Vanneihsangi 4

VANNEIHSANGI ..(4)

Ziaktu: Toni Râlte

Vanneihsangi chuan, a chanchin chu hetiang hian a sawi ta a.

"Ka nu te unau hi panga an nia, ka nu hi a upa ber a ni. Ka nu kum 15 a nihin ka nu nu leh pa ka pi leh pute chu mitthi rala an kalna lamah an chuanna motor accident-in a hmunah an thi nghal a. Tichuan, ka nute unau chu an vakvai chho ta a ni.A pi te bulah an khawsa lo thei lo a. Ka nu patea te chhungkua lah an chhangchhe ve bawk si, chutihnak alaiin ka nu ní, ka pa farnu chu an pa nen inthenin a fa te pahnih a rawn hawnpui bawk si. Ka nu sawi danin, chaw an ei pawn hlui hnihah an ei thin. Chutiang taka an hautak tak si-ah chuan, innghirnghona a thleng ta zeuh zeuh a. Patea a hah ve bawk si, A awm ve tho mai. Tichuan, ka nu chu school bangin a mangan em vangin Aizawlah mi awmpui ni turin a chhuk ve ta tawp a. Aizawl a thlen atanga thla khat lekah an naupangber chu tukverh atanga tlain a boral zui ta bawk a. A awmna te an khirh em vangin hawn pawh a hawng lo a ni. A naute pathum a ngaihtuah em em a, An tan a hlawhte chu a khawl ve tang tang a . A tum dan chuan inkhawl ve hram hrama in luah vea a naute pawh awmpui a tum ve a ni. A la naupang bawk si. A awmna te chu an khirh viau naa, an sual hran lo thung. Hlawh pawh an pe tha viau a niawm e. Kum khat a awm takah chuan a inkhawl ve ta nual a. A patea ten a naute hnawk an tihzia leh chawm an hautakzia an rawn hrilh sek bawk nen, La ngah tawk lo mah se; Veng mawngah in te takte chu a luah ve ta rawih a. Tichuan, a naute pathum chu a han hruai thla ta a. A pi a boral tawh a, a pu lah khuma mu chawt, buaipui ngai a ni. A ni lah khan a fate kha pasal a umsan daih lehnghal a. A patea nupui a thinrim leh a âng thin pawh chu a dem hran lo, an phur kha a rit ve em a ni. Aizawla an chhuk leh hma hian ka nu nu nutapa hian Rs. 2000 a pe ve a, An High School Headmaster te nupain an khawngaih em vangin Rs .3000 an pe bawk a niawm e. Tun thleng hian a la sawi thin. Tichuan, kum 18 mi lek niin a naute chu a enkawl dawn ta a. A naute hi mipa pakhat leh hmeichhe pahnih an ni. An in luah te takteah chuan an khawsa ve a. Veng chhung leh an thenawm te chuan bungbel te pawh an pe ve nual niin a sawi. Mizo hi chu a nawlpui hi kan la tha bawk a. Mi inah lângin hna. a thawk leh a, a nau chiah hian pawl 11 a zir ve mek a, a dawt lehin pawl 9, an te ber erawh chuan pawl 7 a zir thung. School thaah pawh an kal ve thei lo a ni. Mahse, ka nu chuan a naute chu enkawl puitlina eizawnna neihtir ngei a tum ve a ni. A thawkrim em em a, hna hahthlak leh zahthlak a sawi ngai lo. Mipa zuiin mi ek paih te pawn a inhlawh fo mai. Pathian zarah a hrisel hlauh a, a vannei. Chutianga kum hnih dawn an inchawm hnuah chuan a nau chiah chuan college a kal ve dawn ta a. An zirna senso a sang ve telh telh bawk si, ka nu inhlawhna ringawt chuan a phurhru zo ta meuh lo va. A mangang ta hle a. Hetia a mangana a indawmkun reng lai hian, a thianu, mi awmpuia tang ve thin tho hian hnathawh tur tha deuh, hlawh tam deuh a hriat thu a lo hrilh a. Chu hna chu nawhchizawrh a ni. Rei tak ka nu chu a inngaihtuah a ni. Nawhchi zawrh em chu a hreh ve ngang a ni. A tirah chuan a hnawl phawt. Mahse, Pathian pawh hi a chang chuan a demawm lek lek thin. An naupang ber dawttu chu an in panna kawng stepah lum palhin a ngal ruh a tliak ta tlat mai . Tah zet zawng ka nu chu chuan duhthlan tur dang a nei ta lo a ni. A nau enkawlna sum senso chu a tam si, a inkhawl ve chu a zo nghal duak a ni mai e. Tichuan, a thiannu chu kawpin eizawnna chu a thlak ta a. Mi ina thawha thla khata Rs. 3000-4000 hlawh nen chuan a kar pawh a lo hla ta deuh a niang. Thla khat a taksa hmanga ei a zawn takah chuan a nau enkawlna tur pawh a thawk chhuak ta a. A nau pawh tha takin an zawmsak a, a ke pawh a bai lo. Ka nu chuan eizawnna dang nei ta lo chu a hna chu a chhunzawm ta zel a. A inkhawl ve zel bawk. A naute zirna atan vek a ni. Mahse, mihring rilru hi a lo mak khawp mai a..". Nenei chu a insút faih a. Kan en thap. A thusawi chu ngaihnawm kan tiin kan lo tang ru ve teuh mai. Pindan kawngka a rawn inhawng a, Nu Sangi chu phelh phang hian a rawn chhuak a..

A fanu hmel a hmuh chuan, "Ti nge?" A ti sap a. 

"I chanchin ka lo hrilh ve a. Kan muhil thei dawn chuang si lo va. A pawi lo tiraw? Nangmah ngeiin han hrilh teh" Nenei chuan a ti ta a. Kan bulah rawn thu vein,"Thingpui va lum la " tiin a fanu a melh a. A tho vat a. 

"A sawi kha ka hre vek alawm. Ka fanu hi ka fanu ni lo se chuan, ka vanduaina avang hian ka thi daih tawh ngei ang. Nenei hian damchhan min neihtir a, ani hi ka damkhawchhuahna chhan a ni" a ti dam thlap a. 

Zira chuan,"Pawi i tih loh chuan, Nenei sawi bak leh a sawi lan loh ho kha sawi zawm la..a ngaihnawm bakah kan tan pawh a la tangkai dawn tlatin ka hria" a lo ti var a. Ni e, thawnthu tam tak hi kan chhiarin kan ngaithla liam puat thin a. A phena zir tur leh hriatreng tur inphum hi kan hmuhsak leh thin si lo. Mihring nunah hian tupawhnise, zir tur leh hriatreng tur sulhnu pakhat tal hi chu a awm zel thin..

Nu Sangi chuan," Ni e, ka la hrilh ang che u ka la ti tho a. A chhan chu hmun hrang hrangah ka awm kual nasa a, ka chanchin tuitang lo tak an hriat hian min thinhrikin min hlat zel a, mi dang ka atanga inhriat ai chuan keimah ngeiin sawi ka duh alawm" tiin a aw a thian kharh a.

"Umm, nia, a harsa thin khawp mai. Tikhan ka naute avang khan zah pawh dawn zo leh Pathian zah zo loin hna tenawm leh tenghneng tak ka thawk ta kha a nia. Khatih lai kha chuan KS te hi an la tam vak lo va, KS zingah rau rau pawh ka lo langsar vein ka hmel a lo këu ve deuh bawk aniang. Dawrtu pawh ka nei thain la lakah an thil phal em em thin. Ka naute pawh an duh leh mamawh ka tihsak zel thei a. Ka nau chiah mipa kha Mama tiin kan ko mai a, ani kha lehkha a thiam reuh a, amahah khan beiseina sang tak ka nei ve a ni. A nau chiah hmeichhia Amuani erawh a thian kawpten an lo zir lo bawk nen, ka duh aia hmain mipa a hria a. Dawt min hrilha school tlanbo te kha a ching tlat mai a. Han hauin han zilh ve thin mah ila; engah teh vak min ngai tlat lo mai a. Ka rilru a hrehawm thin khawp mai. Amuani'n college a han kal ve tan a, thawmhnaw a duh changkangin a duh manto thei si. Phur a rit zual thin khawp mai. Kan in luah pawh kan sawn ve tawh a, tlemin a hmuh tlak ve ta deuh. 

Hun a liam a, kei pawh zan tin ka chhuak tawh lo va, ka naute bulah hi chuan, zan lamah hna ka thawk ka ti mai zel a, an la hrethiam lo va ka lawm thin. Mahse, vanduaithlak takin zan khat ka service chu ka thian pahnihte nen Veng chhung duty ten min man ta a. Ks ni mah ila, zu hi far khat pawh ka tem lo va ,damdawi nise ka ti ngai hek lo. Mahse, ka thiante kha an ruih bakah damdawi an vawrh tur kha an lo ak chu niin, kei pawh min ching lepse nasa a, mahse, engmah an hmu ve lo. Chuti chung chung chuan min ngaidam thei ta lo va, ka theihtawpa ngaihdam ka dila min kaltir tura ka ngenna chu min hnawlsakin, " Veng chhung titawptu" tiin kan lu min kehsawnsak ta a. News-ah kan hmel nen lam kan lang ta chuai chuai mai a. Mizoramah khatiang kha a la hluar lo va, miin mak an tiin tenawm min ti em em a. Chu zawng aia na leh tawrh har chu ka thisen zawmpui, ka naute, an tana mualpho leh hmingchhiat pawh dawn zo lo khawpa ka inpekna te khan min zahpua min haw ta em em kha a ni. (A mittui a hru zauh a) Tluangtea pawh a mittui a khap per sak mai. 

Nasa takin min an khum a, Amuani phei chuan a u ka ni chungin kut min thlak a, ka nakah te hian a chhuih a, ka thawk a tisak rei hle. Kan te ber Mateii erawh chuan engtin min ti ve vak lo. Mama leh AMuani chuan, "Mi hur i nih kha. Hetiang i ni tih kan lo hre ngai lo va ,engtin nge class pawh kan kal ngam tawh ang. Mi zawng zawngin min hmusit tawh dawn a nih hi...ka nute rual khan lo thi ve law law a tha tur..hetiang eizawnna tenawm i thawk tih hria ila chuan, patea te bulah khan tihduhdahna kha kan tuar leh mai tur" ti ten a ni min ankhum ni. Mama pawn vawi hnih min hnek a. Ka kehsawm a ni ber e. Anmahni vanga ka tih vek a ni tih an hriat loh vangah ka la ngai lui hram hram a. Tap zawih zawih chungin, "In tan vek a ni..mi hlawhtling in niha tuma tihduhdah intawrh tawh loh nana thawk ka ni asin" ka tih pawn, "Nanga chawm kan ngai lo. Kan thawk ve thei. I mi chawmna kha eng atanmah kan ti lo, khatiang i hurna man kha eng atan mah kan ti lo" an ti ta a. Chu zet chuan ka thinlung a tikehsawm chiang ta kher mai. Heti taka ka hmangaihna leh an tana ka tawrhna hrethiam duh lote tan hian khang kum chhung zawng kha ka lo inhlan a maw?! Na ka va ti tak..

Kan in luahna ten min hnawhchhuah chu thuhran, kan veng hruaitute chuan kan awm an phal ta lo bawk a. Tah chuan, ka naute chuan, "Ani hi chhuak se, keini chuan engmah kan tisual ve lo va. Min awmtir hram ru" tiin an ngen a. An remtihsak ta a. Kei chu ka thawhrimna hmanga kan luahlum ,engkim bungbel leh in chhung bungrua zawng zawng ka thawhchhuaha ka lei vekna in chhung chu ka chhuahsan ta a ni. Ka naute tana ka tihtheih hnuhnung ber tiin ka thawmhnaw bak engmah ka la chhuak lo. Ka chhuah dawn chuan, Mateii chuan , "A u, ka rawn zawng chhuak leh ang che..lo thi suh aw" tiin min thlah a. Ka pawm vawng vawng mai. A u te a hlau si a, min zui ngam lo tih ka hria. Mama leh Amuani te erawh chuan, "Vawikhatmah i hmel rawn lan tawh ngai suh. Nang leh keini chuan inlaichinna kan nei tawh lo ve" tiin min tuithlar ta a ni. Ka thiante in ka pan a. Ka lu a kawlh si a, pawn chhuak ngam chi pawh ka ni lo. Tichuan, ka thiante chuan burma lama an thiante nen sumdawn dan tur an ruahman ta a. Ka sum khawlsa ve kha chu ka la chhuak ve vek a. Engvangin nge ka han hnutchhiah bik ang ka ti ve kha a nia. A la tam tham ve bawk a tiin thianten damdawi hmanga sumdawn an rawtna chu zawm vein ka sum kawlsa chu bultan nan ka hmang ta a. Engmah kha ka pawisa ta bik lo a ni ber e. Thinlung a nata a puahkeh tawh chuan eng thil mah hian min tinghing zo hlek tawh lo mai a lo nia. Kei pawh damdawi zuar ka ni ve ta reng mai. Pawi tihna chu nei deuh mah ila, ka ti rei chuang lo vang tiin ka inkhawl ngah huna tawpsan ka tum a.

Kum khat a liam leh takah chuan keimahin in ka luah leh thei ta a. Ka in luah pawh a nuam ve khawp mai. Mahse, min hria hi an lo awm ve leh nawk zel a, veng reh leh lun lo lai ka thlang a ni. Damdawi zawrh chu bansan a har riau mai a. A hlawkna ka pawh tawh si. Mahse, a dik ber si lo tiin ka nu leh pate damlaia min zilhna te kha ka hrechhuak a. Ka bansan thei ta hram a. Burma lama bungrua te chu la vein sumdawnna ka tan chho ve leh ta a. Ka hlawk ve chho dawn tihin vanduaina chuan min lo la kalsan hlen hauh lo mai a. Ka thiannu boral an khaw lama ruang zuia ka zin hlanin ka in chu an lo rawk a! A bo a bang awm hlek loin ka pawisa kawl sa ve zawng zawng an lo la fai mek mai a! Ka at vang a ni pakhat a. Bank ac ka siam lawk duh lo va, engkim ka chân leh ta der mai. Thih mai kha ka chak hman a. Damchhan ka nei tawh chuang hleinem le..naute chawm tur leh enkawl tur ka nei bawk si lo ka ti hman a. Mahse, thih ringawt chu ka ngam bik si lo. Thiante pawisa han hmansak mai tur lah an lo tluan loh lai ni bawk nen ka cha ta hle mai a.

(Nenei'n thingpui a rawn dah a. Kan in te te a)

Hmana ka hna ngai bawk kha thla 5 vel ka thawk ang a, ka inpeipun hnuah Thingtlangah ka pem daih ang tiin ruahmanna ka siam ta a. KS hna chu ka thawk leh ta a. Ka lo nalh lehzualin inchei te pawh ka lo thiam chho nen. Customer chu ngah thin tak ka ni. A hlawk pawh ka hlawk. Thla 3 velah chuan ka inkhawl ngah ta der mai a. Mahse, ka rin loh leh beisei phak ngai loh ka chungah a lo thleng ta a. Ka rai! 

Tu fa ber nge tih ka hre si lo. Ka manganzia leh ka inzahpuizia kha aw. Damdawi hi kan ei ziah a, ka lo ei theihnghilh lai leh ka fel loh lai a lo innagching hlauh a lo ni. Mahse, tihtlak erawh ka tum lo bur. Lo piang se tu nge a pa hmingah ka ziah ang tih ngaihtuah reng rengin zan tam ka tlaivar thin. Ka eizawnna pawh ka bansan nghal a. Ka chhuak ngai lo tluk a ni. Mahse, chutia mangang leh baihvai taka ka awm lai chuan, U Mawia kha a rawn lang ta a. Ani hi kan thenawm ami niin a hma pawn min ngaizawng nasa thin. Pathlawi nii fa pakhat an nei hman a, an fa erawh an nuin a kawl thung. Ks ka ni tih hre vek chung pawn min bansan duh miah lo va, nau ka pai tih a hriatte chuan," apa ka ni mai ang. Tha takin ka enkawl ang" tiin amah nei turin min ngen ngawih ngawih thin. Kei lah Ka naute pa tura buai reng reng mai chu ka lo sihhnip zo ta a. U Mawia chu ka zui ta a ni. A chhungten min thinhrik leh min huat vangin kan inruk atanga kar hnih lekah ka in luah lamah khan kan insawn ta daih a. U Mawia hi P&E Department-ah hian a thawk ve a, a nghet a ni ve bawk a. A hminga sawrkar hna thawk chu a chhungte pawn an ui ve hlein ka hria. Mahse, "Ka nupui inpawm theih dawn loh chuan kan awmho thei lo" a ti ve tlat si a. Tikhan min chhuahpui ve ngat a ni. Chuvang a nia khang kum tam tak chhunga min tihretheihna te pawh ka tawrh hram hram thin. Engmah ka nih loh lai leh mi zawng zawngin min ensan laiin min vuan ve tlat a, chhuahsan tuma ka han inngaihtuah pawn khatih lai hun kha ka ngaihtuah lo thei bik thin lo a ni.

Tichuan, kan hlim dun ve em em thin. Kan inhau ngai lo. Zu kha a in zeuh zeuh a, nasa khawp a ni lo. Kei pawh ka thla a muang a, ka hriselna te pawh a rawn tha chho ta a. Sum lamah nise ka lo inkhawl ve nual hman avangin U Mawia hlawh chu bank-ah kan dah zel a. Kan buai vak lo. Hetih lai hian ka naute chanchin kha a rukin ka la ngaihven ve reng thin. 

Mama kha class a kal chhunzawm thei ta lo va. A chhan chu pawisa a nei lo. Mi hnuaia inhlawha hnathawh kha a zak tlat bawk sia! College bansanin ruihhlo lamah tlanin kar loah nuthlawi zu zuar a luhkhung a. Zu bawihah a tang chho ta a. Amuani erwh pasal a um a. Vanduaithlak takin a pasal khan natna hlauhawm tak, HIV AiDS a lo vei reng chu niin. A pasal atangin chu natna chu a kai ta a. Naute ka neih dawn hian damdawiinah kan inhmu a, mi pawh a en ngam meuh lo. A pasal nen an inthen leh ta bawk si a, Belh tur nei ta lo chu a vakvai chho a, Mahse, a vanneihna chu a piangthar ta hlauh a..home pakhatah involunteer-in a thawk a. Kum 3 a thawh hnuah a boral zui ta a ni. Kan te ber Mateii erawh kan in luahna te khan khawngaihin awmna tur an ngaihtuahsak a, a awmna te kha an lo felin an lo duat khawp mai a. An fanu Delhi-a hnathawka awm hnenah a thawk zui a, ani lah nula senior, pasal neih tum lo ni ta chuan fa ang maiin a lo en ta a. Tunah hian pasal tha tak neiin chhungkaw duhawm tak a nei mek tawh a ni. Mahse, vawikhatmah ka pur buai duh lo. A pasal chhunngten keimah vangin an hmuhsit ka hlau. A chanchin erawh ka ngaihven ve reng thin. Mama pawh kha a la dam ve a, dam chu..mahse, kei ai pawn a upat hmel zawk a ni. 

Tichuan, u Mawia nen chuan kan innei chho ve zel a. Nenei a lo piang a. A duat ve viau. Mahse, zu a in nasa tan ta tlat a. Kan in luahte sawnin kan inbengbel nghet ve zel a. A tawi zawngin Nenei naute an lo pian tak hnu atang khan U Mawia chu a danglam ta chiah a ni. Apuia te leh Nenei inkarah vawi khat nau ka chhiat a ni. Nenei chu a hlamchhiah tan ta a. Kei pawn ka hrethiam tho. Gaby ka pai lai phei chuan kan nufa chu a thinrim hrikthlakna ber kan ni ta a. Zu ngawlveiah a chhuak ta bawk nen..ngaihzawng min neihsan thul, aaa..U mawia vanga ka tawrhna hi chu sawiin a siak lo vang. Taksa him piala awm lai kan nei ta mang lo. A fate erawh a duat ve viau lawi a. Chu ringawt pawh chu ka lawmna tawk a ni. Ka fate hmeithaipui turin kan la chhangchhe si, hna ka thawk thei rih dawn si lo. Ka tuar tlawk tlawk mai a ni. Puan thui hi ka lo timi phian a. Ka thiannu dawrah ka thawk ve hlauh a. Mahse, A hlawh zawng zawng deuhthaw a zu mana a kal zel vangin ka puanthuina chu kan ei a ni mai a. Nenei'n pawl 12 a pass te khan college kaltir ka tum ve em em, mahse, pa ber khan tul a tih loh bakah i kal luihtir chuan inchhuak ang a ti mauh mai si a. Nenei hian kan nufazaa retheih ai chuan tiin, 'Nu..ka bang mai ang" a ti ta ringawt a. Ani pawh thingpui dawrah te a inhlawh chho ve ta a. A pa awm lai chuan tawng pawh a tawng ve ngam ngai lo. Chaw kawpuar pawh a ei ngam ngai lo. Nep ka inti a, ka fanu chu ka lainat ngawih ngawih thin. Mahse, a naute an la te si, kawng dang ka la hre tlat lo a ni. Nenei a tihduhdan zawng zawng erawh sawi a tul ber lo va, ka sawi lo mai ang. Tikhan a bialnu rawn hruai lutin keini nufa chu min hnawtchhuak ta a, he ta kan lo phei hma hian ka thiannu , a dawra ka thawhna te inah khan kan khawsa ve rih tawp a, anni lah an khawsak a chuti lua bik si lo nen. Vanneihthlak takin U Saii ten min rawn zawng chhuak ta a nih hi.." Nu Sangi te nufa zinkawng chu a khirhin a harsa zet mai. Ka khawngaih zual sawt mai. 

Zing dar 4 a ri dawn ta reng mai. Kawl pawh a eng tan det det a. 

"Tlem tal muthilh tum ang u" an tih vangin keini pawh kan haw phei ta a. Anni nufa erawh an mu tawh pawn ka hre lo. Kei tak pawh ka muhil thei lo, ka taksa chu a chauin ka mit pawh a thial urh mai. Mahse, Nenei te nufa hringnun chuan min mawlh ka ti mai. Ka ngaihtuah zui ta reng mai. Chhungkaw pangngai neih hlutzia pawh ka hriatchian phah sawt mai.

"Em em a! Hei,lulian..tho tawh rawh" Zira'n ka luah a rawn sawi nawk nawk a. Khawvar hnu feah ka lo chhing ve sek a nih hmel. Ka phawk hru ringawt. Rizai hlim a rawn tum chu a kut ka lo man vat. A nui huk huk a, "Khaw maw.." Tih pahin a rawn pawt táng tâng a. 

"Kal teh, Dula, ninawm" ka lo ti nghek. Nia, mipa hi chu a thawh thut theih loh..englo nghah a ngai. HEhe..

Ka va tho chhuak a. Dar 9 a ri tep. Hmai pawh phih loin dawhkan ka kil ve thâwr..a tui vek tho. 

"Engtin nge an tih leh zel dawn le?" Ka ti a. Nenei te ka sawi tih an hrethiam mai .

"Police stationah an kal leh dawn" Lukira'n a ti a. 

"A mak e, han bo tawp mai chu..ka khawngaih, an duhawm reuh si" ka ti a. Apuia te unau harh leh hlei tak ka mitthlaah an lo lang nghal. Kan ei kham thleng ka sil lai chuan, Nu Sangi te an lo lut a, Nenei'n Gaby a pua a. 

"Kan va kal leh ang e, U Saii te pawh vawiinah an rawn haw dawn e. Inhah si a, tikhan lo chawl hahdam ru aw" a rawn ti a. 

"Naute kha kan lo awmpui dawn mi?" Tluangtea chuan a lo ti a.

"A khirh reuh lutuk,." Nenei chuan a lo ti vat a. Ka en reng a, min en ve duh thak lo. Nizana ka fawh ngawt vang kha a nia. Keia reng reng pawh nge maw ka fawh ringawt ni. 

"Khaw maw, Nene,i number min lo pe teh. Chanchin inzawh dawn pawn" Zira chuan a lo ti a. Nenei chuan a pe ve a. An chhuak zui nghal. 

"Khawi, Nenei number kha min lo thawn ve lawk" tih pahin ka thleng sil zo chu Zira ka melh a. 

 A ke zungtang phur ar ar pahin, "Ngatan nge i tih? Bem i tum leh tum loh sawi phawt la" a ti a. Lukira a lo nui huk.

"I va ninawm e aw..rawn thawn mai teh. " ka ti nghut a.

"Done..va text chhen suh..an buai em kha.." A la ti zui! Nenei number chu ka save ta thân a. A dp ka en chuan, a naute nen an lakna a hmang a, a nui sen sen a, a duhawm reuh khawp mai. Rilruah an awm ve reng mai. Engtin tak chet la ang maw?! Chawhnu dar 1 bawr velah Apuia te unau bo thu chu kan chhiar ta a. An thlalak pholangin lo hmu an awm chuan report nghal turin. Hmu hram se aw. A hmasa berah Pu Mawia nupui kha an hmuh phawt a ngaiin ka hria. Kha nu ruahmanna vek kha a nih ka ring tlat! A hmel kha mi tha a ni tlat lo. Ka hriat loh karin ka lo muhil daih a. 

"Khumah va mu rawh..Esi te an lo leng dawn" Nunzira'n a rawn tih sur sur chuan ngawi rengin ka tho a, ka va mu a. Tluangtea erawh ka hmu lo. Alicia a hmu leh dawn a niang. Ninawm, single reng hi ka ning ve lek lek zel. Ka inngaihtuah thui hmain ka lo muhil leh daih a. Hmeichhe nui uar uar thawmin min tiharh leh. Ka meng kâwk a. Zira'n ,"I nui ring ee..Tpa a muhil a nia" a tih ri ka hre zui nghal. Tho ta chuang lo chuan ka meng ta reng a.

"Tpa leh Vanneihsangi chu an ni ve tak tak ami?" Zari aw niin ka hria.

"Ka hre lo. Ti nge?" zira.

"Tpa hian a duh anih chuan ka ngaihdan a dan phah viau ang. Tiang kawngsir thingpui dawr vela thawk mai mai te chu a..bakah mi bialpa ngaihzawn a hrat bawk si" Zari chuan a ti leh hlang hlang a. 

Esi'n ,"Hmm..em em a che. Thingpui dawra thawk tih vel kha chu kei chu ka hmusit lo. An chak vanga thawk an ni bik lo va, thawh hreh nei lo an ni hi ka ngaisang daih zawk..mi bialpa ngaihzawn tih vel pawh i thiannu bialpa bak a ngaizawng ami?" A lo ti ve ta fak a. A thiannu zia chu a mil lo tan ta niin ka hria. Ka lo khi ve suk ringawt.

"An tam ang. Johny te ang pawh a ngaihzawn ngamte chuan.." zari chuan a ti a. 

"Sawi sek suh u. Zari, i thik zawk a ni lo maw? A ninawm. Tunah phei chuan a naute an bo a, an mangan tehreng nen..i thik anih ka ring tlat, Johny kha i lo duh ve reng a ni zawk lo maw?" Nunzira awki chuan ngaihno a bei ta lo. Ani hi chu a sat phat tawh hi chuan tu hmai eng mah a zah ngai lo. A reh duk mai.

"Es, ka hawnsan mai ang che. I bialpa te thianho hi Vanneihsangi zunah an uai zo tawh a nih hi" Zari chuan a ti nghat a.  

"I ho em mai a..thu mai mai teh" Esi chuan a ti a. Mahse, kawngka a rik rak danah a chhuak tih ka hria. Kei pawh ka tho chhuak ve ta a. 

"Kha kamtami kha kawm tawh suh" Zira chuan a ti ta fak a.

Esi chu a ngawi reng a. Zira bawk chuan, "Min rawn be peih ve bawk sia, ka ning a nia. Bem ila min duh ang..tiang chu..i hrethiam em?" A ti leh a. Esi mitmeng pawh a danglam nghal.

Hmeichhia tih takah,"Awii chu chu ni maw..I chanchin min zawh ve ziah, hei ngaihbel theih si loh hian i chanchin a sawi peih thei tawp. Pubg inkhelh ho vel te hi a sawi sek zel a. Mahse, thiante em thik chu ka tia" a ti ta a.

"Thiante ngaihzawng lo ngaihven ve húrh ching chuan an phatsan hreh lo vang che..hre tawh rawh. Rini leh Alicia kawm la a tawk.." zira'n a ti leh hmawk hmawk. Thingpui ka lum a, ka siamsak ve nghal bawk a. Esi chu chaw eiah kan sawm tlat a, Zira'n ei rawng a bawl peih loh vang a ni reng sia! Ani pawn a u te a bia a, a ei ve dawn ta nge nge e. Esi hi Aizawl khua a ni bik lo va, a u te nen in an luah ve tho a ni. Tluangtea lo hawn chuan kan eirawng kan bawl peih vek tawh. Nu Sangi te erawh an la rawn haw lo. 

Nenei ka call ve ta reng reng a.

"Hello" a rawn ti dam thlap a.

"Aw. Nene, keimah Tpa..eng nge inchanchin?" Ka va ti a.

"Hei ka pa te lam pawh an rawn kal ve tawh a. Ka pa nupui Feli kha an zawng tawp a. Ka pa lah hian ka nu a la mawhpuh zui! Ka nu thiannu te khan chaw ei mai ru an tia, kan ei dawn a. Tih vak ngaihna a la awm lo" a rawn ti a.

"Buaithlak ve aw. Zanah inlo hawng dawn em?" Ka tih chuan. 'Aw hawng ang. Inlo leng ang tiraw?" A ti sep a. Min dek riau!

"Inchau awm sia, lo len pawh a inthlahrunawm..mut hahchawlh nan hmang ru..mahse, ka rawn phei zuai ang. In lo hawn hunah" ka ti a. 

Phone ka dah zui. Nunzira te pawh chu ka hrilh ve a. Feli chu an ringhlel ve khawp mai. Chaw kan ei zui nghal a. Hmeichhia eisiam na na na chu kan eitui deuh e. Ei khamah Nunzira'n Esi chu a va thlah ta a. Alicia pawh naktuk lamah chuan chhuah theih an inbeisei a niawm e. Kan va lang leh ta miah si lo va, a inthahrunawm angreng. Mahse, Lukira'n a phal miau si lo alawm. Chance a duh ve si..

Dar 7 pelh velah Nu Sangi te chu an lo haw a. Nunzira pawh a lo thleng zui a. A rawn khi lut tháw a. Lukira chuan, "Khiang rah tla anga i khik thú reng a?" A lo ti hmuk a.

A kawr chu hlipin, "En u la" a ti a. A kekawr kawngah Amawii um khat a lo pai reng chu niin. Kan tho rang teh e. In lohna a rei leh tlat tawh. "Engtin nge?" Ka ti hlut a.

"Zia tawp. Esi u bialpa min pek anih hi..a kai tawh sia, min pe ve tawp..in nghal ang u..khaw nge Alu fry kha, Lulian, lo suak rawh" a ti leh sawk sawk a. A hmanhmawh thei siah. Rial no ah ngei chuan a thli ta sar sar a. A hmel hmuh a nuam ngei mai. Ngawi reng chuan kan in ta hlawm a. No 3 ka in hnu chuan, Zu power ni maw Nenei te ina len a lang tlat! Anni erawh an bialnu te ve ve an be kur leh lúk tawh. Ka kekawr ka va thlak a, Thenawm te in chu ka pan ta a. Nenei chauh amaha lo thuin a phone a lo khawih a.

"Lo kal rawh" a ti a. A bulah ka thu hmak mai. 

Min rawn melh hâw a, "U Tri, ti nge zu i in?" A ti ta mai a. Ka va inthlahrung tak.

"Nia, ka chau ve deuh a" ka ti ringawt. 

"Khaw nge i nu?" Ka ti zui zat a.

"Api Saii te inah a chho.." A ti hmuk a. Titau te pawh a ang riau. 

"Nene"

"Eih"

"Hmuk hmuk a"

"Nge zu i in?" A ti ta a. A mitmeng thleng pawn a lawm lo tih a lang reng mai. Kan inngaizawng miah lo nachungin zu a huat em vangin keini a mi ngainat ten kan in kha a lawm lo ve tih ka hrethiam.

"Tihpalh.." Ka ti sup a. 

"Nene.." Zu rui ho tak hi chu aw..! 😆

"Aw. Nge min koh reng, Pu Mawia ang mai" a ti hlak a. Ka nuih a za deuh si, ka nui ngam si lo.

"Ih, bialpa i nei em?" Ka ti ta a.

"Nei mai mai lo" a ti leh hmak.

"Neih duhna te i nei em?" Ka ruih leh ruih loh kar a hla chu a ti ve ngawt ang. 

"Tuman min duh ve lo vang" a ti a. Hope a awm .

"Duh ta che ila" ka tih chuan a rawn hawi a. Chiang kelkawla min en chungin, "I ruih loh hunah sawi rawh. " a ti chang rât a.

"Hmm..harhfim chuan ka zak alawm" ka ti nawi nak a.

"i zak lo aniang, nizanah pawh min fawh kha" a ti bawk si. Lehlam hawiin ka khi suk.

"Min duh em?" Ka'n ti leh thawr a!

"I mak" a ti daih.

"Ni ila" ka va ngampa sáwt tak.

"U Tri, ka rilru a hahin a buai em em asin. Ka naute vangin engmah ka ngaihtuah thei lo va, tihian ka ngainat leh ka rinngamin rui chungin min bawl kual a. A hrehawm ania" a ti ta nghat nghat a. Ka harh hawkin ka hria. Hrehawm ka va ti tak.

"ka tihpalh..ka tihpalh lutuk..nia, ka lo rui deuh a ni. Ka va haw ang e. Muttui aw.." Tih leh thawh ka rual a. Chhan pawh min chhang lo. Ka tisual niin ka hria. Mi rilru hah leh mangan em em laiin ka lo ri ve sek a, zu rui chung lehnghalin. Ka mu nghal daih. No khat chu ka in belh leh hram tho. 

Whatsapp atangin ngaihdam ka dil leh. "Nene, ka tihpalh aw. Min hrethiam hram dawn nia" tiin.

"Aw..hrehawm ti suh. Ka rilru a chawl lo em a, kei pawh ka lo insum zo lo a nih kha..min hrethiam zawk dawn nia" a rawn ti ve leh thliam a. He nu hi ka duh tak tak dawnin ka hria. A hmel ka mitthla apiangin a biang taitek hnuaia a biangsum khuar kelha a nui sak hmel chu ka hmu ziah thin. Min haw bik lo chuan ka hria a, nawr tut tut chu an dinhmun nen a dikin ka hre lo. 

"Ka'n mu ang e. Muttui aw.." Ka va ti leh hram a.

"Muttui le..lulian" a rawn ti ve. Ka khi suk. Mahse, U tri min tih hian sial ka ti riau! 

"Zonunsang, mi hurnu, rawn hawng rawh. Nangmah vangin ka fate an bo anih hi..engtin nge i mut theih zawk? I fate i hmangaih lohzia a lang chiah e. Zawngi, rawn hawng rawh..in nufa khan ka'n nghaisa tak tak teh ang che u.." Pu Mawia tawng thawm avang chuan ka harh hlawl. Ka phone ka en vat a. Dar 12:09 chiah chiah. Nunzira pawh a lo thu ve chiah a, Lukira erawh a hnâr súk súk mai.

Chapal bunin kan chhuak nghal a. U Mala pawh a rawn chhuak ve mek. Nu Sangi'n kawngka a rawn hawng ri rak a, a hnungah Nenei hmel phelh phang a rawn lang zui bawk. Kan inrin hmain pu Mawia chu a lut ta rawp a, Nu Sangi a rak tuar ..Zira nen a rang arangin kan va lut ve nghal. 

"Min rawn hnaih hlek suh u..nangni pahnih kha" pu Mawia chuan a ti pawr huar a. Nu Sangi chuan ,"Eng nge i rawn tih dawn? Min rawn pal fo tawh suh. Nangmah vangin anih hi ka fate an bo?"a lo ti hlawk hlawk a. A khur deuh bawkin ka hria. 

Pu Mawia chu kan chelh a, "Chhuahsan teh. I tithlabar zing tawk tawh e" ka ti a. Kei aia upa pawh nise ka zah peih tawh bik lo. An kailawn a thleng tihin a ri phut a, Nu Sangi chu a va pan leh ngat a, kan chelh hman si lo, mahse, Nenei a rawn lawr zawk, "Nu," a tih rualin a eu zawk a, chhuatah chuan a tlu ta mai a. A rang lutuk a, ka hrethiam lo. Nenei chu Nu Sangi chuan a bawh vat a, "Bawihte" a ti tuar. Pu mawia erawh hrilhai hmel zetin chemte thisen kai hum chungin a ding run mai. Engtin nge chemteah sawn thisen a kai theih?! Ni lo, a dik lo. Hei hi. Nunzira chuan rang takin Nenei chu a va bawihsawm a. Kei erawh ka la ding tlat! Nu Sangi'n, "I vit ringawt a nia" thlaphang tih hriat ngawih ngawih hian a ti a. Ka harh chiah. Pu Mawia chu ka bawh rawp a, a lo inring lo nen, a hmaiah chuan vawi 3 ka hnek hman. U Mala'n min lo kai tho lawp a, pu Mawia erawh a let reng ringawt. Nenei chu an kai tho a, a dul veilam chu a hup a, a kut kar atangte chuan thisen a rawn chhuak tiam tiam mai. A mittui a luang ngiai ngiai a, "Nu.." Tiin a a phun sep a. Ka pan vat a, a dul chu ka va hup ve vat, U Mala chuan thutthlenga nau puakpuan chu lain a rawn vet ta mawlh mawlh a, kan la naupang deuh bawk a, kan hamhaih tlang a ni e. Nu sangi lah engmah a ti thei lo, kil khatah a ding khur zawih zawih ringawt. U Mala a fel hlauh a, In chungte a han kai tho a, Nenei te in chung pawh an rawn chhuk ve a. An che ta sawk sawk a. Nenei chu damdawiina phur phei turin kan zawn chhuak ta a, a kut veilam chuan ka kut chu a vuan tlat a, a vuan nghet kher mai. 

U Mala leh Nu Sangi leh Nu Saii te nen Damdawiin lam chu kan pan ta a. Zira te erawh chuan Pu Mawia chu an lo buaipui dawn a nih hmel..kal ve loh pawh tum mah ila, Nenei'n ka kut a chelh bet tlat si. Ka kal em em ang, ka vuan ang che..Nene.., Thi suh aw..

(Duhtawk leh phawts 🥱