Vanneihsangi 18

VANNEIHSANGI (18)

Ziaktu: Toni Râlte

Ka harh leh chuan ka lo mu a. A eng lutuk chu ka meng tha ngam lo. Na ka neih ka hre lo a, mahse, bawm tawt zeta hnawh luh ang mai hian ka chëpin ka hria. Ka meng lui hram hram a, ka mit ka khap sek sek bawk. Mi pathum niawm tak ka han hmu a. Zawi zawiin ka meng fiah ve ta tial tial a. Ka awmna chu ceiling var tak hnuai leh lian tak a nih avangin damdawiin a nih ka ring. Bolero ka va den dawt kha ka hrechhuak nghal ta bawk a. Ka thi lo chu a nih awm hi! Min kila lo thute chu ka han melh hram hram a, ka nu leh pa leh nuteii niin ka hria. Ka nu aw ka hre zui ta bawk. "Bawiha, i lo harh tawh maw..ka va lawm tak em" a ti tiau a. Ka beng hriatna leh ka khawhmuh a la fiah avang chuan ka accident na vak lo mawni ka ti hman a. 

Mahse, "Ni 4 zet chu tihian nikhaw hre loin i mu tawh asin. " tih pahin ka nu chuan ka chal a rawn dek a. A kut chu a vawt thler mai. Tawng ka tum a, ka aw a phui vek. Ka aw chu a chhuak thei lo a nih ber mai chu. Ka pa chuan min hrethiam takin, "Tawng rih lo mai rawh aw..i chau lutuk ang" a lo ti vat a. Chet ka tum a, sawi tawh ang khan ka engmah chu ka tiche thei lo. Bawm tawt takah hmun awl reng reng awm lo khawpa hnawh luih ka inchan ber mai. Ka lu pawh chu ka her kual hleithei lo. Ka na viau em mawni le? Na engmah ka hre bawk si lo. 

Ka mitmenga ka zawhna chu ka pa chuan a chhiar thiam a nih ka ring. A aw thian kharhin, "I chesual kha i na viau mai a. I ke dinglam a tliak a, i ban veilam a auh bawk a. Chuan,.." tiin a ngawi dat a. Ka lo melh reng ringawt. Sawi harsa tih hmel zet hian, "I hnungzáng ruh hi a khaw lo deuh a, i kawng hnuai lam hi a che thei lo a" a ti ta a. Ka chhing sawk mai. Ka zeng dawn a maw?! Ka damchhungin ka ke hmangin ka kal thei tawh lo vang maw?! Ni lo, ti nge ka thih mai zawk loh? Ti nge ka la dam ? Chutiang tehhrepa nun hman ai chuan thi ila ka chhungte tan pawh a tha zawk. Ka tawng chhuak thei lo naa, au vak chakin ka ang a, mahse, eng ri mah a chhuak thei si lo. Ka nu chuan mittui tling pam chungin min melh ngawih ngawih a, a mitmenga beidawnna pawh chu ka han hmu theiin ka hria. Ka pa erawh a intipachang thei viau mai. Nuteii pawn a muttui a hru fap fap mai. 

Ka harh chhuah atanga ni 2-naah ka thiante leh Nenei te hmel ka hmu leh ta a. Doctorin hmuh min phalsak tawh vang zawk a ni. Nitin an lo kal zawk a, ka la harh loh bakah ka harh tawh hnuah pawh doctorin min hmuh a la remti chiah lo va, chuvanga hmu thei lawk lo ka ni. Ka tawng chhuak thei ve tawh a. Ka thiante hmel ka hmuh chuan mipa e ti lo chuan ka tah a chhuak a, awrawl tawp tawpa tah hawm hawm ka chak takzet. Nenei ka hmu leh ngat phei chu awrawl chhuah si loin ka biangah mittui a luang zung zung mai. Ani pawh a insum zo lo nge a mittui khap sak sak chungin a nui lui hram hram a. Lukira leh Zira pawh an ngui nghiai mai. 

"A pawi em mai, Bawiha, dam vat rawh. Pathian khawngaihna i dawng a, i boral lo a, kan lawmzia hi" Zira chuan a ti a. 

Ka heh ka lo pet ringawt. Lukira pawh chuan,"Nia, i dam vat turah ngai ang. Class tan hmaa i that a ngai" a lo ti ve a. Nenei erawh a ngawi reng. 

"Kei chu ka piangsual tawh alawm" ka ti sup a. Ka aw chu a ri chang chang mai. Zira chuan, "A awihawm loh e, tu nge piangsual ti che. I piangsual dawn awkawng lo, i kal leh vat dawn alawm" a lo ti vat a. Ka kawng hnuai lam che thei lo chu an hre ve tawh tih a lang mai. 

"Hetiang ai chuan thi ila a tha tur" ka ti ro halh a. Lukira chuan, "Chutiang sawi suh. Kan kal ho leh dial dial dawn alawm. Beidawng suh aw .." a lo ti a. Nenei pawh chuan, "U Tri, beidawng miah suh. I tha leh dawn tih ka chiang alawm. I tan kan awm reng aw" a lo ti ve seuh deuh a. A hmel chu ka han melh táwk táwk a. Min lainatzia ka han hmu thei. Keimah ka inlainat ai mahin amah chu ka lainat lehchhawng a. Keimaha innghat ve em em, a hmalam hun pawh ka kuta daha beiseitu chu ka duh vang ni miah lo va ka phatsan a ngai dawn ta si a..engtin nge a nun a hman zel ang le..sawi tur pawh ka hre lo, ka thiante ka tihrilhhai tih ka hria ,mahse, pachang taka awm kha harsa ka ti em a ni. Ka rilru a fim vek tawh si a.

 A hnua ka nu ten an sawi leh danin, Khatia ka va inbarh lut kha ka vanneih asiamin min chil lo hlauh a. Mahse, ka va inpaih nat em vang khan nikhua ka hre lo zui nghal a. Ka thianten rang taka min bawihsawmin Bolero chuan damdawiin min panpui nghal a. Ka chhungte pawh biain Nenei leh Kimi te unau an thleng phei ta bawk a. Nenei tak chu a khurh nasat em vangin eng han tithei chi a ni lo va. Ka nu te an zuk thlen pawn kil khatah a lo thu chawrh chawrh rimgawt a niawm e. Min zai chhung zawngte chuan tui pawh in loin ngawi rengin min lo nghak ngat ngat mai a ni. Ka chesual tih hria ka hmelhriatte bakah kan khaw lam mite tawngtaisakna ka dawng nasa a. Ka nu pawn, "Pathian ringtute dilsakna zar i zo a nih hi" a ti hial nghe nghe. Ka thih loh kha ka thiante ngei pawn an lo ring tawh lo. An thla a phang takzet a ni. Mahse, ka dam a, ni lo, ka la thaw ve naa, ka damchhunga wheelchair-a ka hun ka hmang tawh tur chuan thihna nen inang rengin min nghaisa tho si a ni. Doctorin a sawi dan dik takin,"Kea a kal leh theih a rinawm tawh lo va, a taksa dang erawh sawiselna tur a awm lo. Phai lam pawh ka refer lo law law ang che u. A nihna hi pawm thiam se huaisen takin hmachhawn rawh se" tiin. Tun dinhmunah chuan ka pawm thei lo bur..ni e, tlangval chak vanglai, thaza rual lek, Pathian zara hrisel ve tak, thothang tha tak ka ni. Chu mai a ni lo, ka chhungte innghahna leh an beisei, zirlai naupang ka ni bawk. Bialnu keimahah innghat pumhlum tawp leh a naute an la awm chëu! Engtin nge hetiang hian ka chungah ro a rel theih? Ni e, Zu la haw kan ni. Thil tha ti tura kal kan ni lo va, chuvanga min hremte pawh a ni mahna. Zu that lohzia pholanna hmanruaa min hman a tum te pawh a niang e. Mahse, a engahmah eng chhuanlam mah ka pawm ve thei si lo. Ka beidawng a, ka insit a, phurrit la ni mai tur niin ka inhria a. Chhungte buaipui ngai, tuamhlawm leh vil ngai ni tura dam ai chuan, ralin bo law law ila ka lakah beidawng law law zawk se an tan pawh a nuam zawk tur… Ka chhungril natna leh tawrhna chuan min vaw chau zawk a. Ka harhchhuak an lawm tehlul nen, ka muthilh lai khan ka hahdam daih zawk. Chaw pangngai ei phalsak ka nih hnuah pawh ka ei thei lo va, ka kaah engmah a tui si lo. Tui erawh zawng ka in ve. Tihian engmah ei lo ila ka rawih ral ve mai ang tiin ka ngaihtuah a. Min nawrluiin min ngen eltiang mah se; Chaw chu ka ei duh ta lo. Ka chhungte an mangang a, Doctor pawn min kawm tawh. Ka thinlung a sak tulh tulh bawk si. Ka nu phei chu a tap a tap a niawm e. Tin, Nenei phei chu ka hmu duh ta miah lo va. Rilru harhfim kekkawka ka ngaihtuah hnuah hmu tawh lo turin thutlukna ka siam ta a ni. A beiseina awmchhun ka hetih tak avangin a tana phurrit nih ai chuan kalbo se, mipa dang tawng se ka duh a. Na ti leh mahni inhrem chungin min hmu chak ngawih ngawihtu chu lehlam ka hawisanin a zawhna ka chhansak ta ngai lo. Damdawiina thla dawn kan awm chhung khan min hmu turin ni khat danah te a rawn kal ziah a, beidawngin a haw leh thin. Ka thianten min hauin ka chhungten Nenei an khawngaih em vangin min zilh thin bawk. Mahse, mipa taka ka thutlukna siam ve hi bawhpelh ka tum lo, ka tan ka ti lo va, amah Vanneihsangi tana ka tihtheih awmchhun a nih vang zawk a ni. A ngaih erawh ka va ngai thin tehlul em..! A kut dam leh nel thep te khan ka hliamah te hian chulin, min ngaihzia tawh thute kha sawi leh sep sep se..ka dam sawng sawng dawn tih ka hai lo. Mahse, Inzawmna la neihpui zelin la vuan zel ila, a dinhmun ka hria a, amah pawh buaipui ngai a nih mek laia kei a bialpa buaipui leh bawihsawm ngai nih kha hmangaihtu thinlung atang chuan tihtawpa pawhchah vek duhna a lian lo thei lo a ni e. 

Chutianga ka awm tak tlat siah chuan Nenei chu a beidawn mai ka rin nen, a la rawn kal reng tho a, eitur min la rawn kensak ziah tho! A hmaa a lo sawi tawh ang khan U Zikpuii dawr chu instalment-in a leisak a. Hnathawk ngaite vek kha chhawr lehin, ama pualin dawr a nei ve ta bawk a. A khawsak pawh a nuam turah ngai ang. Apuia pawh hostelah a lut leh tawh bawk. Ni khat ka nuin tuiluma min hrukfai laiin a rawn lut leh a. Lehlam ka hawi nghal vat. Mahse, tumruh zetin ka hawina lamah a rawn ding ta chat a. Ka mita melh ran chungin,"Mipa huaisen tak i ni emaw ka lo tia" a ti ta a. Ka chil ka lem khawlh. Ka nu chuan min hru zo thawkhat tawh bawk a, a chhuak ta rih a. 

"U Tri, ka hria. Hetia i awm chhan hi, min pehhel i tum zel vang hian engkim a that i ring mi?" A ti leh a. Tun tum chu ni dang ang lo takin min hawnsan leh mai mai kha a tum hmel loh tlat. 

"Hei hi kawng awmchhun a nia lawm" ka ti ram hmak a. 

A nui hawk. "I va dawihzep em em ve. Kei aiin i upa a, mipa i la ni zui! Min tluk miah lo. Kei chuan ka nu leh ka nau ka chân tawh a, ka beidawng ve tawh em? Nang ang hian dawihzep takin thih ka tum ve tawh ngai em? Nangmah vangin ka beidawng ngai lo va, ka ring che a, hei chen kan kal tawh. Ka thianghlimna pawh ka hlan tawh che. Heti ringawt hian kan tawp ang maw?" A ti khur ta dat dat a. A lungchhia tih chu a awrawl atang pawn ka hre thei. Amah chu en loh hram hram tumin, "Kan dinhmun a inang ve lo" ka ti nghut a.

"Nang phei chuan nu leh pa, unau i la nei a. An hmangaihin i dam an duh em em a. Ti nge hetia i awm tlat a?! u tri, i damchhungin kea kal leh thei tawh lo turah i inngai ringawt a. Beiseina nei ta che" a tih zawh rual chuan, "A tawk, ka kal thei tawh dawn lo, a chiang em?" Ka ti vin tuar a. Ani pawh a phu deuh zawk. Ka thisen zám a pawng tawlh tawlh a. Ka hmai pawh a sen vekin ka ring. 

Min lainat tih hriat ngawih ngawiha min melhte chuan ka thin a tirim tlat! Khawngaih leh lainat nih ka duh lo. Mahse, ka dinhmun vangin chu chu ka chantawk tih ka hre si, ka pawm thei thlawt lo chuan ná min siamsak leh lo thei lo. 

"Haw rawh. Rawn kal leh tawh ngai suh, mipa dang nangmah hmangaiha nuam taka awmtir thei che tawng la, kei chu thi tawhah min ngai rawh" ka ti hmuk hmuk a. Harsa ka tihzia erawh a hre ve ang em le? Ka kut humruh chu dimtein a rawn chul a, ka kut chungah chuan a mittui a far ta a. A inhnit hraih a. 

"Ka kalsan dawn lo che. Min mamawh alawm..tiang hian awm tawh suh, khawngaihtakin" tiin mittui luang chungin min rawn melh ngawih ngawih a. Ka hrawk a táwt, sawi mai tur ka haihchham bawk. Keimahah chuan thil pahnih an insual a. Chu ringawt pawh chu tawrh hrehawm a ni. Pakhat chu a nëm a, pakhat erawh a khauh thung. A nem zawk chuan ka hmangaih leh ka chhungkuate ka mamawh tih min hrilh chamchi a, an duh anga awma dam tuma beiseina nei turin min tur ve thin. Mahse, a khauh zawk hi a chak em a, ani hi chuan engkim thihsana muthilhbosan daihtir min duh thung. Hmalam hun eng ka nei lo tih min hrilh chamchi a, ka hmangaihte pawh hnawl fai veka keimaha awm turin min nawr thin. Eng chu nge dika dik lo ka thliar thei lo va, mahni hma sial taka mi dang tana phurrit nih ka hlauh rualin min hmangaihtute mita mittui chu en harsa ka ti bawk si. Ka hringnun tehhrep chu aw..

"Nene, ka hmangaih vang zawk chein ka sawi. Damdawiin hi chhuahsan mah ila, Aizawlah ka awm thei tawh dawn lo, zirna ka bansan a tul dawn bawk. Chhugte tuamhlawm ngaiin kan khuaah ka damchhung hun ka hmang tawh dawn. Chumi harsatnaa kaihluh ve che chu ka duh lo. I hriat kha, ni e, ka ngaiin ka thlahlel che. Mahse, ka thutlukna hi min pawmsak la, ka dam zawk ang. " ka ti ta a. Ka sawi chhung zawngin chhuat lam ka bih thung. A mitah ka en ngam hlawl lo a ni ber. Ka mamawh takzet a, min kuahin min buaipui se tih ka duh hluah hluah. Mahse, hlim a phu ve tawh, khawvel tharah mi dang nen an invawn a tul tlat zawk a ni. 

"Ti nge dawt i sawi reng a. Min mamawh ka tih chu..u Tri, kalsan tur che chuan min nawr tawh suh. Ka ti dawn lo" a ti chang fak a. A lung a awi vak tawh lo tih ka hria. Ka nu a lo lut a. 

"Nu, he nu hi hawntir teh. A hmel hi ka hmu duh tawh lo. Lo kaltir tawh suh" ka lo ti vat a. Ka nu pawh a na tih ka hai lo. Ka maimichhin tak tlat avang chuan Nenei pawh chu ngawi rengin a haw ta a. A beidawn erawh ka ring lo, ni lo, beidawng turin ka la phal chuang lo. A sawi dik, kei hi mi dawihzep ka lo ni. 

"Bawiha, ani khan a hmangaih takzet che asin. Hetianga awm hi chu tha ka va ti lo e aw" ka nu chuan a ti a. Ka banpuam te tawh tak chu lek kangin ka en reng a, "Hlim a phu ve tawh alawm" ka ti zawi raih a. Ka nu mitmengah erawh a hrethiam lo tih a lang. 

Zanah ka nuteii a lo riak thung a. Ka nuteii ka tih hian ka nu nau ni loin ka patea nupui ka sawina zel tih kha lo hria ula, ka nu nau ka nuteii te chu Chhim lamah an pa hna avangin an awm daih a, hmuh pawh kan inhmu khat angreng. Nuteii chuan min fuih leh malh malh a. Ka nu ang chiaha ka ngainat leh nel a ni bawk a, ka nu bula ka sawi hreh tam tak pawh a bulah ka thlen a. Nenei chungchang thlengin..

"Tunah chuan i thil ei that loh vanga i taksa chau.hi a ni tawh mai a. I hliam dang chu a dam vek tawh. I ke pawh tha takin an zawmsak che a, rah ngam a la ni lo tih mai a ni. I beidawng hma ve deuh bawk a ni. I zirlai pawh i chhunzawm dawn, i pain a sawi tlat. I thiante an inhuam bawk a. Exam vawi khat chiah i hmabak tawh a. I bansan thiang lo. I pass a nihte chuan kan khuaah Higherah i thawk ve ang a, kea i kal thei ta lo a nih pawhin i thawk vek thei tho, chutiang tala beiseina chu neih tum rawh. Bawiha, i nu leh pate hi tibeidawng suh. I beidawng hmel avang hian an na a, i nu phei chu zan tin a la tap ania aw. Kha chen rim takin u zirna atan tiin an thawk a, tunah i kal theih loh dawn vang maiin an beiseina tichhe suh. Mipa takin awm rawh. Chu chu Pathianin a damtir leh chhan che pawh a ni ngei ang" a tih dap dap chuan min fan hneh viau mai. Ngaihtuahna hi chu ka seng fo a. Mahse, a tawpah beidawnna bawkin min lem pil leh thin. 

Nuteii muthilh hnu pawh chuan ka inngaihtuah zui nasa a. Ka nu leh pate hmel, hna an thawh nasat vanga an kum aia lang upa tawh, an hmel thu thatte ka han mitthla a. Ka na zawk zawk mai. Ka dam nan tiin tunah pawh cheng tam an seng tawh a, chhung leh khatte inkhawrhin zah pawh sawi loin an dil kual a. Heti taka ka damna duha ka la thâwk ve hram hram duhtu te hi ka tibeidawng ang maw?! Tawngkam na leh chang taka biain hlim hmel pawh ka hmuh ngai lo tluk a ni si a. Ka va tina dawn tak em..ka a thaw ve an lawm dawn tehlul nen. Chumi zan chuan ka harh thar ti mai ang. A thim zawnga thlir lui ngat ngat thin khan a eng zawngin ka thlir chho tan a. Ni e, kal thei dawn lo mah ila, MA hi ka pass ve hram chuan kan khaw HSS-ah min chhawr duhte a nih chuan ka thawk ve ang a, chhungte chawmhlawm ringawt ni loin thawh chhuah tlem ka neih ve khan ka nun pawh a nuamin a zangkhai ve thei ang. Ka chhungkaw bulah hun ka hmang thei bawk ang a. Aw le, engvangin nge chu khawvel, ka chhungkuate hlimna tur kawngka chu ka hawnsak mai loh ang? A vawi hnih nan thutlukna ka siam leh ta a. Ka dam chhuak ang tiin. Ka thutlukna siam chuan min tihlimin min tichak sawt niin ka hria a, ka mut pawh a tui ve ta deuh e. Nenei erawh ngaihtuah kai loh hram hram ka tum ta mai. A chhan chu ka mipatna pawh hman theih a ni ang em ka hre lo va, lo hman theih tehreng pawh nise, a buaipui tur leh a enkawl tura neih kha a dinhmun ka thlirin chu aia tha chu a phu ka ti. A naute hi chu awm lo nise amah ngau ngaua tihbuai hi chu min hmangaihna avang pawhin ka inthlahrung lo ngam ve mahna. A naute an la tein enkawl ngai takmeuh an ni ve si a, ka huphurh ni miah loin a naute tan lehzela hnawksak ka nih ai chuan, na tak tuar chung pawha kalsan hlen ka duh a ni. Ka putea fanu a nihna anga ena inlaichinna neihpui ka tum tawh mai ang chu. Nupui fanau neih chu ka suangtuahna mitthla atangin a mit ta hmiah a. Ka dam chen chen dam vea ka chhungte tana thil tha tihsak chauh chu ka damchhan ni tain ka hria. 

Ka nu te thlenna leh college ka kal lai pawha ka khawsakna thin ka pute hi ka pu te unau zinga naupang ber an ni a. An ni pawh hian mo an nei fuh bawk a, Aizawl kal changa chhung khatte innghahna ber an ni thin. Ka pu monu chuan a hna kal pahin chaw a rawn dah a. Kan lo inhrawn ve hrep tawh bawk a, hlim hmel pu tak hian,"I chawhmeh duh ber vawksa rep ka siam ania aw. Ei teuh ang che" tiin ka chal a rawn dek a. Ka lo nuih ve ringawt. Awmpui loh theih loh ka ni hi ka inthlahrung. Zun leh ek mahniin ka thiar thei miau si lo va. Nuteii leh ka nu awmpui bak ka duh lo reng a ni. Mi dang chu ka zah ve tlat sia. Nuteii chuan chaw leh chawhmeh chu a dah chhuak a. Ei chakna chu nei lo mah ila, nizan ka thutlukna avangin ka ei lui a, rei tak ka ei tha duh tawh lo kha a nia. Ka rin aiin ka ei tui ta a, Nuteii'n chaw a va lak belh hial. Chutia ka ei ve teuh chu a lawm ve ngang a niang, ka nu a call zui nghal a. Kei tak pawh ka lawmin ka chak sawtin ka inhria. 

Tiang chuan February ni 2-ah damdawiin atang chuan kan chhuak ta a. Ka pute inah chuan kan innghat leh phawt a. Ro an han rel mam mam a. Wheelchair-ah kei chu ka thu tawh a. Ka beidawn laia ka cher kuam leh ka tla dûk erawh a bo deuh tawh. Ka chaw ei a tui chho a, tisen pawh ka nei chho tan viau. Kan chhuah ni thlengin Nenei'n min tawiawm, hnar a harsa. Mahse ka ti laklawh tawh a, ka intipaukhauh thei viau tawh e. Nitin class kal chu ka tan tihngaihna a awm miau loh avangin, ka pa ten kan hotute min biaksak a. Class kal lo va, in lama lo inzir vein, exam ve min dilsak ta a. Kan dinhmun leh ka harsatna hriain kan hotute chuan min phalsak ta hlauh mai. Kan va lawm tak. Thiante nen in luaha khawsa chi ka ni ta si lo, a inthlahrunawm dawn lutuk. Bakah inbual leh inthiarah ber hian. Chuvang chuan ka thiante chu inhuamin kei pawn thlahlel hle mah ila, ka chhuahsan lo thei ta lo. Exam hma chu kan khuaah ka awm thei dawn a. Exam dawnah min zuk hruai mai dawn a ni. An rorelna ang ang chu a tha ka ti mai. Kan thlenna ka puin ka dara beng thak thak chungin,"Buangpui, Pathian a awm a, Hetia nat hlen hi i rilruin tum lo la ka duh. Thil mak hi a thleng ve fo a nia. " a tih chuan rilru a tikalthui hle. Mahse, thil mak beiseia kea kal leh theih erawh ka ngaihtuah zui ngam lo. Ka beisei anga ka awm si loh khan ka na leh dawn si a. Kan thutlukna chu ka nuin Nenei a va hrilh nge ni, kan khuaa kan hawn dawn zanah chuan Zira te nen an rawn leng a. A naute erawh Kimi ten an awmpui a ni maithei. Kimi te pawh khan min rawn kan fo a, anni hi chu an buai em a, an duh ang pawn an rawn lang zing thei lo. Roomah kan pali chuan kan thu thap a. Kei chu khumah ka thu a. 

"I ngaihawm dawn hle mai.." Lukira'n ngui zeta a tih chuan, "Nangni deuh..tihian kan exam zo ang a, mahni kawngah kan kal theuh ang a, kan inhmu leh mai mai tawh awm si lo va" ka ti duah a. Ka hnuk a ulh. Ka zep buai lo mai ang. 

"Aa. I ngaihtuah thui lutuk a nih kha. Aizawl kan kal chang chuan kan inhrilh hre zel ang chu.." zira'n a lo ti vat a. Ka thiante hmelah chuan min khawngaihna bakah min ngainatzia ka hmu tel a, an ni aia thiantha leh rintlak hi ka dam leh zelna turah ka tawng tawhin ka ring lo. 

"Nupui in neih dawnah min hrilh loh chuan in chak lovang" boruak tihzangkhai tumin ka ti hawk a.

"Zira hian a nei hmasa ber ang, MA pawh hi pass se, a haw ka ring lo" Lukira pawh chuan a lo ti vat a. 

"I zak em? Nangmah zawk a nih kha..Lukira hi ka makpa a la ni dawn chu a nia" a tih mek laiin, "I Zak lo, Nuphal alawm ..ve che" Lukira'n a lo ti zauh. Nenei thu ngawi reng, inthlahrung zet chuan ka thinlung a luah ngawih ngawih thung. Han biak mai dan ka hre si lo a ni. Zira'n ka rilru hria niawm takin, "Nenei pawh Hualtu lamah a feh ve tlauh tlauh dawn a ni.." A ti ta zauh a. Ka na zawk mai. 

"A pawi hleinem" a lo ti sep a. Ka en ngam lo. Kan inkar boruak an hre vek bawk a. "Tak taka Lulian,in pahnih inkar hi sawi fel rawh u, mipa i nia, i thutlukna chu kan zahsak ang che. Mahse, inbe leh hrim hrim r'u, kan lo va chhuak rih ang" Lukira'n a ti a. An tho nghal nulh. Chelh tumna ka nei bik lo. Ka va en a, min lo melh ve chiah. Ka lai chhe der mai . 

"Ka dam loh chhung zawngin min lo kan a, ka lawm lutuk ania Nene" ka ti ta a. 

"A ho lutuk.. Chuan, exam dawnah maw i lo chhuk ang?" A ti daih a.

"Aw. aniang, ka pa te sawi dan kha chuan" ka ti a. 

"Chuan" a ti hap a. A ngawi leh daih. Min rawn melh a. Ka melh rei ngam si lo. 

"Min then hlen chu i tum tak tak em ni?" A ti zawi sap a. 

"Ka tih a ngai a ni..i hriat kha' ka ti a. 

" a ngaihna lai tak ka hrethiam lo. U Tri, zak thei lo angah pawh min ngai la pawi ka ti lo. Nangmah ang mipa ka tawng leh tawh awm si lo va ,inthen hlen chu ka theih ka ring lo" a ti a. Thaw a la káwk bawk. 

"I tawng em em ang, kei aia tha leh fel, i hmeltha a, i fel bawk a. Mahse, fimkhur la aw. Mipa hi kan inang vek lo ania. " ka ti duah a. 

"I damchhungin nupui neih i tum lo em ni?" A lo ti halh a. 

"Tum ta lo mai. Nei ringawt ila, fa pawh ka nei thei ang em hriat a ni lo. Bakah nei thei pawh ni ila, nupui leh fate buaipui ngai ka ni reng dawn a." Ka ti a. A chil a lem khawlh. "Mahse, rai ta ila" a ti ta sap a. Ka lo meng phar káwk. Kan mudun ngei a, damdawi a ei miah bawk si lo. Raina chance chu a awm ve tlat si. 

"Ka hre lo. " ka ti ringawt. 

"Aw le, U Tri, mipa i nia, rilru fim takin i inngaihtuah ang tih ka ring. Hetia min hnara min kalsan i duh tlat hi ka lo hrethiam ngai lo va. Mahse, tikhan ka hrethiam chiah e. I fa ka lo pai a nih pawhin ka tobul ang chiah khan pa nei loin a rawn seilian ve mai aniang chu.." A ti ta mai a. Ka che zawk mai. A banah ka va chelh a, ka lamah ka pawt lawp . "I rai em ni?" Ka ti hrâwk a. Ka lungphu chu rang tak a ni. 

"Ka hre lo. Rai lo ila ka duh ngawt mai. A chhan chu a pa hian a duh miau si lo va" a ti fiah kák a. A ban ka hmer na salh, "Ti nge i hriatthiam theih miah loh le? Ka hmangaib che ,ka duh che. Nupui atan pwh ka duh che. Mahse, i nau te leh nangma tan ngei pawha hnawksak leh phurrit nih ka duh lo. Hnathawk thei ka ni lo va, awm tawp ngai, buaipui ngai reng ka nih tawh hi, engtin nge nuamsa taka ka siam theih ang che" ka ti ta tuar tuar a. A ding phat a, mit sen ràm chungin,"Nawmsak chu hlimna a ni em mi? I dinhmun hre vek chungin engkim ka huam a..min hnar tlat a. Aw a tawk e, U Tri, min lo duh tak tak lo zawk a nih hi..ka kal ang, ka kal em em ang. Ka nu anga duhthlan tur dang hre lo va a kawng zawh ang ka lo zawh ta a nih pawhin min dem mgai suh ang che. " a tih rual chuan,"Vanneihsang" ka ti tuar..ka au ring thawkhat bawk a niang. Ka nu a rawn tlan lut vat mai. Kan pahnih chuan min melh tawn a. Nenei lah a tap pur tawh si, kei lah ka sa hulh hulh bawk. 

."eng nge thil awmzia?" Ka nu chuan a ti a. 

Nenei chuan inhnit faih faihin,"Min then a duh em a nih kha.. A duh ang tak chuan ka then ang. " a ti a. A baw hawk nge, a tap chhuak hawk mai. Ka nu chuan a kuah vat a. A chul hliau hliau a. Kei chu min rawn enin, "I ti mah mah a ni. Ani hian a theih ang tawkin a hmangaih che a, nang akara tikhawpa hmangaihtu che chu, engvangin nge i hnar tlat a?" A ti ta bawrh bawrh a. Ka chau, ka zawi. Sawi tur pawh ka hre lo. Mipa rilru pu ve tan lo chuan hriatthiam chi ka ni lo vang. Mahni tawka intipa ve tak, nupui ka neih hunah pawh ka chawm ang, ka nupuiin engmah a thawk lo vang ti ve ngat thin kha nupui thawhchhuahsa rin chu thuhran, a buaipui leh enkawl ngai reng renga a hun khawhralsak chu ka mipa thinlung lian hian rem a ti thei tlat si lo. Hna te chu nei ve ni ila ka danglam mahna. Tunah chuan engmah sawi lawk theih a la ni bawk si lo. Nenei kher lo hmeichhe tlahlang, nu leh pate bula khawsa ni se ka hnar lo zawk maithei. Nenei erawh ka dinhmun khirh dan leh a dinhmun khirh dan a inang reng mai si a. Ka khawngaih em a ni. 

Ka thiante leh ka pa an rawn lut ve leh a. Kan boruak chu ka nu chuan Nenei side deuhin a lo hrilh ve a. Ka ngawi reng ringawt. 

Ka pa chuan Nenei chu ngun zeta melhin," Nene, ka hmuh phat atang che khan hmeichhe fel tak i ni tih ka hre mai. Ka fapa pawh i hmangaih ve tak tak niin ka hre bawk. Mahse, hei i hriat angin Bawiha chu kein a kal thei dawn ta lo chu a nia. Heti chung hian i la neiin i la tuam hlawm duh tho ang maw?" A ti ta a. Boruak a reh dûk mai. 

Nenei chuan zah hmel lek lek hian,"Min nei duh hleinem. Kei chuan amah bak ka duh lo" a ti a. Ka lo thaw hawk ringawt. 

"I la naupang a, ngun takin ngaihtuah la,i naute thlengin..i inchhir leh lo vang maw?" Ka pa chuan a ti lehzel a.

"Ka hre lo le..chu chu.." A ti ringawt a. A awm ve tho. Hmalam hun hriat a ni hleinem.

"Kalsan i duh lo tiraw?" Ka pa bawk chu aw..

"Duh lo" a ti sap a.

Ka pa chuan min rawn melhin, "Bawiha, nang ani hi kalsan i duh tak tak em ni? Dawt tel miah loin min han hrilh teh" a ti leh a. 

"A tana tha tur alawm" pehhel zetin ka lo ti a. 

A aw thian kharhin, "In induh tawh loh vang leh inhmangaih loh vang a ni lo a. Pu Ruata ka han bia a. MA i pass rualin Kan khaw HSS-ah chuan i thawk thei dawn chiang a. I dinhmun avang pawn an duhsak em em zawk che. A hmingin hlawh chhete i nei ve dawn a. Tun tut tutah innei thei inla ni lo, Nenei pawh a la inpeih lo. Mahse, tuna i dam loh sarhu laia hetia rilru hrehawm taka insiam hi a tha ngai lo. Nenei'n a nghah peih chea nang pawn a dinhmun siam chhung i dawhtheih chuan in pahnih inkar tawpna chhan tur ka hre lo ve. Amah Nenei hian kan bula khawsaka nang vawn che a inhuam phawt chuan" a ti ta mai a. Hnial tumin ka ang zuau a, ka nuin min lo khap vat. 

Ka pa chu hnial ka duh. Mahse, a thusawi chu thleng dik se ka duh bawk si. Nenei chu ka va melh a, ani pawn min rawn melh ve chiah. Kan inmelh dun ta ngat ngat a. 

"U Tria'n a pawm chuan ka hnial lo" a ti sap a. A inrintawk hmel hle. Kei a pa zawk hi ka tîm dûi si.. ka pa chuan chiang zetin min rawn melh a, inhumruhin, "Aw amah a inhuamte chuan" ka ti ve ta a. Ka thiante thaw sang sang chu ka hre phak. An lo insangruh ve hle aniang e. Nenei mitmeng pawh a dai raih mai. A inhuamna angin kan kal dawn chu a nia. Eng chin tak thleng ang i maw…

Ka thiante leh Nenei te chu zan dar 10 thleng an leng a. Thingpui te in in, kan titi pawh a zangkhai ta deuh. Nenei erawh a la inthlahrung deuh dûk a, ka lainat leh si. Ka bulah ka thuttir a, a kut ka vawnsak char char. Ka fawp chak si, mi dang an awm ve bawk nen, a beng bulah, "Ka va fawp chak che..min zunpui la" ka ti a. A khi sak a, lai deuhin min rawn melh káwk. 

"nene, min lo zunpui mai aw.." Tiin ka han zi mar a. Min lo chelh vat. Chair-ah chuan min thuttir a, chaw ei a tui ve tho sia, ka rit viauin ka ring. Bathroom-ah min nawt lut a, Kawngka khar turin ka hrilh a. A khar ve mai. Ka kekawr chu ka phelh a. Min lo pui vat. A lo kun lai tak chuan ka lo fawp ta siah a. Thla khat zet kan inkhawih tawh lo va, kan han infawp leh thei ta chu duhthawh a na kher mai. Ani pawh eng teh ual a ni bik lo. Ka lo khawih vir ve hman bawk nen. Bakah zep miah lohin infiah ka duh ve bawk a. Kan han infawh takah chuan ka tawngtai rukna angin mipa ka nihzia a lang ta! Au vak vak mai ka va chak tak. Ka hnukte a ulh lek lek hial mai. Ka zung zo a, kan innawr chhuak leh ta a. Ka hlimna chuan van a chen hial awm e. Pa thei lo niha rilru fim kur si nih ai chuan thih a thlanawm zawk hial awm e..

A tlai ve tawh nen ,kan inmang tha ta a.

."Rinawm rawh aw. Beiseina min siamsak ta sa sa, min phatsan suh aw" tiin ka chah a. 

Mawi zeta nuiin, "I ta chauh ka ni reng ang" a ti sap a. An kal liam thlengin ka thlir zui vawng vawng mai. Ka ngai hle ang...harsatna hian min buan fo tawh lose tiin duhthu ka sam a ni. Buan tlak ka ni tawh mawlh si lo va…

(Sunday a nia, a sei thei lo. 😣