin, "Abby, ka che tawh mai dawn e aw" a ti mawlh mawlh a. Phalsak a la ni si lo. Mahse, a tawpa tawpah Abby phalna chu hmuin chet an han la tak tak mai chu..! Khawvel pawh hi a zak zawk hial awm e. Abby nihna dik tak Sex addicted a nihna chu lantirin a awm mek a ni satliah lo va. Sama chungah a leihbaw mek zawk a ni. Chutiang taka nawm leh phurna chu Sama tan a vawi khatna a ni. A hrereng tawh ngei ang le..Amanda neih ve loh thil neitu Abby lakah chuan a intulut lo chauh chu a nih si kha maw..

Zoliansanga chuan a nupui chau leh zawi taka mu chu a chul dan dan a. Zawhna tam tak a nei a. Mahse, a nupui chuan chhanna a duh ang a pe thei si lo. Bakah Hlupuii chu a la chau mah mah a ni. Chuti taka hliam a tuar chu Doctor te ngei pawn a chhan an zawt a, Zoa chuan engmah a hre si lo. A nupui lo awm lo ringawt kha rukbo a ni ve ah a ngai hman a. Mahse, ni 2 hnuah Jonathana'n lo callin Hlupuii Hospitala an dah luh thu a rawn sawi ringawt a nih kha. A mangan tawh laia a nupui chanchin duhawm lo a han hre zui leh ta khan a thawng em em a, awmngaihna tak pawh a hre lo. Amah ngeiin a nupui zawn a tum mek laia chutia hliam nasa tak nena hmuh a nih leh takah chuan a report thehluh pawh a lakir ta a. Rang takin a nupui chu a va hmu ta a ni. A rin aiin a nupui chu a hliam nasa. A mit veilam chu a vung phui vek a, a biang leh taksa dang a duk nasain a ban dinglam pawh chu a tliak niin a hria. Chuti taka a nupui nghaisatu chu tu nge a nih a hre duh a, Hlupuii a rawn harh ve zawk chhungin a han zawt a. "Engmah hriat ka nei tawh lo a ni. Zo" tih chhanna bak a pe thei si lo. Mahse, a nupui hian eng thil emaw a zep a nih a ring. A fanu Zochhingpuii chu hmun himah a awm tawhah a ngai a, tunah chuan Hlupuii chiah hi a nei ta. Venhim pawh a tum ruh hle. Tin, a fanu pawh nakinah chuan la buaipuia a chanchin la chhui a tum tho. Chutia mi kuta dah ngawt chu felin a hre lo a ni. Ramsa pawh nise a fanu a nihna a bo chuang tlat si lo va. 

Hlupuii rawn meng diar diar chu a lo ngaihven vat a. A mitmeng pawh a fim tan tawh e. Zoa chuan a lo nuih var var a, a pasal hmel a han hmuh chuan mak a ti deuh tih a hmelah a lang. 

"Zo" a ti tham tiak a. 

"Umm, a tha vek tawh e. I him tawh aw" tiin duat takin a lo chul a. Hlupuii pawh a thlamuan hmel viau. Tui a in leh hnu chuan a harh ta deuh a. Zoa chuan, "Thil thlen dan hi ka hriat a hun tawh i ti ve lo maw?" a ti sup a. 

"Engmah ka hre lo a ni. Ka hrechhuak zo tawh lo, Zo,.." mangan hmel zet hian a ti a. A pasal mitah erawh a en tha ngam meuh lo. Zoa chuan chung chu a hai hlek lo thung. Mahse, nawr erawh a duh hauh lo. Nakinah amah ngeiin engkim a la chhui chhuak mai ang chu aw. Hlupuii hi a dam chhuah phawt a ngai a ni. 

Rosangpuia Hotel , a hotel hming atana Loicy Hotel tia a vuahah chuan thil mak tak a thleng leh ta tlat mai le! Hei zet hi chuan Police te lu pawh a tihai viau mai. Zing lam dar 3 bawr velah Hotela thleng, Chhim lam pa hausaa sawi, Car dealer nia sawi chu a room chhungah thia hmuh a ni leh ta tlat mai le! He mitthi hi Nunsanga a ni a. Kum khat kalta khan a nupui pahnihna Miriami nen an innei a, fa erawh an la nei hman lo. Miriami nen an rawn zin chu tihian rawng taka thah a ni ta ringawt mai a ni. Police lamin a ruang an va lak chuan Manager leh Asst. Manager te pawh kawm theihin an lo awm diam tawh a. Hotel neitupa Rosangpuia rukbo ni mah se ,a hotel erawh a kal ngaiin a la kal reng a, ngaihhlut a la hlawh reng tho a ni. Room no. 047 -a thil thleng a ni a, Cctv footage an han en thuak thuak a, room service tih loh chu lut chhuak an awm hauh si lo. Room service chu a rang thei ang bera lo kal turin an han hrilh a. Cindy chuan Pari chu a ko vat. Cindy hi sawi tawh angin, Asst. Manager a ni mek a ni. Kan la hre theuh awm e, Cindy chu Rosangpuia nupui Dingi pasal hual Valpuia laka fa pai kha a ni. Mahse, a inchhir a, tihian Rosangpuia te tan rinawm takin hotel a enkawl chho a, Dingi pawn a ringin engkima a rawn ber a ni leh tawh a ni. Pari pawh kan la hriat a rinawm, ani hi Dingi u Lawma nupui hlui kha niin, he hotelah hian ni 3 a thawhna chauh a ni. A vanduai asiamin a service zanah kher tualthahna a la thleng zui a! 

"I va luh laiin mi dang awm ve an awm em? " tiin Pari chu an han bia a. A hlauhthawn hmel hle. Buaina chu a cho vak bik lo a nih hmel e. A lu a thing nar nar a, "Aih, Sir, an nu nen chauh an awm" a ti bah niai a. Miriami kha biak tlakin a la khawsa mang tlat lo mai a. Chuvanga hetia mi dang han kawm kual pawh an ni reng a. A pasal thihna chuan a thawng na ngang a niang e. A khawng deuh reng mai. 

"Han ngaihbel tur thil te i hmuin i hria em? An nupa inkarah emaw amah Pu Nunsanga awmdanah emaw pawh" tiin an han zawt leh a. Pari chuan, "Chutiang engmah ka hre lo sir, ka luh chuan an nu hi a inbual zo a rawn chhuak chiah a, pu Nunsanga erawh a phone a hmet a. Eitur ka dah a, ka chuak lehnghal..chuan zing dar 3 velah mikhual kan neih leh thut avangin Cindy hian min rawn bia a, ka va buaipui a. Pu Nunsanga te room ka kal tlang lai khan eng emaw dik lo awmin ka hria a, kawngka kha a inkalh lo a ni. Chuan, mak ka tih deuh vangin ka va lut a. Light ka on chuan tikhan ka va hmu ta mai a ni. " a ti a. Tlemin a aw khur pawh a zia deuh e. Ni e, Nunsanga kha a hrawkah zai a ni a, va hmu hmasa berah a va tang ve si a, rapthlak a ti viau pawh a ni mahna le. Police lam pawn a nupui Miriami harhfim hun nghah mai loh chu tihtheih dang an nei ta vak lo a nih hmel. Cctv footage-a a landan chuan Pari chhuah hnuah Asst. Manager Cindy hi a va lut ve leh a, ani chuan Pu Nunsanga khan a ko niin a sawi. 

"Bill vel tifel turin min ti teh ngawt a. Ni khat an la cham dawn si a, a hmanhmawhthlak loh thu ka sawi paw'n siam mai turin min ti a. Ka siamsak a. Ka luh lai chuan an nu hi a mu tawh a, amah Nunsanga chuan zu a la in thung. Kei pawh ka chhuak zui ve nghal mai" tiin a sawi. A sawi ang tak takin room chhungah a awm rei lo viau. Tuna han en mai chuan an nu bak rinhlelh tur an váng ta raih mai. Rinhlelh pawh inthlahrunawm khawpin Miriami lah chuan an pa thihna chu a tuar bawk si a. Police tan pawh a luhaithlak duh viau ang. Dingi pawn an hotela thil thleng chu a lo hre ve a, pawi a ti kher mai. An sumdawnnain a tlakchhiat phah a hlauhawm ve bawk si nen, Pu ber lah awm bawk si lo. A inngaihtuah nasa lutuk chu a á thei mai dawnin a inhre hial mai. 

Chawhnu lam a ni tawh a, Pu Nunsanga ruang pawh postmortem a nih hnuah Lunglei lama lak phei zai an rel dawn tan a. Miriami erawh Police lamin an hreng rih. A chhanna a mumal hleithei tlat lo a. 

"Zu ka in khan ka mut a tichhuak a, ka nguai bawk si. Ka muhil hma lutuk. Cindy rawn luh lai pawh ka hre tawh lo. Kawngka inhawng thawm niawm takah ka harh a, dar 2 bawr vel a ni maithei. Ka pasal pawh ka bulah a mu. A thim deuh a, ka hmu chiang thei lo. Khatih lai pawh khan a lo thi reng tawh a ni maithei. Kei lah ka muhil zui ve leh mai bawk sia. Room service au lawng lawng thawmah ka harh ta a. Tikhan thil chu a thleng ta tawp mai a ni. Engmah ka hre lo" tih chu a sawi theih a ni mai. Dawt a sawi nge sawi lo hriat a ni lo nachungin an han chhui vel pawn an pa a thahna chhan tur hi chu a awm ve thei tlat mai a! Chuvanga police lam pawn la chelh rih an ni. Sawi tawh angin Pu Nunsanga hi kum 51 a ni a. A la valai hle. Amah fitness lam ngaipawimawh mi, home gym neia la inla fit ngat ngat mi a ni a. A nupui pakhatna nen fa pahnih an nei a. An tleirawl ve ve tawh. A pa bulah an khawsa ve nghe nghe. Nunsanga hi pa tha leh thil phal tak ni mah se; chak lohna a nei ve a. Nupui pakhat duhkhawp lo mi a nihna hian a hmingthat tur ang pawn a tihmingtha thei lo fô, chu a chak lohna avanga a fate nu nen pawh inthen an ni ta reng a. Miriami hi hruai lutin an nu chu kawngka súlah a ma a ni. Miriami hi nuthlawi niin fa pakhat a nei a. A pa bulah a awm thung. Kum 38 lek a la ni a, a la nalhin nula tam tak ai pawn a la tuihnai zawk awm e. Chuvanga pu Nunsanga pawn thlang ta chat a ni. Mahse, an nu hmasa laka a fate leh Miriami inkarah indona a awm lo thei ta lo va; chhungrilah an intai ta ran mai. A fate tan lah an nu luahlantu chu lo pawm mai a harsa ve bawk dawn nen..a bul chu amah Pu Nunsanga a ni. 

A thurochhiah erawh a mak viau. A in leh lo chu a nupui hlui Ma-i leh a fate tan a dah vek a. Miriami chuan chan pakhatmah a nei lo. A chumi hria thinrim chuan a pasal hi a that ta mai em ni ang tih thuhlaah Miriami chu chîk zawka kawm an tum ta reng a ni. 

Zan lai dar 12 chiah chiah a ni. Hotel room pakhatah chuan mipa leh hmeichhia an indinchilh ran a. Mipa chu a sang viau. 

"A tha vek e. I kal thei tawh e" hmeichhia chuan a ti zawi sap a. Kawngka bula ding chungin chu pa chuan , "Ka lawm e. Cindy" a ti sup a. Room chu chhuahsanin, corridor a zawh phei zel a. Kailawn a pen dawn lai tak chuan a ding chut. Kailawn ep chiah room lam chu a va hawi zawk a, a khi suk. Pen thla páwk páwkin garage-ah a lut a. Zawimuangin a car chuan hotel chu a chhuahsan ta a. Kawi khat a liam tihin a phone a hmet a. 

"Hello" hmeichhe awin a rawn tih rual chuan, "Cindy, Pari kha lo enthla rawh aw. Min hmu tlat mai. Thisen chhuah lo zawnga thil kalpui theih tluka tha a awm lo a nia" a ti zung zung a. 

"Aw le..ka lo en ang." a rawn ti hap a. Phone a dah ta a. An headquater lam be lehin, "Kan thianfai fel e. Cindy hi kan tan a la tangkai dawn khawp e. A nghing lo vang" a tih zawm zat a. 

Isabella pawh a rawn harh hret hret a. A na a awm tawh lo naa, a luak a chhuak ut ut mai. Zirsanga'n, "I tha em?" a lo ti vat a. A bu nghat ringawt. Heta a bopui te hi tumah a hriatsa an awm lo nachungin an ngaihtuah em em a. Ani naupai a lo ni ve bawk nen, a rin ang em em chuan a hrehawm loh e. Mahse, a pasal a ngai thung. A thu kang tur chu a kap chu a hnáwng deuhin a hria a, zun a cheh emaw tuibawm a keh emaw a ti hman. Hmanhmawh takin bathroom a pan a. A thiante pawn an lo en ve reng ringawt. Comode chu a melh ngawt ngawt, thisen chhuak nasa lutuk leh a tai na váwt váwt avang chuan thlabarna hlirin a khat a. 

"Ni lo, ni lo..a ni thei lo" a ti mawlh mawlh a. Nau a chhiat a maw?! A naute a tla..a thi. A duh thei lo. A tap chhuak ta hawm hawm a. Kawngka a kalh si, a thiante chuan an rawn kik dat dat a, "Bella, i tha em? Eng nge thleng?" Rosangpuia chuan a ti a. 

"A na lutuk..ka naute..ka naute" a lo ti táwk táwk a. Mipa pahnihte chu an inmitmei zauh a. Kawngkhar chu an nek hawng ta thawt a. Bella chu a lo tlu niaih a, a tap khur ngawt ngawt bawk. A kap atanga thisen chhuak chu a lo luang ngiai ngiai a. Tenna leh thinhrikna nei hauh loin Zirsanga chuan Bella chu a pawm tho lawp a, A hmaa an muttirna dawhkanah bawk khan a va muttir leh ta a. Arini chuan Bella nau chhiatna thi chu mittui tling pam chungin a va leih fai a. A thinrim hle tih pawh a lang. 

Rosangpuia chuan, "Zawngho, rawn chhuak teh u. Eng nge in tih hi? Bella hian nau a chhiat asin. Chu pawh inrukbo vang vek. Kha naute khan hlutna a nei asin. " a ti tuar tuar a. Judy leh Drose ten Bella tap chu an lo thlem ve mek bawk. Mi pahnih bawk an rawn lut leh a. 

"A chhiat ta nge nge maw? Tikhan a awlsam zawk ang" pakhat chuan a ti khanglang a. Amah hnaiha ding Zirsanga chuan leh pawh tih hman loh khawpa rangin chupa khabeah chuan a tha tawpin a dawm chho bur mai. A thal chiang teh e. A thianpa chuan silai kau nghal rapin an ni ho chu a tin kual a. 

."Tumah kha che hlek suh u. Thih in duh loh chuan" a ti teng chhuai a. 

Boruak a reh duk. Mahse, a reh rei lo. Judy kut a che zawk a, chumi rual chuan chupa chuan a hrawk a dawm vut, silai chu a hmet puak zui a, mahse tumah a fuh lo. Bang a ni a va kah ni. A tlu ta ruah a. A nghawng veilamah perek 6inch a bur vú mai. A hrawk chu a ri bawrh bawrh a. A tal awrh awrh bawk. Zirsanga chuan, "Ti ru le.." tih leh silai chu chuh a rual a. Mi dang pawh an che ve vat. Kawngka chu an khar vat a. Chhunglamah an kalh hmak bawk. Mahse, an la hlauhthawn fo avangin dawhkan leh bungraw hmuh theih ang ang chu kawngka do nan an hmang a. Tukverhah chuan bar kham vek mah se, kawng an neih an ring nge. Tukverh chu an hawng a. Bar lah chu a nghet phian si. Lehlam ho thawm pawh a ri tak tak e. Silai puak ri kha an hre miau si a. Misual pawl lam tlu rengte chu tho zui tur an awm rih lo nge an zâl der a. Ngaihven hman pawh a ni bik lo nen. 

Tukverh chu a sang lo naa, chhuah ngaihna awm lo khawpin bar chu an dah bit si. An han sawi thin. A sak fun mai a. Tukverh atanga chhuah chu tum buai chiah an ngai ta lo nge,. Zirsanga chuan bathroom bula store room angreng deuha an hman thim rek ruk atang chuan hreipui a va la chhuak nawlh mai. An lo thlir reng a. Bang thlanglam chu cement vek a ni a, mahse, bei nge sei run dung a ti nge a han chek thuai a. A bam let awl mai. Chhut chhiat chu thil huphurhawm tawp a tling. Judy chuan misual pahnihte bula va thut pahin, "Hei phone a awm alawm. Lawkin" a ti ta a. An lo mangnghilh pek a nih dawn kha. Tu number ber nge a call dawn tiha a buai laiin Drose chuan, "Amanda be rawh. Amanda " a lo ti tuar a. Judy pawh chuan thuawih takin a call ve nghal. A ring ral ral a.

"Aw ..Amanda ka ni e" a rawn tih rual chuan, "Judy ka ni. Rukbo zing ami kha. Tunah hian tlan chhuah tumin kan bei a. Mahse, a khirh takzet. Kan awmna hi Tuirial ram niin ka hria a. Tu emaw farm house a ni..aw..aw le.." a ti zung zung a. Phone chu a dah a. 

"An lo kal dawn e" a ti a. An mitmengah phurna a lang ve tan ta. Chutihrualin lehlam atangin an rawn do ve mek a, kawngka chu an rawn nawr sawk sawk a, an rawn kap thul. Tlanbotir chu an tum loh hmel nasa mai. Silai an kawl ve tlat avangin chutimaia an rawn nanchin huk erawh an ring bik lo. An awm khawm thap a, Zirsanga leh Rosangpuia te chu tlar hmaah silai hum chungin an thu khar a. Hmeichheho erawh an hnungah..

Amanda a chhuah rualin Sama chuan Abby call nghalin, "A chhuak. A pawimawh tawpkhawk a nih hmel" a ti sup a. 

"Pawimawh tawpkhawk e. Mibo te kha tunah hian tlanchhuah an tum mek a ni. " a rawn ti a. Sama a chek hluk. 

"Tikhawtlai rawh. Tunah khan..vatin" Abby aw-a hmanhmawhna chu haider chi rual a ni lo. Sama pawh a che zawk a ni ber e. 

Pawnah tlan chhuakin a bike a chuh nghal a, chak mangtaraa tlanin Amanda car pawh chu a va hmu pha ta a. A rilru fim tawh lo, Amanda huatnaa khat tawh leh Abby tihlawm loh a hlauhna chuan pawisak a neihtir thei ta lo. Chak zeta tlanin Amanda car hmaah chuan a tlan a, A ding ta hmiah. Amanda pawh a ding hrawih a. Sama a hmuh chuan makti hmel a pu lo. Amanda car hnungah mi dang pawn an rawn zui ve mek e. 

"Sama..tunah ni rih lo.." tiin a va pan sawk sawk a. 

"Ka nupui i ni a, hetia zana i chhuah zen hi ka phal hleinem" Sama chuan lungpuam aw zet hian a ti a. 

A sana a bih a, a duh aiin an tlai dawn. Ni lo, tunah an chhanchhuak lo a nih chuan thisen chhuahna a thleng thei..a mawhphurhna a ni tlat. 

"Sam, a tawk rih. Nakinah kan sawifel ang. A tha em? Khawngaihin" tiin a han dawhthei hlek a. 

"Aih, a nih loh chuan kei i pasal hi min sut hlum a ngai ang" a lo ti hmiah. He pa hi Samsona a pasal kha a ni tawh lo tih Amanda chuan a hai lo. Mahse, a hmangaih si a ni. 

"Pawi ka ti khawp mai. Min hrethiam rawh aw.." tih pahin a vir zawk a, Sama kutah vuanin hnunglamah a herh a, a kawnga a pai handcuff chuan a pasal kut chu a lock ta hmiah mai. Sama hrilhhai pawn a melh reng ringawt. Police deparment lam be lehin, "Ka pasal hi rawn la u la, tuman kut hmawr pawhin lo khawih suh ang che u." tiin. 

Sama chalah a fawp zauh a. 

"Bye..ka pasal duhtak" a ti sap a. Nui hak chungin a carah a lut a. Ramhuai speed -in a tlan ta vawn vawn a…

(Thluak hi ..thluak hi 😥😭