Inferno 2

INFERNO (2)

Ziaktu: Toni Râlte

A phone ri ral ral chu a melh zauh a. Khi sak chungin a la kang a, "Hello sir" a ti thawp sat a. 

Lehlam ami chuan, "Zanin dar 11-ah farm-ah kan lo beisei ang che" a rawn ti a. An inbiakna a zo der mai. A hmaa darthlang a taksa pum lang theiah chuan a va inthlek zauh a, a sam chu huihkiangin, "Hna nuam tak a nih ngei beisei ang" a ti sap a. 

Farm house lamah erawh inhnialna thawm a ring hle thung. Kum 56 bawr vel tur, pa zahawm leh dulkiar lek lek chuan aw fiah zetin,"He hmeichhia hi a rinngam ang maw? Mipa chak deuh kan mamawh zawkin ka hria" a ti khauh a. Phone hmang zo chiah khan rum nghut chungin, "Mipa chak tak chu hel pawlah an lut vek alawm. He hmeichhia hi kan hman tangkai theih chuan engmah pawisak nei lo a nia. A la tangkai viau ang" a lo ti a. 

A bul chiaha thu chuan,"Eng ang chiah nge a nih?" A lo ti sup a. 

"Sex addict a ni a" a han ti phawt a! Mak ti fe hian a thiante chuan an lo melh a. Nui hmelpu deuh hlek hian, "Pawisa hi a hmangaih hle bawk a. Chakma thisen kai a nihnaah hian mizo thisen chhuah pawi a ti lem lo. Thawk khat lai phei kha chuan Mihring hmanga sumdawnnaah a inhnamhnawih ve vangin man a tawk thelh a, mahse, ani zawng a thluak a tha ve tlat a. A insawi fihlim thei ta a. Kei hian ka pui nasa bawk a, ka lei a bat bakah kan pawla luh hi a duh ve tho bawk a. Tihian kan duh ang chu min tihsak zel dawn a ni" a ti ta chat chat. 

Pa fimkhur tih takah Mizorama pa challang ve tak chuan, "A vulhtu kuta seh mai chi a ni lo vang maw?" A lo ti nghut a. Pu Hmaa chuan a bawp khawkherh átin, "Tihsual a awm chuan a hrawk hrui kan chhat mai ang chu. Tunah chuan amah hian kawng a sial thei ber ang" a ti ta a. Boruak a reh duk mai. Eng pawl tak ni ang maw..? Mizoram sawrkar laka hel chu an ni hauh lo va. Eng chiah nge maw an tum ve a, eng thil nge an ruahman tak ang le…?

"Kan lo lawm takzet che a ni. I nupui i rawn hruai ve dawn emaw kan lo tia" Tluanga chuan a hmaa ding palian zet mita en chung chuan a ti a. 

Ephraime chu a khi suk a, "Ani ang kal vena chi niin ka hre lo va. Bakah ka fa a pai mek a ni" phurna hlira khat mitmeng hian a ti a. 

"Kan va lawmpui che ve aw. Chuan, Zanriah ei hmain hun a la awm hlek bawk a. Report kimchang i ngaithla duhin ka ring a, he lamah hian sawi dun ila" Tiin Tluanga chuan pindan tepen dangah hruaitu lawk zualte nen Ephraime chu a luhpui a. An buai rukna tun hnaia inrukbona thlengah engmah inhnamhnawihna an neih loh laia sawrkar leh mipui lam atanga an chetna niawma sawi a awm thin chu an sawi liam liam a. An thiltih dan lah hrethiam lo an awm lo bawk a. Ephraime pawh a buai hmel ve riau mai. A khabe hmul a tuai a tuai a, a thluak a hmang tih a hmelah pawh a lang reng mai. An sawi zawhah, "Keimahni hmingpu leh kan kawng sah en-saah tu te emaw chuan sum lakluhna hmanruaah min hman an tum mek niin ka hria. Mahse, a ni lo ve thei tho..Sawrkar hian pawl rûk a din ve thei tlat..

Diteii leh Dinfela chuan Mapuia chungchang an sawi dun hnu fêah leh amah Mapuia an biak fel tawh hnuah Amanda hrilh mai an rel thlu ta a. A chhan chu an fanu hmuh leh an duh miau si a. Hetiang chiah hian Lawmsanga te nupa pawn thutlukna an siam ve tho mai. Nauteii chu helho rukbo a nih a rin loh thu Amanda hrilh erawh a tuk lamah an tum thung. 

Hetih mek lai hian thil duhawm lo tak a thleng leh ta tlat mai. ZO CHOKA neitu Rosangpuia chu a bo ve leh ta tlat mai le! A bo rual deuhthawin Zirsangliana, sumdawng hausa pawh lak bo a ni ve leh chiah bawk. Amanda hmu turin an nupuite ve ve an lut rual a, Rosangpuia nupui Dingpuii chu a mit a sen rám a. Zirsanga nupui Kimi pawn mut a hmu tha lo tih a lang reng bawk. Amanda chuan mi bo chungchang a lo hriat lawk tawh vangin a hmaa nu pahnihte chu makti hmel pawn a lo en lem lo va. A khawngaih tih erawh a lang. Kimi chuan a pasal bo dan chu tiang hian a sawi ta a. 

" College atangin ka haw a, ka hawn rual hian dawrah ka peng ngei ngei thin. Nimin tlai kha chu ruah a rawn sur thut avang khan ka peng ta lo va, in ka thlen rualin Zirsanga pawh ka be nghal tho. A ring ral thak a, a buai a niang tiin eirawng ka bawl zui nghal a. Ka inbual zawhah pawh a lo la hawn loh vangin ka call leh a, a ring ral leh thak. Manager ka be ta nge nge a, kan Manager hi Puia kan ti mai a, pa fel tak mai a ni. Ka va biak chuan kan pa chu a lo haw tawh thu a sawi ta a. A nih chuan a lo la thleng lo a niang tiin ka dah leh mai a. Mahse, zanriah ei hunah pawh a rawn lang thei ta si lo. Puia bawk ka va be leh a. "Ruah a sur hma khan a lo chhuak tawh. A va mak ve" a rawn ti ta mai a. Tun hnaiah mi bo an awm zauh zauh nen, ka ngaih a tha ta lo a ni. Zankhuaa a rawn hawn tak loah chuan ka pasal hi an rubo a nih ka ring nghet tlat a ni" tiin. 

" Zirsanga phone number chu lo sawi la, Sama, lo trace lawk la aw" Amanda chuan a ti a. Kimi pawh chuan a hrilh vat a. Sama'n a chhui nghal bawk. Dingpuii lam chu hawiin Amanda chuan,"Chuan, i pasal bo dan ve thung chu le?" Tiin a zawt a. Dingpuii chuan a chil lem khalhin, "Zirsanga bo ang tho kha a ni. Hotel atangin a rawn haw lo tawp. Vawikhatmah a tlai ngai lo va, mahse hei nghahchhuah tur a awm lo chu a nih hi" a ti zawi sap a. Amanda a bu nghat. A kutzungtang sei sala dawhkan tlir zaih zaihin, "Thil pakhat ka zawt ang che u. In ngaihdan ni loin, thudik takin min chhang ula aw. In pasalte hi hel pawlah an inhnamhnawihin in hria em?" A ti ta a. 

A rual deuhthaw hian,"Chulam chu engmah ka hre lo" an ti ve ve a. Amanda a bu leh nghat. 

"Rinhlelh tur ang tal pawn inhre lo maw?" A ti leh ngat a. 

Kimi chuan,"Aw..i zawhna khan min thawng mah zawk. Ka hre miah lo kei chuan" a lo ti vat a. Dingi pawh chuan,"Kei pawn ka hre lo takzet" a ti a. 

Amanda chu a bu nghat nghat a. "Aw le, engpawhnise, phone call danglam deuh indawn chuan a ranglamin min rawn hrilh dawn nia. Hei hna kan tan chho a, mi dang bo te pawh kha hmuhkir leh vek kan duh a ni" a ti dap dap a. Kimi leh Dingi pawh tlemin an thlamuan hmel ta deuh e. 

Guard pakhat rawn lutin a pu beng bulah a phun sur sur a. A pu chuan, "Rawn luhtir rawh" a ti sup a. Guard chhuah hnu atanga reivakloah kawngka chu rawn inhawngin hmeichhe lian zeh zuah, sam dum sei tak, a lai taka bari then, zahawm hmel tak hi a rawn lut ta zan zan a. Kekawr dum body fit zaih hain heel sang vak lo, a ke zungtang nalh leh sei sal mai lang tam thei tur a bun a. A kawr erawh a awm a zau deuh a, a hnute bu a lang titih. Mahse, hmeichhe nalh tak erawh a ni chiang mai. Thutna an lo kawhhmuhah chuan thuin a bawp a khawkherh zàn a. A awm a pho lah bawk. Lo thlir thaptu te chu melh kualin, "ka inpeih e" a ti fiah kák a. Pu ber amah rawn betu chuan, "Abigail, tunah chuan kan mamawh ta che a ni. I tuihalna kha i leihbaw thei tawh dawn e" a ti te te a. Abby chuan phur hmel zeta rawn melhin, "Chuan" a ti thawp sat a. 

A aw thian leh te tein, "Mi bote zawng turin Amanda leh a naute an che chhuak dawn a. An kawng i dal ngei tur a ni. Mi bote rubotu hi an hre tur a ni lo. Engti kawng zawng paw'n i dal tur a ni" thupe aw zet hian a ti ta a. 

Abby chuan,"Mibote chu i rukbo em ni? " a lo ti khauh a. Mitmeng buai nak chungin Mizoram Health Minister Pu Chawimawia chuan, "Aw. Mahse, invenna hmanrua atan chauh. Hel ho man an nih hma loh chuan hmuhkir an ni lo vang. Chutah chuan i pawimawh ta ber dawn a ni." A ti ta a. Abby chuan a dar a san ák a, "Hel ho rukbo niawm taka lantir i tum tihna ni maw. Ka man e. Hel hoin an target ve che i hlauh vangin, a dik em?" A ti lehzel a. 

Pu Chawimawia chuan,"Dilchhut vak loh a tha zawk..Abby, mahse, he kan thuruk hi Sawrkar ruahmanna vek a ni e. Ka mimal ruahmanna a ni lo. Hel ho vang hian thinthia muthilh a harsa tan tawh a, Zoram mipui hian inrukbona avangin do se, hnawl se kan duh a, an vaia man theih dan tur ruahmanna kan siam mai zawk a ni. Mibote pawh an la him vek e. Chuan, i hna tur kha i chiang maw?" A ti a. 

Abby chu za vak lo va nuiin, "Amanda ber kher han hmachhawn chu..a chakawm rualin a huphurhawm mang e." a ti sap a. 

"Amah Amanda i beih nghal chuan a fuh lo vang. Kawng dang i dap tur a ni. Pasal a nei tih i hriat kha" Pu Thangliana, Department pakhata Director ni lai chuan a lo ti nghut a. Abby pawh a khi sak mai. "Okay,..ka ngaihtuahawm loh vang. Zanin atangin hna ka tan ang e. " a ti zangkhai vah a. Awm ve dangte chu an thaw huai hlawm mai. Abby chu hmeichhia a nihna laiah Amanda kawng dal theihna chance a nei miau a. Chuvanga thlan a ni reng a ni. 

Lawmsanga a vei nghut nghut a. Nguri erawh a thu fel thàn thung. Mapuia a rawn lut ve chiah bawk a, "Pa, Sangpuia vanga rukbo angah chuan i ngai deuh em ni?" Tiin a pa a melh a. Lawmsanga mitmeng erawh hriatthiam a har deuh. 

"Ka hre lo. Dik tak chuan hel ho an ni lo vang tih hi chu ka ring nghet hmak tawh a, ka nauteii kha engvanga rukbo nge a nih ang tihah ka buai. Sangpuia vang chu a ni thei tihna a nih chu" a ti duah a. Nguri chuan, "Engpawhnise, kha Amanda leh a naute an che chhuak dawn a. Hel ho te pawh hi man vek se ka duh tawh. Ka fanu hi anmahni rukbo a ni lo a nih pawhin, anmahni vanga rukbo a ni thei. Tihi chuan kan ralmuang lo em mai" a ti niah niah a. 

"Taka Nu, Zanin chu Sasai te inah chaw ka ei a ngai dawn aw" Mapuia chuan inthlahrun hmel angreng takin a ti a. 

Lawmsanga'n, "Buai lai laia aw. A tha tho e. Mahse, inneih chu kan hmanhmawh thei lo aw" a lo ti nghut. Mapuia pawn a hrethiam khawp mai. 

Nguri chuan,"Aw va ei rawh. U Muanpuia te chhungkuain an rawn ei dawn a. A zia tho e. " a lo ti siam siam a. Lawmsanga ai mahin a dai thei zawk, Nguri kha a ni miau a. Mahse,a fanu chu englaimahin a theihnghilh lo thung. A la dam turah a ngai a, chutiang ni lose engtin emaw hriatna a nei tawh ngei ang. Nu leh fa inkar thukzia a hai si lo va. 

Hmana ramhnuaia a in kha hel pawl khat-in an luah ta a. An ni nupa pawh ni 2 lai chu an awm ve. Zoi chu a naupai vangin a tuamah chuan chettir an phal lo va, an awl zung zung mai. Tin, Zoi pawh chuan hahchawlh a lo mamawh ve bawk nen, a pasal hi hel pawl hruaitu lu ber a ni tih chu Mizorama an rawn kal dawn zanah a hre chauh. Chutiang khawpa inthup thei leh mi danglam chu a pasal a ni tlat si a! A hmangaih em em nachungin hel pawl chu bansan se a duh ru ngawih ngawih thung. A nunna atan a hlauthawng a ni. Ephraime sulhnu leh nunhlui zawng zawng a hre vek tawh a, hlauthawng reng rengin hun a lo hmang tawh thin. Mizorama chhuah chhoh a hrehna ber pawh Ephraime chu an lo man ang tih a hlau. Tunah lah Police ten khawi kipa an chhui hel pawl hruaitu a la ni zui! 

"Amanda an thehchhuak dawn an ti a. Bansan mai ta che. An man che chuan i nunhlui nen lam an phawrh ang a, damchhungin kan awm dun leh thei tawh lo vang" mut hmunah a pasal bulah chuan a ti a. 

Ephraime chuan rawn kuah thawkin, "Bawihi, i hlauthawng mah mah thin. Nau pai lai i nih kha. I rilru hmang nasa lutuk thin suh. Tuman engtikahmah min man lo vang. " a ti nghet charh a. Zoi chuan tûm bár chungin, "Tihian ti ziah suh. Hma hun kan hre lo aw. A thuhrimin mi rukbo te chu a ngai em ni? In pawi an sawi pawh a ni lo va" a ti hlak hlak a. Hel pawl ruk bo angah a ngai tlat a ni. 

Ephraime a khi suk a, "An rukbo te hmu chhuak turin naktuk atangin ka hoin kan thawk chhuak dawn asin. Tikhan kan rubo lo tih chu i hre tawh ang chu" a ti duh lek a. Zoi erawh a ngawi hmak. Ephraime chuan a hnungah a chul heuh heuh a, "Fa duhawm tak min hrinsak hma chu i pa bulah i lo khawsa rih ang a. Ramhnuaiah chuan i awm ve ka remti lo. Zoi, ka hria i duhthusam angin ka awm thin lo. Mahse, heng hi ka tih a ngai a ni. Mizo ka ni ve tho a, mizoram hi ka hmangaih a ni. Engtikah emaw chuan hnehna kan la chang ang a. Kan pahnih pawh zalen takin kan la awm thei ang. Min support ngai lo chungin ka kiangah i awm zel a, ka lawm. Ka hmangaih che" tiin Zoi chalah a fawp a. Zoi pawh a lungawi chawpchilh ve leh hmiah. He hmeichhia hian a pasal hi a hmangaih ve bawk êm a ni. 

Pindan chu a rawn eng uar a. Drose chuan a mit a khap sak sak mai. A eng mah mah a, a meng tha ngam lo. A han men chian theih hnuah chuan a hawi kual a. Pindan zau tak a ni naa a ruak hle a ni. Chu pindanah chuan amah anga an rukbo ve tho te chu phuarbeha awmin an thu ve far a. A hma zawnah chuan Zo choka neitupa Rosangpui, a lo ralkhat ngaihsan ve em em a thu a, a bul chiahah Rosangpuia nen inrual khat tur mipa hmeltha tak a thu bawk. A bul chiaha thu an zinga naupang ber tur chu lainat zetin a melh a. A piah chiaha thu ve tho Arini pawn Nauteii chu a lo melh ve reng bawk. Nauteii chu a tap faih faih a, a mitmeng te pawh a bui lek lek tawh. 

"Tap tawh suh le..min tihhlum nghal loh danah kan zalen leh hi ka ring tlat a nia" Drose chuan Nauteii bulah a ti sap a. Chairah thuttir vek niin an kut leh ke an phuar vek a. An ka erawh an hnawhsak lo thung. An bo tirh atangin eitur an dawng tha viau bawk. Tihnat tum emaw han khawih tum an la awm lo bawk. Anmahni rubotu te erawh chuan mask an vuah zel avangin tute nge tih an hre lo thung. 

Nauteii chuan, "Ka pain min ngaihtuah tawh dawn em mai..ka khawngaih. Ka tha tih tal hi hria se ka duh" a ti tham tiak a. Zirsanga chuan, "Kawng hi chu a awm ang mawle. Min phuarna hi phelh thei ila chuan tlan chhuah dan a awm ang. Engtin nge niang aw.." A ti vang vang a. 

Rosangpuia chu a che deuh hrut a. "Min phuar thiam mah mah a ni. Chair chawp hian chawikang thei ila, tihdan a awm maithei" a lo ti ve bawk a. 

Arini erawh chuan,"Min rutu te hi hel pawl an nih in ring em?" A lo ti daih. 

Drose chuan,"Ring lo. Hel pawl hian min rukbo ngawtna chhan tur an neiin ka hre lo. Sawrkarah pawimawhna kan nei lo miau a" a lo ti a. 

Zirsanga chuan, "Nia.. Mahse, tuna min rutute pawh hian ti nge keini kher le? Tlanna sum an phût chuang bawk si lo. A mak ka ti mang e" a lo ti a. 

"An hmuh fuha kan tan vang nge ni ang a, an pawi kan lo sawi ru reng zawk ni dawn ni.." Rosangpuia chuan a lo ti ve bawk a. 

Boruak chu a reh duk mai. Kawngka chu rawn inhawngin, eitur kengin mi pahnih an rawn lut a. An hmai an tuam leh tho. Dawhkana eitur an dah hnuah an mi mante phuarna chu an phelhsak a, Zirsanga leh Rosangpuia inmitmei zawk chu an hmu lo a ni maithei. Pakhat zawkin Zirsanga a phelh fel chiah tih chuan Zirsanga chu a zuang zawk a, amah phelhtu bekah chuan a kiuin a nghawk chawrh mai. A na thawkhat nge a tlu ta zuah a. Pakhat lah chu a lo hamhaih ve nge, A harhchhuah meuh chuan Zirsanga'n silaiin a lo tin ran tawh. Rosangpuia chu Drose chuan a va phelh ve vat a. Zirsanga nghawk thluk khan a bek dawm vung vung chuan thawh a rawn tum a, Arini'n a bekah bawk a lo chhuih zawt mai. Rosangpuia chuan an hmai tuamna chu a hlihsak ta a. A hmuh tawh hnu ang a tih rualin tu te nge an nih a hrechhuak zo tawh lo. 

Zirsanga chuan, "He lai hmun atang hian min hruai chhuah a ngai. Kan awmna hi khawi lai hmun nge?" Tiin a chalah silai a hmehbel khap a. Chu pa chu a thlabar hmel hle. 

"In chhuak thei chuang lo vang. Pawnah vengtute an awm vek alawm. Kan awmna hmun hi Tuirial ram a ni. " a ti khur dat dat a. Chhuata tlu reng kha a rawn harh ve leh ta nge ni, an inrin hmain ring lutuk tak maiin a au ta mai a! Rosangpuia'n a hmaiah a zuk hnek siah a. A let leh tawl. Mahse, a au ri kha hria an awm tih a chiang mai. Thawm a ri nghal nak nak a, An inrin hma hauhin silai keng mi pathum an rawn lut ta. MAhse, Zirsanga chuan silaia a tinna chu a la thla duh chuang lo va. 

"He lai hmun atanga min chhuahtir loh chuan in thiante pahnih nunna hian a tuar ang" a ti hmiah mai a. Chung mi pathumte pawh chu an buai ru deuh tih an mitmengah a lang. Mahse, an hotu ber niawm tak chu rawn pen pheiin, "Kan ti thei lo vang. Heta in la awm hi a ngai a ni. A rei tawh dawn lo. In chhuak thei tep a nia. " zaidam deuh zawkin a ti a.

"Sal nih kan duh hleinem. Min rukbo ngawtna chhan lah kan hre hek lo. Min chhuahtir vat mai r'u " Rosangpuia chuan a lo ti rum ûl a. 

"Nakinah rukbo in nih chhan chu in la hre mai ang. In chhuak thei lo. In duh leh an ni pahnih kha in that thei e. Mahse, in chhuak dawn lo" An hotupa chuan a ti ta riap mai. Chuti taka an pawimawh chu mibote pawh chuan mak an ti. A chhan an hre chak zek zek bawk. 

"Chuan, in chhuak lo vang tih min tiam theih chuan phuar in ni tawh lo vang. Eitur pawh a tha ber in dawng tawh ang" inremsiamna neihpui tum takin a ti leh a. Zirsanga te pawh an buai map mai. 

"Tunah hian keimahni vangin Zoram khawvel an buai mek maithei asin. Kan chhungte lungngaiin an kun mek ang. An bulah kan tha tih tal hi hrilh rawh u..a nih loh chuan kan tih theih theih kan ti ve ang" Arini chuan inringtawk zetin a ti a. 

"Aw le, tun atanga darkar reiloteah in chhungte theuh kan lo hrilh ang. In tha tih an hriat nan" hotupa chuan a ti leh a. 

Kawng a ping ngang si a. Mipate pawh chuan ruahmanna tha zawk han siam mai tur an hre bik lo nen, an inremsiam titih chu a ni ta ringawt. Mahse, a ruka tlan chhuah an la tum fan em tih chu an rilru lam a ni tawh mai e.

 Judy leh a pasal Ngura te chuan muthmunah an mibo leh an ram buaina chu an sawi ve niah niah a. 

"Ka nu thawhpuite chu an ni lo phawt ang a. Jail-ah an la awm vek si a. Secret society thiltih a ni thei ang em aw tih erawh ka ngaihtuah" Judy chuan a ti sap sap a. 

Ngura pawh chuan, "Kei pawh ka lo ngaihtuah mek a. I putea hian jail atangin thu a la rawn nei thei zawk nge ni ang..ani hian thil a tithei nasa mai si a. " a ti ve a. 

"Ka hre lo le. A ni thei tho mai. Inrukbona mak tak zawng a ni e. Hel pawl lam chu an ni lo tihah hian ka chiang ve tawp. Mipui thluak suk nan sawrkar lam hian ruahmanna an siam a nih ka ring ta ber e" Judy chuan a ti a. Ngura'n a biang a rawn nul thuak thuak takah chuan a mut dan siamremin a pasal tan chuan a lo inready thlap a. Nupa hlim leh inngeih tak zawng an ni e. 

Samsona muhil chu a phone riin a rawn kai harh hlawl mai. Ham bui bui chungin a phone chu a la a, a nupui tihharh hlau takin zawi sup hian, "Hello" a ti a. 

Hmeichhe aw fiah tak hian, "I nupui chungchang hriat i duh chuan naktukah Ritz Hotel, room no. 014-ah lo kal ang che. " a rawn ti teh ngawt a. A dah leh daih. Sama a hrilhhai teh e. An nu muhil chu a zuk thlek zauh a, a lu thing nur nur chungin a muthla leh nghal. Kha hmeichhia teh ngawt kha, eng nge a nupui chungchangah hriatchian tur awm le?! A hriat tur awm ang chu a hre viau tawh. Hriatbelh pawh a duh hek lo. Ngaihtuah zui lem loin a muhil ve leh nghal daih. Zinga a harh chuan a khum bulah thingpui a lo khu leh vut vut tawh. Hetiang nupui a nei hi a hlim a, a lungawi a ni. Thingpui chu lain a in a, Amanda a rawn lut ve chiah. A dul a len deuh tawh vangin Sama hian a khawngaih a, awmpui lak a rawt tawh. Mahse, "Kan hna hi heti hi a ni si a. Mi dang chenpui chi kan ni lo" a ti si. Eirawngbawl leh in chhung chetah an inpui tawn ta zel a. An hna vanga eirawng an bawl hman loh changin Sama te inah emaw hotelah emaw te chaw an ei mai zel bawk. Amanda chawlh nei thei lo chuan Sama a tithinur lek lek thin. Tunah phei chuan mi bo zawn chungchang leh Hel ho chhuina tur kawngah Amanda chu leader a la ni zui! An hotute lamin an hrethiam duh miah lo chu a ngei! Amanda lah a vui duh miah si lo. Hnuchhui hi a nunah a bet tawh a, a tan a hrehawm lem lo a ni mahna. 

"Vawiin chu kan mi bo te ho chhungte ka tlawh kual dawn a. Min rawn zui lo mai rawh aw. " Amanda chuan a ti a. 

"Eng nge ka lo tih ve ang?" A ti hû a. 

"A hmun lo nghak rawh. Ziah fel tur pawh a awm nual kha" a lo ti awlsam êt a. Sama chuan a chhang tawh lo. A phone a'n en a, msg a dawng nual a, number hlang atanga a msg dawn chu a open a. A thingpui in lai a phuh thawt, Amanda chuan rawn en vatin, "Ti nge?" A ti vat a. 

Insiamrem vatin, "Engmah a ni lo. Ka hak thut alawm" a lo ti vat a. Amanda chuan room a chhuahsan zui nghal. Sama chuan a msg dawn chu ngun lehzualin a han en a. Thlalak a ni. Amanda leh a la hmuh ngai loh mipa palian tawk tak te mudun lai a ni! Hmanhmawh zetin chu number chu a call a. A ring ral thak. Ner nawk chungin, "Eng nge a awmzia? I thil min lo thawn hi" tiin msg a va thawn ve a. A thaw hawk. Thlalak chu a'n en nawn leh ringawt thin. Amanda a zawt law law mai dawn mawni tih a ngaihtuah a, mahse, a rilruah tîmna a awm tlat! Amanda chuan a hriat ve a hlau zawk tlat! A nupui hi vawikhatmah a la ringhlel ngai lo va, rinhlelh turin a la khawsa ngai hek lo. Tuna a rilruah pawh mak tihna leh lo thawntu hriatchian duhna chiah a la awm. An inneih hma nun a nih chuan a palliam thei mai ang chu..

Villa kawngkapui chu an rawn kik dat dat a. Hlupuii chuan a apron hak lai chu hlipin a va hawng a. Suit dum ha, palian tak, a bika ser inrinthla ruak, nelawm loh zet hi a lo ding run a. A sam chu a kir deuh chhap a, a sei lek lek bawk. 

"Eng nge ni ta? Ka hria che em?" Hlupuii chuan a ngaihna hre mang lo fe hian a ti a. 

"Ephraime ka ni. I fanu Zochhingpuii hruai tura rawn kal ka ni. " a ti thum chhak a. Hlupuii a tawlhhnung dawrh. Zoliansanga chu khuaah mamawh lamin a thang mek a. Zoi erawh a roomah lemziakin a awm thung. 

"Eng vangin maw? Eng nge a awmzia?" Nelawm vak lo hian a ti a. Ephraime chu a khi suk. 

"A chhan chu sawrkar lamin an rawn lak dawn vang a ni. Chumi hma chuan ka kutah dah la, a him ang a. I fanu i hmu leh thei bawk ang" a ti ta a. Hlupuii chu a dáng sáwp sáwp mai. 

"Sawrkarin a?! An rawn la dawn a maw? Engti turin?" A ti sek sek a. 

"I hria alawm. Hel ho te nghaisaa ei zo turin i fanu hi an duh a ni" a lo tihsan a. Thutthlengah Hlupuii a thu hnawk. Chutih mek laiin room kawngka rawn inhawngin a lemziah nen Zochhingpuii a rawn chhuak ve chiah a. A nu bula ding mipa lian tak chu melhin a meng bial káwk. 

"Na..nang maw?!" A ti tuar a. 

Hlupuii chuan a fanu chu makti zeta melhin, "I hria a maw?" A lo ti vat a. 

"Hria..amah chauh hian min thunun thei tlat a ni" Zochhingpuii chuan a ti ta a. 

(A tawi deuh maithei. A la sei ve zel turah ngai ang. Ziah tam a la har rih a. Sorry u 😇