Vanneihsangi 23

VANNEIHSANGI (23)

Ziaktu: Toni Râlte

"Mite hi zawt ila , " Eng hi nge vanduainaa i ngaih" ti ta ila, Thihna tia min chhan ka ring. Ka neihchhun ka nuin min thihsan a, ka nau duat em emin min kalsan leh bawk. Ka naute pahnih nen vakvai leh turin khawvel thar min hawnsak a ni ringawt mai. Mahse, an duh vang a ni dawn teuh si lo. Ka nu kha chuan la dam hi a thlahlelh ve ngawih ngawih hian ka va ring tak. Nih loh pawn keimah zawk hi lo thi daih zawk ila a tha tur. U Tri-a leh ka naute vang chauhin damkhawchhuah ka tum a. Mahse, ka kalna apiangah chhiatna ka tawk bik zel a. Pu Mawia'n, "Ánchhia i nih hi" min ti pawh kha a dik a nih ka ring ta rum rum mai. 

He lehkha pheka ka thuziak hi tu emawin a chhiar hunah chuan ka thiltihte avang hian min dem bik ka ring lo. Kawng dang ka nei mawlh lo a ni. Thil thlen dan chu hetiang hi a ni. 

Kan in luahna te fapa Malsawmkima hian a tir phat atang khan min lo vehthlem char char a nih ka ring. U Sawma boral ka thawk huaina chu ani hian rawn tirit leh tanin, ka nun khua zawng zawng a tichhe leh ta. Ka thil tawn hi a mak dangdai em a. Finfiahna hmuhtir tur ka neih miau loh vangin ania kawng dang nei tawh lo va, Malsawma ril ka khei tak ni..

A tirah chuan a felin min puihte nuam a ti a. Kei aiin a upa hlek chauh bawk a, kan inkawm theiin kan titi pawh a rual viau mai. Ka naute pawh a duatin an ni pawn an ngaina viau. U Tri-a tih loh mipa ka kawm tam ve ber a ni maithei. Min ngaizawngin ka hre lo va, kei pawn nuta ang thawthangin ka en ve. Mahse, a chhungril piansualna hrikthlak nana min hman a lo tum reng si a! Kei hian a fin ka lo chelh lo nasa a lo nia. Zan khat chu ruah a sur cherh cherh a, U Tri-a nen kan inbe zo chu mut ve mai tumin ka inbuatsaih a. Ka naute phei chu an mutna a rei tawh. Tv ka lo en khawtlai ve deuh bawk nen. Ka ha ka nawh lai takin Malsawma chu a rawn lut ta hlawl mai a. A rui loin la hria. 

"Ka nu ten min hau a, ka lo riak dawn aw. Ka ning tlat" a ti a. Chutia a tlan tauh nana min hmangte chu min ngainat ve tawh vangah ngaiin, a rem thu ka lo hrilh ve mai a. Bakah mipa puitling chuan ka thlate pawh a timuang ve reng reng a. 

"Ngati nge an hauh che, i sual ami?" Tiin ka ha nawt zo chuan ka zawt a. 

"Ka thiante an sawisel reng a, ka lungawi tawh lo anih kha. An duh ang mi chauh kawm turin min beisei a. Ka duh bik hleinem" a ti mai a. Malsawma nu leh pate hi ka nel tehchiam lo, bakah an milian em a, ka pawh tha ngam lo. Officer ve ve a nia, a pa phei chu ka sawi ve thiam danin Aizawl police-ah hian a lal ber pawl niin ka hria. A nu erawh Department dangah a thawk thung. 

"E! Taka..hei beer hi ka'n in lawk aw" a ti a. Zu lam hi ka huat em vangin kan inah hi chuan vawikhatmah he lam kaihhnawih a in ngai lo. Min dil ve bawk nen, Beer ringawt a ni tho tiin ka remti a. Ka theihtawpin invawn ve hi ka duh a. Beer a in lai chuan Sting hi min pe ve a. Sting ka duhzia hi a hre ve tawh bawk nen, "Ka mu tawh dawn sin" ka tih pawn. 

"In ve rawh, mut a tui duh" a ti mai a. Ka in ve leh ta a. Kan titi ve bawrh bawrh. Thu ho te te bak kan sawi lo. Dar 10 a ri dawn ta hial a. Mu tura room pan ka tum chu ka pai ta awt awt mai a. Ka lu chu hai namën loin a hai a ni. Min lo dawm vat a, ngaihthat lohnain min tuam hlup hlup mai. Thutthleng seiah chuan min thutpui leh a, min nam thlu ta a. Mak takin ka che thei ta reng reng lo mai a. Ka rilru erawh a harh kur thung. Thawh tumin ka insangmar a, ka zawi vek. Ka engmah chu a che thei lo. Engmah a tha lo tih ka chiang ta khawp mai. Malsawma lah chuan nui vur vur chungin min lo chhuk melh run a. Eng nge ka chungah a tih dawn tih chu ka ngaihtuah thiam. Ka taksa, U Tri-a tan chauha ka vawnhim chu ka phalna tel hlek loin a chen dawn a ni ang tih ka ring a. Au ka tum a, ka aw reng reng a chhuak thei si lo. Ka mittui a luang zawih zawih a. Ka thawmhnaw a phelh lai te chuan ka rilruin ka tawngtai char char a. Mahse, Pathian chu a che si lo. Ka nu thlarau te ka ko a, ka mang a va ang tak em..

Min phelh ruah vek hnuah a phone camera chu ka taksa lang chiang thei ber turin a kam te te a. A rilru chu hre hnehsawh tak ka ni. Ka taksa chu a sawngbawl chho ta a, ka naute tu emaw zawk tal harh se ka tih nen, ruah sur nen kan thawm chu an hre pha teuh dawn si lo. A sawi pawh a zahthlak e a. A duhtawka min sawngbawl hnuah ka chungah thil rapthlak tawpkhawk a ti ta a. Pawngsual satliah a ni lo. Malsawma chu mawngkawhur a lo ni reng a lo nia! Tikhan ka sawi tum chu in hrethiam tawh mai em?mumangah pawh ka man phak loh, a suangtuah pawh ka suangtuah ngai reng reng loh chu ka chungah a ti ta a ni. Ka tap thei lo, ka mittui pawh a hul vek. Mi á ang maiin ka melh ngai ka melh tlawk tlawk. A ná tih mai hian a hrilhfiah theiin ka ring lo a ni. Min that law law zawk ka ti a, a ngen pawh ka ngen hial a ni. A nui vur vur a. A hlawhtlinna chuan a tilawm hle a niang. A duh ang a tih zawh vek hnuah saruak chuan min hnutchhiah a. A chhuak ta daih a. Ka la che thei si lo. Ka meng tlaivar ta thak a. Mahse, zing khua a rawn en chuan ka che ve thei tan a, harsa ti takin ka thawmhnaw te chu ka ha ta a. Ka khur zawih zawih bawk. Bathroomah lutin tui chuan ka inleih ngat ngat a. Malsawma sulhnu tenawm tak chu ka tleng fai zo si lo. Tui herh hawin ka awrawl chhuahin ka tap ta zawih zawih a. Inawhhlum tumin bathroomah chuan hrui pawh ka suih vek tawh. Mahse, Gabby hian "Nene, thingpui ka in duh. Lo chhuak tawh rawh" tiin min ko a. Mittui luang zawih zawih chungin hrui chu ka sût leh ta a ni. Ka naute ka lo mangnghilh hman a. Ka tel lo va an baihvai turzia leh kei ang bawka vanduai an la nihzia tur hriain thih chu ka tum ngam leh ta lo a ni. Ka mawhphurhna an ni miau si a. 

Mahse, ngawih ringawt ka duh lo va. Video khan cover vek mah se, ka awmdan atang khan hrai ruih ka ni tih mi pangngai chuan an hriatthiam ka ring a. Ka naute ka thlah zawhah Police stationah ka tlan lut ta a. Ka harsatna ka sawi chuan an lo ngai serious ve khawp mai a. Malsawma pawh an ko ta a. Mahse, ih e, ih maw..Mi rethei leh fahrah tan chuan dikna hian ro a rel thei ta lo a niang e. Malsawma pa chuan a tihtheih a han lantir chho ta a. Malsawma chuan video kha police te a entir a. Chutah chuan a nia mak ka tih em em..kei aia fing leh case tam tak lo chhui tawhte chuan, "Hei nang pawn i hnial hauh hleinem. Hetiang hi pawngsual a ni hleinem" an ti a nih chu. Damdawi hmanga hrai ka nihzia thu ka sawi ngial paw'n, "I in chhung ngeiah saruak vekin a duhtawkin a sawngbawl thei che a, vawi khat pawh i au lo va, a tan pawh i tang der eih hleinem. Damdawi hnathawh a ni vek thei lo" an ti tlat! Mahse, report ka thehlut ve miau vangin an thawhpuite dang mitmei an veng nge ni, "Medical test nei phawt rawh" min ti ta a. Damdawi sulhnu kha an hmu ngei ang tiin beiseina ka nei ve leh a. Kan va test ta a. Mahse, mahse...Min test tu Doctor chu Malsawma nu nuta Dr. Thangliana a lo nia! Test result-ah eng damdawi sulhnu mah an hmuh loh thu a sawi ta a. Khatih lai ang renga mi hausa leh mi lian nih ve ka chak hun kha a la awm awm lo ve. Tichuan, ka report thehluh chu withdraw turin min vau ka ti mai. Inremsiamna nei tur ten case IO chuan min nawr thul. Ka duh bik si lo. A hnuah Malsawma pa ngei mai chuan, ,"Kan in luahtu i ni tih te theihnghilh lo la, video hi kan thehdarh chuan Zoram hian i hurherhzia leh i nu sulhnu thlengin an sawi ang. Eng tin pawn tumin bei mah la, evidence i nei lo. Ukil rawihna pawisa i neih loh piahlamah evidence nei miah lo chu tu ukil mahin an dinsak lo bawk ang che. Ka thu awih la, i case hi la let la, pangngai takin awm la, i video pawh a darh lo vang. I hrethiam em?" A ti ta a. Khatah khan Dan ang chuan Malsawma chungah rorelna a thleng dawn lo tih ka hrethiam ta a. Thinlung na ngawih ngawih, tihtheih nei si loin ka tlawm ta a. A na asin aw..tumah puitu reng reng ka nei ve si lo. Ka bialpa U Tri-a chu engkim hrilh ka duh, mahse, han ngaihtuah teh. A bialnu duhtak, a nupui tur anga a lo suangtuah kha mipa dangin saruak veka sawngbawlin a mawngkuaah a pawngsual tih hre ta se, ani pawh hian min ring ang em? Min ring tehreng pawh nise, a tan ka tenawmin ka bawlhhlawh tawh em a, min hmangaih vang ngawt chuan min pawm thei mahna. Nakin zelah hriatchhuah hunte a nei ang a, a rilru a na fo dawn tih ka hria. Tin, Video kha darh thut thei reng a ni bawk si a. Kha video kha a hmuh ve chuan ani ang mipa rilru lian chuan hmangaihna mit atang pawn min ngaidam theiin ka ring ngam thlawt lo a ni. 

Ka zep ta rih phawt a. Ni e, dawihzep takin tihian boruak reh se, malsawma a reh chuan nun pangngaia nun ka tum ang a. Video kha delete turin ka ngen bawk ang a ka ti a. Chutianga phumbo theih inbeisei chuan ka ngawi ta tawp mai a ni. Khami zan ringawt kha duhtawk nise chuan Malsawma pawh hi a thi kher lo maithei a ni. Ka damchhungin ngaidam dawn lo mah ila a nunna lak kher hi chu ka suangtuah ngai bik lo. Mahse, ramhuaipa khan a duhtawk lo miau a. Ka chungah la tuan zel nise ka chhelna zawng zawng sawmkhawmin ka la tuar thei mahna. Ka nau ka nau duhtak, Apuia chungah lehzel tuan a tum takah khan ka alh lo thei ta bik lo a ni e. Ni e, he mi piangsual, ramhuaipa hian ka nau duhtak Apuia lehzel pawh khawih a tum a nih chu! Kei chu vawikhat min pawngsual bak kha chu ka inven ve kar tawh vangin min tilui thei tawh lo. 

Tlai khat dawr bungrua ka chah ho a thlen laklawh vangin Miss Judy ka call a, ka naute chu an inah lo awmpui riha nakina ka va lam tur thu ka va hrilh a. Ani hi a felin a ngilnei a, ka ringtawk khawp mai. Mahse, Malsawma chuan an in kan luah thu leh Apuia te chu keiman va hruai tura min tih thu a va sawi a. Judy fel dan chu min lo call leh thlap a, ka hlauthawng lutuk kha ka khur thei hial. A rang arangin ka naute chu ka va lam ta a. Inven reng a ngai tawh dawn tih ka hrechiang telh telh. Apuia te bulah pawh Malsawma chu nel tawh lo tur leh a fala awmpui lo turin ka thiam ang tawkin ka hrilh ve a ni. Kum 9 lai a ni ve tawh a, a hrethiam ve deuh niin ka hria. Mahse, zan khat chu ka khuasik vak mai a. Khawsik ser ser leh taksa na thûm hi chu ka nei zeuh zeuh thin a. Damdawi ka ei a, ka zia ve leh mai zel a. Inentir pawh ka buai em vangin ka tum lem lo. Ka damdawi eiin min hneh deuh nge ka lo muhil daih a. Ka harh chuan thutthleng seiah ka lo mu a. Zan tira ka naute vil paha ka mu kha ka lo muhil tlang daih a lo nia. Khuma mut tuma room kawngka ka hawng tur chu a inkalh tlat mai a. Apuia ka ko vak vak a, an harh thei si lo chu ka ngaih a tha ta lo va. Ka nam vak vak a, ka theihtawpa naa ka tlawh takah chuan a inhawng ta a. Kareii! Khumah chuan Apuia chu a hmui plastera bel hnanin saruakin a lo awm a. A mittui a lo luang zawih zawih mai. Malsawma chuan chemte kengin, tawng lo turin min ti a. Ka tawng chuan ka nau hrawk a zai thler tur thu a sawi a. Gaby erawh mak takin a muhil a, a harh eih lo. Ka mangang em em a, ka thin a phu nasa hle bawk. Apuia chu a lo la khawih hman lo a lo nia. A hun taka ka va luh hmain Malsawma chuan ka hmuh lai ema ka nau khawih chu a hreh ve nge, min kalsan ta a. Min chhuahsan hmain Apuia bulah,"Prank a nih kha. I u ka tihder a.." A ti a. Apuia hlauthawng leh thlabar lutuk chu amah pawm chungin kan tlaivar ta thak mai. A phu zawk zawk reng a, a tukah pawh school a kal ta lo. Nilengin kan inawm a. A pangngai hleithei si lo chu ka mangan em vangin, "Malsawma khan a tihder mai mai che alawm. Film an chang dawn a, a zir chhin anih kha" tiin dawt ka sawi ta a. Mahse, doctor hmuhpui ka tum ta tho. Gaby chu Judy kutah dahin Apuia hruaiin Doctor chu kan va hmu ta a. Apuia awm laia sawi chi a nih loh vangin Apuia chu pawnah ka awmtir te te a, Doctor chu engkim ka hrilh ta a. Ka chunga a chet dan erawh ka sawi lo. Doctor chuan a lo ngai serious khawp mai a. Report thehlut turin min ti a. Mahse, awmzia a neih lohzia ka hrechiang si. Social worker lar ve tak pakhat chu be tur leh child protection-a zualko turin min ti bawk a. Lehkha pawh min ziahsak thlap a ni. Tichuan, a thurawn ang chuan keimah min pawngsual vang ni loin Apuia a rikrap vang zawkin Child protection lam chu ka be pawp a, zawhna hrang hrang min zawt a, chhan sen pawh a ni lo. A hmaa ka lo hlawhchham tawh vangin beiseina ka nei sang lo viau. Social activist lar tak kei pawn ka lo ngaihsan em em thin pawh chu ka be pawp ta a.

A mak ka ti! Khawvelah hian mi lian leh thiltithei te hian dan an bawhchhe thei bik em ni ang? Dan chunga leng an lo tam em mai. Kei hmeichhe tlahlang, fahrah hian tihtheih ka va nei tam lo ëm..chu Social worker chuan, "A thun hman em ni? A thun hman loh chuan hmalakna tur a váng riau " a ti! A thun hman emaw hman lo emaw ka nau rilru a nghaisak retheihzia , zan tam thinthia muthilhtir thei lo va awmtirtu thiltih hi pawngsual nen eng nge a danglamna?! Ka lo ngaihsanna chu tlenfai ang duak a ni ta. A chhan chu Malsawma pa te nen lo thawk hoa hetiang lam case chungchangah pawh lo inbe reng reng an lo ni tawh thin a. A hmelhriat fapa chu a hum duh ta zawk a! Ram leh khawtlang tan tia langsar taka chea huaisen hle thin si kha ka nau thlavang hauh tur takngial pawhin tawngkam khat pawh a chhak chhuak ngam lo. Ka ngaihnep tawhzia leh dawihzep ka tihzia chu a sawi pawh ka sawi peih lo. Tikhan mite chuan an fakin huaisen tiin an chawimawi mahna. Mahse, lo ngai reng rawh u, keini chungah chauh lo pawh rorelna a kenkawh ngam loh hun a la awm ang a. A dawihzepna leh lansarh khela hna thawk a nihzia chu zoram hian an la hre mawlh ang. Chutih hunah chuan tuna a rahbeh leh a puih duh lohte hian kan la nuih ve ngei ang le…

Child protection lam lah chuan thawm an rawn nei leh ta si lo va, va zài reng kha ka hreh a. Ka ngawi ta a. Mak deuh chu kha Doctor min khawngaih deuhtu leh Keima chungchanga Police pakhat hmalak dan tur thurawn min peve tu te kha hmun dangah an transfer daih nia! Zoram kalphung hi ka man ve tanin ka hria. Dikna a tlawm a, dâwt a dingchang a, mi dik leh huaisen chu rahbeh niin hmuhsit an ni a. A insawithiam leh mi lian apiangin ngaihsawn rawn leh danin an chunga ro a rel ve theih loh an ni ta. Hei hi Ram pum huam atanga intan a ni lo. Hetah Village Council atangin a intan vek tawh. Kan ram hi a dam tawhin ka ring lo ve. 

Apuia chungah lehzel a tuan tak avang chuan in luah sawn tumin hma ka la ta a. Mahse, ka biak ho an rem loh bakah a lo váng riau si. Tuikualah ngei luah ka duh bawk si. Rilru a chawl lo va, U Tri-a nen kan inthen tawh vanga ka thinlung natna nen, ka khawvel chu englaimahin a nuam ta ngai lo. U Tri-a chungchang bikah hi chuan ka hmangaih em vangin a tan tia ka kalsan hi tawrhthiam dan a la awm zawkin ka hria. Mahse, thudik hi hrilh ta vek ila min la pawm theih beiseina erawh ka la nei tho. Hrilh turin huaisenna ka nei si lo. Ka tenawm a, bawlhhlawh hlawm niin ka inhre bawk. Ni khat ka dawr nghak chu ka taksa na leh ka khawsik nasa lutuk vangin inah ka tlan haw a. Zan khuain ka khua a sik tlaivar ta thak a, ka taksa lah nat namèn loin a na bawk si.Tin, ka ke a sa a, ka chhip hi a sa vut vut bawk. Ka hriatrengna te hi a tawi tuk a. Ka awmdan chu a ngaihthatthlak loh em vangi , A tukah eng nge ka dinhmun hrim hrim tih hriat nan ka inentir ta nge nge a. Doctor chuan test hrang hrang min neihtir a. Damdawi min chawh tawp. Ka han ei a, kar khat a liam hnuah pawh ka khawsik leh ka awmdan chu a mak em vangin ,A vawi hnih nan ka inentir leh ta a. Doctor chuan, ka chhul a cancer thu leh paih a nih vat loh chuan ka taksaah a taidarh tur thu leh ka thihpui mai tur thu min hrilh tlang ta rawih a. Ka beiseina chhete la de ve vèt vèt pawh chu hmeh mih a ni ta a ni. Damchhan neiin ka inhre ta lo. U Tria'n min la pawm leh beiseina ka neihte chu lak bo ang duak niin, kumkhua atana thlah hlen tura thutlukna siam a ngai ta a. Ka chhul pawh paihtir ka tum ta lo. Thih ka duh. Thi vat ila, heng buaina zawng zawng hi theihnghilh vek ka duh a ni. Mahse, buaina ka nei a. Ka naute..ni e, keimaha innghat an ni a, an nu leh pa ka ni. Ngun taka ka ngaihtuah hnuah a pa te chhungte kuta dah ai chuan fa atana la duhtu tur zawnsak mai thain ka hre ta a. Ka taksa hriselna a tlak hniam zel avangin ka hmanhmawh a ngai tih ka hria. Ka hun tawn a harsat tawk tawh tehlul nen U Tria hmel ka hmu leh ta a. Ka natna leh tawrhna belhchhah turin ka rilru diktak leh ka dinhmun pawh hrilh thei loin Malsawma'n ka naute hmangin min vau leh ta bawk si! Khawvel hi a nuam lo em mai. Natna vek a lo nih hi. 

"I bialpa bulah engpawh i sawia mi dang bulah i ka i ang leh anih chuan i naute pahnih nunna hi ka hlut dawn hauh lo a nia" tiin min vau chamchi a. Inah a rawn kal reng a, APuia hian a hlau viau naa, engtin a tihzawm tawh loh vangin a nungchang pawh a zia chho ta phian a. Mahse. Kei chu englai mahin ka thla a muang ngai lo. Ka naute avanga la dam ka ni bawk a. Ka naute la duhtur ka hmuh hnu chuan, ka chet lak dan tur ka ngaihtuah tan ta a ni. 

Dawr chu man man deuha lei duhtur ka zawng ta a. Chu ka sum hmuh chu ka naute tan ka dah vek ang tiin. Tin, ka thih hma ngeia ka tihtur chiangsa chu Malsawma thah a ni. Hei hi chu zantin ka suangtuahna luahtu a ni a. Hun remchang ka la hmu thei lo mai a ni. Ka naute ka venthawn avangin kan ina thah em chu ka hreh ve a. Ka thi vat dawn tho a, jail tan te mai mai ka hlau lo nasa. Mi pakhat ka ngaihtuah chhuah chang erawh chuan heng zawng zawng hi chinfel theiha ani bula thlamuang taka awm ka thlahlel thin. Ni e, ka hmangaih a, ka engkim a ni. Ani chuan ka retheih leh baihvaih lai ber pawn min zahpui a hnekin min tuamhlawm a, min tawiawm a. Ka tana a thiltih hi a tam tawh lutuk a, ka damchhungin ka rul zo dawn lo, Amah phatsan anga lana ka hawisanna hian thihna ai pawn min nghaisa rethei zawk a. Zantin amah leh a kut dam taka min kuah thlahlel reng rengin ka tap muhil thin. Vawi khat tal ka hmangaihzia hrilh ka duh a, U Zira te khuaa a awm laiin ka va be ta tawp a. A rawn call a. A aw ka hre lehzet kha chu ka tliak hnáwp a, ka kehchhe leh ta. Ka tap ta tawp a, a hrethiam si lo. A bialnu hi tenawm taka khawsakpui, a dikna rahbehsak, a naute avanga vaubeh leh thi mai tur a ni tih a hrethiam si lo. Min hua se ka duh thin kha a nia. Nasa taka min huain 

Mi dang tha tak tawng se tih kha ka duhdan a ni thin. Mahse, ka thinlung chhungril ber hian mi dang tan a phal ngai lo va. Ka ta chauh ni turin ka la duh ve ngawih ngawih a. Mahse, hmangaihtlak ka ni tawh si lo. 

Ka chhul te hi paihin dam leh pawh ni ila, fa ka nei thei tawh dawn lo va. Mipa tenawmin a duhtawka a sawngbawl hnu, mihring ngaihtheih piahlama tenawm taka pawngsual ka ni si. Ani chuan keimah vangin zahna a la hmachhawn fo ang a, a chhungte tan pawh ka tlin tawh lo sa nak alaiin ka tla ta vawn vawn si a. Mahse, ka thinlung chhungril ber thleng hian ka hmangaih tih erawh dawt a ni ngai lo vang. ANi chauh hi ka hmangaih a ni. A tan chuan thih pawh ka ngam. Ni e, ka hmangaih berin nun nuam leh tha zawk a neih theih nan ka thi mèk chu a nih hi..Malsawma chunga phuba lak ka duh vangin ani leh kei chu engtikahmah kan awmdun thei dawn chuang lo bawk. Malsawma kha dan hmanga hrem ni se , he kawng hi ka zawh bik lo vang..mahse, danin a hum miau a. Tihtheih dang ka nei ta lo a ni. He ramsa, mi rapthlak hi he khawvel atanga ka phumbo theih chuan zoram thalai te tan thil tha tiah ka inngai ang a, thlamuang tak pawhin ka thi ve thei mahna...Nenei hi hmeichhe derthawng tak a ni asin, mahse, huatna hian thil a lo tithei khawp mai a lo nia. Malsawma ka huat leh ka nun a tihchhiat thûk em vangin ka lei rohu ka hmangaih ber U Tria pawh ka thlah asin..Malsawmkim, Hremhmunah pawh anchhia dawng ang che. Ka hua che..

U Tri, ka va ngai thin tak che ëm...ka buaina hi hria la, min khawngaih dawn tiraw? Min lainatin, "Nene, a pawi lo. I duh vang a ni hleinem..engkim ka siam tha ang " i ti leh ngei awm sia tiraw? Duat taka min kuahin, "Kei pawh engmah ka ni hleinem, Ka famkim lo. Theihnghilhin nun thar bultan ang aw" tiin min en chungin i sawi leh ngei awm sia. Ni e, hei hi i nihna a ni tih ka hriatchian em vang zawkin alawm ka kalsan che. Min hmangaih lutuk a, ka khawngaih che a ni. A chhan chu ka vanduaina hi i thinlung tinatu a la ni fo dawn tih hrethiam rual ka ni ve a, Pawngsual ka nihna chauh chu min hmangaih luat vang pawhin i palliam lui thei mahna..mahse, a duhtawka min sawngbawl dante i mitthlain i la hmu fo ang a, Chuta karah fa nei thei tawh lo ka ni si. U Tri, ka hmangaih ngawih ngawih vang zawk chein ka phatsan che a ni. Hliam chuan hnai a la a, a dam a , khawvel tharah i la hlim leh theih zawk nan bawlhhlawh hi ka phumbosak zawk che a ni tih hi min hriatsak hram rawh aw. Nang chauh chu nang i ni. Ka ni te leh i pate, i puten engtin chiah nge an dawnsawn ang? Fa nei thei tawh lo hmeichhia, chuta karah tenawm taka khawsakpui hnu hi tuma mo ni lo se a tha zawk. Mahse, a ngaih zawng ka ngai takzet che a ni. I mi duatna te kha ka va dawngsawng leh chak ëm..Vanneihsangi i lo tawng hi mi vanduai ber i ni. Vanneihsangi hi a vannei ngai si lo va, vanduai chungchuang tura piantir ve ka nih avang hian maw..ka thih hunah min dintu Pathian hi chhuahchhalh ngei pawh ka tum a ni. 

"Engvangin nge Vanneihsangi hi Vanduaichuangi tia a hming sak a lo nih zawk loh?" Tiin. 

Khawvel mite u, ka thiltihah hian inchhirna ka nei lo va. Ka thih hnuah pawh ka inchhir hek lo vang. Mi beidawng thutawp siam hi a thlum ngai em ni? Mi hlawhchham thutlukna hi a nem diai ngai em ni? Chintawk awm miah lo va ka taksa leh rilru sawisaa nghaisatu chunga ka phuba lak dan hi Dan hremi leh roreltu te hian lo hriain lo harh chhuak mawlh teh se..

He lehkha chhiartu hi tu pawh lo ni la..a tawp nana ka chah duh che chu…"U Tri-a kha a tawp thlengin ka hmangaih a, ka hmangaih luat vanga ka tihnatnaah min ngaidam miah suh se.." Tih hi min lo hrilhsak dawn nia aw...ka chau ta…" 

Ka khur hlawk hlawk a. Ka mittui lah a kuangah leng loin ka biangah a rawn lum thla puat. Vanneihsang, Mi Vanduainu,..hetiang hi maw lo ni?! 

"U, i tha em?" Khuma ka kun ngawih ngawih chu ka nau chuan ka dara khawihin a rawn ti a. 

Ka tawng thei lo. Ka thinah a hnawh a, ka hrawk a tawt. Engmah ka sawi thei lo. Nâ hi a va ná lulai em..hei zawng a vawrtawp takmeuh a ni ngei ang. Mami chuan lehkha chu lain a bih thuak thuak a, "Ka chhiar ngam lo, i awmdan atang khan eng nge inziak tih ka hre thei mai e" a ti hul hak a. Min tih vak ngaihna a hre lo, min dinchilh tawp. 

Ka insangmar a, inhruhulin tumruh zetin hmalam ka en a. Tihtheih ka la nei em tiin. Ka rilruah mi pakhat a rawn lang. Amanda kha..ani kha chu dik taka thil tithin a ni. Ukil chu a ni lo, mahse, hma min laksak thei tura ka rin awmchhun a ni tlat. Zanah ka nute ka be bawk a. Putea pawh chanchin ka hrilh bawk. Ka pa chuan,"Bawiha, amah Nenei ka lainat loh vang ni hauh loin inrawlh loh kha a tha zawk lo'ng maw? Amah ngeiin a thah thu a sawi a, tihtheih kan va nei awm lo em.." A ti charh charh a. 

Inhumruhin,"Pa, jail atanga lak chhuah kha ka tum ber a ni lo. Vanneihsangi hian a dikna chanvo hmu ngei se ka duh a ni. Zoram khawvel hian tualthattu, KS fanu tia an hriatna hi thaibosak ka tum dawn a ni. Khawngaihin ka kawng dal zawng chuan lo inrawlh lo zawk r'u " ka ti nghet charh a. Ka chak sawtin ka inhria. 

Ka nu erawh chuan,"E! Bawiha, Vanneihsangi tana vantirhkoh ni tur leh tanpui var tura ruat i ni maithei asin. Kei chuan ka pawm ve e. I hming pawh Laltanpuia a nih ngei kha mawle" a ti hmiah mai. Putea erawh a rilru a na lutuk a, sawi tur pawh a nei lo. A hul vek. Hmanni lawkah a fanu a chhar chhuak a, tunah a fanu chuan vanduaina tawpkhawk a tawk leh a, Pute, ka dem lo che, a na ngawt ang le..

Inngaihtuah lungpuam hman ka ni lo bawk a. Rilru la nu deuh but mah se, chet ka lak vat a ngaiin ka hria. Apuia te unau erawh mami te in luaha awm tir reng ringawt kha an school kal hruai leh lam pawh kan hman mang si lo va. Judy te an lo inhuam tho bawk nen, Nenei chungchang ka buaipui chhunga lo awmpui rih turin thu kan titlu a. Nenei chanchin dik tak an han hre ve phei chu an tap ve tawp mai. An khawngaih takzet tih a lang. U Seni pawh chuan,"Tp, tihtheih ka neih chuan ka tlanchhe lo vang. Min ko hreh miah suh aw" a ti sauh sauh mai a. Nenei tan hian kawl ka entirin Vanneihsangi tan hian vawi khat tal chu vanneihna ka siamsak ve tur a ni ringawt. Kan pahnih hmalam hun erawh chunglam kutah awm rawh se. Kei chuan a sawi ang khan iaina chhete mah ka nei lo va, Ka khawih hmaa Malsawma nunna a lo la kha pawi ka ti zawk. Ka kut ngeia ka that thei lo hi a pawi! Ka hmangaih ka bialnu hringnun tichhiaa dam nuam ti lo khawpa siamtu khan dam reng a phu hlawl lo e. Tin, Dan hretute leh roreltu, dan kengkawhtu te tenawmna pawh hailana an phutawk hremna pek ngei ka tum. Laltanpuia hian VANNEIHSANGI tan thutiam ka nei a, ka tihlawhtling ngei tur a ni. 

A hmasa berah Amanda hmuh phawt chu tha ka tih vangin a biak pawh theihna number ka zawng a, a lar bawk a, ka nei thei ta mai. Ka call ta a, "Hello, Amanda ka ni e" a rawn ti dam thlap a. Ka chhing sawk mai.

"Hello, Tpa ka nia. I puihna ka mamawh takzet a ni. Khawngaihtakin min pui rawh" ka ti ta tawl a. 

"Oh! A nih dawn kha, i aw pawh a rit em mai. Naktukah office-ah min rawn hmu ta che. " a ti ta mai a. Ka lawm hle, Tunah hian Thla kaltaa nu pakhat thihna a chhui mek niin ka hria a, hun min pe thei chu ka lawm kher mai. A tuka inhmu tur chuan kan inthlah ta a. Beiseina ka neih hi beidawng tawh suh se aw..Lalpa, khawngaihin.

Tiang hawl chung chuan Amanda office-ah chuan ka lut ta a. Sama nen an lo thu a. Min lo en reng chu ka zàm lek lek. Ka tawng hmain, Amanda chuan,"Sam, tu nge kan hmuh mek hi? I la hria em? Vanneihsangi bialpa kha a nih hi. A rawn kal chhan pawh hriain ka inhria. A tha e, hahdam tak khan awm la. Thawk te kha han la phawt teh..hetah chuan i him a nia" a lo ti sawk sawk a. A hahdamthlak ta vawng vawng mai. A hmel hmuh hrim hrim a hahdamthlak tawh nak alaiin a tawngkam lehzel pawh dawnsawn a nuam si. Sama pawh chuan tui min rawn pe vat a, "Nizan i muhil mang lo a ni maw?" A ti sup a. Ka lo nui hawk ringawt. Tui ka in zawh chuan, Amanda chuan, "Nenei chungchang em ni? " a ti ta a. 

Ka thut dan siamremin, engkim a chin chhuakin ka hrilh ta vek a. Min rin theih nan Nenei ziah lehkha tel chu ka pe bawk. A ngawih vang vang hnuah, "Tichuan, eng ti tur berin nge min duh tak? " a ti sap a. 

"Amah Nenei hian a thah a nih ngei thu a sawi tawh si a, chhanchhuah chu thil theih pawh a ni kher lo maithei. Mahse, a dikna chanvo hi zoram khawvel hian hre ve se, i thawhpui mi tenawm ho hian hremna hmachhawn ve se ka duh a ni. Chu chu hma min lakpui theih beiseiin ka rawn pan tawp che a ni" ka ti ta mawlh mawlh a. A tira ka zámna te kha thinrimnain a thlak tawh a. Ka insangmar nasa viau. 

"A ropui hle mai. Zoram hi a chhe vek tawh emaw ka tih laiin mi dik ka tawng leh ta hlauh che a. Ni e, kei pawhin he case ka hriattirh khan a phenah thuruk a awm ka lo ring sa rêng a. Ni e, Amah Nenei khan a thah thu a sawi a, i beidawng deuh a nih kha. Beidawng mah ta che. Mi dik aia dik lo te dinchanna khawvela mi tenawm te hi engvangin nge an game-ah kan luhpuia kan lehthal theih loh bik ang le?! Ngawi tak rawh..dik lohna hmachhuantu te chu trick awlsamtè hmangin kan bawhbet ve dawn nia. Chuan, lawk, Nenei khan chhul cancer a nei i ti em ni kha?" A ti ta zung zung a. Ka thawpik chu lakbo ang huai a ni e. 

"Aw..paih loh chuan a dam rei theih tawh loh tur thu a sawi a" ka lo ti a. 

"Aw le..a nih chuan amah chu enkawl hmasak phawt a ngai anih chu. Jail atanga ka lak chhuah a ngai dawn anih chu.. Sam, report hi lo ziak ta che. " a ti dam thlap a. 

"Mahse, lak chhuah theih a ni dawn em ni?" Ka lo ti hû a. Ka bangbo ve bawk nen. 

Nui sak chungin, "Hei..Dr Lalrinnunga hnen atang hian lehkha kan la ang a, lak chhuah chu a har lo e. Doctor lehkha leh record kan lek mai dawn alawm. A dam phawt a ngai. A dikna chanvo hi a hmu ve hman lo vang tih a hlauhawm alawm" a ti leh sawk sawk a. 

"ka lawm e, ka lawm takzet. " tih bak sawi tur ka hre lo. 

"Lawmthu chu nakinah le..chuan i report thehluh hi puanzar rih loh ni rawh se. Ukil azawnga ka ukil rin ber leh mi dik awmchhun tia ka lo hriat thin Rohluzuala ka bia ang a. Ani chuan Nenei kawmin engkim hi a tidanglam thei ngei ang. Kei erawh chuan, Heng dan kengkawh zo lo ho hremna tur kawng ka lo zawh ang e" a ti fiah kák a. 

"Pu Rinsiama chu kan hmachhawn nge nge dawn a ni maw..a chakawm tawh hle mai" Sama'n a lo ti zauh a. Pu RInsiama chu Malsawmkima pa a ni. 

"Doctor Jamesa pawh mawle..saw mihring fake lutuk saw ka kutphah ngeia ben hi ka chak tawh lutuk" Amanda chuan a lo ti ve zat a. An lo hre ru fo tawh a ni ngei ang. 

"A pawi em mai, Nenei chuan a tirah min hrilh nachang hria se aw" a ti leh rih a. Kei pawn pawi ka ti. Amanda hi engvanga pan mai lo nge maw anih dawn ni. An hna nen a inpersan deuh a ti ve a ni maithei ni. A buai mangan lai a nia a ngaihtuahna kha a fim lo ve bawk nen. Ka dem chuang lo. 

"Engpawhnise, ngaihngam takin va haw la. Naktukah Nenei chu lak chhuah kan lo tum ange , Zai nghal ni thei se. Ka rawn be dawn che nia..lo tha la, nakinah i pawimawh dawn a nia. Amah Nenei rilru hneh thei tur ber i ni a, a beidawn dan a ril tawh lutuk a, beiseina kan siamsak loh chuan a tawp thlenga khutia tawrh tawp khu a duh dawn..i pawimawh aw" tiin min chah mawlh mawlh a. Ka lo bu nghut nghut. Amanda te chu ka chhuahsan ta a. Thawk ka la hawk mai. Beiseina kawlah a eng ve leh tan ta e. Amanda, min tibeidawng lo hram ang che aw. Ka nute pawh chanchin ka han hrilh ve leh a. Kan school lam pawh ka bia a, ka huntawn chu ka hrilh vek ta tawp mai, Nenei thil tawn erawh ka sawi lo va. Kan principal chuan min lo hrethiam khawp mai a, ka aikal ka tir tho bawk a, engmah ngaihtuah lo turin min ti a. Ka lawm takzet a ni. 

Ka'n kir leh lawk ang a. Malsawma kha an garage-ah a ruang chhar a ni a. Nasa taka vih niin a rilte pawh a chhuak nasa a. A hmel erawh a him thung. Zing dar 2-3 inkara thi vel a ni maithei, an hmuh khan a lo khawng hneh hle tawh a, thisen pawh a khang tawh a ni. A vihna chemte erawh hmuh a ni lo va, Nenei te in kha an dap chiam a, chemte kha hmuh a ni lo thung. Engvanga Nenei chu man mai nge an nih tih chu a hmaa Malsawma nen an boruak an hriat tawh vang a ni a. Bakah Zanah Nenei te inah a len thu a nu ten an sawi tlat bawk. Nia, kei pawn ka hria hei chu. Ka hawsan a nih nghe nghe kha. Nenei lahin, "Ka thah anih kha" a lo ti mai bawk si. Court hunah pawh chhanchhuah dan tur a váng ta raih mai. Mahse, Amanda sawi Rohluzuala khan tihtheih a neih ka ring. Jail atanga a chhuah chu beisei ru si, beisei ngam loin ka awm a. An court hun tur a la hla angreng bawk a. A chhul te paiha damdawiin lama hun a hman dawn vangin sum leh pai pawh kan insen ve deuh a ngai dawn a, Putea a rawn tang hle. "Bank-ami ka la chhuak mai ang. Ka fanu a nia, ka tum tur a ni. I piteii pawn a remti thlap e" a rawn ti a. Kei lah School-a ka thawhna a la rei bik si lo va, ka nei mang lo. Amah Nenei sum khawih chet kan hreh si. A sawi ang khan dawr chu mi dangin an luah ta daih. Restaurant-ah tho an hmang. 

A tuk chawhma dar 11-ah chuan Amanda call ka dawng ta a. "Tp, kan tlai thelh alawm..khawsikin nikhua a hre mang lo va, hei damdawiin kan rawn panpui mek e. Lo kal ve mai ta che" a rawn ti a. Mami nen Taxi lain Damdawiin kan pan ve nghal. Ka farnu leh ka naute hian min tawiawm tha khawp mai. 

A dáng bai a, nachhawknain an jection nghal a, a lo muhil bám mai. A cher tawhzia te chu mak ka ti. A rilru a hman nasat bakah a hah em a ni. Amanda chuan Doctor a be mawlh mawlh a, zai nghal mai chu a hriselna dinhmun a hniam rih vangin naktuk nghah leh phawt an tithlu ta a. Ka lo hmanhmawh tawh nasa. 

Nelawm takin, "Tisawn ngaihngam takin lo awmpui rih la, rilru hahdam takin awmtir la aw. Ka ringtawk che a nia" Tiin Amanda chuan ka darah a rawn hmer vang vang a. 

"Ka theihtawp ka chhuah ang" ka ti nghet charh a. An ni chuan buaipui tur dang an neih vangin min kalsan ta rih a. In lam atangin mamawh kan kensa nual avangin kei chu ka riak nghal ang a, Mami chu rawngbawl turin a haw leh ta a. Tlaiah chaw min rawn pe leh dawn a ni. 

Dar 4 bawr velah a rawn che telh telh a, a riat niah niah a. A kut chu vawnsak vatin a chalah chuan ka zuk dek a, a rawn meng ta diar diar a. Min hmu thut chu a meng phawk kher mai. 

Nui chungin," A tha vek aw..Nene, i bulah ka awm reng a nia" ka lo ti vat a. Sawi duh nei, sawi hleithei si lo hian a awm a. A mittui a luang bawk. Ka hruk hulsak a. 

"I dam vat a ngai. Chak taka i awm a ngai" ka ti leh a. 

"U Tri" a ti sap a. Ka lo bu nghut a. 

"Ka mumang a ni lo tiraw?" A ti tiau a. Ka nui hawk a, a kut chu lakangin ka fawp zauh a. 

"Keimah ka ni. Luliana " ka ti sup a. 

"Hetiang mumang hi ka nei ziah a, ka harh leh thin sia..tunah chuan harhsan ka duh tawh lo" a ti sep a. Ka va lainat tak ëm..

A chauh em vangin a tep chep chep a, a muhil zui leh nghal. Doctor khan a tam thei ang ber muhil se kha a ti bawk a. A pawi lo khawp mai. Muhil bawrh bawrh teh se. 

Zial zu turin ka va chhuak ve lawk a. Ni chu a tla lek lek tawh a, thlir vawng vawng pahin zial chu ka zu vang vang a. 

Aw thian kharh thawm ka hriat rual chuan ka lehhawi vat a. Ka thil hmuh chu ka awih lo lek lek..

Zirdula leh Lukira chu nui sáng chungin an lo ding reng mai. 

"khai!" Ka tih rual chuan, min rawn panin, "Dam leh tlang khatah, thih leh ruam khatah kan tih kha mawle. Lulian" tiin min rawn kuah a. Ka mittui a hnám sawk..hei hi a ni thiantha chu…

(Min hau vak vak tawh lo ula..a nuam lo si😒😒