Vanneihsangi 7

VANNEIHSANGI (7)

Ziaktu: Toni Râlte

Nenei chu a thaw hawk a. 

"U Sawm, hmangaihna leh induhna hi intihluih chi a ni lo. Nang chu ka u i ni. Mipa angin ka en thei lo che" a ti ta a. 

"I ti tak tak a maw? A tha e" tia a banrek zai a tum lai chuan, a u leh Lukira'n an va bawh ta rawk a. A chemte ken lai chu A u chuan a chhuhsak ta a. Lukira'n a kut chu a chelh a, Zira nen pawh kan che ve vat. Sawma lah a lian si,a tal nasa mai a. A rak tuar tuar bawk. Nu Saii leh Nu Sangi erawh an chiái hle tih a lang. Nenei erawh a dinna ngaiah a ding ran thung. A u chuan Sawma bekah a hnek ta thuai mai a. A hnek na thawkhat a niang, a zal raih raih mai. Khumah kan zawn chho a. 

A u chuan, "Mi hi a tibuai leh lutuk mai. Hmanah pawh tiang hian a awm tawh alawm. Ka nu te pawh ka hrilh tawh. Doctor hmuhpui turin, an ngai ho deuh nge ni..Nene,hrehawm ti suh aw. A zia chho leh mai ang" a ti mawlh mawlh a. A pangngai khawp mai. U zawk na na na chu. Sawma chu a rawn harh leh thleng kan awm a. A harh har hran lo. Chauh hmel zet hian a meng lep lep a, a mitmeng pawh a dava riai mai. Lehlam tak chuan a khawngaihthlak angreng. Nenei nen inzawmna nei lo ila chuan, Nenei chu ka nawrlui zawk maithei a ni. Mahse, tunah chuan a theih loh. Ka phal tawh lo bur. Sawma nen kan inel chho dawn chu a nia. An in kan luah bawk si. 

Ina kan chhuk hnuah, Lukira chuan, "Ka hlauh ang ngeiin a thleng chu a nia. Sawma hian a bansan ring suh. A hma aiin a kherh ang, Nu Saii ten an pui ngei bawk ang" a ti fak fak a. 

Zira chuan,"Mahse, Nenei'n a duh miau lohte chuan.." A lo ti a.

"Chutiang a ni ringawt lo. Nenei'n a nu a hmangaihzia kan hria, nu Saii te hian Nu Sangi lama kua an hreuh chuan hnial zawh loh hun an la nei ang. " a ti ta a. A dik khawp ang.

Nunzira chuan, "Sawma hi sas zawnpui mai ang u. Tha deuh" a ti leh pek a. Kan nui leh huk. He pa hi chu a.. Kan mu ta a. Mutthilh erawh a har. Nenei nen kan intext char char..

"Anuin 'U Saii te hi an zahawm ee..engtia tih chi nge maw ni dawn le' a tia" a rawn tih chuan, "Nang eng nge i rilru?" Ka ti a.

"A ngai. Ka danglam lo vang. Nangin min phatsan a nih loh chuan, tin, min phatsan pawh ni la U Sawma kher hi chu ka ngaizawng lui thei lo vang" a rawn tih chuan, ka thëp suai suai mai. 

"Engpawhnise, thudik a hriat hunah pawh kan hmachhawn mai ang chu.."ka ti a. Engkim hre vek tawh mah se, pawi tihna em em ka nei tawh lo. Sawma hi ka haw hran lo, Nenei a duh ve a ni mai. Duh ve suh intih ngawt theih a ni lo, Mahse, Nenei'n a duh ve lo tih hrereng chunga a force a nih chuan a kal dik lo tihna a ni mai. Hmun dangah dah leh daih se a thawventhlak ngawt ang.

A tukah kan class kal rualin Nenei pawh a rawn kal ve a. Kawng bulah Sawma a lo ding ran a. Nizan lam ai chuan a hmel hmuh pawh a nuam ta deuh e. Nenei a hmuh rual chuan, " Hawh ka va thlah ang che, kalna tur ka nei tho a" a lo ti nghal tâwng a. 

"Aw le" Nenei chuan a ti nghat a. A chhan chu ka mitmei nasa em a ni. Mi hmuh laiin kan buai leh a hlauhawm, chutiang a thlen ai chuan va inthlahtir mai kha a pawina a awm lo. Nenei chu ka ring tawk. 

Zirna lam pawh tlema ngaihsak ve tan a ngai tawh. Nun holam lutuka nun a hun vak tawh lo. Zampuii lah khan a khat tawk hian min rawn be ziah lehnghal a.Chhan loh pawn a rawn ti tho. Mahse, over deuha han chet erawh a nei em em hran lo. Lunch break laiin Teteii ka bulah a rawn thu ve mial a. Nenei a rawn lan tak atang hi chuan, Teteii pawh thian satliah a ni tawh mai. 

"Tp, inkhua kha Hualtu tiraw?" A ti a.

"Umm ti nge?" Ka tih chuan, "Biak thin ka nei a. Pubg kan khelh ho atangin, ka zawt mai mai che.." A ti a. 

"Ehh..i bialpa ni chiang" ka tih chuan a hmui a tipawrh a,"I zak em? I chanchin asin ka zawh thin" a ti ta mai a. Mak ka ti deuh.

"Engvangin nge i zawh ?" Ka ti khauh a. Ka lungawi lo hran lo.

"Aa..ka hrechiang chak che mawle.." A ti mai a. A frank thin siah.

"Chuan.." Awmze nei vak lo hian ka ti a.

"I la hre mai ang" a ti ringawt. Ani hi ka star tih te kha a lo hre ve mawni le..

Chawhnu class laiin Nenei'n min lo text a.

"Awii, U Tri, U Sawma hi ka ngei e. Dawrah a awm ve char char ania" a rawn ti ta mai a. Ka ner sawk. Sawma mai mai chu aw..a va cheap tak.

"Eng nge a tih ve?" Ka ti a.

"A thu ve tawp..zirlai dang bulah, 'Ka bialnu ania, ka tawn tawiawm' a tia. Eitur te a leisak vek a, hei an lawm phian " a rawn ti a. Mipa e ti lo chuan Sawma chu ka ngei lek lek mai. 

"Va thing tak e aw..naktukah chuan a rualin kal tawh suh. Zaninah kan chungchang hi kan sawi tawh mai dawn nia" ka ti ta a. Sir-in ka phone khawih vangin min la hau zui. 

Rilruah zirlai reng a awm thei ta lo. Sawma chet dan leh nungchang chu mak ka ti a ni. Engtin nge tiang taka tlawm hian a awm theih? Mipa a ni ve si. Nenei ber kher a lo atchilh ve hi pawi ka ti ngawih ngawih. Hetia min chuhpui vang hi em mawni Nenei chu a hlu zual sauh a, hloh leh chân ka hlau tulh tulh mai. 

Banah kan che nghal a. Nenei thu sawi te pawh kha ka hrilh vek a. Zira pawn, "A va cheap tak e aw. Nenei tan pawh han duh ngaihna a awm lo. Khawngaihthla a la lo" a ti hmiah hmiah mai. 

Lukira erawh chuan, "Ani hi chu Dr Hrekima te lam chan a ni. Nu Saii te hian an panpui duh tlat lo alawm. Amah lah hian mi á ka ni lo a ti ve tung bawk sia. " a lo ti a. Amah vang hian buaina thuk zawk kan la hmachhawn mai thei a ni. 

Nenei rawn haw pawh a rawn peng zuai a, a mood a chhia tih hai rual a ni lo. A nuih pawh a nui lui thei lo a chha a ni e. "in lama zir mai te ka duh. Ka chhuah chuan min zui zel dawnin ka hria" a ti a.

"Nia, in lama zir theih a nih chuan, ti mai teh ..mahse, a hman ropui sia, a rawn leng leh reng lo'ng maw" ka ti a. A ner sak, "Ni bawk si..ka hne e" a ti hmak a. A phei ve ta a. 

Chaw ei khama Nenei text ka hmuh chuan ka ner sawk.

"Pi Saii'n ka nu a lo bia a. Zaninah an pa nen an lo leng dawn anih chu. Nenei leh Sawma chungchang hi sawi ho a ngai an tia...ka rilru a hah e..u Tri" tih a ni. Ka za zak mai. Mahse, eng nge tihtheih ka neih chuan? Chutiang a nih tak siah chuan va len ve pawh chu a nawm loh piahlamah a zahthlakin hnawksak ka va ni dawn tihna a nia. Nu Sangi tan lah lo hnar ngawt chi a ni bik si lo. Zira chuan, "Kimi va rim leh mai ang u. Lulian, nang pawh i mood thlak a ngai..min zui ang che" a ti a. Mahnia in nghah ngawt ai chuan tiin ka hnial ta bik lo. 

Kimi te rim tura kan chhoh mek laiin Nu Saii te nupa nen kan intawk ta chiah. Tha takin min bia. Engmah an la hre lo tih a lang. Kimi te in kan va thlen chuan, ani pawn thleng a lo sil zo deuh chiah a. A lo nui leh sáng mai. A nau tleirawl dawra a kal haw a rawn lut ve chiah bawk. A ngo puak mai a, mahse, a la naupang bawk a, a la á heih heih hle. A ri ve phawng phawng mai a. Nuih a tiza phian.

"U Tpa leh U Tluangtea te hi ti nge insam a kir kher? Sam kir saa han pian ngawt mai chu" tih vel ania a la ngaihtuah. A ho viau. Kimi leh Zira erawh zawi te tein eng emaw ni an sawi a, an inthut hnaih phian bawk si. Esi nen an inkar a tha vak lo tih chu ka hre tho a, mahse, ngaihzawng dang hi an inneihsan ngai meuh lo,an nih leh zel avang hian. 

"Bte, i bialpa ka hria" Tluangtea'n Kimi nau bulah a ti zauh a.

Phawk zet hian, "Tu?" A ti hú a.

"Keimah" a lo ti hmiah. Bteii lai leh zak lutuk chu a sen tán tán mai a. Ka lo nuih vur vur, "Lo nui ve suh" min la ti zui!

."Tluangtea chuan a va sawi dik awm ve aw" ka ti zauh a.

"A teuh lo. A sawi dik lo hrim hrim..bialpa pawh ka la nei lo" a ti sawk sawk a.

"Zanah te hian min mangphan thin tiraw?" Tluangtea chuan a ti leh a. A remote ken lai chuan Tluangtea awmah a vawm a, "I ninawm..nangpa hi..haw rawh" a ti chul a. Kei ka lo nui char char. Tluangtea lah a nui duh der si lo. Bteii chu a lai chhe takzet tawh a ni. 

Ka phone a rik chuan ka tho nulh a, Kimi te veranda-ah chhuakin ka bialnu Nenei chu ka va be ta a..

"U Tri, ka ning" a rawn ti teh tawl a.

"Inah i awm lo mi!" Ka ti vat.

"Hei dawrah Apuia nen kan kal. Pi Saii te chu an la awm a" a ti a.

"Eng nge an sawi?" Ka ti vat.

"U Sawma chungchang an sawi teuh phawt a, Mi a atchilha a awm thin dante, a vei tawh a vei bur dan vel te,a tam mai" a ti mawlh mawlh a.

"I nuin eng nge a sawi ve" ka ti a.

"ENgmah a la sawi lo. A ngaithla ringawt..hei kan lut dawn. Nakinah chanchin ka lo hrilh leh ang che. Leng rei suu aw" a ti a. A dah nghal. Nu Saii te tih tur chu hriain ka inhria. Nu Sangi mizia ka hre bawk si, rilru a nuam lo viau mai. Kimi te thingpui hâng kan in zawh atanga reivakloah hawn ka rawt ta a, ka bet lo tih an hre ve bawk a, min hnial lem lo. Zira leh Kimi te hlim viau mah se, kan haw ta phawt. 

Lukira'n ,"Zira, kimi kha bem i tum mi?" A ti sup a.

"Tum pawh awm lo. A nuam ve a. Khatia kawm kha" a lo ti mai a. 

"nang pawh Bteii kha" tiin Lukira ka melh a.

"Nia, a cute ka ti..a innocent mai bawk sia. Ka iai miah lo" a lo ti a. 

"Alicia rawn let leh ta si se, i tina leh mai mai ang" ka ti a.

"Hei kan la inbe miah lo. A tlei viau aniang" a lo ti a. In kan thlen chuan Nenei te chu an lo inkhar thap a. Nu Saii te an la leng a ni maithei. Zira lah chuan,"An inpalai deuh tawp mawni le.." A ti sek a. Rilru a tinuam lo zual. Kan mu ve tak naa, mut a chhuak hlawl lo. Nu Saii te leh Nu Sangi te inmang tha thawm ka hriat rual chuan, Nenei ka call nghal. A lo la ve vat bawk a.

"Eng nge chanchin?" Ka tih chuan, "Anu nen inbe lawk r'u" tih leh Nu Sangi phone pek a rual a.

"Aw..tp, i mu tawh mi? I la muhil chuang lo bawk a. I lo phei lawk dawn mawni le" a rawn tih chuan, zâm namēn loin ka zâm a. Ka lungphu pawh rang tak a ni. "Aw le" ka ti a. Ka tho nghal.

Thiante bulah, "Min ko a..ka va phei lawk ang e" ka ti a. An pahnih chuan, "Huaisen rawh aw" an ti rual thawt. A eng chu an hria chu ni maw!..

Ka va phei chuan an nufain an lo thu dun ral a. Min lo melh nghal vat. Nenei bulah chuan ka va thu ve chat a. Nu sangi hmel chu a buai riauin ka hria, ka ngaihbel pawh a nu maithei. 

"Tp, a buaithlak hle mai..engtin nge maw kan tih dawn le?" A ti nghat a.

"Ka hrethiam bik lo. Eng nge an rawn sawi le?" Ka ti a.

"Sawma leh Nenei hi inneihtir mai ila, chhungkhat kan insiam a ni mai a. Nangni nufa pawh tihian kan inchhawmdawl zel ang a, tun tut tut kan ti chuang lo va, kan fapa dinhmun heti hi a nia. A ât phah mai ang tih a hlauhawm si a. Nenei pawn a rilru te lo siam se..an rawn tia" a ti ta mawlh mawlh a. Ka chau rawih mai. Ka rindan sa ni tho mah se; inneih em em chu an sawi thlen ka ring lo. 

Intihuaisen luiin,"Anih nangin engtiangin nge i ngaih?" Tiin Nu Sangi chu ka melh a..

"Ka fanu duhthlanna hi ka dah pawimawh em em, tin, kan nufa tana inthianho hlutzia ka hria. Nenei pawn a duh ve zia che ka hria. Mahse, kan dinhmun khirhzia chu i hria ang a. An in kan luah a, min khawngaihin engkimah min tawiawm bawk. Sum um hrim hrim chu ni ila ka fanu hi ka tir lui ang. Mahse, in pahnih duhthlanna ka dah pawimawh zawk a. Mipa zawk i ni a, i ngaihdan ka hre duh a ni. Nenei nen inlaichinna inneihna a la rei lo a. Ka fanu hi i duh tak tak lo a niha nakin i hma hun zela a leng lo a nih chuan, tuna sawi mai hi a tha a" a ti ta duah a. Ka chil ka lem khawlh. Ka nu leh pate min beiseina te ka hria. Sawrkar hnate thawk vea chhungkua chawm turin min beisei tih ka hria. Ka chhungte duhthusam vangin ka hmangaih em em Mapuii pawh rilru na takin ka kaltir a nih kha. Tunah khatiang problem tho kha ka hmachhawn leh si. Rilru a va buai duh em ..

"Mahse, Nenei hian a duh bik nang" ka ti nghut a. 

"Min hmangaih em a, ani chuan ka thu awih loh a hreh thin" a ti ta a. Nenei chu ka melh a, chhuat lam a bih ran mai. 

"Ka hrethiam lo khawp mai. Nupui nei tur em chuan thawh chhuah ka la nei lo va, tin, ka chhungte pawn rem an la tih ka ring lo bawk a. Amah hian min nghah theih dawn chuan chutia phatsan leh chu ka tum bik lo . Tun dinhmunah erawh chu bak tihtheih ka nei lo a ni" ka ti ta a. 

"Ih maw,Tp, nang hi iaina che ka nei lo. Ka haw hek lo che. Mahse, U Saii ten kan tana thil an tih tam tawhzia ka ngaihtuah hian, hnial thei dinhmunah ka dingin ka inhre lo a. Mahse, hnial ka duh bawk si. Chhanna eng nge ka pek tak ang? In pahnih chungchang lah sawi ngam niin ka hre si lo, nangmah thlengin i tawrh ka hlau bawk a. Rilru a hrehawm hle mai" a ti hniam raih a. A rilru tur chu hriain ka inhria. Ka khawngaih angreng zawk. Nenei chuan a aw a thian kharh a, "Nu, ka hmangaih em em che a. I thu awih fo pawh ka duh. Mahse, U Sawma hi zu in mi a ni a, a nunphung hrim hrimah misual chu a ni lo. Mahse, nu, a nu leh pate khi boral ta se engtin nge min chawm ang? Nangmah ang bawka vanduai khan ka awm ve leh mai ang em? Tin, ka hmangaih theih ka ring lo. UTri-a hi lo lang lo pawh nise" a ti ta a. A aw chu a khur dat dat mai. A kut ka va vuan a, a lo sa hat hat mai. 

"Naktukah kan thutlukna hrilh turin min tia. Inneih nghal kha an duh dan a ni em em bik lo, mahse, Sawma dinhmun mila Nenei insiamrem turin min ngen a ni ber. Nene, a harsat viau loh chuan, ngaihzawng ang em em pawh ni loin a lawmzawng anga awm chu a harsa lutukin ka ring lo. Chu chu ti hram mai ta che. Tihian, keiin puan thui hmangin dinhmun siam ka lo tum ve ang a. U Saii te puihna leh chhawmdawlna tel lova kan nufazaa ke kan pen theih hunah kan in luah hi kan chhuahsan dawn nia. Tunah chuan khawl leh puan than eng ilo mana kan sum dawn kha kan hmang deuh vek tawh si a. I tithei ang em?" Nu Sangi chuan a ti ta a. Chu chu a thutawp a ni tih ka hria.

"U Tri-a rilru a hrehawm dawn asin. Kan awmdun lai te a hmuh fo te chuan" naupangchhia taka a tih chuan, "Ngawi teh u, nia, Nene, i nu sawi kha a dik. Sawma hi an sawi hmangin a rilru hi buai thut thei a ni a. Chutia ngaihzawng ang tak taka va vawn pawh a ngaiin ka ring lo. A lawm nana lo biak that leh lo kawm ve kha a tawk maiin ka ring. Kei pawn zir lai hi tha taka tih ka lo tum ang a. Pathian zarah hna te ka hmuh ve theih chuan, i nu remtihnain kan innei dawn nia" ka ti ta hmiah mai. Chutiang taka puithu chuan tumah ka la hmachhawn ngai lo. Engmah ka la tiam thei lo miau a, tunah kan chungchang hi Sawma ten hria se, kei leh Nenei ten kan tuar thei. Chhawmdawl turin engmah ka la ni miau si lo va. Hetiang dinhmun khirh zet hi mi te hian an tawk ve tawh ang em le? Sawma hi a rilru a kim chiah tawh lo zawk niin ka hria. Nizan te khan va bawh buai lo se a inzai duh tak tak ka ring tlat! Nu Saii te tan pawh chinfel a harsa ve dawn hlein ka hria. Rilru muang lo zetin Nenei te chu ka hawnsan ta a. Engtin lek nge kan awm zel dawn ni.

Ka nu te pawh ka bia a, mak an ti ve khawp mai. Ka nu chuan, "Aaa..Bawiha, chutiangte chu zui reng chi a ni dawn em ni? An hausak hmel bawk si. In inluahna an ni bawk nen, nakin zelah i tan a hrehawm lutuk ang e. Bansan mai rawh. In inzuina a la rei chuang lo" a ti nghe nghe. Ka pa erawh chuan eng vak mah a sawi lo. "Mipa i nia. Thutlukna siam thiam rual i ni tawh" a ti mai. Ka thiante pawn, "Bansan zawk mai rawh. Nakinah hriat chhuah hun che u an la nei ang a. Nangman hrehawm i la ti ang. Sawma hian pawisak vak a nei lo a nia" an ti! Ni e, Sawma hian Nenei nen kan inngaizawng tih hria se tharum ang zawng pawn chet a la duh maiin ka ring. Ka hlau miah lo naa, ka thiante lehzel dinhmun ka tiderthawng ang tih erawh ka hlau. Nakkum kum chanve dawn in kan la luah dawn bawk si. Nenei ka ngaihtuah a, ka hmangaih niin ka la hre lo. Then dawn ila ka tawrh em em pawh ka ring hran lo. Mahse, Tun dinhmuna a duh miah lo mipa vanga bansan kha tlawmthlak ka tiin, dawihzepthlak ka ti ve bawk si a ni. 

Nenei pawn a nu thu zawmin Sawma chu tha takin a hmachhawn ta a. Sawma hmel hmuh pawh a nuam sawt hle. A hlim poh leh ka na thung si. Chumi kar tluan chuan Nenei thil zir chu a va thlahin a va hruai leh thin. Hetia an inzui nitin chuan, Nenei pawn ngainat hun leh khawngaih hun a la nei ang a, nawr ngai miah loin kei pawh min bansan mahna. Chutiang ka ngaihtuah erawh chuan na chu ka ti tho si. Zanah nise kan leng ho vek a, Lukira leh Zira'n min lenpui loh zanah phei chuan ka zum dúk maiin ka hria. Sawma a inti tatu-in a tlangnel bawk si. Ka mitmei veng reng renga Nenei khawsa hmuh hrehawm ka tih vanga ka len loh tum pawh a awm fo. Nu Sangi erawh chuan min be thain min la ngaina reng thung. 

Kan Batchmate Opa muhil an kai tho zo lo ta tlat! Thawhlehni a ni a. Zing karah kan thawh tlai avangin phone hi ka en hman vak ngai lo. Class kal tura ka insiam mek laiin, Msi'n min lo call a, "Kalpui ka nei lo, min lo nghak rawh , ka insiam dawn mek" a rawn ti teh ngawt a. Ka bo hle tih a hriat hnuah thil awmzia a sawi ta a. Kan batch chu Opa vuinaah kal tur a lo nia! Msi hian kan classa han kawm em em a nei bik lo va, a kawm ber Zampuii lah MSW lam daih a ni si. Chuvanga min lo sawm a ni. Ka lo nghak ta ran a. Nenei chhuak lai ka la hmu miah lo. Nizanah kan inhnial a, zingah a morning wish ka dawng lo. Kei lahin va biak tumna ka nei hran lo bawk. Englo a nia, Zan tir lama ka va leng kha, Sawma a rawn kal ve leh a. Sawma khan eitur ka show ang tiin Apuia te lehkha an zir bawk si chu, "Tp, kei aiin i naupang. Nang han lei lawk rawh" a ti a. Min hmuhsit vang ni pawn ka hre hran lo. Chu chu Nenei chu kalpuiah ka sawm a, "Nangmahin han kal mai rawh" a ti kher a! Sawma mitmei a veng ta vel lutuk chu ka ngei ta riau a. Thil chu ka han lei a, ei hmain ka haw ta daih. A inthiam lo nge min rawn text nghal a, "Ni r'u, ka kal mai ang" ka ti pek a. 

"Ka nu nen inremruatna ka zawm a, i lawm leh si lo, anih chuan U Sawma hi engkim ka hrilh ang, a nih nih kan ni ang a a ni mai" a rawn ti ta a. Keiin ka phal chuang bawk si lo. 

"Min fiam kual vel mai mai a nih kha..he lai awm nawm nan min hmang. U Sawma hi chuan min hmangaih..nang chuan min duh ringawt' a rawn tih takah chuan," A dik ang. Mang tha" ka va ti hmak a. Min rawn reply tawh lo. Sawma a haw tlai hle tih ka hre bawk. Rilru a kap em em naa, pa taka hmachhawn ka tum ve tlat. Nenei chu a kal dawn lo a ni maithei. Va zawh ka tum bik lo bawk. Hmeichhia leh uite a chul nel peih peih an tih kha maw..sawma chu a hlawhtling ta a ni ngei ang. Ni e, Nu Sangi nen kan duh angin a awm a, ka lawm leh si lo, ni lo, nizan khan ka fawp chak em a, dawra kalpuiah ka sawm mai chauh a ni. Sawma pawh khan engah vak a ngaih ka ring lo, min hnial kha ka la na em a ni.

"Lulian..lulian" Lalmalsawmi mai mai chu! 

Ka va hawng a. Ka inpeih sa vek tho a, kan chhuak ta nghal a. Kawngka ka kalh mek laiin Sawma leh Nenei te rawn inzui phei chu ka mitsirin ka va hmu a. Ka lungphu a rang sawt. 

"Einch, Tpa chuh! Kha kha mi?" Sawma chuan awmze nei zet hian a ti a. A nui vur vur bawk.

Msi hamhaih lai takin, "A chhe lo ve tho em?" Ka ti sup a, ka nui lui bawk. Nenei mitmeng danglam zawk pawh ka hmu. Inrunluih chu a cheap tih ka hria, mahse, nizana ka dawr kal ka inkhawngaihzia ka ngaihtuah letin hetia tih let ve hi tul ka ti tlat. Msi lah chuan a hrethiam ve nge ni, engmah a sawi hauh lo lehnghal.

Sawma chuan, "I phu lo zawk a nih kha..tiraw..nene" tiin Nenei kut a zu vuan a. Ka mit a la ngang mai. Nenei chuan thing sawn ta bik lo chuan, "Nia" a ti nghat a. Ka mitah tak rawn enin a nui sak bawk. Ka chhungril na zawk chu ka hre thei. An hnungah Msi nen chuan kan kal dun a. 

Sawma chuan rawn lehhawi zukin, "Inva tlai reng reng ve" a ti a.

"Nia, hei kan batchmate a thi a, a vuinaah kan kal dawn a nih hi" ka lo ti ve mai a.

"Keini pawh an miss a zin sia, an chawlh niah ka lenpui dawn nih hi..hun thawl a nei tlem sia" pangngai takin a ti a. Kei erawh na tak ka ni. A hun awl, ni khat tawp chu Malsawmtluanga tan a hlan a maw?! Eng chena thui tak lo kal tawh ang maw?! Ka ngawi hmak ta mai. Han sawia han tawng el tumna pawh ka nei lo. Nenei chu ka dem a ni tawp mai. Ni e, kei aiin Sawma chuan a tilawm thiam zawk a niang e. Msi scooty chu keiman ka khalh a, Nenei te hmuh lai reng chuan kan tlan chhuak zui ta nghal a. Vawikhatmah ka en lo a, ani pawn min melhin ka hre lo. A tha vek e. 

Opa chu ka khawngaih takzet. Mi ngawichawi leh tawng tam lo tak, mi pawisawi lo ber pawl a ni a. Lehkha pawh a thiam. Thian em em pawh a neiin ka hre lo. Amah hian a awm ve mual mual tawp kha a nia. Zinga a farnuin a va kai tho tur kha a lo khawng vek tawh a, an kai tho zo lo ringawt a ni. Damdawi a lo ti ve em ni ang? Ka ring si lo. Mihringin hmalam hun kan hriat lohzia hi aw..Mitthi vuinaah awm mah ila, ka ngaihtuahna chu Nenei bulah a awm thung si. Mak ka ti lo thei lo. "U Tri, nangmah nen pawh lo intawng lo ila, U Sawma hi chu ka duh chuang lo vang" a tih lai te khan dawt sawi hmel a pu hauh si lo. Engtin nge Sawma tan a ni khat hun a pek tawp theih? A zirnaah a kal dawn lohte chuan min rawn hrilh se, kei pawh chhuanlam siamin mitthi vuinaah ka kal lo ang a. Nilengin kan inkawmin kan awmdun thei mai tur. Mahse,nizanah thinrim takin kan inhnial ve bawk a, chu pawh lo ni tehreng se,..

"Eng nge maw i ngaihtuah vung vung le?" msi chuan min nghawk salh chungin a ti a. Ka phu uih. Kan class chuan a ruang chu kan va thlah ve dawn a lo nia. Ka ding vat a, Msi chu ka zui ta nghal a. Opa chu tui taka muhil chiah chiah hmel a pu. Ka lainat mang e. Vui zawhah Msi nen kan haw leh ta nghal a. A lo peng ve leh zuai. 

"Zinga hmeichhia nen khan inzawmna innei tiraw?" A ti ta chiah a. 

Ka zep buai duh ta bik lo. Kan dinhmun chu mak a ti ve viau aniang, a chek tlak tlak a. "Nang pawh i thiam bik lo a nih chu. A rilru a hrehawm dawn tehlul nen, mipa zawkin inthup leh engmah sawi i phal bawk si lo. Tha taka kawm turin i la nawr ta deuh deuh a. Kei chu ni ila, ka ngaihzawnsan daih ang che" a ti ta a.

"Mahse, kawng dang kan nei rih lo alawm. Keimah ringawtin tuar dawn ni ila ka hlau lo. Sawma hian a nunna te lak phah ta se, Nu Saii te khian engtin chiah nge Nenei te nufa chungah an tuan dawn ka hre lo…" ka ti a.

"A dik tho mai. A hmel pawh a that reuh kha. Thlem vat la, tha deuhin sawipui rawh" a ti a. Thingpui a in zawhah a haw phei ve ta a. Zira te pawh an rawn haw hma angreng. A ngaite bawkin kan hna chanpual theuh kan thawk leh ta a. Kei chu ka ngawichawi an ti deuh nge, "Sawi vek teh" Lukira chuan a ti teh ngawt a. Ka lo hawi á deuh. Mahse, ka hrethiam leh vat a. Nenei nen nizan lama kan boruak leh vawiin chungchang te chu ka sawi ta vek a.

Zira chuan, "Then mai rawh. I inbat hnawk tan tawh a nia aw. A aia tha i hmu dawn, tih tak emah chuan ka va hmuhsitna ni lo se; Zirna lamah pawh ani aia zirsang leh khawsak tha zawk pawh i hmu dawn lutuk" ka hma ngai takin a ti bawrh bawrh a. 

Lukira pawn,"Amah Nenei lamah chuan sawi tur ka nei hran lo. Sawma zawk hi kei ka khawngaih letling, heti khawpa hmangaihtu hi Nenei pawn a hmu bik dawn em ni? A tana Pathian ruat pawh a ni zawk maithei asin. Nu Saii pawn ,'Nenei vangin zu pawh a in leh ta miah lo. A lawmawm tak tak' a tia sin..chutiang khawp chuan an kal thui tawh. Lulian, tihian ngawi rengin bansan mai rawh" a lo ti ve ta a. 

Ka rilrua awm an rawn nemngheh ve ve takah chuan, kei pawn tha ber tur niin ka hre ve. Ka inbat hnawk thui zel dawna hriatna ka nei tlat! Nenei ka duhsak vang pawhin ka kalsan tur a ni. Tichuan, zalen takin inngaizawng law law se..hrehawm mah se, tawrh dam hun ka la nei dawn chiang.

Sawma'n a rawn thlah leh thlap a,an lo chhuk lai takin tui ka dawh si, ka hmu lo thei lo. Nenei chuan hlim hmel a pu hran lo va, lungngai hmel pawh a pu chuang lo. Milim ang maiin a nghet churh ringawt. Ka be lo bawk a, Sawma nen pawh lu kan inbuk khum zauh ringawt. Kan inhnaih leh lutuk hi ka tan chuan tawrh a hrehawm ve rih maithei. Mipa alawm ka nih le..

Kimi te inah kan leng leh daih. Kei erawh ka mood a dik thei thlawt lo a ni ber e. Lukira lah hi ALicia nen an inthen chauh a, Bteii hi a hnaih mah mah. Mahse,ani hi chu a rilru a lian a, chuti maia a thlahthlam leh mai erawh ka ring lo. Kan Nunzira hi a ni, Esi nen an chhia pawh a ni si lo va, Kimi hi engvanga belbul thar ta riau nge maw a nih le? Ka leng ve mang lo. Phone ka khawih char char ringawt. Dar 9 pelh hlekah kan haw ta ngawt a. Keimah vanga haw kan ni deuh, ka awm a nuam meuh lo tih an hmu thiam ve si a, min khawngaih niin ka hria. Nenei te in pawh a la eng pap mai. Kan Sawmtluanga chu a khi leh vur vur tawh ang chu. Thawh lawka va hnek bur te pawh ka chak lek lek. Mahse, Nenei mitmei hmu lo chuan hei chen a zui lo vang, kan nawrluih vanga be tha pawh lo ni mah se; mipa pangngai tan hriatthiam a hun tawh. Chuvang chuan hei chen a la chulnnel hi chu chhan tha tak a awm a ni mahna le.

Ka mu hmak. Muthilh erawh har ngang ngang tak a ni. Nenei chu ka va call buai chiam dawn em mawni te ka ti thut thut a. Mipa hna lo riauin ka hre bawk si. Ka hriat loh karin ka inngaihtuah muhil ve ta nge ni, Kawngka chum dawt dawtah ka harh a. Ka thawh hmain Zira a tho. A va hawn rualin, Nu Sangi aw kan hre nghal.

"Zira, khawngaihin min pui teh u..sawma saw" a ti a. A tap deuh purin ka hre bawk. Ka tho rang ngei mai. Lukira pawh muangchangin a rawn tho ve chhur chhur a. Nu Sangi chuan, "Tluangte,I nu Saii te han kaitho lawk mai ta che" a ti a. A insum nasa hle tih a hmelhmaiah a hriat. Eng tak chu ni ang maw ka tih mek laiin, an in atang chuan thinrim awrawl kan hre zui ta a, naupang tap thawm nen. Zira nen kan thlawk phei a ni thawthang e. 

"Chhuak vat rawh. Mi piangsual i nih hi..ramsa i nih hi" Nenei aw khur hlak hlak ka hriat rual chiahin kawngka ka kan. Sawma nen chuan an lo indinchilh ran mai a. Sawma hmel ka hmuh chuan mak ka ti! Chutiang taka nunrawng hmel chu ka la hmu ngai lo. Nenei chu sah sawm vek duh mai hmel a pu. Hmanrua erawh a keng hauh lo. Pindan atangin Apuia te unau thum tap chungin an rawn chhuak bawk..a va chhangchhiat theih ve le. Nenei kawr chu a dar veilam a thler a, a kawr hnuai hrui pawh a lang thei. 

" Eng nge a? Eng nge thleng?" zira chuan a va ti a.

"Lo inrawlh ve suh u. Ka bialnu nen kan inkar thil a nih hi" Sawma chuan a ti ro hak. Nenei a ling phat, "I bialnu ka ni lo va, ka ni ngai bawk lo vang. Haw rawh. Vawi khatmah rawn kal tawh suh" a ti tâwn tâwn a. Nu Saii leh Sawma u an rawn lang ve ta bawk. Chutia an pahnih indinchilh ran chu kan thlir reng ringawt. 

A hnuah, Nu Saii chuan, "ENg nge maw a awmzia le? Sangi,." A ti ta a. Keini tak pawh kan bangbo tlat. Anni pahnih lah an inmelh dun ngat ngat a. An thinrim em em bawk si.

Nu Sangi chuan, "Sawma hi hruai haw phawt mai teh e..u Sai.." A ti halh a. Sawma chuan pawr zetin,"Ka thu thu. Nang nu vang vek hi a ni..engkim i rawn tichhe vek" a ti ta mai a.

Nenei a sa leh phat, "Khatin ka nu ti reng reng suh. He mihring hian ka duh lo chung min khawih a tum alawm..kan thawmah ka nu a rawn harh a, mahse, ka nu lehzel pawh kut a thlak a, a mangangin U Zira te a va pun a. U Zira te a va pun tih a hriat rual khan min thlah chauh a ni. Khawngaihtakin he pa hi Home-ah emaw mi á dahnaah dah rawh u. Tual a la that duh mai ang" a ti ta hrep mai. Nu Saii meng tal tawp tawp chu ka hmu reng si. Kan inrin hmain Sawma chuan Nenei hrawkah chuan a rek ta thut mai. Kan phu suau a ni ber..chhuatah Nenei chu a tlu a, a rek na thawkhat aniang, a mitmeng pawh a buai nak mai. Mahse, kan tam hneh hrim a, Sawma kut chu kan laksak thei hram, ka kut humruh chu Zira leh Lukira'n an chelh ngat ngat, insum a va har ve le...Malsawmtluanga hnek ka chakzia hi aw…

Nenei chu a khuh bawrh bawrh a, a meng sen ram bawk. Nu Sangi'n tui a pe vat a. Sawma awmdan chu a mak takzet a ni. Hetiang em em zawng kan beisei pha miah lo. Khur hlawk hlawk hian, "Zawngi, ka ta i nih loh chuan tu ta mah i ni lo vang, i nunna kha ka la a ni mai. Thi la a tha zawk..ka duh lo ve te i han tih khanglan le..khaw nge" tih leh Nenei pan leh a rual a. Kan bawh huk mai. Ka insum zo ta ngang lo va, a bekah ka hnek ta siah a. Tawng erawh ka tawng thei. Nu Saii chuan, "A tawk e. Bawiha, ti nge hetia i awm le aw? Insum rawh. Ni e, Nene, ti nge nang pawn hetia ti leh tur si chu beiseina i lo pek?" Tiin Nenei chu thip zetin a melh a. Nu Saii, nu nelawm leh fel, thil phal em em hmel kha a pu tawh miah lo mai.

Nenei chuan mittui tling pam chungin, "A chhan chu ka nu leh ka bialpain ti tura min tih vang a ni. Kan dinhmun a chhiat em vangin..be chhe lo turin min ti. Ngaizawng turin min ti lo, ka biak that avang ringawt khan ka duh ve tihna a ni lo..pi, U Sawma hi a á alawm..doctor panpui hram r'u, a awmdan hi a mak em mai..a hlauhawm" a biang a ri thawk mai. Nu Saii'n Nenei a beng! Thinrim meng sen rum leh khur hlawk hlawk chungin,"Khatin ka fapa chungchang hi sawi leh tawh suh ang che. Nang hmeichhia, i pa pawh tu nge hriat loh, falak mai mai hian ka fapa hi i lo hnawl ve khanglang a maw? Tu nge nia i inhriat? I nu hnungzuiin i taksa i la zuar ve lovang tih pawh tu nge sawi thei? A tha e..ka fapa hi mi anglo i ti maw? Aw le..Sangi, naktuk ni chhuah hma ngeiin he in hi chhuahsan nghal ang che u..a chiang em?" A ti ta mai le..nu Sangi a meng phar awk a.

"Ngawi teh, U Sai,inbengdai teh..khawngaihin, kan lo dik lo a ni e..khawiah nge kan awm chuan ang?" A ti tham tiak a.

"Kan khawngaih em em che u a, a thlawnin in pawh kan luahtir che u a. Buaina intawh lahin kan tawiawmin sum leh pai pawn kan vur che u..ka fapain i fanu tikhawp hian a hmangaihin a atchilh a. I fanu khan mi anglo tiin a lo hnawl khanglang a maw? Kha i fanu tenawm zet khan a chawm thei ang che..a ch*** kha zuar se la.." A lo ti hlawih hlawih thung. Sawma u chuan, "Ka nu, insum teh..a mak bawrh bawrh em mai. Sawma pawh a dik bik hleinem.." A lo ti ve naa, "Lo tawng suh. Nang lah hi nem duai zel mai. Chhuak se a ni mai. Kan puihna tel lo hian engtin chiah nge an awm kan hria ang chu" a lo tihsan hmawk hmawk a. Thil chu a thleng zawt zawt a ni ber. Sawma lah chu a ding khawng reng a. A mitmeng atang pawn a harhfim lo tih a hriat ngawih ngawih. Damdawi a rui buai zawk te hi a nih ka ring. Zu rim pawh a nam tho. 

"Min puihna ka hria e. Ni e, U Sai, kan lawm em em reng a ni. Amaherawhchu, Sawma hian ka fanu hi a duhthlanna tel hauh lova khawih a tum a, kei a nu ngei pawh min zah zo loin kut hial min thlak a, Ka fanu hian chutah chuan dik lohna a nei em ni? I fapa kha zilh ve ta che" Nu Sangi chuan tah chhuah hmel zet hian a ti a.

"Khatiang falak sawn, mipa chi chi hrang hrangin a pawlh atang lo piangchhuak kha nula thianghlim a ni em ni? Lawm taka ka fapa hi lo dawngsawng zawk tur a nia sin" Nu Saii tawngkam zet chu leh! Ka insum thei ta ngang lo. Ring zet hian, "Duhtawk rawh u.." Ka ti tuar a. Min rawn melh thup. Kan in hnuai U Mala te kawngka hawng ri rak thawm a ri nghal. Ka tawng ring thawkhat a niang e. Nenei te in chung erawh in chung berah an mu a, an hre pha lo maithei.

Tawng leh ka tum lai takin Lukira'n min tawng khalh ta a. "A zia lo em mai. Duhtawk teh u. Zan a rei tawh a,miin an hre palh ang. Inbuaina lah a mualphothlak si..sawma, hawh u, chho ang u" a ti ta zung zung a. Zira pawh chuan, "Nia..Nu Sai, nangni pawh..chho ang u..zia lo em mai" a lo ti ve a. Kei erawh ka che sawn lo. Nu Saii chuan,"Zanin chiah inriak thei aw..naktukah chuan inhmel ka hmu tawh tur a ni lo" a ti a. Nenei tawng tuma ang ziau chu a ka ka va hup vat. Buaina a awm leh dawn sia. Nu Sangi erawh thutthleng seiah a thu hnawk a. A thaw kawk kawk mai. A mittui a dir zung zung bawk. A hmai chu a hup a. Apuia te unau thum tap pawh an lo bang daih tawh a lo nia..pindan kawngka bulah zum zetin an lo ding khawm taih mai. 

"Ka va zak em..ka nunhlui chuan min umzui zel chu a nih si hi maw.." nu sangi chuan a ti tiau a, a hmai hupin a tap khur hlawk hlawk mai. Nenei chu a nu ke bulah a va thingthi vat a, a bianga mittui luang chung bawkin, "Nu, a pawi lo. Engahmah ngai suh. Pawi ka ti lo, ka nu i ni hi ka lawm em em asin..nu, ka zahpui ngai lo vang che..ka hmangaih che. Keimah vangin zahna i hmachhawn a..min ngaidam rawh aw..ka thei thlawt lo a ni" tiin a nu kut chu a vuan a, lu insi rialin an tap dun ta tlawk tlawk a. Tihtur leh sawi tur reng ka hre hauh lo mai. Ka hriat chhun erawh he hmeichhe duhawm leh rilru thianghlim lutuk hi engvang mahin ka kalsan ngai lo vang tih hi...Lukira te pawh an lo lut ve tawh a..an ding ve reng ringawt. Apuia te lah an mittui an lo hru ve kiang kiang bawk.

"Kan vanduai em a ni tiraw? Ti nge maw ka lo piantir che u le..keimah kha lo thi daih ila a tha tur" Nu Sangi'n a tih leh phei chuan kei pawh ka hnuk a ulh. An buaina namën lo leh ril tak hi chunglam hian chinfelsak se ka va ti tak em..

"Nu Sang, a tawk e..insum rawh u. Apuia te pawh an hrilhhai em saw. " Zira'n a ti ta hlauh a. Nu Sangi pawh chu insiam thain a sam te a tuai mam a. Insehruh leh tumruh hmel tak hian, "Ni e, a pawi lo ve. Ka fanu him damna anih phawt chuan, kan vakvai zel mai ang chu. Sum leh pai hmanga kan zahawmna lei tumtu te thlazar hnuaia chen ai chuan, zalen taka ka fate nena meialh en pawh ka thlang zawk e." A ti nghet ta charh a. Ka va ngaisang e aw..

Nenei chu ka va kai tho a, ka bulah thuttirin a kut chu ka humsak a. "Min ring thei ang. Tunah chuan tuman an tibuai tawh lo vang che" ka ti a. Mittui kar atanga min rawn melhin a nui sak a. 

Apuia chuan a nu mal chung rawn belin, a nauten an rawn zui bawk a..gaby chu Nenei'n a pawm a. 

"Ih, Au Sawma kha a injection a" Apuia chuan a ti hlawl mai a. 

Zira'n ,"Khawiah " a ti vat. 

"Kan bawlhhlawh bawm dahna bulah" a ti mai a. An in leh kan in inkara satha ip bag var lianpui kan dah bul saw a kawi nget a, a va puk hlek bawk a, thil tih ruk nan chuan a rem viau ang. Ka ring a ni. Zu rui satliah ni se khatiang tak khan a bawraw lo vang. Inchhirna pawh a nei miah lo a nia! Nenei rehhlum a la tum zui!

A insum theih deuh hnuah Nenei chuan thil awmzia a sawi ta a. "Anu te an mu tawh a. Ka insawn pawn min rawn thut hnaih zel sia. Ka hlau deuh renh reng tawh a. Tv kan en a. A tawng bawrh bawrh emaw ka tih laiin ka hnute a rawn tham thut a, a kut ka lo paihsak vat a. A thu tha ve leh mai. Thingpui lum la a tih vangin ka va lum a, gas ka on lai takin ka hnunglam atangin min rawn pawm thut a, ka ka a hup nghal bawk. Mahse, min hneh bik lo, bangah min nam bet a, ka kawr hi a pawtthler a, a chak dan em em kha a rapthlak lutuk. Ka tal chhuak a, ka nu ka ko nghal tuar a, mahse, chhuatah min keuh thlu a, min bawhbet nghal. Ka nu rawn thoin rawn pawh thawh a tum kha a biangah a lo vai pawp a, a tlu hnawk nghe nghe. Chuan a rawn ko ta che u a nih kha..ramhuai a ni..ramhuai.." Tiin. 

An dinhmun chutiang chu a ni ta si a. Khawiah nge an insawn tak ang tih chu buaina a ni ta. Kan hmelhriat ang angte kan han biaksak a, naktuk zinga insawn nghal maina tur a váng si. Mang a ang khawp mai. Zira chu Kimi call turin ka ti ta tawp a. Kimi a call ta a. "Kimi, in in luah lehlam kha an luah lo tiraw?" A ti a.

"Aw..bia chu an awm reng a" a rawn tih rual chuan Zira chuan Nu Sangi te buaina chu a sawi ta zung zung a, Kimi chu in neitute inah a han chhohtir a, Nu Sangi leh inneitupa an inbe ta a. An buaina a nasat em vangin te deuh mah se, in dang luah tur an zawn chhung chu an luah theih tur thu a rawn sawi hlauh mai. Kan thaw huai hlawm e. 

"Zing dar 5-ah kan tho ang a. Kan inthiar chhuak dawn nia. Mu r'u,.a hla lo bawk a. Zing dar 8 hmain kan inthiar zo hman vek ang" ka ti a. U Sanga, kan khaw pa, Venghluia khawsa pick up nei chu ka va bia a, a muhil tawh ka kaitho zui a, a inthlahrunawm. Aniin bungraw min thiarpui theih dawn bawk chuan a zia dawn em a ni. A lo rem ve hlauh bawk a. Ngaih a tha ta e.

Hnukulh teuh chunga, "Kan tan chuan vantirhkoh inni e. Kan damchhungin kan tana inthatna hi kan theihnghilh tawh lo vang" Nu Sangi'n a tih chuan, Lukira'n ,"I fanu hi ka thianpa nen innei se a tawk mai" a lo ti zauh a. Kan han nui leh rih. Nenei nena kan inkara boruak eng emaw awmte kha chinfel a ni vek tawh, Sawi pawh kan sawi chhuak lo. Engkim chu Sawmtluanga'n a rawn siamtha ta vek a ni ber e. Ni e, he tah hian awm lo se, ka tan pawh a thlamuanthlak zawk. 

Kawngka bula ding chungin mit bui lek leka min melhtu chu ka kuah hnai a, a hmuiah ka fawp zauh a. "Muttui aw..engkim a tha vek a nia" ka ti a.

Ka sam rawn chul zauhin, "Muttui le..ka lawm e.." A ti sap a. Kan in lam panin ka pheisan ta hnak hnak a..

Buaina hi a kiang tak tak ang em? Vanneihsangi nen kan hringun kalkawng hi a la bumboh zel ang em? Chunglam chauhin chu chu a hre si a..

(Ka phone hi a hráng leh tawh..engtin mawni a awm..🥺