Inferno 1

INFERNO..!

Ziaktu: Toni Râlte

(A hmasaa ka sawi duh chu, he story hi ka story lo ziah tawh hrang hrangte inzawmkhawm a ni dawn a. Khang ka story la chhiar lo te tan chuan hriatthiam a harsa deuh maithei aw. Support ka ngai dawn a nia 😍

-1-

A mo kawrfual hak, simple zet leh a dul puar ve ák tawh chu a inrem thlap a. A sam chu a chhipah an bawk khawm a, a hmaiah make up sulhnu a tam lem lo. Pastor Lalrempuia'n inneih thutiam a chhamtir lai chuan, A pasal Samson Rammuanawma chuan a rawn melh ngawih ngawih a, a hmel leh a mitmengah a lem leh a der pakhatmah a awm lo. Zungbun an inbuntir laite chuan Sama kut chu a khur lek lek! Chuti taka a zám chu Amanda nuih a za hial. Tunah chuan Amanda chu Samsona nupui a ni ta. An inneih ni chuan Social mediaah titi dang a leng meuh lo a ni ber e. Hmanni lawka Vanneihsangi case turu tak mai chinfelna kawnga Amanda hmalakna tih loh kha case dang an la khawih zawm lo va, A nau pai a hrám chho ve tan dawn bawk nen. Chawlh a lak rih a ngai ve alawm. Amanda duh dan leh Sama chhungte remtihna thlapin an inneih atanga kar hnihna lekah Amanda in lamah an insuan phei ta a. Nitin leh zantin mai chu honeymoon a ni ringawt mai awm e. Sama duhthusam a thleng dik ta bawk a, an fa lo piang tur chauh chu an hmathlir a ni ta rih mai e. 

Hetih mek lai hian Zoram khawvelah thil thleng danglam tak a awm a. Chu chu ram inrelbawlna leh sawrkar duhkhawp lohna avanga sawrkar laka hel pawl an ding ta chu a ni. Ram dangah chauh an awm thin emaw kan tih pawh kan ramah ngei an awm ve ta tlat mai. Mahse, a mak vak lo. Kan ram rorelna leh inrelbawlna kha a chhe lulai em a, mi retheite an bet tlawk tlawk a, a hausa leh a liante an páwng thur thur a. Thiltithei ve lo tan chuan damkhawchhuah a harsa ta ëm a ni. Hetianga hel pawl hial an din takah chuan Zoram chu thuang hnihin an kal ta ruak a. Sawrkar milian leh minister leh MLA chaw kilpui thei ho te chuan anmahni invenhim nan misual leh pawisak nei lo, mi rawva tak tak a rukin an ruai ta thup bawk. Hel pawl kan tihte kha a nihna takah chuan Zoram mi nawlpui lakah an sual lo va, an che ngai hek lo. Heng eiruk vanga lian, mipui chanai ruksaka invulh lianho te lakah erawh na lua awm lova an chet vangin an ni lam pawn venghimtu an mamawh miau si a. Tichuan, alh chhuak lem si loin Zoram chu a chhunglamah a damlo nasa ta em em a ni. Ruang chhar a awm nawlh fo a, a tam zawk chu Sawrkar zêm zen leh dik lo taka Mipui chanvo chhuhsak thinte ruang a ni. Police te tan pawh chhui sen leh chhui fel hleihtheih loh a ni fo mai. Case kal lai tam tak a awm reng bawk a. Amanda leh Sama ngei ngei pawh an lu a haiin an thawkrim kher mai. A naupai chawlh pawh la hleithei loin a dul puar lah tawh hnuah pawh a che chhuak fo lo thei lo. Mahse, Hel pawl zinga pakhatmah a la man lo! Chu chu thilmak a ni ve bawk a, Sawrkar lam chuan Amanda chu an beisei san vang ni maw rinhlelhna mitin an melh tan ta a. An department pawh siksawiin, Case lian tham chu Amanda kutah dah a ni ta lo zeuh zeuh a. Mahse, mi dang kutah awm mah se, a tu amahin Hel pawl an man thei chuang lo. An fing viau emaw an rin loh tak tak an nih vang emaw a ni maithei. Amanda pawn tute nge tih tak a la chhui fuh thei bik lo. 

A dawhkana a phone ri ral ral chu lain, "Aw,Detective Amanda ka ni e" a ti fiah kák a. 

Lehlam ami chuan, thlabar hmel zet hian,"Ka fanu a bo. Ka fanu Drose..Diteii ka nia, min la hria em?" a rawn ti ta mai a. Amanda chuan a la hrechiang khawp mai. Diteii chu theihnghilh phal chi a ni lo alawm. 

"Aw Dite, ka hria che. Ka office-ah min rawn hmu zawk mai dawn em ni ang?" a ti a. Diteii lo beisei ruk a ni bawk a. Chawhnu dar 1-a inhmu tur chuan an intiam a, an dah ta a. 

Sama chuan, "Chawlh hi i lak a ngai tawh. I puar tawh mah mah" a lo ti a. Chair-a hahdam thei ang bera thu awn chungin,"Kan hotute hian min chhawr hlum an tum aniang" a lo ti ve mai a. Chawlh hi a duh lo pawh a ni bik lo. Phalsak a ni rih tlat lo. Detective dang Raymond leh Jane te nen hian chawlh an nei ve thei ngai dawn lo a nih hmel. An intiam angin Diteii chu dar khatah chuan a rawn lut ta zán zán a, a mitmeng sen rám danah a tap nasa a nih a rinawm. A nulat lai hmel a la paih lo va, tin, a la upa lem lo bawk nen. Amanda dawhkan bul chair-ah chuan a thu a. Amanda chuan,"I mangang hle a ni maw? Thil thlen dan min han hrilh teh" a lo ti dam thlap a. 

Diteii'n a aw a then káwk laiin kawngka chu kik khawmawi pawh awm loin a rawn inhawng rawk a. Phelh phang hian mi pakhat hi a rawn pen phei pawk pàwk a. A landanah a hmanhmawh bakah manganna a nei tih hai rual a ni lo. An lo en thap a, Amanda dawhkan bulah chuan ding vein, "Ka nupui a bo" a ti ta chawt a. Amanda leh Sama a inmelh zawk. 

"Thianpa, thu hahdam rawh. Diteii pawh khan a fanu a hloh ve mek a ni. In buaina hi thil kal kawp a ni maithei a ni" Amanda chuan a ti dam diai a. A aw chu a nelawm hle. Chu pa pawh chu hah hmel zetin a thu hnawk a. Diteii lam chu hawiin,"I fanu chu tu nge?" a ti sup a. 

"Drose a nia, a mizo hming chu Zochhuanawmi a ni e, i nupui chu tu nge?" Diteii chuan a lo ti ve bawrh bawrh a. 

"Arini a nia, kei hi Ruatfel ka ni e. I fanu leh ka nupui ru botu hi mi thuhmun an ni ang em le?" a lo ti mawlh mawlh a. A rilru buaizia chu a hmel hmai zawng zawngah chiang takin a lang thei. Amanda chuan a aw a thian kharh a. 

A hmaa thute melh tawnin,"Aw le, Diteii hian han sawi hmasa se, Ruatfel, nangin i lo sawi ve dawn nia aw. Dawhthei tak khan le" a ti ta a. 

Diteii chuan a fanu bo dan chu hetiang hian a sawi ta a. 

"A pa hi hna thilah tunah hian Malaysia-ah a zin mek a, ka hovin kan awm a. Nizan khan a thiannu Jenny piancham lawmnaa kal min dil a, a tawmim em vangin chutia intih harh ve a duh chu ka lo lawm viau zawk a. Ka phalsak a. Jenny te chuan an rawn lam nghe nghe. Dar 10 hmaa lo haw turin kan inchah thlap. Ka thu hi a awih lo ngai lo va, ka ring tawk viau. Mahse, dar 12-ah pawh a rawn hawn loh avangin ka call a, a phone a switch off tlat si. Jenny zawk ka call ta a, Jenny lah chuan,'Dar 9:30 khan a lo haw daih tawh kha' a rawn ti ta mai si. Scooty nena chhuak kha a nia. Ka mangang tan ta a. Thian a kawm tam lo va, biak tur pawh ka hre lo. Chutia ka zat ruai lai chuan a nau Puipuia zawk hian, 'Nu, ngaihtuah suh. Bialpa a nei ve leh a, an inhmu aniang. An inru aniang' a ti mai a. Sawi nuam a ni lo naa ka'n sawi mai ang a. Drose hian a tleirawl chhuah phat atangin ngaihzawng nghet tak a nei a, mahse, kum hnih hnuah a bialpa chuan a boralsan ta mai a! Khata tang khan mipa a ngaihsak leh ta miah lo a ni. Chutia a nauin a lo sawi pawh chu ka awih hreh khawp mai, a chhan chu a engkim thlenna ka ni ve a. Engmah ka hre lo chu ka ringhlel deuh. A bialpa nen pawh lo ni ta tehreng se, ngaihthatna chi ziazang a ni chuang lo. Pasal a um ta mai em ni ang tih ngaihtuahna nen zing dar 3 thleng ka nghak a. Zawn ngaihna ka hre bawk si lo, kan pa pawh ram dang atangin a lo mangang ve em em a. Tihtheih kan nei si lo. Tichuan, khawvar dawn khan ka lo chhing ve sek a, ka harh khan Mapuia hian, "Nu, A u scooty an chhar a" a ti ta a. Tah khan ka fanu chu a bo a ni ang tih ka ring thiam nghal mai a ni. Pasal a um ka ring hlawl lo a ni. Chawhma chhung ka ngaicháng a. Phone call leh eng thil mah ka dawn loh vangin ka rawn be ta che a nih kha" tiin. Amanda chuan a ngaithla uluk kher mai. 

Ruatfela lam chu hawi ve lehin, "I nupui chu engtia bo nge ni ve le?" a ti zawi sap a. Ruatfela chuan a thut dan a siamrem a. A kut pahnih suihin hetiang hian a nupui bo dan chu a sawi ve ta a. 

"Aizawl khawchhungah kan khawsa lo va, Tanhril daiah khuan resort enkawl pahin kan awm a. Nizan kha chuan kan la awmdun ti ila, zing lam dar 3 bawr velah ka zun chhuakin min tiharh a. Ka harh chuan Arini chu a lo mu tawh hauh lo va. Ani hi a che dangdai ve thin a, hma taka thawha kan chenna bul vel han fante chu a ching fo thin. Chuvang chuan ngaihthat lohna lutuk chu ka la nei lo. A nunhluia a sulhnu tam takin a la tibuai thin ve bawk nen. Tichuan, Zingah pawh a la rawn lan loh avangin ka call a. A phone chu a lukham hnuaiah a lo awm a. Tukthuan ei a hun dawnah pawh a rawn lang thei si lo. A chhungte leh ka chhungte ka bia a, a kal loh thu an sawi bawk si. Kan hnathawkte lahin an hmu bawk si lo. Ngaih a tha lo tan ta a. Ramhnuaiah te chuan ka'n zawng thuak thuak a, hmuh tur reng reng a awm si lo va. Chawhma chhung tihtheih deuhthaw kan hnathawkte nen kan zawng a, kan hmu ta si lo va. A bo a nih ka ring ta ber a. Ka rawn pan ta tawp mai che a ni. Rukbo ni ta se kan pindan atanga rukbo a ni awm si a, thawm ka hre ngei ang. Mahse, a dang han puh tur ka hre mai bawk si lo" tiin. A nupui a ngaihtuahzia chu a awka thlengin a hriat mai. Ruatfela nupui Arini tia hriat hi thawk khat lai khan tualthah thubuai avangin jail-ah a lo tang tawh a ni. A pa hi ex Minister a ni a, thil an tithei bawk nen, tunah chuan thubuai a nei ta lo a nih hmel. Jail atang khan Assylum-ah an sawn phawt a, a ât vang khan. Mahse, an enkawl dam ta nge, tihian pasalte hial a nei ta a. An rubo ve em ni ang? Drose pawh chu engvangin nge an ruk ang? Arini bik tak hi chu rukbo ni ta se, a pa hi ex minister a nih bakah sawrkarah thiltithei pawl a la ni reng a, chhan tha tak a la awm thei mahna. Drose erawh a nu leh pate chu sawrkarah nihna engmah nei lo, chhungkaw pangngai ve mai an ni si..engvanga bo ve ve nge an nih tak ang le?! 

Amanda leh Sama pawh an rilru a buai hmel kher mai. Case tam tak chinfel loh lah a awm hnér hnúr bawk si. A luhaithlak viau ngei ang le. 

"Aw le, Report hi Sama lo ziak la. Engpawhnise, theihtawp kan lo chhuah ang a. Tin, nangni lamin eng emaw rinhlelhawm deuh chu min rawn hrilh vat zel u la aw. Kan inpuitawn zel dawn nia.." Amanda chuan a ti dap dap a. Diteii leh Ruatfela pawh chu a rualin an chhuak ta a. Amanda chuan thlir zui pahin, "Hel pawl thiltih a ni lo vang. Rin dan erawh ka nei thiam rih lo" a ti sar sar a. Sama erawh a lo hawi á leh hú thung. A ni lah taka eng emaw thleng se, an department-ah chuan hel pawl thiltih emaw ti tawk pawl an kat nuk nghal zel a. A vehin an veh bawk nen.. Chuvang ni maw, "Sam, kamtam loh a tha. Hei chu kan pahniha chinfel tur ni rawh se aw" a ti zawi sap a. Sama pawh a bu nghut mai. 

Cabin no. 7-a mu mek Lawmsanga chu a rawn meng diar diar a, A hmuh hmasak ber chu a nupui duhtak Nguri a ni. A lo nuih sen sen a. Lawmsanga pawh a khi ve suk. 

"Naktukah chuan kan chhuah theih tur thu doctor khan a sawi asin" Nguri chuan a lo ti zangkhai vah a. 

"A va tha ve. In lam ka ngai tawh reng a ni" a lo ti sup a. Nguri phone a ri ral ral a,Mapuia a lo nia. 

"Aw..bawiha" a ti nghal sar sar a. Mapuia chuan, "Ka pa chu eng nge a an?" a rawn ti a. 

"Aw hei a tha, naktukah kan chhuak thei dawn e" A nu chuan phur takin a lo ti a. Mapuia chuan a chil a lem khawlh. Harsa tih hmel angreng deuhin, "Nu, sawi ka hreh viau naa, sawi loh theih a ni si lo va. Ih, Sasai a rai a" a rawn ti zawi sup a. Nguri nui hmel a reh duak. Thinrim hmel erawh a pu hran lo. 

"Chungte chu phone-a sawi chi a nih loh chu, naktuk zanah i pate nen kan sawi ho dawn nia. I nau kha lo enkawl tha la aw..i pi khan chaw a ei tha maw?" a ti ta zung zung a. Mapuia chu a thaw huai huai ngei ang le. 

Phone an dah hnuah, Nguri chuan, "Mapuia chuan fa a nei dawn ta nge nge e" a ti ta a. Lawmsanga a lo rum nghut. "A puk lawk lo zawnga tih a that nen aw. Vanropuia mai mai chu" a ti ram hmak a. 

"Khatin thinrim suh. An tan a harsa ve pawh a ni thei. Engpawhnise, naktuk zanah U muanpuia te bakah patea te ho nen sawiho a ngai dawn a nih hmel" a ti siam siam a. Ani chu a inthunun thei hle tih a lang. Nurse a rawn luh vangin an ngawi ta a. Nurse chhuah hnu lawkah An fanu neihchhun Nauteii a rawn lut ve leh hlawl mai. Nguri chuan phawk zetin,"Eng nge a awmzia? Inbang chiah tihna em ni?" a lo ti var a. 

"Bang chiah lo e. Ih, Remremi te inah ka leng lawk a. Ka rawn peng kawi. Apa ka ngai tawh sia" a ti zung zung a. A pa pawn a fanu hmel a han hmu chu a thep suai suai ni maiin a lang. A lo nui sáng a. Nauteii chuan a va kuah thawk a, "Nu, inchhuak har tawh si" tiin a nu zawk chu a be daih a. Nguri chuan a tuka an chhuah tur thu a sawi nghal zat. 

An college chanchin leh a thiante chungchang a sawi leh fe hnuah a lo tlai lam ta bawk a, haw turin a ding ve ta nge nge a. Nguri chuan kawngka pawn thleng a va thlah a. Heta an awm rei deuh tawh avang hian cabinah eirawng an inbawl mai tawh a. Chaw inpek kha a buaithlakna chen a awm ve vang a ni pakhat. Nauteii chu damdawiin thlangah dingin taxi a lo chang a. A u bike a chian loh vangin vawiin chu a u-in a scooty a hmansak daih si. Taxi lah chu a ruak a rawn tlan duh malék a. A hawi a hawi hnuah a piah maiah rawn dingin,"I hmang duh em ni?" a driver lukhum hmathlawk khum chuan a rawn ti a. A hmel chu a hmuh chian hleihtheih loh. Nauteii chuan buk nghat pahin kawngkhar a hawng nghal a. A back seat-ah a thu lut a. An tlan zui nghal. 

"Petrol thun lawk ang aw. I hmanhmawh em?" driver chuan a rawn ti a. Dar 5 a ri thuak tawh a, favang a ni chho tan a, khua pawh a thim hma deuh tawh nen, a tlai ve riau tawh a. Mahse, petrol lak chhung chu a rei vak nang ti rilru chungin, "Hmanhmawh lo ve" a ti ve mai a. Petrol pump-ah chuan an kawi lut nghal. Motor a din ve nual vangin petrol an lak zawh meuh chuan khua a thim chhulh tawh. A nu nen an inbe zuai a, a rawn ngaihtuah lehpek a nih dawn kha. An in lam panin an tlan mek a, Driver chuan, "Mei ka zu dawn asin. Ka zu chak lutuk a. Min hrethiam rawh aw" polite takin a rawn ti a. Glass down pahin, "Aw le" a ti sap a. Driver chuan a tan nghal. Meikhu chu a rawn zàm phei chiai chiai a, Nauteii chuan hîp chin a lo nei nge , ner ru sak chungin tukverhah chuan a dak a. Mahse, an in peng thlen hma chuan a zawi hnawk mai a. A hnung nghenchhan chu ngheng bet thlawpin, driver chu a melh ta ngawt ngawt a. An in peng an tlan pelh chuan a theihtawpa insangmarin, "Ding rawh" a ti tiau a. A aw pawh a phui lek lek mai. A rawn hawi a, a khi suk ringawt. A bag a dap a, a phone phawrh tumin a han dap rak rak a. Mahse, a phone pawh chu a lek kang zo lo a ni mai e, a meng hnual rawih a. A mut chu chhuah namen lovin a rawn chhuak ta a. A chunga thil thleng chu a tha lo tih hre reng chungin a muthilhsan ta bawrh bawrh a...Driver chuan a phone phawrhin, "Hmangaihzuali chu ka kutah a awm tawh e" a ti zawi sup a. Lehlam tawng erawh hriat phak a ni lo. 

Zoram khawvela thil thleng langsar leh sawi nasat ber chu Hmeichhe pathum bo chungchang a ni. Police te lam lu a hai mep mep hle. Engtia chet lak chi nge tih hre tur pawn chhui zui ngaihna a vàng hle mai si. Hmeichhe tam tak an ralti a, an fimkhur phah hle. Zoram, ram ralmuang pawh a him ta lo. He thil thleng hi engvanga thleng tak ni ang maw?! 

Villa pakhat reh raih mai chhungah chuan zawi tetein mi pahnih an titi a. Tu dang ni loin Valtea leh Zohlupuii te an ni. An ni unau hian thil pawimawh tak an khel dun mek a ni. Zoliansanga erawh khuaah mamawh lamin a haw lawk a. 

"Thunun a harsa sáwt khawp mai. Nizanah pawh an rawn ko leh nge ni, tukverh atanga zuanthlak a tum kha ka va nang hram a" Zoi chuan a ti sep sep a. 

Valtea chu a lo rum nghut. 

"Doctor hmu tura hruai chu i ti ta lo em ni!" tiin a u chu a melh a. 

"Tum lo, miin maksak ena an en ka phal lo. Sawrkar hian a hriat phei chuan an la ngei ang" a lo ti hmak a. 

"Damdawi kan chah belh a ngai dawn anih chu..Zoa hian engtin nge a ngaih?" Valtea chuan a ti hawk a. 

"Kei aiin a nem zawk, a fanu a nih angin a duh anga chet mai hi a phalsak deuh ringawt. Ramhnuaia a chet vel hi chu a enliam deuh tawp mai a ni" Zoi chuan beidawn hmel lek lek hian a ti a. 

Chutih lai tak chuan Zochhingpuii room atang chuan rum thawm a rawn chhuak a. An pahnih chuan an tho rual thawt. Room kawngka chu Zoi chuan a hawng a, khumah chuan a fanu duhtak chu chauh hmel em emin a lo mu a. A dáng lep a, a hmui leh a bul vel chu a ro var pap bawk. Hmana Zochhingpuii, tleirawl duhawm leh hmel tha tak kha a hmelah hmuh tur a awm tawh lo. Valtea chuan lainat zetin a va pan a,a chala dawmin,"Ka naute, i va lainatawm tak em.." A ti sup a. Zochhingpuii chu a rawn meng diar diar a, a putea a hmuh chuan a khi sak a. "Te, eng nge i lo tih? Khaw nge Dory" a ti sap a. 

"Dory chu shillongah a chhuk rih, ka ngai lutuk che a. Ka rawn hmu che a nih hi.." Valtea chuan a lo ti ve vat a. 

"Kei pawn ka ngai che. Nu, khaw nge ka pa" Zochhingpuii chuan a ti leh a. (Zochhingpuii hi Zoi tiin kan sawi zel tawh ang. A nu Zohlupuii hi Hlupuii tiin) 

"Mamawh lamin a chhuak lawk a. I ril a tam em? Naute" Hlupuii chuan a lo ti dam diai a. 

"Ar bawp ka ei chak" a lo ti hak a. 

"I putea nen kan va talh ang e. I duh ang tawka tam i ei dawn nia. Muhil leh rawh" tiin a fanu chalah chuan a fawp zauh a. Valtea nen chuan an chhuahsan leh ta a. Valtea chuan ar va manin a talh nghal sawk sawk a, a tunu tan chuan engpawh hi phur takin a ti thin rèng a ni. Hlupuii erawh chuan arsa sawngbawlna tur a lo siam mek thung a. Kawtah motor a rawn inhung dawt a. Hlupuii a tlan chhuak nghal var. A pasal Zoliansanga hmuak turin a inpeih leh thlap mai. Zoa pawh bungraw thenkhat nen a rawn inpawm bawr lûk a, Hlupuii chuan a va pui vat. Zoa'n Valtea a hmuh chuan,"A va tihzia em..i lo awm hlauh chu. Thil pawimawh tak sawi tur ka nei" a ti nghal vat a. Valtea a lo bu nghut ringawt. An han insingsak fel hnu chuan thingpui an han in te te a, hahdam taka thu chungin Zoa chuan,"Ka thu hriat hi a dik a nih ngai chuan ka fanu hi khawiah emaw kan thuhruk a tha ang" a ti zawi sup a. Hlupuii'n a lo melh háw ringawt. Valtea erawh chuan,"Engtin?" A lo ti a. 

"Jona nen kan inhmu zuai a, Sawrkar atanga thu thenkhat putru a hriatte min hrilh zingah, 'Sawrkar chuan Zochhingpuii zawn hmuha Hel ho te laka invenhim nana hman a tum' tih thu a sawi tlat a ni. Chu chu thu tak a nih ngai chuan, kan fanu dinhmun a derthawng tihna a nia" tiin a nupui a melh a. Hlupuii a meng thim raih mai. Thinurna nei hmel a pu bawk. 

"Ka fanu chu inhumhim nan maw an tum maw?! Hehe..an thei ngut ang e maw le..a nu ka la dam ve alawm" a ti ta nghat mai reng a. Valtea leh Zoa an inmelh zawk ringawt. Ni e, Zohlupuii hian a la dam ve tek tek chhung chuan a fanu hi tu kutah mah hlan a tum loh hmel. 

"Mahse, sawrkar hi chhunglamah a insawhnghet ru viau tawh a nia. Hel ho camp pakhat pawh an zawng hmu tawh. Minister leh a chekkawite lahin guard atan mi bumro leh rawva tak tak an ruai ru fur bawk. He lai ramhnuai pawh hi a him reng ang em ka hre lo" Zoa chuan titak zetin a ti a. 

Hlupuii chuan,"Khawpuiah phei chuan kan him lo lehzual ang" a lo ti chat a. 

"Engpawhnise, hahdam phawt teh u, keini khawpuiah kan awm tawh dawn a, chanchin kan inhrilh zel thei dawn alawm" Valtea chuan an nupa melh chung chuan a lo ti a. An ngawi tlang ta rih. An thusawi zawng zawng a ruka lo ngaithlatu an fanu chuan a ma hriat tham lekin, "Sawrkar chu thawhpui ila, ka riltamna leh tuihalna pawh a tlahniam mahna" a ti sap a. 

Hetih mek lai hian ramhnuaia camp pakhatah sawrkar thuruk putru chu an lo sawi ho ve nak nak a.

Tlangval lian thelh thawlh, Sek phiar fat mai, Tluanga chuan,"Zochhingpuii an thawhpui tak tak dawn anih chuan keini pawh kan fimkhur lehzual chu a ngai khawp ang le. Ramsa hlauhawm tak a ni si a" a ti nghut nghut a. 

A thianpa Nuna chuan,"Chutin awlsam takin a thawhpui lo vang. A nu Zohlupuii hi a tawhkhirh riau a nia, bakah a pa lah journalist tha elkhen kha a ni thin a, chutin an pal ngawt lo vang" a lo ti a. An buk pawnah an rawn tawng nak nak a, Khawpuia mamawh lama kal Dina te ho an rawn lang a. 

"Hmeichhe pathum an bo! Kan kutthlakah an ngai leh ringawt ang chu! Sawrkar pawh hian min daikhalh a tum ve riau" Dina chuan a ti nghal vut vut a. An lo meng káwk hlawm. 

Tluanga chu a tho thurh a. 

"Sawrkar kutthlak a ni kher ang em tihah ka buai tan riau! Keimahni ho hming hawh si hian tu ten emaw kawhmawh an bawl ve em mawni aw ka ti" a ti ta a. An ngawi deuh thap..

Rina chuan,"Tluanga sawi ang kha a ni thei maithei. Kar hmasaa inrawkna thleng pawh kan kut a ni miah lo. Sum kha an la nual a, keimahni angah a nih kha an puh leh fai vek. Hei hi ennawn chu a ngai dawn a ni" a ti ve ta nghut nghut a. An rilru a buai hmel angreng khawp mai. 

An cook Pu Ramtea a rawn lut a. "Naktukah kan hotupa a rawn kal dawn sia, chawhmeh hi a pangngai deuh kan lo hlui ve loh chuan" tiin Tluanga a melh a. 

"Ni dawn tak. Engpawhnise, Pu Ramte, tha i tih ang khan kal rawh. Report ka ziah a ngai sia, kei chu ka va inkhung lawk ang e" tih leh chhuah a rual nghal a. Rina chuan a thian dangte bulah zawi sup hian, "Hotupa hi a takah hmu tawh in awm em?" A ti a. An lu an thing nur nur hlawm mai. 

"Kei pawn ka la hmu hauh lo mai. A nupui nen an rawn ni dawn a, tha taka kan lo dawnsawn a tha ang. Engkim hi a thluak atanga chhuak vek an ni miau a" a ti leh zung zung a. 

An camp-ah hian mi 20-30 hi an awm deuh reng a. Amaherawhchu, an awmna hmun ngaiah rei tak an awm ngai lo. Veh an nih reng avangin a changa han inthen hran chang pawh an nei. Tin, anmahni in lama haw diak leh boruak a daih hun nghah te, an target zir chianna hunte an nei thin. A tam zawk hi chu an chhungte ngei ngei pawn an nihna dik tak an hre lo, hriatpuitu nei chu pahnih khat lek an ni. Hetia han ena han hmuh mai pawn hel pawla tel ve an ni tih rin harsa tak tak vek an ni a. Thenkhat hausa ve pangngai an awm a, Thingtlang lam mi rethei bakberh ve tak pawh an awm. Chanvo an insem vek a, an duty chu anmahni tawkah an hlen tha thei viau mai. Hmeichhia an awm lo va, pawi an ti lo zawk. A chhangchhiatthlak ve bawk a. Lut duh hi zoram thalai an awm reng naa, an zir chiana an background thlenga an chhuisak phawt loh chuan tumah an lalut ngai lo. An duh ber leh tum ber chu, 'Zoramah diknain ro rel se; mipui ten an chanvo dik tak hmu se " tih hi a ni. Chumi atana bei an nih avangin a hawklak leh a saháwk zawngin chet an la ngai lo. Phur leh kut zat vanga an pawl zawm duh te chu an hnawl hmak hmak zel a, an tam lo naa an vai hian rilru nghet tak pu an nih bakah, an background chhui chuan sawrkar atanga lungawi lohna nei leh an dikna chanvo nei phak lo an ni deuh vek mai. An zinga a tam zawk hi lehkhathiam, fing tak tak an ni a. Lehkhathiam lem lo te pawh anmahni tawkah tangkaina nei vek an ni. An lo indin dan tak hi hria an tam lo thung. Rina sawi ang khan an hotupa din leh engkim a remruatnaa kal an ni. An hotupa hian sawrkar a haw viau emaw Mizoram a hmangaih viau emaw a ni maithei. 

"Kim, titau tawh lo teh..khaw maw .. Lo hnai teh" Zirsanga aw chu a ring hauh lo naa, a ngenngawlzia a lang thei. Kimi chu a tum bár a, a meng ling hlar bawk. 

"Kha nu nen khan ka hmu dun leh che u a nih chuan, Kimi nasatzia ka hmuhtir ang che. I hria em?" Tiin a pasal chu a melh rám rám a. Zirsanga a lo nui hawk hawk. 

Kimi bana va chelhin, "Duhawmnu, kei ai mahin i thikthu hi a chhe tawh a nih hi..hawh lem..ka kuah chak che nia" tiin a lamah a pawt hnai a, lo tang deuh mah se; a tang na vak lo. A kuah ta hlu hlu a. Kimi biangah chuk zauhin,"Hmelthanu, fa neih hi i ngaihtuah tawh em?" A ti sup a. 

"I duh tawh em ni?" Kimi chuan a lo ti háw a. 

"A paitu tur i nia, i thu thu aw" A lo ti nghut a. 

"Ka hrethiam lo. Ka pa pawn min zawt tawh. Kei chuan pawi tihna ka nei lo" Kimi chuan a ti a. 

"Nih chuan, Zanina tangin kan bei ang. A tha em?" Tiin Zirsanga chuan an nu chu a melh a, A pasal chu hmeltha tih hmel zeta melh chhoin, "Aw le,aw lalber" a ti hap a. An infawp vawng vawng. A dik a dik chuan he mite nupa tluka induh leh inngai hi an tam kher lo vang. Unau an ni ngei naa, nu hrang an nih avangin tlangrel pawh dawn zo tawh loin leh pa ber thutlukna pawh zah zo loin nupaah an insiam ta kha a nia. A tirah khan sawi an hlawh nasa viau a, veng chhung titi an tling a nih kha. Mahse, an nupaa an hmachhawn zel avangin chutiang thu lengva avang chuan an nghing ngai lo. Kimi pa remruatnain in hrang an chang ve a. Aizawl veng lar lo takah khawsa dunin Zirsanga'n sumdawnna bul a tan a. Kimi pawn an veng thenawm college-ah Lecturer hna hmu vein nitin an chhuak dun a ni. An khawsak a harsa lem lo khawp mai. Fa pawh nei se an buai lo ang. 

Isabella leh Remruata inkai dun rial chu ral khat atangin enlenna tha tawk tak hmanga enthlak mek an ni. An ni erawh chuan enthlak an ni tih an hre lo tawp ang. Isabell nalh lehpekzia chu aw, a nau pai thla 3 mi lek chuan a dul a la tipuar tham lo naa, kawrfual a khup khuh tawk chiah, satin eng dal lam hain, simple taka thui a ni thung. A sam chu a thlah hnûp a, a bag khai chu a pasal Remruata chuan chhuhsakin a khaisak a. Inngeih zetin an zanriah ei dunna tur ZO CHOKA lam an pan mek a. 

Remruata phone a ri ral ral, a'n en chuan a khi sak. "Bena a nih hi" tih pahin a la nghal a. "Aw ben" a ti nghut a. 

"Madam Amanda hnungzui tura thlan zingah i tel tih i hre tawh em?" Bena'n a rawn tih chuan Remruata chu a ding chawt. Isabella chuan a pasal mitmeng danglam zawk chu maktih hmel deuhin a lo melh ve hà a. 

"Engtikah nge notice an chhuah a?" Remruata chuan a ti sup a. A aw chu a nelawm loh lek lek. 

"Darkar khat liam taah khan. Tichuan, Lunglei chu i pemsan dawn ta a nih mai chu, thianpa, i ngaihawm dawn" a rawn ti duah a. 

"Lawk! Ben, chawlh ka la ve chauh sia. An va hmanhmawh ve mawle" awmze nei vak lo hian Remruata chuan a ti a. 

"I lawm zawk lo em ni? Amanda hnungzuite chu kei hian ka chak asin. Hel lo camp in phindarh dawn chu a nia. Duhsakna ka hlan a che" Bena chuan a la ti zui!

Remruata a ner sawk. "Hel ho hian ka pawi an sawi ve hleinem" zawi sup hian a ti a. 

"Fimkhur rawh. sawrkar uisathiam i nih kha.." Nui hak hak chungin Bena chuan a rawn ti a. An dah ta a. Isabella chu chanchin a hrilh ve nghal a. A lo chek hlak. 

"Ka nute an lawm ngawt ang, an bulah kan awm thei tawh ang a. Kei pawn ka duh zawk e" a lo ti thliam a. A bianga piai zauh pahin,"Mifelnu" a ti sup a. An zanriah eina tur chu an thlen tak avangin ngawi rengin an lut ta a. Zo choka neitupa nupui Dingpuii chu smart taka inthuam leh nui sàngin Manager thutnaah chuan a lo thu váng a. Remruata te nupa chu nui chunga lo dawngsawngin an dawhkan lam pana an kal lai chu a thlir zui vang vang a. A hmeichhia zawk chu a hmuh hnu ang a ti a ni maithei. An restaurant hian hniam lam aiin san lam a pan zel a. Lecturer hna bansanin tihian a pasal remtihna thlapin dawr a luahlum a. Rosangpuia erawh a hotel ho enkawlin a buai hle thung. An nupa nun a la hlim a, an inneih hlima buaina chhete an tawh bak kha chu eng buaina mahin a la tlak buak leh ta lo. Dingpuii chuan ama chhungte lam ngaihtuah kaiin, A u Lawma leh Rami te pawh an la innei tluang zel a, Par kebali te lam chuan engmah an rawn sawiin an rawn dîkdák tawh lem lo. A nu hriselna pawh a tha zel e. Nu Madini leh Pa Zuia te pawh an bulah la khawsa ve zel e, Roger pawh an kiangah a la awm ve zel e. Rogera a ngaihtuah apiang hian a awm a nuam lo ve ziah. A chhan sawi tur a hre chiah si lo va. 

"Ka pi, dawhkan kan rawn hauh lawk lo naa, a awl a awm thei mai em le?" A ngaihtuahna atangin chu chu pa tawng ri chuan a rawn kai harh a. Nui sáng chungin,"A pawi ka ti hle mai. Book vek tawh an nia" a ti sap a. A hmaa ding mipa pahnihte chu an palian dun viau, pakhat chuan sunglass a bun tût a! A rawn betu erawh a mitmeng chu a thip lam lek lek a ni. Dingpuii thusawi avang chuan a lunghnur hmel deuh a, inthunun leh vatin,"A pawi lo ve. Kan lawm e" tiin a thianpa chu a buk khum zauh a. An chhuak zui nghal. 

Remruata chuan kaikuang chu khehin a nupui thlengah chuan a va dahsak a, Bella raino hian lui lam sa ngawt a ei chak si a, chakai erawh naute chilthli a tam duh tih thu hlaah a insum hram hram a. Niminah pawh Remruata nuin chengkawl thahnem fe a rawn lei hawng a, zanriah an ei khamah Bella chuan a kher zo vek! Chutiang khawpa a ráwp avang chuan Remruata chuan a khawngaih viau, tih vak dan erawh a hre lo. A ei chàk zawng leisak mai loh chu. 

"Naktuk tuk lehah Amanda bulah joining report ka pek a ngai dawn a. Karlehah Lunglei lama pheia kan bungrua pack fela he lama kan phei leh a ngai dawn a ni. Muanchan chi vak a nih loh hmel.." A ti sur sur a. Bella chuan hrethiam takin,"Kan thei ang. Chuan, in hna tur chu eng nge? Hmeichhe pathum bo chungchang hi a ni em lo vang chu tiraw ?" Ngaihtuah hmel deuh hian a ti sap a. 

A lo thaw hawk ringawt. A pasal mitmeng leh hmel hmai lan danah a lo sawi kher kher chu a inchhir deuh. Ni e, tun hnaiah hmeichhe pathum chu mak takin an bo tawp mai a nih kha. Heng mi bo te hi chhungkhat an nih loh piah lamah hriat pawh inhre ngai miah lo an ni. Pakhat erawh kha chu a hre ve, Arini an tih kha chu..ni e, tualthah thubuai avanga jail tang tawh kha a ni miau a! A dang pahnih kha chu an hming pawh a hriat vawi khatna a ni. Chung mi bo te chu tupawn Hel ho thiltih a nih an ring a, Hel ho umzui tura a pasal a che chhuak tur chu Bella chuan a ngaihtuah deuh a ni maithei. Mahse, an zanriah ei chhung zawng hna chungchang an sawi tawh lo. An puar dun kher mai. Bella pawn a dul a zût a zût mai. Bill an pek fel hnuah dawr chu an chhuahsan ta a. An chhuahsan hma deuh khan dawr neitupa Rosangpuia tia mi ten an hriat lar chu a rawn lut a, a nupui chala a fawp zauh chu Bella chuan hmuh nuam a lo ti hle. A pasal ang chiah pa tha leh nupui duat thiam a nih ngei a ring. 

Remruata chu garage-ah a motor la chhuak turin a phei a, a awlsam zawk avangin Bella chuan Dawr bathlarah a lo nghak a. Khua chu a lum tawh lo bawk a, a vawt a ti lek lek mai, a inkuangkuah fel thán a. Hmalam a melh ran bawk. Lut chhuak an awm mang lo va, pawn lamah erawh lirthei an inpel suau suau thung. Dawr chhungah khan an khat tha viau bawk. Motor inpel a thlir mek laiin, "He lamah" a beng bula rawn ti suptu lam chu a hawi vat a. Mitmeng hriam leh thip fahran a hmachhawn nghal. A chiái hmain a suit chhung atanga silai kaw hmawr rawn lawr chu a zuk hmu ta a, chu pa chu a nui sáng a, "A hautak lo zawngin aw..ka pi" a ti thum leh chhak a. Bella chuan Remruata motor lo tlanna tur lam a va hawi a, a rawn lang mai si lo,. Chu pa chuan rawn hnaih chilhin a dul si rátin silai chuan a rawn tin a. "I hma zawnah khan" tih leh nghutin a nawr nghal a. Bella chuan au chhuah chi a ni ang em tih a ngaihtuah a, mahse, a hma zawn a va en rual chuan a rilru a thlak nghal. Scorpio bulah mipa pahnih amah nawr mektu tiat awm vel hi an ding a, an rawn melh chat. An hmel nunrawn hmel zetah chuan pawisak an nei lo tih a hriat ngawih ngawih si. A'n muangchang lui ngial naa, "I pasal car karchehin kan mite an ding. Buaina siam i tum chuan i pasal thluak a darh nghal ang" a beng bulah a rawn tih leh meuh chuan a khawng lo chauh. A chil a lem khawlh a. Hmalam panin a pen phei ta páwk páwk a. Scorpio kawngka chu lo hawnsakin an nawrlut ta a. A tlan zui nghal. A ka chu an rawn hnawhphui ta hmiah bawk. Isabella a ni miau a, a chiái tehchiam lo. Amah hruaitute pawn mak an ti deuh niin a lang. Hmalam melhin a thu ngawi ran a. A pasal chiah a ngaihtuah. A ngaihtuahna hria niawm takin a bula thu chuan,"I pasal chu a him e. A rawn chhanchhuak ngei ang che. Amanda hnung zuiin" a lo ti thum bul bul a. A chhing sawk. 

Remruata chu a mangang tawh takzet a ni. Dawrah va lut lehin Dingi leh a pasalte chu a va bia a. A ngaihna an lo hre si lo. Dawr bul hnaia awmte a han zawt kual leh a, dawr opposite-a counter nghaktu nuthlawi háng lam deuh chuan, "I nupui ni ngei tur chu Mi pakhat nen Scorpio dum-ah an lut dun. Chu bak ka hre lo" a ti ta a. Remruata training chhuak tawh chuan thil awmzia a hai ta lo. In lam pan loin Police station lam a pan ta zawk a. A hlauhthawn ang chiaha thil thleng chu mak a ti! Amah hi an duh zawk tur a ni lo em ni? Engvangin nge a nupui naupai lai chu an lak ang?! 

Lawmsanga mangang lutuk chu a vei nghut nghut a. Ni 3 a liam ta. A fanu neihchhun chu khaw nge a kal tak ang? Khawiah tehlul nge a awm ang? Nguri meuh pawh a biak tlak mang loh. An chhungkaw hlimna chu hmuh theih khawpin a kiam a ni. Mapuia tak pawn a farnu chu a ngaihtuah takzet a, tunah te hian a thi nge a dam tih hriat a ni si lo. Engvangin nge rukbo a nih ang? Tun thlengin amah rubotu ten an la rawn be bawk si lo. Eng nge an lakah an duh ang le?! 

Lawmsanga phone a ri ral ral a. Rang takin a la nghal. Sangpuia a lo nia! 

"Aw, Sangpui, thu thar hriat i nei tawh em?" Beisei tih hriat ngawih ngawih hian a ti a. 

 

"Nauteii hi keimah vanga rukbo niin ka hre ta. " Sangpuia aw zawi raih leh fiah em em a hriat rual chuan a ding mar nghal awt. 

"Eng a?! Engtin?" A ti tuar a. Thinrim awrawl erawh a ni lo. 

"Nauteii hi Hel ho rukbo a ni lo. A chhan chu keimah hi member ka ni miau a. Ka bialnu chu engvangin nge kan ruk ang?" A rawn ti ta mai a! Lawmsanga mitmeng lian zet chu a len belh sauh mai. Nguri pawn a rawn ngaihven vat. 

"Ka hrethiam lo" a ti khur dat a. 

"Tunah hian kan pawl pawh kan buai mek a ni. Heng hmeichhe pathum rubo tute hi tu te nge tih kan chhui dawn a. Kan hotupa a rawn thleng dawn a. Engpawhnise, lo mangang lo phawt ula, ka thuruk erawh min lo zepsak dawn nia. Ka hmangaih i fanu hi damin ka hmu leh ang tih ka tiam a che" a rawn ti nghet ta charh charh a. Lawmsanga erawh chuan sawi tur reng reng a hre lo. 

Diteii pawh bathlarah dingin thaw a la káwk a. A mittui chu muangchanga hruin, "Ka fanu, khawiah nge maw i awm le?" A ti sap a. Drose avangin zan thum lai chu thinthiin a muhil ta lo. A pasal pawh a rawn thang mek a, naktukah chuan a rawn thleng thei tawh ang chu..

"Nu," A fapa upa zawk Mapuia aw a hriat rual chuan a insiam rem vat a. Lehhawiin a nui lui sak a. "Chanchinthar i hria em?" A ti nghal a. 

Mapuia chuan a nu chu inthlahrung taka melhin a chil a lem khawlh a. 

"Nu, min ngaidam miah suh" a ti phawt a. Diteii mitmeng danglam zawk chu melh pawh melh ngam lovin, "Englo a nia. Ka u hi keimah vanga rukbo a niin ka hria" a ti ta a. 

Diteii chu a ding mar zawt. "ENg a?' A ti tuar a. 

" Aw a dik alawm. Kei hi hel pawl member ka ni ve a ni. Nu, ka farnu hi kan hmelma ten keimah min nawrchhuah nan an rubo a nih ka ring" a ti ta hlawl a. A sawi tur a sawi hreh em em a sawi a ni bawk a. A thaw huai mai. Diteii chu a ding khur der der mai. A fapa mitah tak melhin,"Rammuansang, Sawifiah rawh" a ti thawt a. 

Mapuia chuan a kut humruhin, "Nu, min ngaidam suh ka tih kha. Mahse, Drose hi dam takin ka rawn hruai hawng leh ang. Ka tiam a che. Tunah rih chuan engmah min zawt rih suh..khawngaihin" a ti a. Diteii erawh chuan a fapa chu a lo melh ngawih ngawih ringawt. 

An camp-ah chuan an kim ta thap mai. An vaiin 32 an ni. Mipa thah an ni a. An ngawi thap a,puanzar chu a rawn inkeu a. Tluanga chuan fiak thakin, "Kan lo lawm a che." A ti a. Rawn lut thar chu a palen em vangin palian ve tawk tak Tluanga pawh a chîk rût ni hian a hriat a. An vai mai chuan an hotupa, a tir atanga engkim ngaihtuah, sum leh pai pawh an mamawh zawng zawng petu leh remruatna hrang hrang kalpuitu ,a fawng vuantu chu an melh thap a. Tu nge a nih an hre ngai lo! Ni e, tumah khan chiang takin an hre ngai lo reng a ni. 

"Ka lawm e. Ephraime ka ni e. Zothanpuia hi ka mizo hming a ni bawk. " mipa aw tih hriat ngawih ngawih hian a hmaa thu te hriatah chuan a ti thum ta chhak a...a reh tlawk tlawk mai.. 

Note : Ka sawi ve duh chu story hi chi hrang hrang in chhiar thin a. Story kal lai ka neih lai chuan ,ni khat lek chawlh pawh hrehawm ka ti thin. Mahse, story kal lai ka neih loh hi chuan ka chawlh ve pawn min hrethiam ve thin ula, min rawn nawr sek sek hian ka mangang thin. Story writer dangte chungchang ka hre lo naa, ka buai ve thin êm a. Min hrethiam a, mahse, thenkhat hi chu titau niawm taka group leave hmak angte in awm a. Mi hmaizah chi ka ni a. Nuam ka ti lo thn. Nangni aia ngaigpawimawh hi ka nei ngai lo asin 😊