Inferno 3

INFERNO (3)

Ziaktu: Toni Râlte

Hlupuii chuan, "Mahse, engtin nge in inhriat?" A ti he haw a. Zoi chuan khi sak chungin, "Zan khat ramhnuaia ka vahnaah a chenna hmun ka va pawh hlawl a, a ui nen kan inngur a, ani hi rawn chhuakin mihring ka ni tih a hria a niang, min thunun ta a ni. " a ti kalh kalh a. Hlupuii mitmeng erawh a la buai nak tho. Ephraime chuan, "Zoi, hun kan ngah lo a. Min zui dawn em?" A ti thum dût a. Zoi chuan a nu leh Ephraime melh tawn zak zak chungin, "Eng nge ka tih ang?" A ti sap a. 

Ephraime tawng hma chuan Hlupuii chuan,"Ngawi lawk teh u, a pa pawh lo haw ve phawt se. Hetiang teh thutte chu" a ti hliai a. 

"Hun kan nei tam tawk lo, sawrkar mi tirh an rawn thleng tep tawh ang. Min zui phawt mai la, i tihtur chu kan la inhrilh zel mai aniang chu. Sawrkar kuta i awm chuan i mihringpuite i tina dawn ania. Chu chu i duhin ka ring lo" Zoi melh kar chungin a ti a. Zoi pawh a rilru a buai hmel angreng. 

"Nu, ka kal mai ang aw. Sawrkar thuhnuaia kun ka duh lo" a ti sep a. Hlupuii'n a chhang lo. Thawm reh lai takin Villa lam rawn pan mek motor thawm an hre ta bawk nen, an chiái tlang a ni ber e. Ephraime chuan Zoi chu a kai lawk a, Villa hnunglam atangin a chhuahpui ta a. A chhuah hmain Hlupuii bulah ,"Thawmhnaw leh mamawh dang chu zanah ka rawn lam leh ang" a ti sup a. Hlupuii'n a chhan hmain an pil bo zui ta daih. 

Villa kawngkapui kik thawm a ri ta chiah bawk. Hlupuii chuan intuai mam tha sawk sawkin a va hawng a. Mi pahnih an lo ding a. 

"I fanu rawn hruai tura lo kal kan ni" an ti nghal tháwr mai. Hlupuii chuan, "An rawn la tawh" a ti ta a. 

Sama chu Ritz Hotel kawtah a ding váng a. Amanda erawh a sawi tawh ang khan mibo chhungte a tlawh kual dawn a. Amanda a chhuak fel chauh tihin Sama pawh a chhuak ve nghal. Amanda bulah erawh engmah a sawi lo. Room kawngka chu a kik dat dat a, kawngka chu a ri rak a, a rawn inhawng ta a. A la hmuh ngai loh hmeichhe hmeltha leh hleitling tak, mitmeng mawi zet nen an inhmachhawn ta ran mai. 

"Lo lut ta che" a ti sap a. An inzui lut ta a. Chair-ah thuin an inhmachhawn dun ta ran a. 

"Chuan" Sama chuan a ti nghut a. 

"Abby ka ni e." Tiin a kut a rawn phar chhuak a, a nui sáng bawk. Sama pawh chuan a lo vawnsak ve mai a. 

"Thlalak kha a awmzia ka hre duh a. Chuan, a dang pawh" Sama chuan a ti ta phawt a. 

Abby chuan a bawp khawkherhin, "I hmanhmawh hle mai. Ka sawi hmain drinks lam te i duh phawt em?" Ngaihnobei zet hian a ti a. Sama chuan a lu a thing nur nur a, "Sawi rawh" a ti nghut a. 

Abby chuan a aw thian kharhin, "Aw le, a hmasa berah chuan thlalaka i nupui mutpuitu kha ka pasal hlui a ni a! Amanda vanga inthen kan ni. Chu chu thla hnih liam taa thil thleng a ni a, nupa in nih tawh hnuah a nih chu! Nupui uire i nei tihna.." A ti hmak hmak a. Sama mitmeng danglam nasatzia chu haider chi rual a ni lo. Abby thusawi chu rin tur nge rin loh tur tih a ngaihtuah thiam lo. A tawt up up ringawt. 

"Chuan" a ti thàm tuak a. 

"Chuan, mipa dang a thawhpui lakah pawh a uire tawh a ni. A naupai hi i fa a ni ngei em tih a chiang miah lo a nia. In inneih hma pawh khan vawi tam a thlim thin che. Engvangin nge he thil hi ka hrilh che chu i hrethiam ang. Ka hmangaih ka pasal min laksaktu i nupui hi ka hua a ni. " Abby chuan a ti dap dap a. 

"Mahse, thla hnih liam ta i ti a. Raipuar chungin a uire ang maw?!" Sama chuan hawihai fe hian a ti leh a. Abby a nui sak. 

"Enteh, chiang taka i bula ka sawi theih chuan dawt a ni lo tihah chiang phawt rawh. " a ti hmiah mai. 

"Chuan, eng nge ti tura min duh a? Ka awih i ring em ni?" Sama chuan a ti khauh a. 

Abby chuan nui ver ver chungin, "Phuba mawle. Kei leh nang hi buma thlim kan ni a, chutah chuan i lungawi a maw? Ka pasal hlui nen hian an la inhmu zauh zauh tih pawh i hre tawp nang. Detective a ni a, nanga thluak kha chu a bum hneh dawn nasa tih hria la. Raipuar chung pawha a la bum duh tho che hi lawm taka i pawm zui zel thei a nih chuan i thu thu le..kei zawngin ka tihtheih ka ti ang" a ti ta sak sak a. Sama'n a chil a lem khawlh ringawt. 

"Amah ka biaka a ka atang ngeia ka hriat loh chuan awih harsa ka la ti rih e" a ti zawi sup a. 

Ngaihnep hmel fêa rawn melhin, "Zawt lul rawh. A pha ngei dawn tih erawh hria la, vawiinah pawh hian an inhmu dawn tih ka'n sawi law law ang e. A tak ngeiin kan va hmu dawn em ni?" Cho zet hian a ti a. Sama a phu zawk. Abby melh kal chungin, "Khawiah maw an inhmuh dawn?" A ti hû a. 

Sana melh zauh pahin, "Tun atanga darkar chanveah he hotelah ngei hian an inhmu dawn. I hmu ve duh em? " a ti zawi sap a. Sama mitmeng chu danglam tak a ni. 

"Kan hmu ngei tur a ni" a ti vawt raih a. A mitmeng thim raihah chuan thinrimna pawh a zám tel e. Abby chu Sama hmuh lohin a khi ta sak a. 

"Ka lo tibuai lawk che. Ma'm Amanda" Amanda chuan a call dawnna number chu a save hauh lo. A motor tidingin, "Aw eng nge ni ta le?" A ti dam thlap a. 

Chupa chuan, "Ritz hotelah buaina ka tawk mek a ni. Khawngaih takin rawn kalin min rawn chinfelsak thei ang em?" A rawn ti tham tuak a. 

"Eng buaina nge?" Amanda chuan a ti a. 

"Lo kal phawt rawh, khawngaihin. Mi pakhat ka that a ni" a rawn ti ta mai a. Chutiang taka thu hmanhmawhthlak chu Amanda pawn tlansan thei bik hek lo le..Ritz hotel lam pan chuan a inher a. Chak zetin a tlan ta a. Room no a rawn sawi lam chu pan nghalin kawngka a kik kauh kauh a. Mipa lian lam, hmelchhe vak lo hian a rawn hawng ta a. Kawr a ha lo va, kekawrbul nen tlawng a awm. Amanda chu a pawt lut titih a. Amanda pawh a hamhaih ve hman deuh. A kal hma khan Sama a call a, mahse, a la thei miah lo kha a nia. Eng emaw thil thuhlaah mi dang a hrilh miah si lo va, a tal awk ve dawn a ang riau. Room chhung chu a lo hnawk niaih a, zu rim a nam vung vung bawk. 

"Eng nge thleng?" Amanda chuan a ti nghal táwng a. 

"Engmah a thleng lo. Ka ngaisang em che a, vawikhat tal hetia a fala hmuh che hi ka duh a ni" inthiam lohna nei hlek lo hian mipa chuan a ti ta a. Amanda a sa zak mai, mahnilomaha buai ve nak alai a! 

"A nih chuan ka chhuak leh nghal mai dawn e aw. Hei min hmu tawh bawk a" tiin kawngka a hawng a. Mak takin chu pa pawh chuan a chelh zui eih lo. Kawngka bul thleng chu rawn thlahin Amanda kut chu a vuan a ,"Ka lawm e aw. Kan inhmu leh vat dawn nia" a ti sup a. Amanda chuan chhang tawh loin a kalsan zui ta a. An room bul chiah atanga a ruka rawn entu an awm tih a hre lo! 

Sama chuan Abby thusawi dikna a mit ngeia a hmuh tak avang chuan a kut a hum ruh a, a hachang a thial bawk. A khur hlawk hlawk a, a mitmeng a sen rám bawk. 

Abby chuan Sama ban puama vuan chungin, "Tunah chuan kan thawk dun tawh ang" a ti chang fak a. Sama erawh chuan a chhang lo. 

Isabella leh Imma te inhau thawm avang chuan Imma chhungte pawh an room bulah an va kal hnaih phah hial a! An thawm a ring tan tlat a tin ni. Nupa inngeih leh inngai tak an ni a. An han inhnial ve hlak hlak tih loh chu thinrim taka inhauhna an nei vak ngai lo a ni. An inhauh chhan lah thikthu vang a la ni zui! Eng dang a ni lo, Imanuela ex Lateii kha a rawn let leh miau a. Imma chu a rawn belbul leh tan tlat a ni. Bella raino huatthu chhiat lai ni bawk nen, a ngaithei vak lo a niawm e. 

"Ani ang saw 10 pawh awm se,nangmah chauh ka thlang. Thik tlak a ni lo" Imma chuan a ti bawrh bawrh a. Ani hi chu thinrim vak hmel pawh a pu lem lo. 

Bella erawh chuan, "Chutiangte chu zanriah eipui kha enh nge a tulna? A kianga awm i thlakhlelh loh chuan engvangin nge zanriah i eipui?" A ti hlaih hlaih a. Imma chu a nui hul hak ringawt. Ni e, zanin tlaiah Lateii'n a ngen nasat em vang leh buaina nei anga a insawi avangin chaw a ei chhuahpui a ni. Chu an ei dunna thlalak chu Lateii'n statusah a lo hmang kual vel ta bawk si a. Bella chuan a lo hmu ve leh lo thei ta si lo a ni. 

"A nih ka tihpalh. Thinrim tawh suh. Vawikhatmah ka hmu tawh lo vang " zaidawh deuhin a ti ta a. Bella erawh sawi tawh angin a raino lai a ni si, a la sen tán tán mai. 

"Tin, in team din tharah pawh Cindy kha ka thik aw. Hmeichhia hrim hrim ka thik..hre rawh Lalremruat" a ti táwn tâwn a. Imma a nui hawk hawk. Ni e, Bella hi an inneih tirh phat atang khan a thikthu a chhe hle a nih kha. 

"Cindy chuan bialpa a nei" a ti duh lek a. 

"Chu! Bialpa nei lo se i bem duh dawn tihna em ni?" a lo ti leh khauh. 

A nupui chu pawmin, "Duatpui, titau tawh lo teh. Nau pai i nih hi. Rilru hahdam i mamawh aw. Tumah ka neihsan dawn hleinem che. Ka tan i tha ber ka tih fö thin kha" tiin a chalah a fawp zauh a. Imanuela tawngkam dam thlup vang chuan Bella pawh chu a thep ta deuh nge, "Nangmah chauh neih ka nei tawh ka tih kha..min kalsan hi ka hlau alawm" a ti tiau a. A mittui a tling pam bawk. 

"Chutiang a thleng ngai lo vang..ka hmangaih che" Imma chuan a ti sup a. Nghet zetin an inkuah ta vawng vawng a. 

Ruatfela chuan rilru buai takin a phone chu a ban a, lo calltu chu a hre ngai hauh lo. 

"Hello" a tih rualin mipa aw thum lam hian, "I nupui a him e aw. A dam tha a, a rawn chhuak thei tep tih hrilh tur chein ka lo call che a ni" a rawn ti ta mai a. A kang zawk a ni ber e. 

"Amah ka be duh" a ti nghal thuai a. 

"Tunah rih chuan a biak theih loh ang. A thlalak erawh ka rawn thawn ang che. Police i hrilh a nih erawh chuan i nupui ruang hi ramsa ten an pawtdarh ang" a rawn ti leh ta chher chher a. Arini hmel a mitthla a, thi tur chuan a phal lul lo mai. A bo atang khan mangang leh rilru baihvai reng rengin a khawsa a, zu pawh a in nasat phah. A nupui chu chán nawn leh a duh tawh lo a ni. An inbiak zawhah thlalak a dawng zui zat a, a nupui thlalak ngei mai chu. A dáng deuh tih mai loh chu hliam leh han hmelhemna a nei hran lo. A nupui thlalak chu a fawp ta ngawih ngawih a. A mittui pawh a rawn hnám nghal sak. 

"Bawihte, lo haw vat teh aw. I tel lo chuan he lai hmun hi hremhmun a ni" a ti zawi sup a. 

Mi bo dang chhungte pawn call dawngin an thlalak an lo dawng ve theuh bawk a. Lawmsanga'n Nauteii thlalak a hmuh chuan a tap titih nia! A fanu hi a ngai tawh lulai em a ni. Diteii te pawn Drose thlalak an han hmuh chuan a la dam a ni tih hriatna chauh pawh khan a tithlamuang a. Dama an inhmuh leh ngei an beisei a ni. Kimi pawh a pate in lamah a khawsa rih a, a pasal Zirsanga avangin mut a hmu tlem bawk nen, a meng dul raih reng mai. A pasal thlalak a hmuh khan ani pawh a tap hlawp hlawp a, hliam a neih loh avang erawh chuan a lawm thung. Police a hrilh ngam lo va, a pasal chán ai chuan ngawih a thlang ta tawp mai. Dingi pawh dawra a awm laiin an rawn call a. Office-ah tlan lutin a pasal a hmangaih em em thlalak chu a melh ngawih ngawih a. Ani erawh chuan police hrilh a rilruk thung. Vau eng ang mah se, Rosangpuia duhdan pawh a nih a ring a. A rukin Amanda a call ta a. 

Rawn betu number chu a va thawn ta a. Chuta tang chuan an awmna hmun hriat theih a beisei a ni. A pasal bo atang khan a fimkhur em em a, dawrah pawh a kal zen zen lo, Hotel pawh manager kutah a dah pumhlum tawp a, Zanah hian balcony-ah lungleng takin a tei kual thin. Roger leh a fanu te hi awm lo phei se chuan rilru hman nasat luat vangin a thi thei hial awm e. Mahse, beiseina chhete zawng a la nei ve tho a. Amanda ten chet an lak tak tak hunah a pasal chu dama hmuh leh a beisei ve a ni. A thiam leh theih ang tawka a chhui ve paw'n a pasal bona chhan tur awm a ngaihtuah thiam meuh lo a ni e. 

Building lian tak hnuai ber, pindan zau takah chuan thinrim inhrosa thawm a ring kher mai. Home Minister Laldanglova chu a tei vut vut a, Pu Thangliana lah a meng rum ûl bawk. Guard niawm tak mipa pali ding khawng rengte chu kawkin, "Zochhingpuii in hloh hi in lu in zuar tihna a ni. Engtin nge min chet khalh theih? Tupawh ni rawh se, Kan hmanrua tur min lo seng khalhtu hi a thi ngei tur a ni" Pu Danglova chuan a ti tuar tuar a. Tuman an chhang ngam lo. 

Ni e, Zoi zuk la tura an tirhte khan, "Min chetkhalhtu an awm a. An lo la tawh" an rawn ti a nih kha.. Chu chuan an pawl a tibuaiin an ruahmanna kal tluang lai a rawn tithuanawp pha tlat si! Zochhingpuii chu an kuta awmtira Hel ho dah tha tura train an tum ru kha a nia. Tin, he ramsa mihring hi an kawl theih phawt chuan an duh danin Zoram pawh an thunun theih an inbeisei a ni. 

"A hmasa berah chuan heng Chhantu pawl inti te hotu ber hi kan hriatchhuah a ngai a ni. Amah hi kan hriatchian mi tak pawh a lo ni ru reng thei tlat" Pu Thangliana chuan a ti a. Ani pawh a tawngkamin ngaihno a bei tehchiam lo hle. 

"A ler atanga thuai ai chuan ni e, a kaikuang hi hup beh tum a tha. Mahse, he khawpuiah hian chutiang ang tur chu sang chuang an awm si a ni" Pu Hminga chuan a lo ti ve sup. 

Boruak a reh lai takin Pu Danglova chuan call a dawng a. Chief Minister hnen atangin a ni tlat! A aw thian leh te tein, "Hello Sir" a ti sup a. 

"Rambuatsaiha a thi!" A rawn ti teh tawp. Pu Danglova a ding hluai a, mi dang pawn an lo melh ve hû mai. 

"Eng a?! Engtin?" A ti tuar a. 

"Tu ten nge dah tha tih chu i hriat kha.. Chet kan lak vat vat a ngai ta e" Chief Minister chuan thinrim insum ru tak hian a rawn ti ta a. 

Rambuatsaiha chu sumdawng hlun, smuglling kaihhnawiha sumdawng, mahse, a thuruk hria erawh an tam lo. Aizawl palar ve tak, sawrkar nena thawhdunna tha tak nei a ni. Chu chu tuna a thih chhan pawh a ni maithei. 

Pu Danglova chuan a thiante melh kualin, "Rambuatsaiha kan chán leh ta tlat mai" a ti zawi sup a. An che dual mai. An mitmengah manganna a lang thei. Engtikah nge an hun a thlen ve ang tih an ngaihtuah pawh a ni mahna le. He Zoram Chhantu Pawl inti te hi an tan chuan an hnawksak tawh takzet a ni. Tu te nge an nih lah hriat a ni si lo. Mangan lohna chi pawh ni lo chuan a…

Amanda chuan Dingi calltu number chu a trace tir nghal a. Mahse, Sim card chu a lo nung tawh lo hman. An fimkhur hle tih a lang e. Mahse, an mibote an la dam tha tih an hriatna ringawt paw'n a la thlamuan ve deuh e. A inbual zawhah zanriah an ei a. Sama chu ni dang ang lo takin a ngawichawi a ni. A melh ngai a lo melh leh run run thin bawk. Vei eng emaw tak a nei tih a lang reng mai. Chaw an ei lai chuan, "Eng nge thleng a?" A ti ta nge nge a. Sama chu a thu ngil zawt mai. Amanda melh káwkin, "A tha vek e." A ti ringawt. Sama mitmeng buai niaih atang chuan eng emaw dik lo a awm tih chu Amanda chuan a man thiam nghal mai. A inpeih hunah a hrilh mai ang chu maw. Chaw pawh Sama chuan a ei tam lo kher mai. A tawng bawk hek lo, Amanda pawh a hrilhhai ve lek lek mai. A lakah lungawi lohna a nei em mawni dawn le te a ti rilru a. A ngaihtuah thiam chiah bik bawk si lo. 

Thleng a sil zawhah roomah lutin Sama lo insiam mawlh mawlh a hmuh chuan, "Khawiah nge i kal dawn?" A ti sap a. 

Zan dangah a leng chhuak ngai si lo. 

"Chhuahna tur ka nei a" a lo ti mai a. 

"Sam, eng nge thleng sawi teh. Thil dik lo eng emaw chu a awm alawm. Ka lakah zep i nei ngai lo. Sawi teh" tiin a pasal chu a chelh a. A kut chu a lo vai per lawp mai. 

"Thil tam tak ka hria. I hriat ve kher a tulna ka hre lo bawk. Tikhan min enliam tawp mai rawh" a ti ram hmak a. Amanda pawh a ding khawng reng ringawt. Chutiang taka Sama thinrim leh lungawi lo hmel chu a hmuh vawikhatna a ni hial awm e. A mak mang e aw. Sama chhuah hnuah pawh chuan thil dang a ngaihtuah thei meuh lo. A pasal danglam thut chhan hi a hriatchhuah ngei a ngai a ni. A phone ri ral ral chuan a rawn kai harh a. Imanuel Lalremruata a lo ni. 

"Aw..Imma" a ti zawi sap a. 

"Ka nupui a bo!" A rawn tih chuan a ding hluai a. 

"Isabella maw?" A ti leh kher. 

"Aw..Bella a bo..an ru bo ve. Chet kan lak vat a tul ta hle mai. Khawngaihin" mangang tih hriat ngawih ngawih hian a rawn ti ta a. Amanda a chhing sawk mai. A pasal vanga buaina bul intan chho mek leh he inrukbona hi a inzawm ang em le?! Thawk a la hak a. Eng nge a tih ang tih a hrethiam hauh lo mai. A dul a zut a, a puar ve tawh viau a, a la inzo viau naa, chawlh hahdam te pawh a chak ve thin asin le aw. Khumah a zangthal zawnga muin. , "Amanda, intichak rawh" tiin amah leh amah chu a infuih a. 

Zochhingpuii chu a khur hlawk hlawk a, a awmdan a inthlak leh dawn tih a hai lo. A awmna pindan zimteah chuan a hawikual ruk ruk a. A kut leh ke tin rawn khawng leh thang thut te chu a zuk melh a. A kawr hak lai tet hret hret te, a hmul rawn khawng fur mai te avang chuan pindan kil lam a pan a. A vawt sung sung bawk si. Tu emawin a eitur an rawn dah loh chuan a ramsa rilru fim lo chuan pawi a khawih ngei ang le..a rum hruih a, tunah chuan ramsa hrawl tak a ni ta. Pindan kawngka chu a hiat vak vak a, a hram nghur nghur bawk. Pindan pawn lama awm te chu an teh nghal hak a. Ephraime a rawn lang ve zat bawk. Ar puahsa pahnin hi khai lutin pindanah chuan a theh lut a, Zoi chuan ar chu a lo pawtsawm nghal vek. Ar pum pahnih a ei zawh takah chuan a bawk ta hle hle a. A mit chu a de sawr sawr mai. Ephraime chu a va lut ta a. 

"Zoi, hei..i tithei aw. Mihring i ni. Ramsa i ni lo. I chak tawk ka tih kha..aw le, a tha e..tho la, pindan kilah sawn va inthlak rawh aw. " tiin a be mawlh mawlh a. Zoi chuan thuawih takin pindan kil lam chu a pan ta hnu hnu a. Ephraime pawh chu a chhuak ve leh nghal. 

Tluanga chuan, "Ani saw engtia tih nge i rilruk" tiin a lo zawt a. 

"Mihring dik tak ni turin ka siam ang. Sawrkar kuta a awm ai chuan hetia kan kuta a awm hi a tha zawk" a lo ti hmiah a. DIk tak chuan awm ve dangte chuan Zoi chu an hnaih tha ngam meuh lo a ni e. A pawhsawm hneh dan tur an hre ve kur si a. Rapthlak an tih chu thuhran, Zochhingpuii lo pian dan leh secret society te thlenga an hriat tawh avang khan Zoi hlat chu an tum ru thám mai a ni. Lainat erawh an lainat ve tho mai. Ni, a lainatawm em asin. Nula hmel tha leh pianfuh tak, hetia damdawi chi khat hmanga thununa rapthlak taka thlak danglam a ni thin hi..mahse, pawi ber erawh ramsa a nih hian a chhungkua tih loh mi dangte a phek en vek tawh zel hi a ni. Chu chu risk sang tak a ni miau a, thih theihna chance a tling tlat! Ephraime-an a la kher pawh hi a tirah khan an lungawi vak lo. Mahse, an han ngaihtuah chiang a; sawrkarin Zoi hi train ta ngatin ramhnuaiah te chhuah ta se, an pawl tan hmelma hlauhawm tak a ni ringawt mai dawn si a. Sawrkar chet hmaa Ephraime chet lakna chu an pawmpui lo thei lo a ni ber e. 

Hetih mek lai hian Zohlupuii pawh sawrkar mi leh saten nasa theihtawpin an lo dáwp ve mek a. Zoi rawn hruaitu kha tu nge a nih tih leh eng ang hmelpu nge tih chu an zawhna a ni. Mahse, Zohlupuii, Emy a nih tawh hnua hmeichhe lunglian leh chhel, thinlung vawt tak nei chuan a fanu chhanhim nan chuan thih pawh a hnial hauh si lo. A ke phah chu a na satliah tawh lo, a ke chuan a hriatna a hloh mek tawh ni maiin a hria. A kut tin chhunga hriau an vih luh laite chuan au turin chakna a nei tawh lo va, a hmai saranga tuama tuia an nem luh te pawh chuan a thi ta emaw a inti hman tawh. MAhse, a nunna chu a la tawp em bik lo ve. Chutiang khawpa nasa chuan a fanu vangin an nghaisa a. Ani erawh chuan a chhanna ngai reng, "Ka hre lo" tih thu bak engmah a chhak chhuak duh der si lo. Amah dáwptu te chu an beidawng lek lek tawh zawk a ni. Chu hmeichhe luhlulzia leh sehhelzia an hmuh chuan a fanu pawh a tihmawh viauin an ring. Mahse, Zochhingpuii chu an tan a pawimawh miau si a. Zan khua deuhthawa Hlupuii an nghaisak hnuah pawh eng an an theih loh takah chuan an mutsan ve ta ringawt mai. Amah Hlupuii erawh muhil chi ziazang a ni lo va. A rilru erawh a fim kar thung. A fanu kha a kaltir lo vang tih a hlau leh hnuhnawh kher mai. Sawrkarin an train dan tur a ngaihtuah chuan tuna a tawrhna te chu eng thamah a ngai lo. Hetiangte chu a tawrh than a ni miau a. Mahse, Zoliansanga a ngaihtuah a, a rawn ngaihtuah dawn lutuk tih a hria. Sawrkar lamin an rawn hruai chhuah lai khan amah Zoa kha inah a awm si lo va, a hawihaiin a hrilhhai dawn lutuk em a, chu thil a ngaihtuah chuan a ipik ve deuh. Eng chen nge an hren dawn a hre bawk si lo. 

Isabella an rawn dah luh chuan raipuar a nih avangin Zirsanga leh Rosangpuia chu an thinur kher mai. An ni bak hi tumah ru bo tawh lo se an duh laia raipuar ber kher an rawn rubo leh chuan an thinlungah helna a hring chhuak ti mai ang. Bella chu an khawngaih hlawm kher mai. Ani lah intipachang zo thei bik hek lo, a tap a tap mai si. A hnuah a insum theih hnuah a pasal leh Amanda te an thawkho dawn tih a sawi chuan an rukbo chhan tur awm chu an hrethiam ta deuh. Pawi an tihpui hle. 

Zirsanga chuan, "Chhantu pawl lam tal hian min rawn zawng hmu mial se aw. Heti ringawt zawng" a ti nuah nuah a. 

Rosangpuia pawh chuan, "Ngawi tak r'u, an awm mai mai bikin ka ring lo. A dik adik chuan Amanda pawh hian hel ho thiltih a ni lo tih a hmuhthiam ka ring.." A ti nghut nghut a. 

"Kei chu engmah hi a awmzia ka hrethiam tawh lo. Min rukbo avang hian hel pawl lam hi an inpek an beisei nge, hel pawl laka tawktarhah min hmang zawk pawh ka hrethiam tehnuai tawh lo" Drose chuan a lo ti ve bawrh bawrh a. Arini erawh a hma zana a mumang avangin ngawih a chuh tlat! A mumang kha rapthlak a ti takzet a ni. Ni e, Resort-ah a pasal Ruatfela nen hlim taka an awmdun laiin ramhnuai atangin silai keng mi paruk an rawn chhuak a, a pasal hmuh lai ngeiin Arini chu an pawngsual ta a. An pawngsual zawhah a hmuh lai ngeiin Ruatfela kha an kap hlum a nih kha..kha a mumang avang khan a awm a nuam thei chai lo va, a rilruah eng dang mah a leng thei lo a ni ber e. 

Rambuatsaiha thihna chuan Zoram a tuam hneh leh hle. A thiltih rûk vanga a thihnaa ngai nghet hmiah an awm laiin lo tan pawl erawh an awm bawk. Tu nge a lehpekah ni ang tih lo inrinsiakte an awm thul. Police lam lu a hai mup mup tawh teh e. sawrkar lamin thuchhuah an siam ta rup mai bawk. 

"Zoram Chhantu Pawl inti ten Zoramah thisen an luantir tak zel avangin, he pawl member pakhat luman atan Rs. 100000 a ni ang. Tupawn finfiahna tha tawk tak nena he pawl member rawn report thei in awm chuan venhimna hnuaia khawsa zuiin a luman in nei thei bawk ang" tiin. He an thu chhuah avang hian Zoram chuan thil rapthlak tak a hmachhawn chho dawn ta ni pawhin a lang..

(Tawk rih aw..🥺