Vanneihsangi last

VANNEIHSANGI (LAST)

Ziaktu: Toni Râlte

(A tawpna a ni bawk a. Comment drop theuh ang aw)

Zoram khawvelah Vanneihsangi chanchin chu a lar tak em vang leh Malsawmkima chet dan diktak finfiah chhoh zel a nih tak avangte, Police department-a Pu RInsiama uite te ho leh amah Rinsiama chet dik lohna bakah Social worker te thleng khan an nihna dik tak puanzar a han ni chho ta mai a. Education minister pawh a kangkai ta zel a. Mi thiam leh dikna duh, journalist huaisen deuhte chu Vanneihsangi case vangin chawh thawh an ni chho ta bawk nen. A nuam rualin Nenei lar tel ve zel chu ka lainat tho. An khawngaih leh lainat vang mahnise, a thlalak te a darh ve tho si a, a kalna lam apiangah enzui a hlawh tawh dawn tlat! Hei tak hian a nunkhua a tinuam lo thei. Doctor ngenna angin a natna chu langchhuakin dam lohnain tlak buak tawh lo mah se; Chemotherapy a khai ta tho a. Mami'n a lo buaipui a, ka farnu hi ka farnu a ni na vang vanga fakawm tak a ni. Nenei pawn a ngainain a zahthiam ve hle. Judy te leh U Seni te an tangkaiin engkimah an tawiawm zel bawk a. A tirah kha chuan zep thu a cheng lo, thudik hriat hma a ni bawk a. Khatia Judy ten an in hnuai an han luahtir te kha an veng YMA te khan an han hmumawh thut thut hman kha a nia. MAhse, Judy pa Pu Sangvela kha pa luhlul leh tumtlang tak, rilru tha deuh mai a ni a. "Ka in a ni a, thu ka nei tlat" a ti hmiah mai si. An nëk ngam ta chiah lo a niawm e. Mahse, tihian Nenei tualthahna phëna thurúk inthup chu puanzar a han ni ta a, a confidential hleithei ta ngang lo a niang e. Rohluzuala erawh chuan pawi a lo ti hranpa hauh lo va. Mipuite authawm leh an pressure a nat em vangin Judges te lu pawh a hai fu ta ve ang le. DIkna hian ro rel ve hram tawh teh se. Nenei pawh chemo a khai zeuh zeuh bak inah a tawm deuh reng a, in lamah eitur a la siam reng bawk. A sum lakluh tam lo mah se, a ac-ami khawih chet loh kha a tha a ni mai. 

A tawi zawngin ka'n sawi tawh mai ang e. Nenei te court leh hun chuan kei pawh ka zuk kal ve leh a. Ka putea pawn min tawiawm leh tawh bawk. A fel ve thlawt mai. Kan tang bawk a, Nenei lamtang an tam bawk nen. Malsawmkima te lam chu an zum dák tawh. Eng dang a ni lo, Nenei chungah chauh loh pawh rorelna dik lo a lo thleng fo tawh thin a. Sawi chhuak ngam awm ta lo chu an lo inup a. Nenei vangin khang rahbeha lo tawh thinte khan a finfiahna nen lam chu chhungkaw inzawmkhawm dik lohna chu an rawn puangzar ve hmiah hmiah tawh si a. Zoram mipui tam zawk kan thle dual lo thei si lo. Nenei tan kawl a eng ve tan dawn ta e. "A dikna rahbehsak a nih avanga beidawng leh pawisak nei tawh lo, Vanneihsangi chuan amah a inchhanhim theih nan Malsawmkima nunna a la ta a ni" tih chu court thutlukna a ni ta e. IPC Sec 307-ah a case chu a tla thla ta a. Bail theih loh tura ngaih kan bail thei a, jail chhungah a hun a hman a ngai dawn ta lo. Aw khawvel hi...a va mawiin a va duhawm leh si em..thinlung na leh ruma amah vanga ka awm lai khan a tan leh a pual liau liauin thu ka phuah ve a. Ka'n pholang ve reng reng ang e aw. (Hei hi Laltanpuia'n Nenei puala a ziah tak tak a ni e . TR)

"Kârah doral a hrâng emni?

Buaina bubit chu hnehin a awm tawh em?

Kan kar hmangaihna chhermei chu a mit phah dawn emni?

Bawihte, in rûnah ṭapin i tâp a,

Chhûm pui zîngin hun mangang ten an tâwksir che a,

Nghilh rual loh, i ngaih-a hmangaihna hian a hnem zo che em?

Hun sûl ang a liam dawn alawm,

Hlimni kan chaih thleng chu lo tuar hram rawh aw,

A lét thawk hmangaihnaa rulh ka tiam che."

Dr. James-a, Pu Rinsiama leh ASI kha hremna pek an ni dawn ta bawk. A chhan chu report an ziahsak duh loh bakah , Pu Rinsiama chuan a fapa hum nan Nenei a vau miau a. Dr. Jamesa erawh chuan report dik lo a siam a, Amanda ngeiin Thiam takin a lo inpuantir diam tawh a lo nia! Social worker erawh a him ta hram e. Malsawmkima chu mitthi ni tawh mah se, Court chuan Vanneihsangi a pawngsual avang leh thah a tum avangin thiam loh a chantir a ni. 

Vanneihsangi chu a zalen ta tihna chu ni lo mah se; amah tawiawma support tute azarah jailah a hun a hmang dawn ta lo. Hei tak hi kan vanneihna em em chu a ni.Bakah dik tak chuan trial kha an nei har lo va,hei tak hi chu Pu Rinsiama te milen zar kan zo a ni mah zawk. An fapa thattu thiam loh chantir an tum luatah kan tan vanneihna kawng an hawng a ni ber zawk. Tihian court vawitam a hmachhawn leh hnuah heng thil thleng hi chu kan la theihnghilh ve thei mahna le.. A hun hma leh kan beisei aia hmaa court-in thutlukna a siam chhan hi Amanda leh Rohluzuala te nawrna leh thahnemngaihna a ni a. Kan lawm takzet a ni. Amanda pawn a hming a chher belh leh zual a, a duhthusam ang takin Dr. Jamesa hmaiah pawh a beng thei ta. Amah leh Rohluzuala kan va hmuh niah chuan,"Tunah chuan daltu in nei ta lo. Innei vat r'u, buaina intawh leh hma hian" a ti sap a. Ka rilru dik tak a ni. 

"Kan damchhungin kan tana in thiltih hi kan theihnghilh tawh ngai lo vang" ka ti a. Nenei pawh a nui sàng mai. A biang a tai têk a, Criminal ni mah se, ka tan chuan innocent a ni kumkhua tho ang. 

Ka haw chhoh chuan ka chhungte nen kan han meeting ta a. Kei chuan neih ka duh thu ka sawi ta a. Putea leh ka nu ka lamah an tang bawk. Dik tak chuan Nenei a lar luatah ka hmingte pawh lamrik a ni lo thei bik lo va, mi tam zawk chuan kan inlaichinna an hre vek tawh a ni. Bakah a hre lo pawh ka zah tit tet peih lo. A nih tur ang nih vat vat ka chak tawh a ni. Mahse, a case kal chhung kha a rei lo kan han ti naa, kum tawp a hnai leh ta kuar sia, ka pa chuan kum thar law lawa insawirem a duh thu a sawi charh charh a. Ka pu erawh chuan mak deuhin,"Eng nge kan la tawn zel dawn hriat a ni lo va. Amah Nenei a inhuam te chuan December thla tirah hian kan ti thei reng alawm. Buangpuia te pawn hrethiam se, chutia ropui taka lawm hup hup kher a ngaiin ka hre lo. Ka ngaihnep vang ni loin, kha zawng zoram titi a siam tawh a, ngaihven a hlawh angreng si a, holam leh zahawm taka insuih mai hi ka duh dan a ni" a ti ta a. A tira iaitu ber a hmanhmawh ta hle chuan min tilawm ru viau mai. Ni e, Nenei pawn ropui deuha lawm kha a duh lo sa reng reng a. Kei tak pawn tul ka ti hran lo. Kan Kohhran dana inneiha inhruai mai kha a tawk reng mai. Nenei chu ka be leh a, ani pawn ka laka a inthlahrun luatah hnialna a nei lem lo. Mahse, hlauhthawnna riau a la nei a. "Kan la court leh fo dawn nia, Inkhaw mi ten min endan a danglam ang em? " tih a ni. Mi mitmei a veng thin lutuk hi buaina a ni ve tho mai. Ka lo hnial thla hmiah bawk si. A tang ngam ta lo va. Judy pa Pu Sangvela chu pa anga a neih tak avangin kan palaite chu an zuk leng ta a. An lo fel khawp mai. Judy te chhungkua hi hausa tia sawi theih ni hauh lo mah se, an phak ang tawka Pathian tih leh an in pawh misual ber te tan pawha len luh ngamna a ni ve a. Judy u tlangval hi Evangelist a ni bawk. Tichuan, kan insawirem ta a, i ti mai teh ang. Ka piancham Ni 9, pawltlak thlaah Vanneihsangi nen chuan kan innei dawn ta. Harsatna kan tawh hnem tawhzia hretute chuan min lawmpui lo thei lo. Ka thiante pawh phur tak an ni. Zirdula fanu pawh a lian ve leh tawh a, Lukira leh Bteii erawh Bteii college kal chhung an la innghak dawn niawm tak a ni. An rinawm dun ve ngat ngat khawp mai. Thawk khat lai khan Kimi hian min rawn be thin a, a rawn vui ve niah niah zel a. Kan Zirdula'n zu in a lo ching deuh em mawni, Zira chu ka be vat a. Ani a thawhpuite hian an lo show thin sia, a hnar phal bik si lo a lo nia. Lukira nen kan han zilh ve luam hnuah chuan ani pawh a zia chho ve leh mai. Bakah fate an han neih takah chuan kum inrual theuh theuh pawh rilru a inpuitlin hleih ta deuh. 

Putea te nupa hian ka nuih an tihzat rualin ka hnuk an tiulh lek lek fo bawk. An fanu Nenei thuamchhawm tur tlem azawng chu tumsak ve an duh si, Kan thuruk kha kan lo puang lo zo tawh si a, mi dang hriata sawilan rem si lo chu kan inah hian an rawn lut zut reng mai a. Nenei pazawn tur pawh Putea'n a thiantha ber, a kawipa Pa Tlana a thlansak thlap a ni. Pa Tlana te nupa erawh engkim a hrilh thung. Keini chhungkua pawh kan inbuatsaih ve sauh sauh a. Ka room hi duh aia a zim deuh vangin in hnuai kan siam ta a. Thianthate an fel bawk a, sum seng em em loin min pui liam liam a. Kan khaw mistiri tha ber lah Sanga pa a lo ni bawk a, a thlawn ngawt aiah tiin tlem a zawng a la duh chauh a. Beisei aia hmain ka room tur pawh chu kan peihfel a. Nenei nen chuan kan thawl nuam tawk viau ang. 

"U Tri, ka rilru a buai" a rawn ti a. 

"Ngati" ka ti vat.

"U Seni hian APuia te unau hi dil taktein min dil a. School an kal peih chhung min enkawltir mai rawh. I pasal chhungte lakah pawh i zangkhai phah ang a a ti thin a. Apuia te lahin an ngaina ve bawk si, an school luhna hi tha ka tiin han sawn kual leh te kha an tan pawh a ninawm dawn em a..chung vel chu ka rilru a buai" a ti mial mial a. 

"Hei chu ka hrethiam bik hauh lo. Mahse, i theiin ka ring lo. Tin, i naute avanga i inthlahrunna kha paihbo tawh rawh. Kan pawm em em ka tih kha.." ka ti a. 

"Ka hria alawm..mahse, anmahni hi duh ka thlantir dawn mawni ka tia. DIk tak chuan ka hmangaih a, an hmalam hun ka thlirpui hian ka bulah ai chuan U seni bula an awm hian an hmabak a eng zawkin ka hria. Nang ka rin loh vang che ni loin..i hriat kha" inthlahrun hmel lek lek hian a ti a. 

"ka nu nen inbe r'u, he lam chu ka hrethiam lo..Nene" ka ti a. Ka nu nen an inbiak zanah kan chhungkua chuan kan han sawi ho leh phawt a. Ka chhungte lam chuan huphurhna an nei lo, Amaherawhchu, amah Nenei enkawl seilen an ni a, an chunga thuneihna chu Nenei kuta dah mai tha kan ti ta a. Kan sawihona pawh Nenei chu ka hrilh tho a. A hnu ni 2-na velah,"Anmahni ka bia a, U Seni bula awma a chang changa ka bula rawn haw an duh a. Schoolah an thiante an ngai ve bawk si, bakah U Tri, hei hi an hmalam hun atan pawh a tha ka ti zawk tlat a ni. " a ti ta a. Pawmpui mai loh chu tihtheih a awm lo. Ni e, lehlamah he lamah kan awm hmel si a, School tha zawka luhtir kha chu tha ka ti reng mai. 

Inneih ni pawh a hnai chho ve zel a. Kei pawh tiang tel lo chuan ka kal su ve bup bup thei tawh a. Zingah exer lain ka tei kual tam a, ka ngeih viau mai. Zawhte hmai erawh ka ei zawm ta lo. Ka damna kawng min sialsaktu Muanpuii chu han biak that peih loh chang nei mah ila, ka be chhe ngam tak tak lo. Ka tan a hlu ve em a ni. Ani pawh nupui ka nei dawn tih hriain a rawn phur ve viau mai. Ni 7-ah Nenei leh amah zuitu thenrualte chu an rawn thleng chho ta a. Judy chu thiana hman a duh hle naa,Kan kohhran danah kohhran mi leh sa lo chu thianah a hman theih si loh. Ka cousin Hriati a hmang dawn ta ringawt. Kei erawh chuan Mama ka hmang dawn thung. A pazawn Pa Tlana te nen kan in hi a inhnaih viau a, ka va kal zut mai. Ka thiante pawh an rawn thleng chho ve a, A nuam tan hle. Nenei vanneihna em em chu Mo kawr kha an venga Judy best friend puanthui thiamin a thlawnin simple takin a thuisak a. Thuamchhawm lah chu a pawisa khawih chet tam ngai lo zawngin a pa ka putea leh nuteii ten eng emaw zat an leisak a. Tin, U Seni a tang hle bawk. Khuta an awmna hmuna a thenawm hnai ten thil manto em em ni lo, mahse, hlu em em si an lo pe ve liam liam bawk. Thuamchhawm vak kha tul kan ti lo bawk nen, a ngah em em hran lo. Khu lama an bungrua erawh tihral theih chi a tiral a, a bak chu U Seni kutah a dah. A naute tana a dahsak pawisa pawh keini lamin pe vek tura kan tih angin U Seni kutah a dah bawk. Chhungkhatah kan insiam tawn ta bawk a, Pu Sangvela te nupa leh ka nu leh pate pawh an inkawm thei khawp mai. 

Dar a ri val val a. Ka khi suk mai. Ka tana dar vuak ri ngei chu a ni si a. Zira leh Lukira pawh an rawn nalh takzet. Kan pathum chuan ka roomah chuan kan ding kual pap a. Zira chuan nui sáng chungin,"Lulian, a tawpah chuan i hneh ta. Nenei i lo hmangaihzia hi ka lo hrethiam ngai lo va, ka ngaisang khawp mai che..a tawp thlengin Laltanpuia i ni e" a ti sup sup a. 

Lukira paw'n, "Vanneihsangi hian i lakah bat a ngah ve khawp mai. Mahse, a rul let thei vek ang che. Pasal tha tak ni ang che" a lo ti nghet ve charh a. Kan thianhoa hringnun kan lo hmachhawn tawhte ka han ngaihtuah chho a, ka tan an hlutzia leh buaina ka ngah bikzia te, min thlauhthla lo va a tawp thlenga min pui te, ka ruala an kal ve zel te, aaa..engkimah ka lawm a ni tawp mai. Hetiang taka thiantha min petu Pathian chungah ka lawm takzet a ni. 

Biak in kawtah chuan a lo kal loh kan hlauh em em, a hranpa ngata ka sawm bik Nu Ramteii, Amanda leh Sama te bakah Rohluzuala te pawh nalh taka incheiin an lo ding thap mai a. Engkim chu a thar a, a mawi vek mai. Catholic te kan inneih dan hi la hre ve lo te in awm maithei a. Ni e, danglamna hlek hlek a awm ve a. Inneihna hi kan ngai urhsun em em a, Dan khatna , Dan hnihna tih vel a awm ve lem lo va. Catholic dan a ni tawp mai. Mahse, Inneihna chu a nghet thung. Kan insún te a nih tawp loh chuan nupui pasal dang neih leh hi thil theih loh tawp chu a ni hran lo naa, a harsa khawp mai. Nenei nen ding dunin Father-in Bible min chhirtir ve ve a. Pasal mawhphurhna ka chhiar a, Nenei'n Nupui mawhphurhna a chhiar thung. Sacrament buatsaihna hun a awm leh a. Tin, Innei tharte tana 'Hlanna' hun a awm leh a. Lo kal khawm ten an neih leh an phal ang ang, eitur, chawhmeh atanga thei thlengin an lo keng khawm thin. Inneih hunserh hun chhung pawh hi a rei thawkhat viau. Inneih thutiam erawh Kohhran dang nen a inang tlangpui. Chutiang chuan ka nupui Vanneihsangi kutah inneih zungbun ka buntir ta vá mai. A kawr chu a taksa remthlap niin a vul chúk lo va, a mawlmangin a thianghlim hle thung. Veil erawh nula thianghlim a nih tawh loh avangin a khim lo thung. Inneih thutiam kan chham lai chuan a mittui a tla..min melh vawng vawng chu kei pawn ka lo melh let ve a. Hmeltha hi ka va ti hluah hluah tak ëm..

A behbawm chu a han zo thawkhat a. Inneih inkhawm chhimtu pawh an thahnem ve hle. Ka pu khan ropui taka lawm kha a tum lo viau kha a nia. Mahse, a tupa hmuh hmasak ber hi zawng ka dan a dang ve a ni mahna le. Bawng pakhat leh vawk pakhat talhin, Ar eng emaw zat a talh bawk. Pa Tlana ten an fanu thar Nneei chu vawk an talhsak ve bawk. Chutiang chuan tlai leh puar takin ka nupui neih ni chuan kan hlim viau e. Zanah kan roomah chuan thian ten mutna min han siam sak a. 

Kan inbual hmasa phawt a. Kimi leisak underware dum suit, sexy ru zet chu a han inbel a. Khua a vawt tawh viau naa, kan room hi a úp reuh a, boruak a nuam tawk viau tho mai. Zira nupui neih nia kan ruih ang khan kan rui ve lo va, an ni pahnih erawh chu an men danah ka va hre thei. Kei erawh Nneei ngenna avangin ka hnar thei hram. Khumah chuan kan inngheng chial a. 

"E taka! " tih leh thawh a rual thut a. Ka lo hawihai deuh,. A bag pakhat hi a va zen rak rak a. Gift bawm lsei it et hi a rawn phawrh nalh a. Nui sen sen chungin, "Happy Birthday..U Tri" a ti zawi sap a. Ka birthday aiin ka nupui neih ni ka lo hrechiang zawk a lo ni. Ka thiante pawn an lo hre chang tawh lo. Lawm zetin a gift chu ka laksak a, a chalah fawp zauhin,"Ka lawm e..duatte" ka ti a. 

Ka hawng a, ka rin loh deuhin Diary a lo nia! Ka ziah peih a ring chu a ni teh chëk aniang chu maw. 

"He tah hian kan inneih zan atangin kan pahnihin kan ziak tawh ang. He lai thleng hi i ziak ang a, kei in ta tang hian" tiin a kawk dan dan a. Ka lo um e ve tawp mai. Ka khawih chak tawh. In chung lam thawm pawh a reh tan tawh a. Ka kuah hnai a, ka fawp ta a. Kan insum rei ve tawh bawk a, ani pawh inneih zan a ni bawk a. Zah loh theih a ngai tih a hre ve a niang chu maw..kan che na dun viau e. A pawi lo. Pathian leh Kohhran hmaah kan intiam tawh tlat. 

Inneih sarhu lai leh a behbawm chu sawi ta vak lo mai ila. A naute leh a thenrualte an han haw rem a, ka thiante pawn min hawnsan a. Kan nupa nun bul chu kan tan chho ta e. Ka nu hi ka ní ti khan a ko laklawh sia, ka nu han tih thut kha a harsa a ti angreng viau. Ka pa te lam erawh a ko thei nghal vek a. Putea leh an nu leh ka nu bik hi a koh hian a lei a chhuah zuk zuk thin. Putea pawh hmuh a nuam surh surh viau, piteii hi a fakawm thlawt bawk. Nenei pawn a ngainain lawmthu a sawi bang lo. School kan chawl zui ta bawk a. Kan inawm heuh heuh ta reng mai. Lo lam hna thawh a ngai tawh bawk si lo. Ngai pawh nise ka ke vangin ka thawk ngai tawh meuh lo va. Min phút vak lo bawk nen. Vanneihsangi chu in chhung chet leh engkimah sawisel bo a ni chiang teh e. Ka nu reng hian nuam a ti em mai. Mami nen lah an inngeih si. Inkhawm nuam a ti a, zan lamah ka tawiawm tha peih vak si lo va, Ka nu nen an inzui hnak hnak thin. Pathian a bel chho leh lawmna thar a nei hi ka lawm veng veng. A natna hi a chhuak leh ta miah lo bawk. Vanneihsangi vanduai vanneihzia tawh hi..a hun takah chunglam chuan chet a rawn la ta a nih ka ring. Phuba lak kha a tha ka ti miah lo, Pathian chuan , "Phuba reng reng keima lak tur a ni" tiin min lo chah diam tawh a. Khatia a beidawngin pawi a khawih ta mai kha ka pawmsakin ka dem lo lam ni loin, Mihring rilru atang zawka ka thlir hian ka dem phal meuh lo a ni. 

Zan khat a muhil chu a rawn phu leh zawk zawk zel a. Mangchhia a mang a nih ringin ka kaitho a. Tui a in khawlh khawlh nghal a. 

"U Tri, Ka sawi duh lo va. Ih maw, zan tam tak chu Malsawma thisenin a bual khah vek hi ka mumangah ka hmu thin a. Dik tak chuan khatianga chet la lo khan kawng dang chu ka nei ngei awm si a. Ka inchhir thin" a ti ta sep sep a. 

Kuah pahin,"Ni ngawt mai. Mahse, ngaihtuahna fim kha i pu lo miau a. Pathian hnenah tihtakzetin ngaihdam dil la, a ngaidam em em ang che" ka ti ringawt a. Engvanga sawi nge ka nih ka inhre lo. Ka tet lai chuan tualthat te, uire te, pawngsualtu te hian vanram an kai theih ka ring lo. Ka lo thanglian ve zel a, khawvelah hian thleng lo tura ngaih thil thleng hi a tam ta em a. Mi nunna lak ngawtte chu hetia ngaih mai pawn rapthlak tak a ni. Vanram an chan ve hi a rinawm loh, kha thil ka ngaihtuahna kal zel kha ka lo la thlah hlen awzawng lo a lo nia. Nenei thlarau lam nunah chuan tihtheih em em nei si loin thahnem ka ngai thar ta thut mai a ni. Khawvel danah chuan leh ukil te remhriatna hmang chuan a case pawh a nepin mahni inchhanhim nana tualthat angin lang mah se, Nenei khan Malsawma thah kha a duhthlanna a ni miau si a. Chu tak chuan min tibuai ru ve thin khawp mai. Ka pa te pawh ka hrilh ta hial a. Nenei hian Pathian belin inkhawmte pawh nuam ti hle mah se, Pathian hian a ngaidam ang em tihah ka buai chho ta. 

Ka puin ka manganna a lo hriat chuan, Biak inah min hruaiin kei leh Nenei chuan sual puanna kan nei a. Father-in Pathian thu min hrilh chho lehin, Bible te pawh kan han zir nupa ve a. In chhungah ka nu leh pate nen kan inkawm zauh zauh bawk. Nenei pawn a pawh thúk ve tial tial niin ka hria a. Kei tak hi chuan piantharna thu hi ka hre hnehsawh viau, ka zawm lo mai mai zawk a ni. 

Zan khat chu a rawn tap chhuak ta a. Ka tho vat, hlauhlawp tih hriat zetin min kuah a, a khur zawih zawih mai. "Eng nge thleng?" tiin ka be mawlh mawlh a. 

"U Tri, ka sual em mai. Malsawma kha hremhmunah ka tir liam ringawt a. Pathian hmu hman lo va a nunna ka la kha ka indem ngawih ngawih. Ngaihdam tlak pawh ka ni lo a nih hi" a ti khur dat dat a. Ka awm nghengin a tap zawih zawih mai. Sawi vak tur ka hre si lo, kan thawm hriain ka pa te an rawn chhuk ta a. 

"Pa, ka duhthu ngeia ka thah a ni a. Engvangin nge hremna chu pumpelh ka tum tlat? Jail-a damchhung hun hmang tur ka ni asin" a ti a. Ka pain a luah kut nghatin a tawngtai a. A manganzia chu a hmelah pawh a lang thei. A thlarau nunah indona nasa tak a thleng niin ka hria. Ka pain a tawngtai zawh chuan, "Nene, ni e, a nihna takah chuan Malsawma kha i duhthuin i that a ni. Chumi avanga hremna hmu tur pawh i ni ngei mai. Mahse, Jail-a awma court thutlukna tihdanglam leh hi a tul ber lo a nia. I tan theihtawp an chhuah a. A thlawnah chantir suh. Tihian thinlung leh tih takzetin Pathian hnenah inhlan rawh" ka pa chuan a ti dap dap a. A ngawi reng thung. Mahse, ka pa te chhoh hnuah kan nupain kan thingthi a, tihtakzetin Pathian hnenah kan inhlan ta a. Khamizan atang khan ka záng ta a, ka nun chu a nuam leh thei ta. A mak ve ngawt mai. Hmangaihna tawp thei lo neitu hi Christiante Pathian a lo ni tlat a. 

Christmas pawh chu hlim takin kan hmang a. Kan nupain kan inzui ve det det zel a. Khaw mite pawh Nenei chuan a hre ve tawhin nelawm takin tupawh a bia a, a tira be tha vak ngam lote pawn an nel tawh hle. A tira iaitu ber ka pu hlei hlei chuan a ngaina. Chaw eiah min sawm reng zel a, an awmdun tawh chuan Pathian thu an sawi loh leh Nenei hian ka pu chu a nunhlui a sawitir a. Ngaithlatu an awm chuan pitar putarte hian an vanglai sawi hi nuam an lo ti khawp mai a. Chuvang a nia ka pu pawn a mo chu a duata a ngainat em em ni. 

Kum a lo thar a. January ni 20-ah Nenei chu a court leh dawn a. Tin, keini school pawn miss thar kan nei ve mek bawk. Kan miss Ruati kha Chhingchhip lamah pasal a nei ta daih sia, a thawh zawm thei ta si lo chu Serchhip atangin Miss Jenny a rawn thawk ta vang vang a. MA english a ni nghe nghe. Nula te lam, ngo vir ver tak, harhvang ve tak mai a ni a. A rawn tlangnel sa hle. A ngainatawm reuh bawk nen. Kan VCP te inah a innghat mai a. An lo inchhungkhat ve deuh bawk a lo nia. Bike ka khalh thei tawh a, ka te ber kha Scooty kan leisak ve bawk a. Jenny chuan min ngen angin ka school kal tur chuan ka sawm phei a, kan inphur nitin ta thin a. Nenei court tur chu putea'n a zuk tawiawm a. Zan pawh an zu riak lem lo. Tihian a kal a kal ang a, nakinah chuan a la zalen mahna. Helam case hi ka hre ve thiam vak lo bawk a. Jail a tang lo hi ka lawm em em tawp. 

February thla kan chuangkai a, Ni khat ka school bang haw chu a lo reh thiap mai a. Roomah ka lut thla a. Nenei pawh ka hmu chuang lo. Ka sawi hmaih pakhat chu kawmthlang huanah ka nu nen hian vawk an vulh ve a, a vaiin 12 an vulh ve a ni. Vawk chaw la hian an chhuak nitin tihtheih a ni. An phur dun mai sia. Kawmthlang huanah a awm aniang tiin in chungah ka chho leh a. A hnu lawkah ka nu nen an rawn inzui lut a. Helhhawlh nei tlat hian ka hria. Roomah chhukin ka inbual a, ka inbual zo chu khumah ka thawmhnaw hak tur a lo dah leh thlap a, tukverhah a lo dak bawk. 

"U Tri" a ti sap a. 

"Hmm" ka ti mai a.

Rawn lehhawiin, "Hei..en la" tiin pregnancy test kit a rawn lek ta va mai le! Hei vang hi ni maw a lo helhhawlh riaua ka hriat ni. Ka lawm lutuk chu ka hamhaih a, che chang loin ka ding reng hman. Ka harh chhuak thut a. Ka pawm kang a, khumah chuan ka lehpui ta a, kan va rak nasa tak. Ka nu chuan a lo hre tawh a. Pa ka ni ve dawn ta. Kan ina rawn lut apiang kha ka lo hrilhin ka hria. Ka thiante ka zuk hrilh vek bawk a. A va nuam dangdai tak em..

Class xii board exam a hun ta a, Serchhipah an zuk exam dawn a ni. An exam lai tak hian kan thawhpui te pahnih hian training an nei si, Kei leh Sir Rina leh miss jenny chu duty thei awmchhun kan ni mai. Ni hmasa ber chu keimah ka duty a, bike-in ka kal mai a, Jenny ten chaw eia min sawm ve tlat vangin ka hnial hreh si a. Ka khawtlai ta deuh. An fel khawp mai. Kan eikham chuan khua a thim thet thet tawh a, hawn tuma ka intintuah laiin Jenny chu a lo insiam ve a. Makti deuhin ka melh a. "Bungraw lak a ngai a, min phur chho la, zingah ka chhuk leh ang ka ti" a ti mai a. Mak ka ti leh em em hran lo. Tichuan, kan inphur haw leh ta váwk váwk a. Khua kan pel fel tihin Jenny chu a danglam tan ta riau a. Min kuah fet thiam phian mai. Min ngheng chial a, ka kawnga a dawm chu a tiche zauh zauh a, ka kap zawnah a kut chu a dah ta mai a. Rilruin a hre run nia! A tawng pah siam siam tho a. 

"In nu hi chuan a phu vak lo chein ka hria. A lar dante pawh kha ka lo hria a..kan lo intawng har deuh hi a pawi riau" a ti kual chuan mi dek deuh naa ka tawng na palh ang tih hlauin ka nui ringawt. A kut chu a foul tawlh tawlh a, a mak mang e. A chhiat loh reuh nen, kei ang pa tawh lehnghal chu min zuam zawk nge mawni dawn ni. Kawng laklawhah ka ding ta nge nge a. 

"Thu tha la.." ka ti hul hak a. 

A rum nghat, "Pa lo ve" a ti zui sap. Ka nui hawk ringawt. Nupui nei tawh ka ni miau alawm le. Bakah inah min thlahlel em ema min lo nghak rantu ka nupui hmel ka mitthla a, Jenny chu itawm reuh viau mah se, ka hnar thei chiang khawp mai. Rui lo hai lo ka ni bawk a. Ngawi rengin kan tlan ta a. Kan khaw luh dawnah, "Min hnartu awmchhun i la ni" a ti hak a.

"Chu! An va bawhbet nasa tawh awm che ve" ka ti ve ngat. A ngai haw duh der lo lehnghal. VCP te in kawtah ka thlah a. Ka tlan zui vang vang. Thaw chu a tisa ve phat thei a nih kha. Ka inbualna tur tui a lo lum sa thlap hmanga ka inbual lai chuan, Jenny lakah chuan fimlhur a ngai dawn tlata hriatna ka nei a. Nenei lah a thikthu a chhe ve bawk si. 

A rai no hi a la na riau lehnghal a. Naupang exam chhung phei chuan a mood a swing nasa mai a. Deal a har viau. Mahse, ka hmangaih em a, ka fa paitu a ni bawk nen, enliam theih ka tum ve deuh bawk a. A chang chuan a ang hlak hlak a, a changin a túm búr a, a eirawngbawlte hi titau niawm tak hian a ri sawk sawk zel a. Ka nute mitmei ka lo veng zawk thin. A chang lahin a tap belh em em a, eng emaw tawngkam vin deuh han hman zauh pawn a tap nghal pur zel. A thil ei duh a chhuak chho a, vir tak a ni. A chaw hehzia lah chu..ka ei let hnih dawnte zuk ei a! Mahse, chutia thil a ei theih atang chuan a ze inthlak vak vak kha a zia chho a. Ka nute lah an lo lawm em em zawk a. Khatia a han titau bur bur pawh kha an nuihliam mai zel. A la naupang ve bawk nen.

A naupai thla 5 a nihin buaina chhete kan tawk ta a. Jenny vangin. Chhete ka han ti taknaa, Vanneihsangi rilru erawh na tak a ni. Ni e, ka nu nen Aizawlah incheckup turin an kal a, ka pa lah kan kohhran pa ho work camp-na lamah a kal daih a, ka nau mipa kan te ber nen chiah in kan nghak a nih chu.. Ka nuin a hruai kher chhan pawh amah ka nu hian a thiannu fanu man a ei ve a, chu mi zuk hmanpui pah chuan an ti a ni. Vawk ka buaipui ngai bawk, eirawngbawl leh in chhung chet ngai bawk. Kan teber Nunpuia lah len cheh rual lek, luhlul rual a ni bawk si. Zan khat lek an riah pawn ka buai der mai. A zan hnihnaah Jenny hi a rawn leng hlawl mai a. Khami zan min beisei zan atang khan ka be tuitam ta vak lo nen, thawkho satliah ang kan ni ta deuh ringawt a. Chumi zan a lo kal chu a mit a sen rám mai a. 

"Ka pute nen kan inhau hrep a, zanin chu ka lo riak mai teh ang aw. Naktukah kan khuaah ka haw ang" tiin min ngen a. Chutiang na na na chu tiin ka lo remti ve mai a. Mikhual room ti ila Mami te awm loh hlana mikhual mut nana kan hman thinah chuan a riak a. Ka nau lah ka pute inah a riak daih si. Eng dang a ni lo, kan tv chhiat lai a nia, a inkhel en duh vang a ni. Chutia in chung leh in hnuaia kan mu chu, zan dar 11 velah Jenny chuan min rawn kai thoin a hlauh thu a sawi ta a. In chungah chuan ka han chho a, sitting roomah thutthleng seiah ka mu ta a. Ka muhil zui mai tihin Jenny chuan min rawn bawh ta mai a! Room atanga a lo chhuah ka hre miah lo. Ka phu chiang kher mai. 

"Khawngaihin, Tp, ka duh em che a ni. Ka hmuh phat che atang khan vawmbei ang thlawp ka ni. A chhan ka hre bik lo.." a ti ta mai a. Ka lung a phu dup dup mai. 

"A tha lo, nupui nei lai ka nih hi..nang pawh zirtirtu i ni a. Hetiang tur a ni lo. Va mu rawh" ka lo ti a. 

"Min duh lo em ni? I nupui ai hian eng nge ka that lohna ?" a ti a. 

"Ka nupui chauh ka hmangaih.." ka tih rual chuan "Khatiang pawngsual hnu tualthat lehnghal" a ti ta mai a. Ka kut ka lek hman uaih, mahse, hmeichhia a ni tih ka hrechhuak leh vat. 

."chhuak rawh. Min chhuahsan rawh. Khawngaihin" tiin kawngka ka hawng ta a. A chechang duh mai si lo va, ka pawt a, ka nam chhuak ta a. Mahse, ka rin a ang ta lo. A tap vak vak a, a au tuar tuar bawk. Zan a rei tawh a, a thawm chu a ring viau mai. Thenawmte an rawn dak nghal huang a. 

"Tpa hian kut min thlak..chu pawh a duh anga ka awm duh loh vangin" a ti ta mai a. Ka nuihte lam a za. Pa ho an rawn lang a, a tap uar si. Kei pawh chu thil awmzia min rawn zawt ve a, thudik tak ka lo hrilh hmiah. Mahse, Jenny chuan,"Daw suh. Min rawn ko a, ka chhungte an awm lo va, ka damsam meuh si lo va, min lo awmpui teh i tih vangin ka rawn kal a nih kha..chuan min sual i tum a. A khawih em chu min khawih hman lo kut erawh min thlak anih kha. Tenawmpa..nupui nei lai i nih kha" a ti ta phiar phiar anih chu! A va dawthei par par tak. 

"Chutiang a nihte chu Police lamah min va report mai teh. Ka chau ka mu dawn" tih leh in chhunga luh ka rual a. Thenawm hoin VCP inah an va hruai haw a niang. Muthilh leh mai erawh a harsa deuh. Eng em em kan nih ka rin loh nen, a tukah chuan khua kan khat ta der mai a. Min ring zawk leh min ringhlel an kat nuk mai. Ka puin min ko ta vat a. Thudik ka sawi a, ka hmelhmaiah dawt sawi ka ni miau si lo va, min ring ngam a niang. Engmah a sawi lo. Jenny zawk chu a lo insawi awk laklawh si, An khaw lama a nuten an rawn thinrimpui nasa ta mai a. FIR te pawh an sawi ri a. Mahse, Kan VCP ngeiin, "He nau hian dawt a sawi zawk a niang. Ka zilhhau vanga chhuak tau a nih kha. Ka zilhhauna chhan lah mipa laka a awm dan ka hriat ruk vang a nia. Intihmingchhe duh lo mai r'u" a ti ta hmiah a. Jenny chu a chanchin hre thui deuhte sawi hmangin a hmaa a thawhna khuaah pawh a lo hmingchhe fe tawh a, an ban tawp mai a niawm e. Chutah pawh chuan a in luahna pa ber chu min pawngsual tiin a report a, pawisa a chawitir niawm tak a ni. Mahse, a thakzia leh pawisak a neih lohzia hria an lo awm ve si. Chutiang vel chu. Kan VCP vangin kei erawh ka him ta a. Min report mah se, pawi ka ti vak lo, hlauhthawnna ka nei lem lo. Mahse, Ka Nenei'n a lo hriat ve takah chuan ani rai no rilru kal mak hun lai ni bawk si chuan, "Jenny chuan U Tria mitmei a hmu a ni mai alawm. Chutin hmeichhiain an zar hmasa ngawt lo vang" tih tanchhanin a lo tap a lo tap mai a niawm a. Ka nu mangangin min lo bia a, Aizawlah ka chhuk ve ta nghal a. Hmaichhana kan han inthlem takah chuan boruak a zia ta deuh a. A nui ve leh thei ta. A mittui a tlak hi ka phal reng reng hleinem. He ka buaina ho tak anga lang ka han thailan hram nachhan chu danin hmeichhia a humhalh tawh si a, hoteah pawngsual case hi kan awrh thut thei tlat! A bikin kum tling lo hmeichhia phei hi chu khawih loh mai hi a him mai e. Kan hmaah saruak leh inhawngsa pawn awmin, duhthlanna ngeiin lo mudun pawh ni ila, pawngsual anga kaltir a ni thei miau si a. Ka mipatpui te hian fimkhur nan hmang se ka duh ngawt mai. 

Thil a pangngai chho leh ta a. Jenny pawh a bang a, a aiah kan khaw mi, IGNOU-a MA zir mek chu kan la ta a. Kei pawn tibuaitu ka nei leh ta lo. Hun a kal ve zel a, Hualtu khaw mimir hrim hrim hian ,"Nupa inngeih leh inhmeh ber thlang dawn ila, Tpa leh Nenei te an ni ngei ang" an tih hial tur khawpin kan nupa nun chu a nuam a. Ka zir em vang emaw inlo ti ang e, a teuh lo. Ka pangchang zawk mah a, kei aia naupang zawk leh a derthawng zawk si hian min nawrkalin min dawmthiam em a ni. Khawi kipa inzui det det kan hreh lo va, over an tih tur hial khawpa inzui kan ni. Nupa kan ni miau a, hetia induat heuh heuh theih loh hun, faten min chimbuai hun kan la nei dawn tlat a, duh leh mi chuan over min lo ti mai mai teh se..

Nausen ngo sen chek mai, sam dum tha tak leh kir bep mai chu ka melh ngawih ngawih a. A bula chauh hmel zeta mu mek a nu chu melh lehin, "Ka hmangaih, ka lawm e aw. Fapa min hrinsak avangin" ka ti sup a. A chalah ka fawp zauh a. Chau chung chungin a rawn nui hram hram..kan naute, ka fapa chu khawlhring zawng zawngah a khawlhring chiang ber awm e. A nu pa ka putea hi Khawlhring pure a ni a, kei lah ka nu leh pate Khawlhring ve ve an ni bawk. A lu a len ve dawn bakah a luhlul teh ang chu..a pawi lo, Laltanpuia leh VAnneihsangi te fapa a ni tho..

A TAWP TA.