Vanneihsangi 21

VANNEIHSANGI (21)

Ziaktu: Toni Râlte

Pu Mawia pawh jail-ah a tang a. Kan thaw huai hlawm e. Nenei pawh a lu pawn dam lam a pan ta deuh a, Dawrah pawh a kal leh thei ta. Danny pawh a kal leh tawh rih lo nge, Mami ka zawh pawn engmah a sawi lo. Lehkha zir lamah ka insawrbing chho a. Zawhte hmai pawh ka la ei reng tho, kal zir leh lam chu ka ngaihtuah leh tawh rih lo. Muanpuii pawh a reh ve leh ta reng mai. A zin leh a ni maithei. Ka ngaihsak lem lo bawk. Putea te nupa pawn buaina an nei lem lo va, ka pu te lam pawn engmah an sawi tawh lo. Ka nun chu a eng emawti nawm riau ve mai. Ka kal thei lo chu ka harsatna awmchhun ni rih maiin a lang. Nenei te lah ngaihtuahawm an ni em em tawh lo bawk a. Lungkham em em ka nei ta rih lo. Kan ti nek nek emaw kan tih laiin exam pawh a lo hnai ve leh ta kuar mai. Class pangngai ka kal lai aiin ka hre hnem zawk daih. Tihtur dang awm ta lo chu ka zir nasa ve bawk a ni . Exam nan kar khat a la awm ang tihah ka ke chu a rawn na chho tan ta tlat mai a. A va hun lo tak e aw. Zan 2 lai chu ka tlaivar titih ta. Nachhawknain min chiu tawp a, mahse, chu pawh chuan chhawk zawh loh chang a nei nia. A nat dan hi ka sawi thiam dan berin ka ke ruh chhung chu rannung seh na deuh hian dît hlawih hlawih se , tihtheih nei si loin chutiang vel chu a ni. A chang leh puan ka vet a, mar tawkin ka tawn a, a chang leh ka naute chu tuboh ten ka chhuttir thul. A na a chhuah loh lai chuan a zawi nguai a, sik hrep mah ila ka hre leh chuang lo. Ka pain,"Exam hi han zo fel la, doctor kan hmu leh dawn nia" a ti nghe nghe. Ka ke tliak thir an phumna lah a septic deuh nge a tui tuam tuam reng a. Pite Zuali hi a kut a dam reuh a, min dressing sak thin. Chutiang chuan ka tuatam lo riau mai a. Exam lah kar leh mai a ni tawh si. Chhun lamah ka ke a zia lai hian ka zir a, a hmaa ka lo en nasat tawh vangin ennawn a ni deuh mai tawh a. A zia tak a awm. Zanah erawh ka zir lo law law. Zan a rei poh leh ka ná chu a nat dan a vin telh telh si a. Nachhawknaa ka injection nasat vang ni maw ka thu thet a, ka ro ngawih ngawih. Ka thing ngawt ang. Ka intuaifai vak lo bawk nen. 

Nilaini-ah exam kan tan dawn a, Mondayah ka chhuk ta a. Ka nuin min hruai a, Ka pute ina thlen chu a that viau rualin Nuteii chhungte lam an khaw lam mi an lo thlen ve nual lai tak a lo ni a. Nenei ten min ngen nasa bawk nen, Nenei te inah kan thleng ta a. Aizawla kan chhungte dang hi chu kan tibuai tha ngam meuh lo a ni. Chhiat thatah kan inhre ve a, a tawk viau mai. Ka nu pawh zan khat a riak a, a tukah a haw ve leh nghal. Ka farnu leh ka bialnu an awm a, ka ngaihtuahawm lo turah a ngai ni hmiang. Kan riah zan hmasa berah ka khawsik ka tlun hluah a, kan buai mam mam hle. Nenei a fakawm leh takzet,engkimah min bawihsawmin tihtur tul a ti zung zung a. Ka nu mit a tlung takzet a ni. Kan remruat dan chuan Zira'n min lo lam ang a, A bike-in kan chhuk ang a. Exam hall-ah Lukira nen min zawn lut dawn ani. Tlangvala pumpa a nuam chiah lo, a zahte pawh ka zak ve deuh. Mahse, zah sawi hun ni tawh hek lo le. 

Mami te chu an college week hman lai tak a lo ni mial a. A remchang lehzel, Dawrah Nenei ai a kal ang a, Nneei'n ka awm niah chuan min awm thei dawn a ni. Kan inngai tawh bawk a, Kan exam hma ni chiaha kan han inawm te chu kan inthlahlel lutuk chu over rawngte pawh kan kai awm e a. Chimbuaitu kan nei der si lo. A eisiam ei thei leh min bual phaka a awm te chuan ka lawm a tikim ngawih ngawih.

"Exam zawh veleh i haw nghal lo vang a. Kal kan zir ang" a ti mai a. 

Ka'n sawi leh hram duh chu a dawr kharna man kha a rul zo tawh a ni. A thawkrim bawk a, bakah u ZIkpuii khan a lo tlawm ve duai bawk nen. Tunah chuan a hlawkna a tel chho ve dawn tan a, a aiawhin Mami'n a ti ve thiam vek tho a, marawhchu, Mami te class leh hunah chuan mi dang rinawm tak chhawr a tum thu a sawi. Sum khawih tur a ni dawn a, fimkhur pawh a tha khawp ang. A hlawhtlinna chu ka lawmpui rualin min tilaklawh kual vel ang tih erawh ka hlau khawp mai. Sawi lan chi a ni bawk si lo va. 

Zanriah kan ei laiin, "In luah tur hei aia lian hlek ka hmu asin, kan dawr chhak lawkah a awm a. " a ti a. 

"A that chu, engzat?" Ka ti vat.

"3000 a nia. A laili ve deuh vang a niang, ka hrethiam lo. Apuia te school kalna nen pawh a inhnaih deuh a, dawr nen a kartawn theih deuh bawk si, luah mai te ka duh deuh" a ti niah niah a. 

Mami chuan,"U Kimi te an insawn daih chuan nia kei pawh insawn ka duh" a lo ti ve a. Sawi tawh angin Kimi kha a rai ta si a, an khaw lama hawna inbuatsaih a tum ve deuh nge, Bteii pawh hostelah an dah dawn a niawm e. Mahse, Zira nen an inneih chuan Aizawlah tho awma Kimi'n dawr siam leh Zira pawn a thawh theih ang ang hna zawn ve a tum a. He mi an luah lai erawh a tet ve deuh vangin an luah zawm a rinawm tawh loh. Nenei te an khua a har dawn bakah ngaih a ngam lo. 

"A tha alawm..luah theih chuan, Kimi te ber an awm tawh dawn loh phei chuan inngaihtuahawm " ka ti a. 

"I hawn hmain kan en dawn nia" a ti sep a. 

A tuk exam a nih tawh vangin ka'n inen ve deuh a, ka hre bel ve riau tawh. Mut pawh ka mu hma. Ka ke na pawh a la awm rih lo. A zia khawp mai. Thutthleng seiah ka mu a. Khum kha an la thla tawh naa, Mami leh APuia an mu dun a. Khum lehlamah Nenei leh Gaby te chu thawl zetin an mu thung. Apuia hian Mami hi a ngaina khawp a, amah Mami pawn duat ve tak a ni. Gaby erawh Nenei fa ang deuh hi a nia, han lak hran tak tak a har. 

Ka muhil tui ve viau, mumang te pawh ka nei. Mahse, ka mutna nena in ep chiah an tui khawihna bula tukverh rawn inhawng ri rak avang chuan ka harh ta hlawl a.. Ka zuk melh nghal a. Boruak chu a uap nghal ruih mai. Hlauhna erawh ka nei lem lo. Ka zun a chhuak tih ka hre nghal, keimaha zun ngaihna a awm loh vangin zun bur ka inchhawp a. Zawitea chein ka zung ta huau huau a. Ka harh laklawh tawh si, mei te ka zu ta ringawt a. Tukverh lah ka zuk khar thei bawk si lo. Ka melh pah reng tho. An harh ve lo a ni maithei. Ka mei zuk lai ka nawr hlum laiin tukverh zawn atang chu niin ka hria. "Tp" a rawn ti ta mai a. Ka va phu chiang tak. Ka zuk hawi thla nghal a, engmah ka hmu bawk si lo. 

"Tp" ka beng bula rawn tawng a ang ber. Ka phu leh tho. Ka hawi kual nasa mai a. Ka tiril a khur ta deuh e, ka taksa chak loh lai a ni bawk si. Amah hmuh theih loh a aw ringawt hriat theih nisi chu keini ang huaisen em em lo tan chuan a den ve riau a ni. Keimah chauhin ka awm lo nia hriatna ka nei nghal a. Min uaptu eng emaw ni chu a awm chiang a ni. Hmuh theih loh, khawih theih loh ni bawk si chu engtia han hmachhawn chi nge maw ni dawn ni.. Ka thu chhuak a, ka ke a rawn na zawk. Ka aiah tuar a, Apuia tawngvai ka hre zui nghal. A phun sup sup a, a tep chuap chuap a, a muhil zui leh daih. Boruak chu a rawn uap leh churh a, mahse, ka intipachang a. 

"Tu nge?" Ka ti hawk a. Ka aw chu zan reiah chuan a ring thawkhat viau. Thawm chu a reh leh ta tlawk tlawk a. Mahse, 2mins velah tukverh pawn lam chu a ri san san a, ka en reng laiin ka beisei loh lutukin zosangi a rawn dak ta heu mai le?! Ka mit sulhin ka hria. A thi tawh tih ka chiang nasa si. A hmelhmai erawh a danglam lo, mahse, a dâng em em a ni. Min rawn melh a, ka melh ve reng ringawt. Ka mang vek a, hlauh dan pawh ka hrethiam lo. Ka kha a chih a ni ber e. Chutia kan inmelh reng lai chuan a hnung lam atanga hnuk lawptu awm ang hrimin a leng ta lawp mai a. Ka rak tuar. Ka nau leh Nenei an harh ve ta. An mu nghet ka ti hman lutuk. Hlauhna namën loin mun tuam a, ka khur ta der der mai. Nenei a rawn tho a, "U Tri,. Hei U Tri, i harh em?" Tiin ka lu a rawn sawi nawk nawk a. Ka meng hlawl. Ehee! A va mak ëm. Thutthlengah chuan ka lo mu reng mai. Ka thu chhuak chiang sia. Kei hian mangchhia ka mang tihna em ni ang? 

"Awii, Mam, a khawsik hi a sang lutuk, Nachhawkna kha va la teh" Nenei aw chuan a ti a, ka mang hriat rei ruai. Ka banbul thip zawk chuan min mentir leh a, Nenei'n ngaihtuah hmel taka syringe keng ran chunga min lo melh chu ka han hmu a. 

"I tha em?" A ti thám tiak a. 

"Umm..tukverh kha" ka ti ta daih a. Mak a tih hmel hle. Thei leh thei loin tukverh lam chu ka va hawi a. A lo inkhar thiap bawk si. A va mak e aw. Mang lamah tihbuai ka ni a niang. A vawt em em a, ka khawsik lah a sang si. An pahnih chuan min kuah a, ka ke na lah chu tahpui hawm hawm chakawm khawpin a zual a ni. Nenei te khumah chuan ka mu ta thlawrh a. Rizai min thuah belh a, ka tlun nasa mai. Ka maimichhin apiangin Zosangi hmel dáng lup kha a lo lang zel bawk si. Ka hlauhna chuan min tikhawsik zual a nih ka ring. Ka muhil leh ta daih a. Ka harh chuan khua a var tawh. Mahse, zan lama thil thleng erawh hrechiang tak ka ni. Ka rit lúk a, ka hai chhulh bawk. 

Tukthuan ei laiin ka sawi ta a. Naupang an awm tawh lo bawk nen. An pahnih chuan mak an tih hmel kher mai. Nenei chuan,"A thih dan diktak kha puanchhuah a duh a ni maithei sin. U Sawma lah a thi ve tawh sia" a ti niah niah a. Thil ni thei a ni ve tho mai. Kan ei khamah Nneei chuan ka thawmhnaw min thlaksak a. Ka pheikhawk min buntir lai chuan a mittui a hru zauh chu ka zuk hmu a. Inthup tum hle mah se, ka man ve tlat. 

"Ti nge?" Ka ti nghut a. 

" Eng nge?" Inthup tum zetin a ti a. A nui sáng bawk.

"I mittui kha" ka ti a. Min rawn melh káwk a, "Dik tak chuan..ih, ka khawngaih em che a ni. I harhvang ve thin sia" a ti ta a. Ka rin sa tho a ni a. Mak ka ti lo. A lu-ah ka chul a. 

"Kal kan zir dawn kha" ka tum lawk miah lohin ka ti a. 

"Ni e, a dik..i kal leh dawn" tiin a bu nghat nghat a. Zira te an rawn lang ta bawk a. Min kuah chhuak ta a. Exam hall-ah ka ke na vanga ka buai loh nan nachhawkna pawh min paitir thlap mai. "Tha takin chhang rawh aw.. Ka hmangaih che" a tih sap chuan ka chhungril a tinui vur vur mai. Ka taksa chau leh na pawh a reh duak thei nia. Mipa vannei tak chu niin ka inhre ve. 

Ka rin aiin question pawh a lo kal har lo va, ka thiamsa vek a ni. Ka chhang zung zung a, ka rilruin Pathian hnenah lawmthu ka sawi mawlh mawlh mai. Exam zawhah canteena min chawlhpui chu ka batchamate te chuan min lainat takin min lo be liam liam a, Teteii pawh a hnuhnung lamah rawn kal vein,"I exam chhunga i ei leh in man chu ka tum ang. I dam loh lai khan ka rawn kan si lo che a, khami ai kha a ni mai" a ti siam siam a. A inchei nu ve ta lutuk chu mak ka ti. A inhmeh phian tho si. 

"A ngai lo" ti khawmawi ve mah ila, a ti leh tho dawn tih ka chiang. Lawm takin ka pawm ve ta mai. Thiante an felin Msi pawh ka bulah a táp leh chawt a. A dul a puar tawh liah liah hle. Tun thlaa nau nei tur a ni bawk a. Zah pawh sawi lo va raipuar chung chunga a exam chuan min tilawmin ka chhuang hle. A pass dawn chiang bawk a. A ni khatna chu ka che tha viau e. Tlaiah Zira'n min va drop leh thlap a. An ni hi awm lo se engtin lëk nge ka awm ang ni. Nenei'n min lo welcome a, ka thawmhnaw hlipin, tuilum sa ver vawrin min bual a, ka inbual ve thei reng naa, "Min bual rawh" ka ti tlat sia. A naute an la awm lo bawk a, min bual tak bawh bawrh kha.Nuam tak a ni. Amah chu a zakin a lai deuh tih ka hre reng, saruakin ka awm miau si a, kei erawh mipa tih takah ka zak vak lem lo. Ka inbual zo chu ka rit bur te pawh a zia ta hawk a. Mahse, muthilh hlek ka duh sia, khumah ka muhil ta bawrh bawrh a. Chaw ei dawnah min kai tho. 

Zanah lehkhazir ka tum lo bawk a. Kimi te inah ka leng phei a, Card te kan deng ta vel mai mai. Hlim taka thianho kan han inhmukhawm leh thei chu nuam tak a ni. Mut dawnah chuan,"Kan bulah mu tawh mai rawh. Thlahrang i hmu leh palh ang" a ti a. Kei pawn ka hnial lo ni mai loin a sawi loh kha ka hlau zawk. Ka insaseng thei si lo va, a den duh em mai. Chhuna ka muthilh avangin ka mut a chhuak lawk lo va, phone ka en mai mai. Mi dang erawh an muhil bawrh bawrh tawh a. Thawm ka ngaichang deuh run niin ka hria. Mahse, engmah a thleng lo. Zing lama ka zun chhuak ka harh hnu reivakloa ka muthilh leh chuan thil eng emaw chu ka tawng ta a. Kan thianhoa kan in luahah khan ka lo mu a, Zira leh Lukira te pawh thutthleng seiah an lo mu ve. Zosangi leh Sawma hi an rawn lut hlawl mai a. Mumanga thuchang,"In thi tawh sia" ka lo ti a. An nui dun ringawt. Ka mutna bulah chuan an rawn thu a, Zosangi chuan,"Sawma pawn tunah chuan tibuaitu a nei ta lo" a lo ti a. 

Sawma pawh chuan,"Ni e, mi thar hlak ka ni ta. " a lo ti ve bawk. Tawng tuma ka lo an lai takin, "Apui, bengchheng lo deuh ula, Au Tria a la mu" Nenei tih ri-ah ka harh ta a. Khua a lo var uar tawh. Ka mutui ve khawp mai. 

Chutiang chuan ka exam chhung chu harsatna lian tham em em tawk loin ka hmang a, exam zawh niah kan in hluiah ka va leng ve reng a. Lungte pawh a leng dawn dawn mai. Min sawm nasa ve bawk a, chaw pawh ka ei ve nghal. Zanah kan pathumin kan inphur phei leh ta a. Ka nute biain ka la cham hlek tur thu ka sawi a, an inthlahrung zawk. Mahse, Nenei'n ," Keimah zawkin ka sawm a, kal te inzirtir kan tum a, Doctor pawh ka lo hmuhpui dawn nia. Lo ngaihtuah suh u" a ti zung zung a. Ka nute pawn ngaihngam takin Neneni kutah min dah thei ta. Mami te erawh chua class an tan tawh a. Nenei chuan thawktu thar a la la si lo va, a buaithlak ta deuh. Mahse, dawrah min hruai ve a, ka nghahpui ta thin a. Tlaiah kan haw hma a, a vawi hnih nan ke-a kal chu kan zir dawn ta. Ka huphurh ru em em naa phur riauna erawh ka nei tho mai. 

Ka ke chu ka han rap a, meilinga deh ang maiin a na fîk thak mai. Ka la leh zawk a, "U Tri, i tithei a nia aw." Tiin min lo fuih zel a. Insehruh ngar ngar chungin ka han rap leh a, ka mittui a hnám sawk thei. Amah rinchhanin pen khat ka pen ta a. Ka ke tliak vang khan ka ke dinglam erawh rah nat ngam lutuk a la ni lo bawk a. Ka bai deuh. Pen hnihna, pen thumna. Kan chawl leh ta rih a. Amah rinchhan lo chuan ka tlu nghal dawn. Ka chiang. Pen thum lek pawh chu hahpui tak ka ni. Thlanin min bual vek bawk. Chuti taka harsa leh khirh kan tum lui chu Doctor ten hria se min hau duh maithei a ni. Mahse, wheelchair-a thut hlen ka duh bik si lo. Tumruhna ka neih a ngai. Kar khatah ni 3 tal zir kan ti ta a. Tin, a duh ang tak hnathawktu thar a hmu ta hlauh bawk nen, min awmpui zing thei ta deuh a. Ka inthlahrung viau naa ka lawm si. Kimi te an haw a, Zira te pawh an haw ve ta bawk. Mami te pawh kar khat zet chawlh an neih vangin a haw ve ta a. Nenei leh a naute nen kan khawsa leh ta. Nupa ang chiaha awm kan ni tawh a, inzah tit tet ang kha kan nei ta lo. Apuia te lahin pa ang maiin min en a, Kei pawn ka hmangaih ve ta hle. 

Ruah a sur bur bur a, thli pawh a tha telin ka hria. Boruak a nuam tawk viau. Apuia hi Mami awm loh pawn amahin a mu zel mai tawh a. A huai reuh phian mai. Nenei nen chuan kan infawp leh ngur ngur tawh a. Ruah lah a sur nasain a nau siamna khua riau mai si. Hun dangah chuan sex kaihhnawihah ka luhpui ngai lo. Fawh chu ka fawp fo, ka insum thei viau zel a. He mi zan erawh khaw awmdan vang nge ka duh aiin ka kal foul ta a. Ani pawh a thaw lum ham ham mai. 

"Kan theih i ring em?" Ka ti sa sa a. Hnai taka min melhin, "Ka hre lo, ka thiam ve lo maithei. A chunga awm chu" a ti a. A nui deuh bawk. 

"I tum chhin duh em?" Ka tih chuan, Zah hmel deuh hian.."Inneih zanah ti zawk ila..ka naute hi an harh ang" a ti a. Ka pawmpui thlap. Keia khawlo tawh khan ka lo ngaihtuah kim lo lehpek a ni. Nenei mak ka tih ve riauna chu ka accident hma pawh khan chintawk a hria, ka khawih virin ka temtir ve laklawh tawh naa, pawisak nei lo ang maia "Kan ti tawh tho" tih changchawia chhunzawm zel kha a duh mang hauh lo. Hei hi a danglamna chu a ni. Ni e, thil hrim hrim hi a tira kan ngaihhlut pawh nise hman rim leh namnul a nih fo chuan a hlutna a tlahniam thin. Sex pawh hi nupa inkar ni miah loah kan hmang a, tisual kan ni. Kan dik miah lo. Mahse, kan hmang tawh tho tih changchawiin chhunzawm deuh tluk tluk ta ila, inneih hunah a hlu tehchiam tawhin a rinawm loh. Chu lai game tak chu Nenei hian a pawh pha tlat a, Inneih hun min thlakhlelh tirna tur tawka awmdan a thiam thlawt. He hmeichhia hi nei lo ta ila, engtin tak hringnun hmang ang i maw..

Kan exam zawh atangin thla chanve dawn chu ka cham ta. Mahse, hma ka sawn ve tlat. Ni e, Nenei rinchhanin in chhung dungah ka pen thei tawh. Tlat mai a. Ka nu min ngenna angin vawi hnih Doctor kan va hmu a, kal zir chu thil tih chiah a ngaih loh vangin bansan turin min ti a. Mahse, Nenei nen kan tumna kan sawhsawn chuang lo. Doctor pawh kan rawn zui duh ta lo va. Vitamins leh nachhawkna kan kawl nual a. Kan duhtawk viau. Amah rinchhan lo va kal zir chu a ngai tan ta. Mahse, zep loh chuan kal kan zir ni zanah chuan namën loin ka ke chu a na thin a. Ka khua a sik phah thin. Nachhawkna ka ei leh ka injection nasat vangin ka pum lam a chiangkuang lo a, pum damdawi inchhawp reng a ngai ta bawk. A lawnga tawrh chi a ni lul si lo. Tu pa mah hian a háu ngawta an tawrh theih hi ka ring lo hulhual e. Hma ka sawn dan chu ka chhungte ka la hrilh duh lo, surprise ka duh tlat a ni. 

A in luah pawh a sawn ta a. Ka pui thei der si lo va, a inthlahrunawm mang e. Mami pawh a lo chhuk leh tawh a. Ka hmasawnna a rawn hmu chu a meng phar awn awn mai. A lawm ve takzet tih ka hmu thei. A tawi zawngin chutia thla hnih zet kan inchenchilh takah chuan tiang rinchhanin ka kal thei ta sawlh sawlh e. Hei bak baka ropui leh mawi hi a awm thei dawn em ni? Ka hnuk a ulh. Zan khat phei chu ka tap ringawt. Dam chhunga kea kal leh thei tawh lo tura ka inngaih laia chutianga tiang rinchhan pawh nise ka pen leh thei ta chu...ka pen leh thei tih Doctor te kan hmuhtir hnuah chuan ka ke na vak thin chu a chhan min zawn chhuahsakin damdawi min chawh nual a. Hmabak a eng chho ta. Nenei te ka tihautak tawh ema ka hriat vang leh kan result a chhuah hnaih tawh vangin kan khaw lamah ka haw ve ta a. Ka cham chhung zawng khan engkimah min puibawmin, inpawh takin khawsa mah ila, sex kan hmang miah lo tih ka'n sawi hram ang e. Tin, sawi hmaih loh tur ka thik ruk ve deuh Danny khan nupui a ru ta bawk. Enghelh lehchuang tur ka nei ta vak lo. Amah Nenei inpeih hun a ni tawh mai. Mahse, ka nawr ut ut duh lo. A dinhmun ka hria a, bakah ka tan a rinawm phawt chuan ka nghak thei viau e. 

Kan khaw lama ka haw, ka thlen zana ka pute ho awm kim thep thawp laia tiang nena chhuat dunga ka han kal chu nuam ka tiin vanram ka fang a ni hawt mai. Ka nu leh Nuteii'n mittui tla zawih zawih chungin kut an lo beng a. Ka pu pawh a khi ve vur vur mai. Ka ke ná chu la awm mah se, eng thamah ka ngai duh tawh lo. Ka pain,"Thilmak hi a thleng fo reng a ni. Thilmak thlentirtu chu Pathian tih erawh i hrereng tur a ni ang" a ti nghet charh a. Ka lo pawm hle. Ni e, hetia hma ka sawn ve bek bek chhung hian ka theih ang tawkin Pathian ka bel ve nasa a. Bible pawh ka chhiar nasa vein ka phak ang tawkin ka tawngtai ve bawk. Ka thlarau lam nun pawh a harh ve lai tak a niin ka hria. Han fel tehchiam dan erawh ka hre lem lo. 

"Tp, result i hre tawh em?" tetei aw tliang ral ka hriat rual chuan ka phu zawk a.

"A chhuak tawh mi?" Ka ti hu. 

"Chhuak chiang e, 1st-ah i pass e. Ka lawmpui che aw" a rawn tih chuan ka au chhuak lo chauh. Ka va lawm tak em. 1st div em em chu ka beisei ngam miah lo asin le aw. Tunah chuan master degree ka nei ve ta ran e. Ka pa te pawh an lawm ve khawp mai. Ka puin a arpui tuilai talin, ka nite ho nen ka pute inah ka pass chu kan lawm ve ta laih laih a. Ka pass min lawmpuitu te zawng zawng zingah, "Ka va lawmpui tak che em.. Ka chhuang takzet che a ni" titu Vanneihsangi chuan ka thinlung a dek ber mai. Engkima ka tana pawimawh tawpkhawk a ni ta hi Pathian ruat kan nih ngei ka ringin ka beisei tlat a ni. 

Tichuan,session thar atangin Kan khaw HSS-ah ka thawk ve ta ran mai. B.ed erawh ka thawh hnuah zirna chance a la awm bawk a, chuta tan chuan kan ti ta rih a. Kan school kawng hi a chhoh deuh vangin ka nau hian min thlah thin. Ani pawh college a kal ve dawn tawh a. Aizawlah Mami nen in an luah ve dawn a ni. Nenei te in luah thar piah lawkah an unaua awmna tawk tur a lo awm remchang lehzel a. A va fuh chho em. Kan te ber erawh class xi a zir ve tan dawn chauh a. Ani nen chuan a nia School kan kal ve nitin ni. Class room-ah ka din rei theih loh vangin chair ka inchhawp a. Thu chungin lecture ka pe a, min hrethiam khawp mai. Ka subject ka tui bawk a, naupangho pawn ka class chu nuam an ti ve viau chuan ka hria e. 

Thla hnih ka thawk ve ta reng mai. Nenei te dinhmun pawh a tha chho zel a. A dawr hlawkna pawh a tel chho ve tan a, a buai thin em a, zanah bak kan inbe hleithei meuh lo. Ka ring tawk a, chutin ka ngaih a tha lo ngai hran lo. Kei pawh tiang rinchhan chuan ka kal thei tawh viau a, ka ke na pawh a reh ve tial tial e. Zan khat Mami msg avang erawh chuan ka buai ta. 

"U, Sawi chu ka hreh viau naa, Nenei hi tun lai chu mipakhat nen an inzui ngawrh riau a" a rawn ti ta . 

"Tu nen" ka ti vat.

"Malsawma a nia. Keini aiin a u hlek ang. Nenei te in luah neitute fapa a nia" a rawn ti ta a. 

"Engtin chiah nge an inzui!" Ka lungphu a rang tawh hle. 

"Chutin pawn lamah chuan an inzui em em lo, dawrah hian Malsawma hi a thu ve deuh reng zel a, Zan tin a leng bawk" a ti ta zel a. Ka keh tan chu a ni ta reng mai. Kan inbiak tlem zia leh kan inbiak chang pawha chhuanlam a siam nasat tawhzia ka hai hauh lo. A buai a, a chau aniang tiin min mutsan chang pawn vuivaina ka nei ngai lo. Tiang hian a pelhe ka ring pha miah lo asin le. An in luahna te fapa chu a tla na ta viau a niang e. Mami chuan Malsawma thlalak a rawn thawn zui zat! Tlangval lian lam, ngo veng vung, hmelchhelo tak a ni. Kei nen chuan khaikhin tham kan ni mawlh lo ve. Mahse, ka na a ni. Ka ná…

Nenei ka call nghal a. A la thei lo. Zan dar 8 a pelh chauh a ni. Inah a awm tawh tih ka hre bawk. Ka call lui ta zel a. Vawi 4-naah a rawn la hram.

" U Tri" a rawn ti dam thlap a. Ka chhing sawk.

"Malsawma chu i tan eng chiah maw a lo nih tak a?" Ka ti nghal hráwk. 

A ngawi dat a. A hnuah,"I hrechiang lo a nih kha" a ti zawi sap a.

"Sawi rawh. Sawi vat rawh, Vanneihsang, min phatsan a maw?! Beiseina min pe a, tihian min kalsan leh si a maw?" Ka awrawl chu a ngaihnawm tehchiam lo khawp ang. 

"Chutiang a ni lo, U Tri.." A ti nghat a. Harsa tih hmel zetin a thaw káwk.

"Inbum kher lo zawng khan tihdan a awm lo em ni?" Ka ti ta thláwt a. Ka tap lo chauh. Heti em em hian Vanneihsangi hi ka lo hmangaih tawh a ni maw?!

"Tu nge? Dah teh..ka awm ve reng hi" mipa awin a rawn ti ta chiah, ka nghing lawih a ni ber e. Khur dawt dawt chungin,"Nene, a tha e. Nuam takin le..phatsan tlak lek alawm ka nih. Mang tha le" ka theihtawpa insum chungin ka ti ta a. Ka aw chu a ri chang chang a ni ber e. 

Khumah ka mu zangthal a, ka inrin hmain ka mittui a luang. Pa lo pawh min ti mai r'u, ná ka ti. A ná takzet. Ka beiseina neih ve, hmalam hun atana ka theihtawp chhuah ve tauh tauhna chu a thlawn an chang dawn ta. Amah vangin ka dam a, ka pen a, ka damkhawchhuak a, chu chu ka tan a duhtawk ta a niang e. Ni e, ka demin ka vui tur a ni lo. Min tihsak zozai hi a tam tawh em mai. Ani chu ka phu ta lo a ni e. Kei ke bai, Private school-a thawk, Thingtlang khua hian Vanneihsangi chu ka cho phak ta lo. Ka hmangaih em vanga ka dem thei si lo chuan tawrhna min belhchhahsak a, ka haw thei miah lo chuan min vaw chau ngawih ngawih bawk. Engtin nge min phatsan theih tih ka ngaihtuah peih lo va, Min hmangaih miah lo chung khan engtin nge khati taka chak khan min tanpui theih tihah ka buai zawk. A virgin hawngtu ka ni, a tah khum thin leh a hlauhna tikiangtu ka ni thin. Ka ke ngeia kal leh thei tura beiseina min pea min tanpuitu a ni bawk. Tunah kha khawvel kha a boral dawn ta. Nene, ka va ngai dawn che ëm..ka hmangaih takzet che asin. 

Kan inbe zui ta lo. Chuti ringawta tawp chu ka duh lo. Eng emaw tal rawn sawia insawifiah turin ka la beisei tlat a nih chu! Mahse, a ngawi tlat si. Ka be duh tawh bik si lo. Vawi tam a number ka hmet chhuak a. Mahse, ka call ngam ngai lo. Tibuaitu ni lo va tifeltu nih ka thlan vang zawka ka tawrhna hi ka dam loh tirha ka natna ang chiah kha a ni. Dam chu nuam ka ti ta lo va, thih ringawt lah ka duh si lo. Ka awmdan avang chuan ka chhungte pawn thil thleng a awm tih an hrethiam a, zawhna ka dawng ta chiah. 

"Kan inthen" tih chu ka chhanna awmchhun a ni. School ka kal vete chu thlarau ang mai niin ka inhre thin, ka zirtir lai rengte hian khawvel dangah ka lo cheng veng veng thin. Nenei nen kan tawp tih chu rin harsa ka ti a, ka ui a, ka phal hlawl lo a ni ber. Ka awmdan a nawi sawt tak em vangin ka nu mangangin Nneei chu a zuk be ta ngawt a. Tul ka ti lo asin le aw.

Ani chuan,"Ni, pawi ka ti lutuk. Ka hmangaih lutuk, mahse, kan tawp a ngai tlat a ni" a ti! A tawp tak tak ta. Vanneihsang, engtin nge he thil hi i tihtheih zawk?! 

Ka lo inthunun theihna leh insum theihna chu a rawn la bo fai ta vek mai. Ka thiante bulah tápin, zu in ka ching chho leh ta. Ka nute chuan min lainat teh mah se, tihngaihna an hre si lo. Zan khat ka zu rui ka lungpuam chuan ka call leh ta ngat a. 

Mipa in a lo la.

"Nenei kha phone pe teh, ka lo bia ang e" ka ti a. 

"Ka bialnu a nia, mipa dang biak ka remti hleinem" a ti hmak mai. 

"Pe mai rawh,Zawnga, vanneihsangi kha ka be duh" ka ti tuar..

"I va zak lo ve a, tu nge i nih?" A tih lai chuan, "U Tri, min lo call tawh suh. Khawngaihin" Nenei aw ngei mai chuan a rawn ti ta a. 

Phone chu a ri khap a. A reh ta vawng vawng mai. 

Ceiling melhin ka mu zangthal a. A zat loh em avanga nui chungin,"Aw le, Vanneihsang, ka thinlung i fiam hun chu a liam ta e. Ka kal ang, ka kal em em ang. Dam takin le" tiin ka phun ta sup a. 

🥺🥺🥺🥺