Vanneihsangi 20

VANNEIHSANGI (20)

Ziaktu: Toni Rálte

Ka pa mitmeng chu hriatthiam a harsa, ka sawi thiam dan berin, "Ti nge engmah i sawi loh?" Tih melh hian min melh. Ka zám a, ka pa chu ka zah thar em em a ni. 

"Pa, englo a nia" ka ti hman chauh tihin ka nu chuan, "Mam,i putea chu zuk ko rawh." A lo ti kalh a. Ka ngawi zui leh daih. Ka nu chuan ka pute a va call bawk a, "Ka pa, thil pwimawh tak mai a awm a. In lo leng phei lawk mai dawn mawni le " a ti sawk sawk a. Ama chhungte lam ka ni te bakah ka pu te ho a be bawk a. Kan lo nghak ta thap mai. Mami chuan naupang pahnihte chu roomah a luhpui a. Putea pawh zum dûkin a rawn lut a. Ka pa chu a melh tha ngam meuh lo. Chhungte dang an rawn lut khawm ta tiai tiai a, kan ngawi thap. Ka pu te chuan Nenei chu nizan lamah an lo hmu ve tawh tho a, eng boruak nge kan hmachhawn dawn tih an ngaihtuah thiam ka ring lo. An kim ta maw tihin ka nu chu a ding hluai a, thupui fun takin, "Aw le, zanina kan hun tawn hian a thawng hle maithei che u a ni. Mahse, zep reng thu a awm lo va, Thudik ka'n sawi mai ang e. Nenei, Vanneihsangi tia kan hriat hi ka nau ka chhang chiah Siampuia fanu a ni. Khatin lo meng phar lo u la, Ni e, Hmana Siampuia'n a ngaihzawng a zuk luhkhung, ka pa ten neih an remtih tak loh kha Nenei nu hi a ni. Christmas hmaa Mami nen kan zu zin khan Nenei hi ka zuk hmu ta a. A hmaa ka rilrua lo awm reng thin chhanna chu ka zuk hmu ta a nih kha. Nenei hmelah hian Siama naupan lai hmel chiang takin a lang a ni. Rinthu maia thil kalpui ka duh loh vangin Siama hi ko thlain, DNA kan test ta a. A inmil ta chiah mai. Tichuan, ka fapa bialnu a duh em em chu ka vah a lo ni ta a. BAwiha min ngenna angin he thuruk hi kan vawng ta rih a ni. Mahse, min kap reng a, zanin hi sawi chhuahna remchang tak niin ka hria a, Engpawhnise la ,thudik hi ka puang chhuak ta tawp mai a ni e." A han ti ta dap dap a. Thawk pawh ka thaw tha ngam meuh lo a ni e. Nenei pawh a thu ngawi ran mai. Ka pu chu a rum nghut a. Ka pa erawh a chechang lo. Eng thutlukna tak siam ang maw. Ka ni chuan Nenei chu enin," Sangi fanu maw i nih?" A ti sap a. Nenei a bu nghat. 

"A mak hle mai. Thil kal dan chu..unau in lo ni reng a, kan lakah inzep tlat si" ka pu chuan lungawi hmel vak loh hian min en chungin a ti a. Ka ngawi chawrh chawrh ringawt. Sawifiah mai dan tur ka la hre lo. Ka nu zawk chuan,"Chu chu a ni kan buaina, ka pa, Bawiha leh Nenei te hi an inhmangaih takzet a ni. Keini pawh then chi an ni lo" a lo ti vat a. Ka pa a che ta hrut..

"Unau an ni tih inhre loin kha chen nula tlangval angin an lo kal tawh a. An inhriat tawh chuan ti nge an inbansan mai loh?" A ti ta a. A reh tlawk tlawk mai. Nenei chuan a hmui a pet fan fan a, keiin chair bán ka hum nghet hle thung. 

"Pa, ani hi ka farnu angin ka en thei lo vang" ka ti chhuak thei hram. 

Ka pu chuan,"A la harsa deuh ang, mahse, nakinah chuan i thei mai ang. Siama, nang pawn i fanu leh i u fanu inlaichin dan hi i duh bik em ni!" Tiin putea a melh a. Ka pa leh ka pute rilru chu a hriat theih ta ruak e. 

Putea chuan min entawn zak zak chungin,"Aa,ka pu, ka fanu hi ka hmangaih a, Bawiha pawh ka nau ang maia ka en thin a ni. Kei chuan tihnat ve ve ka duh lo a ni. Tun laiah chhungkhat innei leh inlaichinna nei an tam tawh alawm" a ti ve ta a. Ani hi chuan min khawngaih tih ka hria. 

Nuteii a rawn tawng ve ta a. Ani hi chu sawi tawh angin ka pa te unau zing ami ang mai an ni. A thusawi pawh an ngaichang ve viau zel mai.

"Bawiha leh Nenei hi tleirawl inngaizawng ang mai mai an ni tawh lo va, harsatna tam tak an paltlang dun tawh a; Engkima intawiawm duh an ni thin. Chuvang chuan tuna unau an ni tih kan hriat tak avanga pawh thena unau anga awmtir leh chu a har ang, tin, thil thiang pawh niin ka hre lo. Tih tak ëmah te chuan saw Vanlala te pawh a patea fanu nen saw chen an innei tawh a, an fate emaw eng emaw thilah pawh harsatna an tawh kan hre lo. Bawiha te an nih vanga harsatna an tawh kher ka ring hran lo. " a ti ve ta hmak hmak mai. Ka lo lawm ru hle. 

Ka nu pawh chuan, "Ni e, ka pa, Hmanlai puithuna inrin dan kha chu tuna chhawm a tul ber tawh lo. Nenei hian a inhuam chuan ka mo nihtir ngei ka duh a ni" a ti nghet charh mai a. Ka pa mitmeng a danglam zawk. Ka pu chu a rum nghut a, mahse, engmah a sawi lem lo. Ka nute chhung lam erawh chuan eng em em an sawi ve lem lo, mak an ti a nih ka ring. Tin, kal tlangpui mah ila hnialna an neih em em ka ring hran lo. Nenei chu an vah, an fanu mahnise, a hmaa a nuin a pai lai boruak avang pawn chutin an hnaih ngam tak takin ka ring lo. Han duat hluak dawn pawh nise an inthlahrun ka ring deuh. 

Ka pa chuan a aw a thian kharh a. "Aw le, ni e, hei hi chu ngaihtuahna sen ngai deuh a ni a. Chutia rel fel ngawt chi pawh niin a lang lo. Nenei leh Bawiha pawn min hrethiam se, nakina ngaihtuah ho chi a ni. Nenei hi naupangte mah nise, ka fakin amah a puitling em em a. Bawiha a hmangaihzia pawh ka hrechiang. Pawh thena na taka siam ka duh lem lo..engpawhnise, sawi zui tawh rih lo vang u. Tikhan thudik kan hre tawh a, la kamtam rih lo ila a tha awm e" a ti ta a. Sawi zui an awm ta lo. Nenei chu an han chibai tha leh a, an fanu, an vah a lo ni reng si. Ka pa te chhung lam erawh chuan ka bialnu angin an la en lo thei lo. 

An haw vek hnua chhungkaw bila kan awm hnuah ka pa chuan kan pahnih chuan min melhin, "I pu hian a pawm theiin ka ring lo. Kei erawh chuan in chetzia, in inhmangaihna te ka hmuhin pawh then chi niin ka hre lo che u. I pu rilru hneh hi a ngai a ni" a ti ta a. Kan thaw huai e. Ka pu ringawt chu ka pallui ngamin ka hneh theih ka beisei a ni. Mahse, rilru a kap ve tho mai. Mut hmain ka roomah kan awmdun leh a. A cool reih rawih hle. Ka hrethiam, a mikhualna hmunah a duh vak loh danin thil a kal miau si a. 

"Lungngai lutuk lo ang aw. Duati" ka ti a. 

Mawi zeta min rawn melhin, "Ka pa khu ka khawngaih" a ti ta daih a. 

"Ngati maw?" Ka ti mai a.

"Min hmangaih sia, a duh angin a lantir thei si lo va" a ti sap a. A dik ang, putea chu a khawngaihthlak ka ti kei pawn. 

"Mahse, tikhan an hre ta vek a. A lantir ngam ve tawh ang" ka ti a. A bu nghat. Piteii hian a pawm thei rihin ka ring lo va, mahse. Chu chu buaina a ni lo. Kan buaina ber chu Nenei nen kan innei thei ang em tih hi a ni. Muthmunah pawh ka ngaihtuah thui khawp mai. 

A tukah inkhawm turin an insiam malh malh a. Gaby pawh Mami'n a chei nalh rap mai. Nnei erawh chuan inkhawm lo va min awmpui a tum thung a. Naktukah an haw leh mai dawn a, a thlakte pawh kan inthlahlel ve rih a ni. Ka pa te pawn an hrethiam a nih ka ring. An kal diak hnuah roomah kan tawm leh ta daih a. Thudang vak a leng lo, ka pu rilru thlak tir dan tur leh ka dam theihna tur lam a ni kan sawi ni. A ding hluai a, "U Tri, hawh kal zir ang" a ti thut a. 

"Ka theih lohzia i hmuh tawh kha" ka ti a. A nui ringawt , a ding a. Phur zetin ,"Hawh le" tiin a kut a rawn phar chhuak a. Ka lo melh hu ringawt. 

"Muanpuii kal zirtir nge Nenei kal zirtirah i kal thui theih zawk kan en ang chu" a ti leh khalh a. Min va challenge reuh tak e aw. Ka nui vur vur a, "A tha e, Muanpuii nen inelna in nei dawn a ni maw?" ka ti a. A kut chu ka vuan a. Amah rinchhan chuan ka ding ta a, ka ke chhuata ka rah rual chuan ka rak tuar, amah pawn makti zetin min rawn melh nghal háw a. Khumah chuan ka let nghal hlawl..a na lutuk, ka ke natzia chu ka kawchhung zawng zawng a fan chhuak ni maiin ka hria. Ka hmaite pawh a sen vekin ka ring. 

"A na maw?! Awii! u Tri, na i hria. Lalpa, ka va lawm tak. I ke na i hre tawh" a tih chul ri chuan ka na chu min chhawk huai huai ni maiin ka hria. Kei pawh chu harh thut niawm takin, "Ehe! A va mak! Ni e, na ka hria" ka ti ve nghek a. Khuma ka mu chu min rawn bawhin a lawm lutuk chuan ka biang leh hmui a rawn fawp nawk nawk mai. Kan va hlim dun si em. Ná ka hriat theih chuan beiseina ka nei thiang ta. A tha e. A vawi hnih nan ka han insangmar a, nghet zetin min lo vuan bawk. 

"U Tri, ka mitah en rawh, min en la..a tha e, ka vuan tlat che a nia. I ding dawn i ke ngei hian i la ding leh dawn.." Tiin a theihtawpin min lo fuih ngat ngat a, ka khurh nasatzia leh ka thlanin min bual hnehzia chu aw. Ka huh dup mai. A na si, mahse, a mitah ka melh ngat ngat a, ka insehruh nasa lutuk chu hmuh ka nuam fahranin ka ring lo khawp mai. A tawpa tawpah khum atanga thoin Nenei kut chelh chungin keima ke ngei rinchhan chuan ka ding ta! Mahse, 20 sec vel lek a ni maithei. A pawi lo. Ka ding miau alawm le. Ka hah leh chau, ka na ti lutuk chu ka tlu leh nghal a. Mahse, ka nui. Nenei chuan mittui tling pamin, "I kal dawn..i kal leh dawn U Tri.." A rawn ti hawm hawm a. Ka ke ná pawh ka hrechang leh ta bik hauh lo. Nghet zeta inkuahin kan inpawm ta vawng vawng a. Thilmak chu a thleng thei alawm, ni e, thlentir ka tum tlat chuan

..

Ka nute thawm kan hriat rual rualin Nenei a tlan chhuak a,"Awii..Nî, Mam, U Tri-a a ding asin. A ding tak tak dawt ka sawi lo" a va ti sawk sawk a. Khuma mu chungin a hlim leh phur lutuk chu ka lo nuihpui ve. Ka nu a rawn tlan lut ve nghal, "Tak tak em ni?" Phawk zetin a rawn ti ve a. Ka lu ka bu zauh. A hmui a hup a, a mittui a tla lek lek. "I pa ka'n hrilh ve teh ang" tih leh phone hmeh a rual a. Kan hlimna chu hotë anga lang nisi ril tak a ni. Ka pa lo haw pawh a hmel hmuh a nuam ngei mai. Kei chuan Nenei beiseina nung reng leh a tawngkam min fuihphurtu kha ka chakna chhan pakhat a ni tih ka hrechiang hle. Mahse, ka chau a ni. Ka thlan nasa si. Zanriah ei hmain tuilumin ka inbual ta a. Ka harh ta vâk mai. Zanriah pawh ka ei teuh mai. Ka khawvel a danglam ve leh tan ta e. 

Zanah ka pa leh Mami leh Gaby te an va inkhawm leh a, ka nu erawh a awm ve. Putea te nupa an rawn len dawn vang a ni pakhat a. Nenei chuan rooma ka awm laiin,"Ka zám riau, ka nu hian min ngaina dawn loin ka hria" a ti sep a. Piteii mizia te ka hrilh mawlh mawlh a, Piteii hi nu sual a ni hauh lo va, ama that thata tha ve tawp, taima em em, lenglam lo tak a ni. Marawhchu, sawi awm leh awm loh a hre vak lo ve a, a ri ve deuh phawng zel a, chu chu sawisel a ngaihna deuh chu a ni mai e.Nenei pawh hi a sarhu lai a nia chutimaia a pawm theih chu ka ring lo. Mahse, a haw hran em em lo vang. Bakah an awmpui dawn pawh a ni lo a. A hnawksak tham lo em mai. 

Putea te chhungkua nen kan thu thap a. Ka nu chuan thu zaizap takin piteii chu engkim a hrilh malh malh a. "I fa ang tak taka en a harsa ang tih ka ring ,mahse a dinhmunte han ngaihtuah la, nu a mamawhzia i hria ang. Chuvang chuan pawm theih loha i pasal chunga tuan emaw thinrim emaw te kha ka pawm ve hauh lo a nia. Tihah chuan in inneih hma thil a nia. Thinrimna chi pawh a ni lem lo" a ti a. 

"Ka thinrim hran lo, amah Nenei pawh ka haw hleinem. Mahse, ka pasalin ka laka a lo zep reng kha ka hua. Min ring zo lo em mai" a ti nghat a. Putea kan melh thap. A zum dûk ringawt. A aw a thian kharh a, "Aa, Zuali, ka rin loh vang che pawh a ni chiah lo. I rilru ka tina ang tih kha ka hlau ve bawk a. Bakah han hrilh dawt dan tur che kha ka bangbo em a ni" a ti ve chuar chuar a. Nenei chu ka nuin thingpui lum turin a tir a, "Pa, a thlum nge a háng i duh?" Nenei chuan putea melhin a ti a. A lo sawi a, Piteii chu melh lehin, "Nu, nang a hàng tho mi?" a ti sap a. Pite zuali a phu zuk,Nenei melhin, "A háng a ni mai aw" a ti ve a.

Choka lama a rik rak rak lai chuan. "Nu tia min han ko thei nghal maite kha nula fel tak chu a ni ngei ang. Aaa, U Lawm, mo i nei fel dawn e. Kan pa fanu mah nise, Tpa nupui atan ka awt" a ti ta sur sur a. Ka lo thaw huai mai. Ka nu pawh a khi ve ve var var e. Nenei thatna leh duhawmna hian mi thinlung a hneh thei rëng a ni. Ka chhuang tehmai a nia. Ka ta liau liau a la ni zui. 

Dar 9 velah pawh ka roomah kan la titi malh malh a. An haw leh tawh dawn si a, ka khua a har leh dawn mang e. Kimi te nen kan invideo call a, an ni pawh Zira chhungten an hre tawh a, zira'n MA pass ve law law se an tih vangin an la ngawi rih. A zawh rualin an innei deuh maiin ka ring. Lukira leh Bteii pawh an la tha zel a. Alicia pawn bialpa dang a nei leh tawh, Lalesi pawh a hmaa a kawm thin nen an lo ni ve daih a. A mak angreng. Alicia leh Esi hi an fel ve angreng, ka damloh tirh te khan min be ve nasain a kan te pawh min rawn kan ve nawlh mai a. Kan inthianthatna kha a la chhe fai vek lo tih ka chiang. 

Ka duati chu duhthawh takin ka fawp a, mitmeng da sar sar nena min melh chungin,"Muanpuii kha hmu tawh suh aw" a ti zawi sap a. 

"Min rawn kan miau chuan ka tan hnar a nuam bik lo alawm. Ka duat, hrethiam ve rawh. Ka tiam thei lo che. Mahse, nia a hranpa chuan ka be tawh lo vang" ka ti a. Tihtheih loh tur nia lang tiam vak ai chuan hetia tih mai hi ka duh zawk. Ani pawh chuan,"Nia, lehlamah a lo ngaizawng bik lo ve thei tho che. Hei kan awm chhung a reh hmak a, min ngei viau thei bawk" a ti niah niah a. 

"Chuan nang pawh i dawr nghahnaah te mipa melh tam lo la, a mawi tawk a awm. Bakah i la naupang sia, an zuam che ka hlau. Puitling deuhin awm ang che" tiin ka zilh ve luam a.

"Awii Pathian malsawmna ka dawng ka ti mai. Ka hnathawkte an fel sia, customer hi ka nei kal ve reng a, U ZIkpuii dawr tia lo hre tawhte pawn a dawr ni tawh lo mah se, min dawr chhunzawm ve zel a. Ka dawr kharna man pawh ka rulh zawh ve vat ka ring" a ti siam siam a. Ka lo lawm ve ringawt. 

A nuteii te chhungkua kan sawi kaina lamah, "Eli kha tak ana..hmanni deuh tawh khan a rawn kal ve nawlh a. A bialpa niawm tak a rawn hruai bawk a. Min be chhe tawh miah lo mawle. Kei pawn a free in ka lo eitir a. A lawm ve hmel lutuk. A hranin kan va tlawh vak lo naa Nuteii pawn chanchin min rawn zawt ve leh zauh zel. An buai ve bawk sia lehlamah chuan" a ti duah a. 

"Ni ngawt mai. An puihna tel lo va dinchhuah kha tum zawk rawh. I tithei tih ka hria.." Tiin a chalah ka fawp zauh a. 

A tlai ve tawh bawk sia, chhungte lakah a inthlahrunawm ve si. A mutna turah a phei ta a. Ka ruak huaiin ka hria. Ka ngai ngawt ang le. Kan hlim dun nasa mai si a. 

A tuk chaw ei khamah Aizawl lam panin min liamsan leh ta vung vung mai. Zingah khan min rawn kai tho a, ka chalah rawn fawpin,"Lulian, tho tawh la" a rawn ti sap a. Ka lo kuah vat a, khumah ka kuai thlu ve a. A nui hawk hawk mai. Ka thawh hma siin chiang taka min melhin,"I ke ngeiin lo kal vat la, exam tura i rawn chhuk hunah chuan chair hi i mamawh tawh lo maithei a ni. Kan hmalam hun ngaihtuah la aw.." Tiin min chah a nih kha. Hlawhtling se a va tha em tiraw. Nene..

Nilengin ka mu a ni mai e. Ka zawi nguai mai. Ka inngaihtuah lungpuam leh hmain lehkha zir tumin ka han intintuah ve a. Rilruah a lut lo teh e. Ka lukhamte chu Nenei rim a la nám a, ka kuah hlu hlu mai. Hetiang taka hmeichhia ka nuna a pawimawh ta mai hi mak ka ti zawk. Ka mizia leh nungchang hriate tan pawh a mak ngei ang. Mahse, ka nuna lo lut hi tu dang ni loin Vanneihsangi a ni miau si a. Tluang taka an thlen thu min rawn hrilh a, min ngaihzia a sawi chuan tlangvala pumpa ka hnuk a ulh lek lek. Kei hian ka ngaih zawkzia a hre lo em ni ang? Ngai tak ka ni. 

Hun pawh a kal ve leh tan a, kei pawh kal ka la zir leh lo va, suangtuahna leh duhthusam bak ka la nei hleithei meuh lo. Nenei chuan min rawn fuih reng naa a taka che chhuak turin ka la chak tawk lo a ni. Sunday chawhnuah Muanpuii a rawn lang leh hlawl mai. A thau deuha ka hriat chu..a nui leh var var a. A duhawm ve reuh reng mawle. Hmeichhia angin ka en mang lo zawk a. ENg nge ka an min zawt siam siam a. Ka lo hrilh ve mai a. Ka nu chuan thil khawn tur a neih vangin min chhuahsan a. Eirawngbawl a ngai lo nge mawni dawn ni. Ka bulah a rawn thu hnai a. 

"I bialnu tiraw?" A ti teh chawt a. Ka lo nui suk. 

"Umm nih kha. A chhe lo em?" Ka ti a. A nui hmel chu a lem riaua ka hriat ni, ka ngaihbel pawh a ni maithei. 

"Umm a chhe lo, mahse, a lerh hmel ka ti" a ti pek a. 

"Lerh lo se kan ni thei nang" ka lo ti mai a. 

"Ni ve bawk sia. Tak taka ka ti mai mai nih kha..chuan, kal chu i zir leh em?" A ti ta daih a. 

"La zir chiah lo, ná ka hre tawh a. Nenei nen khan kan kal zuai a. A na lutuk a, ka la ti rih lo" ka ti a. 

"Ehe! Na i hre tawh maw? A va lawmawm ve" a ti hluai a. 

Ka lo bu nghat a. Mak a tih hmel khawp mai. 

"I dam har dawn loh chu, naktukah ka zin dawn a, kar tawpah ka rawn let leh ang a, zir ang aw" a ti a. 

"Nia a pawi lo" ka ti mai a. 

"Chuan,Mimi nen khan inlo ni ve reng tawh ni maw?" a ti leh thut a. Nui vur vur chungin ,'Aw' ka lo ti a. 

"I lerh siah" a ti ringawt a. 

"Awihawm loh" ka ti sup. 

Ka naute an lo haw a, nuam a ti vak lo aniang. Chaw ei a hun tawh chhuanlamin min hawnsan ta a. A tih dan kha min ngaizawng deuh niin ka hria, haha, ka inngai luck ve deuh pawh a ni maithei. Ke pawh hmang thei lo hi ka lo lerh ve em em a, Nenei phatsan ka tum pawh a ni hran lo, mipa hi chu kan dan hi a dang ve a. Ka nu te an lo haw sap sap a, zan inkhwm a ngai sia, zanriah kan ei ta a. 

Kan ei kham mei ka zuk lai chuan Mami'n min lo call a, call hian kan inbe khat viau a, mak ka ti deuh. Ka lak rualin, "Awii, U, Hei Nenei pahrawn kha a lo chhuak a, a fate rawn lak a tum a. An buai nasa mai" a rawn ti ta mai a. Ka thu ngil awt mai. Ka hlauh ang ngeiin. 

"Han sawi chiang teh" ka ti a. Thinrim awrawl pawh ka hre pha. A kalsawn hlek nge,"Ih, chaw kan ei laiin a rawn kal a, apuia leh gaby kha ka fate an nia ka la dawn a rawn ti deuh táwng a. Nenei'n a lo phal si lo, an inhau a. U kimi te pawh an lo phei, U zira te ka bia a, an lo phei tep ang" a ti zung zung a. A thlabar hmel hle.

."mam, patling deuh han ko rawh. In neitupa han ko rawh,vat" ka ti nghek a. Ka khur der der thei mawle. Engah chuan nge ka hlauhthawn loh ang le? A nupui hlui a fate hrinsaktu ngei pawh vih tum tawhtu chuan a fahrawn ka hmangaih Nneei pawh a tina hreh dawn lo tih ka chiang em a ni. Ka nute pawn an rawn ngaihven ve nghal vat a. Mami chuan phone a la dah lo va, ka la keng reng kei pawn. In neitupa chu a han ko a niang, a hnuah thawm rapthlak zet ka hre ta a. 

"Awiii...nene" tia Mami rak tuar ka hriat rualin a ri rawk a, a reh tlawk tlawk. Eng nge thleng ang? Mami chu ka call lehnghal a. 

"Aw, U, Nenei lu hi a thi nasa lutuk a" tap titih hian Mami chuan a rawn ti ta. Mipa te u, he lai boruak hi mipa rilru atanga inhriatthiam chuan chhungrilah in nat ve ka va ring em..tihtheih nei miah lo, che sawn thei si lo va ka hmangaih thichhawnga a awm laia khaw hla tak atanga a thawm chauh ngaihthlak theih chu..he dinhmun hi ka duh lo, ka duh hlawl lo. Ka khur zawih zawih a. Mami chuan Nenei a buaipui nge a dah leh daih bawk si. Vanneihsangi chu engtin nge a awm tak ang? Lalpa, a tawk tawh em em lo em ni? 

Kimi ka call leh a, ka kut a khurh nasat em vangin ka hmet fuh lawk thei lo zui. A rawn la ta hram a.

"Nenei a tha em? A thi lo tiraw?" Ka ti tuar tuar a. 

"Tp, inbengdai rawh. Hei a tha e. A lu a thi a, A tha vek aw" dam thlapa a rawn tih takah chuan ka thëp suai suai mai. Ka thaw hawk a. Ka maimichhing a, "Lalpa, ka lawm e" ka ti rilru a. Ka lawm tak tak a ni. 

An buai rih vangin ka dah ta rih a. Zira te an thleng phei ta bawk a, tlemin ka ngaih a ngam tawh bawk. A hnu darkar chanve hnu velah Nenei ngei chuan min lo call ta a. Ka la hlauthawng ru tho mawle.

"U tri" a rawn ti khur dat a. Ka enchim loh, i bula awm ka va chak tak em, i thlabar leh hlauhlawpa i awm lai chuan min mamawh ber thin si a.

"I tha em? Duatte" ka ti vat a. 

"Aw..ka lu hi thui a ngai a, a bak chu ka tha e. I lo hlauthawng viau ni maw?" A ti a. Min ngaihtuah zawk em mawni tih turin a aw chu a nghet charh mai.

"Ngaihtuah lutuk e..i lu chu va thuitir phawt ula, in zawh hunah kan inbe dawn nia" ka ti a. Thui vat vat se ka duh a ni. Ani pawn thuawih takin a dah ve a. An reh ta vang vang rih. Lukira nen kan intext zuai thung a. 

"Zira nen kan hnek ve ve a,a sil ve hlek maithei ni. Tunah chuan in neitu te inah police an nghak e. " a rawn ti a. Ka thaw huai huai mai. A dam chhung zawng jail-ah a hun hmang se ka va ti tak em.

Ka mu chiah tihin Nenei chuan min lo be leh ta a. 

"Ka tha tawh a nia aw. Nachhawkna ka ei a, na pawh ka hre lo" a rawn ti hram hram a. Ka ngaihtuah lutuk ang tih a hlaute chu ka khawngaih letling. Thil thlen dan ka zawt ve leh hrim hrim a. 

"Ka ni Zaui'n a lo bail a niang, a chhuak tih pawh ka hre lo. Tikhan a rawn kal thut sia, Gabby kan inchuh nalamah thutthlenga bakcheh ka dah kha a la a, ka luah a rawn chhun ta a nih kha. Gabby thlabar zia chu aw..Apuia erawh chuan a lo namsawn ve táng táng a, Mami leh U kimi te awm lo se chuan ka thi maithei. " a ti a. 

"Nene, a rang lamin innei ang. Aw..innei mai ang" ka ti hawk. A ngawi dat a.

"Tunah chuan engkim a tha tawh alawm.." A ti ban chhalh a. Ka ngaihtuah luat vangin ka lo hmanhmawh lu deuh tih ka hai lo. Ka bulah ka hmuh phakah awm se ka duh em a ni. 

"A damchhungin táng se ka duh. A nih loh chuan a rawn tibuai leh tho ang che" ka ti a..

"Ni e, chu chu kei pawn ka hlau ve tho. Court-a kala a fate chan a tum tur thu a sawi a. Kha khan min tibuai zawk..u Tri, ka nu a dam tawh si lo va, Court hian Apuia te hi an pe mai ang em?" A ti a. A hlauhthawn hmel ta viau. A naute a hmangaihna chuan ka thinlung a chhun zawk. Heti em ema hmangaihna ngaha amah tiduhdaha retheihna khura hnuk luttu Pu Mawia fate a hmangaih hian hmeichhe sual a nih lohzia a pholang chiang tawk viauin ka hria.

"A thei awm lo em mai. Court pawn an pe lo vang, a nungchangte an enthla ve ang a, naupang enkawl turin an tih ka ring lo" tiin ka hnem a.

"Ni rawh se, Gaby phei hi chuan a hriat pawh a hre lo vang. Hre lo kumkhua se ka duh zawk. Hetiang pa hmingpu ve si, mipa nih tling lo hi an tam ang em le? Tenawm lutuk.

Nenei a that deuh tak vangin ka thaw pik lutuk pawh a zia ta a. Mahse, a tukah ka putea a rawn kal a. Ka nuin nizan lam thil thleng a hrilh ve a niang. A fanu chu a lainat si, a nu fa dangte vanga a tawrh reng chu rem a ti meuh lo niawm tak a ni. " Buangpui, engtin nge maw kan tih ang le? Jail a tang rei awm si lo va, a tibuai leh fo lo'ng maw? Kei ka ngaihtuah riau a nia" tiin min rawn ve a. 

"Ka hrethiam lo, amah chuan ngaihtuahawm ka ni lo chu a tia..mahse, kei pawn ka ngaihtuah khawp mai. Pu Mawia a bawraw sia, Mami tak pawh a ngaihtuahawm" ka ti ve a. 

"I nu phei chuan Mami pawh awm tawh suh se a tia sin" a ti a. 

"Mami a awm loh lehzel phei chuan an ngaihtuahawm lehzual ang. Keimah hi ka zuk awm mai dawn mawni" ka ti phut a. Ka nuin, "I á em mai a" a lo ti hlak a. 

"An in luah khu kan sawntir mai zawk dawn mawni le..pu Mawia zawn hmuh theih lohna turah" ka ti leh a. Ngaihtuahna a buai. 

Putea chuan titak zetin, "Buangpui, nei tawh mai rawh. " a ti zawi ta sup a. Ka pa a lo lut ve chiah, "Eng maw..siampui' a ti a.

" Aa...ka u, Nenei dinhmun a derthawng sia, Buangpuia nen hian innei tawh mai se ka ti mawle..ngaih a ngam lo em mai" a ti ve mai a. Ka lo lai angreng.

"A khai! MA te hi pass phawt teh se..chumi chhung te chuan eng em an ti nang. I pu nen pawh kan sawi dun kha. Nizan thil thlengte ka va hrilh ve a, ani pawh a rilru a nem ta viau mai. MA i pass-a Hna te i neih ve hunah inneih chu kan tithlu ta mai anih kha. Amah Nenei erawh biak leh a tha. Tum dang te pawh a lo nei ve thei. A dawrah te pawh" a ti ta duah a..ka pa chu makti fea melhin,"Pa, ka pu chuan a duh ve tak tak maw?" Ka ti a. Ka zauthau titih. 

"Umm, a tu hmuh hmasak ber i ni bawk a, i rilru tihnat hi a hreh ve em a ni. Bakah amah Nenei dinhmun khuti khu a nia, a khawngaih ve deuh bawk nen.." A ti a. Ka va hlim si em...roomah ka lir lut a, Nenei ka call nghal.

A ring ral ral a. A lu nat vangin dawrah a kal lo tih ka hria. 

Mipa awin,"Hello" a rawn tih rual chuan ka mur uai. 

Mahse ,pangngai takin,"Khaw nge Nenei" ka ti vat a. 

"A mu a. Nakinah lo be leh mai ta che" a ti a. 

"Tu nge i nih?" Ka ti hram..

"Danny-a.." A ti chhum hmuk. Min hre ve tho sia, chutia min be hmuk chu mak ka ti deuh. Ka dah ve ta mai a. Ka thikthu hi a chhiat tak em avang hian ka ngaih a ngam zan lo. 

A hnu darkar chanve velah ka call leh ta a. Nenei chuan a rawn la ta a. A nawmsam loh hmel riau, "I tha vak lo mi!" Ka ti a..

"Aw ka khua a sik deuh a. Hei Danny a rawn kal hlauh a, a zia khawp mai" a ti tham chhal a. Ka awm a nuam lo hle thung si.

Ka pa thusawi chu ka hrilh a. Ka sawi zawhah, "Ngaihdan te i nei em?" Ka ti a. 

A thaw halh a,"Ka hrethiam lo, dinhmunte ka siam chho ve dawn tan chauh sia. " a tih mek laiin, Danny aw khan ,"Nene, tuilum chu ka siam zo aw..va inbual rawh le" a rawn ti lang lang a. Ka tawp chawt.

"Ka va inbual ang e aw" a rawn ti a.

"Aw le" tiin phone ka hmet tawp nghal. Ka duat phak leh khawih theih lohah a awm a. Mipa dangin an duata an enkawl tur chu ka ngaihtuah ngam lo. Ka á mai dawn..bakah inneih pawh a la duh chiah lo tih a lang. Fim takin ka inngaihtuah thei si lo va. Ka na nget nget mai. Nilengin Nenei nen chuan kan inbe lo. Phone ka khawih lo miau a. Amah pawn min rawn be lo bawk. Ka zeldinna leh ngaihruatnain min kaihruai thui telh telh a, ka thin a rim a, ka insehruh a, tihtheih ka nei bawk si lo. Ka hah vek thei. 

Zanriah ei hma ka inbual zo chu Mami'n a lo call a, "U, Nenei i va ngaihsak awm lo ve. Hei a khua a sik reng sia, kan mangang tawp" a rawn ti ta a. Ka bing leh ta mup mai. A lakah titauin ka ngaihsak lo va, ani erawh na tuar leh khawsikin a lo awm char char chu a ni awm sia. 

"Danny kha a la awm em?" Ka ti a.

"Tu Danny maw?" A rawn ti hû! A hre ve lo a nih dawn chu..

"Damdawiin panpui chi a ni lo mi?" Ka ti a.

"Amah hian a duh tlat lo va, ka tha mai ang a tia" a ti a. 

"A van buaithlak e aw. A nat viau chuan kalpui mai r'u aw..mam, tha takin enkawl ang che..ka nau i nih kha" ka'n ti ringawt a. 

Rilru a nuam lo, a pangkhing run mai. Mood that loh nen, Muanpuii leh Mimi an la rawn leng zui. Ka roomah an rawn lut ve si. Helhkam nei run chungin ka lo kawm a. Ka rilru chu luah phak lo dun tak an ni. An ri bawrh bawrh a, Muanpuii chu a bungrua a tan vangin a zin leh lo a lo nia. An nui hawk hawkte chuan ka thaw a tipik..ka phone a ri. 

Rang takin ka la a. "I zia deuh tawh mi?" Ka ti vat a. 

Chauh hmel angreng tak hian,"ka tha e. I mu tawh mi?" A rawn ti a. 

Ring angreng takin Mimi chuan,"Zanin chu kal kan zir dawn a. Lo ngaihtuah suh aw" a ti a. Ka melh rum kher mai. A hun lo lulai em a ni. Nenei chuan zawi sapin,"Zir r'u ,lo kal thei ngei ang che. Mang tha" a rawn ti ta chiah a. A off nghal. Ka tawng chuan ka duh aia nain ka tawng ka hlau a. Ka ngawi tawp. Mimi chu ka hua., ka ngamtlak chu nise ka hau duh ang. Mahni lo maha rilru hah leh buai nak alaiin...Nenei lahin a phone a switch off hmiah bawk si. Ka awmdan leh chetdan chuan a hnar nge ni, Muanpuii te pawh chu rei vak loah an haw ta a. Tukverh hawngin thlifim lo thaw heuh heuh chu ka dawng a. Ka chhing vang vang mai..

Mami ka call a, "Ka lo bia" ka ti bung nghut a.

A pe aniang. 

"Ka rilru a hah tawk tawh asin, thinrim lo teh" ka ti ram hmak a..

"A rim lo, ka ngai em che a, tikhan hmeichhia i awmpui a. Vawiinah nilengin min be lo bawk" taj aw tiau hian a rawn ti a. Ka no nghulh mai.

"Danny khan a lo la kher a nih kha. Tuite i lumtir a, nilengin inawmdun a, eng nge in tih?" Ka ti ta chiam a. Ka lo pai ruk, min kap tlattu kha ka sawi a nih ber chu..

"ENgmah kan ti lo. Ani kha awm lo se a hrehawm ngawt ang, min buaipui vek asin" a rawn ti a.

"Nia, ka buaipui ve thei bawk si lo che a tirw?" Ka ti a. 

"Chutiang zawngin ka sawi lo. I ngaih leh rin ang khan kan awm lo. Nang chuan inleng hmeichhia i nei a,min biak pawh i tum lo" a ti nghat nghat a. 

" Inneih pawh i duh bik hleinem..vawiinah khan nang pawn min rawn be bik em ni? I inbual zawhah te pawh..ka beisei ve asin" ka ti leh hráwk. Ka vin khát viau asin le.

"U Tri,. I dam lova i thin hi a chhe mah mah. Insum rawh. Ka khua a sik a, phone ka khawih peih lo alawm" a rawn ti dam diai a. Ka thèp leh tan tawh.

"Aw. a tha e. Chuan, mahse,Danny kha a rawn kal tawh tur a ni lo , a chiang em?" Ka ti fiak thak a. Ka insangmar nasa hle.

"A tha alawm..ka lo hrilh dawn nia" a ti hmiah. Han thinrim luih ve dawn pawn he nu hi a ngaihna a awm lo. A mak!

Khawsik chung chung pawn lungmuang leh ngaihngam tak chuan min muttir leh ta phawt chu a nia...ka mumangah kan lo innei vel..chuan, ka ke ngeiin ka lo kal..a tak nise ka va ti ëm..

(Tawk rih aw..ka chau 😒