Inferno 5

INFERNO (5)

Ziaktu: Toni Rálte

Khami zan, Sama a rawn ruih haw zana Amanda mut hnu khan Sama chu tho leh them themin, Amanda note kha a va la ru zál zál a. A thla lain, chu thlalak chu Abby hnenah a thawn leh khap. Amanda muhil sâk sák chu melh leh zauhin a mu ve leh ta kha a nia. Mahse, a nupui hi a la hrechiang tawk lo a tin ni. Sama mize danglam atang khan Amanda chuan a lo ringhlel tawh sa reng a. Mahse, fiahna a neih loh vangin a nghak rih mai chauh a ni. A pasal chuan tu nge a thurualpui tih erawh a hre lo thung. Mahse, Sama a tlan khalh hneh phawt chuan chu chu tul a ti ber lo. Nat erawh a na, a pasal ngeiin a vehthlem ta chu..Sama nungchang a hriat atang chiah khan a nia Hel pawl thurualpui tura thutlukna a siam tak ni. A tifuh ngei turah pawh a ngai. 

Imma nen chuan Sangpuia te veng Khatla lam chu an pan ta vang vang a. Sama leh a thawhpui chu an buai ve deuh maithei. Imanuela motorin an kal bawk nen, rawn zui ngaihna an hriat a rinawm loh. Khatla an thlen chuan dar 9 a ri lek lek tawh a. Sama a relhruksan atalángin hun an hmang rei deuh hlek a tin ni. Sangpuia te in chu an thleng a, Kawngka a kik karh karh a. Sangpuia nu Pi Zami chuan a rawn hawng a. A hawihai deuh tih a hmelah a lang. A mit sen rám danah a tap nasa tih pawh a hriat. Hmeithai khawngaihthlak tak chu a ni e. A fapa a chhuan leh a beiseina chuan jail runthim a bel ta si a, beiseina tam tak leh hmachhawp tha tak tak a lo nei ve asin le aw. 

"Eng nge in duh le?" A ti nem diai a. Amanda chuan a thiam ang tawkin thil kal dan chu a han hrilhfiah a. Pi Zami pawh thil man chak chi a ni bawk a, a man thiam ve mai bawk nge, Sangpuia roomah chuan a hruai lut ta a. Amanda chuan Thlang lam Almira chu a hawng vat a, Drawer-ah chuan File a lo let ngát a. A la hmiah. Dawhkana Nauteii nen an thlalak chu lek kangin frame hnung lama pencil-a Number inziak chu a thla a la zauh a. Thlalak chu Pi Zami bulah Sangpuia kensak tur leh kekawrlum pawh kensak turin a ti a. Pi Zami pawh a bu nghat nghat mai. Rei awm loin an chhuak a, zui rutu an nei em tih ngun taka an thlir hnuah a him angah ngaiin Imanuela nen chuan in lam panin an tlan chhuak leh ta phawt a. 

"Tichuan" Imma chuan a ti nghut a. 

"Sama lo hawn hmain biak ka tum ang. Eng lai pawha koh theihin lo awm la a tha mai. Nang leh kei hian a ruka kawng kan sial avangin kan team ten a thawi pawn an hre tur a ni lo. " Amanda chuan a ti nghet charh a. Imanuela pawh a bu nghut mai. 

Zochhingpuii inbual fai zo rawn chhuak chu Tluanga chuan mit la lek loin a lo melh a. Hetiang taka nula nalh leh hmeltha hi a ni ang tih a lo ngaihtuah thiam ngai lo. Ramsa a nih tel tlat vanga a ráp rukna leh bawlhhlawh riaua a ngaihna te chu a kiam duak duak nia! Ni e, Zoi hi Hlupuii vanglai ai khan a hmeltha zawk a, a noin a pian pawh a fuh zawk. A sam dum hlap chuan a kawng a thleng phak a, a laiah tak bari thenin, a tisen no siah mai kap eng turin Ephraime pek kawrdum fual a khup khuh mang lo chu a ha hnalh a, A ke no leh chawn sei thlarh maite chu sawiselbo a ni. Lo melh rengtu chu ani pawn hai hek lo, "Thil dik lo a awm em ni?" A ti sap a. Tluanga a inthing nawk. 

"Ka..ih, awm lo ve. " a lo ti bah nak a. Zoi a khi sak. A ha var rual thah lo lang leh a biangsum khuar kalh te chu Tluanga chuan en nin harsa a ti hle. Chuti teh thuta a rilru a danglam chu mak a inti ru hle. A lo enliam leh a hlauh ruk hmeichhia kha a la ni reng tho si. Tluanga hi a hming pum chu Lalthantluanga a ni. Aizawl Venghluia khawsa niin a pa hi Doctor lar tak, Surgeon niin, a nu pawh Lecturer a ni. Chhungkaw awmthei leh hûng tak an ni a. Colony khatah an awm khawm bawk a, mi zah an kaiin khawtlang tan an hlu viau. Tluanga hi unau pathum zinga a upa ber a ni. M.com a zawh hnuah Furniture lama sumdawnna bul a tan a. ZCP dintu te zing ami a ni tih hi a chhungte ngei pawn an hre lo. A dawr chu a mi rin tak kutah dahin amah pawh rinhlelh a kai loh nan, Delhi lama zin angin a chhungte bulah a sawi a. A zin deuh reng vangin chu chu thilmak a ni lo bawk a. Tihian ramhnuai lamah Ephraime hnuai chiahah awmin rorelna a kengkawh a ni. Kum 34-na a hmang mek a, Mizo mipa vantlang aia lian hlek, Basketball Player tih takah a hleitling viau. He pawla a luh hma khan bialnu angreng ve deuh a nei a, an veng chhung ami tho niin chu nu chuan a duhte pawh a duh viau. Mahse, ZCP- lama a inhman tak hnuah hun a nei ta mang si lo va, thla khat pawh a ral hmain chu nu chuan mipa dang a neihsan leh ta daih a. Tluanga lah chuan pawi a ti tehchiam lo a niang, eng he huah a ngai lo. Hmeichhia hi a ngaihven vak lo hrim hrim a. Mahse, Zoi inbual zo tharlam sara a hmuh chiah khan a chhungrilah eng emaw thawng dawttu a nei. A sawi chhuak thiam si lo a ni. Lai zeta a awm lai takin Vena'n a rawn ko a, "Heng ho hi a nia kan pawla lo luh duhte profile chu" tiin file a pe a. Hmeichhia lakluh an tum tak avangin fimkhur takin an profile an check sak vek phawt dawn a ni. A hmei apain ram hmangaih a na viau a niang e.

Epraime pawh a nupui hmu turin khaw lam a pan mek a. Zomuanawmi lakah hian a chang chuan a inthiam lo fô! A tan hun thawl a nei tam ngai lo va, a nihna dik tak a sulhnu engkim hre vektu a ni a. Khawiahmah khang a sulhnute kha a sawi chhuak lo, a tan chuan hmeichhe hlu tawpkhawk a tling. Tin, a fa pai mektu a ni bawk. Zoi pa Pu Lawma a ngaihtuah a. An sumdawnna tenawm tak a bansan hnu atang kha chuan an tlachhe lo thei bik lo va, mahse, vantlang chunglam an la ni tho. Khawtlang leh Kohhran lamah inhmang zuiin ani hi chu ZCP lam pawhin an target hman ta lo chiah a, a vannei khawp mai. A nupui pa, a puzawn ngei a ni naa sum thianghlim lo hmanga sumdawng leh sawrkar thurualpui la ni ngat se chuan a kalpel chuag hauh lo vang le. Khaw luh dawn kawng peng a tlan laiin a phone a rawn ri a, zan dar 11 a ri tep. Tu tak ni ang maw ti rilru chungin a car chu a tiding te te phawt a. A pick up ta a. 

"hello" a ti zawi sup a. 

Lehlam ami chuan aw fiahfai takin, "Amanda ka ni e" a rawn ti ta a. A ner suk ringawt. 

"A tawpa tawpah chuan" a ti hniam raih a. Amanda nui hak thawm a hre zawm nghal. 

"Inhmuh ka duh a ni. Inbiak kan ngai" a ti sap a. 

"Engvangin" a lo ti hmak a. 

"Kan thawkho dawn a ni" a rawn ti nghet charh a. Ephraime pawh a hamhaih deuh. 

"Eng thilah?" Beisei nei ru deuh si hian a ti a. 

"Thil pahnihah, Mibo zawn kawngah leh sawrkar dona kawngah" Amanda aw chu a zawi hle. 

"Wow! Kan sawrkar uisathiam fing tak hian a vulhtu te kutah a seh ve dawn ta mai elo?!" Ephraim chuan a ti el kual a. A rilru erawh phurna hlirin a khat thung. 

"A chhan chu phiarruk ka ni miau a. Min phiarrua min thlimtu te hna ka thawhsak chuan mi à ka ni ang" duhthawh zet hian a rawn ti a. He nu hian a vehthlem êm lovang chu maw..a biakpawh theihna te hi engtia nei nge a nih ang? Vehthlemin man duh nise a number atang pawn a rawn chhui chhuak vek tawh ngei ang. A awmzia chu Amanda hi a talbuai ve mek a, thawhpui a duh tih hai rual a ni lo ve. 

"Naktuk chawhnu dar 2-ah Lalsavunga park-ah hmuh theihin ka awm ang. " Ephraime chuan a ti ta nge nge a. Amanda chuan a dah khap. Ephraime rilru a kal thui ta hle. Tunah chuan Mizo hmeichhe zinga Detective tha ber pawla sawi Amanda a thurualpui thei tawh ang a, Sawrkar pawh a tan bitum a harsa tawh lo vang. He ram mipuite hian an chanvo dik tak hmuin ram thar an din tawh ang a, zalen takin an leng thei tawh ang. A nu kha la dam se tih a ngaihtuah chuan a khap sawk mai. Ni e, a nu hi a theihnghilh ngai lo. A nu chhungte erawh a tlawh leh ta miah lo thung. Dinhmun hlauhawma an din a remti lo a ni. 

Balcony-a dak vang vangin a mittui a hru zauh zauh a. A hnunga amah thlir rengtu a pasal Dinfela thawm chu a hre hauh lo. Lainat zetin Diteii chu a melh ngawih ngawih a. Fate tana inpe zo, fate hmangaih tina em em a ni a. A fanu neihchhun a vawi hnih nana han bo leh ta chu Diteii tan chuan tawrh harsa tak a ni dawn reng a ni. 

"Bawihi" a ti nghut a. Diteii chu inhruhul sawk sawkin nui lui chungin a rawn hawi vat a. 

"Engkim a tha leh vek ang. Drose chu kan hmu leh dawn alawm.." Tiin a chhip samah a chul a. A chalah a fawp zauh bawk. A pasal kut vuan chatin, "A ril a tam ang em? A tet laia a bo ai khan ka ngaihtuah zawk.." A lo ti tham tiak a. Dinfela'n a chil a lem khawlh. 

"Mi dang nen an ni a, a zia tak a awm alawm. A thlalaka a landanah chuan a that hmel viau kha..titeh, a vawt si i hritlang ang, lut ang" tiin a kuah lut a. In chhung an luh rual chiahin an nulain kawngkapui a lo hawng ve chiah a. Police hmel an va hmu nghal. An ding chawt a. Police te chu an rawn lut a, pathum an ni. 

"Eng nge ni ta? Thu thar a awm em ni?" Dinfela chuan a ti nghal zat a. 

Pakhat hnar tawk hler hlur chuan, "Mapuia rawn la tura rawn kal kan ni a" a ti ta a. Diteii chuan a kut a hum ruh nasa hle. Dinfela pawh a hamhaih deuh, mahse, "Engtiazia nge? Pawi a lo khawih em ni?" A ti tham tuak a. 

"ZCP mi leh sa a ni tih hriatchhuah a ni a. Khawngaihin han ko ta che u" pakhat fel hmel deuh chuan a lo ti a. An lo hriatsa tawh a ni naa chutia an fapa lehzel pawh man a han ni tur chu an ngaingam lo nupa dun kher mai. Mahse, inthunun thei tak ve ve kha an nia. Diteii chu Mapuia room lam panin a kal thuai a. Kawngka chu a kik a. 

Mapuia chuan a rawn hawng a, a hmel a pawr hle. A meng sen rûm bawk. Nizanah khan an target mek Pu Zidingi enthlak hna a thawhna lamah vanduaithlak takin a mask a tla palh a, Pu Zidinga makpain a lo hmu hlauh mai si a. An rawn lak hun tur a lo nghak ve tawp mai a ni. Mahse, a chhungte erawh a hrilh hauh lo. A nu chu a melh run run a, "Nu, tihpalh..mahse, ka tha aw" a ti sup a. 

"Mampui" tih bak Diteii ka atangin a chhuak lo. 

Police te bul a va thlen chuan, "Kal ila" a ti awlsam êt a. A pa melh leh zauh chungin, "Kan ukil kha lo be sa mai la aw..ka pa" a ti nghut a. Jail tan rei chu a tum vak hmel loh. RInhlelh thilthua man chauh a la ni bawk a. Hlauthawng hmel pawh a la pu em em hran lo. An chhuah hmain a û Puipuia a rawn lut ve chiah a, an inhmachhawn ran a. 

"Ka nu saw i kutah ka dah e" Mampuia chuan a ti zawi sup a. Puipuia hi chuan engkim a hre lawk vek tawh bawk a, a hamhaih eih lo. A bu nghut a, a phirpui a nau darah hmer salhin, "Pa takin aw" a ti ve nghut a. An chhuak zui ta nghal a. Dinfela in chhung chu a reh ngawih ngawih mai. 

Dingpuii dawr khar hawng tur chu rawn au làng làngtu a vangin a ding chawt a. A lehhawi nàk chuan Pari a lo ni reng mai! Tehdaih chuan! A pasal thar nen an inthen leh hnu khan a inchei parh leh ta viau kha a nia. An sawi hmangin Sugar daddy a nei a niawm e. Amah Pari hi hmeltha em em tia sawi theih ni lo mah se; a zei har mai a. Pawisak a nei vak lo bawk nen, hna em em thawk loin a incheina leh a mamawh hi a nei thei zel mai si a. Fiahna nei dawt lo mah se, Amah chawmtu, aniin a chawm let ve tho a awm ang tih hi mi tam tak rindan a ni. 

Dingi bul a thlen chuan, "I tha zel maw? I pasal chanchin ka lo hria a. A pawi hle mai" a ti zat zat a. 

"Ka tha alawm. Ni e, a pawi khawp mai" Dingi chuan a ti ve mai a. 

"Nang pawh hi fimkhur rawh. Chuan, ka rawn kal chhan chu thil dang vak a ni lo. Kan nunhlui kha chu theihnghilh ila, i dawrah hian hnathawh tur a la awm mial em tih rawn zawh tum che ka nia. Ka mamawh riau a ni" a ti ham ham a. Dingi a thaw hawk. Mahni lo maha rilru ipik tawh sa nak alaia..mahse, tha takin, "Tunah chuan a awl loh lai tak a ni. A pawi hle mai" a ti sap a. Kal mai a tum laiin Pari bawk chuan, "Hotelah tal" a ti hram a. 

"Saw lam chu Cindy kut a ni a, ka hre ve vak lo. Amah va be mai rawh" a ti a. Kalsan vat vat a duh a ni. Pari mizia a hrechiang tawh a, inhnaih vak a duh tawh lo. In a thlen hnuah Cindy-in a lo bia a. 

"Pari kha i rawn tir em ni?" A rawn ti a. 

"Tir chiah pawh a ni lo, hna ruak a awm leh awm loh zawt tur chein ka ti a" a ti mai a. 

"Choka lama thawk tur kan mamawh lai a ni bawk sia, ka lo la ta mai asin" Cindy chuan a ti a. Dingi chu a ner deuh naa, Hotel hi chu Cindy leh Sangtea te hian an enkawl hnehsawh êm a. An kutah engkim a dah a ni tawp mai. Tha an tih anga an kalpui chu pawi a ti hran lo. 

" a tha mai alawm. Nangin tha i tihte chuan" a ti mai a. Cindy chuan phone chu a dah a. A hmaa ding Pari melh chungin, "Sawiselna a nei lo. Mahse, fimkhur ang che" a ti hriam hraih a. Pari pawh a bu nghat mai. 

Nguri chuan mangang takin a pasal chu a melh a. Tap lo turin a insûm nasa hle. Lawmsanga chu a tei nghut nghut a, a inhum ruh hle bawk. "Rawn haw teh se, Hmangaihzuali chu a chak lo teh ang chu..tlangval ka um e te lo tih..ka vaw duk vek ang" a ti nghut nghut a. A thisen zàm a pawng tawlh tawlh bawk. Mapuia chuan a pa chu khap tumin a ka a ang a, Nguri'n mitmeiin a khap vat. 

"Lawmsang, mu hahdam rawh. I chau a nih kha..hawh le..mu teh ang" tiin a banah a va vuan a. A kut lo thinper sawk pahin, "Nang hian min khawih hlek suh. Min uiresan pawh duhtawk loin ka fate i la rawn hmu ngam a nia. Ka hmuh phakah awm suh" a ti hlur a. A natna, rei tak chhuak tawh lo kha a fanu bo atang hian a rawn chhuak leh ta zeuh zeuh a, Nguri hian a khap daiin a thununsak thei zel naa..tun tum erawh a dan a dang tlat! Nauteii chu pasal um anga ngaiin huat namên loin a haw tlat a ni. Nguri chungah ngei pawh a tuan leh ta chu a nih hi..

"Lawmsang, engkim a tha leh vek ang. I natna a chhuak a nih kha. Tirawh, mu ang" tiin a va pan hnai leh a, Lawmsanga chuan Nguri chhipsamah thamin a kuai dak lawp a, Nguri pawh a te tuar mai. 

"Min uiresan lai khan chhete talin min ngaihtuah ve em? Tuna i pasal nen hian in hlim tawk lo em ni? Engvangin nge i lo lan fô? Ka mamawh tawh lo che. Nupui azawnga nupui tha leh fel ber ka nei tawh. I hmel hi rawn lan leh tawh ngai suh" tiin chhuatah a namthlu dâwrh a. Mapuia a insum zo ta lo. A pa hmai bul cheta va kal hnaiin, "I natna vang mah nise a tawk tawh em em e. Ka pa, Hei hi ka nu Ngurnunsangi a nih hi..min hringtu ka nu kha i tan a hlu viau em ni? Engvangin nge i mangphan leh thin. Ka tan engmah a nih loh tehlul nen..ka nu i tina tam tawk tawh e. Duhtawk hmiah rawh" a tih khum ta sak sak a. Lawmsanga pawh a hawihai deuh. Nguri erawh mittui tling piauin an pindan lam a pan a. A fanu bo vanga a rilru hrehawm tawh sa tehlul nen, a pasal duhtakin a nupui hlui emaw tia tawngkam chhe pui puia a tawngkhumna chu paidaih harsa a ti a ni. A tawn fo tawh mah nise; Uirenu vanga Lawmsanga la na fo leh a la theihnghilh thei miah lo chuan na takin a hliam lo thei lo. Lukhama hmai phumin a tap ta hlawp hlawp a. Intipachangin Nguri mi sehhel ni fo thin mah se; hmangaihna avang chuan a tlawm lo thei bik lo a ni e. 

"Ngur.." A dara rawn vuantu kut dam thlup avang chuan a tap lai chu a tawp chawt a. Inhnit faih faih chungin a lehhawi a. Lawmsanga hmel tak ran leh a mitmeng inthiam lohna hlira khat chu a hmachhawn leh ta. 

"Sawi tur pawh ka hre lo. Ka tina che a.. Kei hi kalsan tlak ka ni ka tih fo kha..min la tuamhlawm reng duh hi mi mawl tak i ni. Tikhan i harh chhuak tawh em?" A ti nghut nghut a. A tawngka chu kha viau mah se, a mitmenga Nguri a thlakhlelhna erawh nasa tak a ni thung si. 

Nguri a tlawm leh ta. Lawmsanga chu a kuah chawt a, nghet zeta pawmin, "Ka ngaidam che. I natna hi kan pahnihin kan tuar dun ang ka tih tawh kha.." a ti sep sep a. A mittui chuan Lawmsanga kawr chu a tihnáwng chap mai. Duat em ema lo kuah let vein, "Ngurpui, Hmeichhe chak tak hi ka nupui ni lo la chuan, Lawmsanga hi ka ral tawh ngei ang. Ka hmangaih che" thúk em em hian a ti a..He mite nupa hi engtikah emaw pawh then an la ni ngei awm si a! 

"I nupui chuan kan thuruk a hrechhuak ta a ni maw? I fimkhur loh zar kan zo ta a nih hi..tihi chuan hneh a harsa fat tawh ang" Abby chuan thîp zeta Sama melhin a ti sak sak a. 

"Ni lo, min hrechhuak hauh lo vang. Min hriat theihna tur hnuhma ka hnutchhiah lo" a lo ti khauh ve fun a. Abby a nui hawk hawk a, a nuih erawh a za teuh si lo. 

"Mawla, i nupui thluak tlem tal ang hi chu nei ni la Amanda hi a duh duh danin kan chettirin kan enthla thei tur..tunah eng nge kan tih tak ang? Tute nge a biak..tu nge a hmuh tih kan hre tawh si lo" a ti vawng vawng a. Saikhamakawn lama an va inzui te kha Abby chu a zak lek lek. Amanda chuan a manchhuak vek tawh si a. Chet lak dan tur a vàng a ti tawh ngei mai. Beiseina pakhat erawh a la nei. A tharum zawngte, a fin kherek ang zawngte, a tlan khalh ang zawngte chuan Amanda hi a chelh dawn lo tih a hai lo va. Thinlung lama indona puang mai tura inpuahchah a tum ta a ni. Tin, Amanda hian amah hi a la hre lo tih a hre bawk. Chuvang chuan Amanda lak atangin Sama hi a rubo dawn a ni. Chu chuan Amanda hna a tithuanawp pha ve ngei ang, Thinlung nei a nih ve ngai chuan..Tichuan, a chet lak dan turah tlemin a kawng an tirualrem lo ve hret thei ang a. Sawrkar lam hian Hel pawl mi leh sa an man kim hman bawk ang. Chumi hnu lam chu a ngaihtuah peih rih lo. 

An mi rukbote awmna hi ani pawn a hre chiang chiah lo naa, Minsiter tu emaw villa-ah a ni tih erawh a hria. Sawrkar lamin mi an rukbo chhan a hria. Mipuite rilru kawihher leh ZCP demna tipung turin a ni. Mahse, tunah chuan ani pawn tihtheih sang tak a nei tawh lo. A thiamthil a hmeichhiatna hmatheh mai loh chu! Sama thluak hi a la su fai vek lo tih pawh a hria. Chutiang thleng tur chuan eng nge a tih ngai tih a hrechiang khawp mai. A ngaihtuahna avang chuan a khi sak a. A hmaa thu rilru buai hmel tak Samsona chu a melh kual dan dan a, Mipa lian ve tawk tak,khabe ruh kual nalh zet mai, a khabe hmul buk lam lek lek, a mitmeng lian kelkawl pawisawilo zet nisi te balah a chal arh phak te atang chuan a mipa iai loh pawl tak a ni ve tlat a. Khumpui kaipui atan pawh Sama te ang hi chu duhthusam an ni tlat! Amanda ta ni thin kha ani hian a ta liau liaua siam tumin a bei dawn chu a nia. Hlawhtling tak ang maw..

Lalsavunga park a lut fel chiah tihin Sama hnen atangin call a dawng a. A ding ta nge nge a. 

"Khawiah nge i awm? Inbiak kan ngai. I uirenapa nen khan em ni in tawm dun leh ?" a rawn ti nghal bawrh bawrh a. Amanda pawh a meng zau kher mai. 

"Eng a?!" a ti tuar a. 

"Khawiah tehlul chuan nge i awm a? I hna i thawk lo tih ka hria. I awmna sawi la ka lo kal ang" a rawn ti leh a. Amanda rilru a buai zawk, mahse, inngaihtuah fim leh vatin .."Hna ka thawk. Tunah chuan ramhnuaiah ka awm. Ka lo haw veleh kan inbe dawn nia. " a ti dam thlap. Sama chuan a awmna hriat a duh a, tu nge a hmuh dawn tih thlengin hriat a duh, chumi sawitir a nih theih nan an nupa inkar boruak a rawn hmatheh tih a hai lo. Sama thurualpui hi mi naran a ni lo tawp mai. Ngaihtuah buai duh rih loin Ephraime sawina hmun lam a pan ding nghal a. A location an hriat loh nan a phone a switch off nghal bawk. A hmun thengthaw leh langsar lai bera inhmuh a duh teh tlat chu a hrethiam lo hman a. Mahse, amah Ephraime a va hmuh chuan a khi ta sak. Putar bal leh tawp tak a ni a hmachhawn ni. A inchei danglam hnehsawh kher mai a..ti rilru chungin a pan ve zel a. Tupawn rawn hmu se hna vanga tu emaw hmu angah an ngai vek ang. Thutphah sir ve veah chuan an thu dun a. Thli a thaw heuh heuh bawk. 

"Eng nge i ruahmanna chu?" Ephraime chuan a ti sup a. 

"Mibo min zawn hmuhsak la, keiin sawrkar ruahmanna ka rawn hrilh thung ang che" a ti nghet charh a. 

"An phiarru che a, eng ruahmanna nge an hrilh duh tawh ang che. Tangkaina i nei tawh lo" Ephraime chuan a lo ti hmiah. Amanda chuan a bawp khawkherhin, "Ka pasal hi an ringtawk thung alawm. Ani hi an spy a nia" a ti dat a. Makti fea Ephraimea'n a melh chu ngaipawimawh lo zetin, "Sama chu ka pasal a ni a. Ka bula cheng a ni. Sawrkar ruahmanna chu aman min hrilh dawn hauh lo naa ka hre zel ang. Tikhan min ring em?" a ti ve ta sak a. A inrintawkzia chu Ephraime pawn a ngaisang kher mai. A pasal ngeiin a phiarruk laia zam lo leh hnehna chan tum ngeia hmathlir a la nei thei chu huaisen a ti bawk. 

"A tha alawm. Mi bote chu hmuh thuai an ni ang. Mahse, chawlh la ang che. Nau pai i ni a..i naupai tan i fimkhur a tha" a nupui raipuar lai mitthla chungin a ti a. 

"Min chawlhtir duh lo alawm" a lo ti mai a. 

"An mamawh hle tho si che a, engvangin nge an phiarruk che?" a lo ti khauh. 

Amanda a nui hul hak a. "Mi bote hi hel ho rukbo a ni lo tih ka hria tih an hre ru a ni mahna le..mibo te hmu tura duty ka ni si a, a rubotu te lamin ka kut an phuar mai loh chuan kawng dang an nei lo a ni. " a ti nghat nghat a. 

"Hel ho zawng hmu turin an la tirh thuai dawn che chu.." a lo ti vat a. 

"Chuvang chuan chutiang a thlen hma chuan mi bote hi i hmu ngei tur a ni. Loh theih loha silai nena kan la inhmachhawn a ngaih loh nan" a lo ti hriam hraih a. Ephraime pawn a hrethiam kher mai. Tui bottle a ban lai takin, Amanda chuan.."Khai! Ka phone an lo trace hman a ni maw..khu an rawn lang vat alawm. Ani khu ka pasal a ni. A bula ding hmeichhia erawh ka hmuh vawikhatna" a ti nghal zung zung a. A bag khai kha haiin lukhum parh hlai angreng tak chu a khum nghal vat a. Ephraime phena ding chungin a kawrfual hak lai chu hlipin kekawr tight teng tawng a ha a, a raipuar tawh si, a kawngah a leng tha mang tawh lo. Mahse, coat fual hlep hlawp chu a ha sawk sawk a. A dul chu engtin tin emaw a hliah thei ta a. A lukhum parh chu la thla lehin a sam chu a thlah hniang a. Ephraime chuan a lo thlir reng ringawt. Sama te chu an lam an rawn hawi rih lo hlauh a. Chutah Ephraime pawh inngaihtuah harh thut niawm takin a inthuamna tawp leh hnawkhnai zet chu a phelh sawk sawk a. Tumtel sawk sawkin Amanda bagah a hnawhlut a, Amanda chu kai lawkin mual letliamah chuan a phei pui a. Thla la leh thalai an lo awm neuh neuh bawk. An lo en duh angreng viau lehnghal. Ni e, an langsar dun si a, Sama te pawn an hai hauh lo vang le. Ephraime car pan dunin an thleng phei an la luh hma siin Sama te an rawn lang ve ta chiah mai le. Amanda thinphu pawh a rang ve det mai. Mahse, a bula mipa ding erawh a phur dawn chauh thung. Sama te chu Amanda hnung lamah an lo phei zel a, Ephraime chu an rawn hmu ta a. Amanda erawh chuan a la hnungchhawn. Sama te lah an rawn phei zel si, Ephraime chuan zawi sup hian, "Inring rawh aw" a ti a. Amanda chu a lamah kuah hnaiin a kuai dak a, a bek tawn tawna a kut lianpuia chelh chungin a fawp ta hmiah mai. Amanda pawh a hamhaih bik hlek lo. Sama te chuan phun sup chungin an rawn kalpel ta a. Abby chuan, "Va tuah tawh awm ve" a ti hlak. Ephraime chuan Amanda chu kuaiher lawpin a taksa chuan a hliah hmuk a, "Bawihte, kal tawh rawh le..kan inhmu leh vat dawn nia. " tiin hma lamah a nawr phei a. Hawi let eih loin Amanda chuan hmalam a pan ta nghalh nghalh a. Sama te erawh chuan rinhlelh enin an lo en tawh lo nge, an chhak tlanga kawrfual ha thu diai chu Amanda emaw an ti zawk. Chu lam chu an pan ta daih a. A car chhunga a luh rualin Amanda chuan thawk a la hawk..chuti taka a insanmar chu a la hre ngai lo. Samsona chu a hnawksak tan ta..a pasal a hmangaih em em a ni bawk si. Hun khirh tak a ni. A sual chhuak thei ang em? 

(Muah 😍