Vanneihsangi 5

VANNEIHSANGI..(5)

Ziaktu: Toni Râlte

Casualty-ah kan lut nghal a. Nu Sangi chu a chiái em avangin a rintlak hlawl loh. Nu Saii chuan Doctor leh nurse chu thil thlen dan a hrilh mawlh mawlh a. U Mala nen Nenei chu kan muttir a. Thisen a chhuak reng sia, a chau ve deuh tawh niin ka hria. Bakah a thawng ve thut bawk nen. A nu lah a hlauthawng leh thlabar ber berah a tang bawk si. An vanduai nufa takzet , Apuia te an lo bo bawk si. Doctor chuan a han en vat vat a, Inzaina roomah rang takin an nawrlut ta rawp rawp a. A vihna chemte kha ka hmu chiang vak lo nain, a lian lo naa, a sei riauin ka hria. Engtin nge chemte kha a phawi hman le? Nu Sangi vih kha a tum zawk niin a lang a, Nu Sanga hmaah Nenei hi a va inbarh lut zawk kha a nia. A nu chu a lo hmangaih takzet a nih dawn hi. An zai chhung chuan kan lo thu tlawk tlawk mai. Nu Saii chuan an pa te bulah chanchin a va hrilh a. Anni lam pawn an rawn sawi ve a. Pu Mawia chu police lamin an lak tawh thu te an sawi a. Tunah chuan Nenei tha taka an zai phawt a ngai a ni ber. 

An rawn nawr chhuak ta a. A harh lo thung. Ward-ah kan dah lut a, drip an khai nghal a. A harh hleithei lo. An damdawi jectionna vang a ni maithei. Zing dar 4 a ri thuak tawh a. Boruak pawh a vawt chho khawp mai. Nu Saii chuan, "Tp, nang tlangvalah Nenei hi tihian lo awmpui rih mai ta che. Sangi lah gabby ngaihtuah a ngaih bakah heti hi a nia, a rintlak tlat loh. Zing lamah kan rawn lang leh dawn nia" a ti dam thlap a. Kei pawn ka hnial lo. Min hawnsan ta a. Nu Sangi chuan an hawn hmain a fanu chalah a dek zauh a, "Bawihte, lo harh vat rawh aw" a ti chuai raih a. Nu Sangi zawk chu ka lainat ngawih ngawih. A thatlai leh vanglai chhung zawng zawng tikhawp khan vanduai leh rethei, mahni inzahpui reng rengin hun a hmang a. A hmangaih em em a nauten an hmusit a, in atanga hnawtchhuak hialin, chutah tu nge a pa pawh hriat loh nau a pai a. A pasal ve lahin tikhawp khan a tiduhdah a, hmeichhe dang hruai lutin tlawm takin an chhuak a. Tunah a fa phirte an awmna chin hriat lohin an bo leh a, a fanu lah a dulah vih niin damdawiin khumah a mu mek chu a ni si a. Nu chhel ber tan pawh tawrh zawh chi a niin ka hre lo. Chiái loh leh hamhaih lohna chi a ni miah lo ve bawk a ni. A damchhungin hlim tak leh zalen taka nuih hun a nei tlem lulai em mai. 

Ka mut a chhuak lem lo va, ka thil in vanga ka pentawng erawh chu a ninawm. Tui ka in sek ringawt. Nenei lah a mu chiah chiah mai si. A mutthilh lai chuan chiang tawkin a hmel chu ka en chiang a. Hmeichhe hmeltha tak a ni. A mithmul sei er tan te chu mithmul lem vuah thin ho hian an awt ngawt ang. A heh lah a sen hiam a, zuk leh hmuam a ti ve lo tih a chiang ngawih ngawih. Tin, a vun hi a lo nalh em em a lo ni. A thisen a chhuah nasat deuh vang khan a dáng ta deuh e tih lohah chuan a la nalhin a nung sar mai. Zing dar 6 rik hma deuhin namen loin ka mut a rawn chhuak a. Ka meng lui thei hlawl lo a ni ber. Khum bawhin ka lo muhil ve a. 

Ka lu min rawn khawihtu an awm vangin ka harh zawk a, ka ban dinglam a mu churh churh mai .ka hawi chhuak vat a. Nenei chuan min lo melh kiau mai. Thawh phan nei lo ang hrimin, "I tui a hal mi?" Ka ti a. Tui ka pe nghal. A in khawlh khawlh a. A zun erawh an siak avangin zunpui a ngai lo vang. A thaw hawk a, min rawn melh leh a. 

"U Tri" a ti sep a. 

"Umm..eng nge i duh." Ka ti vat.

"Ka naute chu an hmu tawh em?" A ti zawi sap a. Ka mittui a hnám sawk nia! A pa fabik te pawh nise ,a naute a hmangaihzia leh a enhran lohzia ka hmuh chuan ka sawi thiam loh thilin min dek tlat a tin ni.

"An hmu tep tawh ang" ka ti ta ringawt a. Nui hmel a pu deuh a, "Pu Mawia kha engtin?" A ti leh a.

."Police ten an hruai tawh e. A tang ang" ka lo ti a. A mit khap leh sak sakin, "Ka lawm e aw. I awm a" a ti a. A thukin a ril riau. 

"I nu te pawh nakin deuhah an rawn kal ang. Muthilh leh tum rawh. I chau em mai" ka ti a.

"Nang pawh" a ti a. Mei ka zu chak lutuk chu ka chhuak ta rih a. Intihahrh pahin damdawiin chung berah ka han zu ta hlat hlat a. Vawiin chu class pawh ka kal theih loh hmel. Test a awm chuang lo bawk a . Thulh ve rih mai ang. Ka nu te bulah chanchin ka han sawi ve reng reng a, an lo lainat ve khawp mai.

 

Ka pain, "Bawiha, khatiang hunah khan mizo tlangval innihna kha lantir zel tur aw. In theih ang angin tawiawmin pui zel rawh u.." A rawn ti leh duam a. Ka pa thin hi chu aw..

Dar 9 rik hma deuhin Nu Saii leh Nu Sangi te chu an rawn lang leh ta a. Gaby pawh an rawn hruai. Chaw an rawn keng bawk a. Rin aia Nenei a lo harh ve deuh vang chuan an lawm ve hle. Ka ril a tam em em hran lo naa, nuam lo an ti ang tih ka hlauh vangin chaw pawh chu ka ei ve hlek a. Nenei chu Nu Sangi'n a barh a. 

"Tp,i nu Saii te rual khan va haw rawh. Va hahchawl tawh rawh. Tihian kan lo awmpui ang. Kan lawm lutuk a nia aw" Nu Sangi chuan a ti mawlh mawlh a. Nu Saii'n a lo zawm ve zat avang chuan han cham luih tálh chu ka tum bik lo va. Nenei bianga va chul zauh pahin, "Lo Dam vat rawh. Tlaiah kan rawn kal leh dawn nia" ka ti a. Inngaihzawnna thu kan la sawi thlu lo naa..ka bialnu ang thawthangin ka ngai tawh a ni. Min melh ran a , "Ngei ngei aw" a ti sap a. Ka buk khum nghut a. A nui a, kei pawh ka chhuak zui ve nghal. 

Kan haw kawngah Nu Saii chuan, "Ka khawngaih nufa em mai. Sangi hi zawng a vanduai em mai. " a ti mawlh mawlh a. An driver nen kan ngawi reng. 

"Sawma pawh vawiinah a rawn hawn dawn kha..lo kawm ve thin teh u, he lama a awm hi chuan ruihhlo hi a lo ti leh mai ang tih hi ka hlau thin a nia" a ti leh daih a.

"A rawn leng duh lo em alawm" ka lo ti ve ringawt. Engmah kan sawi zawm tawh lo. In ka zuk thleng chu an lo la awm a. An kal daih tawh turah ka lo ngai a. 

"Ngati nge?" Ka ti hú a.

"Aa. I kal si lo va, kan kal peih bik lo" Zira'n a lo ti a. 

."A ho e" ka ti hluk a.

"Nizan Zirdula zu rawn hawn kha a tha lo a niang. Ka zawi ngawih ngawih. Alicia pawn an chhuak dawn sia, va phei turin min tia, ka che chang peih thlawt lo" Lukira'n a lo tih chuan, Zira nen inmelh ralhin, "I in hnem em anih kha. Bakah a zu kha a tha zawk, tui i pawlh ve mang si lo va..nizan thil thleng pawh i hriat mai mai loh kha" ka ti ta a. A khi suk ringawt. Zira'n acid a han lei a, a tui chiah a, kan hawp tliar tliar a, kan zia deuh. Ka mit erawh a thip hlur mai. Ka lu na erawh a awm tawh lo. 

Thiangi kan insuktir leh a, puan pho a zar lai mekin, "Thiang, Sawma chu a lo thleng tawh em?" ka ti a.

"Thleng nang..ka piin a ngaihtuah leh tawh ngawt ang" a ti a. Kan tum ruk dan a hre lo zawk a ni. Sawma chu show tir kan duh vang a ni reng sia! Keini lah kan da zawr tawh ropui si. Chhunah chaw thing ka bar laiin Lukira thutthlenga mu a phone khawih mawlh mawlh chu a rawn tho chhuak hlawl a. 

"Ehe! Apuia te case chu Amanda-in a la dawn a nih hi" a ti chul a! 

Nunzira'n ," Hmm..Amanda a chet chuan an hmuh har dawn loh chu! An ko har ka ti reng a ni" a lo ti ve a. Kei erawh chaw ka hmuam tún vangin ka sawi ve thei lo. Apuia te tal hi hmu vat se ka duhpui. Ka ei khamah Pu mawia vel chu an rawn post em tih ka zawt a. Lukira chuan,"Ka'n chhiar ang e" a ti a.

"Nizan zan lai dar 12 bawr velah khan Pu Thangmawia , kum 56 Bawngkawna khawsa chuan, a nupui hlui te inah kalin tawngkam bawlhhlawh tak tak hmanga ankhumin, an thenawm ten chhuahtir tuma an nawr mek laiin a che phut a, a nupui hlui Pi Zonunsangi chu vih ngei tumin a va pan leh a, mahse, pi Zonunsangi fanu Vanneihsangi chuan, chu chu lo hmuin a nu hmaah va indawhin a pahrawn Pu Thangmawia chuan Vanneihsangi dul veilamah a vit a ni. Vanneihsangi hi damdawiin lamah tlanpui nghal niin, rang taka zai nghal niin vanneihthlaktakin a kawchhung a lo khawih pawi hman lutuk lo va, thisen erawh a chhuah nasat deuh vangin Vanneihsangi a chau hle a niawm e. Pu Thangmawia chu Police-in la tawhin tunah hian Lockup-ah a la awm a ni. Vawiin chawhnuah Central jail lamah dah thlak a ni ang. Pu Thangmawia sawi danin a fate phir Rammuanpuia(Apuia) leh Rammuansanga (Atea) te bo chungchangah a nupui hlui thiam loh leh a fate ngaihtuah lo lutuka a hriat vangin a thinrimin a va bei ta mai niin a sawi. Mahse, Police te hnen atanga thu kan hriat danin khang naupangte kha a pa in atanga bo zawk an ni a, a nuhrawnin hruai chhuakin an awmna chin hriat a ni ta lo a ni. A nupui hi zawn mek a ni a, He Case hi Amanda chuan a la dawn nia thuthang a awm a. Thuchiang tak erawh hriat a la ni lo" ..

"kha Zawng mawia kha ka hnek ve chak ngawt mai" Zira chuan a ti hmuk a. 

" Ka hnek kha chu na a ti ve ngawt ang. " ka lo ti ringawt. 

Tluangtea chuan ka mita min rawn melh ranin,"Nenei hi i duh tiraw?" A ti hlawl mai a. Chuti teh bawla min han zawt chu ka lai ve det..

"i mawl mi a.." Ka la ti hram a. Duh tia chhan chu harsa ka la ti ve tho si. Ka awmzia hi ka hrethiam tawh bik lo e a.

"Zep vak a ngai mawni le..kan hai lo. Lulian..nihpui rawh. A fel reuh ka ti, bakah an khawngaihthlak" Zira'n a ti a. Ka nui ringawt.

"Ni ang deuh chu kan ni. Tlaiah pawh ka va kal leh dawn" ka ti a. 

"Kan lo kal ve ang. Sawma a lo thlen hman chuan a motorin va kal ila a tha ang" Lukira'n a ti a. Ka inbualsan ta daih. Ka inbual lai chuan Nenei ka fawh zan kha ka ngaihtuah chhuak thut a, mipa hrisel thisen lum awlsam vanglai ni bawk chu ka zauthau titih ringawt. "A va ho e" ti sup chungin ka inbual sawk sawk a. Mahniin ka khi suk suk mai. Min hmutu chu awm se , "A 99 " min ti ngei ang. 

Ka inthlak laiin Sawma awin,"In awm ka ring rengah" a rawn tih chu ka hria a. A aw a zangkhai danah a rui leh ngei niin ka hria. 

Zira'n ," I awm bo rei mah mah. Inah i awm reng emaw tih laiin i lo zin daih a" a lo ti vat a. 

"Nia, ka nu alawm..ka pute bula ka awm hian a ngaih a tha thin a. Chuan, zuk down ila..ka show ang" a ti leh thur thur e. Awmhmunah ka lo khi thâ mai. 

Lukira chuan, "Silipar ka bun ang a ka hman kei chu.ka awmdan hi ka hne lutuk" a lo tih chuan, ani leh ni lo anga chutiang a sawi ve chu ka nui chhuak huk. A hrehawm ve ngang a niang. 

"Zuk kal u la, ka lo nghak ang che u. Tlaiah Nenei va tlawh a ngaih dawn kha aw" ka ti a. Sawma chuan, "Kal vek ang u.." A ti tlat sia. Mahnia awm ngawt ai chuan tiin ka zui ve leh ta mai a. A nuam ve lawm. Phunchawng lam pan chuan kan tlan thla ta a. College kan kal lai khan Lukira bike-ah kan in-pathum a. Nunzira'n video-a a cover chu a viral pek a, "zu lei tur hmu zo lo down haw lam " tih caption nen khan..a hun lai khan a lar viau. Kan hmel zawng zawng nen khan a inhmeh mai sia, kan zak ve reng ..mahse, a hmusit zawng leh mawi lo zawnga lar kan ni lem lo bawk a, kan enliam ve ta mai. 

Zira hian a lakna sial a hre thei khawp a! Zu la tur a zui peih bawk a. Sawma chu a money bawk a, kan dak thinzia a hre ve bawk nen. Um 5 lai kan la haw a. Hmabak ëng ti em emin kan tlan haw leh ta vang vang a. Police an lo awm lo hlauh bawk nen. Kan inah kan lut thla leh a, Sawma chu an inah a lut zuk a, a hnuah an vawksa hring kg chanve aia tam deuh tur hi a rawn khaithla leh hmiah. 

."hetah chaw ka ei ang. Tp, hei fry la" a ti a. Sa hi ka siam ber thin tih a hre ve vek a ni. In chungte fridge-a kan vawksa rep dah lah kan ei thei si lo, chutia a rawn keng chu a lawmawm khawp mai. A la tlai lutuk lo nain ka chan nghal a, Ka che nghal sawk sawk. 

Ka phone a rik vangin ka sa sil lai chu dahin ka va la a , Nu Sangi a ni. 

"Tp, tlaiah khan lo kal i tum tiraw? " inthlahrun hmel deuh hian a ti a.

"Aw tum e..Zira te pawh an lo kal ang" ka ti a.

"A tihzia nasat chu, enteh, ka inthlahrung viau nain, U Saii te inah chabi spare ka dah a. Mateii hi a inthlakna tur ka lo ken theihnghilh daih a. Khawngaihin min lo kensak mai dawn mawni le..chuan, Gaby thawmhnaw pawh" a ti a. 

"Tehreng mai. Duh deuhte a nei em?" Ka ti a.

"Ih, chutiang pawh a awm lo. Roomah khan drawer uk kha Mateii thawmhnaw dahna a nia, a kekawrte kha a theih chuan pali vel lo titel thei la..Gaby chu hak thlak pakhat a ni mai. Khum hnuaia thingremah khan ani chu a awm ang aw" a rawn ti a. 

."Aw le, chuan intha deuh em? Chaw kan rawn keng dawn em?" Ka ti ve zung zung a.

"Aaa.. Chaw chu a ngai lo..(a hnuk a ulh deuhin ka hria) kan tha zel e. A la chauh bakah chhunah khan a khua a rawn sik a. Mahse, hei nachhawkin an chiu a,a zia tawh e.." A ti a. Ka thaw huai e. Ka va khawngaih e aw..mipa riahpui an phal si lo. Nu Sangi leh Gaby ten an riahpui chuan an chhangchhe dawn si. Chhungte pur tur an nei si lo. An va vanduai tak..

Vawksa ka fry hmain chabi chu ka han la zuai a. Nu Saii pawh a office lo nge a lo awm ve a. "Inva kal dawn chuan chaw leh chawhmeh hi kensak nghal mai r'u aw..driver va pek tir ka tum deuh a. Sawma kha va inhruaitir r'u.." A lo ti var a. An va fel tak ëm..

Nu Sangi te inah chuan ka va phei a. A reh dúk mai a, a khawharthlak viau mai. Roomah chuan ka lut a, pindan hi pakhat chiah a awm a. Khum pathum a lo intlar that a. Nenei khum chu tukverh bul ami hi a ni ngei ang. A felfai thlarh mai, engkim mai chu. Drawer uk chu ka hawng kual a, Tshirt pathum leh kekawr tlawn pathum ka hmuh hmasak sak ka la ringawt. A kekawrte chu a hnuai berah a lo awm a. Hmeichhe kekawrte hi ka khawih zen zen ngai lo. Ka nute awm loha puan pho seng a ngaih changin ka nau leh ka nu panty chu ka seng ve tho a, Sas te nen kan inkungfu chang pawn ka phelhsak bak a hranin ka khawih ngai lo. Nuam ka ti vak lo. Mipa thenkhat pawh in nih ve tho ka ring. Nenei panty chu manto tak an nih hmel loh khawp mai. EN chiang lem loin panga vel chu ka tham chhuak tawp a. Choka lamah polythene ka va zawng a, ka hmu mai si lo, an roomah lut lehin bang thlang lamah bag khai, Lian ve lam chu lain ka hnawh lut ta hmawk hmawk a. Gaby inthlakna pawh chu ka dah tel bawk. An mamawh tur awm ang no leh fian vel leh rizai vel kha chu tukinah an lo keng tawh a. Ka chhuak leh ta nghal a. Ina ka va luh leh chuan an lo dawm der tawh. Ka no pawh a lo ding ve ran mai. Vawksa kan hmain no khat chu ka'n quit pap a. Pum a sa thla vang vang mai. Lukira hian a sawi ve ziah, "Pum a sat thlak ham ham hi chuan ngaih a tha bik" a ti thin. Mahse, kan pum chhiat dan tur reng kan ngaihtuah si lo. 

Zira'n behlawi hnah leh bawkbawn a bai a. Dal a la awm bawk a. A tawk mai. Kan ei leh vak pawn ka ring lo. Dar 4 a ri hnai ta tihah kan in leh te te a, kei chu engtinvak ka la awm lo. Zira leh Sawma chu an ni phút tawh a. "Damdawiinah kan la kal dawn kha..insum rih tawh ru" ka ti a. Ka khapsak ta rih. Sawma rui lah hi music lam an sawi tak tak zel a, hre thui ve vak lo chu kan hawi kan hawi ringawt mai a ni. Mahse, a ngaihnawm tho zel mai. Dar 4:30 velah Damdawiin lam pan chuan kan chhuak thei ta hram a. Thiangi pawn eirawng a lo bawl fel tawh a, an chaw pawh kan kensak thlap e. Kan thleng a, kan lut huk. An nufa hoin an lo awm ve ran a, kantu leh han thutpuitu pawh an nei ve si lo va, ka lainat reuh lutuk. Kan thil kensak ho chu ka pe a. Lawmthu a sawi leh mawlh mawlh tawh. An tawng duh nen, Zira leh Sawma lah chu an ngawi dúk a. An insum ve a ni maithei. Nenei pawh a rawn harh ve a, min rawn melh chat. Ka lo nuih a. A nui ve sek..hmuh a hrehawm lem loh. Lukira chuan Gaby a pawmsak a, ani hi naupang han chhawnchhaih vel hi a thiam phian zel a. 

Nu Saii'n kal dawna min pek Rs.2000 chu Nu Sangi ka pe a. A mit a khap fak fak mai."U Saii te chu awm lose ka lo mangang ru tawh lutuk asin..ka va lawm tak em" a ti a. Nu Saii min chah angin, "Lo lungngai suh se, damdawi leh eng ilo an neih daih loh kha chu lo la ba mai se. Nakinah bill pek rualin kan pe vek mai dawn nia " a tih chu ka hrilh bawk a. A hnuk a ulh leh hle. "Pathian hi chu a tha a ni. Khawi hmunah pawh a mite hi a dah zel a" a ti vawng vawng mai. 

Sawma chuan inti polite takin, "Aa..a ho lutuk..ka nu te chu an hausa alawm. Hmang hmiah hmiah r'u " a lo ti! Kan han nui leh rih. Nenei chu a hmuh vawikhatna a niawm e. A zin bo laia rawn awm kha an ni sia. A en duh hle lehnghal a. "Khaw maw i khawsik a la awm em?" Tiin a chal te chu a zuk dek a. Nenei chu a lo thle sawn deuh a. Min rawn melh ralh bawk. 

Inkan hun a tawp dawn chu thuhran, kan tam ve deuh bawk sia, hawn mai kan tum a."Mipa riah an phal si lo va, phal se ka riahpui hreh lo a nia. A pawi em mai. Chuan, Apuia te pawh kha an hmu vat a, Amanda in case kha a la dawn a niawm e" ka ti duah a. Nu Sangi pawh a hmel hmuh a nuam viau.."Tawngtai ngawt mai lo chu tihtheih ka nei lo a nih hi..ka fapate chu an tha em ang chu maw" a ti a. Inhmu leh vat tura intiam chungin kan chhuahsan ta a. Nenei chu a bik taka biak ka chak a, mahse, rem teuhin ka hre si lo, ani pawn beisei a nei niin ka hria. Bakah zu rim ka lo nam ve kawkalh si a, ka inthlahrung em a ni. 

Motorah kan lut chiah tihin, "Ka bem dawn..a dam veleh" Sawma chuan a ti ta mai a. Lukira nen kan inmelh zawk. Zira chuan,"Akhai! A chi loh..ani te chu…" a tih lai takin Lukira'n a zuk sik zauh a. Rawn hawi á deuhin min rawn en a, mitmeiin kan lo khap vat. "Ani te chu i cousin alawm" a ti leh ta daih a. Ka thaw huai e. Ni e, Damdawiina kan luh atang khan Sawma'n Nenei a melh dan kha ka hai hauh lo. Tul úk lo va a chal a zuk dek te kha..

Mahse, thil dang kan sawi ta daih a. Lukira bulah, "Alicia te kan tlawh kawi dawn mi?" Ka ti a. Alicia te chu Private hospitalah an awm kha a nia. "An chhuak daih tawh..a titau a. Zanah thlem a ngai" a ti hmuk a. A va kal ve loh vang a ni ngei ang. 

In kan thleng a, Kan inkawtah Esi leh Rini an lo ding reng mai. Zira pawh a harh káwk mai. Esi chuan a melh rum ngang mai.

"Nge inlo tih dawn?" Zira chuan a ti hluk a.

"Call i la thei si lo va, Alicia te kan va kan haw lam kan lo peng mawle" Esi chuan a ti hlak a. Kan lut ta nghal a. Zira chuan a phone chu thutthlengah a lo hnutchhiah chu niin..midang kan buai laiin anni pahnih erawh an inhnial leh ta. 

"Zu lah hi i in ve ziah a. I mak em em lutuk" Esi chuan a ti nghat nghat a.

"Aw...sawma'n a show ve lawm..Bawih, ka nghei dawn..ka dry tep, thiante pawh an zahawm. Thinrim reng lo teh" tiin a banah a va vuan a .."kal teh" tiin a kut a lo thinthlaksak hmak. Kan hre thang tawh a, engah teh vak kan ngai lo. Rini chuan Nenei te chanchin vel chu min zawt ve a. Kan han sawi chuan a khawngaih ta hle a niang, "Anmahni hian pawi an tih loh chuan, Zo Inspiration te hi hrilh ve ila a tha lo maw? An khawngaih hlawm viau ang" a ti ta a. Rini hi Social activities lamah hian a bengvarin thahnem a ngai em em thin reng a. Keini luhai tawh ta chuan ngaihtuah chiang mang hlei loin, "A tha viau tak ang. Pawisa an nei tawh lo viau a niawm e" kan ti a. Rini chuan,"Ka lo be dawn nia..nakinah.." Tiin Nenei number pawh min dil a. Ka pe ve mai. Esi te pawh engtin tin emaw an inngeih chho ve ta aniang. An hawn dawnah chuan an in vawn leh reng tawh kha a..Sawma motorin Zira nen an va thlah a, Kan Lukira lah phone a hmang char char. Huiham..

"I damkawr em kha..khatin thinrim vak suh..i taksa a chak lo si..i nat belh ang" a tih chuan hrethiam zetin ka va kiaisak a. Ani pawh nuihzat hmel deuhin a khi ve suk..kan zei hrawt hrawt hlawm a nia. An ni pawh a tuka inhmuh an intiam takah chuan an inrem ta hram e. Zira te an lo haw a, Chaw kan ei zui nghal. Zira leh sawma chuan tihtham an ei lo. Lukira nen kan lim nghek kha..

Chaw ei kham atangin kan bei tan leh a. Kei hi chu ka in thei viau a, ka ruih vek vek pawn nawi ve biah biah thei tak ka nia. Sawma lah chuan Nenei kha a ruih hnan ni maw..a sawi sek mai. Lo ruih lungpuam ve tawh bawk si chuan ngeiawm lamah a kal mai dawn. Lukira'n min khap viau zel lo se chuan ka tawng ve leh teuh ang chu. 

"A chhe lo ka ti em mai. A dam lo chung pawn khati kha a nia. Rawn chhuak vat se, zan tin ka rim ang. Min va duh awm e aw. A nu lahin ka nu te vangin min be chhe ngam dawn der si lo..ka ru hmak ang" tih vel a ni. Kei Nenei lo vei ru ve tan chuan ngaihthlak a nuam fahran lo em a ni. Bakah a sawi dik lo hran lo, Nu Sangi'n a ti chhe ngam dawn lo, Nenei tan pawh biak chhiat ngam chi a ni hek lo. Keini thingtlang tlangval, Zirlai mai mai ai chuan ani Officer fapa, duh duha awm thei chu Nenei pawn a lo duh zawk maithei asin. Aa..ka ngaihtuah duh lo. Ka ning. 

Zira lah chu a tawngkam ven reng a ngai tawh bawk si. Nenei ka tan a hauh ve si, Sawma khenthlak a duhna lamah ka hmingte a lam dawn thut thut zel a, Lukira'n a lo kheuh leh zauh thin. Kei lah ngawi rengin zu ka in tlek tlek mai a. Ka kai ta viau mai. 

Ka phone nghawr dat dat vang chuan ka harh a, meng mang hlei loin ka la a. "Hello" ka ti sup a. 

"U Tri" a rawn ti dam thlap a. Ka meng kawk. Neneni a ni. 

"Nene" ka ti vat a. Khumah chuan ka lo mu ve kuk tawh a. Rizai pawh ka sin lo. 

"Ka muhil thei lo" a rawn ti sap a. Sana ka en vat a. Dar 12 a ri tep.

"I nute an muhil tawh mi!" Ka ti a.

"Umm..ka tibuai che em?" A ti a. A insum thei ngang lo a nih ka ring. 

"Buai lo e. Ka lo muhil daih a. Lo biak che ka tum reng a" ka ti khawmawi a.

"Umm muhil leh rawh. I rui em mai" a ti a. 

"Dah suh..ward-ah i awm lo mi?" Ka ti vat a.

"Awm e..an muhil vek tawh a. Ka tawng ring ngam lo. Ka inthlahrung..ka dah dawn..ka lo call ve mai mai che..muttui aw..chuan, U Tri, rui tawh suh. A tha lo em mai" a ti a. A dah daih! Call back nghal a. A la duh tawh lo. Ka rui tih a hre ta chu a nia. Tlaiah kha chuan ka la kai vak lo va, a hre lo a ni maithei. Ka harh laklawh ta si, tui ka va in khawlh khawlh a. Ka zung bawk. Thutthleng seiah Sawma leh Zira an lo mu a. An hnar bur bur mai. Zu um leh no a let phung mai. Zing thawh a va peihawm loh ngawih ngawih tak em..ka mut leh hnuah phone chu enin, whatsappah ka lut a. 

Nenei chuan dar 10:04-ah khan , "I mu tawh mi?" Tih a lo thawn. A online avangin, "Call kha la ta che" ka va ti a.

"A inthlahrunawm em mai." A rawn ti a.

"Muthilh tum la, i taksa a chauh em kha" ka ti leh a.

"Ka tum ve reng..ka mut a chhuak hlawl lo" a rawn ti ve mai a.

"Sawma khan a sawi reng che a. A star lutuk che a" ka ti a. Ka vei ngang a niang e.

"Bialpa a nei inti lo mi?" A rawn tih chuan ka lung a phu rang hle..

"Tu nge i bialpa chu?" Ka ti daih.

"Luliana " tih chiah a rawn thawn. Mahse, ka khikpui vur vur thung si..

"Tak tak em?" Ka ti a..

"Hetiang lam sawi hian i rui zel a. Naktukah kan sawi tha dawn nia..kan dah ang e..muttui" ...a offline leh hmak. Hmm..min tivir tawk leka awmdan a thiam reuh siah..

Mi dang msg chu ka chhiar a, "I dam maw? Fanu kan nei ta asin..Vawiin khan" Mapuii hnen atanga ka dawn chu dar 7:34-a ka dawn a ni. A mi khawih dan a dang leh ta! Reply ve ngei erawh ka duh si.."Ka lawmpui che u" tiin ..ka phone chu lukham hnuaiah ka thawlh a. Mapuii nena kan duhthusam te kha ka ngaihtuah lo thei ta lo. Ni e, hmeichhe dang tam tak chu ka lo kawp ve tawh alawm. Ani nen erawh thil tam tak a thleng a..tam tak. Harsatna leh lawmna te pawh kan lo hmachhawn dun ve thin a, duhthusam kan nei ve a. Fanu kan nei ang a, a hming turte thleng khan kan phuah lawksa vek a nih kha. Ka dik loh leh thiam loh vanga kal hrang ta chuan ka tel loin fanu a nei ta chu a nia! A pa erawh mi dang an ni ta si. Hetia Mapuii ka ngaihtuah leh avang hian ka va pelhein ka rinawmna ka hloh tihna a ni lo. Mipa mai ni lo, mihring tawh phawt hi chuan nunhlui leh hun kal tawhah mi bîk kan kawl vek mai a. Kum tam liam hnuah pawh hriat chhuah chang a awm lo thei thin lo a ni. Kan hrereng lo va, kan theihnghilh lo mai zawk a ni. Ka hriat loh karin ka lo muhil a. Ka harh rualin ka uak tep. A thing rim chu keimah ngei pawh rimchhia ka inti, ka balh hmel ngawih ngawih. 

Kan class ami ka bula thu thin Peka ka call a, "Pawimawh a awm em? Vawiinah " ka ti a.

"Vawiinte chu Holiday alawm" a rawn tih chuan, "Ehe! Ani maw? " tiin ka inperh tho nghal a. Ka va hlimin ka thaw a va veng si em..

"Lulian, Gandhi birthday alawm le aw" a rawn ti! Hihi. Mahatma Gandhi piancham tih pawh hre mang loin kan lo nawi vel! A ho em mai a. Mood a va fuh cher cher em..tumah an la thawh hmain ka inbual fai sar sar a, ka inthlak zawhah chaw ka chhuang. Chawhmeh thing a la rin theih bawk a. Sawma a rawn harh ve a, ani zawng a nasa deuh bawk a, Zu um khat va la chhuak leh rawk rawkin a in leh pup. 

"Zing zu hi chu in lo teh..a tha lo" ka lo ti ve naa. Engahmah a ngai teuh lo. Mi dang pawh an rawn tho a. Zira pawh chuan zu no chu ban mai a tum a. Tluangtea'n ,"Zira, a tawk." A lo ti nghut. A hunah chuan Lukira hi a intimitak thiam ka tih tawh kha, kan pallui mang mang lo. Kan tana tha lo turah chuan a ri fak zel. Zira pawn a kut a la ta zál zâl a. An va inbual ve sur sur hlawm a. Sawma pawh a la awm ve reng. Thiangi'n a rawn ko a, "Ni dawn tak..vawiinah ka u a lo haw dawn..ka chho aw. A bang saw chu lo ti mai r'u..tuirialah kan kal daih dawn sia" a ti puat puat a. A chho nghal. Zu chu um 2 a la bang.

Lulkira'n ,"No 3 bak ka in ve reng reng hleinem..nizan khan..kan Nunzira leh nangmah vengin ka hah hle ringawt. " a ti hmuk hmuk a. A ni maithei. A fim kar reng khan ka hre reng a ni.

"ven ka ngai mi!" zira chuan towel veng chungin a rawn ti a.

"Nenei leh tpa chungchang i sawi dawn zel a. Buaina a chhuah ka hlau sia, ka veng che mawle. Luliana lah kha Tawng chhuah hlau siin a birh tlut tlut a. Mood a chhe vek alawm" a ti nghut a. Kan nuih tlawn ringawt! A thinrim tak tak chuang lo bawk a.

Class kan kal dawn ta lo bawk a. Vawiin chu kan chhuak vek dawn. Nunzira chu Esi te inah a leng ang. Lukira pawh Alicia bulah a va tâp ang ..kei pawh ka bialnu thar Nenei damlo ka va awmpui dawn. Kan pentawng e ti lo chuan kan phur surh mai. 

Damdawiin ka thlen chuan ka hmaah hmeichhe hleitling leh piannalh zet, smart zeta inchei leh mipa hi an kal a. Ka luh tumna ward-ah pawh an lut ve zel a, ka lut ve leh zel. Ka rin loh deuhin Nenei te khum lam chu an pan ta zel a, ka la ding bik lo. Khum bul ka va thlen phei chuan, Nu Sangi'n mak ti taka a en reng lai chuan, Hmeichhia chuan nelawm leh dam thlap hian, "Pi Sangi maw..? Amanda ka ni e" tiin a kut a lek vá a..

He hmeichia hi maw Boss Amanda tia an lo sawi thin kha..kan vai mai chuan kan melh ta reng a..

(Ka p8 a..ka kutzungpuiah a thawk daih..tawk rih 🥱🥱