Vanneihsangi 6

VANNEIHSANGI (6)

Ziaktu: Toni Râlte

Amanda chuan Nu Sangi te chu Apuia te bo dan bakah an unau chanchin tlem azawng a zawt a. An hriselna a tha em tih leh an blood group thlengin. Nu sangi pawn felfai takin a lo chhang ve zel a. Amanda bula ding a assistant Samsona an tih chuan, Nenei melhin,"I pa khan i nu vih a tum tih hriain i va indawh tak tak em ni!" Tiin a zawt a. Nenei chuan, "Chemte a kawng atanga a phawi kha ka va hmu sia, ka nu a vih ai chuan tiin ka va din hliah tawp anih kha" a ti a. Sama chuan a ngaihsan hmel viau, nuam ka lo ru ve veng veng. Amanda chuan min rawn melh zauhin,"I Dam vat a ngai a nih kha.." Awmze nei zet hian a ti a. Nenei nen pawh kan innuih ve ringawt. An chhuah dawnah, Rs. 3000 hi inkan nan tiin an pe ve zui bawk a. Nu Sangi hnuk a ulh leh tawh. Amanda ten pawisa an pe tih ka hmuh rual chuan, Nimin tlaia RIni'n Zo Inspiration te hrilh a tum vel kha ka hre chhuak zawk a. Chanchin ka lo ngaihven leh miah lo. Amanda te chhuah hnuah phone phawrhin Rini chu ka va text ta a.

"Ka hrilh a. Post an siam tep tawh ang. An gpay no emaw an Ac no emaw a ngai dawn a. I lo ngaihven mai dawn mi niang" a ti a. Ka rui tawh lo bawk a. Anmahni rawn phawt ka duh thu ka hrilh ta a. Lehlamah mihring kan nih chhungin mahni tawkah chapona kan nei ve theuh a. Nu Sangi chuan lo remti pawh nise, Nenei zawk hi nula te a ni ve a, a zak emaw nuam a ti lo tih a hlauhawm ve tho a ni.

Nu Sangi leh Gaby te chaw ei hlanin Nenei chu ka kawm ta a. Ani hi chu inzai hlim a nih vangin chaw pangngai a la ei thei lo va, thil tuiril lam bak a la ei thei lo a ni. Zo inspriration vel chu ka sawi ta a. A ngawih vang vang hnuah, "Min khawngaihnaah ka lawm lutuk a. Mahse, ka nu rawn zawk rawh. Mi khawngaih nih hi a lawmawm em em rualin, mi thenkhat ngaihdan hi a dang ve daih thei a..tun dinhmunah chuan sum chu kan nei lo khawp mai" a ti ta a. A fing fel thin ngawt mai. Nu Sangi te chaw ei kham chu ka hrilh ve ta zung zung a. Vanneih asiamin, "Tp, zah pawh kan zak zo tawh lo a nih ber hi. U saii te rin ringawt chu a dik berin ka hre lo. Inhlawh thei tal ila a zia tak a awm ang a. Nangin tha i tih ang chuan ti mai rawh.." A ti ta a. 

Nenei ac no leh gpay no pawh Rini chu ka va thawn ve nghal a. Miin khawngaihin thilpek dawng teuh se ka duh ngawt mai. Ka awmpui nileng deuhthaw thei dawn tho a, Nu Sangi te nufa chu in lamah intifai leh Apuia te chanchin pawh ngaihven pahin an haw ta a. Nenei nen chiah kan awm ta. 

"A thing rim i nam ther ther" a ti sep a. A nuih tho vangin thinrimin a sawi lo tih ka hria. 

A zun an siak tawh lo va, a zun a chhuah takah chuan ka va kuah chhuak a. A zung zo kan let leh hma, bathroom chhunga kan la awm lai si chuan, "Nene" ka ti a,a lo hawi rualin ka fawp zauh. A khi sak a. "Ka rimchhe awm..ka la inbual thei si lo va..min ten lo ami?" A ti ta reuh a. 

"A thing rim ka nam ve tho hi" ka lo ti a. Kan nui dun kur kur mai. Keimahni tawkah kan hlim ve reuh lutuk. Kei aiin kum 4-in a naupang a. Puitlin kawngah erawh ka tluk kher lo maithei. Kei aiin a zinkawng a lo bumboh a ni bawk a. Ka muttir leh hnu lawkah dressing a ngaih vangin ka kai tho leh a, Dressing roomah ka kuah lut a. Min chah angin a bed sheet chu thiam leh thiam loin ka phahsak a. Damdawiin hi Pathian zarah ka la lut lo va. An kalphung pawh ka hre ve vak lo. An ward-ah chuan khum pathum chiah a awl a, mahse, a tu amah chuan min ngaihsak lem lo va, a zia phian e. An dressing zawhah hahdam takin a mu ta a. Inbual a chak thu a sawi sek vangin, "Tuilumin ka hru ang che aw" ka ti a..an khum bul ami te tuilumna chu hawh ka dil a, tui chu ka lumsak ta a. Gaby thawmhnaw la hak loh, an hawn theihnghilh chuan a taksa lang chin chu ka hruksak ta a. Nuam a tih ve hmel hle. A sam pawh chu a hnawk deuh vangin ka thiam ang angin ka phiarsak a, a phawkphawhraw lutuk chu kan han nui leh rih. Ka thiam ve dan a ni miau si a. A ke lam pawh ka hru a, a malpui vel chu tih chi ni hek lo. Amah zawk chuan a dul leh a awm te chu kawr chhanah a hru a, thei leh thei lo va hru a ni si, ka hmu thei ta lo a. Ka chhuhsak a a taksa chu ka taksaa hliah deuhin a taksa chhung lam pawh ka hruksak ta thuak thuak a. A khum hi a kil bera awm a ni bawk a. A zia viau mai. 

"Ka harh hawkin ka hria" a ti a. Gaby kawr chu ka va pho chhuak a, "Tp" min rawn titu vangin ka hawi zawk. 

Zampuii a lo nia! Mak ti deuh hlek hian min melh a. "Eng nge i tih? Naute kawr te kha eng nge awmzia?" A ti há a. A kalpuinu erawh ka hmuh vawikhatna a ni thung.

"Ka thiannu ka awmpui a. Eng nge intih zawk?" Ka ti a. 

"Ka u kan rawn kan lawk a. Tu nge i thiannu chu? I bialnu maw?" A ti zung zung a.

"Umm..Nenei a nia. Kha a pain a vih kha" ka ti ta a. A meng phawk deuh a, "Ehe! Kha nu kha maw..ka van hmu ve chak, Tete, hawh kan ve ang" tiin a thiannu chu a sawm nghal a. Ennawm angah a ngai mawni le..min zui lut ta a..Nenei chuan min lo en duh khawp mai. Zampuii te chu an hming ka sawi a. A nuih sak a. 

Zampuii chuan,"i chanchin kha kan lo hre ve a. Awii kan khawngaih lutuk che a. I naute an bo bawk si.." A ti luam a. A fel phian hi ka lo ti rilru..

"A van lawmawm..nia, ka naute vang hian rilru a hrehawm khawp mai" a lo ti ve a. 

"Tpa hi ka thianpa alawm..thianpa lutuk ang kha..a lerh ania aw..MZU-ah chuan. Veng tha hle rawh" nui hawk hawk chungin a ti a. Nenei chu a nui naa, a mitmeng a dik lo. Zampuii intihnelawm tum lutuk chu aw..a va tul lo tak. An chhuah dawnah "Kan lo pai tlem sia" tiin cheng 200 an pe ve a. An titha tho mai. 

"Kha nu khan a duh che a nih kha" an chhuah hnuah a ti ta chat a. 

"Awihawm loh" ka ti naa, engtin nge a hriat le ka ti rilru a.

"A awmdan leh tawng dan atang khan ka hre thiam nghal. U Tri, ors kha pleasin min lo siamsak" a ti daih a. Ka siamsak a. A in ve nghal. 

"Dam vat la, ka lo rim chak tawh che" sawi tur a vâng leh tawh.

"Anuin a hria asin" a lo ti daih a.

"Eng..kan chungchang hi maw?" Ka ti hú.

"Umm, tukinah ka sawi hmiah a. Pawi em?" A ti a.

"Pawi tehnang, eng nge a sawi ve?" Hre chak zetin ka ti a.

"A duh tak tak dawn che mawni le..fimkhur la, lehkhathiam an nia, tlangval fel tak an ni bawk nen..a lo fiam ve mai mai thei bawk che " a ti " a ti a. Ka ngai haw hran lo. Thu tiam kúr lûk chi ka ni lo va, kan awm zel dan tur chu hunin a la hril ang chu. 

"I mut chhuah chuan muhil rawh.Min vengthawng suh" ka ti a. Drip an rawn khai leh tawh a. A mitmeng a dul deuh vanga sawi ka ni ve bawk a. "Lo haw miah suh aw" a ti ngial a. Ka bu nghut. A muhil zui ta sák sák a. Kei pawh phone ka khawih mai mai. Pentawng la awm deuh nen , ka ham ka ham mai. 

Zampuii khan msg min lo thawn a , "Ka rin aiin i mit a hniam" tih chiah hi a ni. Ka nui hawk ringawt. Nenei aiin a indahsang ve deuh a nihawm chu..perek a an a an nen. Damdawiin chung zawlah mei zial zuin ka han chho a. Zira leh Lukira te pawn chanchin min rawn zawt ve a, ka chhan ve ve hnuah uluk zeta zial zu chungin ka thu ta veng veng a. 

Amanda te khan Apuia te unau hmu ta se, Nenei damdawiinah a la awm bawk sia, Nu Sangi tan a buaithlak duh awm. An unau enkawl ngai bawk, an vaiin damdawiinah an riak thei dawn bawk si lo va. Ka lo ngaihtuah ve vak vak mai. Ka ph a rik chuan ka phu zawk, Rini a ni. Ka la vat a. "An post tawh aw. Khawngaihtu an awm nual mai. Pawisa pawh an dawn nual ka ring. Ka lo hrilh ve leh lawk che a nih chu, chuan tha deuh khan enkawl la" a rawn ti a. Lawmthu ka hrilh ve a. An post chu ka zawng nghal. Comment lamah pawh an khawngaih hlawm viau. Thenkhat erawh chuan ngaihdan buluk deuh an nei ve thung a, "Pa ber khian engvanga a nupui hlui khi vih tum tak ni ang maw? A ril riau a ni lo maw? " tia awmze nei taka Nenei te lam thiam loh chan tum titiha awka nei pawh an awm ve tho. Ka comment ve lem lo va. Tiang tawk hi chu an awm ve tur pawh a ni. Nia, lehlamah chuan Pu Mawia khan kut thlak te chu a tih fo dan a nia. Khami zana hmanrua a lek kher kha chu kei pawn zawhna chu ka nei tho mai. Mahse, Nu Sangi te lam ka dem ve lem lo. Pu Mawia zu rui, a fate a kut atanga bo bawk inthiam lo ve tho si, thinrima mawhpuh tur zawng kual vel niin ka hria. Mei ka zu zo a. Ka chhuk leh ta a. A lo la muhil a. Ka tihtur hre lo chuan a muhil lai te chu a thla ka laksak a. Chutia keima tawka ka buai ve em em lai chuan Nenei phone chu a ri ta a. 

A harh mai si lo, ka ensak ta a. U Johny tia a save-in a lo call! A block emaw ka tia. Nge khami Johny kha a ni lo zawk. A lo call leh avang chuan ka aw thian kharhin ka pickup ta a. 

"Khaw nge amah..ka lo be lawk" a rawn ti a. 

"A muhil a" ka ti ve mai a.

"Kaitho lawk mai teh. A pawimawh sia" a tih chuan, "A pawimawh viau chuan lo kal mai rawh" ka ti ve hmiah.

"Tu nge i nih a?" A ti ta a. A aw pawn ngaihno a bei vak tawh lo. 

"A bialpa mawle" ka ti ngat a. Ka uang sual ang tih erawh ka hlau angreng. 

"Nih tak chu..a harh hunah ka be mai ang" a ti nghat a . A dah zui. Ka lung a awi vak lo ve tawp. Nenei pawh a rawn harh a. A mit a nuai chat chat a, rem leh rem lo hian a rawn nui a. Ka nui ve lo. Mak a ti deuh nge, "Ngati nge?" A ti a. 

"Kha. An be duh che a. Johnya'n " ka ti a. A phone ka pe nghal bawk a. A lo la vat a, a ner deuh bawk. 

"I thinrim mi!" A ti a.

"Ka bula i sawi dan kha chuan, i block thu te kha a ni sia" ka ti ringawt a. A phone chu a hmet malh malh a, "Kha en la. Ka block reng alawm. Min lo biak lehna hi a mumber dang a lawm..hei pawh ka'n block nghal ang e" a ti sawk sawk a. Ka hmuh lai rengin a block leh daih. Sawi tur pawh ka hre lo. 

"Min tihbuai a bansan tawh mai ang." A ti leh a. 

"Intihbuaitir tawh suh ang che. Mahse, block leh kher kha chu tul pawh ka ti lo. Keima block angah te a ngai ang e" ka ti a. 

"Ka be chak hran hleinem.." Tih pahin a phone chu a en leh a. Chutah, "Awii U tri, hei pawisa a rawn lut nual mai. Enteh" a ti chul a. Ka lo en ve vat. Pawisa lut tawh zat chu kan en dun ta a, a vaiin Rs. 36700 a ni tawh. A mittui a tling pam a. "Ih maw, hetiang zat pawisa hi ka ac-ah a la awm ngai miah lo" a tih chuan min dek khawp mai. 

Lawmthu min hrilh leh thin chu duh loin, "Ka tih a awm hleinem. Nakinah Zo Inspiration leh Rini te hnenah i la sawi zawk dawn nia" ka ti a. Ka lawm ve veng veng mai. Mizo mi nawlpui hi chu mi khawngaih thei, neih ang anga mi tanpui duh hi an lo ni ve zel a. Mizo nih nawmna ka ti mai. 

Nu Sangi te an rawn lan hnu rei vak loah kei pawh hawn lam ka hnaih ta a. Thu tam tak sawi dun lo mah ila; Nenei nen chuan inzawmna thuk tak kan nei tawhah tih ka chiang. Dam vat se, pangngai taka inzui ve te pawh a chakawm e. Apuia te chanchin erawh a la reh vung vung rih mai. In ka thlen chuan thiana te pahnih pawh an lo awm tawh a. 

Amanda vel chu ka sawi a, zira chuan a hmu chak ve ngang mai. Eirawng kan bawl laiin Sawma a rawn chhuk thla leh hnuang hnuang a. Hnuang hnuang tih hi a inhmeh riau, amah hi a san bakah a lian a, a kawr hak reng reng hi a loose-in a ni hnuang zel a. A felfai thlap lo ve thin bawk a ni. 

Nenei bawk a sawi leh tawh. Ngaihthlak a va hrehawm reuh tak. Nizana kan in bang kha chaw ei hmain kan ti leh sek a. Kei pawh ka awm nuam lo leh zawi ngawih ngawih kha a zia hawk mai. Mahse, naktuk atang chuan dry ka tum rih. Min tithuanawp leh dawn tlat! Sawma pawh chawhmeh a han suak a, kan bulah a kil ve leh hmiah. Kawm hi a nawm ve tho bakah a thil phal si a. Keini tan lo kawmserh kha a theih loh hul hual. Chaw ei kham hnu dar 8 velah Zira nen an zuk down leh pek a. Kan zui ve peih ta lo. 

"Alice chu a tha zel maw" ka ti satliah a. Lukira chuan, "Umm..mahse, a cousin a tih ve ziah Rsa saw ka hmumawh riau" a ti hawk a. 

"Ngati nge? Engtin nge an awm a?" Ka ti hu a.

"Chutiang ang chuan an awm chuang lo, mahse, a care lutuk a, Rsa'n chhuahpui a tum vangin vawiin chawhnu pawh ka haw hma phah ringawt. Chhungte tlawh kual kan duh sia..a tia. A la dam chiang vak lo chung chung a chhuak a, kal ve tur chuan min sawm naa, Rsa hmelah khan min mamawh vakin ka hre lo va, thinrimin alawm ka rawn haw" a ti ta a. 

"Alice chuan a va timak ve aw. Mahse, a cousin a nia. Hmeichhia chu i hriat kha" ka ti ringawt a.

"Class kal ka ngai tih te pawh a hre ve vek a, kana va hmu reng turin min beisei a. Ka thei bik si lo va" lungawi vak lo tih hriat zet hian a ti a. Ka bu nghut ringawt. 

Nenei te tanpuina dawn thu velte chu ka sawipui ta daih a. "Lulian, i tifuh ang, Nenei hi a tirah kha chuan ka ngaihven ve vak lo va, mahse, ka chik ve deuh hnu pawh hian hmeichhe tha tak leh rilru tha deuh a niin ka hria. Bakah amah ka va hmuhsitna ni loin an dinhmun heti hi a ni ve a. Hmeichhia nei ve deuh, tlema hausa ve deuh inla leh hautak deuhte ai chuan, i chhungte tan pawh a thlamuanpuiawm daih zawk ang" a ti ta duah a. A kamnam ve deuh bawk a, a tawng nuam ve kher mai.

"Nia, a inngaitlawm reuh bawk sia. Ka duh ve dawn riauin ka hria" ka ti a.

"Mahse, Sawma hi ka vengthawng deuh. I hre kher lo ang a, a hmain he ta kan awm hma khan Sawma hian hmeichhe pakhat a atchilh tawh a. A at phah tep a, ruihhlo a tih chhan pawh hi kha nu vang kha an tia. Ka va hre ve chiah lo naa..a duh tawh chu atchilh tawp chi, neih ngei tum ang kha a nia. Nakinah in pahnih tan hian hnawk a la siam ang em aw ka ti mai mai" a ti ta a. A ruka min kamtu leh min mawlh ve rengtu kha a ni hrim hrim a. Chutia a han sawi takah chuan rilru a tirit zual. "Mahse, Nenei'n a duh ve kher nang" ka ti hram a.

"Duh dawn lo e. Mahse, Nu Sangi hi ngaihtuah la, Nu Saii te laka ba nei anga a inhriat chuan a tichhe ngam dawn miah lo ania" a ti a. A dik ka ti bawk si.

"aa. Hunin hril mai teh se" ka ti ta ringawt a. Nenei ka call zui nghal daih.

"Aw U tri' a rawn ti sep a.

" i va chauh hmel ve ,i khua a sik leh mi?" Ka ti a.

"Aw..chaw ei kham khan a rawn sik a. Mahse, hei min chhawk leh tawh e.." A ti a.

"Pawisa chu a lo luh belh leh tawh em?" Ka tih chuan, "Aw a tam tawh lutuk, Sing nga a tling tawh.." A ti a. A aw pawh a zangkhai ta deuh.

"Min ngai em?" Ka ti a. Lukira a lo kiai suk. 

"Ngai e. Nang?" A ti sap a.

"Ngai che a, ka lo call che hi.. Chhuak vat ula ka ti" ka ti a.

"A cham tal awm a ngai dawn a. Ka peih lohzia hi. E chuan, Apuia te pawh an zawn ngawrh thu leh Pi Feli hmutu an awm thu an lo sawi a. Rilru pawh a nuam deuh" a rawn ti siam siam a. 

"A va lawmawm..mahse, Nene, apuia te hi hmu ta se, i nuin a awmpui thei tawh awm si lo che a.." Ka ti a. 

"Keimah pawn ka awm ve thei tawh mai ang. " a tih chuan, "Ngai lo, Kan dil ang a.keiman ka awmpui ang che" ka ti vat a. Zira te thawm ka hriat vangin, "Ka dah rih ang aw. Phone i khawih peih chuan kan intext dawn nia. " ka ti a. Ani pawn engmah a sawi hran lo. Zu rui chunga va biak hi ka inthlahrung tlat tawh. Zu a haw ropui si. 

Zira chu thutthlengah a rawn thu sawk a. A túm bûr mai. Sawma lah chu a hmui chu a vung nge a kawh deuhin ka hria. 

."Ngati nge a?"ka ti a. Ka melh dun a.

"Kan lamnaah khawi veng tlangval rual nge pawh ka hre lo, kan intibuai khanglang a. Ka hnar pawh a thi lawm..ka tifai tawh nih hi" a ti hlur a. Sawma chu va melhin, "Saw lah saw lian thlawn ringawt. Amah aia te pawh hneh lo" a la ti zui! Lukira nen kan nui huk. Sawma lah chuan, "Ekhai! Bro, a che rang reuh lutuk, ka che hman ve lo re re.." A lo ti mai a. Huatah an la lem lo bawk a. Thudang kan sawi ta daih a. Zu kan han in leh takah chuan an buaina chu an ruihchilh lo nge an sawi zui tawh lo. A zia e.

"Nenei ka'n call ang e aw. Ka nu ka dil a, a number ..lo tawng miah suu aw" Sawma chuan a ti lung lung a. Ka thin a na zawk. Lukira'n ka ban a rawn hmer zauh bawk. Sawma chuan a call tak tak a. A ring ral ral hnuah ,"Hello" Nenei aw ngei mai chuan a rawn ti ta a. 

"Nene, keimah sawma, I pi Saii fapa kha..min la hria em?" a ti nghal bawrh bawrh a.

"Aw a ni maw? ENg nge ni ta?" A rawn ti dam diai a.

"Aa. I ngaihawm em a. I dam tha deuh tawh em?" A ti thur thur a.

"Aw ka zia ve zel e" a rawn ti a.

"Englo a nia. Hei Zira te inah ka leng a. Kan sawi reng che a, Lo chhuak vat ula kan duh khawp mai. Chuan, ka rawn leng chak tawh" a ti mawlh mawlh a. Zu ka thli a, ka thawk khat piap. 

"U Tpa a awm ve em? Zu a in ve em?" A rawn ti teh daih a! Sawma pawn min rawn melh kâwk mai.

"Awm e, in ve e..a heh ber a lawm ni te chu..haha..tak taka Nene, ka hmu leh chak tawh che ee..ka rawn kal atang khan ka la vei ngat ngat che. " a ti hmiah hmiah mai. Ngaihthlak a hrehawm em vangin zung tur niawm takin bathroomah ka lut daih a. Nenei chhanna erawh ka hre chak tho si, ka beng ka va dawh ru dáwk dâwk tho.

" Aa. I nau alawm ka nih. Keite chuan bialpa ka nei reng alawm" a rawn tih chuan ka mur uai ka ti mai. Engtin emaw ka awm. Nenei zawk chu venthawn a ngai tawh zawkin Zira leh Lukira chuan an hria nge, "Nene, kan la rawn kan leh ang che. Sawm, dah tawh rih rawh. A chau ve ang" Lukira chuan a ti a. Zira pawn, "Nia, inkawm tui lai lai a" a lo ti vat. A dah ve ta hram a.

Mahse, a ngui vek. A mood zawng zawng a chhe ta vek mai. A chhan chu Nenei'n bialpa a neih thu a sawi tlat! Tu nge a nih hre lo mah se, a thinrim tho. 

"A tu phiangsen chuan nge min chet khalh le..zawnga chu ka hriat hunah a chak lo ang. Kan in an luah tih an hre lo mawni le..Nenei te chu rawn chhuak teh se, eng nge ka tihtheih an hre mai ang" a ti pûng pûng a. 

Rilru chak tih takah Zira chuan, "Heta an lo awm hma khan a nei tawhin ka hria. Ka zawh khan a sawi tlat. Bawngkawna an awm laia a neih a niang" a lo ti var a. Boruak hahthlak zet chuan zu ruih pawh a tinuam hrep lo ve. 

Nenei msg ka dawng zui nghal bawk. "Zu i in leh a maw?! I mak ee.." Tih a ni.

"Ka tihpalh. A awm remchang sia, naktuk atang chuan dry ka tum tawh alawm" ka ti vat a.

"U Tri, kan la inngaizawng rei lo ka hria. Mahse, zu ka huatzia i hre tawh. Zu in mi hi chu ngaihzawn loh hram ka tum thin" a rawn ti a. 

"Ka hria alawm..ka in tawh lo vang" ka ti a.

"Chuan, khapa kha aa..nge tikhan mi rawn biak chiam a" a rawn tih chuan ka nuih a za deuh a. 

" A duh ve che ka tih kha" ka ti a.

"Ka duh ve lo e a. " a ti hmak. Ka tan ngaihthatthlak mah se; Lukira sawi ang khan hnawk hun a la nei dawn tlatin ka hria. Nenei hming a sawi zin danah a vei tak tak tih a hriat bawk si. 

Class pawh kan kal pangngai chho a. Dry hun kan tihah chuan in tur awm mah se, kan ti lo thei viau. Kei pawh ka dry leh ta char char a. Class ka kal tawh vangin Nenei pawh ka tlawh thei tawh rih lo. Kan inbe reng tho a. A zia chho zel a, chhuah a chak tawhzia a sawi ve reng mai. Zirtawpni tlaia eirawng kan bawl lai chuan, Sawma a rawn tlan thla hlawk hlawk a. "Naupangte kha an hmu tawh" a rawn ti hlawl mai. Kan phâwk kher mai. Amanda inrawlh atanga ni 3-naah Apuia te unau chu hmuh an ni ta. Thu chiang engmah kan la hre lem lo naa kan lo lawm ve hle. Nenei biak ka tum mek laiin amah zawkin min lo call a. 

"Apuia te an hmu tawh" a rawn ti hlut a.

"Nia ka lo hria a. Engtin nge?" Ka ti vat a.

"Ka la hre bik lo. Anu a rawn phei dawn e. Inlo tawiawm hram dawn nia aw" a rawn ti a. Ka pawm hle. Ka thiante pawh ka hrilh ve a. Rei vak loah Nu Sangi te nufa pawh chu an rawn thleng a. In a va tlawh zuai a, Police station lamah phei leh nghal a ngaih vangin a va inthlak ve lawk a niang. 

"Nu Sang, kan lo kal ve ang" ka lo ti a. A lawm hmel kher mai. "Ka phut ngam lo che u a " a ti a. Sawma motorin kan phei ta a. Station kan thlen chuan, Apuia te unau chu mitmeng vai riai leh cher kuam hian an lo thu ran mai le..a nu an han hmu chu an rawn tlan nal nal a, an nufa chuan an inpawm thlawp mai. Hnukte pawh a ulh alawm le. Atea phei chu a tap faih faih mai. Apuia te thutna piah deuhah chuan vai pakhat, zungbun ngah zet , dulkiar hmel hmuh nuam fahran lo leh Pi Feli kha an lo thu bawk a. Kutkawl an bun ran mai. Pi Feli chu hrehawm ti leh zak hmel pawh a pu chuang lo. Amanda a rawn lut a. Nu Sangi te nufa a hmuh chuan, "A tha vek tawh e. Tikhan inhaw thei e. Naupangte u, Anu hmuh leh chu a nuam em?" A ti seuh seuh a. Apuia chuan mittui tling pam hian, "Umm..ka ngai tawh lutuk a..gaby pawh, Nenei pawh" a lo ti ve a. Atea chuan, "Anu, khaw nge Neneni " a ti ta chat a.

"A ngai tawh lutuk che u a, a dam lo a, damdawiinah a awm alawm" Nu Sangi chuan a lo ti ve a. An inhmu leh chu lawmpui tak ka ni. 

Nu Sangi chuan Amanda melhin, "Ka pi, ka fate rubotu te chu saw mi te saw maw lo ni?" A ti fiah kák a. Amanda chu a bu zauh a, Feli te lam thlek chungin, "Hremna a nep vak lo ang. Kan tlai thelh lehnghal.." A ti nghat a. Feli chu a rawn hawi lo. A ngam bik lo a ni maithei. Nu Sangi zawk chuan a va pan a. Gabby erawh a u te a hmuh khan a chhuk tharh a, Apuia'n a kai a. 

"Ka pasal pawmlai min chuhpui pawh duhtawk lo va ka ril arah ka fate chunga i thiltih avang hian ka damchhungin ka ngaihdam che ring ngai suh ang che" a ti zawi raih a. Feli biang a ri thlawp. A na thawkhat khawp ang le. Police te pawh chuan an khap miah lo nia! A awm an ti ve a ni ngei ang.

Nu Sangi chu rawn phei lehin, "An ruk bo dan chanchin leh ka fate hrehawmzia leh retheihzia chu hriat kher pawh ka duh lo. Nungdama ka hmu leh hi ka lawm tawk em em a ni. A bikin i chungah, Pathianin kan chunga i thiltih hi a la rul let ngei ang che..dam reng rawh" Tiin Amanda chu a melh a. Mittui a tling piau bawk. Amanda chuan, "I fate nen zalen takin va khawsa tawh rawh u. Tibuaitu innei leh tawh lo vang…" a ti nghet charh a. Lukira chuan Gaby a va pawm a, Zira'n Apuia te unau a va kai bawk. Amanda chuan min rawn melh a, ka lai chhe viau, nui sak chungin, "Ani hi i makpa nihtir ngei ang che..i fanu a melhna mitmengah khan dâwt a awm lo" a ti zawi raih a. Nu sangi'n min rawn nuih ve bawk. A nuam a, ka zak bawk si. Nu Sangi nen chuan kan chhuak ve ta a. 

A hnua kan hriat leh danin, Feli leh Vaipa khan a hmain ruahmanna an lo nei tawh a, Feli chuan naupangte chu hruai hawn tum anga hruai chhuakin hotel lar lo tak pakhatah a luhpui a, Vaipa te nen chuan an awm ta a. Muthilhna damdawia an chiu zel vangin Apuia te chu an harh hleithei ngai lo va. Chaw erawh an pe ve. Tichuan, nilaini khan boruak a reh ta deuhah ngaiin Zan zanin Gauhati lam panpui an tum a. Vairengte lamah pawh lo check mah se, an thuhruk miau vangin an tlang ta a. Gauhatiah hotel langsar lo takah thleng lehin naupang pahnihte chu an kal hralh turin doctor te an be fel a. Mahse, an doctor biak kha chhungkaw rokhawlhna vangin a hunah a va kal thei ta lo va, chumi vanga an inhauhna thawm chu chu Doctor te ina maid- Manipur hmeichhia chuan a lo hre ve a. Mizorama naupang bo thu te a lo hre ve bawk nen, ani hi a Mizoramah te pawh lo awm ve hrep tawh a lo nia. Tichuan, Mizoram house lam be pawpin, tikhan Amanda ten an zuk chhui ta bawk a. Feli te awmna tak erawh an hriat loh vangin an tlai hman thelh a niawm e. 

A tawi zawngin sawi mai ila. Nenei pawh a zia chho ta viau bawk a, An chhungkaw harsatna te hrethiamin Doctor te pawn an discharge ta hram a. Indim erawh a la ngai viau dawn a ni. A naute nen an han inhmu chu hmuhnawm tak an ni. Zira takngial pawh a khap ve fuk fuk mai. Atea'n, "Ka mumangah ka hmu thin che a, ka ko che a. I eih duh ngai si lo va" a tih laiin, Apuia'n ,"Nia, Atea hian a tawngvaihin, Nene a ti ve ziah zel" a lo ti ve a. Nenei pawn mittui tla parin a naute chu a pawm hlu hlu mai. Apuia te unau kha Doctor ten an hriselna dinhmun an endiksak ve leh a, an tha a, mahse, " An bo laia an awmdan leh an kalna vel chu zawh chi vak an la ni lo. Hlauhna hmanga thunun an nia. An buai phah palh ang. " an ti a. Tuman kan zawt duh lo. An leng lo haw ang in kan treat a nih ber chu.

Pawisa kha an dawng thahnem ve riau a, an awmna bill pawh Nu saii te peksak ngai loin an pe thei a. A la bang nual bawk nen, Nu Saii thurawn angin Nu Sangi chuan an inah chuan puan thuina dawr hawng nghalin, Puan than te a lei khawm ve a, khawl a lei thar bawk a, amah inzir peih mi a ni bawk a. An la hriat lar ka ring tlat. Mipa thawmhnaw thlengin thui leh zai a zir a, Nenei erawh indim a la ngai bawk a, in lamah a tangkai ve tho bawk nen. A thawhnaah a la kal lo va. Nu Sangi chuan, "Khawl khawiah puan thui tur chuan zai tawk tawh ania, ka khawngaih deuh sia. A zai dan leh design te hi zir ve se, keiin lo thui zel ila, mi hnuaia thawh ai chuan a tan pawh a nuam zawk ang" a ti a. Tin, sawi hmaih loh tur pakhat chu Apuia te an bo vanga tanpui nan min bialtu Minister-in Nu Sangi te chu Cheng nuai hnih lai a pe ve bawk a ni. Bultanna tur an nei ve ta bawk a. Nenei pawn Designing lam a lo tui ve tho bawk a, zirna tur an han enkual a. Kan veng chhungah a awm lo phawt. Kei pawn ka zawnpui ve nasa khawp mai. Rini bawk kha a tangkai leh ta, Rini nuteii , nula senior hian dawr a nei a. A hnuaia thawkte chu hlawhtling takin an chhuak deuh vek zel aniawm e. A hnuaia va training ve tur chuan Nenei pawh a in-admit ve ta phawt a. Ramhlun lam daih anih vangin busin a kal mai zel a. An zaina pawh a dam fel tawh a ni mai e. Rit erawh a la chawi lo va. A training hma leh a training inkarah thil tam tak a thleng a, Amah a la damkawr deuh vang leh Nu Sangi puanthui vela an la buai ve deuh niaih vangin Sawma a la che na ngam vak lo va. Apuia te lo haw ve nen. Zantin erawh kan leng ta kha a nia. Nenei bulah Sawma chungchang leh a nu lama ka hlauhthawn thute pawh ka sawi vek a, chuvang chuan Sawma chuan kan pahnih chungchang hre rih lo law law se kan ti a. Tha takin a biain a lo kawm ve tho a. Ka mitmei erawh a veng thiam khawp mai. Sawma lah chuan a ni telin a duh telh telh mai si. A va inzirna turah te chuan ani tihtur nei ta lo chuan, "Ka va hruai thin ang che" a ti mai a. Mahse, "Ngai lo. Ka lawm.." tiin Nenei'n a lo hnar ve tlat. Ka rilru te tein, Kan khuaa han haw lawka bike ken thlak ka chak hle. Mi dang motora ka bialnu kaltir reng chu ka hmuh theih ka ring lo a ni. Mahse, ka bialnu hi rin aiin a lo nghet phian a. Sawma chu zahawm leh nelawm tak siin a hnar thei zel a. Ka chhuang ru ve khawp mai. Lukira leh Zira te pawn min duhpui hle tawh. 

A zirna a tan ni tlai a lo haw chu a rawn peng kawi a. Jean pawl tak zet, a bawp khal zet tilang mawi zet tur a ha a, chapal kaih hnawk deuh a dum a bun a, tshirt dum simple tak a ha bawk. A sam chu a tawn fel leh thak a. 

"A nuam em?" Ka lo ti vat a.

"Umm, nuam ve tho. Mahse, kawm tur ka la nei vak lo va. Kei aiin an u vek a. Ka la nel vak lo " a ti mial mial a.

"I kal rei ang a, i nei vat mai ang. Rini nuteii chu a fel em?" Ka ti a.

"Ma'm Siamteii maw..awii a fel tawp, Chuan, U Rini kha lawmthu min lo hrilhsak leh mawlh mawlh rawh aw. A fel eee" a ti hlut a. A mitmeng nung sar chu hmuh a nuam hle. 

A bag khai chu a zen rak rak a, "Kha ka lo hawn che u, tui inti viau ang. Ih, hmana ka school kalpui thin Tawipui south ami nen kan inhmu a, An savun bawl hi a chhung ten an lo chah nual a, pahnih min pe ve a" a ti a. Savun bawl chu dawhkanah a dah a. "Ka va phei ang e, zanah lo phei hma la aw" tiin min rawn melh zauh a. Kawngka thleng ka va thlah a, "Sawma'n a lo be leh che em?" Ka ti sup a.

"Bia bia..ka ning ania" a ti hlak hlak a. Hmeichhia a nia, a thin a chhe ve hlek hlek lo thei lo. 

"Zanah kan sawi tha dawn nia" ka ti ta ringawt a. 

Tun hnaiah Lukira mood a inthlak nasa hle. A chhan pawh Alicia vang a ni. An boruak a tha vak lo tih a lang. Alicia leh a cousin Rsa te inkarah chuan eng emaw awmin a hre si, fiahna a nei thei si lo ..chu chuan a tingui ve deuh a ni ber. Tunah pawh an inhau leh tawh. 

"Ih maw, Alice, ka hrilh ang che. ANi kha ka thik tih i hriat reng te chuan ti nge kei aia i ngaihpawimawh tlat a? I chhuanlam teivet lah hi..ka rawn hmu reng thei lo che tih i hre ve reng.. Lirthei ka kawl loh hi..min hrethiam ve ta che" a ti vin thak thak a. Zira'n hmarcha a rawt a, keiin Savun bawl chu plate-ah ka dah chhuak mek. 

"Aw..a tawk anih chu..ni e, i cho zek zek bawk a. Ka kal ang. Ka kal em em ang. Inchhir miah suh ang che. Alicia" tih leh phone dah a rual a. Hah hmel deuhin a thu awn a. A thaw hawk bawk.

"inva buai rei tawh e aw..ti nge i chinfel theih miah loh a?" Zira chuan a lo ti a.

"Ka tum alawm. Chinfelna kawng a tiping zel alawm. Rsa kawm tawh loh ai chuan, min then a thlang zawk a. Tikhan a tawp " a lo ti nghut a.

"Bro, inkawm ringawt te chu nang pawn phalsak ve la, cousin an ni bawk nen, i khirh mah mah zawk a ni lo maw?" Ka lo ti ve a. An inzui rei ve tawh si a, tun anga an buai hi a la awm ngai lo va, keini tak pawh kan lo buai lo thei bik lo a ni.

"Cousin ...hmeichheho inphenna tawngkam mai mai a nih hi..inkawm ang hmiang, kei aiin ngaipawimawh lo se kan buai lo ang. Nimin piah zanah pawh ka va kal a. An in chung zawlah kan thu a, Rsa'n a rawn call a, a thianpa nu damdawia a awm thu leh kan puiah a sawm a. Min vengthawng eih lo, 'Tluangtea a lo leng a, a hawnah min lo lam dawn nia' a ti hmak a nia. Ka tan len rengna chi pawh a ni lo..ka thik tih a hre tawh a, min runluih zawk niin ka hria. Saw Remsanga saw a hma zawng khan a rawn lang ngai lo, a dam loh atang khan a rawn vil thut a, eng emaw a awm a ni mai" a ti nghut nghut a. A vuivaina erawh mipa rilru atang chuan a awm hle bawk si. Alicia pawh va biaksak ve hrim hrim tur a nih hi ka ti rilru a. Kan thianho kan fair vena chu kan bialnu te theuh hi tul tawpah lo chuan kan inbiaksak ngai lo. Biak an phal loh phei chuan tul tawpah pawh kan be lo hmiah zel. An bialnu ten min rawn biak erawh chuan kan inhrilh leh thlap thung. 

Chaw kan ei zui a, Savun bawl chu Lalnunzira'n a thak belh leh khanglang a. A tui tehlul nen, duh angin kan ei tha leh ngam pek lo. Biang sa hut hut chungin, "Lalzir, nge i pawlh belh le..kan ei ve i phal lo mi?" Ka ti hlur a. A nui vur vur duh chauh. Thleng ka sil lai te pawh chuan ka la si hlup hlup mai. 

"Zanin chu Lukir, Kimi va rim ila" Zira chuan a ti a. Kimi hi nuthlawi fa pakhat nei tawh a nia, an rawn awmna a la rei lo. Mahse, a hmain college kan kal lai khan kan canteen an nghak thin a, kan inhre tawh a ni. Kan in atanga hla lo teah a nau tleirawl nen a fapa nen in an rawn luah ve a. Kimi hian thingpui dawr a siam a, kawn lamah a daih a ni thung. A nau erawh college kal lai a niawm e. Baktawng khua an ni. A taima in a ei siam a tui bawk a, a hausa phian ang. Kan college canteen an nghah lai khan pasal a nei tawh a, keini aiin kum 3 vel chauhin a upa ang. An pa nen an inthen hnuah pawh Aizawlah tihian a la inbengbel ve zel a nih hmel. A fel a, an in bul lawkah kan awm ve tih a hriat khan leng turin min sawm nghal var a. Vawi hnih chu kan va leng tawh. Lukira erawh vawikhat. 

"Pawi hleinem.." Lukira pawh chuan a lo ti ve a. Kei erawh ka lenna tur an hria. Ha ka nawt a, ngaihtuahna thar ka nei zawk. Ka khi ta sak a.

Nenei ka text a, "Zira te an leng dawn. He tah inkawm zawk ila, Sawma a lo leng leh palh ang" ka va ti a. 

"Anu ka lo hrilh ang aw" a rawn ti ve mai a. A tihchi dawn lutuk. Zep nâk emaw chance pangngai tak hi kan la nei lo reng reng. Naupangin min chim loh leh Sawma a awm ve kur zel sia. A nu hi chuan kan inkar a hriat vek tawh avangin ka zah lutuk tawh lo va. A fala inkawma duhthawh deuha fawh vete ka chak tawh. Dar 7 a pel tawh tihin, zawitein kawngka a rawn hawng a. A rawn nui lut sen sen mai. A va duhawm tak. 

"Hawh, roomah' tiin ka kai lut nghal a. Ka khumah ka thutpui a. 

" I nuin a phal maw?" Ka ti a.

"Umm, Sawma a rawn leng leh awm sia a tia" a ti a. Nu Sangi hian Sawma ai chuan min duh ve tih ka hre tawh tho a, ka lawm zual hle. Ka kuah a, ka zâm ve deuh tlat. Kan pahnih chauha awm dun kan nei khât em a ni.

" Lo hawi teh" ka ti sup a. A rawn hawi ve mai a,a zámzia chu a mitmeng atang pawn ka hre thei. Zawitein ka fawp ta a. A dawh mawl tawp ringawt. Mahse, ka fawp lui zel a, a hnuah chuan ani pawh a hmui a rawn tiche ve ta a, ka duhthawh telh telh a,ani pawn ka tukhumah min rawn kuah ve tawh. Khumah chuan ka nam mu ta a, ka bawh nghal rap, a hnute chu a kawr chhanah ka thamsak táwn tâwn a. Ka thaw pawh a rang titih tawh. Ka hmui lasawnin a nghawng leh a beng bul velte chu ka fawp kual a, za a ti chu a mur ar ar mai. Kawr chhan ringawt duhtawk loin a kawr chhung chu ka zen lut ta a. Chu erawh ka kut a lo man chat a, "Ka khawih ringawt dawn alawm" ka ti vat a. A lo dang bik lo. Chutianga inthlahlel tawn leh inhiptawn bawk si kan han inchul heuh heuh takah chuan a pa zawk na na na chu ka insum zo dawn ta lo. A duh ka ring lo nachungin risk ve reng reng ka tum a, a kekawr kawng ka dap lai chuan min nam ta dawrh a, a chak zet mai. Ka tho hlawl mai alawm..

A sam chul mam chungin ,aw khur dar dar hian, "Anu in min ringtawk a, min lo kaltir tih i theihnghilh ami?" A ti ta a. Ka harh zawk. Ni ngawt mai. Keimah min ringtawkin a fanu a rawn kaltir a. Keiin ka lo khawih daih chuan a dik thei lo. 

Ka tawng dawn lai takin kawngka an rawn kik dat dat a, Sawma aw hian, "Tp,. Zira..in mu mi?" A rawn ti a. Kan inmelh kâwk. Nenei te inah a va kal ang a, a lo awm si lo chu rawn len a tum a ni ngei ang. 

Nenei'n zawi sapin,"Hawng suh" a ti a. Hawn ka tum hran lo. A beidawng ve ta nge , a hnuah chuan a reh ta a. Ka va zung a. Ka la khur der der mawle.. Nenei taksa deh nawmzia kha. Sitting roomah ani pawh a rawn phei a. Thutthleng seiah chuan chep zetin kan mu a. A kut ka khal neuh neuh a, "U Tri, i chhung ten an hria em?" A ti a.

"umm ka nu ka hrilh a, ka pa a lo hrilh ve mai ang" ka ti a.

"Kan rethei sia, min duh lo ang e." A ti a.

Zo Inspiration vanga an lar kha lehlamah chuan anmahniah inthlahrunna leh kimkitna a ni ve deuh a, ka hrethiam tho.

"Ka hausa bik hleinem. Lo te kan nei thin a, nangmah zawk hian min duh lo ang" ka ti a.

"Fehte chu ka chak thei lutuk. Khawpui nun hi ka ning thin.." A lo ti vat a.

"Chuan, Sawma hi kei chu ka rilru a tihah thin" ka ti a. Ka beng a rawn khal niap niap a, "Thudik ka hrilh mai dawn mi?" A ti a. Kan inkar thlenga a chhiat phah ka hlau ve bawk si. 

"Min haw dawn asin. Bakah Nu Saii te pawn min en dan a dan phah vek a hlauhawm alawm" ka ti a.

"A beidawng ve mai ang" a ti ve ringawt. Kan tawng loh karin ka fawp leh ngawih ngawih zel a. Fawh a nuam reuh em a tin ni.

"A chang chuan min chhaih mai mai angah ka ngai thin che. Aizawl awm nawm nan te" a tih chuan, "Confi rawh. Ka thiante pawn min hriatpui..ka duh tak tak che. " ka ti a. 

"Ih maw..bungrua min thiarpui ni khan kei chuan ka star daih tawh che a" lai zet hian a ti a. A nui sen sen bawk. A hnara va tuaisakin, "I va inthup thei ve" ka ti a.

"U Zira kha i number ka dil chak thei lutuk a, ka ngam thlawt bawk si lo va.." A ti leh a. Duhawm reuh lutuk mai. 

"Johny lo kha bialpa engzat nge i neih tawh?" Ka ti a. A meng ráng ngang mai. "U Johny nen kan inngaizawng awkawng lo aw. Chuan, bialpa chu pakhat ka nei ve tawh" a ti ta a..mahse, ka zawt zui duh lo. 

Ka lo en leh vung vung zel aniang. "I mak! Ka lai ania" tiin a hmai a hup a. Ka nui hawk hawk. Thingpui a va lum a. Nu Sangi'n min lo call a, "Lo phei ve tawh u la" a rawn ti! Thingpui in zawhah kan va phei ta a. Zanin chu mood a va fuh cher cher tak.

Zira te va leng pawh chu an rawn hlim haw viau mai. 

"Kimi nau sawn Lukira a star a. Ni daih rawh se. Alicia runluih nan pawh" Zira chuan a ti a. 

Mahse,"Mi dang theihnghilh nan mi dang hman loh tur. Awmzia a awm lo" ka ti vat. Ka lo tawn tawh a ni miau a. A sawt lohzia ka hrechiang ve ëm a ni. Lukira chuan, "Luliana sawi kha a dik. Mahse, Alicia nen kan inthen chuan, ka duh ve tho maithei. A chhe lo reuh em mai" a lo ti sup a. 

"In lerh mai siah" ka ti ringawt. 

Mut tuma kan inbuatsaih lai takin kawngka an rawn kik dawt dawt a. Ka va hawn chuan, Thiangi a lo ni. "Tp, Ka piin lo chho r'u a ti. U Sawma a buai a. Inzaite a tum a" a ti ta mai a! Ka lungphu a va rang tak. Hmanhmawh zetin kan chho a, Sawma chu a khum bulah chemte hriam hmel zet hum chungin a lo ding khur hlawk hlawk mai a. Nu Saii leh a u te chuan bengdaih tumin an lo thlem nasa mai a.

Pawr leh tah aw tâu hian, "Ani nen khuan kan inneih loh chuan, ka ban hi ka zai ang. Chuan, ka thi ang. " a ti ta mai a. Ka ding chawt. Zira te pawh an meng lian hle. Lukira erawh chuan mak a tih vak hmel loh, a hmaa a lo sawi tawh ang khan a atchilh tawh atchilh ngat ngat chi a ni tih a hriat tawh vang a ni ngei ang. Nenei leh a nu an rawn thleng ve chiah a. Thiangi khan a ko tel ve a ni ngei ang. Nenei chuan min rawn melh zawk a, ka lo hawisawn daih. Awmdan thiam a va har ve le..

Nu Saii chuan, "Bawiha, duhtawk tawh rawh le..hei Nenei pawh a lo kal hi..in innei em em ang. Inla naupang deuh a, nghak leh hram hram rawh aw. " a ti dam diai a. Nenei a hmuh rual chuan, "Min nei dawn em? Ka duhzia che i hria a. Ti nge min hnar zel a..mawh..ka thih i duh loh chuan min neih tur thu sawi rawh" a ti mawlh mawlh a. A rui deuh bawk si. A u chuan, "Mama, insum teh. Mipa takin awm teh. Ti nge hetia i awm leh thin. A hma pawn i nunna in a tawrh phah thelh tawh kha..nenei pawh i tihrilhai lutuk alawm" a ti a. Va pan a tum a.

"Lo kal suh u. Tuman min lo hnaih suh u. Nene, sawi rawh..min nei dawn lo maw..a nih chuan a tawk.e" tiin a banrek chu zai tumin a chemte chu a zuk nghat a, Nu Sangi aw hian ring zetin,"Ti suh..sawma, a nei ang che. Nenei nen chuan in innei dawn nia..a tha em?" A lo ti tuar a. Nenei erawh chuan Sawma chu a melh ngat ngat ringawt..

"Sawi ve ta che. " tiin Sawma chuan a melh leh a. Nenei chu a kun a, hnunglam hawiin kan thianho chu a mal malin min rawn melh a. A tawpah keimah chu min melh ta ngawih ngawih a...kei chuan chu lai hmuna awm ve loh mawlh chu ka lo duh ngawih ngawih thung...a harsa em a ni..

(Mipa hi p8 ve tawh rawh se 🥺😭