vanneihsangi 9

VANNEIHSANGI (9)

Ziaktu: Toni Râlte

Zira leh Tluangtea te pawn Nenei danglam thut chu mak an ti ve viau mai. Lukira chuan,"i ex tu emaw te hian an bia mawni le" a tih chuan, ka rilru a vak nghal ruai. Nenei nen kan ni tih hria an awmin ka hre bawk si lo. 

"Aa..kei aiin a hausa aniang. Michael kha..ni mai mai teh se" tia namnul ka tum a. Rilru chhungril erawh a na veng veng mai. Nu Saii a rawn chhuk a, Sawma chanchin kan lo zawt ve a. 

"Chhuah a ngen leh tlut tlut a, tlaiah kan va la chhuak ang. In lama inenkawl theih chi a nia. A zia tho, kan buai ve bawk nen, va awmpui tur tak tak pawh" a ti a. A dik reng mai. 

"A pute bulah khan awmtir leh daih ula, a zia daih zawk lo maw? Hetah chuan thian a ngah ve bawk sia, an lo rui ve leh thin sia" Zira chuan a ti a.

."Dik chiah. Han awm leh daih se ka duhzia hi a. Intihluih vak chi lah a ni bawk si lo" Nu Saii pawn a ti ve mai a.

"In thenawmte pawh nimin khan bungrua an rawn dah lut tawh a. Vawiin tlai atangin an rawn awm ang, lo va leng ve u la aw." A ti siam siam a. Nenei ka hriat chhuah leh phah. 

Chaw ei pawh a tui lo. Ka pu khan sakhi rep min hawntir a, Zira a lawm zual ngei mai. Bar hnih thum ka bar a, ka chaw ei chakna a bo vek mai. Ka tho nalh a, Lukira'n,"A chaw ei tui lo ang zawng chuan tuar hlek suh. Ei nghek nghek zawk tur" a lo ti a. Ka nui huk. EI luih a har ve rih tlat. Hetianga ka awm chu Mapuii'n pasal a neih khan a ni. Ka tuar zo tawh tihin Nenei vangin ka na leh dawn tihna chu a nia. Ka va tuar peih tawh lo tak..

"Va len tho i tum em?" zira'n a tih chuan, "Teuh lo" ka ti hmak. Kimi rimpuiah min sawm a, Nenei te in lehlam a ni sia, ka hnar ta mai. Zu ka in chák. Sawma ka be mai dawn mawni aw ka ti hial nghe nghe. Mahse, damdawin atanga lo chhuak ve chiah lo ruihpui leh kha a nu ten min huat ka hlau si. Ka awmdan chu nuam lo tak a ni. 

Lukira chuan, "E! saw an awm tawh nih saw..va lang ve zuai ila" tiin Nenei te in hlui lam chu a hawi a. 

Kan va dak ve a, an lo eng iar mai. Inthurual ang hrimin in thar lam chu kan va pan ta a. Kawngka chu a lo inhawng hiai a, kik khawmawi lem lo chuan,"In awm maw?" zira chuan a ti lut nghal a. 

Pakhat zawk chuan hmun a lo phiat mek a. Pakhat erawh ka hmu lo. "Ee! Lo leng r'u, hei chaw kan ei kham ve chiah. Lo thu r'u" a lo ti sawk sawk a. 

Kan thu ve nghal. Nenei te ai chuan bungrua an ngah lo deuh. Hmun phiat zawk chu a upa zawk kha niin ka hria. A phiah zawh chuan kan bulah a rawn thu ve a. A hmel hmuh a nuam khawp mai. 

"Tehlimi ka nia, In hming min hrilh ve u la, ka nau chu a inthlak lawk" a ti sar sar a. Kan thiampuipa Zira'n introduction a han pe leh zar zar a. Rooma inthlak pawh chu a rawn chhuak ve ta a. Kawrfual dum simple deuh a ha a, a inhmeh khawp mai. A nui sang bawk. Zosangpuii a ni a, Zosang tiin an ko thin.

Lunglei khua an ni a, Cousin an ni bawk. Zosangi chuan B.ed a zir mek a, Tehlimi erawh Bank-ah a thawk thung. Tehlimi chuan fa pakhat a nei tawh a, a thlawi ve a lo nia. A felin a nelawm khawp mai. Zosangi pawh a zakzum rih nge, a tawng tam lem lo tih loah chuan a fel viau tho mai. Tin, a chhe lo,a vun a nalhin a nui mawi khawp mai. Zan khatna te a ni bawk sia, thingpui háng kan in zawhah kan haw san ta rih a. Dar 8 a pel hlek. Zira te chu len tho an la tum, kimi te inah. Kei erawh ka inla ngeng ve deuh a, ka kal duh lo lui ve tlat! Phone khawihin ka mu mai mai. Ka mut a chhuak der si lo. Nenei bak ka ngaihtuah hleithei lo, Sanga ka ngaihtuah zauh zauh bawk. 

Zira'n a lo call a, "Aw" ka ti nghut. Dar 9 a pel tawh a.

"Lo phei lawk la, Nenei khawsik hi a sang riau mai.." A rawn ti ta a. Hlauhthawnnain min tuam nghal. 

"Michael a awm alawm..kei chuan tel vena ka nei tawh lo e" ka ti a. Ka dah nghal. Min nawrlui lo vang tih ka ring. Ka tawngkam chuan lo hnar mah ila; ka rilru erawh Nenei khawsik bulah a cheng lawi si! Ani hi natna eng emaw tak te hi a vei ang a, min then zawk em mawni dawn le tih thlengin ka ngaihtuah. Mahse, chutiang ni tur em chuan ka ring phal tak tak chuang lo. An rawn hawn lai pawn ka la meng kur mai .

"Rawn phei ve mai tur a nia. " Zira'n a ti nang nang a.

"Min mamawh hleinem" ka ti sup.

"Thil eng emaw tak vang a nia..mi dang a duh zawk vang niin ka hre lo" Lukira'n a ti a. Ka chhing sawk. Thil thleng a awm chuan, sawi rawh se. Zep kual kha a ngaihna ka hre lo. 

Mit thial urhin ka tho a. Sunday hi chu mut nilen ni a ni leh mai. Tukthuan ei kham atangin ka mu leh nghal. Mahse, rei ka mu lo. Kan khuaa ka thian, he lama awm vete Zoa leh Nicky te an rawn leng hlawl mai a. Zu an rawn keng. Ka va in awm chiang e aw. Zira hmel pawh a nung leh sârh mai. Chhun chhunah an zuk lak belh leh a, chhun tuk hi kei ka hrehawm thei lutuk a, ni a daih hun ka nghak hram hram zel. Nicky te chu chaw eiah kan sawm zui ve leh zat. Ka phone ka khawih mang lo va, kan titi char char mai. Nenei chiahin a hmuh theih turin status ka up ngei! A va naupangchhia tak!

Zu no leh a sehhmeh pic chu dahin , captionah, "Ni mai mai teh se" tih ka hmang. A rawn view ta chiah a. Min rawn text ka lo beisei ve ringawt. Mahse, a reh vang vang. A ho em mai. Ka natna leh thinrim rukna ka ruih hnan ta bawk nen, ka tawngkauchheh pawh a hraw tan hle. Lukira'n min kheuh zeuh zeuh. Mahse, ka ngaipawimawh duh lo. 

"Zu in kher a ngai lo asin" a rawn ti ta e. Nenei chuan. A insum thei ngang bik lo a niang, Zu a haw ve em bawk a.

"Ka thu thu" ka va ti hmak.

"Min haw viau a ni maw?" A rawn ti a.

"Huat lohna chhan tur che ka nei em ni?" ka ti leh ve salh.

"Thinrim zawk tur ka nia " a rawn ti a. Ka nui hawk.

"A ho! I duh leh thinrim ve mai rawh. Michael nen khan induat r'u" ka va ti a.

"Ka beisei loh dan ang zelin i awm a. I nu sawi ang ngei khan ka lakah rilru i lo pu takzet a nih dawn hi..ka lawm tho e" a rawn tih chuan, ka pháwk deuh. Zira leh Lukira ka entir ve a. Lukira chuan,"Ka rin ruk a ni reng a. I nu chuan eng thu tak sawi ang maw?"a ti sup a. Vanneihsangi chuan rilru a va tibuai tak em..

Ka va call ta nge nge a. Roomah ka lut daih. Mi dang chuan titi pahin eirawng an bawl. An innel ve leh nghal mai. Mipa hi chu no hnih khat inho tawh hi chuan, Bro a ni vek tawh mai zel reng a. 

"Sawi rawh. Ka nu chuan eng nge a sawi?" Ka ti nghal thâwr a.

"I nu i zawt thei ang chu" a ti tham chhal a.

"Sawi mai la" ka ti a. Ka awrawl pawn ngaihno a bei vak lo.

"Min khawngaih leh kan dinhmun a chhiat em vang chauha min kawp niin a sawi a. Tin, ka tobul avangin engtikahmah a mo ka nih theih loh tur thu a sawi bawk" a aw chu a ri chang chang a ni. Kei pawh ka harh kâwkin ka hria. Engtin nge chutiang chu a nih theih? Ka nu ber kherin maw?! Ka ngaihzawngah a inrawlh ngai lo. Nenei chu a lo iai takzet tihna a nih dawn hi.. 

Mahse, "Chutiang vang chuan mi dang i kawp nghal ta mai a maw?" Ka ti a .

"Michael hi ka bialpa a ni lo. Ka sawi tawh angin ka thian hlui a ni. A bak a awm lo. I nu khan i bula sawi lo turin min ngen a. Ka ngawi a nih kha..mahse, U Tri, zu i in kher a..min huatna ringawt chu ka tuar thei ang, mahse, zu vanga i nun a chhiat ka hlau. " a ti a. A awah chuan min ngaihtuahzia a lang chiang viau. 

"Engmah a chhan pawh hre loin ka awm a. Eng nge ka tih chuan ang a?" Ka ti a. Ka lung chu a awi hleithei chuang lo. A tirah khan a sawi thei reng sia. Kan intihrehawm tawn mai ami a ni. Ka nu sawi dan tak ka hre chak kher mai.

Ka ngaihtuahna hria niawm takin, "Kei ai chuan i chhung ten an hmangaih che alawm. I nu nen kan inbiakna chu ka lo thawn ang. Chhe deuha tawp hi ka duh bik lo , khati khawpa min lainata min buaipuitu i nia. Kei chuan huatna che ka nei lo. I nu khan thudik lo sawi pawh nise " a rawn ti a. A voice record a rawn thawn ta nghal a. Ear phone nen voice record chu ka ngaithla ta a.

"Bawiha hi a tet lai atanga mi dang khawngaih thei tak mai a nia. Indinhmun a hriat khan kan bulah pawh a rawn sawi ngei alawm. Tichuan, tikhan in innel chho a, inngaihzawnna khurah intla lut ta hial a. Anihna takah chuan a khawngaih vang che a ni. Hmangaih a nei tawh a, keini pawn kan hriatpui vek, mahse, eng emaw vangin an inrem thei ta lo va. Hmangaih dang a neih leh hi tuman kan ring lo. I chanchin leh i pianchhuah dante kan hria a, kan hmuhsit vang che ni miah loin Bawiha pu hi mi fir lutuk a nia, kan chhungkaw thlah kal zel tur hringtu atan chuan kan iai deuh che a ni. Chhungkaw khawsak tha kan ni hauh lo naa, kan levelpui ang tal, chhungkaw pangngai tak hi Bawiha pu hian a ti deuh tlat si a. Inla kal thui lo bawk a. Khawngaihin kalsan i lo tum dawn nia. He ka thusawi hi amah i hrilh chuan, a luhlulna vangin a chelh ang che. Chutianga a tih chuan a pu amah hmangaih em emtu nunna hialin a tawrh phah thei a ni. Hman ata tawh a pu duh loh leh lawm loh zawng hian tumah kan la khawsa ngai lo va, kan chhungkaw kalphung hi min lo hriatthiamsak hram dawn nia. Thian erawh inla ni thei zel a nia" tiin. Ka sa chhuak vek. Ka nu chuan engtin nge chutiang chuan a tihtheih? Mak ka va ti tehreng em..ama rilru puakchhuak a nih erawh ka ring lo. Ka nu a nih vang ni lovin, ka nu hi hetiang mi niin ka hre lo a ni. 

Nenei chu ka call leh ta a. "Ka nu khan a rilru a sawi lo. Ama rilru puak chhuak a ni lo" ka va ti táwng a. A nui hak ringawt. 

"Engpawhni se, UTri, a sawi kha a dik ve thei tho alawm. Ka pian chhuahna chungchang kha chu ka nihna a nia, ka tuar dam thei. Min khawngaih leh lainat vang ringawta min lo ngaizawng ve a nih chuan, chu chu na ka ti ber" a ti sap a. A rilru tur ka hrethiam ve tho. 

"Inhmu lawk ang" ka ti leh thut thut a. 

"Chaw kan ei dawn" a ti a.

"Zanah ka rawn kal ang. Chhuak ang aw" ka ti leh tawp.

"Ka hre lo. I ruih chuan ka duh lo" a ti a. 

"Ka in a. Ka rui lo" ka ti hram. Zira'n chaw ei turin min lo ko a. Ka dah ta rih. Chaw ka ei tam lem lo. Nicky te pawh chu an ri bual bual a, an ei mumal pawn ka hre lo e a. Ha ka nawt fai var a. Mahse, tlaia ka in kha a power a zo tan tawh si. Chaw ka ei puar vak lo bawk a. Zu chu no hnih ka in leh ta hram a. Dar 7 pelhah Nenei hmu tur chuan, ka phei ta a. Ka call bawk. "Ka la dam tha si lo va,Anu hian a phal lo vang, chhuah chu" a ti a. Engpawhnise, va hmuh phawt chu a ngai a ni. Ka normal chiah lo bawk a. Boruak chu ka ngam ve tho mai. Kawngka a lo inhawnsa vangin ka lut nghal a. Nu Sangi chuan ph a lo hmang mek a. Nenei chu a lo thu. A naute erawh chuan tv an en thung. A bulah chuan ka thu a, a khawsik vang nge a tla deuh kuama ka hriat chu. A mitmeng te pawh a dul raih mai. 

"Khaw maw i pang a sa em?" Tih pahin a chal chu ka va dek a. A lo dai diak mai 

."chaw i ei tha em?" Ka ti a.

"Umm, tlem chu ka ei" a ti sep a. 

"Damdawi lamte?" Tiin ka melh a. A bu nghat a, "Ka ei" a ti bung nghat a. 

"Titau mi?" Ka ti a.

"I rim khaa" a ti hlar a. A nu hriat ka hlau ve bawk si, a malah ka va sik a. A che zuk. A nuih avang chuan tlemin ka awm a nuam ta deuh. Nu Sangi pawh a ph hmang zo chu nui sáng chungin, "Nizan lam i va reh ve" a ti a. 

"Ka chau ve deuh a..bakah amah hi a dam tha si lo va" ka ti ringawt. Nu Sangi hian engkim a hriat ve chuan a zahawm ru viau mai. Ka nu tawngkam ngei a ni si. Nenei chuan thingpui háng a va lum a. Michael-a kha a rawn lut ve chiah. Min hmuh chuan a mitmeng a danglam zawk mai. Kei ai chuan a nau deuh ang a, mahse, kan intiat deuh reng. Tun lai thangtharte hi chu an thang duh bawk a. Ka ep chiah Nu Sangi bulah a thu a. 

"Mike, naktuk chu inzin dawn maw?" nenei chuan a lo ti var a.

"Aw. Ka peih lohzia hi, thawh hma a ngai dawn sia" a ti ve mai a. 

Thingpui chu a rawn keng phei a. Ka bulah a thu ve leh nghal. Keia rui lungpuam ve tawh si chuan intihtatu ka chak si, a kut chu ka va vawnsak a, a thingthla bik lo. Mike-a mit chu ka melh ran a, ka kutah chuan a fu chat mai. Mahse, Nenei chu ka bialnh a ni tlat. Ve tlat mai a! Hehe..

"Nene, i damdawi i ei em?" mike chuan a ti a. Inlak mark that tum vel lutuk.

"Aw ei e" a lo ti ve mai a. Kimi te in lamah ZIra te thawm ka hre nghal. An thawm an dim vak lo bawk a, "U Kimi te saw inleng hi a duhtui lo thei..an bengchheng thei ngawt lo maw? In inhnaih sia, a hrehawm ngawt ang" Mike chuan a ti leh khanglang a. Ka thiante tih a hre lo nge a hriat vanga sawi zawk? 

"Ka thiante an nih chu..an innel tawh a, thawm an dim vak lo vang " ka ti ngat a.

"He lam hi naupang nei an ni sia, an thawm a hriat vek si, a hrehawm ka ring" a ti ve leh nghat a. 

Nu Sangi chuan, "Hrehawm lah lo ve, anni te chu duh hun huna kan koh ngam a nia. Bakah an bengchheng vak ngai lo, zanin chu an hlim ve a niang" a lo ti vat a. Nenei kut ka hum nghet sauh. 

"Naktuk atangin internal test kha innei dawn tiraw?" A ti sap a. Ka bu nghut. ENgmah ka la zir lo. 

"Haw hma la, zir la..engmah i la zir awm si lo" a ti a.

."Ka ngai rih che alawm" ka ti hmiah. Mike leh nu Sangi pawn an hre pha ang. Mike ner sak chu ka hmu hman. Nuam ka ti tan hle. Nuam a ti vak ta lo nge a tho ta hluai a, "Naktukah ka zin dawn sia, ka haw hma mai ang..thil tha deuh ka lo hawn dawn che nia.." Tiin Nenei a en a. Nenei thawh tum chu ka pawt tlat! Over chu ka inti ve reng. Mahhse, ka ta chauh a ni. Nenei pawn min hnial ngam lo nge, thu chungin Mike chu a mang tha ta a. Tawngkam hawihhawm takin…

Nu Sangi'na a fate a mutpui ta dial a. Kan pahnih chiah kan awm takah chuan ka fawp nghal bawrh bawrh, min chhang let lem hlei lo va. A hnuah min nam sawnin,"Sawi fel ang" a ti ta a.

"Eng chu nge sawi fel la ngai a?! Ka nu chu keiman ka lo bia ang. Ka pal lui ngam , nangmah i inhuam chuan" ka ti a. 

"ENg ang taka hmeichhe tha leh fel nge ka nih tih hmuhtir theih ka chak khawp mai" a ti nghet charh a. A mitmenga tumruhna lo lang chu ka hmuh hmaih lo, ka duh zual sawt mai.

."chuan, kan inthen lo va, ka chhungte emaw thiante emaw ka atangin eng thu pawh hria la, min hrilh zel tawh ang che. Dawihzep takin min kalsan tum tawh suh ,a tha em?" Ka ti nghut a. Chiang taka min rawn melh kiau chungin,"Min nei ang em?" A ti ta a. A fiah kher mai.

Ka inhum ruh a, "Ka tan i rinawm chuan ka nei ang che. Mahse, min nghah a ngai" ka ti a. 

"I pu boral hma ngeiin aw" a tih chuan, ka va melh káwk a, cho zet hian min en a. A va hmeltha tak..

"Tehreng mai. Pathian zarah kuminah MA ka chhuak thei a nih chuan, hna ka zawng ve ang a, kawng chu a awm mai ang" ka ti a. Rilru erawh a buai ru deuh. 

"Naktuk zingah pawh tuna kan intiamna hi i hrereng tur a ni. Chuan, zu hi in tawh suh ka ti ngawt thei lo, innei kan la ni lo va. Mahse, zu rui chungin min rawn hmu tawh suh" a ti fiah kâk a. A zahawm duh angreng hle. Ka nu te hian a nungchang hi an hre lo mai mai a ni. Hrechiang se an ngainat ve tho ka ring.

"Ka in tawh lo vang..chuan, nang pawh Michael emaw mipa dang i kawm tawh tur a ni lo" ka ti ve a. 

"Nimin kha chu a awm remchang em a, min kalpui a inhuam bawk nen, ka va inhruaitir a nih kha.." A ti a. 

"Ka thikthu chhiatzia i la hre dawn chauh..ven deuh i ngai tlat tawh" ka tih chuan a nui a, ka bengah rawn pawtin, "Nang aiin ka thikthu a chhe zawk ang. Thenawm thar innei lehnghal.." A ti sap a. ENgtin nge maw a lo hriat hman ni.

Ka fawp leh ta chawt a, tun tum chu min chhang let ve ta. Lei leh lei a inhawl rak rak hi chuan mipa hi mipa kan nihzia a rawn lang rang thin teh e. Mahse, a nu te an la muhil in ka ring si lo. Bakah a khawsik te pawh a chau ve ang. Mipa dangte ang lo takin kei hian ngaihdan buluk angreng ka nei pek a. Hmeichhia ka hmangaih leh duh nia ka hriat, neih atan pawha ka iai loh te hi chu mutpui ngei ka duh thin. "Mipain sex hmanpui a tum che chuan, a hmangaih tak tak loh vang che" tiin hmeichhia an han fuih thin tak naa, a ni vek lo. Ka ngaihzawng satliah, ka vei zui lem lohte chu an lo sihhnip chuan ka mutpui hreh hran lo va, an duh loh pawn ka nawrlui chuang lo. Mahse, neih atan pawha ka duh, hei chu ka ta chauh ni rawh se ka tih hmeichhia chu a tak ramah pawh ka ta liau liaua siam duh mi ka ni a. Ka ngaih a that phah thin. Hmuhsit chu sawi loh, ka duhna a zual sauh zawk zel. Ni e, Pathian hian mihring hi min lo siam chikim em em a lo ni.

Zira'n ,"Lulian, hei zo chhang kan kan ei dawn, rawn phei ve r'u" a rawn ti dút dût a. 

."Phei ve ila" ka ti sup a. A tho ve mai. Kawngka kan khar a, Kimi te in leh an in inkar corridor-ah chuan bangah nem betin ka'n kiss leh hrep phawt a, eng uar lo se chu a tawp thlen pawh ka pawisa lo maithei ni. Mahse, a duh lehpek lo vang. "Em em a che, Lulian" a ti hlar a. Nui chungin kan inzui phei ta a.

Lukira leh Bteii chu an lo insi deuh chát a. Kimi erawh chuan thingpui a siam mek. Kan thu ve a. Bteii chuan,"U Tp, enteh, U Tluangtea hian bialnu a nei lo tak tak ami? U zira hian a zeppui tlat bawk sia" a lo ti leh phawng! Ka nui hawk a. Ka chhan hmain, "I mak thin phawng phawng ee..i duhawmna chu a ni bawk si" Lukira'n a lo ti zauh.

"Ih maw, a nei reng..bialnu" ka ti pek a! Lukira a mengrum ngang mai. Bteii chuan,"Kha..i dawthei sia maw..hmela, ka mu dawn" a ti nghat a, a tho ta mai. Lukira'n a pawt, "A tihder che a nih khaa..fiam hi nuam viau thin teh suh..a lutuk" a ti a. Bteii pawh a thu ve leh mai.

Kimi chuan,"Nunzira pawh hi ka nei lo a ti teivet a, Esi nen an la inbe reng" a ti hlak hlak a. An unau an inpawh zia ka hmuh chuan ka lo lawm ve tawp. Zira leh Esi te hi college atanga inzui tawh an nih vangin Kimi pawn a hre ve a ni. 

"Ninawm, Esi ti reng suh..Zantin ka rawn phei dawn mi?ani nen la inbia ila"Zira'n a lo ti hlak a. Tlaiah Esi nen an inbe reng sia! A ruih hian a be ve ziah..nia, mi thenkhat hian, " Ruih laia inbiak hi inzah lohna" an ti fö! A dikna chen a awm. Mahse, kan ruih ber lai pawha kan rilru luaha kan la biak hram hramte hi chuan kan thinlung an luah thûk hle a, kan ruih loh laia kan sawi ngam loh kha kai tawh hnua kan va puang chhuak zawk mai a ni..kei pawh ka ni tho. Mapuii khan pasal a neih hma khan ka be ve ziah zel..kan ni leh tawh chuang lem hlei lo va, mahse, kan ruih laia kan biakte hi kan zah loh leh hmuhsit vang a ni vek lo tih ka'n sawi hram a nih chu..

Thingpui chu kan in a. Kimi a tawng leh siam siam, Nenei pawh a kawm thiam leh khawp mai. 

"Nupa tur in ni aniang, in inang ..nupa hi chîk mah r'u, an hmel hi inanna riau an nei zel ania aw" a tih chuan, Nenei nen kan inmelh ringawt. 

"Kan inang ve em?" Zira chuan a lo ti zuk a. Kimi'n ,"Aih, Esi nen in inang" a lo tihsan. 

Nenei chuan , "U tluangtea leh Bteii pawh hi an inang tak tak mawle. AN sam a kir ve ve lehnghal" a lo ti a. An han lai vel ngeiah! 

Nizan lamah hlim lo leh thinrim búrin ka mu a. Zanin erawh ngaihtha leh phur sûrhin ka haw ve thei ta. Mahse, buaina kan nei. 

Nenei te in kan chhuahsan a, Kawngpui chhuah chhoh dawna kawng zau laiah kawng sirah chuan, Mike-a te thian ho niawm tak panga bawr vel hi an lo thu thap a. Kan chho thâm thám chu min lo thlir thap. An phun sur surin ka hria. Ngaipawimawh lem lo chuan kan chho tlang a. Mahse, Michael chuan,"Thingtlang tlangval ho lah hi aa. Khawpui nun zo lo hian an rui ve khanglang zel a" a ti phar phar a. Amah pawh chu a rui tih a tawngkam atang chuan a hai theih loh.

A thianpa chu a nui hak hak a, "Dik chiah, a rual hian an han kal dul dul ngei zel ah" a ti leh kher a. Amah Michael lo ngei sa deuh nen, insum a har ta hle. Zira pawh a meng rum viau tawh.

"Entir nan: khi lai ami te khi" Michael'n a tih leh kher chuan kan insum theihna a nek pawp ve ta a niang e. Intiam rual ang hrimin kan let dial a, an bulah tak chuan dingin, "Michael, insual ang" ka ti hmiah mai. A rawn ding a, kei aiin lian hlek mah se, ka hlau lo nasa lutuk. 

"I bialnu Nenei kha ka duh ve deuh emaw i lo ti mi? Khitiang hmeithai fa, thing lutuk khian min phu lo aw" a ti zo chiah chu a bek a ri no chawk. A hnung lamah a petek ta nawk nawk a. Nge maw le, ka kuttum hian a target a hlah ngai lo. Thingtlang tlangval hnek natzia hi a hre mawlh ang. A thiante an tho suau a, kan ri nghal bawrh bawrh mai. Ka thiante lah mahni tawka insual hrat leh tumah hlau bik lo an ni bawk nen, keini aiin pahnihin an tam a, mahse, kan zám eih lo. Nicky te kha la awm ve se a nuam teh ang chu aw..Michaela rawn inrin leh hma chuan, a bula thu khan mi rawn hnek ve a, ka pai ve deuh nawk. Mahse, ka inhum sek leh vat. Michaela ngar ngar chu a ni ka tum ni. Chu pa min lo bawh tum mek chu na zetin ka tlawh a, a petek nawk. Michaela rawn phei leh mek chu panin ka theihtawpa nain a khabe-ah ka dawm chho a, a dak awrh a, a hnunglamah a tlu ta a. A hmai chu a hup ngawt ngawt mai. A na ve thawkhat tur chu a ni. Ka thiante ka pui ve nghal a. Lukira hnar chu a lo thi a, Zira pawh a mitko a kak tawh. Ka vai buan buan a, zu power kha thisen lo lum tawh khan a ti chak leh zual bawk nen, nuam hem hem tak a ni. Mahse, kan intihbuaina piah lawka in atang chuan an rawn tlann chhuak a, min rawn thelh ta a ni. Patling pathum chuan min din hual thap a. Chet zui kan tum tawh lem lo. Thil awmzia min han zawt a, michaela te chu an insawi thiam nasa ngang mai. Keimahni tihbuai hmasak ang vekin an sawi. An tawng chak si. 

Patling pakhat bulah chuan, Lukira chuan, "Ka pu, an thusawi saw i awih emaw awih lo emaw kan buai lo. Thingtlang tlangval te hian khawpui tlangval te hi kan hlau bik lo tih chiah kan lo sawi ve ang e" a ti ta chat chat a. 

"Haw rawh u" an ti a. An veng tlangval an ni bawk a, an tan ve deuh pawh a ni maithei. Ngawi rengin kan hawnsan ta a. Dik tak chuan mihring hi , A khua ang zawngte, a sakhua/ kohhran ang zawngtea inhmuhsit hi tawrh a har ve em a ni. Michaela ka hnek chhan tak erawh Nenei a sawisel kher kha..hmeithai fa a nih thu kha sawi kher a tul lo. A chan phak loh vanga amah hnawltu sawichhe zui kher hi mipaah ka chhiar ve ngai lo, a hmeichhe mutpui tawh sawi zut zut ching mipa te nen ka en dan a inang reng.

In kan thleng chu thin a rim thar leh a. Mahse, kan inbengdai hram hram..kei pawh ka biang veilam a vûng ve deuh. Tha a va za thin ve aw. Mut pawh kan mu lawk thei lo. Nenei nen kan intext a, engmah a hre lo nge kha lam hawi a rawn sawi lo bawk a. Ka sawi chhuak duh lem lo. 

Lu na bûrin ka tho a. Ka a rimtui lo ngei mai.. Vawiinah kan test dawn..dâwt dâwt va ziak leh hmiah mai ang. Engmah ka zir hman si lo va. Class room ka luh chuan, Msi'n,"I thiam em?" A lo ti vat. Ani hi kan class-ah a thiam ber dawttu a nia. "Thu dun ang.engmah ka zir lo " ka ti a. 

."Tenawm siah" a ti hlak. Mahse, kan thu dun ta tho. 

A zarah 15 marks tal chu ka hmuh ka ring. Ka lawm em vangin lunch pawh ka treat nghe nghe. Bakah a bula awm hi a nuam ve a. A hmel chu a tha hran lo, a hmel ve ai aniang lehkha a thiam em em ni. In ka thlen chuan ka chau hnawk thei..phone ka en a, Nenei msg a lo tam mai.

"Nizanah in lo insual a. Michaela pa ten FIR thehluh an tum a nia. Ti nge engmah min hrilh loh. A khabe ruh kha a tliak aniang..zin pawh an zin lo, damdawiinah an kal a. Chuan, an thian pakhat kha a nak ruh a dik lo bawk a. An thinrim rapthlak" tih te,"Ti nge tharum thawhna hi i ngainat em em? Zu rui lo la, in insual awm si lo. I mak em mai" tihte a ni. Ka ner nawk. Ka thiante ka hrilh ve nghal a.

"An ngam chuan thehlut se la a ni mai lawm. Ka hlau lo, thudik kan sawi ang a a tha a ni mai" Lukira'n a ti a.

"Keini pawh thisen min chhuah ve tho alawm..mai mai a" Zira pawn a lo ti nghut. Eirawng kan bawl zui ta a. Ka inbual zawhah Nenei ka call a, " Michaela pain ka nu a lo hrilh a, Ka hmingte an sawi tel aniang..a zahthlak tawp" a ti niah niah a. 

"A ho lutuk, thehlut rawh se, min tih dan kha paidam a har ve em a ni. I hming a lang tel erawh pawi ka ti. " ka ti a. 

"Aa..zu hi in tawh lo phawt rawh..khawngaihin, chuan, keima lam chu vengthawng suh. I lamah ka tang alawm " a ti dam thlap a. Ka va duh thin tak. Zu pawh in tawh loh rih a ngai tih ka hai lo. 

Zosangi a rawn lut hlawl mai. "Ih, Tluangte, kan tap saw khawngaihin min lo siam teh a. A leak reng a" inthlahrun hmel zetin a ti a. Lukira a chhuak vut. 

 A rawn let har lo. Zanriah kan siam nghal a. Kan ei laiin Nu Saii a rawn lut hlawl. 

"Nizanah inlo insual em ni?" A ti nghal táwng a.

Tluangtea'n a bul atangin a hrilhfiah ta vek a. A chek hlak a. "Pu Roliana te saw chu mi tumlum, khekrek an nia. A pawi thei maithei ni. AN fapa lah saw an duat ve bawk si..a zia lo em mai " a ti a. 

"An fapa kha a chaltlai em a ni" ka ti nghut a.

"Ni e, aia upa zahna te hi an nei tawh lo khawp a. Insawi takah chuan in lo intibuai pawh a awm viau anih chu" a ti ve leh thliam a. Zosangi te in lam min pansan ta a.

Lukira'n ,"Zosangi khan leng turin min sawm tak asin. Zanin chu saw lam an boruak a sosang sia, kan leng rih mai dawn mawni" a ti a. Pawi kan ti lem lo. 

"Kei chu lehkha zir ka ngai hrim hrim" ka ti vat a. Thingpui háng erawh va in hram chu ka duh. 

Dar 7 velah chuan Zosangi te nen kan thu ho ta thap mai.Tehlimi chu a tawng duh bawk a, kan inthlahrung rei vak lo. Kan titi hlut mai. Zosangi erawh a tawng vak lo, ka va en apiangin min lo melh ve ziah lehnghal. A hmel chu a tha reuh mawle. Kan inrual khat loh pawn kei aiin a u hlek maithei. 

"Tpa hi ka hmuh hnu i ang eee". ati ta hlawl a.

" ka hmel hi a common ve lawm..hmu tawh ang" ka ti mai a.

"Ih, Bethsy i hria em? Venghlui" a tih chuan, ka thingpui in ka hak lo chauh. Bethsy chu ka ex a nia! 

"Hria e..i hria mi?" Ka ti vat a.

"Ka cousin alawm..ka pa u fa a nia. Bethsy atangin ka hria che a nih chiah chu..in nih ve tawh kha" a ti a. A nui sak..zep chi pawh a ni tawh lo bawk a. 

"Nia, ka hmuh lohna pawh a rei tawh khawp mai..a dam tha maw?" Ka ti a.

"Pasal a nei dawn alawm..thla lehah..eee! I tuar awm.." A ti hliai a. Ka lo nui hawk.

"A va lawmpuiawm ve..mahse, va kal ve tur a nih chu, min sawm chuan" ka ti a. Bethsy chuan min duh ve thei viau, Mapuii vanga ka rilru hrehawm laia ka kawp kha a nia. Ka ngaihsak lo em em chungin min care hle thung. A tawpah a tuar thei ta ngang lo a niang, kan intha then deuh tawp. Ka vei zui lem lo va, hriat pawh ka hre chhuak ngai lo. Chutia inhre pawp ta zel chu, kan titi tui leh viau mai. Kei pawh dar 9 rik dawnah lehkha zir chhuanlamin ka haw thei chauh. Thiante erawh an la leng. 

Khumah mu chungin text book ka chhiar a. Nenei nen pawh kan la inbe mang lo. Thenawmah ka leng tih ka sawi duh lo, lehkha zir ang char charin ka insawi. 

Dar 9:30 pelh hlekah ka nuin min lo call a, Nenei vang khan ka la han be miah lo kha a nia. Ka lungawi lo ve deuh a ni.

"I va reh ve. Min rawn be si lo" a ti ta chiah a.

"Nia, ka buai ve deuh a" ka ti ringawt a.

"Nenei nen chuan eng nge inchanchin?" A rawn ti a. Ka rum nghut.

"Nu, khatia Nenei lo biak vel kha a ngai lo asin. Ka chingfel thei ve reng. A zahthlak em mai. Chuan, ka bialnu a nia, inneih tur pawh a ni lo. In hriatchian loh vang a nih kha" ka ti ta hmiah hmiah a. A ngawi dat, a hnuah, "I pu leh i pa alawm..falak a nihna kha an hmu lian em a, inthlahchhawnna an ngaipawimawh lutuk a. Nuam ka ti bik reng reng lo" a ti a. Mak ka ti! Ka pa khan engmah a sawi ngai si lo va.

"Engpawhnise, Nenei nen chuan kan tha leh tawh. Ka then dawn lo" ka ti nghet charh a. 

"Mipa i nia, puitling anga ngaih i ni tawh bawk. Kha chu i thu a ni e..chuan kar tawpah chuan rawn hawn chu i tum em?" A ti a. Kan chawlh ve zawk tur thu kha a hre ve a ni. 

"Ka hre lo le..rawn haw chu ka tum dawn nia" ka ti a. Sualin thinchhe ve hle mah ila, ka nu leh pate hi tawngkam vina biak loh hram ka tum ve thin. Meizial te kha ka zu rei khawp mai. Ka nu nen kan inbiak laiin ka thiante pawh an lo haw a. 

Mut a chhuak rih lem lo bawk a. Sitting roomah lehkha chu ka va zir ta daih a. Rilruah erawh a va lut si lo em…

"Lulian, i la zir ami?ka ngai tawh che ee" Nenei msg ka hmuh chuan ka khi sak..

."Zo tep..i mu tawh mi?" Ka ti a.

"Umn mu deuh chiah.Tv ka en a. U Kimi te pawh inlo leng si lo va, an reh dûk mai" a rawn ti a. An khua a har ve maithei ni. 

"Okay, ha ka nawt ang a, ka mu ang..nghak lawk" ka ti a. Ka va nawt suah suah a. Ka mu ve ta mai. Rilruah a lut chuang si lo va zir khan awmzia a nei vak lo. Nenei nen chuan kan intext ta char char a. A nuam ve mai mai..

Kawngka kik dawt dawt thawm vangin ka harh hlawl. Sana ka en vat a, Dar 7 a pel tawh. Ka va tho a, mit nuai chawt chawt chungin ka va hawng a. Ka tawlh hnung deuh dawt. Police pahnih an lo ding reng mai. 

Hmai sen lam, zu heh hmel zet zawk chuan, "Laltanpuia maw? Khaw nge i thiante? Hei Station lamah min zui a ngai tlat mai" a ti ta a. 

Kan thawmah Zira leh Lukira te pawh an rawn tho ve a. An report tawh dawn lo emaw kan tih laiin an lo report tho a nih dawn hi. Ka va inthlak sawk sawk a. Test turin ka rilru a kap bawk si. A va buaithlak tak. Pakhat zawk nelawm deuh chuan, "A zia lo khawp mai. In lo khawih na deuh nge mawni dawn ni" a ti luam a. 

"Na ve thawkhat ang..Kan thin a rim em a ni" ka ti hmiah. Kan insiam sawk sawk a. Kan inzui chhuak ta a. Min handcuff an tum a, "Aa..Sir, ti lo hram teh u. Kan tlanbo lo vang" kan ti ve tlat a. Min tilui lem lo. Nu Saii'n min lo hmu a, "Awii a pawi em mai. Ka hlauhthawn ang chiah. Engpawhnise, va phei phawt ula, i pa Rama pawh ka lo hrilh ve dawn nia" a ti a. Nenei te laka a sual viau pawn kan lakah hi chuan a tha reng zel mai. Thil an tithei a, min buaipui theih chuan, eng em kan ti lo vang. Police station hi chuan huháng hi a nei ve riau a. Kan va thleng phei pawh chu tlemin zámna a awm ve deuh. SI Lalremsiama hmaah kan va inlan a. Pa lian leh nelawm tak mai a lo nia. Kan intihbuai dan velte chu min han zawt ve luam a. A chinchhuakin engkim kan sawi ta a..hmaih nei lo leh dawt tel loin. Nenei hming pawh sawi tel loh hram tum mah ila, a nihna takah chuan Nenei vanga buaina hi thleng a ni miau a. Kei chuan, "Thingtlang tlangval min tih kha chu ka palliam thei , Ka bialnu a sawisel leh hmeithai fa a ti kher kha amah ka lo ngei ve sa nen ka hnek ta mai a nih kha" ka ti a. A nui hawk hawk mai.

"hmmm, a tha e..khatiang thak kha a tha. Mipa nih chuan kan bialnute chhan hi tihnat hle tur.." A ti hmiah mai. 

"Engpawhnise, Report an thehlut miau si a, inngaihdam theih hi a tha a. An ni pawh an rawn kal tep ang a, ngaihdam te indil ang a, case siam em em lo va tihtawp dan zawn a tha.." A ti a. 

"Sir, vawiinah test ka nei a. 3rd period hma ngeia thlen thlak ka duh khawp mai." Ka ti a. 

Michaela pa chu a call niin ka hria. "A lo kal dawn e" a ti sup a. Kan lo nghak. Rei vak loah a rawn thleng a, Pa te lam, thinchhiat hmel zet hi a ni. 

Kawng dang kan nei si lo va, case puitling anga a kal ai chuan, ngaihdam dil mai chu keini pawn pawi kan ti lo. Kan harhfim ta bawk nen. Tluangtea chuan ngaihdam dilna thu chu kan aiawhin a sawi ta dap dap a. 

A mitmeng a thip fahran hle. "Ka fapa enkawlna man saw intum thei em ni? Tawng pawh a tawng theih loh saw" a ti ram hmak a. Pu Remsiama chuan, "Aa, Pu Siam, engpawhnise inrem a tha. Tihah chuan i fate pawh kha an lo dik fai vek bik lo va. An tawngkam a lo chaltlaiin pai daih a har ve bawk a. Chuvang chuan inphah hniam la, inrem rawh u" a lo ti a. Kan lawm khawp mai. 

"Rs. 1000 theuh tal chawi rawh se. Tichuan, ka lungawi ang. Zirlai naupang leh Aizawl khua an nih loh vang chauhin ka inphah hniam ang. Lehpek a awm leh anih chuan jail-ah an lut thla tawh ang" a ti ta a. Kan pawm lo thei ta lo. Kei lah ka hmanhmawh tawh bawk si..tichuan, chutiang chuan bond kan sign a. Kan zalen ta. Pawisa chu zanin leh naktuk hun min pe. Kan nei ve thei em ang chu maw..thla tawp lamah erawh kan inhrëk a ngai ang.

Nenei ka va hrilh ve a. 

"keimah vanga buaina thleng a nia. Keiman pawisa chu ka chawisak ang che u.." A ti tlat a. Kan duh lo rapthlak si. Kan han inhnial leh rih. A inthlahrung lutuk chu ka khawngaih zawk. 

MZU lamah kan liam thla leh ta phawt..hmabak a la ko si! Ninawm..

Test pawh Msi zarah ka ti ve leh thei sawlh sawlh e. Tlaia kan haw , in ka thleng chiah tihin, call ka dawng a. Number hlang a ni.

"Hello " ka tih rualin, "Tp, keimah Mapuii..i dam maw?" A rawn ti zawi sap a.

.

Ka ding vung vung mai …

(Kutzungpui malis thiam deuh bialpa ka'n zawng ve lawk🥱🥺