inferno 4

INFERNO (4)

Ziaktu: Toni Râlte

(Adds mawlh kha🤭

A zu no sawi hliau hliau chungin, "I hmangaih tih ka hria. Mahse, a hmangaih ve si lo che a. A tan chuan hmanraw tha ber, a duh duha a bawlzan theih, a uite leh a inphenna i ni" Abby chuan a ti zat zat a. Sama chuan a chil a lem khawlh. 

"Ni lo, min hmangaih thin" a ti tham tuak a. Abby a nui hak. 

"I mit ngeiin kha pa nen Hotelah an inhmu tih i hmu tawh a, i la ringhlel fo a nih chuan, tikhan a báwih ni reng la a ni mai alawm. Chhanchhuah che ka tum a, i hnar a nih chuan i thu thu" Abby chuan a ti zawi dap dap a. Sama mitah a melh kar bawk. Sama rilru chu a buai hle tih a lang. A nupui a hmangaih leh a chhuan em em chuan mipa dang lakah a phatsan chu a ni ta si a! Hotelah ngei tawmpuiin, raipuar chung pawn a la kal a nia! Zoram khawvel hian hre ve se mak an va ti dawn rua êm.. Amanda chu huat a duh a, mahse, a hmangaih êm vangin a haw thei si lo. Abby lahin a vehthlem thiam si. 

"Awmdan tur ka hre hauh lo. Ka then mai dawn em ni?" A ti hû a. 

"Then mai lo ve. Mahse, i rilru a hliamna leh ka rilru a tihnatna man hi kan tel tir ngei tur a ni. A pasal ni chungin i tichhe tur a ni" Abby chuan inringtawk zetin a ti a. 

"Ani saw keini tihchhiat chi rual a ni lo ve" Sama chuan a ti hmuk. 

"Wow! I va ngaisang awm em em ve. Pahnih tangrual chuan pakhat hneh loh thu a awm hleinem. Ruahmanna ka nei alawm" tiin Abby chuan a'n sawi hmawrhmuh a. 

"Eng?" A lo ti vat. Amanda thinlung na ve tur hmel a mitthla nghal var. A chhungrilah chuan nuam a ti miah lo. Mahse, a na ve bawk si. 

Abby chuan,"Tunah hian mibo ho zawng tur team leader a ni a. A kawng kan dalsak piahlamah amahah hian engkim kan burbun ang a, a hmingthanna hi kan phum bo sak ang" a ti charh charh a. 

Sama chu a thaw hawk. "Chu ringawt chu maw?" A ti a. 

"Tichuan, a larna leh hmingthanna a tawp chuan a belbul ngei che ang a, nangin i lo hnawl tawh thung ang" Sama melh kar chungin a ti ta a. Sama a ding hluai ringawt. Mahse, engmah a sawi lo. A thutlukna takngial pawh engmah a sawi lo. 

Sawrkarin an luman a ngamsan tak em avangin ZCP lam pawh an fimkhur ta viau a. An chhung leh khatte ngei ngei lakah pawh inthup a ngai tawh tlat! Sangpuia pawh a roomah a tei a tei a. A hmangaih em em Nauteii la dam thu hre mah se, a mangang a ni. A chhan pawh nizan zan laiah khan an pawl lama a thian pakhat eitur rawn lam nen mamawh an inhlan lai kha hmutu an awm tlat a tin ni. An luman a san êm vangin an hralh duh mai ang tih a ring. A phone a phawrh a, an hotupa number hmetchhuakin, "Ka him lo va. Tuman min rawn hnaih tawh rih suh u. Lo hrilh hlawm rawh aw" a ti a. Ephraime chuan, "Man i nih hmain ramhnuaiah rawn kal mai rawh. An nghaisa dawn che asin" a ti a. 

"Ka nu hi ka kalsan thei rih lo. Ka let leh lawk thei dawn si lo va" a ti hnual raih a. 

"A tha e. Engpawhnise fimkhur la aw" a rawn ti a. Phone a dah rualin a nuin a rawn ko nghal. Pháwk zetin a hawi chhuak a. A nu chuan kawngka rawm hawngin, "Bawiha, police an lo kal" a ti ta mai a! A hamhaih deuh naa pa taka hmachhawn a tum ta mai. A duhthlannain a lut a, man pawh a inhuam mai tur a ni. A va chhuah chuan Police pahnihin an lo nghak ran a. A rualpui awm vel an ni. 

."Eng thil nge ni ta?" A ti sup a. 

"Stationah min zui lawk a ngai a" pakhat chuan a lo ti dam thlup a. Sangpuia pawh a thaw ve huai mai. A rikrap leh a innghaisa zawnga indawr hi a duh vak lo a ni. Ama tawkah intipa ve tak leh hlauh nei bik lo a ni ve miau si a. 

"Nu, eng emaw zawh duh min nei a niang, ka va kal lawk ang e. Lo mangang suh aw" tiin a nu chu a melh zauh a. A nu erawh a thlabar hmel deuh. A hrilhhai hle tih pawh a lang. An chhuak ta a. Police motorah chuangin an tlan ta vang vang mai. An va thlen chuan Lockup-ah an nawr lut nghal a. An tih ang ang chuan a awm ve tawp mai. Tan vak kha sáwt hek lo le. Reivaklo-ah Officer a rawn lut a. A hmel a nelawm tehchiam lo khawp mai. Sangpuia chu kutthlak a chak hmel viau. 

."Hel pawl zinga mi i ni tih kan lo hria a. I thiante hming lo sawi la, ka lo list thla ang e" a ti chang fak fak a. Sangpuia erawh a chechang eih lo. 

"Ka sawi chu i hria em? Inlak ngen vak a ngai lo aw" a ti leh hmuk a. 

"Hel pawl zinga mi ka ni tih engtin nge i hriat?" A ti ta a. Chu pa chu a rum nghut mai. 

"Nizan zan laia thil in inpe ru lai thlalak hi kha..han en teh le" tiin thlalak pahnih a pe a. Sangpuia chuan lek kangin a han en a. A ner sawk. A hmel chiang taka a lan bakah a thiante hmai tuam chu a lang ve bawk si. Evidence a tling pha tlat! 

"He thlalak hian hel pawl ka zawm tih a lantir i tihna em ni?" A ti ve hram a. Chu pa chu a ding hluai a. 

"A nih chuan hel pawl ni loin smugling kaihhnawihah i inhnamhnawih kan ti zawk mai dawn em ni ang? Zan laiah hmai tuam te hnenah thil eng emaw i hlan ru a. Mi hriat hlau takin, chumi chuan a tha lam a kawk miah lo tih chu kan hriat kha.. Hun ka nei tam lo va, i thurualpuite hming leh address sawi la, kan inbiakna hi a zo a ni mai" a ti ram ta hmuk hmuk a. Sangpuia erawh a ngawi leh hmiah tawh. A thiante hming sawi ai chuan thih a thlang. ZCP a zawm tirh lai kha a ngaihtuah chhuak a, dik tak chuan ani ang tlangval tha leh mi thiam, ram vei pha chin tan chuan sawrkar inrelbawlna kha duhkbawp loh a na em em a, Duhthusamin tuna a pawl zawm ang hi ding ve mai se tiin a ngaihtuah fo thin. ZCP ten kut an thlak hmasak ber an Minister zinga sawisep kai nasa ber, sum leh paia invur nasa ber a thih chiah khan pawl eng emaw chu a ding a ni ang tih a ring thiam ta nghal a. A phak ang tawka zir vein a chhui ve nasa a. An chet dan, an fimkhurzia leh an fin thiam sizia te a hmuh chuan luh ve a duh ta a. Mahse, chutimaia luh ngawt chi a lo ni si lo. A vanneih asiamin zan khat a nî te ina a kal chu a ni fapa, amah aia nau hlek thurûk a va haichhuak ta a. Ani chu ZCP member a lo ni reng mai a lo nia. Khata tang khan inhnimphum chho vein, ani hi chu khawpuia chenga ruahmanna siamtu pawl zingah a tel a. ZCP in an target turte zir chiangtu a ni mai ang chu. A hna a tlin bawk a, rinhlelh a kai lo bawk nen, kar loah an pawlah a hming a chher chho a. Amah tlangval naran a lo ni lo bawk nen ..a hruaitu zingah a tel ta thuai a. Ni e, nizanah khan information pek a ngaih avangin leh phone hmanga chinfel mai theih a nih loh avangin a thiante kha a va hmu lawk kha a nia. A vanduai asiamin an lo hmu fuh ta hlauh si a nih kha. An man a nih pawhin a thiante hming chu a thawi tham pawha sawi rik a tum chuang lo. 

"A fanu labotu hi a hre lo tak tak a nih a rinawm. Kan dáwp zel chuan a thi mai ang" palian sek tul chuan an pu ber bulah a ti thur thur a. Hlupuii a sawina a ni. Ni e, zan khuaa an nghaisak pawhin a ka a ang si lo. An beidawng thawkhat tlat! Pu ber pawh chuan, "Aw le, mipui laka kan hmai phih nan a dam a ngai sia. Enkawl dam vat r'u, a pasal hi Journalist a ni si..eng thu emaw chu a thang ngei dawn e. Chu chu a thlen loh nan amah Hlupuii chu kan biak a ngai ang" a ti zung zung a. 

Hlupuii let hlawm reng, duk cher chur bulah chuan thingthiin, "I harh tiraw? Kan inbiak a ngai" a ti sup a. Hlupuii a rawn meng diar diar a. A chau tih a lang reng mai. Chuti em ema an nghaisak chu an pu pawh chuan a ring bik lo a ni. A la thaw ve hram hram chauh a ni si a. 

"Enkawl i ni vat dawn e. Chumi hmain kan inbiak a ngai. " a ti leh a. 

Hlupuii chuan a mitmengin sawi turin a ti a. 

"I pasalin heng thil hi a hre tur a ni lo. I hrilh dawn lo a nih chuan i fanu zawn leh buaipui hi kan bansan ang. I hrethiam em? Chutiang ni lo va, i pasal i hrilh chuan ngawrh zawkin i fanu kan zawng ang. Kan hmu ngei bawk ang..hel pawlte angin luman a nei ve bawk ang" a ti ta khak khak a. Hlupuii chuan a lo ngaithla ran a. A mitmeng atang chuan a rilru tur awm hriat a ni hauh lo mai. An rawn chawi kang a, khumah muttirin doctor an kohsak chuan a han en thuak thuak a. A tha vak lo tih a sawi nghe nghe. A hliamte chu silfaisakin damdawite a han hnawihsak sawk sawk a. Drip an khaisak bawk. A chau em em mai si a. A pasal hian a zawng ve mek ang em le? Nge a lo nghak tawp zawk ni ang? Hlupuii chu a fim viau lo. Pu ber rawtna pawh kha a ngaihtuahzui chuang lo. Tunah chuan hriat duh pakhat chiah a nei. A fanu a him em? Tih hi. A him em ang chu maw..

Imanuela chu a zatin a za ruai a ni ber e. A nupui a hmangaih em em, a fa pai mek a bo miau a. Han hahdamna chi ziazang a ni mawlh lo a ni. Chet rum rum mai a duh tawh a. Hotu nei a ni si. Mahse, a dinhmun hriatthiampuitu a nei hlauh a, Amanda koh angin inbiakna an kalpui a. Office-ah mi bo zawng zawngte list leh an chenpui te atangin a bul atangin an pahnih chauhin bul an tan ta a. A thaw leh hawk thin chu AManda lakah a inthlahrung deuh naa, a insum thei mang lo a ni e. 

"Lungngai miah suh. Damin kan hmu leh em em ang. Naute pawh a tha ang. Order kan la hmu thei lo hi a awmzia ka hre bik lo. Engpawhnise, naktukah kan pute ka lo nawr ve leh dawn nia. " Amanda chuan coffee pek pahin a ti a. Imma chuan lo melh zauhin, "Keimaha chet chhuah mai te hi ka duh rum rum tawh" a lo ti nghut. 

"Kan naute ramhnuai fang hi an nghak a nih ka ring. ZCP member pakhat an man thu ka lo hria a, lo biak ve ka tum ang. " Amanda chuan a ti a. A chhan chu an hnuchhui tur leh ZCP hian inzawmna a nei lian ve tlat a tin ni. 

"An mi man mek leh tuna mi bo Hmangaihzuali an tih hi inngaizawng an ni tih kan nau pakhat khan a sawi tlat" Imma chuan a lo ti vat a. 

"Chu! Kei aiin i hre thui zawk a nih chu..kan pahnih ngeiin kan va be dawn nia. Tunah chuan a ka antir tumin an vehthlem mek dawn a. Hun kan chang pha rih lo vang, kan biakna tur ki a inang si lo va" a ti a. 

Imanuela chuan, "Engtia bultan nge i rilruk?" Tiin a en a. Amanda chu a phu deuh zawk emaw tih tur hian a awm. A mitmeng dul hnakah chuan phurna hmu tur a tlem hle. A rilru lamah hliam a tuar ve mek a tin ni. 

"Bultanna tur kawng ka zawng mek a ni. Hel ho lam hi be pawp thei ila kawng a sial theih ka ring. Sawrkar lam erawh chuan kan hmalakna hre lo se a tha" a ti ta a. Imanuela pawm dan chiah pawh a ni. Sawrkar lam hi a vengthawng tawh riau. Eng emaw thil hnawk deuh a awm tlat hian a hria a ni. 

Amanda mu tur chu a tih fo danin a inbual leh phawt a. Sama erawh a chhuak a lo la haw lo. An boruak inmung ru ut chuan Amanda pawh a tichau zual a, a pasal chuan a lakah eng nge a thup a hre si lo. A zawt duh tawh bik bawk si lo. Sama'n a sawi chhuah hun a nghak tawp mai a ni. A inbual zo bathroom kawngka a hawn rualin Sama pawh a rawn lut ve chiah a. A mitmeng atangin a harhfim lo tih a va hmu thiam nghal. A inthlak mawlh mawlh laiin a rawn kuah thuak thuak a. A dul puar laite chu rawn chulin, "Zaninah tu nge i hmuh?" A beng bulah a ti sur sur a. 

"Imanuela" a ti mai a.

"An nu a bo ve tak tiraw? Hehee..inva inhmu remchang ve" Sama chuan a ti kual a. A tawng dan vel chu Amanda ngaihtheih lohzawng tak a ni. A inher a, Sama melhin, "Anih nangin tu nge i hmuh?" A ti ve ta khauh a. Sama chu a ding ngil deuh awt hman, mahse, inthlahdul leh thuaiin.."Ka ex" a ti ham ham a. Amanda a na zawk mai. Mahse, harhfim lo bula inhrikthlak hian awmzia a nei thui tehchiam lo tih a hriat vangin ngawih lamah a ramtang leh ta zawk a. Sama chuan topic a rawn thlak thut..

"Eng chen nge i thlen tawh. Mibo chungchangah chuan" a ti a. Amanda chuan mak a ti deuh naa, chu lam hawi zawnga titi thlak chu pawi a ti vak lo. 

"Eng chen em em mah ka la thleng lo. ZCP zing ami an man kha naktukah ka va kawm ang a, ka kawng zawh tur a chiang ang ka ti" a lo ti ve mai a. 

Sama a meng zau deuh awk, "Aw ni maw..a va tha ve. Mahse, ZCP in a ni lawm ni rubo, va be mahla a sawt chuang nang" a ti thur thur a. 

"Risk ka la reng a ni. Hel ho in nge rubo sawrkarin tih hi tuman kan hrechiang reng reng hleinem" a lo ti a. Sama chuan sawi leh mai tur a van nge a irh uk uk a, bathroomah a lut ta daih a. Amanda erawh a inthlak fel ta bawk a, a note bu têah a tuka a programme tur leh a zawhna turte chu a ziak thla dan dan a. A tih fo dan a ni ve hrim a. Mi tupawh han hmachhawn hian eng emaw hi a awm ve thin a, zawhna zawh ngei ngei tura ngaih han zawh theihnghilh te hi thil awm thei a nih avangin chutianga ziak sa thin chu a ni. A ziah zawh thleng pawn Sama chu a la rawn chhuak lo. Drawer-ah a note chu dahin mutzai a rel ta a. Sama pawh rawn chhuakin a inthlak sawk sawk a, a rawn mu zui ve mai. Sik erawh an insi lo. Amanda chuan an nupa inkar boruak chu siamthat a duh a, tlawm pawh dawn zo lovin a pasal chu a va kuah thawk a. Sama a rum nghut. 

"Sam, ti nge i danglam? Eng thil nge thleng sawi tawh rawh" a ti seuh seuh a. Sama rui lungpuam chuan engkim a sawi teuh ther ther mang e. Mahse, engkim a hria tih hria se a la then loh chhan a zawt ngei awm si a. Abby nen an ruahmanna a puitling thei dawn lo a ni. 

"Engmah a thleng lo, ka chau deuh a ..muhil ang" tiin Amanda kut chu a dahthlaksak a. Amanda chu a vawikhat nan mipa vangin a thinlung a na ve ta tlat mai. A tan mipate hi mipa an tling tawk lo fo a, mipa tihtheih ang a tih ve theih fo vang hian mipa mamawh lo angah a inngai thin. Mahse, Sama a tawng a, a tirah chuan a hnuaia thawk a nihna ang khan a en a. Mahse, an inzui rei zel a, Sama zia, a pawisawi lohzia, a nihna ang anga a lan ngamna te chuan hîpin a tawpah hmangaihna khurah an tlu lut dun a. A fa hial a pai ta kha a nia. Inneiin bul an tan chho a. An hlim chho tan dawn chauh emaw tih laiin Sama a danglam thut! A chhan a hriat si loh eng emaw inthup ru avang chuan tunah hian ná a tuar mek a ni. Buaina tam tak a lo chingfel tawh thin a. Nupui pasal inkar kher chu a hriat loh lam a ni ve tlat! Siamthat dan tur kawng a hre ta hauh lo. Engtikah emaw Sama chu a danglam leh mahna tih chauh chu a innghahna a ni ta mai e. 

An thianpa Sangpuia man a ni tih an hriat rualin ZCP lam pawh an buai ve mam mam mai a. Engtia hmalak chi nge ni ang tih an han sawi a. Police kut atanga ruk chhuah mai tur em ni ang tihte, Jail a luhthlak hunah law law a siruk laa thawh chhuah tur em ni ang tihte an ngaihtuah a. Khawpui lama an pawl menber rinawm tak pakhat chuan rawn biain, Sangpuia chu Amanda te team lamin an biak tur thu a rawn sawi ta hlauh mai. Chu chu Ephraime chuan a ngaipawimawh ta tlat. 

"Amanda nen inbia se, Sangpuia hi mi á a ni lo va, mi kan rukbo lohzia piahlamah Amanda hian Sawrkar lam a bitum phah thei tlat. Chutiang a nih chuan langsar si loin kan thawk ho thei dawn tihna a ni. Thil tha tak a ni ngei ang" a ti ta a. A tam zawk chuan hrethiam chiah lo mah se; Ephraime thuchhuak a nih miau avangin han hnawl tawp chu an hreh a, Amanda leh Sangpuia inbiak hun ngaihchan chu an titlu ta a. 

Tluanga a lo ding a. "Thil pakhat a la awm a. Thuthang kan hriat danin thalai a bikin hmeichhe thenkhat hian kan pawl rawn zawm ve hi an duh viau mai a niawm a. A tir phat atanga hmeichhia kan lakluh loh vangin tul kan ti lo nge tihian kan la pa tluang zel a. Kei ka ngaihdan chu ramhnuaia tei vel kher tur ni lo, hmeichhe rinawm leh thil man chak tak kan thu pawimawh lakna tur hi chu kan mamawhin ka hria. Eng nge in ngaihdan?" A ti ta dap dap a. An ngawi thap mai. 

A hnu deuhah Fela a rawn ding ve a. "Tluanga sawi kha ka thlawp e. Tangkaina tam tak an la nei dawn chauh, hmeichhia hian kan rin aiin thil an tithei a nia" a ti a. Awmhmunah an phun mur mur mai. Ephraime a rawn ding ve leh a, an ngawi ta thap. 

"Ni e, insawi kha a dik alawm. Hmeichhia hian tangkaina an nei. Hnawksakna pawh an nei. Thil an zep thei thin lo ber leh hmeichhia an nihna laia an nem leh an zuau hi a ni. Chutiang maia tukzal theih loh hmeichhia, Ram thatna duh ve tak tak an awm a nih chuan kei pawn ka pawm e" a ti ta a. Chu chu thutawp a ni. Hmeichhe tlem tal lakluh ve chu an thutlukna a ni ta. 

Amanda leh Sangpuia chu an inhmachhawn ran a. An inbiakna chu pindan lehlam atanga ngaihthlak vek a ni bawk. Sangpuia chu nizan lamah an khawih ve hle tih hriat takin a duk thlehthluah a, a kak nuai bawk. A mit veilam phei chu a meng thei lo. Chutiang khawpa an nghaisak hnuah pawh Zohlupuii ang bawk khan engmah a sawi lo. Luhlul dun ve tak zawng an ni. Amaherawhchu, ZCP pawl a ni tih erawh a inzep zo ta bik lo va, a thiante hming erawh a tuamah a sawi lo. Amanda chuan a lainat deuh a, hel pawl a nih vanga kutthak hnawih nana hman vak kher chu a tulna a hre vak lo. 

"I tha em? " a ti te te a. 

"Ka tha chuan ka hria, ka la thi em lo va" a lo ti dam thlup a. 

"Thil eng emaw rawn zawh duh che ka nei a. Tha taka min chhan ngei ka beisei a nia" nelawm takin a ti a. 

"Ka hriat zawng a nihte chuan ka hreh hleinem" a lo ti ve mai a. 

"Mi bote hi engvanga rubo nge in nih?" A ti ta thut a. Sangpuia pawh a hamhaih hman. Mahse, insiamrem leh thuaiin, "Mibo te hi ZCP ten rukbona chhan tur kan nei lo" a lo ti chang fak. 

"A awmzia chu inpawl behchhanin tu ten emaw ruahmanna an kalpui i tihna em ni?" Amanda chuan a ti vat a. 

"Ka ring..chutiang lo chu ngaihdan ka nei lo chu a nia lawm" a ti mai a. 

"Mipui nawlpuiah nangmahni beihna a nasa tan riau tawh si a, mipui thláwpna in duh chuan engvangin nge Police department te hi min thawhpui mai loh ang? In rukbo a nih loh chuan anmahni rubotu dik takte hriat hi inchak ve lo em ni?" Amanda chuan a ti ta dap dap a. Sangpuia a inngaihtuah buai hle. He Amanda hi a ring lo a ni lo. Mahse, sawrkar mi leh sa a ni tlat si. 

A chil lem khawlhin, "Police department lam ten mi veh reng a, engtin nge kan thawhpui ang che u..tunah hian kan nau ten mibo te hi an zawng ve reng e. Nangni aiin kan hlawhtling hma zawk maithei a ni " nui lui chungin a ti hul hak a. Amanda pawh a khi ve sak. 

"Anih chuan a rukin kan thawkho tihna a nih chu..Khaw maw..lawk..i bek kha a thi a nih kha" tiin a romol phawrh vatin Sangpuia bek chu a hru chawt chawt a, Sangpuia nen hnai fahranah an inmelh bawk. Romol chu Sangpuia kut nen hmehbelin, "Nakinah i la mamawh takin ka ngaihhruina che ni rawh se" tiin a nui sak a. Sangpuia pawn Amanda mitmeng en reng chungin a lo hum ve chat. Amanda chu a ding a, "Kan inbiakna a zo e. Ka zawhna te tha takin min chhansak a, ka lawm e" a ti a. Zawimuangin a chhuak ta a. Lehlama lo ngaithlatu te chu an chhuak vat. Amanda bulah chuan, "A thiante a thurualpuite thiam takin i dawp chhuak dawn emaw ka tia..i zawhna chu a va kawngkal lo deuh ve" pu ber chuan a lo ti ram hmak a. A lungawi fahran lo tih a lang reng mai. 

Amanda chuan,, "Officer, chu chu i hna a ni. Ka mawhphurhna a ni lo. Ka duty hlenchhuah nan ka hriat duh tur ka zawt mai a ni e" a ti fiah kák a. Officer pawn sawi tur reng a hre lo. Amanda chuan a kalpel a, Imanuela nen an chhuak zui daih. 

Sangpuia chuan inthiar a duh thu sawiin toiletah an nawr lut a. Comode-a thu chung chuan Amanda romol pek kha a kai pharh a. A lai takah chuan lian lo tak hian , "Call me.." Tiin phone number a dah a. Chu number chu a byheart nghal. Amanda-in a rawn kawm khan chhan tha tak a nei ang tih a ring thiam nghal a. Chuvang chuan biak ngei pawh tha a ti. 

Central Jail-a an dahluh hma chuan a nu nen an inhmu a. A nu chu a tap zawih zawih mai. Tin, Lawmsanga te nupa an rawn lang bawk, Lawmsanga chuan, "Sangpui, zàm hlek suh. Nauteii chu kan hmu em em ang. Inthiam lo duh miah suh aw. I lamah kan tang tlat a nia" a ti a. Chu chuan Sangpuia thla a timuang takzet a ni. A beisei phak baka supporttu a nei chu. A bialnu pa a lo ni kher bawk nen. A nuten an hawnsan hnuah Central jail lamah dahthlak a ni ta a. Khaw thim thet thetah jail chu an thleng a. A cell-a a luh tak tak hmain warden bulah, "Ka pu, ka nu kha ka mamawh ka lo chah kim lo palh a. A lo kal veleha min lo kensak turin khawngaihin ka be thei ang em? I phone ka hman man pawh ka nuin a pe ang che" tiin a ngen a. Warden chuan a ruk deuh reuhin a phone a pe a, a bulah a ding reng tho. 

A ring ral ral a. "Hello" a rawn tih rualin, "Nu, keimah Sangpuia" a ti dat a. Lehlam ami chuan a lo man thiam nghal ni tur a ni. 

"In hotupa number ka hre duh,min ringtawk thei ang. In lamtang ka ni e. Kei pawh phiarruk mek ka ni. Ka pasal ngeiin min vehthlem a ni" a rawn ti nghal bawrh bawrh a. Sangpuia a inngaihtuah buai nasa. Mahse, Amanda hi a ringtawk tlat! Ephraime rawn hman a ni tawh si lo va, ama tan pawh kawng an sialsak thei zawk ang tih thu hlaah risk a la dawn ta. 

Warden chuan a rawn en run run si avangin, "Ih , nu, Ka room thlanglama Almira-ah khan ka kekawr lum ho kha a awm a. Hei a vawt tan mai dawn sia, min lo kensak la., chuan file kha i lo dah tha dawn nia. Ka dawhkana Nauteii nen kan thlalak dun kha lo keng bawk la aw. Ka roh si a. " a tih mek laiin, "A tawk tawh e" Wardenin a rawn ti a.

A dah ta. Amanda chuan a manthiam turah a ngai. Mi á a ni lo. A pasain a phiarru maw?! Engtin?

Amanda chuan Imanuela number hmet chhuak lehin, "Kal ang.." A ti teh tawp a. Lehlam ami lah englai pawha inring reng a ni bawk a. A inpeih nghal der. Amanda chu a insiam a, Sama a rawn lut ve mek bawk. 

"Khaw nge i kal dawn?" A ti ha a. 

"Mibo an hmu an tia, Saikhamakawnah ka kal dawn" a ti sap a. Sama meng phawk zet chu a rilruin a lo nuih ru. A ranga ranga bathroom a lut chu melh zuiin, "Ka pasal mah nila, ka hnuaia thawk i ni. Min lehpel ngai lo vang" a ti vawt raih a. 

(Chawhnu atangin ka pum a na reng a. Mu chungin ka rawn ziak hram hram. Min lo tawngtaipui ve ru aw. Ka hmarcha heh lutuk hi a niang 🥺