vanneihsangi 24

VANNEIHSANGI (24)

Ziaktu: Toni Rálte

Nenei khawsik a san tak em vangin kan han buai deuh nak nak a. Zira leh Lukira te pawh chuan min tawiawm ve tlat reng a. Ka mal lo tih ka hriatna chuan min tinuam huai huai e. Amah Nenei erawh nachhawkna ten an han jection a. Doctor chuan, "Zai ngam a la ni rih lo ang. Enkawl deuh phawt a ngai" a tih avangin damdawiina kan awm rei pawh a ngai maithei. Apuia leh Gaby te pawh school an la kal thei ve zel a, ngaihtuahawm an ni rih lo turah ka ngai. Mak ka tih zawk erawh Pu Mawia chhungte lamin an ngaihven eih lo hi. A pa awm lo mah se, Nenei chunga thil thleng an hre ve vek a, eng nge an an tih tal pawh ngaihven ve awm a nia. Mihring hi kan lo inang lo thei khawp mai a lo ni. A rawn harh deuh chang hian, "Ti nge hetia min la enkawl duh. Min thihtir mai ta che" tih a ching thin a. Ka chhang ngai lem lo. Ni 3 lai a awm hnu chuan a zia ve ta hret hret a, chaw ka ei luihtir zel bawk nen. A muhil a tawngvai niah niah zelte pawh a reh tial tial e. A tawngvaiha a lam ngun ber chu a nu leh keimah kan ni. Lainat zetin ka melh ngawih ngawih thin. Ka nute pawn chanchin min zawt ve reng a, ka pu chuan,"Buangpui, amah ka duh loh leh ka huat vang ni loin fa nei lo va i awm ringawt tur ka ngaihtuah hian ka ná..ka tu hmuh hmasak ber i nia, kawng dang awm hram se ka va ti ve mawle" a rawn ti a. Ka pu rilru hi ka hrethiam lutuk. Ka dem reng reng lo. Ni e, fa neih chu ka chák alawm, Dik tak chuan mipa rilru atangin min han chhutpui ve u la, Nenei hi hmeichhe dang aia hmeltha em em bik leh nungchang pawh tha fal em em a ni bik lo. A nunkawng a bumboh a, fahrah a ni. A nu lah ks! Chuta chhapah tualthah thubuai vanga criminal a ni zui..ka thlan em em chhan tur hi a awm hran lo. Mahse, ka hmangaih miau si a, keiin ka thlah lehzel chuan engtin nge a nun a hman chhoh ang a, a naute pawh engtin nge an awm ang? Ka inbat hnawk laklawh tawh a, a tawp khar fel lo va bansan ngawt chu mipa ka nihna atangin a har ka ti. Fate chu kan awh viau leh kan adopt tawh mai ang chu. Hmalam hun ka ngaihtuah chuan a thim vek a, ka ngaihtuah duh lo lui tawp.

Amanda te pawn chet an la tan a ni maithei. Nenei te in hluiah te pawh an va kal a. Nenei'n ,"Ka thah a ni" ti ngawt mah se, Finfiahna a ngai ve tlat a. Dan hian a dik lo zawk hrem a hlau ve khawp a, dik taka rorel a nih chuan Nenei hi a tan ngei ngei chu ngai dawn mah se, a hmaa rorelna dik lo leh a dikna rahbehsak a nihna erawh hailan hram kha kei pawn ka tum ber a ni reng a. Malsawma pa pu Rinsiama leh Social worker te, Dr Jamesa te hian dikna an rahbeh vangin hremna hmu vein mualpho ve se ka ti takzet a ni. Nenei sawi Social worker kha damdawiina kan luh hnu hian vawi khat ka hmu thuak a, nelawm taka nuiin fel leh mi dang ngaihtuah ber niawm hrimin a awm a. Ka hnek chak khawp mai. Fake em mai. 

"U Tri, Apuia te ka hmu chak em mai. Ka hmu thei ang em?" Tiin min ngen a. Judy ka be ta a. Tlaiah an school bang an rawn peng kawi ta a, an han inhmu chu APuia leh Gaby chu an tap nasa mai. An lo ngai hle tawh a lo nia. Nenei pawh a mittui a tla zawih zawih mai. An inkuah khawm raih a, hmuh hrehawm ka tih vangin ka chhuak daih. Judy pawh a mittui a tling pam e. 

An awmna an sawn tak thut vangin an hrethiam lo viau naa, Judy hian thiam takin, "Nenei a dam lo nasa lutuk a, Damdawiina a awm chhung kan bulah inawm a ngai alawm" ti ang zawngin a lo hrilh a. Hman atanga chhel tawh kha an ni bawk a. An tuar thei unau viau reuh mai. 

Amanda phone call ka dawn chuan phur zetin ka la a. "Tp, Hma kan sawn zel a nia. Rohluzuala pawh a inpeih tawh a, amah Nenei kha kawm a ngai dawn a. Eng nge a dinhmun le?" A rawn ti a. 

"Hei a zia ve deuh tawh, ka lo hrilh dawn nia aw" ka ti a. 

"Aw le, cabinah awm se a tha ka ti mang e. Mi chimbuai theih loha kan biak a ngai dawn sia" a ti siam siam a. Hei chu Putea khan a sawi tawh a, a la ruah loh vanga la lut lo kan ni. Zawh leh a ngai dawn a nih hi. Kan inbiak zawh rualin cabin book tumin ka va kal nghal a. Vanneihthlak takin niminah a luahtu pakhat chu a lo chhuak a, kan chang hram e. Zan zanin kan invawm lut ta a. Putea'n pawisa min hnutchhiah nual a, bakah Nenei chuan a atm card min pe bawk. Sum lamah chuan kan la buai chhe lutuk lo ve. Cabina kan riah zan khatnaah chuan a harh tha viau mai a. A sam ka phiarsak leh a, kan titi ve nasa mai. Amah duat leh khawih theiha ka awm hi nuam ka ti hrim hrim e. 

"A tawp thlengin engmah hrechhuak lo la ka duh asin le" a ti sap a. 

"Ngati maw" ka ti hmuk a. 

"Min dem leh min haw reng rengin awm la, hmeichhe dang tawng la ka duh mawle" a ti a. 

"I á siah" ka ti ringawt. 

"Tak tak alawm. Thil a thlen vek hnua inhriatchhuah leha nat leh hi ka duh dan a ni ve lo. Tikhan min bansan hlen tawp la, kei pawh ka damchhung jail-ah awm ila i hmalam hun a eng zawk dawn asin" a ti mawlh mawlh a. 

"A chhan ngaihtuah leh zawhna nei reng chunga hmeichhe dang pawm chu a har ang" ka lo ti a. 

"Anih tihian min iai lo tihna em ni? Ka iaiawm em hi. Tual ka that a, pawngsual ka tawk bawk a. Duhtawka sawngbawl tawh hmeichhia, chhul cancer ni bawk hi thlah zawk mai la..i unaunu angin min en zawk la a tha. Ka lawm em em tho ang" a ti duah a. 

"Tawng tam suh, i chau ang e" ka lo ti daih. Ngaihthlak nuam ka ti lo. 

"Ka chhul paihtir te min tum a, U Tri, fa i awt lo mi?i awh em kha..fa ka hrinsak thei dawn hleinem che. Mawl mawl suh. " a ti bawrh bawrh a. A chala va namin,"Mu mai mai teh.." Ka ti hluk ringawt. 

"Min tawng hi i vanduai ka ti thlawt. A tir atangin min la buaipui char char a nia. Tibuaitu ka ni ringawt. Vannei ve ngai loi ka nih hi" a ti hap a. Ni e, a hming hi a va pu zo lo tak. 

" Vannei tur chuan upat ve deuhte a ngai alawm " ka'n ti ngawt a! A nui hak a. Ka kut rawn vuanin,"Tihdan ka hria" a ti sap a. Ka va melh háw a. A chil lem khalhin,"Jailah ka tang leh dawn a, chumi chhung chuan sáwn lo thlak la..chuan min la duh chuan ka chhuah hunah kan innei ang a" a ti! 

"I a mi? Jailah tan tum ngawt suh. I tang dawn lo. Ka sawi tawh kha, Ukil thiam deuhin a dinsak dawn che. Sawi tura a tih che bak engmah sawi a ngai lo. Nene, ni e, i that a nih pawhin chhan tha tak i nei a, mahse, eng anga chhan tha pawh awm mah se, dan hmaah chuan thiam i chang dawn lo. Kha zawng kha rahbeh i ni a, i chunga an chet ang khan kan chet ve mai a ngai a ni. I him a ngai. Ka nupui i ni dawn, chu chu hrereng rawh" ka ti ta duah a. Min melh vawng vawng ringawt. 

Ka va fawp a. A hmui pawh a da luap mai. A dam lo nasa ve bawk a ni. 

"Tihdan ka hria" a ti leh thut a. Nui chungin, "Eng" ka lo ti vat a. 

"Ka dam that ve deuh lai ka chhul an paih hmain mu dun ila, chuan ka rai ang a. Mahse, ka chhul paih ta se ka rai zui zel thei ang em le" a ti niah niah a. Ka nui hawk hawk. Ani pawh a nui a. A nui hmel leh a biangsum ka han hmu leh ta chu nuam ka va ti ëm..

Ka mitah tak melhin,"Khawvel mipa zawng zawngah i tha ber.. Nang ang ema hmangaihtu tha ka tawng hi Pathian malsawmna ka dawn ve awmchhun a nih ka ring" a ti ta a. A hnuk a ulh leh deuh. 

"Hmangaih loh i har em alawm" ka ti a. Kut inhumsakin kan ngawi ta vang vang a. 

A tukah AManda leh Ukil Rohluzuala te chu an rawn lang ta a. Rohluzuala chu a lar ve vangin IG velah a thlalak hi ka lo hmu ve fo tawh a. Sang leh lian lam, khabe hmul buk ve deuh tak, keimah ang bawka lukir a nia. A aw pawh a pa hle. Nenei chu a han chibai te te phawt a. Kan thu ta thap mai. Thil thlen dan kei pawn ka la zawh miah loh chu a zawt ta a, Nenei chuan a thut dan siamremin a sawi ta a. 

"Huatna hlirin ka khat tawh a. Hun remchang kha ka hmu thei mai lo va. Zanah khan U Tri-a hi a rawn leng ve a. Malsawma vangin rilru na takin a haw a. Khami ka thin so phut khan khami zan ngei ngeia thah kha ka tum ta a ni. Zan dang ang lo takin ka be tha lui a, leng rih tur leh U Tria khan min rawn tibuai palh ang tiin ka sawi kual a. Dar 10 velah a haw a. Mi veivak leh motor veivak a la awm sia. Ka duh dan angin thil a kal thei ta lo phawt. Chuan, ka muhil thei thlawt lo va. Zing dar 2 velah khan Malsawma chu ka call ta a. Ani hi games a khelh thin vangin a mengrei thin. " ka muhil thei lo. Zu ka in chak, i nei em?" Ka ti ta a. Ani min hrai ruih chak reng renga za ruai reng chu a phur khawp a . A rawn lang nghal. Kan ina thah kha chu a ruang kha ka nauten an hmuh ka hlauh bakah kan thawm an hriat ka hlau ve nen, "Lengchhuak ang. I motorin..ride ila" ka ti ta a. Mak chu a ti deuh tih ka hria. 

"I duh pawh i hmu ang. " ka tih leh takah chuan mi fing vak lo tih takah a phur leh ta hurh a. Kan chhuak ta a. Chemte inven nana ka lei ve chu ka paipawn ru ta zauh a. Garage-a a luh rualin ka zui ve a, min hnungchhawn laiin ka vit ta a ni. A nakah ka vit phawt a, a rawn lehhawi leh rualin a dulah ka vit zui ta a ni. Ka inkhawih tui a, nuam ka ti hle bawk. Ka damchhan ka tihlawhtlingah ka ngai hmiah. Thawm a chhuah lo bawk a. Tichuan, a thih hnu khan chemte chu side drain-ah ka paih ta a. Inah ka haw a. Ka mu.." Tiin. A sawi chhung zawng ka lo inhumruh. Ka nenei hi indem em? Mihring nunna a la a sin. Mahse, huatna leh beidawnna thinlung nei te hian engmah pawisak an nei tlat lo a tin ni. Mi beidawng thinrim hi hlauhawm deuh an ni reng a ni. 

Rohluzuala chuan a lo ziak lut zel a. A bu nghut nghut bawk. 

"Malsawma'n a pawngsual zan che kha i la hria em? A hun kha" a ti a. Nenei chuan a sawi vat. A lo la hrechiang khawp mai. 

"Medical exam in neiha lehkha kha i la dah tha ang tiraw?" A ti leh a. A bu leh nghat. 

"Report ziahsak duh lotu che kha ASI Rinpuia a ni tiraw?" A ti lehzel a. Nenei chuan,"Aw ni e.." A lo ti a. 

"Rinpuia kha Pu Rinsiama uite a lawm a nih. Kan Rinsiama inlek lutuk hi kan hmet dai thei vat turah ngai ang. I hriselna dinhmun vangin court hun an sawn leh a, lo inla fit la, lo dam tha la..hnehna chanpui ngei che ka tum dawn a ni. Social worker i biak khan lo record nghe nghe la a va tha tak.." A ti hlut a. 

"Nia, a nachang ka lo hre bik lo a ni. " a ti ve mai a. 

"I nau kha thu zawh tlak a ni ve tawh ang tiraw? Pawngsual a lo tum zana thil thleng kha..e leh lawk, Doctor i va hmuhpuina lehkha pawh kha i la dah tha mial em?" A ti leh zung zung a. 

"Ka file-ah engkim chu a awm e. " a lo ti ve vat a. 

"Hei hi hria la ka duh a ni. Malsawmkima kha thah i duh vanga that i ni lo va, nangmah leh i naute chhanhim i duh vanga that i ni. I hrethiam em? " chiang kek kawk hian a ti leh a. 

"Aw ka hrethiam e" a lo ti nghet charh a. 

Amanda chuan,"Kei chuan huaisen ka ti che a nia. Rinsiama te kher i hmachhawn a, a pawi ngawt mai. Mahse, Amah vang sawn Police department hi tawp leh dik lo viauah lo ngai suh u. Mi dik leh rinawm, dikna duh hi an la kuh ve tûn a nia. Hotu nei kan ni miau si a. Tin, Rinsiama hi kan Education Minister Lalsiamliana nau a ni e. Inla hriat loh takin, Tin, Social worker i va biak Rinmuanpuii pa te leh Rinsiama te hi thian tha leh inti chhungkhat tak an ni bawk. Dr Jamesa chu ka sawi tawh ang khan Malsawmkima nu nuta a ni. Daikhalhtu i nei zel a, i mi tawnte hi an hraw deuh a tin ni. Mahse, beidawng miah suh, Hei Rohluzuala hian hnehna a chanpui ngei ngei ang che. Keiin mi tenawmho kawng ka lo tihnawk ve thung ang" a ti fak fak a. A thlamuanthlak kher mai. Ni e, Nenei hian a tawng vanduai deuh a ni. Mi liante hi an lianin chhungkhat leh thiantha an lo ni vek bawk si a. Mahse, Zoram hi a harh tan ve mek chuan ka hria. Hel pawl kan la ding lote hi a mak angreng zawk hi ka tia, kan lo fel hlein ka hria. 

Inbual a chak ngang si a, tui ka lumsak a. Ka bual ta a. A lo cher hman lutuk chu ka khawngaih, rilru hman nasat hi chuan a thau tak tak theih loh a ni e. A inbual zo chu a harh ve káwkin ka hria. Mami'n chaw a rawn dah leh a, "Malsawma kha a hráng an tia" a ti sap a. 

"Sawma tih hmingpu pawh chu an va hrág duh ve mawle" ka lo ti a. Malsawmtluanga khan Nenei a atchilh vangin buaina kan tawk rap rap a, tunah Malsawmkima vangin kan buai leh mek chu a ni sia. Malsawm tih lam chu ka haw hlur tawh ni maiin ka hria. An hming an pu zo lo ve khawp mai. Sawma pawh kha thih dan pangngai loin a thi a, Malsawma lah rapawm zetin a thi bawk. Mi nun chhia, mi dang tibuai reng renga khawsa te hi chu thih thain an thi ngai lo tih a lang chiang viau mai .

"Nizanah pawh an awmpuinu a tibuai a niang, a chhuak daih" Mami chuan a ti leh a. 

"A thih hnuah lehzel pawh mi dang a la tibuai a nia. Hremhmunah a tla chiang ngawt ang" Nenei chuan a ti a. 

"Apa pawh naktukah lo kal a tum kha" Mami chuan a ti leh a. Kan inbe lutuk lo va, ka lo hre ve pek lo. Ka nu hi chu chanchin ka han hrilh deuh reng zel a. An ngaihtuah ve khawpin ka hria. 

"That chu, min lo tlawh se a tha" ka ti a. 

Mami haw hnuah, "I pa chu ka hmu hreh e" a ti sap a. A luah ka va chul a,"Hmu hreh lo ve. A khawngaih lutuk che alawm" ka ti mai a. Zanah Doctorin ward a rawn fan chuan,"I tha sáwt khawp alawm. Naktuk tuk lehah inzai theih kan tum dawn nia" a tih chuan, Nenei chuan,"Ka pu, ka chhul hi paih loh hram dan a awm lo mi? Fa ka nei thei dawn si lo va" a lo ti a. 

"A taidarh zel dawn si a. A pawi khawp mai. " a ti ve ringawt. Kei chuan ngaihdan ka nei lo. Fa erawh ka awt, ni e, ka awt ve lutuk. Mahse, tihngaihna a awm si lo. Doctor chhuah hnu chuan,"U Tri, dam chhuak mah ila ka nei thei lo che" a ti hawk a. 

"Ngati maw?" Ka ti a. A sawi tur chu hriain ka inhria.

"Unau angin awm zawk ang..umm, khawngaihin. " a ti tiau a. 

A kut vawnsakin,"Thil ngaihtuah vak vak suh. Pathian thu thu a ni mai." Ka ti a. 

"Pathian hian min hmangaih ve lo a niang. Ti nge heti em ema ka vanduai bik le" a ti sap a. A awm e, Ani ang rual heti taka vanduai hi kei pawn ka la hre lo. A tawrh a tan chuan a na lu deuh a ni e. 

Pawn lam thawm chu a rin deuh vangin ka va chhuak a, nu pakhat hi a lo tawngtai nasa mai a lo nia. A tui hluam hluam khawp mai. A tawngtai zo kal a tum chu a kal thei ta mai lo va, a hnungtawlh zawngin a rawn tawlh a, "Amen, Halleluiah" a ti tuar tuar mai. A rawn back zel a, kan cabin zawnah chuan a ding ta chat mai. Mak ti zetin ka lo melh a. Min rawn en vein,"Hetah hian koh ka ni tlat, Mama, tawngtaina ka nei thei ang em?" A ti ta a. Mak ka ti nasa. Roomah chuan rawn lutin khuma Nneei chu a melh vang vang a. 

"ka fanu, Lapa'n a hmangaih che. Nangmah hmua tawngtaisak turin min rawn tir a nih hi..ekhai! Lalpa, i fanu hi i tidam dawn tiraw? Amen" tiin a va pan a. A ngaihna hre mang lo zeta lo entu Nenei lu chungah chuan a kut a nghat a. A tawngtai ta mial mial mai. Ka rilru dek em emtu chu,"Lalpa, ani hi a vanduai rei tawh em mai. A nunkawng a bumboh lutuk, i thil min hmuhtir hi a harsa em mai, Khawngaihtakin a taksaa natna chambang leh a rilru na leh hah zawng zawngte hi lakbosak vek tawh rawh aw. Lalpa, ka ring che. He nula hi i tidam ngei ngei tur a ni" a tih chu..beiseina ka nei ve nia mawle! Pathian hi ka bel em em hran lo va, a awm ka ring a. A tawpkhawkah chuan ka lam ka lam ve tho nain piangthar tia sawi theih ka ni lo. Thih thlamuanna phei chu ka nei lo. Zu ka in a, sex ka hmang bawk a. Inkhawm te pawh ka taima lem lo, Bible te pawh ka damloh laia ka chhiar bak kha chu ka chhiar leh tawh lem lo. Nenei tak pawh a naute vangin a buai a, a hah a. A nunah sual lai sawi em em tur nei lo mah se, Pathian hi a bel tawk bik lo va. A thata tha ve tawp a ni. Kan pahnih hian Pathian kan belh lehzual a ngai hlein ka hria. 

Nenei pawh a mittui a tla, Chu nuin a nun zawng zawng a hria chu a mak tih loh rual a ni tlat lo. Kan hmuh vawikhatna a ni bawk. A landanah chuan nu zahawm leh mi hausa a ni lo. Puan pawl chul lam lek lek tawh a bih a, puan pheikhawk uk a bun bawk. A kawr pawh a zo nu ve hnek hnek tawp. A hmel pawh a zûr tanin a tha lem lo. Mahse, tihtakzeta Pathian a koh chuan a hmelah vantirhkoh hmel ka hmu thei nia! Pathian nen an inzawmna a tha tih a hriat ngawih ngawih mai. 

"Ka pi, kan va lawm em aw. A mak hle mai" tiin ka hming leh Nenei hming ka hrilh a. Khumah chuan a thu ve a ,"Ka zanriah ei kham kha min nawr et ettu ka nei a. Heta rawn kala amah hi tawngtai a lang ta tlat mai si. Nimin piah atang khan ka hritlang awmna ve deuh a, zan chhuah chu ka hreh viau nain Lalpa'n min ko miau si a. Ka hnial thei ta lo a ni. Ka rawn kal kawngah Nenei chanchin leh a vanduaizia te hi thinlung lamah hrilhtu ka nei bawk. Tunah chuan ka zang huai e. Lalpan a tidam ang che. I kawng pawh a sial zel ang, amah hi lo bel tlat u la aw" a ti siam siam a. A landana tlawm leh hausa lo tih hriat ngawih ngawih mah nise, ka zah khawp mai. A hming chu Pi Ramteii a ni a. Khatlaa awm an ni. Kan lawm em vangin pawisa pek ka tum a,"Akhai! A ngai awzawng lo. Ka la dawn lo" a ti tlat mai a. 

"Aa..i taxi fare tur tal hi min laksak hram rawh. Khawngaihin" tiin ka nawr seh ve tlat si. A la ve ta nge nge a. Pathian hming lam chung zelin a chhuak ta a. Nenei chu ka va melh a, min lo en ve kiau mai. 

"U Tri, Pathian hi ka bel lo ve em a ni. Ka vanduai chhan pawh a nih ka ring. Ka inkhawm lohna te hi a rei tawh em asin" a ti sap a. 

"Tun atang chuan kan bel tawh dawn nia. Chuan, i dam ka ring tlat. Naktukah test tir leh teh" ka ti a. 

"Ka sawi ngam lo va, kei pawh mak deuhin ka ring ve tawp mawle" a ti sep a. Lungchim deuhin kan inkuah ta vawng vawng a. Mut dawnah tih tak zetin kan tawngtai a. Kan mu ta vang vang mai. A tukah chuan Doctor rawn luh chuan, "Ka pu, intest that ka duh a ni. Hei ka tha tawh riau mai a. " a lo ti a. Maktih hmel deuhin Doctor chuan a melh a, a ngaihdan a ni vak loin ka hria. 

"Ngati maw?" a ti a. 

"Aa.inzai loh hram ka duh a. " a ti ta ringawt a. Doctor pawn engmah a sawi leh lo. An chhuah hnuah,"Inzai rih loh kan dil tawp dawn nia. " ka ti a. A khawsik a awm tawh lo va, a hmel dáng bai pawh a zia tan e. Thil ka ei luihtir nasa bawk nen. Mami ka fak khawp mai, chaw min rawn pein a rawn kal zat zat a. Ka pa pawn Nenei chu a rawn kan ve a, eitur a rawn leisak nual e. Nenei tana dawnsawn nuam lo tur angin eng thu mah a chhhakchhuak hek lo. A haw leh nghal dawn vangin a awm rei lo. Ka ngaihbel nge Nenei chu a dam tha tawh riauin ka hria. Inzai lo va chhuah dil chu kan tum ta tawp. Mahse, buaina kan nei, Nenei hi jail-ah a lut leh ang em ka hre si lo. Bail an phal ang em pawh kan hre si lo, a hriselna lam dinhmun vanga la chhuak ringawt kha kan ni si a. Amanda ka be ta tawp mai, "Bail theih a ni ang em le?" ka ti a. 

"Theih loh tawp chu a ni lo va, mahse, a harsa khawp mai" a ti ta a. Rilru a hnual duh hle mai. Jail-a a luh leh chuan engtin nge a awm zel ang. A hriselna lam te pawh, ngaihtuah tur a va tam tak ëm..Amanda chu ka ngen ta tawp a, "Theihtawp ka lo chhuah ang e. Mahse, ka tiam thei lo che u aw. A hriselna dinhmun kha chhuanlamah chuan a hman theih maithei" a ti ta a. Tlem chuan beiseina a awm ve leh deuh e. Ni e, tualthata puh kha a ni miau si a, bail chu a harsat ka ring khawp mai. 

Zanah pawh a khua a sik leh tawh miah lo. Pi Ramteii tawngtaina khan rah a nei mek tihna em ni ang? Jail-ah a lut a nih pawhin dam tha tal se ka duh a ni. Amah pawn a dam that chuan a hreh lem lo bawk. Doctorin inzai hun a tih niah chuan ngen taktéin kan ngen a. A lungawi vak lo tih pawh a lang. Mahse, amah Nenei berin inzai a duh miau si lo va, kei chuan hlauhthawnna chu ka la nei tho. "Ka ring alawm. Ka dam" a ti ve tlat si. 

Amanda khan min rawn bia a, "Tp, pawi ka ti khawp mai. Theihtawp ka chhuah a, mahse, RInsiama fapa a lo ni kher nen, bail chu a theih ta loh a ni e" a rawn ti a. Ka hnual rawih naa, amah Nenei zawk chuan min hnem zawk mah a. Tunah chuan court vat vat se ka duh ber tawh mai e. Damdawiin atanga a chhuah tlaiah la la Central jail-ah an liampui leh ta nghal a. Ngui nghiain ka thlir. Ka tah te pawh a chhuak deuh. Amah Nenei erawh hmuh hrehawmin a awm lo va, "Ka ngai ngawt ang che" tih thu a sawi. Kei hian ka ngai fe zawk awm e. Tichuan,amah Nenei ber awm ta lo chu kei pawh kan khaw lamah ka haw chho ve leh ta rih a. Schoolte pawh ka kal leh thei ta. Hmabak a la ko rih viau a ni. Zira leh Lukira te pawh Private schoolah an inhlawh ve lawp lawp ta a. Zira leh Kimi te chu indang vein, Lukira chu amahin a awm a. A khua a har ve thin ngawt ang. Muanpuii pawh a rawn zin leh a. A lo lang leh hlawl mai.

"Awii i bialnu kha a mak eee" a ti teh ngawt a. A lo hre ve a nih ngei dawn kha. 

Ka nui ringawt. 

"A that tak tak ami? A mak ka ti" a ti leh a. 

"Ka hre bik lo. A thah i ring em?" ka ti a. A lu a thing nar nar a, "A nunnem hmel sia, tualthat duh hmel a pu lo" a ti a. Ka bialnu a nih vanga sawite pawh a ni maithei. 

Putea hian Nenei chu a zuk kan thin a. A fanu hi a ngaihtuah ve khawpin ka hria. Kei tak hi chuan ka la kan lo, dik tak chuan jail chhunga a khawsak dan tur ka ngaihtuah ringawt pawn ka na veng veng thei a nia, khuta zuk hmuh kha ka ngam lo a ni ber mai. An court hun pawh a hnai chho ve ta zel a. Lung a phu dup dup tan e. 

Amanda pawn a khat tawkin an hmalakna a rawn sawi ve reng a. Court hunah lo chuan la tlangzarh chi a ni rih si lo. Nenei bula a dil lehkha pawimawh ho kha a kawl tha thlap rawh a, Rohluzuala khan a show ngeiin a rinawm. Tangkaina a nei ve miau si a. Zoram mipui pawn Social media vela sawi an bansan tan tawh a. A tir kha chuan facebook pawh ka lut ngam lo hial! A tam lutuk a. Nenei demna leh thenkhatin an lo tan vena te, Malsawma chhungkhat leh thian ten dáwt an thehdarh ve mek bawk. "Vanneihsangi khan Malsawma kha a ngaizawng a, Malsawma'n a duh si lo kha a rilru nain a that ta mai a ni" tih angreng te a tam mai. "Vanneihsangi nu hi KS a nia, Vanneihsangi pa pawh hi hriat a ni lo. Falak a ni" tih angreng. Hmuh hrehawm ka tih em vang khan ka luh khat phah ta a. Mahse, tunah chuan an sawi leh vak tawh lo, boruak dang a awm ve tawh bawk nen. Ka chhungte pawn eng thu hla em em mah an nei rih lo. Ka hmangaihzia hi an hrechiang ve tawh a ni mahna. 

Nenei te court ni pawh a thleng ta. Engmah zuk tithei lem lo mah ila, a hmel ka hmuh chak avangin ka zu chhuk ve a. Putea a kal bawk. Ka hmuh tum aiin a lo lang tha, a thau deuh bawk. Jail chaw a ngeih a ni mahna. Mak takin a chhul cancer kha a dam ta nge, putea'n a hmaa a zuk kan thin pawh khan insawiselna a nei ngai miah lo. Ka lawm veng veng thin. Pi Ramteii kha Pathian mi tirh ngei chu a nih dawn kha. A nui ver ver a, a va duhawm tak. Han inkawm vak theih ni lo mah se, ka hmu leh hrim hrim chu ka lawm a ni. Rohluzuala pawh a phur hmel viau e. Amanda pawh a rawn lang ve leh chat. Tunah hian eng case nge a khawih ka hre lo. Awl lai hi an nei ve mang si lo. Sama nen hian an innei dawn lo mi le ka ti, a dul pawh a puar ve ak tawh a. Rai a inhmeh hlein ka hria. 

A ukil sawi ang thlapin magistrate hmaah Nenei chuan engkim a sawi ta a. Malsawma thil lo tih tawhte pawh an han phawrh tan ta a. Malsawma te lam ukil pawh a hawihai viau a niawm e. A tira Report an ziahsak duh loh te, Medical-a an kal dan leh Amah test tu doctor kha Malsawma pu a ni tihte thlengin, Apuia a entir tuma doctor lehkha te nen..Social worker a va biakte, Child Protection lam a biak pawh dan te, engkim chu a fiahna nen hailan a ni chho ta a. Apuia a va hmuhpui Doctor kha koh a ni dawn a, child protection lam pawh koh an ni ngei ang. Beiseina ka nei sang a, kan hlawhchham a nih chuan ka na ngawt ang. A tira "ka that' a lo ti kher kha pawi ka ti thlawt. Tuman an hmu lo va, evidence a awm miau loh chuan a thah tih confirm ngaihna a awm dawn lo ania. A pawi a ni. A nun beidawng leh Malsawma a huatna khan pawisak a neihtir thei tawh lo. Mahse, a dikna chanvo erawh hmu lul teh se. Nuna lak chu a tha miah lo nain, dik tak chuan Nenei khan ka bulah engkim kha sawi nise chuan, kei pwn Malsawma kha ka khawih duh maithei. Kei hi thinchhia ka ni lo va, ka thinthawk erawh a na ve riau , ka insum theih ka ring lo.

Nenei chu jail-ah a lut thla leh ta phawt a. Court leh hun pawh a hla leh ta raih mai. Amanda thurawn angin bail chu kan dil leh ta a. Kal leh turin min ti ringawt a, kan haw leh ta rih. Apuia te pawh ka tlawh hman tawh lo. Ngaihtuah an na ve riau. A karlehah putea nen bawk bail chu kan zuk ngen leh ta a, Kan ngen nasat piah lamah ka tawngtai nasa bawk nen, min phalsak ta hlauh mai le. A natna kha kan chhuanlam lo thei lo va, tualthata puh bail hi a theih loh tluk a nia, mahse, Nenei chu a chhul a cancer kan tih miau avangin leh a naute nen an dinhmun kan sawi a, min phalsak ta hlauh e. Ka va lawm ber tak. Mahse, in an nei si lo va khaw nge a awm ang tihah kan buai leh ta. Nu Ruati te ka be duh bawk si lo. Ni e, khatia Nneei a han mualpho khan an reh hmak mai a. An hmel hmuh tur pawh a awm hek lo. Nenei chhungkhat an ni chu an zak te pawh a niang e. Chutiang taka an ensan avang chuan tihbuai ka tum ta bik lo. Nenei chu Mami te bulah khawsa rih mai se han ti dawn ila, Malsawma te nen an inhnaih si, enh emaw te a tawk ang tih ka hlau si. Putea chuan," Kan bulah awm mai rawh se" a ti naa, Ka bialnu a ni tih hria an tam a, Putea fanu a ni tih an hre leh thung si lo va. Kan inlaichin dan tlangzarh lah remin ka hre bawk si lo. Ka rilru a buai viau mai. Amah Nenei chuan a chhuak a nih chuan a naute awmpui a duh leh ngei awm si a. Engpawhnise tiin Judy te pawh ka bia a. Pathian hi chu a lo tha khawp a, Judy chuan an in hnuai a ruah thu leh an luah tawk lek a nih thu a sawi ta a. Ka va lawm ber tak em..Tichuan, Nenei chu kan bail ta a. A jail tan hma ai khan a taksa pawh a tha zawkin hmuh pawh a nuam daih zawk. A tawi zawngin Judy te in hnuaiah chuan an inthiar lut leh ta phawt a. In ringawt pawh hi an va luah zing twh tak. A naute nen an inhmu leh thei ta. Kei pawh an bulah kar khat ka cham leh. Mahse, kan mu dun hauh lo. Pathian kan zah tawh a, "Inneih hma chuan insum tawh ang" kan ti ve ve tawh. Tum tlat chuan insum hi a lo har miah lo. Eizawnna nei ta lo chu bank-a a sum dah a hmang lo thei lo va, tunah rih chuan tuman an chhawr duhin a rinawm loh. Ni e, an hre ve thup si a. Mahse, chutiang ringawta awm tawp chu nakin zelah sumin a daih loh hun a la awm dawn a,eng emaw tak chu a ngaihtuah a ngai. Kei chuan a case hi chinfel ni se, neih mai ka duh tawh. Thutlukna pawh ka siam hmiah. Min hnial ngam lo naa a inthlahrung tih ka hria. Mi min sawi dan tur leh min nuihsawh dan turah ka buai ve lem lo bawk. Ka chhungte pawh ka hrilh tlang vek, ka tumruhzia hriain min hnial miah lo. Bakah a vanduaina te kha an hre vek a, an lainat ve em em bawk si. Kumin hi ral se, nakkumah chuan kan inneih mai ka beisei. A case hi chingfel loin thiam loh chantir pawh nise ka nei tho ang. Nupui jail tang ka nei dawn a ni mai a. Phatsan theiin ka inhre lo. Ka kal laklawh tawh. Ka khawlhring lunglian hian kawng dangah ka pensan thei tawh lo. 

Zan khat kan inbia chu,"Dik tak chuan chhuah pawh ka chhuak ngam tawh lo, mak tiin min thlir thup zel a. U Tri, a hunlai khan inchhirna nei lo mah ila; ka naute leh nangmah vang hian nuam lo ka ti. " a ti a. Ka ring a ni.

"Aw a ho lutuk, nakinah chuan mak tia thlir tu che ho khan an la khawngaih ang che. Thil nihna dik tak an hre lo alawm" ka ti mai a. 

"Thingtlanga awm ve daihte ka chak zawk. Inkhuaah khan ka lo pem daih mai dawn mawni ka ti" a ti leh niah niah a. 

"I naute zirna kha a laklawh zel sia. Nakkum nghak hram hram ang. Kan inneih dawn kha" ka ti a. A nui hul hak a. 

"Taka! I natna kha a chhuak leh tawh miah lo tak tak em? Nang hi i lo inzep ang e" ka ti hluai a. 

"A mak lutuk, eng na mah ka nei ngai tawh lo. Pathian tihdam ka ni chiang e. Ka lawmzia hi..ka lawmna chhan ber zawk chu kan innei thei emaw thei lo emaw fa ka hrinsak thei dawn che a" a ti a. Ka khi suk mai. 

Idea a nei thar a. In lamah eitur siamin dawrah a dah ta thin a. A dawr dahna pawh a ngen nasat em vang chauha phalsak an ni. A lo siam tui bawk nen. In atanga chhuah ngai loin sum tlem tlem a lalut ve ta a. Amanda leh Rohluzuala te nen an inbe zeuh zeuh bawk. A vawi hnih nan court pawh a hnai leh ta. Nenei pawh a inringtawk sawt ve khawp mai. Malsawma te ukil lamin "Malsawma dawtin a puh" tiin han tang ngial mah se, a hmaa Nenei inentir leh Police a punte kha an nuai bo thei ngawt si lo. Apuia a va hmuhpui Doctor lah khan thudik a lo sawi ve hmiah bawk a. Biak tur a pek hial thu nen lam a sawi fai leng si. Dr James pawh koh a ni a, mahse,ani chuan eng damdawi sulhnu mah a hmuh loh thu bak a sawi lo. Hei chu rinsa a nia, a mak vak lo. Rilru a hah duh hle. Chutimaia chinfel theih a la ni lo a. Hun a la duh rei ve deuhin ka ring. Tawngtai bak tihtheih kan nei meuh si lo. 

Nenei te case chuan ngaihven a hlawh ta riau a. Malsawma lo chet tawh dan leh Nenei tanpui duh lotu te thiltih dan pawh a putru ta nge, a lar ta viau mai. Mipui rilru leh súkthlek lam pawh a danglam ve tan ta. Malsawma thah a nih atanga thla 5-naah meuh chuan, "Justice for Vanneihsangi" tih chu mipui auhla a ni ta. Nene, kan hneh tep tawh aw. Lo tuar hram hram ang che. 

(Ka silipar khing bo daih dan hi a mak eee..ka in hi a hráng aniang🥺🙄