Vanneihsangi 22

VANNEIHSANGI (22)

Ziaktu: Toni Râlte

(Adds kha aw. 🥰

Ka hmangaih leh ka nupui ni tura ka ngaihin min phatsan ta chu a nia. Engtia awm zel dan tur nge ka ngaihtuah thiam ta lo. Ka na a, a chhan ka hre chak si. Ka chhungte an mangang a, putea pawn Nenei a zuk be ta chawt mai. Mahse, engmah a danglam thei chuang si lo. Mak ka ti takzet a ni. Zira leh Lukira te pawn mak an ti tho. Mami ka zuk be thin a, "Ka hrethiam bik lo, min la be thain an ina leng turte hian min sawm reng tho. Mahse, a hlim lo hle chuan ka hria. U, Nenei hian chhan tha tak a nei a nih ka ring. " a ti mai si. Zira leh Lukira te chu awm se va lenchilh se thil a danglam mahna. Zira te inneih ni lah a hnai tawh si, Nenei nena kal te kha kan sawi ve si a. Ka mal dawn khawp mai. Ka mipa rilru lian a chhuak chho a, mahni inkhawngaih ngawt ai chuan tiin chapona tlem ka la neihte sawmkhawmin , Kha chen a retheih leh baihvai lai pawha ensan lo va tuamhlawmtu kei min phatsan theitu chu umzuia tlawm zui tâwk táwk ka tum ta bik lo. Ka chhungril ná leh chau chuan ngaiin thlahlel ngawih ngawih mah se; min phatsantu hmaa kun leh chu ka duh bik lo. 

Putea phei chuan a fanu a nihna angin a hau na ve viau a niawm e. "I vahvaih chhung zawng, rethei bakberha in awm lai zawng zawngin a chhawmdawlin a tawiawm che u a. Engtin nge i phatsan theih?" A ti hial mai. Chuta Nenei'n a chhanna chuan a ni min tina em em..

"Hmangaihna hi a dai thei a niang e. A laka ka tihtur ka ti zo tawh, kan inrultawk viauin ka hria" tiin. Ka keh vek a ni ber mai. Ka chunga a thiltih te kha min rulhletna mai maw lo ni le? Min hmangaih vang emaw ka lo ti a, ka ngaih a lo ngam ve em em ringawt a. Ni e, ngawi teh u, kei ke bai akara hna nghet pawh nei lo, hlawh tia sawi tham pawh ni lo nei ve táwk táwk, Aizawla khawsa ni bawk si lo chu a tan ka lo hniamin ka lo tling tawk ta lo a niang e. Ani chuan ama pualin dawr a nei hial tawh a, a hnuaia thawkte pawh an awm tawh. A rilrute a lo hahdam tawhin a hmel te pawh a lo tha lehzual tawh a, a mit a lo sang ve ta a niang e. Heng zawng zawng ka ngaihtuah chuan dem loh hram hram ka tum a. Pawm theih ka tum. Mahse, ka hriatthiam theih ngai loh tur erawh a thianghlimna min hlanin khang kan hringnun liamta zawng zawngah khan a der ka hmu hlawl lo a ni. Lemchan thiam tak a lo ni tihna em ni? Chutiang mi ni tur chuan ka phal hauh si lo. Aw, kha khawvel a der tel lova kan nuih dun hun kha ka va ngai tehlul ëm..

School pawh ka kal ve hram hram a. Ka nguizia chu ka thup thei meuh lo a ni. Mahse, Ka inngaihtuah ngut ngut turna tur lakah min veng ve deuh a, a zia tho mai. Nenei chanchin chu ngaihven ka tum lo lui a, a number te pawh ka delete ta kha. Ka rilru erawh chuan a vawng rauh rauh si. Ani pawh a reh tlawk tlawk mai. A hlim hle aniang e. Thla chanve dawn mumal lo taka khawsain ka nung ve mai mai a. Thla tawpah chuan Zira te inneih hmang tura an khaw lama zin ka ngai dawn a. Ka nute pawn, "Khaw dangah te boruak thar va hip la, i zia ve maithei asin" an ti a. An remti khawp mai. Ka ke pawh tiang rinchhan chuan ka chelek hnehsawh tawh viau. Tiang tel lo erawh chuan ka la inringtawk chiah lo deuh. Zira'n min lo ngen nasa bawk a. An inneih hma ni 3-ah zin tur chuan ka inbuatsaih a. Ka awm loh kara ka aiawh turin Ka thianpa tho Nicky ka chhawr ve kawkalh a. Ka kal hmain Naupangte chu zir tur ka pe lawk vek bawk. Inthlahrung deuh tho mah ila, ka mamawhin ka hre si, bakah ka thiantha tak Zira nupui neih nia a lang lo nih kha tlawmah ka la ve deuh. Aizawlah ka chhuk phawt a, Mami te in luahah ka riak a. Nenei te in nen an inhnaih ka tih tawh kha. Rilru a thar hle. A dawr ka kalpelh lai khan amah ka hmu lo va. Inah a awm a ni maithei. Malsawma nen an indate pawh a ni thei. Háwkdak loh hram hram ka tum. Mami te pawn min hrethiam bawk a, engmah Nenei chungchang an sawi lo. Ka lawm daih zawk. A tuk zingah West phailengah ka kal dawn bawk a, zanriah ei kham atanga reivak loah ka mu daih. Mahse, "Mami, U Tri-a a lo kal tiraw?" Chu aw ka hriat rual chuan ka kang awk nia! Ka lo la hai lo chiang khawp mai. Puanzar chu rawn inkeuin Vanneihsangi chu a rawn dak heu mai. A hmai a dàng lep a, a mitmeng a dul raih bawk. Inla ngeng takin, "Eng nge i duh?" Ka lo ti hmuk a. 

"U Tri" a ti sep a. Tah chhuak hmel a pu. Ka en duh lo lui tlat thung. Vanneih asiamin Muanpui'n min lo call mawle. Kan inbe khat tawh a nia. Ka tana hmanraw tha ber tih ka hai lo bawk a. Ka la chiang hle. 

"Aw, Muanpui" ka ti hawm hawm a. 

"Aizawlah i awm mi?" A rawn ti a. 

"Awm chiang e, lo leng la" te chu kan ti kual a. 

"Khawi laiah nge i awm?" A rawn ti ve mai bawk a. Aizawla bungrua a dah lai a ni maithei. 

Nenei chuan ding chungin min melh ran bawk. Chutia mi dang han biaksan chu nuam ka tih em em vang pawh ni loin min kalsan se ka duh vang a ni. Tunah chuan a insawifiahna ngaithla turin ka chak rih lo. Ka tlawm leh palh ang. Insawifiahna hun ka pe tam tawk viau alawm le. Muanpuii nen kan inbiak mek laiin,"Eng nge i tih reng. Haw ang" tia mipain Nenei a rawn auh ri ka hre ta a. Hming pakhat chiah ka rilruah a rawn lang. Malsawma..

Ka hawi phei lo thei lo va. Malsawma chu kei ai chuan a naupang ang, a lian a, ngo sûk bawk. Hna a thawk ngai lo tih a landanah chuan a hriat, a no sûrh mai. 

Nenei chuan engmah sawi leh tawh loin Malsawma chu a zui chhuak ta a. Mami a rawn lut nghal. Muanpuii pawh chu ka be tuitam leh peih tawh chuang si lo. A va mumal lohthlak e aw. Chhuanlam ka siam leh ta ringawt a, an lo len tak tak khan ka kawm peih hlawl lo a ni. Mahnia awma inngaihtuah ka duh. 

"U , Nenei hi a cher tawp, in inthen hi a tuar ve viau a nih ka ring" Mami'n a tih chuan awmze nei hlek loin ka lo nui hawk hawk mai. Ka nuih a za miah si lo. Ni e, a cher a, a dáng bawk. Hmana a tisen siah leh a mitmeng nung sar kha hmuh tur a awm lo. Malsawma nen an inchen tawn nasa a ni mahna le..chu thil ka ngaihtuah rual chuan ka tho chhuak hlawl nia! Ka na , ka na vawng vawng. Lungchim taka ka khawiha ka dimdawih em em kha Malsawma khan zan tin deuhthaw a kuai let chu a ni awm sia. Lalpa, a va fair lo ve mawle..ani kha ka hmangaih tih i hre ve reng si a. 

Dar 12 tlangah te chuan rël ang maiin ka la khu vut vut a. Nghate rèp ang chauh ka ni. Nenei hmel kha ka mitthlaah a cham bang reh thei si lo. Ka hah a, ka thin te pawh a rim dawn dawn. Ka thaw leh káwk thin. Ka va kal chilh tawp mai dawn em mawni te ka ti thul. Mipa thinlung sak hian a remti meuh si lo. Zan hrehawm ber pawl zawng a ni ngei ang le..

A tuk zingah Zira te khaw lam pan chuan ka liam ta vung vung a. Ka chau ve deuh bawk nen, ka muthlu nasa ngang mai. A lawmawm lamah ngai ang. Zira leh Lukira ten min lo hmuak ran a. Ngaih a va tha thin tak em. Min chah nasa bawk a, U Sanga kal tlangin Asenchi um 3 leh Amawi um 3 ka hawn a. An khuaah lei tur a lo awm lo a lo nia. Khatia Nenei vanga ka khaw loh deuh khan zu kha zan lamah ka han tlan bawrh bawrh tak khan ka puin an inah min ko pheiin, "Buangpui, I rilru a na hle tih ka hai lo ve. Mahse, Zu hian a chhawk chein i hria em?" Tiin min zawt a. 

"ENgmah ngaihtuah thei lo va muthilh ka duh alawm" ka ti mai a. 

"Mahse, i harhfim apiangin a hma aia nasain i buai a, i na zawk zel a ni lawm ni? Buangpui, thih leh dam karah pawh harhfimin damkhawchhuak turin thutlukna i siam a. Engvangin hmeichhe pakhat vangin khang i lo hlawhtlin tawhna kha engmah lo maiah i chantir ang? Ti duh suh. Ani chuan a phatsan che a, ani aia tlahniama i nun i hman lek phei chuan phatsan tlak lek i ni dawn tihna ania sin. In tawh lo la, i duh dan danin harhfimin i natna kha tuar zawk rawh" a ti dap dap mai a. Min hneh bakah ka pu chu ka zah ngawih ngawih. Tichuan, zu kha ka thlah leh ta rih a. Tunah erawh hlim ni a ni a, rui chhe lo tawk vela awm nawm nana han lem ve erawh ka tum tho. Min dem em em ka ring bik lo. 

Zira chhungte pawh ka chungah an thain kei pawh ka tlangnel viau. Naupangchhia kan ni tawh lo bawk a. In hnuaiah Zira nen kan mu a. Ka thlen zanah Lukira pawh a rawn riak. Chutah chuan kan han lem ta bawk a, a chin chhuakin Nenei chungchang chu ka sawi fai ta vek a. Mak an ti! Ni e, a mak em a ni. Min hmangaih lo tia sawi theih hi har deuh mai a ni. 

Lukira chuan a phone a phawrh that a, Nenei a call ta mai. Ka khap hman tawh si lo.

"Hello, U tluangte" a rawn ti dam diai a. A aw lah hian ka beng a luh chiang thei si. 

"Nene, i mak ka ti ve thlawt. I retheih leh baihvai chhung zawnga zahpui lo va chhawmdawltu che hnawla mi hausa fapa i pansan thei kha..hmeichhe tenawm tak i ni. Ka farnu angin ka lo en thin che a, mahse, ka thianpa thinlung i tihnatna man hi chu i la tel ve khawp ang" a ti nghal bawrh bawrh mai. Zira pawn , ring leng lawng hian.."Nene, i nu kha la dam se chuan i awm dan hi a duh bik hauh lo vang. Mahse, Tpa hi ngaihtuah suh. I hnawl leh i phatsan hi a tha ve zel ania.." A ti ve a. Ka thianten ka thlavang an hauhzia ka hmuh chuan ka inkhawngaih a, ka mittui a hnám dawn ta mai. Ka lo lem ve bawk nen. 

"Dah r'u, a ho em mai. A duh dan danin awm ang hmiang. Ka nupui a la ni hleinem..ka tha, Nene, ka tha aw. Ka hlim a nia" ka ti ve vak vak a. Nenei chu tawngna hun siamsak miah loin phone chu kan dah leh daih. Lehlamah a fair lo em a, khatia rik ve rap kha pawi ka ti vak lo. 

Ka mutui phian e. Kan buai ve niai niai a. Zira pu, a nu pa hi a la dam a. Zira hi a tu hmuh hmasak ber a lo ni ve tho a, ropui deuh taka lawmsak a tum a. Vawk pawh pahnih an talh dawn. Kimi te pawh a pazawnte inah an innghat tawh a. Kan va leng zuk zuk. A dul pawh a puar lian ve tawh angreng. Zira kan fiam thin a, "In innei ang a, chan tur i nei lo nghal ringawt dawn a nia. Inneih zan pawh inhmang nuam awm lo " tiin. A kiai suk suk duh chauh. Ka lawmpui takzet a ni. An ni chu harsatna tawk ve zeuh zeuh mah se, a tawp an khar dun bik a. Lukira leh Bteii lah an la induhin an rinawm dun si. Kei zawng ka vanduai bik a nih hi. Mahse, inngaihtuah lunghnura ngui erawh ka tum bik lo. 

Inneih ni pawh dan khatna ni lo mah se, a ropui pawl tak a ni ngei ang. Mi pawh an tam. Ruaitheh pawh an tamin an tlai puar viau e. Keini Lukira nen erawh kan va lem ru sek a, Zira hian mi dang thianah a hmang a. Keimah min venthawn vang a ni tih ka hrethiam reng. Thiantha hi chu hmuh a harsat tlukin hmuh tawh chuan tihchhiat chi a ni tawh lo. 

Inneih zanah chuan Lukira te inah ka riak phei a. Duh aiin kan rui! Kan zirdula ber pawh a meng pháwt mai. A tha vek mai e. A nihna takah chuan kan tana ni pawimawh ber pahnihnaa ruih phâwt chu a chi viau loh. Minn siamtu Pathian rilrem zawng tak a nih a rinawm loh. Insumtheih hi a har ve em a ni. 

"U Tri" Nneei number deltete tawh mah ila amah bakin U Tri tiin min ko ngai lo. 

"Eih" tiin ka reply a.

"Min haw kumkhua tura dam ve reng ai chuan, Hruihrual ka vuan mai dawn e aw" tih thu a rawn dah ka chhiar rual chuan ka thu chhuak hlawl. Lukira erawh a die tawh a. A hnar bur bur mai. 

Ka call ta a. 

"Eng nge a awmzia?" Ka ti phak chuap a. Dar 2 a pel hlek tawh. 

Lungchhe ngawih ngawiha a tap ri leh insut hlawp hlawp ri chu ka ngaithla ta ngawt ngawt a. 

"Ka tihpalh. Ka tha..i mutui lai ka rawn tibuai che a. Min ngaidam ang che. Mangtha le" a ti fiah kák a. A dah leh daih. Ka call leh a. A la duh tawh si lo. Ka ngaih a va tha lo em. Mami ka call a, a lo switchoff si, Mapuia ka try leh. A ring ral thak thak bawk. Mangang takin ka tho a, pawnah chhuakin tiang tel lova ka chhuah vangin tuizem rinchhanin ka ding a. A reh tlawk tlawk tawh,. Boruak chu a vawt lek lek a. Thlifim pawh a rawn thaw heuh heuh mai. Ka hriat loh karin ka mittui a rawn luang a. Ka thu ta hnawk mai. 

Heti em em hian a ni maw Vanneihsangi hi ka lo hmangaih le. Hliam min hnutchhiaha min phatsan hnuah pawh a tap ri ka hriat leh meuh chuan ka buai chhe leh der a, ka naute thlengin tlawm leh zah pawh dawn zo loin ka call chung a..ka inkhawngaih..ni e, mi khawngaihthlak ka va ni tehlul em..Min duh lo va min kalsantu mangang aurawl chuan thawchhamin min la siam lo chauh chu a ni sia. Ka va tlawm tak ëm..ka hmangaih em a ni. Nene, ka lo va hmangaih tak che em,. Engtin nge min phatsan phal? 

Ka zing tho chuan eng emaw ka ngaichang ru ran a. Mahse, Mami leh Mapuia call ka dawng lo va. Nenei chungah chuan engmah a thleng ta lo a niang e. Ka ngaih a ngam thei ta mang si lo va, inneih tuk ka cham leh a, a tukah chuan ka haw ta a. Zira phei chu a vui lek lek. Kan sawi dan ang khan ka awm leh ta si lo va. Mahse, min haw chuang lem lo. 

Nenei dawr chu a lo inkhar thap mai. Sundayah bak a inkhar ngai si lo va, mak ka ti deuh. Mami te chuan Nenei chungchang engmah an lo sawi lo. Ka ngaih erawh a tha tak tak thei chuang lo. Zanah chuan intipachangin tiang nen Nneei te in chu ka pan ta tawp mai le. Ka thin a phu dup dup a, ka khur lek lek bawk. Kawngka chu ka kik rei lo, Apuia'n a lo hawng a. Tv an lo en a. Nenei ka hmu lo.

"Au Tri.." Tiin An unau chuan min rawn pawm chung chung a nih chu! Ka hnuk a va ulh ngai ve le. Min lo la ngainain min lo la hre ve reng chu a ni sia! Room kawngka chu a ri rak a. Vanneihsangi chu a sam huh hlap chungin a rawn chhuak a. Min hmuh chuan mak ti hmel pawh a pu hran lo. Min lo beisei sa pawh a ni mahna le..

"Apui, Au Tri-a kha a ding rei thei lo, thuttir r'u" a ti dam diai a. Aw,Vanneihsang, i aw te chu a la danglam miah lo asin le..

"Lo thu rawh" a tih zawm zat a. Kei pawh ka hnaih berah chuan ka thu thla a. Sawi mai tur ka haihchham deuh. Apuia te unau engmah ka kensak bawk si lo. 

"Bibi , i va lian tawh ve. In school a nuam em?" Ka ti ta ngawt a.

"Aw a nuam , chuan Au Tri, pahnihna ka ni asin" uang zet hian a ti sar sar a. Apuia pawh chuan,"Kei pawh pathumna ka nia. Nenei'n Cycle min lei dawn a.." Tiin a zuang auh auh a. Engkim chuan ka tah a tichhuak! Min hrethiam teh u, a tuidul mah mah e min lo ti maithei,..Apuia te unau ringawt pawh chuan nunhluiah min kirpui vawn vawn miau si a. 

"Inva fel em em, Kum tawpah thil tha tawk ka leisak ve ang che u" ka ti ta ringawt a. 

Nenei chuan,"Apui, i nau nen roomah lehkha va zir tawh r'u le.." A lo ti ta a. Thuawih zetin an unau chuan an lut a. A naute tan chuan pathian ang mai a la ni reng a nih dawn hi. Ka tan erawh vantirhkoh nih a duh tawh si lo. Ka ep chiahah a thu a. Pyzama a ha a, tsgirt sen duk a ha bawk. A sam a thlah hniang a, a mit chu ka ngaihbel nge a bui deuhin ka hria. 

"Eng nge a chhan?" Ka ti ta thlawt a! Ka va melh vawng vawng bawk. Min rawn melh ve chiah a, mahse, chhuat lam a bih leh daih. 

A hmui a liak zauh a. A kut pahnih chu a suihzawm thán a. "Chhan a awm a ngai em ni!" A ti zawi ta sap a. Ka na nawn leh ta. Ka kut humruhin,"Aw le..ka hrethiam e" ka ti ban chhalh a. Kawngka a ri rak a, Malsawma kha a rawn lut ta bawk. Nenei nen kan thu dun a hmuh chuan min melh tawn zak zak a. 

Ka lo melh ve sak , ka zám awm bik lo ee. Nenei bula thut pahin, "Tu nge? " a ti satliah a. 

"Ka thian hlui a nih hi" Kimki zetin Nenei chuan a ti a. Haw mai tura chhungrila min turtu awm mah se, ka kal ta sa sa, vawi khat chauh tal chu tihbuai chakna rauin min man nge ni, ka thu lui ve tlat dawn..

"Ka'n lem lawk" tih leh a zu pai lai chu choka lama ken phei a rual nghal a. Thil danglam ka hmu leh ta phawt. Eng anga zu ka in chak pawn Nenei hmuh laiin vawikhatmah zu ka la in ngai lo. A huatzia hriain ka ruih pawn phone atang pawn ka be tha ngam lo hial thin a nih kha. Tuna a bialpa erawh chuan a ngam sárh sârh khawp mai. Ka nui hul hak a. A mitah tak va melhin, "I lo danglam ta hle mai" ka ti nghut a. 

A nui ve sak a. "Insiamrem ve zel hi a tha" a ti ve hak a. Malsawma chu a tlangnel ham ham khawp mai. An chawhmeh bel hawngin a sehhmeh a, a au lung lung reng bawk. Hetiang mipa hi Vanneihsangi duhzawng an ni ngai em ni? A va in zawhah a rawn thu leh a, Nenei chu a kuah thuak thuak a, hmuh hrehawm teh mah se, ka melh lui tlat. Ka mit pawh ka khap duh lo. Nenei chuan a lo namsawn ve naa, a mitmei chu ka mitmei aiin a veng zawk tih ka hria..

Ka hriat phak tur tho si hian, "Haw tir teh' Malsawma chuan a ti zawi sap a. Ka ner sawk. Ka chechang duh der si lo. Nenei chuan nuam lo a tih hmel tawh khawp mai. Ka ka thu lui ve tlat si. Malsawma chuan a dawhthei ta ngang lo nge. 

"Thianpa, bialnu i nei lo mi?" A ti ta phawng a. 

Ka nui hawk. Ka bawp khawkherhin,"Ani kha ka bialnu chu a nia" ka ti sup a . A che hrut , Nenei a melh a, Chhuat lam a melh daih.

"Nih chu aw..Inkawm r'u, Naupangho ka va ngaihven ang e" tih leh thawh a rual a. Nenei a ding nghal zat. Malsawma chu hlau tih hriat zet hian,"Ka bialpa a ni lo. Ka thian alawm. U Tri, khawngaihin min hawnsan ta che. Ka bialpa hi a thinrim sia" tiin min rawn melh a. Ka na tawh lo. Ka nuihte lam a ni za tawh ni. 

"Aw le, Nene, inchhir suh aw. Hlim ang che" tiin ka tho a. Ka mita melhin,"Inchhir loh hram chu ka tum alawm" a ti zawi sap a. Ngawi rengin ka chhuak ta a. Ka rilru chu a lët ka ti lo naa ka thawveng huai nia ka hriat chu..Min uai rittu ka phurrit kha lak bo ang maiin ka záng sawt ni maiin ka hria. Nenei ka hmangaihna erawh a bo ta vek tihna a ni lo. Ka mu a, ngaihtuah erawh ka ngaihtuah zawm. Thu a va neiin an in chhungah chuan a va lal tawh em..nupa ang maiin an khawsa ang tih ka hai lo. Sex chungchang ka ngaihtuah apiangin ka thinlung hi chhun angin a na thin. Mihring nunah sex hian pawimawhna a neih thûkzia ka hrechiang. Nenei chuan min phatsan satliahin, ngaihzawng dang min neihsan ni se, ka tawrhna hi heti em em hian a náin a thuk lo maithei. Mahse, a bialpa thar nen sex an hmang tawh ngeia ka rinna hian ka hliamah chi min phulsak a, a na ngawih ngawih tih bak hian ka sawi famkim thiam lo a ni e. 

"U, hei U, tho teh. Nenei bialpa Malsawma kha a thi a ..Nenei pawh police-in an man" Mami aw chu ka mang hriat ruai ruai. Nenei hming a rawn sawi rik erawh chuan ka harh nghal zawt mai. Phawk zetin ka melh hû a, "Maw?! Nenei an man a?!" Ka ti nghek a. 

"Aw, a chhan ka hre bik lo, a bialpa kha a thi a" hawihai zet hian a ti ta a. Ka bangbo kher mai. Min phatsantu chu police kutah a awm. Mami phone a ri nghal a, a la vat. 

"Ehe! Nenei a nih hi" tiin min rawn melh a. Speaker a on nghal. 

"Mam, U Tri-a chu ka be ngam lo va. Ka naute kha ka kalsan ringawt si a, khawngaihin anmahni rawn la tur te lo thlen hma chu lo awmpui lawk mai ta che u. An rawn lam tep ang" a rawn ti mawlh mawlh a. A aw chu a zangkhai vah mai a, Police kuta awm si a va thawven hmel em ka lo ti rilru a. Mami pawh chuan, "Aw le..ka va kal ang e" tih leh chhuah a rual nghal a. 5 mins velah Apuia leh Gaby hruaiin a rawn phei leh ta a. Apuia leh Gaby chu an tap pur mai.

"Tuman an lo ngaihsak si lo va, ka khawngaih lutuk' Mami chuan a ti sap a. Ka hrilhhai em vangin chet lak dan tur leh awm dan tur ka hre lo. Ka hawi ka hawi ringawt. 

Mapuia a rawn haw a. " Malsawma chu a rapawm tawp. A rilte a chhuak mawle" a rawn ti lut a. Ka lung a lo phu dawt dawt ringawt. A chhan ka hre bawk si lo. 

"Tu thah nge?" Ka lo ti hû a. Mak tih hmel deuha min enin, "Ka hre bik lo, U Nenei kha ti nge an man ringawt le a that awm tawp si lo va" a ti nuah nuah a. Ka chau. Ka hah..Vanneihsang, ka ta i nih tawh loh hnuah pawh min va timangang si ëm..Kei pawh kan khuaa haw ka tum chu ka thulh ta rih. Ka nute pawh chanchin ka han hrilh a, Nenei an man thu chu putea'n a lo hre ve nge, min rawn be nghal a. A mangan hmel kher mai. Rawn chhuk nghal a tum a niawm e. A fanu kha a ni miau a. Apuia leh Gaby pawh a rei deuh hnuah chuan an tap bang ve ta hram a. A awm ve e, an innghahna an nu leh pa ang Neneni an laksak daih si a. 

Apuia ten chaw an ei kham hnu lawkah chuan Nula senior a nih loh chuan nuthlawi a ni maithei.Chumi leh Amah nau deuh tur nula chhe vak lo hi, an rawn lut hlawl mai a. An nelawm hle. Apuia chuan nula naupang zawk chu, "Miss" a lo ti vat a. 

"Nenei naute rawn ngaihven tura lo kal ka nia" upa zawk chuan a ti siam siam a. Mak ka ti ru viau. An thu a, "Nenei te nen chhungkhat in ni em ni?" Ka ti a. 

"Ni chiah lo e. Mahse, inremna kan nei tawh a. " Apuia te miss zawk chuan a ti mai a. 

"Min hrethiam u la, eng inremna nge le? Tun laiah chuan fimkhur hi a ngai khawp mai a. 

Nula zawk chuan, nui chungin " A ni maw? Ni e, a dik chiah. Apuia te zirtirtu ka nia. Chuan hei hi ka u a nih hi. Judy ka nia, ka u hi Seni a ni e. Nenei'n engmah a hrilh lo che u em ni?" A ti leh he haw a. 

"Hrilh chiah lo, zingah kha chuan min lo call a, A naute ngaihven tur an rawn kal tur thu chu a sawi a" Mami chuan a lo ti vat a. 

"Mahse, eng inremna tak nge in neih hriat a chakawm. Nenei hi ka putea fanu a ni ve tho a" la ringhlel ru deuhin ka ti hram a. Dawhthei deuhin Judy chuan,"Aa..englo a nia. Nenei nen a hma khan kan lo indawr tawh a. Hetiang hun a lo thlen hunah a naute hi kan enkawl tawh ang tiin..U, lehkha kha i keng em? " tiin A u chu a melh a. Seni chuan a bag a hai a, lehkha phek inthuah hi a rawn lek kang a. Min pe a. Ka lo en vat. Ka thaw a chham lek lek a ni. 

"Kei Vanneihsangi hian ka naute enkawl thei tura tihtheih ka neih tawh loh hunah chuan, Ka naute Rammuanawma leh Gaby Thansangpuii te hi Lalrinawmi (Seni) kutah dahin, ani angin a fate angin a lo enkawl tawh ang a. Tuman an chuhpui thei lo vang. " tiin Nenei signature leh Seni signature bakah hriatpuitu pahnih signature a chuang kalh mai. Engvangin nge he thil hi Vanneihsangi hian a tih? Zawhna ka ngah lutuk. 

Mami chu thingpui lum turin ka ti a. Apuia te unau chu Mapuia bulah rooma luhpui turin ka hrilh bawk. An lut ve mai bawk a. Ka awmdan chu Judy chuan mak a tih hmel viau. Nia, ka che phut phut a, ka za chung a ni ber mai. 

Ka inthunun theih hnuah, "Min hrethiam ula, Nenei chungah eng nge thleng? " ka ti ta tawl a. 

Judy chuan sawi hreh hmel deuh hian ,"Aa..aman rem a ti lo thei a" a ti sap a. 

"Nenei pasal ni mai tura ngaih ka ni thin a. Engkim ka hriat ve chu a thiang lo maw" ka ti ta hmiah a. Seni zawk chuan,"Mate, hrilh vek mai rawh" a ti ta a. Judy chuan a chil a lem khalh a. A thut dan siamrem lehin ka hmangaih Vanneihsangi chunga thil thleng a hriat ang ang chu a sawi ta a. 

"Apuia te miss ka ni tih a hriat vang leh Apuia te unau ka duhsakin ka ngaina ve tih a hriat atang khan han inhmuh changte hian kan inbe ve luam zel a. Ni khat a naute a rawn thlah chu a ngui khawp mai a. Nidangah chuan min be hmasa siam siam thin kha a nia. Khamini erawh kha chu a dang tlat. Kei pawn mak ka tih deuh vangin, " I tha em?" Ka ti a. Min rawn enin a nui sak a. 

"Ka tha vak lo. U Judy, mi rinawm tak i niin ka hria a. Min pui thei ang em?" A ti ta hlawl mai a. Mak ka ti ru viau. Ka puih duh tur thu ka sawi atanga kar khat hnuah daih min hmuh a duh thu a sawi ta a. An inah ka va kal ta a. A naute room-ah lehkha an zir hlanin a duh dan chu min hrilh ta a ni. 

A sawi dan angin ka'n sawi mai ang e. 

"Natna khirh tak mai ka vei a. Tihdamna a awm lo. Ka thi vat dawn si a. Ka naute hi ka ngaihtuah em a ni. Nang hi an miss i nih bakah ka rinzawng tak i ni a, Apuia te i duhsak zia pawh ka hria a. Chuvang chuan khawngaihtakin ka thih hunah emaw anmahni enkawl thei loa lakbo ka nih hunah ka naute hi min lo enkawlsak turin ka ngen tawp che a ni. Ka dawr saw ka hralh dawn a, tunah hian ka zuar tan mek a. A ngam sang ber hnenah ka hralh ang a, ka hralhna sum fai chu Apuia leh Gaby te join ac-ah ka dah vek dawn a. An damchhung chu a daih kher lo vang. Mahse, an mamawh zualpui leh an puitlin hmaa an zirna senso chu ka lo inkhawlsa ve te nen hian daihtir hram dan chu a awm maithei a. Chhungkua ka nei lo va, tumah ka naute enkawl tur hian ka ring lo a ni. Min pui hram rawh" tiin. 

A tirah chuan ka bangboin ka hamhaih khawp mai. Amah lah kha a mittui a tla zawih zawih reng a. Dawt sawi hmel reng a pu si lo. Mahse, Nenei'n khatia keimah kher min bia kha Pathian remruat a nih ka ring hmiah. A chhan chu hei ka u hi pasal sûn, a fapa pawh sûn tawh a ni a. Fa lak hi a tum thin a, mahse, rem lohna a la awm zel a. Ka u ka hre chhuak ta nghal a. Tichuan, a tawi zawngin ka u hi ka be ta a. Apuia te unau pawh a hmu ve a, a duhzawng tak an lo ni a. Ani hi pasal neih tum tawh lo a ni bawk a, Pathian zarah hna tha leh nghet a nei ve bawk a, ngaihtuahawm a ni hauh lo. Tichuan, Neneni nen chuan inremsiamna an nei ta a. Kei leh ka bialpa ten kan hriatpui ta bawk. Nenei chuan, "Ka kal bo tep tawh a. Chumi hma chu ka duhdan leh a tam thei ang berin ka naute nen awm ka duh a. Chumi hnuah chuan in kalpui tawh dawn nia" a ti a. Tichuan, Nizan ti ila zing lam dar 3 velah khan min rawn call-in, "Judy, a hun a thleng tawh e. Ka naute chu U Seni ta an ni ta e. " a rawn ti a. Zing kan han thawh khan Nenei an man thu leh an in luahna te fapa boral thu kan hre ta a. U Seni nen Thanah kan va hmu ta a. A naute awmna in in hi a lo sawi ta a ni.. A zawng zawng ka hre lo , Mahse, Nenei hian duhthlan tur dang a nei lo niin ka hria" tiin..

A sawi chhung zawng khan ka thaw em ka hre lo. A sawi zawh ruala ka thawk hawk danah ka thaw a lo chham hman hle tih a lang. Vanneihsangi chungah chuan eng thil chiah nge thleng? Tuna a awmdan leh thil thleng hi kan pahnih nen inzawmna an la nei vek tih ka hria, eng thil chiah nge tih erawh ka hre si lo. Rin dan erawh ka nei. Mahse, a dik ang em ka hre lo. Chu chu Malsawma khan tihluihna hmangin Vanneihsangi kha a sal bet a, Nenei chuan a kawng awmchhun nia a hriat Malsawma nunna chu lain, tunah jail-a awm turin khung a ni mek. Ka tho vut a, "Nenei ka hmu dawn." Tih leh chhuah ka tum a. Mami'n ,"U, Apuia te hi engtin nge?" A rawn ti tuar a.

"A theih chuan Judy te khan min hrethiam ula, kan bulah awm rih se ka duh a ni. Vanneihsangi thurûk hi ka hre phawt ang. Chumi hnuah Nenei pa pawh a la dam ve a, ro kan rel dawn nia. Khawngaihin min hrethiam r'u aw" ka ti zung zung a. Lungni lo hmel an pu lem lo. 

"Sir, ka hmuh ngei ngei a ngai. Khawngaihin..a bialpa ka nia" Police chu tihtak zetin ka ngen a. Ka mitmenga ka ngenngawlzia chu a hmu thiam ve nge, "Rei tak chu a hmuh theih lovang aw" a ti sup a. Lawmthu hrilhin Nenei awmnaah chuan ka lut ta a. Min hmuh rual chuan a lo ding vat a. Hamhaih zetin min lo melh bawk. 

"Engvang nge? Kei hian ka hmangaih che a ni lawm ni? Engvangin nge i zëp a, dawihzep taka kalbo i tum? Vanneihsang, engkim ka hre duh" ka ti thak thak a. Chhuat kilah chuan a thu sawp niaih a. A hmai dáng lep leh a mitmeng dava riai chuan chhuat lam a bih ngar ngar a, "Nene" ka ti leh sup a.

Chutah rawn hawi chhuakin, a biangah mittui a luang. 

"Hmeichhe tenawm tak ka ni tawh a ni. Nenei hi a bawlhhlawh tawh alawm..u Tri" a aw chu a theihtawpin thunun a tum naa a khur dar dar si..

"Eng nge thleng sawi rawh..sawi teh" tiin a banah ka va sawi a. A hmai hupin a khup a tawp a, a khup bawh chuan a tap ta zawih zawih a. Ka chil ka lem khawlh ringawt. He hmeichhia, hman ata vannei ngai reng reng lo kha a lo la vannei chuang reng reng lo a ni maw?! Engtin nge heng thil hi ka hmuh hmaih theih zawk…

A rawn dak chhuak a. A hmui pet fan fanin a thaw leh hawk a. Min rawn melh ta ngawih ngawih a. Mittui luang chunga nuiin,"U Tri, ka va ngai thin tak che em.." A ti hap a. Ka insum thei tawh lo, ka hnaih ruak a, ka lamah kuai pheiin nghet em emin ka pawm ta vawng vawng a. 

"Hun a tawp aw..lo chhuak tawh rawh le.." Police aw ka hriat rual chuan ka thlah a. A bek tawn tawna vuanin, "I that lo tiraw? Dawt vek tiraw? Malsawma kha i that lo tiraw?" Ka ti mawlh mawlh a. 

Rawn dak chho vahin, "Ka thah ngei a ni. Ka that, ka damchhan chu ka tlak tawh e. " a ti zawi sap a. Ka thlah rang kher mai. 

"Vanneihsang.." Ka ti bah nak..

"Tikhan i tan mitthi ka ni. Vanneihsangi chu a thi tawh. Chu chu theihnghilh ngai suh. Mahse, ka thawk tawp thlenga ka hmangaih chu nangmah i ni a. Mi dang tuman an thlak thei ngai lo vang. Kal rawh, haw rawh. Min huatna pai chung khan dam tum la, Hmeichhe tha tak tawng ang che. Mang tha" a aw chu a zawi naa a fiah kher mai. Police ten min rawn kai chhuak ta si. Hawi let lehin, "Nene, ka rawn hruai chhuak ang che. Lo tha rawh aw" ka ti hram a.

"Hei hi ka awmna tur a ni". a lo ti leh hmiah. Rilru a va bangbo tehlul em..ti nge ka lakah zèp a la neih tlat le. Engvangin nge Malsawma chu a thah? Engvangin nge min phatsan? Min phatsan a ngaihna hial a thuruk pai chu ka hriat a tul tawpkhawk. Thuhretu pakhat zawk Malsawma lah a thi tawh si. Amah Thuruk kawltu Nenei lahin eng thu mah a chhak chhuak duh si lo. 

Malsawma thattu a nih thu a sawi miau vangin central jail-ah dah luh a ni ta. Ka beidawn tawh hnuah Malsawma thihna hian beiseina min siamsak tlat lawi si! Lalpa, eng nge ka tih dawn le..min pui hram teh. Nenei te bungrua chu Malsawma nu ten hal ral an tum a, khawngaih dilin ka naute in luah lamah kan thiar phei ta a. Kan khaw lamah pawh ka haw hleithei lo. Ka aiawh tur ka dah tho bawk a. Nenei case hi chinfel a nih hma loh chuan he laiah hian ka táp reng mai awm e. Tihtheih lah pakhatmah ka nei si lo. Putea pawh a rawn chhuk a, Nenei chu a zuk hmu ve. 

" ka pa, i fanu hian ka timualpho dawn lutuk che a, i hming ka lam ta mai aw. Ka pa hming atan Pu Mawia hming kha ka hmang ta mai" a lo ti thlap mai. A damchhungin a tàng maithei. An court hun tur erawh a la hla angreng. 

"U, hei hi lo en teh" Mapuia chuan a ti a. Ka va phei a. Nu Sangi thingrem thin chu ka nau chuan a lo hai nge mawni dawn ni. Lehkha phek chilhkhawm hi a lo lek va a, a kawmah, "Ka awm loh hunah chuan…" tih hi a lo inziak a. Ka la vat a. Khumah thuin chu lehkha inchilh khawm chu ka chhiar ta a. 

"A thin hnunah tak sawn ka theih tawpa na in vit ila, a ril saw khei chhuak ila..thi lawk thei loin na tuar reng rengin awm se..chu pawh chu ka nun a tihchhiat dan ngaihtuah chuan a la tawk zo lo fo ang. Malsawm, Malsawmkim, thi rawh. Mi tenawmpa, chunglam chet hun ka nghah theih loh hunah chuan Vanneihsangi thinrim inup mek hi hlau thlabarin i la hmachhawn ve mawlh ang…" a bul tan dan pawh a hraw kher mai. Malsawmkima chu a haw takzet tih a lang e. A chhan hre chak takin ka keu leh ta a…

🥲🥲🥲