Vanneihsangi 19

VANNEIHSANGI (19)

Ziaktu: Toni Râlte

Hualtu lamah kan haw chho ta vang vang mai. Kan khua ka let leh dan chuan ka lung a va tiawi lo tak e aw. Lungawi loh vanga tûm bûr reng thu a awm si lo. Ka thiante leh chhungkhat te an rawn leng tiam tiam a. Min tuarpui ve khawpin ka hria. Harhvang ve tak, ka haw chang pawha mi tlawh kual ve peih tak kha ka ni si a. Duhsaktu leh khawngaihtu pawh ka ngah ve khawp mai. Ka rilru ngui lutuk tur pawh an tiharh deuh a, a zia khawp mai. Nenei pawh chanchin ka zuk hrilh ve a. Thlen hlim sarhu lai chuan khawhar pawh a la zia e, tin, thian te an rawn lang deuh reng bawk nen. Mahse, kar khat a han liam a, thiante an hman reng tawh bik si lo va, Keimaha hun ka hman chhoh a ngai ta. Kan khua hi kan khua a nih vanga ka fakna lam ni lo se, Thalai awm mai mai hi kan awm ngai lo. Chhunah te phei hi chuan a reh dûk zel a, thalai hnathawk thei chin chu ram lamah an liam sung sung zel, Zirlai naupang leh in nghak pitar putar leh chhangchhenu te an ni deuh ngawt mai. Keini pawh lo lo vah tan a ngaih tawh vangin, Ka nu nen in kan nghak thin. Ka nauten school an tan leh tawh bawk si. A reh thei vawng vawng khawp mai. Nenei lah a buai ve sia, han biak buai chhen kha a nuam si lo. Kan zirtirtu ten material min lo pek hi ka zir zeuh zeuh bawk a. Rilru nguai lutuk leh chawl lutuk a chhawk ve deuh a, a zia ve tho mai. Ei leh in lamah erawh vitamins ka ei nasa bawk a, duh aiin ka rit tlat! Ka kawng hnuai lam a che thei si lo va, ka dulte pawh a kiar ve dawn dawn ta mai. Exer han lak ve vak dan a awm bawk si lo. Mahse, utube lamah te ka en kual a, awmhmunah thu chungin zingkarah ka kawng chin chunglam chu theih ang angin ka ti che ta thin a. A zia chho dawnin ka hria. Ka nu hian ka inbual dawn apiangin ka kawng chin hnuailam chu tuilum chi-alin a hru chhuak dap zel a. A taima thlawt. Kan inawm nitin a ni bawk a, a titi pawh kan titi nasa. Nenei nen kan awmdan engkim pawh zep nei loin ka hrilh vek a, Lehlamah Nenei chu a vah a ni ve bawk a, a fapa bialnu a lo ni bawk si. A tan Nenei chu a hlu zual viau. Putea pawh a rawn lang zauh zauh a. Nenei nen pawh an inbe ve fo mai. Pafa ang tak taka lan rem lo mah se; Nenei pawn a ngaina ve sawt khawp chuan ka hria. Putea zawk hi chuan a thlalak te hi a en reng zel a, a chhuang ve khawp mai. Han tanpui dawn se an ni lam pawh chhawmdawl ngai an ni ve thin si a. Tunah tak chuan Nenei hi chu puih ngai vak niin a lang lo. Amahin dawr a run ve thei a, a dawr man erawh a la ba ve tho nain, a tan chhoh zel chuan a la hlawkpui ang. Amah a felin a kum phu lohin mi biangbiak a thiamin a hawihhawm bawk a, customer pawh a ngah thei viau a niawm e. Sawi tawh angin a tleirawl chhuah atanga thingpui dawra thawk a ni bawk a, eisiam lam video te a en peih bawk nen, a eisiam a tui an ti thei viau. Apuia pawh Tuikual-a private school pakhatah a in admit ve leh a. Nenei nghenga khawsak kha a duh ve bawk si, a school luhnaah Gaby pawh chu luhtir vein nursery a kal ve bek bek a. An unauin an kal dun thei ta bawk a, an banah Nenei dawrah an peng a. Dawr hnung lam pindanah an home work te tiin an unauin an lo in awmtlei a. Nenei dawr khar rualin an haw dam dam thin. Zing dar 5-ah Nenei hi a tho zat zat a, eirawngbawlin, a naute a siam fel leh vek a. An tiffin nen. Dawra a kal pahin a naute chu a thlah nghal a, tichuan dawrah a kal ve chauh thin. Hnathawk hi pathum a ruai mek a. Pakhat eisiamtu ber Pi Tlingi leh a fanu hian dawrah an riahchilh nghal avangin a zia phian. Mipa la naupang lam pakhat hi thleng siltu atan a la bawk a. Amah hi chuan Pi Tlingi siam thiam loh ei in a siam a. A hah thei viau. Pawisa dawn ngai bawk, a indaih vak lo khawp mai. Mahse, ka hrilh angin siam awlsam deuh, chhuanlum mai theih chu zanah in lamah a siam lawk a, zingah a rawlthar chhawr Zitea'n a rawn la thin. Tlemin a zangkhai phah ta deuh e. Zan dar 10 velah hi chuan a chau lutuk hi kan inbiak reng laite hian a lo muthlu thin a, ka thinrim ngai bik lo. A khawsak dinhmun a siam phawt loh chuan kan pahnih tan pawh kawl a eng thei dawn si lo va. A mi chhawr Pi Tlingi leh a fanu tleirawl Sarah te hi Burma mizo an nia, a tir kha chuan an riak thin sia, ka lo hlauthawng deuh a. Mahse, an rinawmin an hnaah an nghet em em a,Nenei chu naupangte mah nise, an zahthiam hle bawk. Dawr kha an zauh ve bawk a. A hmaa an dawr bula eichawp dawr kha an khar tak vangin chu chu luah belhin, Pi Tlingi te nufa mutna tur room an siam a. An cheng a nih mai chu. Amah Pi Tlingi hian zan lamah siam mai theih turin engkim a lo peihfel vek zel bawk. An inhrethiam tawn a, an la hlawhtling ve maithei sin. 

Kei pawh lehkha ka zir loh chuan Phone khawih satliah ringawt loin thawnthu ziah lamah ka peng a, pho chhuak lo mahila ka rilrua thil awmte puangchhuakin, hunawl chu tha takin ka khawhral thin. Vanduai intia mahni inkhawngaihna pawh kha rawn thawh leh chang chu awm mah se, ka inngaihtuah lungpuam vak tawh ngai lo. Zan khat Nenei nen kan inbe zo, ka zun chhuak tih ka hre si lo chu ka lo cheh kawi nuai mai a lo nia. Khumah ka la mu lo hlauh zawk a. Mami'n a rawn tifai malh malh a. Ka va inthlahrung tak. Ka nu chuan,"Diaper hren i ngai anih hi. " a ti a. Puitling diaper hreng thin ka hriatte ka mitthlaah an lo lang a, ka mur uaih. Ka nghilh dup a ni ber. Ka chan ve turah ka lo dah ngai lo asin mawle. Ka zun cheh chuan ka nun thang ve mek lai , a vul chho ve dawn tihin min hnukthla leh ta hawn hawn a. Ka tlaivar ta thak mai. Tukthuan pawh ka ei peih lo. Ka nu chuan min kawm hlim a tum viau naa, tumah ka kawm chak meuh lo a ni e. Roomah ka tawm ngawt ngawt a, ka inngaihtuah a, a changin ka thinrim a, a changin ka tah a chhuak thul. Huatna ten ka khat thul, ka mihringpui thalai harhvang leh hrisel tak tak te chu ka awt a, ka thik bawk . Ka ril a tam ta viau mai a. Mahse, engmah ka ei chak bawk si lo. Ka nu chuan thingpui min rawn pe a, "Chhang ei rawh aw" a ti a. Min khawngaih viaute chu ka thinlung khákna chuan a haw hlur a. 

"Ka duh lo. Engmah ka ei chak lo" ka ti hmuk a. 

"Eng emaw tal i ei a ngai. Chaw i ei bawk si lo" a ti a. 

"tihian ka thi anga a ni mai" ka lo ti hmuk a. A rilru nat dan tur reng reng ka ngaihtuah lo. Keimah chauh ka inngaihtuah a ni. A chhuak a, Nenei a zuk bia a nih ka ring. A chhuah atanga reivak loah Nenei'n min lo call a. A vawikhatna chu ka la duh lo. Mahse, a rawn tihnawn leh takah chuan ka laksak ta hram.."Aw" ka ti hmuk a. 

"ti nge thil i ei duh lo mi?" A ti a. 

"Aw.." Ka ti mai a.

"ei la, U Tri, i fel kha. Ti nge eng nge thleng?" A rawn ti zawi raih a.

"Ka ei chak lo" ka ti ringawt.

"I chak dawn lo sin,ei rawh aw. Tlem tal chu ..ummm" a rawn ti leh ngher ngher a. Pangchang pah si leh min nawr sia thil a sawi hian ka chak lo ve ziah. Mahse,ka inla ngeng rih tlat. 

"Awmzia a awm lo, thil ei pawh. Ka dam rei dawn chuang lo" ka ti hmawk hmawk a. 

Thawk la hawkin,"A mak! A nih chuan ka ei bik lo ang a a ni mai lawm" a rawn ti ve ta hmak mai. 

"Ka ei loh vang maia .." Ka ti sup a. 

"Dam i duh lohte chuan ka dam reng duh bik hleinem. Ka ei dawn lo..i ei loh chuan" a rawn ti fûn si. 

"Aw. A nih ka ei ang ." ka tih rual chuan, "Ka lo vid call ang. I ei lai ka hmu tur a ni" a rawn ti a. 

A dah nghal a. Kar loah a rawn video call nghal. Ka la lo ngam si lo. Ka la ta a, dawrah a thu a, ear phone a vuah bawk. A sam chu a tawn fel leh thlap a, make up a hmang lem lo naa, a va duhawm tak em. Ka dai leh sawng sawng tawh. Ka nu ka ko a, chhang a rawn dah a. Nenei hmuh lai chuan ka ei ta a. Ka ril a tam bawk a. ka eitui leh phian si. 

Ka ei zawhah, "zanriah ei ngei ngei ang che" a rawn ti a. A buai ve bawk nen, a dah ta a. A hmaa ka rilru puthmang dik lo zet zet kha chu vawm bo ang duak a ni leh tawh. Nenei vang chauh pawh hian ka la dam ve hram hram chu a ngaiin ka hria. 

Ka inbual zawhah ka nau nen ka pute inah kan phei a, min nawr phei boh boh mai. Kan khaw kawng hi a tha angreng phian a, chair-a thut pawn a sawt over lo. Ka pute in thlen hma Nu Buangi te dawrah ka nau chuan thil a va lei a, ani hi kan te ber a ni a, a intitlangval ve deuh tan ringawt tawh. Kawngsirah ka lo thu ran a, Nu Buangi'n a lo be ve bawk si a rei ta phian mai. Scooty a rawn tlan a, ka bulah chuan a ding a, ka hawi chhuah chuan kan khaw dawrkai lian fanu Mimi leh a thiannu niawm tak ka la hmuh ngai loh an lo nia. Mimi nen hian hman deuhah kum tawp hman nawm nan tiin kan inzui ve deuh a, mahse, zirna avangin ka awm khat si a, kan inngaihsak zui ta lo a ni. Nula lian lam, thau lek lek a ni a. A hmel erawh a tha viau, a ngo bawk a. Min rawn melh a, "Tp, tu nge i nghah?" A ti a. A thianu chu hâng lam lek lek, hmelfang erawh dik zet mai a ni. Min melh ngun viau chuan ka lai deuh. 

"Hei ka nau ka nghak mawle" ka ti vat a.

"Ka hman veleh ka rawn kan ang che ka ti thin a, inleng innei deuh reng sia, kei lah ka buai ve nen, remchang hmasa berah ka rawn kal ang" a ti siam siam a.

"A tha alawm..hman hi a har ve alawm" ka tih mek laiin ka nau chu a rawn phei a. Mimi te a hmuh chuan, "U Mimi chu i scooty kha a chhia maw ka tia" a ti a. Nui chungin mimi chuan, "Nia, hei chu hei Muanpuii ta a nih hi..ka thiannu a nia, a lo zin ve nih hi" tiin a thiannu chu a melh zauh a. A lo nui ve sáng mai. An tlan a, keini pawh ka pute in lam kan pan leh ta a. 

Ka pu chu a huanah a lo kal leh daih a, a lo la haw lo. Nuteii te nen kan titi mai mai.

"Tihian rawn leng phei ziah rawh. Pawn lam boruak hip zeuh zeuhte hi a tha " Ka pi chuan a ti a. Nuteii pawn a lo zawm ve vat. 

Nuteii te fanu piangtlai deuh, Remremi chuan, "Au Tpa bialnu kha kei chu a hmeltha ka ti." A lo ti zûk zûk a. A thlalak a hmuh ve tawh vang a ni. Ka pi chuan, "Inla tha zel a maw?" A ti a.

"Umm tha ve zel e" ka ti mai a.

"School-a i thawh theih hunah chuan nei daih tawh mai rawh. I nu a khawngaihthlak, tisawn lo lamah pawh feh thei loin a awm che a ngai sia. I pa tak pawh a hah zual alawm" a ti bawrh bawrh a. Ka pi hi chu ngaihtuah hmasa vak lo va thil sawi phawng phawng mi kha a ni ve hrim hrim a. A sawina ki chu ka hriatthiam tho vangin ka la na hran lo. A sawi dik ve bawk a, ka nu khawih loh hi chu ka duh chiah bawk si lo. Ka nu hi tibuai tak chu ka ni. Nupui nei ila chuan ka nu ai a awh vek thei dawn a, ka nu pawh a zangkhai phah ngei ang. Mahse, le Nenei hian min nei duh tak tak kher ang em pawh hriat va ni suh. Amah ka va rin loh lam ni loin , tun dinhmuna min thlauhthlak te chu a hreh ve ang a, a chhan chu an vanduai leh chhiat tawhah a bulah ka awm ve zel avang pawn min rulhletna tur tawk vel chu ka laka tih phawt a duh ve turah ka ngai a. A dinhmunte han siam chhoin han nei ve deuh se, kei enkawl ngai ringawt hi chu min neih a duh kher lo ve thei. Chutiang hun a lo thleng ta a nih pawhin kei chuan ka pawm thlap ang. Tunah chuan amahah beiseina ka la nghah ve tho chu a ngai a ni. 

"Nia, nei vat ang" ka ti teh ngawt a. 

Ka pi bawk chuan,"A pa lah chu zawn chhuah ngaihna a awm ngang si lo a ni maw?" A ti thut a. Ka hamhaih hman alawm le. Nuteii'n ,"Ri phawng phawng zel suh. Zawn chhuah theih nise an zawng hmu vat tawh ang chu.." A lo ti vat a. Ka pi pawh a nui vur vur ringawt. 

"Lehlamah chuan Buangpui, nu leh pa nei lo a nihnaah i chhungte tan hian a la fel ngawtin ania ka rin ni, hetiang fahrah kan tihte hian an nupui pasalte chhung hi an chhungkua ang tak takin an en thin a, an hmangaih thin lutuk asin" min thawidam tum fahranin a ti leh sar sar a. A sawi dik mahna le.

Ka pu a lo hawng a, theitè a rawn hawn nual a, keini pawh min pe ve teuh mai. Khua a tlai lam ta bawk a, kan haw phei ve ta a. Han chhuahvah chang hi chuan tumah hi biak hmasak ka chang ngai lo, min lo be var zel hlawm a, a lawmawmin kei akara min duhsaktu te hi an hlu thin ngawt mai. Zanriah pawh ka bialnuin ei tura min ngenna ang khan ka ei ve leh tak kha..

Kan ei kham zial ka zuk laiin ka pain,"Kar tawpah Aizawl zu kal a ngai a ni. Bawiha damdawi pawh kha a zo dawn tawh lo maw..hlo thlawh chem zuk lei a ngai. Ka chem hman thiam hi Ngura'n mi hawhsak atang khan a dik hleithei lo, len khangte pawh zu en ka duh" a ti nuah nuah a. 

Ka farnu neihchhun Mami chuan, "Taka Pa, Nenei'n Class intan leh hun chu kan inah lo awm daih la, min tia ..ka awm daih dawn mawni ka ti" a lo ti ve hliai a. Nenei nen an inbe nasa thin tih ka hria. 

Ka pa a ner suk, "A khai! A chi dawn mi? Chhungkhat pawh an ni lo va, chutia awm ve ngawt chu. " a ti a. 

"Aman min sawm vang a nia..hostela awm ai chuan a zia zawk ang em aw ka ti mai mai. Hostel fees a to sia" a ti niah niah a. 

Ka nu chuan, "I thu thu ni mai. Amah Nenei tak pawh i lo chhawk zangkhai ve thei zawk ang a, a tan pawh a zia ve dawn em asin" a lo ti thung. Kei erawh ka ngawi reng. A hnua kan inbiakin ka sawi a. 

"Nia, hostel fees a to bakah thiante nen an ni duah sia, lehkha a zir that vak loh thu a sawi a. Ka lo khawngaih deuh mawle..kan khua a har ve tho bawk sia" a ti mai a. 

"A hautak mai mai ang." Ka ti ve tlat a. Mahse, Mami chu zuk awm mah se, pawi tih lohna ka nei tho, a chhan chu ka farnu a awm ve miau chuan Nenei pelhe tur pawh a veng ve thei dawn a. Mipa dang lak atangin min venhimsak ve thei dawn a ni. Chutianga mipa dang kawp tur anga Nnenei ka ngai ringawt pawh chu ka inthiam lo mah zawk. Min phatsan ka hlauhzia ngaihtuahin a hmaa kan dinhmun kha a letling ta thawk niin ka hria. 

 

Ka pa aizawl kal pawn a zuk tlawh ve leh a. Eitur tuihnai zet zet ka tan liau liaua a siam a lo thawn nual mai. He hmeichhia hi aw..sawiselna tur te hi awm ve se ka duh thin. Thikthu han tihchhiatte hi ka chak ve thin ania. A famkim leh lutuk hi ka zo lo lek lek zel. A boring lek lek ka tihna a nia, amah a ninawm lam ni loin kan inngaihzawnna boruak zawk chu a nia ka sawi. Kan inngeihin inhauhna kan nei ngai si lo. Ani lahin thik tur a hre bik bawk si lo. Aa..a tha vek mai e. 

Mimi te thiandun pawn sunday tlaiah min rawn kan ve hlawl mai. Eitur eng emaw a rawn keng nual a, a thiannu Muanpuii tia a sawi pawh a felin a hawihhawm hle. Ka nu chuan a lo dawngsawng tha bawk a. 

Mimi chuan min rawn melhin,"A pawi eee, dam vat la ka ti' a ti sap a. 

"Ni ngawt mai" tih bak sawi tur ka hre lo. 

Sawi tur a váng angreng sia, Muanpuii chu melhin,"Muanpui, kan khua chu nuam i ti em?" Ka ti a. A nui hak a,"Umm, nuam tawp. Infel sia" a ti sap a. 

"Awii a luck lutuk a, kan buai a nih hi. Nizan pawh Lalengkima te an leng rei lutuk a,ka mutsan daih" Mimi chuan a lo ti sawk sawk a. Dam tha pangngai ni ila chuan ngaihzawn vang em em pawh ni loin ka rim ve leh ngei ang. Thingtlangah chuan mikhual hi an to ve thin em a.

."Awihawm loh ee.." muanpuii chuan a lo ti hlak a. Min melh relh relh vang chuan ka awm a nuam vak lo. Mahse, a hnuah, ka ke ka tihnat dan leh chetsual dante min zawt ve a. Ka lo sawi ve mai. "I kea i kal leh theih i ring em?" A ti ta hlawl mai a. Mimi chuan a nghawk zawk, mahse, ka hmu lo der thung.

"Ka hre lo le..Pathian thu thu a ni mai" tiin ka chhang a. 

"Ka sawi chhan chu eng emaw zawngin lo ngai lo ula, Ih maw, ka tet lai ti ila, ka tleirawl chhuah tirh mimi te nen kan la inhriat hma daih hian kei pawh nangmah ang bawk hian ka hnungzáng ruh khawlo vangin ka kal thei bik lo va. Damchhunga mu reng tawh tura inngaiin ka beidawng em em a, tleirawl chhuah, hrisel that vanglai, lerh ve laite kha a lo ni sia. Ka tap ka tap thin alawm. Mahse, ka nu pa ka pu hian zan khat chu a mumangah mi pakhat hi a lo hmu a, 'I tunu hi hnim chi khat zawhte hmai an tih hi a densawm tui intir thim u a, kal te tum chho se, a nulat hunah chuan a ke ngei hian a la kal leh dawn a ni" tiin a lo hrilh a. Mumang mai mai mah nise ka pu chuan a ring ta tlat a. Ka nute ringzo lo chung chung zawhte hmai tui chu min pe ta thin a. Ka lo in ve mai zel. Ka rinna kha ka dampui te pawh a ni maithei. Thla hnih zet ka kal theih tawh loh hnuah ka ke rah ka tum tan a, na pawh engmah hre ngai lo khan ka hre chho a, tikhan zawi zawiin ka pu nen kal kan zir ta a. Thla 4 a liam leh meuh chuan ka kal leh thei ta a ni. Tupawn mak an ti, ka kal leh thei kha..chung vel chu hmannia Mimi'n i chanchin min hrilh khan hrilh ve che ka chak lutuk a, leng ang ka ti tlut tlut a, Mimi phei chuan i ngaizawng te min tih phah vel…" tiin nui deuh sáng chungin a sawi ta mial mial a. Ka nu eirawngbawl pawh a rawn kal hnai vat a, a mitmenga beiseina chu ka va hmu chiang kher mai. 

"Awii! Tak tak em ni? A va mak awm ve" a ti hluai a. Muanpuii bulah a thu nghal.

"Aw tak tak ni e, tun thlengin harsatna ka nei tawh lo. Pathian zarah" a lo ti vat a. Kei atak pawh min thawngin phurna chu min pe chiang khawp mai. Mahse, phur hûrh anga lan ka hreh ve deuh si. Ka pa a lo hawng a, ka nu chuan Muanpuii sawi chu a lo hrilh ve nghal mawlh mawlh. Ka pa pawh chuan Muanpuii chu a han zawt chiang leh deuh a, kei leh Mimi erawh kan lo hawi mai mai ringawt. 

"Zawhte hmai te chu tuikhur thlangah khuan a tam alawm. Zuk lak ve tur a nih chu..khaw nge Mapuia hi le..zuk la nghal teh se" ka pa chuan a ti zung zung a. Hlawhchham ka hlauh luatah, "Pa, inti mak e. Muanpuii nen kan natna a inang ve kher nang" ka lo ti vat a. Mahse, "Inang lo mah se; beidawn nan pawh ei ve chhin hrim hrim la a tha" a ti deuh tlat! 

Muanpuii chuan,"Nia, ei ve chhin la chu ka duh khawp mai. Doctor te pawn kei kha mak an ti alawm. Doctor mah nise ka natna kha an lo hre dik lo ve te pawh a ni thei tho a. Mihring ve tho an nia" a lo ti ve a. Phur ru tho si, beidawn leh hlau si angin ka awm. 

Mimi te hawn hnu chuan ka nu chuan,"Mak deuh mai chu kei i kal leh hi rinna lian tak ka nei tlat zel a. Pathian hnenah pawh ka thlen tawh. Ka beiseina bo thei miah lo chhanna hi Muanpuii hmangin Lalpa'n min pe a ni maithei asin" a ti siam siam a. 

Ka pa pawh chuan, "Chutia i sawi takah chuan kei pawn Bawiha hi a nat hlena a kal loh hlen hi ka lo ring ngai bik miah lo. A mak hle mai. ENgpawhnise, Pathian thu thu a ni a , nang pawh inhlan thar la, ngen ve la. Tihtheih loh a nei hleinem" Tiin min rawn melh a. Awmdan tur thiam a har angreng. Muanpuii thusawi vang chuan ka chhungte beiseina a sang lo thei si lo va, Zawhte hmai chu zuk lain an chhum so phut a, a tui paihin an deng sawm leh ta a. A tui chu sawrin bottle-ah an dah a, chu chu zing leh mut dawnah in tur a ni. A da lup mai a, luak te pawh a tichhuak lek lek, a kha deuh fek bawk nen, zingkar pum ruah lai phei chuan ka uak tuar tuar reng mai. Mahse, rilruah eng emaw a pian ve tlat avang chuan ka tilui hram hram a. Ke pen erawh ka la zir lo. Ka zawi nguai mai si a. Nenei pawn a lo hre ve a, min fuih sauh sauh reng mai.

Mami pawh amahin a duh bakah Nenei'n a lo sawm ve reng vangin class an tan takah chuan an hnenah a awm ve ta a. DIk tak chuan Mami hian Nenei pa dik tak a hriat ve kur vangin kei leh ani inzawmna ai mah chuan, putea fanu a nihna ang zawk hian a ngainat thu leh an inzawmna pawh a thuk zawk thu ka bulah a sawi a ni. Thuruk sawi chhuah theih loh kawltu te hi kan rinawm tlang ve viau e. Mami pawh ka fak khawp mai. Putea zawk hi a insum zo lo lek lek thin a, kan ina a lo len changa Nenei nen kan inbiak hlauh chuan a lo za ve ruai zel, ka nu hian mitmeiin a khap nasa thin. Tin, biak te hi a chak ve thin sia, an inah be thei hek lo, hmun dangah kalsawnin a va be thin a. Chuvang chu a ni mahna, Tuk khat ka piteii a rawn lut hlawl mai a. Ka nu eirawngbawl chu din chilhin, "Siama hian ngaihzawng a nei niin ka hria" a ti ta mai a. Ka pain a chem a tat hriam mek a. 

Ka nu chuan,"Khai aw! Engtin nge ?" A lo ti hluai a. 

Piteii chuan thinrim hmel lek lek hian,"Zan tin deuhthaw hi tu emaw be turin a chhuak ziah a. Zan len hi a ching tawh ngai lo kha a nia. Mahse, hei a hrat leh ta khawp mai. Ka rinhlelhna zawk chu vawi khat Mateii tih hian a lo call a, ka lak khan a tawng duh miah lo, kan pa chuan min rawn hmu a, a thinrim ringawt a. Tun chinah vawikhatmah ka phone hi lo chhang tawh suh min tia. A hmate chuan ka khawihsak bawrh bawrh zel a, whatsapp te pawh. Tunah chuan password te a dah vel a, a mak em mai" a ti ta bawrh bawrh a. Kei chuan a chhan ka hre chiang si. Ka nu pawn a hai hauh si lo. 

Ka pa chuan,"A va mak awm ve aw. Siampuia te chu chutiang a ni ngai mawni le.." A lo ti chuar chuar a. 

Ka nu pawh chuan," Ka lo hau dawn nia, ngah nge chutia a lo awm..zahpuiawm lutuk" a ti hlak hlak a. Piteii pawh a haw ve leh mai. Kan in hi engkim an vuivaina an rawn thlenna a ni ve bawk nen. Chumi ni tlai lamah putea chu a rawn lut ta ngei a. Ka nu chuan a lo hrilh ta vek a. Thawk la hawkin,"Chu chu lawm kan la buai vak ang tih ka hlau thin. Engkim ka hrilh mai dawn mawni aw tih changte ka nei rum rum zel..a pawm thei emaw thei lo emaw" a ti a. 

"Hrilh ta la, a nghawng tur i hria lawm" ka nuin a lo ti ve bawk si. 

"Huiham, a buaithlak a nih hi a. Ka ngaiin ka be ve chak thin si, ka ngaihtuah ve bawk si. Biak tlem deuh ka lo tum dawn nia" putea chuan a ti ta ringawt a. Ka lo khawngaih ru angreng. Sawi chhuak ta vek mai ila, ka pate pawn kei ti hi ka ni tawh mai sia, inneih an rem tih loh em em ka ring vak lo. Mahse, ka nu thu erawh ngaihchan tha ka ti a. Nenei tak hi chuan eng pawh ti ila min hnialna a neih ka ring lem lo. 

Putea pawh chuan a be tlem ta deuh aniang. Piteii pawn engmah a sawi leh ta rih lo. A pasalin tlangval fa a nei tih hria se engtin tak dawngsawng ang maw?! 

Mami leh Nenei te pawh an la cheng dun ve thei zel a. Nenei a zangkhai phah ve a, a zia. A class banah dawrah pengin naupangte a hruai haw a. Rawng a bawl bawk a, Zanah lehkha a zir ve thung a. Kimi te nen pawh an innel tawh viau a niawm e. Ka thiante pawn ka nau a ni bawk a, an lo duatin an lo titlangnel thiam hle. Ka ngaihtuah vak lo. 

"Lulian, ka sawi tur hian a thawng maithei che ni.." Zira chuan a ti te te a. 

."Sawi vat mai teh" ka lo ti a. Nui hak hak chungin,"Pa ka ni ve tawh dawn" a rawn ti ta mai a! Ka au chhuak lo chauh. Kan Lalnunzira chuan fa a nei ve dawn a nih chu. Kimi a rai tihna. 

"Ehe! Ka va lawmpui che ve, Dula, i thei pap pap bik hle mai a. Chuan, engtin nge?" Ka ti duah a. 

"Ka chhungte ka la hrilh chiah lo va. Ka la hrethiam lo. Fa meuh neih dawn chuan an remtih ve mai a ngaih hmel" a rawn ti a. 

"Nia, hrilh vat la, Ka lawmpui takzet che a ni. Sa free ei a chakawm tawh, ti deuh zung zung teh u" ka ti ve sur sur a. Ka nui vur vur bawk. Ni e, thinlung takin ka lawmpui a ni. ENgtikah tak fa nei ve ang i maw?! Ni lo, he lam chu ngaihtuah ka duh rih lo. Ka na leh palh ang. Hlim hun a ni rih e. 

Nenei nen pawh kan sawi dun a, inthlahrun hmel lek lek hian, "Fa i awt ve em?" A tih chuan min dek riau.

"Awt rih chuang lo e. Ka dam phawt loh chuan" ka ti a. 

"Pathian thu thu tiraw?" A ti sap a. 

"Um " ka ti ringawt. Rilru erawh a kal thui viau mai. 

Hun chu a kal ve bek bek a, zawhte hmai an tih pawh chu ka la in ve reng a, hma ka sawn pawh ka hre lem lo. Muanpuii kha Mimi tel lo pawn a rawn leng fo mai a, A va cham rei tawh ka ti rilru mai mai a, mahse, sumdawng a nia, bungrua lain kan khaw chhehvel a lo fang zawk thin a lo nia. Min ngaihtuaha rawn leng lut fo ta na na na chu kan inkawm thei ta viau a. Kan lo inrual chiah bawk nen, kan sawi duhzawng a inan bakah a lo tawnhriat tawh hmangin min fuih mawlh mawlh zel a, ka tan chuan ngainata lo kawm loh theih pawh a ni lo. Ni khat a lo kal pawh ka nuin,"Muanpui, i lo kal remchang sia, kan leipuia ka thing fawmsa ka va phur lawk ang e, i thianpa kha lo awm ve rih lawk ta che" a ti a. 

."aw Va phur rawh, ngaihtuah suh" a lo ti vat a. Vawk hi kan vulh ve nual vangin a chaw chhumna tur thing hi neih ve nual a ngai thin reng a. Ka nu a liam chiah tihin ka bulah a rawn thu a. 

"Hawh, kal zir ang hmiang" a rawn ti ta mai a. A phur nasa mai si. Ka lo melh káwk ringawt. 

"A chi dawn mi? Na pawh ka la hriat loh hi' ka lo ti a. 

" i hre chhawm mai dawn lawm. I nute awm laiin ka sawi ngam si lo va, hawh, ka zirpui ang che" a ti sek sek mai si. Chuti na na na chu tiin ka che cháng ve a. Min lo kuah a, chair atang chuan min kuah tho a, amah rinchhan chuan ka ke chu ka'n rap a. A zawi nguai mai a, ka tlu lek lek mai. Mahse, min lo pawm nghet em a, ka'n rap a, a lek zel. Ka kephah chu a pial ka ti mai. Vawi 5 vel pen tuma ka rah hnuah a inbilh thut a, ka inzo tawh si lo , Muanpuii chu ka bawh thlu ta tawp a, ani pawh khan min chelh nghet zo tawh lo anih dawn kha. Ka lo lianin ka rit ve tawh bawk si. 

"I tha em?" Ka ti vat a. Kan inbawh chiang ropui si, ka tho thei der bawk si lo, a tukhum a sawh avangin a a nat ka ring si. A meng kuau a, min melh ta reng a. 

"i tha em? A na em?" Ka ti leh a. A nui ta hawk a, thawh pawh tum ta chuang lo chuan,"I va rit ve" a ti a. Ka lo nui ve ringawt.

"Ka tho thei miah lo a nia. Engtin nge niang?" Ka ti a. A che hrut a, ka darah a rawn kuah a, tal chhuaha keimah chu min kaihthawh leh a tum niin ka hria. Chutia kan tal dun lai tak chuan kawngka chu rawn inhawng thutin, "U, Surprise.." Ka nau aw ka hriat rual chuan ka hawi chhuak vat. Ni lo, Ka farnu hnungah chuan Nenei leh a naute an lo ding ve reng mai! Khai..Nenei hmela maktihna leh rapthlak tihna chu ka han hmuh hmaih lo chiang hle bawk. Ka nau pawn tawng nachang hre loin kan pahnih chuan min melh dun ngat ngat. 

"Hei..kan tlu a, Mam, min lo pui teh" ka ti tham tuak a. A che ve ta chauh. Muanpuii lah a ngawi hmak tawh si. Kei chu Mami chuan min kai tho a, chairah min thuttir ta a. Muanpuii chuan a sam tuai thain,"Lehpekah chuan kan tithei tawh ang. I nau te mi?" Nelawm takin a ti a. 

Nenei leh a naute chu kimki zetin thutthlengah chuan an thu a. Ka melh hreh tlat anih chu! Thil tisual niawm ang hrimin ka ti (tri) tlat! Ka lungphu lah a rang si. 

"Aw. Ka naute" ka ti nghut a. Ka awmdan chu tu tan maha hai chi ni mawlh hek lo, Muanpuii chuan nuam a ti lo nge, "Ahh..ih, i u nen kal kan lo zir a, a tlu a.." A ti niah a. Ka khawngaih ta thut a. "Muanpui, ka la beidawng lo a nia aw ..kan zir leh dawn nia. I fel thin e" ka ti ta a. Ani pawh a hlim leh thei ta. 

Nenei chu ka va melh a,"Sawi lawk tur alawm. ." ka ti sup a. 

Mami zawk chuan,"Rawn thawn thut che kan duh sia, ANu te chuan an hre vek. Weekend kan lo hmang lawk dawn anih hi" a lo ti nghal mawlh mawlh a. Ka chil ka lem khawlh. 

Zahzelah,"Apui, kan khua chu a nuam em? Ehe! bibi pawh a va lian tawh ve" ka ti luam a. Nenei nui hmel ka hmuh phah lem hlei lo va. Ka beisei aiin Apuia pawh a zum tawh loin Atea thih tirh lai ang kha a ni tawh lo. Gaby pawh a lo lian ve tawhin tawng lah chu a thiam nasa tawh mai. Muanpuii chuan kan boruak chu a hrethiam ve nge , "I naute an lo thleng tawh tho sia, ka va phei tawh ang e. Kan zir leh vat dawn nia" a ti a..a chhuak zui nghal. 

Mami'n tu nge tih min zawt a. Ka hrilh a, "Tawnhriat nei tawh a ni bawk a, in inzirtir kal har dawn loh kha" Nenei chuan a ti nghat a. Ka nau pawh a ngawi reng. A hmelhmaiah a lungawi lo tih a lang chiang si. A va buaithlak e aw. Mami a fel hlauh a, naupangte chu roomah hruai lutin an bag te pawh a dah fel sawk sawk a. "Nene, va inbual phawt la,i zawhah ka ti ang" a ti lang lang a. A bawp khawkherhin min melh chungin a thu a, a chechang eih lo. Kei lahin han tih vak ngaihna ka hre si lo . Min rawn hmuh dan kha a lungawithlak loh ve bawk em a ni. Mahse, min rin dan ang ka nih lohzia erawh ka sawifiah ngei a tul dawn ani. An lo kal ka lawm tehlul nen, ka lawm tur ang pawn ka lawm thei lo. Naupang pahnihte chu Mami'n a bual fai vek a. A fel ania ka farnu hi chu. Ka nu pawh a rawn haw ve ta a. Hre lawk vek tawh a ni bawk a, mak a ti lem lo. Nenei leh kei inmelh ralh ralh reng a hmuh takah erawh thil dik lo a awm tih hriain min zawt a. Ka sawi ta vek a. Ka nu pawh chuan, "Nia, Nene, Muanpuii hi a fel ngawt asin. Tihian a remchan apiangin a rawn kan reng a, kei pwn ka fak viau asin. I rin dan ang an ni lo" a ti ve luam a.

"An inngaizawng ka ti lo, kha nu nen khera kal zir kha a tulna ka hre lo." A ti chang fak mai. Ka nu pawh a ngawi daih. 

"ENgmah a awm lo, kan inkarah. I lo zin a ka lawm nen, thinrim tawh lo teh" ka lo ti vat a. Rum zeta min melhin,"Hmeichhe lawm lutuk" a ti hlak a..inbual turin a insingsa ta a. Ka nu nen kan innuih ringawt. Ka pa leh ka naute pawh an rawn haw ta a. Ka nau te hi chuan an vawikhat hmuhna a ni a, mahse, , kan in chhungah a hming lamrik a ni zing tawh a. An nel ve nghal maiin ka hria. Nau lawm ta reng reng kan ni bawk a, Gaby pawh an chhawnchhaih thiam kher mai. Nenei a ngheng reng hauh lo. Apuia pawh putea fapa te ber Tetea nen an inkawm chawt mai. A tha vek e. Kei leh ka bialnu inkar tih loh chu. Dar 8 velah ka roomah kan awm dun a. Ka phone a khawih malh malh. Keiin ka lo thlir reng ringawt. ENgmah rinhlelh tur a hmu lo turah ka ngai. Biak ka ngah lo bawk a. Mahse, Muanpuii nen nizan lama kan inbiak uanna chu a rawn chham ta zat zat mai le..

"I kal theih veleh thil min lei ang" muanpuii'n a ti a. 

 

Keiin, "Eng nge i duh?" Ka ti a. 

Muanpuii chuan, "I thinlung han ti mai ila..tak taka kal ve thei tawh la, kan hringnun inan turzia hi" a rawn ti duah a ..kei lah chuan uangthuang zetin,"Han innei ta mai ila..kan chak nupa dun awm" ka lo ti a. Chung thu chu a nia. Vanneihsangi chuan a lak nata a thinrimpui ni. 

"Ani kha neih i va chak awm ve..nei rawh. Va nei nghal rawh" a ti hmarh hmarh a. Ka thinrim ve bawk si lo, ka nuihte pawh a za zawk. A kutah ka va chelh a, "Duatte, duhtawk tawh la..ani kha chu ka thian, ka that leh min duhpui em emtu alawm..nang pawn hrechiang la i ngaina viau ang" ka ti a. 

"Kal teh, inngaizawng si lo hi thian tak tak a nih theih loh. Tu emaw zawkin an ngaizawng ru tho tho. Ti nge a ngaihtuah ve em em che? Mikhual lehnghal..chhan a awm ani mai. Tikhan ka awm si lo va, in inhmu zing tial tial ang a, nang pawn i ngaina chho zel ang a. A tawpah in inngaizawng daih ang" a ti bawrh bawrh a. A sawi chu a dikna chen pawh a awm mahna le..

"A mak! Nupui nei tawhah ka inngai .bakah kei ang kal pawh kal thei lo chu min duh teuh lo..i a em mai" tiin a tal aih aih chu ka chelh bet a. Fiah zeta min melhin a tal ta lo va, Zawi leh titak zet hian,"U Tri, hmeichhe dangin an khawih ringawt che pawh hi ka hmu thei lo alawm..i hrethiam lo mi?" A ti ta a. Min dek lutuk. Ka pawt lawp a, ka kuah ta vawng vawng a. A mittui a tling piau zui. He hmeichhia hi tihnat a awlsam dawn hle mai. 

"Ka tihpalh, amah khan zir ang a ti tlat a, ka lo chak ve tho nen ka lo pawm ta mai anih kha. Ka zir tawh lo vang, nangmah nen kan la zir dawn nia" ka ti mawlh mawlh a. Nghet zetin min rawn kuah a, kan ngawi dun vang vang mai. 

Mami nau chiah Nunpuia roomah Nenei leh a naute chu an mu a. Nunpuia chu ka pute in lamah a riak phei daih. Ani hi lerh ve riau e ti lo chuan a zakzum riau a. Nenei te awm chhung chu ka pute inah a chenkual leh reng ka ring mah zawk. Mapuia erawh Nenei nen an innelin an inkawmngeih hle. A tukah zing karah Nenei chuan ka lu kir buk ve angreng tawh tak chu a thawlh vek a, ka khabe leh hmuihmul te chu a met fai vek. "Dam loh pawn hmuh nuam taka awm tur" a ti mai a. Kei tak pawh ka harh hawkin ka hria. Mi dangho chu Ka pa hoin kan huanah dil sangha te man paha kal an tum a, Nenei erawh chuan,"Ka lo awm ang e. Thenkhatte nen kal an zir leh palh ang" a ti..ngeiawm ve thei siah. Apuia leh Gaby chenin an kal vek. Gaby chu kal ve lo mai se ka duh nen,Mapuia'n ,"Ka paw zel mai ang" a ti deuh tlat. Naupang ngaina tak ka nau hian a duat viau dawn e. A tha. 

An kal diak takah chuan a reh hle. "Roomah awm ang" ka ti a. Zingkarah in an tifel vek tawh bawk si. Kawngkapui kalhin roomah kan innawr lut daih. Khumah ka thu a, ani pawh min ngheng chialin a rawn thu ve a. 

Ka'n fawp leh thawr phawt a. Nizan lamah kan infawp rei hman si lo. Kan duhthawh dun hiam hiam teh e. Khuma mu dun chung chuan hnai takah kan inen a, kal thei lo wheel chair-a thu thin ka ni tih hriatreng hi a va har zawk si em...he hmeichhia hi ka neih loh chuan ka nun chu khawharna hlirin a khat ta ve ang. 

Pubg a lo nei ve chu niin, Apuia'n a lo khel thin a lo nia. Tihtur awm ta hek lo, kan inzirtir ta a. Kan va nui nasa tak. Ka dam loh atanga ka la nuih hnem ber a niawm e, Frying pan nen ka bulah a tlan ve teng teng zel a, a inher thiam bawk si lo. A inher dawn chuan a taksa zawng zawng a inher a, khum pawh a chuar nasa. A va nuam dangdai si ëm..chhunah a thingpui lum sial tak ka in leh thei ta bawk. Tiang hi ni nitin mai se aw..

Ka pa te pawh an rawn haw har lo va, an rawn hlim haw ngei mai. Sangha lah a lo lian tawh bawk a. Ka nu leh Nenei'n rawng an bawl a. An titi dun siam siam hmuhte chu thil hrehawm tak a va ni lo chiang tak..Zanriah kan ei kham hlim ka nu te thingpui háng luma Nenei a chet lai takin Piteii a rawn lut a. "Siama a rawn kal na nge?" A ti a. Putea kha nizanah a rawn kal zuai a, a insum theih a inrin loh vangin a chhuak leh vut kha a nia. Nenei thingpui háng rawn chawi phei chu Piteii chuan ngunthluk fahrana melhin a meng lian kher mai. Nenei pawn mak ti angreng deuhin a melh ve a. Piteii chuan a kut zungchala Nenei chu kawk vahin, "Nang hi Siama bialnu, a biak thin kha i ni chiang mai. I thlalak hi ka hmu tawh alawm..siama phone-ah" a ti ta mai le! 

Ka nu thawh rualin Nenei biang a ri thawk..piteii kut chu a va ram deuh mah mah mawle aw. Thil nih dan dik tak hre hawt si lo, ka bialnu hian mi kut thlawn a tawrh fo ka phal hleinem. "Piteee.. " ka ti tuar a. 

Nenei erawh la hamhaih tak a ni. 

Ka nu tawng hma chuan,"Ani kha Putea bialnu a ni awzawng lo, ka bialnu ka nupui hual a nih kha.." Ka ti nghek a. Piteii chuan min rawn melhin,"Engvangin nge i putea nen an inbiak thin si a?" A ti chang ta fak a. 

Ka nu chuan ,"A chhan chu i pasal fanu a ni miau alawm" a lo ti dam thlap a. Ka pa ka va melh chuan a thingpui in lai dah meuhin, Nenei leh piteii chu a melh a, chutah zawimuangin keimah chu min rawn melh leh ta chat a…

(Intan hian ka va thawkrim si em..ka buai vezia leh hun awl ka neih lohzia hria ula, min khawngaih ve tho ka ring. Bialpa neiha biak ve hiam hiamte hi ka chak ve..🥺😒