Vanneihsangi 8

VANNEIHSANGI (8)

Ziaktu: Toni Râlte

Dar 5 rik hma deuhin ka tho a, Nenei te inah chuan ka va phei nghal. An lo tho diam tawh a. A nu nen an lo inpack mek a, ka va pui ve nghal bawrh bawrh a. Dar 6 velah Zira leh Lukira pawh an rawn phei a. Thiar theih mai turin kan peih fel vek mai. Tukthuan chu kan inah ei mai rawh u ka ti ringawt. Class pawh kei chu ka kal lo mai aniang chu. Zira leh Lukira te erawh test an neih vangin an kal ngei ngei a ngai. U Sanga pawh a lo thleng ta a. A pickupah bungraw lian tham chu kan load a. Vawi 2 a vei bakah keini lamin ken theih ang ang kan ken chuan kan thiar zo der mai. Kimi a lo fel hlauh a, an in luah tur chu a lo phiahfaisak vek a. A vengva ve ngawt mai. Bungrua chu kan dah tawp tawp phawt a. Tukthuan ei a hun tawh mai si a, Zira'n rawng a lo bawl kep bawk a. Kan in lamah kan phei leh ta dial a. Inthlahrung teh mah se; naupang nei an ni si a, chaw nghei ngawt kha thil tih chi a ni si lo. Chawhmeh pawh kan nei em em bik lo. Tam hnemah kan ei ve a ni mai e. Kan ei mek laiin, Nu Saii a rawn lut thut mai a. Zira leh Lukira te erawh class kal turin an kal tawh a. Chutia chaw kan ei a rawn hmuh chuan a ner sawk. A hmel hmuh a nuam vak lo. 

"Inbungrua inla kim maw? A bo abang awm loin la fai vek ang che u. Kan kawl duh lo" a ti hmarh hmarh a. Heti taka nu tha leh fel nia ka hriat a danglam thei hi mak ka ti. Fate avang chuan a lo danglam theih dawn khawp a nih hi.

"Kan la kim thawkhat chuan ka hria e" Nu Sangi chuan pangngai tak hian a lo ti a..

"A that chu..vawi khatmah min rawn pur buai tawh lo ang che u" a ti leh hram a. Thinrim duh, thinrimna tur hmu mai tawh si lo a ang. A rin aiin Nu Sangi ten insawn an awlsam bawk si. Ka nuihte pawh a za deuh. Ka ngawi reng thung. Nu Saii chhoh hnu chuan, Nenei chuan, "Tihah te chuan an sum kan hman vak pawh ka hre lo e a. Zo Inspiration te atanga kan dawn kha kan hmang sia.." A ti sap a. A nu erawh chu a ngawi reng. Apuia te pawn school an chawl ve ta tawp. Kan ei khamah muangmarin an in thar lamah chuan kan phei ta a. Nu Saii te verandaah chuan Sawma leh an kawt dawr nghak U Rela te an lo thu dun a, mei an lo zu hlat hlat, kan chho dial chu min rawn thlir reng a. Sawma hmel chu a danglam khawp mai.

"Tp, khaw nge i kal dawn?" Tiin keimah chu min rawn be vat a.

"Hei, Nenei te in tharah ka va pui ve ang e" ka ti nghut a. Min biak zui leh hmain kan kal hmawk hmawk. Nizan lama thil thlengte kha a la hre ve vek ang em le? A rui bawk sia. A hmel pawh chu ka haw lek lek tawh. Kan in atangin Kimi te in luah chu a hla lo bawk a. Nu Sangi pawn, "Awm rengna chi pawh a ni lo vang, duh aiin kan la inhnaih tlat" a ti nghe nghe. A dik ka ti. Keiman ka duhna hmunah ngei in luah tur ka zawnsak ang. Biak turte chu ka ngah ve alawm. An in thar chu an in hlui ai chuan zim tak a ni. A theih ang angin bungrua chu kan rem fel a, U Sanga lah khan pawisa a la duh thak lo lehnghal a. An chanchin tlem ka lo hrilh ve bawk nen, a khawngaih ve a ni ngei ang.

Choka bungrua vel kan rem zo a, a bit ngei mai. Thutthleng sei pahnih an neih ve chu kan hung a, Pindan ve angreng neih a tha ve si. Puan kan zar ta ringawt a. Khum pawh Nu Sangi leh APuia te khum chu kan zawm tawp mai. In dang zawnsak vat an ngai. An chhangchhe si a, a hrehawm dawn em mai. Nenei che fel thlarh reng chu hmuhnawm ti zetin ka lo thlir leh vung vung thin. Dar 12 velah chuan kan peih fel vek, a faiin a fel leh thlarh tawh mai. Nu Sangi'n thingpui a lum a. Apuia leh a naute erawh an verandaah an infiam a. An in hi Kimi te nen inbun ang an ni a, Tile hmanga pin dan ringawt a ni a, thawm pawh a inhriat theih viau ang. Carpet pawh a inphah sa ve a, a zia viau e. Thingpui kan in lai chuan, "U Saii chu mak ka ti angreng khawp mai. Min hmangaiha min khawngaih tehlul nen" nu Sangi chuan a ti sap a. 

"Sawma vang vek alawm. An duat ve bawk sia, a pawi ngawt mai. Sawma saw a bawraw chho zel maithei ni. An enkawl vat loh chuan" ka lo ti ve a.

"Awii kei chu a rilru lam chu thu hran, ramhuai te hian a luhchilh mawni ka ti tawp! A chak dan em em te kha" Nenei chuan a lo ti ve vat a. Kan nui ringawt. 

"Rini kha ka lo be leh ang, in luah tur a hre maithei ni. Chuan, Nenei hi in lamah inzir tawh mai se ka duhpui. A theih tho ang" ka ti ta a. 

"A duh leh duh loh a ni mai kha chu" A nu chuan a ti a.

"Ka hrethiam lo. Admission fees te kan pe vek tawh sia, ka ui ve deuh. Mahse, U Sawma hian min zui ru ang tih chu ka hlau" Nenei chuan a lo ti a.

"Buaithlak ngawt mai. Duh leh naktukah chuan va kal leh phawt la, chumi azir chuan i kal zel dan tur kan ngaihtuah dawn nia" a nu chuan a ti a. 

Kei pawn tha ka ti. A thiamte ngeiin an zirtir tluk a awm dawn lo. Chaw eiah min sawm ve ngial naa, an la buai belebut em a, ka hawnsan ta rih. Zanah erawh ka leng chiang ngawt ang. 

In ka thlen rual deuhthawin Sawma a rawn chhuk ve nghal a. Min zui lut a. Zu a nei leh tawt mai. Mahse, in ka duh tawh rih lo. 

"Nenei te in chu khawi lai nge?" A ti ta ngei a.

"Nakinah i hre mai ang" ka ti ta ringawt. 

"Nenei hi i duh ve deuhin ka hria. A dik em?" A ti ta thut a. Ka hamhaih deuh. Ka nui hawk a, ka hrilh vek mai dawn mawni ka ti hman a. Mahse, kei chauh ni lo ka thiante thlengin an tawrh ka hlau a, ka insum hram hram. Zu chu a in a. Min pek ve a tum naa ka duh lo. Mak a ti deuh tih ka hria.

"Nizan kha chu a nu kha rawn chhuak lo se chuan, ka hlawhtling ang mawle" a ti ham ham a. Ka va hnek chak tak.

"Ti nge khatia i chet reng reng a? A mak e" ka ti ta a.

"Ka hre bik lo, ka it thut alawm. Chhunah khan kan leng dun bawk sia, min duh ve viau tawh khan ka hre sia" a ti niah niah a.

"E taka! Khaw nge inlen nimin khan" ka ti hlut a.

"Lenna tur a vang ve em a, Aizawl chu..Phunchawngah te ka zuk down pui vel..a zak ve ngawt ang" te chu a la ti deuh deuh a. A va mawl tak e aw.

"Bialpa a neih thu a sawi reng kha..nang pawh i bem lui tálh a" ka ti a.

"Hmeichhiate chu pasal an neih hma chuan sava thlawk lai an ni mai. A bem theih vek" a ti phawr phawr a. A zu in a thawk tan ta bawk a. A tawng nuam khawp mai. Ka hman tho sia, ei rawng ka bawl ve a, Bai erawh ZIra siamah ka dah. Kar loah anni pawh an rawn hawng ve a. Sawma nen kan lo awm dun an hmuh chuan an mitmengah zawhna a tam hle. Mahse, ngaih that lohna tur a awm hran lo. 

Zira chuan bai siam chawh rawk tawk pahin, "Lalesi'n min then leh tawh. Ka ning ta viau e. Tun tum chu ka tlawm mai mai tawh lo vang. Min then zing lutuk a, ngaiah ka nei tawh" a ti bawrh bawrh a. Lukira'n nui hak chungin,"Kimi awm lo se, ngaihdam i va dil leh dúk dûk ang" a lo ti sup a. Kan nui nasa. A sawi dik angreng viau. Han inthenin thinrim engphiarin han inkalsan thin mah se, ni khat pawh hi an inngawihsan hleithei lo a ni ber. Keini pawn ngaiah kan nei tawh tho, kan inthen a tih mek lai hian an lo inbe tha leh em em zel thin si a, an inbe tha reng emaw kan tih laiin an lo titau leh daih a. A ngaihna hi an awm lo. 

Sawma chu Thiangi'n a rawn ko a. A chho ve hnu hnu mai. Keini pawn chaw kan ei zui ve ta nghal a. 

Nenei te in lam panin kan inzui phei ta dat dat a. Apuia te eitur pawh ka leisak ve nual mai. Pawisa ngah deuh nih hi a chakawm thin mang e. Chhungte chawmhlawm ka la ni ve bawk si. Zira chu Kimi te inah a peng zuk a, mahse, a rawn chhuak ve leh nghal. Nenei chuan thleng a lo sil mek a. Gabby a lo tap leh a. A kaih leh deuh mawni. A hmel that nen a khawngaihthlak reuh em mai. Kimi pawh a rawn phei ve a, a hawiharh bawk a, Nenei te pawn an nel khawp mai. An chau ve deuh nge, dar 7 a pelh chuan Apuia te unau chu an muhil der mai. Gabby pawh a zia ta deuh bawk a. Nu Sangi chuan, "Lo inkawm ru aw. Ka chau ve deuh nge ni, ka'n mu ang e" a ti a. A va mu ve ta daih. 

Kimi te in lamah thiante chuan min pheisan ta bawk. Thutthleng seiah chuan Nenei nen kan thu dun a. 

"Nge kha nu kha i bialpa anga i sawi ve ringawt a" a ti nghat a. MSi a sawina a ni tih ka hre nghal.

"I ngeiawm em alawm..khami zan khan nge dawrah khan min kalpui duh loh?" Ka ti ve zat a.

"U sawma mitmeng kha i hmu lo alawm..a meng rum em a,i chungah a tuan daih ang tih ka hlau alawm" a ti a.

"Ninawm, inhnial lo ang. Tunah chuan tibuaitu nei tawh lo ila ka ti..ka ning" ka ti hawk a. Ka ban chu thutthleng nghen chhanah ka kham a, a rawn kham nghal zat. 

"Nia, tihian puitling deuh inngaizawng ang hian awm ve ila" a ti hliai a.

"Kan upat tawh hi" ka ti a.

"Ve che a..e chuan, Naktuk chu ka kal dawn a nia aw..i thinrim lo vang maw?" A ti a. Min rawn melh kiau , a hnara tuaisakin, "Rim lo e. Internal test zawh velah ka haw zuai ang a, bike ka rawn keng thla tawh dawn nia..mi dangin an thlah leh palh ang che" ka ti a.

"Awii, bike-ah hian vawi khat chiah ka la chuang" a tih chuan za zetin kan nui dun a. "Nge nui suh, ka hlau alawm..ka zei lo rapthlak" a ti nghat a. 

"Zei vak a ngai lo, rinawm la a tawk" ka lo ti daih. 

"Rinawm thuah chuan, ka ngaihtuahawm loh. Nangmah zawk hi" a ti sap a. A beng khalh pahin, "Ka lerh thin a, mahse, lerh hi ka hne tawh..nghet deuha inngaihzawn ka duh" ka ti a. Ka bianga rawn chuk zauhin, "Hmelthapa" a ti sep a. Ka kuah hnai a, ka fawp nawk nawk. 

"U Kimi leh U ZIra hi an ni ve mi!" A tih chuan ka nui ringawt. Ka ngaihtuah a, tihian kan thian ho chuan kawppui angreng kan nei ta theuh chu a nia. Kimi te leh Nenei te lah in khata cheng ang mai an ni lehzel bawk si. A nuam dangdai riau mai. 

A tuk classroom ka lut chiah chu, Msi'n ,"Lulian, Zampuii'n pasal a nei daih asin..ka ral ang che"a lo ti ham ham a. 

"Ehe! A va'n mak! Tu nge a neih?" Ka ti hu a.

"An in hnuai luahtu nen an inru daih alawm..tupawn mak kan ti..i lawm awm" a la ti zui! Ka khi suk mai. Ka tan a hnawksak tham hran lo va, mahse, pasal a nei thut chu mak ka ti ve tho mai. 

"Taka ms, in ruak zau ve deuh hlek luah tur i hre lo maw!" Ka ti a. Rini kha ka zawt tawh a, ka lo zawng ang a ti kha a nia. Thang kam deuh a pawi lo.

A ngawi vang vang a, "Hre maithei, tu luah tur" a ti a.

"Nenei te kha, ih, an in luah kha an sawn a. Tuna an awmna saw a zim mah mah a, tlema zau ve deuh an duh a " ka ti a. MAhse, Msi te chu Ramhlun daih an ni sia, APuia te school kalna vel a buai leh maithei a ni.

"Ka hriat hi an la luah mek a, mahse, insawn an tum hnai a. Kan thenawmte in a nia. A zau tha khawp mai" a ti ta a.

"Mahse, a to awm" ka lo ti vat.

"Umm 5000 a niin ka hria. Mahse, a in that dan ngaihtuah chuan a to hran lo..ti nge Nenei te chu an chhuah daih a?" Ngaih that vak hmel loh deuhin a ti a. 

."mi dangin an luah dawn a, an chhungte a ni sia" ka tih tak ngawt kha.

"Inni leh tawh mi!" A ti vat a. Nui chungin ka bu nghat, "Hmm..a tha, a fel hmel ka ti.." A ti ve mai a. Nenei te chu APuia te school luhna avang khan Tuikualah tho in luah tur hmu se ka ti..insawn chhen ngai lo tur, luah hlen theih tur ni bawk se..

Tlaia kan haw chu Nu Saii'n ," Lo peng lawk teh u" a tih vangin ngaihtha vak lo chung chuan kan peng kawi a.

"Lo thu r'u, thiangi, thingpui lo siam rawh" a ti siam siam a. A hmelhmaiah han ngaihthat lohna tur em em a awm hran lo. Hmuh a nuam tho mai.

A aw a thian kharh a,."Englo a nia.,inhriat angin Sawma leh Nenei chu tikha an nia. Nenei te inkhawngaih a, inlo buaipui a ,a lawmawm. Demna che u ka nei lo a nia. Ka fapa thiam loh pawh a awm ve tho bawk a. Ka sawi tum zawk chu, Sawma hi tun hnaiah a bawraw chho riau mai a. A u hian doctor panpui tur hian min ti chamchi a, a pa nen kan lainat em vang hian enliam chin kan nei bawk nen. Mahse, vawiin chawhnu khan a buai leh ta thut mai a. Office-a ka awm laiin Thiangi'n min lo call a. Nenei thil zirna dawrah a lo va kal niawm tak a ni. Buaina a va siam aniang, Vanneihthlak takin a thian hlui, chu lai hnaia awm ve chuan a rawn hruai haw hlauh mai a. Tunah chuan an chiu muhil rih a. A awmdan hi a bawraw zel dawn niin a lang si a, a u thurawn angin doctor hmuhpui mai chu a pa nen kan tithlu ta a. Mahse, amah hian a duh dawn si lo, chuvang chuan nangni a thiante hian a rilru min hnehsak thei ula ka duh a ni. Lungawi taka a kal theih nan..a theih hram chuan Nenei tel thei se, Nenei'n kal ang a tih chuan a hreh ka ring lo a. Chu chu Nenei te va ngen kha tlawmah ka la ve si a, khawngaihin min lo ngensak dawn mawni le ka tia" a ti ta mawlh mawlh a. Ka rin loh lam daih a ni. 

Zira chuan thingpui ban pahin, "A tha lawm..nia, entir thei ula tha ka ti khawp mai" a ti ve a.

Lukira pawn, "Amah hi a sual si lo va, mahse, a buai leh thut zel tlat a. Doctor pan ngei chu tha ka ti kei pawn" a lo ti ve a. Kei erawh ka ngawi.

"Nia, chu chu naktukah Nenei chu min hrilhsak thei ula, nangni'n in ngen chuan an hnial ngam bik ka ring lo, an chunga inthatna te avang pawn" inthlahrun hmel deuh hian a ti a..a khawngaihthlak letling. A fapa duatlai vangin an rilru a hah chho mek chu a ni sia.

"A hma pawn tiang deuh hian a awm tawh ni lawm ni?" Zira chuan a ti a.

"Umm awm tawh e. Kan veng tleirawl Mary a atchilh tlat mai a. Mary pawh khan a duh ve, mahse, zirna vanga Sawma a awm hran takah khan Mary khan rinawm lohsanin mi dang a kawpsan ta a, A rawn haw nghal hmak. Mary pawh kha kut a thlak nual hman. Ta tang khan a dik lo chho tawh a. Hmeichhia a ngaihsak lo va, eng atanmah a ti ngai miah lo kha a nia. Kan mangan ruk tawh hnuah Nenei a han duh leh a, ani lahin a lo hnar ta si, a la na ta em em a nih hi" a ti ta duah a. Sawma chu lehlam tak chuan a lainatawm. A duh vang a ni awm bik si lo va. 

" Nia, theihtawp kan lo chhuah ve dawn nia" ka lo ti ve a. A ngaih a that hmel sawt. Kan chhuk a, ka inthlak hnuah Nenei ka call nghal. 

"Sawma'n buaina a rawn siam mi!" Ka ti nghal tâwng a.

"Inbang tawh maw? Tihbuai che ka hlau a, ka sawi duh lo a nih kha..umn siam e mawle..a zahthlak khawp mai" a ti a.

"I tha em? A khawih che em?" Ka ti vat.

."Aw ka tha..min khawih hman lo. Dawr thil erawh a tichhe nual a, Pi Saii ten an chawisak ang. Zanah kimchangin ka hrilh ang che..hei kan ziak lawk dawn" a ti a. Ka dah zui a. Tui ka dawh mek laiin Nu Saii leh hmeichhe pahnih an rawn inzui thla a, Nenei te inah chuan an va lut a. Ka thlir zui ta reng a. Luah an tum a ni ngei ang. Rei vak loah an rawn chhuak a. Nu Saii chuan, "Tp, hei thenawm thar in nei leh dawn e. Zosangpuii leh Tehlimi te an nih hi..hei inthenawm tur te, tpa te an nih hi..in inkawm thei hlawm viau ang" a ti bawrh bawrh a. A hmel pawh a hlim viau. Min hnaih zawktu chuan nui sakin,"A va tha ve..tlangval kan thenawm dawn anih chu" a ti hliai a. An chho zui nghal. Ka en zui a, Tehlimi a tih zawk chu nuthlawi a nih loh pawhin a kalpuinu ai chuan a upa hlek ang, a sam a buang thúng a, a dar chen vel a ni. A thau lam deuh a ni a, a sang vak lo nen, a pian chu a bawng deuh hut a. Zosangi a tih ve thung erawh Nenei aiin a sang a, a pian pawh a zen deuh thlarh mai. A sam a dum a, a kir deuh bawk. A hmel kha ka lo en chiang lem lo va, hnunglam atang chuan a chhiat loh hmel angreng. Thenawma nula pahnih an rawn awm chuan tlemin a nuam ve deuh ang chu. Han teiluhna hnaivai a awm hian mipa tan chuan a nuam ve thin a. Zanriah kan ei lai chuan ka sawi a. Zira ta pek chuan, "Hmm..an va timing lo tak. Kimi kan rim hma te khan lo awm tur a nia" a ti a. 

"Nenei te an la chhuah loh kha. Engtin nge an luah theih ang!" Ka lo ti vat. Kan ngawi zui ta daih a. Chaw eikhamah Sawma chungchang kan sawi leh a. Nenei chuan Nu Saii te ngenna a pawm sak thei ang em? Lo hnial ta se, an thinrim leh awm sia, buaina an tawh leh phah ang em?huiham buaina lah hi a rawn hnai ve zel mai si a .

Kan va thlen phei chuan, an lo intifel tawh a. Kimi te erawh an dawr an la khar lo nge an lo la haw lo. An lo hawn hmain Lukira'n Nu Saii min biakna chu a sawi ta a. An nufa chuan an inmelh relh relh ringawt. A hnuah, Nenei chuan, "An fapa a nia, control theih awm tak, hruai lui mai se, nge ka tel ve kher a ngaihna?" A ti ta nghat a.

Zira chuan, "Nu Saii te nupa saw an dawihzep ve deuh bawk a, buaina a chhuah leh vak an hlau a niang. Tlawmngai hram la, inchhungkaw inkara buaina pawh a ziaawm chho maithei asin" a lo ti a.

Nenei chuan,"An ni chhung nen sawn inkungkaihna neih ka duh tawh lo. An hlauhawm si" a ti leh hmuk a. Nu Sangi erawh chuan,"Bawihte, khatin ti buan buan lo teh. I pi saii mangangin Tpa te a pun ta tawp a nia, Tpa te tan pawh a nuam bik nang. Kei chuan kal rawh kal suh ka ti lo vang che. I thu thu a ni" a lo ti dam thlap a.

"Nia, Nu Saii kha a mangang ve angreng sia, min tahawh ve deuh nen, theihtawp kan lo chhuah ang kan ti ve tawp ang" Lukira chuan a lo ti ve a. Nenei pawh a ngawi ta dat. Min rawn en a, kei lahin lo sawi vak tur ka hre bawk si lo. 

"U Tri-a hian a phal ami?" A ti ta a. 

"Phal e. Kei chu min vengthawng suh" ka lo ti vat. Ka tel ve theih dawn loh vang erawh chuan ka ngaihtuah viau tho mai.

"Anih chuan ka kalpui ang a a ni mai lawm. Amah vangin ka thil zir lah ka bansan ta bawk sia" a ti ngui raih a. Ka khawngaih.

"Vawiin thil thleng chu han sawi teh.." Ka ti ta a.

A chil a lem khalh a. Muangchang hian, "A rawn lut ve tawp a, an lo hriat tawh vangin an lo be ve mai. Ka laklawh laiin min rawn kai ringawt a, 'Chhuak lawk ang' a tia. Ka duh bik si lo va. Kan inchai ta hrep a. Miss-in a lo hau ve a, mahse, a pawr ta lutuk a, bakcheh a la lawk a, min vau ta a. Kei chuan ka hlau hran lo, mahse, ka thiante khan an hlau sia, Nene kal pui mai rawh an tia. Chuan, kan chhuak a, mahse, motora min hnuh luh a tum chuan ka tang ve ta tlat a. Kan inpawh buai laiin a thianpa khan a rawn hmu ta hlauh a, a rawn hruai hrang ta a ni..Ka zah em vangin Miss bulah ka ban tur thu ka sawi ringawt alawm" a ti ta a. Kan Malsawmtluanga mai mai chu aw..

"In lama zir theih chi a tam em?" Ka ti a. 

"Umm, Miss khan min khawngaih ve bawk a, material ka lo pe thin ang che" a tia..ka inzir thei mai ang" a ti a. Tlem chuan lung a muang ta deuh e. Tin, a luha luhchilh a ni lo bawk a, a nu hah lutuk tur chhawkna kha a ni mai a. Kawr zai dan phei chu theory-a zir chi a ni lo va, a beih a beih chuan a thiam leh mai ang chu maw..

Kimi te an rawn haw a. Zira te an phei leh ta. Nenei pawh naktukah chuan kal pui tur chuan thutlukna a siam a. Eng em an ti lo vang chu maw..

Nu Sangi chuan Gabby kawr tur a thui a, naupangho an mu tawh. In luah tur ka dapsak thu te ka sawi ve a. Tuna an luah lai hi 1500 chauh a nia, a te naa, mi pahnih vel luah atan chuan a tha khawp mai. 

"Kar lehah internal test kan nei tawh dawn a. Naktuk zan atang chuan ka rawn leng tawh rih lo vang. Inzir ve loh chuan" ka ti a.

"Umm..a tha lawm..zir rawh. Chuan in khuaah chuan hawn chu i tum ta mi!" A ti sep a. Ka bu nghut. 

."ka ngai awm che"a nu hriat phak loh chuan a ti zawi sap a. Meng zuk zuk chungin ka fawp zauh a. 

Thingpui a lum lai takin ka nuin min lo call a, "Mama, Sanga a boral!" A rawn ti ta mai a. Ka tho zawk mai.

"Eng a?! Engtin?" Ka ti nghek a.

"A patea te in sakna atangin a tla a niawm e. Damdawiin an panpui laiin a chatthla ta a ni. Tunah ruang la turin an kal dawn mek" a rawn ti a. Mak ka va ti em ve aw. Kan khuaa ka thiantha ber a ni a, ka hawn chuan ani nen bak kan inkawp ngai lo. Sawn a thlak vangin a patea te khaw lamah an insak pui pahin a va zin kha a nia! Nizanah pawh Nenei nen kan chungchangte hrilhin kan inbe ve reng kha a ni sia. Chhuani nen pawh an inkar a that tawh thu leh pangngai taka an inbiak tawh thu te a rawn sawi a. Ka lo lawmpui ve em em kha a nia! Tunah a thi a maw?! Awih a va harsa ve le..Nenei te pawh chuan pawi min tihpui ve hle. Thiante pawh an rawn phei vat a. U sanga ka be ta a. Min lo call a tum ve chiah a lo nia. "Insiam la, ka lo lam che ang a, chho mai ila" a rawn ti. Kal lo thei lo niin ka inhria. Karlehah internal test nei mah ila, chu lam chu ka ngaihtuah hman tawh lo. Lukira leh zira te pawn tha min tihpui a. Thingpui pawh in hman loin kan haw ta a. Ka insiam nghal sawk sawk. Zan hnih tal riah ka tum. 

An lo insiam ve sawk sawk ka hmuh chuan, "In lo kal ve dawn mi?" Ka ti a.

"Kal ve lohin.." An ti mai a. Thiantha hlutzia hi chu aw. U Sanga a rawn thleng a, kan chhuak nghal. U Sanga nu leh Sanga pa hi unau an nia. Ani pawh haw lo thei lo a ni a ni bik lo. Tah em chu ka tap lo , mahse, sanga nen kan nunhlui zawng zawng ka chhuikir chuan mittui a hnám lo thei lo. Zirna lamah a tui lo va, a pa hi mistiri niin a pa hnung a zui chho a, kan khuaah chuan naupang hle mah se, a kut hnu a mam leh mawi thin vangin chhawr rim ber pawl a ni. Zu han in zeuh chang chu a nei ve, mahse, misual a ni lo. Chhuani nen rei tak an inzui ve ta a. Nula lamah a hlei lem lo, U Remi lakah a tal awk ve ta hlauh kha a ni mai a. Mi thilphal, mi khawngaih thei deuh mai a ni a. Mi ngainat a hlawh thin. Tu pawi mah a sawi ngai hek lo, kei aiin kum 2 in a upa a, a hunah chuan min zilh hreh ngai lo bawk. Ka ui a ni. Ka ui thlawt..

U Sanga speed a sang bawk a, Rin aiin kan thleng hma. Ka nute ka hrilh lawk bawk a. An lo la meng thap. Sanga ruang pawh a thleng tawh a, an in leh kan in inkarah hian in pathum a awm. An lo zai thât thât tawh a. Lung a va awi lo em aw. Sanga..

Kan inah kan lut phawt a, kan intuai fai thuak thuak a. Ka nuin thingpui a lo lum a, kan in leh te te a. Ka thiante pawh an tlangnel ve nghal maiin ka hria. Kan inhnawh puar zawhah Sanga te in lam chu kan pan ve ta a. Kan va lut ruang kan va kil chu a nu Nu Ruati chuan tah hla nen min lo dawngsawng a. Mipa pawh hi mipa nih a har khawp mai. Sanga chu a lu an lo tuam lák a. Mitthi hmel pawh a pu lo asin le. A biang ka chul a, "Thianpa, a va mak ve le" ka ti sup a. Chubak ka sawi thei lo. Thalai pawh an thahnem kher mai. Rawn lut thar tlema rual u lam deuh te phei chu an rawn tap nghal zel a. Tahtu a ngah khawp mai. 

Zira leh Tluangtea te pawh min tawiawm tluan thak a. Chau hmel leh ning hmel an pu miah lo. Sanga chu an khawngaih ve hle niin ka hria. Chhuani mawlh chu a khawngaihthlak. Khawtlangin an hre vek tawh tho a, inthup a ngai lo hlauh a, a zia phian ang. A tap reng mai a. Sanga nu leh a farnu te nen inkuahin an han tap leh rawih rawih thin a, thalai lungno zualte chuan an mittui an lo hru ve fap fap zel. Khua pawh a rawn var ta. Sanga erawh tho tur a awm tawh si lo. Hrilh a va hai tak em aw. 

Tukthuan chu kan in lamah kan ei a. Zira leh Lukira chu vui zawha chhuk leh mai tur an nih vangin, ka pain, "Tlai lamah an ei hman dawn si lo" tiin kan arpui tui lai a lo talhsak a. An lawm thiam ve khawpin ka hria. Lusun e ti lo chuan kei pawh ka ei teuh mai. 

Ka thianpa ngawih ngawih chu vui liam a ni ta chu a nia. Vui zawhah Zira te chu kan khaw sumo, Aizawl lama haw thla turah chuang vein min hawnsan ta a. A reh huai mai. In ka thleng a, engkim chu Sanga nen kan sulhnu a ni. Khumah ka mu thlawp a. Nenei ka call ta a. Kan buai a talangin zing kara kan inbiak tih loh kan la inbe leh miah lo kha a nia. 

A ring ral thak. Mak ka ti deuh a, Nu Sangi khan phone a nei ve tawh a. Ka call ve leh nghal a. 

"Aw Tp," a rawn ti dam diai a.

"Nenei hian call a la thei lo va, inah a awm tawh em?" Ka ti a.

"A lo la haw lo, ka call pawh a la thei bik lo, an buai deuh mawni ka tia..u Saii ka va bia a,' Doctor a hmuhpui lawk' a ti ringawt a" a rawn ti a. A awah ngaihthat lohna awma ka hriat loh vangin ka dah ve nghal a. Ka chau ve deuh bawk nen, ka muhil ta bawrh bawrh a. Mumang rapthlak zet ka mang lehnghal. 

Nenei nen kan leipuiah hian kan lo kal a, Thlai hnah leh ro kan khawm niin ka hria. Chutia kan buai em em lai chuan, rul dum lian leh sei zet hi a rawn tleng ta zul zul mai a. Nenei kheimitah tak chuan a chuk ta mai a. Nenei a rak tuar, a tlu nghal thlawrh a, kei chuan rul chu thah ngei tumin ka lo um a. Ka hmuh lai rengin chu rul chu a lo thlawk nia! Nenei chu ka pawm tho lawk a. Ka lo tlanpui ta chiam a. Ka inpal nawk a, kan tlu dun a. Ka harh zawk..ka thlan a lo tla nasa mai. Ka hah hle bawk. Ka mumang avang chuan ngaihthat lohna in min tuam nghal a. Nenei ka call leh nghal, ka khur der der mai. 

A ring ral leh tep tihin a rawn la ta hlauh mai. Hah hmel deuha thaw hlawp hlawp hian,"U Tri" a rawn ti a.

"Eng nge thleng?" Ka ti nghal vat.

"Aw hei U Sawma chu an admit a, a buai leh vak a. Kan inchai buai leh deuh a. Tunah chuan an admit, an phuar tawp..a rapthlak lutuk" a ti a. Ka thaw suai suai mai. Ka lungphu dup dup pawh a ziaawm tan e..

"Ka va lawm..haw nghal rawh aw. Tikhan i tihtur i ti zo tawh a. Inhnamhnawih tawh suh aw" ka ti a.

"Umm..ka haw dawn mek e. Thlen veleh ka lo bia ang che" tiin kan dah ta a. Ka nuin, "Va inbual harh la" a rawn ti mek bawk. Ka tho a, ka va inbual ta a. 

Zanriah ei laiin ka pa chuan Nenei nen kan chungchang chu chik deuh zawkin min zawt ta a. Ka sawi ta vek mai. Ka nu chu hlauthawng chi a ni bawk a."Awii, Bawiha, kei chu ka ngaih a ngam thei lo. Mahse, i duh miau chuan sawi tur ka nei chuang lo va" a ti a.

Ka ngawi reng. Ka pa erawh chuan engmah a sawi lo. Nenei chu a duh ve angah ka ngai mai. 

Zanah Sanga te inah ka va phei ve leh a. Nizan lamah kan tlaivar tawh vangin hun kan hmang rei lem lo. Ka chhuk leh vat dawn avangin ka riak ta lo mai. Ka nu te lahin min thlahlel bawk si. Nenei'n min la call miah lo. MSg a hnutchhiah bawk si lo. Ban rualin ka call ta a. A ring quit leh thak. Ka call leh ngat a, a reject ! Mak ka ti deuh a, Nu Sangi ka call ta a. "Inah ka awm lo, Kawmchhakah tawngtai dam thei a awm an tia, Gabby ka panpui ve e ka tia.." a ti bawk si. 

Nenei chuan ti nge ka call a lak theih loh? Inah a haw ngei tih a nu pawn a sawi sia. A inbual aniang tiin ka nghak leh ren rawn a. 20 mins velah ka call leh. Apuia'n min lo chhang ta a. "Nenei ka lo be lawk ang" ka tih chuan,

"Aw" tih leh "Nene kha" a tih ri ka hre zawm nghal.

"Hello" a rawn ti tliang ral a.

"Ti nge ph i lak theih loh?" Nelawm vak loh hian ka ti a. 

"Ka charge a, ka charge zawhah Apuia'n a khawih leh daih bawk sia" a ti niah niah a.

"Msg tal te pawh hnutchhiah tur alawm.." Ka ti a. Ka lungawi vak lo. 

"Ka lo call khan i lo kal tawh sia..Sorry,.chuan nakinah inbia ila" a tih mek lai chuan, Mipa aw hian, "Tu nge a.." A lo ti a. Ka bengah chuan a ring viau! 

"Tu nge chupa chu?" ka ti vin thak a.

Tim dai hian, "Michael-a a nia..hetah kan in chhak ami" a ti sap a. Ka sa pup thei.

"Aw..kawm rawh..bye" tiin ka dah nghal hmak. Zan a chiah kan khuaah ka la riak a. Mipa inleng a lo nei a maw? Chu pawh a mitmei a veng em em lehnghal. He nu hi Zari sawi ang kha a lo ni tak tak em mawni le..

10 mins hnu velah , whatsapp-ah, "U Tri" a rawn ti a. Ka reply lo. 

"Aw le..muttui le..i mi khawngaihna zawng zawngah ka lawm e" a rawn ti leh a. 

"Ni e, Kha pa nen khan hlim nuam u le" ka va ti a. 

"Michael-a chu ka thian a nia. Class Xii kha kan lo kalho reng a, vawiin khan kan inhrechhuak chiah a. " a rawn ti a.

"I classmate hlui mitmei chu i va veng si ve" ka ti ve ngat.

"Ka veng lo. Nangma lam ka veng thawng zawk che a..chuan, U Tri, mi i khawngaih vang ringawtin tumah ngaizawngin beiseina siamsak tawh ngai suh ang che" a rawn tih chuan, ka thu hlawl.

"Eng nge i sawi awmzia?" Ka ti a.

Ka call nghal. A la duh thak lo zui! Msg bawkin, "I aw ka hriat chuan ka insum zo lo palh ang. Mang tha le..inenkawl tha rawh " a rawn ti teh ngawt! Eng nge maw a awmzia le? Ina a hawn leh ka khawhar in kal inkarah eng thu nge a hriat ang? Ka lo call chein i lo kal tawh sia a tih tak kha. Phone ka keng lo va, "Mami, Mami" tiin ka nau ka ko a.

."Aw" a tih rual chuan, "Ka kal hlan khan an lo call ami?" Ka ti a.

A hawihai deuh, "Call pawh ka hre lo. Bakah roomah ka awm daih alawm" a ti mai a. Tlaiah khan Sanga te in lama an eirawngbawl an tlai deuh a, zanah a kal ta lo kha a nia. 

Nenei chu ka call leh a. A la duh chuang lo. A thil sawi khan awmzia a nei chuan ka hria. 

"Eng thu nge i hriat tih tal rawn sawi teh..hetiang ringawt chu" ka va ti leh hram..

"A ho lutuk, U Tri, min pui nasa tawh a, kan lawm tawk tawh lutuk. Nakinah puih theihna che ka neih ve hunah chuan ka tlan chhe bik lo vang" a rawn ti duah a..

"Pehhel suh..tuin nge bia che" ka ti fak a.

"Mang tha..muttui" a rawn ti a. A switch off nghal nge msg a tlang thei ta lo. Rilru a va buai tak..ka va hne tak em..kan hlim dawn chauh a, buaina dang bawk maw..zirlai lah rilruah a rawn lang ve sek bawk si. Ka muhil mang lo a ni e. 

Ka tho rit lûk a. Vawiin ka cham leh anga , naktukah ka chhuk ang ka ti kha a nia. Thlan nghah ni a ni a, thlan lamah ka liam ve leh a. Thian thenkhat te nen kan ni bawk a, ka chhungril hahna pawh ka hrechang lutuk lo. Mahse, Ka phone ka khawih apiangin Nenei ka hrechhuak nghal zel. A msg hmuh tur a awm lo va, a online hek lo. Biak ka chak a, mahse, awmze nei miah lo va thutawp a siam chu tlawmah ka la bawk si. Hawn veleh tuilum sa ver vawrin ka inbual a, ka harh hawk mai. Ka puten chaw eiah min sawm sia, ka inthlak sawk sawk a. Ka kal hma deuhin, ka nu chuan," Mama, i pu te pawn I bialnu kha an duh vak lo a ni. Then thei la tha ka ti mang e" a ti a. Ka ding chawt.

"I hrilh ami?" Ka ti a.

"I nuteii nen kan sawi dun a, a lo hrilh ve lehchhawng a. I pu hi chu upa lam tih takah inthlah chhawnna lam hi a ngaipawimawh em a, Nenei pian dan leh a pa dik tak pawh hriat loh ang kha chu a pawm thei lo ang..thil dang kha chu thuhran nise" a ti ta a. 

."Nu, ka bialnu a nia, lo inrawlh vak lo ve u la..tunah phei chuan amah zawkin min then alawm.." Ka ti a. Nu Sangi'n a fanu a hmangaihzia leh Nenei pawn a nu a zahpui lohzia sawi uar ka tumna lamah Nenei a pai dan kha ka sawi lang hram a. A pawi zo ta a nih hi. Mahse, ka chhungte chu ka pallui ngam. Amah Nenei'n a inhuam phawt chuan, mahse, tunah lah amah zawkin thutawp a rawn siam bawk si. Muangchangin ka pute in lam chu ka pan ta a. Naktuk zingah erawh Sanga nuin min sawm nasat em vangin an inah ka ei thung dawn ani. Ka pu tu hmuh hmasak ber ka nih avang hian kan in puiah pawh hian ka tlatlum hle. Ka naute pawn min thik ngai lo. Ka pi chuan vaimim a lo rawh a. Ka'n eisak hram kha..ka pu erawh a lo thu fel leh thán a.

A bulah va thu vein,"Hna te hi thawk thawk suh..kha i lang tar zual tlat,." Ka ti nghal bawrh bawrh a. Taima rumrut a ni a, awm mai mai a thiam teuh lo. A rum nghut a, a aw thian kharh kharhin, "Buangpui, i bialnu chu tu maw ni a?" A ti ta daih a. An lo vei tlang hle a nih dawn hi..ka va duh lo tak.

"Aa..kan ni tawh lo. Min then daih alawm" ka ti ta zawk a.

"A tha..ih e, hman lai chuan thlahtute hi an zir nasa thin teh a nia. An thlahtuteah chhul tha lo, uire, mipat hmeichhiatnaa chak lo an awm em tih te thleng hian an chîk a, an chhui vek zel alaawm. Chuvang chuan i bialnu pawh kha amah chu fel viau mah se, a tobul kha ka iai deuh tlat! " a ti ta chiah a. Ka na zawk mai. Mahse, Nenei berin min then tawh a, sawi thui vak ka tum lo. Ka pu sawi hi a dikna chen te pawh a awm mahna. Inthlah chhawn theih thil hi a tam ve a. Mahse, Nu Sangi kha chu a duh vang reng a ni lo tih ka chiang , dawt min hrilhte a nih ngawt loh chuan..

Sakhi chek kan hmeh a, ka va ei hnem tak. A tui a ni. Ka pu hi zial ka la zuk khum ngam lo va, chaw ei kham ruala haw nulh chu ka ti ve deuh si, meizial ka zuk chakzia kha. Ani lah a titi barh barh reng a. A chawlh lailawk laiin ka pheisan ta a. Zial ka tan nghal hmiah. 

A ngaite bawkin khawhar in ka kal leh a. Sanga chu a ngaihawm telh telh dawn a nih hi. Banah ka thu khawtlai ve a. Sanga u te nen kan titi ve mam mam mai. Inriak ho an lo haw tak pheuh pheuhah chuan ka hawnsan ta a. Ka phone ka'n en chu Zira msg a lo awm váng a. 

."Nenei nen intha lo mi?" A rawn ti teh ngawt. Ka la hrilh lo bawk a.

"Aw" ka ti mawl tawp.

"Chuvang aniang, a hlim loh em em..a khuasik lehnghal. Tunah phei chuan" a rawn tih chuan min dek zawk. Mahse, engmah a rawn sawi lo va, va ngaihsak kher ka tum lo. Kan inthen ka ti tak naa, ka chhuk hunah engkim a that leh ka beisei tho. Ka la beidawng lo a nih ber mai chu..hmaichhana thil sawi dun hian a fel hma bik. Phone atang chuan inhauhna a tam..a ninawm.

Zan hmasa ka mu tlem bawk a, zanin chu ka muhil tui viau e. Zingah Sanga nute nen chawhlui kan kil a, Sanghal sa min hmehpui a, ka ei leh nual mai. Dar 11sumo chhuakah Aizawl lam ka pan leh ta a. Inrinni a ni bawk a, Zira te pawh an lo awm a. Nenei chanchin ka zawt hmasa ber. "A khuasik nasa a, damdawi te kan leisak a. Hei kan va kal leh ta lo va, eng nge a an pawh kan la hre bik lo" an ti a. A hmunah ka awm tawh tho alawm le tiin ka inbual sawk sawk a. Nenei te in lam chu ka pan ta a..tlem chuan zamna a awm ve deuh. Kawngka chu ka kik dat dat a, Nu Sangi aw hian, "Lawk aw" tiin kar loah kawngka chu a rawn hawng a. Min hmu thut chu a hamhaih nge ka ngaihbel pawh ka hre lo, a phu zawk mai. Nelawm takin,"I lo haw tawh a ni maw?..engtikah nge i lo thlen?" A ti nghal sawk sawk a. 

Puan a lo thui mek a lo nia.

"Khaw nge Nenei" ka ti nghal thâwr!

"Thisen an va laktir lawk anih kha..an lo thleng ve tep ang" a ti a.

"A khua chu a la sik ami?"

"Aw. Zing lamah khan a rawn sik leh ta vak a. Malaria a ni nge ni lo tih va laktir rawh ka tia, an va kal a nih kha" a lo ti siam siam a. 

"Nih chuan zanah ka rawn kal mai ang..ka chau ve deuh bawk nen" tiin ka tho nalh a. Ani pawn engmah a sawi lo. Ka ngaihbel nge ni a hma anga kan inpawhna boruak kha a tlahniam vekin ka hria..min be tha tho siin, min hlat ka ti mai.

An in peng ka chhuak fel chiah tihin Nenei chu Bike atangin a lo chhuk thla mek a. Mipa pawh chuan a helmet a phelh ve mek bawk. Ka ding chawt a, Nenei rawn hawi pawh chuan min rawn hmu ve nghal. Mak ti hmel a pu deuh a, mahse, a reh leh thuai. Ka nui tawi tak a. Awmdan thiam a va har ve mawle..step lam an rawn pan mek lai pawh chuan ka la ding reng. 

Ka zawn a rawn thlen chuan,"A tha vek e..hlim hle mai teh" ka ti sup a. Ka kal nal nal. Min rawn ko lo va, ka hawi let bik lo bawk. Mi thikthu chhe over ka ni lo va, mahse, Nenei ah chuan a danglam. Kha pa kha a sawi Michaela ngei chu a nih ka ring. Ka awm loh a hriat hle mai. A tha..

A tawp ang a a ni mai lawm..Tpa ka nih hi, ka tuar thei em em ang. 

(A la tawp dawn lo ania 🤣 Lo hmanhmawh lo u la..Vanneihsangi danglamzia kan la hre chho zel ang 🥱